སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པ་གྲོལ་རྗེས་སྤྱི་འཐུས་རྣམ་པ་རྒྱལ་ས་ལྡི་ལིར་ཆེད་ཕེབས་ཀྱིས་ཉིན་ལྔའི་རིང་བོད་ཀྱི་འཐབ་རྩོད་ཆེད་ནུས་པ་མཉམ་སྤུངས་ཀྱི་སྙིང་སྟོབས་སླར་གསོ་སླད་ཐབས་བྱུས་ཚོགས་འདུ་ཞིག་ཚོགས་ཡོད་པ་ལྟར། ཚོགས་འདུ་མཇུག་སྒྲིལ་མ་ཐག་སྤྱི་འཐུས་ཁག་གཅིག་གིས་མང་ཚོགས་ལ་ཆབ་སྲིད་སོགས་ཀྱི་ལམ་སྟོན་དང་བདེ་སྡུག་གཟིགས་ཞིབ་སླད་ཕེབས་རྒྱུའི་ལས་རིམ་ཞིག་དབུ་འཛུགས་གནང་བའི་ཁོངས་སུ་བོད་མི་མང་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་དང་སྤྱི་འཐུས་དབང་འདུས་རྡོ་རྗེ་ལགས་རྣམས་གཉིས་ཟླ་བ་འདིའི་ཚེས་ ༢༥ ཉིན་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་རྒྱལ་ས་སྦེང་ལོར་ནང་ཆེད་ཕེབས་ཀྱིས་ས་གནས་ཀྱི་བོད་མི་ མང་ཚོགས་དང་སློབ་མ་རྣམས་དང་དངོས་སུ་ཐུག་འཕྲད་གནང་སོང་།
སྤྱི་འཐུས་རྣམ་གཉིས་ཀྱིས་ཕྱི་ཚེས་ ༢༥ ཉིན་སྦེང་ལོར་དུ་འབྱོར་མ་ཐག་ས་གནས་བོད་མིའི་ཚོང་པ་དང་གཞོན་སྐྱེས་ཁག་གཅིག་དང་ཐུག་འཕྲད་གནང་བ་མ་ཟད། ཚེས་ ༢༦ ཉིན་གྱི་དགོང་དྲོ་ཚོུད་ ༦ པ་ཙམ་ལ་བོད་ཁྱིམ་སྡོད་ཁང་དུ་སློབ་མ་གཙོ་བོར་གྱུར་པའི་ས་གནས་མང་ཚོགས་ལ་གསུང་བཤད་དང་ཁོང་རྣམ་པའི་འདྲི་རྩད་ཁག་ལ་ལན་འདེབས་གནང་ཡོད།
སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་ཀྱིས་ད་ལྟའི་བོད་མི་གཞོན་སྐྱེས་རྣམས་ལ་བོད་མི་རིགས་ཀྱི་ངོ་བོ་སྲུང་སྐྱོབ་ཀྱི་འགན་ཡོད་པ་དང་སློབ་མ་རྣམས་ཀྱིས་སློབ་སྦྱོང་ལ་ཧུར་བརྩོན་དང་ལྷག་པར་རང་གི་སྐད་ཡིག་ལ་དོ་སྣང་གནང་དགོས་པའི་གཞེན་སྐུལ་གནང་བ་དང་ཆབས་ཅིག་དྲ་རྒྱའི་མྱུར་ཚད་ཆེ་བའི་དུས་སྐབས་ཁྲོད་གཞོན་སྐྱེས་རྣམས་ཀྱིས་སྤྱི་ཚོགས་ནང་གང་བྱུང་དུ་བཀའ་མོལ་གནང་མཁན་ཚོའི་བཀའ་མོལ་ལ་ཆ་འཇོག་མ་གནང་བར་རང་ཉིད་ཤེས་ལྡན་པ་ཞིག་ཡིན་པས་ལེགས་པར་བརྟག་དགོས་ཞེས་གསུངས་ཡོད།
སྤྱི་འཐུས་དབང་འདུས་རྡོ་རྗེ་ལགས་ཀྱིས་སློབ་ཕྲུག་ཚོར་བོད་ནང་གི་ཛ་དྲག་གནས་སྟངས་སྐོར་ལ་ངོ་སྤྲོད་སྙིང་བསྟུས་གནང་བ་དང་འབྲེལ། ང་ཚོ་རང་དབང་ལུང་པར་གནས་ཡོད་དུས་ཡང་ནས་ཡང་དུ་གཞིས་བཞུགས་བོད་མི་ཚོའི་དཀའ་སྡུག་ཚོར་དགོས་པ་དང་གཞོན་སྐྱེས་མི་རེ་ངོ་རེས་ང་ཚོ་ནི་འཐབ་རྩོད་ཀྱི་མི་རིགས་ཤིག་ཡིན་པ་དྲན་དགོས་ཞེས་གསུངས་སོང་།
སྤྱི་འཐུས་རྣམ་གཉིས་ཀྱི་གཏམ་བཤད་གྲུབ་རྗེས་མི་མང་དང་སློབ་ཕྲུག་རྣམས་ལ་དོགས་འདྲི་དང་དགོངས་འཆར་ཞུ་རྒྱུའི་གོ་སྐབས་གནང་བ་ལྟར་སློབ་མ་ཞིག་གིས་བོད་མིའི་སྒྲིག་འཛུགས་ཀྱི་ངོས་ནས་གཞིས་ཆགས་སྲ་བརྟན་ཐད་འགྲོ་སོང་གནང་བ་ལྟར་སློབ་མའི་སློབ་ཡོན་སྤར་ཆ་གནང་ཚེ་སློབ་མ་རྣམས་ལ་ཕན་ཐོགས་ཡོང་ངེས་ཡིན་སྐོར་སོགས་ཞུས་སོང་།
སྐབས་དེར་བོད་མི་ཞིག་དང་ལྷག་པར་སློབ་མ་ཞིག་གིས་གྲོས་ཚོགས་ལ་གཟིགས་སྐབས་སྤྱི་འཐུས་རྣམ་པས་ཕྱག་ལས་གནང་སྟངས་དང་བཀའ་མོལ་གནང་སྟངས་གཟིགས་དུས་བློ་འཚབ་ཞེ་དྲག་ཡོང་གི་འདུག་ཅེས་ཐུགས་ཚོར་དང་འབྲེལ་ཏེ་བཀའ་འདྲི་ཞུས་པར་སྤྱི་འཐུས་རྣམ་གཉིས་ཀྱིས་གྲོས་ཚོགས་ནང་བཀའ་མོལ་ཀྱི་སྐད་ཤུགས་ལ་མ་གཟིགས་པར་དོན་དག་གང་ཡིན་གསན་གལ་ཡིན་སྐོར་གསུངས་པ་མ་ཟད། ང་ཚོ་དགེ་འདུན་པ་ནི་ཆུང་དུས་ནས་གདན་སར་རྟགས་གསལ་བཏང་ནས་སློབ་གཉེར་གནང་བ་ཞིག་ཡིན་སྟབས་སྐད་ཤུགས་ཕྲན་བུ་ཆེ་བ་ཡོད་པ་རེད། འོན་ཀྱང་དེས་ཁོང་ཁྲོ་ལངས་པའི་རྟགས་མཚན་མ་རེད་ཅེས་གསུངས་ཡོད།
དེ་བཞིན་སྤྱི་འཐུས་དབང་འདུད་རྡོ་རྗེ་ལགས་ཀྱིས་ཀྱང་ཆབ་སྲིད་ཟེར་བ་དེ་མགོ་རྙོག་དང་ཡ་མཚན་ཅན་ཞིག་ཡིན་པ་དང་། རྣམ་པ་ཚོས་རྒྱལ་ཁབ་གཞན་གྱི་གྲོས་ཚོགས་ལ་གཟིགས་ཡོད་རེད། དེའི་ནང་བཀའ་མོལ་མཐོ་དམའ་ཡོང་སྲིད་པས་དེར་ཐུགས་འཚབ་གནང་བ་ལས་དོན་དག་གང་ཡིན་གསན་གལ་ཡིན་པའི་འབོད་སྐུལ་གནང་སོང་།
གཞི་རྩའི་སྤྱི་འཐུས་རྣམ་གཉིས་ཀྱི་གཞུང་འབྲེལ་འཚམས་གཟིགས་དེ་རྒྱལ་ས་སྦེང་ལོར་ནས་དབུ་འཛུགས་གནང་སྟེ་རིམ་པས་ཏཱ་ལའི་བླ་མའི་སློབ་གཉེར་ཁང་དང་མེ་སོར། སྦེལ་ཀོབ་གཞིས་ཆགས། མེང་ལོར་བཅས་སུ་ཆེད་ཕེབས་གནང་རྗེས་ཟླ་ ༡༠ ཚེས་ ༧ ཉིན་བཞུགས་སྒར་དྷ་སར་ཕྱིར་ཕེབས་ཀྱི་ཡོད་པ་རེད།
