མཁས་དབང་ཟླ་བ་ནོར་བུའི་རྗེས་དྲན་གྱི་ཉམས་ཞིབ་ཚོགས་འདུ་ཐེངས་བདུན་པ་འཚོགས་འདུག

དེ་རིང་རྒྱ་གར་གྱི་རྒྱལ་ས་ལྡི་ལིའི་ Chanakyapuri ཁུལ་དུ་མཁས་དབང་ཟླ་བ་ནོར་བུའི་རྗེས་དྲན་གྱི་ཉམས་ཞིབ་ཚོགས་འདུ་ཐེངས་བདུན་པ་འཚོགས་འདུག

JNU ཞེས་ནེ་ཧྲུ་གཙུག་ལག་སློབ་གཉེར་ཁང་གི་བོད་དོན་གླེང་སྟེགས་ཀྱིས་གོ་སྒྲིག་ཞུས་པའི་ཐེངས་འདིའི་ཚོགས་འདུའི་བརྗོད་གཞི་གཙོ་བོ་ནི། དེང་རབས་འཛམ་གླིང་ནང་གི་བོད་ཀྱི་ངོ་བོ་དང་། ཆབ་སྲིད། ལོ་རྒྱུས། དེ་བཞིན་རྒྱལ་སྤྱིའི་འགུལ་སྐྱོད་ཀྱི་རྣམ་པ་ཞེས་པ་ཡིན་པ་དང་། ཚོགས་འདུའི་ཐོག་ལྡི་ལི་བོད་ཀྱི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་དང་། ཚོགས་འདུར་མཐུན་སྦྱོར་གནང་མཁན་ KAS ཚོགས་པའི་རྒྱ་གར་ཡན་ལག་ལས་ཁུངས་ཀྱི་ངེས་སྟོན་པ་སྐུ་ཞབས་ Viktor Frank ལགས། དེ་བཞིན་གཙུག་ལག་སློབ་གཉེར་ཁང་དེའི་རྒྱལ་སྤྱིའི་ཆབ་སྲིད་ཚན་པའི་དགེ་རྒན་ཆེན་མོ་ཟུར་པ་ཡེ་ཤེས་ཆོས་སྒྲོན་ལགས་གདན་ཞུས་ཐོག །ཕྱི་ནང་ཉམས་ཞིབ་པ་བདུན་ཙམ་གྱི་བརྗོད་གཞི་དང་འབྲེལ་བའི་གཏམ་བཤད་དང་དྲི་བ་དྲི་ལན་བཅས་གནང་འདུག །འདི་ག་རླུང་འཕྲིན་ཁང་གིས་ JNU བོད་དོན་གླེང་སྟེགས་ཀྱི་རྒྱུན་ལས་པདྨ་ལྷ་མོ་ལགས་སུ་ཐངས་འདིར་མཁས་དབང་ཟླ་བ་ནོར་བུའི་རྗེས་དྲན་གྱི་ཉམས་ཞིབ་ཚོགས་འདུའི་སྐོར་བཀའ་དྲི་ཞུས་ཡོད།

གཞི་རྩའི་སློབ་དཔོན་ཟླ་བ་ནོར་བུ་ལགས་དམ་པ་དེ་ཉིད་ནི་ཨེ་ཤེ་ཡ་དབུས་མའི་ཆབ་སྲིད་དང་བོད་དོན་ཐོག་གི་མཁས་དབང་ཞིག་ཡིན་ལ། ཁོང་ནི་བོད་དུ་སྐུ་འཁྲུངས་ཤིང་ལྡི་ལིའི་ St. Stephen སེན་ཊི་སི་ཊེ་ཧྥན་མཐོ་སློབ་ཏུ་སློབ་གཉེར་གནང་ཡོད། ཁོང་གིས་ California ཁེ་ལི་ཧྥོར་ནི་ཡའི་ Berkeley བྷེརེཀབྷར་ཁེ་ལི་གཙུག་ལག་སློབ་གཉེར་ཁང་ནས་འབུམ་རམས་པའི་ཕྱག་འཁྱེར་བཞེས་པ་དང་། དུས་མཚུངས་སུ་ San Francisco སན་ཧྥ་རན་སི་སི་ཀོ་མངའ་སྡེའི་གཙུག་ལག་སློབ་གཉེར་ཁང་དུ་སློབ་ཁྲིད་ཀྱང་གནང་ཡོད། ཁོང་གིས་ཕྱི་ལོ་ ༡༩༧༢ ནས་ ༡༩༧༦ བར་བོད་གནས་བསྐྱར་ཞིབ་ཅེས་པའི་ཟླ་རེའི་དུས་དེབ་ཀྱི་རྩོམ་སྒྲིག་པ་གནང་ཞིང་། དེ་རྗེས་ལྡི་ལིའི་ཇཱ་ཝཱ་ཧར་ལལ་ནེ་ཧྲུ་གཙུག་ལག་སློབ་གཉེར་ཁང་དུ་ཨེ་ཤེ་ཡ་དབུས་མའི་སློབ་གཉེར་གྱི་སློབ་དཔོན་གནང་ཡོད། JNU བོད་དོན་གླེང་སྟེགས་ཀྱིས་དམ་པ་དེ་ཉིད་ལ་རྗེས་དྲན་གྱི་ཉམས་ཞིབ་ཚོགས་འདུ་ཐེངས་དང་པོ་དེ་ཕྱི་ལོ་ ༢༠༡༥ ལོར་གོ་སྒྲིག་གནང་ཡོད་པ་རེད་འདུག

ཐེངས་འདིའི་ཚོགས་འདུའི་ཐོག་ JNU གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ Srikanth Kondapalli ལགས་དང་། Priyadarsi Mukherji ལགས། Center for Strategic Affairs གྱི་སྤྱི་ཁྱབ་ Dr. Chirayu Thakur ལགས། Ashoka གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ Swarga Jyoti Gohain ལགས། OP Jindal གཙུག་ལག་སློབ་གཉེར་ཁང་གི་སློབ་དཔོན་ Swati Chawla ལགས། གཞན་ཡང་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྒན་པ་འབུམ་རམས་པ་བསྟན་འཛིན་བདེ་གསལ་ལགས་དང་། Tibet Action བོད་དོན་ལས་འགུལ་ལྟེ་གནས་ཁང་གི་ཉམས་ཞིབ་པ་དཔལ་ལྡན་བསོད་ནམ་ལགས། Tibet Watch བོད་གནས་ལྟ་ཞིབ་ཁང་གི་ཉམས་ཞིབ་པ་རྒན་པ་འབུམ་རམས་པ་བསོད་ནམ་སྟོབས་རྒྱལ་ལགས་སོགས་ནས་དེང་རབས་འཛམ་གླིང་ནང་གི་བོད་ཆེས་པའི་བརྗོད་གཞིའི་འོག་བོད་ཀྱི་ངོ་བོ་དང་། ཆབ་སྲིད། ལོ་རྒྱུས། དེ་བཞིན་རྒྱལ་སྤྱིའི་འགྱུར་ལྡོག་གི་རྣམ་པ་སོགས་ཀྱི་སྐོར་ལ་གསུང་བཤད་གནང་འདུག