སྲིད་སྐྱོང་།

ལས་ཐོག་སྲིད་སྐྱོང་སྤེན་པ་ཚེ་རིང་མཆོག་དངོས་གཞིའི་འོས་བསྡུ་མི་དགོས་པར་་སྲིད་སྐྱོང་གི་རྒྱལ་ཁ་ཐོབ་འདུག

ཉེ་ཆར་ཨ་རིའི་གྲོས་ཚོགས་གོང་འོག་གཉིས་ཀྱིས་རྒྱབ་སྐྱོར་དང་ཟླ་བ་འདིའི་ཟླ་འགོར་སྲིད་འཛིན་ Trump གྱི་མཚན་རྟགས་བཀོད་པའི་ཨ་རི་གཞུང་གིས་རྩིས་ལོ་ ༢༠༢༦ ལོའི་སྔོན་རྩིས་ཁྲིམས་ཡིག་གི་ནང་དུ། ཐེངས་དང་པོར་བོད་མིའི་སྒྲིག་འཛུགས་དེ་བཞིན་ Tibetan Exile Government འམ་བཙན་བྱོལ་བོད་གཞུང་ལ་ངོས་འཛིན་གནང་རྒྱུ་ཡིན་པ་འཁོད་འདུག དེ་ཡང་ཁ་ཉིན་ཚེས་ ༩ ཉིན་སུད་སིའི་གྲོང་ཁྱེར་ཇི་ནི་ཝ་ནང་དུ་ཕྱི་ལོ་ ༢༠༢༦ ལོའི་ཇི་ནི་ཝ་བོད་དོན་གླེང་སྟེགས་ཀྱི་དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གསུངས་བཤད་གནང་བའི་ནང་དུ། ཉེ་ཆར་ཨ་རི་གཞུང་གིས་གཏན་འབེབས་གནང་བའི་ཡུལ་དེའི་ཕྱི་ལོ་ ༢༠༢༦ ལོའི་སྔོན་རྩིས་ཁྲིམས་ཡིག་ནང་དུ། ཨ་རི་གཞུང་གིས་ཆེས་ཐོག་མར་ Central Tibetan Administration འམ་བོད་མིའི་སྒྲིག་འཛུགས་དེ་བཞིན་བཙན་བྱོལ་བོད་གཞུང་ལ་ངོས་འཛིན་གནང་རྒྱུ་ཡིན་པའི་ཚིག་བརྗོད་འཁོད་ཡོད་པར་དགའ་ཚོར་ཆེན་པོའི་ཐོག་ཡོངས་གྲགས་གནང་བ་དང་སྦྲགས། ང་ཚོའི་ངོས་ནས་བོད་མིའི་སྒྲིག་འཛུགས་ལ་གཞུང་འབྲེལ་ངོས་འཛིན་ཐོབ་པར་ད་དུང་ལས་ཀ་བྱེད་རྒྱུ་མང་པོ་ཡོད་པའི་ཐོག་འབད་བརྩོན་གནང་མུས་དང་། མུ་མཐུད་ད་རེས་དེར་ཕེབས་པའི་བོད་དོན་རྒྱབ་སྐྱོར་བ་ཚོས་ཡུ་རོབ་ཀྱི་ནང་དུ་དེ་མཚུངས་ཀྱི་ངོས་འཛིན་ཐོབ་ཐབས་ཐོག་ཕྱག་ལས་གནང་དགོས་པ་གསུངས་འདུག རྩ་བའི་ཕྱི་ལོ་ ༡༩༨༨ ལོར་ཨ་རིའི་བོད་མིའི་སློབ་ཡོན་ལས་གཞི་ནས་འགོ་བཙུགས་རྗེས་རིམ་པས་ཨ་རི་གཞུང་གིས་བོད་ཕྱི་ནང་གཉིས་སུ་ཡོད་པའི་བོད་མི་རྣམས་ཀྱི་ཆོས་དང་རིག་གཞུང་སྲུང་སྐྱོབ་དང་དཔལ་འབྱོར་ཡར་རྒྱས། དེ་བཞིན་ཁོར་ཡུག་དང་ཆོས་རིག་སྲུང་སྐྱོབ། ཤེས་ཡོན་དང་འཕྲོད་བསྟེན་བཅས་ཀྱི་སླད་དུ་རོགས་དངུལ་གནང་རྒྱུ་དབུ་འཛུགས་གནང་བ་དང་། ཕྱི་ལོ་ ༢༠༠༢ ལོའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་བ་དང་འབྲེལ་ནས་ལོ་ལྟར་ཡུལ་དེའི་སྔོན་རྩིས་ནང་དུ་བོད་མིར་རོགས་དངུལ་གཏན་འབེབས་གནང་གི་ཡོད་པ་ལྟར། ཐེངས་འདིའི་སྔོན་རྩིས་གཏན་འཏེབས་ཁྲིམས་ཡིག་གི་ནང་དུའང་བོད་ཕྱི་ནང་གཉིས་ཀྱི་བོད་མི་རྣམས་ཀྱི་ཆོས་དང་རིག་གཞུང་། ཁོར་ཡུག སྐད་ཡིག་དང་འཚོ་གནས་སོགས་སྲུང་སྐྱོབ་སླད་ཨ་རི་གཞུང་གིས་ཁྱོན་ཨ་སྒོར་ས་ཡ་ ༢༣ ཞིག་གནང་གཏན་ཁེལ་བའི་ནང་ནས་ཨ་སྒོར་ས་ཡ་ ༡༣ ཞིག་རྒྱ་གར་དང་བལ་ཡུལ་ནང་གི་བོད་མིའི་ཆོས་དང་རིག་གཞུང་། སྐད་ཡིག འཕྲོས་བསྟེན། ཤེས་ཡོན། འཚོ་གནས། དེ་བཞིན་ནུས་པ་གོང་འཕེལ་བཅས་ཀྱི་ལས་དོན་སླད་དུ་བོད་མིའི་སྒྲིག་འཛུགས་ལ་གནང་རྒྱུ་ཡིན་པ་དང་། ཨ་སྒོར་ས་ཡ་ ༡༠ ཞིག་བོད་ནང་གི་བོད་མིའི་ཆོས་དང་རིག་གཞུང་། སྐད་ཡིག་དང་ཁོར་ཡུག་བཅས་སྲུང་སྐྱོབ་བཅས་ཀྱི་ལས་དོན་སླད་བོད་ནང་དུ་ཕྱག་ལས་གནང་མཁན་གཞུང་འབྲེལ་མིན་པའི་ཚོགས་པ་ཁག་སོགས་ལ་གནང་རྒྱུ་ཡིན་སྐོར་དེ་སྔ་ཕྱི་ལོ་ ༢༠༢༤ ལོར་ཨ་རིའི་རོགས་དངུལ་ལོ་གཅིག་ཆད་པའི་སྔོན་གྱི་སྔོན་རྩིས་ཁྲིམས་ཡིག་དང་གཅིག་མཚུངས་སུ་འཁོད་ཡོད་པ་རེད། ཁྲིམས་ཡིག་དེ་གའི་ནང་གསལ་རྒྱ་ནག་ལ་གདོང་ལེན་ལས་དོན་གྱི་རོགས་སྐྱོར་ཞེས་པའི་ནང་དུ། ཨ་རིའི་ཕྱི་སྲིད་བློན་ཆེན་མཆོག་གིས་ཡུལ་དེའི་གྲོས་ཚོགས་ཀྱི་འབྲེལ་ཡོད་ཚོགས་ཆུང་ལ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་གཞུང་དང་༸གོང་ས་མཆོག་༸གང་ཉིད་ཀྱི་སྐུ་ཚབ། ཡང་ན་བོད་མིའི་འོས་འདེམས་བྱས་པའི་འགོ་ཁྲིད་དབར་གྲོས་མོལ་ཐོག་ནས་བོད་དོན་ཐག་གཅོད་བྱུང་ཡོད་པ་སྙན་སེང་མ་ཞུས་བར་དུ། ཁྲིམ་ཡིག་དེའི་འོག་རོགས་དངུལ་གནང་བ་དེ་དག་བོད་རང་སྐྱོང་ལྗོངས་ཟེར་བ་གཙོས་བོད་ཀྱི་རང་སྐྱོང་ཁུལ་དང་ས་གནས་ཁག་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་ཚུལ་འཁོད་པའི་ཡིག་ཆ་དང་སྙན་ཐོ། ས་ཀྲ་སོགས་བཟོ་བསྐྲུན་དང་འདོན་སྤེལ་གནང་རྒྱུར་བེད་སྤྱོད་གཏོང་མི་ཆོག་པ་དང་། ཁྲིམས་ཡིག་འདི་ལག་བསྟར་སླད་བོད་མིའི་སྒྲིག་འཛུགས་དེ་བཞིན་བཙན་བྱོལ་བོད་གཞུང་ལ་ངོས་འཛིན་གནང་རྒྱུ་ཡིན་སྐོར་འཁོད་འདུག གཞི་རྩའི་ཨ་རི་གཞུང་གིས་ལོ་ལྟར་སྔོན་རྩིས་ཁྲིམས་ཡིག་ནང་དུ་བོད་མིར་རོགས་དངུལ་གནང་ཕྱོགས་དང་འབྲེལ་བའི་ཚིག་བརྗོད་འཁོད་ཡོད་ཀྱང་། བོད་མིའི་སྒྲིག་འཛུགས་ལ་བཙན་བྱོལ་བོད་གཞུང་དུ་ངོས་འཛིན་གནང་བའི་ཚིག་བརྗོད་བཀོད་མྱོང་མེད་པ་རེད། ཕྱོགས་མཚུངས་དེ་སྔ་ཕྱི་ལོ་་༢༠༠༢ ལོའི་བོད་དོན་རྒྱབ་སྐྱོར་ཀྱི་ཁྲིམས་ཡིག་དང་ཕྱི་ལོ་ ༢༠༢༠ ལོའི་བསྐྱར་བཅོས་ཁྲིམས་ཡིག་ཁག་གི་ནང་དུ་བོད་མིའི་སྒྲིག་འཛུགས་དེ་བཞིན་བཙན་བྱོལ་བོད་མིའི་སྤྱི་ཚོགས་ཀྱི་སྐུ་ཚབ་ཡིན་པ་འཁོད་ཡོད་ཀྱང་། བཙན་བྱོལ་བོད་གཞུང་ཞེས་ད་ལན་ནང་བཞིན་གྱི་ཚིག་བརྗོད་བཀོད་མྱོང་མེད་པ་རེད་འདུག

ཇི་ནི་ཝའི་གླེང་སྟེགས་ཐེངས་ ༦ པའི་མཇུག་བསྡོམས་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་༸གོང་ས་མཆོག་དང་ཇེ་ཧྥི་རི་ཨེབ་སི་ཊིན་བར་འབྲེལ་བ་ཡོད་ལུགས་ཀྱི་འཁྱོག་བཤད་དེ་རྒྱ་ནག་གིས་བྱས་པ་ཞིག་ཡིན་པ་ཐེར་འདོན་གནང་འདུག དེ་ཡང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་སུད་སི་བོད་ཀྱི་སྐུ་ཚབ་དོན་ཁང་གཉིས་ཀྱི་གོ་སྒྲིག་འོག་སུད་སི་ཇི་ནི་ཝ་གྲོང་ཁྱེར་ནང་དུ། འདི་ཚེས་ ༩ དང་ ༡༠ བཅས་ཉིན་གྲངས་གཉིས་རིང་ཇི་ནི་ཝ་གླེང་སྟེགས་ཐེངས་དྲུག་པ་དེ་བསྐོང་ཚོགས་གནང་ཡོད་ཅིང་། ཉིན་གྲངས་གཉིས་རིང་གི་གླེང་སྟེངས་ཐོག་དྲག་གནོན་དང་གདོང་ལེན། རྒྱ་ནག་གི་བཙན་གནོན་འོག་ཡོད་པའི་བོད་སོགས་ཀྱི་འགྲོ་བ་མིའི་ཐོབ་ཐང་གི་གནས་བབ་ཞེས་པའི་བརྗོད་གཞིའི་ཐོག་བགྲོ་གླེང་ལྷུག་པོ་གནང་ཡོད་པ་མ་ཟད། ཁ་སང་ཇི་ནི་ཝའི་གླེང་སྟེགས་ཐེངས་ ༦ པའི་མཇུག་བསྡོམས་མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས། ༸གོང་ས་མཆོག་དང་ཇེ་ཧྥི་རི་ཨེབ་སི་ཊིན་བར་འབྲེལ་བ་ཡོད་ལུགས་ཀྱི་འཁྱོག་བཤད་དེ་རྒྱ་ནག་གིས་བྱས་པ་ཞིག་ཡིན་པ་ཐེར་འདོན་གནང་འདུག  བོད་མིའི་སྒྲིག་འཛུགས་ཀྱིས་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་དབུ་མའི་ལམ་གྱི་སྲིད་བྱུས་བརྒྱུད་བོད་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་པས་ཞི་བའི་དབུ་མའི་ལམ་གྱི་ཐབས་ལམ་ལ་རྒྱབ་སྐྱོར་གནང་དགོས་པའི་སྐུལ་མ་གནང་འདུག མ་ཟད་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ནས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱའི་དཀའ་རྙོག་ཞི་འགྲིག་ཡོང་རྒྱུར་འབད་བརྩོན་གནང་བཞིན་ཡོད་ཀྱང་། རྒྱ་ནག་གཞུང་ཕྱོགས་ནས་དབུ་མའི་ལམ་གྱི་ཐབས་བྱུས་ཐོག་གྲོས་མོལ་སླར་གསོ་ཡོང་བར་འབད་བརྩོན་གང་ཡང་བྱེད་ཀྱི་མེད་སྟབས།  གླེང་སྟེགས་དེ་ཉིད་ནང་མཉམ་ཞུགས་གནང་མཁན་རྒྱལ་ཁབ་ཁག་ ༢༦ གི་གཞུང་ཁག་ནས་བོད་རྒྱ་གྲོས་མོལ་སླར་གསོ་ཡོང་བར་རྒྱ་གཞུང་ལ་གནོན་ཤུགས་སྤྲོད་དགོས་པའི་ཞུ་སྐུལ་གནང་འདུག དེ་བཞིན་རྒྱལ་ཁབ་ ༢༦ གྱི་གཞུང་ཁག་ངོས་ནས་ལོ་རྒྱུས་དངོས་ལ་རྒྱབ་སྐྱོར་གྱིས། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་ཕྱི་ལོ་ ༡༩༥༡ ལོར་ཁྲིམས་འགལ་གྱིས་བོད་ནང་བཙན་འཛུལ་བྱས་པ་ལས་དེའི་སྔོན་ལ་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པར་ངོས་འཛིན་གནང་གལ་ཆེ་བ་ཡིན་པ་དང་། བོད་དོན་ལ་མུ་མཐུད་སྔར་ལྷག་རྒྱབ་སྐྱོར་གནང་སྐྱོང་ཡོང་བའི་ཞུ་སྐུལ་གནང་འདུག སྲིད་སྐྱོང་མཆོག་གིས་ད་དུང་། ཉེ་ལམ་རྒྱ་ནག་གཞུང་གི་རྒྱབ་སྐྱོར་ཡོད་པའི་གསར་འགྱུར་བརྒྱུད་ལམ་ཁག་གིས་དམིགས་ཡུལ་ངན་པ་འཛིན་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ཇེ་ཕི་རི་ཨེབ་སི་ཊིན་བར་འབྲེལ་བ་ཡོད་ལུགས་ཀྱི་གཞི་མེད་ཀྱི་བསྙོན་འཛུགས་བྱས་ཏེ་གནས་ཚུལ་སྤེལ་བཞིན་པ་གསལ་སྟོན་དང་འབྲེལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ད་བར་ཇེ་ཧྥེ་རི་ཨེབ་སི་ཊིན་དང་མཇལ་འཕྲད་གནང་མྱོང་མེད་པ་མ་ཟད། ༸གོང་ས་མཆོག་གི་མཚན་ཐོག་ནས་ཀྱང་ཁོང་དང་མཇལ་འཕྲད་དམ་བཀའ་མོལ་གནང་རྒྱུ་རིགས་གཏན་ནས་བྱུང་མྱོང་མེད་ཅེས་ནན་བརྗོད་གནང་འདུག དེ་འབྲེལ་དགའ་ལྡན་ཕོ་བྲང་ཡིག་ཚང་ནས་ཡོངས་ཁྱབ་གསལ་བསྒྲགས་ཞིག་སྤེལ་ཟིན་ཡོད་པ་ལུང་འདྲེན་དང་འབྲེལ། བོད་མིའི་སྒྲིག་འཛུགས་ཀྱི་དཀའ་ཉེན་གདོང་ལེན་ཚོགས་ཆུང་དང་བཀའ་ཤག་ལྷན་རྒྱས་གྲོས་བསྡུར་གྱིས། ཨ་རི་ཁྲིམས་དོན་ལྷན་ཁང་ནས་སྤེལ་བའི་ཡིག་ཚགས་ལ་ཞིབ་འཇུག་ནན་པོ་གནང་འབྲས་སུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་དངོས་དང་༸གང་ཉིད་མཆོག་གི་མཚན་ཐོག་ནས་ཇེ་ཕི་རི་ཨེབ་སི་ཊིན་དང་ཐད་ཀར་མཇལ་འཕྲད་དམ་བཀའ་མོལ་བཅས་གནང་མྱོང་བའི་དཔང་རྟགས་གང་ཡང་རྙེད་སོན་བྱུང་མེད་པ་དང་།  ལྷག་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཇེ་ཕི་རི་ཨིབ་སི་ཊིན་བར་མཇལ་འཕྲད་དང་འབྲེལ་ལམ་ཡོད་པའི་གནས་ཚུལ་སྤེལ་བ་རྣམས་གཞི་མེད་རྫུན་བཟོ་བྱས་པ་ཤ་སྟག་ཡིིན་པ་གསུངས་འདུག དེ་བཞིན་བོད་མིའི་སྒྲིག་འཛུགས་ཀྱི་དྲ་གནས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ཇེ་ཕི་རི་ཨིབ་སི་ཊིན་བར་མཇལ་འཕྲད་བྱུང་བའི་གཞི་མེད་བསྙོན་འཛུགས་ལ་དགག་ལན་གྱི་གསལ་བསྒྲགས་ཞིག་སྤེལ་ཡོད་པའི་ནང་། དཔལ་འབྱོར་ལས་ཁུངས་ཁྱབ་ཁོངས་ཀམ་པུ་ཊར་སྡེ་ཚན་ནས་ཨེབ་སི་ཊིན་གྱི་ཡིག་ཚགས་ལ་དབྱེ་ཞིབ་དང་ཞིབ་འཇུག་ནན་པོ་གནང་འབྲས་སུ།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མགོན་པོ་༸གང་ཉིད་མཆོག་གི་མཚན་ཐོག་ནས་ཇེ་ཕི་རི་ཨེབ་སི་ཊིན་དང་ཐད་ཀར་མཇལ་འཕྲད་དམ་བཀའ་མོལ་བཅས་གནང་མྱོང་བའི་དཔང་རྟགས་གང་ཡང་རྙེད་སོན་བྱུང་མེད་པ་དང་། ཨེབ་སི་ཊིན་གྱི་ཡིག་ཚགས་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བའི་གནས་ཚུལ་རྣམས་མི་གཞན་ཞིག་གིས་བརྗོད་པ་ཞིག་དང་། གཞུང་འབྲེལ་མ་ཡིིན་པ། ཚོད་དཔག འཕྲོས་བཤད་ཙམ་ཡིན་པས། གནས་ཚུལ་དེ་དག་ལས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཇེ་ཕི་རི་ཨིབ་སི་ཊིན་བར་མཇལ་འཕྲད་དང་བཀའ་མོལ། འབྲེལ་ལམ་བཅས་བྱུང་བའི་ཁུངས་སྐྱེལ་ར་སྤྲོད་བྱས་ཐུབ་ཀྱི་མེད་ཅེས་ཐག་གཅོད་གནང་འདུག ཕྱོགས་མཚུངས་གནས་ཚུལ་དེ་དག་རྫུན་མ་ཡིན་པར་བརྟེན་རྒྱལ་སྤྱིའི་ནང་མིང་གྲགས་ཡོད་པའི་གསར་འགྱུར་བརྒྱུད་ལམ་ཁག་དང་། ལྷག་པར་ཨ་རི་ནང་གི་གསར་འགྱུར་བརྒྱུད་ལམ་ཁག་ནས་འཁྱོག་བཤད་ཀྱི་གནས་ཚུལ་ལ་རྒྱབ་སྐྱོར་མཚོན་པའི་གནས་ཚུལ་གང་ཡང་སྤེལ་མེད་ཅེས་བཀོད་དེ། གནས་ཚུལ་དག་ལ་རྫུན་བཟོ་དང་འཁྱོག་བཤད་ཤུགས་ཆེ་བྱེད་བཞིན་པའི་དུས་སྐབས་འདིར། རང་དབང་ལྡན་པའི་གསར་འགྱུར་བརྒྱུད་ལམ་ཁག་ནས་གནས་ཚུལ་ཁག་ལ་ཞིབ་འཇུག་ནན་པོ་གནང་སྟེ། བསམ་སྦྱོར་ངན་པས་དཀྲོག་གཏམ་དང་གཞི་མེད་སྐྱོན་འཛུགས་བྱེད་མཁན་གྱི་ཚོགས་པ་ཁག་གི་ལག་ཆར་མ་སོང་བ་བྱ་དགོས་པའི་འབོད་སྐུལ་ཞུས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག་ Geneva ཇི་ནི་ཝ་བོད་དོན་གླེང་སྟེགས་ཐེངས་དྲུག་པ་དེ་ཚོགས་འདུག་པ་དང་། ཐེངས་འདིའི་གླེང་སྟེགས་དེ་བཞིན་དྲག་གནོན་དང་གདོང་ལེན། རྒྱ་ནག་གི་བཙན་གནོན་འོག་ཡོད་པའི་བོད་སོགས་ས་ཁུལ་ཁག་གི་འགྲོ་བ་མིའི་ཐོབ་ཐང་གི་གནས་བབ་ཞེས་པའི་བརྗོད་གཞིའི་ཐོག་ཚོགས་ཡོད་ཅིང་། དེའི་ཐོག་འཛམ་གླིང་རྒྱལ་ཁབ་ ༢༦ གི་འཐུས་མི་ལྷན་འཛོམས་གནང་འདུག དེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་སུད་སི་བོད་ཀྱི་སྐུ་ཚབ་དོན་ཁང་གཉིས་ཀྱི་གོ་སྒྲིག་འོག་སུད་སི་ཇི་ནི་ཝ་གྲོང་ཁྱེར་ནང་དུ། ཁ་སང་ཚེས་ ༩ དང་དེ་རིང་ཚེས་ ༡༠ བཅས་ཉིན་གྲངས་གཉིས་རིང་ཇི་ནི་ཝ་གླེང་སྟེགས་ཐེངས་དྲུག་པ་དེ་ཚོགས་འདུག་པ་དང་། ཐེངས་འདིའི་གླེང་སྟེགས་ཐོག་ཨ་རིའི་བོད་དོན་དམིགས་བསལ་འབྲེལ་མཐུད་པ་ཟུར་པ་ལྕམ་སྐུ་ Uzra Zeya ཨ་ཛ་ར་ཛིཡ་ལགས་དང་། མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་དམིགས་བསལ་ཆེད་མཁས་པ་ Nicolas Levrat ནི་ཁོ་ལསི་ལགས། སུད་སི་གྲོས་ཚོགས་འཐུས་མི་ལྕམ་སྐུ་ Laurence Fehlmann Reille རེ་ལི་ལགས། Mexico མེཁ་སི་ཁོའི་གྲོས་ཚོགས་འཐུས་མི་ལྕམ་སྐུ་ Paloma Dominguez པ་ལོ་མ་ལགས། ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་སྐུ་ཞབས Pavel Fischer ཕེ་ཝལ་ལགས། འཇར་མ་ནིའི་གྲོས་ཚོགས་འཐུས་མི་སྐུ་ཞབས་ Michael Brand  མེ་ཁལ་ལགས། ཇི་ནི་ཝ་ལྷན་ཚོགས་ཀྱི་ཚོགས་གཞོན་ Dilara Bayrak བྷེ་རཀ་ལགས་སོགས་བོད་མིས་གཙོས་པའི་རྒྱལ་ཁབ་ཁག་ ༢༦ ནས་ཕེབས་པའི་གནད་ཡོད་མི་སྣ་དང་མཁས་པ། ཟུར་ཉན་པ་ཁག་གཅིག་ནས་བརྗོད་གཞི་ཁག་བཞིའི་ཐོག་བགྲོ་གླེང་དང་། དམིགས་བསལ་ཚོགས་འདུ་གཉིས་ནང་མཉམ་ཞུགས་གནང་གི་ཡོད་འདུག ཁ་སང་ཚོགས་འདུ་དབུ་འབྱེད་ཀྱི་མཛད་སྒོའི་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་ནང་དུ་བོད་མི་རྣམས་ལ་འཕྲད་བཞིན་པའི་དྲག་གནོན་དང་གདུག་རྩུབ་ཀྱི་དཀའ་ངལ་བཤད་ས་མེད་པ་དང་། རྒྱལ་ཚོགས་ལྟ་བུ་རྒྱལ་སྤྱིའི་སྡིངས་ཆའི་ཐོག་བོད་མིའི་འབོད་སྒྲ་སྒྲོག་ས་མེད་པའི་རྐྱེན་གྱིས་ཇི་ནི་ཝ་གླེང་སྟེགས་འདི་དབུ་འཛུགས་གནང་ཡོད་པ་དྲན་གསོ་དང་སྦྲགས། དེང་སྐབས་རྒྱལ་སྤྱིའི་ཐོག་རྙོག་གླེང་གི་ཁོར་ཡུག་ཁྲོད་རྒྱལ་ཚོགས་ལྟ་བུའི་རྒྱལ་སྤྱིའི་སྒྲིག་འཛུགས་ཀྱི་གྲུབ་ཆའི་ཞན་ཆ་གསལ་སྟོན་གྱིས་ད་ལྟའི་རྙོག་གླེང་ཅན་གྱི་རྒྱལ་སྤྱིའི་ཁོར་ཡུག་འདིའི་ཁྲོད་རྒྱལ་ཚོགས་ཀྱི་སྒྲོམ་གཞི་ལ་བཅོས་བསྒྱུར་དགོས་ངེས་ཡིན་པ་གསུངས་འདུག ལྷག་པར་དུ་སྲིད་སྐྱོང་མཆོག་གིས་བོད་དེ་བཞིན་རྒྱ་ནག་གི་ཁྲིམས་འགལ་བཙན་བཟུང་མ་བྱས་གོང་དུ་རང་བཙན་གཙང་མའི་རྒྱལ་ཁབ་ཅིག་ཡིན་སྐོར་དང་འབྲེལ། ཉེ་ལམ་སློབ་དཔོན་ལའོ་ལགས་ཀྱིས་ཨིན་ཡིག་ཐོག་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་མིན་ཞེས་པའི་དཔེ་དེབ་འདོན་སྤེལ་གནང་བ་ལུང་འདྲེན་དང་། ཁོང་གི་ཕྱག་དེབ་ནང་དུ་རྒྱ་ནག་རང་གི་ལོ་རྒྱུས་ཡིག་ཆ་གཞིར་བཞག་གིས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་བོད་དེ་རྒྱ་ཁོངས་ཡིན་པའི་འཁྱོག་བཤད་ཐེར་འདོན་གནང་གི་ཡོད་པ་གསུངས་འདུག ཁོང་གི་ད་དུང་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་མཛད་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་གཏན་འབེབས་གནང་བའི་གཉིས་སྨན་དབུ་མའི་ལམ་གྱི་སྲིད་བྱུས་དེ་ཡུན་རིང་ནས་གནས་པའི་བོད་རྒྱའི་དཀའ་རྙོག་སེལ་རྒྱུར་ཐབས་ལམ་ཡག་ཤོས་དེ་ཡིན་པ་གསུངས་འདུག སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཇི་ནི་ཝ་གླེང་སྟེགས་ཐེངས་དྲུག་པའི་དམིགས་ཡུལ་དང་གལ་གནད་ངོ་སྤྲོད་གནང་བའི་ཁྲོད། ཇི་ནི་ཝ་དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྙིང་དབུས་སུ་གནས་ཡོད་པ་ལྟར། ཚོགས་འདུ་དེ་དམིགས་བསལ་གལ་ཆེན་པོ་ཆགས་ཀྱི་ཡོད་སྐོར་དང་འབྲེལ། ང་ཚོ་ད་རེས་གློ་བུར་དུ་ཐུག་འཕྲད་བྱུང་བ་མ་ཡིན་པར་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཆོད་སེམས་བརྟན་པོ་ཞིག་གི་ཐོག་ནས་འདིར་འཛོམས་ཡོད་པ་གསུངས་ཏེ། ད་རེས་ཚོགས་ཁང་ནང་དུ་རྒྱལ་ཁབ་འདྲ་མིན་གྱི་འབོད་སྒྲ་ཐོས་རྒྱུ་ཡོད་པ་དེས། འགྲོ་བ་མིའི་ཐོབ་ཐང་གི་གནད་དོན་ནི་གོ་ལ་སྤྱི་ལ་ཁྱབ་པའི་གནད་དོན་ཡིན་པ་གསལ་སྟོན་གནང་གི་ཡོད་གསུངས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་ས་ལྡི་ལི་དང་། ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས། དེ་བཞིན་ཨ་རི་དང་། ཡུ་རོབ་ཀྱི་རྒྱལ་ཁབ་གཉིས་བཅས་ཀྱི་ནང་གཞུང་འབྲེལ་འཚམས་གཟིགས་དབུ་འཛུགས་གནང་འདུག དེ་ཡང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། དེ་རིང་ཕྱི་ཚེས་ ༢༠ ཉིན་ནས་དབུ་འཛུགས་ཀྱིས་ཚེས་ ༢༥ བར་ཐོག་མར་རྒྱ་གར་གྱི་རྒྱལ་ས་ལྡི་ལི་དང་། སྦེལ་ཀོབ་བཅས་སུ་ཕེབས་རྒྱུ་མ་ཟད། ཚེས་ ༢༦ ནས་ཕྱི་ཟླ་ ༢ ཚེས་ ༦ བར་ཨ་རི་དང་། དེ་ནས་ཚེས་ ༧ ནས་དབུ་འཛུགས་ཀྱིས་གཟའ་འཁོར་གཅིག་ལྷག་ཙམ་རིང་ཡུ་རོབ་སུད་སི་དང་ཧུང་གྷ་རི་བཅས་སུ་ཕྱོགས་ཕེབས་གནང་གཏན་འཁེལ་འདུག གནས་ཚུལ་ནང་སྲིད་སྐྱོང་མཆོག་གིས་ཕྱོགས་ཕེབས་དེའི་ཁྲོད་ས་གནས་སོ་སོའི་གནས་ཡོད་མི་སྣ་ཁག་གཅིག་མཇལ་འཕྲད་དང་། དེ་བཞིན་ཇི་ཎི་ཝ་ལྷན་ཚོགས་གཙོས་པའི་གལ་ཆེའི་ཚོགས་འདུ་རིམ་པའི་ནང་ཆ་ཤས་བླང་རྒྱུ་ཡིན་པ་གསུངས་འདུག ལས་རིམ་ལ་གཞིགས་ན་སྲིད་སྐྱོང་མཆོག་བཞུགས་སྒར་དུ་ཕྱི་ཟླ་ ༢ ཚེས་ ༡༥ སྟེ། ལོ་གསར་གོང་ཙམ་མ་གཏོགས་ཕྱིར་ལོག་གནང་གི་མེད་པ་དང་། སྲིད་སྤྱི་གཉིས་ཀྱི་འོས་བསྡུ་ཆེན་མོའི་སྐབས་ཁོང་ཨ་རིའི་ནང་ཡོད་པ་ཆགས་ཀྱི་འདུག སྤྱིར་བཙན་བྱོལ་བོད་མིའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་སླེབས་ལ་ཉེ་བ་དང་བསྟུན། ཐེངས་འདིའི་འོས་བསྡུ་ཆེན་མོའི་ནང་སྲིད་སྐྱོང་གི་འོས་གཞིར་བཞེངས་མཁན་ཁོངས་སུ་སྲིད་སྐྱོང་ལས་ཐོག་སྤེན་པ་ཚེ་རིང་མཆོག་དང་། ཕྱི་ལོ་ ༢༠༢༡ ལོའི་སྲིད་སྐྱོང་འོས་མི་དབུ་དཀར་ཚང་སྐལ་རྡོར་ལགས། དེ་བཞིན་སློབ་དགར་ཚེ་རིང་ཕུན་ཚོགས་ལགས་སོགས་བོད་མི་ཁག་གཅིག་ཡོད་པ་རེད། འོས་མི་གཞན་རྣམས་ཀྱིས་སྤྱི་ཚོགས་དྲྭ་ལམ་དང་གཞན་ཡང་བོད་མི་གནས་སྡོད་ས་གནས་ཁག་ཏུ་ཆེད་ཕེབས་ཀྱིས་འོས་བསྡུའི་དྲིལ་བསྒྲགས་ཀྱི་ལས་དོན་སྤེལ་མུས་ཡིན་པ་དེ་ལྟར་ཡང་། སྲིད་སྐྱོང་སྤེན་པ་ཚེ་རིང་མཆོག་གིས་དེ་སྔོན་གསར་འགོད་པར་ཁོང་ནས་བགྲོ་གླེང་དང་བཅར་འདྲི་སོགས་ཀྱི་བརྒྱུད་འོས་བསྡུའི་དྲིལ་བསྒྲགས་ཀྱི་ལས་དོན་རིགས་ཀྱི་ནང་བཞུགས་རྒྱུ་མིན་སྐོར་གསུངས་བ་ལྟར། འདི་ག་རླུང་འཕྲིན་ཁང་གིས་ད་བར་ཁོང་ལ་བཅར་འདྲི་ཞུ་ཐབས་ལན་མང་བྱས་ཀྱང་བཅར་འདྲི་དང་ལེན་གནང་མ་སོང་།

དེ་རིང་ཕྱི་ཟླ་ ༡༡ ཚེས་ ༢༥ ཉིན་མོ་འདི་ནི་རྒྱལ་སྤྱིའི་ཁྲོད་ International Day for the Elimination of Violence against Women ཞེས་བེུད་ལ་འཚེ་བ་འགོག་ཐབས་ཀྱི་ཉིན་མོ་ཞེས་སྲུང་བརྩི་ཞུ་བཞིན་པ་མ་ཟད། དེ་རིང་ནས་དབུ་འཛུགས་ཀྱིས་ཕྱི་ཟླ་ ༡༢ ཚེས་ ༡༠ བར་ཁྱོན་ཉིན་གྲངས་ ༡༦ རིང་ཕོ་མོ་དབྱེ་བ་ལ་བརྟེན་ནས་རྩུབ་སྤྱོད་འགོག་ཐབས་ཆེད་ལས་འགུལ་སྣ་ཚོགས་སྤེལ་གྱི་ཡོད་པ་ལྟར། དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་དེ་འབྲེལ་བསྒྲགས་གཏམ་ཞིག་འདོན་སྤེལ་གནང་བའི་ནང་། ཉིན་མོ་འདི་ནི་མི་རེ་ངོ་རེར་བེུད་དང་ཕྲུ་གུ་བུ་མོར་འཚེ་བ་འགོག་ཐབས་དང་། གདོང་ལེན་བྱེད་པའི་འགན་འཁྲི་ཡོད་སྐོར་དྲན་སྐུལ་གལ་ཆེན་ཞིག་ཆགས་ཀྱི་ཡོད་ཅིང་། ཚང་མས་སྤྱི་ཚོགས་ཁྲོད་བེུད་དང་ཕྲུ་གུ་བུ་མོར་དྲག་རྩུབ་རིགས་སྤྱི་དང་བྱེ་བྲག་ཏུ་དྲ་ལམ་ཐོག་ནས་ཆགས་སྲེད་ཀྱི་བསུན་གཙེར་རིགས་ཡོངས་སུ་མཚམས་འཇོག་ཡོང་བར་ནུས་པ་མཉམ་སྤུངས་དགོས་པའི་འབོད་སྐུལ་དང་འབྲེལ། དེ་ལྟར་གནང་ན་བུད་མེད་དང་ཕྲུ་གུ་བུ་མོ་ཚང་མ་འཇིགས་སྣང་མེད་པའི་ཐོག་ནས་རང་དབང་ངང་འཚོ་གནས་ཐུབ་ངེས་ཡིན་པ་གསུངས་འདུག དེ་ཡང་བསྒྲགས་གཏམ་དེའི་ནང་། ཉིན་མོ་འདི་ནི་འཛམ་གླིང་ཡོངས་སུ་བུད་མེད་ཐོག་འཚེ་བའི་རིགས་འགོག་ཐབས་དང་། བུད་མེད་ཀྱི་ཐོབ་ཐང་རྩོད་ལེན་མུ་མཐུད་བྱེད་བཞིན་པར་དྲན་སྐུལ་ཞུ་རྒྱུའི་ཉིན་མོ་ཞིག་ཆགས་ཀྱི་ཡོད་ཅིང་། བྱ་སྤྱོད་དེ་རིགས་འབྱུང་སྐབས་གནོད་འཚེ་ཕོག་མཁན་གང་ཟག་དེའི་གཞི་རྩའི་རང་དབང་བཙན་འཕྲོག་ཙམ་མིན་པར་བདེ་འཇགས་ལའང་ཉེན་ཁ་ཆེན་པོ་ཆགས་ཀྱི་ཡོད་པས། དྲག་རྩུབ་རིགས་ལ་གདོང་ལེན་བྱེད་པ་ནི་བཟང་སྤྱོད་དང་། སྤྱི་ཚོགས་ཀྱི་འགན་འཁྲི། དེ་བཞིན་སྒྲིག་འཛུགས་བཅས་ཀྱི་ངོས་ནས་ལྡོག་ཏུ་མེད་པའི་ལས་འགན་གལ་ཆེན་ཞིག་ཆགས་ཀྱི་ཡོད་པ་གསལ་སྟོན་དང་ཆབས་ཅིག ཚང་མས་སྤྱི་ཚོགས་ཁྲོད་དྲག་རྩུབ་རིགས་སྤྱི་དང་བྱེ་བྲག་ཏུ་དྲ་ལམ་ཐོག་ནས་ཆགས་སྲེད་ཀྱི་བསུན་གཙེར་རིགས་ཡོངས་སུ་མཚམས་འཇོག་ཡོང་བར་ནུས་པ་མཉམ་སྤུངས་གནང་ཐོག བུད་མེད་དང་ཕྲུ་གུ་བུ་མོ་ཚོར་འཇིགས་སྣང་མེད་པའི་ཐོག་ནས་རང་དབང་ངང་འཚོ་གནས་ཐུབ་པའི་ཁོར་ཡུག་བཟང་པོ་ཞིག་བསྐྲུན་དགོས་པའི་འབོད་སྐུལ་གནང་འདུག མ་ཟད་འདི་ལོའི་བརྗོད་གཞི་སྟེ། དེང་སྐབས་མགྱོགས་མྱུར་ངང་རྒྱ་སྐྱེད་འགྲོ་བཞིན་པའི་བུད་མེད་དང་ཕྲུ་གུ་བུ་མོ་ཚོར་དྲ་ཐོག་ནས་ཆགས་སྲེད་ཀྱི་བསུན་གཙེར་རིགས་འགོག་ཐབས་ཞེས་པ་དེ་ཡིན་པ་གསལ་སྟོན་གྱིས། དྲ་རྒྱ་དར་ཁྱབ་བྱུང་བ་དང་བསྟུན་ནས། བུད་མེད་ཚོས་སྔར་མེད་པའི་རྩུབ་སྤྱོད་ལ་གདོང་ལེན་བྱ་དགོས་འཁེལ་གྱི་ཡོད་པ་དང་། དྲ་ཐོག་ཕོ་མོ་དབྱེ་འབྱེད་ཀྱི་རྩུབ་སྤྱོད་ཁོངས་སུ། དྲ་ཐོག་ནས་འཁྲིག་སྤྱོད་ཀྱི་གསང་བརྡ་གཏོང་བ་དང་། འཇིགས་སྐུལ་བྱེད་པ།  རྗེས་འདེད་གཏོང་བ།  བསུན་གཙེར་བཟོ་བ།  དགོས་མེད་ཀྱི་ཆགས་སྤྱོད་དང་འབྲེལ་བའི་བསམ་ཚུལ་འདོན་པ། མོས་འཐུན་མེད་པའི་ཐོག་ནས་ཆགས་སྤྱོད་དང་འབྲེལ་བའི་བརྙན་པར་དྲ་ཐོག་ལ་སྤེལ་བ། སྒེར་གྱི་ལོ་རྒྱུས་ཕྱིར་འདོན་བྱེད་པ།  ཟུར་ཟ་བྱེད་པ། ཡོངས་ཁྱབ་ཀྱི་ཐོག་ནས་ངོ་ཚ་བོ་བཟོ་བ། ཆགས་སྤྱོད་དང་འབྲེལ་བའི་འཕྲིན་ཐུང་བསྐུར་བ་སོགས་ཚུད་ཡོད་པ་གསལ་སྟོན་དང་འབྲེལ།  རྩུབ་སྤྱོད་དེ་རིགས་ཀྱིས་བུད་མེད་ཚོར་རང་འགུལ་གྱིས་སྤྱི་ཚོགས་དང་དྲ་ཐོག་གི་གླེང་སྟེགས་ཐོག་མཉམ་ཞུགས་གནང་བར་བཀག་སྡོམ་བྱེད་བཅུག་གི་ཡོད་པ་མངོན་གསལ་དང་ཆབས་ཅིག བུད་མེད་རྣམ་པའི་བསམ་ཚུལ་དང་སྐད་སྒྲ་རིགས་ཕྱིར་མངོན་གསལ་བྱེད་དུ་བཅུག་གི་མེད་པའི་མཇུག་འབྲས་ངན་པ་ཡོང་གི་ཡོད་པ་གསལ་འདུག དེ་བཞིན་བོད་མིའི་སྒྲིག་འཛུགས་ཀྱིས་བོད་མིའི་སྤྱི་ཚོགས་ཁྲོད་བུད་མེད་དང་ཕྲུ་གུ་བུ་མོའི་ལུས་སེམས་གཉིས་ཀྱི་བདེ་འཇགས་དེ་བཞིན་གལ་ཆེར་ངོས་འཛིན་ཐོག བཙན་གཡེམ་དང་དྲག་སྤྱོད། ཆགས་སྲེད་ཀྱི་རྩུབ་སྤྱོད། དེ་བཞིན་དྲ་ཐོག་ཕོ་མོ་དབྱེ་འབྱེད་ཀྱི་རྩུབ་སྤྱོད་དེ་རིགས་ལ་བཟོད་སྲན་རྩ་བ་ནས་མེད་པའི་ཁར། དེ་འབྲེལ་ཁྲིམས་ཐོག་ནས་ཡ་ལན་ནན་པོ་བྱ་རྒྱུའི་ཆོད་སེམས་བརྟན་པོ་ཡོད་པ་དང་། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པའི་བརྒྱུད་བོད་མིའི་གཞིས་ཆགས་ཁག་དང་སློབ་གྲྭ་ཁག་གི་གཙོ་བྱས་པའི་བོད་མི་འདུ་སྡོད་ཀྱི་ས་ཁུལ་ཁག་ཏུ་དྲག་སྤྱོད་ཀྱི་རིགས་འགོག་ཐབས་དང་། ཁྲིམས་ཐོག་ནས་བོད་མི་རྣམས་ཀྱིས་རང་ཉིད་ལ་འཕྲད་བཞིན་པའི་རྩུབ་སྤྱོད་ཀྱི་དཀའ་ངལ་རིགས་ལ་གདོང་ལེན་བྱེད་ཕྱོགས་ཀྱི་ལམ་སྟོན། དེ་བཞིན་ཕོ་མོ་དབྱེ་འབྱེད་ཀྱི་རྩུབ་སྤྱོད་དེའི་ཉེན་ཁ་ཆུང་དུ་གཏང་ཐུབ་མིན་སྐོར་གོ་རྟོགས་སྣ་མང་སྤེལ་བཞིན་ཡོད་པ་གསལ་འདུག ཕྱོགས་མཚུངས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཁྱབ་ཁོངས་བེུད་ནུས་སྟོབས་གོང་སྤེལ་ཚན་པས་གོ་སྒྲིག་འོག བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་ནང་བུད་མེད་དང་ཕྲུ་གུ་བུ་མོ་ཚོར་བརྡ་འཕྲིན་ཐོག་ནས་དྲག་སྤྱོད་སྤོངས་ཞེས་པའི་བརྗོད་གཞིའི་ཐོག་ནས་ཉིན་མོ་དེ་སྲུང་བརྩི་ཞུས་པ་དང་འབྲེལ། མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་འཕར་ཚེ་རིང་གཡུ་སྒྲོན་ལགས་ཀྱིས་དབུས་པའི་བཀའ་བློན་རྣམ་པ། དེ་བཞིན་ལྷན་ཁང་ཁག་གི་དྲུང་ཆེ་དང་སྲིད་ཞུ་བ་བཅས་ནས་ལྷན་ཞུགས་གནང་བ་མ་ཟད། ཉིན་མོ་དང་འབྲེལ་ནས་གསུང་བཤད་གནང་མཁན་མི་སྣ་བཞི་གདན་ཞུ་གནང་འདུག སྐབས་དེར་སྐུ་མགྲོན་གཙོ་བོ་ནང་སྲིད་ལས་ཁུངས་ཀྱི་དྲུང་འཕར་ཚེ་རིང་གཡུ་སྒྲོན་ལགས་ནས་ཉིན་མོ་དང་འབྲེལ་བའི་ཐོག་གསུང་བཤད་གནང་བ་དང་། རྡ་ས་བོད་དོན་ལས་འགུལ་བསྟི་གནས་ཁང་གི་ལས་བྱེད་བསྟན་འཛིན་རྒྱལ་ལགས་ནས་རང་ཉིད་ལ་དྲ་ཐོག་ནས་རྩུབ་སྤྱོད་དེ་རིགས་མ་ཕོག་པའི་ཆེད་དུ་སྡོན་འགོག་གི་ཐབས་ལམ་ཁག་ལག་བསྟར་ཇི་ལྟར་གནང་དགོས་མིན་དང་། སོ་སོའི་སྒེར་གྱི་ཆ་འཕྲིན་སྲུང་སྐྱོབ་གནང་ཕྱོགས་སོགས་ཀྱི་ཐོག་གསུང་བཤད་གནང་སོང་། དེ་བཞིན་བོད་མིའི་སྒྲིག་འཛུགས་ཀྱི་ལས་ཁུངས་ཁག་བར་བེུད་ལ་འཚེ་བ་འགོག་ཐབས་ཀྱི་བརྗོད་གཞི་ཐོག་བགྲོ་གླེང་དང་དྲི་བ་དྲི་ལན་གྱི་ལས་རིམ་བསྐྱངས་གནང་སོང་། གསར་འགོད་པས་བོད་ཀྱི་བུད་མེད་ནུས་སྟོབས་གོང་སྤེལ་ཚན་པའི་འགན་འཛིན་ཚེ་རིང་སྐྱིད་ལགས་སུ་ཉིན་མོ་དང་འབྲེལ་བའི་སྐོར་ལ་བཅར་འདྲི་ཞུས་པར་ཁོང་གིས། བོད་པའི་སྤྱི་ཚོགས་ཀྱི་ནང་དུ། བཙན་གཡེམ་དང་དྲག་སྤྱོད། དེ་བཞིན་དྲ་ཐོག་ནས་ཆགས་སྲེད་ཀྱི་རྩུབ་སྤྱོད་སོགས་ཡོང་གི་ཡོད་པ་དང་། ལྷག་པར་སྤྱི་ཚོགས་ཁྲོད་ཀྱི་གནས་སྟངས་རྒྱུས་ལོན་གནང་བ་སོགས་ལ་གཞིགས་ཏེ། ཉེ་བའི་ཆར་དྲ་ཐོག་གི་གླེང་སྟེགས་སུ་རྗེས་སྙེགས་བྱེད་པ། སྒེར་གྱི་གསང་བའི་འཕྲིན་ཐུང་དང་། པར་རིས་སོགས་ཡོངས་ཁྱབ་ཀྱི་ཐོག་ནས་འགྲེམས་སྤེལ་བྱེད་པའི་གྱོད་དོན་བཞི་ལྷག་བྱུང་ཡོད་པ་འགྲེལ་བརྗོད་དང་འབྲེལ། དྲ་ཐོག་ཕོ་མོའི་དབྱེ་འབྱེད་ཀྱི་རྩུབ་སྤྱོད་བརྒྱུད་ནས་གནོད་འཚེ་ཐེབས་མཁན་རྣམས་ལ་འཇིགས་སྣང་དང་སེམས་པར་གནོད་སྐྱོན་ཐེབས་ཀྱི་ཡོད་སྟབས། དེ་རིང་ནས་དབུ་འཛུགས་ཀྱིས་ཉིན་གྲངས་ ༡༦ རིང་བོད་མིའི་གཞིས་ཆགས་ཁག་གཙོས་སློབ་གྲྭ་དང་མཐོ་སློབ་སོགས་ལ་དེ་འབྲེལ་གོ་རྟོགས་ཀྱི་ལས་འགུལ་སྤེལ་རྒྱུ་ཡིན་ཞིང་། དྲག་སྤྱོད་ཀྱི་རིགས་འགོག་ཐབས་དང་། དེ་བཞིན་ཁྲིམས་ཐོག་ནས་བོད་མི་རྣམས་ཀྱིས་རང་ཉིད་ལ་འཕྲད་བཞིན་པའི་རྩུབ་སྤྱོད་ཀྱི་དཀའ་ངལ་རིགས་ལ་གདོང་ལེན་བྱེད་ཕྱོགས་ཀྱི་ལམ་སྟོན་ངོ་སྤྲོད་གནང་རྒྱུ་ཡིན་པ་གསུངས་སོང་།

དབུ་དཀར་ཚང་སྐལ་བཟང་རྡོ་རྗེ་ལགས་ཕྱི་ལོ་ ༢༠༢༦ ལོའི་སྲིད་སྐྱོང་གི་འོས་མིར་བཞེངས་རྒྱུའི་གསལ་བསྒྲགས་གནང་འདུག དེ་ཡང་དེ་རིང་ཕྱི་ཟླ་ ༡༡ ཚེས་ ༡༩ ཉིན་གྱི་ཞོགས་པ་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས་སྤྱི་ཚོགས་དྲ་རྒྱ་ངོ་དེབ་ཐོག་གསལ་བསྒྲགས་སྤེལ་བའི་ནང་། ཁོང་རང་ཉིད་སྲིད་སྐྱོང་གི་འོས་མིར་བཞེངས་རྒྱུའི་རྩ་བའི་དམ་བཅའ་གསུམ་སྟེ། མཐུན་སྒྲིལ་དང་བོད་དོན་དྲིལ་བསྒྲགས་རྒྱ་སྐྱེད། དེ་བཞིན་རང་ཁ་རང་གསོ་དང་དཔལ་འབྱོར་སྲ་བརྟན་བཅས་ཀྱི་ཐོག་ནས་ལས་དོན་གནང་རྒྱུའི་ཡིན་ཞེས་གསུངས་འདུག དབུ་དཀར་ཚང་སྐལ་བཟང་རྡོ་རྗེ་ལགས་ནི་དེ་སྔོན་བཀའ་ཤག་སྐབས་ ༡༥ པའི་དུས་སྐབས་སུ་དཔལ་འབྱོར་ལས་ཁུངས་སུ་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དང་། ཨ་རི་བོད་ཀྱི་སྐུ་ཚབ་དོན་གཅོད་གནང་མྱོང་ཡོད་པ་མ་ཟད། ཕྱི་ལོ་ ༢༠༢༡ ལོའི་སྲིད་སྐྱོང་གི་འོས་མིར་བཞེངས་ཡོད་ཅིང་། སྐབས་དེར་དངོས་གཞིའི་འོས་བསྡུའི་ཆེན་མོའི་ཁྲོད་ཁོང་ལ་འོས་གྲངས་ ༢༨༩༠༧ ཐོབ་ཡོད་པ་རེད། ཁོང་ད་རེས་སླར་ཡང་སྲིད་སྐྱོང་གི་འོས་མིར་བཞེངས་དགོས་པའི་རྒྱུ་མཚན་གསལ་བཀོད་ཁྲོད། ཐོག་མའི་ཆར་ ༢༠༢༦ ལོའི་སྲིད་སྐྱོང་འོས་བསྡུ་ཆེན་མོར་མཉམ་ཞུགས་བྱ་རྒྱུའི་འདུན་པ་མེད་པ་དང་། རེ་བར་ད་རེས་ཀྱི་འོས་བསྡུའི་ཁྲོད་འགོ་ཁྲིད་གསར་པ་དང་ལྷག་པར་བུད་མེད་ཀྱི་འགོ་ཁྲིད་རྣམས་མདུན་དུ་ཐོན་ན་བསམས་པ་དེ་ལྟར་ཡང་། ད་ལམ་དེ་ལྟར་མི་བྱུང་བའི་ཁར། ཁོང་ལ་ཡིད་ཆེས་དང་རྒྱབ་སྐྱོར་གནང་མཁན་རྣམ་པས་སྐུལ་མ་དང་། ནང་མི་དང་མཉམ་དུ་གྲོས་བསྡུར། དེ་བཞིན་ལྷག་པར་མང་གཙོའི་ཁེ་དབང་ལ་མཐོན་ཆེན་དང་། མ་འོངས་བོད་ཀྱི་ཁ་ཕྱོགས་གསལ་པོ་ཞིག་དགོས་གལ་གཞིགས་ཏེ་ཐག་གཅོད་གནང་བ་ཞིག་ཡིན་པ་གསལ་བཀོད་གནང་འདུག མ་ཟད་ད་རེས་ཀྱི་འོས་བསྡུའི་ཁྲོད་ཁོང་གི་རྩ་བའི་དམ་བཅའ་གསུམ་སྟེ། བོད་མི་རྒན་གཞོན་དབང་དང་། ལུང་ཚན་དང་ཆོལ་ཁའི་དབར། འཛམ་གླིང་ས་ཕྱོགས་གང་སར་བཞུགས་པའི་ཁ་ཐོར་གྱི་བོད་མི་ཡོངས་རྫོགས་དབར་མཐུན་སྒྲིལ་ལ་ཤུགས་སྣོན་གྱིས་བོད་མིའི་སྒྲིག་འཛུགས་དེ་བཞིན་ཚང་མས་ནུས་པ་མཉམ་སྤུངས་ཀྱི་དེ་ལས་ཀྱང་ཚགས་ཚུད་དུ་གཏང་རྒྱུ་ལ་དམིགས་པའི་མཐུན་སྒྲིལ་དང་། རྒྱལ་སྤྱིའི་སྡིངས་ཆའི་སྟེང་བོད་དོན་དྲིལ་བསྒྲགས་ཀྱི་ལས་གཞི་ད་ལྟ་ལས་ཐབས་ཇུས་བཟང་དུ་དང་ནུས་ཤུགས་ཆེ་རུ་གཏང་རྒྱུ་ལ་དམིགས་པའི་བོད་དོན་དྲིལ་བསྒྲགས་རྒྱ་སྐྱེད། དེ་བཞིན་བོད་མིའི་སྒྲིག་འཛུགས་དེ་བཞིན་རང་ཁ་རང་གསོ་དང་དཔལ་འབྱོར་སྲ་བརྟན་ཞིག་ཡོང་ཆེད། དཔལ་འབྱོར་རོགས་རམ་ཤོར་བ་རྣམས་སླར་གསོ་ཐུབ་པ་བྱ་རྒྱུ་དང་། ལྷག་པར་དུ་དེ་ལས་གཞན་པའི་དཔལའ་འབྱོར་རོགས་རམ་འཕར་མ་གང་མང་གསར་རྙེད་ཐུབ་པ་བྱ་རྒྱུ་ཞེས་རང་ཁ་རང་གསོ་དང་དཔལ་འབྱོར་སྲ་བརྟན་བཅས་དོན་ཚན་གསུམ་མངོན་གསལ་གནང་འདུག རྩ་བའི་ཁོང་གིས་རྒྱ་དམར་གྱིས་བོད་རྒྱ་གྲོས་མོལ་གྱི་བརྒྱུད་ལམ་ཡོངས་རྫོགས་དེ་སྔོན་ནས་བཀག་ཟིན་པ་མ་ཟད། བོད་ནང་དུ་མི་རིགས་གཉའ་གནོན་གྱི་སྲིད་ཇུས་ཉིན་རེ་བཞིན་ཇེ་སྡུག་ཏུ་བཏང་དང་གཏོང་བཞིན་པ་དང་། བཙན་བྱོལ་དུ་གྱར་བའི་བོད་མིའི་སྤྱི་ཚོགས་ནང་བོད་མི་ནང་ཁུལ་ལུང་ཚན་ཕྱོགས་རེས་ཀྱི་གནས་སྟངས་དང་། སྒྲིག་འཛུགས་སྲ་བརྟན་ཡོང་ཆེད་དཔལ་འབྱོར་རོགས་རམ་གྱི་དཀའ་ངལ་སོགས་ཕྱོགས་གང་ས་ནས་བོད་མིའི་འཐབ་རྩོད་ཀྱི་གནས་བབ་དང་སྤྱི་ཚོགས་ཀྱི་གནས་སྟངས་ནི་དུས་ཚིགས་ཧ་ཅང་གལ་ཆེན་ཞིག་ལ་སླེབས་ཡོད་པར་བརྟེན། ངེས་པར་དུ་འགོ་ཁྲིད་བརྟན་པོ་དང་། མཐུན་སྒྲིལ་ལ་ཕྱོགས་པ། མ་འོངས་སྲིད་ཇུས་ཀྱི་ཁ་ཕྱོགས་གསལ་པོ་ཡོད་པ་ཞིག་དགོས་ཞེས་གསུངས་འདུག གཞི་རྩའི་དབུ་དཀར་ཚང་སྐལ་བཟང་རྡོ་རྗེ་ལགས་ནི་ཕྱི་ལོ་ ༡༩༦༨ ལོར་སྐྱེས་ཅིང་།  ཨ་རིའི་བྷོ་སི་ཊོན་ Tufts གཙུག་ལག་སློབ་གྲྭ་ནས་སློབ་མཐར་སོན་པ་དང་།  ཕྱི་ལོ་ ༢༠༡༡ ནས་ ༢༠༢༠ བར་སྲིད་སྐྱོང་བློ་བཟང་སེང་གེ་མཆོག་གི་དམིགས་བསལ་སློབ་སྟོན་པ་དང་།  དེ་ནས་བྱང་ཨ་རིའི་སྐུ་ཚབ་དོན་གཅོད།  དེ་བཞིན་དཔལ་འབྱོར་ལས་ཁུངས་སུ་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་གནང་མྱོང་ཡོད་པ་བཅས་བོད་མིའི་རང་དབང་འཐབ་རྩོད་དང་སྤྱི་ཚོགས་ཡར་རྒྱས་ཆེད་ཕྱག་ལས་གནང་མྱོང་ཡོད་པ་ཞིག་རེད་འདུག

དཀའ་ངལ་གང་འདྲ་ཞིག་འཕྲད་ཀྱང་ང་ཚོས་༸གོང་ས་མཆོག་གི་ལམ་སྟོན་འོག་འཐབ་རྩོད་མུ་མཐུད་བྱ་རྒྱུ་ཡིན་ཞེས་གསུངས་སོང་།

Prague ནང་དུ་༸གོང་ས་མཆོག་དང་༸སྐུའི་མཛའ་གྲོགས་སྲིད་འཛིན་དམ་པ་ Vaclav Havel མཆོག་ལ་རྗེས་དྲན་གྱི་ལས་རིམ་ཞིག་འཚོགས་པ།