Monthly Archives: November, 2018

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་ནང་ཉིན་གྲངས་བཅུ་ཙམ་རིང་གི་ཆོས་འབྲེལ་དང་བཀའ་སློབ་སོགས་ཀྱི་མཛད་འཕྲིན་ཁག་ལེགས་པར་གྲུབ་ཏེ་ཁ་སང་བཞུགས་སྒར་༸རྒྱལ་བའི་ཕོ་བྲང་དུ་༸ཞབས་སོར་བདེ་བར་འཁོད་སོང་། ཁ་སང་ཉིན་རྒྱབ་ཚོུད་ ༡ ཡོལ་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ས་ལྡི་ལི་ནས་མཁའ་ལམ་བརྒྱུད་བཞུགས་སྒར་ཉེ་འདབས་སུ་ཡོད་པའི་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་སྐབས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་གིས་གཙོས་པའི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་གནད་ཡོད་མི་སྣ་སོགས་ཆེད་བཅར་ཀྱིས་ཕེབས་བསུ་གཟབ་རྒྱས་ཞུས་ཡོད་པ་རེད།སྐབས་དེར་མགོན་པོ་༸གང་ཉིད་མཆོག་གིས་གསར་འགོད་པའི་བཀའ་འདྲིར་བཀའ་ལན་སྩལ་བར་ཉེ་ལམ་དཔལ་གསང་ཆེན་སྔ་འགྱུར་རྙིང་མའི་ཆོས་བརྒྱུད་ཀྱི་དབུ་འཛིན་ཁྲི་རབས་བདུན་པ་མཆོག་སྐུ་ཞི་བར་གཤེགས་པའི་གནས་ཚུལ་བྱུང་བར་བརྟེན་ད་ཆ་བོད་ཀྱི་ཆོས་བརྒྱུད་ཁག་གི་ཚོགས་ཆེན་འཚོགས་ན་འཚམ་པོ་མེད་པས་ཕྱིར་འགྱངས་གནང་བ་རེད་ཅེས་བཀའ་བསྩལ་འདུག བཞུགས་སྒར་དུ་ཆིབས་བསྒྱུར་མཛད་སྐབས་ཕེབས་ལམ་གྱི་གཡས་གཡོན་དུ་ས་གནས་བོད་མི་ཚོས་ལག་ཏུ་དཀར་གཙང་གི་མཇལ་དར་དང་དུག་སྤོས། ཞུགས་ཏོག་བཅས་བསྣམས་ཏེ་དགའ་དད་སྤྲོ་གསུམ་འཁོད་ཐོག་༸གང་ཉིད་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད།གཞི་རྩའི་མགོན་པོ་༸གང་ཉིད་མཆོག་ཉི་ཧོང་ཁུལ་དུ་ཟླ་ ༡༡ ཚེས་ ༡༣ ནས་དབུ་འཛུགས་ཀྱིས་ཚེས་ ༢༣ བར་ཁྱོན་ཉིན་གྲངས་བཅུ་ཙམ་གྱི་རིང་བཞུགས་ཞག་མཛད་འཕྲིན་བསྐྱངས་པའི་ཁྲོད་ཚེས་ ༡༤ ནས་ ༡༦ བར་ཡོ་ཁོ་ཧཱ་མ་གྲོང་ཁྱེར་དུ་བཀའ་ཆོས་དང་བཀའ་དབང་། དེ་བཞིན་ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ཐོག་དབུ་བཞུགས་མཛད་པ་མ་ཟད། ཚེས་ ༡༧ ནས་ ༡༨ བར་ Tokyo ནང་ཡོད་པའི་ཤེས་རབ་སྐྱེད་ཚལ་གླིང་སློབ་གཉེར་ཁང་དང་སྐུ་ཚབ་དོན་གཅོད་ཁང་། ཉི་ཧོང་བོད་ཁང་དང་སོག་པོའི་རིག་གཞུང་ལྟེ་གནས་ཁང་བཅས་ནས་༸གང་ཉིད་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་ཊོག་ཡོ་མི་མང་ ༢༠༠༠ ཙམ་ལ་ང་ཚོ་ཁྱིམ་ཚང་གཅིག་ཅེས་པའི་བརྗོད་གཞིའི་ཐོག་བཀའ་སློབ་བསྩལ་བ་དང་ཚེས་ ༡༨ ཉིན་ཤེས་རབ་སྐྱེད་ཚལ་གླིང་སློབ་གཉེར་ཁང་གི་ཚོགས་ཁང་གསར་པ་དབུ་འབྱེད་རབ་གནས་མཛད་པ་དང་འབྲེལ་ཏེ་དགེ་བཤེས་གླང་རི་ཐར་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་མཛད་ཡོད་པ་རེད།དེ་བཞིན་ཚེས་ ༡༩ ནས་  ༢༢ ཉི་ཧོང་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་ཚོགས་ཆུང་དང་མཇལ་འཕྲད་དང་ཁུལ་དེར་གནས་བཞུགས་བོད་མི་དང་འབྲུག་པ། ཧི་མཱ་ལ་ཡའི་མི་རིགས་ཁག་ཅིག་ལ་མཇལ་ཁ་བསྩལ་བ་དང་འབྲེལ་བཀའ་འགྱུར་བསྟན་འགྱུར་ཐད་བསླབ་པ་སློབ་གཉེར་གནང་དགོས་གལ་ཡིན་པར་ལམ་སྟོན་མཛད་པ་མ་ཟད་ཉི་ཧོང་གི་ལྷོ་ཕྱོགས་སུ་དེ་སྔ་ས་འགུལ་འོག་འདས་གྲོངས་སུ་ཕྱིན་པ་རྣམས་ཀྱི་སླད་མཆོད་འབུལ་སྨོན་ལམ་ཐོག་དབུ་བཞུགས་མཛད་ཡོད་པ་རེད།༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་ལ་གཞིགས་ན། རིན་མིན་ཕྱི་ཟླ་ ༡༢ ཚེས་ ༣ ནས་ ༥ བར་རྒྱ་གར་ཨུ་ཏར་མངའ་སྡེའི་སན་ཀི་སའམ་ལྷ་བབས་ཀྱི་གནས་སུ་རྒྱ་གར་གཞོན་ནུ་ནང་ཆོས་ཚོགས་པས་ཇི་ལྟར་གསོལ་འདེབས་ཞུས་དོན་ལྟར། མགོན་པོ་༸གང་ཉིད་མཆོག་གིས་རྒྱལ་སྲས་ཆནེ་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་གསུང་ཆོས་བཀྲིན་བསྩལ་རྒྱུ་དང་། དེ་རྗེས་རྒྱལ་ས་ལྡི་ལི་དང་མུམ་བའེ་ནང་ཆིབས་བསྒྱུར་གྱིས་གཙུག་ལག་སློབ་གཉེར་ཁང་ཁག་གཅིག་ནང་བཀའ་སློབ་བཀྲིན་བསྩལ་རྒྱུ་མ་ཟད། ཕྱི་ཟླ་ ༡༢ ཚེས་ ༡༦ ཉིན་༸གོང་ས་མཆོག་མུམ་བའེ་ནས་མཁའ་ལམ་བརྒྱུད་གནས་མཆོག་རྡོ་རྗེ་གནད་དུ་༸ཞབས་སོར་བདེ་བར་འཁོད་ཀྱི་ཡོད་པ་དང་འབྲེལ་རིས་མེད་དྲང་ངེས་མཁས་པའི་བགྲོ་གླེང་དང་དེ་བཞིན་རྒྱལ་སྤྱིའི་བཀའ་སྡེ་སྣོད་གསུམ་གྱི་བགྲོ་གླེང་ཐོག་དབུ་བཞུགས་མཛད་རྒྱུ་མ་ཟད། ཉེ་བརྒྱུད་འཇམ་དབྱངས་ཆོས་སྐོར་དང་ལག་ལེན་སོ་བདུན་མ། གཞན་ཡང་དེ་སྔ་ཕྱི་ལོ་ ༢༠༡༥ ལོར་གདན་ས་བཀྲིས་ལྷུན་པོར་གནང་བའི་ཚད་མ་རྣམ་འགྲེལ་གྱི་བཀའ་ཁྲིད་འཕྲོ་སྐྱོང་བཀྲིན་སྩལ་རྒྱུ་བཅས་ཐུགས་གཏན་ཁེལ་ཡོད་པ་རེད། དེ་རྗེས་བོད་མིའི་སྒྲིག་འཛུགས་ཀྱིས་གཙོས་པའི་ཚོགས་སྡེ་ཁག་གཅིག་ནས་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་རེད་འདུག

ཁ་སང་ཚེས་ ༢༥ ཉིན་ཕྱི་དྲོ་ཆུ་ཚོད་ ༥༌༣༠ ཐོག་བཞུགས་སྒར་དྷ་སའི་ཉིན་མོ་སློབ་གྲྭར་ཡུ་སྒོར་ལྔ་ཡི་རྨི་ལམ་ཞེས་པའི་བོད་སྐད་གློག་བརྙན་གསར་པ་ཞིག་མང་ཚོགས་ལ་གཟིགས་འབུལ་གནང་སོང་། གློག་བརྙན་བཟོ་སྐྲུན་པ་ནི་ཕ་རན་སིར་གནས་བཞུགས་ཁང་གསར་སྐལ་བཟང་ཚེ་རིང་ལགས་ཡིན་པ་དང་། གློག་བརྙན་དེ་ཕ་རན་སི་རྒྱལ་ས་ Paris ནང་པར་ལེན་གནང་བ་ཞིག་རེད་འདུགའདི་གའི་གསར་འགོད་པས་ཁོང་ལ་གློག་བརྙན་དེའི་སྐོར་ལ་བཀའ་འདྲི་ཁག་གཅིག་ཞུས་པར་གཙོ་བོ་ནི་གཞོན་སྐྱེས་ཕོ་མོ་གཉིས་ཀྱི་ངེས་གཏན་མེད་པའི་བརྩེ་དུང་དང་འཚོ་བའི་དཀའ་སྡུག་སོགས་ཀྱི་གཏམ་རྒྱུད་དེའི་བརྒྱུད་ནས་ནུབ་ཕྱོགས་ཀྱི་སྤྱི་ཚོགས་སུ་བོད་ཟེར་བ་དེ་རྒྱ་མི་མིན་པར་ར་སྤྲོད་གནང་བའི་གློག་བརྙན་ཞིག་ཡིན་སྐོར་ངོ་སྤྲོད་གནང་བ་དང་། ལྷག་དོན་དུས་རབས་ཀྱི་འགྱུར་འགྲོས་དང་བསྟུན་ནས་དེ་ནི་བོད་པའི་དངོས་བྱུང་གི་གཏམ་རྒྱུད་དེ་དག་བོད་པ་རང་གིས་བཟོ་ཐུབ་གནང་དགོས་གལ་ཡིན་པ་དང་། དེས་བོད་ཀྱི་རྩ་དོན་དང་འབྲེལ་བའི་འཐབ་རྩོད་ལ་ནུས་པ་ཐོན་གྱི་ཡོད་ཚུལ་སོགས་གསུངས་སོང་། རྩ་བའི་ཡུ་སྒོར་ལྔའི་རྨི་ལམ་ཞེས་པའི་བོད་སྐད་གློག་བརྙན་དེ་ཐེངས་དང་པོ་ཕ་རན་སི་རྒྱལ་ས་ Paris ནང་དབུ་འབྱེད་གནང་བ་དང་། ཁ་སང་ཕྱི་དྲོར་བཞུགས་སྒར་དྷ་སའི་ཉིན་མོ་སློབ་གྲྭའི་ཚོགས་ཁང་དུ་མི་མང་ལ་གཟིགས་འབུལ་ཞུས་ཡོད་པ་རེད། སྐབས་དེར་གཟིགས་མོ་བ་ ༥༠ ལྷག་ཆེད་ཕེབས་གནང་བ་ལས་མང་པོ་ཞིག་གིས་གློག་བརྙན་དེར་བསྔགས་བརྗོད་གནང་ཡང་། ཁག་གཅིག་གིས་སྒྲ་སྦྱོར་བྱེད་སྟངས་ཐོག་ཡར་རྒྱས་གནང་དགོས་པའི་དགོངས་འཆར་གནང་མཁན་བྱུང་འདུགཁང་གསར་སྐལ་བཟང་ཚེ་རིང་ལགས་ནས་སྔོན་ཆད་ཁོང་བཞུགས་སྒར་དྷ་རྨ་ས་ལར་བཞུགས་སྐབས་འཚོ་བའི་བདེ་སྐྱིད་ The Joy of living ཅེས་པའི་ཁྱི་འཁྱམ་ལ་ལྟ་རྟོག་བྱེད་མཁན་ཁྱི་ཨ་ནེའི་དངོས་བྱུང་གི་གློག་བརྙན་ཞིག་ཀྱང་བཟོ་སྐྲུན་གནང་ཡོད་པ་རེད། ཁོང་གིས་ཐེངས་འདིའི་ཡུ་སྒོར་ལྔ་ཡི་རྨི་ལམ་ཞེས་པའི་གློག་བརྙན་དེའི་ཆེད་ཡུ་སྒོར་སུམ་སྟོང་ཙམ་གྱི་འགྲོ་གྲོན་བཏང་ཡོད་པ་དང། གློག་བརྙན་དེའི་ནང་གི་འཁྲབ་སྟོན་པ་ཚང་མས་དང་བླང་གནང་བ་ཞིག་རེད་འདུག

བོད་མིའི་སྒྲིག་འཛུགས་ཆོས་རིགས་ལས་ཁུངས་ཀྱིས་རྐང་གོ་སྒྲོག་འོག་བཞུགས་སྒར་དྷ་རྨ་ས་ལར་གཟའ་འཁོར་འདིའི་རེས་གཟའ་ཕུར་བུ་ནས་རེས་གཟའ་སྤེན་པ་བར་ཉིན་གྲངས་གསུམ་རིང་འཚོགས་གཏན་ཁེལ་བའི་བོད་ཀྱི་ཆོས་བརྒྱུད་ཁག་དང་གཡུང་དྲུང་བོན་བཅས་ཀྱི་ཆོས་ཚོགས་ཐེངས་ ༡༣ པ་དེ་རེ་ཞིག་དུས་ཚེས་ངེས་མེད་བར་ཕྱིར་འགྱངས་གནང་རྒྱུར་ཐུགས་ཐག་བཅད་འདུག གཞི་རྩའི་ཐེངས་འདིའི་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་ཆོས་ཚོགས་ཐེངས་ ༡༣ པ་དེ་གངས་ཅན་སྐྱིད་ཤོངས་སུ་ཉེ་ཆར་གསར་རྒྱག་ཟིན་པའི་བོད་མིའི་སྒྲིག་འཛུགས་ཀྱི་ཁང་རྩེག་གསར་པ་ T building ཚོགས་ཁང་དུ་འཚོགས་གཏན་ཁེལ་ཡོད་པ་མ་ཟད་ཆོས་ཚོགས་ཀྱི་ཉིན་མཐའ་མ་སྟེ་བདུན་ཕྲག་འདིའི་རེས་གཟའ་སྤེན་པའི་ཉིན་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཆོས་ཚོགས་དང་འབྲེལ་བའི་བཀའ་སློབ་བཀའ་དྲིན་སྩལ་རྒྱུ་སོགས་མཛད་རིམ་ཡོངས་རྫོགས་བང་སྒྲིག་ཡོད་པ་རེད། འོན་ཀྱང་ཁ་ཉིན་ཕྱི་ཚེས་ ༢༤ ཉིན་ཆོས་རིག་ལས་ཁུངས་ནས་ཡོངས་ཁྱབ་གལ་ཆེའི་གསལ་བསྒྲགས་ཤིག་སྤེལ་བའི་བརྒྱུད་ཉེ་ཆར་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་གློ་བུར་དགོངས་པ་གཞན་དོན་དུ་གཤེགས་པར་མྱ་ངན་གུས་འདུད་མཚོན་ཆེད་དང་། སྔ་འགྱུར་རྙིང་མ་གཙོ་གྱུར་ཆོས་བརྒྱུད་གཞན་རྣམས་ཀྱི་བླ་སྤྲུལ་མཁན་སློབ་ཆེ་ཁག་གཞན་མང་པོ་ཡང་གོང་གསལ་གནས་ཚུལ་ལ་བརྟེན་ནས་ཆོས་ཚོགས་ཐོག་ཕེབས་སྟབས་མི་འགྲིག་པ་འགྱུར་ངེས་ཀྱི་རྒྱུ་མཚན་ལ་གཟིགས་ཏེ་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་ཆོས་ཚོགས་ཐེངས་ ༡༣ པ་དེ་དུས་ཚེས་ངེས་མེད་བར་ཕྱིར་འགྱངས་གནང་དགོས་བྱུང་ཞེས་འཁོད་འདུག འདི་ག་རླུང་འཕྲིན་ཁང་ནས་གསལ་བསྒྲགས་དེ་དང་འབྲེལ་དེ་རིང་བོད་མིའི་སྒྲིག་འཛུགས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ལ་ཆོས་ཚོགས་ཐེངས་ ༡༣ པ་དེ་མ་འོངས་ནམ་ཚོགས་ཐུབ་མིན་སོགས་དང་འབྲེལ་བཅར་འདྲི་ཁག་ཅིག་ཞུས་པར་རིམ་པས་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་དབུ་ཁྲིད་བླ་ཆེན་རྣམ་པའི་མཛད་འཆར་དང་། ལྷག་པར་དུ་སྔ་འགྱུར་རྙིང་མའི་དབུ་འཛིན་གསར་པ་ཕེབས་རྒྱུའི་དུས་ཚོད་སོགས་དང་སྟབས་བསྟུན་ཏེ་གང་མགྱོངས་གོ་སྒྲིག་ཞུ་འཆར་ཡོད་པ་གསུངས་ཡོད།

ཉན་པ།: Listen ཕབ་ལེན། Download བོད་ཀྱི་རིག་གཞུང་དང་སྒྱུ་རྩལ་གྱི་དོ་ར།མངའ་རིའི་དམངས་ཁྲོད་ཀྱི་གླུ་གཞས་སྐོར་གླེང་བ། Sunday 25/11/2018 Art and Culture: in conversation with Pasang Tsering and his wife Sonam Sangmo on their passion and interest in preserving Ngari Folk songs

ཉན་པ།: Listen ཕབ་ལེན། Download བློ་གསར་གཞོན་ནུ། སྲོལ་རྒྱུན་གྱི་བསམ་བློ་ལས་འདས་ཏེ་ཚོང་ལས་གཉེར་བའི་གླེང་མོལ། Saturday 24/11/2018 Young Minds: In conversation with 3 young Tibetan entrepreneurs

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཉི་ཧོང་ནང་ཉིན་གྲངས་བཅུ་ལྷག་གི་མཛད་འཕྲིན་ཁག་ལེགས་གྲུབ་མཛད་ནས་དེ་རིང་སྔ་ཐོག་ཁུལ་དེའི་ཚོུད་ ༩.༤༥ ཐོག་ཉི་ཧོང་གི་ལྷོ་ནུབ་གྲོང་ཁྱེར་ Fukuoka ནས་མཁའ་ལམ་བརྒྱུད་རྒྱ་གར་ཕྱོགས་སུ་ཆིབས་ཞལ་བསྒྱུར་གནང་འདུག རྩ་བའི་༸གོང་ས་སྐྱབས་མགོན་ཆེན་པོ་མཆོག་ཟླ་བ་འདིའི་ཚེས་ ༡༢ ཉིན་ཉི་ཧོང་དུ་༸ཞབས་དོར་བདེ་བར་འཁོད་པ་དང་འབྲེལ། ཚེས་ ༡༤ ནས་དབུ་འཛུགས་ཀྱིས་དེ་རིང་བར་ཁྱོན་ཉིན་གྲངས་བཅུ་ལྷག་གི་རིང་ཁུལ་དེའི་ Yokohama དང་ Tokyo གཙོས་པའི་ Chiba ས་གནས་སུ་དད་ལྡན་མང་ཚོགས་ལ་བཀའ་ཆོས་དང་གཞོན་སྐྱེས་ཚོར་བཀའ་སློབ། ཆཱི་སྦ་གྲོང་ཁྱེར་དུ་ཡོད་པའི་ཤེས་རབ་སྐྱིད་ཚལ་གླིང་སློབ་གཉེར་ཁང་གི་ཚོགས་ཁང་གསར་པ་དབུ་འབྱེད་རབ་གནས་མཛད་པ་དང་ཉི་ཧོང་གི་རྒྱལ་ཡོངས་གཟུགས་མཐོང་རླུང་འཕྲིན་དང་ཁུལ་དེའི་ནང་གི་ Think Tank འམ་བསམ་བློ་བའི་བཅར་འདྲི་ཁག་ཅིག་དང་ལེན་མཛད་ཡོད་པ་མ་ཟད། ཁུལ་དེའི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་ཚོགས་ཆུང་དང་མཇལ་འཕྲད་དང་། ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ཐོག་དབུ་བཞུགས། དེ་བཞིན་ཉི་ཧོང་ནང་གནས་བཞུགས་བོད་མི་དང་འབྲུག་པ། དེ་བཞིན་ཧི་མཱ་ལ་ཡའི་མི་རིགས་ཁག་གཅིག་ལ་མཇལ་ཁ་དང་བཀའ་སློབ་ལམ་སྟོན་མཛད་པ་དང་ལྷག་དོན་༸གོང་ས་མཆོག་ནས་ཁ་སང་ཉི་ཧོང་གི་ལྷོ་ཕྱོགས་སུ་དེ་སྔ་ས་འགུལ་འོག་འདས་གྲོངས་སུ་ཕྱིན་པ་རྣམས་ཀྱི་སླད་འཆོད་འབུལ་སྨན་ལམ་ཐོག་དབུ་བཞུགས་མཛད་པ་སོགས་ཀྱི་མཛད་འཆར་དུ་མ་བསྐྱངས་གནང་མཛད་ཡོད་པ་རེད། མཛད་འཆར་ལྟར་ན། ༸གོང་ས་མཆོག་དེ་རིང་ཉི་ཧོང་གི་གྲོང་ཁྱེར་ Fukuoka  ནས་སིངྒ་པུར་བརྒྱུད་རྒྱལ་ས་ལྡི་ལིར་ཆིབས་བསྒྱུར་མཛད་དེ་སང་ཉིན་ཉིན་རྒྱབ་ལྡི་ལིར་༸ཞབས་སོར་འཁོད་གནང་གི་འདུག་པ་དང་ཁུལ་དེར་ཉིན་གཅིག་བཞུགས་གཞག་མཛད་དེ་ཚེས་ ༢༥ ཉིན་བཞུགས་སྒར་རྡ་རམ་ས་ལར་ཆིབས་ཐོན་གནང་གི་འདུག

ཉན་པ།: Listen ཕབ་ལེན། Download ༧གོང་ས་མཆོག་ཉི་ཧོང་ནང་གི་མཛད་འཕྲིན་ཁག་ལེགས་གྲུབ་ཀྱིས་རྒྱ་གར་ལ་ཆིབས་ཞལ་བསྒྱུར་གནང་བ། སྔགས་དགོན་གྱི་འདུ་ཁང་ཞིག་ལ་མེ་སྐྱོན་བྱུང་བའི་འོག་སྐུ་རྟེན་རྣམས་སྐྱོབ་ཆེད་བོད་མི་ཞིག་འདས་གྲོངས། བཀའ་ཟུར་ཟམ་གདོང་རིན་པོ་ཆེས་སེ་ར་ཐེག་ཆེན་གླིང་དུ་གཞུང་ཆེན་སློབ་གཉེར་ལ་སྤྲོ་བ་སྐྱེ་ཐབས་ཐོག་གསུང་བཤད་གནང་བ། དམིགས་བསལ་ལེ་ཚན། ཨ་རིའི་ནིའུ་ཡོག་དང་ནིའུ་ཇར་སིའི་བོད་རིགས་སྨན་ཞབས་ཚོགས་པའི་སྐོར། Friday 23/11/2018 Dalai Lama concludes Japan visit, leaves for India Tibetan monastery gutted down in fire, 1 dead S Rinpoche addresses Sera monks DIASPORA: Tibetan Nurses Association

ཉན་པ།: Listen ཕབ་ལེན། Download ༸གོང་ས་མཆོག་དབུ་བཞུགས་ཐོག་ཉི་ཧོང་དུ་འབྱུང་བའི་གོད་ཆག་ཁྲོད་འདས་གྲངས་སུ་ཕྱིན་པ་རྣམས་ཀྱི་ཆེད་དུ་འབུལ་སྨོན་ལམ་ཚོགས་པ། སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་ཀཿ ཐོག་དགེ་རྩེ་རིན་པོ་ཆེ་མཆོག་སྐུ་གཤེགས་འདུག ཡོ་རོབ་གྲོས་ཚོགས་ནང་བོད་ལ་འདྲ་མཉམ་འགྲུལ་སྐྱོད་ཆོག་པའི་གནད་དོན་སྐོར་བགྲོ་གླེང་ལྷན་ཚོགས་གནང་བ། བོད་མི་ཚོས་༸གོང་ས་མཆོག་༸སྐུ་ངལ་གསོ་བཞུགས་མཛད་དགོས་པའི་གསོལ་འདེབས་ཞུ་བཞིན་འདུག Thursday 22/11/2018 Dalai Lama leads prayer ceremony in Kukuoka CTA mourns passing away of 7th Nyingma head Kathok Getse Rinpoche Conference on Reciprocity and access to Tibet in EP Dalai Lama should rest: Feature

དེ་རིང་ཕྱི་ཟླ་ ༡༡ ཚེས་ ༢༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་ཞུགས་ཐོག་དེ་སྔ་ཉི་ཧོང་གི་ཁུལ་དུ་འབྱུང་བའི་གོད་ཆག་ཁྲོད་འདས་གྲོངས་སུ་ཕྱིན་པ་རྣམས་ཀྱི་སླད་དུ་མཆོད་འབུལ་སྨོན་ལམ་ཚོགས་འདུག ཉི་ཧོང་གྱི་ལྷོ་ངོས་སུ་ཡོད་པའི་ Fukuoka ཞེས་པའི་རྫོང་དུ་རྟེན་གཞི་བྱས་པའི་མ་དགོན་ Tochoji ནང་༸གོང་ས་མཆོག་དབུ་ཞུགས་ཀྱིས་གཙོས་པའི་སེར་སྐྱ་མང་ཚོགས་ ༡༥༠༠ ལྷག་འདུ་འཛོམས་གནང་ཐོག་དེ་སྔ་ལོ་གཉིས་ཀྱི་གོང་དུ་ཉི་ཧོང་ Kumanmoto ས་ཁུལ་དུ་ས་འགུལ་ཤུགས་ཆེའི་དོན་རྐྱེན་འོག་མི་རྒྱུ་གཉིས་ལ་གནོད་འཚེ་ཆེན་པོ་བྱུང་ཡོད་པ་མ་ཟད། འདི་ལོར་ཉི་ཧོང་གི་ས་གནས་མང་དག་ཞིག་ལ་དྲག་ཆར་རླུང་འཚུབ་དང་ཆུ་ལོག་སོགས་ཀྱི་དོན་རྐྱེན་འོག་གནོད་འཚེ་ཚབས་ཆེ་བྱུང་བ་རྣམས་ཀྱི་ཆེད་དུ་བདེ་སྨོན་དང་ཤེས་རབ་སྙིང་པོ་གསུང་འདོན་མཛད་པ་དང་། ཉི་ཧོང་པ་ཚོས་ཀྱང་མ་ཎི་དང་ཉི་ཧོང་གི་སྐད་དུ་ཤེས་སྙིང་པོ་གསུང་འདོན་གནང་ཐོག་མཆོད་འབུལ་སྨོན་ལམ་རྒྱས་པ་ཞིག་ཚོགས་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་ནས་རང་འབྱུང་གི་གོད་ཆག་ཕོག་པའི་ནང་མི་ཚོར་ཐུགས་གསོ་མཛད་པ་དང་ཆབས་ཅིག་ཏུ་ཉི་ཧོང་དེ་བཞིན་ནང་པའི་ལུང་པ་ཞིག་ཡིན་པ་དང་ཤེས་རབ་སྙིང་པོ་གསུང་འདོན་གནང་མཁན་ཤ་སྟག་ཡིན་སྟབས། ཤེས་རབ་སྙིང་པོ་ཁ་ནས་འདོན་པ་ཙམ་མ་ཡིན་པར་དེའི་དོན་རྟོགས་པའི་ཐོག་ནས་གསུང་འདོན་གནང་དགོས་གལ་ཡིན་པར་ལམ་སྟོན་བཀའ་སློབ་བསྩལ་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་ཟླ་བ་འདིའི་ཚེས་ ༡༤ ཉིན་ཉི་ཧོང་དུ་༸ཞབས་སོར་བདེ་བར་འཁོད་པ་དང་འབྲེལ། ཚེས་ ༡༧ ནས་དབུ་འཛུགས་ཀྱིས་ཡུལ་དེའི་མང་ཚོགས་ལ་ཆོས་འབྲེལ་དང་། བཀའ་སློབ། གྲོས་ཚོགས་འཐུས་མི་ཁག་གཅིག་མཇལ་འཕྲད་སོགས་ཀྱི་མཛད་འཆར་དུ་མ་ཞིག་བསྐྱངས་ཡོད་པ་དང། སང་ཉིན་༸གོང་ས་མཆོག་ཉི་ཧོང་ནས་རྒྱ་གར་དུ་ཆིབས་ཞལ་བསྒྱུར་གནང་རྒྱུ་ཡིན་པ་རེད།