དེ་སྔ་ཕྱི་ལོ་ ༡༩༨༧ ལོར་ཟླ་ ༩ ཚེས་ ༢༧ ཉིན་བོད་ཀྱི་རྒྱལ་ས་ལྷ་སར་འབྲས་སྤུངས་དགོན་པའི་དགེ་འདུན་པ་ཞལ་གྲངས་ ༢༡ གིས་སྣེ་ཁྲིད་འོག་བོད་མི་ཚོས་རྒྱ་གཞུང་གི་དབང་སྒྱུར་ལ་ཞི་རྒོལ་གནང་ནས་ལོ་ངོ་ ༣༤ འཁོར་བ་དང་བསྟུན་བྱེས་བཞུགས་བོད་མི་རྣམས་ཀྱིས་མཉམ་འབྲེལ་རྒྱལ་ཚོགས་དང་རྒྱ་ནག་གཞུང་ཚབ་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་ཏེ་ཉིན་མོ་དེ་རྗེས་དྲན་ཞུས་འདུག
ཁ་སང་ནིའུ་ཡོག་དང་ནིའུ་ཇར་སི་ས་གནས་གཞོན་ནུ་ཚོགས་པས་གོ་སྒྲིག་གནང་སྟེ་བོད་མི་རྣམས་ཀྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༨ འཚོགས་བཞིན་པ་དང་བསྟུན་ཁུལ་དེར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དང་རྒྱ་ནག་གཞུང་ཚབ་ཁང་བཅས་སོ་སོའི་མདུན་དུ་བོད་ཀྱི་རྒྱལ་དར་བསྒྲེངས་ནས་རྒྱ་གཞུང་གིས་བོད་མིའི་ཐོག་དྲག་གནོན་གྱི་བྱ་སྤྱོད་མཚམས་འཇོག་དང་བོད་ལ་རང་དབང་དགོས་ཞེས་སོགས་ཀྱི་འབོད་ཚིག་སྤྱོས་ནས་ངོ་རྒོལ་སྐད་འབོད་གནང་འདུག
སྐབས་དེར་ས་གནས་གཞོན་ནུ་ལྷན་ཚོགས་ཀྱི་སྒྲིག་འཛུགས་འགན་འཛིན་བསོད་ནམས་ནོར་བུ་ལགས་ཀྱིས་རྒྱལ་ཚོགས་ཀྱི་ལས་ཁུངས་མདུན་དུ་དགུ་པའི་ཉེར་བདུན་གྱི་ཉིན་མོ་རྗེས་དྲན་དང་སྦྲགས་ཏེ་དེ་སྔ་༡༩༨༧ ལོར་བོད་ནང་གཞི་རྒྱ་ཆེ་བའི་ལས་འགུལ་སྤེལ་བ་དེ་ནི་ཕྱི་ལོ་ ༡༩༥༩ ཟླ་ ༣ ཚེས་ ༡༠ རྗེས་སུ་མང་ཚོགས་ཀྱིས་སླར་གཞི་རྒྱ་ཆེ་བའི་ལས་འགུལ་སྤེལ་བ་ཐོག་མ་དེ་ཆགས་ཀྱི་ཡོད་པ་དང་། ཉིན་མོ་དེར་རྒྱ་གཞུང་གིས་བོད་མིའི་ཐོག་དྲག་གནོན་བྱས་ཏེ་བོད་མི་ཕོན་ཆེ་ཞིག་གི་ཚེ་སྲོག་ཤོར་བ་དང་འཛིན་བཟུང་། བཙོན་འཇུག་ཁྲིམས་ཐག་བཅད་པ་སོགས་ཀྱི་གནས་ཚུལ་ཞིབ་རྒྱས་ངོ་སྤྲོད་གནང་སྟེ་ཐེངས་འདིའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐོག་བོད་དོན་གླེང་དགོས་པའི་རེ་སྐུལ་གནང་བ་དང་། དེ་རྗེས་བོད་མི་དང་བོད་དོན་རྒྱབ་སྐྱོར་བ་རྣམས་རྒྱ་ནག་གཞུང་ཚབ་ལས་ཁུངས་ཀྱི་མདུན་དུ་འདུ་འཛོམས་ཀྱིས་རྒྱ་ནག་དམར་ཤོག་གཞུང་མི་དགོས། བོད་ཀྱི་བདག་པོ་བོད་མི་ཡིན། ང་ཚོར་རང་དབང་དགོས་སོགས་ཀྱི་འཕྲེད་དར་བསྣམས་ནས་གཞི་རྒྱ་ཆེ་བའི་ངོ་རྒོལ་སྐད་འབོད་ཀྱི་ལས་འགུལ་སྤེལ་གནང་འདུག
གཞི་རྩའི་སྤྱི་ལོ་ ༡༩༨༧ ཟླ་ ༩ ཚེས་ ༢༧ ཉིན་བོད་ཀྱི་རྒྱལ་ས་ལྷ་སར་ལྷག་བསམ་དང་སྙིང་སྟོབས་ཅན་གྱི་འབྲས་སྤུངས་དགོན་པའི་དགེ་འདུན་པ་ཉེར་གཅིག་གིས་རྒྱ་གཞུང་གིས་བོད་དབང་སྒྱུར་ལ་ངོ་རྒོལ་ཁྲོམ་སྐོར་གྱི་ལས་འགུལ་སྤེལ་བ་དེ་ནི་གསུམ་བཅུའི་དུས་དྲན་རྗེས་ཀྱི་ལས་འགུལ་གཞི་རྒྱ་ཆེ་བ་ཐོག་མ་དེ་ཆགས་ཀྱི་ཡོད་པ་དང་། སྐབས་དེར་ལས་འགུལ་བ་ཚོས་རྒྱ་མི་བོད་ནས་ཕར་རྒྱུག། བོད་རང་བཙན་ཡིན་ཞེས་སྐད་འབོད་གནང་བར་བརྟེན་རྒྱ་ནག་གིས་ལས་འགུལ་བར་དྲག་གནོན་དང་བཙོན་འཇུག་བྱས་ཡོད། བྱེས་བཞུགས་བོད་མི་རྣམས་ཀྱིས་ཉིན་མོ་དེར་ཞི་རྒོལ་སྐད་འབོད་དང་སྐབས་དེ་དུས་ཀྱི་པར་རིས་འགྲེམས་སྟོན་གནང་བ་སོགས་རྣམ་པ་འདྲ་མིན་སྒོ་ནས་དགུ་པའི་ཉེར་བདུན་ཉིན་གྱི་ལོ་རྒྱུས་རང་བཞིན་གྱི་དོན་སྙིང་ལྡན་པའི་འཐབ་རྩོད་དེར་དྲན་གསོ་ཞུས་ཡོད་པ་རེད།
དེའི་ཁྲོད་ཁ་སང་བོད་ཀྱི་དགུ་བཅུ་གསུམ་ལས་འགུལ་ཚོགས་པས་ངོ་དེབ་བརྒྱུད་དགུ་པའི་ཉེར་བདུན་གྱི་ཉིན་མོ་རྗེས་དྲན་དང་དེ་བཞིན་ཚོགས་པ་དེ་ཉིད་བཙུགས་ནས་མི་ལོ་ ༣༠ ཧྲིལ་པོ་འཁོར་བའི་དུས་དྲན་གཉིས་འཛོམས་དང་བསྟུན་ནས་ཕྱི་དྲོ་ཕྱག་ཚོད་ ༥ ཐོག་ཚོགས་པའི་ཚོགས་གཙོ་ཟུར་པ་དང་པོ་སེར་སྨད་འོད་ཟེར་སྤྲུལ་སྐུ་རིན་པོ་ཆེ་མཆོག་དང་སྐབས་གཉིས་པའི་དྲུང་ཆེ་ཟུར་པ་སྒོ་པེ་ངག་དབང་སྟོབས་ཆེན་ལགས་རྣམ་གཉིས་ཆེད་འབོད་ཐོག་ནས་དགུ་པའི་ཉེར་བདུན་སྐབས་ཀྱི་སྙིང་སྟོབས་ཆེན་པོ་ཁག་ལ་དྲན་གསོ་དང་སྒོས་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་འདས་མ་ད་གསུམ་གྱི་གནས་བབ་ཐད་བགྲོ་གླེང་ཞིག་གོ་སྒྲིག་གནང་བ་བརྒྱུད་དགུ་པའི་ཉེར་བདུན་སྐབས་ཀྱི་འདས་སོན་གྱི་དཔའ་བོ་དཔའ་མོ་རྣམས་ལ་ལྷག་བསམ་རྣམ་པར་དག་པའི་སྒོ་ནས་རྗེས་དྲན་ཞུས་ཏེ་ཁོང་རྣམ་པའི་རླབས་ཆེན་དགོངས་འདུན་མྱུར་དུ་གྲུབ་ནས་བོད་གཞིས་བྱེས་མཉམ་འཛོམས་ཀྱི་བདེ་སྐྱིད་ཉི་མ་ཤར་ཏེ། ༸གོང་ས་༸སྐྱབས་མགོན་མཆོག་ཕོ་བྲང་པོ་ཏ་ལར་༸ཞབས་སོར་བདེ་བར་འཁོད་གནང་ཡོང་བའི་སྨོན་འདུན་ཞུས་ཡོད་པ་རེད།
