༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རུ་ནཱ་ཅལ་མངའ་ཁུལ་དུ་ཟླ་ ༤ ཚེས་ ༢ ཉིན་ནས་དབུ་འཛུགས་ཀྱིས་དེ་རིང་ཟླ་ ༤ ཚེས་ ༡༡ བར་ཁྱོན་ཉིན་གྲངས་ ༡༠ རིང་གི་མཛད་འཕྲིན་ཁག་ལེགས་གྲུབ་མཛད་ནས་དེ་རིང་སྔ་དྲོ་ཚོུད་ ༩།༠༠ སྟེང་མགོན་པོ་༸གང་ཉིད་མཆོག་རྟ་དབང་ནས་ཐད་ཕུར་གནམ་གྲུ་བརྒྱུད་གྷོ་ཧ་ཊི་དང་དེ་ནས་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལིར་ཆིབས་ཞལ་བསྒྱུར་གནང་མཛད་སོང་། རྩ་བའི་དེ་རིང་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མོན་རྟ་དབང་ནས་ཆིབས་ཞལ་མ་བསྒྱུར་གོང་དུ་རྟ་དབང་དགའ་ལྡན་ལྷ་རྩེ་རྣམ་རྒྱལ་གླིང་དུ་མགོན་པོ་མཆོག་ལ་ཕེབས་སྐྱེལ་དང་མཐོན་མཇལ་ཞུ་བར་བཅར་མཁན་འབྲུག་པ་དང་ས་གནས་ཀྱི་མོན་པའི་མང་ཚོགས་ཆེས་དུ་མ་འདུ་འཛོམས་བྱུང་ཡོད་པ་དེ་དག་ལ་མགོན་པོ་༸གང་ཉིད་མཆོག་གིས་སྐར་མ་བརྒྱད་ཙམ་རིང་ལ་ལམ་སྟོན་བཀའ་སློབ་བཀྲིན་བསྩལ་སོང་། སྐབས་དེར་མགོན་པོ་མཆོག་གིས་མོན་པའི་མང་ཚོགས་ཚོའི་དད་པ་དང་དམ་ཚིག དེ་བཞིན་ལ་རྒྱ་གཡོ་བ་མེད་པ་ཡོད་སྟབས་མགོན་པོ་༸གང་ཉིད་མཆོག་ཐུགས་ཧ་ཅང་དགྱེས་ཚོར་བྱུང་སྐོར་བཀའ་བསྩལ་དང་ཆབས་ཅིག མང་ཚོགས་ཀྱི་ངོས་ནས་ནང་ཆོས་ལ་སློབ་གཉེར་གནང་དགོས་གལ་ཡིན་པ་དང་། ༸གོང་ས་མཆོག་ལ་ཆ་མཚོན་ན་ད་ལྟ་དགུང་གྲངས་ ༨༢ ལ་ཕེབས་ཟིན་ཀྱང་ད་དུང་སློབ་མ་ཞིག་ཡིན་པའི་འདུ་ཤེས་ཐོག་ནས་ནང་ཆོས་ལ་སློབ་གཉེར་གནང་བཞིན་ཡོད་པ་བཀའ་བསྩལ་སོང་། དེས་ན་མོན་པའི་མང་ཚོགས་ཚོས་ཀྱང་དེ་དེ་བཞིན་ནང་པའི་ལྟ་གྲུབ་ལ་དོ་སྣང་དང་བགྲོ་གླེང། དེ་བཞིན་སློབ་གཉེར་བྱེད་དགོས་ཞེས་བཀའ་ནན་བསྩལ་ཡོད། ༸གོང་ས་མཆོག་གིས་དེ་བཞིན་འབྲུག་གི་དད་ལྡན་ཆོས་ཞུ་བ་ཚོར་འབྲུག་པའི་རྒྱལ་ཁབ་དེ་འཛམ་གླིང་འདིའི་སྟེང་གི་རང་དབང་ལུང་པའི་ཁྲོད་ནས་ནང་པ་སངས་རྒྱས་པའི་ཆོས་ལྡན་ཞིང་ཁམས་ཀྱི་རྒྱལ་ཁབ་གཅིག་པོ་དེ་ཡིན་པ་དང་། བོད་དང་འབྲུག་ལ་ཆ་མཚོན་ན་གནའ་སྔ་མོ་ནས་ཁྱིམ་མཚེས་རྒྱལ་ཁབ་ཡིན་པ་རེད། སྐབས་རེ་འཁྲུག་པ་ཕྲན་བུ་རྒྱབ་ཀྱི་ཡོད་ཀྱང་། བོད་དང་འབྲུག་གཉིས་པོ་བུ་རྒན་གཞོན་ལྟ་བུ་རེད་ཅེས་བཀའ་བསྩལ་བ་དང་འབྲེལ། ད་ལྟའི་འབྲུག་གཞུང་དེ་ཕྱི་དངོས་པོའི་ཡར་རྒྱས་འགྲོ་བཞིན་ཡོད་པ་དང་དེ་མཚུངས་རང་ཉིད་ཀྱི་ཕ་མེས་ནས་ཡོད་པའི་ནང་པ་སངས་རྒྱས་པའི་ཆོས་དེ་ལམ་དང་ལུགས་སྲོལ་ལྟར་གནང་པ་ཙམ་མིན་པར་དོན་དངོས་ཐོག་སློབ་གཉེར་གནང་དགོས་གལ་ཡིན་པ་སོགས་བཀའ་བསྩལ་ཡོད་པ་རེད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་ ༣ ཚེས་ ༣༡ ཉིན་ནས་ཐོག་མར་རྒྱ་གར་བྱང་ཤར་ཨ་སམ་མངའ་སྡེ་གྲོང་ཁྱེར་གྷོ་ཧ་ཊི་དང་དེ་བཞིན་སྡིབ་རུ་གར་ས་གནས་གཉིས་ཀྱི་མང་ཚོགས་རྣམས་ལ་བཀའ་སློབ་བསྩལ་བ་དང་། དེ་བཞིན་ཟླ་ ༤  ཚེས་ ༢ ཉིན་ནས་དབུ་འཛུགས་ཀྱིས་ཨ་རུ་ནཱ་ཅལ་མངའ་སྡེའི་བསྟན་འཛིན་སྒང་དང་འབུམ་སྡེ་ལ།  སྡི་རང་། རྟ་དབང་བཅས་ཀྱི་མང་ཚོགས་ཚོར་བཀའ་ཆོས་དང་། གསར་བཞེངས་བྱུང་བའི་དགོན་སྡེ་སོགས་ལ་དབུ་འབྱེད་རབ་གནས་གནང་པ་དང་། མང་ཚོགས་ལ་བཀའ་སློབ་སོགས་ཀྱི་མཛད་འཕྲིན་རྒྱ་ཆེ་བསྐྱངས་གནང་མཛད་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མོན་རྟ་དབང་ཁུལ་དུ་ཉིན་གྲངས་གསུམ་གྱི་ཆོས་འབྲེལ་ལེགས་གྲུབ་ཀྱིས་རེ་ཞིག་མཇུག་སྒྲིལ་གནང་པ་དང་འབྲེལ། མགོན་པོ་༸གང་ཉིད་མཆོག་གིས་རིང་མིན་ལོ་གཅིག་གཉིས་ནང་སླར་མོན་རྟ་དབང་ཁུལ་དུ་ཆིབས་བསྒྱུར་མཛད་རྒྱུར་ཞལ་བཞེས་གནང་སོང་། དེ་རིང་ཟླ་ ༤ ཚེས་ ༡༠ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྟ་དབང་ཡིད་དགའ་ཆོས་འཛིན་གསུང་ཆོས་ར་བར་ཕྱི་ནང་གི་དད་ལྡན་ཆོས་ཞུ་བ་ཁྲི་བཞི་ལྷག་ལ་རིག་འཛིན་གདུང་སྒྲུབ་ཀྱི་བཀའ་དབང་བཀྲིན་བསྩལ་བ་དང་ཆབས་ཅིག་ཏུ་ས་གནས་ཀྱི་བཏང་སྙོམས་ཚོགས་ཞེས་རྟ་དབང་ས་གནས་དུད་འགྲོའི་རང་དབང་སྲུང་སྐྱོབ་ཚོགས་པས་གོ་སྒྲིག་འོག་རྟ་དབང་མང་ཚོགས་ནས་མགོན་པོ་མཆོག་ལ་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་གནང་སོང་། སྐབས་དེར་༸གོང་ས་མཆོག་གིས་མོན་ཡུལ་ས་གནས་མང་ཚོགས་ཚོས་མགོན་པོ་༸གང་ཉིད་མཆོག་ལ་དད་པ་དང་དམ་ཚིག ལ་རྒྱ་བཅས་གཡོ་བ་མེད་པའི་ནུས་པར་བརྟེན་ནས་ད་རེས་མགོན་པོ་༸གང་ཉིད་མཆོག་མོན་ཡུལ་ཁུལ་གྱི་ཆིབས་བསྒྱུར་དེའི་ཁྲོད་༸སྐུ་ཉིད་ཀྱི་མཐོང་འདོད་དྲན་ཡོད་གང་ཡོད་པ་བཞིན་ཕན་ཐོགས་ཆེན་པོ་བྱུང་སོང་ཞེས་བཀའ་བསྩལ་བ་མ་ཟད། ལྷག་དོན་མོན་པའི་མི་རབས་རྙིང་པ་ཚོ་བརྗེ་འགྲོ་གི་ཡོད་ཀྱང་། མི་རབས་གཞོན་པ་ཚོས་བོད་དོན་ལ་ལྷག་བསམ་རྣམ་དག་འགན་ཁུར་དང་རྒྱབ་སྐྱོར་རྒྱུན་སྐྱོང་གནང་བཞིན་པར་ཡི་རང་བསྔགས་བརྗོད་མཛད་ཡོད་པ་རེད། དེ་བཞིན་༸གོང་ས་མཆོག་གིས་ད་རེས་ཉིན་གསུམ་གྱི་ཆོས་འབྲེལ་ཞུ་ཟིན་རྗེས་མོན་པའི་མང་ཚོགས་ཚོས་དུས་རྒྱུན་སེམས་པ་བཟང་པོ་བྱེད་དགོས་ཞེས་བཀའ་བསྩལ་བ་དང་འབྲེལ། མགོན་པོ་༸གང་ཉིད་མཆོག་གིས་རིང་མིན་ལོ་གཅིག་གཉིས་ནང་སླར་མོན་རྟ་དབང་ཁུལ་དུ་སླར་ཆིབས་བསྒྱུར་མཛད་རྒྱུར་ཞལ་བཞེས་གནང་སོང་། གཞན་ཡང་ཨུ་རུ་ནཱ་ཅལ་མངའ་སྡེའི་གྲོས་ཚོགས་ཀྱི་འཐུས་མི་འཇམ་དཔལ་བཀྲིས་ལགས་ཀྱིས་ ༸གོང་ས་༸སྐྱབས་མགོན་ཆེན་པོ་མཆོག་གིས་ད་ལན་ས་གནས་སུ་གནམ་གཤིས་དང་ཕེབས་ལམ་ལེགས་པོ་མེད་པར་ལྟོས་མེད་ཀྱིས་མོན་ཡུལ་མང་ཚོགས་ལ་ཐུགས་བརྩེ་བ་ཆེན་པོས་ས་གནས་སུ་ཆིབས་བསྒྱུར་གྱིས་ཆོས་ཀྱི་འཁོར་ལོའི་མཛད་འཕྲིན་རླབས་ཆེན་བསྐྱངས་པར་མོན་ཡུལ་གཞུང་མང་གཉིས་ཀྱི་ཚབ་ཞུས་ནས་མགོན་པོ་༸གང་ཉིད་མཆོག་ལ་ཐུགས་རྗེ་བླ་མེད་དུ་ཆེ་ཞེས་ཞུས་བ་མ་ཟད། མོན་ཡུལ་མང་ཚོགས་ཚོའི་ངོས་ནས་དུས་དང་རྣམ་པ་ཀུན་ཏུ་བོད་དོན་ལ་གདུང་སེམས་མཉམ་བསྐྱེད་ཡོད་ཅེས་གསུངས་སོང་། ལྷག་དོན་ཁོང་གིས་༸གོང་ས་མཆོག་གིས་བསྩལ་བའི་བླང་དོར་ལམ་སྟོན་འོག་མོན་ཡུལ་མང་ཚོགས་རྣམས་ཤར་བསྐྱོད་བྱ་རྒྱུའི་ཁས་ལན་རྒྱུ་ཡིན་ཅེས་གསུངས་པ་དང་ཆབས་ཅིག ཁོང་གིས་རྒྱ་གར་གྱི་རྒྱལ་ཁབ་དེ་བོད་དང་ས་འབྲེལ་ཞིག་ཡིན་པ་རེད། དེས་ན་༸གོང་ས་༸སྐྱབས་མགོན་ཆེན་པོ་མཆོག་ཨ་རུ་ནཱ་ཅལ་ས་གནས་སུ་ཆིབས་བསྒྱུར་མཛད་རྒྱུའི་ཐད་ལ་རྒྱ་ནག་གཞུང་གིས་དགག་བྱ་ཞུ་རྒྱུར་རྒྱུ་མཚན་གང་ཡང་ཡོད་མ་རེད་ཅེས་གོ་སྐབས་དེའི་བརྒྱུད་ནས་གསལ་པོ་བཟོ་རྒྱུ་ཡིན་ཅེས་གསུངས་སོང་། དེ་རིང་སྔ་དྲོ་མགོན་པོ་མཆོག་གིས་ཆོས་འབྲེལ་གྲུབ་པའི་རྗེས་སུ་ཡིད་དགའ་ཆོས་འཛིན་གསུང་ཆོས་ར་བའི་ནང་དུ་རྟ་དབང་ས་གནས་ཁག་གི་མང་ཚོགས་དང་། བོད་མི། འབྲུག་པ་གསུམ་ནས་དགའ་དད་སྤྲོ་གསུམ་འཁོད་པའི་ཐོག་ནས་རང་སོ་སོའི་རིག་གཞུང་གཞས་སྣ་ཁག་༸གོང་ས་མཆོག་ལ་སྤྱན་འབུལ་ཞུས་ཡོད་པ་རེད། རྩ་བའི་༸གོང་ས་༸སྐྱབས་མགོན་ཆེན་པ་མཆོག་བཙན་བྱོལ་དུ་ཕེབས་སྐབས་ཐོག་མར་མོན་རྟ་དབང་ཁུལ་དུ་ཆོས་ཕྱོགས་མཛད་འཕྲིན་ཆེས་ཐོག་མ་དེ་བསྐྱངས་གནང་མཛད་པ་སོགས་ཀྱི་བཀྲིན་རྗེས་དྲན་སླད་དུ་མོན་རྟ་དབང་ཁུལ་གྱི་ཆོས་རིག་ལས་ཁུངས་ནས་ཕྱོགས་བསྒྲིགས་ཞུས་པའི་དཔེ་དེབ་རྒྱ་མཚོ་དང་རི་བོ་སྔོན་པོ་ཞེས་པ་དེ་མགོན་པོ་༸གང་ཉིད་མཆོག་གིས་དབུ་འབྱེད་མཛད་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་རེས་གཟའ་ཉིན་མའི་ཉིན་མོན་རྟ་དབང་ཁུལ་དུ་ལག་ལེན་སོ་བདུན་མའི་ཆོས་འབྲེལ་སྐབས་མང་ཚོགས་ལ་དོལ་རྒྱལ་བསྟེན་སྲོལ་དང་སྤྲུལ་སྐུའིཡང་སྲིད་ངོས་འཛིན་གནང་ཕྱོགས་སྐོར་བླང་དོར་བཀའ་སློབ་བཀྲིན་བསྩལ་བ། སྤྱན་རས་གཟིགས་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་བ། ༸རྒྱལ་དབང་ཚངས་དབྱངས་རྒྱ་མཚོ་མཆོག་གི་འཁྲུངས་ཁང་གནས་གཟིགས། མངའ་སྡེ་བློན་ཆེན་དམ་པ་རྡོ་རྗེ་མཁའ་འགྲོ་མཆོག་གི་རྗེས་དྲན་སྐྱེད་ཚལ་དང་འགྲེམ་སྟོན་ཁང་དབུ་འབྱེད་གནང་པ་མ་ཟད། རྟ་དབང་དགོན་པའི་མཁན་བླ་འདུས་མང་ཡོངས་ལ་བླང་དོར་བཀའ་སློབ་བཀྲིན་བསྩལ་བ་སོགས་ཀྱི་མཛད་འཕྲིན་ཁག་ལྔ་ལྷག་བསྐྱངས་གནང་མཛད་འདུག ཁ་སང་ཟླ་ ༤ ཚེས་ ༩ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་ཡིད་དགའ་ཆོས་འཛིན་གསུང་ཆོས་ར་བར་མོན་པ་དང་བོད་མི། འབྲུག་པ་སོགས་ཕྱི་ནང་གི་དད་ལྡན་ཆོས་ཞུ་བ་ཁྲི་བཞི་ལྷག་ལ་རྒྱལ་སྲས་ཐོག་མེད་བཟང་པོས་མཛད་པའི་ལག་ལེན་སོ་བདུན་མའི་ཆོས་འབྲེལ་བཀྲིན་བསྐྱངས་གནང་པ་དང་འབྲེལ། མགོན་པོ་མཆོག་གིས་མང་ཚོགས་ལ་དོལ་རྒྱལ་བསྟེན་སྲོལ་བྱེད་མི་རུང་བ་དང་། དེ་བཞིན་བླ་མ་ངོས་འཛིན་ཞུ་ཕྱོགས་སྐོར་ལ་བཀའ་བསྩལ་སྐབས་བླ་མ་ཚད་ལྡན་ཞིག་ནི་སྐུ་གོང་མའི་ལུང་རྟོགས་ཀྱི་བསྟན་པའི་བྱ་བ་མཛད་ཐུབ་མཁན་ཁྱད་ཆོས་བཅུ་ལྡན་ཞིག་དགོས་ཀྱི་རེད་ཅེས་བཀའ་གནང་འདུག རྩ་བའི་མགོན་པོ་༸གང་ཉིད་མཆོག་གིས་ཐུགས་རྗེ་ཆེན་པོའི་བཀའ་དབང་གི་སྒྲུབ་བཞག་དབུ་འཛུགས་མ་མཛད་གོང་དུ་རྟ་དབང་གི་ཉེ་འབྲེལ་འབྲུག་གི་ས་མཚམས་ཁུལ་དུ་ཡོད་པའི་རླུང་ལྷར་གསར་བཞེངས་ལེགས་གྲུབ་བྱུང་བའི་སྒྲོལ་མ་ལྷ་ཁང་གི་མཚན་བྱང་དང་། བོད་དང་འབྲུག་གི་ས་མཚམས་སུ་རྒྱལ་བ་བྱམས་པའི་སྐུ་བརྙན་གསར་བཞེངས་གནང་རྒྱུའི་རྨང་རྡོ། དེ་བཞིན་འབྲུག་གི་ས་མཚམས་ཉེ་འཁྲིས་སུ་ལྷུན་པོ་ཛེ་མ་ཐང་དུ་གུ་རུའི་སྐུ་བརྙན་གསར་བཞེངས་ལེགས་གྲུབ་བྱུང་བ་བཅས་ལ་རབ་གནས་བཀྲིན་བསྐྱངས་གནང་ཡོད་པ་རེད། མང་ཚོགས་ལ་ཆོས་འབྲེལ་དང་བཀའ་དབང་གྲུབ་པའི་རྗེས་༸གོང་ས་མཆོག་ནས་ཡིད་དགའ་ཆོས་གླིང་གི་གསུང་ཆོས་ར་བ་ནས་རྒྱང་ཐག་སྤྱི་ལེ་གཉིས་སར་རྟེན་གཞི་བྱས་པའི་༸རྒྱལ་དབང་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་འཁྲུངས་ཁང་ཨུ་རྒྱན་གླིང་དུ་ཆིབས་བསྒྱུར་བསྐྱངས་པ་དང་འབྲེལ། མ་ཧཱ་གུ་རུའི་ཚོགས་མགོན་དུ་དབུ་བཞུགས་ཀྱིས་ལྷ་ཁང་ལ་གནས་གཟིགས་དང་དེ་བཞིན་ཁུལ་དེར་ཉིན་གུང་ལྗགས་སྨིན་བཞེས་གནང་ཡོད་པ་རེད། མགོན་པོ་མཆོག་གིས་དེ་རྗེས་རྒྱལ་དབང་ཚངས་དབྱངས་རྒྱ་མཚོའི་འཁྲུངས་ཁང་ནས་རྒྱང་ཐག་སྤྱི་ལེ་གཅིག་སར་ཉེ་འཆར་གསར་བཞེངས་བྱུང་བའི་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་དམ་པ་རྡོ་རྗེ་མཁའ་འགྲོ་མཆོག་གི་དྲན་རྟེན་སྐྱེད་ཚལ་དུ་ཆིབས་བསྒྱུར་གནང་སྟེ་སྐྱེད་ཚལ་དང་རྡོ་རྗེ་མཁའ་འགྲོ་དྲན་རྟེན་གྱི་འགྲེམས་སྟོན་ཁང་གཉིས་ལ་དབུ་འབྱེད་ཀྱི་རབ་གནས་བཀྲིན་བསྐྱངས་འདུག དེའི་རྗེས་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་པར་ཆིབས་ཞལ་བསྒྱུར་ཏེ་རྟ་དབང་དགོན་པའི་གཙུག་ལག་ཁང་དུ་དགོན་པའི་མཁན་པོ་བླ་སྤྲུལ་དང་དགེ་འདུན་པ་བཅས་ལ་བླང་དོར་བཀའ་སློབ་བཀྲིན་བསྩལ་ཡོད་པ་རེད། རྩ་བའི་ཁ་སང་རེས་གཟའ་ཉིན་མའི་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ས་གནས་ཁག་ཏུ་ཆིབས་བསྒྱུར་དང་མཛད་འཕྲིན་སྐྱོང་སྐབས་ཕེབས་ལམ་གཡས་གཡོན་ཕྱོགས་གང་སར་ས་གནས་མང་ཚོགས་ཚོས་དཀར་གཙང་གི་མཇལ་དར་སོགས་བསྣམས་ནས་དགའ་དད་སྤྲོ་གསུམ་གྱི་ངང་ཕེབས་བསུ་དང་ཆིབས་བསྒྱུར་མཛད་ཡུལ་ས་གནས་དེ་དག་ལ་འཚང་ཁ་ཤིག་ཤིག་གིས་མཇལ་བཅར་ཞུས་བ་མ་ཟད། ལྷག་པར་དུ་མངའ་སྡེའི་སྤྱི་ཁྱབ་བློན་ཆེན་མཆོག་ཀྱང་ཆེད་བཅར་ཞུས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མོན་རྟ་དབང་དུ་ཚོགས་པའི་གསར་འགོད་ལྷན་ཚོགས་ཐོག་རྒྱ་ནག་ནང་དུ་སླར་ཡང་གསར་བརྗེ་ཞིག་དགོས་པ་དང་། དེ་ཡང་གཙོ་བོ་བྱམས་བརྩེ་ལ་གཞི་བཞག་པའི་གསར་བརྗེ་ཞིག་དགོས་ཀྱི་འདུག་ཅེས་བཀའ་བསྩལ་གནང་སོང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་ ༨ ཉིན་མོན་རྟ་དབང་ཁུལ་གྱི་ཉིན་དང་པོའི་ཆོས་འབྲེལ་ལེགས་གྲུབ་ཟིན་རྗེས། མགོན་པོ་མཆོག་དབུ་བཞུགས་ཐོག་གསར་འགོད་ལྷན་ཚོགས་ཤིག་ཚོགས་གནང་པ་དང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོའི་ངོས་ནས་རྒྱ་ནག་མི་མང་དང་རྒྱ་ནག་གཞུང་དབར་ལ་དབྱེ་བ་འབྱེད་དགོས་པ་རེད། རྒྱ་ནག་གཙོས་པའི་འཛམ་གླིང་འདིའི་ཐོག་རྒྱལ་ཁབ་གང་ཞིག་ཡིན་རུང་མཐར་དེ་མང་ཚོགས་ལ་བདག་ཡོད་པ་དང་། གཞུང་གང་འདྲ་ཡིན་རུང་བརྗེ་པོ་ཐེབས་འགྲོ་གི་ཡོད་ཀྱང་། མང་ཚོགས་ནི་རང་འཇགས་གནས་ཀྱི་རེད། རྒྱ་ནག་ལ་ཆ་མཚོན་པ་ན་ལོ་ངོ་སྟོང་ཕྲག་ལྷག་གི་ལོ་རྒྱུས་དང་རིག་གཞུང་ཡོད་པའི་མི་རིགས་ཤིག་དང་དཀའ་ལས་བརྒྱབ་ཐུབ་མཁན་གྱི་མི་རིགས་ཤིག་རེད། འོན་ཀྱང་ད་ལྟའི་རྒྱ་གཞུང་གི་སྒྲོམ་གཞི་འདི་ནི་དབང་ཆ་གཅིག་བསྡུས་རིང་ལུགས་དང་བསམ་བློ་གུ་དོག་པོ་ཞིག་ཡིན་པ་བརྟེན། སྒྲོམ་གཞི་དེའི་འོག་རྒྱ་ནག་གི་ལོ་རྒྱུས་ལྡན་པའི་རིག་གཞུང་དག་ལ་དོག་ཕོག་ཧ་ཅང་ཆེན་པོ་ཐེབས་ཡོད་པ་རེད་ཅེས་བཀའ་བསྩལ་བ་དང་འབྲེལ། རྒྱ་ནག་ནང་ལ་ཆ་མཚོན་ན་ད་ལྟའི་འགྱུར་བ་འགྲོ་གི་ཡོད་པ་དང་། ངོས་ཀྱི་རེ་བ་ལ་ད་ལྟའི་རྒྱ་ནག་དམར་པོའི་གཞུང་དེའི་སྣེ་ཁྲིད་པའི་འོག་སླར་གསར་བརྗེ་ཞིག་བྱེད་དགོས་པ་དང་། དེའང་གཙོ་བོ་བྱམས་བརྩེ་ལ་གཞི་བཞག་པའི་གསར་བརྗེ་ཞིག་དགོས་ཀྱི་འདུག་ཅེས་བཀའ་བསྩལ་གནང་སོང་། རྒྱ་ནག་ནང་ཡོད་པའི་མི་མང་ཚོར་དངོས་ཡོད་ཀྱི་གནས་ཚུལ་གང་ཡིན་ཤེས་རྒྱུར་ཐོབ་ཐང་ཡོད་པ་རེད། རྒྱ་ནག་གཞུང་གིས་དམ་བསྒྲགས་འོག་རྒྱ་རིགས་མང་ཚོགས་ཚོར་ཕྱོགས་གཅིག་པོའི་གནས་ཚུལ་བཤད་ནས་མང་ཚོ་རྣམས་ལྐུག་པ་བཟོ་ཡི་ཡོད་རེད། དེ་ནི་བཟང་ཕྱོགས་ཀྱི་ཆ་ནས་ཧ་ཅང་ནོར་འཁྲུལ་ཆེན་པོ་རེད། གནས་ཚུལ་གང་འདྲ་ཞིག་ཡིན་རུང་མང་ཚོགས་ལ་ཕྱི་གསལ་ནང་གསལ་བྱེད་རྒྱུ་དེ་ཤིན་ཏུ་ནས་གལ་ཆེན་པོ་རེད་ཅེས་གསུངས་སོང་། ད་ལྟའི་རྒྱ་ནག་ནང་ཡོད་པའི་ཁྲིམས་ཞིབ་ལྷན་ཁང་དེ་རྒྱལ་སྤྱིའི་གནས་ཚད་དང་མཐུན་པ་ཞིག་དང་རང་དབང་ལྡན་པ་བཟོ་དགོས་ཀྱི་འདུག་ཅེས་ལམ་སྟོན་བསྩལ་ཡོད། བོད་རྒྱ་འབྲེལ་མོལ་བསྐྱར་གསོ་ཡོང་སྲིད་མིན་ཐད་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་དུས་ཚོད་རིང་མིན་ཞིག་རེད། བོད་ནང་ལ་དཀའ་ངལ་ཐོག་གནས་ཡོད་སྟབས་ཏཱ་ལའི་བླ་མ་ཞེས་པ་དེ་ཚོར་བ་རྣོ་བའི་གནད་དོན་ཞིག་ཆགས་ཡོད་པ་རེད། གལ་ཏེ་བོད་ནང་ལ་དཀའ་ངལ་མེད་པ་ཡིན་ན། ཏཱ་ལའི་བླ་མའི་མིང་དེ་ཚོར་བ་རྣོ་པོ་དེ་འདྲ་ཞིག་ཡོང་གི་མ་རེད། རྒྱ་ནག་གཞུང་གིས་ད་ལྟའི་བོད་ནང་གི་དོན་དངོས་དཀའ་ངལ་དེ་དག་སེལ་ཐབས་བྱེད་རྒྱུ་ལས་ལྡོག་ཏེ་འདས་པའི་ལོ་ངོ་ ༦༠ ལྷག་གི་རིང་ལ་མང་ཚོགས་ཐོག་དྲག་པོའི་ཐབས་བྱུས་བེད་སྤྱོད་བྱས་པ་དང་དེ་བཞིན་དམར་ཤོག་ཀྱི་ལྟ་བའི་སློབ་གསོ་སྤྲོད་པ་མ་ཟད། དངུལ་གྱི་མང་ཚོགས་ཀྱི་བསམ་བློ་བསླུ་ཐབས་སོགས་ཀྱི་ཐབས་ཤེས་འདྲ་མིན་བརྒྱུད་ཞི་འཇམ་ཡོང་ཐབས་བྱེད་ཀྱི་ཡོད་པ་རེད། རྒྱ་གཞུང་གིས་བོད་ནང་ལ་ཕྱི་དངོས་པོའི་མཐུན་རྐྱེན་ཡར་རྒྱས་གང་ཚོད་བཏང་ཡོད་ཀྱང་། དོན་དངོས་ཐོག་བོད་ནང་གི་བོད་མི་ཚོའི་སེམས་གཏིང་ལ་མ་སྐྱིད་པ་དང་དཀའ་ངལ་རག་འཇགས་གནས་ཡོད་པ་རེད། དེས་ན་བོད་རྒྱ་ཕྱོགས་གཉིས་པོའི་ཁེ་ཕན་ཆེད་དུ་རྒྱ་གཞུང་གིས་བོད་ནང་ལ་དཀའ་ངལ་དེ་སེལ་དགོས་ཀྱི་རེད། དཀའ་ངལ་དེ་སེལ་རྒྱུ་ཞིག་ཡོད་པ་དང་། དེའང་དོན་དངོས་དང་མཐུན་པའི་ཐོག་ནས་སེལ་དགོས་ཞེས་བཀའ་བསྩལ་ནན་པོ་གནང་ཡོད་པ་རེད། གཞན་ཡང་སྐབས་དེར་༸སྐུའི་ཡང་སྲིད་ཀྱི་གནད་དོན་ཐོག་བཀའ་འདྲི་ཞུས་པར་༸གོང་ས་མཆོག་གིས་ཏཱ་ལའི་བླ་མམེད་པའི་སྐབས་སུ་ཡང་སྲིད་དགོས་དང་མི་དགོས་དེ་ནི་མཐར་བོད་མི་མང་ཚོགས་ལ་རག་ལུས་ཡོད་པ་རེད་ཅེས་བཀའ་བསྩལ་བ་མ་ཟད།ལྷག་པར་དུ་མགོན་པོ་༸གང་ཉིད་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་ཚོགས་འདུ་ཞིག་ཚོགས་ངེས་ཡིན་སྐོར་ཡང་བཀའ་བསྩལ་མཛད་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རུ་ནཱ་ཅལ་མངའ་སྡེའི་གཞུང་མང་གཉིས་ནས་ཕེབས་བསུའི་སྣེ་ལེན་ཟབ་རྒྱས་ཞུས་ཐོག་དེ་རིང་ཉིན་རྒྱབ་མོན་རྟ་དབང་ཁུལ་དུ་༸ཞབས་སོར་བདེ་བར་འཁོད་གནང་མཛད་སོང། ༸གོང་ས་མཆོག་གིས་སྡི་རང་ཁུལ་གྱི་ཆོས་འབྲེལ་ཁག་ལེགས་པར་གྲུབ་ཀྱིས་དེ་རིང་སྔ་དྲོ་ཚོུད་ ༧།༠༠ སྟེང་མགོན་པོ་༸གང་ཉིད་མཆོག་སྡི་རང་ནས་མོན་རྟ་དབང་ཁུལ་དུ་ཆིལས་ཞལ་བསྒྱུར་གནང་ཡོད་པ་དང། ཕྱི་དྲོ་ཚོུད་ ༤།༠༠ མན་ཙམ་ལ་མགོན་པོ་༸གང་ཉིད་མཆོག་རྟ་དབང་དགོན་པ་དགའ་ལྡན་རྣམ་རྒྱལ་གླིང་དུ་༸ཞབས་སོར་བདེ་བར་འཁོད་བསྟུན་ཕེབས་བསུར་རྟ་དབང་དགོན་པའི་མཁན་པོ་གཙོས་པའི་ས་གནས་ཀྱི་གྲོས་ཚོགས་འཐུས་མི་སོགས་གཞུང་འབྲེལ་གྱི་གནད་ཡོད་མི་སྣ་ཁག་ཆེད་བཅར་གནང་འདུག རྩ་བའི་ད་ལན་༸གང་ཉིད་མཆོག་གི་ཆིབས་བསྒྱུར་གནང་ཡུལ་གྱི་མོན་རྟ་དབང་ས་ཁུལ་དེ་སྡི་རང་ནས་ཕེབས་གྲུ་ནང་ཚོུད་དྲུག་མན་ཙམ་གྱི་རྒྱང་ཐང་ཡིན་ཞིང་། སྔ་དྲོ་མགོན་པོ་མཆོག་སྡི་རང་ནས་རྟ་དབང་ཕྱོགས་སུ་ཆིབས་བསྒྱུར་གནང་པའི་སྐབས་སུ་ཉེ་སྔོན་ལྟར་མི་འདྲ་བ་ལམ་བར་ལ་གནམ་གཤིས་ཧ་ཅང་ཡག་པོ་འདུག་པ་དང་། ཕེབས་ལམ་དུ་བཀྲིས་རྟགས་བརྒྱད་དང་ཆོས་མཛད་སོགས་བཤམ་པ་དང་། ས་གནས་མི་མང་ཚོགས་ཚོའི་ཕྱག་ཏུ་དཀར་གཙང་གི་མཇལ་དར་དང་བདུག་སྤོས་སོགས་བསྣམས་ཏེ་དགའ་དད་སྤྲོ་གསུམ་འཁོད་པའི་ཐོག་ནས་ཕེབས་བསུ་གཟབ་རྒྱས་ཞུས་ཡོད་པ་རེད། རྩ་བའི་མོན་རྟ་དབང་ཁུལ་གྱི་མཛད་འཆར་ལྟར་ན། མགོན་པོ་མཆོག་ནས་སང་ཉིན་ཟླ་ ༤ ཚེས་ ༨ ནས་ ༡༠ བར་རྟ་དབང་གཙོ་བོར་འགྱུར་པའི་དད་ལྡན་མང་ཚོགས་ལ་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་བ་དང་། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཀའ་ཆོས་དང་ཚེ་དབང་སོགས་ཀྱི་ཆོས་འབྲེལ་བསྩལ་རྒྱུའི་མཛད་ཐུགས་གཏན་འཁེལ་འདུག

རྒྱ་ནག་གཞུང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐེངས་འདིའི་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེ་ནང་གི་ཆིབས་བསྒྱུར་དེ་དང་འབྲེལ་ཕྱོགས་གང་ས་ནས་རྒྱ་གར་གཞུང་ལ་སྐྱོན་བརྗོད་ཀྱིས་རྒྱལ་ཁབ་ཕྱོགས་གཉིས་པོའི་འབྲེལ་ལམ་ལ་དོ་ཕོག་འགྲོ་ཉེན་དང་། ལྷག་དོན་ཁ་སང་རྒྱ་ནག་གཞུང་གི་ངོས་ནས་པེ་ཅིང་དུ་ཡོད་པའི་རྒྱ་གར་གཞུང་ཚབ་ཆེན་མོ་ཆེད་བསྐོང་གིས་རྒྱ་གར་གཞུང་གིས་ཏཱ་ལའི་བླ་མ་བེད་སྤྱོད་བརྒྱུད་རྒྱ་ནག་ལ་གནོད་པའི་བྱ་སྤྱོད་རིགས་སྤེལ་རྒྱུ་འཕྲལ་མར་མཚམས་འཇོག་དགོས་ཞེས་ཉེན་བརྡ་བཏང་པའི་གནས་ཚུལ་ཐོན་སྟབས། ༸གོང་ས་༸སྐྱབས་མགོན་ཆེན་པོ་མཆོག་ད་རེས་ཨ་རུ་ནཱ་ཅལ་མངའ་ཁུལ་གྱི་ས་གནས་གང་དུ་ཆིབས་བསྒྱུར་མཛད་ཀྱང་དེར་གསར་འགོད་པ་ཚོས་མུ་མཐུད་རྗེས་དེད་གནང་བཞིན་ཡོད་པ་དང་། ཁ་སང་སྡི་རང་ཁུལ་གྱི་ཆོས་འབྲེལ་གྱི་མཛད་འཆར་དེའི་སྐབས་སུའང་རྒྱ་གར་གྱི་གསར་འགོད་པ་ཚོས་སླར་མགོན་པོ་༸གང་ཉིད་མཆོག་ལ་གནད་དོན་དེའི་ཐོག་ལ་བཀའ་འདྲི་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་ནས་དེ་སྔོན་ཨ་སམ་གྱི་གྲོང་ཁྱེར་གྷོ་ཧ་ཊི་ནང་ཞུས་ཟིན་པ་ལྟར་ད་རེས་ངོས་ཀྱི་སྐོར་བསྐྱོད་དེ་ཆོས་ཕྱོགས་ཁོ་ན་ལས་ཆབ་སྲིད་དང་འབྲེལ་བ་རྩ་བ་ནས་མེད། རྒྱ་ནག་གཞུང་ལ་ད་དུང་ཡིད་ཆེས་མེད་པ་ཡིན་ན་ཁོ་རང་ཚོའི་ལས་བྱེད་གཅིག་འདིར་དངོས་སུ་བཏང་ནས་ངོས་ཀྱི་ལས་ཀ་གང་ཞིག་བྱེད་ཀྱི་ཡོད་མེད་བལྟ་ན་འགྲིག་གི་རེད་ཅེས་བཀའ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་རྒྱ་གར་དང་རྒྱ་ནག་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་གོང་འཕེལ་ཡོང་ཐབས་སུ་རྒྱ་གར་གཞུང་གི་ངོས་ནས་ཁ་ཆེའི་ཆོས་ལུགས་པ་ཚོར་ Mecca གནས་མཇལ་ཆེད་ Hujj གནས་སྐོར་གྱི་མཐུན་རྐྱེན་བསྐྲུན་གྱི་ཡོད་པ་ལྟར་རྒྱ་རིགས་ནང་པ་ཚོར་ཡང་དེ་མཚུངས་ཀྱི་མཐུན་རྐྱེན་བསྐྲུན་ཐུབ་པ་ཡིན་ན་དགེ་མཚན་ཡོད་པ་སོགས་བཀའ་བསྩལ་མཛད་ཡོད་པ་རེད། གསར་འགོད་པ་ཞིག་གིས་སྐབས་དེར་རྒྱ་ནག་གཞུང་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཆོས་ཕྱོགས་ཀྱི་དབུ་ཁྲིད་གཅིག་ཏུ་ངོས་འཛིན་ཞུས་ནས་བོད་ནང་གི་བོད་མིའི་ཚོའི་མངོན་འདོད་ལྟར་བོད་ལ་ཕྱིར་ཕེབས་ཀྱི་གདན་ཞུ་ཕུལ་དགོས་པ་དགོངས་ཀྱི་ཡོད་དམ་ཞེས་བཀའ་འདྲི་ཞུས་པར་༸གོང་ས་ཆེན་པོ་མཆོག་གིས་བོད་ནང་གི་བོད་མི་ཚོ་ལྟ་ཅི་སྨོས། དེང་སྐབས་རྒྱ་ནག་སྐམ་ས་ཆེན་པོ་ནས་རྒྱ་རིགས་ནང་པ་བདུན་ཕྲག་རེ་རེའི་ནང་མི་ཉི་ཤུ་སུམ་བཅུ་བྱས་ནས་ངོས་ལ་ཐུགས་འཕྲད་ཆེད་ཡོང་གི་འདུག ཁོང་ཚོ་ཕལ་ཆེ་བས་མིག་ནས་མིག་ཆུ་གཏོང་བཞིན་ང་ཚོ་མ་བརྗེད་པ་གནང་རོགས།  རྒྱ་ནག་ལ་ཕེབས་རོགས་ཞེས་བཤད་ཀྱི་འདུག།   ངོས་ནས་སྐབས་དེར་རྒྱ་ནག་གཞུང་གི་ངོས་ནས་བཟང་ཕྱོགས་ཀྱི་རྣམ་པ་ཞིག་བསྟན་པའི་ཉིན་མོ་དེའི་སྐབས་སུ་ངོས་རང་རྒྱ་ནག་ཏུ་འགྲོ་རྒྱུར་གྲ་སྒྲིག་ཨང་གསར་ཡིན་ཅེས་བཤད་ཀྱི་ཡོད། འོན་ཀྱང་ད་ལྟའི་གནས་སྟངས་འདིའི་འོག་ལ་ངོས་རང་ཕྱིན་པ་ཡིན་ན་གནམ་ཐང་རང་ལ་ལག་ལྕགས་བརྒྱབ་ཀྱི་རེད་ཅེས་སོགས་བཀའ་བསྩལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འབུམ་སྡེ་ལ་ནས་སྤྱི་ལེ་ ༤༠ ལྷག་སར་གསར་བཞེངས་བྱུང་བའི་ཐུབ་གསུང་དར་རྒྱས་གླིང་སློབ་གཉེར་ཁང་དབུ་འབྱེད་མཛད་སྒོའི་ཐོག་དབུ་བཞུགས་མཛད་པ་དང་འབྲེལ། མགོན་པོ་༸གང་ཉིད་མཆོག་གིས་མོན་རྟ་དབང་ཁུལ་གྱི་དགོན་སྡེ་ཁག་ཚང་མ་སློབ་གཉེར་བྱ་ཡུལ་གྱི་ལྟེ་གནས་ཁང་ཞིག་ཏུ་བསྒྱུར་དགོས་ཞེས་བཀའ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་འབུམ་སྡེ་ལ་ནང་གི་ཆོས་འབྲེལ་གྱི་མཛད་འཕྲིན་ཁག་ལེགས་གྲུབ་ཀྱིས་དེ་ཉིན་ཕྱི་དྲོ་འབུམ་ལ་ནས་ ༤༠ ལྷག་སར་ཡོད་པའི་སྡི་རང་ས་གནས་སུ་༸ཞབས་སོར་བདེ་བར་འཁོད་གནང་མཛད་ཡོད་པ་དང་། དེ་རིང་ཟླ་ ༤ ཚེས་ ༦ ཉིན་གྱི་སྔ་དྲོ་ཆུ་ཚོད་ ༩།༣༠ སྟེང་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་སྡི་རང་ས་གནས་སུ་རྟེན་གཞི་བྱས་པའི་ཐུབ་གསུང་དར་རྒྱས་གླིང་གཙུག་ལག་ཁང་རྟན་དང་བརྟེན་པ་བཅས་པ་གསར་བཞེངས་ལེགས་གྲུབ་བྱུང་བར་དབུ་འབྱེད་རབ་གནས་མཛད་སོང་། མཛད་སྒོའི་ཐོག་ཨ་རུ་ན་ཅལ་མངའ་སྡེའི་སྲིད་སྐྱོང་པདྨ་ན་བྷ་ཨཙཱརྱ་མཆོག་དང་མངའ་སྡེའི་གྲོས་ཚོགས་ཀྱི་ཚོགས་གཙོ་ T.N Thongdok མཆོག དེ་བཞིན་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་གཙོས། ས་གནས་ཀྱི་གཞུང་འབྲེལ་གནད་ཡོད་མིི་སྣ་དང་ཉེ་འཁོར་གྱི་ས་གནས་མང་ཚོགས་གསུམ་ཁྲི་ལྷག་ཙམ་འདུ་འཛོམས་བྱུང་འདུག ཐོག་མར་ཐུབ་གསུང་དར་རྒྱས་གླིང་སློབ་གཉེར་ཁང་གསར་བཞེངས་གནང་མཁན་སྤྲུལ་སྐུ་ཐུབ་བསྟན་རིན་ཆེན་མཆོག་ནས་ད་ལན་མོན་རྟ་དབང་ཁུལ་གྱི་ཆིབས་བསྒྱུར་འདིར་གནམ་གཤིས་རྐྱེན་པས་༸གོང་ས་༸སྐྱབས་མགོན་ཆེན་པོ་མཆོག་གི་ཕེབས་ལམ་ཐོག་སྐུ་ངལ་དུ་མ་ཡོད་པར་ལྟོས་མེད་༸གང་ཉིད་མཆོག་གིས་ཐུགས་བརྩེ་ཆེན་པོས་མོན་ཡུལ་ས་གནས་སྡི་རང་དུ་ཆིབས་བསྒྱུར་གནང་པ་མ་ཟད། གཙུག་ལག་སློབ་གཉེར་ཁང་གི་དབུ་འབྱེད་རབ་གནས་མཛད་སྒོར་དབུ་བཞུགས་མཛད་པ་འདི་ནི་བཀྲིན་གཞལ་དཀའ་བ་རེད་ཅེས་ཞུས་ནས་ཐུགས་ཚོར་ཆེན་པོས་སྤྱན་ཆབ་གཏོང་ཞིང་ལས་བསྡོམས་སྙན་སྒྲོན་ཞུས་སོང་། སློབ་གཉེར་ཁང་དེ་གཙོ་བོ་ས་གནས་ཀྱི་ཡུལ་མི་ཚོར་ནང་ཆོས་སློབ་གཉེར་གནང་སའི་ལྟེ་གནས་ཁང་ལ་གཙོ་དམིགས་ཀྱིས་གསར་བཞེངས་གནང་པ་ཞི ག་ཡིན་པ་དང་། སློབ་གཉེར་ཁང་དེའི་ནང་ལོ་ཤས་གོང་ནས་སྡི་རང་ས་ཁུལ་ནས་རིགས་ལམ་སློབ་གཉེར་གནང་མཁན་མོན་པའི་སྐྱེས་ཕོ་མོ་ཁག་ཅིག་གིས་མགོན་པོ་མཆོག་ལ་རིགས་ལམ་རྟགས་གསལ་གཟིགས་འབུལ་ཞུས་སོང་བ་དང་། དེའང་མོན་པའི་མི་རིགས་ཀྱི་ལོ་རྒྱུས་ཁྲོད་ཀྱི་མང་ཚོགས་ནས་རིགས་ལམ་སློབ་གཉེར་དང་རྟགས་གསལ་གཏོང་བ་ཆེས་ཐོག་མ་དེ་ཆགས་ཡོད་པ་རེད། སྐབས་དེར་༸གོང་སྐྱབས་མགོན་ཆེན་པ་མཆོག་གིས་ད་རེས་སྤྲུལ་སྐུ་ཐུབ་བསྟན་རིང་པོ་མཆོག་གིས་ད་ལྟའི་ཆར་བོད་པའི་གདན་ས་ཁག་ཏུ་ནང་ཆོས་སློབ་གཉེར་བྱེད་མཁན་མོན་པའི་དགེ་འདུན་པ་མང་དག་ཞིག་ཡོད་པ་དང་དེ་དག་ཁྲོད་ནས་སློབ་གཉེར་མཐར་ཕྱིན་རྗེས་ས་གནས་དགོན་སྡེ་ཁག་ཏུ་མཁན་པོ་བྱེད་བཞིན་ཡོད་པ་མ་ཟད། ལྷག་དོན་ནང་ཆོས་ལའང་དོ་སྣང་བྱེད་མཁན་མང་རུ་འགྲོ་བཞིན་འདུག་པ་ནི་བཟང་ཕྱོགས་ཀྱི་རྣམ་པ་ཞིག་ཡིན་པ་རེད་ཅེས་བཀའ་བསྩལ་སོང་། ད་རེས་འདིར་མོན་པའི་མང་ཚོགས་ཁྲོད་ནས་ནང་པའི་རིགས་ལམ་སློབ་གཉེར་གྱི་རྟགས་གསལ་གཏོང་བ་དེས་༸གང་ཉིད་མཆོག་མཆོག་ཐུགས་ཧ་ཅང་དགྱེས་ཚོར་ཆེན་པོ་བྱུང་ཞེས་བསྔགས་བརྗོད་མཛད་པ་དང་ཆབས་ཅིག སྐྱེས་ཕོ་མོ་ཚོས་ད་རེས་རིགས་ལམ་རྟགས་གསལ་མཚོན་པའི་ནང་ཆོས་ལ་སློབ་གཉེར་བྱེད་འགོ་བཙུགས་པར་བརྟེན་ཁྱེད་ཚོས་སློབ་གཉེར་དེ་དུས་ཐུང་མ་ཡིན་པར་ལོ་ཉི་ཤུ་སུམ་ཅུ་རིང་སློབ་གཉེར་རྒྱུན་སྐྱོང་བྱེད་དགོས་ཞེས་ལམ་སྟོན་བསྩལ་སོང་། ལྷག་པར་དུ་མགོན་པོ་མཆོག་གིས་སྤྲུལ་སྐུ་ཐུབ་བསྟན་རིན་པོ་མཆོག་ནས་ས་ཁུལ་འདིར་ནང་ཆོས་སློབ་གཉེར་ཁང་འདི་ལྟ་བུ་གསར་བཞེངས་གནང་ཐུབ་པར་ཡི་རང་བསྔགས་བརྗོད་གནང་པ་དང་འབྲེལ། རིན་པོ་མཆོག་གིས་ད་ལན་ཐུགས་ཚོར་ཆེན་པོས་ལས་བསྡོམས་སྙན་སྒྲོན་གནང་པ་དང་འདི་བཞིན་བཅོས་མིན་གྱིས་ཚོར་ཤུགས་ཆེ་བའི་རྣམ་པ་དེས་ངོས་རང་ཧ་ཅང་དགའ་ཚོར་ཆེན་པོ་དང་སེམས་ལ་ཐད་པོ་བྱུང་ཞེས་ཕྱག་ལས་གནང་པར་བསྔགས་བརྗོད་མཛད་ཡོད་པ་རེད། གསར་བཞེངས་གྲུབ་པའི་ལྟེ་གནས་ཁང་དེ་རིང་མིན་ནང་པའི་སློབ་གཉེར་བྱ་ཡུལ་གྱི་ལྟེ་གནས་ཁང་ཞིག་ཏུ་བསྒྱུར་དགོས་པ་ནི་ཤིན་ཏུ་ནས་གལ་ཆེ་ཡིན་པ་ལྟར་དེ་འདྲ་ཞིག་བྱུང་ཚེ། མ་འོངས་པར་ཧ་ཅང་གི་ཕན་ཐོགས་ཆེན་པོ་ཡོང་གི་རེད་ཅེས་གསུངས་པ་དང་འབྲེལ།མོན་པའི་དགོན་སྡེ་ཁག་དང་མང་ཚོགས་ཚོའི་ངོས་ནས་ རྒྱུན་ལྡན་གྱི་ཆོ་ག་ཕྱག་ལེན་ཙམ་མ་ཡིན་པར། དུས་རབས་ཉེར་གཅིག་པའི་ནང་པ་ཞིག་བྱེད་དགོས་པ་མ་ཟད།དེའང་གཙོ་བོ་ནང་ཆོས་འདི་ཆོས་ཕྱོགས་ཙམ་མིན་པར་ཤེས་བྱའི་ངོ་བོའི་ཐོག་ནས་སློབ་གཉེར་བྱེད་དགོས་ཞེས་ལམ་སྟོན་སོགས་མཛད་སོང་། མགོན་པོ་༸གང་ཉིད་མཆོག་གིས་དེ་རིང་སྔ་དྲོའི་མཛད་སྒོ་སྐབས་སུ་ཆོས་ལུགས་མཐུན་སྒྲིལ་དང་། དཔལ་ན་ལནྡྲའི་ལྟ་གྲུབ་དང་འབྲེལ་རིག་གཞུང་གི་གལ་གནད་དང་། བྱམས་བརྩེ་དང་འགྲོ་བ་མིའི་གཅིག་འགྱུར་གྱི་འདུ་ཤེས་སོགས་ཀྱི་གལ་གནད་སྐོར་ལམ་སྟོན་བསྩལ་སོང་བ་མ་ཟད། ལྷག་པར་དུ་མགོན་པོ་༸གང་ཉིད་མཆོག་ད་ལན་མོན་རྟ་དབང་ཁུལ་དུ་ཕེབས་ལམ་བརྒྱུད་ནས་ཕེབས་དགོས་བྱུང་ཡོད་ཀྱང་། ལམ་བར་ལ་ཧ་ཅང་གི་ཉམ་ཐག་པའི་ལམ་བཟོ་བ་གྲོང་གསེབ་ཁག་གི་མང་ཚོགས་དང་ཐུགས་འཕྲད་བྱེད་རྒྱུའི་གོ་སྐབས་བྱུང་པས་རྐྱེན་ངན་གྲོགས་ཤར་ལྟར་༸གང་ཉིད་མཆོག་ལ་བྱམས་སྙིང་རྗེ་ཉམས་ལེན་དང་དེ་གོང་མཐོར་གཏོང་རྒྱུའི་ནུས་པ་ཤུགས་ཆེ་རུ་འགྲོ་སོང་ཞེས་གསུངས་ཡོད་པ་རེད། དེ་བཞིན་མཛད་སྒོར་ཆེད་དུ་གདན་ཞུ་ཕུལ་བའི་ཨ་རུ་ན་ཅལ་མངའ་སྡེའི་སྲིད་སྐྱོང་པདྨ་ན་བྷ་ཨཙཱརྱ་མཆོག་གིས་རྒྱ་གར་རྒྱལ་ཁབ་འདི་རྒྱལ་སྤྱིའི་རྒྱལ་ཁབ་མང་པོ་ཞིག་དང་ས་འབྲེལ་ཆགས་ཀྱི་ཡོད་པ་དང་། ང་ཚོའི་རྒྱལ་ཁབ་ཕན་ཚུན་དབར་ལ་ཞི་བདེ་དང་དེ་གོང་འཕེལ་ཡོང་བར་མགོན་པོ་མཆོག་གི་ལམ་སྟོན་དགོས་རྒྱུ་ནི་ཧ་ཅང་གི་གལ་ཆེན་པོ་ཆགས་འདུག་ཅེས་གསུངས་སོང་། དེ་བཞིན་མངའ་སྡེའི་གྲོས་ཚོགས་ཀྱི་ཚོགས་གཙོ་ T.N Thongdok མཆོག་གིས་མགོན་པོ་མཆོག་གིས་ཕྱི་ལོ་ ༢༠༠༩ ལོར་མོན་ས་ཁུལ་དུ་ཆིབས་བསྒྱུར་མཛད་པ་ནས་བཟུང་ས་གནས་སུ་ནང་པའི་དགོན་སྡེ་ཁག་དང་ནང་ཆོས་ཐོག་སློབ་གཉེར་སོགས་ཕྱོགས་གང་ས་ནས་ཡར་རྒྱས་ཧ་ཅང་ཕྱིན་ཡོད་སྐོར་གསུངས་པ་དང་སྦྲགས། མགོན་པོ་མཆོག་གི་མཛད་རྗེས་ལ་ཆེ་བསྟོད་དང་ཐུགས་རྗེ་ཆེ་ཞེས་ཞུས་ཡོད། རྩ་བའི་ད་རེས་གསར་བཞེངས་བྱུང་བའི་ཐུབ་གསུང་དར་རྒྱས་གླིང་འདི་ནི་དེ་སྔ་ཕྱི་ལོ་ ༢༠༠༩ ལོར་མགོན་པོ་༸གང་ཉིད་མཆོག་མོན་སྡི་རང་ས་ཁུལ་དུ་ཆིབས་བསྒྱུར་མཛད་སྐབས་ས་གནས་སུ་ནང་ཆོས་སློབ་གཉེར་བྱ་ཡུལ་གྱི་ལྟེ་གནས་ཁང་ཞིག་གསར་བསྐྲུན་ཞུ་དགོས་པའི་བཀའ་སློབ་ཕེབས་དོན་བཞིན་གསར་བཞེངས་གནང་པ་ཞིག་ཆགས་ཡོད་པ་དང་། ལྟེ་གནས་ཁང་དེ་གཙོ་བོ་ས་གནས་མང་ཚོགས་དང་དགེ་འདུན་པ་ཚོའི་ངོས་ནས་ནང་ཆོས་རང་གི་ཐོག་ལ་སློབ་གཉེར་གནང་ཕྱིར་ཆེད་བཙུགས་གནང་པ་ཞིག་ཆགས་ཀྱི་ཡོད་པ་རེད། གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྡི་རང་གཙོ་བོར་འགྱུར་པའི་ཉེ་འཁོར་གྱི་ཆོས་ཞུ་གསུམ་ཁྲི་ལྷག་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་། བླ་མའི་རྣལ་འབྱོར། སྤྱན་རས་གཟིགས་ཀྱི་རྗེས་གནང་སོགས་ཀྱི་བཀའ་ཆོས་བཀྲིན་བསྩལ་གནང་ཡོད་པ་རེད། མཛད་འཆར་ལྟར་ན། སང་ཚེས་ ༧ ཉིན་མགོན་པོ་༸གང་ཉིད་མཆོག་སྡི་རང་ནས་མོན་རྟ་དབང་ཁུལ་དུ་ཆིབས་ཞལ་བསྒྱུར་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐེངས་འདིའི་རྒྱ་གར་བྱང་ཤར་ཨ་རུ་ནཱ་ཅལ་ཁུལ་གྱི་ཆིབས་བསྒྱུར་ཐད་ལ་རྒྱ་གཞུང་གིས་སྒོ་གང་ས་ནས་རྒྱ་གར་གཞུང་ལ་སྐྱོན་བརྗོད་ཤུགས་ཆེ་བྱེད་བཞིན་པའི་ཁྲོད། ཁ་སང་པེ་ཅིང་དུ་རྟེན་གཞི་བྱས་པའི་རྒྱ་གར་གྱི་གཞུང་ཚབ་ཁང་གི་གཞུང་ཚབ་ཆེན་མོ་མཆོག་རྒྱ་ནག་ཕྱི་སྲིད་ལས་ཁུངས་སུ་ཆེད་བསྐོང་གིས་རྒྱ་གར་གཞུང་གིས་ཏཱ་ལའི་བླ་མ་བེད་སྤྱོད་བརྒྱུད་རྒྱ་ནག་གི་ཁེ་ཕན་ལ་གནོད་པའི་བྱ་སྤྱོད་རིགས་སྤེལ་རྒྱུ་འཕྲལ་མར་མཚམས་འཇོག་དགོས་ཞེས་ཉེན་བརྡ་བཏང་འདུག ཁ་སང་ཟླ་ ༤ ཚེས་ ༥ རེས་གཟའ་ལྷག་པ་ཉིན་རྒྱ་ནག་གི་ཕྱི་སྲིད་ལས་ཁུངས་སུ་ཚོགས་པའི་ལྷན་ཚོགས་ཤིག་གི་ཐོག་རྒྱ་ནག་ཕྱི་སྲིད་མགྲིན་ཚབ་པ་ Hua Chunying ཡིས་རྒྱ་གར་གྱི་གཞུང་ཚབ་ཆེན་མོ་སྐུ་ཞབས་ Vijay Gokhale མཆོག་ཆེད་འབོད་ཀྱིས་སྐུ་ཞབས་ཁོང་ལ་ཐེངས་འདིའི་༸གོང་ས་མཆོག་གི་ཨ་རུ་ནཱ་ཅལ་ནང་གི་ཆིབས་བསྒྱུར་ཐད་མི་འདོད་པའི་རྣམ་འགྱུར་ཤུགས་ཆེ་བཏོན་པ་དང་སྦྲགས། རྒྱ་གར་གཞུང་གིས་རྒྱ་ནག་གི་སེམས་ཁྲལ་བྱ་གཞི་གནད་དོན་ཁག་རྒྱབ་ཏུ་བསྐྱུར་ནས་༸གོང་ས་མཆོག་ཡུལ་དེར་གདན་ཞུ་གནང་པར་སྐྱོན་བརྗོད་ཤུགས་ཆེ་བྱས་པ་མ་ཟད། རྒྱ་གར་གྱི་ཕྱོགས་ནས་ཏཱ་ལའི་བླ་མ་བེད་སྤྱོད་ཀྱིས་རྒྱ་ནག་གི་རྩ་དོན་དང་ཁེ་ཕན་ལ་སྣང་ཆུང་གཏོང་རྒྱུ་མཚམས་འཇོག་བྱེད་དགོས་པ་དང་། ཅི་སྟེ་དེ་ལྟར་མ་བྱས་ཚེ་རྒྱ་དཀར་ནག་གཉིས་ཀྱི་འབྲེལ་ལམ་ལ་དོ་ཕོག་འགྲོ་ངེས་ཡིན་པའི་ཉེན་བརྡ་བཏང་འདུག ད་རེས་༸གོང་ས་མཆོག་ཨ་རུ་ནཱ་ཅལ་ནང་གི་ཆིབས་བསྒྱུར་དེ་དང་འབྲེལ་ནས་རྒྱ་དཀར་ནག་གཉིས་དབར་གླེང་སློང་ཆེས་ཤུགས་ཆེ་བྱུང་བཞིན་པ་མ་ཟད། ལྷག་པར་བརྒྱུད་ལམ་ཁག་ཏུ་རྒྱ་གར་གཞུང་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་ཕྱིན་ཡོད་པའི་གནས་ཚུལ་ཐོན་བཞིན་ཡོད་སྟབས། འདི་ག་རླུང་འཕྲིན་ཁང་གིས་བོད་མི་མང་སྤྱི་འཐུས་ཚོགས་གཞོན་ཨཙཱརྱ་ཡེ་ཤེས་ཕུན་ཚོགས་མཆོག་ལ་བཀའ་འདྲི་ཞུས་པར་ཁོང་གིས་བོད་དང་རྒྱ་གར་དབར་གྱི་ས་མཚམས་ཀྱི་འབྲེལ་ལམ་དེ་དེ་སྔ་ལོ་རྒྱུས་ནས་ཡོད་པ་ཞིག་ཡིན་སྟབས། དེར་རྒྱ་གཞུང་གིས་གློ་བུར་དུ་འགྱུར་བ་གཏོང་ཐབས་མེད་སྐོར་གསུངས་པ་དང་འབྲེལ། གནད་དོན་དེའི་དབང་གིས་རྒྱ་གར་གཞུང་གི་ངོས་ནས་བོད་ཐོག་འཛིན་པའི་སྲིད་བྱུས་ལ་འགྱུར་བ་ཕྱིན་པར་ངོས་འཛིན་ཞུ་བཞིན་མེད་ཀྱང་། རྒྱ་གར་གཞུང་གི་ཕྱག་ལས་གནང་ཕྱོགས་ལ་གུ་ཡངས་དང་མངོན་གསལ་ཆགས་པར་ངོས་འཛིན་གྱི་ཡོད་ཅེས་སོགས་གསུངས་སོང། དེའི་ཁྲོད་རྒྱ་གར་གྱི་ཁྱད་མཁས་མི་སྣ་དང་གནད་དོན་དབྱེ་ཞིབ་པ་ཁག་ཅིག་གིས་རྒྱ་གཞུང་གིས་༸གོང་ས་མཆོག་གི་ཆིབས་བསྒྱུར་དང་འབྲེལ་རྒྱ་གར་གཞུང་ལ་སྐྱོན་བརྗོད་བྱེད་བཞིན་པ་ཁག་ལ་དོགས་ཟོན་རྩ་བ་ནས་མ་གནང་པར་རྒྱབ་ཏུ་བསྐྱུར་དགོས་སྐོར་གསུངས་འདུག དེ་བཞིན་ཁ་སང་རྒྱ་གར་གྱི་བདེ་སྲུང་ཁྱད་མཁས་མི་སྣ་དང་དམག་དཔོན་ཁག་གིས་རྒྱ་གར་གྱི་ ANI གསར་ཁང་གི་ཆེད་འདོན་དྲི་བར་ལན་འདེབས་གནང་པར་རྒྱ་གར་གྱི་རུ་དཔོན་སྐུ་ཞབས་ Praful Bakshi ལགས་ཀྱིས་ང་ཚོའི་ངོས་ནས་ཨ་རུ་ནཱ་ཅལ་དེ་རྒྱ་གར་གྱི་ཆ་ཤས་ཤིག་ཡིན་པ་དེ་སྔ་ནས་ཡོངས་བསྒྲགས་གནང་ཟིན་ཡོད་ཀྱང་། རྒྱ་གཞུང་གིས་མུ་མཐུད་གནད་དོན་དེའི་ཐོག་རྩོད་གླེང་བྱེད་བཞིན་པ་དེར་རྒྱ་གར་གཞུང་གིས་ལན་འདེབས་བྱ་རྒྱུ་མེད་པ་མ་ཟད། རྒྱ་གཞུང་ལ་འཇིགས་སྣང་མ་གནང་པར་དངོས་དོན་གང་ཡིན་པ་དེ་སྤོབས་པ་ཆེན་པོས་གསུང་དགོས་གལ་ཡིན་པ་མངོན་གསལ་གནང་འདུག ལྷག་པར་དུ་བདེ་སྲུང་ཁྱད་མཁས་མི་སྣ་སྐུ་ཞབས་ Qamar Agha ལགས་ཀྱིས་རྒྱ་དཀར་ནག་གཉིས་དབར་གྲོས་མོལ་གནང་ཐོག་རྒྱ་གཞུང་ལ་༸གོང་ས་༸སྐྱབས་མགོན་ཆེན་པོ་མཆོག་ནི་རྒྱ་གར་གྱི་ཆེ་བསྟོད་དམིགས་བསལ་སྐུ་མགྲོན་ཡིན་པ་དང་མགོན་པོ་༸གང་ཉིད་མཆོག་རྒྱ་གར་གྱི་ས་གནས་གང་དུ་ཆིབས་བསྒྱུར་མཛད་ཀྱང་༸གང་ཉིད་མཆོག་ལ་ཆོག་མཆན་ཡོད་པ་ཤེས་རྟོགས་ཐུབ་པ་བཟོ་དགོས་གལ་ཡིན་པའི་དགོངས་འཆར་ཕུལ་འདུག གཞི་རྩའི་རྒྱ་གར་གྱི་ཕྱི་སྲིད་ལྷན་ཁང་གི་ངོས་ནས་རྒྱ་གཞུང་ལ་༸གོང་ས་མཆོག་གི་ཆིབས་བསྒྱུར་སྐོར་དོན་མེད་ཀྱི་རྩོད་གཞི་རིགས་བཟོ་རྒྱུ་མེད་པ་ནན་བརྗོད་གནང་ཡོད། དེ་དེ་བཞིན་གཟའ་འཁོར་འདིའི་རེས་གཟའ་མིག་དམར་ཉིན་རྒྱ་གར་གྱི་ནང་སྲིད་བློན་ཆེན་གཞོན་པ་སྐུ་ཞབས་ Kiran Rijiju མཆོག་གིས་ཀྱང་རྒྱ་གར་གྱིས་རྒྱ་ནག་གི་ནང་སྲིད་ལ་དུས་ནམ་ཡང་ཐེ་བྱུས་གནང་མེད་པ་ཟད། རྒྱ་ནག་གཅིག་གི་སྲིད་བྱུས་ལ་གུས་བརྩི་གནང་གི་ཡོད་པ་ལྟར་རྒྱ་ནག་གི་ངོས་ནས་དེ་མཚུངས་སུ་རྒྱ་གར་གྱི་ནང་སྲིད་གནད་དོན་ལ་ཐེ་བྱུས་མེད་པ་དང་༸གོང་ས་ཏཱ་ལའི་བླ་མའི་ཆིབས་བསྒྱུར་ལ་ངོ་རྒོལ་གནང་དགོས་དོན་མེད་ཅེས་ལན་འདེབས་ཁ་གསལ་ཞིག་གནང་ཡོད་པ་རེད། ལྷག་དོན་ཁོང་གིས་མགོན་པོ་༸གང་ཉིད་མཆོག་ད་ལན་ཨ་རུ་ནཱ་ཅལ་ཁུལ་དུ་ཆིབས་བསྒྱུར་མཛད་པ་དེ་ནི་ཆོས་ཕྱོགས་ཀྱི་མཛད་འཆར་ཁོ་ན་ཡིན་པ་ལས་ཆབ་སྲིད་ཀྱི་ལྟ་ཕྱོགས་འཛིན་ན་འགྲིག་གི་མ་རེད་ཅེས་ནན་བརྗོད་གནང་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འབུམ་སྡེ་ལར་བཀའ་སློབ་སྩལ་སྐབས་ནང་པ་བྱབ་ཆུང་ཞིག་བྱས་པ་ལས་ཆོས་དད་མེད་པའི་འགྲོ་བ་མི་བཟང་པོ་ཞིག་བྱེད་ན་ཕན་ཐོགས་ཆེ་བ་ཡོད་ཅེས་བཀའ་བསྩལ་མཛད་སོང་། ཁ་སང་ཟླ་ ༤ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འབུམ་སྡེ་ལ་ནས་སྡེ་ར་ཁུལ་དུ་ཆིབས་བསྒྱུར་མ་མཛད་གོང་སྟེ་ཉིན་རྒྱབ་འབུམ་སྡེ་ལའི་རྫོང་སྡེ་ལས་ཁུངས་ནས་ཇི་ལྟར་གསོལ་འདེབས་ཞུ་དོན་ལྟར། མགོན་པོ་༸གང་ཉིད་མཆོག་གིས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། རྒྱ་གར་གྱི་གཞུང་འཛིན་ BJP ཆབ་སྲིད་ཚོགས་པའི་མགྲིན་ཚབ་པ་སྐུ་ཞབས་ Sudanshu Mittal མཆོག་གིས་དབུས་པའི་རྫོང་གི་མཐོ་རིམ་མི་སྣ་དང་གཞུང་འབྲེལ་གྱི་ལས་རིགས་འདྲ་མིན་ཐོག་ཕྱག་ལས་གནང་བཞིན་པའི་མི་སྣ་ ༣༠༠ སྐོར་ཞིག་ལ་ཟུར་དུ་བཀའ་སློབ་དང་བཀའ་འདྲི་ཞུ་རྒྱུའི་ལས་རིམ་ཞིག་ཚོགས་ཡོད། སྐབས་དེར་༸གོང་ས་མཆོག་གིས་རྣམ་ཀུན་ལྟར་བཀའ་སློབ་ཐོག་ཆེད་བཅར་ཞུ་མཁན་རྣམས་ལ་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་གྱི་སྐོར་ལ་ངོ་སྤྲོད་མཛད་པ་དང་འབྲེལ། བོད་ཀྱི་སྐད་ཡིག་ལྟ་བུ་ནི་ད་ལྟའི་ཆར་དཔལ་ན་ལེནྡྲའི་ཆོས་བརྒྱུད་ཆ་ཚང་བ་ཞིག་འགྲེལ་བཤད་ཐུབ་མཁན་སྐད་ཡིག་ཡག་ཤོས་ཤིག་ཆགས་ཡོད་པ་མ་ཟད། དེ་ལྟ་བུའི་སྐད་ཡིག་འདི་ནི་ཧི་མཱ་ལ་ཡ་ཁུལ་གྱི་ནུབ་ལ་དྭགས་ནས་ཤར་མོན་རྟ་དབང་གཙོ་བོར་འགྱུར་པའི་བོད་མི་རིགས་ཀྱི་རིག་གཞུང་དང་འབྲེལ་བ་ཡོད་པའི་རྒྱལ་ཁབ་མང་དག་ཞིག་ལ་གནད་ཆེ་ཆགས་ཡོད། དེར་བརྟེན་བོད་ཀྱི་རིག་གཞུང་དང་སྐད་ཡིག་སྲུང་སྐྱོབ་བྱ་རྒྱུ་ནི་བོད་མི་ས་ཡ་དྲུག་གི་འོས་འགན་ཁོ་ན་མིན་པར་འདི་ནི་འཛམ་གླིང་སྤྱི་ལ་ཞབས་འདེགས་བསྒྲུབ་ཐུབ་པ་ཞིག་ཡོད་སྟབས། དེ་ལྟ་བུའི་སྐད་ཡིག་དང་རིག་གཞུང་དེ་སྲུང་སྐྱོབ་བྱ་རྒྱུར་ཚང་མར་འགན་ཡོད་ཅེས་བཀའ་བསྩལ་སོང་བ་དང་། ཁྱད་པར་དུ་མོན་པའི་མི་རིགས་ཚོའི་ངོས་ནས་ཀྱང་དཔལ་ན་ལེནྡྲའི་ལྟ་གྲུབ་གཏིང་ཟབ་ཡོད་པ་འདིའི་ཐོག་དོ་སྣང་བྱེད་དགོས་ཞེས་བཀའ་ནན་མཛད་སོང་། སྐབས་དེར་མགོན་པོ་མཆོག་གི་སྐར་མ་ཉི་ཤུ་ལྷག་གི་བཀའ་སློབ་བསྩལ་གྲུབ་རྗེས་བཀའ་འདྲི་དགོངས་བསྐོར་ཞུ་རྒྱུའི་ལས་རིམ་ཞིག་ཚོགས་ཡོད་པ་རེད། སྐབས་དེར་ཚོགས་བཅར་བ་གཅིག་གིས་དེང་སྐབས་ཆོས་ལུགས་འདྲ་མིན་གྱི་མིང་ཐོག་ནས་སྤྱི་ཚོགས་ཁྲོད་དཀའ་ངལ་མང་དག་ཞིག་སྐྲུན་གྱི་ཡོད་པར་བརྟེན། མགོན་པོ་༸གང་ཉིད་མཆོག་གི་ངོས་ནས་ཆོས་མ་ཡིན་པར་འགྲོ་བ་མི་སྤྱིའི་ལ་ཕན་ཐོགས་ཡོད་པ་གང་ཞིག་གཟིགས་ཀྱི་ཡོད་དམ་ཞེས་བཀའ་འདྲི་ཞུས་པར་༸གོང་ས་མཆོག་གིས་བཀའ་ལན་དུ་ཉེ་སྔོན་ཡི་ཤུ་བླ་ཆེན་པོཔ་མཆོག་གིས་ཡི་ཤུའི་ཆོས་པ་བྱབ་ཆུང་ཞིག་བྱས་པ་ལས་འགྲོ་བ་མིའི་བཟང་པོ་ཞིག་བྱེད་ན་ཡག་གི་ཡོད་ཅེས་གསུངས་པ་ལུང་འདྲེན་དང་འབྲེལ་ཏེ་ང་ཚོའི་ནང་པ་ཚོ་ཡིན་ནའང་ནང་པའི་ཆོས་པ་བྱང་ཆུབ་ཞིག་བྱས་པ་ལ་ཆོས་དད་མེད་པའི་འགྲོ་བ་མིའི་བཟང་པོ་ཞིག་བྱེད་ན་ཕན་ཐོགས་ཆེ་བ་ཡོད་ཅེས་བཀའ་བསྩལ་སོང་། ལྷག་དོན་དེང་གི་འཛམ་གླིང་ཐོག་ཆོས་ལུགས་ཀྱི་མིང་ཐོག་ནས་ཕན་ཚུན་གསོད་རེས་བྱས་པ་གཙོས་ཐབས་སྡུག་གི་གནས་ཚུལ་མང་དག་ཞིག་འབྱུང་བཞིན་པར་བརྟེན། ང་ཚོའི་ངོས་ནས་ཆོས་ལུགས་ཕན་ཚུན་དབར་མཐུན་སྒྲིལ་ཡོང་ཐབས་ཐོག་དམིགས་བསལ་དོ་སྣང་དང་ཤུགས་སྣོན་བསྐྱོན་དགོས་ཞེས་བཀའ་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་ཡང་སྤྱི་ཚོགས་ཁྲོད་ལ་ཁ་ཆེ་དང་ནང་པའི་ཆོས་ཀྱི་མིང་ཐོག་ནས་མི་ལ་ལས་དྲག་སྤྱོད་ཀྱི་ལས་འགུལ་སྤེལ་བར་དེ་ནི་ཁ་ཆེའི་དྲག་སྤྱོད་པ་དང་ནང་པའི་དྲག་སྤྱོད་པ་ཞེས་ཆོས་ལུགས་སྤྱི་མིང་ཐོག་འགྲེལ་བརྗོད་གནང་ན་དེ་ནི་ནོར་བ་དང་། གང་ཟག་གང་ཞིག་གིས་ཁ་ཆེ་དང་ནང་པའི་མིང་ཐོག་ནས་བྱ་སྤྱོད་དེ་ལྟར་སྤེལ་ཚེ་དེ་ནི་ནང་པ་དང་ཁ་ཆེ་གང་ཡང་མ་རེད་ཅེས་བཀའ་ནན་མཛད་སོང་།