Monthly Archives: May, 2019

ཉི་ཧོང་གི་གོང་མ་ཁྲི་ཐོག་ ༡༢༥ པའི་རྒྱལ་སྲས་བགྲེས་པ་ Naruhito མཆོག་གིས་ཁ་སང་ཉི་ཧོང་གི་གོང་མ་ཁྲི་ཐོག་ ༡༢༦ པའི་རྒྱལ་སྲིད་འགན་དབང་བཞེས་པ་དང་འབྲེལ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་ལ་དགའ་བསུའི་འཚམས་འདྲི་བསྩལ་འདུག དེ་ཡང་གུང་ལོ་ ༨༥ ཕེབས་པའི་ཉི་ཧོང་གི་གོང་མ་ཁྲི་ཐོག་ ༡༢༥ པ་ Akihito མཆོག་གི་སྐུ་ན་དང་སྐུ་གཟུགས་ཀྱི་འཕྲོད་བཞེས་གནས་སྟངས་ལ་བརྟེན་རྒྱལ་སྲིད་ཀྱི་འགན་དབང་ཆ་ཚང་བ་ཞིག་གྲུབ་པར་སྐུ་ངལ་འཕྲད་ཀྱི་ཡོད་སྟབས། ཁ་ཉིན་ཟླ་ ༤ ཚེས་ ༣༠ ཉིན་གོང་མའི་རྒྱལ་སྲིད་ཀྱི་སྐུ་དབང་བློས་བཏང་གནང་སྟེ་ Heisei རྒྱལ་སྲིད་ཀྱི་དུས་རབས་མཇུག་སྒྲིདྲིལ་གནང་བ་དང་འབྲེལ། དགུང་ལོ་ ༥༩ སོན་པའི་ཁོང་གི་རྒྱལ་སྲས་བགྲེས་པ་ Naruhito མཆོག་ནས་རྒྱལ་སྲིད་འཛིན་རྒྱུ་ཡིན་པའི་གསལ་སྒྲགས་གནང་བ་བཞིན། ཁ་སང་ཕྱི་ཟླ་ ༥ ཚེས་ ༡ ཉིན་ན་རུ་ཧེ་ཏུ་མཆོག་གོང་མ་གསར་པ་ཁྲི་ཐོག་ ༡༢༦ པའི་ཁྲི་འདོན་གྱི་མཛད་སྒོ་ཚོགས་ཡོད་པ་རེད།སྐབས་དེར་ན་རུ་ཧེ་ཏུ་མཆོག་གིས་ད་རེས་ཁོང་གིས་རྒྱལ་སྲིད་ཀྱི་སྐུ་དབང་བཞེས་པ་དང་བསྟུན་ཁོང་གིས་ཡབ་ཆེན་ Akihito མཆོག་གིས་འདས་པའི་མི་ལོ་ ༣༠ རིང་འཛམ་གླིང་ནང་ཞི་བདེ་དང་ཉི་ཧོང་མང་ཚོགས་ཀྱི་བདེ་སྐྱིད་སླད་དུ་ཕྱག་ལས་གནང་སྟེ། མང་ཚོགས་དང་སྐྱིད་སྡུག་མཉམ་མྱོང་ཐོག་ནས་རྒྱལ་སྲིད་བསྐྱངས་པར་བསྔགས་བརྗོད་དང་བཀའ་དྲིན་རྗེས་དྲན་ཞུས་པ་དང་འབྲེལ། ཁོང་ནས་གོང་མའི་སྐུ་དབང་བཞེས་པ་དང་བསྟུན་རྒྱལ་པོ་གོང་མ་རྣམས་ཀྱི་མཛད་རྗེས་ཡིད་ལ་བཅང་སྟེ་མང་ཚོགས་ཀྱི་བདེ་དོན་གཙོ་བོར་བཟུང་ཐོག་དུས་རྟག་ཏུ་རང་ཉིད་ཡར་རྒྱས་ཀྱི་ཕྱོགས་སུ་བསྐྱོད་པར་འབད་རྒྱུ་ཡིན་པ་དང། ཁོང་གིས་ཉི་ཧོང་རྒྱལ་ཁབ་དང་མང་ཚོགས་ཀྱི་སྐུ་ཚབ་མཚོན་པའི་ཐོག་ནས་འགན་དབང་བཞེས་རྒྱུ་ཡིན་པ་མ་ཟད། མང་ཚོགས་ཀྱི་བདེ་སྐྱི་དང་རྒྱལ་ཁབ་གོང་འཕེལ། དེ་བཞིན་འཛམ་གླིང་ཞི་བདེའི་ཐོག་རེ་བ་དང་ཕྱག་ལས་གནང་རྒྱུ་ཡིན་པ་གསུངས་ཡོད་པ་རེད། དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་གོང་མ་གསར་པ་ན་རུ་ཧེ་ཏུའི་ Reiwa རྒྱལ་སྲིད་ཀྱི་དུས་རབས་གསར་པ་ཞིག་དབུ་འཛུགས་གནང་བར་དགའ་བསུའི་འཚམས་འཕྲིན་ཞིག་བསྩལ་བ་དང་འབྲེལ། གོང་མ་ན་རུ་ཧེ་ཏུ་མཆོག་གིས་ཡབ་ཆེན་ Akihito མཆོག་གིས་ཉི་ཧོང་མང་ཚོགས་དང་ལྷན་དུ་སེམས་ཐག་ཉེ་བའི་འབྲེལ་བ་བཟང་པོ་ཡོད་པ་འདི་རྒྱུན་འཛིན་གནང་རྒྱུའི་ཆོད་སེམས་ལ་བསྔགས་བརྗོད་མཛད་འདུགདེ་བཞིན་༸གོང་ས་མཆོག་གིས་དེ་སྔོན་ཕྱི་ལོ་ ༢༠༡༡ ལོར་ཉི་ཧོང་ནང་ས་ཡོམ་དང་མཚོ་རླུང་གི་གོད་ཆག་ཕོག་པའི་རྗེས་སུ་མགོན་པོ་༸གང་ཉིད་མཆོག་ཡུལ་དེའི་ནང་ཆིབས་བསྒྱུར་མཛད་རྒྱུའི་གོ་སྐབས་བྱུང་ཡོད་པ་དང། སྐབས་དེར་མགོན་པོ་མཆོག་ནས་གོད་ཆག་ཕོག་པའི་ཉི་ཧོང་མང་ཚོགས་རྣམས་དང་མཇལ་འཕྲད་གནང་སྟེ་ཁོང་རྣམས་ཀྱི་ལྷན་དུ་འདས་གྲོངས་སུ་གྱུར་བ་རྣམས་ཀྱི་སླད་བསྔོ་སྨོན་གསུངས་འདོན་གནང་སྐོར་ལུང་འདྲེན་དང་འབྲེལ། ཉི་ཧོང་རྒྱལ་ཁབ་འདི་འཛམ་གླིང་དམག་ཆེན་གཉིས་པ་དང་རང་བྱུང་གོད་ཆག་དུ་མའི་ཁྲོད་ནས་ཧུར་བརྩོན་དང་སྙིང་སྟོབས་ཀྱིས་གདོང་ལེན་གནང་སྟེ་བསྐྱར་གསོ་གནང་ཐུབ་པའི་རྒྱལ་ཁབ་ཅིག་ཡིན་པར་འགྲེལ་བརྗོད་དང་འབྲེལ། མང་ཚོགས་ཀྱི་ཆོད་སེམས་ལ་བསྔགས་བརྗོད་མཛད་འདུག འདས་པའི་ལོ་ངོ་ ༥༠ ཙམ་གྱི་རིང་ལ་༸གོང་ས་མཆོག་མཆོག་ཡུལ་དེར་ཆིབས་བསྒྱུར་རིམ་པ་མཛད་སྐབས་སུ་མགོན་པོ་མཆོག་གིས་བྱམས་བརྩེ་དང་ཆོས་ལུགས་མཐུན་འབྲེལ་གོང་འཕེལ་གྱི་དགོངས་པར་ཉི་ཧོང་མང་ཚོགས་ཡོངས་ནས་དགའ་མོས་དང་དོ་དབྱིངས་བསྟན་པར་ཡི་རང་བསྔགས་བརྗོད་ཡོད་སྐོར་བཀའ་བསྩལ་བ་དང་ཆབས་ཅིག གོང་མ་གསར་པའི་རྒྱལ་སྲིད་ཀྱི་དུས་རབས་གསར་པ་དེ་ལམ་ལྷོང་ལྡན་པ་ཞིག་དང་མང་ཚོགས་ལ་བདེ་སྐྱིད་དང་འཛམ་གླིང་ནང་ཞི་བདེ་དང་བྱམས་བརྩེ་གོང་འཕེལ་ཡོང་བར་ཐུགས་སྨོན་མཛད་འདུག

འགྲོ་བ་མིའི་ཐོབ་ཐང་ཚོགས་པས་ཤེས་རྟོགས་བྱུང་བར་གཞིགས་ཚེ་རྒྱ་ནག་གིས་འཇིགས་སྐུལ་རིང་ལུགས་འགོག་རྒོལ་ཞེས་པའི་མི་བྱང་འོག་དེང་རབས་སྟབས་བདེ་ཁ་པར་མཉེན་ཆས་སྤྱོད་ནས་ཤིན་ཅང་ས་ཁུལ་གྱི་མི་མང་གི་འགྲོ་འདུག་སྤྱོད་གསུམ་ལ་ལྟ་རྟོག་ནན་མོ་བྱས་ཏེ་དོགས་གཞི་༣༦ གི་ཆ་རྐྱེན་ཐོག་ནས་མི་མང་གི་ཉིན་རེའི་བྱ་སྤྱོད་དང་འབྲེལ་ལམ་སོགས་ལ་རྟོག་ཞིབ་ནན་མོ་བྱེད་བཞིན་ཡོད་པ་རེད་འདུག ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་འཇར་མ་ནི་ནང་གི་དྲྭ་རྒྱའི་ཉེན་སྲུང་དང་འབྲེལ་བའི་ཚོང་ལས་ཁང་ཞིག་དང་མཉམ་འབྲེལ་གྱིས་རྒྱ་ནག་གི་ཁ་པར་མཉེན་ཆས་དེའི་ཐོག་ཞིབ་འཇུག་བྱས་ཏེ་ཁ་སང་རེས་གཟའ་ལྷག་པའི་ཉིན་སྙན་ཐོ་ཞིག་འདོན་སྤེལ་བརྒྱུད་རྒྱ་ གཞུང་གིས་རྒྱལ་ནང་གི་མི་སེར་ཡོངས་ལ་བཙན་འཛུལ་གྱིས་ལྟ་རྟོག་ནན་པོ་བྱེད་བཞིན་པ་དེ་ནི་དེང་རབས་ཀྱི་ལོ་རྒྱུས་ནང་བྱུང་མྱོང་མེད་པ་ཞིག་རེད་ཅེས་གསུངས་འདུགརྒྱ་ནག་གིས་དོགས་ཡོད་མྱུལ་ཞིབ་བྱེད་བཞིན་པའི་ཆ་རྐྱེན་ ༣༦ བཞག་ཡོད་པའི་ཁོངས་སུ་གཞུང་འབྲེལ་མ་ཡིན་པའི་ཁ་ཆེའི་ཆོས་དཔོན། གློ་བུར་དུ་ཕྱི་ལོག་ནས་ཡོང་བའི་མི། དེང་རབས་ཀྱི་སྤྱོད་བདེ་ཁ་པར་འཛིན་གྱི་མེད་མཁན། དུས་རྒྱུན་ཁྱིམ་མཚེས་སོགས་ལ་འབྲེལ་ལམ་མེད་པའི་རིགས། དེ་བཞིན་ཕྱི་རྒྱལ་གྱི་མི་ལ་འབྲེལ་བ་ཡོད་པའི་རིགས་དང་། ཁང་ཁྱིམ་དུ་གློག་ཤུགས་ཕོན་ཆེར་སྤྱོད་མཁན། དེ་བཞིན་རྒྱུ་མཚན་གསལ་བཤད་མེད་པར་གཞུང་ལ་རོགས་རམ་མི་ཞུ་མཁན། ས་གནས་གཞུང་དང་དམར་ཤོག་ཚོགས་པས་གོ་སྒྲིག་བྱས་པའི་ལས་རིམ་ཁག་ཏུ་མཉམ་ཞུགས་མི་བྱེད་མཁན་རིགས་ལ་དམིགས་བསལ་སོ་ཉུལ་གྱིས་རྟོག་ཞིབ་ནན་མོ་བྱེད་བཞིན་ཡོད་པ་རེད། འགྲོ་བ་མིའི་ཐོབ་ཐང་ལྟ་ཞིབ་ཁང་གི་སྐུ་ཞབས་ཝང་ལགས་ཀྱིས་ཁ་པར་གྱི་མཉེན་ཆས་དེས་ལས་སླ་པོའི་ངང་ནས་གོང་གི་ཆ་རྐྱེན་དེ་དག་གཞི་ལ་བཞག་གིས་རང་འགུལ་གྱི་བརྡ་སྟོན་བྱེད་ཐུབ་པས་རྒྱ་ནག་གིས་ཁ་པར་གྱི་བརྡ་སྟོན་ལྟར་ས་གནས་ཀྱི་ཡུལ་མི་མང་པོ་དུས་ཐོག་ཏུ་ཞིབ་བཤེར་བྱེད་ཀྱི་ཡོད་པར་བརྗོད་འདུག ཁ་པར་གྱི་མཉེན་ཆས་དེས་ Ali Baba ཚོང་ལས་ཁང་གིས་བཟོ་སྐྲུན་བྱས་པའི་མིའི་ངོ་གདོང་ངོས་འཛིན་གྱི་འཕྲུལ་ལས་སྤྱོད་པ་མ་ཟད། སྣུམ་འཁོར་ས་ཚིགས་དང་། ཅ་ལག་སྐྱེལ་འདྲེན་གྱི་ཞབས་ཞུའི་ས་ཚིགས། དེ་བཞིན་སྐུད་མེད་དྲྭ་བ་དང་མི་དང་མིའི་འབྲེལ་བ་སོགས་ཀྱི་མཚོན་པའི་དྲྭ་རྒྱའི་མཉེན་ཆས་མང་པོ་བརྒྱུད་ནས་མི་སྒེར་གྱི་འབྲེལ་ལམ་ཐད་ཀྱི་ཡིག་ཚགས་ཡོད་ཚད་གསང་ཉར་བྱེད་ཐུབ་པའི་དེང་རབས་ཀྱི་འཕྲུལ་རིགས་མང་པོ་སྤྱོད་བཞིན་ཡོད་པ་རེད་འདུག ཨ་རིའི་ New Orleans ཡི་ལོ་ཡོ་གཙུག་ལག་སློབ་ཆེན་དུ་ཤིན་ཅང་ཐོག་ཞིབ་འཇུག་བྱེད་བཞིན་པའི་མཁས་དབང་ Rian Thum ལགས་ཀྱིས་ Globe and Mail གསར་ཤོག་ཐོག་རྒྱ་ནག་གིས་ཁ་པར་གྱི་མཉེན་ཆས་དེ་དག་གིས་རྒྱ་ནག་གིས་བརྗོད་བཞིན་པའི་འཇིགས་སྐུལ་དང་འབྲེལ་བའི་གནས་ཚུལ་འཚོལ་བཤེར་བྱེད་སྤྱད་ཅིག་མིན་པར་མི་སྒེར་གྱི་ཉིན་རེའི་གསང་བ་ཡོད་ཚད་ལ་གཏོར་རྒོལ་བྱེད་ཆེད་དུ་སྤྱོད་ཀྱི་ཡོད་པར་བརྗོད་པ་དང་འབྲེལ། རྒྱ་ནག་གིས་དོན་དངོས་སུ་མི་སྒེར་གྱི་བྱ་གཞག་ཡོད་ཚད་སྲིད་དབང་གི་མྱུལ་ཞིབ་ཀྱི་འོག་ཏུ་འཇུག་གི་ཡོད་པར་གསུངས་འདུག ཁོང་གིས་ད་དུང་རྒྱ་ནག་གིས་དེ་ལྟ་བུའི་བྱེད་བབ་ཀྱི་འོག་ནས་དོགས་གཞི་ཅན་གྱི་མང་ཚོགས་མང་པོ་ཞིག་ཁྲིམས་འགལ་གྱི་ཉེས་དོན་ལ་གསལ་ཁ་མེད་པར་བཀག་སྐྱིལ་བྱེད་ཉེན་ཡོད་སྐོར་གསུངས་འདུག གཞན་ཡང་ཁེ་ན་ཌར་གནས་སྡོད་བྱེད་མཁན་གྱི་ཡུ་གུར་བ་ལྕམ་ Rukiye Turdush ལགས་ཀྱིས་རྒྱ་ནག་གིས་ཁ་པར་གྱི་མཉེན་ཆས་བརྒྱུད་ནས་ཡུ་གུར་མང་ཚོགས་ལ་ལྟ་རྟོག་བྱས་ཏེ་མི་མང་གི་ཉིན་རེའི་བྱ་གཞག་ཡོད་ཚད་ལ་བཏང་འཛིན་གྱིས་ལུས་སེམས་གཉིས་ཀྱི་རང་དབང་ཡོད་ཚད་འཕྲོག་བཞིན་ཡོད་པར་འགྲེལ་བརྗོད་གནང་བ་མ་ཟད། ཆུ་ཚོད་ ༢༤ རིང་མི་ཞིག་གིས་ཁྱེད་ཀྱི་སྐུད་ལམ་གྱི་ཁ་བརྡ་ལ་ཉན་པ་དང་། གདོང་རིས་བརྟག་པ། དེ་བཞིན་ཁྱེད་ཀྱི་སྐད་ལ་ཉན་ཞིབ་བྱས་ཏེ་བྱ་སྤྱོད་ཡོད་ཚད་ལ་ཚོད་འཛིན་གནང་ཚེ་དེ་དུས་ཁྱེད་ཀྱིས་རང་ཤི་རྒྱག་རྒྱུ་དྲན་ངེས་རེད་ཅེས་བཤད་འདུག  

ཉན་པ།: Listen ཕབ་ལེན། Download གཞིས་བྱེས་གཉིས་སུ་སྐབས་གསུམ་པའི་རྒྱལ་ཡོངས་བོད་ཀྱི་ཡིག་གཟུགས་ཉིན་མོ་སྲུང་བརྩི། རྒྱ་ནག་ལ་ཞིན་ཅང་ཁུལ་དུ་ཡོད་པའི་མི་རིགས་དག་གི་ཐོབ་ཐང་སྲུང་སྐྱོབ་བྱེད་དགོས་པའི་རེ་སྐུལ། ཨ་རིའི་རྒྱལ་སྲུང་ལྷན་ཁང་གིས་རྒྱ་ནག་གི་སྐད་ཡིག་སློབ་ཁྲིད་ཀྱི་མ་དངུལ་མཚམས་འཇོག སཱ་ར་མཐོ་སློབ་ཏུ་རིག་གནས་རབ་འབྱམས་དང་ལས་བྱེད་འོས་སྦྱོང་གི་མཐར་སོན་མཛད་སྒོ ༸གོང་ས་མཆོག་གིས་བོད་དོན་རྒྱབ་སྐྱོར་བ་སྐུ་ཞབས་ Richard Lugar ལགས་ཀྱི་ནང་མིར་ཐུགས་གསོ་མཛད་པ། ༸གོང་ས་མཆོག་གི་བཀའ་སློབ་ལེ་ཚན་ནང་། ༸གང་ཉིད་ཀྱིས་ ཨ་རིའི་མེ་ཌི་སན་ནང་བོད་ཀྱི་སྐད་ཡིག་གཅེས་སྲུང་སྐོར་བཀའ་བསྩལ་བ། Wednesday 01/05/2019 Tibetan inside and outside Tibet observe Tibetan Calligraphy day UN Secretary General tells China to uphold rights in Xinjiang Pentagon to end language funding for universities running Confucius institutes Sarah college holds Convocation ceremony Dalai Lama condoles Senator Richard Lugar’s family for his demise FEATURE: Dalai Lama’s speech on importance of Tibetan language

རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres མཆོག་ཉེ་ལམ་རྒྱ་ནག་གི་རྒྱལ་ས་པེ་ཅིང་དུ་རྒྱུད་གཅིག་ལམ་གཅིག་གི་ཚོགས་འདུར་ཕེབས་བསྟུན་ཁོང་གིས་རྒྱལ་སྤྱིའི་ཁྲོད་རྒྱ་གཞུང་གིས་ཤིན་ཅང་ཁུལ་དུ་ཡོད་པའི་ཡུ་གུར་གྱི་ཁ་ཆེ་མི་རིགས་ཐོག་བཏང་འཛིན་དོ་སྣང་ནན་པོ་བྱེད་བཞིན་པ་དྲན་སྐུལ་དང་འབྲེལ་ཏེ་རྒྱ་གཞུང་ནས་མི་རིགས་དེ་དག་གི་ཐོབ་ཐང་ངེས་པར་དུ་སྲུང་སྐྱོབ་བྱེད་དགོས་པའི་རེ་སྐུལ་གནང་འདུགཟླ་བ་འདིའི་ཚེས་ ༢༩ ཉིན་བརྒྱུད་ལམ་ཁག་ཏུ་སྤྱི་ཁྱབ་དྲུང་ཆེ་ Antonio  མཆོག་གིས་རྒྱ་གཞུང་ནས་ལྟ་བ་མཐར་ལྷུང་དང་འཇིགས་སྐུལ་རིང་ལུགས་འགོག་རྒོལ་གྱི་བརྒྱུད་རིམ་ཁྲོད་མང་ཚོགས་ལ་བདག་པའི་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པ་དང་སྤྱི་ཚོགས་གང་འདྲ་ཞིག་ཡིན་རུང་རང་ཉིད་ཀྱི་ངོ་བོ་ལ་གཞན་གྱི་གུས་བརྩི་བྱེད་དགོས་པ་ནི་ཚོར་བའི་ཐོག་ནས་འགྲོ་བ་མིའི་ཐོབ་ཐང་དང་འབྲེལ་བ་ཡོད་པའི་གནད་དོན་གསུམ་གྱི་ཐོག་གླེང་སློང་གནང་འདུག སྤྱི་ཁྱབ་དྲུང་ཆེ་མཆོག་གིས་འཚམས་གཟིགས་ཁྲོད་རྒྱ་ནག་གི་སྲིད་འཛིན་ཞི་ཅིན་ཕིང་དང་མཇལ་འཕྲད་གནང་འདུག་པ་དང་། འཚམས་གཟིགས་དེར་མཉམ་ཞུགས་གནང་མཁན་ཁོངས་སུ་ཡོད་པ་རྒྱལ་ཚོགས་ཀྱི་མགྲིན་ཚབ་པ་སྐུ་ཞབས་ Stephane Dujarric ལགས་ཀྱིས་རྒྱ་ནག་གི་འགོ་ཁྲིད་དང་ལྷན་དུ་གྲོས་མོལ་དེ་སྤྲོ་སེམས་འཁོལ་པོ་ཞིག་དང་འགྲོག་བདེ་གཤིབ་བདེ་བྱུང་སོང་བར་འགྲེལ་བརྗོད་དང་ཆབས་ཅིག དེ་འབྲེལ་གྲོས་མོལ་མུ་མཐུད་ནས་ཡོང་རྒྱུ་ཡིན་སྐོར་གསུངས་འདུག ད་རེས་ཀྱི་འཚམས་གཟིགས་དེའི་སྔ་རོལ་དུ་སྤྱི་ཁྱབ་དྲུང་ཆེ་མཆོག་ནས་ཨ་རི་དང་དབྱིན་ཡུལ།  དེ་བཞིན་འཇར་མ་ནི་དང། ནེ་ཌར་ལན་ཌི། ཨོ་སི་ཊོ་ལི་ཡ།  ཁེ་ན་ཌ།  ཊར་ཀི་བཅས་ཀྱི་རྒྱལ་ཚོགས་ཀྱི་སྐུ་ཚབ་དང་མཇལ་འཕྲད་ཀྱིས་སྐུ་ཚབ་རྣམས་ནས་རྒྱ་ནག་གི་འགོ་ཁྲིད་དང་མཇལ་འཕྲད་སྐབས་ཤིན་ཅང་གི་གནད་དོན་དེ་ངེས་པར་དུ་གླེང་དགོས་པའི་དགོས་འདུན་ཆེད་བཏོན་གནང་ཡོད། གཞི་རྩའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་སྤྱི་ཁྱབ་ངེས་སྟོན་པ་སྐུ་ཞབས་ Kenneth Roth མཆོག་གིས་བདུན་ཕྲག་སྔོན་མར་སྤྱི་ཁྱབ་དྲུང་ཆེ་སྐུ་ཞབས་ Antonio མཆོག་ཕྱི་ལོ་ ༢༠༡༧ ལོར་ད་ལྟའི་ལས་གནས་བཞེས་པ་ནས་བཟུང་ཡུ་གུར་མི་རིགས་ཀྱི་གནད་དོན་གཅིག་ཀྱང་གླེང་སློང་གནང་མེད་སྐོར་བརྒྱུད་ལམ་ཁག་གི་གསར་ཤོག་བརྒྱུད་སྐྱོན་བརྗོད་ནན་པོ་གནང་ཡོད་པ་རེད།སྤྱིར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ལྕམ་ Michelle Bachelet མཆོག་ནས་འདི་ལོའི་ཟླ་བ་ ༣ པའི་ནང་སུད་སི་ཇི་ན་ཝར་ཚོགས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་སྐབས་རྒྱལ་སྤྱིའི་རྒྱལ་ཁབ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་སྙན་ཐོ་ཕུལ་བའི་ཐོག་ཤིན་ཅང་ནང་ཡུལ་མི་གར་སོང་ཆ་མེད་དུ་གྱུར་བ་དང་། བཙན་དབང་གིས་འཛིན་བཟུང་བཀག་ཉར་བྱེད་པའི་གནད་དོན་གླེང་ཀྱང་། དེའི་ཐོག་རྒྱ་གཞུང་གི་སྐུ་ཚབ་ནས་དགག་པ་བརྒྱབས་པ་མ་ཟད། རྒྱ་གཞུང་གི་འཇིགས་སྐུལ་རིང་ལུགས་འགོག་རྒོལ་གྱི་གནས་བབས་དེ་ད་ཆ་ཡར་རྒྱས་འགྲོ་བཞིན་པའི་ཁར་སླད་མར་འཇིགས་སྐུལ་རིང་ལུགས་མེད་པ་འགྱུར་ངེས་ཡིན་པ་དང་། རྒྱ་གཞུང་གི་འཇིགས་སྐུལ་རིང་ལུགས་འགོག་རྒོལ་གྱི་སྲིད་བྱུས་ལག་བསྟར་བྱེད་པ་དེས་ཤིན་ཅང་དང་འཛམ་གླིང་སྤྱི་ཡོངས་སུ་དྲག་པོའི་བྱ་སྤྱོད་བཀག་སྡོམ་བྱེད་ཀྱི་ཡོད་པར་ལན་འདེབས་བྱས་ཡོད། འདས་ལོར་ལྕམ་ Michelle Bachelet མཆོག་གིས་རྒྱ་གཞུང་ལ་ཤིན་ཅང་ཁུལ་དུ་གནས་ཚུལ་རྟོག་ཞིབ་སླད་ཕེབས་ཆོག་པའི་ཞུ་སྐུལ་གནང་ཡོད་ཀྱང་། ཁོང་གིས་ཟླ་བ་སྔོན་མར་རྒྱ་གཞུང་ནས་དེ་འབྲེལ་ཆོག་མཆན་སྤྲད་མེད་པར་སྐྱོན་བརྗོད་བྱས་ཡོད་པ་རེད། རྩ་བའི་རྒྱ་གཞུང་གིས་ཤིན་ཅང་ཁུལ་དུ་ཡུ་གུར་གྱི་ཁ་ཆེ་མི་རིགས་གཙོས་པའི་ཁ་ཆེ་གྲངས་ཉུང་མི་རིགས་ས་ཡ་གཉིས་ལྷག་ཆབ་སྲིད་སློབ་གསོའི་བསྟི་གནས་ཁང་དུ་འཛིན་བཟུང་བཀག་ཉར་བྱེད་བཞིན་ཡོད་སྟབས། རྒྱལ་སྤྱིའི་གཞུང་དང་ཚོགས་སྐྱིད་ཁག་ནས་སྐྱོན་བརྗོད་མང་དག་ཅིག་གནང་ཡོད་ཀྱང་། རྒྱ་གཞུང་གིས་དེར་འཇིགས་སྐུལ་རིང་ལུགས་འགོག་རྒོལ་དང་ལས་རིགས་སྦྱོང་བརྡར་བཅས་ཀྱི་མིང་བཏགས་པའི་ཐོག་ནོར་འཁྲུལ་སྦས་གསང་བྱེད་ཀྱི་ཡོད་པ་དང་། རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་གཙོས་པའི་ཚོགས་སྐྱིད་ཁག་དང་སྒོས་ཉེ་ལམ་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གི་སྤེལ་བའི་སྙན་ཐོའི་ནང་རྒྱ་ནག་ནི་ཆོས་ཕྱོགས་ཐད་ཆེས་སྡང་འཛིན་ཅན་གྱི་རྒྱལ་ཁབ་ཡིན་པར་ཐེར་འདོན་གནང་ཡོད།

ཕྱི་ཟླ་ ༤ ཚེས་ ༣༠ ཉིན་ཟླ་བ་ ༤ པར་བོད་ཀྱི་དབྱངས་ཡིག་བཞི་དང་ཚེས་ ༣༠ ལ་གསལ་བྱེད་སུམ་བཅུ་མཚོན་པར་བྱེད་པའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ཞེས་བོད་མདོ་དབུས་ཁམས་གསུམ་ཁྱོན་ཡོངས་ལ་ལོ་ལྟར་སྲུང་བརྩི་གཟབ་རྒྱས་ཞུ་བཞིན་ཡོད་པ་ལྟར། ཁ་སང་ཕྱི་ཚེས་ ༣༠ ཉིན་བོད་ནང་རིས་མེད་དགོན་སྡེ་ཁག་དང་། སློབ་གྲྭ་ཁག་གི་ནང་སྐབས་གསུམ་པའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་གཟབ་རྒྱས་ཞུས་འདུག་པ་དང་འདི་བཞིན་བཙན་བྱོལ་དུ་བོད་མིའི་སློབ་གྲྭ་ཁག་ཏུ་དེ་ལྟར་སྲུང་བརྩི་གཟབ་རྒྱས་ཞུས་ཡོད་པ་རེད།སྤྱི་ཚོགས་ཀྱི་བརྒྱུད་ལམ་ཁག་ཏུ་བོད་ཀྱི་རྒྱལ་ས་ལྷ་ས་དང་ལྷ་སའི་གཙུག་ལག་ཁང་གཙོས་མགོ་ལོག་དང་། ཡུལ་ཤུལ་སྐྱེ་དགུ་མདོ།  རྨ་ཆེན་རྫོང་མི་རིགས་ཀྱི་སློབ་འབྲིང་། མཛོད་དགེ་སྒར་སར་ནང་བསྟན་རིག་གནས་འཛིན་གྲྭ དེ་བཞིན་རྔ་ཡུལ་ཀིརྟིའི་སྔོན་འགྲོའི་སློབ་གླིང་། འབའ་ཡུལ་སེང་ཁྲི་ཆོས་གྲྭ མདོ་སྨད་རྒན་གྱའི་བྲག་དཀར་དགོན་སོགས་ཀྱི་ནང་བོད་མི་རིགས་ཀྱི་ཡིག་གཟུགས་མི་ཉམས་བརྒྱུད་འཛིན་ཞུ་སླད་དབུ་ཆེན་དང་། ཚུགས་རིང་། ཚུགས་ཐུང་། ཚུགས་མ་ཁྱུག ཁྱུག་ཡིག དེ་བཞིན་འབྲུ་རྩ་སོགས་ཡིག་གཟུགས་སྣ་མང་བྲིས་ནས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ལ་རྟེན་འབྲེལ་ཞུས་ནས་འགྲེམས་སྟོན་གནང་བའམ་ནང་ཕན་ཚུལ་འགྲན་བསྡུར་སོགས་ལས་འགུལ་རྣམ་པ་འདྲ་མིན་ཐོག་ནས་སྐབས་གསུམ་པའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་གཟབ་རྒྱས་ཞུས་ཡོད་པ་རེད།དེ་བཞིན་བཙན་བྱོལ་གྱི་ནང་དུའང་སློབ་གྲྭ་ཁག་མང་དག་ཅིག་གི་ནང་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་ཞུས་འདུག་པ་དང་། ལྷག་པར་ཁ་སང་ཕྱི་ཚེས་ ༣༠ ཉིན་བོད་ཀྱི་དགུ་བཅུ་གསུམ་ལས་འགུལ་ཚོགས་པས་གོ་སྒྲིག་འོག་གོ་པཱལ་པུར་བོད་ཕྲུག་ཁྱིམ་སྡེའི་འཛིན་རིམ་དང་པོ་ནས་བཅུ་གཉིས་བར་གྱི་སློབ་ཕྲུག་རྣམས་ལ་ཡིག་གཟུགས་འགྲན་བསྡུར་གྱི་ལམ་ནས་དུས་ཆེན་སྲུང་བརྩི་ཞུས་འདུག བཞུགས་སྒར་དུ་སྐུ་བཅར་རྣམ་རྒྱལ་གྲྭ་ཚང་གི་སློབ་ཕྲུག་རྣམས་ནས་ཡིག་གཟུགས་འགྲན་བསྡུར་གྱི་བྱེད་སྒོ་སྤེལ་འདུག་པ་དང་། ཀ་སྤུངས་༸དཔལ་ས་སྐྱའི་ཆོས་གྲྭ་བརྩེ་ཆེན་འཕྲིན་ལས་དར་རྒྱས་གླིང་དུ་ཚོགས་པ་སྐྱིད་སྡུག་དང་གཏན་སློབ། དེ་བཞིན་འཇམ་མགོན་ཀོང་སྤྲུལ་སློབ་གྲྭའི་སློབ་མ་རྣམས་ནས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྲུང་བརྩི་ཞུས་འདུག་པ་མ་ཟད། སྒང་ཏོག་བོད་ཀྱི་སྐད་ཡིག་གཅེས་སྐྱོངས་ཀྱིས་གོ་སྒྲིག་འོག་བོད་ཀྱི་མགྲོན་ཁང་དུ་སློབ་གྲྭ་ཁག་གི་སློབ་ཕྲུག་དང་དགེ་རྒན་རྣམ་པ་ཚང་འཛོམས་ཀྱིས་ཡིག་གཟུགས་འགྲན་བསྡུར་ཞིག་གོ་སྒྲིག་གནང་འདུགརྩ་བའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ནི་ཕྱི་ལོ་ ༢༠༡༧ ལོའི་ཟླ་ ༤ ཚེས ༡༦ ཉིན་མཚོ་སྔོན་མི་རིགས་སློབ་ཆེན་དང་། རྒྱལ་ཡོངས་བོད་ཀྱི་ཡིག་གཟུགས་དུས་ཆེན་གྲ་སྒྲིག་ཚོགས་ཆུང་གཉིས་ཀྱིས་གོ་སྒྲིག་འོག་རྒྱལ་ཡོངས་བོད་ཀྱི་ཡིག་གཟུགས་བགྲོ་གླེང་ཚོགས་འདུ་སྐབས་དང་པོའི་ཐོག་མང་མོས་ཀྱིས་ཐག་གཅོད་ལྟར། ཕྱི་ཟླ་ ༤ ཚེས་ ༣༠ ཉིན་མོར་བོད་ཡིག་གི་དབྱངས་བཞི་དང་གསལ་བྱེད་སུམ་བཅུ་མཚོན་པར་བྱེད་པའི་དུས་ཆེན་ལ་གཏན་འབེབས་གནང་ཡོད།

ཨ་རིའི་རྒྱལ་སྲུང་ལས་ཁུངས་ཀྱིས་ད་ནས་བཟུང་ཁུང་ཙི་སློབ་གླིང་དང་འབྲེལ་བ་ཡོད་པའི་ཨ་རིའི་གཙུག་ལག་སློབ་ཁང་ཁག་ལ་རྒྱ་ནག་གི་སྐད་ཡིག་སློབ་ཁྲིད་ཐད་མ་དངུལ་སྤྲོད་ཐབས་མེད་སྐོར་གསུངས་ཡོད་པ་དང་འབྲེལ། ད་ཆ་ཁུང་ཙི་སློབ་གསོ་ཁྱབ་སྤེལ་བྱེད་བཞིན་པའི་ཡུལ་དེའི་ཤེས་ཡོན་ལྟེ་གནས་མང་པོ་ཞིག་གང་མགྱོགས་སྒོ་རྒྱག་རྒྱུ་རེད་འདུག དེའང་ The Newsweek དྲྭ་གནས་སུ་གནས་ཚུལ་སྤེལ་བར་ཉེ་བའི་ལོ་ཤས་རིང་ནས་བཟུང་རྒྱ་ནག་དམར་ཤོག་གཞུང་གིས་ཁུང་ཙི་ཤེས་ཡོན་ལྟེ་གནས་མང་དག་ཅིག་ལ་མ་དངུལ་ཆེད་གཏོང་གིས་རྒྱ་ནག་གི་སྐད་དང་རིག་གཞུང་ཁྱབ་སྤེལ་གཏོང་བཞིན་ཡོད་པའི་ཁྲོད། ཕྱི་ཕྱོགས་ཀྱི་ཤེས་ཡོན་གྱི་རང་དབང་ལ་དོ་ཕོག་འགྲོ་བཞིན་ཡོད་པར་སྐྱོན་བརྗོད་གནང་མཁན་མང་དུ་འགྲོ་བཞིན་ཡོད་སྟབས། ཨ་རིའི་གྲོས་ཚོགས་འོག་མས་ཁྲིམས་སྒྲིག་ཅིག་གསར་བཟོ་གནང་སྟེ་ཨ་རིའི་རྒྱལ་སྲུང་ལྷན་ཁང་གིས་ཆག་ཡང་ཡོད་ན་མ་གཏོགས་ཨ་རིའི་ངོས་ནས་རྒྱ་ནག་གི་སྐད་ཡིག་དང་ཁུང་ཙིའི་སློབ་གསོ་གོང་སྤེལ་གྱི་ལས་གཞིར་རྒྱབ་སྐྱོར་གནང་རྒྱུ་མིན་པར་ཡོང་བསྒྲགས་གནང་ཡོད་པ་རེད།འོན་ཀྱང་རྒྱལ་སྲུང་ལྷན་ཁང་གི་མགྲིན་ཚབ་པ་Jessica Maxwell ལགས་ཀྱིས་ Newsweek ལ་འགྲེལ་བརྗོད་གནང་བར་ཨ་རིའི་གཙུག་ལག་སློབ་གཉེར་ཁང་ ༡༣ ཙམ་གྱིས་རྒྱལ་སྲུང་ལྷན་ཁང་ལ་ཞུ་གཏུགས་གནང་ཡང་ལྷན་ཁང་ནས་ཨ་རིའི་རྒྱལ་སྲུང་གི་གནད་དོན་ལ་བརྟེན་ནས་སློབ་གཉེར་ཁང་དེ་དག་ཡོངས་ལ་ཆག་ཡང་གནང་མེད་སྟབས། གཟའ་འཁོར་སྔོན་མའི་ནང་ Western Kentucky ཞེས་པའི་གཙུག་ལག་སློབ་ཁང་ནས་ཁུང་ཙི་སློབ་གླིང་སྒོ་རྒྱག་རྒྱུ་ཡིན་པར་བརྗོད་ཡོད་པ་མ་ཟད། གང་མགྱོགས་ཨ་རིའི་ Arizona དང་། San Francisco དེ་བཞིན་ Hawaii བཅས་ཀྱི་གཙུག་ལག་སློབ་ཆེན་སོགས་ཀྱིས་ཀྱང་ཁུང་ཙི་སློབ་གླིང་དེ་སྒོ་རྒྱག་འཆར་ཡོད་པར་ཚོད་དཔག་གནང་བཞིན་འདུག ཉེ་བའི་ཟླ་ཤས་ཀྱི་རིང་ལ་ཨ་རིའི་རྒྱལ་སྲུང་ལྷན་ཁང་གི་ཁྲིམས་སྒྲིག་དེའི་དབང་ཚད་ཀྱི་འོག   Indiana དང་། Rhode དེ་བཞིན་ Minnesota གཙུག་ལག་སློབ་ཆེན་སོགས་ཀྱིས་ཁུང་ཙི་སློབ་གླིང་དང་འབྲེལ་བ་བཅད་ཡོད་པ་ལྟར།  Oregon གཙུག་ལག་སློབ་ཆེན་གྱིས་ཀྱང་རྒྱ་ནག་གི་ཁུང་ཙི་སློབ་གླིང་དང་འབྲེལ་ཐག་གཅོད་རྒྱུ་ཡིན་པར་ཡོངས་བསྒྲགས་གནང་ཡོད་པ་རེད། རྩ་བའི་ཨ་རིའི་ངོས་ནས་རྒྱལ་ཁབ་སྣ་མང་ཞིག་གི་སྐད་ཡིག་གི་སློབ་ཁྲིད་ལ་མ་དངུལ་ཆེད་གཏོང་གིས་རང་རྒྱལ་ནང་གི་ཕྱིའི་སྐད་ཡིག་གི་གནས་བབས་ཡར་རྒྱས་བཏང་བའི་ཐོག་ནས་རྒྱལ་སྲུང་ལྷན་ཁང་ལ་རོགས་འདེགས་ཐུབ་པའི་དམིགས་ཚད་བཟུང་ཡོད་ནའང་། རྒྱ་ནག་གི་སྐད་ཡིག་སློབ་ཁྲིད་ལ་མ་དངུལ་བཏང་བ་དེ་རྒྱ་ནག་གིས་དམར་ཤོག་གི་ལྟ་གྲུབ་ཁྱབ་སྤེལ་བྱེད་པའི་ཆབ་སྲིད་ཀྱི་ལག་ཆ་བཞིན་སྤྱོད་ཀྱི་ཡོད་པ་ར་འཕྲོད་བྱུང་སྟབས་མ་དངུལ་གཏོང་མཚམས་བཞག་སྟེ་གཙུག་ལག་སློབ་ཆེན་ཡོངས་ནས་ཁུང་ཙིའི་སློབ་གླིང་སྒོ་རྒྱག་བཞིན་པ་རེད། གཞི་རྩའི་རྒྱ་ནག་གི་ཁུང་ཙི་སློབ་གླིང་ཞེས་པ་བརྒྱུད་ནས་བོད་དང་ཐེ་ཝན། དེ་བཞིན་ཤིན་ཅང་སོགས་ཀྱི་གནས་ཚུལ་ལ་འཁྱོག་བརྗོད་དྲིལ་བསྒྲགས་སྤེལ་བཞིན་པ་མ་ཟད། སྤྱི་ཡོངས་ནས་རྒྱལ་སྤྱིའི་སྟེང་རྒྱ་ནག་ལ་ལྟ་སྟངས་ཡག་ཏུ་འགྲོ་ཕྱིར་ནུས་ཤུགས་ཡོད་རྒུ་བཏོན་ནས་འགྲེལ་ལོག་རྒྱག་བཞིན་ཡོད་པའི་གསང་བའི་སྲིད་བྱུས་སྤེལ་སྟངས་ཤིག་ཆགས་ཡོད་པ་རེད། འོན་ཀྱང་ཉེ་བའི་ལོ་ཤས་ནས་བཟུང་བོད་རང་བཙན་སློབ་ཕྲུག་ཚོགས་པའི་སྣེ་ཁྲིད་ཐོག་རྒྱལ་སྤྱིའི་སྟེང་རྒྱ་ནག་གི་ཁུང་ཙི་སློབ་གླིང་དང་འབྲེལ་ཐག་གཅོད་དགོས་པའི་ཞུ་གཏུག་དང་ངོ་རྒོལ་སྐད་འབོད་དུ་མ་གནང་ཡོད་པ་ལྟར་འདི་ལོའི་གྲོས་ཚོགས་སུ་ཁུང་ཙི་སློབ་གླིང་ལ་ཁ་གཏད་གཅོག་དགོས་པའི་བགྲོ་གླེང་གནང་ཡོད། ད་ཆ་ཨ་རི་དང་ཡོ་རོབ་སོགས་སུ་ཁུང་ཙི་སློབ་གླིང་མང་པོ་ཞིག་སྒོ་རྒྱག་བཞིན་པའི་གནས་བབས་ཅིག་ཆགས་ཡོད་པ་རེད།