དབྱིན་ཡུལ་གྱི་རྒྱལ་ས་ལོན་ཊོན་ནང་རྟེན་གཞི་བྱས་པའི་ Scheherazade ཐེབས་རྩས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་འགྲོ་བ་མིའི་རིགས་ཀྱི་བདེ་དོན་དང་ཆོས་ལུགས་མཐུན་སྒྲིལ། དེ་བཞིན་འཛམ་གླིང་ཞི་བདེ་བཅས་ཀྱི་ཆེད་དུ་བསྐྱངས་པའི་རླབས་ཆེན་གྱི་མཛད་རྗེས་ལ་ཆེ་བསྟོད་ཀྱི་གསེར་གྱི་གཟེངས་རྟགས་ཕུལ་འདུག
Scheherazade ཐེབས་རྩ་ཁང་གི་གསེར་གྱི་གཟེངས་རྟགས་ནི། ཐེབས་རྩ་ཁང་གིས་འཛམ་གླིང་ཐོག་བེུད་ཀྱི་ནུས་སྟོབས་གོང་འཕེལ་བརྒྱུད་ནས་དམིགས་དཔེ་ལྡན་པའི་མ་འོངས་ན་གཞོན་བེུད་འགོ་ཁྲིད་རྩོད་ལེན་གནང་མཁན་དང། རིག་གཞུང་ཕན་ཚུན་དབར་མཐུན་ལམ་དང་སེམས་ཐག་ཉེ་པོའི་ཐོག་ནས་ཁྱད་དུ་འཕགས་པའི་མཛད་རྗེས་འཇོག་མཁན་སྐྱེ་བོ་རྣམས་ལ་ཕུལ་གྱི་ཡོད་པ་རེད།
ཟླ་བ་འདིའི་ཕྱི་ཚེས་ ༡༤ ཉིན་དབྱིན་ཡུལ་ནང་རྟེན་གཞི་བྱས་པའི་ Scheherazade ཐེབས་རྩ་ཁང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་འགྲོ་བ་མིའི་རིགས་ཀྱི་བདེ་དོན་དང་ཆོས་ལུགས་མཐུན་སྒྲིལ། དེ་བཞིན་འཛམ་གླིང་ཞི་བདེ་བཅས་ཀྱི་ཆེད་དུ་བསྐྱངས་པའི་རླབས་ཆེན་གྱི་མཛད་རྗེས་ལ་ཆེ་བསྟོད་ཞུ་ཕྱིར་ཐེབས་རྩ་ཁང་གསར་འཛུགས་གནང་མཁན་རྩོམ་པ་པོ་ Tahir Shah ལགས་ཀྱི་བུ་ Timur Shah ལགས་ནས་ཐེབས་རྩའི་སྐུ་ཚབ་ཞུས་ཏེ་དབྱིན་ཡུལ་བོད་ཀྱི་སྐུ་ཚབ་དོན་གཅོད་ཁང་དུ་ཆེད་བཅར་གྱིས་གསེར་གྱི་གཟེངས་རྟགས་དེ་ཉིད་སྐུ་ཚབ་དོན་གཅོད་བརྒྱུད་ནས་ཕུལ་འདུག
རྩ་བའི་ Scheherazade ཐེབས་རྩ་ཁང་ནི་ཕྱི་ལོ་ ༢༠༢༠ ལོར་དབྱིན་ཡུལ་ནང་གནས་བཞུགས་དང་རྩོམ་པ་པོ་དང་དངོས་བྱུང་གློག་བརྙན་བཟོ་སྐྲུན་པ་ Tahir Shah ལགས་ཀྱིས་བཙུགས་པའི་ཁེ་མེད་ཚོགས་པ་ཞིག་ཡིན་འདུག་ཅིང་། ད་བར་ཐེབས་རྩ་ཁང་དེའི་གསེར་གྱི་གཟེངས་རྟགས་ལྷོ་ཨ་ཕི་རི་ཀའི་སྲིད་འཛིན་དམ་པ་ Nelson Mandela མཆོག་དང་དབུལ་ཕོངས་སྐྱོང་མཁན་ཡེ་ཤུའི་ཨ་མ་དམ་པ་ Mother Teresa ལགས་སོགས་འཛམ་གླིང་གི་ཆབ་སྲིད་དབུ་ཁྲིད་དང་སྤྱི་ཚོགས་ཞབས་ཞུ་བ། དེ་བཞིན་རྩོམ་པ་སོགས་སྐྱེ་བོ་ ༡༩ ལྷག་ལ་ཕུལ་ཡོད། ཐེབས་རྩ་ཁང་གསར་འཛུགས་གནང་མཁན་རྩོམ་པ་པོ་ Tahir Shah ལགས་ ༢༠༠༩ ལོར་བཞུགས་སྒར་དྷརྨ་སཱ་ལཱར་ཆེད་བཅར་གྱིས་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་ཡོད་པ་རེད།
