༸གོང་ས་མཆོག

དེ་རིང་ཕྱི་ལོ་ ༢༠༢༡ ཟླ་ ༡ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་ཀོ་རི་ཡའི་ནང་པ་གཙོས་འཛམ་གླིང་ཡུལ་ཕྱོགས་གང་སར་བཞུགས་པའི་དད་ལྡན་རྣམས་ལ་ཤེས་རབ་སྙིང་པོའི་བཀའ་ཆོས་མུ་མཐུད་ནས་སྩལ་བ་དང་འབྲེལ་ཆོས་ཞུ་བའི་བཀའ་འདྲི་ཁག་ལ་བཀའ་ལན་མཛད་སོང་། དེ་རིང་གི་བཀའ་ཆོས་ཐོག་ཏུ་སེམས་བཟང་པོ་བྱེད་ཡ་དེ་ནི་འགྲོ་བ་མི་ཙམ་མ་ཡིན་པར་སེམས་ཅན་དུད་འགྲོ་ཚུན་ཆད་ལ་ཡང་ཡོད་པ་ཞིག་ཡིན་སྐོར་བཀའ་སྩལ་བ་དང་འབྲེལ། མིའི་རིགས་ཀྱིས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་ཕན་བདེ་སྒྲུབ་བསམ་པའི་ཀུན་སློང་བཟང་པོའི་སྒོ་ནས་བྱ་བཞག་ལ་བཅུག་པ་ཡིན་ན། བསོད་ནམས་ཀྱི་ཚོགས་རྒྱ་ཆེན་པོ་བསགས་ཏེ་རང་རྒྱུད་དུ་གཞན་དོན་དོན་གཉེར་གྱི་བསམ་བློ་རྒྱ་བསྐྱེད་བཏང་སྟེ་འཕྲལ་ཕུགས་གཉིས་ཀར་ཕན་པའི་སེམས་སྐྱིད་པ་དང་བག་ཕེབས་པ་སོགས་ཀྱི་སྤྱོད་པར་འཇུག་ཐུབ་པར་བཀའ་སྩལ་ཡོད།དེ་བཞིན་མགོན་པོ་༸གང་ཉིད་མཆོག་གིས་བྱང་ཆུབ་ཀྱི་སེམས་སྒོམ་པའི་ཐོག་ནས་སྣང་སྲིད་ཐམས་ཅད་གཉེན་ལ་ཤར་ཐུབ་པའི་བློ་ཞིག་བྱུང་བ་ཡིན་ན་རང་བཞིན་གྱིས་རང་རྒྱུད་ཀྱི་ཆགས་སྡང་གི་བློ་ཇེ་ཉུང་དུ་འགྲོ་ཐུབ་ངེས་ཡིན་སྐོར་བཀའ་སྩལ་བ་དང་ཆབས་ཅིག དེ་ལྟ་བུའི་བསམ་སྤྱོད་ལས་རང་གི་གཉེན་ཙམ་མིན་པར་ཐ་ན་རང་གི་དགྲ་བོ་ལ་ཡང་ཕན་བདེ་སྒྲུབ་འདོད་ཀྱི་སྙིང་རྗེ་ཞིག་སྐྱེ་ཐུབ་ཚེ་དེ་ནི་འདོད་ཆགས་དང་བྲལ་བ་ཞིག་ཡིན་སྟབས། ནང་པའི་གཞུང་ཁག་ཏུ་དགྲ་བོ་ནི་བཟོད་པའི་རྟེན་གཙོ་བོ་ཞིག་ཡིན་པར་བཞེད་པ་ལྟར། བདག་གཞན་མཉམ་བརྗེའི་ཐོག་ནས་དགྲ་བོ་དགེ་བའི་བཤེས་གཉེན་ལྟ་བུར་བཀུར་དགོས་ཞེས་ལམ་སྟོན་བཀྲིན་ཆེ་བར་མཛད་ཡོད།༸གོང་ས་མཆོག་གི་བཀའ་སློབ་ཀྱི་ལས་རིམ་གྲུབ་མཚམས་སུ་ཀོ་རི་ཡའི་ཆོས་ཞུ་བ་ཚོས་མགོན་པོ་༸གང་ཉིད་མཆོག་ལ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་གནང་དོན་བཞིན་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་སྐབས་དགེ་བའི་བཤེས་གཉེན་བསྟེན་ཚུལ་དང་འབྲེལ་ནས་༸རྗེ་རིན་པོ་ཆེའི་ལམ་རིམ་ལུང་འདྲེན་མཛད་དེ་དགེ་བའི་བཤེས་གཉེན་ཞིག་ཡིན་ན་རང་མ་དུལ་བས་གཞན་འདུལ་བའི་གནས་མེད་ཅེས་གསུངས་ཡོད་པ་དང་འབྲེལ། དང་པོ་རང་རྒྱུད་བཏུལ་བའི་ཐོག་ནས་སློབ་མ་རྣམས་ལ་བདེན་བཞིའི་རྣམ་བཞག་གི་ཐོག་ནས་ཚེ་འདི་ཕྱི་གཉིས་ཀྱི་རྣམ་བཞག་ར་སྤྲོད་ཀྱིས་ལམ་དགེ་བའི་ཕྱོགས་སུ་བསྒྱུར་ཐུབ་མཁན་ཞིག་ཡོད་ན་བླ་མའི་མཚན་ཉིད་ཚང་ཡོད་སྐོར་བཀའ་ལན་མཛད་སོང་། དེ་བཞིན་མགོན་པོ་༸གང་ཉིད་མཆོག་གིས་བཟོ་རིག་པ་དང་འབྲེལ་བའི་བཀའ་འདྲི་ཞིག་ལ་ལྗགས་ལན་མཛད་པར་བཟོ་རིག་པ་ནི་མེད་དུ་མི་རུང་བ་ཞིག་ཡིན་ཀྱང་། བཟོ་རིག་པའི་ཆེད་མཁས་པ་གང་ཞིག་གི་སེམས་རྒྱུད་དེ་ཆགས་སྡང་གི་དབང་དུ་ཕྱིན་ནས་གཞན་ཕན་དང་བྲལ་བ་ཞིག་ཏུ་གྱུར་ཚེ་འགྲོ་བ་མིའི་རིགས་སྤྱིར་སྡུག་བསྔལ་སྦྱིན་པའི་རྒྱུར་འགྲོ་རྒྱུ་ཉག་གཅིག་ཡིན་པ་བཀའ་སྩལ་ཏེ་བཟོ་རིག་པ་དེ་གལ་ཆེན་པོ་ཡིན་ཀྱང་། བཟོ་ལས་བ་རྣམས་ཀྱིས་གཞན་ལ་བརྩེ་བའི་བསམ་པའི་ཐོག་ནས་བཟོ་ལས་ཡར་རྒྱས་གཏོང་ཐུབ་པ་ཞིག་བྱུང་ན་འགྲོ་བ་སྤྱི་ལ་ཕན་རླབས་སྐྲུན་ཐུབ་པ་ཞིག་ཡོང་རྒྱུ་ཡིན་སྐོར་བཀའ་སྩལ་ཡོད། དེ་རིང་གི་བཀའ་ཆོས་མཇུག་ཏུ་མགོན་པོ་༸གང་ཉིད་མཆོག་གིས་སང་ཉིན་སེམས་བསྐྱེད་ཆོ་ག་བཀའ་དྲིན་སྩལ་བ་བརྒྱུད་ནས་ཐེངས་འདིའི་ཀོ་རི་ཡའི་དད་ལྡན་ཆོས་ཞུ་བ་རྣམས་ལ་དམིགས་པའི་ཉིན་གསུམ་གྱི་བཀའ་ཆོས་དེ་ལེགས་གྲུབ་མཛད་ཀྱི་ཡོད་པ་རེད།

རྒྱ་གར་གཙོ་བོར་གྱུར་པའི་བོད་མི་གནས་ཡུལ་རྒྱལ་སྤྱིའི་ཡུལ་གྲུ་གང་སར་ ༢༠༢༡ ལོའི་སྲིད་སྐྱོང་དང་སྤྱི་འཐུས་གཉིས་ཀྱི་སྔོན་འགྲོའི་འོས་བསྡུ་ཆེན་མོའི་ལས་རིམ་གནང་བཞིན་པ་དང་བསྟུན། ཁ་ཉིན་རྒྱ་ནག་གཞུང་འབྲེལ་གྱི་གསར་ཁང་ Global Times གི་དྲ་གནས་ཐོག་གནས་ཚུལ་ཞིག་སྤེལ་བར་བཙན་བྱོལ་བོད་མིའི་འོས་བསྡུའི་ལས་རིམ་ལ་ཁྱད་གསོད་དང་སྦྲགས་འོས་བསྡུའི་བརྒྱུད་རིམ་ཁྲོད་གྲུབ་འབྲས་གང་འདྲ་ཞིན་ཐོན་ཡང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་གང་ཡང་གཏང་ཐུབ་ཀྱི་མ་རེད་ཅེས་བཤད་འདུག བཙན་བྱོ་བོད་གཞུང་དང་བོད་མིའི་སྒྲིག་འཛུགས་ཀྱི་མ་འོངས་འགོ་ཁྲིད་དུ་གང་ཟག་སུ་ཞིག་བདམས་ཐོན་བྱུང་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས། དེ་བཞིན་ཨ་རི་གཞུང་ལ་བོད་ཀྱི་གནད་དོན་ཐོག་རྒྱ་ནག་དང་ལྷན་དུ་ཐབས་བྱུས་ལྡན་པའི་ཐོག་གླེང་སློང་གནང་རོགས་ཞེས་སོགས་འབོད་སྐུལ་ཞུ་རྒྱུ་གཙོས་པའི་གནད་དོན་མང་དག་ཅིག་ལ་གདོང་ལེན་གནང་དགོས་སྐོར་བཤད་པར་མ་ཟད། རྒྱ་ནག་གཞུང་གིས་སྔོན་ཚུད་ནས་བོད་ཀྱི་གནད་དོན་ཐོག་སྒྲིག་སྲོལ་དང་འཆར་གཞི་ཁག་གཏན་འབེབས་བྱས་ཡོད་སྟབས། འགྲོ་བཞིན་པའི་བཙན་བྱོལ་བོད་མིའི་འོས་བསྡུའི་བརྒྱུད་རིམ་ཁྲོད་གྲུབ་འབྲས་གང་འདྲ་ཞིན་ཐོན་ཡང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་གང་ཡང་གཏང་ཐུབ་ཀྱི་མ་རེད་ཅེས་བཤད་འདུགལྷག་པར་དུ་རྒྱ་ནག་གི་བོད་གནད་ཉམས་ཞིབ་ལྟེ་གནས་ཁང་གི་གཙོ་འཛིན་ Xiao Jie ཟེར་བ་དེ་ཡིས་སྲིད་སྐྱོང་ཞེས་པ་དེ་ཕྱིའི་རྒྱལ་ཁབ་ཁག་ནས་དཔལ་འབྱོར་འཚོལ་སྒྲུབ་བྱེད་མཁན་གྱི་ཚོགས་པ་ཞིག་གི་འགོ་ཁྲིད་ཡིན་པ་དང་། སྲིད་སྐྱོང་ཞེས་པ་དེ་ཐོག་མར་ ༢༠༡༡ ལོར་འདེམས་སྒྲུག་བྱས་ཡོད་ཀྱང་། དོན་ངོ་མར་དབང་ཚད་ཆ་ཚང་ད་ལྟ་ཡང་༸གོང་ས་མཆོག་དང་ཁོང་གི་ཉེ་འཁོར་གྱི་མི་སྣ་ཁག་ཅིག་ལ་ཡོད་རེད་ཅེས་བཤད་འདུགདེ་བཞིན་རྒྱ་ནག་ཆབ་སྲིད་གྲོས་ཚོགས་ཀྱི་གྲངས་ཉུང་མི་རིགས་དང་ཆོས་ལུགས་ལས་དོན་ཚོགས་ཆུང་གི་ཚོགས་གཙོ་ཟུར་པ་ Zhu Weiqun ཟེར་བ་དེ་ཡིས་ཀྱང་བཙན་བྱོལ་བོད་གཞུང་ཟེར་བ་དེ་ད་ཆ་ལུང་ཚན་དང་ཆོས་ལུགས་འཐེན་འཁྱེར་སོགས་ཀྱི་དཀའ་ངལ་ནང་དུ་ལྷུང་ཞིང་། དུས་ནམ་ཞིག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་མ་ཟིན་པའི་གནས་སྟངས་བྱུང་སྐབས་ནང་འགལ་གྱི་དཀའ་རྙོག་དེ་མི་རབས་གཞོན་པ་ཚོས་གདོང་ལེན་བྱེད་ཐུབ་ཀྱི་མ་རེད་ཅེས་བརྗོད་འདུགཐེངས་འདིར་རྒྱ་ནག་གིས་ཐེ་བྱུས་བྱེད་བཞིན་པའི་གནད་དོན་དང་འབྲེལ་ཏེ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་མཆོག་ལ་བཀའ་འདྲི་ཁག་ཅིག་ཞུས་པར་ང་ཚོའི་ངོས་ནས་རྒྱ་ནག་ཕྱོགས་ནས་སྐད་ཆ་དེ་འདྲ་ཞིག་བཤད་པར་སྔོན་དཔག་ཐུབ་ཀྱི་ཡོད་པ་དང་། རྒྱ་ནག་དེ་རྒྱལ་སྤྱིའི་འགྲོ་ལུགས་ལྟར་མང་གཙོའི་ཐོག་འགྲོ་ཐུབ་ཀྱི་མེད་སྟབས་ང་ཚོར་མི་འདོད་པའི་རྣམ་པ་ཁོ་ན་བསྟན་ནས་མ་བསྡད་པར་འཛམ་གླིང་ཀུན་གྱི་འགྲོ་སྟངས་མཐུན་ཞིང་། འགྲོ་བ་མིའི་གཞིའི་ཐོབ་ཐང་ངམ་ཁེ་དབང་ལོངས་སུ་སྤྱོད་རྒྱུར་བསམ་བློ་གཏོང་དགོས་ཞེས་བརྡ་ལན་གནང་སོང་།དེ་བཞིན་ཕྱི་ཚེས་ ༣ ཉིན་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་ཆེན་མོ་གནང་སྐབས་སུ་སྲིད་སྐྱོང་བློ་བཟང་སེང་གེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱེས་འཁོད་བོད་མི་རྣམས་འཛམ་གླིང་ཡུལ་གྲུ་གང་སར་གནས་ཀྱང་ཚང་མས་མང་གཙོའི་ཁེ་དབང་ལོངས་སུ་སྤྱད་ནས་འོས་བསྡུར་ཆ་ཤས་བཞེས་ཡོད་པ་དང་ལྷག་དོན་བོད་ནང་གི་བོད་མིའི་མངོན་འདོད་ནི་མང་གཙོ་ཡིན་པ་དང་། རྒྱ་ནག་ནང་ཡོད་པའི་རྒྱ་རིགས་མང་ཚོགས་རྣམས་ཀྱི་མངོན་འདོད་ཀྱང་མང་གཙོ་ཡིན་སྟབས། རྒྱ་གཞུང་གིས་བཙན་བྱོལ་བོད་མི་རྣམས་ཀྱིས་མང་གཙོའི་ལམ་བཟང་ཕྱག་བསྟར་གནང་ཕྱོགས་ལས་མིག་དཔེ་ལེན་རྒྱུ་གལ་ཆེན་པོ་རེད་ཅེས་གསུངས་ཡོད།

དེ་རིང་ཕྱི་ལོ་ ༢༠༢༡ ཟླ་བ་ ༡ ཚེས་ ༥ ཉིན་ཀོ་རི་ཡའི་ནང་པ་ཚོས་ཇི་ལྟར་གསོལ་བ་བཏབ་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་ཤེས་རབ་སྙིང་པོའི་བཀའ་ཆོས་དབུ་འཛུགས་བསྐྱངས་སོང་།མགོན་པོ་༸གང་ཉིད་མཆོག་གིས་བཀའ་ཆོས་ཀྱི་ཉིན་དང་པོར་ཀོ་རི་ཡའི་ཆོས་གྲོགས་རྣམས་ལ་འཚམས་འདྲི་མཛད་པ་དང་སྦྲགས། ཤེས་རབ་སྙིང་པོ་དེ་ནི་ཤེར་ཕྱིན་གྱི་གཞུང་ཐམས་ཅད་ཀྱི་རྩ་བ་ལྟ་བུ་ཡིན་སྐོར་གྱི་བཀའ་སྩལ་བ་དང་འབྲེལ། སྤྱིར་བཏང་དད་པ་ལ་དབང་རྟུལ་དད་པའི་རྗེས་འབྲང་དང་དབང་རྣོན་ཆོས་ཀྱི་རྗེས་འབྲང་ཞེས་རིགས་གཉིས་ཡོང་གི་ཡོད་པ་ལས། སྟོན་པ་བཅོམ་ལྡན་འདས་ཀྱིས་སྔར་གསུངས་ཟིན་པ་ལྟར། ནང་ཆོས་ཀྱི་གཞུང་གི་ནང་དུ་ཆོས་ཐམས་ཅད་ཅི་བཞིན་བདག་ཅག་གི་སྟོན་པའི་བཀའ་ཡིན་པའི་དབང་གིས་ཁས་ལེན་བྱེད་རྒྱུ་ཞིག་མིན་པར། རིགས་པའི་ལམ་ནས་བརྡར་ཤ་བཅད་ནས་ཐག་གཅོད་བྱེད་རྒྱུ་དེ་གལ་ཆེན་པོ་ཡིན་པར་བཀའ་སྩལ་སོང་། དེ་བཞིན་༸མགོན་པོ་མཆོག་གིས་ཤེར་ཕྱིན་གྱི་གཞུང་ཡག་པོ་ཞིག་ཤེས་པར་བྱ་བ་ལ་མངོན་རྟོགས་རྒྱན་དང་ཀླུ་སྒྲུབ་ཡབ་སྲས་ཀྱི་གཞུང་ཆེན་དག་ལ་སློབ་སྦྱོང་བྱས་ཏེ་ཐོས་བྱུང་གི་གོ་བ་དང་བསམ་བྱུང་གི་གོ་བ་བསྐྱེད་དེ་མཐར་སྒོམ་བྱུང་གི་ཐོག་ནས་སློབ་གཉེར་གནང་བ་ཡིན་ན། ཟབ་མོ་སྟོང་པ་ཉིད་ཀྱི་གོ་བ་རྙེད་ཐུབ་པར་བཀའ་སྩལ་བ་དང་ཆབས་ཅིག འགྲོ་བ་མིའི་རིགས་ཀྱི་ཚུལ་མིན་ཡེ་ཤེས་ཀྱི་རྣམ་རྟོག་གི་སྒྲོ་བཏགས་པའི་ཁར་བཟང་ངན་སོགས་ཀྱི་དབྱེ་འབྱེད་ཡོང་གི་ཡོད་སྐོར་བཀའ་སྩལ་ནས་ཉོན་མོངས་པའི་གཉེན་པོར་སྟོང་ཉིད་སྒོམ་དགོས་གལ་ཡིན་པར་ལམ་སྟོན་བཀྲིན་ཆེར་མཛད་ཡོད།༸གོང་ས་མཆོག་གི་བཀའ་སློབ་ཀྱི་ལས་རིམ་གྲུབ་མཚམས་སུ་ཀོ་རི་ཡའི་ཆོས་ཞུ་བ་ཚོས་མགོན་པོ་༸གང་ཉིད་མཆོག་ལ་བརྗོད་གཞི་འདྲ་མིན་ཐོག་བཀའ་འདྲི་དགོངས་སྐོར་ཞུས་དོན་ལྟར་དེའི་ཁྲོད་ཆོས་ཞུ་བ་ཞིག་གིས་ནང་ཆོས་དང་ཚན་རིག་གཉིས་ཀྱི་དམིགས་འདུན་གྱི་སྐོར་བཀའ་འདྲི་དགོངས་སྐོར་ཞུས་པར་མགོན་པོ་༸གང་ཉིད་མཆོག་གིས་ནང་ཆོས་ཀྱིས་སེམས་ཁམས་རིག་པ་གཙོ་བོ་བརྗོད་བཞིན་ཡོད་པ་དང་ཚན་རིག་གིས་དངོས་ཁམས་རིག་པ་གཙོ་བོ་བརྗོད་བཞིན་ཡོད་པར་བཀའ་གནང་སྟེ། ནང་ཆོས་དང་ཚན་རིག་གཉིས་ཀྱིས་ཕན་ཚུན་ལ་གཞོག་འདེགས་གནང་ཐུབ་ཀྱི་ཡོད་སྐོར་བཀའ་ལན་སྩལ་སོང་། མགོན་པོ་༸གང་ཉིད་མཆོག་གིས་བཀའ་ལན་གཞན་ཞིག་སྩལ་བར་ཆོས་ལུགས་ཐམས་ཅད་ཀྱི་ནང་དུ་བྱམས་བརྩེ་སྐོར་དེ་གཙོ་བོར་འཛིན་བཞིན་ཡོད་པ་དང་། སྒོས་སུ་མི་ཚང་མ་གཅིག་གྱུར་ཡིན་པའི་འདྲ་མཉམ་གྱི་ལྟ་བའི་ཐོག་སེམས་ཁམས་རིག་པའི་རྣམ་གཞག་སྟེང་ནས་བྱམས་བརྩེ་གོང་མཐོར་གཏོང་ཐུབ་མཁན་གྱི་ཆོས་ལུགས་དེ་ནང་ཆོས་ཡིན་པར་བཀའ་སྩལ་ཏེ་ཆོས་ལུགས་དང་ཤེས་ཡོན་གྱི་ལམ་ལུགས་ཟུང་འབྲེལ་ཐོག་ནས་འགྲོ་བ་མིའི་རིགས་ཀྱི་རྒྱུད་ལ་བྱམས་བརྩེ་གོང་འཕེལ་གཏོང་རྒྱུ་དེ་གལ་ཆེན་པོ་ཡིན་པར་བཀའ་སྩལ་ཡོད།གཞི་རྩའི་འདི་ལོར་རྒྱ་ནག་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་རྐྱེན་གྱིས་མི་ཚང་མའི་འགྲོ་འདུག་ལ་བཀག་སྡོམ་བྱས་ཡོད་པ་ལྟར། རྒྱ་གར་གྱི་ནང་དུ་རིམས་ནད་ཁྱབ་བརྡལ་བྱུང་བ་ནས་བཟུང་བཞུགས་སྒར་༸རྒྱལ་བའི་ཕོ་བྲང་ཡང་སྒོ་རྒྱབ་མུས་ཡིན་པ་ལྟར། མགོན་པོ་༸གང་ཉིད་མཆོག་གིས་དྲ་ལམ་བརྒྱུད་ནས་མང་ཚོགས་ལ་བཀའ་ཆོས་སྩོལ་བཞིན་ཡོད་པ་རེད། ཐེངས་འདིའི་ཀོ་རི་ཡའི་དད་ལྡན་མང་ཚོགས་ལ་བཀའ་ཆོས་སྩོལ་རྒྱུའི་ལས་རིམ་དེ་དེ་རིང་ཚེས་ ༥ ནས་དབུ་འཛུགས་ཀྱི་ཚེས་ ༧ བར་ཁྱོན་ཉིན་གསུམ་གྱི་རིང་ལ་གནང་གི་ཡོད་པ་དང་། དེ་བཞིན་ཕྱི་ཚེས་༡༠ ཉིན་སེམས་དང་སྲོག་གི་བསྟི་གནས་ཁང་གིས་གོ་སྒྲིག་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་སའི་གོ་ལའི་གནམ་གཤིས་ཚ་དྲོད་སྲུང་སྐྱོབ་དང་ཁོར་ཡུག་ལས་འགུལ་བ་གྲགས་ཆེན་གཞོན་ནུ་མ་ Greta Thunberg དང་། དེ་བཞིན་དེང་དུས་ཚན་རིག་པ་ཁག་ཅིག་དང་ལྷན་དུ་གོ་ལའི་ཚ་དྲོད་ཀྱི་ཛ་དྲག་གནས་སྟངས་ཀྱི་བརྗོད་གཞིའི་ཐོག་བགྲོ་གླེང་མཛད་རྒྱུའི་མཛད་འཆར་ཐུགས་གཏན་འཁེལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་སླར་ཡང་མདང་དགོང་སླར་ཡང་ཐེངས་བཞི་པར་ཨ་རིའི་གྲོས་ཚོགས་འོག་མའི་ཚོགས་གཙོར་བསྐོ་བཞག་བྱུང་བར་དགའ་བསུའི་འཚམས་འདྲི་མཛད་འདུགའཚམས་འཕྲིན་དེའི་ནང་དུ་མགོན་པོ་༸གང་ཉིད་མཆོག་གིས་ལྕམ་སྐུ་ Nancy Pelosi མཆོག་གིས་སླར་ཡང་གྲོས་ཚོགས་ཀྱི་ཚོགས་གཙོའི་ངོ་བོའི་ཐོག་ནས་མུ་མཐུད་ཨ་རིའི་མི་མང་གི་རེ་བ་དང་མངོན་འདོན་ཁག་བསྒྲུབ་རྒྱུ་མ་ཟད། འཛམ་གླིང་ཞི་བདེ་དང་འཆམ་མཐུན་སྐྲུན་རྒྱུར་གལ་གནད་ཆེ་བའི་གོ་བབ་ཅིག་འཛིན་རྒྱུར་མགོན་པོ་༸གང་ཉིད་མཆོག་ལ་ཐུགས་དོགས་རྩ་བ་ནས་མེད་ཅེས་བཀའ་སྩལ་འདུག དེ་བཞིན་ལྕམ་སྐུ་མཆོག་གིས་ལོ་མང་གི་རིང་ལ་བོད་དོན་རྒྱབ་སྐྱོར་དང་མགོན་པོ་༸གང་ཉིད་མཆོག་ལ་མཛའ་གྲོགས་ཀྱི་འདུ་ཤེས་བཅིངས་པ་སོགས་ལ་༸གོང་ས་མཆོག་ནས་དུས་རྟག་ཏུ་བཀའ་དྲིན་ཆེན་པོར་ཚོར་བཞིན་ཡོད་སྐོར་བཀའ་སྩལ་བ་དང་འབྲེལ། ལྕམ་སྐུ་མཆོག་ལ་ཕྱི་ལོ་གསར་ཚེས་ཀྱི་འཚམས་འཕྲིན་དང་སྨོན་འདུན་མཛད་འདུགབོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ལྕམ་སྐུ་མཆོག་སླར་ཡང་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་ཞུས་པ་དང་སྦྲགས། ལྕམ་སྐུ་མཆོག་གི་འཇིགས་ཞུམ་བྲལ་བའི་དབུ་ཁྲིད་ཀྱིས་དཀའ་ངལ་ལ་ལྟོས་མེད་ཀྱིས་འཛམ་གླིང་ནང་གི་གལ་གནད་ཆེ་བའི་གནད་དོན་ཡོངས་ཀྱིས་མཚོན་པའི་འགྲོ་བ་མིའི་ཐོབ་ཐང་སོགས་ལ་དྲང་བདེན་ཐོག་རྒྱབ་སྐྱོར་བླ་མེད་གནང་ཡོད་སྐོར་སོགས་གསུངས་འདུག ལྷག་དོན་སྲིད་སྐྱོང་མཆོག་གིས་ང་ཚོ་བོད་མི་རྣམས་ནས་ལྕམ་སྐུ་མཆོག་གིས་དུས་རྒྱུན་ནས་རྒྱ་ནག་གིས་བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་བཏང་ཁག་གཙོས་པའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་ཡོང་བར་རྒྱབ་སྐྱོར་ཤུགས་ཆེར་གནང་བར་ཐུགས་རྗེ་ཆེ་ཞེས་ཞུས་པ་དང་ཆབས་ཅིག་ཏུ་རྒྱལ་ཁབ་གཞན་རྣམས་ཀྱིས་ཀྱང་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་དོན་ལྟར་དེ་མཚུངས་གནང་སྐྱོང་ཡོང་བའི་རེ་སྐུལ་ཡང་ཞུས་འདུག

བོད་མའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ལོ་ ༢༠༢༡ ཟླ་བ་ ༡ ཚེས་ ༡ ཉིན་གྱི་སྔ་དྲོར་ཕྱི་ལོ་ ༢༠༢༡ ལོའི་ལོ་གསར་དང་བསྟུན་གཞིས་ལུས་རྒྱ་ཆེའི་མི་མང་ལ་འཚམས་འདྲིའི་བཀྲིས་བདེ་ལེགས་ཡོད་ཅེས་བཀའ་སྩལ་བ་དང་འབྲེལ་ནས་ཁོང་རྣམས་ཐུགས་སྤྲོ་པོ་ཡོང་བའི་ཐུགས་རེ་ཡང་ཡོད་སྐོར་བཀའ་སྩལ་འདུགམགོན་པོ་མཆོག་གིས་འཚམས་འཕྲིན་དེའི་ནང་ད་ལམ་ངོས་ནས་ཕྱི་ནང་མི་རིགས་ཀུན་ལ་ཕྱི་ལོ་གསར་པར་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་ལྷག་པར་དུ་གོ་སྐབས་འདི་བརྒྱུད་དེ་བོད་ནང་གི་གཞིས་ལུས་རྒྱ་ཆེའི་མི་མང་ལ་ཕྱི་ལོ་གསར་པར་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན། ཁྱེད་རྣམས་སེམས་སྤྲོ་པོ་ཡོང་བའི་རེ་བ་ཡོད། དེ་བཞིན་འདས་པའི་ལོ་དེ་སོ་སོས་བཟང་པོའི་བྱ་བ་བསྒྲུབས་ནས་བསྐྱལ་ཡོད་མེད་ཐད་བསམ་བློ་གཏོང་དགོས། དེ་ཡང་འདས་པའི་ལོའི་ནང་རབ་ལ་གཞན་ལ་ཕན་ཐོགས་བསྒྲུབས་པ་དང་། དེ་ལྟར་མ་བྱུང་ཡང་གཞན་ལ་གནོད་མ་བསྐྱལ་བའི་སྒོ་བས་མི་ཚེ་བསྐྱལ་ཡོད་ན་ཁྱེད་ཀྱི་འདས་པའི་ལོ་དེ་དོན་དང་ལྡན་པ་བྱུང་ཡོད། དེ་ལྟ་མིན་པར་ལོ་སྔ་མའི་རིང་རང་དོན་ཁོག་བཅུག་བྱས་དྲགས་ཏེ། མི་གཞན་ལ་བཤུ་གཞོག་བཏང་བ་སོགས་བྱུང་ཡོད་ན་མི་ཚེ་དོན་ལྡན་ངང་བསྐྱལ་ཐུབ་པ་བྱུང་མེད། གལ་ཏེ་མི་སུ་འདྲ་ཞིག་གིས་མི་ཚེ་དེ་ལྟར་བསྐྱལ་ཡོད་ན། ད་ཆ་ལོ་གསར་པ་འགོ་ཚུགས་པ་ཡིན་སྟབས། བསམ་བློ་འདི་ལྟར་དུ་གཏོང་དགོས། འདས་པ་ནི་འདས་པ་རེད། སང་ཉིན་ལོ་གསར་པ་ནས་བཟུང་སྟེ་རང་གི་ལུས་འདི་དང་མིང་འདི་གཉིས་སྔར་གྱི་དེ་ག་ཡིན་ཀྱང་། རང་གི་མི་ཚེ་འདི་སྐྱེལ་སྟངས་དེ་སྔར་ལས་བྱམས་བརྩེ་ཆེ་བ་ཞིག་དང་དོན་སྙིང་ལྡན་པ་ཞིག་བྱ་སྙམ་པའི་བསམ་གཏོང་དགོས། ཁྱེད་རྣམས་ལ་ཕྱི་ལོའི་ལོ་གསར་ལ་འཚམས་འདྲི་ཞུ་རྒྱུ་ཡིན་ཞེས་བཀའ་སྩལ་འདུག འཚམ་འཕྲིན་གྱི་མཇུག་ཏུ་མགོན་པོ་༸གང་ཉིད་མཆོག་གིས་ལོ་གསར་སྐབས་མི་རྣམས་ལྷན་འཛོམས་ཀྱིས་སྟོན་མོ་གཤམས་ཏེ་ཆང་འཐུང་བ་སོགས་སྤྲོ་སྐྱིད་གཏོང་གི་ཡོད་མོད། ཆང་ཅུང་ཟད་རེ་འཐུང་བ་ལས་དེ་མིན་ཆང་འཐུང་རྒྱུ་མང་དྲགས་ན་གང་འཚམ་ནས་ཕན་ཚུན་འཁྲུག་རྩོད་ཤོར་ཏེ་ལོ་གསར་པའི་དགའ་སྟོན་དེ་སྡུག་བསྔལ་གྱི་རྐྱེན་དུ་འགྱུར་བའི་ཉེན་ཁ་ཆེན་པོ་ཡོད། དེར་བརྟེན་ལོ་གསར་གྱི་དགའ་སྟོན་དེ་ཞི་འཇམ་ངང་ནས་གཏོང་རོགས་ཞེས་གཞེན་སྐུལ་བཀའ་སྩལ་མཛད་པར་མ་ཟད། ལྷག་དོན་ལོ་གསར་གྱི་ཉིན་མོ་ཙམ་དུ་མིན་པར་ལོ་ཧྲིལ་པོའི་རིང་དེ་ལྟར་གནང་དགོས། བཀྲ་ཤིས་བདེ་ལེགས། ཞེས་ཕྱི་ལོའི་གསར་བཞད་ལ་འཚམས་འདྲི་མཛད་ཡོད།

ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་ gallup ཞེས་མང་ཚོགས་ཀྱི་བསམ་ཚུལ་བསྡུ་རུབ་སོགས་ཀྱི་ཐད་ཕྱག་ལས་གནང་མཁན་ནས་འདོན་སྤེལ་གནང་བའི་འདི་ལོ་ ༢༠༢༠ ལོའི་འཛམ་གླིང་ནང་གི་སྐྱེས་བོ་དགའ་མོས་ཆེ་ཤོས་བྱ་ཡུལ་ཁོངས་སུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བདམས་ཐོན་བྱུང་འདུགཚོགས་པ་དེས་ཕྱི་ལོ་ ༢༠༢༠ རྗོགས་ལ་ཉེ་བའི་མཚམས་འདིར་དྲྭ་ཐོག་བརྒྱུད་དེ་མང་ཚོགས་ཁྲོད་འདི་ ༢༠༢༠ ལོའི་ནང་གི་སྐྱེས་ཕོ་མོ་དགའ་མོས་ཆེ་ཤོས་བྱ་ཡུལ་གྱི་འོས་གྲངས་བསྡུ་རུབ་གནང་བ་ཞིག་ཡོངས་གྲགས་གནང་འདུག་པ་དང་། དེའི་ནང་དུ་༸གོང་ས་༸སྐྱབས་མགོན་ཆེན་པོ་མཆོག་འདི་ལོ་མང་ཚོགས་ཀྱི་དགའ་མོས་ཆེ་ཤོས་ཞུ་ཡུལ་གྱི་སྐྱེས་པ་ཨང་བཅུ་པར་བདམས་ཐོན་བྱུང་འདུགའོས་གྲངས་དེའི་ཁྲོད་ཨང་དང་པོར་ཨ་རིའི་སྲིད་འཛིན་ལས་ཐོག་སྐུ་ཞབས་ Donald Trump མཆོག་དང་ཨང་གཉིས་པར་ཨ་རིའི་སྲིད་འཛིན་ཟུར་པ་སྐུ་ཞབས་ Barack Obama མཆོག ཨང་གསུམ་པར་ཨ་རིའི་བདམས་ཐོན་སྲིད་འཛིན་སྐུ་ཞབས་ Joe Biden མཆོག ཨང་བཞི་པར་ཨ་རིའི་ National Institute of Allergy and Infectious Diseases ཞེས་པའི་ལྟེ་གནས་ཁང་གི་འགན་འཛིན་སྐུ་ཞབས་ Anthony Fauci མཆོག དེ་བཞིན་ཨང་ལྔ་པར་ཡི་ཤུའི་བླ་ཆེན་ Pope Francis མཆོག་བཅས་ཆགས་ཀྱི་འདུགདེ་བཞིན་ ༢༠༢༠ ལོར་མང་ཚོགས་ཀྱིས་འཛམ་གླིང་ནང་གི་སྐྱེས་མ་འམ་བེུད་དགའ་མོས་ཆེ་ཤོས་བྱ་ཡུལ་ཁོངས་ནས་ཨང་དང་པོར་ཨ་རིའི་སྲིད་འཛིན་ཟུར་པ་སྐུ་ཞབས་ Barack Obama མཆོག་གི་སྐུ་ཟླ་ Michelle Obama ལགས་དང་ཨང་གཉིས་པར་ཨ་རིའི་བདམས་ཐོན་སྲིད་འཛིན་སྐུ་ཞབས་ Joe Biden མཆོག་གིས་བདམས་པའི་སྲིད་འཛིན་སྐུ་གཞོན་ལྕམ་སྐུ་  Kamala Harris མཆོག ཨང་གསུམ་པར་སྲིད་འཛིན་ལས་ཐོག་སྐུ་ཞབས་ Trump མཆོག་གི་སྐུ་ཟླ་ Melania Trump ལགས། ཨང་བཞི་པར་ཨ་རིའི་གཏམ་གླེང་མདོ་འཛིན་པ་དང་རྩོམ་པ་པོ་ལྕམ་སྐུ་ Oprah Winfrey ལགས། དེ་བཞིན་ཨང་ལྔ་པར་འཇར་མན་སྲིད་བློན་ལྕམ་ Angela Merkel མཆོག་བཅས་ཆགས་ཀྱི་འདུགགཞི་རྩའི་འོས་ཤོག་འདིའི་ནང་ཆ་ཤས་བཞེས་མཁན་མང་ཆེ་བ་ཨ་རིའི་མི་སེར་ཆགས་ཀྱི་ཡོད་སྟབས་ཡུལ་དེའི་ཆབ་སྲིད་ཀྱི་བཞེངས་ཕྱོགས་ཐད་ནས་མང་ཚོགས་ཀྱི་བསམ་ཚུལ་ལ་ཤུགས་རྐྱེན་ཆེན་པོ་ཐེབས་གཞིར་གྱུར་ཡོད་ཀྱང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་ནང་གི་སྐྱེས་བོ་དགའ་མོས་ཆེ་ཤོས་བྱ་ཡུལ་ཁོངས་སུ་ད་ལན་ཙམ་མིན་པར་དེ་སྔ་ཡང་མང་ཚོགས་ཀྱི་དགའ་མོས་ཞུ་ཡུལ་ཁོངས་སུ་བསྟུད་མར་བདམས་ཐོན་བྱུང་ཡོད་པ་རེད།

ཨ་རིའི་གྲོས་ཚོགས་ནས་ཚད་མཐོའི་རྒྱབ་སྐྱོར་ཐོག་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་ཁ་ཉིན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་ཡུལ་དེའི་ཁྲིམས་སུ་བཅས་འདུགཟླ་བ་འདིའི་ཚེས་ ༢༡ ཉིན་ཨ་རིའི་གྲོས་ཚོགས་གོང་འོག་གཉིས་ནས་ཚད་མཐོའི་རྒྱབ་སྐྱོར་ཐོག་ Tibet Policy and Support Act 2020 ཞེས་ལོ་རྒྱུས་ཀྱི་རང་བཞིན་ལྡན་པའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་བར་བོད་མིའི་སྒྲིག་འཛུགས་ཀྱིས་གཙོས་ས་གནས་བོད་མི་དང་བོད་དོན་རྒྱབ་སྐོར་བ་ཡོངས་ཀྱིས་དགའ་བསུ་ཞུས་ཏེ་སླད་མར་ཁྲིམས་འཆར་དེ་ཨ་རིའི་ཁྲིམས་སུ་བཅས་པར་སྲིད་འཛིན་ཌམ་མཆོག་གི་མཚན་རྟགས་གནང་སྐྱོང་ཡོང་བའི་འབོད་སྐུལ་ཞུ་མུས་ཁྲོད་ཁ་ཉིན་རེས་གཟའ་ཉི་མའི་ཉིན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་ཨ་རིའི་གཞུང་གི་སྔོན་རྩིས་ཁྲིམས་གཞིར་མཚན་རྟགས་བསྐྱོན་ཏེ་ ༢༠༢༠ ལོའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་བཞིན་ཨ་རིའི་གཞུང་གི་ཁྲིམས་སུ་གཏན་འབེབས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་བཞེངས་ཕྱོགས་བརྟན་པོ་དང་བོད་མིའི་སྒྲིག་འཛུགས་ལ་ངོས་འཛིན་གྱི་རྣམ་པ་ཆེས་མངོན་གསལ་གནང་ཡོད།བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་དང་འབྲེལ་དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སྐུ་སྒེར་གྱི་ངོ་དེབ་ཐོག་དེ་འབྲེལ་ཁྲིམས་འཆར་གཏན་འབེབས་གནང་ཐུབ་པ་དེ་ནི་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་གཞིས་བྱེས་བོད་མི་ཡོངས་ཀྱིས་ཐུན་མོང་ཐོག་སྐུ་ལས་སྐྱོན་པའི་གྲུབ་འབྲས་ཤིག་ཡིན་པར་བརྟེན་ཐུགས་རྗེ་ཆེ་ཞེས་དགྱེས་ཚོར་བྱུང་སྐོར་གསུངས་འདུག བོད་མིའི་སྒྲིག་འཛུགས་ཀྱིས་དྲ་གནས་ཐོག་སྲིད་སྐྱོང་མཆོག་གིས་བོད་མིའི་སྒྲིག་འཛུགས་དང་བོད་མི་ས་ཡ་དྲུག་གི་ཚབ་ཞུས་ཏེ་ཨ་རིའི་སྲིད་འཛིན་མཆོག་ལ་ཁྲིམས་འཆར་དེར་མཚན་རྟགས་བསྐྱོན་པ་དང་ཨ་རིའི་གྲོས་ཚོགས་ནས་དེར་སྤྱི་མོས་ཐོག་གཏན་འབེབས་གནང་བ། དེ་བཞིན་ཡུལ་དེའི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་ཁག་ཅིག་ནས་རྐང་འགན་བཞེས་ཏེ་ཁྲིམས་འཆར་ངོ་སྤྲོད་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་མ་ཟད། ཁྲིམས་འཆར་དེ་ནི་གཞིས་བྱེས་བོད་མི་དང་བོད་དོན་རྒྱབ་སྐྱོར་བ་རྣམས་ལ་མཚོན་ན་ལོ་རྒྱུས་ཀྱི་རང་བཞིན་ལྡན་པ་ཞིག་དང་དེས་བོད་ནང་གི་བོད་མིར་རེ་བ་གསར་པ་ཞིག་དང་བོད་མིའི་ཆོས་དད་རང་དབང་དང་འགྲོ་བ་མིའི་ཐོབ་ཐང་། བོད་མིའི་མང་གཙོའི་སྒྲིག་འཛུགས་ལ་སྔར་ལྷག་རྒྱབ་སྐྱོར་དང་སྲུང་སྐྱོབ་གནང་བ་ཞིག་མཚོན་སྐོར་གསུངས་འདུགརྩ་བའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་དེ་སྔ་ཕྱི་ལོ་ ༢༠༠༢ ལོར་ཨ་རི་གཞུང་གིས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་བསྐྱར་བཅོས་གནང་བའི་ཁྲིམས་འཆར་ཞིག་ཆགས་ཀྱི་ཡོད་པ་དང་། ཁྲིམས་འཆར་དེའི་འོག་ཨ་རི་གཞུང་གི་བོད་དོན་དམིགས་བསལ་སྐུ་ཚབ་བསྐོ་བཞག་གནང་རྒྱུ་དང་བོད་རྒྱ་ཞི་མོལ་ལ་རྒྱབ་སྐྱོར་གནང་རྒྱུ། དེ་བཞིན་བོད་ནང་ཨ་རིའི་གཞུང་ཚབ་ལས་ཁུངས་གསར་འཛུགས་སོགས་ཀྱི་དེ་སྔའི་འབྲུ་དོན་ཐོག གལ་ཆེའི་གནད་དོན་ཁག་ཅིག་ཁ་སྣོན་གནང་བའི་ཁོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་དང་། གལ་ཏེ་རྒྱ་ནག་གཞུང་གི་ལས་བྱེད་མི་སྣས་བོད་མིའི་བླ་སྤྲུལ་ངོས་འཛིན་ཐད་ཐེ་བྱུས་བྱས་ཚེ་ཨ་རིའི་གཞུང་གིས་ཆབ་སྲིད་ཀྱི་ཉེས་ཆད་ལྕི་མོ་གཅོད་རྒྱུ་ཡིན་པར་མ་ཟད། ༸གོང་ས་མཆོག་གི་མང་གཙོ་གོང་འཕེལ་ཐད་ཀྱི་མཛད་རྗེས་ལ་ངོས་འཛིན་དང་ཆེ་བསྟོད། དེ་བཞིན་བོད་མིའི་སྒྲིག་འཛུགས་འདི་བཞིན་བཙན་བྱོལ་བོད་མིའི་སྐུ་ཚབ་དང་མངོན་འདོད་མཚོན་ཐུབ་མཁན་གྱི་སྒྲིག་འཛུགས་ཤིག་ཡིན་པ་དང་། བོད་མིའི་སྒྲིག་འཛུགས་ཀྱི་འགོ་ཁྲིད་ངོས་འཛིན། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་མ་བཙུག་བར་དུ་ཨ་རིར་རྒྱ་ནག་གཞུང་ཚབ་ལས་ཁུངས་གསར་འཛུགས་མི་ཆོག་པ། བོད་ནང་ཚོང་འབྲེལ་བྱེད་མཁན་རྣམས་ནས་རྒྱལ་ཚོགས་ཀྱི་ཁྲིམས་སྒྲིག་ལྟར་ཚོང་འབྲེལ་བྱེད་དགོས་པ། བོད་མཐོ་སྒང་གྱི་ཁོར་ཡུག་སྲུང་སྐྱོབ་བྱེད་དགོས་པ། བོད་ཕྱི་ནང་གཉིས་ཀྱི་བོད་མིར་རང་གི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་གནང་ཕྱིར་ཕྱི་ལོ་ ༢༠༢༥ བར་རོགས་དངུལ་སྔར་བཞིན་གནང་སྐྱོང་ཡོང་བ་སོགས་ཀྱི་འབྲུ་དོན་ཁག་ཆེད་བཀོད་གནང་ཡོད་པ་རེད།སྤྱིར་བོད་དོན་རྒྱབ་སྐྱོར་གྱི་ཁྲིམས་ཡིག་དེ་གཏན་ལ་ཕབ་རྒྱུར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཨ་རིའི་རྒྱལ་ས་ཝ་ཤིན་ཌོན་དུ་ཐེངས་ཁ་ཤས་ཆེད་ཕེབས་གནང་ཡོད་པར་མ་ཟད་བྱང་ཨ་རིའི་ཁུལ་གྱི་བོད་མི་དང་བོད་དོན་རྒྱབ་སྐྱོར་བ་རྣམས་ནས་རྒྱལ་སྤྱིའི་བོད་དོན་ལས་འགུལ་ཁང་བརྒྱུད་ཨ་རིའི་གྲོས་ཚོགས་འཐུས་མི་རྣམས་ལ་ཞུ་སྙན་དང་དངོས་སུ་མཇལ་འཕྲད་ཀྱིས་ཞུ་གཏུག་གི་ལས་འགུལ་རིམ་པ་སྤེལ་ཡོད་པ་རེད།

དེ་རིང་ཞོགས་པ་ཕྱག་ཚོད་དགུ་པ་ཡོལ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ཐོག་བརྒྱུད་བྱང་ཨ་རིའི་ས་གནས་བོད་རིགས་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་ཆོས་འབྲེལ་དང་འབྲེལ་ནས་ཆོས་ཞུ་བས་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་བཀའ་དྲིན་ཆེ་བར་བསྩལ་གནང་མཛད་སོང་། སྐབས་དེར་མགོན་པོ་༸གང་ཉིད་མཆོག་གིས་བོད་ནང་གི་བོད་མི་རྒན་གཞོན་བར་གསུམ་གྱིས་མགོན་པོ་༸གང་ཉིད་མཆོག་ལ་༸རྒྱལ་བ་བསྟན་འཛིན་རྒྱ་མཚོ་ཞེས་ཡིད་ཆེས་གནང་བཞིན་ཡོད་སྟབས། མགོན་པོ་མཆོག་༸སྐུ་འཚོ་བཞུགས་མཛད་པ་ཙམ་གྱིས་བོད་རྒྱ་ཆེ་མི་མང་གི་བློ་འཇོག་ས་དང་རེ་བ་བསྐྱོན་ས་ཞིག་ག་དུས་ཡིན་ཡང་ཆགས་ཀྱི་ཡོད་པ་བཀའ་སྩལ་བ་དང་འབྲེལ། བོད་མི་གཞོན་སྐྱེས་ཚོས་བོད་ཀྱི་སྐད་ཡིག་གཙོས་སེམས་ཁམས་རིག་པ་དང་ལྟ་གྲུབ་ལ་དོ་སྣང་བྱེད་ཐུབ་ཚེ་བོད་མི་རིགས་དེ་མགོ་བོ་དགྱེ་དགྱེ་བྱ་ཐུབ་པ་ཞིག་ཡོང་ངེས་ཡིན་པ་བཀའ་བསྩལ་སོང་། མགོན་པོ་༸གང་ཉིད་མཆོག་གིས་བསྩལ་བའི་དེ་རིང་གི་ཆོས་འབྲེལ་དའི་ཐོག་ལས་ཀྱི་སྣེ་མོ་འདྲ་མིན་གྱི་ཐོག་ལ་སློབ་གཉེར་གནང་བཞིན་པ་དང་ཕྱག་ལས་གནང་བཞིན་པའི་བོད་རིགས་གཞོན་སྐྱེས་མང་དག་ཅིག་གིས་མཉམ་ཞུགས་གནང་འདུག་པ་དང་། ལྷག་པར་དུ་མགོན་པོ་མཆོག་ལ་བཀའ་འདྲི་དགོངས་སྐོར་ཞུ་མཁན་གྱི་ཁོངས་སུ་སྨན་པའི་སློབ་གཉེར་གནང་བཞིན་པ་དང་ཁྲིམས་ཀྱི་ཐོག་ཕྱག་ལས་གནང་མཁན། ནང་ཆོས་སློབ་གཉེར་དང་ཉམས་ཞིབ་པ། དེ་བཞིན་འཆར་འགོད་འགན་འཛིན་གྱི་ཕྱག་ལས་གནང་བཞིན་པ་བཅས་ཀྱི་བོད་རིགས་གཞོན་སྐྱེས་ཁག་ཅིག་ནས་དོགས་འདྲི་རིམ་པར་ཕུལ་བའི་ཁྲོད་ཨ་རི་ Minnesota ཁུལ་དུ་ཕྱི་མི་གཞིས་སྤོར་གྱི་ཁྲིམས་རྩོད་པ་ངག་དབང་སྒྲོལ་དཀར་ལགས་ཀྱིས་བོད་ཕྲུག་སྤྱི་དང་ལྷག་པར་གཞིས་བཞུགས་བོད་ཕྲུག་ཚོར་བོད་ཀྱི་རིག་གཞུང་མི་ཉམས་རྒྱུན་འཛིན་གནང་ཕྱོགས་ཀྱི་ཐད་ལ་བཀའ་སློབ་ལམ་སྟོན་ཞིག་སྩལ་གནང་ཡོད་བའི་གསོལ་འདེབས་ཞུས་དོན་ལྟར། ༸གོང་ས་སྐྱབས་མགོན་ཆེན་པོ་མཆོག་གིས་བོད་ནང་གི་བོད་མི་རྒན་གཞོན་བར་གསུམ་གྱིས་མགོན་པོ་༸གང་ཉིད་མཆོག་ལ་༸རྒྱལ་བ་སྟན་འཛིན་རྒྱ་མཚོ་ཞེས་ཡིད་ཆེས་གནང་བཞིན་ཡོད་སྟབས། མགོན་པོ་མཆོག་༸སྐུ་འཚོ་བཞུགས་མཛད་པ་ཙམ་གྱིས་བོད་རྒྱ་ཆེ་མི་མང་གི་བློ་འཇོག་ས་དང་རེ་བ་བསྐྱོན་ས་ཞིག་ག་དུས་ཡིན་ཡང་ཆགས་ཀྱི་ཡོད་པ་ཞིག་ཡིན་པ་བཀའ་གནང་བ་དང་འབྲེལ། མགོན་པོ་༸གང་ཉིད་མཆོག་དགུང་གྲངས་བརྒྱད་བཅུ་གྱ་གྲངས་ལ་ཕེབས་ཀྱང་དགུང་གྲངས་བརྒྱ་ལྷག་༸སྐུ་འཚོ་བཞུགས་གནང་རྒྱུའི་ཐུགས་སྨོན་གནང་བཞིན་ཡོད་པ་བཀའ་སྩལ་སོང་། ད་དུང་མགོན་པོ་༸གང་ཉིད་མཆོག་གིས་བོད་ནང་གི་རྒྱ་ཆེ་མང་ཚོགས་རྣམས་ཀྱི་སྙིང་སྟོབས་དང་སེམས་ཤུགས་ཧ་ལས་པ་ཞིག་ཡོད་པ་མ་ཟད། བོད་ཀྱི་རིག་གཞུང་ནི་འཛམ་བུ་གླིང་སྤྱིའི་གཅེས་ནོར་ལྟ་བུ་ཡིན་སྟབས། བོད་མི་རིགས་ཀྱི་སྐད་ཡིག་དང་ལྷག་པར་དུ་སྐད་ཡིག་དེའི་ནང་གི་ཆོས་དང་རིག་གཞུང་གཏིང་ཟབ་ཅིག་ཡོད་པ་དེ་བླ་སྲོག་ལྟ་བུ་ཞིག་ཡིན་པ་དང་། བོད་རིགས་གཞོན་སྐྱེས་ཚོས་བོད་ཀྱི་སྐད་ཡིག་ལ་དོ་སྣང་གནང་རྒྱུ་གཙོས་ཆོས་ལ་དད་པ་ཡོད་རུང་་མེད་རུང། ནང་པ་ཡིན་རུང་མིན་རུང་སེམས་ཁམས་རིག་པ་དང་ལྟ་གྲུབ་ཀྱི་སྐོར་ལ་དོ་སྣང་བྱེད་ཐུབ་ཚེ་བོད་མི་རིགས་དེ་མགོ་བོ་དགྱེ་དགྱེ་བྱ་ཐུབ་པ་ཞིག་ཡོང་ངེས་ཡིན་པ་བཀའ་སློབ་བཀའ་དྲིན་ཆེ་བར་སྩལ་གནང་མཛད་སོང་། ད་དུང་༸གོང་ས་སྐྱབས་མགོན་ཆེན་པོ་མཆོག་གིས་ཨ་རི་ San Francisco ཁུལ་དུ་སྨན་པའི་སློབ་གཉེར་གནང་བཞིན་པ་བསོད་ནམས་མཚོས་དོགས་འདྲི་དང་འབྲེལ་ནས། བོད་རིགས་བཙན་བྱོལ་བ་རྣམས་སྡོད་ས་མིའི་ལུང་པ་ཞིག་ཏུ་སྡོད་ཀྱི་ཡོད་རུང་བོད་ཀྱི་ཆོས་དང་རིག་གཞུང་གཏིང་ཟབ་ཡོད་པ་དེ་བདག་པོ་རྒྱབ་ནས་སྡོད་བཞིན་ཡོད་སྟབས། བོད་རིགས་གཞོན་སྐྱེས་རྣམས་ས་གནས་གང་དུ་ཡོད་ཀྱང་བོད་མི་རིགས་ཀྱི་སྐད་ཡིག་གཞི་ལ་བཞག་པའི་ལྟ་གྲུབ་དང་ཚད་མ་རིག་པའི་གཞུང་ལ་སློབ་གཉེར་གནང་བའི་སྒོ་ནས་བདག་པོ་རྒྱག་དགོས་པ་བཀའ་གནང་བ་དང་འབྲེལ། བོད་མི་རིགས་ཀྱི་རིག་གཞུང་བདག་གཅེས་གནང་བ་དེས་རང་ཉིད་ལ་ཕན་ཐོགས་ཡོང་རྒྱུ་ཙམ་མ་ཟད། སྤྱི་ཚོགས་ལ་ཕན་ཐོགས་ཡོང་རྒྱུ་ཞིག་ཡིན་པ་དང་། ང་ཚོས་མི་རབས་ནས་མི་རབས་ལ་འཛིན་ཐུབ་རྒྱུའི་བསམ་བློ་གཏོང་དགོས་ཞེས་བཀའ་སློབ་བཀའ་དྲིན་ཆེ་བར་སྩལ་གནང་མཛད་སོང་། ༸གོང་ས་སྐྱབས་མགོན་ཆེན་པོ་མཆོག་གིས་དེ་རིང་གི་ཆོས་འབྲེལ་དེའི་ཐོག་ཨ་རིར་ཡོད་པའི་བོད་མི་ཚོའི་སྡོད་གནས་དེ་ཡེ་ཤུ་དང་ཇེའུ་སོགས་ཀྱི་ལུང་པ་ཞིག་ཆགས་ཀྱི་ཡོད་རུང་། ག་ཚོད་ཐུབ་ཐུབ་ཀྱིས་བོད་མི་རིགས་ཀྱི་སྐད་དང་རིག་གཞུང་གཏིང་ཟབ་ཡོད་པ་དེ་ལ་དོ་སྣང་གནང་བའི་སྒོ་ནས་བོད་མི་རིགས་ཀྱི་ཐུན་མོང་གི་ཁྱད་ཆོས་ཏེ། ཡ་རབས་བཟང་སྤྱོད་དང་དྲང་པོ་དྲང་བཞག་གནང་རྒྱུའི་སྤྱོད་པ་དེ་གཞན་ལ་མིག་དཔེ་སྟོན་ཐུབ་པ་བྱ་དགོས་པ་བཀའ་སྩལ་སོང་། གཞི་རྩའི་དེ་རིང་གི་བཀའ་ཆོས་དེ་བཞིན་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་གཞུང་འབྲེལ་བརྒྱུད་ལམ་ཁག་ནས་བོད་སྐད་དང་། དབྱིན་སྐད། རྒྱ་སྐད་སོགས་སྐད་རིགས་སྣ་མང་ཐོག་གསུང་བསྒྱུར་གྱིས་ཐད་གཏོང་ཞུས་ཡོད་པ་རེད།

དེ་རིང་རྒྱ་གར་གྱི་ Hindustan Times ཞེས་པའི་གྲགས་ཅན་གསར་ཤོག་གི་རྩོམ་སྒྲིག་པའི་གླེང་བརྗོད་ཐོག་ཉེ་ལམ་ཨ་རིའི་གྲོས་ཚོགས་ཀྱིས་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་བ་དང་བསྟུན། ༸རྒྱལ་བའི་༸སྐུའི་ཡང་སྲིད་དང་འབྲེལ་བའི་འཐབ་རྩོད་ཅེས་པའི་དམིགས་བསལ་དཔྱད་གཏམ་ཞིག་སྤེལ་བ་དང་འབྲེལ་ནས་རྒྱ་གར་གཞུང་གིས་ཨ་རི་ནང་བཞིན་བཞེངས་ཕྱོགས་བརྟན་པོ་ཞིག་འཛིན་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པའི་ཐད་བཞེངས་ཕྱོགས་གསལ་པོ་བཟོ་དགོས་གལ་ཡིན་སྐོར་གསུངས་འདུགགསར་ཤོག་གི་རྩོམ་སྒྲིག་པའི་གླེང་བརྗོད་ནང་སྤྱིར་ཨ་རིའི་གྲོས་ཚོགས་ཀྱི་ཁྲིམས་འཆར་དེ་ནི་ཊམ་སྲིད་གཞུང་གིས་རྒྱ་ནག་ཐོག་འཛིན་པའི་མཁྲེགས་བཟུང་གི་སྲིད་བྱུས་ཤིག་མཚོན་གྱི་ཡོད་ཀྱང་། ཐུགས་སྣང་གནང་དགོས་པ་ཞིག་ལ་ཁྲིམས་འཆར་དེ་བརྒྱུད་ནས་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན་ཐད་རྒྱལ་སྤྱིའི་ཁྲོད་འཐབ་རྩོད་ཀྱི་རྣམ་པ་ཞིག་མངོན་བཞིན་པ་གསལ་པོ་རེད་ཅེས་གསུངས་འདུག ཐེངས་འདིའི་ཁྲིམས་འཆར་འོག་མ་འོངས་པར་རྒྱ་ནག་གཞུང་གིས་དཔལ་འབྱོར་དང་ཆབ་སྲིད་ཀྱི་ཤུགས་རྐྱེན་བརྒྱུད་རྒྱལ་སྤྱིའི་ཚོགས་སྡེ་ཁག་ལ་རྒྱ་གཞུང་རང་ཉིད་ཀྱིས་བསྐོ་གཞག་བྱས་པའི་༸སྐུའི་ཡང་སྲིད་དེ་ལ་ངོས་འཛིན་བྱེད་དགོས་པའི་གནོན་ཤུགས་རིགས་སྤྲད་ཚེ་ཨ་རིའི་ངོས་ནས་དེར་ངོས་ལེན་གནང་རྒྱུ་མིན་པའི་བཞེངས་ཕྱོགས་གསལ་པོ་གནང་ཟིན་ཀྱང་། རྒྱལ་ཁབ་གཞན་རྣམས་ཀྱིས་ཀྱང་བཞེངས་ཕྱོགས་དེ་འདྲ་ཞིག་གནང་དཀའ་བ་དང་། དེའང་དེ་སྔ་སོག་ཡུལ་ནས་༸གོང་ས་མཆོག་ཡུལ་དེར་གདན་ཞུ་ཕུལ་སྐབས་རྒྱ་ནག་གིས་རྒྱལ་ཁབ་དེའི་ཐོག་གནོན་ཤུགས་དང་དཀའ་ངལ་ཇི་སྤྲད་ལས་གསལ་པོ་ཤེས་ཐུབ་ཀྱི་རེད་ཅེས་གསུང་འདུག དེ་འབྲེལ་རྒྱ་གར་གཞུང་ནས་རྒྱ་གར་ནང་དུ་བཙན་བྱོལ་བོད་མིའི་སྒྲིགས་འཛུགས་ཆེད་འཛུགས་གནང་རྒྱུའི་ཆོག་མཆན་གནང་བ་མ་ཟད་༸གོང་ས་མཆོག་གིས་དབུས་པའི་བོད་མི་སྐྱབས་བཅོལ་བ་འབོར་ཆེན་ཞིག་གནས་སྡོད་ཀྱི་ཆོག་མཆན་གནང་ཡོད་པ་བཅས་ཀྱི་གནད་དོན་ཁོ་ནར་བློ་ཚིམས་ཏེ་མ་བཞུགས་པར་བོད་ཀྱི་གནད་དོན་ཐོག་བཞེངས་ཕྱོགས་གསལ་པོ་ཞིག་བཟོ་རྒྱུའི་དུས་ལ་བབ་ཡོད་པ་ནན་བརྗོད་གནང་འདུག རྒྱ་གར་གཞུང་གི་ངོས་ནས་༸སྐུའི་ཡང་སྲིད་དང་འབྲེལ་བའི་དེང་རབས་ཀྱི་འཐབ་རྩོད་དེར་གདོང་ལེན་གྱི་གྲ་སྒྲིག་ངེས་པར་དུ་གནང་དགོས་པ་དང་། ལྷག་དོན་རྒྱ་གར་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་དེ་ཡོང་གྲགས་གནང་དགོས་པ་མ་ཟད། ཉིན་རེ་བཞིན་གྲངས་འབོར་ཉུང་དུ་འགྲོ་བཞིན་པའི་རྒྱ་གར་ནང་གི་བཙན་བྱོལ་བོད་མིའི་ཐོག་འཛིན་པའི་ད་ལྟའི་སྲིད་བྱུས་ལ་བསྐྱར་ཞིབ་གནང་དགོས་པ། དེ་བཞིན་རྒྱ་ནག་ནས་ངོས་འཛིན་བྱ་སྲིད་པའི་༸རྒྱལ་བའི་ཡང་སྲིད་རྫུན་མར་གདོང་ལེན་གནང་ཕྱིར་ད་ལྟ་ནས་རྒྱལ་སྤྱིའི་གཞུང་འདྲ་མིན་དང་ལྷན་དུ་མཉམ་ལས་གནང་དགོས་ཞེས་འགྲེལ་བརྗོད་གནང་འདུག