༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་དད་ལྡན་རྣམས་ལ་དྲྭ་རྒྱ་ཐད་གཏོང་བརྒྱུད་དབུ་མ་རིན་ཆེན་ཕྲེང་བའི་བཀའ་ཆོས་བསྩལ་འདུག ཁ་སང་ཕྱི་ཟླ་ ༣ ཚེས་ ༣༡ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་ཐེ་ཝན་གྱི་དད་ལྡན་ཆོས་ཞུ་བ་རྣམས་ལ་དཔལ་མགོན་ཀླུ་སྒྲུབ་ཀྱི་རིག་ཚོགས་དྲུག་ལས་དབུ་མ་རིན་ཆེན་ཕྲེང་བ་ལེའུ་དང་པོའི་བཀའ་ཆོས་དང་བཀའ་འདྲིར་བཀའ་ལན་བཅས་མཛད་ཡོད་པ་རེད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་མ་རིན་ཆེན་ཕྲེང་བའི་ཞལ་ལུང་དང་སྦྲགས་ནང་ཆོས་ངོ་སྤྲོད་གནང་སྐབས་རྒྱ་རིགས་དད་ལྡན་རྣམས་ལ་དབང་རྟུལ་དད་པའི་རྗེས་འབྲང་མིན་པར་དབང་རྣོན་རིག་པའི་རྗེས་འབྲང་ཞིག་བྱེད་དགོས་གལ་ཡིན་པ་དང། ལྷག་པར་དུ་དཔྱད་སྒོམ་ཐོག་འབད་དགོས་གནད་ཡིན་པ་སོགས་ལམ་སྟོན་རྒྱ་ཆེ་མཛད་འདུགདེ་བཞིན་༸གོང་ས་མཆོག་གིས་མགོན་པོ་༸གང་ཉིད་མཆོག་དགུང་ལོའི་བབས་དང་ཆབ་སྲིད་ཀྱི་གནད་དོན་སོགས་ཀྱི་རྐྱེན་པས་༸གང་ཉིད་མཆོག་ཐེ་ཝན་དུ་དངོས་སུ་ཆིབས་བསྒྱུར་མཛད་མ་ཐུབ་ནའང་ཐེ་ཝན་དད་ལྡན་རྣམས་ལ་འདི་ལྟ་བུའི་དུས་ནས་དུས་སུ་དྲྭ་ཐོག་བརྒྱུད་བཀའ་ཆོས་བསྩལ་རྒྱུ་ཡིན་པའི་ཞལ་བཞེས་བཀའ་བསྩལ་ཡོད། ༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྔ་བ་ཚེ་རྒྱམ་ལགས་སུ་ཐེངས་འདིའི་བཀའ་ཆོས་དང་འབྲེལ་བའི་བཀའ་འདྲི་ཞུས་པར་ཆོས་འབྲེལ་འདི་ཐེ་ཝན་ནང་རྟེན་གཞི་བྱས་པའི་བོད་བརྒྱུད་ནང་བསྟན་མཐུན་ཚོགས་དང། བསྟན་འཛིན་བྱམས་ཆེན་ཆོས་ཚོགས་གཉིས་ནས་དྷ་རྨ་ས་ལར་ཆོས་ཞུ་བར་བཅར་མ་ཐུབ་མཁན་དད་ལྡན་ལོ་ན་རྒན་གྲས་དེ་དག་གི་ཆེད་དུ་ཆོས་འབྲེལ་གསོལ་འདེབས་ཞུས་པ་ལྟར་བཀའ་ཆོས་བསྩལ་བ་ཞིག་ཡིན་པ་དང། ཐེ་ཝན་གྱི་ས་གནས་མི་འདྲ་བ་གཉིས་ཀྱི་མང་ཚོགས་ཁྱོན་ ༦༠༠༠ ལྷག་ལ་ཐད་ཀར་རྒྱང་སྲིང་ཞུས་ཡོད་པ་མ་ཟད། དྲྭ་རྒྱའི་ཐོག་ནས་གསན་གཟིགས་གནང་མཁན་ཁོངས་སུ་རྒྱ་ནག་ནང་ལོག་ནས་ཀྱང་མི་གྲངས་ཕོན་ཆེན་ཞིག་ཡོད་སྐོར་གསུངས་ཡོད།རྩ་བའི་ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱ་བརྒྱུད་ནས་སོག་རིགས་དད་ལྡན་མང་ཚོགས་སྟོང་ཕྲག་བརྒལ་བར་བཀའ་ཆོས་བསྩལ་རྒྱུ་ཡོད་པ་དང་། སྐབས་དེར་མགོན་པོ་༸གང་ཉིད་མཆོག་གིས་དྲྭ་རྒྱ་བརྒྱུད་བཀའ་ཆོས་སྩོལ་རྒྱུར་སྐུ་ལས་གང་ཡང་མེད་པ་མ་ཟད་ཆོས་ཞུ་བས་ཀྱང་འགྲོ་སོང་གང་ཡང་གཏོང་མི་དགོས་པ་ཡིན་སྟབས། མ་འོངས་པར་དུས་ནས་དུས་སུ་དྲྭ་རྒྱའི་ལས་རིམ་འདི་འདྲ་གོ་སྒྲིག་ཞུ་ཐུབ་ཚེ་དགེ་མཚན་ཅེས་བཀའ་བསྩལ་ཡོད་པ་རེད། ཐེ་ཝན་ལ་ཆ་མཚོན་ན་དེ་སྔ་༸གོང་ས་མཆོག་ཐེངས་ཁ་ཤས་ཆིབས་བསྒྱུར་མཛད་མྱོང་ཡོད་ཀྱང། འདས་པའི་ལོ་ཤས་ནང་ རྒྱ་ནག་གིས་གནོན་ཤུགས་དང་༸གང་ཉིད་མཆོག་གི་དགུང་ལོའི་བབས་བཅས་རྒྱུ་མཚན་འདྲ་མིན་ལ་བལྟས་ནས་༸གོང་ས་མཆོག་ཐེ་ཝན་དུ་དངོས་སུ་ཆིབས་བསྒྱུར་མཛད་ཐུབ་མེད་པ་ལྟར། ཁ་སང་ཡུལ་དེའི་དད་ལྡན་མང་ཚོགས་རྣམས་ལ་དྲྭ་རྒྱའི་ཐོག་ནས་བཀའ་ཆོས་བསྩལ་བ་ཐེངས་པོ་བསྩལ་ཡོད་པ་རེད། ༸སྐུ་པར་bod.asia

དེ་རིང་སྔ་དྲོ་ཚོུད་ ༡༠༌༠༠ ཡོལ་ཙམ་ལ་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སིངྒ་པུར་གྱི་ ༡༨༨༠ ཞེས་པའི་རྒྱབ་ལྗོངས་མིན་ལས་གྲུབ་པའི་ཚོགས་པའི་ཚོགས་མི་ ༨༥ ལྷག་ཙམ་ཞིག་དང་མཇལ་འཕྲད་ཀྱིས་ ༸གོང་ས་མཆོག་གིས་ཐུགས་བསྐྱེད་དམ་བཅའ་དག་ངོ་སྤྲོད་མཛད་པ་དང་འབྲེལ་ཏེ་དཔལ་ནཱ་ལེནྡཱའི་ཐུན་མིན་གྱི་ཆོས་བརྒྱུད་དེར་འགྲེལ་བརྗོད་ཡག་ཤོས་བརྒྱབ་ཐུབ་པའི་སྐད་ཡིག་དེ་བོད་ཀྱི་སྐད་ཡིག་རེད་ཅེས་བཀའ་བསྩལ་སོང་།མཇལ་འཕྲད་ཀྱི་ཐོག་མར་ཚོགས་མི་དེ་དག་ཁྲོད་ནས་ལོ་ན་ཆུང་བ་ཁག་གཅིག་ལ་གཟིགས་སྐབས་ཁོ་ཚོ་ནི་དུས་རབས་ཉེར་གཅིག་གི་མི་རབས་ཡིན་པ་དང་། ད་ལྟའི་མི་རབས་ཀྱི་ཤེས་ཡོན་བརྒྱུད་འཛམ་གླིང་ཞི་བདེ་གོང་སྤེལ་སླད་འབད་བརྩོན་བྱེད་ན་ གྲུབ་འབྲས་དེ་དུས་རབས་རྗེས་མའི་མི་རབས་ནས་མཐོང་རྒྱུ་དང་མྱོང་རྒྱུ་ཡོད་པས་དེ་ཡོང་བར་ད་ལྟའི་མི་རབས་ལ་འགན་ཡོད་ཅེས་ལམ་སྟོན་མཛད་ཡོད།དེ་བཞིན་མགོན་པོ་༸གང་ཉིད་མཆོག་གིས་ཐུགས་བསྐྱེད་དམ་བཅའ་དང་པོ་འགྲོ་བ་མི་གཅིག་མཚུངས་ཀྱི་བདེ་སྐྱིད་བསྐྲུན་ཐབས་དང་འབྲེལ་བཀའ་སློབ་བསྩལ་དོན།  འཛམ་བུ་གླིང་གི་མི་ཐེར་འབུམ་ ༧ ལྷག་ཡོད་པ་རྣམས་ཕྱིའི་གཟུགས་ཀྱི་སྒོ་ནས་མི་འདྲ་བ་ཙམ་ལས་འགྲོ་བ་མི་གཅིག་མཚུངས་ཡིན་པས་ཆོས་ལུགས་ལ་ཁས་ལེན་ཀྱང་རུང་མི་ལེན་ཀྱང་རུང་བྱམས་དང་བརྩེ་བ། དེ་བཞིན་སྙིང་རྗེ་ནི་འགྲོ་བ་མི་སྤྱི་ཡོངས་ལ་དགོས་ངེས་ཤིག་ཡིན་པ་དང། ལྷག་པར་དུ་ང་ཚོའི་དུས་རྟག་ཏུ་སེམས་ཀྱི་ཞི་བདེ་གནས་ཐབས་སུ་བྱང་ཆུབ་ཀྱི་སེམས་དང་གཞན་ཕན་གྱི་བློ་སྒོམ་དགོས་གལ་ཡིན་པའི་བཀའ་བསྩལ་སོང་། ༸གོང་ས་མཆོག་གིས་ད་ཆ་འཛམ་གླིང་སྤྱི་ཡོངས་སྤྱི་ཚོགས་གཅིག་ལྟ་བུར་འགྱུར་ཡོད་པ་དང་ཡང་སྒོས་འགྲོ་བ་མི་རྣམས་སྡུག་བསྔལ་མི་འདོད་ཀྱང་། ད་ལྟར་ཀཤྨིར་དང་། སི་རི་ཡ། དེ་བཞིན་ཨབ་གྷ་ནིས་ཏན་ནང་ཆོས་ལུགས་ཀྱི་མིང་ཐོག་ནས་ཕན་ཚུན་གསོད་རེས་དང། ཨ་རི་དང་མེཀ་སི་ཀོ་གཉིས་ཀྱི་ས་མཚམས་ཀྱི་རྩོད་རྙོག་བརྒྱུད་མེཀ་སི་ཀེན་མི་སེར་མང་པོ་ཞིག་དཀའ་སྡུག་དེའི་འོག་ནས་མྱོང་བཞིན་པ་སོགས་ཀྱི་གནད་དོན་ལ་ཐུགས་ཕམ་དང་སྦྲགས། ཁྱིམ་མཚེས་རྒྱལ་ཁབ་ནས་ཞི་བདེ་ཐོག་མཉམ་གནས་གནང་དགོས་པར་བཀའ་བསྩལ་དང་འབྲེལ། ཐུགས་བསྐྱེད་དམ་བཅའ་གཉིས་པ་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུའི་ངོ་སྤྲོད་མཛད་ཡོད།མགོན་པོ་༸གང་ཉིད་མཆོག་གིས་ཐུགས་བསྐྱེད་དམ་བཅའ་གསུམ་པ་བོད་ཀྱི་ཆོས་རིག་འཛིན་སྐྱོང་སྤེལ་གསུམ་སྐོར་བཀའ་སློབ་བསྩལ་དོན་དུས་རབས་ ༧ པའི་ནང་བོད་ནང་ཡི་གེ་གཏན་འབེབས་དང་། དེ་བཞིན་ནཱ་ལེནྡཱ་གཙུག་ལག་སློབ་ཁང་ནས་སློབ་དཔོན་ཞི་བ་འཚོ་གདན་འདྲེན་གྱིས་བོད་དུ་ནང་པའི་ཆོས་བརྒྱུད་དར་འཕེལ་བྱུང་ཚུལ་དང་། རྒྱ་གར་ནང་ནཱ་ལེནྡཱའི་ཆོས་བརྒྱུད་ཉམས་པ་ནས་བཟུང་བོད་ནང་དེ་འབྲེལ་བདག་ཉར་གནང་པས་ནཱ་ལེནྡཱའི་ཐུན་མིན་གྱི་ཆོས་བརྒྱུད་ཀྱི་སེམས་ཁམས་རིག་པ་དང་། ལྟ་གྲུབ་རིག་པ། དེ་བཞིན་ཚད་མ་རིག་པ་སོགས་ཀྱི་ཐད་འགྲེལ་བརྗོད་ཡག་ཤོས་བརྒྱབ་ཐུབ་མཁན་གྱི་སྐད་ཡིག་དེ་ད་ལྟ་སྤྱོད་བཞིན་པའི་བོད་ཀྱི་སྐད་ཡིག་ཡིན་པར་བཀའ་བསྩལ་སོང་། ལྷག་པར་དུ་དེ་ལས་འཕྲོས་ཏེ་༸གོང་ས་མཆོག་གིས་སྤྱིར་བོད་ནི་ལོ་རྒྱུས་ལ་གཞིགས་ན་རང་དབང་གི་རྒྱལ་ཁབ་ཡིན་ཀྱང། ད་ཆ་བོད་མི་ཚོས་དབུ་མའི་ལམ་རྩོད་པ་དེ་དུས་ཚོད་དང་རན་པོ་ཆགས་པར་བཀའ་བསྩལ་བ་མ་ཟད། དེང་སྐབས་བོད་ནང་རྒྱ་ནག་གི་འཛུགས་སྐྲུན་གསར་རྒྱག་གི་ལས་གཞི་གནམ་ཐང་དང། རྒྱ་ལམ་སོགས་ཀྱི་ཡར་རྒྱས་བཏང་བ་དང་། དེ་བཞིན་རྒྱ་ནག་ནང་ནང་པ་ཧ་ཅང་མང་པོ་ཡོད་པས་དབུ་མའི་ལམ་གྱི་སྲིད་བྱུས་ལས་ང་ཚོ་ཕན་ཚུན་དབར་རོགས་སྐྱོར་གནང་ཐུབ་སྐོར་བཀའ་བསྩལ་སོང་།མགོན་པོ་མཆོག་གི་བཀའ་སློབ་གྲུབ་མཚམས་སུ་ཚོགས་མི་རྣམས་ནས་བཀའ་འདྲི་ཁག་གཅིག་ཞུས་ཡོད་པ་ལྟར་དེའི་ཁོངས་ནས་ཚོགས་མི་ཞིག་གིས་༸གོང་ས་མཆོག་༸རྒྱལ་བ་རིན་པོ་ཆེའི་༸སྐུའི་ཡང་སྲིད་དུ་འཁྲུངས་པར་ཐུགས་ཚོར་གང་ཡོང་གི་འདུག་གམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་༸གོང་ས་མཆོག་གི་ཡང་སྲིད་ཀྱི་མཚན་གནས་འདི་མིས་བཟོས་པ་དང་ཐ་སྙད་བཏགས་པ་ཞིག་ཡིན་སྟབས་མགོན་པོ་མཆོག་ནས་རྣམ་ཀུན་ཏུ་འགྲོ་བ་མི་གཅིག་མཚུངས་ཤིག་ལ་དགོངས་ཀྱི་ཡོད་པ་བཀའ་བསྩལ་ཡོད། ༸གོང་ས་མཆོག་གིས་འགྲོ་བ་མིའི་རང་བཞིན་ལྷན་སྐྱེས་དེ་བྱམས་བརྩེ་ལྡན་པ་ཞིག་ཡིན་པས་ང་ཚོ་རིམ་པ་གཉིས་པའི་ཐོག་ལ་བསམ་བློ་མ་གཏང་བར་རིམ་པས་ནང་སེམས་ཀྱི་རིན་ཐང་ཐད་ཐུགས་སྣང་གནང་དགོས་གལ་ཡིན་པ་སོགས་ལམ་སྟོན་བཀྲིན་ཆེ་བ་མཛད་ཡོད།

བཞུགས་སྒར་བོད་མི་མང་སྤྱི་འཐུས་གྲོས་ཚོགས་སུ་སྐབས་བཅུ་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་འཚོགས་བཞིན་ཡོད་པ་ལྟར། དེ་རིང་ལས་ཉིན་དྲུག་པའི་སྔ་དྲོའི་ཚོགས་དུས་ཐོག་འཛིན་སྐྱོང་དང་འབྲེལ་བའི་ལས་ཁུངས་ཁག་དང་། བདེ་སྲུང་ལས་ཁུངས་ཀྱི་ཁྱབ་ཁོངས་སྣེ་ལེན་འབྲེལ་མཐུད་ལས་ཁང་བཅས་ཀྱི་སྔོན་རྩིས་འགྲོ་གྲོན་གྱི་དགོས་དངུལ་མ་དངུལ་གཏན་འབེབས་ཟིན་མཚམས་སུ་ཆོས་རིག་ལས་ཁུངས་ཀྱི་དམིགས་བསལ་དང་ཟུར་བཀོད་མ་དངུལ་གཏན་འབེབས་དང་ལས་དོན་བཅས་ཀྱི་ཐོག་བགྲོ་གླེང་དབུ་འཛུགས་གནང་ཡོད་པ་རེད།སྐབས་དེར་བོད་མི་མང་སྤྱི་འཐུས་དགེ་བཤེས་ཨ་ཀྲུག་ཚེ་བརྟན་ལགས་ཀྱིས་ཉེ་ཆར་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ Geng Shuang ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་ རྒྱ་ནག་གཞུང་གིས་གཏན་འདེབས་བྱས་པའི་བོད་ཀྱི་བླ་སྤྲུལ་ངོས་འཛིན་གནང་ཕྱོགས་ཀྱི་ཁྲིམས་སྒྲིག་དང་མཐུན་དགོས་སྐོར་བརྗོད་པ་དེར་ངོས་ལེན་ཞུ་ཐབས་མེད་པ་དང་། ལྷག་པར་དུ་རྒྱ་གཞུང་འདི་ཆོས་ལུགས་ཀྱི་ལམ་སྲོལ་དང་ལོ་རྒྱུས་བརྩི་མེད་རྡོག་རོལ་བཏང་མཁན་དང་། ལས་རྒྱུ་འབྲས་ལ་ཡིད་ཆེས་མི་བྱེད་མཁན། དེ་བཞིན་༸གོང་ས་མཆོག་ལ་གུས་བརྩི་མེད་མཁན་བཅས་ཆགས་ཀྱི་ཡོད་སྟབས། རྒྱ་གཞུང་ལ་༸སྐུའི་ཡང་སྲིད་ངོས་འཛིན་བྱ་རྒྱུའི་ཐོབ་ཐང་མེད་ཅེས་གསུངས་ཡོད།སྐབས་དེར་ཆོས་རིག་བཀའ་བློན་མཆོག་གིས་དབུས་པའི་སྤྱི་འཐུས་ཁག་གཅིག་ནས་༸སྐུའི་ཡང་སྲིད་ཀྱི་གནད་དོན་ཐད་རྒྱ་ནག་གཞུང་གིས་ཐེ་བྱུས་བྱེད་བཞིན་པར་ངོས་ལེན་མེད་པའི་རྣམ་འགྱུར་ནན་པོ་ཆེད་བཏོན་གནང་སོང་།སྤྱི་འཐུས་ཁག་གཅིག་ནས་ཆོས་རིག་ལས་ཁུངས་ནས་ལོ་ལྟར་དགེ་བཤེས་མའི་མཚན་ཐོག་ལ་སྔོན་རྩིས་མ་དངུལ་འཕོན་ཆེན་པོ་ཞིག་ཞུ་བཞིན་པ་དེ་རིས་མེད་ཆོས་བརྒྱུད་ཁག་གི་བཙུན་མའི་བསླབ་པ་སློབ་གཉེར་ཐོག་གནང་གི་ཡོད་མེད་དང་། དགེ་བཤེས་མའི་ཕྱག་འཁྱེར་གནང་ཕྱོགས་སོགས་ཀྱི་ཐད་བཀའ་འདྲི་ཞུས་ཡོད་པ་དང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བཀའ་ཤག་རིམ་པས་མིང་ཙམ་མ་ཡིན་པར་བཙུན་མའི་ཐོས་བསམ་སློབ་གཉེར་ཐོག་འབད་བརྩོན་གནང་ཡོད་པ་དང་། ད་ལྟའི་ཆར་སྤྱིར་གྲྭ་རྒྱུན་གྱི་གྲངས་འབོར་ཉུང་དུ་འགྲོ་བཞིན་ཡོད་ཀྱང་བཙུན་མའི་གྲངས་འབོར་མང་དུ་འགྲོ་བཞིན་ཡོད་པ་མ་ཟད། ཉེ་ཆར་དགེ་བཤེས་མ་ ༢༠ ལྷག་སྔགས་ཀྱི་གསན་བསམ་སློབ་གཉེར་ཐོན་ཡོད་པ་སོགས་ངོ་སྤྲོད་དང་སྦྲགས། ཆོས་རིག་ལས་ཁུངས་ནས་རིས་སུ་མ་ཆད་པའི་ཆོས་བརྒྱུད་སོ་སོའི་སློབ་གཉེར་དང་འཚམ་པའི་བཙུན་མའི་ལས་གཞི་ཚང་མ་ལ་གཅིག་མཚུངས་ཐོག་རོགས་སྐྱོར་ཞུ་མུས་ཡིན་པ་གསུངས་ཡོད།དེ་བཞིན་སྤྱི་འཐུས་ཁག་གཅིག་གིས་དགེ་བཤེས་མ་དང་འབྲེལ་བའི་ལས་དོན་སྤྱི་ཡོངས་ལ་བསྔགས་བརྗོད་དང་སྦྲགས། མ་འོངས་པར་དགེ་བཤེས་མ་དེ་དག་བཙུན་མའི་སྡེ་ཁག་དང་སྤྱི་ཚོགས་ཁྲོད་ནང་ཆོས་ངོ་སྤྲོད། དེ་བཞིན་ཆོས་བརྒྱུད་སྤྱི་འཐུས་ཀྱི་ཞབས་སྟེགས་སོགས་ཀྱི་ཐོག་ཕེབས་ཐུབ་པའི་རེ་སྨོན་ཞུ་མཁན་ཡང་བྱུང་ཡོད། ཆོས་རིག་ལས་ཁུངས་ཀྱི་སྔོན་རྩིས་ལས་དོན་སོགས་དང་འབྲེལ་ཏེ་ཆོས་རིག་ལས་ཁུངས་ནས་དེང་སྐབས་གྲྭ་ཁོངས་སུ་མེད་པའི་གྲྭ་བཙུན་རྣམ་པར་འཕྲོད་བསྟེན་དང་འཚོ་སྣོན་སོགས་ཀྱི་མཐུན་རྐྱེན་སྦྱོར་རྒྱུ་གལ་ཆེན་པོ་ཡིན་པ་སོགས་ཀྱི་དགོངས་འཆར་དང་། བོད་ཀྱི་ཟློས་གར་ཚོགས་པ་དབུ་བརྙེས་ཏེ་ལོ་ངོ་ ༦༠ འཁོར་བའི་མཛད་རིམ་སྐོར། དེ་བཞིན་གཞུང་ཆེན་རིགས་གཅིག་རྐང་འཛིན་གྱི་ལས་གཞི་ལག་བསྟར་གནང་ཕྱོགས་སོགས་ཀྱི་ཐད་བཀའ་འདྲི་ཞུ་མཁན་ཡང་བྱུང་ཡོད།  གཞན་ཡང་བགྲོ་གླེང་ཁྲོད་དོལ་རྒྱལ་གྱི་གནད་དོན་དང་དེ་བཞིན་ཆོས་རིག་ལས་ཁུངས་ཀྱི་གཞིས་ཆགས་དང་སློབ་གྲྭ་ཁག་ཏུ་ནང་ཆོས་ངོ་སྤྲོད་གནང་སྟངས་སོགས་ཀྱི་སྐོར་ལ་བཀའ་འདྲི་ཞུས་ཡོད་པ་རེད། དེ་རིང་སྔ་དྲོའི་ཚོགས་དུས་དང་པོ་ནས་ཉིན་རྒྱབ་ཚོགས་དུས་བཞི་པ་བར་དུ་བོད་མི་མང་སྤྱི་འཐུས་རྣམ་པ་པས་ཆོས་རིག་ལས་ཁུངས་ཀྱི་སྔོན་རྩིས་དང་ལས་དོན་གནང་ཕྱོགས་ཐོག་དྲི་བ་དྲིས་ལན་སོགས་གནང་གྲུབ་མཚམས་སུ་ཆོས་རིག་ལས་ཁུངས་ཀྱི་དམིགས་བསལ་འགྲོ་གྲོན་སྒོར་འབུམ་ ༦༦,༩༨༤,༤༥༠ གཏན་འབེབས་དང་། ཟུར་བཀོད་མ་དངུལ་མུ་མཐུད་སྒོ་ཕྱེ་བའི་ཐོག་ནས་འཕྲོད་བསྟེན་ལས་ཁུངས་ཀྱི་དམིགས་བསལ་འགྲོ་གྲོན་དང་ཟུར་བཀོད་མ་དངུལ་གཏན་འབེབས་དབུ་འཛུགས་གནང་ཡོད།  

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་ཉིན་གྲངས་གསུམ་གྱི་རིང་ནང་ཆོས་ཟབ་སྦྱོང་ཐོག་བཅར་བའི་སོག་པོའི་ཁྱད་ལས་རུ་ཁག་ལ་མཇལ་ཁ་བསྩལ་འདུགཨུ་རུ་སུ་སྐུ་ཚབ་དོན་ཁང་དང་སོག་ཡུལ་གྱི་རྒྱལ་ས་ Ulaanbaatar ནང་རྟེན་གཞི་བྱས་པའི་ན་རོ་༸པཎ་ཆེན་ནང་པའི་བསྟི་གནས་ཁང་གཉིས་གཟུང་འབྲེལ་གྱིས་གོ་སྒྲིག་འོག་སོག་ཡུལ་གྱི་གཞུང་ཞབས་པ་དང་ཆབ་སྲིད་པ། ཚོང་པ། དགེ་རྒན། དེ་བཞིན་སྨན་པ་བཅས་ཁྱད་ལས་པ་མི་སྣ་ ༤༠ སྐོར་ཞིག་བཞུགས་སྒར་དུ་གདན་ཞུས་གནང་ཡོད་པ་རེད། ཁ་ཉིན་ཕྱི་ཚེས་ ༢༣ ཉིན་ནས་དབུ་འཛུགས་ཀྱིས་ཁོང་རྣམས་ལ་ནང་ཆོས་གཙོ་བོར་གྱུར་པའི་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་ལྟ་གྲུབ། དེ་བཞིན་བོད་དང་སོག་ཡུལ་དབར་གྱི་ཆོས་དང་རིག་གཞུང་གི་ཐུན་མིན་འབྲེལ་བ་སོགས་ཀྱི་ཐོག་ཉིན་གྲངས་གསུམ་གྱི་རིང་ཟབ་སྦྱོང་གནང་ཡོད་པ་ལྟར། དེ་རིང་ཉིན་མཐའ་མའི་ལས་རིམ་དང་འབྲེལ་ཏེ་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་རྣམས་ལ་དམིགས་བསལ་མཇལ་ཁ་དང་བཀའ་སློབ་བསྩལ་བར་དུས་རབས་ ༢༡ པའི་ནང་པ་བྱེད་དགོས་གལ་ཡིན་པ་དང་གཞོན་སྐྱེས་ཁྲོད་བཟང་སྤྱོད་ཀྱི་རིན་ཐང་གོང་འཕེལ་གཏོང་དགོས་གལ་སོགས་ལམ་སྟོན་མཛད་འདུགཏེ་ལོ་རིན་པོ་ཆེ་མཆོག་གི་ཕྱག་རོགས་སོག་པོའི་དགེ་འདུན་པ་བསྟན་འཛིན་ལེགས་སྨོན་ལགས་ཀྱིས་ད་རེས་བཞུགས་སྒར་དུ་ཕེབས་པ་དེས་ཁོང་རྣམས་ལ་ནང་ཆོས་ཀྱི་གོ་རྟོགས་དང་མཉམ་དུ་བཙན་བྱོལ་བོད་མིའི་གནས་སྟངས་སོགས་གནད་དོན་དུ་མར་སློབ་སྦྱོང་ཞུ་རྒྱུའི་གོ་སྐབས་ཐོབ་སྐོར་གསུངས་ཡོད། དེ་བཞིན་ཐེངས་འདིའི་རུ་ཁག་ནང་ཡོད་པའི་སོག་པའི་བེུད་གཅིག་ལ་བཀའ་འདྲི་ཞུས་པར་ཟབ་སྦྱོང་དེས་ཁོང་རྣམས་ལ་མི་ཚེ་དོན་དང་ལྡན་པ་ཞིག་ཇི་ལྟར་སྐྱེལ་དགོས་པའི་ལམ་སྟོན་བཟང་པོ་ཞིག་ཐོབ་ཡོད་པ་དང། ༸གོང་ས་མཆོག་གི་མཇལ་ཁ་ཞུས་སྐབས་སྤྱིར་ནང་ཆོས་སྐོར་ལ་བཀའ་སློབ་གནང་ཡོད་པའི་ཁྲོད་སེམས་བཟང་པོ་དང་མི་ཡག་པོ་ཞིག་བྱེད་དགོས་པ་ཙམ་མིན་པར་གནད་དོན་མང་པོའི་ཐོག་བཀའ་སློབ་གནང་སོང་ཞེས་གསུངས་ཡོད།རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ནས་སོག་པོ་དང་བོད་དབར་ཆོས་དང་རིག་གཞུང་བཅས་ཀྱི་ཐོག་ནས་ལོ་རྒྱུས་ཀྱི་རང་བཞིན་ལྡན་པའི་ཐུན་མིན་འབྲེལ་བ་དམ་ཟབ་ཡོད་པ་ལྟར་སོག་པོའི་ལྷན་དུ་འབྲེལ་ལམ་དམ་ཟབ་ཡོད་པ་དེ་རྒྱུན་སྐྱོང་གནང་དགོས་གལ་ཡིན་སྐོར་བཀའ་སློབ་བསྩལ་ཡོད་པ་དང་། བཞུགས་སྒར་དུ་སོག་པོའི་ཁྱད་ལས་པའི་རུ་ཁག་ལ་ནང་ཆོས་ངོ་སྤྲོད་ཀྱི་ཟབ་སྦྱོང་གནང་བ་ཆེས་ཐོག་མ་ཆགས་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཟའ་འཁོར་སྔོན་མའི་རེས་གཟའ་པ་སངས་ཉིན་ New Zealand ཡི་ Christchurch གྲོང་ཁྱེར་ནང་གི་ཁ་ཆའི་ལྷན་ཁང་ཞིག་ཏུ་མེ་མདའི་དོན་རྐྱེན་འོག་ས་གནས་མང་ཚོགས་དུ་མའི་ཚེ་སྲོག་ཤོར་བ་དང་རྨས་སྐྱོན་ཕོག་པའི་གནས་ཚུལ་ཐོན་པར་ཐུགས་ཕམ་ཆེན་པོ་གནང་བཞིན་ཡོད་པ་དང་། ལྷག་པར་དུ་ཚེ་སྲོག་ཤོར་བ་རྣམས་ལ་ཐུགས་སྨོན་དང་། ཤུལ་ལུས་ནང་མི་སྤུན་མཆེད་དང་། གྲོགས་ཕོ་མོ་དེ་བཞིན་ནིའུ་ཛ་ལན་ཌིའི་མི་མང་ཡོངས་ལ་གདུང་སེམས་མཉམ་བསྐྱེད་ཀྱི་ཐུགས་གསོ་ཡོད་པ་བཀའ་བསྩལ་འདུགདེའང་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཚེས་ ༢༠ ཉིན་ New Zealand ཡི་སྲིད་བློན་ལྕམ་སྐུ་ Jacinda Adern མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་དེ་བསྩལ་ཡོད་པ་དང་། མགོན་པོ་༸གང་ཉིད་མཆོག་གིས་གསུང་འཕྲིན་དེའི་ནང་སྐུ་ཉིད་ཀྱིས་གནས་ཚུལ་དེ་བྱུང་མ་ཐག་དྲག་སྤྱོད་སྤེལ་མཁན་གྱི་གང་ཟག་དེ་ཟུར་གཅིག་ཏུ་བཞག་སྟེ་དོན་རྐྱེན་ཁྲོད་ཚེ་སྲོག་ཤོར་བ་དང་རྨས་སྐྱོན་ཕོག་པ་ཀུན་ New Zealand རྒྱལ་ཁབ་ཀྱི་ཁྱིམ་ཚང་ཆེན་པོ་དེར་དབང་ཡོད་པར་བརྗོད་པའི་ཡང་དག་པའི་དབུ་ཁྲིད་ཀྱི་ཤེས་རབ་དེར་ངོས་ནས་བསྔགས་བརྗོད་ཞུ་བཞིན་ཡོད། ང་ཚོ་ཚང་མའི་གཅིག་གྱུར་གྱིས་ཁོང་ཚོར་གདུང་སེམས་མཉམ་བསྐྱེད་བྱེད་དགོས། ངོས་རང་གང་དུ་སོང་ཡང་། རང་ཉིད་དེ་རིང་གི་འཛམ་གླིང་འདིར་འཚོ་བཞིན་པའི་མི་འབོར་ཐེར་འབུམ་བདུན་ཡོད་པའི་ནང་ནས་གི་མི་གཅིག་ཡིན་པར་བསམ་བཞིན་ཡོད།  ཆོས་ལུགས་དད་མོས་ཀྱི་ཡིད་ཆེས་མིང་ཐོག་ནས་མི་ཕན་ཚུན་དབར་གསོད་རེས་བྱེད་བཞིན་པ་ནི་བསམ་ཡུལ་ལས་འདས་བ་ཞིག་རེད།  རྒྱུ་མཚན་དེའི་དབང་གིས་ངོས་ནས་རྣམ་ཀུན་ཆོད་སེམས་བརྟན་པོའི་ངང་འགྲོ་བ་ཚང་མ་གཅིག་པ་ཡིན་པའི་གོ་རྟོགས་སྤེལ་ཐབས་བྱེད་བཞིན་ཡོད། དོན་དངོས་ཐོག་འགྲོ་བ་མི་ཚང་མ་སེམས་ཁམས་དང་ལུས་ཀྱི་གྲུབ་ཆ། དེ་བཞིན་ཚོར་མྱོང་ཚོགས་ཕྱོགས་གང་ནས་བལྟས་ཀྱང་གཅིག་པ་ཡིན་པ་རེད་ཅེས་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་བློན་ Adern མཆོག་གིས་དབུས་པའི་ New Zealand ཡི་མང་ཚོགས་ཡོངས་ཀྱིས་བྱམས་པ་དང་སྙིང་རྗེ་ལྡན་པའི་ཐོག་ནས་ཁ་ཆེའི་མི་རིགས་ཚོར་རྒྱབ་སྐྱོར་གནང་བཞིན་པར་ཡི་རང་བསྔགས་བརྗོད་མཛད་པ་མ་ཟད། དོན་རྐྱེན་དེ་བྱུང་རྗེས་འཛམ་གླིང་གང་སར་ཆོས་ལུགས་ཀུན་གྱི་མང་ཚོགས་ནས་ཁ་ཆེ་ལྷ་ཁང་དུ་ཕེབས་ནས་དོན་རྐྱེན་དེའི་ཁྲོད་ཚེ་སྲོག་ཤོར་བ་དང་རྨས་སྐྱོན་ཕོག་པ་རྣམས་ལ་གདུང་སེམས་མཉམ་བསྐྱེད་ཞུས་པ་དེས་མགོན་པོ་༸གང་ཉིད་མཆོག་ལ་སེམས་འགུལ་ཆེན་པོ་ཐེབས་ཡོད་པར་བཀའ་བསྩལ་འདུག ད་དུང་མགོན་པོ་༸གང་ཉིད་མཆོག་གིས་ New Zealand སྲིད་གཞུང་གིས་ཆོད་སེམས་བརྟན་པོའི་ཐོག་ནས་མེ་མདའ་ཉོ་ཚོང་གི་ཁྲིམས་སྒྲིག་དེ་བསྐྱར་བཅོས་གནང་བཞིན་པ་དེས་ཞི་བདེ་དང་བདེ་འཇགས་ལ་ཕན་ནུས་ཆེན་པོ་སྐྲུན་བཞིན་ཡོད་པ་དེ་ལྟར་ཡང་། དེ་དང་ལྷན་དུ་སྲིད་བློན་མཆོག་གིས་ལམ་སྟོན་གནང་བཞིན་མང་ཚོགས་ཀྱི་སེམས་རྒྱུད་ལ་བྱམས་བརྩེའི་བསམ་བློ་སྐྲུན་ཐོག་སྡང་སེམས་དང་འཇིགས་སྣང་སོགས་ལ་གདོང་ལེན་གནང་གལ་ཡིན་པའི་ལམ་སྟོན་མཛད་འདུག གཞི་རྩའི་གཟའ་འཁོར་སྔོན་མའི་རེས་གཟའ་པ་སངས་ཚེས་ ༡༥ ཉིན་ Australia འི་མི་སེར་ཡིན་པ་ཞིག་གིས་ Christchurch གྲོང་ཁྱེར་ནང་གི་ཁ་ཆེའི་ལྷན་ཁང་གཉིས་ནང་བསྐྱོད་དེ་མང་ཚོགས་ལ་མེ་མདའ་གང་བྱུང་བརྒྱབ་ནས་མི་ ༥༠ ལྷག་ཙམ་དམར་བསད་དང་མི་ ༥༠ ཙམ་ལ་རྨས་སྐྱོན་འཚབ་ཆེན་བཏང་ཡོད་པ་རེད། སྲིད་བློན་ལྕམ་སྐུ་ Jacinda Adern མཆོག་གིས་ཐེངས་འདིའི་དོན་རྐྱེན་སྐབས་བེད་སྤྱོད་བྱས་པའི་མེ་མདའི་རིགས་ཡོངས་རྫོགས་བཀག་སྡོམ་དང་འབྲེལ། མེ་མདའ་གཉེར་མཁན་རྣམས་ནས་ཉེན་རྟོག་པར་རང་ཉིད་ཀྱི་མེ་མདའ་རྩིས་སྤྲོད་དགོས་པ་དང། Australia འི་གཞུང་ནས་གུན་གསབ་སྤྲོད་རྒྱུ་ཡིན་པའི་ཡོངས་བསྒྲགས་གནང་ཡོད་པ་རེད།

ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་བསྒྲགས་གཏམ་ཞིག་སྤེལ་ཏེ་ཉེ་ལམ་རྒྱ་ནག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཐད་ནས་ལན་འདེབས་བྱས་པ་དེས་རྒྱ་ནག་གི་འཇིགས་སྣང་མཚོན་ཡོད་པ་མ་ཟད་རྒྱལ་སྤྱིའི་ཆོས་ལུགས་རང་དབང་གི་ཁྲིམས་སྲོལ་དང་ཡོངས་སུ་འགལ་ཡོད་པ་ཡོངས་བསྒྲགས་གནང་འདུག ཉེ་སྔོན་༸གོང་ས་མཆོག་གིས་ Reuters གསར་ཁང་ལ་ཏཱ་ལའི་བླ་མའི་ཡང་སྲིད་ནི་གཅིག་བྱས་ན་རྒྱ་གར་ནང་དུ་འཁྲུང་སྲིད་པ་དང་། རྒྱ་ནག་གིས་ཡང་སྲིད་ཅིག་འདེམས་སྲིད་པའི་དབང་དུ་བཏང་ཡང་དེ་ལ་མི་མང་ནས་གུས་བརྩི་དང་ཆ་འཇོག་ཞུ་མི་སྲིད་པའི་བཀའ་ལན་མཛད་རྗེས་རྒྱ་ནག་གི་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པས་དེ་མ་ཐག་ཏུ་གསར་འགོད་གསལ་བསྒྲགས་ཤིག་སྤེལ་ཏེ།༸གོང་ས་ཏཱ་ལའི་བླ་མའི་ཡང་སྲིད་ནི་རྒྱ་ནག་གི་ཁྲིམས་སྒྲིག་ལྟར་བསྐོ་གཞག་བྱེད་དགོས་ཀྱི་ཡོད་པ་དང། དེའི་ཐོག་ཕྱི་ལོག་གི་ཚོགས་པ་དང་མི་སྒེར་སུས་ཀྱང་ཐེ་གཏོགས་གནང་མི་ཆོག་པའི་བཀའ་རྒྱ་བཏང་ཡོད་པ་རེད།ཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་༸གོང་ས་ཏཱ་ལའི་བླ་མ་ནི་བོད་བརྒྱུད་ནང་བསྟན་གྱི་ཆོས་ལུགས་དབུ་ཁྲིད་ཅིག་ཡིན་སྟབས་༸གོང་ས་མཆོག་གི་༸སྐུའི་ཡང་སྲིད་གདམ་སྟངས་ནི་སྲོལ་རྒྱུན་རང་བཞིན་གྱི་༸སྐུ་སྒེར་གྱི་དབང་ཐང་ཡིན་པ་འགྲེལ་བརྗོད་གནང་བ་མ་ཟད། རྒྱ་གཞུག་གིས་སྐུའི་ཡང་སྲིད་ཀྱི་ཐད་ལ་ཐེ་གཏོགས་བྱས་པ་དེ་ནི་དུས་རབས་མང་པོ་བརྒྱུད་ནས་ཡོང་བའི་བོད་བརྒྱུད་ནང་བསྟན་གྱི་སྲོལ་རྒྱུན་ལམ་ལུགས་ལ་རྩིས་མེད་བཏང་བ་ཙམ་དུ་མ་ཟད། རྒྱལ་སྤྱིའི་ཆོས་ལུགས་རང་དབང་གི་རྩ་འཛིན་སྒྲིག་ཡིག་ཀྱང་གཏོར་བཤིག་བཏང་ཡོད་པའི་གནད་དོན་ཞིག་ཡིན་པར་བརྗོད་འདུག རྒྱ་ནག་གིས་བོད་ཀྱི་བླ་སྤྲུལ་ངོས་འཛིན་གནང་ཕྱོགས་ཀྱི་ཁྲིམས་སྒྲིག་བཟོས་པ་དེ་ནི་རྒྱལ་སྤྱིའི་ལམ་ལུགས་དང་མི་མཐུན་པ་མ་ཟད། སྲིད་གཞུང་གི་ཐེ་གཏོགས་མེད་པར་བོད་མི་རྣམས་ཀྱིས་རང་དབང་གི་སྒོ་ནས་ཆོས་ལུགས་དད་མོས་གནང་རྒྱུའི་གཞི་རྩའི་ཐོབ་ཐང་ཡང་འཕྲོག་ཡོད་པ་ཞིག་ཡིན་པ་གསལ་འདོན་གནང་འདུག ལས་འགུལ་ཁང་གིས་༸གོང་ས་ཏཱ་ལའི་བླ་མའི་ཡང་སྲིད་ངོས་འཛིན་གནང་ཕྱོགས་ནི་དུས་རབས་བཅུ་བཞི་པ་ནས་བརྒྱུད་ཡོང་བའི་ལོ་རྒྱུས་རང་བཞིན་ལྡན་པའི་བོད་བརྒྱུད་ནང་བསྟན་གྱི་ལམ་སྲོལ་ཞིག་ཡིན་པར་བསྒྲགས་ཏེ་རྒྱ་ནག་གིས་ཆོས་ལུགས་དོ་དམ་གྱི་ཁྲིམས་སྒྲིག་ཟེར་བ་དེ་ཕྱི་ལོ་ ༢༠༠༤ ལོར་གསར་བཟོ་གནང་ནས་སྲིད་གཞུང་གིས་དབང་ཆའི་འོག་བསྡུས་པ་དང་། དེ་བཞིན་བླ་སྤྲུལ་ངོས་འཛིན་གནང་ཕྱོགས་ཀྱི་ཁྲིམས་སྒྲིག་ཟེར་བ་དེ་ཕྱི་ལོ ༢༠༠༧ ལོར་གསར་བཟོ་བྱས་ཏེ་པར་བསྐྲུན་བྱས་ཡོད་པ་སོགས་ལུང་འདྲེན་གྱིས་~སྐུའི་ཡང་སྲིད་ངོས་འཛིན་གནང་རྒྱུ་དེ་ནི་༸གོང་ས་མཆོག་༸སྐུ་སྒེར་ལ་ཡོད་པའི་འགན་དབང་དང་ཁྲིམས་ལུགས་ཀྱི་དབང་ཚད་ཅིག་ཡིན་སྟབས་རྒྱ་ནག་ལ་༸གོང་ས་ཏཱ་ལའི་བླ་མའི་ཡང་སྲིད་ངོས་འཛིན་བྱེད་དབང་ནམ་ཡང་མེད་པར་ནན་བརྗོད་གནང་འདུག ད་དུང་རྒྱ་ནག་གིས་བོད་བརྒྱུད་ནང་བསྟན་ལ་ཐེ་གཏོགས་བྱས་ཏེ་༸གོང་ས་ཏཱ་ལའི་བླ་མའི་ཡང་སྲིད་ལ་བཏང་འཛིན་བྱེད་རྩིས་ཀྱི་འཆར་གཞི་ཡོད་པ་སྦྲགས་ཏེ།  འདི་ལྟ་བུའི་གནས་བབས་འདིར་བོད་གཞིས་བྱེས་གཉིས་ནས་ཁས་ལེན་གནང་མི་སྲིད་པ་མ་ཟད་རྒྱལ་སྤྱིའི་སྤྱི་ཚོགས་ཀྱི་ངོས་ནས་ཀྱང་ཆོས་ལུགས་དད་མོས་རང་དབང་རྡོག་རོལ་བཏང་བའི་གནད་དོན་ཞིག་ལ་ངོས་འཛིན་གྱིས་ནམ་ཡང་ཁས་ལེན་གནང་མི་སྲིད་ཅེས་གསུངས་ཡོད། རྩ་བའི་ཨ་རིའི་རྒྱལ་སྤྱིའི་ཆོས་དད་རང་དབང་གི་གཙོ་འཛིན་སྐུ་ཞབས་ Sam Brownback ལགས་ཀྱིས་ཟླ་འདིའི་ཚེས་ ༨ ཉིན་གཏམ་བཤད་ཅིག་སྤེལ་སྐབས་རྒྱ་ནག་སྲིད་གཞུང་གི་ཐེ་གཏོངས་གཅིག་ཀྱང་མེད་པར་བོད་མི་རྣམས་ཀྱིས་རང་གི་ཆོས་ལུགས་ཀྱི་དབུ་ཁྲིད་བསྐོ་གཞག་བྱས་ཏེ་དད་གུས་ཞུ་རྒྱུའི་ཐོབ་ཐང་ཡོད་པ་དང་། རྒྱལ་སྤྱིའི་ཚོགས་སྡེ་ཡོངས་ནས་གནད་དོན་དེ་གསལ་པོ་བཟོ་དགོས་སྐོར་འགྲེལ་བརྗོད་གནང་ཡོད་པ་རེད།

ཁ་སང་ཟླ་ ༣ ཚེས་ ༡༨ ཉིན་ Reuters  གསར་ཁང་གིས་༸གོང་ས་མཆོག་ལ་༸སྐུའི་ཡང་སྲིད་དང་འབྲེལ་བའི་བཅར་འདྲི་ཞུས་པའི་ཐོག་༸གོང་ས་མཆོག་གིས་མགོན་པོ་༸གང་ཉིད་མཆོག་རྒྱ་གར་དུ་མི་ལོ་དྲུག་ཅུ་ལྷག་གི་རིང་བཞུགས་མྱོང་ཡོད་སྟབས་༸སྐུའི་ཡང་སྲིད་དེ་རྒྱ་གར་རང་དབང་ལུང་པར་འཁྲུངས་སྲིད་སྐོར་བཀའ་ལན་བསྩལ་བ་མ་ཟད། རྒྱ་ནག་གིས་ཡང་སྲིད་ཅིག་འདེམས་སྲིད་པའི་དབང་དུ་བཏང་ཡང་དེ་ལ་མི་མང་ནས་གུས་བརྩི་དང་ཆ་འཇོག་ཞུ་མི་སྲིད་པའི་བཀའ་ལན་མཛད་འདུག༸གོང་ས་མཆོག་གིས་རྒྱ་ནག་གི་ངོས་ནས་༸སྐུའི་ཡང་སྲིད་ཀྱི་གནད་དོན་དེ་དོན་གནད་ཅིག་ཏུ་ངོས་འཛིན་བཞིན་ཡོད་པ་མ་ཟད། དེའི་ཐོག་༸གང་ཉིད་མཆོག་ལས་ལྷག་པའི་སེམས་ཁྲལ་བྱེད་བཞིན་ཡོད་སྐོར་བཀའ་བསྩལ་བ་དང་འབྲེལ། མ་འོངས་པར་༸སྐུའི་ཡང་སྲིད་དེ་རང་དབང་གི་རྒྱལ་ཁབ་ནས་གཅིག་དང་རྒྱ་ནག་སྲིད་གཞུང་གིས་གཅིག་གཏན་འབེབས་བྱུང་བ་ཡིན་ན། མི་མང་གི་ངོས་ནས་རྒྱ་ནག་གིས་བདམས་པའི་ཡང་སྲིད་དེར་གུས་བརྩི་ཞུ་ཐབས་མེད་སྟབས། རྒྱ་ནག་ལ་དཀའ་ངལ་འཕར་མ་ཞིག་ཆགས་ངེས་ཡིན་པར་བཀའ་འགྲེལ་དང་ལྷན་ཞལ་འཛུམ་དང་བཅས་དེ་ལྟ་བུའི་གནས་སྟངས་ཤིག་ཤར་སྲིད་པ་རེད་ཅེས་བཀའ་ལན་བསྩལ་འདུགགཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་སྔ་ཕྱི་ལོ་ ༢༠༡༡ ལོར་ཚོགས་པའི་ཆོས་ཚོགས་ཐེངས་ ༡༡ པའི་ཐོག་མ་འོངས་པར་མགོན་པོ་༸གང་ཉིད་མཆོག་༸རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་ཕེབས་སྐབས་ཆོས་བརྒྱུད་ཁག་གི་བླ་ཆེན་རྣམ་པ་དང༌། བོད་མིས་མཚོན་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་༸རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐུགས་ཐག་གཅད་རྒྱུ་ཡིན་པ་དང་། གལ་ཏེ་༸རྒྱལ་དབང་སྐུ་ཕྲེང་རྒྱུན་མཐུད་དགོས་པ་དང༌། སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་གནང་དགོས་པའི་དུས་སྐབས་ཤིག་ཤར་ཚེ་དེའི་གནང་སྒོའི་འགན་ཁུར་གཙོ་བོ་ཏཱ་ལའི་བླ་མ་༸སྐུ་སྒེར་གྱི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང༌། ཁོང་རྣམས་ཀྱིས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང༌། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་མ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་ངོས་འཛིན་སྔར་སྲོལ་བཞིན་གནང་དགོས་པ་མ་ཟད། མགོན་པོ་༸གང་ཉིད་མཆོག་གིས་ཀྱང་གནང་ཕྱོགས་དེ་དག་ལ་ལམ་སྟོན་གསལ་བཀོད་ཀྱི་ཕྱག་ཡིག་བསྩལ་རྒྱུ་ཡིན་ཞིང༌། ཚུལ་མཐུན་རྩད་གཅོད་ངོས་འཛིན་བྱུང་བའི་ཡང་སྤྲུལ་ཞིག་ལས་གཞན་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་པས་མཚོན་སྲིད་དབང་འཛིན་པ་སུ་ཞིག་གིས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༸རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་ཞུ་མི་དགོས་པའི་ལམ་སྟོན་གསལ་པོ་བསྩལ་ཡོད་པ་རེད།ཐེངས་འདིའི་ Reuters  གསར་ཁང་གིས་བཅར་འདྲིའི་སྐབས་སུའང་༸གོང་ས་མཆོག་གིས་ཏཱ་ལའི་བླ་མའི་ཡང་སྲིད་དགོས་མིན་དེ་ནི་འདི་ལོའི་ལོ་མཇུག་ཙམ་ལ་ཆོས་བརྒྱུད་ཁག་གི་བླ་ཆེན་ཚོགས་ཆེན་ཐོག་ནས་ཐུགས་ཐག་གཅད་རྒྱུ་ཡིན་པ་དང་འབྲེལ། བོད་མི་སྤྱི་བོ་གནམ་བསྟན་ཡོངས་ཀྱིས་༸རྒྱལ་དབང་སྐུ་ཕྲེང་མུ་མཐུད་མཇུག་སྐྱོང་དགོས་པ་ཞིག་ལ་དགོངས་ཚེ་༸དཔལ་ལྡན་དགའ་ལྡན་ཕོ་བྲང་གི་ལྟེ་གནས་དེ་ད་དུང་གནས་སྲིད་པ་ཞིག་རེད། དེ་འབྲེལ་༸སྐུའི་ཡང་སྲིད་སྐུ་ཕྲེང་བཅོ་ལྔ་པ་བྱོན་པ་ཡིན་ནའང་ཁོང་ལ་ཆབ་སྲིད་ཀྱི་སྐུ་དབང་གང་ཡང་མེད་པར་བཀའ་བསྩལ་ནན་པོ་ཕེབས་འདུག༸གོང་ས་མཆོག་ལ་བོད་ནང་དུ་ཕེབས་འདོད་ཡོད་དམ་ཞེས་བཀའ་འདྲི་ཞུས་པར་མགོན་པོ་མཆོག་གིས་རྒྱ་ནག་གཞུང་གིས་༸གང་ཉིད་མཆོག་བོད་དུ་ཕྱིར་ཕེབས་སུ་བཅུག་ཚེ་རྒྱ་ནག་གི་གཙུག་ལག་སློབ་ཆེན་ཁག་ཏུ་ཆེད་ཕེབས་ཀྱིས་དཀར་རྩིས་རིག་པ་དང་། ཀླད་རྩ་རིག་པ། དེ་བཞིན་རྡུལ་ཕྲན་གྱི་རྣམ་གཞག་དང་སེམས་ཁམས་རིག་པའི་ཐོག་ལ་བཀའ་སློབ་བསྩལ་འདུན་ཡོད་པར་བཀའ་བསྩལ་ཡོད་པ་དེ་ལྟར་ཡང་། རྒྱ་ནག་དམར་ཤོག་གི་གཞུང་ལ་འགྱུར་བ་ཞིག་མ་ཕྱིན་བར་དུ་མགོན་པོ་༸གང་ཉིད་མཆོག་ཡུལ་དེར་ཕེབས་འདོད་མེད་ཅེས་བཀའ་ལན་མཛད་ཡོད། ༸གོང་ས་མཆོག་གིས་རྩ་བའི་རྒྱ་ནག་ནི་གདོད་མའི་རླབས་ཆེན་གྱི་རྒྱལ་ཁབ་ཅིག་ཡིན་ཀྱང་ཆབ་སྲིད་ཀྱི་ལམ་ལུགས་དེ་དབང་ཆ་གཅིག་སྡུད་ཀྱི་ལམ་ལུགས་འོག་ཡོད་པར་བརྟེན་མི་མང་ལ་རང་དབང་ཅི་མང་མེད་པར་བཀའ་བསྩལ་ནས་མགོན་པོ་༸གང་ཉིད་མཆོག་ད་དུང་རྒྱ་གར་དུ་བཞུགས་འདོད་ཡོད་པ་བཀའ་བསྩལ་བ་ཆབས་ཅིག བོད་མིའི་སྟོབས་ཤུགས་དེ་བདེན་པ་ལ་གཞིིར་བཅོལ་ཡོད་པ་དང་རྒྱ་ནག་གི་སྟོབས་ཤུགས་དེ་གོ་མཚོན་ལ་གཞིར་བཅོལ་བས་གནས་སྐབས་སུ་རྒྱ་ནག་གོ་མཚོན་གྱི་སྟོབས་ཤུགས་དེ་ཐག་ཆོད་པོ་ཡོད་ཀྱང་ཕུགས་རྒྱང་རིང་པོར་དགོངས་ཚེ་བདེན་པ་སྟོབས་ཤུགས་ཆེ་བ་ཡོད་པ་བཀའ་ལན་བསྩལ་འདུག གཞན་ཡང་༸གོང་ས་མཆོག་གིས་གཞུང་འབྲེལ་གྱི་བོད་རྒྱ་འབྲེལ་ལམ་དེ་ཕྱི་ལོ་ ༢༠༡༠ ལོ་ནས་བཟུང་ཆད་ཡོད་པ་དང་། པེ་ཅིང་སྲིད་གཞུང་ནས་རྒས་ཡོལ་དུ་ཕྱིན་པའི་ལས་བྱེད་ཟུར་པ་དང་། རྒྱ་ནག་སྲིད་གཞུང་དང་འབྲེལ་ཡོད་ཀྱི་ཚོང་པ་དེ་འདྲ་དུས་རྒྱུན་ནས་ཁོང་ལ་མཇལ་བཅར་ཞུ་བར་ཡོང་བཞིན་པ་མ་ཟད། ད་ཆ་བོད་ཕྱི་ནང་གཉིས་ཀྱི་འབྲེལ་ལམ་དེ་སྔར་ལས་དམ་ཟབ་ཏུ་འགྲོ་བཞིན་ཡོད་པར་བཀའ་བསྩལ་འདུག Reuters གསར་ཁང་གིས་༸གོང་མཆོག་བོད་མཐོ་སྒང་མཚོ་སྔོན་གྱི་གྲོང་གསེབ་ཅིག་ཏུ་འཁྲུངས་པའི་ལོ་རྒྱུས་ལུང་འདྲེན་གྱིས་ཉེ་སྔོན་གསར་ཁང་གི་ལས་མི་ཞིག་༸གང་ཉིད་མཆོག་འཁྲུངས་ཡུལ་སྟག་འཚེར་དུ་གཟིགས་སྐོར་སོང་ནའང་། རྒྱ་ནག་གི་གོ་མཚོན་ཐོགས་པའི་དམག་མིས་ལམ་ཁ་བཀག་ཡོད་པ་མ་ཟད་ཕྱི་ལོག་གི་མི་སྟག་འཚེར་ནང་གཏོང་གི་མེད་པའི་བཙན་བཀའ་བཏང་བར་བརྟེན་ཡུལ་དངོས་སུ་འགྲོ་ཐབས་མ་བྱུང་བའི་གནས་ཚུལ་གསལ་བཤད་ཞུས་འདུག

བོད་རྒྱལ་ལོ་ ༢༡༤༦ རབ་གནས་ས་ཕག་ལོ་འདི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུའི་དགུང་ཀེག་དངོས་གཞི་ཁེལ་བ་དང་བསྟུན།  དེ་རིང་བོད་མིའི་སྒྲིག་འཛུགས་བཀའ་ཤག་ནས་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་འདི་ལོའི་ཕྱི་ཟླ་ ༥ ཚེས་ ༡༧ ཉིན་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པ་ཡོངས་བསྒྲགས་གནང་སོང་། དེ་རིང་ཟླ་ ༣ ཚེས་ ༡༨ ཉིན་གྱི་ཉིན་དགུང་ཚོུད་  ༡༢ ཐོག་བཀའ་ཤག་ཡང་སྟེང་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་ལྷན་བཞུགས་ཐོག་གསར་འགོད་ལྷན་ཚོགས་གནང་སྟེ་འདི་ལོའི་གནམ་ལོ་བཞད་ཀྱི་ཚེས་བཅུའི་གཟབ་གསོལ་སྤྱན་འདྲེན་ཞུས་སྐབས་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོ་མཆོག་ནས་ཆོལ་གསུམ་ཆོས་བརྒྱུད་གཅིག་ཏུ་བསྒྲིལ་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་གསོལ་འདེབས་ཞུ་དགོས་པའི་བཀའ་ལུང་བསྩལ་ཡོད་པ་ལྟར། བོད་མིའི་སྒྲིག་འཛུགས་བཀའ་ཤག་ནས་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་ཆོག་པའི་གསོལ་འདེབས་ཞུས་པར་བཀའ་བཞེས་བཟང་པོ་སྨིན་བསྩལ་ཐོབ་ཐོག་བོད་ཟླ་ ༣ ཚེས་ ༡༤ ཕྱི་ལོ་ ༢༠༡༩ ཟླ་ ༥ ཚེས་ ༡༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་གཞིས་བྱེས་གཞུང་མང་ལྷ་མི་ཡོངས་ཀྱི་ངོས་ནས་མགོན་པོ་མཆོག་༸སྐུ་ཚེ་༸རྒྱལ་བ་ཚེ་མཐའ་ཡས་པའི་ངོ་བོར་བརྟན་པ་དང། ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་འགྲུབ་པའི་ཆེད་དུ་བརྟན་བཞུགས་བསྟར་འབུལ་ཞུ་གཏན་ཁེལ་འདུགབོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བརྟན་བཞུགས་དེ་ནི་བླ་མ་དང་སློབ་མའི་དབར་གྱི་དམ་ཚིག་གཙང་མ་དང་འགོ་ཁྲིད་དང་མི་མང་དབར་མཐུན་སྒྲིལ་ཡག་པོ་ཡོང་སླད་ཡིན་པ་དང་སྒོས་བོད་མི་མང་ཚོགས་ནས་༸གང་ཉིད་མཆོག་༸སྐུ་ཚེ་རིང་པོར་བཞུགས་ཐབས་སུ་སྨོན་ལམ་གསུང་འདོན་ཞུ་རྒྱུ་དང། ལྷག་པར་དུ་༸མགོན་པོ་མཆོག་གི་བཀའ་སློབ་རྣམས་ཡིད་ལ་བཅངས་པའི་ཐོག་ནས་བཀའ་གསུང་ཅི་བསྒྲུབ་གནང་དགོས་གལ་གནད་ཡིན་སྐོར་གསུངས་སོང་།བོད་མི་སེར་སྐྱ་ཐུན་མོང་ནས་སྤྱི་མཐུན་དགེ་ཚོགས་སླད་མི་རེ་ངོ་རེ་ནས་སོ་སོའི་གནས་ཡུལ་གྱི་སྒོར་ ༥༌༢༥ རེ་ཞལ་འདེབས་འབུལ་གནང་ཡོང་བའི་འབོད་སྐུལ་ཞུས་པ་མ་ཟད།  ཞལ་འདེབས་འབུལ་ཕྱོགས་དེ་རང་ཉིད་ཀྱི་ས་གནས་འགོ་འཛིན་ལས་ཁུངས་དང་སྐུ་ཚབ་དོན་གཅོད་ལས་ཁུངས་བརྒྱུད་ཕྱི་ལོ་ ༢༠༡༩ ཟླ་ ༥ ཚེས་ ༡ གོང་དུ་བཞུགས་སྒར་བོད་མིའི་སྒྲིག་འཛུགས་ཆོས་རིགས་ལས་ཁུངས་སུ་ཕུལ་ཟིན་དགོས་ཀྱི་འདུག རྩ་བའི་འདས་ལོའི་ཟླ་མཇུག་ཏུ་བོད་མིའི་སྒྲིག་འཛུགས་ནས་༸གོང་ས་མཆོག་གི་དགུང་ཀེག་སྔོན་འགྲོ་དང་བསྟུན་བརྟན་བཞུགས་རྒྱས་པ་ཞིག་གནས་མཆོག་རྡོ་རྗེ་གདན་དུ་ཕུལ་ཟིན་པ་མ་ཟད།  ཉེ་ཆར་ཕྱི་ཟླ་ ༢ པའི་ནང་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཀྱང་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་རེད།

 ༸གོང་ས་མཆོག་ལ་ཞི་བདེ་དང་རང་དབང་གི་གཟེངས་རྟགས་ཞེས་པ་ཞིག་ཕུལ་འདུག་པ་དང་། མགོན་པོ་༸གང་ཉིད་མཆོག་གི་གཡོ་བ་མེད་པའི་ཐུགས་བསྐྱེད་དམ་བཅའ་འགྲོ་བ་མིའི་ཐོབ་ཐང་དང་འཛམ་གླིང་ཞི་བདེ། དེ་བཞིན་འཚེ་མེད་ཞི་བའི་དགོངས་པ་སོགས་གཞིར་བཞག་པའི་ཐོག་ནས་འཛམ་གླིང་གི་འགྲོ་བ་མིའི་རིགས་ལ་རླབས་ཆེན་གྱི་མཛད་རྗེས་བཞག་ཡོད་པ་མ་ཟད། བོད་མི་རིགས་ཀྱི་རིག་གཞུང་དང་ཆེ་མཐོང་གོང་སྤེལ་སོགས་ཀྱི་ཐད་ནས་ཀྱང་མཛད་པ་རྒྱ་ཆེར་བསྐྱངས་ཡོད་པར་ངོས་འཛིན་གྱིས་ཞི་བདེ་དང་རང་དབང་གི་གཟེངས་རྟགས་དེ་ཕུལ་བ་ཡིན་ཞེས་གསུངས་འདུག ཁ་ཉིན་ CRUX ཞེས་པའི་དྲྭ་རྒྱར་ཕྱི་ལོ་ ༢༠༡༩ ཟླ་ ༣ ཚེས་ ༤ ཉིན་ཨ་རིའི་ Iowa མངའ་སྡེའི་ནང་རྟེན་གཞི་བྱས་པའི་ཡི་ཤུ་དང་ཇེའུ། ཁ་ཆེ་ཆོས་ལུགས་སོགས་ཀྱི་ལྟ་གྲུབ་དུ་མ་ལས་གྲུབ་པའི་ Pacem in Terris Coalition ཞེས་པའི་ཚོགས་པའི་སྐུ་ཚབ་ཡི་ཤུའི་ཆོས་དཔོན་ Thomas R. Zinkula མཆོག་བཞུགས་སྒར་དུ་ཆེད་བཅར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཞི་བདེ་དང་རང་དབང་གི་གཟེངས་རྟགས་ཕུལ་ནས་༸གོང་ས་མཆོག་གི་རླབས་ཆེན་གྱི་དགོངས་པར་ཡི་རངས་བསྔགས་བརྗོད་ཞུས་ཡོད་པ་རེད།གཟེངས་རྟགས་འབུལ་བཞེས་ཀྱི་མཇལ་མོལ་དེའི་སྐབས་༸གོང་ས་མཆོག་གིས་སྤྱིར་འཛམ་གླིང་ནང་ཆོས་ལུགས་འདྲ་མིན་ཡོད་ཀྱང་ཆོས་ལུགས་ཚང་མས་བྱམས་བརྩེའི་བསླབ་བྱ་གཙོ་བོར་འཛིན་གྱི་ཡོད་པ་གཅིག་མཚུངས་ཡིན་སྐོར་བཀའ་ལན་བསྩལ་ཏེ། ང་ཚོ་ཚང་མ་འགྲོ་བ་མི་གཅིག་གྱུར་ཡིན་སྟབས་ཕན་ཚུན་དབར་གུས་བརྩི་དང་བརྩེ་བ་བྱེད་དགོས་པ་དང་། དེ་རིང་གི་འཛམ་གླིང་འདིར་སྔར་ལས་ལྷག་པའི་བྱམས་བརྩེ་དང་ཞི་བདེ་དགོས་གལ་ཆགས་ཡོད་ཅེས་ལམ་སྟོན་མཛད་འདུག སྤྱིར་གཟེངས་རྟགས་དེ་འཛམ་གླིང་ནང་ཞི་བདེ་གོང་འཕེལ་གྱི་དགོངས་གཞིའི་ཐོག་རླབས་ཆེན་གྱི་བྱས་རྗེས་འཇོག་མཁན་གྱི་སྐྱེས་ཆེན་དམ་པ་རྣམས་ལ་འབུལ་བཞིན་ཡོད་པ་ལྟར། ད་ལྟའི་བར་གཟེངས་རྟགས་དེ་ཐོག་མར་ཨ་རིའི་སྲིད་འཛིན་ཟུར་པ་སྐུ་ཞབས་ John F Kennedy ལགས་སུ་ཕུལ་ཡོད་པ་དང་། དེ་བཞིན་མི་རིགས་ནག་པོའི་རང་དབང་དང་འདྲ་མཉམ་འཐབ་རྩོད་པ་སྐུ་ཞབས་ Martin Luther King དམ་པ་མཆོག ལྷོ་ཨ་ཕི་རི་ཀའི་ཡི་ཤུའི་བླ་ཆེན་ Desmond Tutu མཆོག ཨ་རིའི་སྤྱི་ཚོགས་ཀྱི་ལས་འགུལ་བ་གྲགས་ཅན་ལྕམ་སྐུ་ Dorothy Day མཆོག་བཅས་ལ་ཕུལ་ཡོད་པ་རེད། རྩ་བའི་གཟེངས་རྟགས་ཀྱི་མཛད་སྒོ་བསྡུས་ནས་གཟེངས་རྟགས་མཛད་འབུལ་བཞེས་གནང་གི་ཡོད་ཀྱང་ཉེ་བའི་ལོ་ཤས་ནས་༸གོང་ས་མཆོག་གི་དགུང་ལོའི་བབས་དང་བསྟུན་འགྲུལ་བཞུད་ཀྱི་མཛད་འཆར་མང་པོ་ཞིག་ཉུང་འཕྲི་གནང་ཡོད་སྟབས་དངོས་སུ་ཨ་རར་ཆེད་ཕེབས་ཀྱིས་གཟེངས་རྟགས་ཀྱི་མཛད་སྒོར་དབུ་བཞུགས་གནང་དཀའ་བར་བརྟེན་འདི་ལོའི་ཕྱི་ཟླ་ ༤ ཚེས་ ༩ ཉིན་ཨ་ཡོ་ཝ་མངའ་སྡེའི་རྒྱལ་ས་ Davenport ནང་རྟེན་གཞི་བྱས་པའི་ Ambrose University མཐོ་སློབ་ཏུ་ཐེངས་འདིའི་གཟེངས་རྟགས་ཀྱི་མཛད་སྒོ་འཚོགས་གཏན་ཁེལ་འདུག