དབུ་དཀར་ཚང་སྐལ་བཟང་རྡོ་རྗེ་ལགས་ཕྱི་ལོ་ ༢༠༢༦ ལོའི་སྲིད་སྐྱོང་གི་འོས་མིར་བཞེངས་རྒྱུའི་གསལ་བསྒྲགས་གནང་འདུག
དེ་ཡང་དེ་རིང་ཕྱི་ཟླ་ ༡༡ ཚེས་ ༡༩ ཉིན་གྱི་ཞོགས་པ་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས་སྤྱི་ཚོགས་དྲ་རྒྱ་ངོ་དེབ་ཐོག་གསལ་བསྒྲགས་སྤེལ་བའི་ནང་། ཁོང་རང་ཉིད་སྲིད་སྐྱོང་གི་འོས་མིར་བཞེངས་རྒྱུའི་རྩ་བའི་དམ་བཅའ་གསུམ་སྟེ། མཐུན་སྒྲིལ་དང་བོད་དོན་དྲིལ་བསྒྲགས་རྒྱ་སྐྱེད། དེ་བཞིན་རང་ཁ་རང་གསོ་དང་དཔལ་འབྱོར་སྲ་བརྟན་བཅས་ཀྱི་ཐོག་ནས་ལས་དོན་གནང་རྒྱུའི་ཡིན་ཞེས་གསུངས་འདུག
དབུ་དཀར་ཚང་སྐལ་བཟང་རྡོ་རྗེ་ལགས་ནི་དེ་སྔོན་བཀའ་ཤག་སྐབས་ ༡༥ པའི་དུས་སྐབས་སུ་དཔལ་འབྱོར་ལས་ཁུངས་སུ་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དང་། ཨ་རི་བོད་ཀྱི་སྐུ་ཚབ་དོན་གཅོད་གནང་མྱོང་ཡོད་པ་མ་ཟད། ཕྱི་ལོ་ ༢༠༢༡ ལོའི་སྲིད་སྐྱོང་གི་འོས་མིར་བཞེངས་ཡོད་ཅིང་། སྐབས་དེར་དངོས་གཞིའི་འོས་བསྡུའི་ཆེན་མོའི་ཁྲོད་ཁོང་ལ་འོས་གྲངས་ ༢༨༩༠༧ ཐོབ་ཡོད་པ་རེད།
ཁོང་ད་རེས་སླར་ཡང་སྲིད་སྐྱོང་གི་འོས་མིར་བཞེངས་དགོས་པའི་རྒྱུ་མཚན་གསལ་བཀོད་ཁྲོད། ཐོག་མའི་ཆར་ ༢༠༢༦ ལོའི་སྲིད་སྐྱོང་འོས་བསྡུ་ཆེན་མོར་མཉམ་ཞུགས་བྱ་རྒྱུའི་འདུན་པ་མེད་པ་དང་། རེ་བར་ད་རེས་ཀྱི་འོས་བསྡུའི་ཁྲོད་འགོ་ཁྲིད་གསར་པ་དང་ལྷག་པར་བུད་མེད་ཀྱི་འགོ་ཁྲིད་རྣམས་མདུན་དུ་ཐོན་ན་བསམས་པ་དེ་ལྟར་ཡང་། ད་ལམ་དེ་ལྟར་མི་བྱུང་བའི་ཁར། ཁོང་ལ་ཡིད་ཆེས་དང་རྒྱབ་སྐྱོར་གནང་མཁན་རྣམ་པས་སྐུལ་མ་དང་། ནང་མི་དང་མཉམ་དུ་གྲོས་བསྡུར། དེ་བཞིན་ལྷག་པར་མང་གཙོའི་ཁེ་དབང་ལ་མཐོན་ཆེན་དང་། མ་འོངས་བོད་ཀྱི་ཁ་ཕྱོགས་གསལ་པོ་ཞིག་དགོས་གལ་གཞིགས་ཏེ་ཐག་གཅོད་གནང་བ་ཞིག་ཡིན་པ་གསལ་བཀོད་གནང་འདུག
མ་ཟད་ད་རེས་ཀྱི་འོས་བསྡུའི་ཁྲོད་ཁོང་གི་རྩ་བའི་དམ་བཅའ་གསུམ་སྟེ། བོད་མི་རྒན་གཞོན་དབང་དང་། ལུང་ཚན་དང་ཆོལ་ཁའི་དབར། འཛམ་གླིང་ས་ཕྱོགས་གང་སར་བཞུགས་པའི་ཁ་ཐོར་གྱི་བོད་མི་ཡོངས་རྫོགས་དབར་མཐུན་སྒྲིལ་ལ་ཤུགས་སྣོན་གྱིས་བོད་མིའི་སྒྲིག་འཛུགས་དེ་བཞིན་ཚང་མས་ནུས་པ་མཉམ་སྤུངས་ཀྱི་དེ་ལས་ཀྱང་ཚགས་ཚུད་དུ་གཏང་རྒྱུ་ལ་དམིགས་པའི་མཐུན་སྒྲིལ་དང་། རྒྱལ་སྤྱིའི་སྡིངས་ཆའི་སྟེང་བོད་དོན་དྲིལ་བསྒྲགས་ཀྱི་ལས་གཞི་ད་ལྟ་ལས་ཐབས་ཇུས་བཟང་དུ་དང་ནུས་ཤུགས་ཆེ་རུ་གཏང་རྒྱུ་ལ་དམིགས་པའི་བོད་དོན་དྲིལ་བསྒྲགས་རྒྱ་སྐྱེད། དེ་བཞིན་བོད་མིའི་སྒྲིག་འཛུགས་དེ་བཞིན་རང་ཁ་རང་གསོ་དང་དཔལ་འབྱོར་སྲ་བརྟན་ཞིག་ཡོང་ཆེད། དཔལ་འབྱོར་རོགས་རམ་ཤོར་བ་རྣམས་སླར་གསོ་ཐུབ་པ་བྱ་རྒྱུ་དང་། ལྷག་པར་དུ་དེ་ལས་གཞན་པའི་དཔལའ་འབྱོར་རོགས་རམ་འཕར་མ་གང་མང་གསར་རྙེད་ཐུབ་པ་བྱ་རྒྱུ་ཞེས་རང་ཁ་རང་གསོ་དང་དཔལ་འབྱོར་སྲ་བརྟན་བཅས་དོན་ཚན་གསུམ་མངོན་གསལ་གནང་འདུག
རྩ་བའི་ཁོང་གིས་རྒྱ་དམར་གྱིས་བོད་རྒྱ་གྲོས་མོལ་གྱི་བརྒྱུད་ལམ་ཡོངས་རྫོགས་དེ་སྔོན་ནས་བཀག་ཟིན་པ་མ་ཟད། བོད་ནང་དུ་མི་རིགས་གཉའ་གནོན་གྱི་སྲིད་ཇུས་ཉིན་རེ་བཞིན་ཇེ་སྡུག་ཏུ་བཏང་དང་གཏོང་བཞིན་པ་དང་། བཙན་བྱོལ་དུ་གྱར་བའི་བོད་མིའི་སྤྱི་ཚོགས་ནང་བོད་མི་ནང་ཁུལ་ལུང་ཚན་ཕྱོགས་རེས་ཀྱི་གནས་སྟངས་དང་། སྒྲིག་འཛུགས་སྲ་བརྟན་ཡོང་ཆེད་དཔལ་འབྱོར་རོགས་རམ་གྱི་དཀའ་ངལ་སོགས་ཕྱོགས་གང་ས་ནས་བོད་མིའི་འཐབ་རྩོད་ཀྱི་གནས་བབ་དང་སྤྱི་ཚོགས་ཀྱི་གནས་སྟངས་ནི་དུས་ཚིགས་ཧ་ཅང་གལ་ཆེན་ཞིག་ལ་སླེབས་ཡོད་པར་བརྟེན། ངེས་པར་དུ་འགོ་ཁྲིད་བརྟན་པོ་དང་། མཐུན་སྒྲིལ་ལ་ཕྱོགས་པ། མ་འོངས་སྲིད་ཇུས་ཀྱི་ཁ་ཕྱོགས་གསལ་པོ་ཡོད་པ་ཞིག་དགོས་ཞེས་གསུངས་འདུག
གཞི་རྩའི་དབུ་དཀར་ཚང་སྐལ་བཟང་རྡོ་རྗེ་ལགས་ནི་ཕྱི་ལོ་ ༡༩༦༨ ལོར་སྐྱེས་ཅིང་། ཨ་རིའི་བྷོ་སི་ཊོན་ Tufts གཙུག་ལག་སློབ་གྲྭ་ནས་སློབ་མཐར་སོན་པ་དང་། ཕྱི་ལོ་ ༢༠༡༡ ནས་ ༢༠༢༠ བར་སྲིད་སྐྱོང་བློ་བཟང་སེང་གེ་མཆོག་གི་དམིགས་བསལ་སློབ་སྟོན་པ་དང་། དེ་ནས་བྱང་ཨ་རིའི་སྐུ་ཚབ་དོན་གཅོད། དེ་བཞིན་དཔལ་འབྱོར་ལས་ཁུངས་སུ་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་གནང་མྱོང་ཡོད་པ་བཅས་བོད་མིའི་རང་དབང་འཐབ་རྩོད་དང་སྤྱི་ཚོགས་ཡར་རྒྱས་ཆེད་ཕྱག་ལས་གནང་མྱོང་ཡོད་པ་ཞིག་རེད་འདུག
