Monthly Archives: November, 2015

རྒྱ་གཞུང་ནས་དབྱེ་བའི་བོད་རང་སྐྱོང་ལྗོངས་ཀྱི་གོ་འཁྲིད་ཀྱིས་བོད་ཀྱི་ས་ཁུལ་ཁག་གི་ནང་ལྟ་སྐོར་དུ་ཕེབས་པའི་རྒྱལ་སྤྱིའི་གསར་འགོད་པ་རྣམས་ལ་རྒྱ་ནག་གཞུང་གིས་བོད་ཀྱི་ས་ཁྱོན་ཡོངས་ལ་བཟོ་ལས་ཀྱི་འཛུགས་བསྐྲུན་རྒྱ་ཆེ་སྤེལ་ཡོད་པ་མ་ཟད། བོད་མི་རིགས་གཙོ་བོ་འགྱུར་པའི་གྲངས་ཉུང་མི་རིགས་རྣམས་ལ་ལས་གནས་དང་མཐུན་འགྱུར་སོགས་ཀྱི་གོ་སྐབས་འདྲ་མཉམ་ཡོད་པས། གསར་འགོད་པ་རྣམས་ནས་རྒྱལ་སྤྱིའི་ཐོག་བོད་ནང་ཡར་རྒྱས་ཕྱིན་པའི་གནས་ཚུལ་ཁག་གསལ་བཤད་གནང་དགོས་པ་བཤད་འདུག  ཟླ་བ་འདིའི་ཕྱི་ཚེས་༡༦ཡས་མས་ཙམ་ནས་རྒྱལ་སྤྱིའི་ཐོག་དར་ཁྱབ་ཆེ་བའི་ Bloomberg Businessweek, Financial Times, Reuters, Spanish Daily དེ་བཞིན་France དང་ Germany གྱི་གསར་ཁང་སོགས་རྒྱལ་སྤྱིའི་ཐོག་ཆེས་དར་ཁྱབ་ཆེ་བའི་གསར་ཁང་བཅུ་བཞིའི་གསར་འགོད་པ་ཁག་ཅིག་བོད་ཀྱི་རྒྱལ་ས་ལྷ་ས་གཙོས་པའི་ཉེ་འཁོར་ས་གནས་ཁག་གི་ནང་ལ་སྐོར་བསྐྱོད་གནང་པཞིན་པའི་ཁྲོད། ཁ་ཉིན་ཕྱི་ཚེས་༡༩ཉིན་རྒྱབ་ཏུ་རྒྱ་ནག་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་གོ་འཁྲིད་གཞོན་པ་སྐལ་བཟང་ཚེ་རིང་དང་དྲུང་ཆེ་Deng Xiaogang རྣམ་གཉིས་གཙོས་པའི་ལས་བྱེད་ཁག་ཅིག་ནས་རྒྱལ་སྤྱིའི་གསར་འགོད་པ་རྣམས་དང་ཐུག་འཕྲད་བྱས་ཡོད་པ་མ་ཟད།  སྐབས་དེར་ Deng Xiaogang གྱི་གསར་འགོད་པ་རྣམས་ལ་བོད་འདི་རྒྱ་ནག་དང་ཁ་བྲལ་ཐབས་མེད་པའི་རྒྱ་ནག་རྒྱལ་ཁབ་ཆེན་པོའི་ཆ་ཤས་ཤིག་ཡིན་པ་དང་། འདས་པའི་ལོ་ངོ་དྲུག་ཅུའི་ནང་བོད་ཀྱི་ས་ཁྱོན་ཡོངས་ལ་དཔལ་འབྱོར་དང་སྤྱི་ཚོགས་ཀྱི་བདེ་འཇགས་སོགས་ཀྱི་ཐད་ལ་ཡར་རྒྱས་སྔར་ལྷག་རྒྱ་ཆེ་བཏང་ཡོད་པ་བཤད་འདུག གཞི་རྩའི་རྒྱལ་སྤྱིའི་གསར་འགོད་པ་ཁག་ནས་བོད་ཀྱི་རྒྱལ་ས་ལྷ་ས་དང་གནམ་ཚོ། དེ་བཞིན་སེ་ར་དགོན་པ་བཅས་སུ་ཆེད་ཕེབས་གནང་ཡོད་པ་མ་ཟད། རྒྱལ་སྤྱའི་ཐོག་དར་ཁྱབ་ཆེ་བའི་ Bloomberg Businessweek གསར་ཁང་གི་གསར་འགོད་པ་ Dexter Roberts ལགས་དང་། Finalcial Times གསར་ཁང་གི་གསར་འགོད་པ་ Lucy Hornby ལགས་རྣམ་གཉིས་ཀྱིས་རང་ཉིད་ཀྱི་འཕྲུལ་སྒྲའི་ཐོག་རྒྱ་ནག་གཞུང་ལ་ཟུར་ཟ་དང་སྦྲགས་ཏེ་རྒྱ་གཞུང་གིས་བོད་ནང་དམ་དྲག་དང་བསམ་བློའི་སློབ་གསོ་དྲིལ་བསྒྲགས་བྱེད་མུས་ཡིན་པ་སོགས་ཀྱི་གནད་དོན་ཁག་ཅིག་པར་རིས་དང་ལྷན་འདོན་སྤེལ་གནང་འདུག དེ་བཞིན་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hong Lei ཡིས་ཡོ་རོབ་མཐུན་ཚོགས་ཀྱི་སྐུ་ཚབ་ཚོས་རྒྱ་གཞུང་གི་སྒྲིག་ཁྲིམས་སྟངས་འཛིན་བྱེད་ཕྱོགས་ཐད་ལ་འགྲེལ་བརྗོད་གནང་པ་མ་ཟད། ལྷག་དོན་རྒྱ་ནག་གཞུང་གི་ནང་སྲིད་གནད་དོན་ཐོག་ལ་ཐེ་བྱུས་བྱས་པ་དང་། ཡོ་རོབ་མཐུན་ཚོགས་ཀྱི་སྐུ་ཚབ་རྣམ་པ་ངེས་པར་དུ་ལྟ་རྟོག་བྱ་དགོས་པ་ནི་རྒྱ་ནག་ནང་ད་བར་ཡར་རྒྱས་ཕྱིན་པའི་འགྲོ་བ་མིའི་ཐོབ་ཐང་གི་གནས་སྟངས་དེ་དག་རེད་ཅེས་བརྗོད་ཡོད་པ་རེད། གཞི་རྩའི་ཡོ་རོབ་མཐུན་ཚོགས་གཙོས་པའི་རྒྱལ་སྤྱིའི་ཚོགས་པ་མང་པོ་ཞིག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ལ་ཆེས་བློ་ཚབ་ཆེན་པོ་གནང་མུས་ཡིན་ཀྱང་། རྒྱ་ནག་གཞུང་གིས་རང་སྐྱོན་རྣམས་བཟང་ཕྱོགས་ཀྱི་ཐོག་ནས་ངོས་ལེན་གང་ཡང་མི་བྱེད་པའི་ཁར། རྒྱ་ནག་རང་གི་ཁྲིམས་སྒྲིག་ཁག་ཁྱད་ཆོས་དང་ལྡན་པའི་ཁྲིམས་སྒྲིག་ཞིག་གི་ཐོག་ནས་མི་དམངས་ལ་སྟངས་འཛིན་བྱེད་བཞིན་ཡོད་སྐོར་བཤད་བཞིན་ཡོད་པ་རེད།

རྒྱལ་སྤྱིའི་གསར་འགོད་པ་ཁག་ཅིག་ནས་བོད་ཀྱི་རྒྱལ་ས་ལྷ་སར་ལྟ་སྐོར་དུ་ཕེབས་འདུག་པ་མ་ཟད། རྒྱ་ནག་གཞུང་གིས་ཁུལ་དེ་དག་ནང་ལག་བསྟར་བྱེད་བཞིན་པའི་གནས་ཚུལ་ཁག་ཅིག་སྤྱི་ཚོགས་དྲ་འདྲ་མིན་བརྒྱུད་གསལ་བཏོན་གནང་འདུག ལྕམ་ནེནྶི་པེ་ལོ་སི་མཆོག་གིས་དབུ་ཁྲིད་པའི་གྲོས་ཚོགས་འཐུས་མི་སྐོར་ཞིག་ཟླ་བ་འདིའི་ཕྱི་ཚེས་ ༥ ནས་དབུ་འཛུགས་ཀྱིས་ཚེས་ ༡༢ བར་རྒྱ་ནག་གི་རྒྱལ་ས་པེ་ཅིང་དང་འདི་བཞིན་ཧོང་ཀོང་། ལྷག་པར་དུ་བོད་ཀྱི་རྒྱལ་ས་ལྷ་སར་གཞུང་འབྲེལ་འཚམས་གཟིགས་གྲུབ་མཚམས་འདིར་ཉེ་སྔོན་ཕྱི་ཚེས་ ༡༦ ཡས་མས་ཙམ་ལ་རྒྱལ་སྤྱའི་ཐོག་དར་ཁྱབ་ཆེ་བའི་ Bloomberg Businessweek  གསར་ཁང་གི་གསར་འགོད་པ་Dexter Roberts ལགས་དང་། Financial Times གསར་ཁང་གི་གསར་འགོད་པ་ Lucy Hornby ལགས་གཙོས་པའི་རྒྱལ་སྤྱའི་གསར་འགོད་པ་ཁག་ཅིག་ནས་བོད་ཀྱི་རྒྱལ་ས་ལྷ་ས་གཙོས་པའི་ཉེ་འཁོར་གྱི་ས་གནས་ཁག་གི་ནང་ལ་གཟིགས་སྐོར་དུ་ཕེབས་ཡོད་པ་རེད། སྐབས་དེར་ཁོང་རྣམ་པས་རྒྱལ་སྤྱིའི་ཐོག་དར་ཁྱབ་ཆེ་བའི་སྤྱི་ཚོགས་འབྲེལ་མཐུད་ཀྱི་འཕྲུལ་སྒྲ་Tweeter ཐོག་རྒྱ་ནག་གཞུང་ལ་ཟུར་ཟ་དང་སྦྲགས་ཏེ་རྒྱ་གཞུང་གིས་བོད་ནང་དམ་དྲག་དང་བསམ་བློའི་སློབ་གསོ་དྲིལ་བསྒྲགས་བྱེད་མུས་ཡིན་པ་སོགས་ཀྱི་གནད་དོན་ཁག་ཅིག་པར་རིས་དང་ལྷན་འདོན་སྤེལ་གནང་འདུག  དེ་ཡང་གསར་འགོད་པ་Dexter Roberts ལགས་ཀྱིས་བོད་ཀྱི་རྒྱལ་ས་ལྷ་སའི་ཁྲོམ་ཞུང་དང་དེའི་ཉེ་འགྲམ་དུ་ཡོད་པའི་ལྷ་སའི་ཇོ་ཁང་གཡས་གཡོན་གྱི་པར་ལེན་ཏེ་ས་ཁུལ་དེ་དག་གི་ནང་ལ་རྒྱ་ནག་གཞུང་གིས་བསྔོགས་བཤེར་ཁང་མང་པོ་བཙུགས་ཏེ་མི་དམངས་རྣམས་ལ་མུ་མཐུད་དམ་དྲག་བྱེད་བཞིན་ཡོད་པའི་གནས་སྟངས་དང་། ཁྲོམ་གཞུང་གྱི་རྩིག་པ་ད ང་། ཁང་པའི་གྱང་སོགས་ཀྱི་སྟེང་ལ་ “གུང་ཁྲན་ཏང་ཡག སྤྱི་ཚོགས་རིང་ལུགས་ཡག རླབས་ཆེན་མེས་རྒྱལ་ཡག མི་དམངས་དམག་དཔུང་ཡག” སོགས་ཀྱི་སྦྱར་ཡིག་སྦྱར་པ་དང་། ས་གནས་མི་དམངས་རྣམས་ཀྱི་ཁང་པའི་ཐོག་རྒྱ་གཞུང་གི་རྒྱལ་དར་བསྒྲེང་འཛུགས་བྱས་བཅུག་པ་སོགས་མཚོན་རྒྱ་གཞུང་གིས་དུས་ད་ལྟའི་ཆར་ལའང་བོད་ནང་ཆབ་སྲིད་ཀྱི་སློབ་གསོ་མང་དག་ཞིག་སྤེལ་མུས་ཡིན་པའི་རྣམ་པ་རྒྱལ་སྤྱའི་ཐོག་གསལ་བཏོན་གནང་ཡོད་པ་རེད།  དེ་བཞིན་ Financial Times གསར་ཁང་གི་གསར་འགོད་པ་ Lucy Hornby ལགས་ཀྱིས་ཁོ་མོའི་འཕྲུལ་སྒྲ་   Tweeter  ཐོག་ས་གནས་རྒྱ་གཞུང་གི་ལས་བྱེད་ཚོས་གསར་འགོད་པ་རྣམས་ས་གནས་མི་མང་དཀྱུས་མ་རྣམས་དང་ཐུག་འཕྲད་བྱེད་བཅུག་པའི་རྣམ་པ་ཤུགས་ཆེ་སྟོན་ཡོད་ཀྱང་། རྒྱ་གཞུང་གི་ལས་བྱེད་དེ་དག་གིས་ཁུལ་དེའི་བོད་མི་ཚོའི་ནང་འཁྲིད་ཁུལ་ཙམ་ལས་དོན་དངོས་ཐོག་བོད་མི་དེ་རྣམས་ཁུལ་དེའི་ནང་ནས་ཕྱུག་གྲས་དང་དེ་སྔོན་ལས་བྱེད་བྱེད་མྱོང་ཡོད་པ་འབའ་ཞིག་ཡིན་པ་རེད་འདུག་ཅེས་གསལ་བཏོན་གནང་པ་མ་ཟད། ཁོང་ཚོ་སེ་ར་དགོན་པར་གཟིགས་སྐོར་དུ་ཕེབས་སྐབས། དགོན་པའི་པར་རིས་ཤིག་བླངས་ཏེ་དགོན་པ་མཛེས་སྡུག་ལྡན་པ་ཞིག་འདུག  འོན་ཀྱང་ངའི་ད་བར་བོད་ཀྱི་དགོན་པ་སྟོང་པ་འདི་འདྲ་ཞིག་ནམ་ཡང་མཐོང་མྱོང་མེད་ཅེས་གསུངས་འདུག ལྷག་དོན་དགོན་པའི་གཡས་གཡོན་དུ་མི་མིག་ཤེལ་ནག་པོ་གྱོན་ནས་ཟུར་བལྟ་བྱེད་བཞིན་པ་དེ་དག་ནི་རྒྱ་གཞུང་གི་གསང་བའི་ཐོག་སོ་པ་བཞག་ཡོད་པའི་ཚོད་དཔག་ཀྱང་གནང་འདུག  

ཉན་པ།: Listen ཕབ་ལེན། Download རྒྱལ་སྤྱིའི་གསར་འགོད་པ་ཁག་ཅིག་བོད་ནང་ལྟ་སྐོར་དུ་བཏང་འདུག ཡུ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་མཆོག་རྒྱ་ནག་ནང་གཟིགས་སྐོར་གནང་འདུག བོད་ཀྱི་གཏན་འཇག་འཁྱག་རོམ་རྩ་མེད་དུ་འགྲོ་ཉེན་ཡོད་པ་གསུངས་འདུག དབྱིན་ཡུལ་ནང་བོད་ཀྱི་གསང་བའི་ལྷ་ཁང་ཞེས་པའི་འགྲེམས་སྟོན་གོ་སྒྲིག འབྲས་སྤུངས་སུ་དབུ་མ་དང་ཕར་ཕྱིན་ཐོག་འཇང་དགུན་ཆོས་གསར་དུ་འཛུགས། དམིགས་བསལ་ལེ་ཚན། བོད་མིའི་སུད་ཚོང་སྐོར། Friday 20/11/2015 A group of foreign Journalists visits Tibet EU special representative for human rights visits China Tibetan plateau will possibly disappear around 2100 Tibet’s Secret Temple exhibition held in UK Diaspora Feature: Tibetan Sweater Seller

ཡོ་རོབ་རྒྱལ་ཁབ་དབྱིན་ཡུལ་གྱི་རྒྱལ་ས་ལོན་ཌན་དུ་བོད་ཀྱི་གནའ་བོའི་ཆོས་རྫས་དང་ལྡེབས་རིས་ཁག་ཅིག་འགྲེམས་སྟོན་གནང་ཡོད་པ་རེད། ཁ་སང་ཕྱི་ཚེས་༡༩ཉིན་དབྱིན་ཡུལ་གྱི་རྒྱལ་ས་ལོན་ཌན་ནང་རྟེན་གཞི་བྱས་པའི་Wellcome Collectionའགྲེམས་སྟོན་ཚོགས་ཁང་ནང་གོ་སྒྲིག་གནང་ཐོག་ནང་པའི་གསང་སྔགས་ཀྱི་ཉམས་ལེན་གནང་ཕྱོགས་དང་འབྲེལ་བའི་ཆོས་རྫས་ཁྱོན་༡༢༠ལྷག་འགྲེམས་སྟོན་གནང་ཡོད་པ་རེད། བོད་ཀྱི་གསང་བའི་ལྷ་ཁང་(Tibet’s Secret Temple) གི་འགྲེམས་སྟོན་དེ་ལྟར་གནང་དོན་གཙོ་བོ་ནི་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏཱ་ལའི་རྒྱབ་ངོས་སུ་དུས་རབས་བཅུ་བདུན་པའི་ནང། རྒྱལ་མཆོག་སྐུ་ཕྲེང་དྲུག་མཆོག་གིས་ཕྱག་བཏབ་པའི་རྫོང་རྒྱབ་ཀླུ་ཁང་གི་སྐོར་ཡིན་པ་རེད། ད་ལན་གྱི་འགྲེམས་སྟོན་དེ་ཡང་ཟླ་བ་གསུམ་གྱི་རིང་ཚོགས་ཀྱི་ཡོད་པ་དང། འགྲེམས་སྟོན་དེའི་ནང་བོད་ཀྱི་རྗོང་རྒྱབ་ཀླུ་ཁང་གི་སྔ་རྗེས་པར་རིས་དང། ལོ་རྒྱུས་ཀྱི་རྒྱབ་ལྗོངས་གཙོས་པའི་འཛམ་གླིང་ས་ཕྱོགས་གང་ས་ནས་བསྡུ་རུབ་ཞུས་པའི་བོད་ཀྱི་ཐང་ཁ་རྙིང་པ་དང། སྐུ་འདྲ། བོད་ཀྱི་ཡིག་གཟུགས། གནའ་རྫས། དེ་བཞིན་བོད་སྔ་རྗེས་ཀྱི་བརྙན་པར་སོགས་བོད་མི་རིགས་ཀྱི་གནའ་བོའི་རིག་གནས་ཀྱི་སྒྱུ་སྩལ་འདྲ་མིན་ལས་གྲུབ་པའི་ལྕ་དངོས་རྙིང་པ་རིན་ཐང་བྲལ་༡༢༠ལྷག་འགྲེམས་སྟོན་གནང་འདུག ལྷག་པར་དུ་དེ་སྔ་དུས་བདུན་པའི་ནང་རྫོང་རྒྱབ་ཀླུ་ཁང་དུ་བཞེངས་པའི་རིན་བྲལ་ལྡེབས་རིས་ཀྱི་པར་རིས་རྙིང་པ་ཁག་གསུམ་ཡང་འགྲེམས་སྟོན་ཞུས་ཡོད་པ་རེད། ལྡེབས་རིས་རྙིང་པ་དེ་ནི། ཨ་རིའི་པར་ལེན་གསར་འགོད་པ་སྐུ་ཞབས་Thomas lardལགས་ཀྱིས་དེ་སྔ་བོད་དུ་བསྐྱོད་པའི་སྐབས་རྫོང་རྒྱབ་ཀླུ་ཁང་ནང་ནས་པར་ལེན་ཞུས་ནས་དེང་དུས་ཀྱི་འཕྲུལ་ཆས་ཐོག་བསྐྱར་བཟོ་གནང་པ་ཞིག་ཡིན་པ་རེད། རྩ་བའི་ད་ལན་གྱི་འགྲེམས་སྟོན་དེ་ནི་ཁ་སང་ཚེས་ ༡༩ ནས་དབུ་བཙུགས་གནང་ཐོག་ལོ་རྗེས་མའི་ཕྱི་ཟླ་ ༢ ཚེས་༢༨བར་ཚོགས་ཀྱི་ཡོད་པ་རེད་འདུག  

ཡོ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་སྐུ་ཞབས་ Stavros Lambrinidis མཆོག་རྒྱ་ནག་ནང་དུ་གཟིགས་སྐོར་ལེགས་གྲུབ་རྗེས། ཡོངས་ཁྱབ་གསར་འགོད་བསྒྲགས་གཏམ་ཞིག་སྤེལ་གནང་སྟེ། རྒྱ་གཞུང་གིས་ཉེ་ཆར་ཁྲིམས་རྩོད་པ་བརྒྱ་སྐོར་ཁ་ཤས་འཛིན་བཟུང་བྱས་ཡོད་པ་གཙོས། གནད་དོན་ཁག་ཅིག་གི་ཐོག་ལ་ཡོ་རོབ་མཐུན་ཚོགས་ལ་སེམས་འཚབ་ཆེན་པོ་ཡོད་པ་གསུངས་པ་དང་དུས་མཚུངས། ཕྱོགས་གཞན་ཞིག་ནས་ཡོ་རོབ་མཐུན་ཚོགས་དང་རྒྱ་ནག་དབར་འབྲེལ་བ་ཇེ་བཟང་དུ་སོང་ནས། ད་ཆ་འགྲོ་བ་མིའི་ཐོབ་ཐང་སྐོར་གྱི་གནད་དོན་ཛ་དྲག་སྐོར་ལ་རྒྱ་ནག་དང་ཐད་ཀར་གླེང་སློང་གནང་ཐུབ་པའི་གནས་སྟངས་ཆགས་ཡོད་པ་གསུངས་འདུག  ཡོ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་མཆོག་གི་གཟིགས་སྐོར་དེ་ནི་རྒྱ་ནག་ཕྱི་སྲིད་ལས་ཁུངས་ཀྱི་གོ་སྒྲིག་འོག ཟླ་བ་འདིའི་ཚེས་༩ནས་༡༤བར་གནང་འདུག་པ་དང་། དེ་ཡང་རྒྱ་ནག་གི་རྒྱལ་ས་པེ་ཅིང་དང་གོ་ཝང་ཀྲའོ་གྲོང་ཁྱེར། ཤན་ཀྲན་གྲོང་ཁྱེར་དང་ཧོང་ཀོང་ཁུལ་བཅས་སུ་ཕེབས་འདུག  ཐེངས་འདིའི་གཟིགས་སྐོར་སྤྱིའི་སྐོར་དང་འབྲེལ་ཡོ་རོབ་མཐུན་ཚོགས་ཀྱི་འགྲོ་བ་མིི་ཐོབ་ཐང་གི་དམིགས་བསལ་སྐུ་ཚབ་ཀྱི་ཡོངས་ཁྱབ་གསར་འགོད་བསྒྲགས་གཏམ་དེ་བཞིན་ཚེས་༡༦སྟེ། ཡོ་རོབ་གྲོས་ཚོགས་སུ་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་བསྐྱར་ཞིབ་ལས་རིམ་མ་ཚོགས་པའི་ཉིན་གཉིས་སྔ་སྣུར་དུ་གནང་པ་ཞིག་ཆགས་ཀྱི་འདུག  རྒྱ་ནག་ཕྱི་སྲིད་ལས་ཁུངས་ནས་གོ་སྒྲིག་ཞུས་པའི་ཐེངས་འདིའི་གཟིགས་སྐོར་གྱི་ལས་རིམ་འདི་ནི་གཙོ་བོ་ཡོ་རོབ་མཐུན་ཚོགས་དང་རྒྱ་ནག་དབར་ལ་འགྲོ་བ་མིའི་ཐོབ་ཐང་གི་གནད་དོན་སྐོར་གོ་བསྡུར་ཚད་མཐོ་པོ་ཡོང་ཆེད་ཡིན་པ་གསུངས་ཡོད་པ་ལྟར། ཡོ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་སྐུ་ཞབས་ Stavros Lambrinidis མཆོག་རྒྱ་ནག་གི་རྒྱལ་ས་པེ་ཅིང་དང་གོ་ཝང་ཀྲའོ་གྲོང་ཁྱེར། ཤན་ཀྲན་གྲོང་ཁྱེར་སོགས་ས་ཁུལ་བཞིའི་ནང་དུ་ཉིན་གྲངས་དྲུག་རིང་གཟིགས་སྐོར་སྐབས། རྒྱ་ནག་དབུས་གཞུང་ཆོས་རིག་དང་བདེ་འཇགས། དམངས་ཀྱི་བདེ་དོན་ལྷན་ཁང་སོགས་ཀྱི་ཆེས་མཐོའི་དཔོན་རིགས་མཇལ་འཕྲད་ཚོགས་འདུ་དང། གཞན་ཡང་རྒྱ་ནག་རྒྱལ་ཡོངས་ཁྲིམས་རྩོད་པའི་ཚོགས་པ་དང་རྒྱལ་ཡོངས་བེུད་ལྷན་ཚོགས། འཚོང་འབྲེལ་ལྷན་ཚོགས་དང་གཙུག་ལག་སློབ་གཉེར་ཁང་སོགས་སྡེ་ཚན་མི་འདྲ་བ་༡༧ཙམ་ནས་ཆེད་ཕེབས་ཀྱིས་གནས་ཚུལ་རྒྱུས་ལོན་གནང་པ་དང་ཆབས་ཅིག་ཏུ། སྨྲ་རང་དབང་དང་ཁྲིམས་ལུགས་དབང་འཛིན། ཁྱད་པར་དུ་ཡོ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་ཕྱི་འབྲེལ་སྲིད་བྱུས་སྐོར་ལ་གསུངས་བཤད་གནང་པ་མ་ཟད། ཡོ་རོབ་མཐུན་ཚོགས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་ལ་ཐུགས་སྣང་དང་། སྒོས་སུ་ཁྲིམས་མཐུན་ཡར་རྒྱས་ཡོང་རྒྱུར་དགོངས་བཞེད་གནང་གི་ཡོད་པའི་གནད་དོན་མང་དག་ཐོག་གསུངས་བཤད་གནང་ཡོད་པ་རེད་འདུག  ཡོ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་སྐུ་ཞབས་ Stavros Lambrinidis མཆོག་གིས་རྒྱ་ནག་ནང་གི་གཟིགས་སྐོར་གྲུབ་བསྟུན། གཞུང་འབྲེལ་གསར་འགོད་བསྒྲགས་གཏམ་སྤེལ་གནང་པ་དེའི་ཐོག་ནས་གཙོ་བོ་རྒྱ་གཞུང་ལ་ཉེ་ཆར་ཁྲིམས་རྩོད་པ་དང་ལས་འགུལ་བརྒྱ་སྐོར་ཁ་ཤས་འཛིན་བཟུང་བཀར་ཉར་བྱས་ཡོད་པའི་གནད་དོན་དང་། དེའི་ཁྲོད་མི་སྣ་༢༠སྐོར་ཞིག་ལ་གཞི་རྩའི་འགྲོ་བ་མིའི་ཐོབ་ཐང་མ་སྤྲད་པར་མུ་མཐུད་དཀའ་ངལ་འོག་ལྷུང་ཡོད་པའི་ཐད་ཧ་ཅང་གི་སེམས་འཚབ་ཡོད་ཅེས་གསུངས་འདུག་པ་མ་ཟད།  ཁྲིམས་རྩོད་པ་རྣམས་ནས་ལྗིད་སྙོམ་སྟངས་འཛིན་དང་ཞེད་སྣང་མེད་པའི་ཐོག་ནས་དྲང་བདེན་ལག་ལེན་དུ་སྐྱེལ་བ་ལ་ཁྲིམས་ལུགས་དབང་འཛིན་ངེས་པར་དུ་དགོས་པ་རེད་ཅེས་གསུངས་འདུག  དུས་མཚུངས་ཡང་སྐུ་ཞབས་ Stavros Lambrinidis མཆོག་གི་ཕྱོགས་གཞན་ཞིག་ནས་ཐེངས་འདིའི་གཟིགས་སྐོར་ཁྲོད་རྒྱ་གཞུང་ནས་ཡོང་རྒྱུ་འདས་པའི་ལོ་གཅིག་གི་ནང་ཉམས་ཐག་དབུལ་ཕོང་ས་ཡ་བདུན་ཅུའི་འཚོ་གནས་ཡར་རྒྱས་གཏོང་རྒྱུ་ཡིན་པ་དང། སྲོག་ཐོག་ཉེས་ཆད་ཉུང་དུ་གཏང་བའི་ཐབས་ཤེས་ལ་བསྔགས་བརྗོད་གནང་པ་དང་། དེ་བཞིན་ཡོ་རོབ་མཐུན་ཚོགས་དང་རྒྱ་ནག་དབར་གྱི་འབྲེལ་བ་ཇེ་བཟང་དུ་སོང་ནས། ད་ཆ་འགྲོ་བ་མིའི་ཐོབ་ཐང་སྐོར་གྱི་གནད་དོན་ཛ་དྲག་སྐོར་ལ་རྒྱ་ནག་དང་སྟབས་བདེ་དང་ཐད་ཀར། དེ་བཞིན་དོན་ཕན་ལྡན་པའི་སྒོ་ནས་གླེང་སློང་གནང་ཐུབ་པའི་གནས་སྟངས་ཆགས་ཡོད་པ་གསུངས་འདུག

རྒྱ་ནག་གི་སྐུ་ཚབ་ཚོས་རྒྱལ་ཚོགས་ཀྱི་སྐུ་ཚབ་རྣམ་པས་འདྲི་རྩད་བྱས་པའི་དོགས་དྲི་ཁག་ལ་ལན་འདེབས་གསལ་བཤད་ཐོག་རྒྱ་གཞུང་གི་སྐུ་ཚབ་ཚོས་བོད་ནང་ཆབ་སྲིད་བཙོན་པ་དང་མནར་གཅོད་བཏང་པའི་གནད་དོན་རིགས་གང་ཡང་མེད་ཅེས་བརྗོད་ཡོད་པ་རེད། དེ་ཡང་ཁ་ཉིན་ཚེས་ ༡༧ ཉིན་ནས་Swiss གྱི་གྲོང་ཁྱེར་Geneva འི་ནང་རྟེན་གཞི་བྱས་པའི་མཉམ་འབྲེལ་རྒྱལ་ཆོགས་སུ་ རྒྱལ་ཚོགས་ཀྱི་མནར་གཅོད་འགོག་པའི་ཚོགས་ཆུང་གི་ཚོགས་ཐུན་ཐེངས་ ༥༦ ཐོག་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཆབ་སྲིད་བཙོན་པའི་གནད་དོན་སོགས་དང་འབྲེལ། རྒྱ་ནག་གི་མནར་གཅོད་ལས་དོན་ལ་བསྐྱར་ཞིབ་ཞེས་པའི་ཚོགས་ཐུན་ཞིག་ཚོགས་ཡོད་པ་དང་། ཁ་སང་ཉིན་རྒྱབ་ཏུ་རྒྱ་ནག་གི་སྐུ་ཚབ་ཚོས་རྒྱལ་ཚོགས་ཀྱི་མནར་གཅོད་འགོག་པའི་ཚོགས་ཆུང་གི་ཚོགས་མི་ཁག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ཆབ་སྲིད་བཙོན་པའི་གནད་དོན། ལྷག་པར་དུ་ལོ་འདིའི་ཟླ་བ་བདུན་པའི་ནང་རྒྱ་གཞུང་གི་བཙོན་ཁང་ནང་སྐུ་འདས་གྲོངས་སུ་འགྱུར་བའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་གནད་དོན་དང། རྒྱ་གཞུང་གི་བཙོན་ཁང་ནང་ཡོད་པའི་བོད་ཀྱི་ཆབ་སྲིད་བཙོན་པ་མཁན་པོ་ཀརྨ་ཚེ་དབང་ལགས་གཙོས་པའི་ཆབ་སྲིད་བཙོན་པ་རྣམས་ཀྱི་འཕྲོད་བསྟེན་གྱི་གནས་སྟངས་དང་སྨན་བཅོས་བཅས་ཀྱི་ཐོབ་ཐང་ཐད་ལ་འདྲི་རྩད་བྱས་པར་ལན་འདེབས་ཞུས་པར་རྒྱ་ནག་གཞུང་གི་སྐུ་ཚབ་ཚོས་རྒྱ་ནག་དང་བོད་ཀྱི་ས་ཁུལ་ནང་ལ་ཆབ་སྲིད་བཙོན་པ་མེད་པ་མ་ཟད། མི་སེར་རྣམས་ལ་མནར་གཅོད་བཏང་པའི་གནས་ཚུལ་རིགས་གང་ཡང་མེད་ཅེས་བརྗོད་འདུག དེ་བཞིན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་གནད་དོན་ཐད་ལ་རྒྱ་གཞུང་ངོས་ནས་རིན་པོ་ཆེ་མཆོག་གི་སྐུའི་འཕྲོད་བསྟེན་སླད་སྨན་བཅོས་ཀྱི་རོགས་རམ་གང་ཐུབ་བྱས་ཡོད་པ་མ་ཟད། བཙོན་ཁང་ནང་སྐུ་འདས་གྲོངས་སུ་འགྱུར་བའི་རྗེས་སུ་པུར་ཐལ་རྣམས་ནང་མི་སྤུན་མཆེད་རྣམས་ལ་རྩིས་སྤྲོད་བྱས་ཡོད་སྐོར་དང་། རྒྱ་གཞུང་གི་བཙོན་ཁང་ནང་འདྲི་རྩད་བྱེད་རྒྱུའི་དེང་དུས་འཕྲུལ་རིགས་གང་ཡང་མེད་ཅེས་གསལ་བཤད་བྱས་འདུག གཞན་ཡང་བོད་རང་བཙན་སློབ་ཕྲུག་ཚོགས་པ་དང་། རྒྱལ་སྤྱིའི་བོད་དོན་འབྲེལ་མཐུད་ལས་ཁང་། རྒྱལ་སྤྱིའི་ཡུ་གུར་མང་གཙོ་ཚོགས་པ་། ནང་སོག་འགྲོ་བ་མིའི་ཐོབ་ཐང་ཚོགས་པ། དེ་བཞིན་བོད་དྲང་བདེན་བསྟི་གནས་ཁང་བཅས་ཚོགས་པ་ལྔའི་སྐུ་ཚབ་དང་། བོད་མིའི་ཆབ་སྲིད་གཙོན་ཟུར་གོ་ལོག་འཇིགས་མེད་རྒྱ་མཚོ་ལགས་བཅས་ཀྱིས་གསར་འགོད་བསྒྲགས་གཏམ་ཞིག་སྤེལ་བའི་ནང་། རྒྱ་ནག་གཞུང་གིས་རྒྱལ་ཚོགས་ཀྱི་དྲི་བ་ཁག་ལ་ལན་འདེབས་དྲང་པོ་ཞུས་མེད་པ་དང། ལྷག་པར་དུ་སྤྲུལ་སྐུ་བསྟན་འཛིན་བདེ་ལེགས་མཆོག་གི་གནད་དོན་ཐད་ལ་རྒྱ་གཞུང་གིས་གསལ་བཤད་བྱས་པ་དེ་ནི་བདེན་པ་རྩ་བ་མེད་པ་མ་ཟད། གནད་དོན་འོག་ཁོང་གི་ནང་མི་སྤུན་མཆེད་རྣམས་བཟང་བཙོན་འོག་བཞག་པའི་གནས་ཚུལ་ཁག་ཅིག་གསལ་བཤད་གནང་ཡོད་པ་རེད། དེ་བཞིན་བོད་མིའི་ཆབ་སྲིད་བཙོན་ཟུར་གོ་ལོག་འཇིགས་མེད་རྒྱ་མཚོ་ལགས་ཀྱིས་རྒྱ་ནག་གཞུང་གིས་བོད་ནང་ཆབ་སྲིད་བཙོན་པ་མེད་པ་དང་། བཙོན་ཁང་ནང་ལྕགས་སོགས་དེང་དུས་འཕྲུལ་རིགས་སྤྱོད་ནས་མཉར་གཅོད་གང་ཡང་བཏང་གི་མེད་ཅེས་པ་དེ་ནི་བདེན་པ་རྩ་བ་ནས་མིན་པར་སྐྱོན་བརྗོད་ཤུགས་ཆེ་གནང་འདུག་ལ། རྒྱ་གཞུང་སྐུ་ཚབ་ཚོས་ལན་འདེབས་བྱས་པ་དེ་དག་ལ་ངོས་ལེན་མེད་པ་མ་ཟད། རྒྱལ་ཚོགས་ནས་མུ་མཐུད་རྒྱ་གཞུང་ལ་གནོན་ཤུགས་སྤྲད་དེ་རྒྱ་ནག་སྤྱི་དང་བོད་ནང་གི་འགྲོ་བ་མིའི་ཐོབ་ཐང་དང་། ཆབ་སྲིད་བཙོན་པ་རྣམས་ཀྱི་གནས་སྟངས་ཐད་ལ་ཞིབ་དཔྱོད་གནང་དགོས་པ་གསུངས་འདུག

གཏོང་ལེན་དགེ་རྩ་ཚོགས་པ་དབུ་བརྙེས་ནས་མི་ལོ་ཧྲིལ་པོ་ ༡༡ འཁོར་བའི་དབུ་འབྱེད་མཛད་སྒོ་ཐོག་དཔལ་རྒྱལ་བ་ཀརྨ་པ་མཆོག་གིས་བོད་མིའི་ཁྲོད་ནས་སྤྱི་ཚོགས་ཞབས་ཞུའི་ལས་དོན་ཐོག་དོན་གཉེར་གནང་མཁན་མང་ཙམ་དགོས་པ་གསུངས་ཡོད་པ་རེད།  དེ་རིང་ཟླ་ ༡༡ ཚེས་ ༡༩ ཉིན་བཞུགས་སྒར་ཉེ་ཁུལ་ས་རཱར་རྟེན་གཞི་བྱས་པའི་རྒྱ་གར་དབུལ་ཕོང་ཉམས་ཐག་རྣམས་ལ་ཤེས་ཡོན་དང་འཕྲོད་བསྟེན། སྡོད་གནས་སོགས་ལ་རོགས་སྐྱོར་གནང་མཁན་གཏོང་ལེན་དགེ་རྩ་ཚོགས་པ་དབུ་བརྙེས་ནས་མི་ལོ་ཧྲིལ་པོ་ ༡༡ འཁོར་བའི་དུས་ཆེན་གྱི་དབུ་འབྱེད་མཛད་སྒོར་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་མཆོག་དབུ་བཞུགས་གཙོས་པའི་དབྱིན་ཡུལ་དང་ཕ་རན་སིའི་གཏོང་ལེན་དགེ་རྩ་ཚོགས་པའི་སྦྱིན་བདག་རྣམ་པ།  དེ་བཞིན་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཀྱི་སྐུ་ཚབ་རྣམ་པ།  གཏོང་ལེན་གྱི་རྒྱ་གར་སློབ་ཕྲུག་དང་དགེ་ལས་བཅས་ཁྱོན་མི་གྲངས་ ༤༠༠ ལྷག་འདུ་འཛོམས་ཐོག་དབུ་འབྱེད་ཀྱི་མཛད་སྒོ་ཚོགས་ཡོད་པ་རེད།  སྐབས་དེར་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་ད་བར་གཏོང་ལེན་དགེ་རྩ་ཚོགས་པའི་ངོས་ནས་དབུལ་ཕོང་ཉམས་ཐག་ཚོར་ཤེས་ཡོན་གྱི་མཚོན་པའི་གཞན་ཕན་གྱི་ཞབས་ཞུའི་ལས་དོན་རླབས་པོ་ཆེ་སྒྲུབ་བཞིན་པ་ཁག་ལ་བསྔགས་བརྗོད་མཛད་པ་དང་སྦྲགས་ཏེ། དེའི་ཐོག་རོགས་སྐྱོར་གནང་སྦྱིན་བདག་རྣམས་ལ་ཐུགས་རྗེ་ཆེ་ཞུ་གནང་པ་མ་ཟད།  ལྷག་པར་དུ་རིན་པོ་ཆེ་མཆོག་ནས་མ་འོངས་པའི་བོད་པའི་སྤྱི་ཚོགས་ཁྲོད་ནས་གཏོང་ལེན་དགེ་རྩ་ཚོགས་པ་ལྟ་བུའི་སྤྱི་ཚོགས་ཞབས་ཞུའི་ལས་དོན་ཐོག་དོན་གཉེར་གནང་མཁན་མང་ཙམ་ཐོན་ཐུབ་པ་དགོས་གལ་ཡིན་པ་གསུངས་སོང་།  ད་དུང་རིན་པོ་ཆེ་མཆོག་གིས་རྒྱ་གར་དབུལ་ཕོངས་ཕྲུ་གུ་ཚོའི་ཕ་མ་ཚོར་རང་ཉིད་ཀྱི་ཕྲུ་གུ་རྣམས་གཏོང་ལེན་ལས་གཞི་བརྒྱུད་ནས་ཤེས་ཡོན་གཅིག་པོ་མ་ཡིན་པར་རང་གཞན་གཉིས་ཕན་དང་བཟང་སྤྱོད་ལྡན་པའི་ཐོག་སྤྱི་ཚོགས་ཞབས་ཞུ་བསྒྲུབ་མཁན་ཞིག་བསྐྲུན་ཐུབ་པ་བྱ་རྒྱུ་ནི་དམིགས་ཡུལ་གཙོ་བོ་ཞིག་ལ་འཛིན་དགོས་སྐོར་བཀའ་གནང་པ་དང་ཆབས་ཅིག  དེ་མཚུངས་གཏོང་ལེན་དགེ་རྩ་ཚོགས་པ་ཐོག་མར་དབུ་འཛུགས་པའི་སྐབས་སུ་དཀའ་ངལ་མང་དག་ཞིག་འཕྲད་ཡོད་ཀྱང།  ད་ཆ་སྤྱི་ཚོགས་ཁྲོད་དབུལ་ཕོངས་མང་པོ་ཞིག་ལ་ཕན་ཐོག་ཐུབ་པའི་ཚོགས་པ་བཟང་པོ་ཞིག་འགྱུར་བ་དེ་ནི་ང་ཚོ་བོད་པ་ཚོའི་སྤོབས་པ་བྱེད་འོས་པ་ཞིག་རེད་ཅེས་གསུངས་ཡོད་པ་རེད།  གཏོང་ལེན་དགེ་རྩ་ཚོགས་པའི་ངོས་ནས་ལོ་ལྟར་དེ་རིང་ཉིན་མོ་འདི་དང་བསྟུན་ནས་རྒྱ་གར་གཙོས་པའི་རྒྱལ་སྤྱིའི་ཁྲོད་ལ་སྤྱི་ཚོགས་ཞབས་ཞུ་ལས་དོན་གཉེར་མཁན་ཚོར་ཆེ་བསྟོད་ཀྱི་གཏོང་ལེན་གཟེངས་རྟགས་ཞེས་པའི་ཕྱག་ཁྱེར་དེ་དཔལ་རྒྱལ་བ་ཀརྨ་པ་མཆོག་གི་ཕྱག་ནས་གསོལ་སྩལ་གནང་ཡོད་པ་རེད། དེ་ཡང་ཅཎ་དི་སྒར་དུ་བཅའ་བཞུགས་ནད་པ་ལྟ་རྟོག་གནང་མཁན་ཨ་ཅག་ཚེ་རིང་སྒྲོལ་དཀར་ལགས་དང་། དྷ་ས་ས་གནས་ཀྱི་གྲོང་གསེབ་དང་བེུད་ཀྱི་ཤེས་ཡོན་སོགས་ཀྱི་ཐད་ཞབས་ཞུ་ལས་དོན་གཉེར་མཁན་རྒྱ་གར་གཞུང་འབྲེལ་མིན་པའི་ཚོགས་པ་Jacoreདང་། དེ་བཞིན་རྒྱལ་ཁབ་འདྲ་མིན་ནང་དུ་དབུལ་ཕོང་ཉམས་ཐག་མཚོན་པའི་སྤྱི་ཚོགས་ཞབས་ཞུ་ལས་དོན་གཉེར་མཁན་སུད་སི་ནང་ཡོད་པའི་ Fontana Foundation ཆེད་བཙུགས་གནང་མཁན་སྐུ་ཞབས་Mario Fontanaབཅས་ལ་གསོལ་སྩལ་གནང་ཡོད་པ་རེད།  རྩ་བའི་དེ་རིང་རིན་པོ་ཆེ་མཆོག་གིས་དགེ་རྩ་ཚོགས་པའི་ཕྲུ་གུ་སྡོད་ཁང་གསར་པ་དབུ་འབྱེད་གནང་པ་ཡོད་པ་རེད།  སློབ་གྲྭ་དེའི་ནང་དབུལ་ཕོངས་ཀྱི་ཕྲུ་གུ་ཁྱོན་༢༥༠ལ་ཤེས་ཡོན་དང་སྡོད་གནས། དེ་བཞིན་འཕྲོད་བསྟེན་སོགས་ཀྱི་མཐུན་གྱུར་གནང་མུས་ཡིན་པ་རེད།

ཉན་པ།: Listen ཕབ་ལེན། Download རྒྱ་གཞུང་གི་སྐུ་ཚབ་ནས་རྒྱལ་ཚོགས་སུ་བོད་ནང་མནར་གཅོད་རིགས་གང་ཡང་མེད་ཅེས་བརྗོད་འདུག ཀརྨ་པ་རིན་པོ་ཆེ་མཆོག་གིས་བོད་མི་སྤྱི་ཚོགས་ཞབས་ཞུ་བ་མང་ཙམ་དགོས་པ་གསུངས་འདུག ཧྥ་རན་སིའི་དོན་རྐྱེན་ཐད་བོད་མིས་གདུང་སེམས་མཉམ་བསྐྱེད་ཞུས་པ། རྒྱ་གར་ལྷོ་ཕྱོགས་སུ་གསང་བའི་སྔགས་ཀྱི་རྩོད་པའི་ཆོས་ཐོག་ཆེན་པོ་ཚོགས་པ། བོད་མིའི་སྒྲིག་འཛུགས་ནས་དབུ་མའི་ལམ་སྐོར་ལ་ཟབ་སྦྱོང་གནང་པ། Thursday 19/11/2015 China denies use of torture in prison, says there is no political prisoners We need more Tibetan social workers: Karmapa Exile Tibetans express solidarity to Paris terror victims CTA holds workshop on Middle Way Approach in South India

ཕ་རན་སིར་འཇིགས་སྐུལ་བས་གོད་ཆག་བཏང་པར་ཡུལ་དེའི་མི་མང་ལ་གདུང་སེམས་མཉམ་བསྐྱེད་ཞུ་ཕྱིར་བོད་མི་མང་ཚོགས་ཀྱི་ངོས་ནས་ལས་འགུལ་ཞི་སྤེལ་ཡོད་པ་རེད། ཁ་སང་ཚེས་ ༡༨ དགོང་དྲོ་བཞུགས་སྒར་དྷ་སའི་མེག་གྷན་དུ་པར་ལེན་གསར་འགོད་པ་བློ་བཟང་དབང་རྒྱལ་ལགས་ཀྱི་གོ་སྒྲིག་འོག་ཕར་སིའི་ནང་བྱུང་བའི་འཇིགས་སྐུལ་བས་གོད་ཆག་ལ་ས་གནས་བོད་རིགས་ངོས་ནས་དགུང་སེམས་མཉམ་བསྐྱེད་མཚོན་ཆེད་དུ་བསྔོ་སྨོན་གསོལ་འདེབས་དང་། རོལ་དབྱངས་ཀྱི་ཐོག་ནས་མང་ཚོགས་རྣམས་ལ་སེམས་གསོའི་མྱང་ངན་གྱི་ལས་འགུལ་ཞིག་སྤེལ་ཡོད་པ་རེད། སྐབས་དེར་ས་གནས་བོད་རིགས་དང་ཡུལ་སྐོར་སྤྲོ་འཆམ་པ་སོགས་ཁྱོན་མི་གྲངས་བརྒྱ་ལྷག་འདུ་འཛོམས་བྱུང་བའི་ཐོག་བདེན་ཚིག་སྨོན་ལམ་གསུང་འདོན་གནང་པ་མ་ཟད། གོ་སྒྲིག་ཚོགས་ཆུང་གིས་ཕ་རན་སིའི་གཞུང་མང་གཉིས་ནི་བོད་མི་རིགས་དང་སེམས་ཐག་ཉེ་པོ་ཡོད་པ་དང། ལྷག་དོན་རྒྱལ་སྤྱིའི་ཐོག་བོད་དོན་ཐད་ལ་ད་བར་རྒྱབ་སྐྱོར་ཤུགས་ཆེ་གནང་མུས་ཡིན་པའི་གནད་དོན་ཁག་ཅིག་གསལ་བཏོན་དང་སྦྲགས་ཏེ། ད་ལན་ཕ་རན་སི་ནང་འཇིགས་སྐུལ་དྲག་སྤྱོད་པས་མི་གསོད་ཁྲག་སྦྱོར་གྱི་བྱ་སྤྱོད་སྤེལ་བར་ངོ་རྒོལ་དང་། ཕ་རན་སི་མང་ཚོགས་རྣམས་ལ་གདུང་སེམས་མཉམ་བསྐྱེད་ཡོད་པ་གསུངས་སོང་། དེ་བཞིན་སྐབས་དེར་མང་ཚོགས་ཁྲོད་ནས་ཀྱང་ཕ་རན་སིའི་གཞུང་མང་གཉིས་ལ་སེམས་འཚོར་དང་བཅས་ཞི་བདེ་དང་སེམས་འགུལ་ལྡན་པའི་རོལ་དབྱངས་ཀྱི་ཐོག་ནས་ཀྱང་སེམས་གསོ་གནང་ཡོད་པ་རེད། གཞི་རྩའི་ཕ་རན་སི་ནང་འཇིགས་བསྐུལ་བས་གོད་ཆག་བཏང་བའི་དོན་རྐྱེན་དེའི་ཐོག་བོད་ཀྱི་བླ་ན་མེད་པའི་དབུ་འཁྲིད་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་དགུང་སེམས་མཉམ་བསྐྱེད་ཀྱི་གསུང་འཕྲིན་སྩལ་ཡོད་པ་ལྟར། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་ཀྱང་དེ་བཞིན་ཕ་རན་སི་ནང་འཇིགས་སྐུལ་བས་གོད་ཆག་བཏང་པར་ཕ་རན་སིའི་སྲིད་འཛིན་Francois Hollandeམཆོག་ལ་ཐུགས་གསོ་དང་། ཕ་རན་སི་མང་ཚོགས་ཡོངས་ལ་གདུང་སེམས་མཉམ་བསྐྱེད་ཀྱི་གསུང་འཕྲིན་སྩལ་གནང་འདུག ཚོགས་གཙོ་མཆོག་གིས་འཇིགས་སྐུལ་དྲག་སྤྱོད་པ་རྣམས་ནས་མི་གསོད་ཁྲག་སྦྱོར་གྱིས་ཀླ་ཀློའི་བྱ་སྤྱོད་སྤེལ་བར་ཧ་ཅང་གི་ཐུགས་ཕམ་ཡོད་པ་མ་ཟད། བྱ་སྤྱོད་དེས་མང་ཚོགས་དཀྱུས་མ་བརྒྱ་ཕྲག་གི་ཚེ་སྲོག་ཤོར་ཡོད་པས་བྱ་སྤྱོད་དེ་ལ་ཁོང་གིས་ངོ་རྒོལ་དང་། ཤུལ་ལུས་ནང་མི་སྤུན་མཆེད་ཡོངས་ལ་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་གདུང་སེམས་མཉམ་བསྐྱེད་དང་སེམས་གསོ་ཡོད་པ་གསུངས་འདུག དེ་མཚུངས་ཁོང་གིས་འཛམ་བུ་གླིང་འདིའི་ཐོག་འཕྲད་བཞིན་པའི་དཀའ་རྙོག་གང་འདྲ་ཞིག་ཡིན་རུང་འཚེ་བ་མེད་པར། ཞི་བདེ་དང་གྲོས་མོལ་གྱི་ཐབས་ལམ་ཐོག་ནས་སེལ་ཐབས་གནང་དགོས་པ་དང་། ལྷག་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྣམ་པ་ཀུན་ཏུ་དུས་རབས་ཉི་ཤུ་རྩ་གཅིག་པ་འདི་བཞིན་གྲོས་མོལ་གྱི་དུས་རབས་ཤིག་ཡིན་ཞེས་བཀའ་ཕེབས་མུས་སུ་ཡིན་པ་ལྟར། འཚེ་བ་དང་འཇིགས་སྐུལ་གྱི་བྱ་སྤྱོད་ཐོག་ནས་དཀའ་རྙོག་དེ་དག་སེལ་ཐམས་མེད་པ་མ་ཟད་། འཚེ་བའི་བྱ་སྤྱོད་ལ་མུ་མཐུན་ནམ་ཡང་མེད་པ་མ་ཟད། གནས་ཚུལ་འདིའི་རིགས་འཛམ་གླིང་ས་ཕྱོགས་གང་དུའང་མི་ཡོང་བའི་རེ་སྨོན་ཞུ་བཞིན་ཡོད་ཅེས་ཀྱང་གསུངས་འདུག