Monthly Archives: October, 2019

དེ་རིང་ཟླ་ ༡༠ ཚེས་ ༢༣ ཉིན་བཞུགས་སྒར་རྡ་སྟེང་བོད་ཁྱིམ་དུ་བོད་ཕྲུག་ཁྱིམ་སྡེ་དབུ་བརྙེས་ནས་མི་ལོ་ ༥༩ འཁོར་བའི་དུས་དྲན་སྲུང་བརྩི་དང་སྦྲགས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་སྐལ་བརྒྱར་བརྟན་པའི་སྨོན་འདུན་ཞུས་སོང་། དེ་ཡང་དེ་རིང་བོད་ཕྲུག་ཁྱིམ་སྡེ་དབུ་བརྙེས་པའི་དུས་ཚིགས་ཀྱི་མཛད་སྒོར་སྐུ་མགྲོན་གཙོ་བོ་དཔལ་༸ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་སྐྱབས་རྗེ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་གི་དབུས་པའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་མཛད་གཙོ་རྣམས་པ། དེ་བཞིན་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་དང་། དགེ་ལས་སློབ་ཕྲུག་རྣམས་པ། བོད་ཕྲུག་ཁྱིམ་སྡེར་མི་ལོ་ཉི་ཤུ་ལྷག་ལ་ཞབས་ཞུ་བསྒྲུབས་པའི་དགེ་རྒན་ ༢༠ ལྷག་དང་བོད་ཕྲུག་ཁྱིམ་སྡེ་སློབ་ཕྲུག་ལས་ཟུར་དང་མི་མང་སོགས་མཉམ་འཛོམས་གནང་སོང་། སྐབས་དེར་སྐྱབས་རྗེ་སྨན་རི་ཁྲི་འཛིན་མཆོག་གིས། ༸གོང་ས་མཆོག་གི་ཐུགས་རྗེ་བླ་ན་མེད་པའི་འོག་བཙན་བྱོལ་དུ་མ་འོངས་བོད་ཀྱི་མདུན་ལམ་ཆེད་བོད་ཕྲུག་ཁྱིམ་སྡེ་དབུ་བརྙེས་པ་དང་། བོད་ཕྲུག་ཁྱིམ་སྡེ་ཐོག་མ་ནས་བཟུང་སྟེ་སྐུ་ལས་ཚད་མེད་བསྐྱོན་མཁན་༸སྐུའི་གཅེན་མོ་ཞིང་གཤེགས་དམ་པ་ཚེ་རིང་སྒྲོལ་མ་ལགས་དང་༸སྐུའི་གཅུང་མོ་རྗེ་བཙུན་པདྨ་ལགས་གཙོ་བོར་བྱས་པའི་དགེ་ལས་ཡོངས་ལ་བཀའ་དྲིན་རྗེས་དྲན་ཞུས་པ་དང་སྦྲགས། སློབ་ཕྲུག་དང་དགེ་རྒན་རྣམས་ཀྱིས་བོད་མི་རིགས་ཀྱི་བསྟན་པ་དང་ཆབ་སྲིད་འཛིན་སྐྱོང་དགོས་པ་དང་། ལྷག་པར་དུ་དེའི་ཁྲོད་དགེ་རྒན་ནི་གལ་ཆེ་ཞིག་ཆགས་ཀྱི་ཡོད་པ་དང་ཆབས་ཅིག་ཏུ། སྤྱོད་ཡོན་གཉིས་ལྡན་གྱི་དགེ་རྒན་ཞིག་དགོས་སྐོར་བཅས་དགེ་རྒན་དང་སློབ་ཕྲུག་དབར་གྱི་འབྲེལ་བ་དང་། དེའི་གལ་གནད་སྐོར་བཀའ་སློབ་གནང་སོང་། དེ་བཞིན་རིན་པོ་ཆེ་མཆོག་གིས། བཙན་བྱོལ་ནང་བོད་མི་འབུམ་ལྷག་ཡོད་པ་རྣམས་ནས་རྡོག་རྩ་གཅིག་ཏུ་སྒྲིལ་རྒྱུ་དང་། སོ་སོ་རང་ངོས་ནས་མི་སྤྱི་དང་མཐུན་ལམ་གནང་བའི་ཐོག་ནང་ཁུལ་མཐུན་སྒྲིལ་དང་། སྤྱི་ཚོགས་ནང་གོང་དུ་ཕྱག་ལས་གནང་མཁན་ཚོར་བརྩི་བཀུར་དང་ཆེ་མཐོང་གནང་དགོས་པ་མ་ཟད། ལྷག་པར་དུ་སློབ་ཕྲུག་རྣམས་ཀྱིས་རང་ལ་འཁྲི་བའི་ལས་འགན་བོད་ཀྱི་ཆོས་དང་རིག་གཞུང་སྲུང་སྐྱོབ་དང་རྒྱུན་འཛིན་གནང་བར་ཐུགས་སྣང་གནང་དགོས་སྐོར་གྱི་བཀའ་སློབ་གནང་སོང་། མ་ཟད། སྲིད་སྐྱོང་མཆོག་གིས་སྐབས་དེར། བོད་མི་སྐྱབས་བཅོལ་བ་རྣམས་༸གོང་ས་མཆོག་དང་བཙན་འབྱོལ་སྒྲིག་འཛུགས་ཀྱི་བཀའ་དྲིན་ལ་བརྟེན་ནས། བོད་ཕྲུག་ཚོར་སློབ་གྲྭའི་མཐུན་རྐྱེན་སྦྱོར་ཐུབ་པ་བྱུང་ཡོད་པ་དང་། ད་ཆ་མཉམ་འབྲེལ་རྒྱལ་ཚོགས་ཀྱི་ཁྱབ་ཁོངས་ལ་མཚོན་ན་སྐྱབས་བཅོལ་བ་ས་ཡ་ ༡༩ ལྷག་ཡོད་པ་དེའི་ཁྲོད་ས་ཡ་ ༧ ལྷག་སློབ་གྲྭར་འགྲོ་ཐུབ་པའི་ཕྲུ་གུ་ཆགས་ཀྱི་ཡོད་པ་དེ་ལྟར་ཡང་། ས་ཡ་ ༤ ལྷག་ད་ཆ་ཡང་སློབ་གྲྭར་གཏོང་ཐུབ་ཀྱི་མེད་སྟབས། ང་ཚོ་བོད་མིའི་སྐྱབས་བཅོལ་བ་ནི་འཛམ་གླིང་གཞན་གྱི་སྐྱབས་བཅོལ་བ་དང་བསྡུར་ན་སློབ་གྲྭའི་མཐུན་རྐྱེན་དང་ཤེས་ཡོན་གྱི་གནས་ཚད་སོགས་སྐྱབས་བཅོལ་གཞན་ལས་ལྷག་པ་ཡོད་སྐོར་གསུངས་པ་དང་། ཤེས་ཡོན་གྱི་མཐུན་རྐྱེན་ལེགས་པོ་དེའི་འོག་བོད་ཕྲུག་རྣམས་ཀྱིས་སྔར་ལྷག་ཧུར་བརྩོན་གནང་བའི་ཐོག་སྤྱི་ཚོགས་ཞབས་ཞུ་དང་འཛམ་གླིང་སྤྱི་ཡོངས་ལ་ཕན་པའི་ལས་དོན་བསྒྲུབ་དགོས་པ་གསུངས་སོང་། དེ་བཞིན་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་ནས་སྤྱི་འཐུས་ཀྱི་གསུང་བཤད་སྩལ་བ་དང་སྦྲགས། བོད་མི་མང་སྤྱི་འཐུས་ལྷན་ཚོགས་ཀྱིས་གཞི་རིམ་བོད་མིའི་ཤེས་ཡོན་སྲིད་བྱུས་གཏན་འབེབས་གནང་བ་ལྟར་སླད་མར་བོད་ཁྱིམ་འབྲེལ་ཡོད་རྣམས་པས་གཞི་རིམ་བོད་མིའི་ཤེས་ཡོན་སྲིད་བྱུས་དེ་ཉིད་ཁྱབ་ཁོངས་སློབ་གྲྭ་ཁག་ནང་ཕྱག་བསྟར་མཐིལ་ཕྱིན་པ་དམིགས་དཔེར་འོས་པ་གནང་རྒྱུ་གསལ་འདེབས་ནན་པོ་ཞུས་པ་མ་ཟད། དགེ་ལས་ཕ་མ་ཡོངས་ནས་སློབ་ཕྲུག་རྣམས་ཀྱི་ལུས་སེམས་འཚར་ལོངས་བདེ་སྐྱིད་དང་བཅས་ལ་ཐུགས་སྣང་གནང་དགོས་པའི་སྐུལ་མ་ཞུས་སོང་།

དེ་རིང་གསར་ལམ་ཁག་ཏུ་གསར་འགྱུར་ཐོན་པ་ལྟར་ན།   FIFA  ཞེས་པའི་རྒྱལ་སྤྱིའི་རྐང་སྤོལ་འགྲན་ཚོགས་ཆེ་ཤོས་ཀྱི་འཛིན་སྐྱོང་སྡེ་ཚན་གྱིས་བདུན་ཕྲག་སྔོན་མའི་རེས་གཟའ་ཕུར་བུའི་ཉིན་སྤྱི་ལོ་  ༢༠༢༡ ལོར།  FIFA club world cup ཞེས་པའི་གླིང་ཕྲན་སོ་སོའི་རྐང་སྤོལ་རུ་ཁག་རྩེ་ཕུད་ཀྱི་འགྲན་ཚོགས་དེ་རྒྱ་ནག་ཏུ་འཚོགས་རྒྱུ་ཡིན་སྐོར་གསལ་བསྒྲགས་བསྐྱངས་བ་ལྟར།   ཁ་སང་རྒྱལ་སྤྱིའི་ཉེས་ཡང་ཚོགས་པའི་ངོས་ནས་རྒྱ་ནག་དུ་རྐང་སྤོལ་འགྲན་བསྡུར་དེ་འཚོགས་ན་འོས་བབ་མེད་པར་བརྟེན་ཐག་གཅོད་དེ་ཕྱིར་འཐེན་བྱེད་དགོས་བའི་ཞུ་སྐུལ་གནང་འདུག རྒྱལ་སྤྱིའི་ཉེས་ཡང་ཚོགས་པའི་དབྱིན་ཡུལ་གྱི་སྲིད་བྱུས་དང་འཛིན་སྐྱོང་གི་འགན་འཛིན།  སྐུ་ཞབས་ Allan Hogarth ལགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་དེ་ཡ་ང་བའི་གནས་སྟངས་ཀྱི་འོག་ཏུ་ཡོད་པར་བརྟེན།  སྤྱི་ལོ་ ༢༠༢༡ ལོའི་རྒྱལ་སྤྱིའི་རྐང་སྤོལ་འགྲན་ཚོགས་ཏེ་རྒྱ་ནག་ཏུ་འཚོགས་གཏན་འཁེལ་ཚེ། རྒྱ་ནག་གིས་གོ་སྐབས་དེ་འཇུས་བའི་ཐོག་རྒྱལ་སྤྱིའི་ཐོག་ནས་རྒྱ་ནག་ལ་གཟིགས་ཕྱོགས་ཡག་པོ་མེད་པ་དེར་འགྱུར་བ་གཏོང་རྒྱུ་ཡིན་སྐོར་འགྲེལ་བརྗོད་བྱས་ཏེ།  རྒྱ་ནག་ལ་རྒྱལ་སྤྱིའི་རྐང་སྤོལ་འགྲན་ཚོགས་གོ་སྒྲིག་ཞུ་རྒྱུའི་ཆ་རྐྱེན་ཚང་མེད་སྐོར་ཡོངས་གྲགས་གནང་འདུག ཁོང་གིས་ད་དུང་།  རྩ་བའི་རྒྱ་ནག་ནང་གི་དངོས་ཡོད་གནས་སྟངས་ནི་མུན་ནག་རང་བཞིན་ཀྱི་བཀག་སྡོམ་དང་། སྲིད་གཞུང་གི་ལྟ་བ་དང་མི་མཐུན་པ་རྣམས་འཛིན་བཟུང་།  དེ་བཞིན་ཡུ་གུར་བ་སྟོང་ཕྲག་མང་པོ་བཀག་སྐྱིལ་བྱས་ཡོད་ནའང་། ཐེངས་འདིའི་རྐང་སྤོལ་རྩེད་འགྲན་གྱི་གོ་སྐབས་དེ་བརྒྱུད་ནས་རྒྱ་ནག་གི་དཔོན་རིགས་རྣམས་ཀྱིས་རྒྱ་ནག་གི་རྒྱལ་ཁབ་ནི་བཟོད་བསྲན་དང་གུ་ཡངས་ཀྱི་སྤྱི་ཚོགས་ཤིག་ཡིན་པའི་རྣམ་པ་ཕྱིར་སྟོན་རྒྱུ་ཡིན་སྐོར་ཡང་འགྲེལ་བརྗོད་བྱས་ཏེ།   རྒྱ་ནག་ནང་གི་འགྲོ་བ་མིའི་ཐོབ་ཐང་གི་ཟིན་ཐོ་ནི་ཡ་ང་བའི་གནས་བབ་ཀྱི་འོག་ཏུ་ཡོད་པར་བརྟེན།  FIFA རྐང་སྤོལ་རྩེད་འགྲན་གྱི་འཛིན་སྐྱོང་གིས་ངེས་བར་དུ་རྒྱ་ནག་ལ་གནོད་ཤུགས་སྤྲད་པའི་ཐོག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་གོང་འཕེལ་དུ་གཏོང་དགོས་བར་བརྗོད་འདུག དེ་བཞིན་ཨ་རིའི་གྲོས་ཚོགས་གོང་མའི་འཐུས་མི།   སྐུ་ཞབས་ Rick Scott  ལགས་ཀྱིས་ཀྱང་ཐེངས་འདིའི་རྐང་སྤོལ་འགྲན་ཚོགས་རྒྱ་ནག་ཏུ་སྐོང་རྒྱུ་ཡིན་པའི་གནས་ཚུལ་དང་འབྲེལ་ནས། FIFA ཚོགས་པ་ལ་སྐྱོན་བརྗོད་བྱས་པ་མ་ཟད།  རྒྱལ་སྤྱའི་ཨོ་རྩལ་འགྲན་ཚོགས་ཀྱི་ཚོགས་གཙོའི་མཚན་ཐོག་ཏུའང་ཞུ་ཡིག་ཅིག་ཕུལ་ཏེ།   རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཉམ་ང་བའི་གནས་བབ་ཅིག་ཏུ་ཡོད་པ་མ་ཟད།  རྒྱ་ནག་གིས་ཉེ་སྔོན་ NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྤོལ་མཐུན་ཚོགས་ཀྱི་ཚོགས་མི་ཡིན་པ་Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱི་ཚིག་བརྗོད་དང་འབྲེལ་བའི་རྙོག་གླེང་བསླངས་ཡོད་པར་བསྒྲགས་ཏེ།  རྒྱ་ནག་གིས་ཁྲིམས་མཐུན་གྱི་ཐོག་ནས་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་རྒྱུའི་ཆ་རྐྱེན་མ་ཚང་བར་དུ།  སྤྱི་ལོ་ ༢༠༢༢ ལོའི་དགུན་དུས་ཀྱི་ ཨོ་རྩལ་འགྲན་ཚོགས་དེ་རྒྱ་ནག་ཏུ་འཚོགས་པར་འོས་བབ་མེད་སྐོར་འགྲེལ་བརྗོད་གནང་འདུག གསར་ཁང་གི་ངོས་ནས་ཀྱང་། རྒྱལ་སྤྱིའི་རྐང་སྤོལ་རྩེད་འགྲན་དེ་རྒྱ་ནག་ཏུ་སྐོང་འཚོགས་བྱེད་རྒྱུའི་ཁྱབ་བསྒྲགས་དང་ལྷན་དུ།  རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་སྤྱི་དང་། སྒོས་སུ་རྒྱ་ནག་གིས་ཡུ་གུར་བ་བཀག་སྡོམ་དང་ཧོང་ཀོང་གི་མང་གཙོའི་ལས་འགུལ་བར་དམ་དྲག་སོགས་ཀྱི་ཐད་ནས་རྒྱ་ནག་ལ་སྐྱོན་བརྗོད་བྱེད་མཁན་མང་པོ་བྱུང་ཡོད་པར་འཁོད་འདུག རྩ་བའི་སྤྱི་ལོ་ ༢༠༢༡ ལོའི་རྒྱལ་སྤྱིའི་རྐང་སྤོལ་འགྲན་ཚོགས་ཏུ་རུ་ཁག་ ༢༤ ཞུགས་རྩིས་ཡོད་པ་དང་།  དེ་དག་ལས་རུ་ཁག་བརྒྱད་ནི་སྔོན་ཆད་རྐང་སྤོལ་འགྲན་བསྡུར་ལས་རྣམ་པར་རྒྱལ་བའི་རུ་ཁག་རྐྱང་ཡིན་པ་མ་ཟད།   ཡོ་རོབ་ནང་གི་རྐང་སྤོལ་རུ་ཁག་གྲགས་ཅན། Liverpool དང་Chelsea གཉིས་ཀྱང་ཐེངས་འདིའི་རྒྱལ་སྤྱིའི་རྐང་རྩེད་འགྲན་བསྡུར་ལ་ཞུགས་རྩིས་ཡོད་པ་རེད་འདུག

ཉན་པ།: Listen ཕབ་ལེན། Download ༸གོང་ས་མཆོག་གིས་ཁེ་ན་ཌའི་སྲིད་བློན་མཆོག་ལ་འོས་བསྡུའི་རྒྱལ་ཁ་ཐོབ་པར་འཚམས་འདྲི་མཛད་པ། རྒྱ་གཞུང་ནས་ཨ་རིའི་ཕྱི་འབྲེལ་མི་སྣར་དམ་དྲག་བྱེད་བཞིན་པ་དག་ལྷོད་དུ་གཏང་རྒྱུར་རེ་བ་ཡོད། Austria ནང་༸རྗེ་ཙོང་ཁ་པ་ཆེན་པོ་དགོངས་པ་རྫོགས་ནས་ལོ་ངོ་ ༦༠༠ འཁོར་བའི་རྗེས་དྲན་སྲུང་བརྩི། རྒྱ་གར་ལྷོ་ཕྱོགས་སུ་ཆུ་ལོག་གི་གོད་ཆག་བྱུང་བར་བོད་གཞུང་མང་གཉིས་ཀྱིས་ཞལ་འདེབས་ཕུལ་འདུག དྲྭ་ཐོག་གི་རྩེད་འགྲན་ནང་ཡུ་གུར་ཞེས་པའི་ཐ་སྙད་བཀག་བསྡོམ། རྒྱ་ནག་དང་རུ་སུའི་གསང་བའི་ལས་འགུལ་གྱིས་ཅེག་སྤྱི་མཐུན་རྒྱལ་ཁབ་ལ་ངལ་བ་འཕྲད་བཞིན་པ། གླུ་གཞས་ལས་རིམ། བློ་གསལ་དང་ལྕགས་ཐར་འབུམ་གྱི་གླུ་གཞས་ང་ཡི་རྒྱབ་རི། Tuesday 22/10/2019 Dalai Lama congratulates Canada's Trudeau on second term win US hopes reciprocal measures will help ease China restrictions on diplomats 600th Anniversary of Je Tsongkhapa commemorated in Austria Exile Tibetans donate in Karnataka CMs flood relief fund League of Legends facing backlash for ‘Uighur’ censorship China poses greatest threat to Czech Republic: BIS Chief MUSIC FEATURE: ‘Ngayi Gyabri’ by Lobsel & Chakdar Bum

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌའི་སྲིད་བློན་སྐུ་ཞབས་ Justin Trudeau མཆོག་གི་ Liberal Party འམ་གུ་ཡངས་ཆབ་སྲིད་ཚོགས་པར་སླར་ཡང་རྒྱལ་ཡོངས་འོས་བསྡུའི་རྒྱལ་ཁ་ཐོབ་པར་འཚམས་འདྲིའི་གསུང་འཕྲིན་ཞིག་བསྩལ་འདུག དེ་རིང་༸གོང་ས་མཆོག་གིས་བསྩལ་བའི་གསུང་འཕྲིན་ནང་ཁེ་ན་ཌ་གཞུང་ནས་འཛམ་གླིང་ཁྲོད་དཀའ་ངལ་འཕྲད་པའི་མི་འབོར་མང་དག་ཅིག་ལ་བྱམས་བརྩེའི་ཀུན་ནས་བསླངས་པའི་འདུ་ཤེས་ཐོག་ནས་སྐྱབས་བཅོལ་བའི་གནས་བབ་སྤྲོད་བཞིན་པར་ཡི་རངས་བསྔགས་བརྗོད་མཛད་པ་དང་འབྲེལ་ཏེ་མགོན་པོ་༸གང་ཉིད་མཆོག་ཁེ་ན་ཌའི་མི་སེར་ཞིག་ཡིན་པའི་ཆ་ནས་ཁེ་ན་ཌའི་གཞུང་ནས་འགྲོ་བ་མིའི་འདུ་ཤེས་ཀྱིས་སྐྱབས་བཅོལ་བར་བློ་རྒྱ་ཡངས་པོའི་ཐད་ནས་ཕྱག་རོགས་གནང་བར་ཐུགས་སྤོབས་ཆེན་པོ་ཡོད་སྐོར་བཀའ་བསྩལ་འདུག དེ་བཞིན་མགོན་པོ་༸གང་ཉིད་མཆོག་ཁེ་ན་ཌའི་ནང་ལོ་མང་རིང་ཆིབས་བསྒྱུར་བསྐྱངས་པའི་ཁྲོད་རྒྱལ་ཁབ་དེའི་མི་མང་ནས་མཛའ་བརྩེའི་འདུན་པ་ཤུགས་ཆེ་བསྟན་པ་དེས་མགོན་པོ་མཆོག་གི་ཐུགས་ལ་བག་ཆགས་ཟབ་མོ་ཞིག་བཞག་ཡོད་པར་བཀའ་བསྩལ་བ་མ་ཟད། ཁེ་ན་ཌ་གཞུང་མང་གཉིས་ཀྱི་ངོས་ནས་ཕྱི་ལོ་ ༡༩༧༠  འགོ་སྟོད་ནས་བཟུང་ཁུལ་དེར་བོད་མི་སྐྱབས་བཅོལ་བ་ཚོར་གཞིས་ཆགས་རྒྱུར་རོགས་འདེགས་གནང་བར་ཐུགས་རྗེ་ཆེ་ཞེས་བཀའ་བསྩལ་བ་དང་ཆབས་ཅིག་ཏུ་ཁེ་ན་ཌ་ནང་ཡོད་པའི་བོད་མི་རྣམས་ནས་མི་རིགས་དང་རིགས་གནས་སྣ་མང་འདུས་པའི་ཁེ་ན་ཌའི་སྤྱི་ཚོགས་ལ་བཟང་ཕྱོགས་ཀྱི་ལེགས་སྐྱེས་རྒྱ་མི་ཆུང་བ་ཞིག་བསྒྲུབས་དང་སྒྲུབ་བཞིན་པར་ཐུགས་དགྱེས་ཚོར་བྱུང་ཡོད་པ་བཀའ་བསྩལ་མཛད་འདུག ད་རེས་ཁེ་ན་ཌའི་རྒྱལ་ཡོངས་འོས་བསྡུ་ཆེན་མོའི་རྒྱལ་ཁབ་འདི་བརྒྱུད་ནས་སྲིད་བློན་མཆོག་གི་ཕྱག་ལས་མཐའ་དག་ལམ་ལྷོངས་དང་མི་མང་གི་མངོན་འདོད་རྣམས་འགེགས་མེད་ལྷུན་འགྲུབ་ཡོང་བའི་ཐུགས་སྨོན་རྒྱ་ཆེ་མཛད་འདུག གཞི་རྩའི་སྲིད་བློན་ Trudeau མཆོག་གི་ཆབ་སྲིད་ཚོགས་པའི་རྒྱལ་ཡོངས་འོས་བསྡུའི་རྒྱལ་ཁ་ཐོབ་པ་ཐེངས་གཉིས་པ་ཆགས་ཀྱི་ཡོད་པ་དང་། ད་རེས་འོས་བསྡུའི་ཁྲོད་གུ་ཡངས་ཚོགས་པར་དེ་རིང་སྔ་དྲོ་བར་ཁེ་ན་ཌའི་གྲོས་ཚོགས་ནང་འཐུས་མི་ཞབས་སྟེགས་ ༣༠༤ ཡོད་པའི་ཁོངས་ནས་ཁྱོན་ཞབས་སྟེགས་ ༡༥༧ ཐོབ་པ་བཅས་སྐུ་ཞབས་ Trudeau མཆོག་ནས་དབུ་ཁྲིད་པའི་གུ་ཡངས་ཚོགས་པ་ཡུལ་དེའི་ཆབ་སྲིད་ཚོགས་པ་ཆུང་གྲས་ཁག་གཅིག་དང་མཉམ་འབྲེལ་གྱིས་གཞུང་བསྐྱང་རྒྱུ་ཡིན་པ་རེད།

བདུན་ཕྲག་སྔོན་མའི་རེས་གཟའ་ལྷག་པའི་ཉིན་ཨ་མི་རི་ཀའི་སྲིད་འཛིན་སྐུ་ཞབས་ Donald Trump མཆོག་གིས་སྣེ་ཁྲིད་པའི་ཨ་རིའི་སྲིད་གཞུང་གི་ངོས་ནས་ཨ་རི་ནང་ཡོད་པའི་རྒྱ་ནག་གཞུང་གི་གཞུང་འབྲེལ་སྐུ་ཚབ་གཙོས་པའི་ཕྱི་འབྲེལ་མི་སྣ་རྣམས་ནས་ཨ་རིའི་དབུས་དང་ས་གནས་། དེ་བཞིན་མངའ་སྡེ་བཅས་ཀྱི་གཞུང་འབྲེལ་མི་དང་ཨ་རིའི་ས་ཐོག་ཏུ་ཡོད་པའི་ཤེས་ཡོན་དང་ཉམས་ཞིབ་ལྟེ་གནས་ཁག་གི་ལས་བྱེད་སོགས་དང་འབྲེལ་བ་རིགས་མ་གནང་བའི་གོང་དུ་ཨ་རིའི་ཕྱི་སྲིད་ལས་ཁུངས་ལ་སྙན་སེང་ཞུ་དགོས་པའི་སྒྲིག་ཁྲིམས་གསར་པ་ཞིག་ཡོངས་ཁྱབ་གནང་ཡོད་པ་རེད།  ཨ་རི་སྲིད་གཞུང་གི་སྒྲིག་གཞི་གསར་པ་དེ་ཡོངས་ཁྱབ་གནང་མཚམས་སུ་ཨ་རིའི་རྒྱལ་ས་ Washington DC ནང་ཡོད་པའི་རྒྱ་ནག་གཞུང་ཚབ་པ་ Cui Tiankai ཡིས་ཨ་རིའི་སྒྲིག་གཞི་དེ་ནི་ཝྭི་ཡ་ནའི་རྒྱལ་སྤྱིའི་ཆིངས་ཡིག་གི་དགོངས་དོན་དང་འགལ་ཟླ་ཆགས་ཀྱི་ཡོད་པ་སོགས་སྐྱོན་བརྗོད་རིམ་པ་བྱས་ཡོད་ཀྱང་ཁ་སང་རྒྱ་ནག་ནང་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱིས་ཨ་རིས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་གསར་པ་དེ་ནི་ཚུལ་དང་མཐུན་པ་ཞིག་ཡིན་པ་དང་། སྒྲིག་ཁྲིམས་དེ་ནི་གཙོ་བོ་རྒྱ་ནག་གཞུང་གི་དམ་དྲག་ལམ་ལུགས་འོག་ཕྱག་ལས་གནང་བཞིན་པའི་ཨ་རིའི་གཞུང་ཚབ་པ་དང་ཕྱི་འབྲེལ་མི་སྣ་ཚོར་ཅུང་གུ་ཡུངས་ཐོབ་རྒྱུར་དམིགས་པ་ཞིག་ཡིན་སྟབས་རྒྱ་གཞུང་ནས་ཨ་རིའི་ཕྱི་འབྲེལ་མི་སྣར་དམ་དྲག་བྱེད་བཞིན་པ་དག་ལྷོད་དུ་གཏང་རྒྱུར་རེ་བ་ཡོད་ཅེས་གསུངས་འདུག སྐུ་ཞབས་ Terry Branstad ལགས་ཀྱིས་ད་དུང་དེ་སྔ་རྒྱ་ནག་གཞུང་ནས་ཁོང་བོད་ནང་བསྐྱོད་རྒྱུར་ཆོག་མཆན་མ་སྤྲད་པའི་གནས་སྟངས་ཐེངས་གཉིས་བྱུང་ཡོད་པ་དང་ཕྱི་ལོ་ ༢༠༡༨ ལོར་བོད་ནང་བསྐྱོད་རྒྱུའི་ཆོག་མཆན་སྤྲད་ཡོད་ཀྱང་བོད་མཚོ་སྔོན་དུ་འབྱོར་སྐབས་རྒྱ་ནག་གཞུང་འབྲེལ་མི་སྣ་ཚོས་ས་གནས་ཀྱི་ཇ་ཁང་དང་མི་མང་རྣམས་ལ་སྔོན་ཚུད་ནས་ཨ་རིའི་གཞུང་འབྲེལ་མི་སྣ་དང་གླེང་སློང་བྱ་མི་ཆོག་པའི་དམ་དྲག་བྱས་ཡོད་པ་དང་། ཉེ་ཆར་ཁོང་རྒྱ་ནག་ནང་ཡོད་པའི་ཨ་རིའི་ཤེས་ཡོན་དང་ཉམས་ཞིག་ལྟེ་ཁང་དུ་བསྐྱོད་རྒྱུའི་ཆོག་མཆན་ཡང་སྤྲོད་མེད་པ་སོགས་འགྲེལ་བརྗོད་དང་སྦྲགས། རྒྱ་ནག་གི་གཞུང་ཚབ་དང་ཕྱི་འབྲེལ་མི་སྣ་རྣམས་ཨ་རིའི་ཕྱི་སྲིད་ལས་ཁུངས་ལ་སྙན་སེང་ཙམ་ཡང་ཞུ་དགོས་ཀྱི་མེད་ཀྱང་ཨ་རིའི་ཕྱི་འབྲེལ་མི་སྣ་ཚོ་རྒྱ་ནག་གཞུང་འབྲེལ་ལས་ཁུངས་ལ་སྙན་སེང་ཞུ་དགོས་པ་མ་ཟད་ལས་དོན་ཐོག་ཞུགས་ཆོག་པའི་ཆོག་མཆན་ཀྱང་ཞུ་དགོས་ཀྱི་ཡོད་སྟབས། ཨ་རི་ནང་ཡོད་པའི་རྒྱ་ནག་གཞུང་ཚབ་དང་ཕྱི་འབྲེལ་མི་སྣ་ཚོ་ལས་རྒྱ་ནག་ནང་ཡོད་པའི་ཨ་རིའི་གཞུང་ཚབ་དང་ཕྱི་འབྲེལ་མི་སྣ་ཚོར་དམ་དྲག་ཆེ་བ་ཡོད་པ་མངོན་གསལ་གྱིས་གསུངས་འདུག ལྷག་པར་དུ་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ནས་ཨ་རིར་ཡོད་པའི་རྒྱ་ནག་གི་གཞུང་ཚ་བ་ Cui Tiankai ཡིས་ Tweeter དྲྭ་གནས་ཐོག་ཨ་རིའི་ཁྲིམས་སྒྲིག་གསར་པར་སྐྱོན་བརྗོད་བྱས་པ་དེ་ནི་ཆེས་མི་འོས་པའི་བྱེད་སྟངས་ཤིག་ཡིན་པ་དང་ཁོང་ཨ་རི་རང་དབང་ལུང་པའི་ནང་ཡོད་སྟབས་ Tweeter སྤྱོད་ཐུབ་པ་ལས་རྒྱ་ནག་ནང་གཞུང་གིས་དམ་དྲམ་རྐྱེན་པས་ Tweeter གཙོས་པའི་ངོ་དེབ་དང་ Youtube སོགས་བཀག་བསྡོམ་བྱེད་བཞིན་ཡོད་པ་གསུངས་འདུག གཞི་རྩའི་ཉེ་དུས་སུ་ཨ་རི་གཞུང་གིས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་གསར་པ་དེ་ནི་འདས་པའི་ལོ་དུས་མང་པོའི་རིང་ལ་རྒྱ་ནག་གཞུང་གིས་ཡུལ་དེའི་ནང་ཡོད་པའི་ཨ་མི་རི་ཀའི་གཞུང་ཚབ་དང་ཕྱི་འབྲེལ་མི་སྣའི་ལས་དོན་ཐོག་དམ་དྲག་བྱེད་བཞིན་པར་ཡར་ལན་ཞིག་ཆགས་ཀྱི་ཡོད་པ་དང་། ཁ་སང་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱི་འགྲེལ་བརྗོད་གནང་བར་ཨ་རི་གཞུང་ནས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་འདི་ཙམ་མ་ཟད་ད་ལྟའི་ཆར་ཨ་རི་ནང་ལ་རྒྱ་ནག་གཞུང་གི་བདག་དབང་འོག་ཡོད་པའི་ལྟེ་གནས་ཁག་དང་། ཚོང་ལས་སྡེ་ཚན། དེ་བཞིན་རྒྱ་ནག་གཞུང་འབྲེལ་གྱི་གསར་ཁང་བཅས་པ་སྲིད་གཞུང་གི་གསང་བའི་ལས་དོན་མི་སྣའི་ཁོངས་སུ་བཅུག་རྒྱུའི་ཁྲིམས་སྒྲིག་གསར་པ་ཞིག་ཀྱང་གཏན་འབེབས་གནང་འཆར་ཡོད་པ་རེད་འདུག རྩ་བའི་ཨ་རི་ཙམ་མ་ཟད་སྔར་ལོའི་ཕྱི་ཟླ་ ༡༢ ནང་ལ་ Australia སྲིད་གཞུང་ནས་རྒྱ་ནག་གཞུང་གི་གསང་བའི་ལས་གཞི་རྣམས་ཡུལ་དེར་དར་ཁྱབ་མི་ཡོང་བའི་སླད་དུ་ Australia ནང་ཡོད་པའི་རྒྱ་ནག་གཞུང་འབྲེལ་གྱི་མི་སྣ་དང་ཚོང་གི་ལྟེ་གནས་ཁག་ཐོ་འགོད་དང་དེབ་སྐྱེལ་བྱེད་དགོས་པའི་སྒྲིག་ཁྲིམས་གསར་བཟོ་གནང་ཡོད་པ་རེད།

ཉེ་དུས་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་རྫོང་ཁག་ ༡༡ ནང་ཆར་ཆུ་ཆེན་པོ་བབས་ཏེ་ཆུ་ལོག་གི་གོད་ཆག་ཚབས་ཆེན་བྱུང་བའི་ཁྲོད་ཡུལ་མི་མང་པོ་ཞིག་ཤི་རྨས་ཐེབས་པ་དང་དུད་ཁྱིམ་མང་པོ་གནས་སྤོར་བྱེད་དགོས་བའི་དཀའ་མང་དག་ཅིག་འཕྲད་བཞིན་པར་བརྟེན་ཀ་ན་ཊ་ཀའི་མངའ་སྡེའི་ནང་རྟེན་གཞི་བྱས་པའི་བོད་མི་རྣམས་ཀྱིས་ཁུལ་དེའི་གནོད་ཐེབས་ཀྱི་ཡུལ་མི་རྣམས་ལ་གདུང་སེམས་མཉམ་བསྐྱེད་མཚོན་ཕྱིར་དུ་རང་ཉིད་ཀྱི་ཉིན་གཅིག་གི་ཕོགས་བསྡུ་རུབ་ཀྱིས་ཞལ་འདེབས་གནང་བ་མ་ཟད་བོད་མིའི་སྒྲིག་འཛུགས་བཀའ་ཤག་གིས་ཀྱང་ཧིན་སྒོར་འབུམ་ལྔ་ཞལ་འདེབས་གནང་འདུག དེ་རིང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་རྒྱ་གར་ལྷོ་ཕྱོགས་བོད་མིའི་གཞིས་ཁག་ལྔའི་ནང་གི་བོད་རིགས་སྲི་ཞུ་བ་དང་མཉམ་འབྲེལ་སྡེ་ཚན་རྣམས། སློབ་གྲྭ་དང་སྨན་ཁང་ཁག་གི་ལས་བྱེད་རྣམས་ཀྱིས་རང་ཉིད་ཀྱི་ཉིན་གཅིག་གི་གསོལ་ཕོགས་ཡོད་ཚད་བསྡུ་རུབ་གནང་སྟེ་ཁྱོན་བསྡོམས་ཧིན་སྒོར་ ༥༢༦༢༡༥་༦༥ བཅས་བྱུང་ཡོད་པ་ལྟར་ལྷོ་སྤྱི་ཆོས་འཕེལ་ཐུབ་སྟན་ལགས་ཀྱིས་ཁ་སང་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ B.S. Yediyurappa མཆོག་མཇལ་འཕྲད་དང་འབྲེལ་ནས་ཁོང་གི་ཕྱག་ལ་བཀའ་ཤག་ནས་བྱུང་བའི་ཧིན་སྒོར་འབུམ་ལྔ་དང་དེ་བཞིན་བོད་མི་མང་ཚོགས་ཀྱི་བསྡུ་རུབ་གནང་བའི་དངུལ་འབོར་དེའི་བརྒྱ་ཆ་ ༥༠ ཕུལ་བ་དང་མཉམ་དུ་ཀ་ན་ཊ་ཀ་མངའ་སྡེ་དེ་བོད་མི་རྣམས་ལ་བཀའ་དྲིན་ཆེན་པོ་ཡིན་པ་ཞུས་འདུག ལྷོ་ཕྱགས་ཀྱི་སྲིད་ཞུ་ལས་བྱེད་དང་མཉམ་འབྲེལ་སོགས་ཀྱི་མཚོན་པའི་ཉིན་གཅིག་གི་གསོལ་ཕོགས་ཀྱི་བརྒྱ་ཆ་ལྔ་བཅུ་ལྷག་འཕྲོ་དེ་མོན་གྷོ་འདོད་རྒུ་གླིང་གཞིས་ཆགས་སུ་གནས་པའི་བོད་མིའི་གནོད་ཐེབས་ཁྱིམ་ཚང་རྣམས་ལ་བགོ་འགྲེམས་གནང་རྒྱུ་རེད་འདུག རྩ་བའི་རྒྱ་གར་ལྷོ་ཕྱོགས་ཁུལ་དུ་ཆུ་ལོག་གི་དོན་རྐྱེན་དེ་བྱུང་སྐབས་བོད་མིའི་གཞིས་ཆགས་ཀྱི་ས་གནས་འགོ་འཛིན་རྣམས་ཀྱིས་ཀྱང་ས་གནས་མངའ་སྡེ་གཞུང་གི་རྫོང་དཔོན་རྣམས་བརྒྱུད་དེ་ཆུ་ལོག་གི་གོད་ཆག་ཕོག་མཁན་རྣམས་ལ་གྲོང་སྡེ་ངལ་སེལ་བརྒྱུད་ནས་རོགས་རམ་གྱི་ལས་འགུལ་ཞིག་ཀྱང་སྤེལ་ཡོད་པ་རེད།

League of Legends ཞེས་དྲྭ་ཐོག་གི་རྩེད་འགྲན་ཞིག་གི་ནང་རྩེད་འགྲན་པ་ཚོས་གླེང་མོལ་བྱེད་སྐབས་ཡུ་གུར་ཞེས་པའི་ཐ་སྙད་ལ་བཀག་བསྡོམ་བྱེད་ཀྱི་ཡོད་པ་མངོན་གསལ་གནང་འདུག BBC གསར་ཁང་གིས་གནས་ཚུལ་སྤེལ་བར་ League of Legends ཞེས་ཧ་ཅང་གྲགས་ཆེ་བའི་དྲྭ་ཐོག་གི་རྩེད་འགྲན་ནང་ཡུ་གུར་ཞེས་པའི་ཐ་སྙད་བཀག་བསྡོམ་བྱེད་བཞིན་པ་མངོན་གསལ་བྱུང་བ་དང་འབྲེལ། མཉེན་ཆས་བཀོལ་སྤྱོད་གནང་མཁན་ཁག་གཅིག་གིས་དེར་ཞུ་གཏུགས་བྱས་ཀྱང་རྩེད་འགྲན་གྱི་སྒྲིག་གཞི་ནང་དུ་མི་རིགས་ཀྱི་གནད་དོན་དང་འབྲེལ་བའི་གླེང་སློང་བྱ་རྒྱུར་བཀག་བསྡོམ་གནང་ངེས་ཡིན་པ་གསལ་ཡོད་སྟབས་མཉེན་ཆས་དེ་བཟོ་མཁན་ riot games ཚོང་ལས་ཁང་ནས་ཐོག་མའི་འཆར་རྩེད་འགྲན་པ་ཚོའི་ཞུ་གཏུགས་དེ་དག་སྣང་མེད་དུ་འཇོག་ཡོད་པ་མ་ཟད་ཞུ་གཏུག་དེ་དག་མཉེན་ཆས་དེ་ནས་ཕྱིར་འཐེན་བྱས་འདུག འོན་ཀྱང་མཉེན་ཆས་བཀོལ་སྤྱོད་གནང་མཁན་ཚོས་རྗེས་སུ་ Reddit  ཞེས་པའི་དྲྭ་གནས་ཐོག་གནས་ཚུལ་དེའི་སྐོར་ཡང་བསྐྱར་བཀོད་རྗེས་ Riot Games ཚོང་ལས་ཁང་གི་འབྲེལ་ཡོད་ལས་བྱེད་ Ryan Rigney ལགས་ཀྱིས་ twitter བརྒྱུད་གནས་ཚུལ་དེར་ངོས་ལེན་ཞུས་པ་དང་འབྲེལ་ཏེ་དྲྭ་ཐོག་གི་རྩེད་འགྲན་ནང་དུ་མི་རིགས་བྱེ་བྲག་པ་ཞིག་གི་མིང་བཀག་བསྡོམ་བྱས་པ་དེ་ནི་བྱབ་ཆུང་གི་ལས་ཀ་ཞིག་ཡིན་པར་འགྲེལ་བརྗོད་གནང་བ་དང་ཆབས་ཅིག ཚོང་ལས་ཁང་གི་ངོས་ནས་གནད་དོན་དེར་ཞིབ་གཅོད་དང་ཁ་སྐོང་ཇི་དགོས་ཞུ་ངེས་ཡིན་པར་བརྗོད་འདུག གཞི་རྩའི་རྒྱ་ནག་ནང་དྲྭ་ཐོག་གྱི་རྩེད་འགྲན་དང་འབྲེལ་བའི་མཉེན་ཆས་བཀོལ་སྤྱོད་བྱེད་སྐབས་བོད་རང་བཙན་དང་ཐེ་ཝན། གནམ་སྡེ་སྒོར་མོ་ཆེའི་དོན་རྐྱེན། ༸གོང་ས་མཆོག་གི་མཚན་སོགས་ཐ་སྙད་མང་དག་ཅིག་ལ་དམ་དྲག་བྱས་དང་བྱེད་བཞིན་པ་དེ་ནི་རྒྱུན་ལྡན་གྱི་བྱེད་སྟངས་ཤིག་ཡིན་ཀྱང་། དེང་སྐབས་ Tencent ལྟ་བུ་དྲྭ་ཐོག་གི་རྩེད་འགྲན་བཟོ་མཁན་རྒྱ་ནག་གི་ཚོང་ལས་ཁང་ཆེ་གྲས་དེའི་ཤུགས་རྐྱེན་ལ་བརྟེན་རྒྱ་ནག་གཞུང་གི་དབང་ཤུགས་དེ་རྒྱ་ནག་རྒྱལ་ནང་ཙམ་མ་ཟད་རང་དབང་ལྡན་པའི་རྒྱལ་ཁབ་གཞན་ནང་ལའང་ཁྱབ་བརྡལ་ཆེན་པོ་འགྲོ་བཞིན་ཡོད་པ་རེད། ཉེ་ལམ་ NBA ཞེས་ཨ་མི་རི་ཀའི་རྒྱལ་ཡོངས་སིལ་སྦོལ་ལྷན་ཚོགས་ཀྱི་ཚོགས་མི་ཡིན་པའི་ houston rockets  རུ་ཁག་གི་འགན་འཛིན་སྐུ་ཞབས་ Morey ལགས་ཀྱིས་ཧོང་ཀོང་ནང་གི་ལས་འགུལ་ལ་རྒྱབ་སྐྱོར་གྱི་བཀའ་མོལ་གནང་རྗེས་རྒྱ་ནག་དབུས་བརྙན་འཕྲིན་ལས་ཁང་དང་ Tencent ཚོང་ལས་ཁང་ནས་ NBA སིས་སྦོལ་རྩེད་འགྲན་རྒྱ་ནག་ནང་ཐད་ཀར་རྒྱང་སྲིང་གནང་བར་བཀག་བསྡོམ་བྱས་ཡོད་པ་རེད། བི་བི་སི་བརྙན་འཕྲིན་ལས་ཁང་གིས་ཐེངས་འདིའི་གནད་དོན་དང་འབྲེལ་ཏེ་ Tencent ཚོང་ལས་ཁང་དང་དེ་བཞིན་ཨ་རིའི་ནང་རྟེན་གཞི་བྱས་པའི་ Riot Games ཚོང་ལས་ཁང་གཉིས་ལ་འབྲེལ་བ་ཞུས་ཀྱང་ད་ལྟའི་ཆར་ཚོང་ལས་ཁང་དེ་དག་ནས་འགྲེལ་བརྗོད་གང་ཡང་གནང་མི་འདུག

འདི་ལོ་ ༢༠༡༩ དེ་བཞིན་འཇམ་མགོན་བླ་མ་ཙོང་པ་ཆེན་པོ་མཆོག་ཟུང་འཇུག་མངོན་དུ་མཛད་ནས་ལོ་ངོ་ ༦༠༠ འཁོར་བའི་དུས་ཁྱད་དང་སྟབས་བསྟུན་རི་བོ་དགེ་ལྡན་པ་ཚོའི་ངོས་ནས་༸རྗེ་བདག་ཉིད་ཆེན་པོ་མཆོག་གི་བཀའ་དྲིན་རྗེས་དྲན་དང་འབྲེལ་ཕྱི་ལོ་ ༢༠༡༩ འདི་བཞིན་རྒྱལ་སྤྱིའི་༸རྗེ་ཙོང་ཁ་པའི་ལོ་ཞེས་རྒྱ་གར་གཙོ་བོར་གྱུར་པའི་འཛམ་གླིང་ས་ཕྱོགས་གང་སར་ཆོས་ཕྱོགས་ཀྱི་གནང་སྒོ་འདྲ་མིན་བརྒྱུད་ནས་སྲུང་བརྩི་ཞུ་བཞིན་ཡོད་པ་ལྟར། ཁ་ཉིན་ཕྱི་ཚེས་༢༠ ཉིན་ཡོ་རོབ་རྒྱལ་ཁབ་ཨོ་སེ་ཏྲེ་ཡའི་ལྷོ་ནུབ་མངའ་སྡེ་ Carinthia ནང་རྟེན་གཞི་བྱས་པའི་བོད་ཀྱི་ཆེས་མཐོའི་སློབ་གཉེར་ཁང་དུ་འཇམ་དགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་མཆོག་དབུ་བཞུགས་ཐོག་སུད་སི་སྐུ་ཚབ་དོན་གཅོད་འཆི་མེད་རིན་འཛིན་ལགས། ཕྱི་ནང་གི་དད་ལྡན་ཆོས་ཞུ་བ་རྣམས་འདུ་འཛོམས་ཐོག་ལ་འཇམ་མགོན་བླ་མ་ཙོང་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམ་ནས་ལོ་ངོ་ ༦༠༠ འཁོར་བའི་རྗེས་དྲན་སྲུང་བརྩི་ཞུས་འདུག སྤྱིར་དགའ་ལྡན་ཁྲི་རིན་པོ་ཆེ་མཆོག་གིས་ཟླ་ ༡༠ ཚེས་ ༡༤ ཉིན་ཨོ་སི་ཏྲེ་ཡའི་བོད་ཀྱི་ཆེས་མཐོའི་སློབ་གཉེར་ཁང་དུ་༸ཞབས་སོར་འཁོད་ནས་ཉིན་གྲངས་དྲུག་གི་རིང་ཆོས་འབྲེལ་མཛད་བཞིན་ཡོད་པ་དང་། ཕྱི་ཚེས་ ༡༨ དང་ ༡༩ དེ་བཞིན་ ༢༠ བཅས་སུ་ས་གནས་སུ་ཡོད་པའི་དད་ལྡན་ཆོས་ཞུ་བ་ཚོར་༸དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་བཀའ་དབང་དང་༸དཔལ་རྡོ་རྗེ་སེམས་པའི་རྗེས་སྣང་བསྩལ་བ། ཁ་སང་ཕྱི་ཚེས་ ༢༡ ནས་ ༢༣ བར་ཉིན་གྲངས་གསུམ་གྱི་རིང་༸དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་བདག་བསྐྱེད་ལུང་ཁྲིད་བཅས་གནང་བཞིན་ཡོད་པ་རེད། རྩ་བའི་ཨོ་སི་ཏྲི་ཡའི་ནང་རྟེན་གཞི་བྱས་པའི་བོད་ཀྱི་ཆེས་མཐོའི་སློབ་གཉེར་ཁང་དེ་ Carinthia མངའ་སྡེས་གསོལ་འདེབས་ཞུས་དོན་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལམ་སྟོན་མཛད་པའི་འོག་ནས་ས་གནས་ཡུལ་མི་ཚོར་བོད་ཀྱི་ཆོས་དང་རིག་གཞུང་སློབ་གཉེར་བྱ་ཡུལ་ལྟེ་གནས་ཤིག་ལ་དམིགས་ཏེ་ཕྱི་ལོ་ ༢༠༠༨ ལོར་དངོས་སུ་དབུ་འབྱེད་གནང་བ་ཞིག་ཡིན་འདུག་ཅིང་། ལྟེ་གནས་ཁང་དེས་ཆོས་དད་ཡོད་མེད་དང་ཆོས་ལུགས་རིས་མེད་ཀྱི་སྐྱེ་བོ་ཀུན་ལ་ནང་ཆོས་ནང་ཡོད་པའི་སེམས་ཁམས་རིག་པ་དང་ལྟ་འགྲུབ། གསོ་བ་རིགས་པ་སོགས་སློབ་ཁྲིད་གནང་བཞིན་ཡོད་པ་རེད།

ཉན་པ།: Listen ཕབ་ལེན། Download རྒྱལ་སྤྱིའི་ནང་པའི་ཚོགས་པའི་སྐུ་ཚབ་ནས་༸གོང་ས་མཆོག་གི་མཇལ་ཁ་ཞུས་པ། བོད་མི་ཡིན་པར་དོགས་ནས་བལ་པོའི་བྱིས་པ་དང་རྒན་འཁོགས་རྣམས་ཀྱང་འཛིན་བཟུང་། སིལ་སྤོལ་རྩེད་འགྲན་སྐབས་བོད་དང་ཧོང་ཀོང་ལ་རྒྱབ་སྐྱོར་གྱིས་ལས་འགུལ་སྤེལ་བ། ལྷོ་རྒྱ་ནག་རྒྱ་མཚོའི་ཐོག་རྒྱ་ནག་གི་བདག་དབང་དང་འབྲེལ་Abominable གློག་བརྙན་ལ་ངོ་རྒོལ། དམིགས་བསལ་ལས་རིམ། ༸རྒྱལ་དབང་འཕྲིན་ལས་རྒྱ་མཚོ་མཆོག་གི་མཛད་རྣམ་འཕྲོ་སྐྱོང་། Monday 21/10/2019 Dalai Lama meets International Buddhist delegates led by Sulak Sivaraksa Nepal: People held for Tibetan signage on clothes during Xi’s visit Fans support Hong Kong, Tibet at NBA game in New York Malaysia latest to ban Abominable over controversial map of South China Sea FEATURE: Trinley Gyatso the 12th Dalai Lama