Monthly Archives: May, 2021

ཉན་པ།: Listen ཕབ་ལེན། Download བོད་ནང་མུ་མཐུད་རྒྱ་ནག་དམར་ཤོག་གི་ལོ་རྒྱུས་སློབ་སྦྱོང་གི་ལས་འགུལ་ཤུགས་ཆེ་རསྤེལ་བཞིན་པ། རྒྱ་གཞུང་གིས་ G7 ལྷན་ཚོགས་ནས་རྒྱ་ནག་གི་ནང་སྲིད་གནད་དོན་ལ་ཐེ་བྱུས་བྱེད་རྒྱུ་མེད་པར་བརྗོད་འདུག ལས་འགུལ་བ་ཇཱོ་ཞ་ཝང་ལགས་སུ་བཙོན་འཇུག་ཁྲིམས་ཆད་འཕར་སྣོན། ཐེ་ཝན་རྒྱལ་སྤྱིའི་ཚོོགས་ཁག་ནང་མཉམ་ཞུགས་དགོས་པའི་གྲོས་ཆོད་སྤྱི་མོས་ཀྱིས་གཏན་འབེབས། བོད་ཀྱི་སྐད་ཡིག་ཞབས་ཞུ་ཁང་གསར་འཛུགས་གནང་མཁན་ཐུབ་བསྟན་རབ་བརྟན་ལགས་དང་ལྷན་དུ་གླེང་མོལ། Friday 07/05/2021 Xi Jinping’s Party history campaign continues in Tibet to cement CCP’s centenary anniversary Beijing accuses G7 ministers of interfering in China’s affairs 10 months jail term added on Joshua Wong over banned Tiananmen vigil French Senate backs Taiwan's entry in international organizations DIASPORA FEATURE: Tibetan Language Preservation Organization

དབྱིན་ཡུལ་དུ་རྟེན་གཞི་བྱས་པའི་བོད་གནས་ཉམས་ཞིབ་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གིས་འདི་ལོར་རྒྱ་ནག་དམར་ཤོག་སྲིད་གཞུང་བཙུགས་ནས་དུས་རབས་གཅིག་འཁོར་བཞིན་པའི་དུས་དྲན་དང་བསྟུན་ནས། བོད་ཁུལ་དུ་དམར་ཤོག་གི་ལོ་རྒྱུས་ལ་སློབ་སྦྱོང་དང་་གཞུང་གི་དྲིལ་བསྒྲགས་རིགས་འདྲ་མིན་སྤེལ་བཞིན་པའི་ཁྲོད་དུ། འདི་ལོ་ཟླ་བ་གཉིས་བ་ནས་རྒྱ་ནག་གིས་བོད་ཁུལ་དུ་ལོ་རྒྱུས་འཁྱོགས་བརྗོད་ཀྱི་དྲིལ་བསྒྲགས་རིགས་ཤིག་ལག་བསྟར་བྱས་ཏེ། ལོ་རྒྱུས་འཁྱོགས་བརྗོད་ཀྱི་ལས་འགུལ་དེར་ངོས་ལེན་མེད་མཁན་གྱི་བོད་མི་རྣམས་ལ་དྲག་གནོན་བྱེད་ཀྱི་ཡོད་པར་འཁོད་འདུག གནས་ཚུལ་དེའི་ནང་གསལ་རྒྱ་ནག་གིས་འདི་ལོའི་དམར་ཤོག་སྲིད་གཞུང་བཙུགས་ནས་ལོ་བརྒྱ་འཁོར་བའི་དུས་དྲན་དང་བསྟུན་ནས། བོད་ཁུལ་གྱི་དགོན་པ་ཁག་ཏུ་བཙན་དབང་གིས་ཡིག་གཟུགས་འགྲན་བསྡུར་བྱེད་དུ་བཅུག་པ་དང་སློབ་ཕྲུག་རྣམས་བདུན་ཕྲག་རེ་རེར་རྒྱ་ནག་གི་དྲིལ་བསྒྲགས་ལས་འགུལ་དུ་ཞུགས་སུ་འཇུག་བཞིན་ཡོད་སྐོར་འཁོད་འདུག དེ་ཡང་ཉེ་ལམ་ཟླ་བ་ ༤ བའི་ཚེས་ ༣༠ ཉིན། རྒྱ་ནག་གིས་བོད་ནང་གི་གདན་ས་གསུམ་གྱི་ཡ་གྱལ། སེ་ར་དགོན་དུ་རྒྱ་ནག་དམར་ཤོག་སྲིད་གཞུང་དབུ་བརྙེས་ནས་དུས་རབས་གཅིག་ཕྱིན་པའི་དུས་དྲན་མཛད་སྒོ་འཚོགས་སུ་བཅུག་ནས།  ཁྲིམས་སྒྲིག་དམ་པོའི་འོག  གྲྭ་བ་རྣམས་ཀྱིས་ཡིག་གཟུགས་འགྲན་བསྡུར་གྱི་ལམ་ནས་རྒྱ་ནག་གི་སྲིད་བྱུས་ལ་བསྔགས་བརྗོད་དང་། རྒྱ་ནག་གི་དབུ་ཁྲིད་དང་རྒྱལ་གཅེས་ཀྱི་སློབ་གསོ་ལ་དགའ་མོས་བྱེད་ཡོད་རབས།  དེ་བཞིན་༸གོང་ས་སྐྱབས་མགོན་རིན་པོ་ཆེ་མཆོག་དང་རྒྱ་ནག་གིས་བརྗོད་བཞིན་པའི་ཁ་བྲལ་བར་མཚད་སྨོད་བྱེད་དུ་བཅུག་ཡོད་པར་འཁོད་འདུག དེ་བཞིན་རྒྱ་ནག་གིས་ས་བགོས་བྱས་པའི་མཚོ་སྔོན་ཞིང་ཆེན་གྱི་ཁོངས་གཏོགས་ཀྱི་ཡུལ་ཤུལ་རང་སྐྱོང་ས་ཁུལ་དུ་རྒྱ་ནག་གིས་གཞུང་འབྲེལ་གྱི་ལས་བྱེད་མང་པོ་ཆེད་མངགས་ཀྱིས་ཁུལ་དེའི་གྲོང་བརྡལ་དང་གྲོང་གསེབ་མང་པོར་སྐོར་བསྐྱོད་ཀྱིས། བོད་ཁྱིམ་རེ་རེར་རྒྱ་ནག་གི་སྲིད་བྱུས་དང་དུས་སྟོན་དང་འབྲེལ་བའི་ལོ་རྒྱུས་སློབ་གསོའི་ལས་འགུལ་དྲིལ་བསྒྲགས་བྱེད་དུ་བཅུག་ཡོད་པ་ཡང་མངོན་གསལ་གནང་འདུག གཞན་ཡང་རྒྱ་ནག་གི་ཉེན་རྟོག་མི་སྣ་བདུན་ཕྲག་གཅིག་གི་ནང་དུ་ཡུལ་ཤུལ་ཁུལ་གྱི་སློབ་གྲྭ་ཁག་གི་ནང་དུ་ཚར་གསུམ་ལ་ཆེད་གཏོང་གིས་རྒྱ་ནག་དམར་ཤོག་སྲིད་གཞུང་དབུ་བརྙེས་ནས་ལོ་བརྒྱ་འཁོར་བའི་དུས་རབས་རང་བཞིན་གྱི་གཟི་བྱིན་དྲིལ་བསྒྲགས་བྱེད་དུ་འཇུག་གི་ཡོད་པ་མ་ཟད། བོད་མི་རྣམས་ལ་རྒྱ་ནག་དམར་ཤོག་སྲིད་གཞུང་བཀའ་དྲིན་ཆེན་པོ་ཡིན་པར་དྲིལ་བསྒྲགས་ཀྱིས།  བོད་མི་རྣམས་ཀྱིས་རྒྱ་ནག་སྲིད་གཞུང་ལ་ལར་ཞེན་ཡོད་དགོས་བར་སྐུལ་མ་གཏོང་བཞིན་ཡོད་པར་གསལ་འགྲེལ་གནང་འདུག མ་ཟད་ལས་འགུལ་དེའི་ཁྲོད་ཉེ་ལམ་དམར་ཤོག་གི་ལོ་རྒྱུས་དང་འབྲེལ་བའི་སློབ་གསོའི་ལས་རིམ་ཞིག་གི་ཐོག་ནས་རྒྱ་ནག་གཞུང་གིས་བོད་ཁུལ་དུ་ Wang Kai ཟེར་བའི་དམག་དཔོན་གསར་པ་ཞིག་བསྐོ་གཞག་བྱས་པའི་གནས་ཚུལ་ཡང་ཐོན་ཡོད་པ་རེད། གཞི་རྩའི་རྒྱ་ནག་གིས་སྔ་མོ་ནས་བོད་ཁུལ་དུ་རྒྱལ་གཅེས་ཆོས་གཅེས་ཀྱི་སློབ་གསོ་རྒྱ་ཆེར་སྤེལ་བཞིན་པ་མ་ཟད། བོད་ཁུལ་གྱི་དགོན་པ་གྲྭ་ཚང་རེ་རེར་རྒྱ་ནག་གིས་ཆེད་བསྐོས་བྱས་པའི་ལས་བྱེད་རྩ་འཛུགས་ཀྱིས་རྒྱ་ནག་གི་ཁྲིམས་ལུགས་དང་ལོ་རྒྱུས་སོགས་ཀྱི་སློབ་ཁྲིད་བྱེད་བཞིན་ཡོད་པ་མ་ཟད།  རྒྱ་ནག་གི་ཁྱད་ཆས་ལྡན་པའི་སྤྱི་ཚོགས་རིང་ལུགས་ཀྱི་ལྟ་བ་ཞེས་པའི་ཁྱབ་ཁོངས་སུ། བོད་བརྒྱུད་ནང་བསྟན་དེ་ཡང་རྒྱ་ནག་གིས་ཁྱད་ཆས་ལྡན་པ་ཞིག་ཏུ་བསྒྱུར་རྒྱུར་ཧུར་བརྩོན་བྱེད་བཞིན་ཡོད་པ་ལྟར། འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་མི་ལོ་བརྒྱ་འཁོར་བའི་དུས་དྲན་དང་འབྲེལ་ནས་དམིགས་བསལ་གྱིས་བོད་ཁུལ་དུ་དགོན་པ་གྲྭ་ཚང་ཙམ་མ་ཡིན་པར་སློབ་གྲྭ་ཁག་དང་། ཐ་ན་དུད་ཁྱིམ་རེ་རེར་ཆེད་དུ་སྐྱོད་ནས་རྒྱ་ནག་སྲིད་གཞུང་གི་དྲིལ་བསྒྲགས་ཀྱི་རིགས་སྤེལ་ཤུགས་ཆེ་རུ་བཏང་ཡོད་པ་ཞིག་རེད་འདུག

ཁ་སང་ཚེས་ ༦ ཉིན་ཧྥ་རན་སིའི་གྲོས་ཚོགས་གོང་མའི་འཐུས་མི་ཚོས་སྤྱི་མོས་ཐོག་ནས་ཐེ་ཝན་འདི་བཞིན་རྒྱལ་སྤྱིའི་འཕྲོད་བསྟེན་སྒྲིག་འཛུགས་གཙོ་བྱས་པའི་རྒྱལ་སྤྱིའི་ཚོགས་པ་ཆེ་ཁག་བཞིའི་ནང་མཉམ་ཞུགས་ཆོག་པའི་ཁྲིམས་འཆར་གཏན་འབེབས་གནང་འདུགད་རེས་གཏན་འབེབས་གནང་བའི་ཁྲིམས་འཆར་དེ་ཐོག་མར་ཧྥ་རན་སིའི་གྲོས་ཚོགས་འཐུས་མི་སྐུ་ཞབས་ Joel Guerriau and Alain Richard རྣམ་གཉིས་ནས་གྲོས་ཚོགས་ནང་ཆེད་འདོན་གནང་ཡོད་པ་དང་། དེར་གྲོས་ཚོགས་འཐུས་མི་ ༣༠༤ ནས་ཀླད་གོར་བར་གྱིས་སྤྱི་མོས་རྒྱབ་སྐྱོར་གནང་བ་ཞིག་ཡིན་པ་མ་ཟད། ཆེད་འདོན་གནང་བའི་གྲོས་འཆར་དེའི་ནང་ཐེ་ཝན་འདི་བཞིན་འཛམ་གླིང་འཕྲོད་བསྟེན་སྒྲིག་འཛུགས་དང་དེ་བཞིན་རྒྱལ་སྤྱིའི་ཉེན་རྟོག་དང་སྤྱི་མང་མཁའ་ལམ་འགྲུལ་བཞུད་ཚོགས་པ། གཞན་ཡང་རྒྱལ་ཚོགས་ཀྱི་གནམ་གཤིས་འགྱུར་ལྡོག་ལྷན་ཚོགས་ཀྱི་སྒྲོམ་གཞི་བཅས་སུ་མཉམ་ཞུགས་དགོས་ཞེས་འཁོད་ཡོད་པ་རེད། གོང་ཞུས་གྲོས་འཆར་འདོན་མཁན་གྲོས་ཚོགས་འཐུས་མི་གཉིས་ནི་ France-Taiwan Inter-Parliamentary Amity Association ཞེས་པའི་ཚོགས་པའི་ཚོགས་མི་ཡིན་པ་དང་དེའི་ཁོངས་ནས་སྐུ་ཞབས་ Alain Richard ལགས་སུ་ཉེ་ལམ་རྒྱ་ནག་གཞུང་ཚབ་ནས་ཡི་གེ་ཞིག་འབྱོར་བ་བརྒྱུད་ཁོང་ལ་ཐེ་ཝན་ནང་འཚམས་གཟིགས་གནང་རྒྱུའི་འཆར་གཞི་ཕྱིར་འཐེན་དགོས་པ་དང་དེ་ལྟར་མ་གནང་ཚེ་དེས་ཐེ་པེ་དང་པེ་ཅིང་དབར་གྱི་ད་ཡོད་སོར་གནས་ཀྱི་གནས་སྟངས་ལ་ཤུགས་རྐྱེན་སྤྲོད་རྒྱུ་ཡིན་པའི་ཉེན་བརྡ་བཏང་ཡོད་པ་རེད་འདུག སྐབས་དེར་གྲོས་ཚོགས་འཐུས་མི་རྣམས་ནས་བགྲོ་གླེང་གི་ཆ་ཤས་བཞེས་སྐབས་ཐེ་ཝན་གྱིས་དེ་སྔ་ཡུལ་དེའི་ནང་ཡོངས་ཁྱབ་ཏོག་དབྱིབས་རིམས་ནད་སྔ་དུས་ཀྱི་རྩད་གཅོད་དང་འབྲེལ་སྔོན་འགོག་གི་བཀོད་བྱུས་དང་སྟངས་འཛིན་གནང་ ཕྱོགས་དེ་མིག་དཔེར་འོས་པ་ཞིག་ཡིན་པར་བསྔགས་བརྗོད་གནང་བ་མ་ཟད།ཐེ་ཝན་ངོས་ནས་ ༢༠༡༩ ལོའི་ཟླ་མཇུག་ཏུ་འཛམ་གླིང་མཉམ་འབྲེལ་རྒྱལ་ཚོགས་ལ་གཉན་རིམས་འདི་རྒྱལ་སྤྱིའི་ཁྱོན་དུ་ཁྱབ་གདལ་འབྱུང་བར་ཉེ་བའི་ཉེན་བརྡ་བཏང་ཡོད་ཀྱང་རྒྱལ་ཚོགས་ནས་དེར་སྣང་མེད་བཏང་སྟེ་གཉན་རིམས་དེ་འཛམ་གླིང་རང་བཞིན་གྱི་ཛ་དྲག་རིམས་ནད་ཡིན་པར་སྔ་ལོའི་ཕྱི་ཟླ་ ༡ ཚེས་ ༣༠ བར་དུ་གསལ་བསྒྲགས་གནང་མེད་པར་ལུང་འདྲེན་གནང་སྟེ། འཛམ་གླིང་འཕྲོད་བསྟེན་ལྷན་ཚོགས་ཀྱིས་ཐེ་ཝན་འདི་བཞིན་བསམ་ཞིབ་གོ་བསྡུར་གནང་ཡུལ་ལས་ཟུར་བཅད་གནང་བ་དེས་རྒྱལ་སྤྱིའི་སྤྱི་ཚོགས་ཀྱི་ཁེ་ཕན་ལ་གནོད་སྐྱོན་ཆེན་པོ་བཏང་ཡོད་པར་གསལ་སྟོན་གནང་འདུག ད་དུང་གྲོས་ཚོགས་འཐུས་མི་རྣམས་ཀྱིས་གོང་ཞུས་ཚོགས་པ་བཞི་པོའི་ནང་མཉམ་ཞུགས་ཆོག་པར་མཉམ་ལས་ཀྱི་གཏན་འབེབས་རྩ་ཚིག་ནང་རྒྱལ་ཁབ་དེ་རང་བཙན་གཙང་མའི་རྒྱལ་ཁབ་ཅིག་ཡིན་དགོས་མེད་པ་དང་ལྷག་དོན་ཚོགས་མི་རྒྱལ་ཁབ་བཞིའི་ཁྲིམས་ཀྱི་རང་དབང་ལ་རྩིས་མེད་གནང་གི་མེད་པ་མ་ཟད། ཐེ་ཝན་འདི་བཞིན་རྒྱལ་སྤྱིའི་ཁྲོད་ཞི་འཇམ་དང་མཉམ་ལས་ཀྱི་བཞེངས་ཕྱོགས་འཛིན་མཁན་ཞིག་ཡིན་སྟབས། ཐེ་ཝན་འདི་རྒྱལ་སྤྱིའི་ཚོགས་སྡེ་ཁག་དང་ལྷག་དོན་འཛམ་གླིང་འཕྲོད་བསྟེན་ལྷན་ཚོགས་སུ་ཞུགས་དགོས་པའི་དགོས་འདུན་བཏོན་འདུག ཐེ་ཝན་རྒྱལ་སྤྱིའི་ཚོོགས་ཁག་ནང་མཉམ་ཞུགས་དགོས་པའི་གྲོས་ཆོད་སྤྱི་མོས་ཀྱིས་གཏན་འབེབས་དང་འབྲེལ་དེ་རིང་ཐེ་ཝན་ཕྱི་སྲིད་བློན་ཆེན་སྐུ་ཞབས་ Joseph Wu ལགས་ཀྱིས་རང་ཉིད་ཀྱི་ Twitter དྲྭ་ལམ་བརྒྱུད་ཧྥ་རན་སིའི་གྲོས་ཚོགས་འཐུས་མི་རྣམ་པར་ཐུགས་རྗེ་ཆེ་ཞེས་གསུངས་འདུག

ཉེ་ཆར་ཟླ་བ་འདིའི་ཕྱི་ཚེས་ ༣ ནས་ ༥ བར་ཨིན་ཡུལ་གྱི་རྒྱལ་ས་ London ནང་དུ་ཚོགས་པའི་ G7 ལྷན་ཚོགས་ཐོག་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་རྒྱ་གཞུང་གིས་ཤིན་ཅང་ཡུ་གུར་དང་བོད་མི་བཅས་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་སྐྱོན་བརྗོད་ཤུགས་ཆེ་བྱས་ཡོད་པ་དང་འབྲེལ། རྒྱ་ནག་གཞུང་གིས་སྐྱོན་བརྗོད་དེ་དག་ལ་ངོས་ལེན་མེད་སྐོར་དང་སྦྲགས། G7 ལྷན་ཚོགས་ལ་རྒྱ་ནག་གི་ནང་སྲིད་གནད་དོན་ཐོག་ཐེ་བྱུས་བྱེད་རྒྱུ་མེད་པར་བརྗོད་འདུག དེ་ཡང་སྔ་ལོར་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་རྐྱེན་གྱིས་རྒྱལ་སྤྱིའི་ཁྲོད་ཀྱི་གལ་ཆེའི་ཚོགས་འདུ་མང་དག་ཅིག་ཚོགས་མ་ཐུབ་པ་དང་ཡང་ན་དྲ་རྒྱའི་ཐོག་ཚོགས་པའི་གནས་སྟངས་ཁྲོད། ཟླ་བ་འདིའི་ཚེས་ ༣ ནས་ཁ་ཉིན་ཚེས་ ༥ བར་ཨིན་ཡུལ་གྱི་རྒྱལ་ས་ལོན་ཌན་ནང་དུ་ G7 ལྷན་ཚོགས་དེ་དངོས་སུ་ཚོགས་པའི་ཐོག་ཨ་རི་དང་ཨིན་ཡུལ། ཉི་ཧོང་། འཇར་མ་ནི། ཕ་རན་སི། ཨི་ཊ་ལི། དེ་བཞིན་ཁེ་ན་ཌ་བཅས་ G7 རྒྱལ་ཁབ་བདུན་པོའི་ཕྱི་སྲིད་བློན་ཆེན་རྣམས་ལྷན་འཛོམས་ཀྱིས་རྒྱལ་ཁབ་དེ་དག་ཚང་མར་སེམས་འཚབ་གཅིག་མཚུངས་ཡོད་པའི་གནད་དོན་ཁག་གི་ཐོག་གྲོས་བསྡུར་གནང་ཡོད་པ་རེད། དེའི་ཁོངས་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་འགོག་ཐབས་བཅས་ཀྱི་སྐོར་ལ་གྲོས་བསྡུར་གནང་ཡོད་ནའང་། གནད་དོན་གཙོ་བོའི་ཁོངས་སུ་དེང་སྐབས་རྒྱ་ནག་གིས་རྒྱལ་སྤྱིའི་ཁྲིམས་ཀྱི་གོ་རིམ་དཀྲུག་ཐབས་བྱེད་བཞིན་པ་དང་། རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས། ལྷག་པར་དུ་ཤིན་ཅང་ཡུ་གུར་མང་ཚོགས་དང་། བོད་མིིའི་ཐོག་དྲག་གནོན་གྱི་སྲིད་བྱུས་ལག་བསྟར་གྱིས་གྲངས་ཉུང་མི་རིགས་དེ་དག་གི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གཏོང་བཞིན་པ་དང་། ཧོང་ཀོང་ནང་དུ་སྲིད་བྱུས་ལག་བསྟར་བྱེད་ཕྱོགས། དེ་བཞིན་ཐེ་ཝན་གྱི་གནད་དོན་བཅས་ཀྱི་སྐོར་ལ་གྲོས་བསྡུར་ལྷུག་པོ་གནང་བ་མ་ཟད། ཁ་ཉིན་ཚེས་ ༥ ཉིན་ལྷན་ཚོགས་འཇུག་སྒྲིལ་དང་འབྲེལ་བའི་བསྒྲགས་གཏམ་ནང་དུ་དེ་དག་ཚང་མའི་སྐོར་བཀོད་འདུག བསྒྲགས་གཏམ་ནང་དུ་ལྷན་ཚོགས་ཀྱི་ཚོགས་མི་རྒྱལ་ཁབ་ཚོའི་ངོས་ནས་གནད་དོན་དེ་དག་ཐོག་སེམས་འཚབ་ཤུགས་ཆེ་བྱེད་བཞིན་ཡོད་སྐོར་དང་འབྲེལ། རྒྱ་ནག་གཞུང་ལ་རྒྱལ་སྤྱིའི་ཁྲིམས་སྒྲིག་ཁག་ལ་གུས་བརྩི་ཞུས་ནས་མང་ཚོགས་ཀྱི་རང་དབང་དང་གཞི་རྩའི་ཐོབ་ཐང་ལ་སྲུང་སྐྱོབ་བྱེད་དགོས་པའི་སྐུལ་མ་གནང་བ་མ་ཟད། བོད་དང་ཤིན་ཅང་ས་ཁུལ་ནང་གི་གནས་སྟངས་དངོས་རྒྱུས་ལོན་ཆེད་བཀག་སྡོམ་མེད་པའི་ཐོག་ས་ཁུལ་དེ་དག་ནང་དུ་སྐུ་ཚབ་མི་སྣ་བསྐྱོད་བཅུག་དགོས་པའི་ཞུ་སྐུལ་གནང་འདུག G7 ལྷན་ཚོགས་ཀྱིས་ད་དུང་རྒྱ་ནག་གཞུང་ལ་ཁྲིམས་ཀྱི་གཞི་རྟེན་ལྡན་པའི་རྒྱལ་སྤྱིའི་འགྲོ་ལུགས་ནང་དུ་དོན་ཕན་ལྡན་པའི་ཐོག་ནས་ཆ་ཤས་བླངས་དགོས་པ་དང་། ཐེ་ཝན་རྒྱལ་ཁབ་ཀྱི་ཏོག་དབྱིབས་གཉན་རིམས་འགོག་ཐབས་ཐོག་གྲུབ་འབྲས་ལྡན་པའི་ལག་ལེན་བསྟར་ཕྱོགས་ལ་ངོས་འཛིན་དང་འབྲེལ། ཐེ་ཝན་ལ་འཛམ་གླིང་འཕྲོད་བསྟེན་ལྷན་ཚོགས་ཀྱི་ཚོགས་འདུ་ཁག་གི་ནང་དུ་ནུས་པ་ལྡན་པའི་ཐོག་ནས་ཆ་ཤས་བཞེས་བཅུག་དགོས་པའི་དགོས་འདུན་ཡང་མངོན་གསལ་གནང་ཡོད་པ་རེད། དེ་དོན་ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Wang Wenbin ཡིས་རྒྱལ་སྤྱིའི་འབྲེལ་ལམ་གྱི་གཞི་རྩའི་འགྲུ་དོན་ཁག་ལ་བརྩི་མེད་ཀྱིས་རྒྱ་ནག་གི་ནང་སྲིད་གནད་དོན་ལ་ཐེ་བྱུས་དང་། རྒྱ་ནག་གི་ས་ཁོངས་བདག་དབང་ལ་སྣང་མེད་བཏང་བ། དེ་བཞིན་རྒྱ་ནག་གི་ཆེ་མཐོང་ལ་དོ་ཕོག་གཏང་རྒྱུའི་ཐབས་ཤེས་རྣམས་ནམ་ཡང་ལམ་ལྷོང་ཡོང་གི་མ་རེད་ཅེས་བརྗོད་པ་དང་འབྲེལ། ལྷན་ཚོགས་ནས་བསམ་བློའི་ཆུ་ཚད་མཐོ་བོའི་རྒྱལ་ཁབ་ལ་སྐྱོན་བརྗོད་དང་ཐེ་བྱུས་བྱེད་རྒྱུ་མེད་པ་དང་། རྒྱལ་སྤྱིའི་གཉན་རིམས་འགོག་ཐབས་ཀྱི་མཉམ་འབྲེལ་ལས་དོན་ལ་མཐོང་ཆུང་བྱེད་རྒྱུ་མེད་རས་བརྗོད་འདུག ཁོ་པས་ད་དུང་ཐེ་ཝན་ནས་རྒྱལ་སྤྱིའི་ཚོགས་སྡེ་ཁག་གི་ནང་དུ་ཆ་ཤས་བཞེས་མིན་གྱི་གནད་དོན་དེ་རྒྱ་ནག་གཅིག་གི་ལྟ་གྲུབ་ཐོག་ནས་ལྟ་དགོས་པ་དང་། G7 རྒྱལ་ཁབ་ཁག་ནས་རྒྱལ་སྤྱིའི་སྤྱི་ཚོགས་ཁྲོད་རྩོད་རྙོག་བཟོ་རྒྱུ་ལས། རྒྱལ་སྤྱིའི་དཔལ་འབྱོར་གནས་སྟངས་བསྐྱར་གསོ་བྱེད་རྒྱུའི་ཐོག་དོ་སྣང་གནང་དགོས་པ་སོགས་བརྗོད་འདུག G7 ལྷན་ཚོགས་དང་འབྲེལ་ཁ་སང་བོད་མིའི་སྒྲིག་འཛུགས་ཀྱི་དྲ་གནས་ཐོག་ཐེངས་འདིའི་ G7 ལྷན་ཚོགས་ཀྱི་བསྒྲགས་གཏམ་ནང་དུ་བོད་སྐོར་འཁོད་ཡོད་པ་མངོན་གསལ་དང་སྦྲགས། དེང་སྐབས་བོད་ནང་གི་བོད་མི་ཚོར་འབྲེལ་བ་བྱེད་དཀའ་བའི་ཆེས་དམ་དྲག་གི་གནས་སྟངས་འདིའི་ཁྲོད་ད་ལན་ G7 ལྷན་ཚོགས་ཀྱིས་བོད་སྐོར་གླེང་སློང་གནང་བ་དེས་བོད་ཕྱི་ནང་གཉིས་ཀྱི་བོད་མི་རྣམས་ལ་བརྡ་ལན་དང་རེ་བ་ཤུགས་ཆེན་པོ་ཞིག་མཚོན་གྱི་ཡོད་པ་རགསུངས་འདུག

འདས་པའི་གཟའ་འཁོར་འདིའི་ཁྲོད་རྒྱ་གར་བྱང་ཕྱོགས་ལྡེ་ར་ལྡུན་དང་རྡ་རམ་ས་ལ་གཙོ་བོར་གྱུར་པའི་བོད་མི་བཞུགས་ཡུལ་ཁག་ཏུ་ཏོག་དབྱིབས་གཉན་རིམས་ཕོག་པ་བོད་མི་ ༤༨༤ བྱུང་བ་བཅས་གཉན་རིམས་ཀྱི་ནད་རླབས་གཉིས་པའི་ཁྲོད་ཉིན་རེ་བཞིན་ནད་དེ་ཕོག་མཁན་མང་དུ་འགྲོ་བཞིན་པའི་མཚམས་འདིར། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རིམས་ནད་ཀྱི་ཛ་དྲག་གནས་སྟངས་ཁྲོད་ཕྱག་ལས་གནང་མཁན་སྤྱི་དང་ལྷག་པར་དུ་སྨན་པ་དང་སྨན་ཞབས་པ་སོགས་མདུན་ཐོན་ཞབས་ཞུ་བ་ཡོངས་ལ་ཡི་རངས་བསྔགས་བརྗོད་དང་གཉན་རིམས་ཀྱི་ཛ་དྲག་གནས་སྟངས་འདི་མྱུར་དུ་ཞི་བར་ཚང་མས་ནུས་པ་མཉམ་སྤུངས་དགོས་པའི་སྐུལ་མ་གནང་བ་མ་ཟད། ཕྱི་ཚེས་ ༩ ནས་བཟུང་སྟེ་གཟའ་འཁོར་གཅིག་གི་རིང་བོད་མིའི་གཞིས་ཆགས་ཁག་ཡོངས་རྫོགས་སྒོ་རྒྱ་བསྡམ་དགོས་པའི་གཞེན་སྐུལ་གནང་སོང་། བོད་མིའི་སྒྲིག་འཛུགས་ཀྱི་རྒྱ་ནག་ཝཡ་ཧན་ནས་མཆེད་པའི་ COVID 19 ཛ་དྲག་ལས་དོན་ཚོགས་ཆུང་གི་བདུན་རེའི་གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་བརྙན་ཐུང་བརྒྱུད་བཀའ་ཤག་གི་ཚབ་ཞུས་ཏེ་གཉན་རིམས་ཁྱབ་གདལ་གྱི་ཛ་དྲག་གནས་སྟངས་ཁྲོད་བོད་པའི་གཞིས་སྒར་ཁག་ཏུ་གནས་སྟངས་སྡུག་པོ་མ་བྱུང་བ་དེ་ནི་གཙོ་བོ་ད་བར་ཕྱག་ལས་གནང་མཁན་བོད་པའི་སྨན་པ་དང་སྨན་ཞབས་པ། དེ་བཞིན་འཕྲོད་བསྟེན་ཆེད་ལས་པ་གཙོས་པའི་མདུན་ཐོན་ཞབས་ཞུ་བ་ཡོངས་ཀྱི་སྐུ་དྲིན་ལ་བརྟེན་ནས་ཡིན་པས་ཚང་མར་བསྔགས་བརྗོད་གནང་བ་ཆབས་ཅིག ད་ཆ་རྒྱ་གར་ནང་གཉན་རིམས་ཀྱི་ཚ་རླབས་གཉིས་པ་འཕེལ་བཞིན་པའི་དུས་སྐབས་སུའང་སེམས་ཤུགས་མ་ཆགས་པར་མུ་མཐུད་ཕྱག་ལས་གནང་དགོས་པའི་འབོད་སྐུལ་གནང་སོང་། དེ་བཞིན་སྲིད་སྐྱོང་མཆོག་གིས་གཉན་རིམས་ཀྱི་ཆེས་ཛ་དྲག་གནས་སྟངས་ཁྲོད་ནད་ཡམས་དེར་གདོང་ལེན་གནང་རྒྱུར་ཐབས་ལམ་གཙོ་བོ་གསུམ་ཡོད་པ་ནི་སྔོན་ཁབ་བརྒྱབ་རྒྱུ་དང་ཐེམ་སྤང་བཀའ་རྒྱ་བསྡམ་རྒྱུ། དེ་བཞིན་སྒེར་ནས་སྔོན་འགོག་གི་ལམ་སྟོན་ཁག་མུ་མཐུད་བསྟེན་རྒྱུ་བཅས་ཡིན་པར་འགྲེལ་བརྗོད་གནང་བ་མ་ཟད། སྤྱིར་རྒྱ་གར་རྒྱལ་ཡོངས་སུ་རིན་མེད་ཐོག་ཏོག་དབྱིབས་སྔོན་ཁབ་བརྒྱབ་རྒྱུ་དབུ་འཛུགས་གནང་ཡོད་ཀྱང་ད་ལྟའི་ཆར་མང་ཚོགས་ཚང་མར་སྔོན་ཁབ་དེ་ཐོབ་དཀའ་བར་གྱུར་ཡོད་སྟབས་རབ་བྱུང་ན་སྒེར་སོ་སོའི་ངོས་ནས་སྔོན་ཁབ་དེ་བཞེས་རོགས་ཞེས་གཞེན་སྐུལ་གནང་སོང་། བོད་མིའི་སྤྱི་ཚོགས་སུ་ནད་ཡམས་ཁྱབ་གདལ་འགོག་ཐབས་སུ་ཕྱི་ཚེས་ ༩ སྟེ་རེས་གཟའ་ཟླ་བ་ནས་བདུན་ཕྲག་གཅིག་རིང་ལ་བོད་མིའི་གཞིས་སྒར་ཡོངས་རྫོགས་སྒོ་རྒྱ་བསྡམ་དགོས་པའི་འབོད་སྐུལ་ཡང་གནང་སོང་། ལར་ནས་སྲིད་སྐྱོང་མཆོག་གིས་བོད་མིའི་སྒྲིག་འཛུས་ཀྱི་བཀའ་ཤག་ངོས་ནས་ད་བར་གཉན་རིམས་སྔོན་འགོག་དང་གདོང་ལེན་ཆེད་ཁྱོན་ཧིན་འབུམ་ ༦༠༠ ལྷག་འགྲོ་གྲོན་བཏང་ཟིན་ཡོད་པ་དང་ད་ཆ་གཉན་རིམས་ཀྱི་ཚ་རླབས་གཉིས་པའི་དུས་སྐབས་སུའང་དེ་འབྲེལ་གྱི་སྔོན་འགོག་ལས་དོན་ཆེད་བསྐྱར་དུ་ཧིན་སྒོར་འབུམ་ ༡༠༠ འགྲོ་གྲོན་གཏང་རྒྱུ་ཡིན་སྐོར་གསུངས་པ་དེ་ལྟར་ཡང་། གཙོ་བོ་གཉན་རིམས་དེར་གོང་ལེན་གནང་བར་ཚང་མའི་ནུས་པ་མཉམ་སྤུངས་དགོས་པའི་འབོད་སྐུལ་གནང་ཡོད། དེ་རིང་ཉིན་རྒྱབ་ཀྱི་གཉན་རིམས་ལས་དོན་ཚོགས་ཆུང་གི་གསར་འགོད་གསལ་སྒྲགས་ཐེངས་ ༥༨ ཐོག་ཚོགས་ཆུང་ངོས་ནས་གཟའ་འཁོར་འདིའི་ནང་བོད་མིའི་འདུས་སྡོད་ཁག་ཏུ་ཏོག་དབྱིབས་ནད་གཞི་ཕོག་མཁན་ ༤༨༤ དང་དེ་དག་ཁྲོད་ནད་གཞི་ཕོག་མཁན་ལོ་ན་བགྲེས་ཤོས་དེ་ ༨༧ དང་ཆུང་ཤོས་དེ་བྱིས་པ་ཟླ་བ་བརྒྱད་ཡིན་པ་དང་གཟའ་འཁོར་འདིའི་ནང་ནད་ཡམས་རྐྱེན་པས་བོད་མི་བརྒྱད་འདས་གྲོངས་སུ་གྱུར་བ་བཅས་ད་བར་རྒྱ་བལ་གཉིས་ནང་ཏོག་དབྱིབས་ནད་གཞི་ཕོག་མཁན་མི་གྲངས་ ༢༩༣༤ དང་དྲག་སྐྱེད་དུ་སོང་བ། ༡༨༠༤ ཡིན་ཀྱང་ད་བར་བོད་མི་ ༦༡ འདས་གྲོངས་དང་ད་ཆ་ནད་མནར་བཞིན་པ་དེ་ ༡༠༦༩ ཆགས་ཀྱི་ཡོད་པ་གསུངས་སོང་། སྐབས་དེར་ཕྱི་ལུགས་སྨན་པ་བསྟན་འཛིན་རྣམ་སྒྲོན་ལགས་ཀྱིས་ནད་རླབས་གཉིས་པ་འདིའི་ཁྲོད་མང་ཚོགས་ནས་ཏོག་དབྱིབས་སྔོན་འགོག་གི་ལམ་སྟོན་ཁག་མུ་མཐུད་བསྟེན་དགོས་པར་ནན་བརྗོད་གནང་བ་དང་སྦྲགས། ད་ཆ་ནད་རླབས་གཉིས་པ་འདི་ནད་གཞི་ཁྱབ་གདལ་ཧ་ཅང་མྱུར་བས་བོད་མི་རྣམས་ནས་ད་ལྟ་ས་གནས་གང་དུ་བཞུགས་ཡོད་པ་དེར་རང་འཇགས་བཞུགས་རྒྱུ་དང་ལྷག་པར་དུ་རང་ཉིད་ལ་ནད་རྟགས་གང་རུང་བྱུང་ཚེ་འཕྲལ་མ་ཉིད་དུ་བརྟག་དཔྱད་གནང་དགོས་པའི་ལམ་སྟོན་གནང་སོང་། གཞི་རྩའི་ད་ཆ་རྒྱ་གར་ནང་ཏོག་དབྱིབས་གཉན་རིམས་ཀྱི་ Second Wave འམ་ཚ་རླབས་གཉིས་པ་འཕེལ་བཞིན་པའི་དུས་སྐབས་འདིར་མངའ་སྡེ་སོ་སོ་ནས་གནས་སྟངས་ལ་གཞིགས་ཏེ་ནད་ཡམས་སྔོན་འགོག་བཀག་སྡོམ་སླད་ཐེམ་སྤང་གི་བཀའ་རྒྱ་སོགས་གསལ་བསྒྲགས་གནང་ཡོད་པ་ལྟར། འདས་པའི་ཉིན་ཤས་ནས་ཀངྒ་ར་རྫོང་ཁོངས་སུའང་ནད་གཞི་དེ་ཕོག་མཁན་ཇེ་མང་དུ་འགྲོ་བའི་རྐྱེན་གྱིས་དེ་རིང་ཉིན་རྒྱབ་ཀངྒ་ར་རྫོང་དཔོན་སྐུ་ཞབས་ Rajesh Kumar Prajapati ལགས་ཀྱིས་གསར་འགོད་གསལ་བསྒྲགས་བསྐྱངས་ཏེ་ཧི་མཱ་ཅལ་མངའ་སྡེ་ནང་དུ་རིམས་ནད་ཁྱབ་བརྡལ་སྔོན་འགོག་གི་ཆེད་དུ་སང་ཉིན་ཚེས་ ༧ ནས་བཟུང་སྟེ་ཟླ་བ་འདིའི་ཚེས་ ༡༧ བར་ཉིན་གྲངས་བཅུའི་རིང་ལ་ཕྱིར་སྐྱོད་མི་ཆོག་པའི་ཐེམ་སྤང་བཀག་རྒྱ་གནང་རྒྱུ་ཡིན་པའི་བཀོད་ཁྱབ་བཏང་འདུག ཐེངས་འདིའི་བཀོད་ཁྱབ་ནང་གཙོ་བོ་ཆུ་དང་གློག གཙང་སྦྲ་འཕྲོད་བསྟེན་སོགས་མི་མང་གི་དགོས་མཁོ་དང་འབྲེལ་བའི་ལས་ཁུངས་ཁག་སྒོ་ཕྱེ་རྒྱུ་ལས་གཞན་གཞུང་སྒེར་ལས་ཁུངས་ཚང་མ་སྒོ་བརྒྱབ་དགོས་པ་དང་། ཕྱི་མི་སུ་ཡང་ཚོུད་ ༧༢ མ་བརྒལ་བའི་(RT-PCR)་ཞེས་པའི་ནད་ཡམས་བརྟག་དཔྱད་ཀྱི་དཔང་ཡིག་མེད་པར་ཧི་མཱ་ཅལ་དུ་ཕེབས་མི་ཆོག་པ། དེ་བཞིན་ཁུལ་འདིའི་སློབ་གྲྭ་དང་ཤེས་ཡོན་བསྟི་གནས་ཁག་ཕྱི་ཟླ་ ༥ ཚེས་ ༣༡ བར་སྒོ་བརྒྱབ་རྒྱུ་མ་ཟད། འཛིན་རིམ་བཅུ་པའི་མཐའ་མའི་ཡིག་རྒྱུགས་ཀྱང་རྩིས་མེད་བཏང་སྟེ་སློབ་ཕྲུག་རྣམས་འཛིན་རིམ་སྤར་ཆོག་སྐོར་འཁོད་འདུག

ཉན་པ།: Listen ཕབ་ལེན། Download ༸གོང་ས་མཆོག་གིས་ང་ཚོ་ཚང་མར་འཛམ་གླིང་འདི་གོ་མཚོན་མེད་པ་ཞིག་བཟོ་རྒྱུའི་འགན་ཡོད་ཅེས་བཀའ་སྩལ་བ། གཉན་རིམས་ལ་ནུས་པ་མཉམ་སྤུངས་ཀྱིས་གདོང་ལེན་གནང་དགོས་པོའི་སྐུལ་མ། ཨ་རིའི་ཕྱི་སྲིད་ལས་ཁུངས་ཀྱི་ལོ་འཁོར་སྙན་ཐོར་རྒྱ་ནག་ལ་བསྟུན་མཁས་ཀྱི་ཚིག་བརྗོད་མ་བཀོད་པར་བསྔགས་བརྗོད། ནེའུ་ཛ་ལན་ཌིའི་གྲོས་ཚོགས་སུ་ཡུ་གུར་མི་རིགས་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཐོག་གྲོས་འཆར་བཞག་པ། འཕྲོད་བསྟེན་ལས་རིམ། གསོ་རིག་ཐོག་ནས་སྔོན་ཁབ་མ་བརྒྱབ་གོང་དང་བརྒྱབ་རྗེས་ཐུགས་སྣང་གནང་ཕྱོགས། Thursday 06/05/2021 Dalai Lama delivers keynote speech on understanding emotional landscape Over 480 Tibetans tests positive for Covid this week, Sikyong urges Tibetans to stand together Rubio, Leahy Commend State Department Tibet Language in the 2020 Human Rights Report New Zealand Parliament unanimously passes motion on treatment of Uygurs in Xinjiang Health and Wellness: Do and Don’ts before and after taking Covid Vaccine

ཨ་རིའི་གྲོས་ཚོགས་གོང་མའི་ནང་དུ་བོད་དོན་རྒྱབ་སྐྱོར་གྱི་བསྐྱར་བཅོས་ཁྲིམས་འཆར་བསྣམ་མཁན་གྲོས་ཚོགས་གོང་མའི་ཕྱི་སྲིད་ལས་དོན་ཚོགས་ཆུང་གི་ཚོགས་མི་སྐུ་ཞབས་ Marco Rubio ལགས་དང་གྲོས་ཚོགས་གོང་མའི་བར་བརྒལ་ཚོགས་གཙོ་དང་རྒྱུན་གྲོན་ཚོགས་ཆུང་གི་ཚོགས་གཙོ་སྐུ་ཞབས་ Patrick Joseph Leahy གཉིས་ཀྱིས་ཉེ་ལམ་ཕྱི་ཟླ་ ༣ པ་ནང་འདོན་སྤེལ་གནང་བའི་ཨ་རིའི་ཕྱི་སྲིད་ལས་ཁུངས་ཀྱི་ལོ་འཁོར་འགྲོ་བ་མིའི་ཐོབ་ཐང་གི་སྙན་ཐོའི་ནང་དུ་དེ་སྔའི་གཞུང་འཛིན་དང་མི་འདྲ་བར་རྒྱ་ནག་ལ་བསྟུན་མཁས་ཀྱི་ཚིག་བརྗོད་མ་བཀོད་པར་བསྔགས་བརྗོད་གནང་འདུག དེ་རིང་གྲོས་ཚོགས་འཐུས་མི་ Marco Rubio ལགས་ཀྱི་དྲ་གནས་ཐོག་ཁ་ཉིན་ཕྱི་ཚེས་ ༤ ཉིན་ཁོང་དང་ཕྱག་སྦྲེལ་གྲོས་ཚོགས་འཐུས་མི་ Leahy གཉིས་ཀྱིས་ཨ་རིའི་ཕྱི་སྲིད་དྲུང་ཆེ་ Antony Blinken མཆོག་གི་མཚན་ཐོག་ལ་ཕུལ་བའི་ཕྱག་བྲིས་ཤིགའདོན་སྤེལ་གནང་འདུག་པ་དང་། དེའི་ནང་དུ་གྲོས་ཚོགས་འཐུས་མི་གཉིས་ནས་ཉེ་ཆར་འདོན་སྤེལ་གནང་བའི་ཕྱི་སྲིད་ལས་ཁུངས་ཀྱི་ལོ་འཁོར་འགྲོ་བ་མིའི་ཐོབ་ཐང་གི་སྙན་ཐོར་བསྔགས་བརྗོད་དང་སྦྲགས། རྒྱ་ནག་གཞུང་གིས་འདས་པའི་ལོ་ངོ་བཅུ་ཕྲག་ཁ་ཤས་ནང་གི་བོད་དང་འབྲེལ་བའི་ཐབས་བྱུས་གཙོ་གྲས་གཅིག་ནི། བོད་ཀྱི་ས་ཁོངས་བདག་དབང་དེ་ཁྲིམས་མཐུན་བཟོ་ཐབས་བྱེད་རྒྱུ་དེ་ཡིན་པ་རྒྱལ་སྤྱིའི་ཁྲིམས་ཀྱི་མཁས་པ་མང་པོའི་ཐུགས་སྣང་བྱུང་ཡོད་པ་ལུང་འདྲེན་དང་འབྲེལ། ཨ་རི་གཞུང་གིས་དེ་སྔ་བོད་དེ་རྒྱ་ཁོངས་རེད་ཟེར་བའི་བསྒྲགས་གཏམ་ཁག་གི་ནང་དུ་ཚིག་བརྗོད་བཀོད་སྟངས་ཁག་གིས་བོད་མིས་རྒྱ་གཞུང་དང་ལྷན་དུ་གྲོས་མོལ་བྱེད་བཞིན་པའི་ཐོག་བསམ་ཞིབ་མ་ཡིན་པར་དོ་ཕོག་བཏང་ཡོད་པ་དང་། ཨ་རིས་གནང་ཕྱོགས་དེའི་ཐོག་ནས་རྒྱ་ནག་ལ་བསྟུན་མཁས་ཆེ་གྲགས་པ་བྱས་ཡོད་ཀྱང་། དེའི་ངན་ལན་ལ་བརྟེན་བོད་མིར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་དགོས་པར་རྒྱབ་སྐྱོར་གནང་བཞིན་པའི་ཨ་རིའི་སྲིད་བྱུས་ལ་དོ་ཕོག་བཏང་ཡོད་པ་དང་། དེ་སྔའི་ཨ་རིའི་གཞུང་འཛིན་ཁག་གི་གནང་ཕྱོགས་དེ་དག་གིས་རྒྱ་ནག་གིས་བོད་ཐོག་བདག་དབང་ཡོད་ཚུལ་དེ་ཁྲིམས་མཐུན་ཡིན་པར་མངོན་གསལ་མེད་པར་རྒྱབ་སྐྱོར་བྱེད་ཀྱི་ཡོད་པ་མཚོན་ཡོད་སྐོར་གསུངས་འདུག རྒྱ་ནག་གཞུང་ལ་༸གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་དང་ལྷན་དུ་གྲོས་མོལ་གནང་དགོས་པའི་དགོས་མཁོ་མེད་པ་བཟོ་བཞིན་ཡོད་སྐོར་གསུངས་ཏེ། ཐེངས་འདིའི་སྙན་ཐོའི་ནང་དུ་བོད་ཟེར་བའི་སྐབས་སུ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བ་དང་། བོད་རིགས་རང་སྐྱོང་ས་ཁུལ་ཁག དེ་བཞིན་རྒྱ་གཞུང་གིས་དབྱེ་བའི་ཟི་ཁྲོན་དང་མཚོ་སྔོན། ཡུ་ནན་དང་ཀན་སུ་ཞིང་ཆེན་ནང་གི་རྫོང་ཁག་བཅས་བོད་ཀྱི་ས་ཁུལ་ཡོངས་རྫོགས་བཀོད་པར་བསྔགས་བརྗོད་གནང་འདུག གྲོས་ཚོགས་འཐུས་མི་རྣམས་གཉིས་ཀྱིས་ད་དུང་རྒྱ་ནག་གཞུང་གིས་སོ་སོའི་དགོས་མཁོ་ལ་གཞིགས་ནས་ལོ་རྒྱུས་ལ་བཅོས་སྒྲིག་བཏང་བ་དང་། གནད་དོན་ཁག་ཅིག་གི་ཐོག་ལོ་རྒྱུས་རྫུན་མ་བྲི་བཞིན་ཡོད་པ་ལྟར། ང་ཚོའི་འདས་པའི་ཉམས་མྱོང་ལས་རྒྱ་ནག་གཞུང་གིས་གཞན་ལ་ཁས་བླངས་བཅུག་པའི་ལོ་རྒྱུས་ཁག་ཡང་ན། ཆ་མི་ཚང་བ་དང་ཡང་ན་བདེན་པ་མིན་པ་ཡིན་པ་གསལ་པོ་རྟོགས་ཐུབ་རྒྱུ་ཡོད་སྐོར་དང་འབྲེལ། རྒྱ་ནག་གཞུང་གིས་ད་ལྟ་དང་འདས་པའི་དངོས་ཡོད་གནས་ཚུལ་ལུང་དྲེན་བྱེད་བཞིན་ཁག་ལ་རྟོག་ཞིབ་ནན་པོ་གནང་དགོས་གལ་ཡིན་པ་གསུངས་ཡོད། ཨ་རིའི་ཕྱི་འབྲེལ་སྲིད་བྱུས་ནང་དུ་འགྲོ་བ་མིའི་ཐོབ་ཐང་དང་མང་ཙོ་གོང་འཕེལ་གཏང་རྒྱུ་དེ་གནད་དོན་སྙིང་པོའི་ནང་དུ་བཞག་དགོས་པ་དང་། ཕྱི་སྲིད་ལས་ཁུངས་ཀྱི་ངོས་ནས་རྒྱ་ནག་དང་ལྷན་དུ་འབྲེལ་ལམ་ཁྲོད་གནད་དོན་དེ་དག་སྣང་མེད་དུ་མ་ཤོར་བར་གྲོས་ཚོགས་འཐུས་མི་ཁོང་གཉིས་ནས་མཉམ་ལས་གནང་རྒྱུའི་གྲ་སྒྲིག་ཡོད་པ་གསུངས་འདུག རྩ་བའི་འདི་ལོའི་ཕྱི་ཟླ་ ༣ པ་ནང་དུ་འདོན་སྤེལ་གནང་བའི་ཨ་རིའི་ཕྱི་སྲིད་ལས་ཁུངས་ཀྱི་སྙན་ཐོ་ནང་དུ། འདས་པའི་ཕྱི་ལོ་ ༢༠༢༠ ནང་དུའང་བོད་ནང་རྒྱ་གཞུང་གིས་དྲག་གནོན་གྱི་སྲིད་བྱུས་མུ་མཐུད་སྤེལ་བཞིན་པའི་འོག་འདས་ལོའི་ནང་རྒྱ་གཞུང་གིས་བོད་མི་ ༢༧༣ ཙམ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་དང་མི་མཐུན་པའི་ཐོག་ནས་འཛིན་བཟུང་བྱས་ཡོད་པ་དང་། དེའི་ཁོངས་ནས་བོད་མི་ ༡༠༡ ཙམ་ཏཱ་ལའི་རུ་ཚོགས་དང་འབྲེལ་བ་ཡོད་པའི་ཉེས་མིང་དང་། ཕྱི་ཕྱོགས་སུ་འབྲེལ་བ་བྱེད་ཀྱི་ཡོད་་པའི་ཉེས་མིང་འོག་འཛིན་བཟུང་བྱས་ཡོད་པ་ལྟར། དེའི་ཁོངས་ནས་བོད་མི་ལྷ་མོ་ལགས་ལྟ་བུར་རྒྱ་གཞུང་གིས་བཀག་ཉར་འོག་མནར་གཅོད་ཚད་ལས་འགལ་བ་བཏང་བའི་འོག་འདས་གྲོངས་སུ་ཕྱིན་ཡོད་པ་དང་། དེ་བཞིན་ལྟ་སྲུང་དམ་དྲག་ཤུགས་ཆེ་སོགས་ཀྱི་ཁྲོད་ནས་བོད་མིའི་སྨྲ་བརྗོད་རང་དབང་དང་ཆོས་དད་རང་དབང་། དེ་བཞིན་འདུ་འཛོམས་དང་གསར་འགོད་རང་དབང་སོགས་ཕྱོགས་ཡོངས་ནས་དམ་དྲག་བྱས་ནས་བོད་མིའི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་བཏང་ཡོད་པ་བཀོད་ཡོད་པ་རེད། གཞན་ཡང་བོད་ནང་བོད་མི་རྣམས་སྐད་ཡིག་རང་དབང་མེད་པའི་ཐོག་ལས་ཀའི་གོ་སྐབས་མ་སྤྲད་པ། དེ་བཞིན་བོད་མིར་ཆབ་སྲིད་ཀྱི་ནག་ཉེས་འདྲ་མིན་གཡོགས་ཏེ་བོད་མི་གང་བྱུང་དུ་འཛིན་བཟུང་བྱས་པ་སོགས་ཀྱང་མངོན་གསལ་གནང་ཡོད་པ་རེད།

ཟླ་བ་འདིའི་ཕྱི་ཚེས་ ༢ ནས་དྲ་ཐོག་བརྒྱུད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རྒྱལ་སྤྱིའི་ཚན་རིག་མཁས་པའི་དབར་ Science and Wisdom of Emotion ཞེས་ཚན་རིག་དང་སེམས་ཚོར་སྐོར་གྱི་ལྷན་ཚོགས་ཤིག་འཚོགས་བཞིན་ཡོད་པ་དང་། ཁ་སང་ལྷན་ཚོགས་ཀྱི་ཉིན་མཐའ་མར་༸གོང་ས་མཆོག་དང་ཀླད་པའི་ཚན་རིག་པ་གྲགས་ཅན་སྐུ་ཞབས་ Richard Davidson ལགས། དེ་བཞིན་སེམས་ཁམས་རིག་པའི་ཚན་རིག་པ་གྲགས་ཅན་སྐུ་ཞབས་ Daniel Goleman ལགས་བཅས་ཀྱི་དབར་ཚན་རིག་པའི་ངོས་ནས་སེམས་ཚོར་གྱི་རྣམ་གཞག་ལ་དཔྱད་པ་གནང་སྟངས་ཀྱི་ཐབས་ལམ་གསར་པ་ཇི་ཡོད་དང་། བློ་སྦྱོང་དང་སྙིང་རྗེ་སོགས་ཀྱི་དགོས་གལ་དང་དགེ་མཚན་སོགས་ཀྱི་ཐོག་གྲོས་བསྡུར་མཛད་ཡོད། གྲོས་བསྡུར་མཛད་རིམ་གྱི་ཐོག་མ་དེ་ལ་སྐུ་ཞབས་ Richard Davidson ལགས་ནས་འདས་པོའི་ལོ་ངོ་ཉི་ཙམ་གྱི་རིང་༸གོང་ས་མཆོག་ནས་ཐུགས་བརྩེ་བ་ཆེན་པོས་སེམས་དང་སྲོག་གི་ཚོགས་པའི་ཚོགས་མི་དང་རྒྱལ་སྤྱིའི་ཚན་རིག་མཁས་པ་ཚོ་དང་ལྷན་དུ་སེམས་ཁམས་རིག་པ་དང་། བློ་རིག་གི་རྣམ་གཞག དེ་བཞིན་སེམས་ཚོར་སོགས་ཀྱི་ཐད་ལ་གྲོས་བསྡུར་སྦྱང་ཤེས་ལན་མང་གནང་བའི་རྐྱེན་གྱིས་ནུབ་ཕྱོགས་ཚན་རིག་པ་ཚོས་སེམས་ཁམས་དང་བློ་རིག་སོགས་ཀྱི་རྣམ་གཞག་དེ་དག་ལ་ལྟ་སྟངས་དང་། དཔྱད་ཞིབ་གནང་སྟངས་སོགས་ཀྱི་བློ་སྐྱེད་གསར་པ་མང་པོ་ཐོབ་ཡོད་པ་སོགས་ངོ་སྤྲོད་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་གནད་དོན་དེ་དག་ཐོག་ལམ་སྟོན་བཀའ་སློབ་སྩལ་བར་ཆེ་བསྟོད་དང་སྦྲགས་ཐུགས་རྗེ་ཆེ་ཞུས་འདུགཁོང་ནས་ད་ལྟའི་ཆ་ལ་མུ་མཐུད་དེ་ནུབ་ཕྱོགས་པའི་སེམས་ཁམས་རིག་པ་ཚོའི་ནང་ལ་ Genuine Happiness འམ་ཡང་དག་པའི་བདེ་སྐྱེད་ཀྱི་གྲུ་ཆའི་ཐོག་ལྟ་སྟངས་མི་འདྲ་བ་ཁག་ཅིག་ཡོང་གི་ཡོད་པ་འགྲེལ་བརྗོད་གནང་སོང་བ་དང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་གཞི་རྩའི་ཆ་ནས་བདེ་སྐྱིད་ཅེས་པ་དེ་ནི་སེམས་ཚོར་གྱི་གནས་བབ་དང་འབྲེལ་བ་ཡོད་པ་དང་། སེམས་ཚོར་གྱི་གནས་བབ་དེ་བཞིན་ཕྱི་ནང་གི་རྒྱུ་རྐྱེན་མང་པོ་ཞིག་ལ་བརྟེན་ནས་འགྱུར་བ་འགྲོ་བཞིན་ཡོད་པར་བཀའ་འགྲེལ་དང་སྦྲགས། གཙོ་ཆེ་ཤོས་སེམས་ཀྱི་གནས་བབ་དེ་ཞི་བ་དང་ལྷོད་པོའི་ངང་གནས་དགོས་པ་དང་། དེ་ལྟ་འབྱུང་ཚེ་ཕྱི་ནང་གི་རྒྱུ་རྐྱེན་གང་འདྲ་ཞིག་འཕྲད་ཀྱང་སེམས་ཚོར་གྱི་གནས་བབ་ལ་དོ་ཕོག་དེ་ཙམ་གཏང་མི་ཐུབ་པ་མ་ཟད། བདེ་སྐྱིད་དང་འབྲེལ་བའི་སེམས་ཚོར་བཟང་པོའི་ཆ་དེ་དག་གོང་འཕེལ་གཏང་ཐུབ་ངེས་རེད་ཅེས་བཀའ་སྩལ་ཡོད། དེ་བཞིན་སྐུ་ཞབས་ Daniel Goleman ལགས་ནས་ Distructive Emotion ཞེས་གནོད་པའི་རིགས་ཅན་གྱི་ཉོན་མོངས་ཞེས་པ་དེ་གང་འདྲ་ཞིག་ལ་ངོས་འཛིན་གནང་གི་ཡོད་མེད་བཀའ་འདྲི་ཞུས་སོང་བ་དང་། སྐབས་དེར་མགོན་པོ་༸གང་ཉིད་མཆོག་གིས་ང་ཚོ་མི་ཙམ་མ་ཟད་འགྲོ་བ་ཚང་མ་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་ཡིན་པ་མ་ཟད། ཚང་མས་བདེ་བ་བྱུང་ཐབས་ཐོག་འབད་བརྩོན་གནང་གི་ཡོད་པ་དང་། གལ་སྲིད་བདེ་བ་སྒྲུབ་ཐབས་ཐོག་འབད་བརྩོན་གནང་སྐབས་དེར་འགོག་རྐྱེན་བཟོ་མཁན་གྱི་བསམ་བློའི་ཆ་ཞིག་ཡོང་བ་ཡིན་ན། དེ་ལ་གནོད་པའི་རིགས་ཅན་གྱི་ཉོན་མོངས་ཞེས་ངོས་འཛིན་གནང་ཆོག་གི་རེད་ཅེས་བཀའ་སྩལ་བ་དང་ཆབས་ཅིག བྱམས་པ་དང་བརྩེ་བ། སྙིང་རྗེ་སོགས་སེམས་ཚོར་བཟང་པོའི་ཆ་དེ་དག་ང་ཚོ་འགྲོ་བ་སྤྱིའི་རང་བཞིན་ལྷན་སྐྱེས་སུ་ཡོད་པ་ཞིག་ཡིན་སྟབས། ཆོས་ལུགས་བྱེད་བྲག་པའི་སྐད་ཆ་མེད་པར་བཟང་པོའི་ཆ་དེ་དག་གོང་འཕེལ་གཏོང་ཐབས་དང་། ཤེས་ཡོན་སློབ་གསོའི་ཐོག་ནས་དེ་ལྟར་གནང་ཐུབ་ན་དགེ་མཚན་ཡོད་པ་སོགས་ལམ་སྟོན་མཛད་འདུག༸གོང་ས་མཆོག་ནས་ཁོང་ཁྲོ་ལྟ་བུ་སེམས་ཚོར་དྲག་པོའི་ཆ་དེ་དག་ཇེ་ཉུང་དུ་གཏང་ཐབས་སུ་རྐང་ལུས་ངག་ཡིད་གསུམ་གྱི་བྱ་ལས་དང་འབྲེལ་བ་ཡོད་ཀྱང་། དེ་དག་ཁྲོད་ནས་གཙོ་ཆེ་ཤོས་ཡིད་ཀྱི་ཐོག་ནས་ཀུན་སློང་བཟང་པོ་ཞིག་ཡོད་ན། ངག་དང་ལུས་ཀྱི་ཐོག་ནས་སེམས་ཚོར་དྲག་པོའི་ཆ་དེ་དག་ཡོང་རྒྱུ་ཁག་པོ་ཡིན་པ་དང་། ཡིད་ཀྱི་ཀུན་སློང་བཟང་པོ་ཡོད་པ་དེ་ཡིས་ལུས་ཀྱི་ཀུན་སྤྱོད་དང་། ངག་གྱི་སྨྲ་བརྗོད་རྣམས་རང་གཞན་གཉིས་ལ་ཕན་པ་ཞིག་མ་གཏོགས། གནོད་པ་ཞིག་ཐོན་གྱི་མ་རེད་ཅེས་བཀའ་སྩལ་ཡོད། ང་ཚོ་འགྲོ་བ་མིའི་རང་བཞིན་ལྷན་སྐྱེས་སུ་ཡོད་པའི་བཟང་པོའི་ཆ་རྣམས་ཤེས་རབ་རྩལ་འདོན་གནང་གལ་ཆེན་པོ་ཡིན་པའི་ལམ་སྟོན་མཛད་འདུག དེ་བཞིན་སྐབས་དེའི་གྲོས་བསྡུར་གྱི་ལས་རིམ་ཁྲོད་༸གོང་ས་མཆོག་ནས་སྤྱི་ཚོགས་ནང་དྲང་བདེན་མིན་པའི་གནས་སྟངས་རིགས་བྱུང་སྐབས་ཁོང་ཁྲོ་དང་ཞེ་སྡང་སོགས་ཀྱི་ཀུན་ནས་མ་བླངས་པར་བྱམས་པ་དང་བརྩེ་བའི་རང་བཞིའི་ཐོག་ནས་གདོང་ལེན་གནང་དགོས་པ་དང་། ལྷག་པར་དུ་ང་ཚོ་ཚང་མ་གཅིག་ལ་གཅིག་བརྟེན་ཐོག་འཚོ་དགོས་པའི་འགྲོ་བ་ཅིག་མཚུངས་ཡིན་སྟབས་དཀའ་ངལ་རིགས་འཕྲད་སྐབས་གྲོས་མོལ་གྱི་ལམ་ནས་སེལ་ཐབས་གནང་དགོས་པ་སོགས་བཀའ་སྩལ་དང་ང་ཚོ་ཚང་མར་འཛམ་གླིང་འདི་གོ་མཚོན་མེད་པ་ཞིག་བཟོ་རྒྱུའི་འགན་ཡོད་ཅེས་ལམ་སྟོན་བཀྲིན་ཆེ་བ་མཛད་ཡོད།གཞི་རྩའི་ཕྱི་ཚེས་ ༢ ནས་ཁ་སང་བར་ཉིན་གྲངས་བཞིའི་རིང་ཚོགས་པའི་ Science and Wisdom of Emotion ཞེས་ཚན་རིག་དང་སེམས་ཚོར་སྐོར་གྱི་ལྷན་ཚོགས་དེ་ནི་ཨ་རིའི་ནང་རྟེན་གཞི་བྱས་པའི་སེམས་དང་སྲོག་ལྟེ་གནས་ཁང་དང་། The Awake Network ཞེས་པའི་ཚོགས་པ་གཉིས་ཟུང་འབྲེལ་ཐོག་གོ་སྒྲིག་ཞུས་པ་ཞིག་ཆགས་ཀྱི་ཡོད་པ་དང་། ལྷན་ཚོགས་དེའི་ཐོག་རྒྱལ་སྤྱིའི་ཚན་རིག་མཁས་པ་དང་སློབ་དཔོན་སོགས་མི་སྣ་ ༣༠ ཙམ་ནས་འདས་པའི་ལོ་ ༢༠ ལྷག་གི་རིང་༸གོང་ས་མཆོག་དང་རྒྱལ་སྤྱིའི་ཚན་རིག་མཁས་པའི་དབར་འགྲོ་བ་མིའི་བཟང་སྤྱོ་དང་སེམས་ཚོར་གྱི་རྣམ་བཞག་སོགས་ཀྱི་ཐོག་གྲོས་བསྡུར་དཔྱད་ཞིབ་མཛད་པའི་གྲུབ་དོན་ཁག་གི་ཐོག་བགྲོ་གླེང་མཛད་ཡོད་པ་དང་། དེའི་ཁོངས་སུ་ཀླད་པའི་ཚན་རིག་པ་གྲགས་ཅན་སྐུ་ཞབས་ Richard Davidson ལགས་དང་སེམས་ཁམས་རིག་པའི་ཚན་རིག་པ་གྲགས་ཅན་སྐུ་ཞབས་ Daniel Goleman ལགས། དེ་བཞིན་༸སྐུའི་དབྱིན་སྐད་གསུང་སྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་དང་ཡོངས་དགེ་མི་འགྱུར་རིན་པོ་ཆེ་སོགས་ཕྱི་ནང་གི་མཁས་པ་མང་པོ་ཞིག་ནས་མཉམ་གནང་འདུག

དེ་རིང་ལྷོ་རྒྱ་ནག་གི་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བའི་ནང་དུ་ནེའུ་ཛ་ལན་ཌིའི་གྲོས་ཚོགས་ཀྱི་ནང་དུ་རྒྱ་ནག་གིས་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ངོས་འཛིན་གྱིས་གྲོས་ཚོགས་ཀྱི་དབུས་སུ་སྤྱི་མོས་ཀྱི་གྲོས་ཆོད་ཅིག་བཞག་འདུག རྩ་བའི་བདུན་ཕྲག་སྔོན་མའི་ནང་ནེའུ་ཛ་ལན་ཌི་ནང་གི་ཁ་གཏད་ཆབ་སྲིད་ཚོགས་པས་ཡུལ་དེའི་གྲོས་ཚོགས་ནང་དུ་རྒྱ་ནག་གི་ཤིན་ཅང་ཡུ་གུར་མང་ཚོགས་ཐོག་གདུག་རྩུབ་ཀྱི་བྱ་སྤྱོད་སྤེལ་བཞིན་པ་དེ་དག་མི་རིགས་རྩ་གཏོར་གྱི་བྱ་སྤྱོད་ཡིན་མིན་ཐོག་བགྲོ་གླེང་དགོས་པའི་གྲོས་ཆོད་ཁྱེར་ཡོད་པ་དང་འབྲེལ། བདུན་ཕྲག་འདིའི་ནང་གྲོས་འཆར་དེའི་ཐོག་བགྲོ་གླེང་གནང་རྒྱུར་ངང་སྒུག་བྱས་ཡོད་ཡོད་ཀྱང་། ཡུལ་དེའི་གྲོས་ཚོགས་ཀྱི་དབུས་སུ་གཞུང་འཛིན་ངལ་རྩོལ་ཚོགས་པའི་རྒྱ་ནག་གིས་ཡུ་གུར་མི་རིགས་སྡེབ་གསོད་བྱེད་ཀྱི་ཡོད་པར་རྒྱབ་སྐྱོར་མ་ཐོབ་པར་མཐར་མི་རིགས་སྡེབ་གསོད་ཀྱི་གནད་ཚིག་དེ་ཟུར་བཏོན་གྱིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པའི་གྲོས་ཆོད་བཞག་འདུག ཁ་སང་ཁུལ་དེའི་ཁ་གཏད་ཚོགས་པའི་ཚོགས་གཞོན་ལྕམ་ Brooke van Velden ལགས་ཀྱིས་གྲོས་ཚོགས་ཀྱི་དབུས་སུ་རྒྱ་ནག་གིས་ཡུ་གུར་མི་རིགས་ཀྱི་འགྲོ་བ་ཐོབ་ཐང་རྡོག་རོལ་དང་མི་རིགས་སྡེབ་གསོད་བྱེད་བཞིན་ཡོད་པའི་གྲོས་འཆར་གྱི་ཐོག་ཏུ་བགྲོ་གླེང་ལྷུག་པོ་བྱེད་མ་ཐུབ་པར་བློ་ཕམ་དང་སྦྲགས། ང་ཚོས་དཔྱོད་ཤེས་ཀྱིས་རྒྱ་ནག་གིས་ཡུ་གུར་མི་རིགས་སྡེབ་གསོད་བྱེད་ཀྱི་ཡོད་པར་ར་སྤྲོད་བྱུང་ཚེ། ང་ཚོས་ངོས་པར་དུ་དེ་གསལ་པོ་བཟོ་དགོས་པ་ཞིག་ཆགས་ཀྱི་ཡོད་པར་གསུངས་འདུག གསར་ཁང་གིས་གནས་ཚུལ་སྤེལ་བའི་ནང་དུ། གཞི་རྩའི་ཁུལ་དེའི་གཞུང་འཛིན་ཚོགས་པའི་གྲོས་ཚོགས་ཚོགས་འཐུས་མི་ཁག་ཅིག་གིས་རྒྱ་ནག་གིས་དངོས་སུ་ཡུ་གུར་མི་རིགས་སྡེབ་གསོད་བྱེད་སྲིད་པར་བློ་འཚབ་བྱེད་བཞིན་ཡོད་སྐོར་དང་འབྲེལ་ནས། ཁུལ་དེའི་ཕྱི་སྲིད་བློན་ཆེན་སྐུ་ཞབས་ Nanaia Mahuta ལགས་ཀྱིས་ཁ་སང་གསར་ལམ་ཁག་ཏུ་གསུངས་བ་ལྟར་ན། རྒྱ་ནག་གིས་ཡུ་གུར་མི་རིགས་ཀྱི་འགྲོ་བ་ཐོབ་ཐང་རྡོག་རོལ་འཚབ་ཆེན་བཏང་སྟེ་མི་མང་བཀག་བསྐྱིལ་དང་ངལ་རྩོལ་བསྒྱུར་བཀོལ་སོགས་བྱེད་ཀྱི་ཡོད་པར་དཔང་རྟགས་གསལ་པོ་ཡོད་ནའང་། མི་རིགས་སྡེབ་གསོད་བྱེད་ཀྱི་ཡོད་མེད་དེ་རྒྱལ་སྤྱིའི་ཁྲིམས་ལུགས་ལ་དཔྱད་ཞིབ་གང་ལེགས་བྱས་རྗེས་གཞི་ནས་གསལ་པོ་ཆགས་ཐུབ་པ་ཞིག་ཡིན་སྐོར་འགྲེལ་བརྗོད་གནང་འདུག གཞི་རྩའི་ནེའུ་ཛ་ལན་ཌི་རྒྱལ་ཁབ་ཀྱི་སྲིད་བློན་ལྕམ་སྐུ་ Jacinda Ardern ལགས་དངོས་སུ་གྲོས་ཚོགས་སུ་རྒྱ་ནག་གིས་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་བྱེད་བཞིན་པའི་ཐད་ནས་གྲོས་ཚོགས་སུ་བགྲོ་གླེང་བྱས་པའི་ཡུལ་དངོས་སུ་མེད་ཀྱང་། ཁོང་གིས་གསར་ལམ་ཁག་ཏུ་གནད་དོན་དེ་དང་འབྲེལ་བའི་ལན་འདེབས་གནང་བར་ཁུལ་དེའི་གྲོས་ཚོགས་ཀྱི་ནང་དུ་གྲོས་འཆར་དེར་རྒྱབ་སྐྱོར་ཐོབ་པར་ཁོང་དགའ་སྤྲོ་སྐྱེས་ནས་ཡོད་པར་གསུངས་འདུག གནད་དོན་དབྱེ་ཞིབ་པས་འགྲེལ་བརྗོད་བྱས་པ་ལྟར་ན། ནེའུ་ཛ་ལན་ཌི་གཞུང་འཛིན་ཚོགས་པའི་ཐེངས་འདིའི་གྲོས་འཆར་གྱི་ནང་དུ་མི་རིགས་སྡེབ་གསོད་ཀྱི་གནད་ཚིག་དེར་རྒྱབ་སྐྱོར་གྱིས་བགྲོ་གླེང་བྱེད་མ་ཐུབ་པ་དེ་ནི་ཁུལ་དེ་དང་རྒྱ་ནག་གཉིས་དབར་གྱི་ཚོང་འབྲེལ་ལ་རག་ལས་ཡོད་པ་ཞིག་ཡིན་སྐོར་འགྲེལ་བརྗོད་གནང་ཡོད་པ་ལྟར། ཁུལ་དེའི་ཚོང་འབྲེལ་བློན་ཆེན་གྱིས་ཁ་ཉིན་རེས་གཟའ་མིག་དམར་གྱི་ཉིན་གསར་ལམ་ཁག་ཏུ་འགྲེལ་བརྗོད་བྱས་པའི་ནང་། New Zealand གཞུང་འཛིན་ཚོགས་པས་མི་རིགས་སྡེབ་གསོད་ཀྱི་གནད་ཚིག་དེ་བེད་སྤྱོད་བཏང་བ་ཡིན་ན། རྒྱ་ནག་དེར་མི་དགའ་བ་མ་ཟད། གནད་དོན་དེའི་དབང་གིས་གསལ་པོར་རྟོགས་ཐུབ་པ་ཞིག་ནི་རྒྱལ་ཁབ་ཕྱོགས་གཉིས་དབར་གྱི་ཚོང་འབྲེལ་ལ་དོ་ཕོག་འགྲོ་རྒྱུ་ངེས་རེད་ཅེས་གསུངས་འདུག རྩ་བའི་དེང་སྐབས་ནེའུ་ཛ་ལན་ཌི་ཙམ་མ་ཟད། ཨིན་ཡུལ་དང་ཨོ་གླིང་། དེ་བཞིན་ཁེ་ན་ཌ་བཅས་རྒྱལ་ཁབ་ཁ་ཤས་ཀྱིས་གྲོས་ཚོགས་ནང་དུ་ཤིན་ཅང་གི་གནད་དོན་དེ་མི་རིགས་རྩ་གཏོར་གྱི་གནད་དོན་ཡིན་མིན་ཐོག་གླེང་སློང་གནང་བཞིན་པའི་ཁྲོད། ཨིན་ཡུལ་གྲོས་ཚོགས་ཀྱི་ངོས་ནས་གནད་དོན་དེ་མི་རིགས་རྩ་གཏོར་རང་ཡིན་པའི་གྲོས་ཆོས་བཞག་པ་མ་ཟད། ཨིན་ཡུལ་དང་ཡུ་རོབ་མཐུན་ཚོགས་ཀྱིས་ཨ་རི་དང་ཁེ་ན་ཌ་དང་ལྷན་དུ་ཤིན་ཅང་ནང་གི་འབྲེལ་ཡོད་དཔོན་རིགས་ཁག་ཅིག་ལ་སྲིད་དོན་ཉེས་ཆད་ཡང་བཅད་ཡོད་པ་རེད།