དེའང་ཟླ་ ༡༢ ཚེས་ ༨ ཉིན་དགོང་དྲོ་ཚོུད་ ༦།༠༠ ཙམ་ལ་བོད་མདོ་སྨད་རྨ་ཆུ་རྫོང་ཐོག་ཏུ་བོད་མི་བཀྲིས་རབ་བརྟན་ལགས་རང་ལུས་མེར་སྲེག་གནང་སྐབས་པར་ལེན་གནང་པའི་དོགས་གཞིའི་འོག་བོད་མི་གཞོན་སྐྱེས་གསུམ་འཛིན་བཟུང་བྱས་འདུག
དེ་ཡང་དེ་རིང་འདི་ག་རླུང་འཕྲིན་ཁང་ལ་ཕ་ཡུལ་རྨ་ཆུ་ནས་ཡིན་པའི་ཁྲི་སྲོང་རྡོ་རྗེ་ལགས་ཀྱིས་གནས་ཚུལ་མཁོ་སྤྲོད་གནང་པར། དེ་ཉིན་རང་སྲེག་གནང་སྐབས་པར་ལེན་
གནང་པ་སོགས་ཀྱི་དོགས་གཞིའི་འོག་བོད་མི་གཞོན་སྐྱེད་གསུམ་འཛིན་བཟུང་བྱས་ཡོད་པ་མ་ཟད། ད་ལྟའི་ཆར་ས་གནས་སུ་དམ་དྲག་ཤུགས་ཆེ་བྱེད་བཞིན་ཡོད་སྐོར་གསུངས་སོང་།
ད་ལྟའི་ཆར་བཀྲིས་རབ་བརྟན་ལགས་ཀྱི་སྐུ་ཕུང་ནང་མིར་རྩིས་སྤྲོད་བྱས་ཟིན་ཡོདཔ་དང་། ཁོང་གི་པ་ལགས་དང་ལོ་ ༡༥ ཡིན་པའི་ཁོང་གི་བུ་གཉིས་མུ་མཐུད་བཀག་ཉེར་བྱེད་མུས་ཡིན་པ་ཤེས་རྟོགས་བྱུང་འདུག དེ་མིན་ཁོང་གི་ཨ་མ་ལགས་དང་བུ་མོ། གཉེན་འབྲེལ་འཛིན་བཟུང་བྱེད་པ་རྣམས་ཀྱི་གནས་སྟངས་ཇི་ཆགས་སོགས་ཁ་གསལ་ཤེས་རྟོགས་ཐུབ་ཀྱི་མི་འདུག
གཞི་རྩའི་བོད་མི་བཀྲིས་རབ་བརྟན་ལགས་ནི་རྒྱ་གཞུང་གི་དབྱེ་བའི་ཀན་སུ་ཞིང་ཆེན་ཀན་ལྷོ་ཁུལ། རྨ་ཆུ་རྫོང་ཁྲོ་ཁོ་སྨད་མའི་བྲག་ཐོག་རུ་ཆེན་ནས་ཡིན་པ་དང་། སྤྱི་ལོ་ ༢༠༡༢ ཟླ་ ༣ ཚེས་ ༣ ཉིན་རྨ་ཆུ་རྫོང་ཐོག་ནས་རང་ལུས་མེར་བསྲེགས་རྗེས་སྐུ་གྲོངས་པའི་ཚེ་རིང་སྐྱིད་ལགས་ཀྱི་ཕ་བསོད་ནམས་ཡེ་ཤེས་ཀྱི་ཕུ་བོའི་བུ་བཀྲིས་རབ་བརྟན་ལགས་ཡིན་པ་དང་། འདས་པོ་ཁོང་གི་ཕ་མིང་ལ་བསྟན་འཕེལ་དང་མ་མིང་ལ་སྒྲོལ་དཀར་ཡིན་པ་རེད་འདུག ཁོང་དང་ཁོང་གི་བཟའ་ཟླ་གཉིས་ལ་ཕྲུག་གུ་ལོ་ ༡༥ ཡས་མས་ཀྱི་བུ་ཞིག་དང་བུ་མོ་རྒན་པ་གཅིག་བཅས་ཕྲུག་གུ་གཉིས་ཡོད་པ་རེད་འདུག
