Monthly Archives: April, 2022

ཉན་པ།: Listen ཕབ་ལེན། Download བོད་མིའི་སྒྲིག་འཛུགས་ཀྱིས་རྒྱལ་གཅེས་པ་བཀྲ་ཕུན་ལགས་ཀྱི་འདས་མཆོད་དུ་མཆོད་འབུལ་སྨོན་ལམ་ཚོགས་པ། ཉིན་མཚན་མེད་པར་ངོས་ལ་སྲུང་མཁན་ས་གནས་ཀྱི་དཔོན་རིགས་དང་སྐུ་སྲུང་བ་ཡོངས་ལ་ཐུགས་རྗེ་ཆེ་ཞེས་བཀའ་སྩལ་བ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་རྒྱལ་ཡོངས་ཚོགས་ཆེན་ཚོགས་པ། གླུ་གཞས་སྒྱུ་རྩལ་ལམ་ནས་ཡོ་རོབ་ཁུལ་དུ་བོད་དོན་ངོ་སྤྲོད་ལས་འགུལ། ཡོ་རོབ་མཐུན་ཚོགས་དང་རྒྱ་ནག་དབར་གྱི་ལྷན་ཚོགས་ཐོག་ཡུག་རེན་དང་བོད་དོན་གླེང་སློང་། བོད་མིའི་ཆོས་དང་རིག་གཞུང་ལ་དྲག་གནོན་ཤུགས་ཆེར་བྱེད་བཞིན་ཡོད་པའི་སྙན་ཐོ་སྤེལ་བ། Monday 04/04/2022 CTA mourns death of 81 year old self immolator Taphun HHDL meets senior local officials, expresses gratitude for constant assistance and security 5th GBM of Tibetan People’s movement for Middle way approach convenes A song from Tibet for you: Tibetan artist begins Europe tour for Tibet China commission report says Tibetans face cultural and religious repression EU raises concerns about China’s treatment of Tibetan people and other minorities

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ཀངྒ་རཱ་རྫོང་དཔོན་དང་སྐུ་སྲུང་བ་སྤྱི་ཁྱབ་པ་གཙོས་དྷརྨ་སཱ་ལཱའི་ས་གནས་ཀྱི་དཔོན་རིགས་ཁག་ཅིག་དང་ཁོང་རྣམ་པའི་ནང་མི་སྐུ་འཁོར་ཡོངས་ལ་གཟིམ་ཆུང་མཇལ་ཁ་སྩལ་བ་དང་འབྲེལ། མགོན་པོ་༸གང་ཉིད་མཆོག་བཞུགས་སྒར་དུ་སྐུ་བཞུགས་མཛད་ནས་མི་ལོ་ ༦༠ ལྷག་ཙམ་ཕེབས་ཡོད་པ་དེའང་ཐུགས་ཧ་ཅང་ལྷོད་པོ་དང་བདེ་པོ་བྱུང་ཡོད་པར་བཀའ་སྩལ་མཛད་པ་དང་སྦྲགས། ཐེངས་འདིའི་མཇལ་ཁའི་གོ་སྐབས་ཐོག་ནས་ས་གནས་ཀྱི་སྔ་རྗེས་སུ་ཕེབས་པའི་དཔོན་རིགས་རྣམས་དང་ལྷག་དོན་མགོན་པོ་༸གང་ཉིད་མཆོག་ལ་ཉིན་མཚན་མེད་པར་སྐུ་ཕྱྭའི་ཉེན་སྲུང་གནང་མཁན་ཡོངས་ལ་ཐུགས་རྗེ་ཆེ་ཞེས་བཀའ་སྩལ་འདུག༸གོང་ས་མཆོག་གིས་ཀངྒ་རཱ་རྫོང་དུ་ཆགས་པའི་བཞུགས་སྒར་དྷརྨ་སཱ་ལཱ་འདི་ནི་རྒྱ་གར་གྱི་སྲིད་བློན་དམ་པ་ནེཧ་རུ་མཆོག་གི་དགོངས་གཞི་ལྟར་མགོན་པོ་༸གང་ཉིད་མཆོག་གིས་དབུས་པའི་བོད་མི་བཙན་བྱོལ་བ་རྣམས་ཀྱི་བཞུགས་གནས་སུ་གྱུར་བ་དང་། ས་གནས་འདི་གནམ་གཤིས་དང་ས་བབ་སོགས་ཕྱོགས་གང་ཅིའི་ཐོག་ནས་མགོན་པོ་མཆོག་ལ་ཧ་ཅང་འཚམ་པོ་གྱུར་ཡོད་སྐོར་བཀའ་སྩལ་བ་དང་འབྲེལ་ཏེ། ༸གོང་ས་མཆོག་དང་མགོན་པོ་༸གང་ཉིད་མཆོག་གི་སྐུ་ཕྱྭའི་འགན་ཡོད་པའི་རྒྱ་གར་གྱི་སྐུ་སྲུང་བ་དབར་རྒྱུན་ལྡན་ནས་དམིགས་བསལ་གྱི་མཛའ་བརྩེའི་འབྲེལ་བ་མཚོན་པའི་དཔེ་མཚོན་ཁག་ཅིག་ཞལ་ཤོབ་མཛད་དེ་བཀའ་སྩལ་བ་དང་ཆབས་ཅིག སྤྱིར་༸གོང་ས་མཆོག་སྐུ་མགྲོན་གྱི་ངོ་བོའི་ཐོག་ནས་རྒྱ་གར་གྱི་ས་གནས་གང་དུ་ཆིབས་བསྒྱུར་མཛད་ཀྱང་དབུས་དང་མངའ་སྡེའི་གཞུང་ནས་མཐུན་འགྱུར་གང་ཐུབ་ཞུས་དང་ཞུ་བཞིན་ཡོད་པ་དེ་ལྟར་ཡང་། བཞུགས་སྒར་གྱི་ས་གནས་དཔོན་རིགས་དང་སྐུ་སྲུང་བ་རྣམས་ལ་མགོན་པོ་ནས་དམིགས་བསལ་བཀྲིན་ཆེན་པོ་ཡིན་སྐོར་བཀའ་སྩལ་འདུག ༸གོང་ས་མཆོག་གིས་སྐབས་དེར་ད་དུང་རྒྱ་གར་འཕགས་པའི་ཡུལ་འདི་ནི་མང་གཙོ་དང་ཆོས་དད་རང་དབང་ལྡན་པའི་རྒྱལ་ཁབ་ཅིག་ཡིན་པར་ཆེ་བསྟོད་མཛད་པ་དང་འབྲེལ། དེ་སྔ་༸གོང་ས་མཆོག་མ་སུ་རིར་ལོ་གཅིག་ཙམ་རིང་སྐུ་བཞུགས་མཛད་རྗེས་བཞུགས་སྒར་དྷརྨ་སཱ་ལཱར་ཆིབས་བསྒྱུར་མཛད་གཏན་ཁེལ་སྟབས། སྐབས་དེའི་འབྲས་སྤྱི་བློན་ཆེན་ Apa Pant ལགས་ཀྱིས་དྷ་ས་ནས་༸གོང་ས་མཆོག་གི་ཐུགས་ཀྱི་འོད་ཟེར་འཛམ་གླིང་ཡོངས་ལ་འཕྲོ་ངེས་རེད་ཅེས་ཞུས་པ་དེ་ད་ཆ་རན་པོ་ཞིག་ཆགས་ཡོད་པ་དང་། ༸གོང་ས་མཆོག་ད་ཆ་ས་གནས་འདིར་རང་དབང་ལྡན་པའི་ངང་སྐུ་བཞུགས་མཛད་དེ་སྐབས་བསྟུན་ཕྱི་ནང་གི་མི་སྣ་མཇལ་འཕྲད་དང་ལྷག་པར་བརྙན་སོགས་ཀྱི་བརྒྱུད་ལམ་ཐོག་ནས་མགོན་པོ་མཆོག་གི་དགོངས་གཞི་བརྒྱུད་སྤེལ་མཛད་ཐུབ་པ་བཅས་ལ་གཞིགས་ན་༸སྐུ་ཚེ་འདི་དོན་དམ་པའི་ཕན་རླབས་ཅན་ཞིག་ཏུ་གྱུར་ཡོད་པར་བཀའ་སྩལ་མཛད་ཡོད། ༸གོང་ས་མཆོག་གིས་སྐབས་དེར་དེ་རིང་སྔ་དྲོ་༸སྐུའི་བླ་སྨན་པ་རྣམས་ནས་༸གོང་ས་མཆོག་གི་༸སྐུའི་འཕྲོད་བཞེས་བརྟག་དཔྱད་ཞུས་པ་ལྟར་སྔར་བཞིན་གསལ་ཐང་ཡིན་པའི་སྙན་སེང་ཞུས་པ་ཡོངས་གྲགས་བཀའ་སྩལ་མཛད་འདུག  ཚོུད་གཅིག་ལྷག་ཙམ་གྱི་མཇལ་མོལ་དེའི་རིང་རྒྱ་གར་གྱི་ས་གནས་དཔོན་རིགས་རྣམས་ནས་༸གོང་ས་མཆོག་ཁུལ་འདིར་སྐུ་བཞུགས་མཛད་པ་ཙམ་གྱིས་ད་ཆ་ས་གནས་འདི་གནའ་བོའི་ལེགས་བཤད་ཀྱི་ལྟེ་གནས་ལྟ་བུར་གྱུར་ཡོད་པ་འགྲེལ་བརྗོད་དང་འབྲེལ་མགོན་པོ་༸གང་ཉིད་མཆོག་ལ་བཀའ་དྲིན་རྗེས་དྲན་ཞུས་པ་མ་ཟད། ནང་སེམས་ཀྱི་ཞི་བདེ་སྐྲུན་ཐབས་དང་མི་ཚེ་དོན་དམ་པ་ཇི་ལྟར་བསྐྱེལ་དགོས་པ། དེ་བཞིན་རང་གི་འོས་འགན་དང་འཚེ་མེད་ཞི་བའི་ལྟ་གྲུབ་གཉིས་ཟུང་འབྲེལ་ཐོག་ལག་བསྟར་བྱེད་ཕྱོགས་སོགས་ཀྱི་གནད་དོན་འདྲ་མིན་ཐོག་བཀའ་འདྲི་དགོངས་སྐོར་ཞུས་ཡོད་པ་བཞིན་༸གོང་མཆོག་གིས་ཐུགས་བརྩེ་ཆེན་པོས་བཀའ་ལན་མཛད་པ་དང་འབྲེལ། གཙོ་བོ་འགྲོ་བ་མི་གཅིག་གྱུར་གྱི་བློ་གོང་འཕེལ་གནང་རྒྱུའི་གལ་གནད་དང་། རྒྱ་གར་གྱི་གནའ་རབས་ལེགས་བཤད་ནང་འཚེ་མེད་ཞི་བ་དང་སྙིང་རྗེའི་སྐོར་གསལ་བ་དེ་དག་རླབས་ཆེན་ཡིན་པ་དང་། དེ་དག་ལ་བརྟེན་ནས་རྒྱ་གར་གྱི་སྤྱི་ཚོགས་ནང་ཆོས་ལུགས་འདྲ་མིན་འཆམ་མཐུན་ངང་ལོ་ངོ་སྟོང་མང་པོའི་རིང་ནས་གནས་ཐུབ་ཡོད་སྟབས་རྒྱ་གར་གྱི་གནའ་རབས་ལེགས་བཤད་དག་ལ་སློབ་གཉེར་གནང་གལ་ཡིན་པ་སོགས་ཀྱི་ལམ་སྟོན་མཛད་འདུག  

དེ་རིང་ཕྱི་དྲོ་ཕྱག་ཚོད་བཞི་བའི་སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ།  སྲིད་སྐྱོང་དང་བཀའ་བློན་ལྷན་རྒྱས། གཞན་ཡང་སྤྱི་འཐུས་རྒྱུན་ལས་རྣམས་དང་ལྷན་ཁང་ཁག་གི་དྲུང་ཆེ་རྣམས་ཀྱི་དབུས་བའི་སྲི་ཞུ་ལས་བྱེད་ཡོངས་སུ་ལྷན་འཛོམས་ཀྱིས།  ཁ་ཉིན་ཕྱི་ཟླ་ ༣ ཚེས་ ༢༧ ཉིན་གྱི་ཞོགས་པའི་ཆུ་ཚོད་ལྔ་པ་ཡས་མས་སུ་རང་ལོ་ ༨༡ ཡིན་པའི་བཀྲ་ཕུན་ལགས་ཀྱིས་རྔ་པ་ཀིརྟི་དགོན་པར་ལྟ་རྟོག་བྱེད་མཁན་གྱི་ཉེན་རྟོག་ལས་ཁུངས་མདུན་དུ་རང་ལུས་མེར་སྲེག་བཏང་ནས་འདས་གྲོངས་སུ་གྱུར་བའི་རྒྱལ་གཅེས་ཁོང་ལ་གདུང་སེམས་མཉམ་སྐྱེད་ཀྱི་ཆེད་དུ་མཆོད་འབུལ་སྨོན་ལམ་ཞིག་ཚོགས་སོང་།སྐབས་དེར་དགེ་འདུན་པ་རྣམས་ཀྱི་དབུས་བའི་སྲི་ཞུ་ལས་བྱེད་ཡོངས་ཀྱིས་ཞལ་འདོན་བསྔོ་སྨོན་གསུང་འདོན་གནང་རྗེས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱལ་གཅེས་བ་བཀྲ་ཕུན་དམ་པ་དེ་ཉིད་ཀྱི་ལོ་རྒྱུས་སྒྲོག་སྦྱོང་གནང་བ་དང་སྦྲགས།  ད་ལྟའི་ཆར་རྒྱ་ནག་གི་དྲག་གནོན་གྱི་རྐྱེན་གྱིས་ཁོང་གི་སྐུ་ཕུང་ནང་མིར་རག་སོན་བྱུང་མིན་གྱི་ཐད་ནས་གནས་ཚུལ་ཤེས་རྟོགས་དཀའ་བའི་གནས་སུ་གྱུར་ཡོད་པར་འགྲེལ་བརྗོད་ཀྱིས། དམ་པ་ཁོང་དང་ཁོང་གི་ནང་མི་ཡོངས་ལ་གདུང་སེམས་མཉམ་སྐྱེད་ཡོད་པར་གསུངས་སོང་། རྩ་བའི་བཀྲ་ཕུན་ལགས་ནི་རྔ་པའི་འབྲོག་སྡེ་རྨེའུ་རུ་མའི་རུ་ཆེན་གསུམ་པའི་ཕུར་རྩ་ཚང་ནས་ཡིན་པ་དང་། དུས་རྟག་ཏུ་བོད་དོན་ལ་སེམས་ཁུར་དང་ལ་རྒྱ་ཡོད་མཁན་ཞིག་ཡིན་པ་དང་། ལྷག་པར་དུ་ཁོང་གིས་ ༢༠༢༡ ལོར་བརྒྱད་ཅུའི་གྱ་སྟོན་སྐབས་སུ་༸རྒྱལ་བ་རིན་པོ་ཆེའི་ཐུགས་རྗེ་བྱིན་རླབས་ཀྱིས། བོད་ལ་སྐྱིད་པའི་ཉི་མ་ཞིག་ཤར་རྒྱུ་ཡོད་པ་གཏན་འཁེལ་ཡིན་པས་ན་ཆུང་གཞོན་ནུ་ཚོའི་སེམས་ཤུགས་མ་ཆགས་ཞེས་གཏམ་བཤད་སྤེལ་མྱོང་ཡོད་པ་རེད་འདུག གཞི་རྩའི་འདས་པའི་ཉིན་ཤས་ནང་བོད་ཁམས་སྐྱེ་རྒུ་མདོ་གྲོང་ཁྱེར་གྱི་ཁུལ་རིམ་པའི་ཉེན་རྟོག་ལས་ཁུངས་མདུན་དུ་བོད་མི་ཞིག་གིས་རང་ལུས་མེར་བསྲེགས་གནང་ཡོད་པའི་གནས་ཚུལ་ཐོན་ཡོད་ལ། དེའི་གོང་སྟེ་ཕྱི་ཟླ་ ༢ པའི་ནང་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏྭ་ལའི་མདུན་དུ་བོད་ཀྱི་གཞས་པ་གྲགས་ཅན་ཚེ་དབང་ནོར་བུ་ལགས་ཀྱིས་རང་ལུས་མེར་བསྲེགས་བགཏང་སྟེ་ཁོང་རྗེས་སུ་སྨན་ཁང་ནང་འདས་གྲོངས་སུ་འགྱུར་བའི་གནས་ཚུལ་ཐོན་ཡོད་པ་དེ་ལྟར་ཡང་། རྒྱ་གཞུང་གིས་ཆེས་དམ་དྲག་གི་གནས་སྟངས་འོག སྐྱེ་རྒུ་མདོ་གྲོང་ཁྱེར་ནང་རང་ལུས་མེར་བསྲེགས་བཏང་མཁན་སུ་ཡིན་གྱི་ཞིབ་ཕྲའི་གནས་ཚུལ་དང་། དེ་བཞིན་ཚེ་དབང་ནོར་བུ་ལགས་ཀྱིས་རང་ལུས་མེར་བསྲེགས་དང་འབྲེལ་བའི་སྔ་རྗེས་གནས་ཚུལ་ཁ་གསལ་ཞིག་ཐོན་ཁག་པོར་གྱུར་ཡོད་པ་རེད། དེའི་ཁྲོད་དེ་རིང་ Nextshark ཞེས་པའི་གསར་ལམ་དུ་ཐོན་པའི་གནས་ཚུལ་ཞིག་གི་ནང་།  ཕྱི་ཕྱོགས་ཀྱི་གསར་ཁང་མང་པོས་ཟླ་ ༢ པའི་ཚེས་ ༢༥ ཉིན་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏཱ་ལའི་མདུན་ཐང་དུ་རྒྱ་གཞུང་ལ་ངོ་རྒོལ་གྱིས་སྐུ་ལུས་མེར་བསྲེགས་གནང་མཁན་གྲགས་ཅན་ན་གཞོན་གཞས་བ་ཚེ་དབང་ནོར་བུ་ལགས་ཀྱི་སྐོར་ནས་གླེང་སློང་དང་འདྲི་རྩད་མང་པོ་བྱུང་བའི་མཚམས་འདིར། རྒྱ་ནག་གི་ཕྱི་སྲིད་ལས་ཁུངས་ཀྱིས་ཚེ་དབང་ནོར་བུ་ལགས་ད་ལྟ་གྲོངས་མེད་པར་སྨན་བཅོས་བྱེད་བཞིན་པར་བརྗོད་པ་ཞིག་ལུང་འདྲེན་བྱས་འདུག དེ་ཡང་རྒྱ་ནག་གི་ཕྱི་སྲིད་བློན་ཆེན་ལས་ཁུངས་ཀྱི་གནས་ཚུལ་སྤེལ་བ་དེའི་ནང་དུ།  རང་ལུས་མེར་བསྲེགས་གཏང་མཁན་གང་ཟག་དེར་དེ་སྔོན་ནས་སེམས་ཁམས་དང་འབྲེལ་བའི་ནད་གཞི་ཞིག་ཡོད་པ་མ་ཟད།  ཁོང་གིས་ཐེངས་ཁ་ཤས་ལ་རང་སྲོག་བཅད་ཐབས་བྱས་མྱོང་ཡོད་པ་དང་། ཁོང་ད་ལྟའང་འདས་གྲོངས་སུ་གྱུར་མེད་པར་སྨན་བཅོས་བྱེད་མུས་ཡིན་པར་འགྲེལ་བརྗོད་བྱས་འདུག གཞི་རྩའི་ཕྱི་ཕྱོགས་སུ་གནས་ཚུལ་འབྱོར་ཁག་ལ་གཞིགས་ན། རྒྱལ་གཅེས་པ་དམ་པ་དེ་ཉིད་ལྷ་ས་གྲོང་ཁྱེར་ནང་གི་རང་སྐྱོང་ལྗོངས་མི་མང་སྨན་ཁང་དུ་གཟུགས་གཞི་མིས་ཚིག་དྲག་པས་རྐྱེན་གྱིས་འདས་གྲོངས་སུ་གྱུར་ཡོད་པའི་གནས་ཚུལ་ཐོན་པ་མ་ཟད། བཞུགས་སྒར་ཁུལ་གྱི་ཚོགས་སྐྱིད་ཁག་གིས་དམ་པ་ཁོང་གི་འདས་རྐྱེན་དང་འབྲེལ་ནས་གདོང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་གནང་བ་མ་ཟད། ཟླ་བ་སྔོན་མའི་ཚེས་ ༡༤ ཉིན།   བོད་མིའི་སྒྲིག་འཛུགས་ཆོས་རིག་ལས་ཁུངས་ནས་དམ་པ་དེ་ཉིད་སྐུ་འདས་གྲོངས་སུ་གྱུར་བའི་གནས་ཚུལ་དང་འབྲེལ་ནས་ཆེད་དུ་གདུང་སེམས་མཉམ་སྐྱེད་ཀྱི་མྱ་ངན་རྗེས་དྲན་སླད་མཆོད་འབུལ་སྨོན་ལམ་ཞིག་ཚོགས་གནང་ཡོད་པ་རེད།གང་ལྟར་ཐེངས་འདི་རྔ་པའི་ནང་སླར་ཡང་རང་ལུས་མེར་བསྲེགས་ཀྱི་གནས་ཚུལ་ཐོན་པ་དང་སྦྲགས།ཁ་སང་ཨ་རིའི་ཁུལ་གྱི་ནེའུ་ཡོག་དང་ནེའུ་ཇིར་སི་ས་གནས་སུ་བོད་ཀྱི་གཞོན་ནུ་ཚོགས་པ་དང་བོད་རིགས་སྤྱི་མཐུན་ཚོགས་པ་སོགས་ཀྱིས་ཉེ་ཆར་རང་ལུས་མེར་བསྲེགས་བཏང་བའི་རྒྱལ་གཅེས་བ་གསུམ་གྱི་ཆེད་རྒྱ་ནག་གི་གཞུང་ཚབ་ཁང་གི་མདུན་དུ་མར་མེ་ཁྲོམ་སྐོར་དང་ཞི་བའི་རྔམ་སྟོན་ཁྲོམ་སྐོར་གནང་སྟེ་རྒྱལ་གཅེས་བ་གསུམ་ལ་གདུང་སེམས་མཉམ་སྐྱེད་གནང་བ་བརྒྱུད། རང་ལུས་མེར་བསྲེགས་ཀྱི་གནད་དོན་དེ་ལས་བོད་ནང་གི་རྒྱ་ནག་གི་གདུག་རྩུབ་ཀྱི་སྲིད་བྱུས་དེ་གསལ་བོར་ཕྱི་ལ་མངོན་ཡོད་པ་ཞིག་ཡིན་པའི་གཏམ་བཤད་གནང་སྟེ། བོད་མི་རྣམས་ས་གནས་གང་དུ་ཡོད་མེད་ལ་ལྟོས་མེད་ཀྱིས་བོད་སྤྱི་བའི་རྩ་དོན་འཐབ་རྩོད་ལ་འགན་འཁྲི་ལེན་དགོས་བའི་གཞེན་སྐུལ་གནང་འདུག

ཕྱི་ཟླ་ ༣ ཚེས ༣༡ ཉིན་ CECC ཞེས་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་ཕྱི་ལོ་ ༢༠༢༡ ལོའི་རྒྱ་ནག་ཐོག་སྤེལ་བའི་ལོ་འཁོར་སྙན་ཐོ་ཞིག་འདོན་སྤེལ་གནང་བའི་ནང་རྒྱ་ནག་དམར་ཤོག་གཞུང་གིས་བོད་མིའི་ཆོས་དད་རང་དབང་ལ་མུ་མཐུད་དྲག་གནོན་ཙམ་མ་ཟད། གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་པ་བཀོད་འདུག དེ་ཡང་ཨ་རིར་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་རྒྱ་ནག་དང་འབྲེལ་བའི་སྐོར་ལ་འདོན་སྤེལ་གནང་བའི་སྙན་ཐོའི་ནང་དོན་བཀོད་པའི་ནང་། རྒྱ་ནག་གཞུང་གིས་༸གོང་ས་སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ངོས་འཛིན་གནང་རྒྱུ་རྒྱ་ནག་ཁོ་ནར་ཡོད་སྐོར་བརྗོད་བཞིན་པ་དང་འབྲེལ། རྒྱ་ནག་གཞུང་གིས་མགོན་པོ་༸གང་ཉིད་མཆོག་ལ་དད་གུས་ཞུ་མཁན་རྣམས་ལ་ཉེས་ཆད་གཅོད་བཞིན་པ་དང་།  བོད་ཕྱི་ནང་གཉིས་སུ་འབྲེལ་ལམ་བྱ་རྒྱུ་དམ་དྲག་ཤུགས་ཆེར་བྱེད་རྒྱུ་དང་ལྷག་པར་དུ་ཕྱི་ཕྱོགས་སུ་ཡོད་པའི་བོད་མི་དང་འབྲེལ་ལམ་བྱེད་མཁན་ཀུན་ལ་གདུག་རྩུབ་མནར་གཅོད་གཏོང་གི་ཡོད་པ་མ་ཟད། རྒྱ་ནག་གཞུང་གིས་འཕྲུལ་རིགས་མ་ལག་བརྒྱུད་ཨ་རིའི་མི་སེར་ལའང་སོ་མྱུལ་བྱེད་ཀྱི་ཡོད་པ་སོགས་ལུང་འདྲེན་དང་སྦྲགས། ཨ་རིའི་སྲིད་འཛིན་བྷ་ཊན་མཆོག་གི་སྲིད་གཞུང་ནས་ Tibetan Policy and Support Act of 2020 ཞེས་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེ་བརྒྱུད་དེ་བོད་མིའི་ཆོས་དང་རིག་གཞུང་། དེ་བཞིན་ངོ་བོ་བཅས་སྲུང་སྐྱོབ་གནང་དགོས་པ་མ་ཟད། ཕྱི་འབྲེལ་མི་སྣས་༸གོང་ས་སྐུ་ཕྲེང་ ༡༥ པ་མཆོག་གི་གནད་དོན་ཐོག་རྒྱ་ནག་གཞུང་གིས་ཐེ་བྱུས་མི་ཡོང་བར་འབད་བརྩོན་གནང་དགོས་པ་གསུངས་ཡོད་པ་བཀོད་འདུག ད་དུང་ཚོགས་ཆུང་དེས་ཨ་རིའི་འཛིན་སྐྱོང་དང་གྲོས་ཚོགས་ནས་རྒྱ་ནག་གཞུང་ལ་གནོན་ཤུགས་སྤྲད་པ་བརྒྱུད་དེ་སྔ་གར་སོང་ཆ་མེད་དུ་གྱུར་བའི་ཀུན་གཟིགས་པཎ་ཆེན་རིན་པོ་ཆེ་མཆོག་དང་རྒྱལ་སྤྱིའི་ཚོགས་སྡེ་ཁག་གི་སྐུ་ཚབ་མི་སྣ་དང་ལྷན་དུ་མཇལ་མོལ་གནང་དུ་འཇུག་དགོས་བའི་ཞུ་སྐུལ་གནང་དགོས་པ་མ་ཟད། སྙན་ཐོ་འདི་བརྒྱུད་དེ་དེ་སྔ་ཨ་རིས་གཏན་འབེབས་གནང་པའི་ The Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་གནང་དགོས་རྒྱུ་དང་། འཛིན་སྐྱོང་དང་གྲོས་ཚོགས་འཐུས་མི་རྣམས་ནས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོང་གནང་རྒྱུའི་སླད་རྒྱལ་སྤྱིའི་གྲོས་ཚོགས་འཐུས་མི་གཞན་དང་ལྷན་དུ་རྒྱལ་སྤྱི་རང་བཞིན་ལྡན་པའི་མཉམ་རུབ་ཀྱི་ནུས་པ་སྤུངས་རྒྱུ་ཙམ་མ་ཟད། བཙན་བྱོལ་ནང་གི་དབུས་བོད་མིའི་སྒྲིག་འཛུགས་ཀྱི་འགོ་ཁྲིད་དང་ལྷན་དུ་དུས་ནས་དུས་སུ་བཀའ་མོལ་གནང་དགོས་པ་གསུངས་འདུག སྙན་ཐོ་འདི་དང་འབྲེལ་ནས་རྒྱལ་སྤྱི་བོད་དོན་ལས་འགུལ་ཁང་གི་སྲིད་གཞུང་དང་འབྲེལ་ལམ་འཇོག་མཁན་གྱི་ངེས་སྟོན་པ་ Franz Matzner ལགས་ཀྱིས་རྒྱ་ནག་གཞུང་གིས་བོད་ནང་སྤེལ་བཞིན་པའི་གདུག་རྩུབ་ཅན་གྱི་སྲིད་བྱུས་འོག་བོད་མིའི་ཆོས་དང་རིག་གཞུང་། དེ་བཞིན་གཞི་རྩའི་འགྲོ་བ་མིའི་ཐོབ་ཐང་ཁག་ནག་གསུབ་གཏོང་བཞིན་ཡོད་སྟབས། ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་ནས་འདོན་སྤེལ་གནང་བའི་སྙན་ཐོའི་ནང་གསལ་ལྟར། རྒྱལ་སྤྱིའི་ཚོགས་སྡེ་ཁག་ཀྱིས་ཀྱང་རྒྱལ་སྤྱིའི་བདེ་འཇགས་དང་། གཞི་རྩའི་འགྲོ་བ་མིའི་ཐོབ་ཐང་། དེ་བཞིན་ཆོས་དད་རང་དབང་སོགས་ཀྱི་གནད་དོན་ཀྱི་ཐོག་ནས་མཉམ་རུབ་གནང་དགོས་པ་གསུངས་འདུག

བཞུགས་སྒར་མེག་གྷན་དུ་ཡོད་པའི་ཤིང་མཁར་མགྲོན་ཁང་ Wood Castle དུ་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་རྒྱལ་ཡོངས་ཚོགས་ཆེན་འཚོགས་བཞིན་འདུག ཁ་སང་ཚོགས་ཆེན་དབུ་འཛུགས་ཀྱི་མཛད་སྒོ་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་དམིགས་བསལ་སྐུ་མགྲོན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ དབུ་མའི་ལམ་གྱི་ས་གནས་སོ་སོའི་རྒྱུན་ལས་སྐུ་ཚབ་སོགས་ལྷན་འཛོམས་གནང་བའི་ཐོག་སྲིད་སྐྱོང་མཆོག་གིས་དབུ་མའི་ལམ་གྱི་སྐོར་བཤད་པར་ལོ་རྒྱུས་ཀྱི་གནས་བབ་ཤེས་དགོས་གལ་དང་ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་མའི་ལམ་གྱི་དགོངས་པ་བཞེས་པ་དེ་བོད་ཆོལ་ཁ་གསུམ་གྱི་ཆེད་དུ་དགོངས་པ་བཞེས་ཀྱི་ཡོད་སྐོར་གསུངས་པ་དང་སྦྲགས། དབུ་མའི་ལམ་གྱི་བྱུང་རིམ་ངོ་སྤྲོད་གནང་སྟེ་ང་ཚོས་ད་ལྟའི་གནས་སྐབས་སུ་དབུ་མའི་ལམ་གྱི་སྐོར་ལ་འགྲེལ་བརྗོད་གནང་སྟངས་ཐད་དགོངས་པ་གཏིང་ཟབ་བཞེས་གནད་ཡིན་པ་མ་ཟད། ཕྱོགས་མཚུངས་གཞུང་གི་ལས་ཁུངས་དང་གཞུང་ཁོངས་མིན་པ་རྣམས་ཀྱིས་ཀྱང་ལས་དོན་ཚགས་ཚུད་གནང་ཕྱོགས་ཐད་དགོངས་པ་བཞེས་དགོས་པ་སོགས་གསུངས་སོང་། སྲིད་སྐྱོང་མཆོག་གིས་རྒྱལ་སྤྱིའི་སྟེང་བོད་ཀྱི་གནད་དོན་སྐོར་འགྲེལ་བརྗོད་གནང་བའི་ཁྲོད་སྐུ་ངལ་ཆེ་ཤོས་ནི་རྒྱ་ནག་གིས་འཛམ་གླིང་ནང་བོད་ཀྱི་གནད་དོན་ཐད་འཁྱོག་བཤད་དྲིལ་བསྒྲགས་ཤུགས་ཆེར་བྱས་པའི་རྒྱུ་མཚན་གྱིས་ད་ཆ་མི་མང་པོ་ཞིག་གི་བསམ་བློར་བོད་དེ་གདོད་མ་ཉིད་ནས་རྒྱ་ནག་གི་ཆ་ཤས་ཡིན་པར་བསམ་མཁན་ཡོད་པ་ཆགས་ཡོད་སྟབས། ང་རང་ཚོའི་ནང་ཁུལ་ལ་དབུ་མའི་ལམ་གྱི་གོ་རྟོགས་སྤེལ་ཐུབ་པ་ཙམ་གྱིས་འཛམ་གླིང་གི་མང་ཚོགས་ཚོས་ཤེས་ཀྱི་ཡོད་ཤག་བྱས་པ་དེ་ནོར་འཁྲུལ་ཡིན་སྐོར་གསུངས་པ་དང་ཆབས་ཅིག ང་ཚོའི་ངོས་ནས་བོད་དོན་ཞུ་གཏུག་ལས་འགུལ་སྤེལ་སྐབས་ཐོག་མར་དབུ་མའི་ལམ་གྱི་འགྲེལ་བརྗོད་གནང་བ་དང་། དེ་ནས་སྒེར་གྱི་དགོངས་པ་གང་ཡིན་འགྲེལ་བརྗོད་གནང་ཚེ་དེར་འགལ་ཟླ་གཟིགས་ཀྱི་མེད་སྐོར་བསྐྱར་ནན་གསུངས་ཡོད།  གཞི་རྩའི་ཚོགས་ཆེན་དེ་ཁ་སང་ནས་འགོ་བཙུགས་ཀྱིས་སང་ཉིན་བཅས་ཉིན་གྲངས་གསུམ་རིང་ཚོགས་ཀྱི་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིས་མཚོན་ཟབ་ཅིང་རྒྱ་ཆེའི་དགོངས་གཞི་དང་ལམ་སྟོན་རྣམས་སྤྱི་ཚོགས་ནང་གོ་རྟོགས་སྤེལ་ཐབས། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྒྲིག་འཛུགས་སྲ་བརྟན་ཡོང་ཐབས། བོད་ནང་གི་ཛ་དྲག་གནས་སྟངས་དང་འབྲེལ་བའི་ཐོག་དབུ་མའི་ལམ་མི་མང་ལས་འགུལ་ཁང་ནས་ལས་འགུལ་སྤེལ་ཕྱོགས་སོགས་གྲོས་གཞི་གྲོས་ཆོད་ཁག་ལ་བགྲོ་གླེང་གནང་གི་ཡོད་པ་རེད། ད་རེས་ཚོགས་ཆེན་ཐོག་ཁྱོན་ཚོགས་བཅར་བ་མི་གྲངས་ ༥༠ ལྷག་ནས་མཉམ་ཞུགས་གནང་འདུག

ཉེ་ཆར་ཡུ་རོབ་མཐུན་ཚོགས་དང་རྒྱ་ནག་དབར་དྲ་བརྙན་བརྒྱུད་ཆེས་མཐོའི་ལྷན་ཚོགས་ཚོགས་ཡོད་པ་དེའི་ཐོག་གཙོ་བོ་ཡུག་རེན་ནང་གི་དམག་འཁྲུག་གི་གནད་དོན་དང་ལྷན་དུ་རྒྱ་གཞུང་གིས་བོད་ནང་གི་བོད་མི་དང་དེ་བཞིན་ཤིན་ཅང་དང་ནང་སོག་གི་གྲངས་ཉུང་མི་རིགས་ཐོག་འཛིན་པའི་དྲག་པོའི་སྲིད་བྱུས་སྐོར་གླེང་འདུགདེ་ཡང་ཟླ་བ་འདིའི་ཚེས་ ༡ ཉིན་ཡུ་རོབ་མཐུན་ཚོགས་དང་རྒྱ་ནག་དབར་དྲ་བརྙན་བརྒྱུད་ཆེས་མཐོའི་ལྷན་ཚོགས་ཤིག་ཚོགས་ཡོད་པ་དང་བསྟུན་ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་ Charles Michel ལགས་ཀྱིས་ལྷན་ཚོགས་དེའི་ཐད་བསྒྲགས་གཏམ་ཞིག་སྤེལ་བའི་ནང་དུ། ཐེངས་འདིའི་ལྷན་ཚོགས་དེ་ནི་རྒྱུན་ལྡན་གྱི་ཚོང་འབྲེལ་སྐོར་མིན་པར་དེ་ནི་ཨུ་རུ་སུས་ཡུག་རེན་ནང་དུ་དམག་འཁྲུག་བྱུང་བཞིན་པའི་དུས་སྐབས་ཀྱི་ལྷན་ཚོགས་ཤིག་ཆགས་ཀྱི་ཡོད་པ་དང་ང་ཚོ་ཚང་མ་ཡུ་རོབ་ནང་དུ་རྒྱལ་སྲུང་ཀྱི་ངལ་བ་ཚབས་ཆེན་འོག་གནས་བཞིན་ཡོད་སྟབས་ཡུ་རོབ་མཐུན་ཚོགས་ཀྱི་ལས་དོན་གལ་ཆེ་ཤོས་དེ་ཡུཀ་རེན་ནང་གི་དམག་འཁྲུག་མཚམས་འཇོག་གིས་ཡུལ་དེའི་མང་ཚོགས་ལ་སྲུང་སྐྱོབ་གནང་རྒྱུ་ཡིན་པར་གསུངས་འདུག ལྷག་དོན་ལྷན་ཚོགས་དེའི་ཐོག་རྒྱལ་ཁབ་ཕྱོགས་གཉིས་ད་བར་གོ་ལའི་འཕྲོད་བསྟེན་གྱི་གནད་དོན་གཙོས་ཡོངས་ཁྱབ་རིམས་ནད་ཀྱི་སྔོན་འགོག་དང་ཛ་དྲག་གི་གྲ་སྒྲིག་དང་གདོང་ལེན་བཅས་ཀྱི་ཐོག་ལ་གླེང་སློང་གནང་བའི་ཁྲོད་རྒྱ་ནག་དང་ལྷན་དུ་གཅིག་གྱུར་གྱིས་གོ་ལ་སྲུང་སྐྱོབ་ཐད་མཉམ་ལས་གནང་རྒྱུ་དང་དེ་བཞིན་རྒྱ་གཞུང་ལ་ཁོར་ཡུག་དང་རྒྱལ་སྤྱིའི་སྣ་མང་སྐྱེ་དངོས་སྲུང་སྐྱོབ་བཅས་ཀྱི་ཐད་ལས་འགུལ་མང་ཙམ་སྤེལ་དགོས་པའི་ཞུ་འབོད་གནང་བ་མ་ཟད། གནད་དོན་ཁག་ཅིག་གི་ཐོག་ལ་ཕྱོགས་གཉིས་དབར་དགོངས་ཚུལ་མི་མཐུན་པ་བྱུང་བའི་ཁོངས་སུ་ཡུ་རོབ་མཐུན་ཚོགས་ཀྱིས་རྒྱ་གཞུང་ལ་བོད་ནང་གི་བོད་མི་དང་གཞན་ཡང་ཤིན་ཅང་དང་ནང་སོག་བཅས་ཀྱི་གྲངས་ཉུང་མི་རིགས་ཐོག་དྲག་གནོན་བྱེད་བཞིན་པ་དང་སྒོས་སུ་ཧོང་ཀོང་གི་རྒྱལ་ཁབ་གཅིག་ལ་ལམ་ལུགས་གཉིས་ཟེར་བའི་སྲིད་བྱུས་ལ་རྡོག་རོལ་གཏོང་ཐབས་བྱེད་བཞིན་པའི་ཐད་སེམས་འཚབ་ཀྱི་རྣམ་པ་ཆེད་བཏོན་གནང་སྟེ། འགྲོ་བ་མིའི་ཐོབ་ཐང་དང་འབྲེལ་ནས་སྒེར་ཁག་ཅིག་གི་གནད་དོན་ཡང་གླེང་སློང་གིས་རྒྱ་གཞུང་ལ་ཕྱོགས་གཉིས་དབར་གྱི་འགྲོ་བ་མིའི་ཐོབ་ཐང་གི་གྲོས་མོལ་བསྐྱར་གསོ་དགོས་པའི་འབོད་སྐུལ་ཞུས་དོན་ལྟར་སྲིད་བློན་ Li Keqiang གྱིས་དེ་འབྲེལ་གྲོས་མོལ་གང་མགྱོགས་འགོ་འཛུགས་བྱ་རྒྱུའི་ཁས་ལེན་བྱས་ཡོད་འདུག སྤྱིར་ད་ལན་གྱི་ལྷན་ཚོགས་འདི་བཞིན་གཙོ་བོ་ཡུག་རེན་ནང་གི་དམག་འཁྲུག་སྐོར་ལ་གླེང་སློང་གནང་རྒྱུ་དེ་ཆགས་ཀྱི་ཡོད་སྟབས། ཡུ་རོབ་མཐུན་ཚོགས་ཀྱིས་ད་ལྟའི་དཀའ་ཚེགས་ཆེ་བའི་དུས་སྐབས་འདིར་ཕྱོགས་གཉིས་དབར་གྲོས་མོལ་གནང་གལ་ཆེ་བ་ཡིན་དང་འདིའི་ཐད་དམིགས་བཀར་གྱིས་དམག་འཁྲུག་དེ་ཉིད་གང་མགྱོགས་མཚམས་འཇོག་ཡོང་སླད་ཐབས་ཤེས་གང་ཡོངས་གནང་བཞིན་པ་འགྲེལ་བརྗོད་དང་འབྲེལ།  ཡུ་རོབ་མཐུན་ཚོགས་དང་རྒྱ་ནག་གཉིས་ནས་ད་ལྟའི་དམག་འཁྲུག་དེ་ཉིད་གོ་ལ་སྤྱིའི་ཉེན་སྲུང་དང་དཔལ་འབྱོར་གནས་བབ་ལ་ཉེན་ཚབས་ཆེན་པོར་གྱུར་ཡོད་པར་མོས་མཐུན་གནང་བཞིན་ཡོད་པ་དང་ང་ཚོ་འཛམ་གླིང་ཞི་བདེ་དང་བརྟན་ལྷིང་ཡོང་སླད་གོ་ལའི་འགན་འཁུར་མི་སྣའི་ཕྱག་ལས་གནང་མཁན་ཡང་ཆགས་ཀྱི་ཡོད་སྟབས། རྒྱ་ནག་གཞུང་ནས་ཨུ་རུ་སུས་རྒྱལ་སྤྱིའི་ཁྲིམས་ལ་རྩིས་མེད་རྡོག་རོལ་གཏོང་བཞིན་པའི་གནད་དོན་དག་ལ་མིག་ལོང་བ་ལྟར་སྣང་མེད་དུ་གཏོང་རྒྱུ་མེད་པར་འགྲེལ་བརྗོད་ཀྱིས་ཡུ་རོབ་མཐུན་ཚོགས་དང་ལྷན་དུ་ཡུག་རེན་ནང་གི་དམག་འཁྲུག་དེ་ཉིད་མཚམས་འཇོག་ཡོང་སླད་རོགས་པ་གནང་དགོས་པའི་འབོད་སྐུལ་ཞུས་འདུག དེ་བཞིན་ཡུ་རོབ་མཐུན་ཚོགས་དང་རྒྱ་ནག་དབར་གྱི་ཆེས་མཐོའི་ལྷན་ཚོགས་ཐོག་ཕྱོགས་གཉིས་ཀྱི་ཚོང་འབྲེལ་དང་དཔལ་འབྱོར་འབྲེལ་ལམ་དེ་ཉིད་དྲང་བདེན་བརྒྱུད་ཕན་ཚུན་གཉིས་ཕན་ཡོང་སླད་གྲོས་བསྡུར་ལྷུག་པོ་གནང་བའི་ཁྲོད། རྒྱ་གཞུང་གིས་ལཱི་ཐི་ནི་ཡར་ཁ་གཏད་གཅོག་བྱེད་ཀྱིས་དབྱེ་འབྱེད་ཚོང་འབྲེལ་བྱས་པ་གཙོས་ཐེ་ཝན་དང་ ཨཧྥ་གྷན་དང་འབར་མ།   དེ་བཞིན་ཀོ་རི་ཡ་སོགས་ཀྱི་ནང་དཀའ་ངལ་གང་འཕྲད་སྐོར་དང་འབྲེལ་བའི་རྒྱལ་སྤྱིའི་གནད་དོན་ཁག་ཅིག་གི་ཐོག་ལའང་གྲོས་བསྡུར་གནང་འདུག རྩ་བའི་ཡུ་རོབ་མཐུན་ཚོགས་དང་རྒྱ་ནག་དབར་དྲ་བརྙན་བརྒྱུད་ཚོགས་པའི་ཆེས་མཐོའི་ལྷན་ཚོགས་དེའི་ཐོག་ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་ Charles Michel ལགས་དང་མཐུན་ཚོགས་ཀྱི་འཛིན་སྐྱོང་ལྷན་ཁང་གི་ཚོགས་གཙོ་ལྕམ་ Ursula von der Leyen ལགས། དེ་བཞིན་ཡུ་རོབ་མཐུན་ཚོགས་ཀྱི་ཕྱི་སྲིད་དང་བདེ་སྲུང་བློན་ཆེན་སྐུ་ཞབས Josep Borrell ལགས་བཅས་རྣམ་པ་གསུམ་དབུ་བཞུགས་ཐོག་ཚོགས་འདུ་གཙོ་སྐྱོང་གནང་སྟེ་རྒྱ་ནག་གི་སྲིད་འཛིན་ཞི་ཅིན་ཕིང་དང་སྲིད་བློན་ Li Keqiang གཉིས་ནས་དེར་མཉམ་ཞུགས་གནང་ཡོད་པ་རེད།  

སུད་སི་ནང་གནས་བཞུགས་བོད་མི་གཞས་པ་དང་སྒྱུ་རྩལ་བ་བློ་ལྡན་རྣམ་གླིང་ལགས་ཀྱིས་བོད་ནས་ཁྱེད་ལ་གཞས་གཅིག་ཅེས་པའི་མིང་བྱང་འོག་ཡོ་རོབ་རྒྱལ་ཁབ་ཁག་ཏུ་རང་ཉིད་ཀྱི་གླུ་གཞས་སྒྱུ་རྩལ་ལམ་ནས་བོད་དོན་ངོ་སྤྲོད་ཀྱི་སྐོར་སྐྱོད་ལས་འགུལ་ཞིག་སྤེལ་བཞིན་འདུག བློ་ལྡན་རྣམ་གླིང་ལགས་ཀྱིས་བོད་ཀྱི་རྒྱལ་དར་དང་བོད་རང་དབང་ཞེས་འབོད་ཚིག་སོགས་འཁོད་པའི་བོད་པའི་རྣམ་པ་མཚོན་པའི་རླངས་འཁོར་ཞིག་བཏང་སྟེ། ཡོ་རོབ་རྒྱལ་ཁབ་ཁག་གི་ནང་དུ་བོད་དོན་ཆེད་སྐོར་སྐྱོད་གནང་བཞིན་འདུགལས་འགུལ་དེ་ནི། ཁོང་གིས་ཐོག་མར་སྔར་ལོའི་༸སྐུའི་འཁྲུང་སྐར་ཉིན་སུད་སི་ནས་དབུ་འཛུགས་གནང་ཡོད་པ་དང། བོད་ནས་ཁྱེད་ལ་གཞས་གཅིག་འམ་ A Song from Tibet for You ཞེས་པའི་ལས་འགུལ་ཁྲོད་བོད་ཀྱི་ཐོུང་མ་ཡིན་པའི་གླུ་གཞས་སྒྱུ་རྩལ་ལམ་ནས་མང་ཚོགས་ལ་བོད་དོན་གོ་རྟོགས་སྤེལ་བའི་ལས་འགུལ་ཞིག་ཆགས་ཀྱི་ཡོད་པ་རེད། བློ་རྣམ་གླིང་ལགས་ཀྱིས་བོད་ནས་ཁྱེད་ལ་གཞས་གཅིག་ཅེས་པའི་བོད་དོན་སྐོར་སྐྱོད་ལས་འགུལ་དེ་སྦེལ་ཇམ་དང་འཇར་མི་ནི། ནི་ཐར་ལན་ཌི། ཨི་ཊ་ལི། ཕ་རན་སོགས་ཡོ་རོབ་རྒྱལ་ཁབ་མང་པོར་སྐོར་སྐྱོད་གནང་གི་ཡོད་པ་རེད། བོད་པའི་གཞས་པ་བློ་ལྡན་རྣམ་གླིང་ལགས་ནས་རྒྱུན་དུ་རང་ཉིད་གླུ་གཞས་སྒྱུ་རྩལ་ལམ་ནས་བོད་དོན་ངོ་སྤྲོད་དང་དྲིལ་བསྒྲགས་ཀྱི་ལས་འགུལ་མི་ཉུང་བ་ཞིག་སྤེལ་བཞིན་ཡོད་པ་དང། ཕྱི་ལོ་ ༢༠༡༢ ལོར་ཁོང་ནས་བོད་ནང་གི་དངོས་ཡོད་གནས་སྟངས་རྒྱལ་སྤྱིའི་མང་ཚོགས་ལ་གོ་རྟོགས་སྤེལ་བའི་བོད་རང་དབང་གི་འགྲུལ་བཞུད་ཅེས་པའི་མིང་བྱང་འོག་སུད་སི་རྒྱལ་ས་སྦན་ནས་ཇི་ནི་ལྦར་སྤུར་སྒམ་འགྲུད་དེ་གོམ་བགྲོད་ཀྱི་ལས་འགུལ་སྤེལ་ཡོད་པ་མ་ཟད། བོད་དོན་འཐབ་རྩོད་པ་ཞེས་པའི་དངོས་བྱུང་གློག་བརྙན་ཞིག་ཀྱང་འདོན་སྤེལ་གནང་ཡོད་པ་རེད།

ཉན་པ།: Listen ཕབ་ལེན། Download བོད་ཀྱི་བེུད་ལེ་ཚན། མོ་ནད་སྨན་པ་བསྟན་འཛིན་མཚོ་མོ། Sunday 03/04/2022 Women of Tibet: Gynaecologist and Obstetrician Dr. Tenzin Tsomo

བཀྲ་ཕུན་ལགས་ཀྱིས་རྔ་པ་ཀིརྟི་དགོན་པར་ལྟ་རྟོག་བྱེད་མཁན་གྱི་ཉེན་རྟོག་ལས་ཁུངས་མདུན་དུ་རང་ལུས་མེར་བསྲེགས་བཏང་རྗེས་ཉེན་རྟོག་པས་བཙན་ཁྲིད་བྱས་འདུག་པ་དང་རྗེས་སུ་ཁོང་འདས་གྲོངས་སུ་གྱུར་འདུགརླུང་འཕྲིན་ཁང་ལ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་ལགས་རྣམ་གཉིས་ཀྱིས་གནས་ཚུལ་མཁོ་སྤྲོད་གནང་བར་གཞིགས་ཚེ། ཕྱི་ཟླ་ ༣ ཚེས་ ༢༧ ཉིན་གྱི་ཞོགས་པའི་ཆུ་ཚོད་ལྔ་པ་ཡས་མས་སུ་རང་ལོ་ ༨༡ ཡིན་པའི་བཀྲ་ཕུན་ལགས་ཀྱིས་རྔ་པ་ཀིརྟི་དགོན་པར་ལྟ་རྟོག་བྱེད་མཁན་གྱི་ཉེན་རྟོག་ལས་ཁུངས་མདུན་དུ་རང་ལུས་མེར་སྲེག་བཏང་ནས་རྒྱ་གཞུང་གིས་བོད་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གནང་རྗེས་ཉེན་རྟོག་པས་བཙན་ཁྲིད་བྱས་འདུག་པ་དང་རྗེས་སུ་ཁོང་སྐུ་གྲོངས་ཡོད་པ་རེད་འདུག བོད་ནང་ནས་གནས་ཚུལ་མཁོ་སྤྲོད་གནང་མཁན་གྱིས་གསུངས་དོན། འདས་པའི་ལོ་མང་རིང་ཕྱི་ཟླ་གསུམ་པ་ནམ་ཡིན་ལ་རྒྱ་གཞུང་གིས་རྔ་པ་མི་མང་ལ་རྒྱུན་ལྡན་ལས་ལྷག་པའི་དམ་བསྒྲགས་དང་སུན་གཙེར། འདྲི་གཅོད་དང་བཀག་འགོག་སོགས་བྱས་པར་བརྟེན་དཀའ་ངལ་རབ་དང་རིམ་པ་བཟོས་པ་ལྟར་འདི་ལོ་ཡང་ཕྱི་ཟླ་གསུམ་པའི་ནང་དམིགས་བསལ་དམ་བསྒྲགས་ཆེན་པོ་བྱས་འདུག་ལ། བོད་མི་ཆེས་མང་པོ་ཞིག་འུ་ཐུག་ཐབས་ཟད་ཀྱི་གནས་སུ་བསྐྱལ་དང་སྐྱེལ་བཞིན་པའི་གནས་བབ་དེ་མངོན་གསལ་ཆགས་ཡོད་པའི་འགྲེལ་བརྗོད་ཀྱང་གནང་སོང་། བཀྲ་ཕུན་ལགས་ནི་རྔ་པའི་འབྲོག་སྡེ་རྨེའུ་རུ་མའི་རུ་ཆེན་གསུམ་པའི་ཕུར་རྩ་ཚང་ནས་ཡིན་པ་དང་། དུས་རྟག་ཏུ་བོད་དོན་ལ་སེམས་ཁུར་དང་ལ་རྒྱ་ཡོད་མཁན་ཞིག་ཡིན་འདུག ལྷག་པར་དུ་ཁོང་གིས་ ༢༠༢༡ ལོར་བརྒྱད་ཅུའི་གྱ་སྟོན་སྐབས་སུ་༸རྒྱལ་བ་རིན་པོ་ཆེའི་ཐུགས་རྗེ་བྱིན་རླབས་ཀྱིས། བོད་ལ་སྐྱིད་པའི་ཉི་མ་ཞིག་ཤར་རྒྱུ་ཡོད་པ་གཏན་འཁེལ་ཡིན་པས་ན་ཆུང་གཞོན་ནུ་ཚོའི་སེམས་ཤུགས་མ་ཆགས་ཞེས་གཏམ་བཤད་སྤེལ་མྱོང་ཡོད་པ་རེད།