སྲིང་སྐྱོང་མཆོག་ནེའུ་ཛི་ལན་ཌིར་གཞུང་འབྲེལ་ཕྱོགས་བསྐྱོད་ཐེངས་དང་པོ་གནང་རྒྱུ།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་རིང་མིན་ཟླ་བ་འདིའི་ཚེས་ ༣༠ ཉིན་ནས་དབུ་འཛུགས་ཀྱིས་ཟླ་རྗེས་མའི་ཚེས་  ༥ བར་ནེའུ་ཛི་ལན་ཌི་ནང་དུ་གཞུང་འབྲེལ་ཕྱོགས་བསྐྱོད་ཐེངས་དང་པོ་གནང་རྒྱུ་རེད་འདུག

ཐེངས་འདིའི་སྲིད་སྐྱོང་མཆོག་གི་གཞུང་འབྲེལ་ཕྱོགས་བསྐྱོད་གོ་སྒྲིག་གནང་མཁན་ Friends of Tibet ཞེས་པའི་ཁུལ་དེའི་བོད་དོན་རྒྱབ་སྐྱོར་ཚོགས་པས་གསར་འགོད་གསལ་བསྒྲགས་ཤིག་སྤེལ་བར་གཞིགས་ན། སྲིད་སྐྱོང་མཆོག་ནས་ཕྱི་ཟླ་ ༤ ཚེས་ ༣༠ ཉིན་ New Zealand ཁུལ་གྱི་ Auckland གྲོང་ཁྱེར་ནང་དུ་འབྱོར་གྱི་ཡོད་པ་དང་། ཟླ་ ༥ ཚེས་ ༡ ཉིན་ཁུལ་དེའི་མང་ཚོགས་ལ་ China Tibetan Relations : Past Present and Future ཞེས་བོད་རྒྱ་གཉིས་ཀྱི་སྔ་རྗེས་ཀྱི་འབྲེལ་ལམ་སྐོར་ལ་གསུང་བཤད་གནང་རྒྱུ་དང། དེ་རྗེས་ཚེས་ ༢ ཉིན་ Dunedin གྲོང་ཁྱེར་ནང་དུ་ Tibet in the 21^st Century ཞེས་དུས་རབས་ ༢༡ པའི་ནང་བོད་ཀྱི་ཆབ་སྲིད་དང་ཁོར་ཡུག དེ་བཞིན་རིག་གཞུང་བཅས་ལ་འཕྲད་བཞིན་པའི་ངལ་བའི་སྐོར་གསུང་བཤད་གནང་རྒྱུ་རེད་འདུག  ཕྱི་ཚེས་ ༣ ཉིན་ཁུལ་དེའི་ལྗང་ཁུ་ཚོགས་པའི་འཐུས་མི་སྐུ་ཞབས་ Gareth Hughes ལགས་ཀྱིས་གདན་ཞུ་ལྟར་རྒྱལ་ས་ Wellington ནང་དུ་རྟེན་གཞི་བྱས་པའི་ཡུལ་དེའི་གྲོས་ཚོགས་སུ་ཕེབས་ནས་གྲོས་ཚོགས་ཀྱི་འཐུས་མི་རྣམས་དང་མཇལ་འཕྲད་གནང་རྒྱུ། ཝི་ལིངྒ་ཊོན་ནང་གི་མཛད་རིམ་ཁྲོད་སྲིད་སྐྱོང་མཆོག་ནས་ཁུལ་དེའི་ Victoria གཙུག་ལག་སློབ་གཉེར་ཁང་གི་ཁྲིམས་ལུགས་རིག་པའི་སྡེ་ཚན་གྱི་དགེ་སློབ་རྣམས་ལ་བོད་དོན་སྐོར་གསུང་གནང་རྒྱུ་དང་། དེ་རྗེས་ཚེས་ ༥ ཉིན་ Auckland ནས་ཕེབས་ཐོན་གནང་རྒྱུ་རེད་འདུག

གསར་འགོད་བསྒྲགས་གཏམ་དེའི་ནང་དུ་ New Zealand བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཐུབ་བསྟན་སྐལ་བཟང་ལགས་ཀྱིས་བོད་ནང་ཕྱི་ལོ་ ༢༠༠༩ ལོ་ནས་བཟུང་ད་བར་བོད་མི་ ༡༤༧ གྱིས་རང་ལུས་མེར་བསྲེགས་གནང་ཟིན་ཡོད་པ་དང་། བོད་མི་དེ་དག་གི་འབོད་ཚིག་ཁག་ཕྱི་ཕྱོགས་ལ་ཐོན་ཐུབ་ཀྱི་མེད་སྐོར་གསུངས་པ་དང་འབྲེལ། ད་ལན་སྲིད་སྐྱོང་མཆོག་གིས་ཐེངས་འདིའི་གཞུང་འབྲེལ་ཕྱོགས་ཕེབས་བརྒྱུད་ནས་ཡུལ་དེའི་མང་ཚོགས་ལ་ད་ལྟའི་བོད་ནང་གི་ཛ་དྲག་གནས་སྟངས་ཁག་ཐད་ཀར་ཞུ་རྒྱུའི་གོ་སྐབས་ཤིག་ཡོད་པ་གསུངས་ཡོད།

རྩ་བའི་སྲིིད་སྐྱོང་མཆོག་ད་ལན་ New Zealand ནང་གི་མཛད་འཆར་དབུ་འཛུགས་མ་གནང་གོང་དུ་ Australia ནང་དུ་ཆེད་ཕེབས་ཀྱིས་ Brisbane གྲོང་ཁྱེར་ནང་དུ་འཚོགས་བཞིན་པའི་བོད་ཀྱི་དུས་སྟོན་ཐོག་དབུ་བཞུགས་དང་ཡུལ་དེའི་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་ཞུ་རྒྱུའི་ལས་རིིམ་སོགས་ཡོད་པ་རེད།

དེ་མཚུངས་སུ་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་ཁ་སང་ཚེས་ ༢༦ ཉིན་རྒྱབ་སྲིད་སྐྱོང་བློ་བཟང་སེང་གེ་མཆོག་ནས་རྒྱལ་ས་ལྡི་ལིར་རྒྱ་གར་གྱི་རིག་གཞུང་དང་ཡུལ་སྐོར་སྤྲོ་འཆམ་བློན་ཆེན་སྐུ་ཞབས་ Mahesh Sharma མཆོག་དང་མཇལ་འཕྲད་ཞུས་འདུག སྐབས་དེར་སྲིད་སྐྱོང་མཆོག་གིས་འཕགས་བོད་གཉིས་དབར་གྱི་ཐུན་མོང་མ་ཡིན་པའི་ཆོས་རིག་གི་གལ་གནད་སྐོར་གསུངས་འདུག དེ་བཞིན་རྒྱ་གར་གྱི་རིག་གཞུང་ལྷན་ཁང་དང་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དབར་འབྲེལ་ལམ་གང་ལེགས་གནང་རྒྱུའི་ཐོག་གླེང་མོལ་གནང་ཡོད་པ་དང་སྐབས་དེར་རྒྱ་གར་གྱི་རིག་གཞུང་ལྷན་ཁང་གི་དྲུང་ཆེ་སྐུ་ཞབས་ NK Sinha མཆོག་དང་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་འཕར་ཀརྨ་དགྲ་འདུལ་ལགས་དང་། ལས་འཆར་སྡེ་ཚན་གྱི་ལས་བྱེད་བསྟན་འཛིན་ཟླ་སྒྲོན་ལགས་བཅས་ནས་མཉམ་ཞུགས་གནང་འདུག