Monthly Archives: September, 2015

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་ཐོག་ཆོས་ཞུ་བ་ཚོར་ཆོས་དད་ཡོད་མིན་ལ་མ་ལྟོས་པར་ཀུན་ལ་འགྲོ་བ་མི་གཅིག་གྱུར་གྱི་འདུ་ཤེས་འཛིན་ཏེ་བྱམས་བརྩེའི་ཐོག་ནས་སྐྱོང་དགོས་པ་བཀའ་སྩལ་ཡོད་པ་རེད། དེ་རིང་ཟླ་ ༩ ཕྱི་ཚེས་ ༧ཉིན་སྔ་ཐོག་ཚོུད་ ༨།༠༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དྷ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆེད་དུ་བྱ་བའི་འདུལ་བྱ་ཨེ་ཤ་ཡའི་ནང་པའི་དད་ལྡན་ ༨༠༠ གཙོས་པའི་ཕྱི་ནང་གི་ཆོས་ཞུ་བ་ ༦༠༠༠ ལྷག་ལ་ཆོས་འབྲེལ་དབུ་འཛུགས་བསྐྱངས་སོང། ༸གོང་ས་༸སྐྱབས་མགོན་པོ་མཆོག་ནས་ཐེངས་འདིའི་བཀའ་ཆོས་སྐབས་ལྷོ་ཤར་ཨེ་ཤེ་ཡའི་ནང་པའི་དད་ལྡན་པ་ཚོས་༸གང་ཉིད་མཆོག་ལ་ཇི་ལྟར་གསོལ་འདེབས་ཞུ་དོན་ལྟར། མགོན་པོ་མཆོག་ནས་དད་ལྡན་ཆོས་ཞུ་བ་མང་ཚོགས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལེའུ་བཅུ་པ་ནས་འཕྲོ་སྐྱོང་གི་ཆོས་འབྲེལ་དང་། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ། དབུ་མའི་ཤིང་རྟ་སྲོལ་འབྱེད་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ། དེ་བཞིན་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་བཅས་ཀྱི་བཀའ་ཆོས་མཛད་རྒྱུ་ཡིན་འདུག དེ་རིང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ནས་ཆེས་ཐོག་མར་ཆོས་ཞུ་བ་ཚོར་སྔོན་འགྲོའི་ཆོས་བཤད་སྩལ་སྐབས་ད་ལན་གྱི་ཆོས་འབྲེལ་འདིར་ཡུལ་གྲུ་འདྲ་མིན་གྱི་ནང་པའི་དད་ལྡན་པ་ཁག་ཅིག་ལྷན་འཛོམས་ཀྱིས་དུས་གཅིག་ལ་གསུང་ཆོས་ཞུ་ཆེད་བཅར་བར་མགོན་པོ་༸གང་ཉིད་མཆོག་ཐུགས་དགྱེས་ཚོར་ཆེན་པོ་བྱུང་སྐོར་བཀའ་གནང་བ་དང་སྦྲགས། ཆོས་ཞུ་བའི་ངོས་ནས་ཆོས་འབྲེལ་འདི་གཙོ་བོ་སློབ་སྦྱོང་གནང་སླད་ཡོང་བར་དགོངས་ནས་དམིགས་བསལ་གྱི་ཐུགས་སྣང་གནང་དགོས་གལ་ཆེ་བའི་སྐོར་ལ་བཀའ་སློབ་སྩལ་བ་མ་ཟད། འཛམ་གླིང་འདིའི་སྟེང་ཡོད་པའི་སྲོག་ཆགས་རིགས་ཚང་མ་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་ཡིན་ཀྱང། སྲོག་ཆགས་དེ་ཚོར་འགྲོ་བ་མི་ལྟ་བུའི་བླང་དོར་འབྱེད་པའི་ཤེས་རབ་ཀྱི་རྣམ་དཔྱོད་མེད་སྟབས། ང་ཚོ་འགྲོ་བ་མིས་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་དཔྱད་ནས་བདེ་སྡུག་གཉིས་ཀྱི་རྒྱུ་རྐྱེན་གང་ཡིན་ངོས་འཛིན་པའི་ཐོག་སྡུག་བསྔལ་གྱི་རྩ་བ་སེལ་ཐབས་སུ་འབད་པ་གང་ཆེ་གནང་དགོས་པའི་བཀའ་སློབ་ཕེབས་དང། ལྷག་དོན་མགོན་པོ་མཆོག་གིས་ད་ཆ་འཛམ་གླིང་འདིིའི་སྟེང་འགྲོ་བ་མི་དུང་ཕྱུར་ ༧༠ ལྷག་ཡོད་པའི་ནང་ནས་དུང་ཕྱུར་ ༡༠ ལྷག་ཆོས་དད་མེད་མཁན་གྱི་གྲངས་འབོར་ཆགས་ཡོད། འོན་ཀྱང་ཆོས་ཁས་བླངས་མིན་ལ་མ་ལྟོས་པར་ཚང་མ་བྱམས་བརྩེ་འདོད་པ་འབའ་ཞིག་ཡིན་པས་ཆོས་དང་མ་འབྲེལ་བའི་ཡ་རབས་བཟང་སྤྱོད་ཐོག་ནས་མིའི་སྤྱི་ཚོགས་དེ་བྱམས་བརྩེ་ལྡན་པའི་སྤྱི་ཚོགས་ཤིག་ཏུ་བསྐྲུན་དགོས་པའི་སྐུལ་ལྕག་སོགས་གནང་སོང། གཞན་ཡང་༸གང་ཉིད་མཆོག་གིས་འཛམ་གླིང་འདིའི་སྟེང་ཡོད་པའི་ཆོས་ལུགས་ཚང་མའི་ནང་ལ་བྱམས་བརྩེ་སྐོར་གསུངས་ཡོད་པས་སྤྱི་ཚོགས་ལ་ཕན་པ་གཅིག་མཚུངས་སྒྲུབ་བཞིན་ཡོད་པར་ཤེས་པའི་ཐོག་ནས་ཆོས་ལུགས་ཕན་ཚུན་དབར་མཐུན་སྒྲིལ་དང་ཚང་མར་གུས་བརྩི་དགོས་པའི་སྐོར་ལའང་བཀའ་སློབ་ཟབ་མོ་ཕེབས་སོང། སྔོན་འགྲོའི་ཆོས་བཤད་གྲུབ་ཟིན་རྗེས་༸གང་ཉིད་ཀྱིས་ཆོས་ཞུ་བ་ཚོར་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་དང། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་གཉིས་ཟུང་འབྲེལ་ཐོག་ནས་བཀའ་ཆོས་མཛད་སོང་། རྩ་བའི་ད་ལན་གྱི་ཆོས་འབྲེལ་སྐབས་ཀོ་རི་ཡ། ཝི་ཏི་ནམ། ཨིན་དྷོ་ནེ་ཤི་ཡ། མ་ལ་ཤི་ཡ། ཐའེ་ལན་ཌི་དང་དེ་བཞིན་སིངྒ་པུར་སོགས་ལྷོ་ཤར་ཨེ་ཤེ་ཡའི་ཆོས་ཞུ་བ་ ༨༠༠ གཙོས་པའི་རྒྱལ་ཁབ་ ༧༠ ནས་ཆོས་ཞུ་བ་ཁྱོན་མི་གྲངས་ ༦༠༠༠ ལྷག་བཅར་ཡོད་པ་མ་ཟད། ཐེངས་འདིའི་ཆོས་འབྲེལ་སྐབས་དམིགས་བསལ་དེ་སྔ་དང་མི་འདྲ་བར་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཆོས་སྩལ་བའི་ཐོག་ལ་དོགས་འདྲི་དང་ཉིན་རྒྱབ་ཆོས་རྭའི་ནང་དུ་ནང་པའི་དགེ་བཤེས་ཁག་ཅིག་བཀོད་སྒྲིག་འོག་ཆོས་ཞུ་བ་རྣམས་ནས་སྦྱང་བཤད་གནང་གི་འདུག

རྒྱ་ནག་གཞུང་ནས་ཟླ་ཤས་གོང་བོད་སྐོར་རྒྱབ་ཤ་དཀར་པོ་ཞིག་འདོན་སྤེལ་བརྒྱུད། ༸གོང་ས་མཆོག་གི་ལམ་སྟོན་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་དེ་ནི་རྒྱ་གཞུང་གི་རྩ་ཁྲིམས་དང་ཡོངས་སུ་འགལ་གྱི་ཡོད་པའི་སྐྱོན་བརྗོད་ཤུགས་ཆེ་བྱས་རྗེས། ཁ་སང་ཕྱི་ཟླ་ ༩ ཚེས་ ༦ ཉིན་སླར་ཡང་རྒྱབ་ཤ་དཀར་པོ་ཞིག་འདོན་སྤེལ་བརྒྱུད། བོད་ནང་མི་རིགས་ས་ཁོངས་རང་སྐྱོང་ལག་བསྟར་འོག་ཕྱོགས་ཡོངས་ནས་ཡར་ཐོན་གོང་འཕེལ་གཏོང་མུས་ཡིན་སྐོར་བཤད་འདུག དེ་ཡང་རྒྱ་ནག་རྒྱལ་སྲིད་སྤྱི་ཁྱབ་ལས་ཁང་གི་གསར་འགྱུར་ཚན་པས། ཁ་སང་རྒྱལ་ས་པེ་ཅིང་དུ་བོད་སྐོར་སླར་ཡང་རྒྱབ་ཤ་དཀར་པོ་ཞིག་འདོན་སྤེལ་བྱེད་པ་དང་ཆབས་ཅིག རྒྱ་གཞུང་གིས་འདས་པའི་ལོ་ངོ་ ༥༠ དེའི་ནང་བོད་ལྗོངས་ཀྱི་སྤྱི་ཚོགས་རྙིང་པའི་མུན་ནག་དང་རྗེས་ལུས་དེ་བཞིན་མདུན་སྐྱོད་འཕེལ་རྒྱས་ཀྱི་ལམ་བུར་སྐྱོད་བཞིན་ཡོད་སྐོར་དང་། དམངས་ཀྱི་བདེ་སྐྱིད་འཚོ་བ་གོང་སྤེལ་དང་། ཕུལ་བྱུང་གི་སྲོལ་རྒྱུན་རིག་གནས་སྲུང་སྐྱོབ་དང་དར་སྤེལ། ཆོས་ལུགས་དད་མོས་རང་དབང་ལ་བརྩི་འཇོག་དང་སྲུང་སྐྱོབ། བོད་ནང་སྐྱེ་ཁམས་དཔལ་ཡོན་འཛུགས་སྐྲུན་ལ་སྐུལ་འདེད་བྱེད་པའི་གནད་དོན་ཁག་ཅིག་སྐོར་ལ་བརྒྱུད་བསྒྲགས་བྱེད་འདུག ལྷག་པར་དུ་ཁ་སང་གི་ཚོགས་འདུ་དེའི་ཐོག་བོད་རང་སྐྱོང་ལྗོངས་ཀྱི་འགོ་གཙོ་གཞོན་པ་རྡོ་རྗེ་འགྲུབ་ཀྱིས་བོད་ནང་མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱེད་རྒྱུ་ནི་བོད་ལྗོངས་ཀྱི་ལོ་རྒྱུས་གོང་འཕེལ་དང་སྤྱི་ཚོགས་ཡར་རྒྱས་ཡོང་བའི་ཕྱི་རོལ་ཡུལ་གྱི་བླང་བྱར་བཤད་པ་དང་།བོད་ལྗོངས་ཀྱི་རིགས་སོ་སོའི་མི་དམངས་ཀྱི་རྩ་བའི་ཁེ་ཕན་དང་འཚམ་ཞེས་དང་། མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱེད་རྒྱུ་ནི། ཀྲུང་གོའི་རྒྱལ་ཁབ་ཀྱི་གནས་ཚུལ་དང་བོད་ལྗོངས་ས་གནས་ཀྱི་དོན་དངོས་གནས་ཚུལ་དང་ཁྱོན་ཡོངས་ནས་འཚམ་སྟེ། བོད་ལྗོངས་ཡར་རྒྱས་གོང་འཕེལ་དུ་འགྲོ་བའི་གདམ་ག་ཡང་དག་ཡིན་ཞེས་བརྗོད་འདུག འོན་ཀྱང་བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་མགྲིན་ཚབ་པ་བཀྲིས་ཕུན་ཚོགས་ལགས་ཀྱིས་གསུངས་པར། རྒྱ་གཞུང་ནས་རྒྱབ་དཀར་པོ་བསྟུད་མར་བཏོན་ནས་འགྲེལ་བཤད་བསྐྱར་བཤད་ཡང་བཤད་བྱེད་ཀྱི་ཡོད་པ་འདི་ནི་གཞན་གྱི་དགའ་མོས་ཐོབ་ཐབས་ཙམ་ཤིག་ལས། རང་སྐྱོང་དང་ཡར་རྒྱས་བཤད་བཞིན་པ་དེ་དག་དོན་དངོས་བོད་མི་རྣམས་ལ་ཕན་ཐོགས་མེད་པ་གསལ་པོ་ཡིན་པ་གསུངས་ཀྱི་འདུག དེ་དེ་བཞིན་རྒྱ་ནག་ཉམས་ཞིབ་པ་སྤྱི་འཐུས་འབའ་པ་སྐལ་བཟང་རྒྱལ་མཚན་ལགས་ཀྱིས་གསུངས་པར། རྒྱ་ནག་གཞུང་ནས་ད་བར་རང་སྐྱོང་གི་ཁྲིམས་ལུགས་ཤིག་བཟོ་ཐུབ་མེད་པའི་དུས་སྐབས་འདིར། རང་སྐྱོང་གི་ཁྲིམས་ལུགས་ལག་བསྟར་བྱེད་ཐུབ་ཡག་ཡོད་མ་རེད་ཅེས་དང། ལྷག་པར་དུ་རྒྱ་ནག་ནང་གི་བློ་གཟུ་བོར་གནས་པའི་ཉམས་ཞིབ་པ་ཚོས་བོད་ནང་གི་རང་སྐྱོང་གི་ཐོབ་ཐང་དེ་རྒྱ་ནག་གི་སྤྱི་སྟངས་མངའ་སྡེ་ལས་ཆུང་བ་ཡོད་པ་ངོས་འཛིན་གནང་གི་ཡོད་སྐོར་གསུངས་ཀྱི་འདུག ཁོང་གིས་མུ་མཐུད་གསུངས་པར་རྒྱ་ནག་གཞུང་ནས་ཤིང་ཅང་དང་སོག་པོ། གཞན་ཡང་མང་གཙོ་དོན་གཉེར་ཅན་གྱི་ཐོག་ལ་རྒྱབ་ཤ་དཀར་པོ་དེ་ལྟར་བཏོན་གྱི་མེད་ནའང། བོད་སྐོར་ཉུང་མཐར་ལོ་གཅིག་ལ་རྒྱབ་ཤ་དཀར་པོ་ཚར་གཅིག་བཏོན་དགོས་དོན་གཙོ་བོ་ནི། གཞིས་ལུས་བོད་མིའི་སྙིང་སྟོབས་དང་ཕྱི་ཕྱོགས་བོད་མིའི་སྒྲིག་འཛུགས་ཀྱི་ནུས་སྟོབས་ཁ་གཏད་གཅོག་ཆེད་ཀྱི་ཡ་ལེན་མ་བྱེད་ཀ་མེད་ཅིག་ཏུ་ངོས་འཛིན་གནང་གི་འདུག ཁ་སང་རྒྱ་ནག་རྒྱལ་སྲིད་སྤྱི་ཁྱབ་ལས་ཁང་ནས་བོད་སྐོར་རྒྱབ་ཤ་དཀར་པོ་འདོན་སྤེལ་བྱས་པ་དེའི་ཐོག་ནས། བོད་རང་སྐྱོང་ལྗོངས་ཀྱི་འཐབ་ཕྱོགས་གཅིག་གྱུར་ལས་ཁང་གི་ཚོགས་མི་ནོར་བུ་དོན་འགྲུབ་ཀྱིས་པཎ་དགེ་འདུན་ཆོས་ཀྱི་ཉི་མ་མཆོག་གི་གནད་དོན་སྐོར་ལ་ལན་འདེབས་བྱས་པའི་ཁྲོད། པཎ་ཆེན་རིན་པོ་ཆེ་རྒྱུན་གཏན་གྱི་འཚོ་བ་སྐྱེལ་ཞིང་བདེ་ཐང་ངང་འཚར་ལོངས་བྱེད་་བཞིན་ཡོད་པས། ཁོང་བསུན་པོ་ཆགས་འདོད་བྱེད་ཀྱི་མི་འདུག་བཅས་བཤད་པ་སྦྲགས། ནོར་བུ་དོན་འགྲུབ་ཀྱིས་ཏཱ་ལའི་བླ་མས་པཎ་བླ་མའི་ཡང་སྲིད་ངོས་འཛིན་བྱས་པ་དེ་ནི་ལོ་རྒྱུས་ལ་སྣང་མེད་དང་ཆོས་ཕྱོགས་ཀྱི་ལམ་ལུགས་སྲོལ་ལ་རྩིས་མེད་བཏང་པ་ཞིག་ཏུ་འགྲེལ་བརྗོད་བྱས་འདུག རྩ་བའི་རྒྱ་ནག་གཞུང་ནས་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་འཛིན་བཟུང་བཙན་ཁྲིད་བྱས་ནས་ད་བར་ལོ་ངོ་༢༠སོང་ཡོད་པ་འདིའི་ཁྲོད། གཞུང་གི་འགོ་ཁྲིད་ཚོས་རིན་པོ་བདེ་ཐང་ངང་ཡོད་སྐོར་བཤད་པ་ཙམ་ལས་མང་ཚོགས་ཀྱི་མིག་ལམ་དུ་བསྟན་མེད་པ་རེད། གཞི་རྩའི་རྒྱ་ནག་གཞུང་ནས་ཕྱི་ལོ་༡༩༩༢ནས་ད་བར་བོད་སྐོར་འཁོད་པའི་རྒྱབ་ཤ་དཀར་པོ་ཐེངས་༡༢་འདོན་སྤེལ་བརྒྱུད། བོད་ལྗོངས་ཀྱི་སྤྱི་ཚོགས་རྙིང་པ་མུན་ནག་དང་རྗེས་ལུས་དེ་བཞིན་རྒྱ་ནག་གུང་བྲན་ཏང་གི་ཡར་ཐོན་ཅན་གྱི་སྤྲོ་སྣང་ལྡན་པའི་བོད་ལྗོངས་གསར་པ་ཞིག་ཏུ་སྐྲུན་བཞིན་པའི་གནས་ཚུལ་བརྒྱུད་བསྒྲགས་དང། ལྷག་པར་དུ་བརྒྱུད་ལམ་འདིའི་ཐོག་ནས་རྒྱ་ནག་གཞུང་གིས་༸གོང་ས་མཆོག་ལ་རྒྱལ་ཁབ་ཁ་བྲལ་གཏོང་མཁན་དུ་ངོས་འཛིན་གྱིས་མཚན་སྨས་ཞུ་ས་དང་༸གང་ཉིད་ཀྱི་ལམ་སྟོན་གནང་པའི་གཉིས་སྨན་དབུ་ལམ་ལ་སྐྱོན་བརྗོད་སྔ་རྗེས་བྱེད་ས་ཤིག་ཡིན་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གིས་བཞུགས་སྒར་དུ་དབུ་མ་རིན་ཆེན་ཕྲེང་བའི་བཀའ་ཆོས་དབུ་འཛུགས། རྒྱབ་ཤ་དཀར་པོ་ཞེས་པ་འདི་བོད་མིའི་སྒྲིག་འཛུགས་ལ་ཁ་གཏད་གཅོག་ཆེད་ཀྱི་འཁྱོག་བཤད་ཅིག་ཡིན་པ་གསུངས་འདུག ༸གོང་ས་མཆོག་གིས་དབྱིན་ཡུལ་གྲོས་ཚོགས་འཐུས་མི་ཁག་ཅིག་དང་འཇལ་འཕྲད་གནང་འཆར། སེ་ར་ཐེག་ཆེན་གླིང་དུ་དགེ་ལུགས་རྒྱུགས་སྤྲོད་ཆེན་མོ་འཇུག་སྒྲིལ། བོད་ཀྱི་བེུད་ལྷན་ཚོགས་ནས་མང་གཙོ་དང་འོས་བསྡུའི་སྐོར་གོ་རྟོགས་སྤེལ་བཞིན་པ། Monday 07/09/2015 Dalai Lama begins 4 days teaching in Dharamsala China’s white paper, another propaganda stunt: Exile China expert Dalai Lama to meet with UK parliamentarians this month TWA holds workshop on Election and Democracy ‘Gelug Gyugtroe Chenmo’ concludes at Sera Thekchenling

ཁ་སང་ཟླ་ ༩ ཕྱི་ཚེས་ ༦ ཉིན་བོད་ཀྱི་བུ་མེད་ལྷན་ཚོགས་ཀྱིས་གོ་སྒྲིག་འོག་སྲིད་སྐྱོང་དང་སྤྱི་འཐུས་ཀྱི་འོས་བསྡུ་དངོས་གཞི་ལས་རིམ་བསླེབ་ལ་ཉེ་བ་དང་བསྟུན། རྒྱ་གར་གྱི་རྒྱལ་ས་ལྡི་ལི་བསམ་ཡས་གླིང་དུ་ས་གནས་བུ་མེད་ ༢༠ ལྷག་ལ་འོས་བསྡུ་དང་འབྲེལ་བའི་གོ་རྟོགས་རྒྱ་མི་ཆུང་བ་ཞིག་སྤེལ་བཞིན་ཡོད་འདུག རྩ་བའི་གོ་རྟོགས་ཀྱི་ཟབ་སྦྱོང་དེ་བོད་ཀྱི་བུ་མེད་གཅིག་པུ་མིན་པར་རྒྱ་བལ་འབྲུག་གསུམ་ནང་གི་བོད་མི་ཚོར་མང་གཙོའི་ཁེ་ཕན་དང་འོས་བསྡུའི་རིན་ཐང་སྐོར་གོ་རྟོགས་སྤེལ་བཞིན་ཡོད་པ་རེད།  

སྤེན་པ་ཚེ་རིང་། "སྲིད་སྐྱོང་ལངས་རྒྱུའིི་གདེང་ཚོད་ཡོད་ལ་དང་སྤོབས་པ་ཡང་ཡོད། སྔོན་མ་ནས་སྤྱི་པའི་ལས་དོན་བསྒྲུབ་རྒྱུའི་དམ་བཅའ་ཡོད།” "ད་བར་སྤྱི་པའི་ལས་དོན་ལ་འཐུས་ཤོར་བཏང་མྱོང་མེད།” “ཆོལ་གསུམ་ཆིག་སྒྲིལ་དང་མང་གཙོའི་ཀ་བ་གསུམ་གྱི་ནུས་པ་མཉམ་སྤུངས་ཐོག་འབད་རྒྱུ་ཡིན།” “གང་ཟག་ལས་སྒྲིག་འཛུགས་གལ་ཆེ་བ་ཡིན།” “ང་ཚོའི་འཐབ་རྩོད་ཀྱི་དཀའ་ངལ་དེ་ཕྱི་མིས་སེལ་ཐུབ་ཀྱི་མ་རེད།” “བོད་ཀྱི་འཕྲལ་ཕུགས་ཀྱི་དཀའ་ངལ་སེལ་ཆེད་དབུ་མའི་ལམ་ལས་ལྷག་པ་མེད།” “ཤེས་ཡོན་སྲིད་བྱུས་ཀྱི་དགོས་དམིགས་གཙོ་བོ་ལེགས་ཉེས་བླང་དོར་གྱི་བློ་མིག་འབྱེད་ཆེད་རེད།” “རྒྱ་གཞུང་གི་རོགས་དངུལ་ཆད་མཚམས་དོལ་རྒྱལ་རྗེས་འབྲང་པ་རང་བཞིན་གྱིས་མེད་པ་ཆགས་རྒྱུ་རེད།” “འོས་འཕེན་སྐབས་ཕྱོགས་རིས་མེད་པར་རྩ་དོན་ལ་ཕན་པའི་གང་ཟག་འདེམས་དགོས།”

ཉན་པ།: Listen ཕབ་ལེན། Download ཕྱི་ལོ་ ༢༠༡༦ ལོའི་སྲིད་སྐྱོང་གི་འོས་མི་ངོ་སྤྲོད། སྤེན་པ་ཚེ་རིང་། Sunday 06/09/2015 Portrait: 2016 Sikyong Candidate Penpa Tsering