ཉེ་ཆར་བོད་ཀྱི་རྒྱལ་ས་ལྷ་སར་རྒྱ་ནག་གིས་བོད་ཞི་བའི་བཅིངས་གྲོལ་ཟེར་བ་བཏང་ནས་ལོ་ངོ་ ༧༠ འཁོར་བའི་མཛད་སྒོ་དང་འབྲེལ་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་གནས་ཚུལ་སྤེལ་བར་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ Wu Yingjie ཡི་གཏམ་བཤད་ནང་དོན་བཀོད་པར་གཞིགས་ན་ཁོ་པས་ས་མཚམས་ས་ཁུལ་སྲུང་སྐྱོབ་ཀྱི་གལ་གནད་སྐོར་དང་འབྲེལ་ཏེ་རྒྱ་གར་དང་འབྲེལ་བའི་བོད་ཀྱི་ས་མཚམས་ཁུལ་གྱི་རྫོང་ཁག་ཉེར་གཅིག་རྒྱ་གཞུང་གི་ཐད་ཀར་སྟངས་འཛིན་དང་རོགས་རམ་འོག་ཡོད་པ་དང་། ས་ཁུལ་དེ་དག་ནང་དུ་འདས་པའི་ལོ་ངོ་ ༡༠ ནང་དུ་མི་འབོར་བརྒྱ་ཆ་ ༡༠ ལྷག་འཕར་ཡོད་པར་བརྗོད་འདུག
རྒྱ་ནག་གི་གཞུང་འབྲེལ་གྲངས་ཐོར་ད་ལྟའི་ཆར་བོད་རང་སྐྱོང་ལྗོངས་ཟེར་བའི་ནང་དུ་བོད་མི་ས་ཡ་གསུམ་དང་ཕྱེད་ཀ་ལྷག་ཙམ་ཡོད་པ་དང་དེའང་འདས་པའི་ལོ་ངོ་བཅུ་དང་བསྡུར་ཚེ་བརྒྱ་ཆ་ཉེར་གཉིས་ཙམ་གྱི་མི་འབོར་འཕེལ་རྒྱས་ཕྱིན་ཡོད་པ་བཀོད་འདུག
ཚེས་ ༡༩ ཉིན་གྱི་མཛད་སྒོའི་ཐོག་སྐུ་མགྲོན་གཙོ་བོ་རྒྱ་ནག་དབུས་ཆབ་སྲིད་གྲོས་ཚོགས་ཀྱི་ཚོགས་གཙོ་ཝང་དབྱང་གིས་གཏམ་བཤད་སྤེལ་བར་བོད་ནང་དུ་རྒྱ་ཡིག་ཚད་ལྡན་འབྲི་ཀློག་ཐུབ་རྒྱུ་དང་། བོད་གཙོས་གྲངས་ཉུང་མི་རིགས་ཚང་མའི་ངོས་ནས་སོ་སོའི་ཆོས་དང་རིག་གཞུང་ལས་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་དང་ལྟ་གྲུབ་ལ་དོ་སྣང་དང་ཁྱབ་སྤེལ་ཆེ་བ་བྱེད་དགོས་གལ་ཡིན་པ། ལྷག་པར་དུ་བོད་ནང་དུ་ཀྲུང་གོའི་ཁྱད་ཆོས་ལྡན་པའི་ནང་པའི་ཆོས་དང་སྤྱི་ཚོགས་སྐྲུན་རྒྱུར་དམིགས་བསལ་འབད་བརྩོན་བྱེད་དགོས་པ། བོད་ཁ་བྲལ་གཏོང་ཐབས་བྱེད་མཁན་ཕྱི་ནང་གི་སྟོབས་ཤུགས་རྣམས་ཕམ་ངེས་ཡིན་པ་སོགས་བརྗོད་ཡོད་པ་རེད།
གསར་འགོད་པས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དང་རྒྱ་ནག་ཉམས་ཞིབ་པ་ཟླ་བ་ཚེ་རིང་ལགས་སུ་བཀའ་འདྲི་ཞུས་པར་ཁོང་གིས་རྒྱ་གཞུང་གི་མཛད་སྒོ་དེའི་ཐོག་ནས་ཡོངས་གྲགས་བཤད་པ་མ་གཏོགས་བོད་ཀྱི་ས་མཚམས་ས་ཁུལ་ཁག་གི་སྟངས་འཛིན་དེ་སྔོན་མ་རྒྱ་ནག་གི་སྲིད་འཛིན་ཅང་ཙེ་མིན་སྐབས་ནས་བཟུང་སྟེ་དུས་ད་ལྟ་བར་རྒྱ་ནག་དམར་ཤོག་གཞུང་རང་གི་ཐད་ཀར་སྟངས་འཛིན་འོག་ཡོད་པ་དང་། བོད་རང་སྐྱོང་ལྗོངས་ཟེར་བའི་གཞུང་འཛིན་ལ་ས་མཚམས་སྲུང་སྐྱོབ་ཀྱི་གནད་དོན་ཐད་དབང་ཚད་གང་ཡང་མེད་སྐོར་གསུངས་ཡོད།
བོད་གཞིས་བྱེས་གཉིས་ཀྱི་བོད་མིའི་དབར་འབྲེལ་ལམ་བཀག་སྡོམ་གཙོས་སྲིད་བྱུས་དེ་ལག་བསྟར་བྱེད་བཞིན་ཡོད་པ། དེ་བཞིན་ད་ལྟ་ཡོངས་གྲགས་ཐོག་བཤད་པ་དེ་རྒྱ་གར་ལ་བརྡ་ལན་ཞིག་ཀྱང་ཡིན་སྲིད་པ་དང་། ཕྱོགས་གཞན་ཞིག་ནས་ལོ་ཤས་གོང་ནས་རྒྱ་གཞུང་གིས་འཕགས་བོད་གཉིས་ཀྱི་ས་མཚམས་ཁུལ་དུ་གྲོང་རྡལ་གསར་རྒྱག་གི་ལས་གཞི་རྒྱ་སྐྱེད་གཏོང་མུས་ཀྱི་གནད་དོན་དེ་དག་རྒྱ་ནག་རང་གི་ལག་རྗེས་ཡིན་པ་ཆེད་དུ་བཏོན་ཐབས་ཡིན་སྲིད་པར་གསུངས་ཡོད།
