ཟླ་བ་འདིའི་ཕྱི་ཚེས་ ༥ ཉིན་ཁེ་ན་ཌའི་གངས་ལྗོངས་ཆོས་ལྡན་གླིང་བོད་ཀྱི་རིག་གཞུང་བསྟི་གནས་ཁང་དུ་སྐུ་ཞབས་ Enes Kanter Freedom གདན་ཞུ་ཕུལ་ཏེ་བོད་རིགས་མང་ཚོགས་དང་ཐུག་འཕྲད་གནང་ཡོད།
ཁ་སྔོན་རེས་གཟའ་ཉི་མའི་ཉིན་ཨོན་ཊ་རི་ཡོ་བོད་རིགས་སྤྱི་མཐུན་ཚོགས་པ་དང་ས་གནས་བོད་ཀྱི་གཞོན་ནུ་ལྷན་ཚོགས། ས་གནས་བོད་ཀྱི་བུད་མེད་ལྷན་ཚོགས། ཁེ་ན་ཌ་མདོ་ཁམས་ཆུ་བཞི་སྒང་དྲུག བོད་རང་བཙན་སློབ་ཕྲུག་མཐུན་ཚོགས་བཅས་ས་གནས་བོད་རིགས་ཚོགས་པ་ལྔས་ཐུན་མོང་གིས་གོ་སྒྲིག་འོག་སྐུ་ཞབས་ Freedom ལགས་ཁེ་ན་ཌའི་གངས་ལྗོངས་ཆོས་ལྡན་གླིང་བོད་ཀྱི་རིག་གཞུང་བསྟི་གནས་ཁང་དུ་གདན་འདྲེན་ཞུས་ཏེ་མི་མང་རྣམས་ནས་ཁོང་ལ་ཕེབས་བསུའི་སྣེ་ལེན་གཟབ་རྒྱས་ཞུས་སོང་།
ཁོང་ནས་ད་བར་བོད་དོན་ཐོག་ཚད་མཐོའི་རྒྱབ་སྐྱོར་གནང་བར་ཡི་རང་བསྔགས་བརྗོད་དང་མུ་མཐུད་རྒྱབ་སྐྱོར་ཡོང་བའི་འབོད་སྐུལ་ཞུ་ཆེད་ལེགས་གསོལ་མཛད་སྒོ་ཞིག་ཚོགས་ཡོད་པ་རེད།
མཛད་སྒོའི་ཐོག་ཨོན་ཊ་རི་ཡོ་བོད་རིགས་སྤྱི་མཐུན་ཚོགས་པ་དང་གངས་ལྗོངས་ཆོས་ལྡན་གླིང་གི་ཚོགས་གཙོ་སྐལ་བཟང་ཕུན་ཚོགས་ལགས་ཀྱིས་བོད་ཀྱི་ཉག་ཕྲ་བའི་གནས་སྟངས་ངོ་སྤྲོད་དང་། སྐུ་ཞབས་ Freedom ལགས་ཀྱི་སྙིང་སྟོབས་ལ་བསྔགས་བརྗོད་ཞུས་པའི་ཐོག་ནས་མཛད་སྒོ་དངོས་སུ་དབུ་འཛུགས་གནང་ཡོད།
སྐབས་དེར་སྐུ་ཞབས་ Freedom ལགས་ཀྱིས་ཁོང་ཆུང་དུས་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་རྣམས་ལ་ཡིད་སྨོན་དང་། དགའ་མོས་ཧ་ཅང་ཆེན་པོ་ཞུས་དང་ཞུ་བཞིན་ཡོད་ཅེས་གསུངས་པ་མ་ཟད། འཛམ་གླིང་གི་འགོ་ཁྲིད་རྣམ་པས་མགོན་པོ་༸གང་ཉིད་མཆོག་གི་བཀའ་ལ་སློབ་གཉེར་དང་གསན་བསམ་གནང་དགོས་སྐོར་གསུངས་འདུག་ལ། ཁོང་གིས་བོད་དང་ཤིན་ཅང་། ཐེ་ཝན། ཧོང་ཀོང་། ནང་སོག་རྣམས་ཆིག་སྒྲིལ་གྱིས་རྒྱ་དམར་གཞུང་ལ་ཁ་གཏད་གཅོག་དགོས་ཞེས་སོགས་གསུངས་ཡོད།
ཕྱི་ཚེས་ ༦ ཉིན་ཁོང་གིས་འཕྲུལ་སྒྲ་ཐོག་བོད་མི་རིགས་རྣམས་བློ་སྟོབས་གོང་འཕེལ་དང་རེ་བ་ནམ་ཡང་མ་བརླག་ཞེས་གསུངས་ཡོད་པ་རེད།
དེ་བཞིན་དེ་རིང་ཁོང་གིས་ཁེ་ན་ཌའི་གསར་ཁང་ CBC ནང་བཅར་འདྲི་དང་ལེན་སྐབས་རྒྱ་ནག་གཞུང་གི་འགྲོ་བ་མིའི་ཐོབ་ཐང་རྡོག་རོལ་དང་འབྲེལ་ནས་སྐྱོན་བརྗོད་ཁག་གཅིག་གནང་སྟེ་བོད་དོན་སྐོར་གླེང་སློང་གནང་ཡོད།
གཞི་རྩའི་ཁ་སྔོན་སྐུ་ཞབས་ Enes Kantre Freedom ལགས་ཁེ་ན་ཌའི་བོད་རིགས་མང་ཚོགས་དང་ཐུག་འཕྲད་གནང་བ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྲུང་བརྩི་ཆེད་ཕྱི་ཟླ་ ༧ ཚེས་ ༩ ཉིན་ཁོང་ས་གནས་སུ་༸སྐུའི་འཁྲུངས་སྐར་སྲུང་བརྩི་སྐབས་ཕེབས་རྒྱུར་ཞལ་བཞེས་གནང་ཡོད་པ་དང་། དེ་བཞིན་ཁེ་ན་ཌའི་གྲོས་ཚོགས་གོང་མའི་འཐུས་མི་ Leo Housakos ལགས་དང་མཇལ་འཕྲད་ཀྱིས་རྒྱ་ནག་ནང་ལ་འགྲོ་བ་མིའི་ཐོབ་ཐང་ཞན་སྐོར་དང་འབྲེལ་ནས་སྐྱོན་བརྗོད་ནན་པོ་གནང་ཡོད་པ་ Conservative Party རྙིང་ཞེན་ཚོགས་པའི་དྲ་ཚིགས་ནང་བཀོད་འདུག
