བཀའ་ཤག་གིས་རྒྱ་གར་གྲོས་ཚོགས་འོག་མའི་ཚོད་དཔག་འཆར་རྩིས་ཚོགས་ཆུང་གི་སྐུ་ཚབ་སྣེ་ལེན་ཞུས་པ། 

རྒྱ་གར་གྲོས་ཚོགས་འོག་མའི་ཚོད་དཔག་འཆར་རྩིས་ཚོགས་ཆུང་གི་སྐུ་ཚབ་ཚོགས་པ་ཞིག་བཞུགས་སྒར་དུ་ཕེབས་འབྱོར་བྱུང་བར་བོད་མིའི་སྒྲིག་འཛུགས་བཀའ་ཤག་གིས་ཕེབས་བསུའི་སྣེ་ལེན་གཟབ་རྒྱས་ཞུས་འདུགབདུན་ཕྲག་སྔོན་མའི་རེས་གཟའ་པ་སངས་ཉིན་བོད་མིའི་སྒྲིག་འཛུགས་བཀའ་ཤག་གིས་བཞུགས་སྒར་དུ་ཆེད་ཕེབས་གནང་བའི་རྒྱ་གར་གྲོས་ཚོགས་འོག་མའི་ཚོད་དཔག་འཆར་རྩིས་ཚོགས་ཆུང་གི་སྐུ་ཚབ་གྲོས་ཚོགས་འཐུས་མི་བརྒྱད་དང་ཁོང་རྣམ་པའི་སྐུ་ཟླ་གཙོ་གྱུར་སྐུ་འཁོར་ལྷན་རྒྱས། དེ་བཞིན་ལས་བྱེད་རྣམ་པར་སྲིད་སྐྱོང་ཚོགས་ཁང་དུ་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་གཟིགས་འབུལ་བརྒྱུད་ཕེབས་བསུའི་སྣེ་ལེན་ཞུས་ཏེ་བོད་མི་མང་སྤྱི་འཐུས་ལྷན་ཚོགས་དང་ལྷན་ཁང་ཁག་ངོ་སྤྲོད་གནང་སླད་གཟིགས་སྐོར་དུ་གདན་འདྲེན་ཞུས་པ་མ་ཟད། སྲིད་སྐྱོང་སྤེན་པ་ཚེ་རིང་གིས་རྒྱ་གར་གྱི་གྲོས་ཚོགས་འཐུས་མི་རྣམ་པར་དྲན་རྟེན་གྱི་ཚུལ་དུ་ཕྱག་རྟགས་རེ་གནང་འདུགསྐབས་དེར་སྲིད་སྐྱོང་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༦༠ ཟླ་ ༥ ཚེས་ ༡ ནས་བཟུང་ད་བར་བཞུགས་སྒར་དྷརྨ་ས་ལར་བཞུགས་བཞག་མཛད་ཡོད་པ་དང་དེ་ནས་འདས་པའི་ལོ་ངོ་ ༦༠ ལྷག་གི་རིང་བོད་མིར་ངལ་བ་ཇི་སྙེད་ཅིག་འཕྲད་པའི་སྐབས་དང་ལྷག་དོན་བོད་མི་རྣམས་རྒྱ་གར་ལ་བཙན་བྱོལ་དུ་འབྱོར་སྐབས་རྒྱ་གར་གྱི་སྲིད་བློན་དམ་པ་ནེཧ་རུ་མཆོག་གིས་དབུ་བཙུགས་པའི་དབུ་ཁྲིད་རིམ་པ་དང་སྲིད་དོན་ཚོགས་པ་ཁག་སོགས་རྒྱ་གར་གཞུང་མང་གཉིས་ནས་ད་བར་བོད་མིར་སྡོད་གནས་སོགས་ཀྱི་མཐུན་འགྱུར་རྒྱ་ཆེ་གནང་ཡོད་པ་མ་ཟད། བོད་དོན་ཐོག་དམིགས་བསལ་ཐུགས་འཁུར་གྱིས་རྒྱབ་སྐྱོར་གནང་དང་གནང་བཞིན་པར་བཀྲིན་ཆེ་ཞེས་གསུངས་པ་དང་ཆབས་ཅིག དེ་བཞིན་ཨ་རིར་མཚོན་ནའང་མང་གཙོ་དང་སྤྱི་མཐུན་ཆབ་སྲིད་ཚོགས་པ་གཉིས་ཐུན་མོང་གིས་བོད་དོན་སླད་རྒྱབ་སྐྱོར་གནང་དང་གནང་བཞིན་ཡོད་པ་དང་། གལ་ཏེ་རྒྱ་གར་དང་ཨ་རི་གཞུང་གིས་དེ་ལྟར་གནང་མེད་ཚེ་བོད་མིའི་གནས་སྟངས་དེ་ད་ལྟ་ནང་བཞིན་ཡོང་དཀའ་བ་ཡིན་པར་གསུངས་འདུགཐེངས་འདིའི་རྒྱ་གར་གྲོས་ཚོགས་འོག་མའི་ཚོད་དཔག་འཆར་རྩིས་ཚོགས་ཆུང་སྣེ་ཁྲིད་གནང་མཁན་གྲོས་ཚོགས་འཐུས་སྐུ་ཞབས་  P.P Chaudhary ལགས་ཀྱིས་༸གོང་ས་ཏཱ་ལའི་བླ་མ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་མི་ཚོས་འདས་པའི་ལོ་ངོ་ ༦༠ ལྷག་གི་རིང་མང་གཙོའི་ལམ་ལུགས་ལྡན་པའི་འཛིན་སྐྱོང་དང་བོད་ཀྱི་རིག་གཞུང་གཅེས་འཛིན་ཐུབ་ཡོད་པ་མ་ཟད། མགོན་པོ་༸གང་ཉིད་མཆོག་གི་འཚེ་མེད་ཞི་བ་དང་བྱམས་བརྩེའི་དགོངས་པ་སོགས་ལ་བརྟེན་ནས་འཛམ་གླིང་ཡོངས་སུ་བོད་དོན་ལ་རྒྱབ་སྐྱོར་གནང་མཁན་ཇེ་མང་དུ་འགྲོ་བཞིན་ཡོད་པར་བསྔགས་བརྗོད་དང་འབྲེལ། རྒྱ་གར་དང་བོད་གཉིས་ཀྱི་དབར་ལོ་རྒྱུས་ཀྱི་འབྲེལ་ལམ་ཙམ་མིན་པར་མང་གཙོ་དང་རིག་གཞུང་གི་འབྲེལ་བ་དམིགས་བསལ་ཅན་དང་གཏིང་ཟབ་ཅིག་ཡོད་པ་སོགས་གསུངས་ཏེ་རྒྱ་གར་གྱིས་ཀྱང་སྔར་བཞིན་བོད་དོན་ལ་རྒྱབ་སྐྱོར་གནང་ངེས་ཡིན་པའི་ཞལ་བཞེས་གནང་འདུགརྩ་བའི་སྐུ་ཞབས་ P.P. Chaudhary ལགས་ཀྱིས་སྣེ་ཁྲིད་པའི་རྒྱ་གར་གྲོས་ཚོགས་འོག་མའི་ཚོད་དཔག་འཆར་རྩིས་ཚོགས་ཆུང་བཞུགས་སྒར་དུ་ཕེབས་དགོས་དོན་གཙོ་བོ་ནི་རྒྱ་གར་དབུས་གཞུང་གིས་དེ་སྔ་ཕྱི་ལོ་ ༢༠༡༦ ནས་ལས་གཞི་བརྒྱ་ལྷག་དབུ་འཛུགས་གནང་ཡོད་པའི་ཁོངས་ནས་ཁག་ཅིག་གྲོང་གསེབ་ཀྱི་གནས་སྟངས་ཡར་རྒྱས་གཏོང་རྒྱུ་སོགས་ཡིན་པ་ལྟར་ད་རེས་ས་གནས་ས་ཐོག་ཏུ་དངོས་སུ་ལས་འཆར་དེ་དག་ལག་བསྟར་ཇི་ཙམ་ཐུབ་ཀྱི་ཡོད་མེད་ལ་གཟིགས་ཞིབ་གནང་སླད་དང་། ལྷག་དོན་དྷརྨ་ས་ལ་དེ་དེང་དུས་ཅན་གྱི་གྲོང་ཁྱེར་འཛུགས་སྐྲུན་ལས་གཞི་དང་འབྲེལ་བའི་ཚོགས་འདུ་འཚོགས་སླད་ཕེབས་པ་ཞིག་ཆགས་ཀྱི་འདུག གཟིགས་ཞིབ་དེའི་ཁྲོད་ཁོང་རྣམས་ནས་དྷ་ཤོད་ Kacheri ཁུལ་དུ་རྟེན་གཞི་བྱས་པའི་གཡུག་རྩེད་སྤོ་ལོའི་རྩེད་ཐང་དང་རྒྱ་གར་གཞུང་གི་འགྲེམས་སྟོན་ཁང་། དེ་བཞིན་ཐེག་ཆེན་ཆོས་གླིང་གཙུག་ལག་ཁང་སོགས་སུའང་གཟིགས་སྐོར་ཕེབས་ཡོད་པ་རེད། གོང་གནས་དང་འབྲེལ་ཡོད་པར་ཁག་གི་བདག་དབང་བོད་མིའི་སྒྲིག་འཛུགས་ལ་ཡོད།