དེ་རིང་། ཕྱི་ལོ་ ༡༩༥༩ ཟླ་ ༣ ཚེས་ ༡༢ ཉིན་བོད་ཀྱི་རྒྱལ་ས་ལྷ་སར་བུད་མེད་སྟོང་ཚོ་བརྒལ་བས་མ་སྐུལ་དང་བླང་ཐོག་རྒྱ་ནག་གི་ཁྲིམས་འགལ་གྱི་བཙན་འཛུལ་ལ་ངོ་རྒོལ་གནང་ནས་མི་ལོ་ ༦༢ འཁོར་བའི་དུས་དྲན་ཡིན་པ་དང་སྦྲགས། བོད་ཀྱི་བུད་མེད་ལྷན་ཚོགས་ཀྱིས་མཉམ་འབྲེལ་རྒྱལ་ཚོགས་ནས་རྒྱ་ནག་ལ་གནོན་ཤུགས་སྤྲད་དེ་༸གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་དགོས་པའི་དགོས་འདུན་ཁག་ཅིག་ཆེད་འདོན་གྱིས་བོད་ཀྱི་བོད་ཀྱི་བུད་མེད་སྒེར་ལངས་ཐེངས་ ༦༢ པ་དེ་སྲུང་བརྩི་ཞུས་གནང་སོང་།
དེ་རིང་སྔ་དྲོ་ཕྱག་ཚོད་ ༩།༣༠ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འཁྲིས་སུ་ཆགས་པའི་རླངས་འཁོར་འབབ་ཚུགས་སུ། སྐུ་མགྲོན་གཙོ་བོ་བོད་ཀྱི་བུད་མེད་ལྷན་ཚོགས་ཀྱི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་དང་། དམིགས་བསལ་སྐུ་མགྲོན་དགེ་བཤེས་མ་བསྟན་འཛིན་ཀུན་གསལ་ལགས་དང་། སྤྱི་འཐུས་སྒྲོལ་མ་ཚེ་རིང་ལགས། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་མང་ཚོགས་འདུ་འཛོམས་ཀྱིས་བུད་མེད་སྒེར་ལངས་ཐེངས་ ༦༢ པ་སྲུང་བརྩི་ཞུས་སོང་། 
སྐབས་དེར་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་སྒྲོལ་མ་དབྱངས་ཅན་ལགས་ཀྱིས་ཡོངས་ཁྱབ་བསྒྲགས་གཏམ་སྒྲོག་སྦྱང་གནང་བའི་ནང་། འདས་ལོར་རྒྱ་ནག་གི་ཉེན་རྟོག་པའི་རྡུང་རྡེག་ཚད་མེད་བཏང་རྐྱེན་འདས་གྲོངས་སུ་གྱུར་བ་ལྷ་མོ་ལགས་དང་། རང་ལུས་མེར་བསྲེགས་གཏོང་མཁན་ཤུར་མོ་ལགས་རྣམ་གཉིས་ཀྱི་གནད་དོན་ལུང་འདྲེན་གྱིས་ཞི་ཅིན་ཕིང་གིས་འགོ་ཁྲིད་འོག་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་སྐོར་གསུངས་པ་མ་ཟད། མཉམ་འབྲེལ་རྒྱལ་ཚོགས་དང་གྲོས་ཚོགས་འཐུས་མི་རྣམ་པ། དེ་བཞིན་རྒྱལ་སྤྱིའི་དབུ་ཁྲིད་རྣམ་པ་དང་། བོད་དོན་རྒྱབ་སྐྱོར་ཚོགས་པ་རྣམས་ནས་རྒྱ་ནག་གཞུང་ལ་གནོད་ཤུགས་སྤྲད་དེ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་དང་། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་དང་ཆབ་སྲིད་བཙོན་པ་ཡོངས་ཆ་རྐྱེན་མེད་པའི་ཐོག་གློད་གྲོལ་གཏོང་དགོས་པ། ༸སྐུའི་ཡང་སྲིད་གཙོས་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ལམ་ལུགས་ལ་རྒྱ་གཞུང་ནས་ཐེ་བྱུས་བྱེད་མི་ཆོག་པ། དེ་བཞིན་བོད་ནང་འགྲོ་བ་མིའི་ཐོབ་ཐང་གི་གནས་སྟངས་གོང་མཐོར་གཏོང་དགོས་པ་བཅས་དགོས་འདུན་ཆེད་འདོན་གྱིས་དེར་རྒྱབ་སྐྱོར་ཡོང་བའི་རེ་སྐུལ་ཞུས་གནང་སོང་།
དེ་བཞིན་སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་མཆོག་གིས། དེ་རིང་གི་དུས་ཚིགས་དང་བསྟུན། བཙན་བྱོལ་ནང་བུད་མེད་ལྷན་ཚོགས་ཆེད་འཛུགས་གནང་དགོས་པའི་དམིགས་ཡུལ་སོགས་འགྲེལ་བརྗོད་ཀྱིས། དེ་རིང་གི་ཉིན་མོ་འདི་ནི་བོད་ཙམ་མིན་པར་སྒོས་སུ་བུད་མེད་ཚོར་ཉིན་མོ་གལ་ཆེན་ཞིག་ཆགས་ཀྱི་ཡོད་སྐོར་གསུངས་སོང་། ཁོང་གིས་ད་དུང་། ང་ཚོའི་དུས་རྒྱུན་ནས་ལས་དོན་གང་འདྲ་ཞིག་གཉེར་ཡང་སོ་སོ་ངོས་ནས་དཔྱད་པ་གནང་དགོས་པ་དང་། དེ་ལྟར་གནང་ཚེ་རྒྱལ་ཁབ་ཅིག་གི་མི་སེར་ཡིན་པའི་ཆ་ནས་ནོར་གྱི་མ་རེད་ཅེས་གསུངས་པ་དང་། མ་ཟད་བོད་མི་རྣམས་ནས་བཟང་སྤྱོད་དང་ཆོལ་གསུམ་བོད་མི་རྡོག་རྩ་གཅིག་སྒྲིལ་གནང་དགོས་པའི་གཞེན་སྐུལ་གནང་སོང་། 
དེ་བཞིན་དམིགས་བསལ་སྐུ་མགྲོན་དགེ་བཤེས་མ་བསྟན་འཛིན་ཀུན་གསལ་ལགས་ཀྱིས། དེ་རིང་བུད་མེད་ཀྱི་དམིགས་བསལ་གྱི་ལས་འགུལ་ཉིན་མོ་དང་སྦྲགས། བུད་མེད་ཀྱི་ཐོག་ནས་སྤྱི་ཚོགས་ལ་ཞབས་འདེགས་ཇི་ལྟར་སྒྲུབ་ཐུབ་མིན་སྐོར་གསུངས་བཤད་གནང་བ་དང་། ཁོང་གིས་འཛམ་གླིང་ཞི་བདེ་བག་ཕེབས་ཡོང་བར་བྱམས་དང་བརྩེ་བ་ངེས་པར་དུ་དགོས་པས། བྱམས་དང་བརྩེ་བའི་ས་བོན་མ་ལུས་ཨ་མ་བརྒྱུད་ནས་བྱུང་གི་ཡོད་སྟབས། བུད་མེད་ཚོས་བྱམས་དང་བརྩེ་བའི་ཐོག་ནས་ཕྲུག་གུ་སྐྱེད་བསྲིང་དགོས་སྐོར་གྱི་གཏམ་བཤད་གནང་སོང་།
ད་རེས་ཀྱི་མཛད་སྒོ་གྲུབ་མཚམས་སུ་མང་ཚོགས་རྣམས་ནས་བོད་ཀྱི་རྒྱལ་དར་མཁའ་རུ་འཕྱར་ཏེ། བོད་ལ་རང་དབང་དགོས། ཆབ་སྲིད་བཙོན་པ་རྣམས་ཆ་རྐྱེན་མེད་པའི་ཐོག་གློད་བཀྲོལ་དགོས་པའི་འབོད་ཚིག་བསྒྲགས་པའི་ཐོག་རླངས་འཁོར་འབབ་ཚུགས་ནས་དྷ་ཤོད་ཀ་ཅ་རཱིའི་མདུན་ཐང་གི་བར་དུ་གོམ་བགྲོད་གནང་སོང་།
རྩ་བའི་བུད་མེད་སྒེར་ལངས་ཀྱི་ཉིན་མོ་དེ་ནི་བོད་མིའི་སྒེར་ལངས་བྱུང་བའི་ཉིན་མོའི་རྗེས་ཏེ། ཕྱི་ཟླ་གསུམ་པའི་ཚེས་༡༢ཉིན་ཕོ་བྲང་པོ་ཏ་ལའི་མདུན་གྱི་འབྲས་བུ་གཡུལ་ཁའི་ཐང་དུ་རྒྱལ་གཅེས་དཔའ་མོ་གུར་སྟེང་ཀུན་བཟང་ལགས་དང་། དགའ་གླིང་ཤར་ཆོས་ལགས། སྤེལ་གོང་སྤེན་པ་སྒྲོལ་མ་ལགས་སོགས་ཀྱི་སྣེ་ཁྲིད་འོག་བུད་མེད་ཕོན་ཆེར་འདུ་འཛོམས་ཀྱིས་རྒྱ་ནག་གཞུང་གི་དྲག་པོའི་དབང་བསྒྱུར་ལ་ཞི་རྒོལ་བྱས་པའི་དུས་དྲན་གྱི་ཉིན་མོ་དེ་ཆགས་ཀྱི་ཡོད་པ་རེད། དུས་ཚིགས་དེ་བསྟུན་གྱིས། བཙན་བྱོལ་ཡུལ་གྲུ་ཁག་ཏུ་གནས་བཞུགས་བོད་མི་མང་ཚོགས་ནས་ལས་འགུལ་སྣ་མིན་སྒོ་ནས་ཉིན་མོ་དེ་དྲན་གསོ་ཞུ་བཞིན་ཡོད་པ་རེད།
