ཨ་རིའི་ Ohio མངའ་སྡེའི་ Columbus ཁུལ་དུ་རྟེན་གཞི་བྱས་པའི་ Huntington Bancshares དངུལ་ཁང་དུ་ཕྱག་ལས་གནང་མཁན་བོད་རིགས་བུད་མེད་ Tenzin Alexander ལགས ཨ་རིའི་ནང་དུ་ལོ་འདིའི་དངུལ་ཁང་སྟངས་འཛིན་གྱི་ལས་དོན་ཐད་ཆེས་ཤུགས་རྐྱེན་ཆེ་བའི་བེུད་དུ་བདམས་ཐོན་བྱུང་འདུག
དེའང་ American Banker ཞེས་ཚོང་ལས་དང་འབྲེལ་བའི་ཉིན་རེའི་གསར་ཤོག་ངོས་ནས་ལོ་ལྟར། སྡེ་ཚན་བཞིར་ཆ་བགོས་ཀྱིས་དངུལ་ཁང་གི་ལས་དོན་ཐད་ནས་མང་ཚོགས་ལ་ལེགས་ཕྱོགས་ཀྱི་ཤུགས་རྐྱེན་ཆེས་ཆེ་བའི་བུད་མེད་རྩེ་ཕུད་ཉེར་ལྔའི་མཚན་གཞུང་འདོན་སྤེལ་གནང་གི་ཡོད་པ་བཞིན། འདི་ལོའི་མཚན་གཞུང་ནང་ Tenzin Alexander ལགས་མཚན་འདོན་གནང་ཡོད་པ་རེད།
དྲ་ལམ་དུ་གནས་ཚུལ་ཐོན་པ་ལྟར་ན།འདི་ལོ་རྒྱ་ནག་གི་ཏོག་དབྱིབས་རིམས་ནད་ཀྱི་རྐྱེན་གྱིས་མི་མང་གི་འགྲོ་འདུག་སོགས་ལ་དཀའ་ངལ་འཕྲད་བཞིན་པའི་ཁྲོད་དུ། བསྟན་འཛིན་ལགས་ཀྱིས་སྤྱི་ཚོགས་དྲ་རྒྱ་བརྒྱུད་ནས་རང་ནུས་ཅི་ཡོད་ཀྱིས་མི་མང་གི་འཚོ་བའི་དགོས་མཁོ་དང་བཟོ་ལས་ཁང་གི་དངོས་ཟོག་ཐོན་སྐྱེད་སོགས་ཀྱི་ཐད་ནས་མི་མང་དང་བཟོ་ལས་ཁང་གི་འབྲེལ་མཐུད་ཀྱི་ཕྱག་ལས་རྒྱ་ཆེར་གནང་སྟེ། Huntington དངུལ་ཁང་གི་མ་དངུལ་ཨ་སྒོར་ཐེར་འབུམ་ ༡༡༤ ལྷག་གི་དངུལ་རྩིས་སྤྱི་ཚོགས་དྲ་ལམ་གྱི་ཐབས་ལམ་བརྒྱུད་ནས་སྟངས་འཛིན་གནང་ཡོད་པ་རེད་འདུག
ཁོང་གིས་དུས་རྒྱུན་ནས་སྤྱི་ཚོགས་དྲ་རྒྱ་བརྒྱུད་ནས་དངུལ་ལས་སྟངས་འཛིན་གྱི་འབྲེལ་ལམ་ཐད་ནས་ཕྱག་ལས་གནང་གི་ཡོད་པ་ལྟར། ཁོང་སྤྱི་ལོ་ ༢༠༡༨ ལོར་ཁོང་ Huntington དངུལ་ཁང་གི་སྤྱི་ཚོགས་དྲ་རྒྱའི་འགན་འཛིན་དུ་བསྐོ་བཞག་གནང་ཡོད་འདུག ཁོང་གིས་སྤྱི་ཚོགས་དྲ་རྒྱ་ནི་མི་མང་གིས་རང་གི་བསམ་ཚུལ་དག་ལས་སླ་བོའི་ངང་ནས་ཕྱིར་འདོན་དང་བསྡུ་ལེན་བྱེད་སའི་བརྒྱུད་ལམ་ཡག་པོ་ཞིག་ཡིན་པ་དང་། ཁོང་གིས་དུས་རྒྱུན་ནས་སྤྱི་ཚོགས་དྲ་རྒྱ་བརྒྱུད་ནས་མི་མང་གི་བསམ་ཚུལ་ལ་ཉན་རྒྱུར་དགའ་བོ་ཡོད་པར་འགྲེལ་བརྗོད་གནང་འདུག
གཞི་རྩའི་བོད་རིགས་བུད་མེད་བསྟན་འཛིན་ལགས་རྒྱ་གར་དུ་སྐྱེས་བ་ཞིག་ཡིན་ནའང་། ཁོང་དགུང་ལོ་ལྔ་ལ་སོན་དུས་ཕ་མ་གཉིས་དང་ལྷན་དུ་ཨ་རིའི་ནང་དུ་ཕྱིན་ཏེ་ཁུལ་དེར་སློབ་སྦྱོང་རིམ་པ་ཐོན་རྗེས་ཁ་པར་འབྲེལ་མཐུད་ཁང་ཞིག་གི་ནང་དུ་ཕྱག་ལས་གནང་ཡོད་པ་དང་། ཕྱིས་སུ་ཁོང་གིས་ས་གནས་ཀྱི་བཟོ་ལས་དང་འབྲེལ་བ་བཙུགས་ཏེ། ད་ཆ་ཁང་པ་གསར་རྒྱག་གིས་བསམ་བློའི་དཀའ་ངལ་ཡོད་པའི་དབུལ་ཕོངས་རྣམས་ཁང་གླ་གཏོང་རྒྱུའི་ལས་འཆར་ཞིག་དབུ་འཛུགས་གནང་ཡོད་པ་རེད་འདུག
