རྒྱ་ནག

ཨ་རིའི་སྲིད་འཛིན་བྷེ་ཊན་གྱི་གཞུང་འཛིན་གསར་བའི་ཕྱི་སྲིད་དྲུང་ཆེ་མཆོག་གིས་ཨ་རིའི་ངོས་ནས་བོད་དོན་ལ་ཤུགས་སྣོན་སྐྱོན་རྒྱུ་ཡིན་པའི་ཁས་ལེན་གནང་འདུག

ཕྱི་ལོ་ ༢༠༢༢ ལོའི་པེ་ཅིང་གི་དགུན་དུས་ཨོ་ལམ་སྤིག་རྩེད་འགྲན་འཚོགས་པར་ལོ་གཅིག་ཏག་ཏག་ལྷག་ཡོད་པའི་དུས་སྐབས་དང་བསྟུན། དེ་རིང་བོད་མི་དང་ནང་སོག ཡུ་གུར། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་ཚོགས་པ་འདྲ་མིན་ ༡༨༠ ངོས་ནས་རྒྱལ་སྤྱིའི་སྤྱི་ཚོགས་ལ་སང་ལོའི་དགུན་དུས་འགྲན་ཚོགས་དེར་ཞུགས་རྒྱུ་མེད་པའི་ཞུ་འབོད་གནང་བཞིན་པའི་ཁྲོད།་དེ་རིང་སྔ་དྲོ་ཕྱག་ཚོད་བཅུ་བའི་ཐོག  བཞུགས་སྒར་ཁུལ་དུ་རྟེན་གཞི་བྱས་པའི་བོད་ཀྱི་གཞོན་ནུ་ལྷན་ཚོགས་དང་བུད་མེད། བོད་རང་བཙན་སློབ་ཕྲུག་ཚོགས་པ། དེ་བཞིན་བོད་རྒྱལ་ཡོངས་མང་གཙོ་ཚོགས་པ་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པ་སོགས་ཀྱི་གཞུང་འབྲེལ་མིན་པའི་ཚོགས་པ་ལྔའི་གོ་སྒྲིག་གི་འོག  རྒྱ་ནག་གི་ནང་གི་སང་ལོའི་དགུན་དུས་ཨོ་རྩལ་འགྲན་ཚོགས་ལ་རྒྱལ་སྤྱིའི་སྤྱི་ཚོགས་ཀྱིས་འཛུལ་ཞུགས་མི་བྱེད་རྒྱུའི་རེ་ཞུ་རང་བཞིན་གྱི་གསར་འགོད་བསྒྲགས་གཏམ་ཞིག་སྤེལ་བ་མ་ཟད། མེག་གྷན་བཞི་མདོ་རུ་ཨོ་རྩལ་འགྲན་ཚོགས་ཀྱི་ལས་རྟགས་ཀྱི་སྟེང་དུ་མི་རོ་བཀལ་ནས་ཡོད་པའི་འདྲ་གཟུགས་བཤམ་སྟོན་གྱིས་ངོ་རྒོལ་གྱི་ལས་འགུལ་ཞིག་སྤེལ་སོང་།   དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཁང་ནང་དུ་ཚོགས་པའི་གསར་འགོད་ལྷན་ཚོགས་དེའི་སྐབས། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ཀྱིས།  ད་ལྟའི་རྒྱ་ནག་དམར་ཤོག་གི་སྲིད་གཞུང་གི་གདུག་རྩུབ་འོག་ཏུ། བོད་དང་ཡུ་གུར་མི་རིགས། དེ་བཞིན་ལྷོ་ནང་སོག་སོགས་ཀྱི་གྲངས་ཉུང་མི་རིགས་རྣམས་ཀྱི་གཙོ་བྱས་པའི་ཐེ་ཝན་དང་ཧོང་ཀོང་སོགས་ཡོངས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་ཐེབས་ཀྱི་ཡོད་སྟབས།  དེ་རིང་གི་གསར་འགོད་བསྒྲགས་གཏམ་གྱི་ལས་འགུལ་དེ་བརྒྱུད་ནས་རྒྱ་ནག་དང་ཨོ་རྩལ་མཐུན་ཚོགས་གཉིས་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་པར་མ་ཟད། རྒྱལ་སྤྱིའི་སྤྱི་ཚོགས་ཀྱི་ཚོགས་སྡེ་ཡོངས་དང་། སྒོས་སུ་རྒྱ་ནག་གི་ཨོ་རྩལ་འགྲན་ཚོགས་དེར་འཛུལ་ཞུགས་བྱེད་མཁན་གྱི་རྩེད་འགྲན་པ་ཡོངས་ལ་རེ་ཞུ་བྱས་ཏེ། རྒྱ་ནག་ནང་གི་སང་ལོའི་དགུན་དུས་ཀྱི་ཨོ་རྩལ་འགྲན་ཚོགས་དེར་འཛུལ་ཞུགས་གནང་རྒྱུ་མེད་པའི་རེ་སྐུལ་གནང་སོང་།དེ་བཞིན་སྐབས་དེར་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས་ཀྱིས་དེ་རིང་གི་གསར་འགོད་བསྒྲགས་གཏམ་སྒྲོག་སྦྱང་གནང་པའི་ནང་དུ།  རྒྱལ་སྤྱིའི་ཨོ་རྩལ་མཐུན་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་ལྟོས་མེད་ཀྱིས་ཕྱི་ལོ་ ༢༠༢༢ ལོའི་དགུན་དུས་ཀྱི་ཨོ་རྩལ་འགྲན་ཚོགས་རྒྱ་ནག་ཏུ་འཚོགས་རྒྱུར་ཐག་གཅོད་བྱས་པ་ནི་ཨོ་རྩལ་མཐུན་ཚོགས་ཀྱི་ངོས་ནས་རྒྱ་ནག་དམར་ཤོག་གཞུང་གི་བཙན་འོག་ཏུ་ཡོད་པའི་གྲངས་ཉུང་མི་རིགས་རྣམས་རྩ་གཏོར་དང་མི་མང་སྡེབ་གསོད་ཀྱི་བྱ་སྤྱོད་ལ་བསམ་ཤེས་མ་བྱས་པ་ཞིག་དང་། བཙན་གནོན་གྱི་རྒྱ་ནག་དམར་པོའི་རྒྱལ་ཁབ་སྲིད་གཞུང་དེ་ཁྲིམས་མཐུན་ཡིན་པར་ངོས་འཛིན་བྱས་པའི་གནས་བབ་ཅིག་ཡིིན་སྐོར་གསུངས་སོང་།འདི་གའི་གསར་འགོད་པས་སྐབས་དེར་རྒྱ་ནག་གི་སང་ལོའི་དགུན་དུས་ཀྱི་་ཨོ་རྩལ་འགྲན་ཚོགས་དེར་བོད་མིའི་གཙོ་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་པ་བརྒྱ་དང་བརྒྱད་ཅུ་ལྷག་གིས་མཉམ་རུབ་ཀྱི་ཐོག་ནས་ད་བར་ལས་འགུལ་རབས་དང་རིམ་པ་སྤེལ་བར་གྲུབ་འབྲས་ག་རེ་ཐོན་ཡོད་མེད་ཀྱི་ཐད་ནས་བཀའ་འདྲི་ཞུས་པར་བོད་རང་བཙན་སློབ་ཕྲུག་ཚོགས་པའི་རྒྱལ་སྤྱིའི་འགན་འཛིན།  བོད་མི་མང་སྤྱི་འཐུས་ལས་ཐོག་རྡོ་རྗེ་ཚེ་བརྟན་ལགས་ཀྱིས་ཐོག་མའི་དམིགས་ཡུལ་ལྟར་ན་རྒྱ་ནག་གི་ཨོ་རྩལ་འགྲན་ཚོགས་དེ་རྒྱ་ནག་ནས་ཕྱིར་འཐེན་བྱེད་དགོས་བའི་ཐོག་ནས་ལས་འགུལ་ཤུགས་ཆེར་སྤེལ་བ་ལྟར་རྒྱ་ནག་སྲིད་གཞུང་དང་ཨོ་རྩལ་མཐུན་ཚོགས་གཉིས་ལ་གནོན་ཤུགས་ཆེན་པོ་ཞིག་སྤྲད་པ་མངོན་གསལ་བྱུང་ཡོད་པར་ལུང་འདྲེན་དང་སྦྲགས། ཨོ་རྩལ་མཐུན་ཚོགས་ཀྱི་ཚོགས་གཙོའི་ངོས་ནས་དངོས་སུ་ཨོ་རྩལ་མཐུན་ཚོགས་འདིར་ངོ་རྒོལ་སྤེལ་ན་ཡག་པོ་མེད་ལུགས་ཀྱི་རྩོམ་ཡིག་བྲིས་ཡོད་པ་མ་ཟད། ཨ་རི་དང་དབྱིན་ཡུལ་གྱི་གྲོས་ཚོགས་ནང་དུ་རྒྱ་ནག་ཏུ་བསྡུ་རྒྱུའི་ཨོ་རྩལ་འགྲན་ཚོགས་དེར་ངོ་རྒོལ་བྱེད་དགོས་བའི་གྲོས་འཆར་ཡང་བཏོན་ཡོད་པར་གསུངས་སོང་།གསར་འགོད་ལྷན་ཚོགས་རྗེས་སུ་གཞུང་འབྲེལ་མ་ཡིན་པའི་ཚོགས་པ་རྣམས་ཀྱིས་མེག་གྷན་བཞི་མདོ་རུ་ཨོ་རྩལ་འགྲན་ཚོགས་ཀྱི་ལས་རྟགས་མཚོན་པའི་ཨ་ལོང་རེ་རེའི་ཐོག་བོད་མི་དང་ཡུ་གུར། ནང་སོག ཧོང་ཀོང་། དེ་བཞིན་ཐའེ་ཝན་སོགས་ཀྱི་མི་རོ་རྣམ་པ་བཀལ་བའི་ཁྲོད། ཨོ་ལིམ་སྤིག་རྩེད་འགྲན་ལྷན་ཚོགས་ཀྱི་ཚོགས་གཙོ་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་གྱི་རྒྱ་ནག་གི་སྲིད་འཛིན་གཉིས་ལག་པར་མདར་རྟགས་སྐྱོན་ཏེ། རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་དེ་མི་མང་སྡེབ་གསོད་ཀྱི་འགྲན་ཚོགས་ཡིན་པའི་སྦྱར་ཡིག་འགྲེམས་སྟོན་གྱིས་རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་ལ་ངོ་རྒོལ་གནང་སོང་། གཞི་རྩའི་རྒྱ་ནག་གི་ནང་དུ་སང་ལོའི་དགུན་དུས་སུ་ཨོ་རྩལ་འགྲན་ཚོགས་བསྡུ་རྒྱུའི་ཐག་གཅོད་དེར། བོད་མི་རྣམས་ཀྱི་སྣེ་ཁྲིད་པའི་ཐོག  ཡུ་གུར་ཁ་ཆེ་མི་རིགས་དང་ནང་སོག་མི་རིགས། དེ་བཞིན་ཐེ་ཝན་དང་ཧོང་ཀོང་སོགས་ཀྱི་མཚོན་པའི་རྒྱལ་སྤྱིའི་ཚོགས་སྡེ་༡༨༠ ལྷག་གིས་མཉམ་རུབ་ཀྱིས་ལས་འགུལ་སྤེལ་ཏེ། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་འགྲོ་བཞིན་པའི་དུས་སྐབས་འདིར་རྒྱལ་སྤྱིའི་ཨོ་རྩལ་འགྲན་ཚོགས་ཀྱིས་རྒྱ་ནག་ཏུ་འགྲན་ཚོགས་དེ་བསྡུ་རྒྱུའི་ཐོབ་ཐང་སྤྲོད་ཐབས་མེད་པའི་ལས་འགུལ་སྣ་མང་སྤེལ་ཡོད་ནའང་། ད་ལྟའི་བར་དུ་ཨོ་རྩལ་འགྲན་ཚོགས་ཀྱིས་རྒྱ་ནག་ནག་གི་སང་ལོའི་ཨོ་རྩལ་དེ་ཕྱིར་བསྡུ་བྱས་མེད་སྟབས།  ད་ཆ་ལས་འགུལ་གྱི་ཁ་ཕྱོགས་ལ་འགྱུར་བ་བཏང་ནས་རྒྱལ་སྤྱིའི་སྲིད་གཞུང་ཁག་དང་། རྩེད་འགྲན་པ་རྣམས་པར་ཞུ་སྐུལ་གྱིས་རྒྱ་ནག་ནང་གི་ལས་འགུལ་དེར་འཛུལ་ཞུགས་མི་བྱེད་པར་ངོ་རྒོལ་བྱེད་དགོས་བའི་ཞུ་སྐུལ་གནང་བཞིན་པ་རེད་འདུག

རྒྱ་གར་ལྷོ་ཕྱོགས་ཀྱི་གྲོང་ཁྱེར་བྷེང་ལོར་ཁུལ་དུ་རྟེན་གཞི་བྱས་པའི་བོད་མི་གཉིས་རྒྱ་གར་གྱི་དྲ་རྒྱ་ཉེས་དོན་དང་འབྲེལ་ནས་ས་གནས་ཉེན་རྟོགས་པས་འཛིན་བཟུང་བྱས་འདུག དེའང་དེ་རིང་རྒྱ་གར་གྱི་དུས་བབ་གསར་ཁང་གིས་གནས་ཚུལ་སྤེལ་བའི་ནང་དུ། བོད་མི་མིང་ལ་སྙིང་ལྕགས་དོན་འགྲུབ་དང་ཡེ་ཤེས་རྒྱ་མཚོ་ཟེར་བ་གཉིས་དང་གཞན་ཡང་རྒྱ་གར་གྱི་ཡུལ་མི་གཉིས་ཀྱིས་རྒྱ་ནག་གི་ཚོང་པ་ཞིག་དང་ལྷན་མཉེན་ཆས་འདྲ་མིན་ ༡༩ བརྒྱུད་མང་ཚོགས་ལ་དྲ་ཐོག་ནས་དངུལ་བུན་གཏོང་བྱེད་རྒྱུའི་ཚོང་ལས་གཉེར་བཞིན་པ་དང་། དངུལ་བུན་དུས་ཆད་ལྟར་ཕྱིར་སྤྲོད་བྱེད་མ་ཐུབ་པ་རྣམས་ལ་དྲ་ཐོག་ནས་ཁ་པར་མང་པོ་བཏང་ནས་སུན་པོ་བཟོས་ཡོད་པའི་གྱོད་དོན་དང་འབྲེལ་ནས་ཉེ་ལམ་རེས་གཟའ་སྤེན་པའི་ཉིན་འཛིན་བཟུང་བྱས་ཡོད་པ་རེད་འདུག ཉེན་རྟོག་པས་འདྲི་གཅོད་བྱས་ནས་ཤེས་རྟོགས་བྱུང་བ་ལྟར་ན། འཛིན་བཟུང་བྱས་པའི་གང་ཟག་དེ་དག་རྒྱ་ནག་ནས་ཡིན་པའི་རྒྱ་རིགས་ Cheen Wu དང་ Andy Lu Wenjie ཟེར་བ་གཉིས་ཀྱིས་གླ་གཡར་བྱས་པ་ཞིག་ཡིན་པ་དང་། ཁོང་རྣམ་པས་རྒྱ་རིགས་དེ་གཉིས་ཀྱིས་ Bangalore གྲོང་ཁྱེར་ནང་དུ་གསར་འཛུགས་བྱས་པའི་དྲ་ཐོག་ཚོང་ལས་ཁང་འདྲ་མིན་གཉིས་ཀྱི་འགན་འཛིན་ལས་ཁུར་ཞུ་བཞིན་ཡོད་པ་རེད་འདུག འཛིན་བཟུང་བྱས་པའི་བོད་མི་གཉིས་ཀྱིས་ཉེན་རྟོག་པར་བརྗོད་པ་ལྟར་ན། ཁོང་ཚོ་དྲ་ཐོག་ནས་ཚོང་ལས་ཐད་ཀྱི་ལས་ཀའི་གོ་སྐབས་ཀྱི་ཁྱབ་བསྒྲགས་ཤིག་མཐོང་ནས་དེར་སྙན་ཞུ་བྱས་པ་ལྟར། རྒྱ་ནག་གི་སྦྱིན་བདག་དེ་གཉིས་ཀྱིས་ཁོང་ཚོར་ཟླ་གླར་ཧིན་སྒོར་འབུམ་གཅིག་རེ་སྤྲད་ནས་གླས་ཡོད་པ་དང་། རྒྱ་རིགས་སྦྱིན་བདག་གཉིས་པོ་ཚོང་ལས་ཁང་གསར་འཛུགས་བྱས་རྗེས་ཕྱིར་རྒྱ་ནག་ཏུ་ལོག་ཡོད་པར་དོགས་པ་བྱེད་བཞིན་པ་ཡོད་པ་རེད་འདུག གཞི་རྩའི་རྒྱ་གར་གྱི་གྲོང་ཁྱེར་ཆེ་ཁག་གི་ནང་དུ། རྒྱ་ནག་གི་བཟོ་ཚོང་ཁང་དང་དེ་བཞིན་རྒྱ་དཀར་ནག་གཉིས་ཀྱི་མཉམ་ལས་ཀྱི་བཟོ་ལས་ཁང་སོགས་སུ་རྒྱ་སྐད་རྒྱ་ཡིག་ཤེས་མཁན་རྣམས་ལ་གླ་ཆ་མཐོ་བའི་ཐོག་ནས་ལས་ཀ་བྱེད་རྒྱུའི་གོ་སྐབས་མང་པོ་ཡོད་པ་ལྟར། ད་སྐབས་རྒྱ་གར་གྱི་རྒྱལ་ས་ལྡི་ལི་དང་བྷང་ལོར་སོགས་ཀྱི་ནང་དུ་རྒྱ་སྐད་རྒྱ་ཡིག་ཤེས་མཁན་བོད་མི་གཞོན་སྐྱེས་མང་པོ་ཞིག་གིས་རྒྱ་ནག་གི་ཚོང་ལས་སོགས་སུ་ལས་ཀ་བྱེད་མཁན་མང་པོ་ཡོད་པ་རེད། འདི་གའི་གསར་འགོད་པས་Bangalore གྲོང་ཁྱེར་དུ་བཅའ་བཞུགས་བོད་མིའི་སྒྲིག་འཛུགས་ཀྱི་ལྷོ་སྤྱི་ཆོས་འཕེལ་ཐུབ་བསྟན་ལགས་སུ་བཀའ་འདྲི་ཞུས་པར་ཁོང་གིས་ད་རེས་བོད་མི་གཉིས་ས་གནས་ཉེན་རྟོགས་པས་འཛིན་བཟུང་བྱས་པའི་གནས་ཚུལ་དེ་དངོས་བདེན་ཡིན་པ་དང་། ད་ལྟའི་འཆར་བོད་མི་གཉིས་པོ་དེ་དག་ཉེན་རྟོགས་པས་འདྲི་རྩད་ཆེད་ Hyderabad གྲོང་ཁྱེར་དུ་ཁྲིད་ཡོད་སྐོར་གསུང་བ་དང་འབྲེལ། ཁོང་གིས་གནད་དོན་དེ་དང་འབྲེལ་ནས་དབུས་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་སུ་སྙན་གསེང་ཞུས་ཡོད་པ་དང་། བཀའ་ཤག་ནས་བོད་མི་གཞོན་སྐྱེས་རྣམས་ཀྱིས་རྒྱ་ནག་གི་ཚོང་ལས་ཁང་དུ་ལས་ཀ་བྱེད་བཞིན་ཡོད་པ་རྣམས་ལ་དམིགས་པའི་ལམ་སྟོན་བཀའ་ཁྱབ་ཅིག་ཕེབས་སྲིད་པ་རེད་ཅེས་གསུངས་སོང་། རྩ་བའི་འདས་ལོར་རྒྱ་དཀར་ནག་གཉིས་ཀྱིས་འཕགས་བོད་ས་མཚམས་སུ་ས་ཆའི་བདག་དབང་རྩོད་ཤུགས་ཆེ་རུ་འགྲོ་བའི་ཁྲོད་རྒྱ་གར་གཞུང་ངོས་ནས་སྔ་རྗེས་བཀོད་ཁྱབ་གསུམ་ཙམ་བཏང་སྟེ་ད་བར་རྒྱ་ནག་གིས་བཟོས་པའི་མཉེན་ཆས་གྲངས ༢༠༠ ལྷག་ཙམ་རྒྱ་གར་ནང་བཀག་སྡོམ་བྱས་པ་མ་ཟད། རྒྱ་གར་གྱི་ཁྲལ་བསྡུ་ལས་ཁུངས་ཀྱིས་རྒྱ་ནག་གི་བཟོ་ལས་ཁང་མང་པོར་དངོས་ཟོག་དང་ཞབས་ཞུའི་ཁྲལ་སྟེར་གྱི་ཡོད་མིན་སོགས་ཀྱི་ཐད་ནས་ཞིབ་འཇུག་བྱེད་མུས་ཡིན་པ་རེད་འདུག

ཟླ་བ་སྔོན་མའི་ཚེས་བཅོ་བརྒྱད་ཀྱི་ཉིན། མཚོ་སྔོན་ཞིང་ཆེན། མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་གི་བོད་མི་ཞིག་དཀྲོགས་གཏམ་སྤེལ་བའི་ཉེས་མིང་གི་འོག་འཛིན་བཟུང་བྱས་འདུགདེ་ཡང་སྐད་འཕྲིན་གྱི་འཕྲིན་སྟེགས། བོད་ལྗོངས་གསར་འཕྲིན་ཞེས་པའི་ཐོག་ཏུ་ཚུལ་ཐོན་པ་ལྟར་ན། མགོ་ལོག་དར་ལག་རྫོང་གི་བོད་མི་མིང་ལ་ཚེ་ག་གེ་མོ་ཟེར་བ་ཞིག་གིས་འདི་ལོའི་ཟླ་བ་ ༡ པོའི་ཚེས་ ༡༥ ཉིན། མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་གི་སྐད་འཕྲིན་ཚོགས་པ་དང་གྲོགས་ཚོམས་ཁ་ཤས་ནང་བརྙན་ཐུང་ལྟར་བཟོས་ཡོད་པའི་བོད་སྐད་ཀྱི་སྐད་ཆ་དུམ་བུ་འགའ་བརྒྱུད་སྐུར་བྱས་ཡོད་པ་དང་། དེའི་ནང་དོན་མདོར་བསྡུས་ན་ཉེ་ཆར་མགོ་ལོག་དར་ལག་རྫོང་དུ་མཚོ་ལྷོ་ནས་ཡིན་པའི་མི་གཉིས་ཀྱིས་ཁྱེར་ཡོང་བའི་སྐམ་ཤར་ནད་དུག་འགོས་ཡོད་པ་མ་ཟད། དེ་ཟས་ནས་མི་འདས་གྲོངས་སུ་ཕྱིན་ཡོད་པའི་དཀྲོགས་གཏམ་སྤེལ་ཡོད་པར་བརྗོད་དེ་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་སྤྱི་བདེ་ལས་ཁུངས་ཀྱི་བདེ་འཇགས་དོ་དམ་གྱི་ཆད་གཅོད་བཅའ་ཁྲིམས་ཀྱི་དོན་ཚན་ཉེར་ལྔར་གཞིགས་ནས་བོད་མི་ཞིག་འཕྲལ་དུ་འཛིན་བཟུང་བྱས་ཡོད་པར་འཁོད་འདུགདེ་བཞིན་འཕྲིན་སྟེགས་དེར་བཀོད་པའི་གནས་ཚུལ་ལྟར་ན། མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་སྤྱི་བདེ་ལས་ཁུངས་དྲ་བའི་བདེ་འཇགས་རུ་ཆེན་གྱིས་འཕྲལ་མར་གོང་རིམ་འགོ་ཁྲིད་ལ་གནས་ཚུལ་སྙན་སེང་ཞུས་པ་དང་འབྲེལ་གོང་རིམ་གྱི་བཀོད་སྒྲིག་ལྟར་ཁུལ་སྤྱི་བདེ་ལས་ཁུངས་ཀྱིས་དྲ་བའི་བདེ་འཇགས་ཀྱི་ཉིང་ལག་རུ་ཁག་དང་འབྲེལ་བ་བྱས་ཏེ་དུས་ཐོག་ཏུ་གནད་དོན་ཚོད་འཛིན་བྱས་པ་དང་ཆབས་ཅིག་ཏུ་དར་ལག་རྫོང་གི་སྤྱི་བདེ་ལས་ཁུངས་ཀྱིས་གནས་ཚུལ་དེ་ནི་དཀྲོག་གཏམ་ཡིན་པའི་གནས་ཚུལ་འཕྲལ་མ་ཉིད་དུ་གཞུང་ཕྱོགས་ཀྱི་འཕྲིན་སྟེགས་ཁག་གི་ནང་དུ་བརྒྱུད་སྐུར་བྱས་ཡོད་པར་བཀོད་འདུག གཞི་རྩའི་རྒྱ་ནག་གིས་སྔར་ལོའི་ཏོག་དབྱིབས་གཉན་རིམས་ལ་ཁ་གཡར་ནས་བོད་ཁུལ་དུ་དམ་དྲག་བྱེད་ཤུགས་ཆེ་རུ་གཏོང་བཞིན་ཡོད་པའི་གནས་ཚུལ་རིམ་པ་ཐོན་པ་ལྟར། ཁ་སང་འདི་གའི་གསར་འགོད་པར་བོད་ནང་གི་བོད་མི་ཞིག་གིས་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གིས་འདི་ལོར་བོད་ནང་དུ་ལོ་གསར་གཏོང་མི་མང་དགྱེས་འཛོམས་སོགས་ཀྱི་མཚོན་པའི་ཞིང་ཆེན་ཁག་ལ་ལོ་གསར་གྲྭ་སྒྲིག་གི་ཚོང་ལས་ཉོ་རུ་འགྲོ་མི་ཆོག་པའི་བཀའ་རྒྱ་བཏང་ཡོད་པ་ལྟར། མཚོ་སྔོན་བྲག་དཀར་རྫོང་ཁོངས་སུ་འདི་ལོའི་ལོ་གསར་ལ་གྲ་སྒྲིག་གང་ཡང་མང་མེད་པར་ལྷག་ཡོད་པ་དང་། གཅིག་བྱས་ན་སྲིད་གཞུང་གི་བཀའ་རྒྱ་དང་། དེ་བཞིན་རིམས་ནད་ཀྱི་རྐྱེན་གྱིས་ས་ཕྱོགས་གང་སར་མི་མང་པོའི་ཚེ་སྲོག་ཤོར་ཡོད་པ་ཡིན་མིན་གང་ཞིག་ལ། མང་ཚོགས་ཀྱི་ཁྲོད་དུ་འདི་ལོའི་བོད་ལུགས་ཀྱི་ལོ་གསར་འ་དབྱིངས་གང་ཡང་བྱེད་ཀྱི་མེད་པར་ཁུ་སིམ་པོར་གནས་ཡོད་པར་འགྲེལ་བརྗོད་གནང་སོང་། དེ་བཞིན་ཉེ་སྔོན་ཀྲུང་གོ་བོད་ཀྱི་དྲ་བའི་འཕྲིན་སྟེགས་ཟེར་བར་གནས་ཚུལ་སྤེལ་བའི་ནང་། འདི་ལོའི་ལོ་གསར་དང་སྟབས་བསྟུན་གྱིས་བོད་རིགས་མང་ཚོགས་གྲོང་ཁྱེར་ཆེ་ཁག་ནས་ཕྱིར་ཕ་ཡུལ་དུ་ལོག་སྐབས་མཚོ་སྔོན་ཞིང་ཆེན་གྱི་ཞིང་སྡེ་དང་འབྲོག་ཁུལ་གྱི་ཏོག་དབྱིབས་གློ་ཚད་རིམས་ནད་སྔོན་འགོག་ཚོད་འཛིན་གྱི་ལས་དོན་ལ་ཕྱོགས་ཡོངས་ནས་ཤུགས་སྣོན་དང་། ཕྱིར་ཕ་ཡུལ་དུ་ལོག་པའི་མི་སྣའི་རིམས་ནད་སྔོན་འགོག་ཚོད་འཛིན་དོ་དམ་བྱེད་ཤུགས་ཆེ་རུ་གཏོང་རྒྱུ་ཡིན་པའི་བརྡ་ཁྱབ་ཅིག་སྤེལ་ཡོད་པའི་ནང་དུ། ཞིང་ཆེན་ཕྱི་ནས་ཕྱིར་ལོག་པའི་མི་སྣ་དང་། ཞིང་ཆེན་ནང་ཁུལ་གྱི་འདྲེན་འཁྱགས་ཉར་ཟས་རིགས་ཀྱི་ལས་གཉེར་མི་སྣ། དེ་བཞིན་འགག་སྒོའི་ཐད་གཏོགས་ནང་འདྲེན་ཚོང་ཟོག་ལས་བཟོ་བ། འགྲིམ་འགྲུལ་སྐྱེལ་འདྲེན་ལས་གཉེར་མི་སྣ་ཚོགས་བོད་ཁུལ་དུ་ཕྱིར་ཕྱིར་ལོག་དུས་བརྟག་དཔྱད་རིམ་པ་བྱེད་དགོས་བ་མ་ཟད། རང་ཁྱིམ་དུ་ཟུར་བཀག་ཉིན་ ༡༤ ལ་བཞུགས་དགོས་བ་དང་དོན་དག་མེད་པར་འཁྱམ་ཉུལ་བྱེད་མི་ཆོག་པའི་བཀའ་རྒྱ་བཏང་འདུག གཞན་ཡང་།་ལོ་གསར་སྐབས་སུ་དགོས་ངེས་མིན་པའི་དགྱེས་འཛོམས་རིགས་མི་ཆོག་པའི་རྩ་དོན་ལྟར།  གཅིག་འདུས་རང་བཞིན་གྱི་བྱ་འགུལ་ཚོད་འཛིན་ནན་མོ་བྱེད་དགོས་པ་དང་། ཆོས་ཚོགས་དང་རིག་རྩལ་འཁྲབ་སྟོན། ཕྱིར་ཚོང་སོགས་ཀྱི་བྱ་འགུལ་ཚོད་འཛིན་བྱས་ཏེ། ཞིང་སྡེ་དང་འབྲོག་ཁུལ་གྱི་ཚོང་རའི་གཞི་ཁྱོན་དང་གྲངས་ཀ་ཉུང་དུ་གཏོང་བ་དང་། མི་སྣའི་འགྲོ་འོང་ཚོད་འཛིན་བྱེད་དགོས་པ། ཆོས་ལུགས་ཀྱི་བྱ་འགུལ་དང་ཚོགས་ར་ཚོད་འཛིན་དོ་དམ་གྱི་བླང་བྱ་རྒྱུན་འཁྱོང་བྱས་ནས།  རིམས་ནད་སྔོན་འགོག་ཚོད་འཛིན་གཏན་འབེབས་ལག་བསྟར་བྱེད་དགོས་པ། དེ་བཞིན་མི་མང་གིས་འདུ་ཚོགས་སོགས་གཅིག་འདུས་ཀྱི་ཅན་གྱི་བྱ་འགུལ་མི་སྤེལ་བར། ཞིང་འབྲོག་མང་ཚོགས་ཀྱིས་ལོ་གསར་སྐབས་ཁྱིམ་མཚེས་བར་འགྲོ་རྒྱུ་ཚད་འཛིན་གྱིས། སྒོ་ཁྱིམ་ཕྱི་རུ་འགྲོ་བ་ཇེ་ཉུང་དུ་བཏང་ནས། གཉེན་སྟོན་དང་འདས་མཆོད་སོགས་སྟབས་བདེ་ཅན་དུ་གཏོང་དགོས་བའི་བཀའ་རྒྱ་བཀྲམས་འདུག

བོད་མིའི་་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་ཁ་སང་བཙོན་གྲོལ་བཏང་བ་དང་འབྲེལ། དེ་རིང་སྔ་དྲོ་ཕྱག་ཚོད་ ༡༡ ཐོག  བཞུགས་སྒར་རྡ་རམ་ས་ལའི་མེག་གྷན་ཁྲོམ་གཞུང་དུ། བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག བཀྲིས་དབང་ཕྱུག་ལགས་ཀྱིས་བོད་ཀྱི་སྐད་ཡིག་ཐོབ་ཐང་སྲུང་སྐྱོབ་བྱས་པར་རྒྱ་ནག་སྲིད་གཞུང་གིས་འཛིན་བཟུང་བཙོན་འཇུག་གིས་ལོ་ལྔ་ཡི་ཁྲིམས་ཐག་བཅད་དེ་སྡུག་སྦྱོང་མནར་གཅོད་ཚད་མེད་བཏང་བའི་སྐོར་ནས་གཏམ་རྒྱུད་ཅིག་འཁྲབ་སྟོན་གནང་སོང་།

རྒྱ་གར་གྱི་དམག་སྤྱི་ཆེན་མོ་ M M Naravane ལགས་ཀྱི་སློབ་སྟོན་གྱི་འོག་དུ། རྒྱ་གར་བྱང་ཕྱོགས་ཀྱི་མཐའ་མཚམས་ཁག་གི་དམག་མི་རྣམས་ཀྱིས་རྒྱ་ནག་ལ་འཐབ་རྒོལ་བྱེད་ཆེད་དུ་བོད་རིག་པར་སློབ་སྦྱོང་བྱེད་རྒྱུར་གྲོས་བསྡུར་གྱི་སྙན་ཞུ་ཕུལ་འདུག

སྤྱི་ལོ་ ༢༠༡༩ ལོའི་ཟླ་བ་༡༡ པའི་ནང་བོད་རང་བཙན་གྱི་སྦྱར་ཡིག་འགྲེམ་སྤེལ་བྱས་པར་བརྟེན་ནས་རྒྱ་ནག་གིས་འཛིན་བཟུང་བྱས་པའི་གྲྭ་བསྟན་འཛིན་ཉི་མ་ལགས་རྒྱ་ནག་གི་གཅར་རྡུང་གི་རྐྱེན་གྱིས་ནད་གཅོང་དུ་གྱུར་ནས་སྔར་ལོའི་ཟླ་བ་ ༡༢ པའི་ཚེས་ ༡ ཉིན་འདས་གྲོངས་སུ་ཕྱིན་ཡོད་འདུག གཞི་རྩའི་གྲྭ་བསྟན་འཛིན་ཉི་མ་ལགས་ནི་རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་དཀར་མཛེས་སེལ་ཤུལ་རྫོང་རྫ་སྨད་དབོན་པོ་ཡུལ་ཚོའི་དབོན་པོ་དགོན་པའི་དགེ་འདུན་པ་ཡིན་པ་དང་། ཁོང་གཙོས་པའི་དགོན་པ་དེའི་དགེ་འདུན་པ་ཁག་ཅིག་གིས་ཕྱི་ལོ་ ༢༠༡༩ ལོའི་ཟླ་བ་ ༡༡ པའི་ནང་བོད་རང་བཙན་དོན་དུ་འཐབ་རྩོད་བྱ་དགོས་ཞེས་དྲིལ་བསྒྲགས་ཡིག་ཆ་བརྒྱ་ཕྲག་མང་པོ་གཏོར་འགྲེམས་བྱས་པའི་དོགས་གཞིའི་འོག་འཛིན་བཟུང་བྱས་པ་མ་ཟད། རྒྱ་ནག་གི་ཁྲིམས་ཁང་ནས་སྐབས་དེར་ཁོང་རྣམས་ལ་ལོ་གཅིག་ནས་ལྔ་བར་གྱི་ཁྲིམས་ཐག་བཅད་ཡོད་པ་རེད། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་སྤེལ་གནས་ཚུལ་ལྟར་ན། རྒྱ་ནག་གཞུང་གིས་སྔར་ལོའི་ཕྱི་ཟླ་ ༥ བའི་ནང་ཆབ་སྲིད་བཙོན་པ་ བསྟན་འཛིན་ཉི་མ་ལགས་ཀློད་གྲོལ་བཏང་ཡོད་ཀྱང་། ཁོང་གིས་རང་ཉིད་འཛིན་བཟུང་བྱས་པའི་གནས་ཚུལ་རྣམས་ཕྱིར་བསྒྲགས་བྱས་པ་དང་རྒྱ་གར་ནང་ཡོད་པའི་བོད་མིར་འབྲེལ་བ་བྱས་པའི་ཉེས་མིང་འོག་སྔར་ལོའི་ཕྱི་ཟླ་ ༨ ཚེས་ ༡༡ ཉིན་སླར་ཡང་འཛིན་བཟུང་བྱས་ཡོད་འདུག ཕྱི་ཟླ་ ༡༠ པའི་ནང་རྒྱ་ནག་གིས་ཁོང་གི་ནང་མིར་འབྲེལ་གཏུག་གིས་བསྟན་འཛིན་ཉི་མ་ལགས་ཀྱི་གཟུགས་གཞི་བདེ་ཐང་མིན་པའི་དཀའ་ངལ་འོག་བཙོན་ཁང་ནས་ལེན་དགོས་པའི་བཀའ་བཏང་ཡོད་པ་ལྟར་ནང་མི་རྣམས་ཀྱིས་ཁོང་སྨན་ཁང་དུ་བསྟེན་གཏུག་རིམ་པ་བྱས་པ་ནའང་། མཐར་སྔར་ལོའི་ཟླ་བ་ ༡༢ པའི་ཚེས་ ༡ ཉིན་འདས་གྲོངས་སུ་ཕྱིན་ཡོད་པ་རེད་འདུགགཞི་རྩའི་འདི་ག་རླུང་འཕྲིན་ཁང་གིས་དེ་སྔོན་གནས་ཚུལ་སྤེལ་བའི་ནང་གྲྭ་བསྟན་འཛིན་ཉི་མ་ལགས་དང་ཁོང་གི་ཕྱག་རོགས་དགེ་འདུན་པ་གསུམ་དང་ཁོང་རྣམ་པའི་དགེ་རྒན་བཅས་ཀྱིས་ ༢༠༡༩ ལོའི་ཕྱི་ཟླ་ ༡༡ པའི་ཚེས་ ༧ ཉིན་གྱི་མཚན་མོ་རྫ་སྨད་དབོན་པོ་ཡུལ་ཚོའི་རྒྱ་གཞུང་གི་ལས་ཁུངས་ཤིག་གི་ར་སྐོར་ནང་དུ་བོད་རང་བཙན་གྱི་ལས་འགུལ་སྤེལ་བའི་རྐྱེན་གྱིས་འཛིན་བཟུང་བྱས་པ་དང་། རྒྱ་གཞུང་གིས་རྗེས་སུ་ཁོང་རྣམ་པའི་དགེ་རྒན་གྲྭ་ ཤེར་རྒྱམ་ལགས་ཀློད་བཀྲོལ་བཏང་ཡོད་ཀྱང་། ཉིན་དེར་གྲྭ་བ་གཞན་ཞིག་གིས་དྲ་ཐོག་ཏུ་འཛིན་བཟུང་བྱས་པའི་དགེ་འདུན་པ་ཚོར་རྒྱབ་སྐྱོར་གྱི་ཡི་གེ་བྲིས་པར་བརྟེན་ནས་འཛིན་བཟུང་བྱས་པའི་གནས་ཚུལ་སྤེལ་བ་ཡོད་པ་བཅས། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྤེལ་བའི་གནས་ཚུལ་དང་འདི་ག་ལས་ཁུངས་ཀྱི་སྤེལ་གནས་ཚུལ་དབར་དགེ་འདུན་པའི་ཁ་གྲངས་དང་འཛིན་བཟུང་གི་ཚེས་གྲངས་སོགས་ཀྱི་ཐད་ཕྲན་བུ་ཁྱད་པར་འདུག གང་ལྟར་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་་གིས་དེ་རིང་སྤེལ་བའི་གནས་ཚུལ་དེའི་ཐོག རྒྱ་ནག་གཞུང་གིས་བསྟན་འཛིན་ཉི་མ་ལགས་བཙོན་འཇུག་ཐེངས་གཉིས་བྱས་པ་མ་ཟད། བཙོན་ཁང་དུ་རྒྱ་གཞུང་གི་ཉེན་རྟོག་པས་ཁོང་ལ་རྡུང་རྡེག་དྲག་པོ་བཏང་པའི་རྐྱེན་གྱིས་ཕྱིས་སུ་ཁོང་གིས་དབུགས་གཏོང་ལེན་དང་སྐད་ཆ་བཤད་མི་ཐུབ་པ་སོགས་འཕྲོད་བསྟེན་གྱི་གནས་སྟངས་ཛ་དྲག་ཏུ་གྱུར་ཡོད་སྟབས། ཕྱི་ལོག་ཏུ་ཡོད་པའི་ཁོང་གི་སྤུན་མཆེད་རྣམས་ཀྱིས་རྒྱ་སྒོར་ཁྲི་བཞི་ལྷག་བསྡུ་རུབ་ཀྱིས་ཁོང་ལ་སྨན་བཅོས་བྱ་ཐབས་བྱས་ཀྱང་དྲག་སྐྱེལ་མ་བྱུང་བར་རྐྱེན་འདས་སུ་ཕྱིན་པར་བཀོད་པ་དང་འབྲེལ། རྒྱ་ནག་གིས་སྐབས་དེའི་སྔ་རྗེས་སུ་འཛིན་བཟུང་ཁྲིམས་ཐག་བཅད་པའི་དགེ་འདུན་པ་གཞན་དྲུག་པོ་འཕྲལ་དུ་ཀློད་གྲོལ་གཏོང་དགོས་བ་དང་ ། རྒྱ་ནག་གི་བཙོན་ཁང་ནང་གི་གནས་བབ་ལ་གང་མགྱོགས་རྟོག་ཞིབ་བྱེད་དགོས་བྱེད་དགོས་བ་སོགས་ཀྱི་དགོས་འདུན་བཏོན་འདུག མ་ཟད་འཛིན་བཟུང་བཙོན་འཇུག་བྱས་པའི་དགེ་འདུན་པ་དེ་དག་གི་ཁྲོད་དུ་རང་ལོ་བཅོ་བརྒྱད་ཀྱི་འོག་ཏུ་ཡིན་པའི་བྱིས་པ་ཞིག་ཀྱང་ཡོད་པར་ལུང་འདྲེན་གྱིས། བྱིས་པ་རང་ལོ་བཅོ་བརྒྱད་ལ་མ་ཟིན་པ་རྣམས་ལ་ཉེས་འཛུགས་ཀྱིས་ཁྲིམས་ཐག་གཅོད་བཞིན་པ་ནི་རྒྱལ་སྤྱིའི་ཁྲིམས་ལུགས་དང་འགལ་ཡོད་པ་ཞིག་ཡིན་སྐོར་གྱི་སྐྱོན་བརྗོད་གནང་འདུག གཞི་རྩའི་གྲྭ་བསྟན་འཛིན་ཉི་མ་ལགས་ཕྱི་ལོ་ ༢༠༡༩ ལོར་འཛིན་བཟུང་བྱས་པའི་སྐབས་ཁོང་དང་ལྷན་དུ། གྲྭ་ཀུན་གསལ་དང་གྲྭ་བསོད་བཀྲ། ཚུལ་ཁྲིམས། དེ་བཞིན་ཁོང་ཚོའི་དགེ་རྒན་ཤེར་རྒྱམ་བཅས་ཁྱོན་དགེ་འདུན་པ་ལྔ་ཡོད་པ་དང་། འདི་ག་རླུང་འཕྲིན་ཁང་ལ་དེ་སྔོན་གནས་ཚུལ་ངོ་སྤྲོད་པས་འགྲེལ་བརྗོད་གནང་དོན་ལྟར་ན། དགེ་འདུན་པ་དེ་དག་གིས་ངོ་རྒོལ་ལས་འགུལ་ཡོང་སྟངས་དེ་ནི་གཙོ་བོ། ཕྱི་ལོ་༢༠༡༩ ལོར་རྒྱ་ནག་གཞུང་གིས་བོད་མདོ་དབུས་ཁམས་གསུམ་ནང་རྒྱ་ནག་གུང་ཁྲན་ཏང་གི་བཀའ་དྲིན་འོག་ཞིང་འབྲོག་མང་ཚོགས་ཀྱི་འཚོ་བ་ཡར་རྒྱས་ཕྱིན་པ་ངོས་ཟིན་དགོས་པའི་དྲིལ་བསྒྲགས་བྱེད་བཞིན་པ་ལྟར་རྫ་དབོན་པོ་ཡུལ་ཚོའི་ནང་དུའང་རྒྱ་གཞུང་གི་གོང་རིམ་ལས་སྣེ་ཚོ་ལྟ་སྐོར་དུ་ཡོང་བ་དང་སྦྲགས། རྒྱ་གཞུང་གིས་གསར་རྒྱག་བྱས་པའི་གྲོང་ཁང་གསར་པའི་ནང་དུ་གནས་སྤོར་བྱས་པའི་འབྲོག་པ་རྣམས་ལ་བཙན་དབང་གིས་༧རྒྱལ་བ་རིན་པོ་ཆེའི་སྐུ་པར་མར་བླངས་ནས་མའོ་ཙེ་ཏུང་དང་ཞི་ཅིན་ཕིང་གི་ཐང་ག་རྣམས་གཤོམ་དུ་བཅུག་པ་དང་། ཡང་རེ་ཟུང་ལ་གུང་ཁྲན་ཏང་བཀའ་དྲིན་ཆེན་པོ་ཡིན་ཚུལ་དང་། ཏང་གིས་རོགས་སྐྱོར་མང་པོ་བྱས་ཚུལ་སོགས་བཙན་ཤེད་ཀྱིས་བཤད་དུ་བཅུག་ནས་དྲྭ་ཐོག་ཏུ་བཀྲམ་ནས་ཡུལ་མི་ཕན་ཚུན་དབར་མི་མཐུན་པ་བཟོས་པ་བཅས་ལ་བརྟེན་ནས་གོང་གསལ་གྱི་ལས་འགུལ་དེ་སྤེལ་བ་ཞིག་ཡིན་སྐོར་ངོ་སྤྲོད་གནང་ཡོད་པ་རེད།

ཁ་སང་ཨ་རིའི་སྲིད་འཛིན་ཇཱོ་བྷ་ཌན་མཆོག་གིས་ཨ་རིའི་གཞུང་འཛིན་གྱི་ཁྲི་སྟོན་མཛད་སྒོ་ཚོགས་མ་ཐག  རྒྱ་ནག་གི་ཕྱི་སྲིད་ལྷན་ཁང་གིས་ཨ་རིའི་སྲིད་འཛིན་ཊྲམ་ཕུའི་གཞུང་འཛིན་སྐབས་ཀྱི་ཆེས་མཐོའི་དཔོན་རིགས་ ༢༨ མིང་འདོན་གྱིས། ཁོང་རྣམས་རྒྱ་ནག་གི་གཙོ་བྱས་པའི་ཧོང་ཀོང་དང་མ་ཀའོ་སོགས་སུ་འགྲོ་སྐྱོད་བྱེད་རྒྱུ་བཀག་སྡོམ་བྱས་འདུགདེ་རིང་སྔ་དྲོ་རྒྱ་ནག་གི་ཕྱི་སྲིད་ལས་ཁུངས་ཀྱིས་འདོན་སྤེལ་གནང་བའི་བསྒྲགས་གཏམ་ཞིག་གི་ནང་དུ། ཐེངས་འདིར་རྒྱ་ནག་གིས་བཀག་སྡོམ་བྱས་པའི་ཨ་རིའི་ཆེས་མཐོ་དཔོན་རིགས་ཀྱི་ཁྲོད་དུ། སྲིད་འཛིན་ཊྲམ་ཕུ་མཆོག་གི་གཞུང་འཛིན་སྐབས་ཀྱི་ཕྱི་སྲིད་དྲུང་ཆེ་Michael R. Pompeo ལགས་དང་། ཨ་རིའི་བདེ་སྲུང་གི་སློབ་སྟོན་པ། Robert C. O'Brien ལགས་དང་སློབ་སྟོན་པ་གཞོན་པ། Matthew Pottinger ལགས། གཞན་ཡང་ཨ་རིའི་ཚོང་ལས་ཀྱི་སློབ་སྟོན་པ།  Peter K. Navarro ལགས་སོགས་ཀྱི་གཙོ་བྱས་པའི་དཔོན་རིགས་ཉེར་བརྒྱད་ལ་མིང་འདོན་བྱས་ཏེ། ཁངོ་རྣམས་རྒྱ་ནག་ནང་དང་ཧོང་ཀོང་སོགས་ལ་འགྲོ་སྐྱོད་བྱེད་རྒྱུ་བཀག་འགོག་བྱས་པ་མ་ཟད། ཁོང་རྣམས་དང་འབྲེལ་བའི་བཟོ་ཚོང་ཁང་རྣམས་ཀྱིས་རྒྱ་ནག་དང་ལྷན་དུ་ཚོང་འབྲེལ་བྱེད་རྒྱུ་ཡང་བཀག་སྡོམ་བྱས་འདུག རྒྱ་ནག་གིས་ཕྱི་སྲིད་ལས་ཁུངས་ཀྱི་བསྒྲགས་གཏམ་དེའི་ནང་དུ་འདས་བའི་ལོ་འགའི་རིང་ལ། ཨ་རིའི་ནང་གི་རང་ལྟ་མཆོག་འཛིན་དང་རྒྱ་ནག་ལ་སྡང་སྡུག་ཆེ་བའི་ཆབ་སྲིད་པ་འགའ་ཤས་ཀྱིས་འཆར་གཞི་ལྡན་པའི་ཐོག་ནས་བྱེད་སྒོ་འདྲ་མིན་བརྩམས་ཏེ་རྒྱ་ནག་གི་ནང་སྲིད་ལ་ཐེ་ཇུས་བྱས་ཡོད་ལུགས་ལུང་འདྲེན་གྱིས། ཁོང་ཚོས་བྱེད་བབ་ཀྱིས་ཨ་རི་དང་རྒྱ་ནག་རྒྱལ་ཁབ་གཉིས་ཀྱི་འབྲེལ་ལམ་ལ་དོ་ཕོག་ཤུགས་ཆེར་བཏང་ཡོད་ལུགས་བསྒྲགས་འདུགགནས་ཚུལ་དེ་དང་འབྲེལ་ནས། ཨ་རིའི་ཚོང་ལས་ཀྱི་སློབ་སྟོན་པ།  Peter K. Navarro ལགས་ཀྱིས་་CNN གསར་ཁང་ལ་རྒྱ་ནག་གི་རིམས་ནད་ཀྱིས་མི་གྲངས་ས་ཡ་མང་པོ་སྡེབ་གསོད་བཏང་ཡོད་པའི་སྐྱོན་བརྗོད་དང་སྦྲགས་རྒྱ་ནག་གིས་ཐེངས་འདིར་ཨ་རིའི་དཔོན་རིགས་ལ་ཉེས་ཆད་བཅད་པ་དེ་ནི་ཁོང་ལ་མཚོན་ན་གཟི་བརྗོད་ཅིག་ཏུ་མཐོང་གི་ཡོད་པར་ངོ་སྤྲོད་གནང་འདུག གཞི་རྩའི་ཨ་རིའི་སྲིད་འཛིན་ཊྲམ་ཕུ་མཆོག་གི་གཞུང་འཛིན་གྱི་སྐབས་སུ། ཨ་རིས་རྒྱ་ནག་དང་འབྲེལ་བའི་ཕྱིར་ཚོང་རིགས་མང་པོ་ཞིག་ལ་ཁྲལ་ཆེན་པོ་བརྒྱབས་ནས་ཚོང་ལས་མང་པོ་ཞིག་བཀག་སྡོམ་བྱས་ཡོད་པ་མ་ཟད། ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་བྱས་པ། དེ་བཞིན་ཧོང་ཀོང་གི་བདེ་འཇགས་ཁྲིམས་འཆར་དང་འབྲེལ་ནས་རྒྱ་ནག་གི་དཔོན་རིགས་ཁག་གི་འགྲོ་འདུག་བཀག་སྡོམ། གཞན་ཡང་རྒྱ་ནག་གིས་ཡུ་གུར་མི་རིགས་སྡེབ་གསོད་གཏོང་གི་ཡོད་པ་སོགས་གཞུང་འབྲེལ་གྱིས་འདོན་སྤེལ་གནང་བ་སོགས་ཕྱོགས་ཡོངས་ནས་རྒྱ་ནག་ལ་རྒོལ་ལན་སྤྲད་ཡོད་སྟབས། ད་ལྟའི་ཆར་ཨ་རྒྱ་གཉིས་ཨ་རྒྱ་གཉིས་ཀྱི་འབྲེལ་ལམ་ཇེ་སྡུག་དང་འགྲན་རྩོད་ཇེ་ཆེར་འགྲོ་བཞིན་ཡོད་པ་རེད།

རྒྱ་གར་གྱི་ IANS ཞེས་པའི་གསར་ཁང་གིས་ C-VOTER བསམ་ཤོག་ཆེད་བསྡུ་ལས་ཁང་བརྒྱུད་ནས་རྒྱ་གར་མང་ཚོགས་དཀྱུས་མའི་ཁྲོད་བསམ་ཤོག་བསྡུ་ལེན་གནང་སྐབས་མང་ཚོགས་བརྒྱ་ཆ་ ༨༠ ཉེ་བས་ལོ་རྒྱུས་ཐོག་ནས་བོད་དེ་བར་བཞུགས་རྒྱལ་ཁབ་ཅིག་ཡིན་པར་བསྐྱར་གསོ་གནང་དགོས་པའི་མངོན་འདོད་གསལ་འདོན་གནང་འདུགདེའང་ IANS ཞེས་པའི་གསར་ཁང་གིས་རྒྱ་གར་མང་ཚོགས་དཀྱུས་མ་ ༣༠༠༠ ཙམ་ལ་ཁྱེད་ཀྱི་ངོས་ནས་བོད་དེ་བར་བཞུགས་རྒྱལ་ཁབ་ཅིག་ཡིན་པར་བསྐྱར་གསོ་གནང་དགོས་གལ་གཟིགས་སམ་ཞེས་དང་། ཡང་ན་རྒྱ་དཀར་ནག་ཕྱོགས་གཉིས་ཀྱི་མཐའ་སྲུང་དམག་མི་དབར་འཐབ་འཛིང་གི་གནད་དོན་སེལ་བར་ཞི་བདེའི་ལྟེ་གནས་ཤིག་ལ་ངོས་འཛིན་གནང་གལ་གང་གཟིགས་སམ་ཞེས་བསམ་ཤོག་བསྡུ་ལེན་གནང་སྐབས་མང་ཚོགས་བརྒྱ་ཆ་ ༨༠ ལ་ཉེ་བ་ཞིག་གིས་འཕགས་བོད་གཉིས་ཀྱི་ས་མཚམས་དང་འབྲེལ་ནས་རྒྱ་དཀར་ནག་ཕྱོགས་གཉིས་ཀྱི་མཐའ་སྲུང་དམག་མི་དབར་འཐབ་འཛིང་གི་གནད་དོན་མང་དག་ཅིག་བྱུང་བ་དེ་དག་སེལ་ཐབས་སུ་རྒྱ་གར་དབུས་གཞུང་གིས་དེ་བྱུང་ཐོག་ནས་བོད་དེ་བར་བཞུགས་རྒྱལ་ཁབ་ཅིག་ཡིན་པར་བསྐྱར་གསོ་གནང་དགོས་པའི་མངོན་འདོད་གསལ་འདོན་གནང་ཡོད་སྐོར་བཀོད་འདུགདེ་བཞིན་མང་ཚོགས་བརྒྱ་ཆ་ ༨༠ ཉེ་བ་ཞིག་གིས་རྒྱ་གར་གི་ངོས་ནས་ཆབ་སྲིད་དང་འབྲེལ་བའི་གནང་སྒོ་གཅིག་གིས་ཀྱང་བོད་ཀྱི་གནད་དོན་ལ་འགྱུར་ལྡོག་དང་ཁྱད་པར་ངེས་ཅན་ཞིག་འགྲོ་བར་ཤུགས་རྐྱེན་ཐེབས་ངེས་ཡིན་པར་ཡིད་ཆེས་ཡོད་ཅེས་གསུང་མཁན་བྱུང་འདུག་པར་མ་ཟད། རྒྱ་གར་མང་ཚོགས་ཁྲོད་རྒྱ་ནག་ལ་ཞེན་ལོག་གི་ཚོར་ཤུགས་ཆེས་ཆེར་ཡོད་པའི་དུས་སྐབས་འདིར་མང་ཚོགས་བརྒྱ་ཆ་ ༦༢ ལྷག་གིས་རྒྱ་གར་དབུས་གཞུང་གིས་རྒྱ་དཀར་ནག་གཉིས་ཀྱི་འབྲེལ་ལམ་ལ་གནོད་མིན་གྱི་ཉེན་ཚབས་ལ་ལྟོས་མེད་ཀྱིས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་གི་གནས་བབས་ཐོག་བཞེངས་ཕྱོགས་གང་ཡིན་གསལ་པོ་བཟོ་དགོས་གལ་ཡིན་པའི་དགོངས་འཆར་གནང་མཁན་བྱུང་འདུག བསམ་ཤོག་བསྡུ་ལེན་གནང་བ་དེའི་ནང་མང་ཚོགས་བརྒྱ་ཆ་ ༧༠ ལྷག་གིས་རྒྱ་གར་གཞུང་གི་ངོས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་དགོན་འདུན་ཆེད་བཏོན་གནང་མཁན་ཡང་བྱུང་འདུག་པར་མ་ཟད། མང་ཚོགས་བརྒྱ་ཆ་ ༥༣ ཉེ་བས་བོད་ཀྱི་གནད་དོན་དེ་རྒྱ་གར་གྱི་བདེ་འཇགས་དང་འབྲེལ་བའི་གནད་དོན་གཙོ་གྲས་ཤིག་ཆགས་ཀྱི་ཡོད་ཀྱང་། རྒྱ་གར་གཞུང་དང་རྒྱ་གར་གྱི་གསར་ཁང་གིས་ཀྱང་དོ་སྣང་མ་གནང་བར་བཞག་པ་དེ་ནི་ཆེས་མ་འོས་པའི་གནད་དོན་ཞིག་ཡིན་པར་དགོངས་འཆར་གནང་འདུགགཞི་རྩའི་འདས་བའི་ལོ་གཅིག་གི་རིང་ལ་རྒྱ་དཀར་ནག་གཉིས་ཀྱིས་འཕགས་བོད་ས་མཚམས་ཀྱི་བདག་དབང་ཐད་ནས་གདོང་ཐུག་རིམ་པ་བྱས་ཏེ། ཕྱོགས་གཉིས་ཀྱི་མཐའ་དམག་གི་བར་དུ་ཤི་རྨས་ཀྱི་དོན་རྐྱེན་ཡང་བྱུང་ཡོད་པ་ལྟར། དགུན་དུས་ཀྱི་ནམ་ཟླའི་འཁྱགས་གྲང་ལ་ལྟོས་མེད་ཀྱིས། ད་དུང་ཕྱོགས་གཉིས་ཀྱི་མཐའ་མཚམས་ཁག་ཏུ་དམག་མི་འགྲེམས་འཇོག་ཇེ་མང་དུ་བཏང་སྟེ་གོ་མཚོན་དང་བཟའ་ཆས་སོགས་འབོར་འདྲེན་བྱེད་ཤུགས་ཆེ་རུ་གཏོང་བཞིན་ཡོད་པ་རེད། རྒྱ་ནག་གཞུང་གིས་འདས་པའི་ལོ་ཤས་ནས་དེ་གའི་མཐའ་མཚམས་ཁག་ལ་དམག་འཐབ་དཔུང་འཇུག་ཙམ་མ་ཟད། སྒོས་སུ་ས་མཚམས་ཁག་ཏུ་དཔལ་འབྱོར་གྱི་མཐུན་རྐྱེན་བཟང་བའི་གྲོང་ཚོ་གསར་རྒྱག་གི་ལས་གཞི་སྤེལ་འགོ་ཚུགས་ཏེ་སྔར་ལོའི་བར་གྲོང་ཚོ་༩༠༠ ལྷག་གསར་རྒྱག་བྱས་ཡོད་པ་དང་དེའི་ཁོངས་ནས་ ༢༠༠ ཙམ་འཕགས་བོད་ས་མཚམས་ལ་ཡོད་པའི་ཚོད་དཔག་གནང་གི་ཡོད་པའི་ཁྲོད་འདིར་རྒྱ་གར་གྱི་གནད་ཡོད་དཔོན་རིགས་ཁག་ཅིག་དང་མང་ཚོགས་དཀྱུས་མའི་ནང་ནས་ཀྱང་བོད་ཀྱི་བདེན་དེན་སེལ་བར་རྒྱ་གར་དབུས་གཞུང་གི་བཞེས་ཕྱོགས་གང་ཡིན་གསལ་བཟོ་གནང་དགོས་པའི་འབོད་སྐུལ་ཞུ་མཁན་མི་ཉུང་བ་ཞིག་བྱུང་ཡོད་པ་རེད།