འདས་པའི་ཟླ་བ་མང་པོའི་གོང་ནས་བོད་མི་དང་བོད་དོན་རྒྱབ་སྐྱོར་བ། དེ་བཞིན་ཡུ་གུར་བ་དང་ཧོང་ཀོང་མང་གཙོའི་ལས་འགུལ་བ། འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་ཚོགས་སྒེར་མང་དག་ཅིག་ནས་རྒྱལ་སྤྱིའི་ས་གནས་སྟེང་འདི་ལོར་རྒྱ་ནག་ཏུ་འཚོགས་རྒྱུའི་དགུན་དུས་ཨོ་ལམ་པིག་རྩེད་འགྲན་ལ་ངོ་རྒོལ་གྱི་ལས་འགུལ་སྣ་མང་སྤེལ་མུས་ཡིན་པ་ལྟར། རྒྱ་ནག་དང་ས་ཐག་ཉེ་བའི་ཐེ་ཝན་ལ་མཚོན་ན། ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་རྐང་འགན་བཞེས་ཐོག་སྔ་ལོའི་ཕྱི་ཟླ་ ༡༢ ཚེས་ ༨ ནས་བཟུང་རེས་གཟའ་ལྷག་པ་འཆར་ཅན་ཁུལ་དེར་རྟེན་གཞི་བྱས་པའི་རྒྱ་ནག་གཞུང་འབྲེལ་ལས་ཁུངས་དང་། རྒྱ་ནག་དངུལ་ཁང་ཆེན་མོ་སོགས་ཀྱི་མདུན་དུ་རྒྱ་ནག་གཞུང་གིས་བོད་དང་ཤིན་ཅང་། ཧོང་ཀོང་དང་ཐེ་ཝན་སོགས་ཀྱི་ནང་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོལ་རོལ་བཏང་དང་གཏོང་བཞིན་པའི་གནས་སྟངས་ཐེར་འདོན་དང་སྦྲགས་ཏེ། རྒྱ་ནག་ནང་འཚོགས་རྒྱུའི་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་གྱི་ལས་འགུལ་བསྟུད་མར་སྤེལ་ཡོད་པ་རེད། 
ཁོང་རྣམ་པའི་ལས་འགུལ་མཐའ་མ་དེ་ཁ་སང་རེས་གཟའ་ལྷག་པའི་ཉིན་སྤེལ་བ་དང་བསྟུན། རླུང་འཕྲིན་ཁང་གིས་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་བཀྲ་ཤིས་ཚེ་རིང་ལགས་སུ་ཞལ་པར་བརྒྱུད་བཀའ་འདྲི་ཁག་གཅིག་ཞུས་པར་ཁ་སང་ལས་འགུལ་ཉིན་མཐའ་མའི་སྐབས་ཐེ་ཝན་གྲོས་ཚོགས་མདུན་དུ་གྲོས་ཚོགས་འཐུས་མི་ཁག་གཅིག་ལྷན་ཞུགས་ཐོག་གསར་འགོ་ལྷན་ཚོགས་ཤིག་བསྐོང་ཚོགས་གནང་ཡོད་པ་དང་། གྲོས་ཚོགས་འཐུས་མི་རྣམས་ཀྱིས་བོད་མི་དང་བོད་དོན་རྒྱབ་སྐྱོར་བ་གཙོས་ས་གནས་མི་མང་གིས་རྒྱ་ནག་གི་ཨོ་རྩལ་ལ་ངོ་རྒོལ་གནང་བཞིན་པའི་ལས་འགུལ་ལ་རྒྱབ་སྐྱོར་ཡོད་སྐོར་གསུངས་པ་དང་སྦྲགས། རྒྱ་ནག་གི་བྱེད་སྟངས་ཁག་ལ་སྐྱོན་བརྗོད་གནང་གལ་ཡིན་པ་སོགས་གསུང་བཤད་གནང་བར་ངོ་སྤྲོད་གནང་ཡོད།
ལྷག་པར་དུ་ཁོང་གིས་དུས་རྒྱུན་ཐེ་ཝན་ནང་ལ་རྒྱ་ནག་གཞུང་གི་འབྲེལ་ཡོད་ཚོགས་པ་ཁག་གིས་ཆེད་མངགས་མི་བཏང་སྟེ་སྐུ་ཚབ་དོན་གཅོད་ལས་ཁུངས་དང་ལས་འགུལ་བའི་ལས་དོན་ལ་ལྟ་སྲུང་བྱེད་ཀྱི་ཡོད་པ་དང་། ལྷག་པར་དུ་ཁ་སང་གི་ལས་འགུལ་སྐབས་འབྲེལ་ཡོད་ཚོགས་པ་དེ་དག་གི་ལྟ་སྲུང་བྱས་པ་མ་ཟད། ལས་འགུལ་སྤེལ་སའི་ས་ཚིགས་ཐོག་ཆེད་མངགས་ཇག་ཚོགས་བཏང་ནས་ལས་འགུལ་བར་ཁ་བརྡུང་སོགས་བཏང་པའི་གནས་སྟངས་ཡང་བྱུང་ཡོད་ཅེས་གསུངས་ཡོད།
