བོད་མིའི་སྒྲིག་འཛུགས་ནས་བདག་ཉིད་ཆེན་པོ་གྷན་དྷིའི་མཆོག་གི་འཁྲུངས་སྐར་སྲུང་བརྩི་ཞུས་པ།

བོད་མིའི་སྒྲིག་འཛུགས་ཀྱིས་མེས་པོ་དམ་པ་བདག་ཉིད་ཆེན་པོ་གྷན་དྷི་མཆོག་རྗེས་དྲན་ཞུས་པ་དང་ཆབས་ཅིག ཁོང་གིས་ལམ་སྟོན་མཛད་པའི་འཚེ་མེད་ཞི་བ་ནི་རྩོད་རྙོག་འདུམ་སྒྲིག་གི་ལྡེ་མིག་ལྟ་བུ་ཡིན་པ་གསུངས་གནང་སོང་།
ཁ་སང་ཟླ་ ༡༠ ཚེས་ ༢ ཉིན་སྔ་དྲོ་ཚོུད་ ༩།༠༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་ཕྱག་སྦྲེལ་བཀའ་བློན་རྣམ་པ་དང་ལྷན་ཁང་ཁག་གི་དྲུང་ཆེ་ཆུང་རྣམ་པ་བཅས་བཀའ་ཤག་ཏུ་ལྷན་འཛོམས་ཀྱིས་ཆེས་ཐོག་མར་རྒྱ་གར་གྱི་རྒྱལ་གླུ་དབྱངས་སུ་གྱེར་པ་དང་དུས་མཚུངས་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་ཡོད་པ་རེད།
སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་ཕྱི་ནང་གི་གསར་འགོད་པ་རྣམས་ལ་ཁ་སང་གི་ཉིན་མོ་དེ་ནི་བདག་ཉིད་ཆེན་པོ་མཆོག་གི་འཁྲུངས་སྐར་ཙམ་མ་ཡིན་པར་རྒྱལ་ཚོགས་ནས་གསལ་བསྒྲགས་བསྐྱངས་དོན་ལྟར། འཛམ་གླིང་འཚེ་མེད་ཞི་བའི་ཉིན་མོ་ཞིག་ཀྱང་ཆགས་ཡོད་པ་འགྲེལ་བརྗོད་དང་འབྲེལ། རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུས་པ་མ་ཟད། ལྷག་དོན་སྲིད་སྐྱོང་མཆོག་གིས་བོད་མི་ཚོའང་གྷན་དྷི་མཆོག་གི་རྗེས་སུ་འབྲངས་ནས་༸གོང་ས་མཆོག་གི་འཆར་སྣང་བཞིན་འཚེ་མེད་ཞི་བའི་སྟེང་མུ་མཐུད་ཆོད་སེམས་བརྟན་པོའི་ངང་གནས་རྒྱུའི་དམ་བཅའ་ཡོད་པ་གསུངས་སོང་།
བདག་ཉིད་ཆེན་པོ་གྷན་དྷི་མཆོག་གི་འཁྲུངས་སྐར་ ༡༤༧ པ་དེ་དང་བསྟུན་རྒྱ་གར་རྒྱལ་ཡོངས་ནང་Swachh Bharat Abhiyan ཞེས་པའི་ཁོར་ཡུག་གཙང་བཟོའི་ལས་གཞི་ཞིག་ཀྱང་སྤེལ་ཡོད་སྟབས། འདི་ག་བཞུགས་སྒར་དུའང་ས་གནས་ཀྱི་ཧིན་བོད་མཛའ་འབྲེལ་ཚོགས་པས་གོ་སྒྲིག་འོག་ཁོར་ཡུག་གཙང་བཟོའི་ལས་འགུལ་སྤེལ་ཡོད་པ་རེད།
གཞི་རྩའི་བདག་ཉིད་ཆེན་པོ་གྷན་དྷི་མཆོག་ནི་ཕྱི་ལོ་ ༡༨༦༩ ལོར་སྐུ་འཁྲུངས་ཡོད་པ་དང་། ཁོང་ནི་རྒྱ་གར་གྱི་རྩ་དོན་གྲུབ་སླད་འཚེ་མེད་ཞི་བའི་ཐབས་ལམ་བསྟན་གནང་མཛད་མཁན་ཞིག་ཆགས་ཡོད་པ་རེད།