དེ་རིང་ཟླ་ ༦ ཚེས་ ༢༦ ཉིན་མོ་འདི་ནི་རྒྱལ་སྤྱིའི་མཉམ་འབྲེལ་རྒྱལ་ཚོགས་ནས་གཏན་འབེབས་གནང་བའི་ International Day in Support of Victims of Torture འམ་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ཡིན་པ་དང་བསྟུན། བཞུགས་སྒར་དུ་རྟེན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པས་དྷ་སྟེང་བོད་ཁྱིམ་སློབ་གྲྭའི་ཚོགས་ཁང་དུ་རྨི་ལམ་གྱི་ཡོལ་བ་ཞེས་པའི་བརྗོད་གཞིའི་ཐོག་མནར་གཅོད་དང་འབྲེལ་བའི་རི་མོ་བྲིས་འགྲེམས་བརྒྱུད་སྲུང་བརྩི་ཞུས་སོང་།
ལས་རིམ་ཐོག་གཙོ་བོ་དྷ་སྟེང་བོད་ཁྱིམ་སློབ་གྲྭའི་འཛིན་རིམ་བདུན་པའི་སློམ་མ་ཡོངས་ནས་མཉམ་ཞུགས་གནང་ཡོད་པ་དང་། སྐབས་དེར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་རྒྱུན་ལས་བསོད་ནམས་རྡོ་རྗེ་ལགས་ནས་དེ་རིང་གི་ཉིན་མོ་སྲུང་བརྩི་དང་འབྲེལ་བའི་གསར་འགོད་བསྒྲགས་གཏམ་སྙན་སྒྲོན་གནང་བའི་བརྒྱུད་བོད་ཀྱི་མདོ་དབུས་ཁམས་གསུམ་གྱི་ས་གནས་གང་སར་རྒྱ་གཞུང་ནས་དམག་མི་བཀྲམ་པ་དང་། གསང་བའི་པར་ཆས་བཙུགས་ཏེ་བོད་མིའི་འགྲོ་སྡོད་སྤྱོད་གསུམ་ལ་སོ་ལྟ་བྱས་པ་དང་། བོད་ཀྱི་དགོན་སྡེ་དང་གཞི་རིམ་གྲོང་གསེབ་ཁག་ཏུ་རྒྱ་གཞུང་གི་ལས་དོན་ཚོགས་ཆུང་ཟེར་བ་ཆེད་བཙུགས་ཀྱིས་བོད་མི་ཞི་རྒོལ་བ་རྣམས་བཙོན་འཇུག་མུ་མཐུད་བྱེད་བཞིན་པ་སོགས་འགྲེལ་བརྗོད་དང་སྦྲགས། རྒྱ་གཞུང་གི་བཙན་གནོན་དང་སྡུག་རྩུབ་འོག་འདས་གྲོངས་སུ་ཕྱིན་པ་དང་འདི་བཞིན་ད་ལྟ་མུ་མཐུད་ནས་མནར་གཅོད་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་དང་། ལྷག་དོན་མནར་གཅོད་མྱོང་བཞིན་པ་རྣམས་མུན་ནག་གི་བཙོན་ཁང་ནས་གྲོལ་ཏེ་རང་དབང་གི་མཁའ་དབུགས་རྔུབ་ལེན་ཐུབ་པའི་རེ་སྨོན་ཞུ་བཞིན་ཡོད་པ་གསུངས་ཡོད།
བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་དེང་སྐབས་འཛམ་བུ་གླིང་འདིའི་ཐོག་མནར་གཅོད་དང་སྡུག་རྩུབ་མྱོང་བཞིན་པའི་གྲངས་འབོར་སྔར་ལྷག་མང་དུ་འགྲོ་བཞིན་ཡོད་པ་དང་། ལྷག་པར་དུ་མི་རིགས་དབྱེ་འབྱེད་དང་ཆོས་ལུགས་དབྱེ་འབྱེད། ཕོ་མོ་དབྱེ་འབྱེད། སྐད་ཡིག་དབྱེ་འབྱེད་སོགས་ཀྱི་གནས་ཚུལ་ལའང་ཛ་དྲག་ཏུ་འགྲོ་བཞིན་ཡོད་སྟབས། ཚང་མས་དེ་རིང་གི་ཉིན་མོ་འདི་བཞིན་འཆར་ཅན་ཙམ་མ་ཡིན་པར་འཛམ་གླིང་འདི་བཙན་གནོན་དང་མནར་གཅོད་མེད་པའི་འཛམ་གླིང་ཞིག་ཆགས་ཐབས་སུ་འབད་བརྩོན་དང་དམ་བཅའ་གསར་པ་ཞིག་འཇོག་དགོས་གལ་ཡིན་པ་གསུངས་ཡོད།
དེ་བཞིན་སྐབས་དེར་འཛིན་རིམ་བདུན་པའི་སློབ་མ་རྣམས་ནས་རང་ཉིད་ཀྱི་འཆར་སྣང་ཐོག་རས་གཞི་དཀར་པོའི་སྟེང་དུ་རྨི་ལམ་གྱི་ཡོལ་བ་ཞེས་པའི་བརྗོད་གཞིའི་ཐད་རྒྱ་གཞུང་གི་སྲིད་བྱུས་འོག་བོད་མི་རྣམས་མི་སྤྱོད་ལས་འདས་པའི་མནར་གཅོད་མྱོང་སྟངས་དང་འབྲེལ་བའི་བཙོན་ཁང་གི་གནས་སྟངས་དང་། མེ་མདའ། དེ་བཞིན་བོད་ཀྱི་རྒྱལ་དར་དང་བོད་རྒྱའི་དབར་ལག་པ་གཏོང་བཞིན་པ་སོགས་རི་མོ་མི་འདྲ་བ་ལྔ་བཅུ་ལྷག་བྲིས་ནས་འགྲེམས་སྟོན་གནང་ཡོད་པ་རེད།
བོད་ཀྱི་དགུ་བཅུ་གསུམ་ལས་འགུལ་ཚོགས་པས་སློབ་ཕྲུག་དེ་དག་ལ་བོད་མིའི་ཆབ་སྲིད་བཙོན་པའི་ལོ་རྒྱུས་དང་རང་ལུས་མེར་སྲེག་དང་འབྲེལ་བའི་བརྙན་ཐུང་ཞིག་ཀྱང་གཟིགས་འབུལ་ཞུས་ཡོད་སྟབས། སྐབས་དེར་སློབ་མ་ཁག་ཅིག་ནས་རང་སྲེག་ལས་གཞན་པའི་ཤེས་ཡོན་རང་གི་ཐོག་ནས་བོད་ཀྱི་བདེན་དོན་གསལ་ཐབས་གནང་དགོས་གལ་ཡིན་པའི་དགོངས་འཆར་ཕུལ་སོང་།
