ARCHIVE
Monthly Archives: November, 2017
རེས་གཟའ་ཕུར་བུ། ༢༠༡༧།༡༡།༣༠
vot.org -
ཉན་པ།: Listen
ཕབ་ལེན། Download
སྲིད་སྐྱོང་མཆོག་གིས་རྒྱ་གཞུང་ནས་བོད་མིའི་མངོན་འདོད་དྭང་ལེན་ཞུ་རྒྱུ་དུས་ལ་བབ་ཡོད་གསུངས་འདུག
བོད་ཀྱི་གཞོན་ནུ་ལྷན་ཚོགས་ནས་ཞི་རྒྱ་ཆེ་བའི་རྒྱལ་ཡོངས་གཞུང་དམངས་ལས་འགུལ་སྤེལ་འཆར།
བོད་ཀྱི་སྲོལ་རྒྱུན་སྒྱུ་རྩལ་ནང་འཛུལ་ཞུགས་བྱེད་མི་ཉུང་དུ་འགྲོ་གི་ཡོད་པ་གསུངས་སོང་།
ཧང་གཱ་རི་གྲོས་ཚོགས་ནང་བོད་ཀྱི་གནད་དོན་གླེང་སློང་གནང་བ།
རྒྱ་གཞུང་གིས་བཀའ་སྡོམ་བྱེད་རིགས་དྲིལ་བསྒྲགས་བརྒྱུད་འགྲོ་བ་མིའི་ཐོབ་ཐང་རྩོད་དགོས།
རྒྱལ་སྤྱིའི་ནང་པའི་ཚོགས་ཆེན་ཐོག་བོད་བརྒྱུད་ནང་བསྟན་གྱི་སྐུ་ཚབ་ལྷན་བཞུགས་གནང་པ།
Thursday 30/11/2017
It is time Beijing heed to the calls of Tibetans in Tibet: Sikyong on latest Tibet immolation
Exile Tibetans hold solidarity vigil for self immolator Tenga
TYC announces Bharat Jagran Yatra, nationwide speaking tour for Tibet
Tibet raised in Hungarian Parliament as China PM arrives in Budapest
Norbulingka Institute marks 22nd founding anniversary
SFT launches banned by China campaign
སྲིད་སྐྱོང་མཆོག་གིས་རྒྱ་གཞུང་ནས་བོད་མིའི་མངོན་འདོད་ལ་དང་ལེན་ཞུ་རྒྱུའི་དུས་ལ་བབ་ཡོད་པ་གསུངས་འདུག
vot.org -
ཉེ་ཆར་ཟླ་བ་འདིའི་ཚེས་ ༢༦ རེས་གཟའ་ཉི་མའི་ཉིན་བོད་ཁམས་དཀར་མཛེས་རྫོང་ཐོག་ཏུ་རང་ལོ་ ༦༣ ཙམ་ཡིན་པའི་དགེ་འདུན་པ་བསྟན་དགའ་ཞུ་བ་ཞིག་གིས་རང་ལུས་མེར་བསྲེགས་གནང་སྟེ་རྒྱ་གཞུང་ལ་ཞི་རྒོལ་གནང་རྗེས་འདས་གྲོངས་སུ་གྱུར་ཡོད་སྟབས། ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་གནད་དོན་དེའི་ཐོག་ཐུགས་འཚབ་དང་འབྲེལ། རྒྱ་གཞུང་ནས་བོད་མིའི་མངོན་འདོད་ལ་དང་ལེན་ཞུ་རྒྱུའི་དུས་ལ་བབ་ཡོད་པ་གསུངས་འདུག
དེ་ཡང་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་དྲ་གནས་ཐོག་ད་ཆ་བོད་ནས་བོད་མི་སྐྱ་སེར་ཕོ་མོ་དབྱེར་མེད་ཐོག་རྒྱ་གཞུང་ལ་ཞི་རྒོལ་གྱིས་མུ་མཐུད་རང་སྲེག་གནང་དང་གནང་བཞིན་པ་མཐོང་སྐབས་སེམས་འཚབ་ཧ་ཅང་ཆེན་པོ་འབྱུང་བཞིན་འདུག་ཅེས་གསུངས་པ་དང་འབྲེལ། དོན་རྐྱེན་དེས་བོད་ནང་གི་བོད་མི་རྣམས་རྒྱ་གཞུང་གིས་དམ་བསྒྲགས་སུན་གཙེར་འོག་ཞི་བདེའི་འཚོ་བ་རོལ་རྒྱུར་དཀའ་ངལ་ཇི་ཙམ་འཕྲད་བཞིན་ཡོད་པ་གསལ་བཏོན་གནང་པ་མ་ཟད། རྒྱ་གཞུང་ནས་བོད་མིའི་མངོན་འདོད་ལ་ཉན་འཇོག་དང་བརྩི་བཀུར་ཞུ་རྒྱུའི་དུས་ལ་བབ་ཡོད་པ་གསུངས་ཏེ་བོད་མིར་སྨྲ་བརྗོད་རང་དབང་སྤྲོད་དགོས་པ་དང་༸གོང་ས་མཆོག་བོད་ལ་གདན་འདྲན་དགོས་པ། དེ་བཞིན་འཚེ་མེད་ཞི་བའི་གྲོས་མོལ་གྱི་ལམ་ནས་བོད་མིའི་སྐུ་ཚབ་ལྷན་གྲོས་མོལ་བསྐྱར་གསོ་དགོས་པར་བསྐྱར་ནན་གནང་འདུག
རྩ་བའི་བོད་ནང་ཕྱི་ལོ་ ༢༠༠༩ ནས་བཟུང་རྒྱ་གཞུང་གིས་བོད་ཐོག་འཛིན་པའི་དྲག་པོའི་སྲིད་བྱུས་ལ་ངོ་རྒོལ་ཆེད་གྲྭ་བསྟན་དགའ་ལགས་གཙོས་པའི་ད་བར་ཁྱོན་བོད་མི་ ༡༥༠ ནས་རང་ལུས་མེར་སྲེག་གནང་ཡོད་པ་དང་། ལྷག་དོན་འདི་ལོ་གཅིག་པོའི་ནང་བོད་མི་ ༥ ཡིས་རང་སྲེག་གནང་ཡོད་པ་མ་ཟད། ད་རེས་རང་ལུས་མེར་སྲེག་གནང་མཁན་གྲྭ་བསྟན་དགའ་ལགས་དཀར་མཛེས་རྫོང་ཐོག་ནས་རང་སྲེག་གནང་མཁན་གསུམ་པ་དེ་ཆགས་ཀྱི་ཡོད་པ་རེད།
ཁ་སང་བཙན་བྱོལ་དུ་རྒྱལ་གཅེས་པ་བསྟན་དགའ་ལགས་ཀྱིས་རང་སྲེག་གནང་བའི་ཡིད་སྐྱོའི་གནས་ཚུལ་དེ་ཐོན་མ་ཐག་བཞུགས་སྒར་གཙོས་པའི་རྒྱལ་སྤྱིའི་ཁྱོན་དུ་གནས་པའི་བོད་རིགས་རྣམས་ནས་དམ་པ་ཁོང་ལ་གདུང་སེམས་མཉམ་བསྐྱེད་ཀྱི་ལས་འགུལ་རྣམ་པ་འདྲ་མིན་སྤེལ་གནང་འདུག དེ་ཡང་བཞུགས་སྒར་རྡ་རམ་ལ་སར་མཚོན་ན་རྡ་ས་ས་གནས་བོད་ཀྱི་གཞོན་ནུ་ལྷན་ཚོགས་དང་བེུད་ལྷན་ཚོགས། བོད་རང་བཙན་སློབ་ཕྲུག་ཚོགས་པ་གསུམ་ཐོུང་གིས་གོ་སྒྲིག་འོག་ས་གནས་མང་ཚོགས་རྣམས་ཐེག་ཆེན་ཆོས་གླིང་གཙུག་ལག་ཁང་གི་དཔའ་བོའི་རྡོ་རིང་མདུན་ཐང་དུ་འདུ་འཛོམས་ཀྱིས་རྒྱལ་གཅེས་པ་བསྟན་དགའ་ལགས་གཙོ་གྱུར་རྒྱལ་གཅེས་པ་ཡོངས་ལ་མྱ་ངན་གུས་འདུད་ཀྱིས་མར་མེ་ཁྲོམ་སྐོར་གནང་སོང་།
སྐབས་དེར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་མགྲིན་སྲིད་གཅོད་ལགས་ཀྱིས་རྒྱལ་གཅེས་པ་གྲྭ་བསྟན་དགའ་ལགས་ཀྱིས་རང་སྲེག་གནང་པའི་གནས་ཚུལ་ངོ་སྤྲོད་དང་སྦྲགས། ཆེས་གཉན་འཕྲང་གི་དུས་ཚོད་འདིར་སྐྱབས་བཅོལ་བོད་མི་ཡོངས་ནས་དམིགས་བསལ་འགན་བཞེས་པའི་ཐོག་བོད་ཀྱི་གནད་དོན་དེ་རྒྱལ་སྤྱིའི་སྡིངས་ཆ་འདྲ་མིན་ཐོག་དྲིལ་བསྒྲགས་རྒྱ་གང་ཆེ་གནང་ཐབས་སུ་འབད་དགོས་གལ་ཡིན་པར་སྐུལ་མ་གནང་སོང་།
དེ་དང་ཕྱོགས་མཚུངས་ཨ་རི་ནིའུ་ཡོག་ཏུ་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་འོག་བོད་མི་དང་བོད་དོན་རྒྱབ་སྐྱོར་བ་ཁག་ཅིག་ལྷན་འཛོམས་ཀྱིས་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་མདུན་དུ་ངོ་རྒོལ་སྐད་འབོད་གནང་འདུག་པ་མ་ཟད་དབྱིན་ཡུལ་རྒྱལ་ས་ལོན་ཊོན་གྱི་བོད་མི་རྣམས་ནས་ཀྱང་གྲྭ་བསྟན་དགའ་ལགས་ཀྱིས་གཙོས་པའི་བོད་ཀྱི་རྩ་དོན་ཆེད་རང་སྲོག་བློས་བཏང་གནང་མཁན་ཡོངས་ཀྱི་ཆེད་དུ་སྨོན་ལམ་གསུང་འདོན་དང་ཁྲོམ་སྐོར་གོ་སྒྲིག་གནང་འདུག
རྒྱ་ནག་གི་སྲིད་བློན་ Hungary ནང་འབྱོར་སྐབས་ངོ་རྒོལ་གནང་འདུག
vot.org -
དེ་ཡང་ཕྱི་ཚེས་ ༢༧ ཉིན་ Hungary ནང་གི་ Budapestbeacon.com ཞེས་པའི་གསར་ཁང་གིས་གནས་ཚུལ་སྤེལ་བར་ཚེས་ ༢༦ ཉིན་རྒྱ་ནག་གི་སྲིད་བློན་ལི་ཁེ་ཆིང་ Hungary རྒྱལ་ས་ Budapest ནང་དུ་རྒྱལ་ཁབ་ཕྱོགས་གཉིས་དབར་ཉིན་གྲངས་གསུམ་རིང་གི་ཚོང་འབྲེལ་ལྷན་ཚོགས་ཆེད་འབྱོར་བ་དང་བསྟུན། ཁོ་པ་གནམ་ཐང་ནས་མགྲོན་ཁང་ཕྱོགས་སུ་སྐྱོད་སྐབས་ཡུལ་དེའི་བོད་དོན་རྒྱབ་སྐྱོར་བ་ཁག་ཅིག་གིས་བོད་ཀྱི་རྒྱལ་དར་འཕྱར་ནས་ཞི་རྒོལ་གནང་ཡོད་པ་དང། ལྷག་པར་དུ་སྐབས་དེར་ Tibor Hendry འམ་ཡོངས་གྲགས་སུ་ Hendry Tibet ཞུ་བའི་བོད་དོན་རྒྱབ་སྐྱོར་བ་ཞིག་གིས་ལི་ཁེ་ཆིང་གི་རླངས་འཁོར་འགྲོ་སའི་གཞུང་ལམ་ཉེ་འགྲམ་དུ་བོད་ཀྱི་རྒྱལ་དར་འཁྱེར་ནས་བཞུགས་ཡོད་སྟབས་ཡུལ་དེའི་ཉེན་རྟོག་པ་བདུན་བརྒྱད་ཙམ་ཡོང་ནས་བཀག་སྡོམ་གྱིས་རྒྱལ་དར་ལག་ནས་འཕྲོག་སྐབས་ཁོང་གིས་ FreeTibet ཞེས་འབོད་ཚིག་སྒྲོག་བཞིན་སྐད་འབོད་གནང་འདུག
དེ་བཞིན་རེས་གཟའ་ཟླ་བའི་ཉིན་ཡུལ་དེའི་གྲོས་ཚོགས་ནང་ LMP ཚོགས་པའི་འཐུས་མི་དང་མ་འོངས་པར་ཚོགས་པ་དེའི་སྲིད་བློན་འོས་མི་ཡིན་པ་གྲོས་ཚོགས་འཐུས་མི Bernadett Szel ལགས་ཀྱིས་ལུས་ལ་བོད་ཀྱི་རྒྱལ་དར་གྱོན་སྟབས་ཉེན་རྟོག་པས་ཡུལ་དེའི་མི་སེར་ཞིག་ལ་བོད་དོན་ལས་འགུལ་སྤེལ་རྒྱུར་བཀག་སྡོམ་བྱས་ཡོད་པར་སྐྱོན་བརྗོད་གནང་བ་སྦྲགས། ཁོང་ནས་ཀྱང་ FreeTibet ཞེས་འབོད་ཚིག་སྒྲོག་ནས་རང་ཉིད་ཀྱི་གཏམ་བཤད་མཇུག་སྡོམ་གནང་འདུག
རྩ་བའི་སྐུ་ཞབས་ Hendry ལགས་ནི་ Shambala Tibet Center ཞེས་པའི་ཡུལ་དེའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡིན་པ་དང། ཁོང་ནས་དེ་སྔོན་ཕྱི་ལོ་ ༢༠༡༢ ལོར་ཡང་ལི་ཁེ་ཆིང་རྒྱ་ནག་སྲིད་བློན་གཞོན་པའི་གནས་བབ་ཐོག་ཡུལ་དེར་སླེབས་སྐབས་བོད་ཀྱི་རྒྱལ་དར་བསྣམས་ནས་ངོ་རྒོལ་གནང་རྐྱེན་འཛིན་བཟུང་བྱེད་མྱོང་ཡོད་པ་དང། སྐབས་དེར་ཡུལ་དེའི་ཆེས་མཐོའི་ཁྲིམས་ཁང་གི་ངོས་ནས་སྐུ་ཞབས་ Hendry ལགས་ལ་ཨ་སྒོར་ ༡༩༠༠ དང་ཁོང་གི་ཁྲིམས་རྩོད་པའི་གླ་ཆ་ཡོངས་རྫོགས་སྤྲོད་དགོས་པའི་ཉེས་ཆད་བཏང་ཡོད་པ་རེད་འདུག
བོད་ཀྱི་གཞོན་ནུ་ལྷན་ཚོགས་ནས་ཞི་རྒྱ་ཆེ་བའི་རྒྱལ་ཡོངས་གཞུང་དམངས་གོ་རྟོགས་ལས་འགུལ་སྤེལ་རྒྱུ་རེད་འདུག
vot.org -
དེ་རིང་ཕྱི་ཟླ་ ༡༡ ཚེས་ ༣༠ ཉིན་སྔ་དྲོ་ཚོུད་ ༡༠།༠༠ ཐོག་བཞུགས་སྒར་དུ་རྟེན་གཞི་བྱས་པའི་བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་ཡིག་ཚང་དུ་གསར་འགོད་ལྷན་ཚོགས་ཤིག་གནང་སྟེ། བོད་ཀྱི་གཞོན་ནུ་ལྷན་ཚོགས་དབུས་ས་གཉིས་ཐོུང་ཐོག་རིང་མིན་ཕྱི་ཟླ་ ༡༢ ཚེས་ ༡༠ ཉིན་ནས་དབུ་འཛུགས་ཀྱིས་རྒྱ་གར་གཞུང་དམངས་གཉིས་ཀྱི་འདས་པའི་ལོ་རྒྱུས་ནང་བོད་འདི་རང་བཙན་གྱི་རྒྱལ་ཁབ་ཞིག་ཡིན་པ་དང་། ད་ལྟ་བཙན་འོག་ལ་ཡོད་པའི་རྒྱལ་ཁབ་ཅིག་ཡིན་པ་ངོས་འཛིན་ཡོང་ཐབས་སོགས་ལ་ཆེད་དམིགས་ཀྱིས་རྒྱ་གར་རྒྱལ་ཡོངས་སུ་གཞི་རྒྱ་ཆེ་བའི་རྒྱལ་ཡོངས་གཞུང་དམངས་གོ་རྟོགས་ལས་འགུལ་ཞིག་སྤེལ་རྒྱུ་ཡིན་པ་ཡོངས་བསྒྲགས་གནང་སོང་།
སྐབས་དེར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་ལས་འགུལ་འདི་དབུས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ཁག་ཅིག་ས་གནས་འཆར་འགོད་ཐོག་བཞུགས་སྒར་རྡ་རམ་ས་ལ་དང་། རྒྱ་གར་བྱང་ཤར་ས་ལུ་གྷ་ར། དེ་བཞིན་རྒྱ་གར་ཕྱོགས་ཅན་ནའི་གྲོང་ཁྱེར་བཅས་སུ་ཟླ་ ༡༢ ཚེས་ ༡༠ ཉིན་དབུ་འཛུགས་ཀྱིས་རྒྱ་གར་གྱི་མངལ་སྡེ་ ༢༢ ལྷག་གི་གྲོང་ཁྱེར་དང་གྲོང་རྡལ་ཆེ་ཁག་ ༡༥༠ ནང་བསྐྱོད་གནང་གི་ཡོད་པ་དང་། སྐབས་དེར་ཁོང་རྣམས་ནས་ས་གནས་ཀྱི་དཔོན་རིགས་དང་མི་མང་མཇལ་འཕྲད། དེ་བཞིན་གསར་འགོད་ལྷན་ཚོགས་དང་ཡིག་ཆ་འགྲེམས་སྤེལ། མཚན་རྟགས་བསྡུ་རུབ། ས་གནས་སོ་སོའི་མཐོ་རིམ་སློབ་མ་རྣམས་ལ་གསུང་བཤད་གནང་རྒྱུ་སོགས་ཀྱི་ལས་རིམ་འདྲ་མིན་བརྒྱུད་རྒྱ་གར་དབུས་ས་་གཉིས་ཀྱི་དཔོན་རིགས་དང་མི་མང་རྣམས་ལ་འདས་པའི་ལོ་རྒྱུས་ཀྱི་བྱུང་བ་དང་། ད་ལྟའི་དངོས་ཡོད་ཀྱི་གནས་བབས། མ་འོངས་པའི་རྒྱ་གར་དང་བོད་ཀྱི་མདུན་ལམ་སོགས་ཀྱི་ཐད་འགྲེལ་བརྗོད་གནང་ནས་བོད་རང་བཙན་གྱི་གནད་དོན་དེ་རྒྱ་གར་གྱི་བདེ་འཇགས་དང་ཨེ་ཤ་ཡའི་བརྟན་ལྷིང་ལ་ཐད་ཀར་འབྲེལ་བ་ཡོད་སྐོར་གོ་རྟོགས་སྤེལ་རྒྱུ་ཡིན་པ་གསུངས་ཡོད།
བོད་ཀྱི་གཞོན་ནུ་ལྷན་ཚོགས་ཀྱིས་ལས་འགུལ་དང་འབྲེལ་བའི་གསར་འགོད་བསྒྲགས་གཏམ་ཞིག་འདོན་སྤེལ་གནང་བའི་ནང་། བོད་དང་རྒྱ་གར་གཉིས་ལོ་ངོ་སྟོང་ཕྲག་མང་པོའི་ལོ་རྒྱུས་ཀྱི་འབྲེལ་བ་གཏིང་ཟབ་ཡོད་པ་མ་ཟད། ལྷག་པར་དུ་ས་མཚམས་དང་ཁོར་ཡུག་གི་གནས་བབས་ཆ་ནས་དམིགས་བསལ་འབྲེལ་བ་ཞིག་ཡོད་སྟབས། དེང་སྐབས་རྒྱ་གཞུང་ནས་བོད་ནང་གི་གཙང་པོ་ཁ་བསྒྱུར་དང་། ཆུ་རགས་གསར་རྒྱག དེ་བཞིན་ཤིང་ནགས་གཅོད་བྲེག་སོགས་རང་བྱུང་ཁོར་ཡུག་གཏོར་བརླག་འཚབ་ཆེ་གཏོང་བཞིན་པ་དེ་དག་ཨེ་ཤ་ཡ་སྤྱི་དང་། རྒྱ་གར་གྱི་གནམ་གཤིས་དང་ཁོར་ཡུག་ལ་གནོན་པ་མ་ཟད་མི་མང་གི་འཚོ་ཐབས་ལ་ཡང་དོ་ཕོག་ཆེན་པོ་གཏོང་བཞིན་ཡོད་སྐོར་འགྲེལ་བརྗོད་གནང་པ་དང་ཆབས་ཅིག རྒྱ་གར་གྲོས་ཚོགས་ནང་བོད་ཀྱི་གནད་དོན་གླེང་སློང་དགོས་པ་དང་། རྒྱ་གར་གཞུང་ནས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་དགོས་པ། དེ་བཞིན་ཧིན་བོད་མི་མང་ནས་རྒྱ་ནག་གི་ཅ་དངོས་ཉོ་ཚོང་སྤྱོད་གསུམ་བྱ་རྒྱུ་མཚམས་འཇོག་དགོས་པ་བཅས་འབོད་སྐུལ་གནང་འདུག
གཞི་རྩའི་བོད་ཀྱི་གཞོན་ནུ་ལྷན་ཚོགས་ཀྱི་རྒྱལ་ཡོངས་གཞུང་དམངས་གོ་རྟོགས་ལས་འགུལ་གྱི་ཡིག་ཆ་འབུམ་བཅུ་ལྷག་ཡོད་པ་དེ་དག་བོད་ཡིག་དང་ཧིན་དྷི། དེ་བཞིན་དབྱིན་ཡིག བྷན་གྷ་ལི་སོགས་སྐད་ཡིག་མི་འདྲ་བ་དྲུག་ནང་ལ་འགྲེམས་སྤེལ་ཞུ་གནང་གི་ཡོད་མ་ཟད། ད་བར་བོད་ཕྱི་ནང་གཉིས་སུ་རང་སྲེག་གནང་མཁན་ཁོང་རྣམ་པའི་ལོ་རྒྱུས་དང་དགོས་འདུན། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གྱི་མཛད་རྣམ་ཡོད་པའི་འོད་སྡེར་སོགས་ཀྱང་འགྲེམས་སྤེལ་གནང་རྒྱུ་རེད་འདུག
བོད་ཀྱི་སྲོལ་སྒྱུ་རྩལ་ནང་འཛུལ་མཁན་ཉུང་རུ་འགྲོ་གི་འདུག
vot.org -
དེ་རིང་བཞུགས་སྒར་ཉེ་འདབས་སུ་ཆགས་པའི་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་གླིང་མཆོག་སྤྲུལ་རིན་པོ་ཆེ་མཆོག་དབུ་བཞུགས། བོད་མིའི་སྒྲིག་འཛུགས་ཀྱི་ཆོས་རིག་བཀའ་མཆོག་དང་། ལྟེ་གནས་ཁང་གི་འགན་འཛིན་ལས་ཟུར་རྣམ་པ་བཅས་ལྷན་འཛོམས་ཐོག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་ངོ་ ༢༢ འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་སོང།
འདི་ག་རླུང་འཕྲིན་ཁང་ནས་སྐབས་དེར་ནོར་གླིང་བོད་ཀྱི་བོད་ཀྱི་རིག་གཞུང་གཅེས་སྐྱོང་ཁང་གི་འགན་འཛིན་བདེ་ཆེན་རྣམ་རྒྱལ་ལགས་སུ་ལྟེ་གནས་ཁང་གི་ལས་དོན་སྤྱོ་ཡོངས་སྐོར་ལ་བཅར་འདྲི་ཞུས་པར་ལྟེ་གནས་ཁང་དེ་དབུ་བརྙེས་ནས་ད་བར་གྱི་བརྒྱུད་རིམ་ལ་གཞིགས་ན། དཔལ་འབྱོར་གྲུབ་འབྲས་ཡག་པོ་ཆགས་ཡོད་ཀྱང་དཀའ་ངལ་གཙོ་བོ་ཞིག་ནི་དགོས་མཁོ་ལ་གཞིགས་པའི་ཐོན་འབྲས་བཏོན་མ་ཐུབ་པའི་དཀའ་ངལ་ཡོད་པ་དང། ལྟེ་གནས་ཁང་དེའི་ནང་དུ་ཡོད་པའི་བོད་ཀྱི་སྲོལ་རྒྱུན་གྱི་སྒྱུ་རྩལ་བཟོ་གྲྭ་ཁག་ཏུ་བོད་མི་འཛུལ་ཞུགས་བྱེད་མཁན་ཉུང་རུ་འགྲོ་གི་ཡོད་པ་གསུངས་སོང་།
རྩ་བའི་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ནི་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་རྒྱུར་གཙོ་དམིགས་ཀྱིས་ཕྱི་ལོ་ ༡༩༩༥ ལོར་དབུ་བརྙེས་ཡོད་པ་དང་། ད་ལྟའི་ཆར་ལྟེ་གནས་ཁང་དུ་རྟེན་བཞེངས་དང་ལྟ་བྲིས། ཤིང་བསྐོས་དང་ཤིང་བཟོ། གོས་ཐང་དང་ལག་ཚེམ། ཐག་ལས་སོགས་སྒྱུ་རྩལ་སྡེ་ཚན་་དང། དེ་བཞིན་རིག་གནས་ཁོངས་སུ་མཐོ་སློབ་དང་ཉམས་ཞིབ་སྡེ་ཚན། མཛད་རྣམ་སྡེ་ཚན། དེ་བཞིན་ཡིག་ཚགས་སོགས་ཡོད་པའི་བཙན་བྱོལ་ནང་གི་བོད་ཀྱི་རིག་གཞུང་གཅེས་སྐྱོང་ཁང་ཆེ་གྲས་ཤིག་ཆགས་ཡོད་པ་རེད།
བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ད་བར་ལྟེ་གནས་ཁང་དེའི་ངོས་ནས་བོད་ཀྱི་རིག་གཞུང་མི་ཉམས་རྒྱུན་འཛིན་གནང་བའི་ལས་དོན་ཐོག་ལ་ཡི་རང་བསྔགས་བརྗོད་ཞུས་པ་དང་འབྲེལ། ལྟེ་གནས་ཁང་དེ་ལྟ་བུ་འཛིན་སྐྱོང་གནང་པར་དཀའ་ངལ་མི་ཉུང་བ་ཞིག་འཕྲད་ཡོད་པ་དེ་ལྟར་ཡང། ཚང་མས་གཙོ་བོ་བསམ་ཤེས་གནང་རྒྱུ་དེ་སྤྱི་པའི་ལས་དོན་ལ་ཧ་ཅང་གནད་ཆེ་ཆགས་ཡོད་སྐོར་གསུངས་པ་མ་ཟད། ལྷག་དོན་ལྟེ་གནས་ཁང་དུ་རྟེན་བཞེངས་སྒྱུ་རྩལ་གྱི་གནས་བབས་ཉག་ཕྲ་པོ་ཆགས་ཡོད་པའི་གནད་དོན་འབྲེལ། སྒྱུ་རྩལ་ཐོག་དོན་གཉེར་བྱེད་མཁན་ཚོར་རིགས་རུས་དབྱེ་འབྱེད་གནང་ཚེ་རིག་པ་ཡོངས་སུ་འགལ་གྱི་ཡོད་པ་གསུངས་ཡོད་པ་རེད།
དཀར་མཛེས་རྫོང་ཐོག་ཏུ་གྲྭ་བསྟན་དགའ་ལགས་ཀྱིས་རང་ལུས་མེར་བསྲེགས་གནང་འདུག
vot.org -
ཉེ་ཆར་ཕྱི་ཟླ་ ༡༡ ཚེས་ ༢༦ རེས་གཟའ་ཉི་མའི་ཉིན་བོད་ཁམས་དཀར་མཛེས་རྫོང་ཐོག་ཏུ་རང་ལོ་ ༦༣ ཙམ་ཡིན་པའི་དགེ་འདུན་པ་བསྟན་དགའ་ཞུ་བ་ཞིག་གིས་རང་ལུས་མེར་བསྲེགས་གནང་སྟེ་རྒྱ་གཞུང་ལ་ཞི་རྒོལ་གནང་རྗེས་འདས་གྲོངས་སུ་གྱུར་འདུག
འདི་ག་རླུང་འཕྲིན་ཁང་ལ་རང་ལུས་མེར་སྲེག་གནང་མཁན་འདས་པོ་ཁོང་དང་དེ་སྔོན་རྒྱུས་མངའ་ཡག་པོ་ཡོད་མཁན་བཙན་བྱོལ་དུ་ཡོད་པའི་ཕ་ཡུལ་དཀར་མཛེས་ནས་ཡིན་པ་བོད་མི་ཞིག་གིས་ཁུངས་ལྡན་གནས་ཚུལ་འགྲེལ་བརྗོད་གནང་དོན་གྲྭ་བསྟན་དགའ་ལགས་ལ་སྲིང་མོ་ཞིག་ཡོད་པ་དེས་ཨ་རིར་ཡོད་པའི་ཁོ་རང་གི་སྤུན་མཆེད་ཞིག་ལ་ཁ་པར་གནང་ནས་ཨ་ཞང་གིས་བོད་ལ་རང་དབང་དགོས་པའི་འབོད་ཚིག་སྒྲོག་བཞིན་རང་ལུས་མེར་བསྲེག་གནང་སྟབས་ཁོང་འདས་གྲོངས་སུ་གྱུར་ཡོད་ཚུལ་འགྲེལ་བརྗོད་གནང་ཡོད་པ་གསུངས་སོང་།
ཁོང་འདས་གྲོངས་སུ་གྱུར་རྗེས་སྐུ་ཕུང་ནང་མིའི་ལག་ཏུ་རག་མེད་པ་མ་ཟད་རང་ལུས་མེར་སྲེག་གི་དོན་རྐྱེན་དེ་བྱུང་རྗེས་ས་གནས་ལ་རྒྱ་གཞུང་དམག་མི་དང་ཉེན་རྟོག་པ་འགྲེམས་འཇོག་གིས་དཀར་མཛེས་རྫོང་ཁུལ་དུ་ཁ་པར་དང་དྲ་རྒྱའི་བརྒྱུད་ལམ་ཁག་ལ་དམ་དྲག་ཤུགས་ཆེ་བྱས་ཡོད་སྟབས་ས་གནས་སུ་འབྲེལ་གཏུག་བྱ་རྒྱུར་དཀའ་བས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད་འདུག འདས་པོ་ཁོང་དེ་སྔོན་དཀར་མཛེས་དགོན་པའི་གྲྭ་པ་ཡིན་ཞིང་ལོ་ཤས་རིང་དགོན་པར་བཞུགས་ཀྱང་དེ་རྗེས་གཟུགས་གཞི་བདེ་མིན་རྐྱེན་པས་རང་ཁྱིམ་དུ་བཞུགས་ཀྱི་ཡོད་པ་མ་ཟད་དགུན་དུས་གྲང་ངར་ཆེ་སྐབས་རྒྱ་ནག་ནང་དང་དབྱར་དུས་རང་ཁྱིམ་དུ་བཞུགས་ཀྱི་ཡོད་འདུག ཁོང་ནས་རྒྱུན་དུ་རྒྱལ་སྤྱིའི་གནས་ཚུལ་སྤྱི་དང་སྒོས་བོད་དོན་གྱི་གནས་ཚུལ་ཐད་ཧ་ཅང་དོ་སྣང་དང་གོ་རྟོགས་ཡག་པོ་ཡོད་མཁན་ཞིག་ཡིན་པ་རེད་འདུག
གཞི་རྩའི་གྲྭ་བསྟན་དགའ་ལགས་ནི་དཀར་མཛེས་རྫོང་དང་ཐག་ཉེ་བའི་མདའ་མདོ་གྲོང་ནས་ཡིན་ཅིང་ཁོང་ལ་ཕ་མ་གཅིག་པའི་སྤུན་མཆེད་གསུམ་ཡོད་པ་རེད་འདུག སྤུན་མཆེད་གཉིས་ལྷ་སར་གཏན་སྡོད་གནང་བཞིན་པ་དང་སྤུན་མཆེད་བོུ་གཅིག་རང་ཁྱིམ་དུ་གཏན་སྡོད་གནང་བཞིན་ཡོད་འདུག ཁོང་གི་ཁྱིམ་ཚང་འཚོ་བའི་གནས་སྟངས་ལེགས་པོ་ཡོད་པ་རེད་འདུག ལྷག་དོན་ཁོང་ནས་ཕ་ཡུལ་གྱི་མང་ཚོགས་ཚོར་ཞལ་འདོན་དཔེ་ཆ་སློབ་ཁྲིད་གནང་གི་ཡོད་སྟབས་མང་ཚོགས་ཚོས་ཁོང་ལ་རྒན་བསྟན་དགའ་ཞེས་མཚན་འབོད་གནང་གི་འདུག
ཨ་རིའི་སྐུ་ཚབ་དོན་གཅོད་ཀྱི་རྩིས་ལེན་རྩིས་སྤྲོད་སྐབས་བོད་མི་ཁག་ཅིག་གིས་ངོ་རྒོལ་ལས་འགུལ་སྤེལ་འདུག
vot.org -
ཁ་ས་ཕྱི་ཚེས་༢༨ཉིན་ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་ཨ་རིའི་སྐུ་ཚབ་དོན་ཁང་གི་ལས་ཁུངས་ནང་སྐུ་ཚབ་དོན་གཅོད་གསར་རྙིང་དབར་རྩིས་ལེན་རྩིས་སྤྲོད་གནང་སྐབས་ལས་ཁུངས་ཀྱི་ཕྱི་ཕྱོགས་ལ་ NewYork དང་ Connecticut་ boston སོགས་ཨ་རིའི་ས་གནས་ཁག་ཅིག་ནས་ཕེབས་པའི་བོད་མི་བརྒྱ་སྐོར་ཞིག་འདུ་འཛོམས་ཀྱིས་བཀའ་ཤག་ནས་སྐུ་ཚབ་དོན་གཅོད་སྤེན་པ་ཚེ་རིང་ལགས་ལས་སྣེ་ནས་འཕོ་འགྱུར་གནང་བའི་ཐག་གཅོད་ལ་ངོ་རྒོལ་དང་འབྲེལ། བཀའ་ཤག་གིས་གནད་དོན་དེའི་ཐོག་ཕྱི་གསལ་ནང་གསལ་གནང་དགོས་པ་དང་རང་དབང་ཅན་གྱི་ཞིབ་འཇུག་ཚོགས་ཆུང་ཞིག་ཆེད་འཛུགས་དགོས་པར་ཞུ་འབོད་གནང་འདུག
དེའང་ལས་འགུལ་དེའི་སྐབས་བོད་མི་དེ་དག་གིས་ལག་ཏུ་བོད་ཀྱི་རྒྱལ་དར་དང་། དགའ་ལྡན་ཕོ་བྲང་ལ་ངོ་རྒོལ་མིན། བོད་མིའི་སྒྲིག་འཛུགས་ལ་གུས་རྩི་ཡོད། སྲིད་སྐྱོང་བློ་སེང་ལ་ངོ་རྒོལ་ཡོད་ཅེས་པའི་འབོད་ཚིག་དང་། དེ་བཞིན་སྤེན་པ་ཚེ་རིང་ལ་དྲང་བདེན་བྱེད་དགོས། བློ་བཟང་སེང་གེ་དབང་ཆ་སྒེར་སྤྱོད་མ་གནང་རོགས་ཞེས་སོགས་འཁོད་པའི་འཕྲེད་དར་བསྣམས་ནས་ངོ་རྒོལ་གནང་འདུག སྐབས་དེར་སྐུ་ཚབ་དོན་གཅོད་གསར་རྙིང་གཉིས་ནས་མི་མང་གི་སྐུ་ཚབ་ཁག་ཅིག་ལས་ཁུངས་སུ་ཆེད་སྐོང་ཐོག་ཁོང་ཚོའི་མངོན་འདོད་ལ་གསན་འཇོག་གནང་རྗེས་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་ཁོང་ད་རེས་བཀའ་ཤག་གི་ལས་བྱེད་པ་ཞིག་གི་ངོ་བོའི་ཐོག་རྩིས་ལེན་རྩིས་སྤྲོད་ཆེད་དུ་ཕེབས་པ་མ་གཏོགས་བཀའ་ཤག་གི་སྐུ་ཚབ་ཀྱི་ངོ་བོའི་ཐོག་ནས་ཕེབས་མེད་སྟབས། ཁོང་ནས་གནད་དོན་དེའི་སྐོར་ཐག་གཅོད་དང་འགྲེལ་བརྗོད་རིག་གང་ཡང་མེད་ཅེས་གསུངས་པ་དང་སྦྲགས། བཀའ་ཤག་གི་ངོས་ནས་སྔ་རྗེས་སུ་གསལ་བཤད་རིམ་པ་གནང་ཡོད་པ་དེ་ལྟར་ཡང། མང་ཚོགས་ཁག་ཅིག་གི་གསལ་བཤད་གསལ་པོ་མི་འདུག་ཅེས་གསུང་བཞིན་པའི་ཁྲོད་ད་རེས་ལས་འགུལ་བ་རྣམས་ནས་གང་གསུངས་པ་དང་དགོས་འདུན་འཁོད་པའི་ཡིག་ཆ་རྣམས་རྡ་སར་ཕྱིར་ལོག་གནང་རྗེས་བཀའ་ཤག་ལ་སྙན་གསེང་ཞུ་རྒྱུ་ཡིན་སྐོར་གསུངས་འདུག
ལས་འགུལ་བའི་འཐུས་མི་ཁག་ཅིག་སྐབས་དེར་སྐུ་ཚབ་དོན་གཅོད་གཉིས་ལས་ཁུངས་ཕྱི་ཕྱོགས་སུ་ཕེབས་ནས་མང་ཚོགས་ལ་གསལ་བཤད་གནང་དགོས་པའི་དགོས་འདུན་བཏོན་འདུག་ཀྱང། ཤེས་རིག་བཀའ་བློན་དངོས་གྲུབ་ཚེ་རིང་མཆོག་ནས་སྐུ་ཚབ་འཐུས་མི་རྣམས་ལ་ཞུས་པ་ལས་ལྷག་པ་གང་ཡང་ཞུ་རྒྱུ་མེད་ཅེས་ཕྱི་ཕྱོགས་སུ་ཕེབས་མེད་སྟབས། ཁོང་རྣམས་ནས་དེར་ངོ་རྒོལ་གནང་བ་དང་སྦྲགས། དངོས་གྲུབ་ཚེ་རིང་མཆོག་སྐུ་ཚབ་དོན་གཅོད་གསར་པར་ངོས་ལེན་མེད་ཅེས་གསུངས་འདུག
དེ་བཞིན་ལས་འགུལ་བའི་གསར་འགོད་བསྒྲགས་གཏམ་གནང་བའི་ནང་དགོས་འདུན་དོན་ཚན་བཅུ་ཆེད་བཏོན་གནང་འདུག་པ་རྣམས་ནི། བཀའ་ཤག་ནས་ཕྱི་གསལ་གནང་གསལ་གནང་དགོས་པ་དང། གནད་དོན་དེ་སེལ་ཐབས་སུ་རང་དབང་ལྡན་པའི་ཞིབ་འཇུག་ཚོགས་ཆུང་ཚུགས་དགོས་པ། རྩོད་རྙོག་འོག་ཡོད་པའི་ཨ་སྒོར་ས་ཡ་གཅིག་དང་ཕྱེད་ཀའི་རྩིས་ཁྲ་མང་ཚོགས་ལ་ཡོངས་བསྒྲགས་གནང་དགོས་པ། སྤེན་པ་ཚེ་རིང་ལ་དྲང་ལྡན་གནང་དགོས་པ་སོགས་འཁོད་འདུག
རེས་གཟའ་ལྷག་པ། ༢༠༡༧།༡༡།༢༩
vot.org -
ཉན་པ།: Listen
ཕབ་ལེན། Download
དཀར་མཛེས་རྫོང་ཐོག་ཏུ་དགེ་འདུན་པ་ཞིག་གིས་རང་ལུས་མེར་བསྲེགས་གནང་འདུག
ཐེ་ཝན་གྲོས་ཚོགས་སུ་མང་མོས་ཐག་གཅོད་འོག་བོད་སོག་ལས་ཁུངས་སྒོ་བརྒྱབ་རྒྱུ་གཏན་འཁེལ་བྱུང་འདུག
ཨ་རི་དོན་གཅོད་ཀྱི་རྩིས་ལེན་རྩིས་སྤྲོད་སྐབས་བོད་མི་ཁག་ཅིག་གིས་ངོ་རྒོལ་ལས་འགུལ་སྤེལ་འདུག
ཇོ་ནང་པ་ལ་ཆོས་བརྒྱུད་གཅིག་མཚུངས་ཀྱི་ཐོབ་ཐང་ཆེད་མུ་མཐུད་ལས་འགུལ་སྤེལ་རྒྱུའི་ཐག་གཅོད་བྱུང་འདུག
ཡེ་ཤེས་ཞི་སྲས་ལགས་ལ་རྒྱལ་སྤྱིའི་དྲག་རྩལ་འགྲན་བསྡུར་ནང་རྒྱལ་ཁ་ཐོབ་འདུག
བཀའ་སློབ་ལེ་ཚན། ༸གོང་ས་མཆོག་གིས་ཨོ་རི་ས་བོད་མིར་བསྩལ་བའི་བཀའ་སློབ།
Wednesday 29/11/2017
Tibetan monk self immolates in Karze, Tibet
Taiwan Parliament passes bill to dissolve Mongolia Tibet Affairs Commission
Group of Tibetans protest outside Office of Tibet in Washington DC
Jonang Association to continue strive for seat in parliament
Tibetan youth wins Swiss Championship at World Kickboxing
FEATURE: Dalai Lama speech to Odisha Tibetans in Bhubaneswar
ཇོ་ནང་པར་གྲོས་ཚོགས་སུ་ཆོས་བརྒྱུད་གཅིག་མཚུངས་ཀྱི་ཐོབ་ཐང་ཆེད་མུ་མཐུད་ལས་འགུལ་སྤེལ་རྒྱུར་ཐག་གཅོད་བྱུང་འདུག
vot.org -
ཇོ་ནང་པའི་དམིགས་བསལ་ཚོགས་ཆེན་ཐེངས་ ༩ ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཐག་གཅོད་ལ་ཡིད་ཆེས་ཀྱིས་ཇོ་ནང་པར་གྲོས་ཚོགས་སུ་ཆོས་བརྒྱུད་གཅིག་མཚུངས་ཀྱི་ཐོབ་ཐང་སླད་གྲོས་ཚོགས་སུ་མུ་མཐུད་ཞུ་གཏུག་གནང་རྒྱུ་དང་། གལ་ཏེ་གྲོས་ཚོགས་ནས་འདོད་བློ་ཁེངས་པའི་ཐག་གཅོད་གཅིག་མ་བྱུང་ཚེ་ཆེས་མཐོའི་ཁྲིམས་ཞིབ་ཁང་དུ་ཞུ་གཏུག་དབུ་འཛུགས་བྱ་རྒྱུར་ཐག་གཅོད་བྱུང་འདུག
དེའང་ཕྱི་ཟླ་ ༡༡ ཚེས་ ༢༥ ནས་ ༢༧ བར་ནོར་གླིང་བོད་ཀྱི་རིག་གཞུང་ལྟེ་གནས་ཁང་གི་ཉེ་འཁྲིས་སུ་ཆགས་པའི་ཇོ་ནང་དུས་འཁོར་གྲྭ་ཚང་དུ་༸རྒྱལ་བ་ཇོ་ནང་པའི་སྔོན་གྱི་བྱུང་རབས་དང་ད་ལྟའི་གནས་བབ་གླེང་བའི་བགྲོ་གླེང་དང་། ཇོ་ནང་པའི་དམིགས་བསལ་ཚོགས་ཆེན་ཐེངས་ ༩ བསྐོང་ཚོགས་གནང་ཡོད་པ་རེད། ཚོགས་འདུ་ཐོག་རྒྱ་གར་གཙོས་ ཕྱིའི་རྒྱལ་ཁབ་ཁག་བདུན་གྱི་ས་གནས་ཁག་ ༡༩ ཙམ་ནས་སྐུ་ཚབ་མི་སྣ་ ༥༠ ལྷག་འདུ་འཛོམས་བྱུང་འདུག
ཚོགས་ཆེན་ཉིན་མཐའ་མའི་སྐབས་གྲོས་གཞི་དོན་ཚན་ལྔའི་ཐོག་གྲོས་ཆོད་བཞག་གནང་ཡོད་པ་ལྟར་གྲོས་གཞི་དོན་ཚན་བཞི་པའི་ཁོངས་སུ་ལོ་རྗེས་མའི་ཕྱི་ཟླ་ ༣ པའི་གྲོས་ཚོགས་སྐབས་སམ་གྲོས་ཚོགས་ཚོགས་དུས་གང་རུང་ཞིག་ཏུ་ཇོ་ནང་ཆོས་བརྒྱུད་ལ་ཆོས་བརྒྱུད་གཞན་སྤྱི་མཚུངས་ཀྱི་ཐོབ་ཐང་གནང་ཕྱོགས་སྐོར་གཞུང་འབྲེལ་ཁྲིམས་འཆར་འཁུར་ཐབས་སྐོར་དང་འབྲེལ་ཇོ་ནང་པས་བོད་མི་མང་སྤྱི་འཐུས་ལྷན་ཚོགས་ཀྱི་ཐག་གཅོད་ལ་ཡིད་ཆེས་ཀྱིས་ཇོ་ནང་པར་གྲོས་ཚོགས་སུ་ཆོས་བརྒྱུད་གཅིག་མཚུངས་ཀྱི་ཐོབ་ཐང་ཆེད་ཁྲིམས་བཟོ་ལྷན་ཚོགས་ལ་མུ་མཐུད་ཞུ་སྙན་འབུལ་འཆར་ཡོད་པ་དང་། གལ་ཏེ་གྲོས་ཚོགས་ནས་འདོད་བློ་ཁེངས་པའི་ཐག་གཅོད་གཅིག་མ་བྱུང་ཚེ་ཆེས་མཐོའི་ཁྲིམས་ཞིབ་ཁང་དུ་ཞུ་གཏུག་དབུ་འཛུགས་བྱ་རྒྱུར་ཐག་གཅོད་བྱུང་འདུག
དེ་བཞིན་ཉིན་གཉིས་རིང་གི་ཚོགས་ཆེན་ཐོག་ཇོ་ནང་པའི་ངོས་ནས་༸གོང་ས་མཆོག་གི་བཀའ་དགོངས་བཞིན་ཆོས་ལུགས་དང་ཆོས་བརྒྱུད་ཕན་ཚུན་མཐུན་སྒྲིལ་ཆེད་ཆོས་བརྒྱུད་གཞན་གྱི་བཀོད་སྒྲིག་ཞུས་པའི་རིས་མེད་བགྲོ་གླེང་སོགས་ལ་མཉམ་ཞུགས་བྱ་རྒྱུ་དང་བགྲོ་གླེང་བཀོད་སྒྲིག་བྱ་རྒྱུའི་གྲོས་ཆོད་དང་། དེ་སྔ་ཡོད་པའི་འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་མིང་དེ་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ལ་མིང་བསྒྱུར་གྱིས་ཚོགས་གཙོའི་ཐུགས་འགན་ཇོ་ནང་རྒྱལ་ཚབ་རིན་པོ་ཆེས་བཞེས་རྒྱུ་དང་། བཙན་བྱོལ་དུ་ཡོད་པའི་ཇོ་ནང་པའི་དགོན་སྡེ་ཁག་དང་ཕྱི་རྒྱལ་ཁག་ཏུ་ཡོད་པའི་ཆོས་ཚོགས་ཁག་སྲ་བརྟན་ཡུན་གནས་དང་སློབ་གཉེར་ཡར་རྒྱས་གཏང་རྒྱུ་སོགས་གྲོས་གཞི་ཁག་མི་འདྲ་བ་ལྔའི་ཐོག་གྲོས་ཆོད་བཞག་འདུག
རྩ་བའི་བཙན་བྱོལ་དུ་ཇོ་ནང་པའི་དགོན་པ་ལྔ་དང་སོག་ཡུལ་དུ་དགོན་པ་གཉིས་ཡོད་པ་མ་ཟད་ཕྱི་རྒྱལ་ཡུལ་གྲུ་ཁག་ཏུ་ཆོས་ཚོགས་ཁག་ ༢༠ ལྷག་ཡོད་པ་རེད།