རྒྱལ་སྤྱི།

སུད་སི་གྲོང་ཁྱེར་ཇི་ནི་ཝ་ནང་འཚོགས་བཞིན་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༡ པ་དང་བསྟུན། ཁ་སང་ཕྱི་ཚེས་ ༢ ཉིན་རྒྱལ་ཚོགས་ཀྱི་ཚོགས་ཁང་ནང་ད་བར་མི་ལོ་ ༢༤ རིང་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་བའི་༸ཀུན་གཟིགས་༸པཎ་ཆེན་སྐུ་ཕྲེང་ ༡༡ པ་དགེ་འདུན་ཆོས་ཀྱི་ཉི་མ་མཆོག་གི་གནད་དོན་ཐོག་ཟུར་ཚོགས་ཤིག་གནང་ཡོད་པ་རེད།ཟུར་ཚོགས་ཐོག་བཀྲིས་ལྷུན་པོ་དགོན་གྱི་༸པཎ་ཆེན་ཨེར་ཏེ་ནི་ཞབས་ཞུ་ལྟེ་གནས་ཁང་གི་ཚོགས་གཙོ་གྲྭ་བློ་བཟང་རྡོ་རྗེ་ལགས་ཀྱིས་ད་བར་མི་ལོ་ ༢༤ རིང་༸པཎ་ཆེན་རིན་པོ་ཆེ་མཆོག་དང་བྱ་བྲལ་རིན་པོ་ཆེ་རྣམ་གཉིས་རྒྱ་གཞུང་གིས་བཙོན་འཇུག་གིས་འགྲོ་བ་མིའི་སྤྱི་ཚོགས་ཧྲིལ་པོ་དང་འབྲེལ་ལམ་ཡོངས་སུ་བཀག་སྡོམ་བྱས་པ་དེ་ནི་བདེ་སྐྱིད་ཀྱི་འཚོ་བ་རོལ་བ་ཞིག་རྩ་བ་ནས་མིན་པར་མི་གཅིག་གི་མི་ཚེའི་ནང་བསུབ་ཐབས་མེད་པའི་གྱོང་གུད་ཆེན་པོ་ཞིག་དང་། དད་ལྡན་ས་ཡ་མང་པོའི་སེམས་ནང་ལ་ཕོག་ཐུག་བཏང་བ། དེ་བཞིན་བོད་མིའི་ཆོས་ཕྱོགས་ཀྱི་བླ་སྤྲུལ་ཡང་སྲིད་ངོས་འཛིན་ཞུ་རྒྱུའི་ཐོབ་ཐང་འཕྲོག་པ་སོགས་རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ཙམ་མ་ཟད། རྒྱ་ནག་གཞུང་གིས་གྲངས་ཉུངས་མི་རིགས་ཐོག་བཞག་པའི་ཁྲིམས་སྒྲིག་ཁག་རྡོག་རོལ་བཏང་བའི་ནག་ཉེས་བསགས་ཡོད་ཅེས་རྒྱ་གཞུང་གི་ནག་ཉེས་ཁག་གླེང་སྟེགས་ཐོག་ཐེར་འདོན་གནང་འདུགསྤྱིར་ཁ་སང་༸པཎ་ཆེན་རིན་པོ་ཆེ་མཆོག་དང་འབྲེལ་བའི་ཟུར་ཚོགས་དེ་ནི་རྒྱལ་ཁབ་གཞན་གྱི་དབང་སྒྱུར་འོག་ལྷུང་བའི་གྲངས་ཉུང་མི་རིགས་རྣམས་ཀྱི་སྲུང་སྐྱོབ་སླད་རྒྱལ་སྤྱིའི་ཚོགས་པ་ Society  for Threaten people ཞེས་པས་གོ་སྒྲིག་གནང་བ་ཞིག་ཡིན་ཞིང་། སྐབས་དེར་ཚོུད་གཅིག་གི་རིང་བོད་ནང་གི་བོད་མིའི་ཆོས་དད་རང་དབང་ལ་རྒྱ་གཞུང་གི་དམ་དྲག་ཞེས་པའི་གླེང་བརྗོད་ཐོག་ཟུར་ཚོགས་ལས་རིམ་གནང་ཐོག་གཙོ་བོ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་གླེང་སློང་གནང་ཡོད་པ་དང་། སྐབས་དེར་ཟུར་ཚོགས་དངུས་སུ་མ་ཚོགས་གོང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་གྱུར་སྐོར་བཟོ་སྐྲུན་ཞུས་པའི་དངོས་བྱུང་གློག་བརྙན་ The Stolen Child ཞེས་པ་སྐར་མ་གཉིས་ཅན་ཡོད་པ་ཞིག་ཚོགས་བཅར་བ་ཚོར་ངོ་སྤྲོད་ཞུ་སླད་གཟིགས་འབུལ་ཞུས་ འདུག་པ་དང་ཆབས་ཅིག གྲྭ་བློ་བཟང་རྡོ་རྗེ་ལགས་ཀྱིས་༸རྒྱལ་བ་ཡབ་སྲིད་རྣམས་ཀྱི་འབྲེལ་བའི་སྐོར་དང་༸པཎ་ཆེན་སྐུ་ཕྲེང་བཅུ་པའི་མཛད་རྗེས། དེ་བཞིན་༸པཎ་ཆེན་སྐུ་གོང་མ་དགོངས་པ་རྫོགས་སྐབས་ཀྱི་གནས་ཚུལ། ཡང་སྲིད་འཚོལ་ཞིབ། རྒྱ་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་བྱ་བྲལ་རིན་པོ་ཆེ་མཆོག་སོགས་འཛིན་བཟུང་བཙན་ཁྲིད་བྱས་པ་དང་། ད་བར་རྒྱལ་སྤྱིའི་ཐོག་ཞུ་འབོད་རིམ་པ་གནང་བ་བཅས་གནས་ཚུལ་སྙིང་བསྡུས་ཐོག་ནས་ངོ་སྤྲོད་ཀྱང་གནང་འདུག ལྷག་པར་དུ་བློ་བཟང་རྡོ་རྗེ་ལགས་ཀྱིས་ཟུར་ཚོགས་ཐོག་ད་བར་རྒྱ་ནག་གཞུང་གིས་༸པཎ་ཆེན་རིན་པོ་ཆེ་མཆོག་གི་གནད་དོན་དང་འབྲེལ་ནས་བོད་ནང་གི་བོདམིའི་ ༦༠ ལྷག་འཛིན་བཟུང་བྱས་པའི་གནས་ཚུལ་གསལ་བཏོན་གནང་བ་དང་སྦྲགས། ད་ཆ་བོད་ནང་རྒྱ་ནག་གཞུང་གིས་ཆེས་སྡུག་རྩུབ་ཅན་གྱི་སྲིད་བྱུས་ལག་བསྟར་བྱེད་བཞིན་པའི་གནས་སྟངས་འོག་བོད་མི་རྣམས་གྲངས་ཉུང་མི་རིགས་སུ་འགྱུར་བཞིན་པ་དང་རྒྱ་སྐད་མི་ཤེས་མཁན་བོད་མི་ཚོའི་འཚོ་རྟེན་མེད་པ་བཟོས་པ་དང་། བོད་མི་ཚོས་མི་རིགས་ཀྱི་གོམས་སྲོལ་དང་ཐོབ་ཐང་སྲུང་བ། ༸པཎ་ཆེན་ཡབ་སྲས་གཉིས་ལ་དད་མུས་ཞུས་ནས་ཁ་བྲལ་བ་དང་ཁྲིམས་འགལ་ཆགས་པར་ངོས་འཛིན་བྱེད་བཞིན་ཡོད་སོགས་གནད་དོན་དེ་དག་ལས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་དེ་ཆེས་མུན་ནག་དང་། ཆེས་འཇིགས་སྣང་ཅན། དེ་བཞིན་ཆེས་སྡུག་རྩུབ་ཅན་ཤ་སྟག་ཡིན་པ་གསལ་པོ་རེད་ཅེས་གསུངས་འདུགཟུར་ཚོགས་གླེང་སྟེགས་བརྒྱུད་ནས་གྲྭ་བློ་བཟང་རྡོ་རྗེ་ལགས་ཀྱིས་ད་དུང་རྒྱལ་ཚོགས་དང་རྒྱ་ནག་གཞུང་ལ་བོད་ནང་གི་བོད་མིར་འགྲོ་སྡོད་སྤྱོད་གསུམ་དང་ཆོས་དད་དང་སྨྲ་བརྗོད་རང་དབང་། དེ་བཞིན་གཞི་རྩའི་འགྲོ་བ་མིའིཐོབ་ཐང་བཅས་སྤྲོད་དགོས་པ་མ་ཟད། རྒྱལ་ཚོགས་ཀྱི་འབྲེལ་ཡོད་མི་སྣ་སྔོན་འགྲོའི་ཆ་རྐྱེན་གང་ཡང་མེད་པར་རྒྱ་ནག་ནང་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་བྱ་བྲལ་རིན་པོ་ཆེ་མཆོག་རྣམ་གཉིས་ཀྱིས་གཙོས་པའི་སྐུ་འཁོར་ནང་མི་རྣམས་སྐུ་གཟུགས་གསལ་ཐང་ཡིན་པའི་ཁུངས་སྐྱེལ་ར་འཕྲོད་གཟིགས་ཞིབ་གནང་བར་གཏོང་དགོས། ༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་བྱ་བྲལ་རིན་པོ་ཆེ་རྣམ་གཉིས་མ་ཉེས་ཁག་གཡོག་བྱས་པ་ལྟར་དེ་འབྲེལ་ཉེས་མེད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས་པ་བཅས་དོན་ཚན་བཞི་ཅན་གྱི་འབོད་སྐུལ་ཞུས་འདུག ཟུར་ཚོགས་ཐོག་གཏམ་བཤད་གནང་མཁན་ཁོངས་སུ་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་སྲིད་བྱུས་ཚན་པའི་འགན་འཛིན་སྐུ་ཞབས་ Vicent Metten ལགས་ཡིན་ཞིང་། ཁོང་གིས་བོད་ནང་གི་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་བ་དང་འབྲེལ། རྒྱ་ནག་གཞུང་གིས་རྩ་ཁྲིམས་གཞིར་བཞག་ཐོག་གཞུང་གིས་ཐེ་བྱུས་གང་ཡང་མེད་པར་བོད་ནང་གི་བོད་མི་ཚོར་ཆོས་དད་རང་དབང་གི་ཐོབ་ཐང་ལོངས་སུ་སྤྱོད་བཅུག་དགོས་པ་དང་དེའི་ཐོག་རྒྱལ་སྤྱིའི་ཚོགས་སྡེ་ཁག་ནས་རྒྱ་གཞུང་གིས་གནོན་ཤུགས་སྤྲོད་དགོས་པའི་རེ་འདུན་ཡང་སྟོན་ཡོད་པ་རེད།ཟུར་ཚོགས་དེའི་ཐོག་ཇི་ནི་ཝར་ཡོད་པའི་རྒྱལ་ཁབ་ཁག་གི་གཞུང་ཚབ་མི་སྣ་དང་། རྒྱལ་སྤྱིའི་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་ཚོགས་པའི་སྐུ་ཚབ། སུད་སི་སྐུ་ཚབ་དོན་གཅོད་འཆི་མེད་རིན་འཛིན་ལགས། ས་གནས་བོད་མི་བཅས་ནས་མཉམ་ཞུགས་གནང་འདུགརྩ་བའི་ཕྱི་ལོ་ ༢༠༡༩ ལོ་འདི་ནི་རྒྱ་ནག་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་འཛིན་བཟུང་བཙན་ཁྲིད་བྱས་ནས་མི་ལོ་ ༢༤ འཁོར་བ་དང་རྒྱལ་ཚོགས་བྱིས་པའི་ཐོབ་ཐང་ཁྲིམས་ཡིག་གཏན་འབེབས་གནང་སྟེ་མི་ལོ་ ༣༠ འཁོར་བའི་དུས་ཚིགས་ཁེལ་གྱི་ཡོད་པ་རེད།གྲྭ་བློ་བཟང་རྡོ་རྗེ་ལགས་ཀྱིས་རྒྱལ་ཚོགས་འཚོགས་བཞིན་པ་དང་བསྟུན་ད་བར་བཀྲིས་ལྷུན་པོ་དགོན་གྱི་༸པཎ་ཆེན་ཨེར་ཏེ་ནི་ཞབས་ཞུ་ལྟེ་གནས་ཁང་གིས་ལོ་ཤས་ནང་འཛམ་གླིང་ས་ཕྱོགས་གང་སར་མང་ཚོགས་ཁྲོད་ནས་༸པཎ་ཆེན་རིན་པོ་ཆེ་མཆོག་གློད་བཀྲོལ་ཡོང་བའི་མཚན་རྟགས་བསྡུ་རུབ་གནང་བའི་དེབ་གྲང་གཉིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་ Michelle Bachelet མཆོག་གི་མཚན་ཐོག་ཏུ་ཕུལ་བ་དང་ཆབས་ཅིག་ཏུ་དོན་ཚན་བཞི་ཅན་ཡོད་པའི་འབོད་སྐུལ་ཞུ་སྙན་ཞིག་ཀྱང་ཕུལ་ཡོད་པ་རེད།

བོད་ཀྱི་རྒྱལ་ས་ལྷ་སའི་བཞི་མདོ་ཁག་ཏུ་ལྟ་སྲུང་བྱེད་མཁན་ཉེན་རྟོག་པའི་འདུག་སྡོད་རེར་སྣུམ་འཁོར་རེར་འགྲེམས་འཇོག་གིས་དམ་དྲག་སྔར་ལྷག་བྱེད་བཞིན་པ་རེད་འདུག ཉེ་ལམ་ཉི་ཧོང་གི་ཡུལ་སྐོར་སྤྲོ་འཆམ་པ་ཞིག་གིས་ཁྲན་ཏུ་གྲོང་ཁྱེར་ནས་ཕྱི་ཟླ་ ༧ ཚེས་ ༡ ཉིན་གྱི་དགོང་མོ་ཚོུད་ ༧ པ་ཡོལ་ཙམ་ལ་རྒྱ་ནག་གི་དམག་མི་གནམ་གྲུ་མང་པོ་ཞིག་འཕུར་བ་མཐོང་ཡོད་སྐོར་སྤྱི་ཚོགས་དྲྭ་ལམ་ནང་བཀོད་པ་དང་སྦྲགས། ཁོང་གིས་ད་ཆ་ཧོང་ཀོང་ནང་ཉེས་ཅན་རྩིས་སྤྲོད་ཀྱི་ཁྲིམས་འཆར་རྐྱེན་པས་ངོ་རྒོལ་ཤུགས་ཆེ་བྱུང་བའི་ཁྲོད་དེའི་ཤུགས་རྐྱེན་བོད་ནང་དུ་བྱུང་སྲིད་པ་དང་རྒྱ་གཞུང་གིས་དེ་འབྲེལ་དམ་དྲག་བྱེད་སྲིད་པར་ཚོད་དཔག་གནང་འདུག རླུང་འཕྲིན་ཁང་གི་རྒྱ་ཡིག་ཚན་པའི་ལས་བྱེད་ཟུར་པ་བསྟན་འཛིན་ཕན་ཐོགས་ལགས་སུ་བོད་ནས་དེ་འབྲེལ་གནས་ཚུལ་མཁོ་སྤྲོད་གནང་བར་གཞིགས་ཚེ་ད་ཆ་བོད་ཀྱི་རྒྱལ་ས་ལྷ་སར་རྒྱ་གཞུང་གིས་བཞི་མདོ་ཁག་ཏུ་ཡོད་པའི་ཉེན་རྟོག་པ་འདུག་སྡོད་རེར་སྣུན་འཁོར་རེར་འགྲེམས་འཇོག་དང་དམ་དྲག་སྔར་ལྷག་བྱེད་བཞིན་ཡོད་པ་གསུངས་ཡོད་པ་དང་། དེ་བཞིན་གནས་ཚུལ་མཁོ་སྤྲོད་པས་ཁོང་ལ་ཉེ་ལམ་རྒྱ་གཞུང་གིས་བོད་ནང་ནག་སེལ་གཤེད་བཅོམ་གྱི་སྲིད་བྱུས་ལག་བསྟར་བྱེད་བཞིན་པའི་འོག་རྒྱ་གཞུང་གིས་ས་ཁུལ་སོ་སོར་མི་འཛིན་བཟུང་བྱེད་དགོས་པའི་བརྒྱ་ཆ་གཏན་འབེབས་ཀྱིས་འདས་པའི་ཟླ་བ་བཞི་ཙམ་ནང་ལྷ་ས་དང་ལྷོ་ཁ་ཁུལ་ནས་ཁབ་གཙགས་བརྒྱབ་མཁན་གཙོས་བོད་མི་མང་དག་ཅིག་འཛིན་བཟུང་བྱས་ཡོད་པ་ངོ་སྤྲོད་གནང་འདུག  གཞི་རྩའི་ཧོང་ཀོང་ནས་རྒྱ་ནག་སྐམ་ས་ཆེན་པོ་དང་ལྷན་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་བཞག་རྒྱུའི་ཐད་ཧོང་ཀོང་མང་ཚོགས་ནས་ངོ་རྒོལ་གནང་མུས་དང་ཟླ་བ་ ༧ ཚེས་ ༡ ཉིན་ཨིན་ཇིས་ཧོང་ཀོང་གི་བདག་དབང་རྒྱ་ནག་ལ་རྩིས་སྤྲོད་བྱས་ནས་ལོ་འཁོར་དུས་དྲན་ཐེངས་ ༢༢ པ་འཁེལ་བ་དང་བསྟུན། ཧོང་ཀོང་མང་ཚོགས་སྟོང་ཕྲག་བརྒལ་བ་ནས་ཁྲིམས་འཆར་དེར་ངོ་རྒོལ་དང་།  ཡང་ཁག་གཅིག་ནས་དེ་གའི་གྲོས་ཚོགས་ལ་བཙན་རྒོལ་དང་། དེ་བཞིན་དེ་སྔོན་ཧོང་ཀོང་ཨིན་ཇིའི་མངའ་ཁུལ་དུ་ཡོད་སྐབས་ཀྱི་དར་ཆ་འཕྱར་བ་སོགས་བྱས་ཡོད་སྟབས། ཉེན་རྟོག་པས་རྒྱལ་སྤྱིའི་ཚོགས་སྐྱིད་ཁག་གིས་སྐྱོན་བརྗོད་གནང་བར་ལྟོས་མེད་བསྐྱར་དུ་མིག་ཆུ་དུག་རླངས་སྤྱོད་རྐྱེན་འགོག་རྒོལ་བ་མི་ ༥༤ ལྷག་སྨན་ཁང་དུ་འགྲོ་དགོས་པ་བྱུང་འདུག གནད་དོན་དེ་དང་འབྲེལ་ནས་ཁ་སང་ཧོང་ཀོང་གི་སྤྱི་ཁྱབ་ཀེ་རི་ལེམ་ལགས་ཀྱིས་སྔ་དྲོ་ཚོུད་ ༤ ཐོག་གསར་འགོད་ལྷན་ཚོགས་བསྐོང་ཐོག་ཧོང་ཀོང་མང་ཚོགས་ནས་གྲོས་ཚོགས་ནང་བྱ་སྤྱོད་དེ་ལྟར་སྤེལ་བ་དེར་ཐུགས་ཕམ་དང་སྦྲགས། ཧོང་ཀོང་ནང་ཁྲིམས་ལས་གལ་ཆེ་བ་མེད་པ་དང་དྲག་སྤྱོད་ཀྱི་བྱ་སྤྱོད་སྤེལ་མཁན་ལ་སྐྱོན་བརྗོད་ཤུགས་ཆེ་གནང་འདུག འོན་ཀྱང་ཨིན་ཡུལ་གྱི་ཕྱི་འབྲེལ་དྲུང་ཆེ་ Jeremy Hunt མཆོག་གིས་རྒྱ་ནག་ནས་ཧོང་ཀོང་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་ཀྱི་གྲོས་མཐུན་དེར་བརྩི་འཇོག་མ་བྱས་པ་དང་། དེ་བཞིན་རྒྱ་ནག་ནས་ཧོང་ཀོང་མི་མང་གི་གྲོས་ཚོགས་ལ་བཙན་རྒོལ་བྱས་པར་བཏགས་ཏེ་ཧོང་ཀོང་གི་གཞི་རྩའི་རང་དབང་ལ་དོ་ཕོག་གཏང་ཚེ་དེའི་མཇུག་འབྲས་འཚབས་ཆེན་ཐོན་ངེས་ཡིན་པར་ཉེན་བརྡ་བཏང་འདུག རྩ་བའི་ཧོང་ཀོང་མི་མང་ནས་ཧོང་ཀོང་གཞུང་ནས་རྒྱ་ནག་དང་ལྷན་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་གཏན་འབེབས་གནང་ཚེ་ཧོང་ཀོང་ནང་གི་འགྲོ་བ་མིའི་ཐོབ་ཐང་རྩོད་ལེན་པ་དང་ལས་འགུལ་བ་སོགས་ཀྱི་ཚེ་སྲོག་ཉེན་འཚབས་ཆེན་པོའི་འོག་ཏུ་ལྷུང་བ་དང་། ཁྲིམས་འཆར་དེས་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་ལ་དོ་ཕོག་གཏོང་བར་ཡིད་ཆེས་བྱེད་བཞིན་པ་དང་། ཁྲིམས་འཆར་དེ་ཕྱིར་འཐེན་དང་།   སྤྱི་ཁྱབ་ཀེ་རི་ལེམ་ལས་གནས་ནས་རྩ་དགོངས་ཞུ་དགོས་པ་སོགས་ཀྱི་དགོས་འདུན་ཆེད་བཏོན་གནང་ཐོག་ངོ་རྒོལ་རིམ་པ་གནང་ཡོད་པ་རེད།

རྒྱ་ནག་གི་ནང་རིང་མིན་ཕྱི་ཟླ་ ༨ ཚེས་ ༡༢ ཉིན་འཚོགས་གཏན་ཁེལ་བའི་ Gothia Cup ཞེས་པའི་རྒྱལ་སྤྱིའི་གཞོན་སྐྱེས་རྐང་སྤོལ་རྩེད་འགྲན་ཐོག་ཕ་བོད་མི་ཡིན་པ་ NewZealand གྱི་ན་གཞོན་རྐང་སྤོལ་རྩེད་འགྲན་པ་ཉི་མ་ཚེ་རིང་ལགས་འགྲན་སྡུར་དེར་ཞུགས་རྒྱུར་བདམས་ཐོན་བྱུང་ཡོད་ཀྱང་། རྒྱ་གཞུང་གིས་ཁོང་ལ་མཐོང་མཆན་མ་སྤྲད་པར་བཀག་འགོག་བྱེད་བཞིན་ཡོད་པ་རེད། ཁ་ཉིན་ New Zealand Herald བརྒྱུད་ལམ་ཐོག་གནས་ཚུལ་སྤེལ་བར་རང་ལོ་ ༡༤ ཡིན་པ་ཉི་མ་ཚེ་རིང་ལགས་དེ་སྔོན་སྒེར་གྱི་རྐང་སྤོལ་ཆེད་སྦྱོང་ལྟེ་གནས་ཁང་ཞིག་གིས་རིང་མིན་རྒྱ་ནག་ནང་འཚོགས་གཏན་ཁེལ་བའི་ Gothia Cup རྐང་སྤོལ་རྩེད་འགྲན་ཐོག་མཉམ་ཞུགས་གནང་རྒྱུར་བདམས་ཐོན་གནང་ཡོད་ནའང་། རྒྱ་གཞུང་གིས་ཁོང་ལ་མཐོང་མཆན་མ་སྤྲད་པར་འགོག་རྐྱེན་མང་དག་ཅིག་བཟོ་བཞིན་ཡོད་སྟབས་ཁོང་རྐང་སྤོལ་ཆེད་སྦྱོང་ལྟེ་གནས་ཁང་གི་རུ་ཁག་ནས་ཕྱིར་འཐེན་བྱས་ཡོད་པ་རེད་འདུགཁོང་གི་ཨ་མ་ Megan Tsering Young ལགས་ཀྱིས་བརྒྱུད་ལམ་ཁག་ལ་གནད་དོན་དེའི་སྐོར་འགྲེལ་བརྗོད་གནང་བར་རྩ་བའི་ལྟེ་གནས་ཁང་ལ་དུས་ཚོད་སོགས་ཀྱི་དཀའ་ངལ་འཕྲད་རྐྱེན་ཁོང་གི་བུ་རུ་ཁག་ནས་ཕྱིར་འཐེན་གནང་རྒྱུ་མ་གཏོགས་ཐབས་གཞན་མ་མཆིས་ཀྱང་། རྒྱ་ནག་གཞུང་ཚབ་ལས་ཁུངས་ནས་རྩེད་འགྲན་པ་གཞན་ཚང་མར་དུས་ཚོད་མ་འགྱངས་པར་མཐོང་མཆན་སྤྲད་ཡོད་པ་དང་། ཉི་མ་ཚེ་རིང་ལགས་གཅིག་པོའི་ཞུ་སྙན་དེ་རྒྱ་ནག་ཏུ་སྔོན་ནས་བཏང་ཡོད་ཀྱང་རྒྱ་ནག་གིས་ཉི་མ་ལགས་ཀྱི་པཱ་ལགས་བོད་རིགས་ཡིན་པའི་དབང་གིས་ཁོང་གི་མཐོང་མཆན་དེ་དུས་འགྱངས་བྱས་མེད་པས་དེ་ནི་མི་རིགས་དབྱེ་འབྱེད་ཀྱི་རྣམ་པ་ཞིག་ཡིན་པ་གསུངས་འདུག རྩ་བའི་དེ་སྔོན་ཉི་མ་ཚེ་རིང་ལགས་ཀྱི་ཨ་མ་ལགས་དང་ནང་མི་རྣམས་བོད་ནང་ཕེབས་སྐབས་སུ་མཐོང་མཆན་ཞུས་པར་དུས་ཚོད་མང་པོ་འགྱངས་པ་སོགས་ཀྱི་དཀའ་ངལ་འཕྲད་མྱོང་ཡོད་རྐྱེན་ཁོང་གི་ཨ་མ་ལགས་ཀྱིས་མཐོང་མཆན་སྙན་ཞུ་དེ་རྩེད་འགྲན་པ་གཞན་ལས་སྔོན་ལ་བཏང་ཡོད་ནའང་། སྙན་ཞུ་དེ་རྒྱ་ནག་ལ་གཏོང་དགོས་ཚུལ་སོགས་ཀྱི་འོག་ད་བར་དུས་ཚོད་འགྱངས་ནས་བཞག་པ་དང་། བདུན་ཕྲག་སྔོན་མར་ཁོང་ལ་ཡི་གེ་ཞིག་འབྱོར་བའི་ནང་ཉི་མ་ལགས་ཀྱིས་རྐང་སྤོལ་རྩེད་འགྲན་ལ་ཞུགས་པ་ཙམ་ལས་བྱ་བཞག་གཞན་གང་གི་ནང་དུ་ཡང་འཛུལ་ཞུགས་མི་བྱེད་པའི་ཁས་ལེན་ཡི་གེ་ཞིག་བྲིས་པ་ཡིན་ན། ཁོང་ལ་མཐོང་མཆན་སྤྲོད་རྒྱུར་བསམ་བློ་གཏོང་གི་ཡིན་ཚུལ་བརྗོད་ཡོད་པ་རེད། ཉི་མ་ལགས་ཀྱི་ཨ་མ་ལགས་ཀྱིས་རང་ལོ་བཅུ་བཞི་ཡིན་པའི་བྱིས་པ་ཞིག་གིས་བྱ་འགུལ་གང་སྤེལ་སྲིད་པ་དང་ཉེན་ཁ་གང་ཡོད་མེད་ཚོད་དཔག་གནང་དཀའ་སྐོར་གསུངས་པ་དང་འབྲེལ། ཁོང་གི་ནང་མིའི་ངོས་ནས་གནད་དོན་དེ་དྲང་ལྡན་ཞིག་མིན་པར་གཟིགས་ཀྱི་ཡོད་ཀྱང་ཁོང་གི་བུས་ཡི་གེ་དེ་བྲིས་རྒྱུ་ཡིན་པ་གསུངས་འདུགཁོང་གིས་ད་ལྟ་བོད་ནང་ཉི་མ་ཚེ་རིང་ལགས་ཀྱི་སྤུན་ཉེ་འབྲེལ་ ༡༣ ཙམ་ཡོད་པ་དེ་ལྟར་ཡང་། ཁོང་རྣམས་དང་མཇལ་འཕྲད་དང་འབྲེལ་བ་གནང་རྒྱུ་ཧ་ཅང་ཁག་པོ་ཆགས་ཡོད་སྐོར་གསུངས་པ་དང་འབྲེལ། ནིའུ་ཛ་ལན་ཌིར་སྐྱེས་པའི་བོད་རིགས་རྐང་སྤོལ་རྩེ་འགྲན་པ་ཞིག་ལ་དཀའ་ངལ་དེ་ལྟར་འཕྲད་ཀྱི་ཡོད་ཚེ་བོད་ནང་གི་བོད་མི་མང་ཚོགས་རྣམས་ཀྱི་གནས་སྟངས་གང་འདྲ་ཡོད་དམ་ཞེས་དྲི་བ་ཞིག་ཀྱང་གནང་འདུག རྩ་བའི་ Gothia Cup ཞེས་པའི་རྩེད་འགྲན་དེ་ཕྱི་ལོ་ ༡༩༧༥ ལོར་ཐོག་མར་དབུ་འཛུགས་གནང་ཡོད་ཅིང་། ད་བར་འཛམ་གླིང་རྒྱལ་ཁབ་འདྲ་མིན་ ༡༤༣ ཙམ་ནས་རྩེད་འགྲན་པ་ས་ཡ་གཅིག་ལྷག་ནས་དེའི་ནང་མཉམ་ཞུགས་གནང་བའི་ཁྲོད་  FIFA ཞེས་རྒྱལ་སྤྱིའི་རྐང་སྤོལ་ལྷན་ཚོགས་ཀྱི་ངོས་ནས་ཕྱི་ལོ་ ༢༠༠༧ ལོར་རྩེ་འགྲན་དེར་འཛམ་གླིང་གཞོན་སྐྱེས་རྐང་སྤོལ་རྩེད་འགྲན་ཞེས་མཚན་གནས་ཕུལ་ཡོད་པ་རེད། འདི་ལོའི་རྩེད་འགྲན་འདི་བཞིན་རྒྱ་ནག་གི་ཁྲིན་ཡང་གྲོང་ཁྱེར་དུ་ཕྱི་ཟླ་ ༨ ཚེས་ ༡༢ ནས་ ༢༠ བར་ཉིན་གྲངས་ ༨ རིང་རྩེད་འགྲན་གནང་གི་ཡོད་པ་རེད། འོན་ཀྱང་བོད་རིགས་ཉི་མ་ཚེ་རིང་ལགས་ཀྱི་པཱ་ལགས་བོད་མི་ཡིན་པར་བརྟེན་ཁོང་ཐེངས་འདིའི་རྩེད་འགྲན་ལ་ཞུགས་ཐུབ་མི་འདུག

བལ་ཡུལ་ནང་གི་ Kathmandu Post ཞེས་པའི་གསར་ཁང་གིས་ཕྱི་སྲིད་དང་འབྲེལ་བའི་ས་གནས་གསར་འགོད་པ་སྐུ་ཞབས་ Anil Giri ལགས་ཀྱིས་དེང་སྐབས་བལ་ཡུལ་གཞུང་གི་ངོས་ནས་བོད་དང་རྒྱ་ནག་གི་གནད་དོན་ཐོག་སྐྱོན་བརྗོད་ཀྱི་གནས་ཚུལ་སྤེལ་བར་དམ་དྲག་བྱེད་བཞིན་པ་གསུངས་འདུགཉེ་ཆར་ཨ་རི་རླུང་འཕྲིན་ཁང་གི་ཨིན་སྐད་དྲྭ་བའི་ཐོག་གནས་ཚུལ་སྤེལ་བར་སྐུ་ཞབས་ Anil Giri ལགས་ཀྱིས་ཟླ་བ་སྔོན་མའི་ཚེས་ ༢༨ ཉིན་རླུང་འཕྲིན་ཁང་ལ་འགྲེལ་བརྗོད་གནང་གསལ་རྒྱ་ནག་གི་རྒྱུད་གཅིག་ལམ་གཅིག་ཚོང་འབྲེལ་ལས་གཞིའི་ཁྲོད་དེང་སྐབས་རྒྱ་ནག་དང་བལ་ཡུལ་གཉིས་དབར་འབྲེལ་ལམ་ཇེ་ཆེར་འགྲོ་བཞིན་པའི་ཁྲོད། བལ་ཡུལ་ཆབ་སྲིད་མི་སྣ་རྣམས་ནས་རྒྱ་ནག་དང་འབྲེལ་བའི་གནད་དོན་ཐོག་གསར་འགོད་པའི་དྲི་བར་དང་ལེན་གནང་གི་མེད་པ་མ་ཟད། ཉེ་ལམ་བལ་ཡུལ་གྱི་ Samajbadi ཆབ་སྲིད་ཚོགས་པའི་གྲོས་ཚོགས་འཐུས་མི་སྐུ་ཞབས་ Pradip Yadav ལགས་ཤར་ཡོ་རོབ་ཀྱི་རྒྱལ་ཁབ་ལཊ་ཝི་ཡའི་རྒྱལ་ས་རི་གྷ་ནང་ཚོགས་པའི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ ༧ པའི་ཐོག་མཉམ་ཞུགས་གནང་བའི་རྐྱེན་གྱིས་ཁོང་ཆབ་སྲིད་ཚོགས་པའི་ལས་དོན་ནས་ཟླ་བ་དྲུག་རིང་གནས་དབྱུང་བཏང་བ་དང་། དེ་བཞིན་ཟླ་བ་སྔོན་མའི་ནང་ Rastriya Samachar Samiti ཞེས་བལ་ཡུལ་རྒྱལ་ཡོངས་གསར་ཁང་གི་ཨིན་ཇི་སྡེ་ཚན་གྱི་གསར་འགོད་པ་གསུམ་ནས་༸གོང་ས་མཆོག་གི་༸སྐུའི་འཕྲོད་བཞེས་སྐོར་ལ་གནས་ཚུལ་སྤེལ་བར་བརྟེན་གསར་འགོད་པ་གསུམ་པོར་བལ་ཡུལ་གཞུང་གིས་འདྲི་རྩད་ནན་པོ་བྱས་ཡོད་པ་བཅས་ཀྱི་གནད་དོན་ལུང་འདྲེན་དང་སྦྲགས་ཏེ་དེང་སྐབས་བལ་ཡུལ་གཞུང་གི་ངོས་ནས་བོད་དང་རྒྱ་ནག་གི་གནད་དོན་ཐོག་སྐྱོན་བརྗོད་ཀྱི་གནས་ཚུལ་སྤེལ་བར་དམ་དྲག་བྱེད་བཞིན་པ་མངོན་གསལ་གནང་འདུགདེ་བཞིན་རྒྱལ་མཚམས་མེད་པའི་གསར་འགོད་པའི་ཚོགས་པའི་ཨེ་ཤ་ཡ་སྡེ་ཚན་གྱི་ངེས་སྟོན་པ་སྐུ་ཞབས་ Cedric Alviani ལགས་ཀྱིས་ཀྱང་བལ་ཡུལ་གཞུང་དང་རྒྱ་ནག་གཉིས་དབར་ཕྱི་ལོ་ ༢༠༡༧ ལོའི་ཕྱི་ཟླ་ ༥ པའི་ནང་རྒྱུད་གཅིག་ལམ་གཅིག་གི་ཚོང་འབྲེལ་ཐོག་གྱན་རྒྱ་བཞག་ཐོག་རྒྱ་ནག་གཞུང་གིས་ཕྱི་ལོ་ ༢༠༡༥ ནས་མགོ་འཛུགས་ཀྱིས་ ༢༠༡༨ བར་བལ་ཡུལ་གཞུང་ལ་འཛུགས་སྐྲུན་ལས་གཞི་ཆེད་ཁྱོན་ཨ་སྒོར་ས་ཡ་ ༥༥༠ ལྷག་གི་རོགས་དངུལ་སྤྲད་ཡོད་པ་ལུང་འདྲེན་དང་འབྲེལ། རོགས་སྐྱོར་དེ་ལྟར་ཐོབ་པར་ཆ་རྐྱེན་ཆེན་པོ་ཡོད་ངེས་ཡིན་སྟབས། རྒྱུད་གཅིག་ལམ་གཅིག་གི་ལས་གཞིའི་འོག་རྒྱ་ནག་དང་ཚོང་འབྲེལ་བྱེད་མཁན་རྒྱལ་ཁབ་ཁག་གི་ནང་དྲི་བ་དང་དོགས་ཟོན་ཤུགས་ཆེན་པོ་ཡོང་ངེས་ཡིན་པར་བརྟེན་འབྲེལ་ལམ་འདི་ལམ་ལྷོང་ཡོང་བར་རྒྱལ་ཁབ་དེ་དག་ནང་གསར་འགྱུར་བརྒྱུད་ལམ་ཁག་ལ་དམ་དྲག་འམ་ཡང་ན་རྒྱ་གཞུང་གི་བཀོད་སྒྲིག་ལྟར་གནས་ཚུལ་སྤེལ་མཁན་བཟོ་བཞིན་པ་མངོན་གསལ་གནང་འདུགདེ་བཞིན་ Human Rights Watch འམ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ལྷོ་ཨེ་ཤ་ཡ་སྡེ་ཚན་གྱི་ངེས་སྟོན་པ་ལྕམ་ Meenakshi Ganguli ལགས་ཀྱིས་རྒྱུད་གཅིག་ལམ་གཅིག་གི་ཚོང་འབྲེལ་འོག་རྒྱལ་ཁབ་མང་པོ་ཞིག་ནས་རྒྱ་ནག་གི་དངུལ་གྱི་རོགས་སྐྱོར་ཤུགས་ཆེན་པོ་འཐོབ་བཞིན་པའི་ཚབ་ཏུ་རང་རྒྱལ་ཁབ་ནང་རྒྱ་ནག་ལ་སྐྱོན་བརྗོད་རིགས་སྤེལ་ཚེ་བཀག་སྡོམ་བྱེད་དགོས་པའི་གནོན་ཤུགས་ཤིག་སླེབས་ཡོད་སྐོར་གསུངས་པ་དང་འབྲེལ། བལ་ཡུལ་གཞུང་ནས་ལོ་མང་ནས་ཡུལ་དེའི་ནང་བོད་མིས་ཞི་བའི་ལས་འགུལ་རིགས་སྤེལ་ཁག་ལ་དམ་དྲག་བྱེད་བཞིན་ཡོད་པ་གསུངས་འདུག འོན་ཀྱང་སྐུ་ཞབས་ Anil Giri ལགས་ཀྱིས་བལ་ཡུལ་ནང་བོད་མིར་དམ་དྲག་དེ་ལྟར་བྱས་པ་ནི་བལ་ཡུལ་མང་ཚོགས་ཀྱི་བོད་དོན་ལ་སྣང་མེད་བཞག་པ་ཞིག་མིན་པ་ལས་དེ་ནི་བལ་ཡུལ་གཞུང་ལ་རྒྱ་ནག་གིས་གནོན་ཤུགས་ཆེན་པོ་སྤྲོད་བཞིན་པའི་ཁྲོད་བལ་ཡུལ་གཞུང་གི་དམ་དྲག་བྱེད་བཞིན་ཡོད་པ་གསུངས་འདུག

ཟླ་བ་འདིའི་ཕྱི་ཚེས་ ༢༤ ནས་དབུ་འཛུགས་ཀྱིས་སུད་སི་གྲོང་ཁྱེར་ཇི་ནི་ཝ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༡ པ་འཚོགས་བཞིན་པ་བསྟུན། ལྷན་ཚོགས་ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་ནས་རྒྱ་ནག་གཞུང་ལ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ལ་དོན་འཁྱོལ་ལག་བསྟར་བྱེད་བཅུག་རོགས་ཞེས་པའི་དགོས་འདུན་འོག་བོད་མི་ཚོས་ཞི་བའི་རྔ་སྟོན་གྱི་ལས་འགུལ་སྤེལ་སོང་། དེ་རིང་ཟླ་ ༦ ཚེས་ ༢༨ ཉིན་ཇི་ནི་ཝའི་རྒྱལ་ཚོགས་ལས་ཁུངས་མདུན་ངོས་ཀྱི་ལས་འགུལ་ཐང་ཆེན་དུ་སུད་སི་དང་ལེག་ཏིག་སཊཡན་བོད་རིགས་ཚོགས་པས་གོ་སྒྲིག་འོག་བོད་དོན་རྔམ་སྟོན་ལས་འགུལ་གནང་བའི་ཐོག་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་གཙོས། ས་གནས་བོད་རིགས་མི་མང་དང་གཞུང་འབྲེལ་མིན་པའི་ཚོགས་པ་ཁག དེ་བཞིན་བོད་དོན་རྒྱབ་སྐྱོར་བ་བཅས་འདུ་འཛོམགས་གནང་ཡོད་པ་དང་། སྐབས་དེར་ལས་འགུལ་བ་ཚོས་ལག་ཏུ་བོད་ཀྱི་རྒྱལ་དར་དང་རྒྱ་ནག་གཞུང་ནས་བོད་མི་དམར་གསོད་དང་དང་བོད་ཀྱི་ཆོས་དང་རིག་གཞུང་། སྐད་ཡིག་རྩ་གཏོར་གྱི་སྲིད་བྱུས་མཚམས་འཇོག་དགོས་པ་སོགས་འཁོད་པའི་འཕྲེད་དར་འཕྱར་ནས་ཞི་འབོད་དང་བོད་དོན་ཆེད་རང་སྲོག་བློས་བཏང་གནང་བའི་རྒྱལ་གཅེས་པ་ཡོངས་ལ་བསྔོ་སྨོན་གསུང་འདུན་བཅས་གནང་བའི་ཐོག་ནས་ཞི་བའི་ལས་འགུལ་སྤེལ་སོང་།སུད་སི་དག་ལེག་ཏིག་སཊཡན་བོད་རིགས་མི་མང་ཚོགས་གཙོ་ནོར་བུ་ལགས་ཀྱིས་རྒྱ་ནག་གཞུང་གིས་བོད་ནང་གི་བོད་མིའི་ཐོག་སྤེལ་བའི་དམ་དྲག་གི་སྲིད་བྱུས་འོག་བོད་མིའི་གནས་སྟངས་སྔར་ལས་ཆེས་ཛ་དྲག་ཏུ་འགྱུར་བཞིན་ཡོད་པར་བརྟེན་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་ནས་ལྷན་ཚོགས་དེའི་ཐོག་ནས་དཀའ་ངལ་སེལ་ཐབས་གནང་དགོས་ཞེས་གསུངས་ཡོད། དེ་རིང་རྒྱལ་ཚོགས་ཀྱི་མདུན་ངོས་སུ་ཞི་བའི་སྐད་འབོད་ཀྱི་ལས་འགུལ་སྤེལ་བ་ཙམ་མ་ཟད་སུད་སི་དང་ལེག་ཏིག་སཊཡན་བོད་རིགས་མི་མང་གི་ངོས་ནས་རྒྱལ་ཚོགས་ཀྱི་ཚོགས་གཙོ་ལྕམ་སྐུ་ Michelle Bachelet ལགས་ཀྱི་མཚན་ཐོག་ཏུ་བོད་དོན་ཞུ་སྙན་ཞིག་ཀྱང་ཕུལ་ཡོད་པ་དང་། ཞུ་སྙན་ནང་གཙོ་བོ་འདི་ལོའི་རྒྱལ་ཚོགས་ཀྱིས་བྱིས་པའི་ཐོབ་ཐང་གི་ཁྲིམས་སྒྲིག་གཏན་འབེབས་གནང་ནས་ལོ་ངོ་ ༣༠ འཁོར་བ་དང་བསྟུན་རྒྱལ་ཚོགས་ཀྱི་ངོས་ནས་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་སྐོར་འདྲི་རྩད་གནང་རོགས་ཞེས་དང་། དེ་བཞིན་བོད་ནང་བྱིས་པ་ཚོར་ཤེས་ཡོན་དང་བོད་པའི་སྐད་ཡིག་ཐོག་སློབ་གཉེར་གནང་རྒྱུའི་ཐོབ་ཐང་སྲུང་སྐྱོང་དགོས་པ། སྐད་ཡིག་སྲུང་སྐྱོབ་ལས་འགུལ་བ་བཀྲིས་དབང་ཕྱུག་ལགས། ད་བར་གྱི་བོད་མིའི་རང་ལུས་མེར་སྲེག་གི་གནད་དོན། བོད་ནང་འབྲེལ་ཡོད་རྟོག་ཞིབ་མི་སྣ་རང་དབང་ཐོག་ཆེད་སྐྱོད་གནང་དགོས་པ་མ་ཟད། ལྷག་པར་དུ་ལྷན་ཚོགས་ཐོག་ཚོགས་མི་རྒྱལ་ཁབ་ཚོས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་མ་གླེང་བར་ཁུ་སིམ་པོར་བཞུགས་ཚེ་རྒྱལ་ཚོགས་ཀྱི་གཞི་རྩའི་ལྟ་གྲུབ་ཁག་དང་རྒྱབ་འགལ་ཆགས་ཡོད་ཅེས་གསུངས་པ་དང་ཆབས་ཅིག ༸གོང་ས་མཆོག་གི་སྐུ་ཚབ་དང་རྒྱ་ནག་དབར་ཞི་མོལ་ལམ་བུ་དེ་ནི་བོད་ནང་གི་བོད་མིའི་དཀའ་ངལ་དང་འགྲོ་བ་མིའི་ཐོབ་ཐང་གནད་དོན་སེལ་རྒྱུ་ནི་ཐབས་ལམ་གཅིག་པོ་དེ་རེད་ཅེས་སོགས་འཁོད་འདུག

རྒྱ་ནག་གཞུང་གིས་ཨིན་ཡུལ་ནང་གི་གཙུག་ལག་སློབ་གཉེར་ཁང་མང་པོའི་ནང་ལ་ཐེ་གཏོགས་བྱས་ཏེ་ཤེས་ལྡན་མི་སྣ་དང་མཁས་པ་རྣམས་ཀྱིས་རྒྱ་ནག་དང་འབྲེལ་བའི་ཐོག་ཞིབ་འཇུག་དང་དཔྱད་རྩོམ་སོགས་སྤེལ་སྐབས་བཟང་ཕྱོགས་ཀྱི་ཐོག་ནས་འགྲེལ་བརྗོད་ཁོ་ན་བྱེད་དགོས་པ་དང་། གལ་ཏེ་དེ་ལྟར་མ་གནང་ཚེ་རྒྱ་ནག་ནང་འགྲོ་རྒྱུའི་མཐོང་མཆན་སྤྲད་རྒྱུ་མིན་པའི་ཉེན་བརྡ་བཏང་འདུག ཁ་སང་ཕྱི་ཚེས་ ༢༥ ཉིན་ཨིན་ཡུལ་གྱི་ The Times གསར་ཁང་གིས་གནས་ཚུལ་སྤེལ་བར་གཞིགས་ན། ཨིན་ཡུལ་ནང་གི་མཁས་པ་དང་ཤེས་ལྡན་མི་སྣ་དག་གིས་ཚོར་བ་རྣོ་བའི་རྒྱ་ནག་དམར་ཤོག་ཚོགས་པ་དང་འབྲེལ་བའི་ཆབ་སྲིད་ཀྱི་གནད་དོན་དང་། བོད་དང་། ཧོང་ཀོང་། ཐེ་ཝན། དེ་བཞིན་ཆོས་དད་རང་དབང་ལ་སོགས་པའི་གནད་དོན་ཁག་གི་ཐོག་གཏམ་བཤད་དང་བགྲོ་གླེང་གནང་རྒྱུར་འཛེམ་ཟོན་མ་གནང་ཚེ་རྒྱ་གཞུང་གིས་མི་སྣ་དེ་དག་རྒྱ་ནག་ནང་འགྲོ་སྐྱོད་བྱ་རྒྱུའི་མཐོང་མཆན་བཀག་གི་ཡོད་པ་དང་། གནད་དོན་དེའི་རྐྱེན་པས་རྒྱ་ནག་ནང་དུ་རང་ཉིད་ཀྱི་ངོས་ནས་ཉམས་ཞིབ་གནང་རྒྱུའི་གོ་སྐབས་མེད་པ་གྱུར་བའི་དཀའ་ངལ་འཕྲད་བཞིན་ཡོད་པ་རེད།མིང་བརྗོད་འདོད་མེད་པའི་མཁས་པ་ཞིག་གིས་ The Times གསར་ཁང་ལ་ཁོང་གིས་རྒྱ་ནག་དང་འབྲེལ་བའི་དཔྱད་བརྗོད་སྤེལ་སྐབས་རྒྱ་ནག་དམར་ཤོག་ཚོགས་པ་ལ་བཟང་ཕྱོགས་ཀྱི་རྣམ་པའི་ཐོག་ནས་འགྲེལ་བརྗོད་གནང་མེད་སྟབས་རྒྱ་གཞུང་གིས་ཁོང་རྒྱ་ནག་ནང་སྐྱོད་ཆོག་པའི་མཐོང་མཆན་མེད་པ་བཟོས་པ་དང་། ལྷག་དོན་གཙུག་ལག་སློབ་གཉེར་ཁང་གི་དགེ་རྒན་མང་པོ་ཞིག་ལ་ཨིན་ཡུལ་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་གློག་འཕྲིན་བརྒྱུད་ནས་དེ་འབྲེལ་སྡིགས་ར་བསྐུལ་ཡོད་སྐོར་གསུངས་འདུག དེ་བཞིན་ཤེས་ལྡན་མི་སྣ་གཞན་ཞིག་ལ་རྒྱ་གཞུང་གིས་གང་བཤད་པ་དེ་ལྟར་གནང་ཚེ་རང་ཉིད་ལ་ཉམས་ཞིབ་ཀྱི་སློབ་ཡོན་རག་པ་མ་ཟད་རྒྱ་ནག་དམར་ཤོག་ཚོགས་པའི་དཔོན་རིགས་མཐོ་ཁག་དང་ཐུག་འཕྲད་གནང་རྒྱུའི་གོ་སྐབས་ཐོབ་ངེས་ཡིན་པ་དང་མདོར་ན་རང་ཉིད་ཀྱི་འདོད་མོས་ལྟར་གནང་ཆོག་གི་ཡོད་པར་འགྲེལ་བརྗོད་བྱས་འདུག ཨིན་ཡུལ་གྱི་མཁས་པ་གཞན་ཞིག་གིས་རྒྱ་ནག་དམར་ཤོག་ཚོགས་པས་འཇིགས་སྐུལ་མང་དག་བྱས་ཡོད་རྐྱེན་མཁས་པ་ཁག་གཅིག་གིས་རྒྱ་ནག་ལ་ཁོང་ཁྲོ་སློང་གཞིར་དོགས་ནས་རང་ཉིད་ཀྱིས་རང་ལ་བཏང་འཛིན་བྱས་ནས་བོད་དང་དྲུག་བཞིའི་དོན་རྐྱེན། དེ་བཞིན་ཐེ་ཝན་སོགས་ཀྱི་གནད་དོན་གླེང་རྒྱུར་འཛེམ་ཟོན་བྱེད་བཞིན་ཡོད་པ་མངོན་གསལ་གནང་འདུག དེ་བཞིན་རྒྱ་ནང་ནང་སྐྱེས་པ་དང་ད་ལྟའི་ཆར་ཨིན་ཡུལ་ནང་ཕྱག་ལས་གནང་བཞིན་པའི་རྒྱ་རིགས་ན་གཞོན་མཁས་པ་ཞིག་གིས་སེམས་འཁུར་དང་འབྲེལ་ཕྱི་ཟླ་གཉིས་པའི་ནང་ཨིན་ཡུལ་གཞུང་གི་བདེ་སྲུང་དང་འབྲེལ་བའི་ཞིབ་འཇུག་ཁང་ཞིག་གི་གྲུབ་དོན་སྤེལ་བའི་ནང་རྒྱ་ནག་གཞུང་ཚབ་ཁང་གི་དཔོན་རིགས་ནས་ཤེས་ལྡན་མི་སྣ་ཁག་གཅིག་གཞུང་ཚབ་ཁང་དུ་ཆེད་འབོད་ཀྱིས་རྒྱ་ནག་དམག་ཤོག་ཚོགས་པའི་སྒྲོམ་གཞིར་རྒྱབ་སྐྱོར་བྱེད་དགོས་པའི་སྐུལ་མ་བྱས་ཡོད་སྐོར་གསུངས་འདུགད་དུང་ Institute of Oriental Studies ཞེས་པའི་ཨིན་ཡུལ་གཙུག་ལག་སློབ་གཉེར་ཁང་གི་རིགས་སྡེ་འགན་འཛིན་མཁས་དབང་སྐུ་ཞབས་ Steve Tsang ལགས་ཀྱིས་རྒྱ་གཞུང་གིས་ཨིན་ཡུལ་ནང་གི་མཁས་པ་ཁག་གཅིག་གི་མཐོང་མཆན་ཕྱིར་བསྡུ་བྱས་པའི་གནས་ཚུལ་ཁག་ཅིག་ཁོང་རང་ཉིད་ལ་ཐུགས་རྒྱུས་ཡོད་སྐོར་གསུངས་པ་དང་འབྲེལ། རྒྱ་ནག་གཞུང་གི་ངོས་ནས་ཡུལ་དེའི་མཐོང་མཆན་དེ་ལག་ཆ་ལྟ་བུར་སྤྱོད་ནས་ཨིན་ཡུལ་གྱི་ཤེས་ལྡན་མི་སྣར་གནོནཤུགས་སྤྲོད་བཞིན་ཡོད་པ་མངོན་གསལ་གནང་འདུག སྐུ་ཞབས་ Tsang ལགས་ཀྱིས་རྒྱ་ནག་ནས་ཨིན་ཡུལ་དུ་སློབ་གཉེར་ཆེད་ཕེབས་མཁན་རྒྱ་རིགས་སློབ་མ་ཚོས་ཀྱང་ཚོར་རྣོ་བའི་གནད་དོན་དེ་དག་ཐོག་འགྲེལ་བརྗོད་དང་མཆན་སོགས་བཀོད་རྒྱུར་ཧ་ཅང་འཇིགས་སྣང་བྱེད་བཞིན་ཡོད་སྟབས། སློབ་མ་དེ་དག་གི་ངོས་ནས་རང་དབང་ངང་འཛིན་གྲྭའི་ནང་རང་ཉིད་ཀྱི་གང་བསམ་པ་ལྟར་ཞལ་གསང་པོ་ཐོག་ནས་བཀའ་མོལ་གནང་ཐུབ་ཀྱི་མེད་པར་ཐེར་འདོན་གནང་འདུག གཞི་རྩའི་རྒྱ་ནག་སྐམ་ས་ཆེན་པ་ནས་ཕྱི་ལོ་ ༢༠༡༧ ནས་ ༢༠༡༨ བར་རྒྱ་རིགས་སློབ་གཉེར་བ་ཁྱོན་འབུམ་གཅིག་ལྷག་ཨིན་ཡུལ་དུ་སློབ་ཞུགས་གནང་ཡོད་པ་རེད།    

སུད་སི་གྲོས་ཚོགས་འཐུས་མིས་སུད་སི་གཞུང་ལ་བོད་དོན་དང་དེ་བཞིན་སུད་སི་དང་རྒྱ་ནག་ཕྱོགས་གཉིས་ཀྱི་དབར་འགྲོ་བ་མིའི་ཐོབ་ཐང་གི་གྲོས་མོལ་དེར་ནུས་པ་ག་ཚོད་ཐོན་ཡོད་མེད་སོགས་ཀྱི་སྐོར་དྲི་བ་གནང་འདུག ཁ་སང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་སྤེལ་བར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་ Maya Graf ལགས་དང་གྲོས་ཚོགས་འཐུས་མི་སྐུ་ཞབས་ Fabian Molina ལགས། དེ་བཞིན་སྐུ་ཞབས་ Niklaus Gugger ལགས། གྲོས་ཚོགས་འཐུས་མི་ཁག་གཅིག་ནས་ཉེ་ལམ་ཟླ་བ་འདིའི་ཕྱི་ཚེས་ ༣ ནས་ཕྱི་ཚེས་ ༢༡ བར་ཚོགས་པའི་སུད་སི་དབྱར་དུས་གྲོས་ཚོགས་སུ་སུད་སི་གཞུང་ལ་བོད་དོན་དང་འབྲེལ་བའི་དྲི་བ་ཁག་གཅིག་བཏང་འདུགསྐབས་དེར་གྲོས་ཚོགས་འཐུས་མི་རྣམ་པས་རྒྱ་ནག་གི་སྲིད་འཛིན་ཞི་ཅིན་ཕིང་གི་འགོ་ཁྲིད་འོག་བོད་གཙོས་པའི་ཤར་ཏུར་ཀི་སི་ཐན་གྱི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཇེ་སྡུག་ཏུ་འགྲོ་བཞིན་པ་དང་། ཆོས་ལུགས་དང་འདུ་འཛོམས་རང་དབང་ལ་དམ་དྲག་བྱེད་བཞིན་པའི་གནད་དོན་གླེང་སློང་གནང་འདུག ལྕམ་སྐུ་ Maya Graf ལགས་ཀྱིས་སུད་སི་གཞུང་ནས་བོད་གཙོས་པའི་ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་དཔྱད་ཞིབ་གནང་རྒྱུའི་བསྐྱར་དུ་བསམ་ཞིབ་གནང་མིན་དང་སུད་སི་ནས་རྒྱ་ནག་ཐོག་འཛིན་པའི་སྲིད་བྱུས་ལ་བསྒྱུར་བཅོས་གནང་མིན་དང་འབྲེལ།  སུད་སི་དང་རྒྱ་ནག་ཕྱོགས་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཐད་ནུས་པ་ཇི་ཙམ་ཐོན་མིན་སྐོར་ལ་དྲི་བ་བཏང་འདུག གཞི་རྩའི་དེ་སྔོན་པེ་ཅིན་དུ་སུད་སི་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཐེངས་ ༡༦ པ་ཚོགས་པ་དང་འབྲེལ། སུད་སི་གཞུང་གིས་སྤྱི་བསྒྲགས་ཤིག་སྤེལ་ནས་གྲོས་མོལ་ཐོག་བོད་ཀྱི་གནད་དོན་གླེང་ཡོད་སྐོར་བརྗོད་པ་དེ་ལྟར་ཡང་། སྐུ་ཞབས་ Niklaus Gugger ལགས་ཀྱིས་སུད་སི་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཐད་ད་ཆ་གྲུབ་འབྲས་གང་ཡང་སོན་མེད་པ་དང་སྒོས་སུ་སུད་སི་གཞུང་ནས་འགྲོ་བ་མིའི་ཐོབ་ཐང་གི་སྡེ་ཚན་ཐད་གྲུབ་འབྲས་ཇེ་བཟང་དུ་གནང་ཕྱིར་འབད་བརྩོན་སྔར་ལྷག་གནང་རྒྱུ་ཡིན་མིན་དང་། སྐུ་ཞབས་ Fabian Molina ལགས་ཀྱིས་ཡུ་རོབ་མཐུན་ཚོགས་ཀྱི་ཆེས་མཐོའི་སྐུ་ཚབ་བོད་ནང་འཚམས་གཟིགས་སུ་ཕེབས་སྐོར་གྱི་གནད་དོན་སོགས་ཀྱི་ཐད་དྲི་བ་བཏང་འདུག རྩ་བའི་ད་རེས་ཀྱི་གྲོས་ཚོགས་ཚོགས་འདུ་མ་འཚོགས་གོང་དུ་ཉེ་སྔོན་ཕྱི་ཚེས་ ༡༧ ཉིན་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་འདུ་ཚོགས་པ་དང་། ཚོགས་འདུ་ནང་མཉམ་ཞུགས་པས་བོད་དོན་དང་འབྲེལ་བའི་ནང་མོལ་གནད་དོན་དང་། སུད་སི་གྲོས་ཚོགས་ནང་གཉིས་སྨན་དབུ་མའི་ལམ་གྱི་སྲིད་བྱུས་སྐོར་གླེང་སློང་གནང་ཕྱོགས་སོགས་ཀྱི་ཐོག་གྲོས་བསྡུར་གནང་བ་དང་བསྟུན་ཚོགས་འདུའི་སྐབས་ཀྱི་དྲི་བ་ཁག་གཅིག་དབྱར་དུས་གྲོས་ཚོགས་སུ་སྙན་གསེང་ཞུས་པ་ཡོད་པ་རེད། སུད་སི་གཞུང་ནས་གྲོས་ཚོགས་འཐུས་མིའི་དྲི་བ་ཁག་ལ་ཟླ་བ་དགུ་པའི་ནང་སྟོན་དུས་གྲོས་ཚོགས་ཐོག་ལན་འདེབས་གནང་རྒྱུ་རེད་འདུག

ཁ་སང་ཕྱི་ཟླ་ ༦ ཚེས་ ༢༤ ཉིན་སུད་སི་གྲོང་ཁྱེར་ཇི་ནི་ལྦ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༡ པ་དབུ་འཛུགས་གནང་ཡོད་པ་དང་།  རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་སྐུ་ Michelle Bachelet མཆོག་ལྷན་ཚོགས་ཀྱི་དབུ་འབྱེད་གསུང་བཤད་གནང་སྐབས་ཡུ་གུར་དང་རྒྱ་ནག་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་གཞན་གྱི་ཐོག་འགྲོ་བ་མིའི་ཐོབ་ཐང་གི་ལྷན་ཁང་གི་ངོས་ནས་རྒྱ་ནག་གཞུང་དང་ལྷན་དུ་གླེང་མོལ་གནང་བཞིན་ཡོད་པ་མ་ཟད། དེ་བཞིན་རྒྱ་ནག་ཁྱབ་ཁོངས་ས་གནས་ཁག་ཏུ་འགྲོ་བ་མིའི་ཐོབ་ཐང་ལྷན་ཁང་གི་འབྲེལ་ཡོད་མི་སྣ་དག་ལ་བཀག་འགོག་མེད་པར་རྟོག་ཞིབ་གནང་ཕྱིར་འགྲོ་སྐྱོད་ཡོང་རྒྱུར་རྒྱ་ནག་དང་ལྷན་དུ་གླེང་མོལ་མུ་མཐུད་ནས་གནང་བཞིན་ཡོད་པ་གསུངས་འདུགདབུ་འབྱེད་ཀྱི་གསུང་བཤད་གནང་སྐབས་གཙོ་འཛིན་མཆོག་གིས་སིརྱ་དང་ Suadi Arabia དེ་བཞིན་ Sudan དང་ Sri Lanka དང་ Myanmar སོགས་ཀྱི་ནང་འགྲོ་བ་མིའི་ཐོབ་ཐང་གི་གནས་བབ་ལ་སེམས་ཚབས་ཆེན་པོ་ཡོད་པའི་རྣམ་པ་བསྟན་པ་དང་། དེ་བཞིན་ཉེ་ཆར་ཧོང་ཀོང་ནང་མི་མང་ས་ཡ་མང་པོས་ཞི་རྒོལ་དང་འབྲེལ་ཏེ་ཧོང་ཀོང་གཞུང་གིས་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་འཆར་ཐོག་འབྲེལ་ཡོད་མང་ཚོགས་གང་མང་གི་བསམ་ཚུལ་མཉམ་སྤུངས་དགོས་གལ་ཡིན་སྐོར་གསུངས་པ་མ་ཟད། ལྷག་པར་དུ་གཙོ་འཛིན་མཆོག་གིས་དེང་གི་འཕྲུལ་རིགས་དང་སྤྱི་ཚོགས་ཀྱི་དྲྭ་རྒྱའི་དུས་སྐབས་འདིར་འབྲེལ་ཡོད་རྒྱལ་ཁབ་ཚོས་སྤྱི་ཚོགས་ཀྱི་དྲྭ་རྒྱར་དོ་དམ་བཏང་འཛིན་གནང་སྐབས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་དཔ་ཕོག་མེད་པར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྒྲོམ་གཞིར་གཞི་བཅོལ་ཐོག་དམ་འཛིན་གནང་དགོས་པ་གསུངས་འདུག རྩ་བའི་ད་རེས་ལྷན་ཚོགས་ཐེངས་ ༤༡ པ་དེ་ཟླ་ ༦ ཚེས་ ༢༤ ནས་ཟླ་ ༧ ཚེས་ ༡༢ བར་བདུན་ཕྲག་གསུམ་གྱི་རིང་ཚོགས་ཡོད་པ་རེད།ཤེས་རྟོགས་བྱུང་བར་ལྷན་ཚོགས་དང་བསྟུན་རེས་གཟའ་པ་སངས་ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་ཚོས་རྒྱལ་ཚོགས་ཀྱི་མདུན་དུ་ཞི་རྒོལ་གྱི་ལས་འགུལ་སྤེལ་འཆར་ཡོད་པ་མ་ཟད། གཟའ་འཁོར་རྗེས་མའི་རེས་གཟའ་མིག་དམར་ཉིན་སུད་སི་སྐུ་ཚབ་དོན་གཅོད་ཁང་གི་གོ་སྒྲིག་འོག་རྒྱལ་ཚོགས་ཀྱི་ཆེད་ལས་མི་སྣ་གདན་ཞུས་ཀྱིས་བོད་ནང་གི་ཆོས་དད་རང་དབང་དང་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐོར་ཟུར་ཚོགས་ཤིག་ཀྱང་གནང་རྒྱུ་རེད་འདུག སྤྱིར་ཚོགས་མི་རྒྱལ་ཁབ་ ༤༧ ལས་གྲུབ་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཁང་གི་ལྷན་ཁང་གིས་ལོ་རེའི་ཕྱི་ཟླ་གསུམ་དང་དྲུག་པ་། དེ་བཞིན་ཕྱི་ཟླ་བཅིུག་བཅས་ཁག་སོ་སོར་ལྷན་ཚོགས་ཐེངས་གསུམ་རེ་ཚོགས་ཀྱི་ཡོད་པ་དང་། ལྷན་ཚོགས་སོ་སོའི་ནང་གཙོ་བོ་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་དང་བགྲོ་གླེང་བཅས་གནང་གི་ཡོད་པ་རེད། ད་རེས་ཕྱི་ཟླ་ ༦ པའི་ལྷན་ཚོགས་ཐོག་འཛམ་གླིང་རྒྱལ་ཁབ་ཁག་སོ་སོའི་ནང་གི་སྨྲ་བརྗོད་རང་དབང་དང་། འདུ་འཛོམས་རང་དབང་། ཤེས་ཡོན་རང་དབང་། སྲོག་ཁྲིམས། དབུལ་ཕོངས་དང་བེུད་ཀྱི་ཐོབ་ཐང་སོགས་ཀྱི་ཐོག་རྒྱལ་ཚོགས་ཀྱི་ཁྱད་ལས་མི་སྣ་ཞིབ་འཇུག་གནང་བའི་སྙན་ཐོ་འདོན་སྤེལ་དང་བགྲོ་གླེང་སོགས་གནང་གི་ཡོད་པ་རེད།

ཨ་རི་ཕྱི་སྲིད་ལས་ཁུངས་ཀྱི་ཕྱི་ལོ་ ༢༠༡༨ ལོའི་རྒྱལ་སྤྱིའི་ཆོས་དད་རང་དབང་གནས་བབས་ཀྱི་ལོ་འཁོར་སྙན་ཐོའི་ནང་འདས་པའི་ལོ་ངོ་གཅིག་གི་ནང་ཚུད་ལ་ཨ་རི་གཞུང་ནས་རྒྱ་ནག་གི་མཐོ་རིམ་འགོ་ཁྲིད་ཚོ་དང་མཇལ་འཕྲད་གནང་སྐབས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཙམ་མིན་པར་བོད་མིའི་ཆོས་དད་རང་དབང་ལ་བརྩི་བཀུར་དགོས་པའི་སྐུལ་མ་ལན་མང་གནང་ཡོད་ཀྱང་། རྒྱ་ནག་ཕྱོགས་ནས་བཟང་ཕྱོགས་ཀྱི་འགྱུར་བ་མེད་པའི་ཁར་བོད་མིའི་ཆོས་དད་རང་དབང་ཐོག་སྔར་ལྷག་དམ་དྲག་བྱེད་བཞིན་ཡོད་པ་ཐེར་འདོན་གྱིས་གསུངས་འདུགཟླ་བ་འདིའི་ཕྱི་ཚེས་ ༢༡ ཉིན་ཨ་རིའི་གཞུང་འབྲེལ་ལས་བྱེད་དང་དང་གནད་ཡོད་མི་སྣ་སོགས་འདུ་འཛོམས་སར་ཨ་རི་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་ཀྱིས་ཡོངས་གྲགས་སུ་འདོན་སྤེལ་གནང་བའི་ ༢༠༡༨ ལོའི་རྒྱལ་སྤྱིའི་ཆོས་དད་རང་དབང་གནས་བབས་ཀྱི་ལོ་འཁོར་སྙན་ཐོ་དེར་ཁྱོན་ཤོག་གྲངས་ ༨༧ ལྷག་འདུག དེའི་ནང་ནས་རྒྱ་ནག་སྡེ་ཚན་ཁོངས་སུ་རྒྱ་ནག་དང་། བོད། ཤིན་ཅང་། ཧོང་ཀོང་། མ་ཁའོ་བཅས་སྡེ་ཚན་ལྔ་སོ་སོའི་ནང་གི་ཆོས་དད་རང་དབང་སྐོར་ཆེད་བཀོད་གནང་ཡོད།བོད་དང་འབྲེལ་བའི་སྡེ་ཚན་ཁོངས་སུ་ཨ་རི་ཕྱི་སྲིད་ལས་ཁུངས་ནས་རྒྱ་གཞུང་གི་རྩ་ཁྲིམས་དོན་ཚན་ ༣༠ པར་ས་གནས་མི་ཚོར་ཆོས་དད་ཀྱི་རང་དབང་ཡོད་པ་ཁ་གསལ་འཁོད་ཡོད་ཀྱང་། འདས་ལོ་ ༢༠༡༨ ལོར་རྒྱ་ནག་གཞུང་ནས་ཆོས་ཕྱོགས་ཀྱི་ལས་དོན་རྣམས་རྒྱལ་ཁབ་ཀྱི་བདེ་འཇགས་དང་མཐུན་པ་དགོས་སྐོར་སོགས་ཀྱི་ཁྲིམས་གཞི་གསར་པ་གཏན་འབེབས་ཀྱིས་རྒྱ་གཞུང་གིས་དབྱེད་བའི་བོད་རང་སྐྱོང་ལྗོངས་གཙོ་བོར་གྱུར་པའི་བོད་ཀྱི་ས་གནས་ཁག་ཏུ་ཡོད་པའི་དགོན་སྡེ་གྲྭ་ཚང་གི་དཔེ་ཁྲིད་ལས་དོན་ལ་དམ་དྲག་དང་། ཉིན་རེའི་ཆོས་ཕྱོགས་ཀྱི་བྱ་བ་ལ་ཐེ་བྱུས་སོགས་བྱས་པ་མ་ཟད་འདས་ལོའི་ནང་རྒྱ་གཞུང་གི་དམ་དྲག་སྲིད་བྱུས་འོག་གྲྭ་བཙུན་ཁག་གཅིག་ལ་སྡུག་སྦྱོང་མནར་གཅོད་དང་ཁག་གཅིག་ལ་ངེས་མེད་འཛིན་བཟུང་སོགས་བྱས་སྟབས། བོད་པའི་གྲྭ་བཙུན་ཁག་གཅིག་ད་ལྟའི་ཆར་གར་སོང་ཆ་མེད་དུ་གྱུར་ཡོད་ཅེས་གསུངས་འདུགལྷག་པར་དུ་སྙན་ཐོའི་ནང་འདས་ལོ་ ༢༠༡༨ ལོར་རྒྱ་གཞུང་གི་དྲག་པོའི་སྲིད་བྱུས་ལ་མ་བཟོད་པར་རང་ལུས་མེར་བསྲེགས་གནང་མཁན་རྒྱལ་གཅེས་པ་ཚེ་ཁོ་ལགས་ཀྱིས་གཙོས་པའི་གཞན་གསུམ་གྱི་ལོ་རྒྱུས་དང་། རྒྱ་ནག་གཞུང་ནས་བོད་དཀར་མཛེས་གསེར་རྟ་བླ་རུང་སྒར་དང་ཡ་ཆེན་སྒར་བཅས་སུ་གྲྭ་ཤག་ ༡༥༠༠ གཏོར་བཤིག་བཏང་བ་མ་ཟད། གྲྭ་བཙུན་ ༣༠༠༠ ཕྱིར་འབུད་བཏང་བའི་གནས་ཚུལ་སོགས་འབུར་འདོན་དང་སྦྲགས། རྒྱ་གཞུང་ནས་བོད་མིའི་ཆོས་ཕྱོགས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དུས་ནས་དུས་སུ་མཚན་སྨད་ཞུས་པ་དང་མགོན་པོ་༸གང་ཉིད་མཆོག་དབུས་བོད་ཀྱི་བླ་སྤྲུལ་རྣམ་པའི་༸སྐུའི་ཡང་སྲིད་ཀྱི་གནད་དོན་ཐོག་མུ་མཐུད་ཐེ་བྱུས་བྱེད་བཞིན་པ་སོགས་ཐེར་འདོན་གནང་འདུགས་གནས་བོད་མི་ཚོར་སྲོལ་རྒྱུན་གྱི་ཆོས་ཕྱོགས་ལས་དོན་བྱེད་རྒྱུར་བཀག་སྡོམ་དང་གནས་སྐོར་སྐྱོད་མཁན་ཚོར་མཐོང་མཆན་མ་སྤྲད་པ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུ་གཙོས་ཆོས་ཕྱོགས་མཛད་སྒོ་ཁག་ལ་དམ་དྲག་བྱེད་བཞིན་ཡོད་པ་སོགས་ཐེར་འདོན་དང་འབྲེལ། ཨ་རིའི་གཞུང་ནས་བོད་ནང་གི་གནས་སྟངས་ལ་ཐུགས་ཚབས་ཆེན་པོ་ཡོད་པ་མ་ཟད་བོད་མི་ཚོར་གདུང་སེམས་མཉམ་བསྐྱེད་མཚོན་ཆེད་སྔ་ལོར་ཨ་རིའི་རྒྱལ་སར་ཚོགས་པའི་རྒྱལ་སྤྱིའི་ཆོས་དད་རང་དབང་གི་ཆེས་མཐོའི་ལྷན་ཚོགས་སྐབས་ཨ་རིའི་སྲིད་འཛིན་གཞོན་པ་སྐུ་ཞབས་ Mike Pence མཆོག་དང་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་རྣམ་གཉིས་ནས་བོད་མིའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་མཇལ་མོལ་གནང་ཡོད་པ་སོགས་གསུངས་འདུགགཞི་རྩའི་ཨ་རི་ཕྱི་སྲིད་ལས་ཁུངས་ནས་ལོ་ལྟར་རྒྱལ་སྤྱིའི་ཐོག་ཆོས་དད་རང་དབང་གི་གནས་བབས་གོང་མཐོར་ཡོང་སླད་རྒྱལ་ཁབ་སོ་སོའི་ནང་གི་ཆོས་དད་རང་དབང་གི་གནས་བབས་ཐོག་སྙན་ཐོ་འདོན་སྤེལ་གནང་བཞིན་ཡོད་པ་དང་། ཐེངས་འདིའི་སྙན་ཐོའི་ནང་རྒྱལ་ཁབ་ ༢༠༠ འི་ཆོས་དད་རང་དབང་སྐོར་བཀོད་ཡོད་པ་དང་། སྙན་ཐོ་དེ་འདོན་སྤེལ་གནང་སྐབས་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་ནས་ཆོས་དད་རང་དབང་གི་སྙན་ཐོ་འདི་ནི་སྲིད་འཛིན་སྐུ་ཞབས་ Donald Trump མཆོག་གི་སྲིད་གཞུང་ཙམ་མ་ཟད་ཁོང་སྐུ་སྒེར་གྱི་ངོས་ནས་གནད་འགག་ཆེན་པོ་ཞིག་ཏུ་ངོས་འཛིན་གནང་གི་ཡོད་པ་གསུངས་ཡོད།