རྒྱ་གར་གཞུང་གིས་ཏོག་དབྱིབས་གཉན་རིམས་སྔོན་འགོག་གི་སྨན་ཁབ་བརྒྱག་རྒྱུ་གྲ་སྒྲིག་གནང་བཞིན་པའི་ཁྲོད་འདིར་ཨོ་སི་ཊི་རི་ཡའི་ Austria བོད་རིགས་ཚོགས་པ་དང་སུད་སི་ནས་ཡིན་པའི་ཆོས་སྐྱིད་ལགས་ཀྱིས་བཙན་བྱོལ་ནང་གི་བོད་མི་དགོས་ངེས་ཅན་ཚོར་ཏོག་དབྱིབས་གཉན་རིམས་སྔོན་འགོག་སྨན་ཁབ་ཆེད་ཡུ་སྒོར་ ༤༢༢༡ ལྷག་ཞལ་འདེབས་གནང་འདུག
དེང་སྐབས་འཛམ་གླིང་ཁྱོན་དུ་ཏོག་དབྱིབས་གཉན་རིམས་ཀྱི་དཀའ་ངལ་ཆེན་པོ་འཕྲད་བཞིན་པའི་དུས་སྐབས་སུ་ཕྱིའི་རྒྱལ་ཁབ་ཁག་ཏུ་དེ་འབྲེལ་གཉན་རིམས་ཀྱི་སྔོན་ཁབ་དེ་སྤྱོད་འགོ་ཚུགས་ཡོད་པའི་ཁྲོད་རྒྱ་གར་ནང་དུའང་དེ་འབྲེལ་སྔོན་འགོག་སྨན་ཁབ་བརྒྱག་རྒྱུ་གྲ་སྒྲིག་དང་འབྲེལ་བདུན་ཕྲག་འདིའི་རེས་གཟའ་ཉི་མའི་ཉིན་སྨན་ཁབ་དེ་སྤྱོད་རྒྱུ་ཡིན་པ་ལྟར། དེ་རིང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་དེ་འབྲེལ་གནས་ཚུལ་སྤེལ་བར་གཞིགས་ན། ཉེ་ལམ་ཨོ་སི་ཊི་རི་ཡའི་བོད་རིགས་ཚོགས་པས་རྒྱ་གར་ནང་ཡོད་པའི་བོད་མི་དགོས་ངེས་ཅན་ཚོར་དམིགས་ཏེ་ཏོག་དབྱིབས་གཉན་རིམས་སྔོན་འགོག་སྨན་ཁབ་ཀྱི་མཐུན་འགྱུར་རོགས་རམ་ཆེད་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ལ་ཡུ་སྒོར་ ༣༢༩༨།༠༠ ཞལ་འདེབས་ཕུལ་ཡོད་པ་དང་དེ་བཞིན་སུད་སི་ནས་ཡིན་པའི་ཆོས་སྐྱིད་ལགས་ཀྱིས་སུད་སི་སྒོར་ ༡༠༠༠།༠༠ ཐམ་པ་ཕུལ་ཡོད་པ་བཀོད་འདུག
རྩ་བའི་རྒྱ་གར་ནང་ཏོག་དབྱིབས་གཉན་རིམས་སྔོན་ཁབ་གྲ་སྒྲིག་དང་འབྲེལ་བདུན་ཕྲག་འདིའི་རེས་གཟའ་ཉི་མའི་ཉིན་ཆེས་ཐོག་མ་སྔོན་ཁབ་དེ་སྤྱོད་རྒྱུ་ཡིན་པ་ལྟར། རྒྱ་གར་གཞུང་གིས་བོད་མིར་སྔོན་ཁབ་ཀྱི་མཐུན་རྐྱེན་གནང་རྒྱུར་ཐེ་ཚོམ་མེད་ཅེས་གསུངས་ཡོད་པ་མ་ཟད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་ཀྱང་ས་གནས་རྫོང་གི་སྨན་ཁང་ལ་ཟླ་བ་སྔོན་མའི་ཚེས་ ༡༥ ཉིན་སྙན་ཞུ་ཕུལ་ཟིན་པ་ཆགས་ཀྱི་འདུག
རྒྱ་གར་གཞུང་གིས་བདེ་ལེགས་སྨན་ཁང་དེ་སྔོན་ཁབ་བརྒྱག་རྒྱུའི་ས་ཚིགས་སུ་ངོས་འཛིན་གནང་ཡོད་ཀྱང་ད་ལྟའི་ཆར་སྔོན་ཁབ་དངོས་སུ་འགོད་འགྲེམས་གནང་རྒྱུའི་དུས་ཚོད་ནམ་ཡིན་གསལ་པོ་མེད་པ་རེད། འོན་ཀྱང་སྔོན་ཁབ་ཀྱི་རིམ་པ་དང་པོ་འདི་བདེ་ལེགས་སྨན་ཁང་གི་སྨན་པ་དང་སྨན་ཞབས་པ། རིམ་པ་གཉིས་པར་ལོ་ན་ ༥༠ ཡན་གྱི་བགྲེས་སོང་རྣམ་པར་བརྒྱག་རྒྱུ་ཡིན་པ་རེད།
གཞི་རྩའི་འཛམ་གླིང་ཁྲོད་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་མང་ཚོགས་ས་ཡ་གཉིས་མན་ཙམ་གྱི་ཚེ་སྲོག་ཤོར་བ་དང་དེ་བཞིན་མང་ཚོགས་ས་ཡ་དགུ་བཅུ་ལྷག་ལ་གཉན་རིམས་དེ་ཕོག་པའི་རྐྱེན་གྱིས་ངལ་བ་བཟོད་གླགས་མེད་མྱངས་པའི་ཁྲོད་རྒྱ་ནག་ནང་གཉན་རིམས་ཁྱབ་གདལ་དེ་མི་ཁྱབ་པར་སྟངས་འཛིན་བྱས་ཡོད་ཀྱང་ཉེ་དུས་སུ་རྒྱ་ནག་ནང་སླར་གཉན་རིམས་ཁྱབ་གདལ་ཇེ་ཆེར་སོང་བའི་རྐྱེན་གྱིས་རྒྱ་ནག་གི་གྲོང་ཁྱེར་མང་དག་ཅིག་ཕྱི་ལ་སྒོ་མོ་བརྒྱབ་ནས་མང་ཚོགས་རྣམས་རང་ཁྱིམ་དུ་ཟུར་བཀག་བྱེད་མུས་རེད་འདུག
ཉེ་ལམ་རྒྱ་ནག་བྱང་ཕྱོགས་ཀྱི་ Hebei ཞིང་ཆེན་གྱི་མི་འབོར་ ༡༡༠༠༠༠༠༠ ཡོད་པའི་ཧྲི་ཅ་ཀྲོང་གྲོང་ཁྱེར་ལ་ཏོག་དབྱིབས་གཉན་རིམས་ཁྱབ་གདལ་བྱུང་སྟེ་གྲོང་ཁྱེར་དེ་ནས་པེ་ཅིང་ལ་གནམ་གྲུ་དང་མེ་འཁོར། དེ་བཞིན་སྤྱི་སྤྱོད་རླངས་འཁོར་བཅས་ཀྱི་འགྲིམ་འགྲུལ་ཁག་ཡོངས་སུ་བཀག་སྡོམ་བྱས་པའི་གནས་ཚུལ་ཐོན་ཡོད་པ་དང་། དེ་རིང་རྒྱ་ནག་གཞུང་གིས་ཡུལ་དེའི་ནང་སླར་ཡང་ཏོག་དབྱིབས་གཉན་རིམས་ཁྱབ་གདལ་འབྱུང་བཞིན་པའི་ཆེས་ཛ་དྲག་གི་གནས་སྟངས་ལ་དམིགས་ཏེ་པེ་ཅིང་གི་ཉེ་འགྲམ་དུ་ཡོད་པའི་གྲོང་ཁྱེར་ཁག་ཏུ་མང་ཚོགས་ས་ཡ་ ༤༌༩ ལྷག་གི་འགྲོ་འོང་ལ་བཀག་སྡོམ་གྱིས་རང་ཁྱིམ་དུ་ཟུར་བཀག་བྱས་འདུག
རྒྱ་ནག་འཕྲོད་བསྟེན་ལྷན་ཚོགས་ཀྱིས་དེ་རིང་རྒྱ་ནག་ནང་གཉན་རིམས་ཕོག་མཁན་མི་གྲངས་ ༥༥ བྱུང་ཡོད་པ་དང་དེའི་ཁོངས་ནས་མི་ ༤༠ ཧྲེ་ལུང་ཅང་ཞིང་ཆེན་གྱི་གྲོང་ཁྱེར་ནང་ཁུལ་ལ་འགྲུལ་བཞུད་བྱས་པ་ཤ་སྟག་ཆགས་ཀྱི་ཡོད་སྟབས་ཧེ་བྷེ་ཞིང་ཆེན་གྱི་ Langfang གྲོང་ཁྱེར་གིས་ཁུལ་དེར་གནས་སྡོད་གནང་མཁན་གྱི་མང་ཚོགས་ས་ཡ་བཞི་དང་ཕྱེད་ཀ་ལྷག་དེ་རིང་ནས་རྩིས་པའི་ཉིན་གྲངས་བདུན་གྱི་རིང་རང་ཁྱིམ་དུ་ཟུར་བཀག་སྡོད་དགོས་པ་མ་ཟད། དེ་དག་ཁྲོད་གཉན་རིམས་ཕོག་ཡོད་མེད་ཀྱི་བརྟག་དཔྱད་ཀྱང་བྱེད་དགོས་པར་བརྗོད་འདུག
ད་ལྟའི་ཆར་ཧེ་བྷེ་ཞིང་ཆེན་གྱི་ Langfang གྲོང་ཁྱེར་གྱི་ Guan རྫོང་དང་ Sanhe གྲོང་ཁྱེར་གཉིས་ཀྱི་མང་ཚོགས་རྣམས་རང་ཁྱིམ་དུ་ཟུར་བཀག་བྱེད་མུས་ཁྲོད་ཁ་སང་རྒྱ་ནག་གི་ Heilongjiang ཞིང་ཆེན་གིས་ Wangkui རྫོང་ནང་ནད་རྟགས་མེད་པའི་ནད་པ་གསར་པ་མི་གྲངས་ ༣༨ ཐོན་ཡོད་པ་མངོན་གསལ་གྱིས་མང་ཚོགས་ཀྱི་འགྲོ་འོང་ལ་བཀག་སྡོམ་བྱས་པ་དང་དེ་འབྲེལ་ཞིང་ཆེན་གྱི་ Yichun གྲོང་ཁྱེར་ནང་ལའང་ནད་པ་རེ་ཟུང་ཐོན་པར་མ་ཟད། ཁ་སང་ Jilin ཞིང་ཆེན་གྱི་རྫོང་གཅིག་ནང་དེ་མཚུངས་ནད་རྟགས་མི་མངོན་པའི་ནད་པ་མི་གྲངས་བདུན་ཐོན་ཡོད་པ་དང་དེའི་ཁོངས་ནས་ནད་པ་བཞི་ཉེ་ཆར་ Wangkui རྫོང་ནས་འགྲུལ་བཞུད་གནང་བར་ར་སྤྲོད་བྱས་ཡོད་སྟབས་ད་ཆ་རྒྱ་གཞུང་གིས་གཉན་རིམས་ཐོན་སའི་གོང་གསལ་གྲོང་ཁྱེར་དང་རྫོང་ཁག་ཡོངས་རྫོགས་ནང་འགྲུལ་བཞུད་བྱ་རྒྱུར་བཀག་སྡོམ་བྱས་འདུག དེ་དག་གི་མང་ཚོགས་རྣམས་རང་ཁྱིམ་དུ་ཟུར་བཀག་བྱས་འདུག
དེ་རིང་བར་རྒྱ་ནག་ནང་ཏོག་དབྱིབས་གཉན་རིམས་ཀྱི་ནད་རྟགས་མངོན་གསལ་མེད་པའི་ནད་པ་གསར་པ་གྲངས་ ༨༡ ཐོན་ཡོད་པ་དང་ད་ལྟའི་ཆར་རྒྱ་ནག་སྐམ་ས་ཆེན་མོར་གཉན་རིམས་ཕོག་མཁན་མི་གྲངས་ ༨༧༥༩༡ ཆགས་ཡོད་པ་མ་ཟད་འདས་གྲོངས་སུ་གྱུར་བ་ ༤༦༣༤ ཡིན་པ་རེད།
