ཉེ་སྔོན་ཟླ་བ་ ༧ པའི་ནང་ཨ་རི་གཞུང་ནས་རྒྱལ་ཁབ་ཀྱི་བདེ་འཇགས་སླད་ཧུས་ཊོན་གྲོང་ཁྱེར་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་དེ་སྒོ་རྒྱག་བཅུག་ཡོད་པ་དང་སྦྲགས། ཨ་རིས་བྱེད་ཕྱོགས་དེར་འཁོན་ལན་ཚུལ་དུ་རྒྱ་གཞུང་གིས་ཁྲིན་ཏུ་ནང་ཡོད་པའི་ཨ་རི་གཞུང་ཚབ་ཁང་དེ་སྒོ་རྒྱག་བཅུག་པའི་གནད་དོན་བྱུང་ཡོད་པ་རེད། ཁ་སང་ཨ་རི་གྲོས་ཚོགས་འཐུས་མི་ ༡༠༠ ལྷག་གིས་དེ་གའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་ལ་ཁྲིན་ཏུ་ནང་ཨ་རི་གཞུང་ཚབ་ཁང་སྒོ་རྒྱབ་པ་དེས་བོད་དང་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་སྟངས་རྒྱུས་ལོན་སླད་འགོག་རྐྱེན་བཟོ་རྒྱུ་ཡིན་པས་ཕྱི་སྲིད་དྲུང་ཆེ་ནས་དེར་ཐབས་བྱུས་ཅི་ཡོད་ཐད་འདྲི་བརྩད་ཀྱིས་ཕྱག་ཡིག་ཅིག་ཕུལ་འདུག
དེ་ཡང་ཁ་སང་ཚེས་ ༡༠ ཉིན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Andy Levin ལགས་དང་། གྲོས་ཚོགས་འཐུས་མི་སྐུ་ཞབས་ Jim McGovern ལགས་རྣམ་གཉིས་ཀྱིས་ཕྱི་སྲིད་དྲུང་ཆེ་སྐུ་ཞབས་ Pompeo མཆོག་ལ་ཁྲིན་ཏུ་ནང་གི་ཨ་རིའི་གཞུང་ཚབ་ཁང་སྒོ་རྒྱབ་པ་དང་འབྲེལ་ཐབས་བྱུས་ཅི་ཡོད་ཐད་འདྲི་བརྩད་གནང་བའི་ཐོག་ཨ་རི་གྲོས་ཚོགས་འཐུས་མི་བརྒྱ་ལྷག་གི་མཚན་རྟགས་བསྐྱོན་པས་ཕྱག་ཡིག་ཅིག་ཕུལ་ཡོད་པ་དང་། དེའི་ནང་གྲོས་ཚོགས་འཐུས་མི་རྣམས་པས་ཐུགས་འཚབ་དང་སྦྲགས། རྒྱ་གཞུང་གིས་ཁྲིན་ཏུ་ནང་གི་ཨ་རིའི་གཞུང་ཚབ་ཁང་སྒོ་རྒྱབ་པ་དེས་ཨ་རི་ངོས་ནས་བོད་རང་སྐྱོང་ལྗོངས་ཟེར་བ་དང་། སི་ཁྲོན། ཀན་སུ་དེ་བཞིན་ཡུན་ནན་ཞིང་ཆེན་དང་། ཤིན་ཅང་བཅས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐང་གི་གནད་དོན་རྒྱུས་ལོན་སླད་འགོག་རྐྱེན་བཟོ་ངེས་ཡིན་པས། ས་ཁུལ་དེ་དག་གི་འགྲོ་བ་མིའི་ཐོབ་ཐང་གི་གནས་སྟངས་མུ་མཐུད་བརྟག་ཞིབ་སླད་ཞིབ་ཕྲའི་ཐབས་བྱུས་ཅི་ཡོད་ཐད་འདྲི་བརྩད་གནང་འདུག
གྲོས་ཚོགས་འཐུས་མི་རྣམས་པས་རྒྱ་ནག་གཞུང་གིས་ཡུན་རིང་ནས་བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་བཏང་བ་མ་ཟད། བོད་མིའི་ངོ་བོ་ཆོས་དང་རིག་གཞུང་རྩ་མེད་བཟོ་ཐབས་བྱེད་ཀྱི་ཡོད་པ་དང་། ཕྱོགས་མཚུངས་ཆབ་སྲིད་སློབ་གསོ་བསྟི་གནས་ཁང་ནང་ཡུ་གུར་ཁ་ཆེ་མི་རིགས་ས་ཡ་གཅིག་ལྷག་བཀག་ཉར་བྱས་ཡོད་པ་སོགས་ཐེར་འདོན་གྱིས། ཕྱི་སྲིད་ལྷན་ཁང་ནས་ཁྲིན་ཏུ་གཞུང་ཚབ་ཁང་སྒོ་རྒྱབ་པ་དེས་བོད་མི་དང་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་གི་གནད་དོན་རྒྱུས་ལོན་སླད་འགོག་རྐྱེན་བཟོ་འཇུག་རྒྱུ་མེད་པ་གསུངས་འདུག
ལྷག་པར་དུ་བོད་ཀྱི་གནད་དོན་དང་འབྲེལ་ཕྱི་ལོ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིའི་བོད་དོན་ཁྲིམས་འཆར་ནང་གསལ་བ་ལྟར། ཨ་རིའི་ཕྱི་སྲིད་ལྷན་ཁང་ནས་གང་མགྱོགས་བོད་དོན་འབྲེལ་མཐུད་པ་ཞིག་བསྐོ་བཞག་དགོས་པའི་འབོད་སྐུལ་ཡང་ཞུས་འདུག
གཞི་རྩའི་དབྱེ་ཞིབ་པས་ཁྲིན་ཏུར་ཡོད་པའི་ཨ་རིའི་གཞུང་ཚབ་ཁང་དེས་བོད་རང་སྐྱོང་ལྗོངས་ཟེར་བ་དང་སི་ཁྲོན། ཡུ་ནན། དེ་བཞིན་ Guizhou དང་ Chongqing ཞིང་ཆེན་བཅས་ཀྱི་ནང་ལས་དོན་སྒྲུབ་ཀྱི་ཡོད་པ་དང་། གཞུང་ཚབ་ཁང་དེ་བོད་ཀྱི་ས་ཁུལ་ཕལ་མོ་ཆེ་དང་ཐག་ཉེ་ཤོས་ཤིག་ཀྱང་ཆགས་ཀྱི་ཡོད་པས། གཞུང་ཚབ་ཁང་དེ་ནི་བོད་དང་ཤིན་ཅང་ནང་གི་འགྲོ་བ་མིའི་ཐོབ་ཐང་སོགས་དང་འབྲེལ་གནས་ཚུལ་རྒྱུས་ལོན་བྱེད་རྒྱུའི་བསྟི་གནས་ཤིག་ཆགས་ཀྱི་ཡོད་པ་གསུངས་ཡོད་པ་རེད།
སྤྱིར་འདས་པའི་དུས་ཡུན་ནང་ཨ་རྒྱ་གཉིས་ཀྱི་ཆབ་སྲིད་ཀྱི་རྩོད་རྙོག་དབང་གིས་ཕན་ཚུན་གྱི་གཞུང་ཚབ་ཁང་རྒྱག་རེས་དང་། ཨ་རིའི་གཞུང་འབྲེལ་མི་སྣ་བོད་ནང་འགྲོ་སྐྱོད་ཐད་བཀག་སྡོམ། དེ་བཞིན་ཨ་རིས་རྒྱ་ནག་གི་མཉེན་ཆས་བཀག་སྡོམ་གནང་རྒྱུ་སོགས་གང་ལྟར་ཕྱོགས་གཉིས་ཀྱི་འབྲེལ་ལམ་ཇེ་ཞན་ཇེ་སྡུག་ཏུ་འགྲོ་བཞིན་པའི་ཁྲོད། ཁ་སང་ཨ་རི་གཞུང་ནས་རྒྱ་ནག་གི་སློབ་ཕྲུག་དང་ཉམས་ཞིབ་པ་ ༡༠༠༠ ཙམ་ཞིག་རྒྱ་ནག་དམར་ཤོག་ཚོགས་པའི་དམག་དཔུང་དང་འབྲེལ་བ་ཡོད་པ་དང་། དེ་བཞིན་སོ་མྱུལ་གྱི་དོགས་གཞིའི་འོག་ཁོང་རྣམས་ཀྱི་མཐོང་མཆན་ཕྱིར་འཐེན་གནང་འདུག
ཉེ་ལམ་ཨ་རིས་རྒྱ་ནག་ནས་སློབ་ཕྲུག་གི་མཐོང་མཆན་ལོག་སྤྱོད་ཀྱིས་ཨ་མི་རི་ཀའི་ཤེས་ཡོན་བསྟི་གནས་ཁང་སོགས་ཀྱི་ཁེ་ཕན་ལེན་གྱི་ཡོད་པས་ད་ལན་ཨ་རི་གཞུང་ངོས་ནས་རྒྱ་ནག་གི་དམག་དཔུང་དང་འབྲེལ་བ་ཡོད་པའི་རྒྱ་རིགས་སློབ་མཐར་སོན་པ་དང་། ཉམས་ཞིབ་པ་ཁག་ཅིག་ནས་ཏོག་དབྱིབས་གཉན་རིམས་དང་འབྲེལ་ཉམས་ཞིབ་དང་། དེ་བཞིན་ཨ་རིའི་གསང་བའི་གནད་དོན་རྐུ་འཁྱེར་བྱེད་རྒྱུ་སྔོན་འགོག་སླད་ཁོང་ཚོའི་མཐོང་མཆན་བཀག་སྡོམ་གནང་རྒྱུ་ཡིན་པ་གསུངས་འདུག འོན་ཀྱང་ཁ་སང་རྒྱ་ནག་གི་མགྲིན་ཚབ་པ་ Zhao Lijian ཡིས་ཨ་རིས་བྱེད་ཕྱོགས་དེ་ནི་ཐད་ཀར་ཆབ་སྲིད་ཀྱི་སྡང་འཛིན་ཞིག་དང་མི་རིགས་དབྱེ་འབྱེད་ཀྱི་བྱ་སྤྱོད་ཅིག་ཡིན་པ་མ་ཟད། ཡང་སྒོས་རྒྱ་རིགས་སློབ་ཕྲུག་ཚོས་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པ་དང་ཆབས་ཅིག པེ་ཅིན་ནས་དེའི་ཐད་ལན་འདེབས་བྱེད་རྒྱུ་ཡིན་པ་བརྗོད་ཡོད་པ་རེད།
