Monthly Archives: August, 2021

ཉན་པ།: Listen ཕབ་ལེན། Download རྒྱལ་བསྟན་དགེ་རྩ་སློབ་གྲྭའི་བསླབ་གཞི་ཁག་རྒྱ་སྒྱུར་གྱི་བཙན་བཀའ་བཏང་བ། སྲིད་སྐྱོང་མཆོག་གིས་ཁྱེད་ཚོའི་འདོད་པ་ཡོངས་བསྐང་དཀའ་ནའང་དགོས་མཁོ་དེ་བསྒྲུབ་ངེས་ཡིན་ཅེས་གསུངས་འདུག འགྲོ་བ་མིའི་ཐོབ་ཐང་རྡོག་རོལ་མཚམས་འཇོག་སླད་ཉི་ཧོང་གིས་རྒྱ་གཞུང་ལ་གནོན་ཤུགས་སྤྲོད་དགོས། རྒྱ་ནག་གིས་ལྷོ་རྒྱ་ནག་རྒྱ་མཚོ་ཁུལ་དུ་བཙན་ཤེད་དང་འཇིགས་སྐུལ་གྱི་བྱ་སྤྱོད་སྤེལ་བཞིན་པར་སྐྱོན་བརྗོད། གླུ་གཞས་ལས་རིམ། བསྟན་འཛིན་ཡོན་ཏན་ལགས་ཀྱིས་བླངས་པའི་དམ་བཅའ། Tuesday 24/08/2021 Tibetan school ordered to teach in Chinese or face shutdown Sikyong meets with Tibetan nomadic communities of Jhangthang, Ladakh Japanese foreign affairs chair wants more pressure on Beijing Olympics Harris rebukes China in major speech on Indo Pacific relations MUSIC FEATURE: ‘Dhamcha’ by Tenzin Yonten

ཁམས་དཀར་མཛེས་ཏྲེ་ཧོར་རོང་པ་ཚ་ས་ཁུལ་གྱི་རྒྱལ་བསྟན་དགེ་རྩ་སློབ་གྲྭར་ཟླ་བ་སྔོན་མའི་ནང་རྒྱ་ནག་གིས་བཙན་བཀའ་བཏང་སྟེ། དགེ་རྒན་རྣམས་ཀྱིས་སློབ་གྲྭ་དེའི་བསླབ་གཞི་ཁག་རྒྱ་ཡིག་གི་ལམ་ནས་སློབ་ཁྲིད་བྱེད་དགོས་བ་དང་། དགེ་རྒན་རྣམས་ཀྱིས་རྒྱ་ནག་གི་བཀའ་ལྟར་མ་སྒྲུབ་ན་སློབ་གྲྭ་སྒོ་རྒྱག་རྒྱུ་ཡིན་པའི་འཇིགས་སྐུལ་བྱས་འདུག དེ་ཡང་ཁ་སང་བོད་གནས་ལྟ་ཞིབ་ཁང་གིས་གནས་ཚུལ་སྤེལ་བའི་ནང་དུ། འདི་ལོའི་ཟླ་བ་བདུན་པའི་ཟླ་འགོར་རྒྱ་ནག་དམར་ཤོག་སྲིད་གཞུང་གི་ཁུལ་དེའི་འབྲེལ་ཡོད་དཔོན་རིགས་ཀྱིས་རྒྱལ་བསྟན་དགེ་རྩ་སློབ་གྲྭར་བཙན་བཀའ་བཏང་སྟེ། སློབ་གྲྭ་དེའི་བསླབ་གཞིའི་གཙོ་རྒྱུགས་ཀྱི་སྐད་ཡིག་དེ་རྒྱ་ཡིག་འཇོག་དགོས་བ་མ་ཟད། ཡིག་རྒྱུགས་ཀྱང་རྒྱ་ཡིག་གི་ལམ་ནས་གཏོང་དགོས་བར་བཙན་སྐུལ་གྱིས། རྒྱ་ནག་གི་བཀས་བཀོད་ལྟར་མ་སྒྲུབ་ཚེ་སློབ་གྲྭ་དེ་འཕྲལ་དུ་སྒོ་རྒྱག་རྒྱུ་ཡིན་སྐོར་གྱིས་འཇིགས་སྐུལ་བྱས་ཡོད་པར་བཀོད་འདུག རྒྱལ་བསྟན་དགེ་རྩ་སློབ་གྲྭ་ནི་ཕྱི་ལོ ༡༩༩༤ ལོར་བླ་མ་རྒྱལ་མཚན་བྱམས་པ་ལགས་ཀྱིས་གསར་འཛུགས་གནང་བ་ཞིག་ཡིན་ཞིང་། སློབ་གྲྭ་དེར་བོད་ཀྱི་སློབ་ཕྲུག་རྣམས་ལ་རྒྱ་བོད་དབྱིན་གསུམ་གྱི་གཙོ་བྱས་པའི་འཚེམ་བཟོ་དང་རི་མོ་སོགས་ཀྱི་ལག་ཤེས་ཀྱི་སློབ་སྦྱོང་སྣ་མང་ཞིག་སྤྲོད་བཞིན་ཡོད་པ་དང་། ད་ལྟའི་བར་དུ་སློབ་གྲྭ་དེ་ནས་བོད་ཀྱི་སློབ་མ་ ༦༠༠ ལྷག་དངོས་སུ་སློབ་མཐར་ཕྱིན་ཡོད་པ་མ་ཟད། སློབ་ཁྲིད་ཀྱི་དགེ་རྒན་ཡང་༣༥ ལྷག་ཡོད་པ་ལྟར་ལོ་རེར་སློབ་འཇུག་གསར་དུ་བྱེད་མཁན་གྱི་སློབ་མའི་གྲངས་ཚད་ཀྱང་མང་དུ་འཕེལ་བཞིན་ཡོད་པ་ལྟར། ཟི་ཁྲོན་ཞིང་ཆེན་སྤྱི་ཚོགས་ནུས་པ་ལྡན་པའི་སློབ་འཛུགས་སྔོན་ཐོན་མི་སྣའི་བྱ་དགའ་ཞེས་པ་ཡང་སྤྲད་པ་རེད།འདི་གས་གསར་འགོད་པས་བཞུགས་སྒར་ཁུལ་གྱི་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་སུ་ཐེངས་འདིར་རྒྱ་ནག་གིས་བཙན་བཀའ་བཏང་་བའི་རྒྱལ་བསྟན་དགེ་རྩ་སློབ་གྲྭ་དང་འབྲེལ་བའི་གནས་ཚུལ་སྐོར་ནས་བཀའ་འདྲི་ཞུས་པར་ཁོང་གིས་རྒྱ་ནག་གིས་བོད་ཁུལ་དུ་སྲིད་བྱུས་སྣ་མང་ཞིག་ལག་བསྟར་གྱིས་བོད་ཀྱི་སྐད་ཡིག་སློབ་ཁྲིད་དང་སློབ་སྦྱོང་གི་ཁོར་ཡུག་ལ་ཚོད་འཛིན་གྱིས་སྐད་ཡིག་རྩ་མེད་བཟོ་བཞིན་པར་བརྟེན་ནས་བོད་ཁུལ་གྱི་བོད་སྐད་ཡིག་རྒྱ་བསྒྱུར་གྱི་ལས་གཞི་དེ་ནི་བོད་ས་ཡོངས་རྫོགས་རྒྱ་ནག་གི་ངོ་བོར་བསྒྱུར་རྒྱུའི་ལས་གཞི་ཆེན་པོ་ཞིག་ཡིན་ཚུལ་དང་འབྲེལ་ནས། དངོས་སུ་བོད་ཁུལ་ནས་ཤེས་ཡོན་སློབ་གསོའི་སྒང་ནས་སྤྱི་ཚོགས་ཀྱི་ནང་དུ་ནུས་བ་ཆེན་པོ་ཐོན་བཞིན་པའི་སྒེར་གཉེར་གྱི་སློབ་གྲྭ་ཁག་མང་པོ་ཞིག་སྒོ་རྒྱག་བཞིན་པར་ངོ་སྤྲོད་གནང་སོང་།གཞི་རྩའི་འདི་ལོར་གསར་དུ་གནས་ཚུལ་ཐོན་པ་ལྟར་ན་རྒྱ་ནག་གི་ཤེས་རིག་ལྷན་ཁང་ཟེར་བས་ཡོངས་གྲགས་ཀྱིས་གནས་ཚུལ་སྤེལ་བའི་ནང་དུ། སྔ་ལོར་ལོ་ལྔ་ཚན་བཅུ་བཞི་བའི་ཚོགས་འདུ་སྐབས་གཏན་འཁེལ་བྱས་པ་ལྟར། འབྱུང་འགྱུར་གྱི་ཕྱི་ཟླ་ ༩ པ་ནས་བཟུང་རྒྱ་ནག་གི་ཞིང་ཆེན་དང་རང་སྐྱོང་ས་ཁུལ། གྲོང་སྡེ་ཁག་སོགས་ནས་ཞི་ཅིན་ཕིང་གིས་རྒྱ་ནག་ནང་གི་སྐད་ཡིག་སློབ་གསོའི་ཐད་གནང་བའི་ལམ་སྟོན་དང་དགོངས་པར་སློབ་སྦྱོང་ཡང་དག་ཟེར་བ་ལག་བསྟར་ཡོང་སླད། གྲངས་ཉུང་མི་རིགས་ས་ཁུལ་དང་གྲོང་གསེབ་ས་ཁུལ་གྱི་བྱིས་པ་རྣམས་ལ་རྒྱ་སྐད་རྒྱ་ཡིག་སློབ་ཁྲིད་ཀྱིས། ཆུང་དུས་ནས་རྒྱའི་སྐད་ཡིག་གི་བག་ཆགས་ཟབ་མོ་བཞག་སྟེ། མི་སྒེར་འཕེལ་རྒྱས་དང་རིག་རྩལ་ལྡན་པ་ཞིག་ཏུ་བཟོས་པ་བརྒྱུད་གྲོང་གསེབ་གོང་འཕེལ་དང་། ཀྲུང་ཧཱ་མི་རིགས་ཆེན་མོའི་གཞིས་ཁྱིམ་སྲ་བརྟན་གྱི་འདུ་ཤེས་ཡོད་མཁན་ཟེར་བ་ཞིག་ཏུ་བསྒྱུར་དགོས་སྐོར་བསྒྲགས་ཡོད་པ་ལྟར་ད་ཆ་དངོས་སུ་སྲིད་བྱུས་དེ་ལག་བསྟར་གྱིས་ཉེ་ལམ་ཟླ་བ་སྔོན་མའི་ནང་དུ་དངོས་སུ་མདོ་སྨད་མགོ་ལོག་ཁུལ་གྱི་སེང་འབྲུག་སྟག་རྩེ་སློབ་གྲྭ་ཞེས་པ་དེ་སྒོ་རྒྱབ་པ་མ་ཟད་དེར་འབྲེལ་གྱི་བོད་ཡིག་དགེ་རྒན་ཞིག་ཀྱང་རྒྱ་ནག་གིས་འཛིན་བཟུང་བཙན་ཁྲིད་བྱས་ཡོད་པ་རེད། གནད་དོན་དེ་དང་འབྲེལ་ནས་པདྨ་རྒྱལ་ལགས་ཀྱིས་འདི་ལོའི་སློབ་སྐབས་གསར་བ་འགོ་བཙུགས་པ་ནས་བཟུང་རྒྱ་ནག་གིས་རྒྱ་ནག་རྒྱལ་ཡོངས་དང་སྒོས་སུ་བོད་ཁུལ་དུ་རྒྱ་ནག་གི་སྤྱི་སྐད་གཙོར་འཛིན་ཞེས་པའི་སྲིད་བྱུས་འོག་བསླབ་གཞིའི་མ་སྐད་དེ་རྒྱ་ཡིག་བཞག་ཡོད་པ་དང་འབྲེལ་ནས་བྱིས་པ་ཆུང་ཆུང་ནས་རྒྱ་ནག་གི་སྐད་ཡིག་དང་རིག་གཞུང་གི་ཤན་ཤུགས་ཐེབས་ཐབས་སུ་སྲིད་བྱུས་དེ་འདྲ་ཞིག་ལག་བསྟར་བྱེད་བཞིན་ཡོད་པར་མངོན་གསལ་གནང་སོང་།གཞི་རྩའི་ཁམས་དཀར་མཛེས་ཏྲེ་ཧོར་རོང་པ་ཚ་ས་ཁུལ་གྱི་རྒྱལ་བསྟན་དགེ་རྩ་སློབ་གྲྭ་དེ་གསར་འཛུགས་གནང་མཁན་གྱི་བླ་མ་རྒྱལ་མཚན་བློ་བཟང་བྱམས་པ་ལགས་ནི་ཕྱི་ལོ་ ༡༩༤༩་ལོར་དགུང་ལོ་གསུམ་གྱི་སྟེང་རྒྱ་ནག་གིས་ས་བགོས་བྱས་པའི་ཁམས་དཀར་མཛེས་བོད་རིགས་རང་སྐྱོང་ས་ཁུལ་གྱི་ཏྲེ་ཧོར་བཀྲ་ཤིས་དར་རྒྱས་དགོན་པའི་བླ་མ་རྒྱལ་མཚན་རིན་པོ་ཆེ་མཆོག་གི་ཡང་སྲིད་དུ་ངོས་འཛིན་གནང་བ་བརྒྱུད་ནས། ཁོང་གི་མཐུན་འགྱུར་རོགས་རམས་ཁྲོད་སློབ་གྲྭ་དེ་གསར་འཛུགས་ཀྱིས་བོད་རིགས་སློབ་མ་རྣམས་ལ་རིན་མེད་ཀྱིས་ཤེས་ཡོན་སློབ་སྦྱོང་སྤྲོད་བཞིན་པ་ཞིག་ཆགས་ཡོད་པ་དང་། ཁོང་ད་ཆ་རྒྱ་ནག་གི་རྒྱལ་ཡོངས་མི་མང་འཐུས་མི་ལྷན་ཚོགས་ཀྱི་ཚོགས་མི་ཞིག་དང་ཟི་ཁྲོན་ནང་བསྟན་ལྷན་ཚོགས་ཀྱི་ཚོགས་གཞོན་ཡང་ཆགས་ཡོད་འདུག རྩ་བའི་ཉེ་སྔོན་Financial Times ཞེས་པའི་གསར་ཁང་གིས་རྒྱ་ནག་ནང་གི་སྒེར་གཉེར་སློབ་གྲྭའི་གནས་ཚུལ་རྒྱུས་ལོན་བྱས་པའི་ནང་དུ། རྒྱ་ནག་གི་ནང་དུ་མ་མཐའ་ཡང་སྒེར་གཉེར་སློབ་གྲྭ་འབུམ་གཉིས་མ་ཟིན་ཙམ་ཡོད་པ་དང་། དེ་དག་གི་ཁོངས་སུ་སྒེར་གཉེར་གྱི་སློབ་གྲྭ་འགྲིམས་མཁན་གྱི་སློབ་མའི་གྲངས་ཚད་ས་ཡ་ ༥༦ ཙམ་ཟིན་ཡོད་པར་ཤེས་རྟོག་བྱུང་ཡོད་ནའང་། ད་ཆ་རྒྱ་ནག་ནང་གི་སྒེར་གཉེར་གྱི་སློབ་གྲྭ་ཁག་སྲིད་གཞུང་གི་བཀའ་རྒྱའི་འོག་ཡོངས་སུ་སྒོ་རྒྱག་རྒྱུ་ཡིན་པར་འཁོད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་རྒྱ་གར་བྱང་ཕྱོགས་ལ་དྭགས་ཁུལ་གྱི་གཞུང་འབྲེལ་ཕྱོགས་ཕེབས་ཁྲོད་ཁ་ཉིན་སྲིད་སྐྱོང་མཆོག་གིས་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་བརྒྱ་ཤོག་དང་པོ་ནས་བརྒྱ་ཤོག་དགུ་པ་བར་གྱི་གཞིས་གྲོང་རིམ་པར་འཚམས་གཟིགས་གནང་བ་དང་འབྲེལ་ཏེ་བརྒྱ་ཤོག་སོ་སོའི་སྤྱི་ཁང་དུ་མི་མང་དང་མཇལ་འཕྲད་གནང་འདུག་པ་མ་ཟད། སྲིད་སྐྱོང་མཆོག་སྔ་ལོ་ཕྱི་ལོ་ ༢༠༢༠ ལོར་བྱང་ཐང་ཆུ་ཤུལ་དང་བྱང་ཐང་མ་ཁྱུ་ནས་ཁྱིམ་ཚང་ ༥༣ ལ་གསོལ་སྩལ་གནང་བའི་ས་ཆ་གསར་པར་ཆེད་ཕེབས་ཀྱིས་མང་ཚོགས་དང་མཇལ་མོལ་གནང་ཡོད།དེ་སྔ་ཞིང་འབྲོག་གཉིས་ལ་བརྟེན་མཁན་བྱང་ཐང་ཆུ་ཤུལ་གྱི་ཡར་འཕེལ་དངོས་གྲུབ་གླིང་དང་བྱང་ཐང་མ་ཁྱུའི་མང་ཚོགས་ནས་མི་ལོ་ ༢༠ སྔོན་ནས་ལ་སྤྱི་དང་བོད་མིའི་སྒྲིག་འཛུགས། དེ་བཞིན་སྤྱི་འཐུས་རིམ་པར་འཚོ་བའི་གནས་སྟངས་ཀྱི་འགྱུར་ལྡོག་ལ་གཞིགས་ཏེ་བྱང་ཐང་ནས་གླེའི་ཁུལ་དུ་གནས་སྤོ་བྱ་རྒྱུའི་ས་ཆ་སྐྱབས་འཇུག་གནང་སྐྱོང་ཡོང་བའི་གསོལ་འདེབས་རིམ་ཁག་ཞུས་དོན་ལྟར་སྔ་ལོ་ ༢༠༢༠ ལོར་བྱང་ཐང་གི་བོད་མིའི་འདུས་སྡོད་གཉིས་པོ་དང་ཁ་འཐོར་བྱང་ཐང་ནས་ཁང་ཁྱིམ་མེད་པའི་གྲོང་པ་ཁག་ཅིག་ལ་ཨག་གླིང་བརྒྱ་ཤོག་བརྒྱད་པ་དང་དགུ་པ་བར་ལ་གསོལ་སྩལ་གནང་བའི་ས་ཆ་གསར་པར་འཚམས་གཟིགས་དང་མང་ཚོགས་ཀྱི་འཚོ་བའི་དཀའ་ངལ་སོགས་ཀྱི་ཐད་ལ་བཀའ་བསྡུར་གནང་འདུགགསར་འགོད་པས་སྲིད་སྐྱོང་མཆོག་ས་ཆ་གསར་པར་འཚམས་གཟིགས་གནང་བའི་གནད་དོན་དང་འབྲེལ་ནས་བྱང་ཐང་ཆུ་ཤུལ་གྱི་ཡར་འཕེལ་དངོས་གྲུབ་གླིང་གྱི་འགོ་བ་སྐལ་བཟང་ཚེ་རིང་ལགས་སུ་ཞལ་པར་བརྒྱུད་སྲིད་སྐྱོང་མཆོག་གིས་སྐབས་དེར་བཀའ་སློབ་གཙོ་བོ་གང་གནང་ཡོད་དམ་ཞེས་བཀའ་འདྲི་ཞུས་སྐབས་མང་ཚོགས་ནས་བྱང་ཐང་ས་ཁག་གཉིས་ལ་གསོལ་སྩལ་གནང་བའི་ས་ཆའི་སྟེང་མ་འོངས་པར་ཁང་ཁྱིམ་འཛུགས་སྐྲུན་བྱ་སླད་དེ་སྔ་ནས་བོད་མིའི་སྒྲིག་འཛུགས་ལ་རོགས་རམ་སྐྱབས་འཇུག་རིམ་ཞུས་ལྟར་ད་རེས་སླར་སྲིད་སྐྱོང་མཆོག་ལའང་ཡིག་ངག་གཉིས་ཐོག་ནས་གསོལ་འདེབས་ཞུས་དོན་བཞིན་སྲིད་སྐྱོང་མཆོག་གིས་ཁྱེད་ཚོའི་འདོད་པ་ཆ་ཚང་བསྐང་ཐུབ་རྒྱུ་དཀའ་ནའང་དགོས་མཁོ་གང་ཡིན་དེ་དག་ངེས་པར་དུ་བསྒྲུབ་རྒྱུར་འབད་བརྩོན་གནང་ངེས་ཀྱི་ཞལ་བཞེས་གནང་ཡོད་སྐོར་གསུངས་སོང་། གཞི་རྩའི་སྲིད་སྐྱོང་སྤེན་པ་ཚེ་རིང་མཆོག་ལ་དྭགས་སུ་ཆེད་ཕེབས་གནང་ནས་དེ་རིང་ཉིན་གྲངས་བཞི་པ་དེ་ཆགས་ཀྱི་ཡོད་པ་དང་། དེ་རིང་ཕྱི་ཚེས་ ༢༤ ནས་ཕྱི་ཚེས་ ༢༧ བར་བོད་རིགས་གནས་སྡོད་གནང་ཡུལ་བྱང་ཐང་ས་ཁག་ཏུ་འཚམས་གཟིགས་གནང་གི་ཡོད་པ་རེད།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཁ་སྔོན་ཕྱི་ཚེས་ ༢༠ ཉིན་ལ་དྭགས་སུ་ཕེབས་འབྱོར་བྱུང་བ་དང་བསྟུན་དེ་རིང་སྲིད་སྐྱོང་མཆོག་གིས་ལ་དྭགས་ས་གནས་ཀྱི་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་འདུག དེ་རིང་སྔ་དྲོ་སྲིད་སྐྱོང་སྤེན་པ་ཚེ་རིང་མཆོག་ལ་རྒྱ་གར་གྲོས་ཚོགས་ཀྱི་འཐུས་མི་ཟུར་པ་དང་ལ་དྭགས་ནང་པ་ཚོགས་པའི་ཚོགས་གཙོ་གཅིག་ལྕོགས་སྐུ་ཞབས་ཐུབ་བསྟན་ཚེ་དབང་ལགས་ཀྱིས་གཟིམ་ཤག་ཏུ་ཆེད་མངགས་མགྲོན་འབོད་ཞུས་འདུག་པ་དང་། མཇལ་འཕྲད་དེ་གྲུབ་མཚམས་སུ་ལ་དྭགས་ནང་པ་ཚོགས་པས་ཇོ་ཁང་གི་མདུན་ནས་དགོན་པའི་ནང་སྲིད་སྐྱོང་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད། དེ་རིང་ཉིན་རྒྱབ་སྲིད་སྐྱོང་མཆོག་རྒྱ་གར་གྲོས་ཚོགས་ཀྱི་འཐུས་མི་སྐུ་ཞབས་འཇམ་དབྱངས་ཚེ་རིང་རྣམ་རྒྱལ་ལགས་དང་མཇལ་འཕྲད་གནང་སྟེ་སྲིད་སྐྱོང་མཆོག་གིས་ཁོང་ལ་ད་བར་བོད་དོན་དང་ལྷག་པར་དུ་བོད་མིའི་བདེ་སྡུག་ལ་མཐུན་འགྱུར་ལྷག་བསམ་རྣམ་དག་གིས་རྒྱབ་སྐྱོར་ཤུགས་ཆེར་གནང་བ་དང་། ཁོང་དེ་སྔ་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐབས་ཀྱི་དུས་ཡུན་ཁྲོད་ལ་དྭགས་སུ་གནས་སྡོད་བྱེད་མཁན་གྱི་བོད་མིར་རྒྱབ་སྐྱོར་ཤུགས་ཆེར་གནང་ཡོད་པ་བཅས་ལ་བོད་མིའི་སྒྲིག་འཛུགས་ཀྱི་ངོས་ནས་ཐུགས་རྗེ་ཆེ་ཞུས་གནང་འདུག གཞི་རྩའི་སྲིད་སྐྱོང་མཆོག་ད་རེས་ལ་དྭགས་བོད་མིའི་འདུས་སྡོད་དུ་ཕྱོགས་ཕེབས་གནང་བ་དེ་ནི་བོད་མིའི་གནས་སྡོད་དུ་གཞུང་འབྲེལ་འཚམས་གཟིགས་གནང་བ་ཆེས་ཐོག་མ་དེ་ཆགས་ཀྱི་ཡོད་པ་དང་། ད་བར་གྱི་ལ་དྭགས་ཀྱི་གཞུང་འབྲེལ་འཚམས་གཟིགས་ཁྲོད་སྲིད་སྐྱོང་མཆོག་གིས་ལ་སྤྱི་གཙོས་ས་གནས་འཐུས་ཚོགས་དང་། ལ་བྱང་གཉིས་ཀྱི་ས་གནས་རང་བདེན་ཚོགས་ཆུང་། ས་གནས་ཁྲིམས་ཞིབ་ཁང་། ཡན་ལག་སྨན་རྩིས་ཁང་།  ས་གནས་འཕྲོད་བསྟེན་སྨན་ཁང་། དགོན་སྡེ་ཁག མཉམ་འབྲེལ། དེ་བཞིན་ལ་དྭགས་བོད་ཁྱིམ་སློབ་གྲྭའི་རྒས་གསོ་ཁང་ལ་འཚམས་གཟིགས་གནང་ཡོད་པ་མ་ཟད། ལྷག་པར་དུ་ལ་དྭགས་བསོད་ནམས་གླིང་གཞིས་ཆགས་ཀྱི་གཞིས་གྲོང་ཁག་ལ་འཚམས་གཟིགས་སུ་ཕེབས་སྐབས་ཆེས་ཐོག་མར་འདས་ལོར་འཕགས་བོད་གཉིས་ཀྱི་ས་མཚམས་སུ་འབར་རྫས་གས་གཏོར་གྱི་དོན་རྐྱེན་ཁྲོད་འདས་གྲོངས་སུ་གྱུར་བའི་བོད་པའི་དྭང་སློབ་རུ་ཁག་ཨང་བདུན་པའི་མེ་ཏོག་གཉིས་ཅན་གྱི་བརྒྱ་དཔོན་སྐུ་གཤེགས་དམ་པ་ཉི་མ་བསྟན་འཛིན་ལགས་ཀྱི་རྗེས་ཤུལ་ནང་མིར་བརྩི་བཀུར་དང་ཆེ་མཐོང་མཚོན་ཕྱིར་འདས་པོ་ཁོང་གི་ཁྱིམ་དུ་ཕེབས་ཏེ་ནང་མི་དང་ལྷན་མཇལ་འཕྲད་གནང་ཡོད།སྲིད་སྐྱོང་མཆོག་གིས་ཕྱི་ཚེས་ ༢༠ ཉིན་གྱི་ཕྱི་དྲོར་བོད་ཕྲུག་ཁྱིམ་སྡེའི་དགེ་ལས་སློབ་ཕྲུག་ཡོངས་དང་མཇལ་འཕྲད་ཀྱིས་ཁོང་གིས་སྲིད་སྐྱོང་གི་ཐུགས་འགན་བཞེས་པ་ནས་བཟུང་ད་རེས་སློབ་གྲྭར་གསུང་བཤད་གནང་བ་དེ་ཐོག་མ་ཆགས་ཀྱི་ཡོད་པ་དང་སྤྱིར་ཁོང་ཉིད་གང་དུ་ཕེབས་ཚེ་དམིགས་བསལ་བོད་པའི་གཞོན་སྐྱེས་ཚོར་མཇལ་འཕྲད་གནང་རྒྱུར་འབད་བརྩོན་གནང་གི་ཡོད་སྟབས། ད་རེས་ལ་དྭགས་ཁུལ་གྱི་འཚམས་གཟིགས་ཀྱི་མཛད་རིམ་བཟོ་སྐབས་སུ་དམིགས་བཀར་བོད་ཕྲུག་ཚོ་དང་ལྷན་མཇལ་འཕྲད་གནང་རྒྱུའི་ལས་རིམ་བང་སྒྲིག་ཡོད་པར་གསུངས་ཡོད།སྲིད་སྐྱོང་མཆོག་གིས་ད་ཆ་བཙན་བྱོལ་ནང་བོད་པའི་སློབ་གྲྭ་དང་དགོན་སྡེ་ཁག བོད་མིའི་གཞིས་སྒར་ཆེད་འཛུགས་གནང་ཐུབ་པ་དེ་དག་གཙོ་བོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ལ་བརྟེན་ནས་བྱུང་བ་ཞིག་དང་། གལ་ཏེ་བོད་མི་རྣམས་རྒྱ་གར་ནང་གཅིག་པུ་ཡོང་བའི་དབང་དུ་བཏང་ན་རྒྱ་གར་ནང་ཁ་འཐོར་ཏེ་བོད་བརྒྱུད་ནང་བསྟན་དང་བོད་ཀྱི་རིག་གཞུང་ཕར་ཟད་བོད་ཀྱི་སྐད་ཡིག་ཡང་སྲུང་སྐྱོབ་གནང་ཐུབ་རྒྱུ་ཁག་པོ་ཆགས་ཡོད་པ་དང་། ལྷག་དོན་༸གོང་ས་མཆོག་དེ་སྔ་རྒྱ་གར་ནང་༸ཞབས་སོར་མ་འཁོད་གོང་རྡོ་རྗེ་གླིང་དང་ཀ་སྦུག་གཉིས་ལ་བོད་མི་ཕྲན་བུ་ཡོད་པ་དང་། ས་ཁུལ་དེ་དག་ལ་ཡོད་པའི་བོད་མི་རྣམས་བོད་ལ་ཕྱིར་ལོག་གནང་རྒྱུའི་བཀའ་མོལ་གོ་རྒྱུ་ཡོད་པ་དང་ཆབས་ཅིག    གལ་ཏེ་སྐབས་དེ་དུས་༸གོང་ས་མཆོག་རྒྱ་གར་ནང་ཆིབས་བསྒྱུར་བསྐྱངས་མེད་ཚེ་བོད་མི་དེ་དག་བོད་ལ་ཕྱིར་ལོག་གནང་རྒྱུར་ཉེན་ཁ་ལྟ་བུ་ཆགས་ཡོད་སྟབས། ང་ཚོས་གནས་སྟངས་དེ་གཅིག་པུར་བལྟས་པ་ཡིན་ན་ ༸གོང་ས་མཆོག་ཇི་ཙམ་གྱི་བོད་མི་རྣམས་ལ་བཀའ་དྲིན་ཆེན་པོ་ཡིན་པ་ཚོར་ཐུབ་ངེས་རེད་ཅེས་གསུངས་ཡོད།སྲིད་སྐྱོང་མཆོག་གིས་༸གོང་ས་མཆོག་གི་དབུ་ཁྲིད་འོག་བོད་མི་རྣམས་ཀྱི་གནས་སྟངས་དང་བོད་མི་རྣམས་ནས་བོད་ཀྱི་ཆོས་དང་རིག་གཞུང་། སྐད་ཡིག་སོགས་བདག་ཉར་ཇི་ལྟར་གནང་མིན་སྐོར་དང་། དབུ་མའི་ལམ་དང་བོད་ཀྱི་རྒྱལ་རབས་ལོ་རྒྱུས་ཐད་སློབ་སྦྱོང་གནང་གལ་ཡིན་སྐོར་གསུང་བཤད་གནང་འདུག་པ་མ་ཟད།  ང་ཚོ་ཚང་མ་བོད་ཀྱི་མགྲིན་ཚབ་པ་ཞིག་ཆགས་ཀྱི་ཡོད་པ་དང་མགྲིན་ཚབ་པ་ཚད་ལྡན་ཞིག་ཆགས་པར་བོད་ཀྱི་ལོ་རྒྱུས་ཀྱི་གནས་བབ་ཤེས་དགོས་གལ་ཡིན་སྐོར་སོགས་ཀྱི་གསུང་བཤད་གནང་ཡོད།

ཉན་པ།: Listen ཕབ་ལེན། Download སྲིད་སྐྱོང་མཆོག་གིས་ལ་དྭགས་ས་གནས་ཀྱི་གནད་ཡོད་མི་སྣ་དང་མཇལ་འཕྲད། རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་ཚོགས་ཆེན་ཐེངས་ལྔ་པ་དབུ་འཛུགས། ཨོ་གླིང་གིས་ངལ་རྩོལ་སྒྱུར་བཀོལ་གྱི་དངོས་ཟོག་བཀག་སྡོམ་གྱི་ཁྲིམས་གཏན་འབེབས། བོད་རིགས་ན་གཞོན་ཚོས་རྒྱ་གར་གྱི་གཞོན་སྐྱེས་ཚོ་དང་འབྲེལ་བ་གནང་གལ་ཆེ། འཕགས་བོད་ས་མཚམས་ས་ཁུལ་གྱི་རྫོང་ཁག་ཉེར་གཅིག་རྒྱ་གཞུང་གི་ཐད་ཀར་སྟངས་འཛིན་འོག་ཡོད་བཤད་པ། Monday 23/08/2021 Sikyong meets MP Jamyang Tsering Namgyal and LBA President in Ladakh Tibetan Refugee Traders Association holds 5th General Body Meet in Ludhiana Tibet’s 21 border counties under direct supervision, aid from Beijing: Wu Yingjie Australian Senate passes bill banning imports made using forced labour Close relation with Indian youth important: Long time Tibet supporter visits MT

དེ་རིང་ཨོ་གླིང་གི་གྲོས་ཚོགས་གོང་མའི་ནང་དུ། ངལ་རྩོལ་སྒྱུར་བཀོལ་བྱས་བའི་དངོས་ཟོག་ཐོན་སྐྱེད་རིགས་གང་ཡང་ཨོ་གླིང་གི་རྒྱལ་ཁབ་ཏུ་གཏོང་རྒྱུ་མིན་པར་བཀག་སྡོམ་བྱེད་རྒྱུའི་གྲོས་འཆར་ཞིག་གཏན་འབེབས་གནང་ཡོད་པ་དང་། གྲོས་ཆོད་ཐོག་རྒྱལ་ཁབ་ཀྱི་མིང་གསལ་སྟོན་བྱས་མེད་ཀྱང་། དེ་ནི་གཙོ་བོ་རྒྱ་ནག་གིས་ཤིན་ཅང་ནང་གི་ཡུ་གུར་མི་རིགས་ཚོར་འཛིན་པའི་སྲིད་བྱུས་ལ་དམིགས་བཀར་བྱས་པ་ཞིག་ལ་ངོས་འཛིན་བྱེད་ཀྱི་ཡོད་པ་རེད་འདུགཐེངས་འདིའི་གྲོས་འཆར་དེ་ནི་ཨོ་གླིང་གི་གྲོས་ཚོགས་གོང་མའི་འཐུས་མི་སྐུ་ཞབས་ Rex Patrick ལགས་ཀྱིས་དེ་རིང་གྲོས་ཚོགས་གོང་མའི་དབུས་སུ་ཆེད་འདོན་གནང་བ་ཞིག་ཡིན་པ་དང་།  ཨོ་གླིང་སྲིད་གཞུང་གིས་ཁྲིམས་འཆར་དེ་དངོས་སུ་ལག་བསྟར་བྱེད་རྒྱུར་གྲོས་ཆོད་དེ་གྲོས་ཚོགས་འོག་མའི་ནང་དུའང་གཏན་འབེབས་ཐུབ་པ་དགོས་ཀྱི་ཡོད་པ་རེད། རྩ་བའི་སྐུ་ཞབས་ Patrick ལགས་ཀྱིས་རྒྱ་ནག་གཞུང་གིས་ཤིན་ཅང་ནང་དུ་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གྱིས་ཡུ་གུར་བ་ ས་ཡ་བརྒལ་བར་བཙན་དབང་གིས་ངལ་རྩོལ་སྒྱུར་བཀོལ་བྱེད་བཞིན་པའི་གནད་དོན་དང་འབྲེལ་ནས་གྲོས་ཆོད་དེ་ཆེད་འདོན་གནང་ཡོད་ཀྱང་། གྲོས་ཚོགས་ཀྱི་ཚོགས་ཆུང་ཞིག་གིས་དེའི་ནང་དུ་ས་ཁོངས་དང་རྒྱལ་ཁོངས་སོགས་དམིགས་སུ་བཀར་ནས་འགྲེལ་བརྗོད་བྱ་མི་དགོས་བའི་གྲོས་མཐུན་བྱུང་བ་ལྟར། དེ་རིང་གྲོས་ཚོགས་སུ་གྲོས་ཆོད་དེ་དངོས་སུ་ཆེད་འདོན་གནང་སྐབས། དེའི་ནང་དུ་རྒྱ་ནག་དམིགས་བསལ་མིང་བཏོན་བྱས་མེད་ཀྱང་། གྲོས་ཚོགས་ཀྱི་བགྲོ་གླེང་སྐབས་སུ་རྒྱ་ནག་གི་དབང་ཆ་གཅིག་སྡུད་ཀྱི་སྲིད་དབང་དང་འབྲེལ་ནས་སྐྱོན་བརྗོད་གནང་མཁན་ཤུགས་ཆེར་བྱུང་འདུག སྐུ་ཞབས་ Patrick ལགས་ཀྱིས་གྲོས་ཚོགས་གོང་མའི་ནང་ད་རེས་གྲོས་ཆོད་དེ་དངོས་སུ་གཏན་འབེབས་ཐུབ་པ་དེ་ནི་རྒྱལ་སྤྱིའི་འབད་བརྩོན་གྱི་ཐོག་ནས་དེང་རབས་ཀྱི་བྲན་གཡོག་ལམ་ལུགས་ལ་གདོང་ལེན་བྱེད་རྒྱུའི་གོམ་སྟབས་གལ་ཆེན་ཞིག་ཡིན་པར་ཡོངས་གྲགས་ཀྱིས། གྲོས་ཚོགས་འོག་མས་ཀྱང་ཐེངས་འདིའི་གྲོས་འཆར་དེར་རྒྱབ་སྐྱོར་གནང་རྒྱུའི་འགན་འཁྲི་ཡོད་པ་དང་། ཨོ་གླིང་གྲོས་ཚོགས་ཀྱི་ངོས་ནས་ཤུགས་སྣོན་གྱིས་གྲོས་འཆར་དེ་ལག་བསྟར་ཡོང་བར་འབད་བརྩོན་གནང་སྟེ། ཡུལ་དེའི་སྲིད་གཞུང་གིས་གནད་དོན་དེར་བསྐྱར་ཞིབ་བྱེད་རྒྱུའི་གོ་སྐབས་སྤྲོད་ཐབས་མེད་པའི་ཞུ་སྐུལ་གནང་འདུག སྐབས་དེར་གྲོས་ཚོགས་འཐུས་མི་སྐུ་ཞབས Abetz ལགས་ཀྱིས་རྒྱ་ནག་དམར་ཤོག་ཚོགས་པའི་སྲིད་དབང་སྒེར་སྤྱོད་ཀྱི་དྲག་རྩུབ་ལ་སྐྱོན་བརྗོད་དང་འབྲེལ། ཐེངས་འདིའི་གྲོས་འཆར་དེ་ཁ་གསལ་བོ་བཟོ་མ་ཐུབ་ཚེ། སྲིད་གཞུང་དང་བཟོ་ལས་ཁང་རྣམས་ཀྱིས་གྲོས་འཆར་དེའི་དམིགས་འདུན་དེ་ཐོན་སྐྱེད་དངོས་ཟོག་ཁག་གང་ནས་བརྒྱུད་སྤྲོད་བྱེད་བཞིན་པ་ཤེས་ཐབས་བྲལ་བའི་དགོངས་འཆར་གནང་ཡོད་པ་དང་། སྐབས་དེར་ཨོ་གླིང་གི་ངལ་རྩོལ་ཚོགས་པ་དང་ལྗང་ཁུ་ཚོགས་པ་སོགས་ཀྱིས་ཀྱང་ངལ་རྩོལ་སྒྱུར་བཀོལ་གྱི་གྲོས་འཆར་དེར་རྒྱབ་སྐྱོར་གྱིས། བྲན་གཡོག་ནི་འདས་ཟིན་པའི་གནད་དོན་ཞིག་མིན་པར་བསྒྲགས་འདུགདེ་བཞིན་ཐེངས་འདིའི་གྲོས་ཚོགས་གོང་མའི་གྲོས་འཆར་དང་འབྲེལ་ནས། ཨོ་གླིང་གི་ངལ་རྩོལ་མཉམ་འབྲེལ་མཐུན་ཚོགས་ཀྱི་ཚོགས་གཙོ་སྐུ་ཞབས་  Michele O’Neil ལགས་ཀྱིས་ཀྱང་ཚོགས་པ་ཆེ་ཁག་གཞན་ལ་ཞུ་སྐུལ་གྱིས་གྲོས་ཚོགས་འཐུས་མི་རྣམས་ཀྱིས་གྲོས་འཆར་དེར་རྒྱབ་སྐྱོར་བྱེད་དགོས་བའི་སྐུལ་མ་གནང་བ་མ་ཟད། བཙན་དབང་གི་ངལ་རྩོལ་ཐོན་སྐྱེད་བཀག་སྡོམས་ཀྱི་གྲོས་འཆར་དེར་རྒྱབ་འགལ་བྱེད་དགོས་པའི་རྒྱུ་མཚན་གང་ཡང་མེད་པར་མངོན་གསལ་གནང་འདུགདེ་བཞིན་ཨོ་གླིང་དུ་རྟེན་གཞི་བྱས་པའི་ཡུ་གུར་བུད་མེད་ཚོགས་པའི་ཚོགས་གཙོ་ Ramila Chanisheff ལགས་ཀྱིས་རྒྱ་ནག་གི་བཟོ་ལས་ཁང་དང་ངལ་རྩོལ་ས་ཚུགས་སུ་ཡུ་གུར་མང་པོ་བཀག་སྐྱིལ་བྱས་ཡོད་པའི་གནད་དོན་དེར་འཕྲལ་དུ་ཐག་གཅོད་ཅིག་ལེན་དགོས་བའི་ཞུ་སྐུལ་གནང་ཡོད་པ་དང་། འགྲོ་བ་མིའི་ཐོབ་ཐང་ལྟེ་གནས་ཁང་གི་ཁིམས་རྩོད་པ་རྒན་པ། ལྕམ་Freya Dinshaw ལགས་ཀྱིས་ཀྱང་ཚོང་ལས་གང་ཞིག་ཡིན་ཡང་བྲན་གཡོག་ལས་ཁེ་བཟང་ལེན་ཐབས་མེད་པར་བསྒྲགས་འདུགགཞི་རྩའི་འདི་ལོའི་ཟླ་བ་ ༤ ནང་དུ། ཨོ་སི་ཊི་ལི་ཡའི་གཞུང་ངོས་ནས་ཡུལ་དེའི་མངའ་སྡེ་ Victoria ཡིས་དེ་སྔོན་རྒྱ་ནག་དང་ལྷན་དུ་བཞག་པའི་རྒྱུད་གཅིག་ལམ་གཅིག་གི་གྲོས་མཐུན་གཉིས་ཕྱིར་འཐེན་གནང་ཡོད་པ་དང་། ཟླ་བ་ ༦ པའི་ནང་དུ། ནི་ཛ་ལན་ཌིའི་སྲིད་བློན་ལྕམ་ Jacinda Ardern ལགས་དང་། ཨོ་གླིང་གི་སྲིད་བློན་ Scott Morrison ལགས་གཉིས་དངོས་སུ་མཇལ་འཕྲད་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་སེམས་འཚབ་ཕྱིར་མངོན་པ་དང་འབྲེལ་ནས་ཕྱོགས་གཉིས་ཀྱིས་རྒྱ་ནག་ལ་ཁ་གཏད་གཅོག་རྒྱུའི་ཆིག་སྒྲིལ་གྱི་བཞེངས་ཕྱོགས་གསལ་སྟོན་གནང་ཡོད་པ་ལྟར། ད་ལྟའི་ཆར་རྒྱ་ནག་དང་ཨོ་གླིང་གཉིས་ཀྱི་འབྲེལ་ལམ་སྔར་ལས་རྣོ་ངར་ཅན་དུ་འགྱུར་བཞིན་པ་རེད་འདུག

ཕྱི་ལོ་ ༡༩༧༠ དོན་གྲངས་ནས་བོད་དོན་ཐོག་ཞལ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་སྐུ་ཞབས་ Shri Shyam Gambhir ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་བདེན་དོན་འཐབ་རྩོད་དེ་འཚེ་མེད་ཞི་བ་དང་འབྲེལ་བའི་གཉིས་སྨན་དབུ་མའི་ལམ་གྱི་ཐབས་ལམ་ཐོག་ལམ་སྟོན་མཛད་ཡོད་པ་དང་། དེ་ནི་བོད་མི་ཚོར་རང་དབང་ཡོང་བའི་ཐབས་ལམ་ཉག་གཅིག་པོ་དེ་ཡིན་པར་གསུངས་པ་མ་ཟད་རང་དབང་འཐབ་རྩོད་ཀྱི་ལས་འགུལ་དེ་རྒྱུན་སྐྱོང་ཐུབ་པར་བོད་མི་ཚོས་རྣམ་ཀུན་ནས་བོད་དོན་དང་འབྲེལ་བའི་ལས་འགུལ་ཁག་ཏུ་ངེས་པར་དུ་མཉམ་ཞུགས་གནང་རྒྱུ། བོད་ཀྱི་གཅེས་ནོར་ཐུན་མིན་ཆོས་རིག་དང་ལེགས་བྱང་། སྐད་ཡིག་བཅས་པ་མི་ཉམས་རྒྱུན་འཛིན་གནང་རྒྱུ། ལྷག་དོན་རྒྱ་གར་ནང་ལ་བཙན་བྱོལ་དུ་ཡོད་པའི་བོད་རིགས་ན་གཞོན་ཚོས་ས་གནས་རྒྱ་གར་གྱི་གཞོན་སྐྱེས་ཚོ་དང་འབྲེལ་བ་གང་མང་གནང་དགོས་གནད་ཆགས་ཡོད་པར་གཟིགས་སྐོར་ལམ་སྟོན་གནང་ཡོད།རེས་གཟའ་པ་སངས་ཀྱི་ཕྱི་དྲོར་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁུངས་ཀྱིས་གོ་སྒྲིག་གནང་སྟེ་ཕྱི་ལོ་ ༡༩༧༠ དོན་གྲངས་ནས་བོད་དོན་ཐོག་ཞལ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་ India Tibet Friendship Society ཞེས་པའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྒན་གྲས་སྐུ་ཞབས་ Shri Shyam Gambhir ལགས་ལྡི་ལི་བོད་སྒར་བསམ་ཡས་གླིང་དུ་བོད་མི་དང་འཇལ་འཕྲད་གནང་ཕྱིར་ཕེབས་ཡོད་པ་དང་ལྡི་ལི་ས་གནས་འགོ་འཛིན་གྱི་ཚོགས་ཁང་དུ་མཛད་སྒོ་སྟབས་བདེ་ཞིག་གོ་སྒྲིག་ཞུས་ཡོད་པ་ལྟར་ཁོང་གིས་སྐབས་དེར་ཁོང་ཉིད་དགུང་ལོ་ཆུང་དུས་ནས་བོད་དོན་ཆེད་ཐེངས་མང་བཙོན་འཇུག་གནང་མྱོང་ཡོད་པ་དང་། ཁོང་དང་ཕྱག་སྦྲེལ་སྤྱི་ཚོགས་རིང་ལུགས་ཀྱི་ལྟ་གྲུབ་པ་དཔེར་ན། སྐུ་ཞབས་ Dr. Ram Monohar Lohiya ལགས། སྐུ་ཞབས་  George Fernandas ལགས། སྐུ་ཞབས་ Rabi Ray ལགས། སྐུ་ཞབས་ Mohan Singh ལགས། དེ་བཞིན་སྐུ་ཞབས་ Prof. Anand Kumar ལགས། སྐུ་ཞབས་ Dr. Nand Kishor Trikha ལགས་དང་སྐུ་ཞབས་ Bahu Lal Guna  ལགས་སོགས་ནས་ཧི་མཱ་ལ་ཡ་སྲུང་སྐྱོབ་གནང་དགོས་པའི་ལས་འགུལ་ནས་དབུ་འཛུགས་ཀྱིས་བོད་དོན་ཐོག་ལས་འགུལ་མང་དག་ཅིག་སྤེལ་མྱོང་ཡོད་སྐོར་དང་། ལྷག་པར་དུ་ཁོང་གིས་བཙན་འཛུལ་བ་གང་འདྲ་ཞིག་ཡིན་རུང་བཙན་འཛུལ་བྱེད་སའི་རྒྱལ་ཁབ་དེའི་ཆོས་རིག་དང་ལེགས་བྱང་། སྐད་ཡིག་བཅས་པ་རྩ་མེད་མ་སོང་བར་དུ་བཙན་བཟུང་བྱེད་ཐུབ་ཐབས་མེད་པ་ཞིག་རེད། དཔེར་ན་བོད་ལ་ཆ་མཚོན་ན། རྒྱ་ནག་གཞུང་གིས་ས་ཁྱོན་གྱི་ཆ་ནས་བོད་བཙན་བཟུང་བྱས་ཡོད་ཀྱང་བོད་མི་ཚོས་སོ་སོའི་ཆོས་དང་ལེགས་བྱང། སྐད་ཡིག རིག་གཞུང་བཅས་པ་མི་ཉམས་རྒྱུན་འཛིན་གནང་ཡོད་པ་དེས་བོད་མིའི་ཞུམ་པ་མེད་པའི་བློ་སྟོབས་ལ་དུས་ད་ལྟའང་བཙན་འཛུལ་བྱེད་ཐུབ་མེད་སྐོར་གསུངས་པ་དང་ཆབས་ཅིག བོད་མི་རྣམས་ལ་བློ་བརྟན་འགྱུར་མེད་ཀྱི་ཆོད་སེམས་ཡོད་ཚེ་སྔ་ཕྱི་མ་གཏོགས་རྒྱལ་ཁ་ཐོབ་ངེས་ཡིན་པ་དང་ཇི་སྲིད་བོད་མི་ཚོས་བོད་ཀྱི་གཅེས་ནོར་ཐུན་མིན་ཆོས་རིག་དང་ལེགས་བྱང་། སྐད་ཡིག་བཅས་པ་མི་ཉམས་རྒྱུན་འཛིན་གནང་བ་དེ་ཙམ་གྱིས་འཐབ་རྩོད་ཀྱི་ནུས་པ་ཆེ་རུ་འགྲོ་རྒྱུ་དེ་ཆོས་ཉིད་རེད་ཅེས་སོགས་གསུངས་སོང་།  ཁོང་གིས་ད་དུང་ད་ལྟའི་གནས་སྐབས་འདིར་རྒྱ་གར་ནང་ཁོང་ལྟ་བུའི་མི་རབས་རྒན་པ་ཚོས་བོད་དོན་ཐོག་རྒྱབ་སྐྱོར་གང་འོས་གནང་དང་གནང་བཞིན་ཡོད་ཀྱང་། དེང་གི་ན་གཞོན་ཚོར་བོད་དོན་གོ་རྟོགས་དང་དམིགས་བསལ་གྱི་ཚོར་བ་དེ་ཙམ་མེད་སྟབས། བོད་རིགས་ན་གཞོན་ཚོས་ས་གནས་རྒྱ་གར་གྱི་གཞོན་སྐྱེས་ཚོ་དང་འབྲེལ་བ་གང་མང་གནང་དགོས་གནད་ཆགས་ཡོད་པར་གཟིགས་སྐོར་ལམ་སྟོན་གནང་ཡོད། India Tibet Friendship Society ཞེས་པའི་བོད་དོན་རྒྱབ་སྐྱོར་ཚོགས་པའི་སྐུ་ཞབས་ Shri Shyam Gambhir ལགས་ཀྱིས་བོད་མི་རྣམས་ཐོག་མར་བཙན་བྱོལ་དུ་འབྱོར་སྐབས་མཐོང་རྒྱུ་གནམ་དང་ས་ལས་མེད་ཀྱང་། ད་ཆ་ལོ་ངོ་ ༦༠ ལྷག་གི་རྗེས་གཞན་ཕན་ཀུན་སློང་གི་ཐོག་ནས་ཉམ་ཆུང་མི་མང་རྣམས་ལ་ཟས་གོས་གནས་མལ་སོགས་ཀྱི་མཐུན་འགྱུར་གནང་ཐུབ་པ་ནི་རླབས་ཆེན་གྱི་གྲུབ་འབྲས་ཤིག་ཡིན་པར་ངོས་འཛིན་གནང་གི་ཡོད་ཅེས་གསུངས་སོང་།  ལྡི་ལི་བོད་སྒར་བསམ་ཡས་གླིང་གི་ས་གནས་འགོ་འཛིན་གྱི་ཚོགས་ཁང་དུ་ཚོགས་པའི་མཛད་སྒོའི་ཐོག་ས་གནས་ཀྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་ཁྱོན་ ༢༠ ལྷག་ཙམ་ཆེད་ཕེབས་གནང་འདུག་པ་དང་སྐབས་དེར་ལྡི་ལི་འཕགས་བོད་འབྲེལ་མཐུད་ལས་ཁུངས་ཀྱི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་མི་མང་གི་སྐུ་ཚབ་དེ་དག་ལ་བོད་དོན་རྒྱབ་སྐྱོར་ཚོགས་པ་དེའི་ལས་དོན་དང་ལྷག་དོན་སྐུ་ཞབས་  Shri Shyam Gambhir ལགས་ཀྱི་སྐོར་སོགས་ངོ་སྤྲོད་གནང་ཡོད།  

དེ་རིང་རྒྱ་གར་བྱང་ཕྱོགས་པཾཇཱབ་མངའ་སྡེའི་གྲོང་ཁྱེར་ལུ་དྷྱཱནཱར་རྒྱ་གར་རྒྱལ་ཡོངས་བོད་མིའི་ཚོང་པ་ཚོགས་པའི་ཁྱབ་ཁོངས་ས་གནས་ ༡༨༠ ཡི་ཚོགས་མི་སྐུ་ཚབ་བཅས་ལྷན་འཛོམས་ཀྱིས་རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་ཚོགས་ཆེན་ཐེངས་ལྔ་པ་དབུ་འཛུགས་གནང་བ་དང་འབྲེལ་ཏེ་བོད་མིའི་སྒྲིག་འཛུགས་ཀྱི་ངོས་ནས་བོད་མི་སུད་ཚོང་བར་ཕན་པའི་སྐྱེད་ཆུང་བུན་གཡར་གྱི་ལས་གཞི་མུ་མཐུད་གནང་དགོས་པའི་ཞུ་སྐུལ་ཞུས་འདུགདེ་རིང་སྔ་དྲོ་ཚོུད་ ༩ སྟེང་ལུ་དྷཱནཱར་རྟེན་གཞི་བྱས་པའི་ King Palace གསོལ་མགྲོན་ཁང་དུ་རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་སྐབས་ ༤ པའི་ཚོགས་ཆེན་ཐེངས་ལྔ་པའི་མཛད་སྒོར་སྐུ་མགྲོན་གཙོ་བོ་ ludhiana  གྲོས་ཚོགས་འཐུས་མི་སྐུ་ཞབས་ Surinder Kumar Dawar ལགས་དང་ Ludhiana འི་གྲོང་སྡེ་སྤྱི་ཁྱབ་པ་གཞོན་པ་རྒན་གྲས་ Sham Sunder Malhotra ལགས། དེ་བཞིན་བོད་མིའི་སྒྲིག་འཛུགས་ཀྱི་སྐུ་ཚབ་དཔལ་འབྱོར་དྲུང་ཆེ་བསྟན་འཛིན་ལེགས་གྲུབ་ལགས་བཅས་ཕེབས་ཡོད་པ་མ་ཟད།  Ludhiana ནང་གི་ Lala Tibetan Hosiery Association དང་ Indo Tibetan Hosiery Association ཞེས་བོད་མི་དང་ལྷན་ཚོང་འབྲེལ་གནང་མཁན་རྒྱ་གར་ཚོང་པ་ཚོགས་པ་གཉིས་ཀྱི་ཚོགས་གཙོས་གཙོས་པའི་རྒྱ་གར་ཚོང་བདག་ལཱ་ལཱ་ ༥༠ ཙམ་དང་དེ་བཞིན་རྒྱ་གར་རྒྱལ་ཡོངས་བོད་མིའི་ཚོང་པ་ཚོགས་པའི་ཁྱབ་ཁོངས་ས་གནས་ ༡༨༠ ཡི་ཚོགས་མི་སྐུ་ཚབ་སོགས་ཁྱོན་ཚོགས་བཅར་བ་ ༢༠༠ མན་ཙམ་ནས་མཉམ་ཞུགས་གནང་འདུགདེ་རིང་ཉིན་རྒྱབ་ཚོགས་ཞུགས་བོད་མི་སུད་ཚོང་བ་རྣམས་དང་བོད་མིའི་སྒྲིག་འཛུགས་དཔལ་འབྱོར་དྲུང་ཆེ་དབར་དྲི་བ་དྲིས་ལན་གྱི་ལས་རིམ་ཞིག་གནང་སྐབས་དེ་སྔ་དཔལ་འབྱོར་ལས་ཁུངས་ཀྱི་གངས་ལྗོངས་དཔལ་འབྱོར་ཞབས་ཞུ་ཁང་གིས་བོད་མི་ཚོང་ལས་གཉེར་མཁན་དག་ལ་འབྲིང་རིམ་མ་རྩའི་ཚོང་དོན་བུན་གཡར་གྱི་ལས་གཞི་དབུ་འཛུགས་གནང་དོན་ལྟར་བོད་མི་ཚོང་པ་མང་པོས་དེ་ནས་ཁེ་དབང་སྤྱོད་ཐུབ་པ་དང་ཚོང་ལས་ཀྱི་བྱ་གཞག་ལམ་ལྷོང་བྱུང་ཡོད་པར་འགྲེལ་བརྗོད་ཀྱིས་དཔལ་འབྱོར་ལས་ཁུངས་ནས་དེ་འབྲེལ་སྐྱེད་ཆུང་བུན་གཡར་ལས་གཞི་མུ་མཐུད་གནང་དགོས་པའི་ཞུ་སྐུལ་ཞུས་པར་དཔལ་འབྱོར་དྲུང་ཆེས་རིམ་པས་བཀའ་སྡུར་གནང་རྒྱུ་ཡིན་པར་གསུངས་འདུགགཞི་རྩའི་ཕྱི་ལོ་ ༢༠༠༨ ལོར་གསར་འཛུགས་གནང་བའི་རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་འོག་ས་གནས་མི་འདྲ་བ་ ༢༤༠ ལྷག་དེབ་སྐྱེལ་ཐོག་ཚོགས་མི་ ༤༠༠༠ ཡས་མས་ཡོད་པ་རེད།

ཉེ་ཆར་བོད་ཀྱི་རྒྱལ་ས་ལྷ་སར་རྒྱ་ནག་གིས་བོད་ཞི་བའི་བཅིངས་གྲོལ་ཟེར་བ་བཏང་ནས་ལོ་ངོ་ ༧༠ འཁོར་བའི་མཛད་སྒོ་དང་འབྲེལ་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་གནས་ཚུལ་སྤེལ་བར་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ Wu Yingjie ཡི་གཏམ་བཤད་ནང་དོན་བཀོད་པར་གཞིགས་ན་ཁོ་པས་ས་མཚམས་ས་ཁུལ་སྲུང་སྐྱོབ་ཀྱི་གལ་གནད་སྐོར་དང་འབྲེལ་ཏེ་རྒྱ་གར་དང་འབྲེལ་བའི་བོད་ཀྱི་ས་མཚམས་ཁུལ་གྱི་རྫོང་ཁག་ཉེར་གཅིག་རྒྱ་གཞུང་གི་ཐད་ཀར་སྟངས་འཛིན་དང་རོགས་རམ་འོག་ཡོད་པ་དང་། ས་ཁུལ་དེ་དག་ནང་དུ་འདས་པའི་ལོ་ངོ་ ༡༠ ནང་དུ་མི་འབོར་བརྒྱ་ཆ་ ༡༠ ལྷག་འཕར་ཡོད་པར་བརྗོད་འདུགརྒྱ་ནག་གི་གཞུང་འབྲེལ་གྲངས་ཐོར་ད་ལྟའི་ཆར་བོད་རང་སྐྱོང་ལྗོངས་ཟེར་བའི་ནང་དུ་བོད་མི་ས་ཡ་གསུམ་དང་ཕྱེད་ཀ་ལྷག་ཙམ་ཡོད་པ་དང་དེའང་འདས་པའི་ལོ་ངོ་བཅུ་དང་བསྡུར་ཚེ་བརྒྱ་ཆ་ཉེར་གཉིས་ཙམ་གྱི་མི་འབོར་འཕེལ་རྒྱས་ཕྱིན་ཡོད་པ་བཀོད་འདུག ཚེས་ ༡༩ ཉིན་གྱི་མཛད་སྒོའི་ཐོག་སྐུ་མགྲོན་གཙོ་བོ་རྒྱ་ནག་དབུས་ཆབ་སྲིད་གྲོས་ཚོགས་ཀྱི་ཚོགས་གཙོ་ཝང་དབྱང་གིས་གཏམ་བཤད་སྤེལ་བར་བོད་ནང་དུ་རྒྱ་ཡིག་ཚད་ལྡན་འབྲི་ཀློག་ཐུབ་རྒྱུ་དང་། བོད་གཙོས་གྲངས་ཉུང་མི་རིགས་ཚང་མའི་ངོས་ནས་སོ་སོའི་ཆོས་དང་རིག་གཞུང་ལས་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་དང་ལྟ་གྲུབ་ལ་དོ་སྣང་དང་ཁྱབ་སྤེལ་ཆེ་བ་བྱེད་དགོས་གལ་ཡིན་པ། ལྷག་པར་དུ་བོད་ནང་དུ་ཀྲུང་གོའི་ཁྱད་ཆོས་ལྡན་པའི་ནང་པའི་ཆོས་དང་སྤྱི་ཚོགས་སྐྲུན་རྒྱུར་དམིགས་བསལ་འབད་བརྩོན་བྱེད་དགོས་པ། བོད་ཁ་བྲལ་གཏོང་ཐབས་བྱེད་མཁན་ཕྱི་ནང་གི་སྟོབས་ཤུགས་རྣམས་ཕམ་ངེས་ཡིན་པ་སོགས་བརྗོད་ཡོད་པ་རེད། གསར་འགོད་པས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དང་རྒྱ་ནག་ཉམས་ཞིབ་པ་ཟླ་བ་ཚེ་རིང་ལགས་སུ་བཀའ་འདྲི་ཞུས་པར་ཁོང་གིས་རྒྱ་གཞུང་གི་མཛད་སྒོ་དེའི་ཐོག་ནས་ཡོངས་གྲགས་བཤད་པ་མ་གཏོགས་བོད་ཀྱི་ས་མཚམས་ས་ཁུལ་ཁག་གི་སྟངས་འཛིན་དེ་སྔོན་མ་རྒྱ་ནག་གི་སྲིད་འཛིན་ཅང་ཙེ་མིན་སྐབས་ནས་བཟུང་སྟེ་དུས་ད་ལྟ་བར་རྒྱ་ནག་དམར་ཤོག་གཞུང་རང་གི་ཐད་ཀར་སྟངས་འཛིན་འོག་ཡོད་པ་དང་། བོད་རང་སྐྱོང་ལྗོངས་ཟེར་བའི་གཞུང་འཛིན་ལ་ས་མཚམས་སྲུང་སྐྱོབ་ཀྱི་གནད་དོན་ཐད་དབང་ཚད་གང་ཡང་མེད་སྐོར་གསུངས་ཡོད། བོད་གཞིས་བྱེས་གཉིས་ཀྱི་བོད་མིའི་དབར་འབྲེལ་ལམ་བཀག་སྡོམ་གཙོས་སྲིད་བྱུས་དེ་ལག་བསྟར་བྱེད་བཞིན་ཡོད་པ། དེ་བཞིན་ད་ལྟ་ཡོངས་གྲགས་ཐོག་བཤད་པ་དེ་རྒྱ་གར་ལ་བརྡ་ལན་ཞིག་ཀྱང་ཡིན་སྲིད་པ་དང་། ཕྱོགས་གཞན་ཞིག་ནས་ལོ་ཤས་གོང་ནས་རྒྱ་གཞུང་གིས་འཕགས་བོད་གཉིས་ཀྱི་ས་མཚམས་ཁུལ་དུ་གྲོང་རྡལ་གསར་རྒྱག་གི་ལས་གཞི་རྒྱ་སྐྱེད་གཏོང་མུས་ཀྱི་གནད་དོན་དེ་དག་རྒྱ་ནག་རང་གི་ལག་རྗེས་ཡིན་པ་ཆེད་དུ་བཏོན་ཐབས་ཡིན་སྲིད་པར་གསུངས་ཡོད།