དེ་རིང་Italy ནང་དུ་རྟེན་གཞི་བྱས་པའི་ Bitter Winter ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། ད་ཆ་རྒྱ་ནག་གིས་བོད་ཁུལ་གྱི་སློབ་མ་མང་པོ་རྒྱ་ནག་གི་སློབ་གྲྭ་ཁག་ཏུ་མངགས་གཏོང་བྱས་ཏེ། བོད་རིགས་སློབ་མ་དེ་དག་བོད་ཀྱི་ཆོས་དང་རིག་གཞུང་། སྐད་ཡིག་ཡུལ་སྲོལ་དང་བཅས་ལ་རྒྱང་ཐག་རིང་དུ་གཏོང་ཐབས་བྱེད་ཀྱི་ཡོད་ལུགས་མངོན་གསལ་གནང་འདུག
དེ་ཡང་གསར་ཁང་གིས། རྒྱ་ནག་གིས་ལོ་བཅུ་ཕྲག་གི་གོང་ནས་རྒྱ་ནང་གི་གྲོང་ཁྱེར་ཞི་ཨན་གྱི་རྒྱལ་ས་ཧྲན་ཞིའི་ཁུལ་གྱི་སློབ་འབྲིང་གི་སློབ་གྲྭ་ཞིག་བརྒྱུད་དེ་བོད་ཁུལ་གྱི་དཔལ་འབྱོར་དང་སྐྱིད་སྡུག་གོང་འཕེལ་མཉམ་ལས་ཞེས་པའི་ལས་གཞི་ལག་བསྟར་གྱིས། ལོ་རྟག་པར་བོད་དང་ཤིན་ཅང་ཁུལ་གྱི་སློབ་མ་ཁག་ཅིག་གདམ་གསེས་ཀྱིས་རྒྱ་ནག་དུ་ཁྲིད་དེ་ཞི་ཨན་གྱི་སློབ་གྲྭ་དེར་སློབ་འཇུག་བྱེད་བཞིན་ཡོདཔ་དང་། སློབ་མ་དེ་དག་ག་ལེར་རང་གི་ཕ་མེས་ཡང་མེས་ཀྱི་སྐད་དང་རིག་གཞུང་། ཆོས་ལུགས་དང་བཅས་ལ་འབྲེལ་ཐག་རིང་དུ་གཏོང་བཞིན་པ་མ་ཟད། དམར་ཤོག་སྲིད་གཞུང་གི་ལྟ་གྲུབ་ལ་སློབ་སྦྱོང་བྱེད་དུ་འཇུག་བཞིན་ཡོད་པ་ཡོངས་གྲགས་གནང་འདུག
ཞི་ཨན་གྱི་སློབ་གྲྭའི་འབྲེལ་ཡོད་ཅིག་གིས་གསར་ཁང་ལ་འགྲེལ་བརྗོད་བྱས་པ་ལྟར་ན། རྒྱ་ནག་སྲིད་གཞུང་གིས་བོད་ཁུལ་ནས་རྒྱ་ནག་ཏུ་སློབ་སྦྱོང་བྱེད་ཆེད་ཁྲིད་ཡོང་བའི་བོད་རིགས་སློབ་མ་དེ་དག་གིས་མ་འོངས་བར་བོད་གསར་འཛུགས་དང་མཐའ་སྲུང་འགན་བཞེས་མཁན་དང་། དེ་བཞིན་གྲངས་ཉུང་མི་རིགས་མཐུན་སྒྲིལ་ལ་ཕུགས་བསམ་བཅིངས་ཡོད་པའི་སློབ་མར་ངོས་འཛིན་བྱེད་ཀྱི་ཡོད་པ་མ་ཟད། སློབ་མ་དེ་དག་རིམ་བཞིན་སློབ་ཆེན་འགྲིམས་ནས་སློབ་མཐར་ཕྱིན་མཚམས་སུ།་བོད་ཁུལ་དུ་ཡོད་པའི་རྒྱ་ནག་གི་གཞུང་འཛིན་ལས་ཁུངས་ཁག་ཏུ་བྱ་བ་བགོ་ངེས་ཡིན་པར་འགྲེལ་བརྗོད་ཀྱིས། དོན་དུ་བོད་རིགས་སློབ་མ་རྒྱ་ནག་གི་གྲོང་ཁྱེར་ཆེ་ཁག་ཏུ་སློབ་སྦྱོང་བྱེད་དུ་འཇུག་བཞིན་པ་དེ་ནི་རྒྱ་ནག་གཞུང་གིས་བོད་མི་རྒྱ་བསྒྱུར་བྱེད་རྒྱུའི་འཐབ་ཇུས་ཤིག་ཡིན་པར་བརྗོད་ཡོད་བྱས་ཡོད་པ་འཁོད་འདུག
དེ་བཞིན་ཞི་ཧན་ཁུལ་གྱི་བོད་རིགས་སློབ་མ་དེ་རྣམས་རྒྱ་རིགས་ཀྱི་མི་ཚང་རེ་རེར་རྩིས་སྤྲོད་ཀྱིས། ལོ་གསུམ་གྱི་ནང་དུ་ཕ་ཡུལ་དུ་ཐེངས་གཅིག་ལས་འགྲོ་ཆོག་གི་མེད་པ་མ་ཟད། རྩིས་སྤྲོད་བྱ་སའི་རྒྱ་རིགས་ཁྱིམ་མི་དེ་དག་གིས་བོད་རིགས་སློབ་མའི་བསམ་བློ་ཀུན་སྤྱོད་ཡོངས་སུ་རྒྱ་བསྒྱུར་བྱེད་རྒྱུར་ཤུགས་སྣོན་བྱེད་བཞིན་ཡོད་པ་མ་ཟད། དུས་རྒྱུན་ནས་སློབ་མ་དེ་དག་ལ་རྒྱ་ནག་རྒྱལ་ཁབ་ལ་རྒྱལ་ཞེན་སླེབས་ཐབས་ཀྱི་ཀློག་བརྙན་སོགས་བསྟན་ཏེ། ཕྱོགས་ཡོངས་ནས་སློབ་མ་དེ་དག་ལ་དམར་ཤོག་གི་ལྟ་བའི་ཤུགས་རྐྱེན་སྐྲུན་ཐབས་ལ་འབད་བརྩོན་བྱེད་ཀྱི་ཡོད་པར་གསུངས་འདུག
མཚོ་སྔོན་མཚོ་བྱང་ཁུལ་གྱི་བོད་རིགས་སློབ་མ་ཞིག་གིས་གསར་ཁང་ལ་འགྲེལ་བརྗོད་བྱས་པ་ལྟར་ན། སློབ་གྲྭའི་ནང་དུ་ཆོས་ལུགས་ཀྱི་བྱེད་སྒོ་ཡོངས་སུ་བཀག་ཡོད་པ་མ་ཟད། སློབ་མ་སུ་ཞིག་གི་གློག་ཀླད་ཀྱི་ནང་དུ་༸གོང་ས་མཆོག་གི་སྐུ་པར་ཡོད་པ་ཤེས་རྟོག་བྱུང་བ་ཡིན་ན་སྲིད་གཞུང་དང་ཁ་གཏད་དུ་ལངས་བ་དང་ཡང་ན་ལྟ་གྲུབ་ཀྱི་དཀའ་ངལ་ཡོད་པར་ངོས་འཛིན་གྱིས་དུས་ཡུན་ངེས་ཅན་ལ་སློབ་གྲྭ་ནས་ཕྱིར་ཕུད་གཏོང་བཞིན་པ་མ་ཟད། སློབ་མ་གང་དེ་སློབ་མཐར་འཁྱོལ་རྒྱུ་དང་། ཡང་ན། སློབ་མཐར་ཕྱིན་ཡང་སྤྱི་ཚོགས་ཀྱི་སྟེང་དུ་ལས་ཀ་རག་མིན་སོགས་ལ་ཤན་ཤུགས་ཆེན་པོ་ཐེབས་བཞིན་པར་བརྟེན། བོད་རིགས་སློབ་མ་རྣམས་ཀྱིས་ཆོས་ལུགས་ཀྱི་བརྗོད་བྱ་ལ་ལག་པ་འཆང་རྒྱུ་ཧ་ཅང་ཁག་པོ་ཆགས་ཡོད་པར་འགྲེལ་བརྗོད་བྱས་འདུག
དེ་བཞིན་ཁ་སང་དེ་རིང་། རྒྱ་ནག་གིས་མཚོ་སྔོན་ཞིང་ཆེན་རེབ་གོང་རྒྱལ་བོ་རླངས་ཚང་གི་སྡེ་བ་ཁག་ཏུ་ཡོད་པའི་བོད་ཀྱི་སློབ་ཆུང་ཁག་སྒོ་རྒྱག་ཏུ་བཅུག་སྟེ། ཕ་མ་དང་ས་གནས་མི་མང་ལ་འདོད་བློ་མེད་བཞིན་དུ་བོད་པའི་སློབ་མ་རྣམས་རྫོང་དང་ཁུལ་རིམ་པའི་སློབ་གྲྭ་སོགས་ཀྱི་ནང་གཏོང་གི་ཡོད་པ་མ་ཟད། གལ་སྲིད་གཞུང་གི་བཀའ་ལ་བརྩི་སྲུང་མ་བྱས་ཚེ་ཁྱིམ་བདག་ཚོར་ཉེས་ཆད་གཅོད་རྒྱུ་ཡིན་པའི་བཀའ་ཁྱབ་བསྒྲགས་ཡོད་སྐོར་ཀྱི་གནས་ཚུལ་བྱུང་བཞིན་ཡོད་འདུག
གོང་གི་གནས་ཚུལ་དེ་དང་འབྲེལ་ནས། འདི་གའི་གསར་འགོད་པས་རླངས་ཚང་སྡེ་བའི་ཕྱི་སྡོད་ཀྱི་འབྲེལ་ཡོད་ཅིག་ལ་བཀའ་འདྲི་ཞུས་པར་ཁོང་གིས། གནས་ཚུལ་དེ་འདྲ་ཞིག་བྱུང་བཞིན་ཡོད་པའི་སྐད་ཆ་ཐོས་ཡོད་ནའང་། ད་སྐབས་བོད་ནང་དུ་དམ་དྲག་ཡོད་སྟབས་གནས་ཚུལ་ཞིབ་ཕྲ་ཤེས་རྟོག་བྱེད་ཐབས་མ་བྱུང་བར་བརྗོད་སོང་།
གཞི་རྩའི་འདི་ལོའི་ཕྱི་ཟླ་ ༨ པའི་ཚེས་ ༢༨ དང་༢༩ ཉིན་གཉིས་ཀྱི་རིང་། རྒྱ་ནག་དམར་ཤོག་གཞུང་གིས་བོད་ཀྱི་ལས་དོན་ཐད་ཀྱི་བཞུགས་མོལ་ཚོགས་འདུའི་ཐོག རྒྱ་ནག་གི་སྲིད་འཛིན་ཞི་ཅིན་ཕིང་གིས་བོད་ཁུལ་གྱི་སློབ་གྲྭ་ཁག་གི་ནང་དུ་ལྟ་གྲུབ་རང་བཞིན་དང་ཆབ་སྲིད་རང་བཞིན་ཀྱི་ཤེས་ཡོན་གྱི་རྩ་བ་བརྟན་པོར་འཛུགས་དགོས་བའི་ཐད་ལ་སྐུལ་འདེད་བྱས་ཏེ། ཤེས་ཡོན་སློབ་གསོ་བརྒྱུད་ནས་ན་གཞོན་སློབ་མ་རྣམས་ཀྱི་བློ་ཡུལ་དུ་རྒྱལ་ཞེན་གྱི་ལྟ་བ་གསར་འཛུགས་བྱེད་རྒྱུ་དེ་གལ་ཆེན་པོ་ཡིན་པའི་གཏམ་བཤད་སྤེལ་ཡོད་པ་རེད།
