བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཡུ་རོབ་རྒྱལ་ཁབ་བཞི་ནང་གི་གཞུང་འབྲེལ་ཕྱོགས་ཕེབས་སླད་དེ་རིང་བཞུགས་སྒར་ནས་ཕེབས་ཐོན་གནང་སོང་།
སྲིད་སྐྱོང་མཆོག་དེ་རིང་བཞུགས་སྒར་ནས་ཕེབས་ཐོན་གྱིས་ཕྱི་ཟླ་ ༤ ཚེས་ ༢༡ ནས་ཕྱི་ཟླ་ ༥ ཚེས་ ༩ བར་དབྱིན་ཡུལ་དང་ནོར་ཝེ། ཌེན་མག འཇར་མན་བཅས་སུ་གཞུང་འབྲེལ་ཕྱོགས་ཕེབས་གནང་གི་ཡོད་པ་རེད།
སྲིད་སྐྱོང་མཆོག་གིས་ཐེངས་འདིའི་ཕྱོགས་ཕེབས་ཁྲོད་གཙོ་བོ་དབྱིན་ཡུལ་གྲོས་ཚོགས་སུ་བོད་ནང་གི་ཆོས་དད་རང་དབང་གི་གནས་སྟངས་དང་འབྲེལ་བའི་ཉན་ཞིབ་ལས་རིམ་ཐོག་གདན་ས་ཆེན་པོ་བཀྲིས་ལྷུན་པོའི་མཁན་རིན་པོ་ཆེ་མཆོག་དང་ལྷན་དུ་མཉམ་ཞུགས་གནང་རྒྱུ་དང་། རྒྱལ་ཁབ་སོ་སོའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་མཇལ་འཕྲད་དང་གཙུག་ལག་སློབ་ཁང་དུ་གསུང་བཤད་གནང་རྒྱུ་སོགས་ཀྱི་མཛད་རིམ་ཡོད་པ་རེད།
དེ་བཞིན་ཁ་སང་ཕྱི་ཚེས་ ༢༠ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཕ་རན་སིའི་གྲོས་ཚོགས་གོང་མའི་འཐུས་མི་ལྕམ་སྐུ་ Jacqueline Eustache-Brinio ལགས་ཀྱིས་སྣེ་ཁྲིད་འོག་གྲོས་ཚོགས་འཐུས་མི་བཞི་ལས་གྲུབ་པའི་གྲོས་ཚོགས་ཀྱི་སྐུ་ཚབ་ཚོགས་ཆུང་དང་མཇལ་འཕྲད་ཀྱིས་རྒྱ་བོད་གཉིས་དབར་གྱི་དཀའ་རྙོག་དང་འབྲེལ་བའ་གནད་དོན་ཁག་གཅིག་དང་བཙན་བྱོལ་བོད་མིའི་བདེ་དོན་སྐོར་ལ་བཀའ་བསྡུར་གནང་འདུག
དེ་རིང་ཕྱི་ཚེས་ ༢༡ ཉིན་གྱི་སྔ་དྲོ་ཕ་རན་སི་གྲོས་ཚོགས་གོང་མའི་སྐུ་ཚབ་ཚོགས་ཆུང་གིས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་ལྷན་མཇལ་མོལ་གནང་ཡོད་པ་དང། རེས་གཟའ་ཟླ་བའི་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུ་རྒྱུ་རེད་འདུག
རླུང་འཕྲིན་ཁང་གིས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་སུ་དེ་འབྲེལ་བཀའ་འདྲི་ཞུས་ཡོད།
