རེས་གཟའ་པ་སངས་ཉིན་གྱི་ཕྱི་དྲོ་རྒྱ་གར་གྱི་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་དགོན་པའི་མདུན་ཐང་དུ། དབུ་དཀར་ཚང་སྐལ་རྡོར་ལགས་ཀྱིས་ཁོང་རང་ཉིད་ ༢༠༢༦ ལོའི་སྲིད་སྐྱོང་དུ་བཞེངས་རྒྱུའི་ཐག་གཅོད་ཟིན་པའི་དམིགས་ཡུལ་གྱི་བསྒྲགས་གཏམ་གསལ་བསྒྲགས་དང་སྦྲགས། མི་མང་གིས་ཁོང་ལ་འོས་འཕང་དགོས་པའི་དྲིལ་བསྒྲགས་ཀྱི་ལས་འགུལ་དེ་འགོ་འཛུགས་གནང་སོང་།
ཁོང་གིས་སྐབས་དེར། གལ་ཏེ་ཁོང་རང་ཉིད་སྲིད་སྐྱོང་དུ་འཁོད་ཚེ། དབུས་བོད་མིའི་སྒྲིག་འཛུགས་ཀྱི་དཔལ་འབྱོར་སྲ་བརྟན་ཡོང་བ་དང་། ༸སྐུའི་ཡང་སྲིད་དང་འབྲེལ་བའི་གནད་དོན་ཐོག་ G7 སྟོབས་ཆེན་རྒྱལ་ཁབ་ཁག་ལ་གཞུང་འབྲེལ་ངོས་འཛིན་གཏན་འབེབས་ཡོང་བའི་ཐབས་ཤེས། བཙན་བྱོལ་ནང་གི་སློབ་གྲྭ་ཁག་དེ་བཞིན་དེང་དུས་དང་མཐུན་པའི་ཤེས་ཡོན་གྱི་ལྟེ་གནས་སུ་བསྒྱུར་ཐབས། མ་ཟད་བོད་མིའི་སྒྲིག་འཛུགས་ཀྱི་འཛིན་སྐྱོང་ཆ་ཚང་འཕྲུལ་རིག་གྲངས་འཛིན་ Digitization གྱི་ངོ་བོར་བསྒྱུར་རྒྱུ་སོགས་ཀྱི་བསྒྲུབ་བྱའི་དོན་ཚན་ལྔ་ཅན་ཁས་ལེན་དང་འབྲེལ། མི་མང་གི་ངོས་ནས་ཁོང་ལ་འོས་འཕང་དགོས་པའི་དྲིལ་བསྒྲགས་ཀྱི་ལས་རིམ་དེ་འགོ་འཛུགས་གནང་ཡོད།
གཞི་རྩའི་དབུ་དཀར་ཚང་སྐལ་རྡོར་ལགས་ཀྱིས་ཁོང་རང་ཉིད་ ༢༠༢༦ ལོའི་སྲིད་སྐྱོང་གི་འོས་མིར་བཞེངས་རྒྱུའི་གསལ་བསྒྲགས་དེ། ཁ་སྔོན་ཕྱི་ཟླ་ ༡༡ ཚེས་ ༡༩ ནས་གནང་ཟིན་ཡོད་ཀྱང་། ད་རེས་ཀྱི་དྲིལ་བསྒྲགས་ལས་རིམ་དེ་ནི། ཁོང་དངོས་སུ་སྔོན་འགྲོའི་འོས་གཞི་ནང་སླེབས་ཐབས་སུ་མི་མང་གི་འོས་འཕང་དགོས་པའི་དྲིལ་བསྒྲགས་ཀྱི་ལས་རིམ་དང་པོ་དེ་ཡིན་པ་དང་། རིམ་པས་བྱང་ཨ་རི་དང་ཡུ་རོབ་ཕྱོགས་སུའང་དྲིལ་བསྒྲགས་ཆེད་བསྐྱོད་རྒྱུ་ཡིན་པའི་འགྲེལ་བརྗོད་གནང་གི་འདུག
