རྒྱ་ནག་གཞུང་གིས་བོད་མངའ་རིས་ས་ཁུལ་མཚོ་ཆེན་རྫོང་ནས་ཡིན་པའི་བོད་མི་བསམ་གཏན་ལགས་ཞུ་བ་ཞིག་ལ་གསང་བའི་སྒོ་ནས་ལོ་གསུམ་བཙོན་འཇུག་གི་ཁྲིམས་ཐག་བཅད་ཡོད་པ་དང་ཁོང་གི་གཅུང་མོར་གཅར་རྡུང་ཚད་མེད་བཏང་སྟེ་ད་ཆ་ཁུལ་དེའི་སྨན་ཁང་དུ་བསྐྱལ་ཡོད་པ་རེད་འདུག
དེ་ཡང་ཁ་སང་དུས་བབ་གསར་ཁང་གིས་དེ་འབྲེལ་གནས་ཚུལ་སྤེལ་བར་གཞིགས་ན། ཟླ་འདིའི་ཕྱི་ཚེས་ ༢ ཉིན་བོད་མངའ་རིས་ས་ཁུལ་མཚོ་ཆེན་རྫོང་ནས་རང་ལོ་ ༣༦ ཡིན་པའི་བོད་མི་བསམ་གཏན་ལགས་སུ་རྒྱ་ནག་གཞུང་གིས་གསང་བའི་ཁྲིམས་ཐག་བཅད་ཡོད་པ་དང་། ཁྲིམས་བཅད་དེ་ནི་ཁོང་རྒྱ་གཞུང་གིས་འཛིན་བཟུང་བྱས་ནས་ཟླ་གསུམ་ལྷག་ཕྱིན་རྗེས་སུ་གཞི་ནས་ཐག་གཅོད་བྱུང་བ་ཞིག་ཡིན་པ་དང་། ཁྲིམས་ཐག་དེ་བཞིན་བཅད་དགོས་དོན་ཐད་ད་ཆ་གསལ་ཁ་མེད་ཅིང་། ད་ལྟའི་ཆར་ཁོང་གང་དུ་བཙོན་འཇུག་བྱས་ཡོད་མེད་དང་། གཟུགས་གཞིའི་གནས་སྟངས་གང་འདྲ་ཡོད་མིན་ཐད་ཤེས་རྟོགས་མ་ཐུབ་པར་ལྷག་ཡོད་པ་རེད་འདུག
མ་ཟད་ཁོང་ལ་གསང་བའི་ཁྲིམས་ཐག་བཅད་རྗེས་སུ། ཁོང་གི་གཅུང་མོ་དཔལ་སྒྲོན་ལགས་ཀྱིས་མཚོ་ཆེན་རྫོང་ཉེན་རྟོག་ཁང་དུ་ཕྱིན་ནས་བསམ་གཏན་ལགས་འཛིན་བཟུང་དང་ གསང་བའི་ཁྲིམས་ཐག་གཅོད་དགོས་དོན་གང་ཡིན་མིན་ཐད་གསལ་པོ་བཟོ་དགོས་པའི་རེ་སྐུལ་ཞུས་པར། ཉེན་རྟོག་པས་དཔལ་སྒྲོན་ལགས་ལ་གཅར་རྡུང་འཚབ་ཆེ་བཏང་སྟེ་ད་ཆ་ཁོང་མཚོ་ཆེན་རྫོང་ཟེར་བའི་སྨན་ཁང་དུ་བསྐྱལ་ནས་སྨན་བཅོས་བྱེད་བཞིན་ཡོད་པ་རེད་འདུག
