ཟླ་བ་འདིའི་ཕྱི་ཚེས་ ༡༡ ཉིན་ཕ་རན་སིའི་བྱང་ཕྱོགས་ Normandie ཁུལ་གྱི་ Saint léonards ས་གནས་སུ་ཡོད་པའི་རྒྱ་མིའི་ཟ་ཁང་དུ་ལས་ཀ་བྱེད་མཁན་རང་ལོ་ ༣༠ ལ་སོན་པའི་བོད་མི་ཚུལ་ཁྲིམས་ཞེས་པ་ཞིག་ལ་ཟ་ཁང་དེའི་སྦྱིན་བདག་དང་ལས་ཀ་བྱེད་མཁན་རྒྱ་མི་གཉིས་ནས་གྲི་བརྒྱབ་སྟེ་བསད་པའི་ཡིད་སྐྱོའི་གནས་ཚུལ་ཐོན་པ་དང་འབྲེལ། ཁ་སང་ཕྱི་ཚེས་༡༧ རེ་གཟའ་ཉིན་མའི་སྔ་དྲོ་བོད་མི་སྟོང་ཚོ་དུ་མས་ལག་ཏུ་རྒྱ་སེར་མེ་ཏོག་དཀར་པོ་དང་ལྟོས་གོས་དཀར་པོ་གྱོན་ཏེ་འདས་པོ་ཁོང་ལ་ཁྲིམས་མཐུན་དང་དྲང་བདེན་དགོས་ཞེས་པའི་འབོད་ཚིགས་དང་བཅས་པེ་རི་སི་ Paris གྲོང་ཁྱེར་གྱི་ Bastille ཐང་ཆེན་ནས་ République ཐང་ཆེན་བར་མྱ་ངན་ངག་བཅད་ཀྱིས་གོམ་བགྲོད་ལས་འགུལ་གཞི་རྒྱ་ཆེ་བ་ཞིག་སྤེལ་འདུག
ཐེངས་འདིའི་ལས་འགུལ་དེ་བཞིན་ཕ་རན་སི་བོད་རིགས་ཚོགས་པའི་གོ་སྒྲིག་འོག་ས་གནས་སུ་ཡོད་པའི་བོད་མིའི་གཞུང་འབྲེལ་མིན་པའི་ ཚོགས་སྐྱིད་ཁག་མཉམ་རུམ་ཐོག་སྤེལ་བ་ཞིག་ཡིན་པ་དང་། ལས་འགུལ་དེའི་ཐོག་ཕ་རན་སི་བོད་རིགས་ཚོགས་པའི་ཚོགས་གཙོ་སྐར་མ་འཕྲིན་ལས་ལགས་གཙོས་པའི་རྒྱུན་ལས་རྣམ་པ་དང་། ཡུ་རོབ་བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་དང་ཐུབ་བསྟན་རྒྱ་མཚོ་ལགས། སྦེལ་འཇམ་བོད་ཀྱི་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་ས་གནས་དོན་གཅོད་ལས་ཁུངས་ཀྱི་འབྲེལ་མཐུད་པ་རྣམ་རྒྱལ་བསམ་འགྲུབ་ལགས། ས་གནས་བོད་མི་མང་ཚོགས་༧༠༠༠ ལྷག་འདུ་འཛོམས་བྱུང་འདུག ད་རེས་ཀྱི་ལས་འགུལ་དེའི་ཐོག སྦེལ་འཇམ་དང་སུད་སི། དེ་བཞིན་ཕ་རན་སིའི་ཉེ་འཁོར་གྱི་ས་གནས་གཞན་ཁག་ནས་ཀྱང་བོད་མི་མང་པོ་ཞིག་ནས་མཉམ་ཞུགས་གནང་འདུག
ཤེས་རྟོགས་བྱུང་བར་གཞིགས་ན། དེ་རིང་ཕྱི་ཚེས་ ༡༨ ཉིན་སླར་ཡང་བོད་རིགས་ཚོགས་པའི་གོ་སྒྲིག་འོག་མྱ་ངན་ངག་བཅད་ཀྱི་གོམ་གྲོད་ལས་འགུལ་གཞི་རྒྱ་ཆེ་བ་ཞིག་ཀྱང་སྤེལ་གྱི་ཡོད་པ་མ་ཟད། ཕྱི་ཚེས་ ༢༤ ཉིན་བོད་རིགས་ཚོགས་པས་གོ་སྒྲིག་འོག་འདས་པོ་ཁོང་གི་ཆེད་དུ་གཞི་རྒྱ་ཆེ་བའི་གདུང་སེམས་མཉམ་བསྐྱེད་དང་མཆོད་འབུལ་སྨོན་ལམ་ཡང་འཚོགས་རྒྱུ་རེད་འདུག
གཞི་རྩའི་ཕ་རན་སིར་གནས་བཞུགས་བོད་མིའི་ཁྲོད་ནས་བརྒྱ་ཆ་མང་བ་ཞིག་རྒྱའི་ཟ་ཁང་དུ་ལས་ཀ་བྱེད་ཀྱི་ཡོད་པ་དང་ད་ལན་གྱི་དོན་རྐྱེན་དེར་ངོ་རྒོལ་གྱི་ཚུལ་དུ་འདས་པའི་ཉིན་ཤས་ནང་ས་གནས་ཀྱི་བོད་མི་རྣམས་ནས་རྒྱ་མི་ཟ་ཁང་ནང་ལས་མཚམས་བཞག་པའི་གནས་ཚུལ་བྱུང་ཡོད་པ་མ་ཟད། ས་གནས་སུ་ཡོད་པའི་རྒྱ་མི་ཟ་ཁང་ཁག་ཅིག་ལས་མི་མེད་པའི་དབང་གི་གནས་སྐབས་ཟ་ཁང་སྒོ་བརྒྱག་དགོས་པ་ཡང་བྱུང་འདུག
