རྒྱལ་སྤྱི།

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi  མཆོག་ཐའེ་ཝན་ནང་ཕྱོགས་ཕེབས་དང་འབྲེལ་ནས་རྒྱ་ནག་གིས་ཁུལ་དེའི་མཚོ་ཁར་མེ་ཤུགས་འཕུར་མདའ་བདེ་སྤྱོད་ཀྱི་སྔར་ལས་ལྷག་པའི་དྲག་པོའི་འཇིགས་སྐུལ་བྱེད་བཞིན་ཡོད་པ་དང་བསྟུན། དེ་རིང་ལྕམ་སྐུ་མཆོག་གིས་ཉི་ཧོང་ནང་རྒྱ་ནག་གིས་ཨ་རིའི་དཔོན་རིགས་བཀག་འགོག་གིས་ཐའེ་ཝན་ནམ་ཡང་ཁྱེར་རྐྱང་བཞག་ཐུབ་ཀྱི་མ་རེད་ཅེས་གསུངས་འདུགདེ་ཡང་ཕྱི་ཚེས་ ༣ ཉིན་ལྕམ་སྐུ་མཆོག་ནས་ཐའེ་ཝན་གྱི་སྲིད་འཛིན་མཆོག་དང་མཇལ་འཕྲད་ཀྱིས་ཨ་རིས་ཐའེ་ཝན་གྱི་མང་གཙོ་སྲུང་སྐྱོབ་དང་འབྲེལ་བ་སྔར་ལྷག་སྲ་བརྟན། དེ་བཞིན་རྒྱབ་སྐྱོར་ཚད་མཐོ་བོ་གནང་ཡོད་པ་བསྟུན། རྒྱ་ནག་གིས་གནད་དོན་དེར་འཁོན་ལན་ཤུགས་ཆེར་བྱེད་བཞིན་ཡོད་པའི་ཁྲོད་ཁ་སྔོན་ཕྱི་ཚེས་ ༣ ནས་ཁུལ་དེའི་མཚོ་ཁར་དམག་སྦྱོང་བྱས་འགོ་བཙུགས་ཡོད་པ་དང་། ལྕམ་སྐུ་མཆོག་ཐའེ་ཝན་གྱི་ཕྱོགས་བསྐྱོད་མཇུག་སྒྲིལ་ཏེ་ལྷོ་ཀོ་རིའི་ཕྱོགས་སུ་ཐོན་མ་ཐག་རྒྱ་ནག་གི་ཁ་སྔོན་ལས་ལྷག་པར་ཁུལ་དེའི་མཚོ་ཁར་མེ་ཤུགས་འཕུར་མདའ་ཧ་ཅང་ཉེན་ཁ་ཆེ་བ་རྣམས་བེད་སྤྱོད་ཀྱིས་མཚོ་གླིང་གི་མཐའ་མཚམས་བརྒལ་ཏེ་འཇིགས་སྐུལ་དང་སྦྲགས་དམག་སྦྱོང་བྱེད་བཞིན་ཡོད་པར་དེ་རིང་ལྕམ་སྐུ་མཆོག་ནས་རྒྱ་གར་ཞི་བདེའི་རྒྱ་མཚོའི་ཁུལ་གྱི་ཕྱོགས་བསྐྱོད་མཐའ་མ་ཉི་ཧོང་དུ་ཆེད་ཕེབས་ཀྱིས་སྐབས་དེར་ཁོང་གིས་རྒྱ་ནག་གིས་ཨ་རིའི་དཔོན་རིགས་བཀག་འགོག་གིས་ཐའེ་ཝན་ནམ་ཡང་ཁྱེར་རྐྱང་བཞག་ཐུབ་ཀྱི་མ་རེད་ཅེས་གསུངས་པ་དང་འབྲེལ་ནས་དེ་རིང་རྒྱ་ནག་གིས་ལྕམ་སྐུ་མཆོག་ཁ་སྔོན་ཐའེ་ཝན་དུ་ཕེབས་པར་རྒྱ་ནག་རྒྱལ་ཁབ་ཀྱི་ཁྲིམས་དང་བརྒལ་ཡོད་པའི་སྐྱོན་བརྗོད་དང་འབྲེལ་ཁོང་དང་འབྲེལ་ཡོད་ནང་མིར་སྲིད་དོན་ཉེས་ཆད་བཀལ་ཡོད་པ་རེད་འདུག བརྒྱུད་ལམ་ཁག་གི་ནང་གནས་ཚུལ་སྤེལ་བ་གཞིགས་ན་རྒྱ་ནག་གིས་ཁུལ་དེར་དམག་སྦྱོང་གི་འཇིགས་སྐུལ་ཙམ་མ་ཟད། ཐའེ་ཝན་གྱི་སྲིད་འཛིན་ལས་ཁུངས་གཙོས་བདེ་སྲུང་དང་ཕྱི་སྲིད་ལས་ཁུངས་ཀྱི་དྲྭ་ཐོག་གསང་ཉུལ་ཀྱིས་གནས་ཚུལ་འཇབ་རྐུས་སོགས་ཀྱི་དཀའ་ངལ་ཡང་བྱུང་ཡོད་པ་རེད་འདུག འོན་ཀྱང་ཐའེ་ཝན་འཛིན་སྐྱོང་གི་མགྲིན་ཚབ་པ་སྐུ་ཞབས་ Lo Pong-cheng ལགས་ཀྱིས་གསུངས་དོན་ལྟར་ན། ཐའེ་ཝན་ངོས་ནས་དྲྭ་རྒྱའི་བདེ་འཇགས་ཆེད་འཕྲུལ་ཆས་གསར་པ་ཞིག་འགོ་འཛུགས་བྱས་ཡོད་པས་དྲྭ་རྒྱའི་བདེ་འཇགས་ལ་ཉེན་ཁ་མེད་སྐོར་མངོན་གསལ་གནང་ཡོད་པ་རེད་འདུགདེ་བཞིན་ཐའེ་ཝན་གྱི་སྲིད་འཛིན་མཆོག་གིས་ཁ་སང་ཕྱི་ཚེས་ ༤ ཕྱི་དྲོ་གསར་འགོད་གསལ་བསྒྲགས་ཤིག་སྤེལ་ཡོད་པ་དེའི་ནང་། ཐའེ་ཝན་ངོས་ནས་རྙོག་དྲ་བསླང་འདོད་མེད་ལ་རྙོག་དྲ་རྒྱུད་སྐུལ་ཡང་བྱེད་འདོད་མེད། འོན་ཀྱང་ང་ཚོས་བློ་རྩ་བརྟན་པོས་ཐོག་ནས་རྒྱལ་ཁབ་ཀྱི་བདག་དབང་དང་བདེ་འཇགས་སྲུང་སྐྱོབ་ཐོག་ནས་མང་གཙོ་དང་རང་དབང་སྲུང་སྐྱོབ་བྱ་རྒྱུ་ཡིན་པ་ནན་བརྗོད་གནང་འདུག་པ་མ་ཟད། རྒྱ་ནག་གིས་འགན་ཁུར་མེད་པར་དེ་ལྟ་བུའི་དམག་སྦྱོང་བྱེད་བཞིན་པའི་ཁྲོད་ཧ་ཅང་ཉེན་ཁ་ཆེ་བའི་མེ་ཤུགས་འཕུར་མདའ་བེད་སྤྱོད་བྱེད་པ་དེས་ཐའེ་ཝན་ཙམ་མིན་པར་རྒྱལ་སྤྱིའི་སྤྱི་ཚོགས་ཀྱི་ཆེས་གནད་འགག་ཅན་གྱི་ཚོང་ལམ་ཐད་ལའང་འགོག་རྐྱེན་ཆེན་པོ་བཟོས་ཀྱི་ཡོད་པ་དང་ཆབས་ཅིག རྒྱ་གར་ཞི་བདེ་རྒྱ་མཚོའི་ཁུལ་ཀྱི་བདེ་འཇགས་ལའང་གནོད་ཀྱི་ཡོད་སྐོར་གསུངས་འདུགརྩ་བའི་ཁ་སང་ཕྱི་ཚེས་ ༤ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Pelosi མཆོག་གི་ཐའེ་ཝན་ཕྱོགས་བསྐྱོད་མཇུག་སྒྲིལ་ནས་ལྷོ་ཀོ་རི་ཡའི་ཕྱོགས་སུ་ཕེབས་ཐོན་གྱིས་ཁ་སང་ཁུལ་དེའི་གྲོས་ཚོགས་ཀྱི་ཚོགས་གཙོ་མཆོག་དང་གྲོས་ཚོགས་འཐུས་མི་རྣམས་མཇལ་འཕྲད་གནང་ཡོད་པ་རེད། སྐབས་དེར་ཕན་ཚུན་བར་གྱི་འབྲེལ་ལམ་བཟང་དུ་གཏོང་ཕྱོགས་སོགས་ཀྱི་སྐོར་བཀའ་མོལ་གནང་ཡོད་པ་མ་ཟད། ཕན་ཚུན་ཐུན་མོང་གིས་ཐོག་ནས་བྱང་ཀོ་རི་ཡས་རྡུལ་ཕྲན་མཚོན་ཆའི་ཉེན་ཁ་འགོག་ཐབས་དང་དེར་གདོང་ལེན་སོགས་ཀྱི་ཐད་ལ་གྲོས་མོལ་བྱུང་ཡོད་འདུག འོན་ཀྱང་ཁུལ་དེའི་སྲིད་འཛིན་སྐུ་ཞབས་ Yoon Suk Yeol མཆོག་དང་ལྷན་དུ་དངོས་སུ་མཇལ་འཕྲད་བྱུང་མེད་ཀྱང་ཞལ་པར་བརྒྱུད་ཐུན་མོང་གི་མཐུན་གྲོས་དང་ཕྱི་འབྲེལ་སྲིད་ཇུས། དེ་བཞིན་གལ་ཆེའི་གནད་དོན་གཞན་རྣམས་བཀའ་བསྡུར་གནང་ཡོད་པ་རེད། དེ་རྗེས་ལྕམ་སྐུ་མཆོག་ཁ་སང་ཕྱི་ཚེས་ ༤ ཕྱི་དྲོ་ཉི་ཧོང་དུ་ཆེད་ཕེབས་ཀྱིས་དེ་རིང་ཞོགས་པ་ཁུལ་དེའི་སྲིད་བློན་སྐུ་ཞབས་ Fumio Kishida མཆོག་དང་མཇལ་འཕྲད་གནང་ཡོད་པ་རེད་འདུགགཞི་རྩའི་ལྕམ་སྐུ་མཆོག་གི་ཐའེ་ཝན་ཕྱོགས་བསྐྱོད་དེས་རྒྱ་ནག་ལ་ཧ་ཅང་ཕོག་ཐུག་བྱུང་ཡོད་སྟབས། ལྕམ་སྐུ་མཆོག་ཐའེ་ཝན་ནས་ཕེབས་ཐོན་གནང་མ་ཐག་རྒྱ་ནག་གིས་ཁུལ་དེར་སྔར་ལྷག་དྲག་པོའི་དམག་སྦྱོང་བྱས་འགོ་བཙུགས་ཡོད་པ་དང་བསྟུན། བརྒྱུད་ལམ་ཁག་གིས་གནས་ཚུལ་སྤེལ་བར་གཞིགས་ན། རྒྱ་ནག་གི་མེ་ཤུགས་འཕུར་མདའ་ ༥ ཉི་ཧོང་གི་ཆེས་གནད་འགག་ཅན་གྱི་དཔལ་འབྱོར་ས་ཚིགས་སུ་བབས་ཡོད་པ་འཁོད་འདུག གནས་ཚུལ་དེ་བྱུང་འཕྲལ་ཉི་ཧོང་གི་སྲིད་བློན་སྐུ་ཞབས་ Kishida མཆོག་གིས་རྒྱ་ནག་གི་དམག་སྦྱོང་དེ་བཞིན་ཁུལ་དེའི་བདེ་འཇགས་དང་ཞི་བདེ་ལ་ཧ་ཅང་དཀའ་ངལ་ཆེན་པོ་ཞིག་བཟོ་བཞིན་ཡོད་པས་འཕྲལ་དུ་མཚམས་འཇོག་དགོས་པ་གསུངས་འདུགདེ་བཞིན་དེ་རིང་ཨ་རིའི་ཕྲི་སྲིད་དྲུང་ཆེ་སྐུ་ཞབས་ Antony Blinken མཆོག་ནས་ཨེ་ཤི་ཡའི་ཆེས་མཐོའི་ཕྱི་འབྲེལ་མི་སྣའི་ལྷན་དུ་ཚོགས་འདུའི་སྐབས་རྒྱ་ནག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi  མཆོག་གི་ཐའེ་ཝན་ཕྱོགས་བསྐྱོད་ལ་དེ་ལྟ་བུའི་རྣམ་འགྱུར་སྟོན་པ་དེ་ཧ་ཅང་ཁོང་ཁྲོ་སློང་གཞི་ཞིག་ཡིན་སྐོར་གསུངས་ཡོད་པ་དང་ཆབས་ཅིག ཨོས་ཊོ་ལིཡའི་སྲིད་བློན་སྐུ་ཞབས་ Anthony Albanese མཆོག་གིས་རྒྱ་ནག་གི་བྱ་སྤྱོས་དེར་སྐྱོན་བརྗོད་དང་སྦྲགས། ཁོང་གིས་སྤྱིར་རྒྱ་ནག་དང་ལྷན་དུ་མཉམ་ལས་དང་བཟང་ཕྱོགས་ཀྱི་འབྲེལ་ལམ་མུ་མཐུད་འཛིན་འདོད་ཡོད་ཀྱང་གཞི་རྩའི་ཨོས་ཊོ་ལིཡའི་རྒྱལ་ཁབ་རང་ཉིད་ཀྱི་རིན་ཐང་དང་ཁེ་ཕན་ཐོག་བཞེངས་ཕྱོགས་བརྟན་པོ་ཡོད་པ་གསུངས་འདུག

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས་ཐའེ་ཝན་ནང་ལོ་རྒྱུས་ཀྱི་རང་བཞིན་ལྡན་པའི་ཕྱོགས་བསྐྱོད་མཇུག་སྒྲིལ་དང་སྦྲགས། ཁ་ས་ཕྱི་དྲོ་ལྷོ་ཀོ་རི་ཡའི་ཕྱོགས་སུ་ཐོན་མ་ཐག་རྒྱ་ནག་ངོས་ནས་ཐའེ་ཝན་གྱི་མཐའ་སྐོར་ས་ཚིགས་བདུན་ཙམ་གྱི་ནང་མཁའ་དམག་དཔུང་འཇོག་གིས་དམག་སྦྱོང་བྱེད་འགོ་བཙུགས་ཡོད་པ་རེད།བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་སྤྱི་འཐུས་ཚོགས་གཞོན་མཆོག་ནས་རྒྱ་ནག་གི་བྱེད་སྟངས་འདིར་སྐྱོན་བརྗོད་ཤུགས་ཆེ་གནང་འདུག་པ་མ་ཟད། བོད་མིའི་སྒྲིག་འཛུགས་ཀྱི་མགྲིན་ཚབ་པའི་ངོས་ནས་ཀྱང་ཨ་རི་དང་རྒྱ་ནག་གཉིས་བར་ཕན་ཚུན་གྲོས་མོལ་གནང་སྟེ་དཀའ་ངལ་སེལ་ཐབས་གནང་དགོས་པ་འགྲེལ་བརྗོད་གནང་སོང་།དེ་ཡང་ཁ་སང་ཕྱི་ཚེས་ ༣ ཉིན་ ANI གསར་ཁང་ནས་སྤེལ་བའི་གནས་ཚུལ་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ལྕམ་སྐུ་ Pelosi མཆོག་གི་ཐའེ་ཝན་གྱི་ཕྱོགས་བསྐྱོད་དེ་འོས་འཚམས་ཞིག་ལ་འགྲེལ་བརྗོད་དང་འབྲེལ། རྒྱ་ནག་གིས་གནད་དོན་དེ་ཇི་ཙམ་གྱི་ཆེན་པོ་བཟོས་པ་དེ་ཙམ་གྱིས་ཨ་རི་དང་རྒྱ་ནག་གཉིས་དབར་གྱི་མ་འོངས་འབྲེལ་ལམ་དོ་ཕོག་འགྲོ་ངེས་ཡིན་སྐོར་གསུངས་འདུག ཁོང་གིས་ད་དུང་ཐའེ་ཝན་དེ་ཉིད་རྒྱ་ནག་གི་རྒྱལ་རྒྱུད་སྤྱི་འདྲ་ཞིག་གི་འོག་ནམ་ཡང་གནས་མྱོང་མེད་པ་འགྲེལ་བརྗོད་དང་འབྲེལ། ཁུལ་དེ་བཞིན་མང་གཙོའི་ལམ་ལུགས་དང་མཐུན་པའི་ཐོག་ནས་ཞི་བདེ་ལྷིང་འཇགས་ངང་གནས་བཞིན་པའི་ཁྲོད་འདིར་རྒྱ་ནག་གིས་རྒྱུ་མཚན་གང་གི་ཕྱིར་དེའི་ཐོག་བདག་དབང་རྩོད་བཞིན་ཡོད་དམ་ཞེས་དྲི་བ་དང་འབྲེལ་ནས་སྐྱོན་བརྗོད་ནན་པོ་གནང་འདུགདེ་བཞིན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་ལགས་ནས་ཀྱང་རྒྱ་ནག་གིས་ལྕམ་སྐུ་ Pelosi  མཆོག་གི་ཐའེ་ཝན་ཕྱོགས་བསྐྱོད་ལ་དེ་ལྟ་བུའི་བློ་འཚབ་བྱ་དགོས་དོན་གང་ཡིན་ནམ་ཞེས་དྲི་བ་ནན་བརྗོད་དང་འབྲེལ། ལྕམ་སྐུ་མཆོག་གིས་ཕྱོགས་བསྐྱོད་དེ་ནི་མང་གཙོའི་ལམ་ལུགས་ལྡན་པའི་རྒྱལ་ཁབ་དེའི་རང་དབང་གི་རིན་ཐང་མཚོན་གྱི་ཡོད་སྐོར་གསུངས་བ་མ་ཟད།  འཛམ་གླིང་ཁྱོན་ཡོངས་ནས་ད་རེས་རྒྱ་ནག་གིས་འཇིགས་སྐུལ་ལ་ལྟོས་མེད་ལྕམ་སྐུ་མཆོག་གི་སྙིང་སྟོབས་ལ་དམིགས་ལྟོས་བྱ་དགོས་ལ། རྒྱ་ནག་གིས་བྱ་སྤྱོད་ངན་པ་དག་ལ་མཉམ་རུབ་ཀྱི་གདོང་ལེན་བྱ་དགོས་པ་གསུངས་འདུགགཞི་རྩའི་ལྕམ་སྐུ་མཆོག་གིས་ཁ་སང་ཐའེ་ཝན་ནང་སྲིད་འཛིན་ Tsai Ing-wenm མཆོག་མཇལ་འཕྲད་དང་འབྲེལ། ཨ་རིའི་ངོས་ནས་ཐའེ་ཝན་གྱི་མང་གཙོ་སྲུང་སྐྱོབ་བྱ་རྒྱའི་ཆོད་སེམས་མུ་མཐུད་བརྟན་པོ་ཡིན་པའི་འགྲེལ་བརྗོད་གནང་བ་མ་ཟད། ཡུལ་དེའི་གྲོས་ཚོགས་ལ་ཆེད་ཕེབས་ཀྱིས་གསུང་བཤད་དང་། དེ་བཞིན་ཐའེ་ཝན་གྱི་འགྲོ་བ་མིའི་ཐོབ་ཐང་གི་འགྲེམས་སྟོན་ཁང་དུ་ཆེད་ཕེབས་ཀྱིས་ཡུ་གུར་མི་རིགས་གནམ་སྡེ་སྒོ་མོ་ཕྱེའི་མང་གཙོའི་ལས་འགུལ་བ་ Wuer Kaixi དང་། དེ་སྔ་རྒྱ་ནག་གིས་བཙོན་འཇུག་རྗེས་ཐའེ་ཝན་དུ་སྐྱབས་བཅོལ་ལ་ཕེབས་པའི་ཧོང་ཀོང་གི་དོབ་ཚོང་བ་གྲགས་ཅན་ Lam Wing-kee དང་། རྒྱ་ནག་གི་བཙོན་ཁང་ནང་ལོ་ ༥ བཙོན་འཇུག་བྱེད་མྱོང་ཡོད་པའི་ཐའེ་ཝན་གྱི་རང་དབང་རྩོད་ལེན་པ་ Lee Ming-che དེ་བཞིན་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟད་རྒྱལ་མཚན་ལགས་སོགས་དང་ལྷན་མཇལ་འཕྲད་གནང་ཡོད་པ་རེད།ལྕམ་སྐུ་མཆོག་གིས་སྣེ་འཁྲིད་པའི་སྐུ་ཚབ་རྣམས་ཁ་སང་ཐའེ་ཝན་ནས་ཕེབས་ཐོན་གྱིས་དེ་རིང་ལྷོ་ཀོ་རི་ཡའི་གྲོས་ཚོགས་ཀྱི་ཚོགས་གཙོ་མཇལ་འཕྲད་གནང་ཡོད་པ་དང་། ལྷོ་ཀོ་རི་ཡའི་རྗེས་ཉི་ཧོང་ལ་ཆེད་ཕེབས་གནང་གི་ཡོད་པ་རེད་འདུག

རྒྱ་ནག་གི་ཉེན་བརྡ་རིམ་པ་ལ་མ་ལྟོས་པར་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་ཁ་སང་ཕྱི་དྲོ་ཐའེ་ཝན་ལ་གཞུང་འབྲེལ་ཆེད་ཕེབས་གནང་བ་མ་ཟད། དེ་རིང་ཡུལ་དེའི་སྲིད་འཛིན་ Tsai ing-wen མཆོག་གིས་ལྕམ་སྐུ་ Pelosi མཆོག་ལ་ Order of Propitius Cloud ཞེས་པའི་ཐའེ་ཝན་གྱི་ཆེ་བསྟོད་གཟེངས་རྟགས་ཞིག་འབུལ་བཞེས་ཞུས་སྐབས། ལྕམ་སྐུ་མཆོག་གིས་ཨ་རིའི་ངོས་ནས་ཐའེ་ཝན་གྱི་མང་གཙོ་སྲུང་སྐྱོབ་བྱ་རྒྱུའི་ཆོད་སེམས་དེ་ཉིད་ Iron-clad འམ་ལྕགས་གོས་ལྟ་བུ་བརྟན་པོ་ཡིན་པའི་འགྲེལ་བརྗོད་གནང་འདུགལྕམ་སྐུ་ Pelosi མཆོག་ནི་མི་ལོ་༢༥ རྗེས་ཐའེ་ཝན་ལ་འཚམས་གཟིགས་སུ་ཕེབས་པའི་ཨ་རིའི་དཔོན་རིགས་མཐོ་ཤོས་དེ་ཆགས་ཡོད་པ་དང་། ཁོང་ཐེངས་འདིར་ཐའེ་ཝན་དུ་ལོ་རྒྱུས་ཀྱི་རང་བཞིན་ལྡན་པའི་ཕྱོགས་བསྐྱོད་སླད་འབྱོར་བའི་གནས་ཚུལ་ཐོན་མ་ཐག་རྒྱ་ནག་གཞུང་ངོས་ནས་ཨ་རིའི་གཞུང་ཚབ་ཆེན་མོ་འབོད་འགུགས་ཀྱིས་ཉེན་བརྡ་ནན་པོ་བཏང་བ་མ་ཟད། མཁའ་དམག་གནམ་གྲུ་ ༢༠ ལྷག་ཐའེ་ཝན་ཕྱོགས་སུ་བཏང་ཡོད་པ་དང། དེ་བཞིན་ཐའེ་ཝན་དང་ལྷན་དུ་ཟས་རིགས་ཚོང་འབྲེལ་ལ་སོགས་པའི་ཚོང་སྒོ་མང་པོ་ཞིག་བཀག་བ་དང་ཆབས་གཅིག ཐའེ་ཝན་གྱི་མཐའ་འཁོར་དུ་དམག་སྦྱོང་བྱ་རྒྱུ་གསལ་བསྒྲགས་སྤེལ་ཡོད།ལྕམ་སྐུ་ Nancy Pelosi མཆོག་གིས་གང་ལྟར་དེ་རིང་ཐའེ་ཝན་གྱི་སྲིད་འཛིན་མཆོག་མཇལ་འཕྲད་དང་། ཡུལ་དེའི་གྲོས་ཚོགས་ལ་གཏམ་བཤད་སྤེལ་བ་མ་ཟད། ཐའེ་ཝན་གྱི་སྲིད་འཛིན་ནས་ལྕམ་སྐུ་མཆོག་ལ་ཡུལ་དེའི་ཆེས་མཐོའི་གཟེངས་རྟགས་འབུལ་བཞེས་ཞུ་སྐབས། ལྕམ་སྐུ་མཆོག་གིས་གསུངས་བཤད་ཁྲོད་སྲིད་འཛིན་ Tsai ing-wen མཆོག་ལ་འཛམ་གླིང་ནང་ཁྱེད་ལྟ་བུ་བེུད་དབུ་ཁྲིད་ཅིག་ཡོད་པ་དེ་གཟི་བརྗིད་དང་སྤོབས་པ་བྱེད་འོས་པ་ཞིག་ཡིན་སྐོར་འགྲེལ་བརྗོད་དང་འབྲེལ། ཨ་རི་དང་ཐའེ་ཝན་དབར་ Taiwan Relations Act ཞེས་པའི་ཐའེ་ཝན་དང་འབྲེལ་ལམ་ཁྲིམས་གཞི་བཞག་ནས་ད་བར་མི་ལོ་ ༤༣ ཕྱིན་ཡོད་པ་དང་། ཨ་རིའི་ངོས་ནས་ཁྲིམས་གཞི་དེའི་བརྒྱུད་ཐའེ་ཝན་དང་ལྷན་དུ་དུས་རྟག་ཏུ་བཞེངས་རྒྱུའི་དམ་བཅའ་ཡོད་པ་བཞིན། ཁོང་གིས་སྣེ་འཁྲིད་པའི་གྲོས་ཚོགས་ཀྱི་ཆེས་མཐོའི་སྐུ་ཚབ་རྣམས་ད་རེས་ཐའེ་ཝན་ལ་རྒྱབ་སྐྱོར་མཚོན་ཆེད་ཁུལ་དེར་ཆེད་ཕེབས་གནང་ཡོད་པ་དང་། དེང་སྐབས་འཛམ་གླིང་ཁྲོད་མང་གཙོ་དང་མི་གཅིག་དབང་སྒྱུར་རིང་ལུགས་ཀྱི་འདམས་ཁ་གཉིས་ཡོད་པའི་སྐབས་འདིར། ཨ་རིའི་ངོས་ནས་ཐའེ་ཝན་གྱི་མང་གཙོ་སྲུང་སྐྱོབ་བྱ་རྒྱུའི་ཆོད་སེམས་དེ་བཞིན་ Iron-Clad འམ་ལྕགས་གོས་ལྟ་བུ་ཡིན་པར་གསུངས་འདུགསྐབས་དེར་ཐའེ་ཝན་གྱི་སྲིད་འཛིན་ Tsai ing-wen མཆོག་གིས་ཀྱང་། ལྕམ་ Pelosi  མཆོག་དང་གྲོས་ཚོགས་འཐུས་མིའི་སྐུ་ཚབ་རྣམས་ཁུལ་དེར་ཕེབས་པར་དགའ་བསུའི་འཚམས་འདྲི་ཞུས་པ་དང་སྦྲགས། ཁྱེད་རྣམས་ཁུལ་དེར་ཕེབས་པ་དེས་ང་ཚོར་རྒྱབ་སྐྱོར་ཆེན་པོ་ཞིག་མཚོན་གྱི་ཡོད་སྐོར་མ་ཟད། ལྕམ་སྐུ་མཆོག་གིས་ལོ་མང་པོའི་རིང་རང་དབང་དང་མང་གཙོ། དེ་བཞིན་འགྲོ་བ་མིའི་ཐོབ་ཐང་སོགས་ཀྱི་སྲུང་སྐྱོབ་སླད་དུ་གདོང་ལེན་རིམ་པ་གནང་ཡོད་པ་དེར་བསྔགས་བརྗོད་དང་སེམས་འགུལ་ཆེན་པོ་ཐེབས་ངེས་ཡིན་པ་གསུངས་ཡོད། དེ་བཞིན་སྲིད་འཛིན་མཆོག་ནས་ཐའེ་ཝན་འདི་ཉིད་རྒྱ་གར་ཞི་བདེའི་རྒྱ་མཚོའི་ཁུལ་གྱི་བདེ་འཇགས་ལ་གནད་འགག་ཆེན་པོ་ཆགས་ཀྱི་ཡོད་པ་ཆབས་ཅིག རྒྱ་གཞུང་གིས་འཇིགས་སྐུལ་ལ་ཞུམ་དགོས་དོན་མེད་པ་མཟད། ཐའེ་ཝན་རྒྱལ་ཁབ་ཀྱི་མང་གཙོ་སྲུང་སྐྱོབ་ཆེད་གདོང་ལེན་དང་། འཛམ་གླིང་ཞི་བདེ། དེ་བཞིན་རྒྱ་གར་ཞི་བདེའི་རྒྱ་མཚོའི་ཁུལ་གྱི་བདེ་འཇགས་ལ་ཐའེ་ཝན་ངོས་ནས་རམས་འདེགས་ཞུ་རྒྱུ་ཆོད་སེམས་བརྟན་པོ་ཡོད་པ་མ་ཟད། ཨ་རི་ལྷན་དུ་སྔར་ལྷག་འབྲེལ་བ་གོང་སྤེལ་བྱ་རྒྱུ་ཡིན་པ་བཅས་གསུངས་འདུགགནས་ཚུལ་ཐོན་ཁག་ལ་གཞིགས་ན། རྒྱ་ནག་ངོས་ནས་ལྕམ་སྐུ་མཆོག་གི་ཕྱོགས་བསྐྱོད་དེར་ངོ་རྒོལ་མཚོན་ཆེད། ཐའེ་ཝན་ནས་ཤིང་ཏོག་དང་ཉའི་ཐོན་ཁུངས་རིགས་ནང་འདྲེན་དང་། དེ་བཞིན་ཐའེ་ཝན་ལ་བྱེ་མའི་ཐོན་ཁུངས་ཕྱིར་བཙོང་བྱ་རྒྱུ་མཚམས་འཇོག་བྱས་པ་མ་ཟད། ཨ་རིའི་ཆེས་མཐོའི་སྐུ་ཚབ་རྣམས་ཁུལ་དེ་ནས་ཕྱིར་ཐོན་མ་ཐག སང་ཉིན་ནས་ཐའེ་ཝན་མཚོ་གླིང་གྱི་མཐའ་སྐོར་དུ་དམག་སྦྱོང་བྱ་རྒྱུའི་གསལ་བསྒྲགས་བྱས་པ་ལྟར། ཐའེ་ཝན་ངོས་ནས་ད་ལྟའི་འཆར་ཉི་ཧོང་དང་། Philippines ལྷན་དུ་གྲོས་མོལ་བརྒྱུད་མཚོ་ལམ་གཞན་འཚོལ་ཐབས་བྱེད་བཞིན་པ་རེད་འདུགགཞི་རྩའི་ལྕམ་སྐུ་མཆོག་ནས་ཁ་སང་དགོང་མོ་ཐའེ་ཝན་དུ་འབྱོར་མ་ཐག་རང་ཉིད་ཀྱི་ Tweeter དྲ་ལམ་ཐོག་ཐེངས་འདིའི་ཕྱོགས་བསྐྱོད་དེ་བཞིན་ཨ་རིས་ཐེ་ཝན་གྱི་མང་གཙོ་ལ་རྒྱབ་སྐྱོར་བརྟན་པོ་མཚོན་གྱི་ཡོད་སྐོར་དང་། ཁུལ་དེའི་གཙོ་འཛིན་ལྷན་དུ་གྲོས་མོལ་བྱ་རྒྱུ་དེའང་ཐེ་ཝན་གཙོས་རྒྱ་གར་ཞི་བདེའི་རྒྱ་མཚོའི་ཁུལ་གྱི་ཨ་རིའི་མཐུན་ཕྱོགས་རྒྱལ་ཁབ་ཁག་གི་རང་དབང་དང་ཞི་བདེ། དེ་བཞིན་ཕན་ཚུན་གཉིས་ཀའི་མཐུན་ཕྱོགས་དེ་དག་གི་ཐོག་ལ་ཨ་རིས་རྒྱབ་སྐྱོར་ཤུགས་ཆེར་མཚོན་གྱི་ཡོད་པ་བཀོད་འདུགསྤྱིར་ལྕམ་སྐུ་ Pelosi མཆོག་གིས་སྣེ་འཁྲིད་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོ་ཁག་ཁུལ་དེར་ལོ་རྒྱུས་ཀྱི་རང་བཞིན་ལྡན་པའི་ཕྱོགས་བསྐྱོད་ལ་ཕེབས་པ་དང་བསྟུན། ཐའེ་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་དང་མཇལ་འཕྲད་གནང་ཡོད་པ་དང་འབྲེལ་ཁོང་ལ་བཀའ་འདྲི་ཁག་ཞུས་པ་གཤམ་འོག་གི་སྒྲ་ཐོག་བརྒྱུད་གསན་ཐུབ། དེ་བཞིན་ཐའེ་ཝན་དུ་གནས་བཞུགས་བོད་མི་ཁག་གཅིག་གིས་ཀྱང་སྐུ་ཚབ་ཚོགས་པའི་བཞུགས་གནས་མགྲོན་ཁང་དུ་བསྐྱོད་ནས་ལག་ཏུ་བོད་ཀྱི་རྒྱལ་དར་ནབ་བཞིན་ཁོང་རྣམ་པས་དགའ་བསུའི་རྣམ་པ་ཤུགས་ཆེར་བཏོན་གནང་འདུག འདི་ག་རླུང་འཕྲིན་ཁང་ནས་དེའི་ཁོངས་སུ་ཡོད་པའི་བོད་དང་ཐའེ་ཝན་གྱི་འགྲོ་བ་མིའིི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲིས་ཚེ་རིང་ལགས་སུ་བཀའ་འདྲི་ཁག་ཅིག་ཞུས་པ་གཤམ་འོག་གི་སྒྲ་ཐོག་བརྒྱུད་གསན་ཐུབ། སྐུ་ཚབ་དོན་གཅོད་པར་དབང་RFA

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་རེས་གཟའ་ཟླ་བའི་ཉིན་ Singapore ནང་ཆེད་ཕེབས་དང་འབྲེལ་ཨེ་ཤི་ཡའི་རྒྱལ་ཁབ་བཞིའི་ནང་གི་གཞུང་འབྲེལ་ཕྱོགས་བསྐྱོད་དབུ་འཛུགས་གནང་ཡོད་པ་དང་། ཐེངས་འདིའི་ཕྱོགས་བསྐྱོད་ཀྱི་ལས་འཆར་ནང་ཁོང་ཐའེ་ཝན་ནང་ཕེབས་རྒྱུ་བཀོད་མེད་ཀྱང་། མཚན་གསལ་མི་གནང་བའི་ཨ་རི་དང་ཐའེ་ཝན་གྱི་གཞུང་འབྲེལ་མི་སྣ་འགས་ལྕམ་སྐུ་མཆོག་དེ་རིང་ཕྱི་དྲོ་ཐའེ་ཝན་ལ་ཕེབས་རྒྱུ་ཡིན་པའི་སྐོར་འགྲེལ་བརྗོད་གནང་བའི་ཁྲོད། རྒྱ་ནག་ངོས་ནས་སླར་ཡང་ཨ་རིར་ཉེན་བརྡ་ཤུགས་ཆེ་བཏང་བ་དང་ཆབས་གཅིག ཐེ་ཝན་ཕྱོགས་ནས་ཀྱང་རྒྱ་ནག་ལ་གདོང་ལེན་གྱིས་དམག་དོན་གྲ་སྒྲིག་བྱེད་བཞིན་པ་མ་ཟད། ཨ་རིས་ཕོ་བྲང་དཀར་པོས་ལྕམ་སྐུ་མཆོག་ལ་ཐའེ་ཝན་ནང་ཕེབས་རྒྱུའི་རང་དབང་ཆ་ཚང་ཡོད་པ་དང་། རྒྱ་ནག་གིས་དེ་འབྲེལ་འཇིགས་སྐུལ་བྱེད་བཞིན་པ་དེར་ཨ་རིའི་ངོས་ནས་ཞེད་དགོས་དོན་གང་ཡང་མེད་པའི་འགྲེལ་བརྗོད་བྱས་འདུགདེ་ཡང་ཨ་རིའི་ཕོ་བྲང་དཀར་པོའི་རྒྱལ་ཡོངས་བདེ་འཇགས་ལས་ཁུངས་ཀྱི་མགྲིན་ཚབ་པ་སྐུ་ཞབས་ཇྷོན་ཁར་བི་ John  Kirby ལགས་ཀྱིས་རྒྱ་ནག་ངོས་ནས་ལྕམ་སྐུ་མཆོག་གི་ཕྱོགས་བསྐྱོད་དེ་དཀའ་ཉེན་ཆེ་བའི་གནད་དོན་ལ་འགྱུར་རྒྱུ་མེད་པ་དང་། རྒྱ་ནག་གིས་ད་ཆ་ཐའེ་ཝན་ཉེ་འགྲམ་དུ་དམག་སྦྱོང་སོགས་བྱེད་བཞིན་པའི་འཇིགས་སྐུལ་དེར་ཨ་རིའི་ངོས་ནས་ཞེད་དགོས་དོན་མེད་ལ། ཨ་རིས་ངོས་ནས་དམག་འཐབ་སོགས་ཀྱི་ནང་བཞུགས་འདོད་མེད་སྐོར་འགྲེལ་བརྗོད་གནང་འདུགསྐུ་ཞབས་  Kirby ལགས་ཀྱིས་ད་དུང་ཨ་རིའི་གྲོས་ཚོགས་ཀྱི་ཚོགས་གཙོ་མཆོག་དེ་སྔ་ཡང་ཁུལ་དེར་ཕེབས་མྱོང་ཡོད་པ་མ་ཟད། ལོ་འདིའི་ནང་ཨ་རིའི་གྲོས་ཚོགས་འཐུས་མི་གཞན་མང་པོ་ཞིག་ཀྱ་ཁུལ་དེར་ཕེབས་མྱོང་ཡོད་པར་བརྟེན། ད་རེས་ལྕམ་སྐུ་མཆོག་ཀྱང་ཁུལ་དེར་ཕེབས་རྒྱུའི་རང་དབང་ཆ་ཚང་ཡོད་པ་གསུངས་ཡོད།དེ་བཞིན་ཐའི་ཝན་གྱི་སྲིད་བློན་ངོས་ནས་ལྕམ་སྐུ་མཆོག་ལྟ་བུ་ཕྱི་རྒྱལ་གྱི་སྐུ་མགྲོན་སུ་འདྲ་ཞིག་ཕེབས་ན་དགའ་བསུ་ཞུ་རྒྱུ་དང་། འབྲེལ་ཡོད་གྲ་སྒྲིག་ཆ་ཚང་ཞུ་རྒྱུ་ཡིན་སྐོར་གསུང་འདུག་པ་དང་། དེ་བཞིན་ཐའི་ཝན་རྒྱལ་སྲུང་ལས་ཁུངས་ངོས་ནས་ཀྱང་རྒྱལ་ཁབ་དེའི་བདེ་འཇགས་སྲུང་རྒྱུའི་གདེང་ཚོད་དང་ཆོད་སེམས་བརྟན་པོ་ཡོད་སྐོར་གསུང་ཡོད་པ་མ་ཟད། དམག་མི་རྣམས་ཀྱི་གུང་སེང་སོགས་ཀྱང་མེད་པ་བཟོས་ཏེ་རེ་ཞིག་དམག་དོན་གྲ་སྒྲིག་བྱེད་བཞིན་ཡོད་པ་རེད་འདུགསྤྱིར་བརྒྱུད་ལམ་ཁག་གཅིག་གི་ནང་གནས་ཚུལ་སྤེལ་བར་གཞིགས་ན། ལྕམ་སྐུ་མཆོག་ནས་ཕྱོགས་བསྐྱོད་ཀྱི་མཛད་འཆར་ཁྲོད་ཐའེ་ཝན་དུ་ཕེབས་ཏེ་སང་ཉིན་ཕྱི་ཚེས་ ༣ ཉིན་ཁུལ་དེའི་སྲིད་འཛིན་ལྕམ་སྐུ་ Tsai Ing-wen མཆོག་དང་མཇའ་འཕྲད་གནང་རྒྱུ་ཡིན་པ་འཁོད་འདུག ཡང་གནས་ཚུལ་གཞན་ཁག་གཅིག་ནང་ལྕམ་སྐུ་མཆོག་དེ་རིང་ཕྱི་དྲོ་ཐའེ་ཝན་དུ་ཕེབས་འབྱོར་གྱིས་མཚན་གཅིག་བཞུགས་བཞག་གནང་རྒྱུ་འཁོད་འདུག གང་ལྟར་གལ་ཏེ་དེ་ལྟར་བྱུང་ཚེ་དེ་སྔ་ཕྱི་ལོ་ ༡༩༩༧ ལོའམ་མི་ལོ་ ༢༥ སྔོན་ཨ་རིའི་གྲོས་ཚོགས་ཀྱི་ཚོགས་གཙོ་སྐུ་ཞབས་ Newt Gingrich ལགས་ཀྱི་རྗེས་སུ་ལྕམ་སྐུ་མཆོག་ནི་ཨ་རིའི་མཐོ་གྲས་དཔོན་རིགས་ཁུལ་དེར་ཕེབས་མཁན་ཐེངས་གཉིས་པ་དེ་ཆགས་ཀྱི་ཡོད་པ་རེད་འདུགརྩ་བའི་རྒྱ་ནག་གཞུང་གིས་ངོས་ནས་ལྕམ་སྐུ་མཆོག་ཁུལ་དེར་ཕྱོགས་བསྐྱོད་དེས་མང་གཙོའི་ལམ་ལུགས་གོང་སྤེལ་ལ་ཉེན་ཁ་ཆེན་པོ་ཞིག་མཐོང་གི་ཡོད་པ་མ་ཟད། ཁུལ་དེ་ནི་རྒྱ་ནག་གི་ཆ་ཤས་ལྡོག་ཏུ་མེད་པ་ཞིག་ཡིན་པ་དང་། རྒྱ་ནག་རྒྱལ་ནང་གི་གནད་དོན་ལ་ཕྱི་ཕྱོགས་ནས་ཐེ་བྱུས་བྱས་ཚེ་འཁོན་ལེན་ནན་པོ་བྱ་རྒྱུ་ཡིན་པའི་འགྲེལ་བརྗོད་བྱེད་བཞིན་ཡོད་པ་རེད། གཞི་རྩའི་ཨ་རི་དང་ཐེ་ཝན་གཉིས་ཀྱི་བར་གཞུང་འབྲེལ་གྱི་ཐོག་ནས་ཕན་ཚུན་འབྲེལ་བ་མེད་ཀྱང་དེ་སྔོན་ཕྱི་ལོ་ ༡༩༧༩ ལོར་ཐེ་ཝན་གྱི་བདེ་འཇགས་ལ་ཨ་རིས་རོགས་སྐྱོར་བྱ་རྒྱུའི་ཁྲིམས་འཆར་ཨ་རི་དང་ཐེ་ཝན་འབྲེལ་བ་ཞེས་པ་ཞིག་བཞག་ཡོད་པའི་རྐྱེན་གྱིས་ཕན་ཚུན་འབྲེལ་བ་དེ་ལྟར་བྱུང་བ་ཞིག་ཡིན་པ་རེད་འདུག

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy pelosi མཆོག་གིས་ཨེ་ཤི་ཡའི་རྒྱལ་ཁབ་བཞིའི་ནང་ཕྱོགས་བསྐྱོད་དབུ་འཛུགས་གནང་ཡོད་ཀྱང་ཐེངས་འདིར་ཐེ་ཝན་དུ་ཕྱོགས་བསྐྱོད་ཀྱི་མཛད་འཆར་མངོན་གསལ་མེད་པ་རེད་འདུགདེ་ཡང་ཕྱི་ཟླ་ ༧ ཚེས་ ༣༡ ཉིན་ཨ་རིའི་གྲོས་ཚོགས་འོག་མའི་ཚོགས་གཙོའི་ལས་ཁུངས་ནས་སྤེལ་བའི་གསར་འགོད་གལས་བསྒྲགས་ནང་ལྕམ་སྐུ་ Nancy Pelosi མཆོག་གི་སྣེ་འཁྲིད་འོག་གྲོས་ཚོགས་འཐུས་མིའི་སྐུ་ཚབ་རྣམས་ཨེ་ཤི་ཡའི་རྒྱལ་ཁབ་སིང་ག་པུར་དང་། མ་ལེ་ཤི་ཡ། དེ་བཞིན་ལྷོ་ཀོ་རི་ཡ་དང་ཉི་ཧོང་བཅས་རྒྱ་གར་ཞི་བདེ་རྒྱ་མཚོའི་ཁུལ་དུ་ཕྱོགས་བསྐྱོད་ཕེབས་རྒྱུ་དང་ཆབས་ཅིག ཕྱོགས་བསྐྱོད་དེའི་དགོས་དམིགས་གཙོ་བོ་ནི། རྒྱ་གར་ཞི་བདེའི་རྒྱ་མཚོའི་ཁུལ་དུ་ཡོད་པའི་ཨ་རིའི་མཐུན་ཕྱོགས་རྒྱལ་ཁབ་རྣམས་ཀྱི་ཐུན་མོང་བདེ་འཇགས་དང་། དཔལ་འབྱོར། དེ་བཞིན་མང་གཙོའི་ལམ་ལུགས་གོང་སྤེལ་བྱ་རྒྱུ་བཅས་ཡིན་པ་འཁོད་འདུག དེ་བཞིན་ཚོགས་གཙོ་མཆོག་ནས་ཀྱང་གསར་འགོད་གསལ་བསྒྲགས་སྐབས་ཕྱོགས་བསྐྱོད་འདི་བཞིན་རྒྱ་གར་ཞི་བདེའི་རྒྱ་མཚོའི་ཁུལ་གྱི་ཨ་རིའི་མཐུན་ཕྱོགས་རྒྱལ་ཁབ་བར་གཡོ་བ་མེད་པའི་འབྲེལ་བ་དམ་ཟབ་ཡོད་པ་ཞིག་མཚོན་གྱི་ཡོད་སྐོར་དང་། ཨ་རིས་འཆར་གཞི་ལྡན་པའི་ཐོག་ཁུལ་དེར་བྱེད་སྒོ་འཐུས་ཚང་ཡོང་རྒྱུ་དམ་བཅའ་བརྟན་པོ་ཡོད་པ་མ་ཟད། རྒྱ་གར་ཞི་བདེ་རྒྱ་མཚོའི་ཁུལ་འདི་བཞིན་འཛམ་གླིང་ཡོངས་ཀྱི་ཞི་བདེ་ལ་གལ་འགངས་ཆེན་པོ་ཞིག་ཡིན་པ་གསུངས་འདུགརྩ་བའི་ལྕམ་སྐུ་མཆོག་འདི་ལོ་ཕྱི་ཟླ་ ༤ པའི་ནང་ཐེ་ཝན་དུ་བསྐྱོད་འཆར་གནང་ཡོད་ཀྱང་། སྐབས་དེར་ཁོང་ལ་ཏོག་དབྱིབས་གཉན་རིམས་ཕོག་པའི་རྐྱེན་གྱིས་ཕྱོགས་བསྐྱོད་ཕྱིར་འགྱངས་གནང་དགོས་བྱུང་བ་དང་། འདི་ལོ་ལྕམ་སྐུ་མཆོག་དངོས་སུ་ཐའེ་ཝན་དུ་ཕེབས་ཚེ་དེ་སྔ་མི་ལོ་ ༢༥ སྔོན་ཨ་རིའི་གྲོས་ཚོགས་ཀྱི་ཚོགས་གཙོ་སྐུ་ཞབས་ Newt Gingrich ལགས་ཀྱི་རྗེས་སུ་ཨ་རིའི་གྲོས་ཚོགས་འཐུས་མི་མཐོ་གྲས་ཕེབས་མཁན་ཐེངས་གཉིས་པ་དེ་ཆགས་ཀྱི་ཡོད། དེ་རྗེས་ཚོགས་གཙོ་མཆོག་ཕྱི་ཟླ་ ༧ པའི་ནང་ཐའེ་ཝན་དུ་ཕྱོགས་བསྐྱོད་གནང་འཆར་ཡོད་པའི་ཡོངས་ཁྱབ་གནས་ཚུལ་བྱུང་ཡོད་ཀྱང་གནད་དོན་དེའི་ཐད་རྒྱ་ནག་གཞུང་གིས་གལ་ཏེ་ལྕམ་སྐུ་མཆོག་དངོས་སུ་ཐའེ་ཝན་དུ་ཕེབས་ཚེ་ཨ་རིའི་ལོ་རྒྱུས་ཀྱི་རང་བཞིན་ལྡན་པའི་ནོར་འཁྲུལ་ཞིག་དང་། རྒྱ་ནག་གིས་ངོས་ནས་དེར་འཁོན་ལེན་ནན་པོ་བྱ་རྒྱུ་ཡིན་པ་བརྗོད་ཡོད།མ་ཟད་ཕྱི་ཟླ་ ༧ ཚེས་ ༢༨ ཉིན་ཨ་རྒྱ་གཉིས་ཀྱི་སྲིད་འཛིན་བར་དྲ་ཐོག་བརྒྱུད་བཀའ་མོལ་གནང་བའི་སྐབས། ཞི་ཅིང་ཕིང་གིས་ཨ་རིས་ངོས་ནས་རྒྱ་ནག་གཅིག་གི་སྲིད་ཇུས་ལ་རྩིས་སྲུང་ཞུ་དགོས་པ་དང་། གལ་ཏེ་མ་བྱུང་ན་སུས་མེ་ལ་འཆང་ཚེ་འཚིག་རྒྱུ་ཡིན་པའི་ཉེན་བརྡའང་བཏང་ཡོད། སྐབས་དེར་ཨ་རིའི་སྲིང་འཛིན་མཆོག་ནས་ཞི་ཅིང་ཕིང་ལ་ཐེ་ཝན་གནད་དོན་ཐད་ཨ་རིའི་བཞེངས་ཕྱོགས་འགྱུར་བ་ཕྱིན་མེད་སྐོར་དང་། རྒྱ་ནག་གིས་ཕྱོགས་གཅིག་ཁོ་ནའི་བརྒྱུད་ཐེ་ཝན་གྱི་གནད་དོན་ཐད་འགྱུར་བ་དང་། དེ་བཞིན་ཁུལ་དེའི་ཞི་བདེ་དང་སྲ་བརྟན་ལ་སྣང་ཆུང་བྱེད་པ་དེ་ཧ་ཅང་མི་འོས་པ་ཞིག་ཡིན་པར་སྐྱོན་བརྗོད་བྱས་ཡོད།རྩ་བའི་ད་རེས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་རྒྱ་གར་ཞི་བདེའི་རྒྱ་མཚོའི་ཁུལ་དུ་ཨ་རིའི་མཐུན་ཕྱོགས་རྒྱལ་ཁབ་ཁག་གི་ནང་ཕྱོགས་བསྐྱོད་མཛད་འཆར་ཡོད་པ་དེའི་ནང་ཐེ་ཝན་འཁོད་མེད་ན་ཡང་རྒྱ་གར་ཞི་བདེའི་རྒྱ་མཚོའི་ཁུལ་འདི་བཞིན་རྒྱ་ནག་གི་ལོ་ཤས་སྔོན་ནས་ཐེ་བྱུས་ཤུགས་ཆེར་བྱས་བཞིན་ཡོད་པའི་རྐྱེན་གྱིས་ད་རེས་རྒྱ་ནག་གིས་གོའང་ཅོ་ Guangzhou ལྷོ་མཚོ་ཁུལ་དང་། ཐེ་ཝན་ནས་སྤྱི་ལེ་ ༡༠༠ ལྷག་གི་མཚམས་སུ་ཡོད་པའི་ཕྷུ་ཤན་ Fuijan ཞིང་ཆེན་གྱི་མཚོ་ཁ་རུ་དམག་སྦྱོང་བྱེད་བཞིན་ཡོད་པར་ཉེན་བརྡ་མངོན་གསལ་གཏོང་བཞིན་ཡོད་པ་རེད་འདུག གཞི་རྩའི་ལྕམ་སྐུ་མཆོག་གིས་ཨེ་ཤི་ཡའི་ཕྱོགས་བསྐྱོད་དེ་ནི་ཨ་རི་དང་རྒྱ་ནག་བར་གྱི་ཆབ་སྲིད་ཀྱི་གནད་དོན་ཛ་དྲག་ཞིག་ཏུ་གྱུར་ཡོད་པ་མངོན་གསལ་བྱུང་ཡོད།

ཨ་རིར་གནས་བཞུགས་རྒྱ་རིགས་མཁས་དབང་བཞི་ནས་ཉེ་སྔོན་ཕྱི་ཟླ་ ༧ ཚེས་ ༡༣ ཉིན་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་དང་འབྲེལ་བའི་ཁྲིམས་འཆར་ཞིག་བཏོན་པ་དེས་མ་འོངས་པར་བོད་དོན་ཐོག་ཤུགས་རྐྱེན་ཆེན་པོ་ཞིག་འཐེབ་རྒྱུར་ངོས་འཛིན་དང་སྦྲགས། ཁྲིམས་འཆར་དེའི་བརྒྱུད་ཨ་རིས་གཙོས་པའི་མང་གཙོ་རྒྱལ་ཁབ་རྣམས་ནས་བོད་རྒྱའི་དཀའ་རྙོག་གི་ཐད་ལ་བཞེངས་ཕྱོགས་མངོན་གསལ་གནང་ཡོད་པ་ཞིག་ཀྱང་མཚོན་གྱི་ཡོད་སྐོར་གསུངས་འདུགདེ་ཡང་ཨ་རིའི་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་བོད་དོན་ཁྲིམས་འཆར་དེ་དང་འབྲེལ་ཕྱི་སྡོད་རྒྱ་རིགས་མཁས་དབང་བཞི་དང་ལྷན་འབྲེལ་བ་ཞུ་པར་ Colorado གཙུག་ལག་སློབ་ཁང་གི་ཉམས་ཞིབ་པ་སྐུ་ཞབས་ཏིང་ཡི་ཧྥུ་ Ding Yifu ལགས་ཀྱིས་ཁྲིམས་འཆར་དེའི་བརྒྱུད་བོད་རྒྱ་འབྲེལ་མོལ་ཡོང་ཐབས་དང་། འབྲེལ་མོལ་དེའི་བརྒྱུད་ནས་ཕན་ཚུན་གཉིས་མོས་ཀྱི་ཐོག་ནས་བསམ་ཤེས་དང་ཡིད་ཆེས་ཙམ་མ་ཟད། འདས་པའི་ལོ་རྒྱུས་ནང་བོད་རྒྱ་གཉིས་ཞི་བདེ་ལྷིང་འཇགས་ངང་མཉམ་གནས་བྱས་མྱོང་ཡོད་པའི་དེ་སྔའི་གནས་བབ་དེའང་སྐྱར་གསོ་ཐུབ་སྲིད་པ་ཞིག་འགྲེལ་བརྗོད་གནང་འདུགཁོང་གིས་ད་དུང་བོད་རྒྱ་གཉིས་ནི་ངོ་བོ་དང་། མི་རིགས་སོགས་ཐ་དད་ཡིན་པ་ལོ་རྒྱུས་དང་དངོས་བོའི་གནས་ཚུལ་གྱི་ཐོག་ནས་ར་སྤྲོད་ཐུབ་ཡོད་པ་མ་ཟད། བོད་ཀྱི་རིག་གཞུང་འདི་བཞིན་རྒྱ་ནག་གི་རིག་གཞུང་དང་ལོགས་སུ་ཡོད་པར་བརྟེན། བོད་མི་རིགས་རྒྱ་འགྱུར་དང་བོད་ཀྱི་ནང་ཆོས་རྒྱ་ནག་ཅན་དུ་འགྱུར་རྒྱུ་སོགས་ནི་ཡོང་མི་སྲིད་པ་ཞིག་ཡིན་པར་སྐྱོན་བརྗོད་དང་། སྔ་ཕྱི་མ་གཏོགས་རིམ་པས་རྒྱ་དམར་གཞུང་ནས་བོད་ཐོག་བཞེངས་ཕྱོགས་འགྱུར་བ་བྱུང་ངེས་པ་ཞིག་དང་། རིམ་པས་མཁྲེགས་འཛིན་གྱི་སྲིད་བྱུས་དེ་དག་སྤངས་ཏེ། བོད་མིའི་མངོན་འདོད་དང་ཐོབ་ཐང་ལ་གུས་བཀུར་ཞུས་ངེས་པ་ཡིན་པ་སྐོར་དང་། དེ་ལྟར་ཡོང་ཐབས་སུ་ངེས་པར་བཙན་བྱོལ་བོད་མིའི་སྒྲིག་འཛུགས་དང་ལྷན་དུ་འབྲེལ་མོལ་གནང་དགོས་པ་སོགས་གསུངས་འདུགདེ་བཞིན་རྒྱ་རིགས་རྩོམ་པ་པོ་དང་པེ་ཅིང་དཔྱིད་ཀའི་དུས་དེབ་ཀྱི་སྤྱི་ཁྱབ་རྩོམ་སྒྲིག་པ་སྐུ་ཞབས་ཝུ་ཕིངས་ Hu Ping ལགས་ཀྱིས་དེང་སང་རྒྱ་རིགས་ནང་དབུ་མའི་ལམ་གྱི་སྲིད་བྱུས་དེ་ཉིད་ཤེས་པའི་ཐོག་ནས་རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་ཡོད་པ་མ་ཟད། ཐེངས་འདིའི་ཁྲིམས་འཆར་བརྒྱུད་བོད་མིའི་རང་དབང་གོང་སྤེལ་གཅིག་པུ་མིན་པར་འཛམ་གླིང་སྤྱིའི་ཞི་བདེ་དང་དྲང་བདེན། དེ་བཞིན་རྒྱ་རིགས་ཀྱི་རྩ་དོན་ལའང་ཕན་ཐོགས་ཆེན་པོ་ཡོད་སྐོར་གསུངས་པ་དང་འབྲེལ། བོད་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་དང་བོད་མི་རིགས་ཀྱི་ངོ་བོ་དང་རྒྱལ་ཞེན་རྩ་གཏོར་གཏོང་བཞིན་པའི་དུས་སྐབས་འདིར་ཁྲིམས་འཆར་འདི་བཞིན་དུས་ཐོག་ཏུ་བཏོན་ཐུབ་པ་བྱུང་ཡོད་སྐོར་གསུངས་འདུགདེ་དང་ཕྱོགས་མཚུངས་ནེའུ་ཡོག་ནང་རྟེན་གཞི་བྱས་པའི་ City གཙུག་ལག་སློབ་ཁང་གི་སློབ་དཔོན་ཆེན་པོ་སྐུ་ཞབས་ཤཱ་མིང་ Xia Ming ལགས་ཀྱིས་འདས་པའི་ལོ་ངོ་བཅུ་ཕྲག་གཅིག་གི་ནང་བོད་མི་གྲངས་ ༡༦༠ ཙམ་གྱིས་རང་ལུས་མེར་བསྲེགས་བརྒྱུད་བོད་མིའི་དཀའ་སྡུག་རྣམས་མངོན་གསལ་བྱས་པའི་ཁྲོད་འདིར། བོད་དོན་ཁྲིམས་འཆར་འདི་ལྟ་བུ་ནི་ཕུགས་ཀྱི་དམིགས་ཡུལ་བཟང་པོ་ཞིག་ལ་བཅངས་བའི་རྒྱལ་སྤྱིའི་གནོན་ཤུགས་ཞིག་ལ་ངོས་འཛིན་ཞུས་ཀྱི་ཡོད་སྐོར་གསུང་འདུག རྒྱ་ནག་གཞུང་གིས་མི་ལོ་༧༠ ལྷག་ཙམ་གྱི་རིང་ནས་བོད་ཆོལ་གསུམ་ཡོངས་ལ་བཙན་ཤེད་དབང་སྒྱུར་བྱེད་ཕྱོགས་དེས་ཡུལ་དེའི་ངོས་ནས་བོད་ཐོག་བདག་དབང་རྩོད་བཞིན་པ་དེ་ནམ་ཡང་ཁྲིམས་མཐུན་བཟོ་ཐུབ་ཐབས་མེད་པ་ཞིག་མ་ཟད། དེང་གི་དུས་སུ་འགན་འཁྲི་མེད་པའི་མི་གཅིག་དབང་འཛིན་གྱི་ལམ་ལུགས་དེ་གསོན་གནས་ཐུབ་ཀྱི་མེད་པ་དང་། ལྷག་པར་དུ་སྡུག་རྩུབ་ཅན་གྱི་སྲིད་གཞུང་ལ་ཁྲིམས་མཐུན་གྱི་གནས་བབ་དེ་བས་ཡོང་རྒྱུ་མེད་པའི་ནན་བརྗོད་དང་སྦྲགས། སྐྱོན་བརྗོད་ཤུགས་ཆེར་བྱས་འདུགཡང་ Hunter མཐོ་སློབ་ནང་གི་འགྲོ་བ་མིའི་ཐོབ་ཐང་ཚན་པའི་མཁས་པ་སྐུ་ཞབས་ཐེང་པཱོ་ Teng Biao ལགས་ཀྱིས་ ཐེངས་འདིའི་ཨ་རིའི་ཁྲིམས་འཆར་ལ་དགའ་བསུ་ཞུས་པ་དང་སྦྲགས། ཁྲིམས་འཆར་འདི་བཞིན་བོད་རྒྱའི་འབྲེལ་ལམ་ཐད་ཤུགས་རྐྱེན་ཆེན་པོ་ཞིག་འཐེབ་ངེས་ཡིན་སྐོར་གསུང་འདུག  ཁོང་གིས་ད་དུང་རྒྱ་ནག་གཞུང་གིས་རྒྱལ་སྤྱིའི་ཁྲིམས་དང་། རྒྱ་ནག་རང་ཉིད་ཀྱི་རྩ་ཁྲིམས། དེ་བཞིན་མི་རིགས་རང་སྐྱོང་སོགས་ཀྱི་ཁྲིམས་རྣམས་རྡོག་རོལ་དང་། བོད་གཙོས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་སྡུག་རྩུབ་དང་དྲག་སྤྱོད་ཀྱི་སྲིད་བྱུས་ལག་བསྟར་བྱེད་ཀྱི་ཡོད་པ་མ་ཟད། བོད་མི་རིགས་དང་རིགས་གཞུང་། དེ་བཞིན་ཆོས་ལུགས་སོགས་ལ་རིག་གཞུང་རྩ་གཏོར་གྱི་སྲིད་བྱུས་བརྒྱུད་མི་རིགས་ཀྱི་ངོ་བོ་རྩ་མེད་དང་བོད་མི་རྣམས་ཀྱི་གཞི་རྩའི་རང་དབང་དང་འགྲོ་བ་མིའི་ཐོབ་ཐང་སོགས་རྡོག་རོལ་གཏོང་བཞིན་ཡོད་པར་སྐྱོན་བརྗོད་ནན་པོ་དང་སྦྲགས། དེ་ལྟ་བུའི་གནས་སྟངས་ཁྲོད་ཨ་རིས་གཙོས་པའི་མང་གཙོ་རྒྱལ་ཁབ་ཁག་ནས་བོད་རྒྱའི་གནད་དོན་ཐད་བཞེངས་ཕྱོགས་གསལ་པོ་ཞིག་འཛིན་རྒྱུ་དེ་བོད་མིའི་མ་འོངས་གནས་བབ་དང་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་སླད་ཧ་ཅང་གནད་ཆེན་ཞིག་ཏུ་གྱུར་ཡོད་པ་གསུངས་འདུགགཞི་རྩའི་ཉེ་ལམ་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་བཏོན་པ་དེའི་ནང་རྒྱལ་སྤྱིའི་ཁྲིམས་འོག་ནས་བོད་ཀྱི་གནད་དོན་དེ་དུས་ད་ལྟའང་ཐག་གཅོད་མ་ཟིན་པར་ལུས་ཡོད་པ་དང་། བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པར་ངོས་འཛིན། དེ་བཞིན་༸གོང་ས་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་འབྲེལ་མོལ་བསྐྱར་གསོ་མ་གནང་བ་དེ་རྒྱ་ནག་གི་ནོར་འཁྲུལ་ཞིག་ཡིན་པ་དང་། རྒྱ་ནག་གི་ལོ་རྒྱུས་ཁྲོད་བོད་ཐོག་བདག་དབང་ཡོད་སྐོར་བརྗོད་བཞིན་པ་དེ་འཁྱོག་བཤད་འབའ་ཞིག་ཡིན་པ་སོགས་འཁོད་ཡོད། དེ་བཞིན་ཁྲིམས་འཆར་དེས་ཨ་རི་སྲིད་གཞུང་གི་བཞེངས་ཕྱོགས་མངོན་གསལ་གནང་བའི་ཐོག་ནས་ཨ་རིའི་བོད་དོན་དམིགས་བསལ་འབྲེལ་མཐུད་པར་རྒྱ་ནག་གིས་བོད་དང་བོད་དོན། ༸གོང་ས་མཆོག་དང་བོད་མིའི་སྒྲིག་འཛུགས་བཅས་ལ་འཁྱོག་བཤད་སྤེལ་བཞིན་པར་གདོང་ལེན་གྱི་ནུས་པ་ཤུགས་ཆེར་གཏང་རྒྱུ་ཡིན་པ་དང་། བོད་ཅེས་པ་བོད་རང་སྐྱོང་ལྗོངས་ཟེར་བ་ཁོ་ན་མིན་པར། ཀན་སུའུ་དང་ཟི་ཁྲོན། མཚོ་སྔོན་དང་ཡུན་ནན་ཞིང་ཆེན་ཁག་གི་ནང་འཆར་འགོད་བྱས་པའི་བོད་ཀྱི་ས་ཁུལ་ཁག་ཀྱང་དེ་མཚུངས་ཡིན་པ་མངོན་གསལ་གནང་རྒྱུ་ཡིན་པ་འཁོད་ཡོད། པར་དབང་རྒྱལ་སྤྱིའི་བོད་དོན་ལས་འགུལ་ཁང་།

དབྱིན་ཡུལ་གྱི་སྲིད་བློན་འོས་མི་སྐུ་ཞབས་ Rishi Sunak ལགས་ནས་རྒྱ་ནག་དེ་བཞིན་དབྱིན་ཡུལ་དང་འཛམ་གླིང་སྤྱིའི་བདེ་འཇགས་ལ་ཉེན་ཚབས་ཆེ་ཤོས་ཀྱི་རྒྱལ་ཁབ་ཡིན་པ་གསུངས་འདུགཟླ་བ་འདིའི་འགོ་སྟོད་ཏུ་དབྱིན་ཡུལ་གྱི་སྲིད་བློན་སྐུ་ཞབས་ Boris Johnson མཆོག་ལས་གནས་ནས་རྩ་དགོངས་ཞུ་རྒྱུའི་གསལ་བསྒྲགས་གནང་ཡོད་སྟབས། ད་ལྟའི་ཆར་དབྱིན་ཡུལ་རྒྱལ་ཁབ་ནང་སྲིད་བློན་གསར་པ་འོས་འདེམས་ཀྱི་ལས་རིམ་ཁག་འགྲོ་མུས་ཁྲོད། དབྱིན་ཡུལ་གྱི་དཔལ་འབྱོར་བློན་ཆེན་ཟུར་པ་སྐུ་ཞབས་ Rishi Sunak ལགས་དང་། ཕྱི་སྲིད་བློན་ཆེན་ལས་ཐོག་ལྕམ་སྐུ་ Liz Truss ལགས་གཉིས་མཐའ་མའི་འོས་མིའི་ཁོངས་སུ་ཚུད་ཡོད།ཁ་སྔོན་རེས་གཟའ་ཉི་མིའི་ཉིན་སྐུ་ཞབས་ Rishi Sunak ལགས་ཀྱིས་དབྱིན་ཡུལ་དང་རྒྱ་ནག་དབར་གྱི་མ་འོངས་ལས་དོན་གནང་ཕྱོགས་སོགས་ཀྱི་ཐད་བཀའ་མོལ་གནང་སྐབས་རྒྱ་ནག་རྒྱལ་ཁབ་དེ་བཞིན་དབྱིན་ཡུལ་དང་འཛམ་གླིང་སྤྱིའི་བདེ་འཇགས་ལ་ཉེན་ཚབས་ཆེ་ཤོས་ཤིག་ཡིན་སྐོར་གསུངས་པ་དང་འབྲེལ་གལ་ཏེ་མ་འོངས་པར་ཁོང་རང་དབྱིན་ཡུལ་གྱི་སྲིད་བློན་དུ་འོས་འདེམས་བྱུང་ཚེ་ལས་ཉིན་དང་པོར་དབྱིན་ཡུལ་གྱི་ཤེས་ཡོན་ལྟེ་གནས་ཁག་ཏུ་ཡོད་པའི་རྒྱ་ནག་གི་ Confucius སློབ་གླིང་ ༣༠ ཙམ་ཡོད་པ་དེ་དག་ཕྲལ་དུ་སྒོ་བརྒྱབ་ཏེ་རྒྱ་ནག་གཞུང་གིས་རིག་གཞུང་དང་སྐད་ཡིག་གི་མིང་བྱང་ཐོག་ལ་འཇམ་པོའི་སྟོབས་ཤུགས་རྒྱ་སྐྱེས་གཏོང་བཞིན་ཡོད་པ་དེ་ཉིད་འགོག་ཐབས་བྱ་རྒྱུ་ཡིན་ཞེས་གསུངས་ཡོད། ཁོང་ནས་ད་དུང་ MI5 ཞེས་པའི་དབྱིན་ཡུལ་གྱི་གསང་བའི་ལས་ཁུངས་བརྒྱུད་ཡུལ་དེའི་ནང་ཡོད་པའི་གཙུག་ལག་སློབ་ཁང་དང་ཞིབ་འཇུག་གི་ལྟེ་གནས་ཁག་གཙོས་སྡེ་ཚན་ཅི་རིགས་ནང་ཡོད་པའི་རྒྱ་ནག་དམར་ཤོག་ཚོགས་པའི་ལས་དོན་ཁག་མཚམས་འཇོག་དང། རྒྱ་ནག་གི་དྲ་རྒྱའི་བརྒྱུད་སོ་ཉུལ་ལས་དོན་བྱེད་བཞིན་པར་གདོང་ལེན། དེ་བཞིན་དབྱིན་ཡུལ་ནང་རྒྱ་རིགས་ཚོས་ཚོང་ལས་རྒྱ་ཆེར་སྤེལ་བཞིན་ཡོད་པ་དེར་ཚོད་འཛིན་དམ་བསྒྲགས་བྱ་རྒྱུ་ཡིན་ཞེས་གསུངས་ཡོད།རྒྱ་ནག་གཞུང་ནས་དབྱིན་ཡུལ་གྱི་ཚད་མཐོའི་འཕྲུལ་རིགས་ཁག་འཇབ་རྐུ་དང་ད་ཆ་ཨུ་རུ་སུའི་རྒྱལ་ཁབ་ལ་རྒྱབ་སྐྱོར། ཐེ་ཝེན་ལྟ་བུའི་ཁྱིམ་མཚེས་རྒྱལ་ཁབ་ལ་ཐུབ་ཚོད། དེ་བཞིན་རྒྱ་ནག་སྤྱི་དང་། ལྷག་པར་དུ་ཤིང་ཅང་དང་ཧོང་ཀོང་སོགས་ཀྱི་ནང་མི་སེར་ཉེས་མེད་རྣམས་འཛིན་བཟུང་བཀག་ཉར་དང་།  མནར་གཅོད་བཏང་པ་སོགས་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩི་མེད་པ་མ་ཟད། རྒྱལ་སྤྱིའི་དཔལ་འབྱོར་གནས་བབ་ཐོག་དྲང་བདེན་མེད་པ་དང་། རྒྱུད་གཅིག་ལམ་གཅིག་གི་ལས་གཞིའི་འོག་ཡར་རྒྱས་འགྲོ་བཞིན་པའི་རྒྱལ་ཁབ་རྣམས་ལ་བུ་ལོན་གྱི་བསླུ་ཁྲིད་བྱེད་བཞིན་པ་སོགས་འགྲེལ་བརྗོད་དང་སྦྲགས། རྒྱ་ནག་གིས་བྱེད་ཕྱོགས་དེ་དག་ལ་དབྱིན་ཡུལ་དང་ནུབ་ཕྱོགས་རྒྱལ་ཁབ་ཡོངས་ནས་ཤེས་རྟོགས་མེད་ཁུལ་བྱེད་བཞིན་པ་ད་ཚོད་གདོང་ལེན་བྱ་དགོས་པའི་གནས་ལ་བབས་ཟིན་ཡོད་པས། ངའི་སྲིད་བློན་ལས་ཉིན་དང་པོར་རྒྱ་ནག་གི་ཐད་བཞེངས་ཕྱོགས་དེ་ཡང་འགྱུར་བ་གཏང་རྒྱུ་ཡིན་པ་བཅས་ནན་བརྗོད་གནང་ཡོད།ད་རེས་སྐུ་ཞབས་ Rishi Sunak ལགས་ཀྱིས་རྒྱ་ནག་དང་འབྲེལ་བའི་བཀའ་མོལ་དེ་དག་དང་འབྲེལ། སྲིད་བློན་གྱི་འོས་མི་ཕྱི་སྲིད་བློན་ཆེན་ལས་ཐོག་ལྕམ་སྐུ་ Liz Truss ལགས་ཀྱིས། སྐུ་ཞབས་ Rishi Sunak ལགས་འདས་པའི་ལོ་གཉིས་ཙམ་གྱི་རིང་ལ་དབྱིན་ཡུལ་གྱི་དཔལ་འབྱོར་བློན་ཆེན་གནང་སྐབས་རྒྱ་ནག་གཞུང་གིས་ཧོང་ཀོང་དང་། ཐེ་ཝན། དེ་བཞིན་ཤིང་ཅང་སོགས་ཀྱི་ནང་ལ་དྲག་པོའི་བྱ་སྤྱོད་སྣ་ཚོགས་སྤེལ་བ་དེར་ཁ་ཁུ་སིམ་པོ་བཞུགས་ཡོད་པ་མ་ཟད། སྐབས་དེར་དབྱིན་ཡུལ་དང་རྒྱ་ནག་གཉིས་ཀྱི་དབར་ཚོང་འབྲེལ་བ་རྒྱ་སྐྱེད་གཏོང་རྒྱུའི་ཐོག་གི་བྱ་སྤྱོད་དང་ད་རེས་གསུངས་པའི་བཀའ་མོལ་གཉིས་བར་འགལ་ཟླ་ཡོད་པར་གླེང་སློང་དང་སྦྲགས། ལྕམ་སྐུ་ཁོང་སྲིད་བློན་དུ་འདེམས་ཐོན་བྱུང་ཚེ་དབྱིན་ཡུལ་དབུས་པའི་སྟོབས་ཆེན་རྒྱལ་ཁབ་བདུན་གྱི་སྒྲིག་འཛུགས་ G7 ཞེས་པ་དེ་ཡིས་ཚོང་ལས་ཁྲོད་གཙོ་བོ་རྒྱ་ནག་གཞུང་གི་ཚོང་དང་འབྲེལ་བའི་འཇིགས་སྐུལ་དང་ཉེན་ཚབས་ཁག་ལ་གདོང་ལེན་ནན་པོ་བྱ་རྒྱུ་ཡིན་ཞེས་གསུངས་ཡོད།ད་རེས་དབྱིན་ཡུལ་གྱི་སྲིད་བློན་འོས་མི་གཉིས་ནས་རྒྱ་ནག་གི་གནད་དོན་ཐོག་བཀའ་མོལ་མ་གནང་པའི་གོང་རྒྱ་ནག་གཞུང་འབྲེལ་གྱི་བརྒྱུད་ལམ་ Global Times ནང་དུ་སྲིད་བློན་འོས་མི་སྐུ་ཞབས་ Rishi Sunak ལགས་སུ་དབྱིན་ཡུལ་གྱི་སྲིད་བློན་དུ་འོས་འཚམས་ཤིག་ཡིན་སྐོར་གནས་ཚུལ་སྤེལ་ཡོད་ཀྱང་། ཁེ་ཉིན་ཁོང་ནས་རྒྱ་ནག་གིས་ལས་དོན་བྱེད་ཕྱོགས་ལ་སྐྱོན་བརྗོད་དང་སྦྲགས། རང་ཉིད་ཀྱི་ངོས་ནས་མ་འོངས་ལས་དོན་བྱ་ཕྱོགས་ཀྱི་ཐད་ཡོངས་གྲགས་གསུངས་པའི་རྗེས་རྒྱ་ནག་ཕྱི་སྲིད་ལས་ཁུངས་ནས་དབྱིན་ཡུལ་གྱི་འོས་བསྡུའི་ལས་རིམ་ཁྲོད་རྒྱ་ནག་རྒྱལ་ནང་གི་གནད་དོན་ཐོག་ཐེས་བྱུས་བྱ་རྒྱུ་མེད་སྐོར་བཤད་ཡོད་པ་རེད། རྩ་བའི་དབྱིན་ཡུལ་གྱི་རྙིང་ཞེན་ཚོགས་པའི་ Conservative Party འགོ་ཁྲིད་སྐུ་ཞབས་ Boris Johnson མཆོག་སྲིད་བློན་གྱི་ལས་ཡུན་མཇུག་སྒྲིལ་གོང་རྩ་དགོངས་ཞུ་དགོས་པའི་གནས་སྟངས་བྱུང་སྟབས། སྲིད་བློན་གྱི་འོས་བསྡུ་འདི་ཉིད་ Conservative རྙིང་ཞེན་ཆབ་སྲིད་ཚོགས་པའི་འགོ་ཁྲིད་འོས་འདེམས་ཤིག་ཀྱང་ཆགས་ཀྱི་ཡོད་སྟབས། རྙིང་ཞེན་ཚོགས་པའི་ཚོགས་མི་སྐུ་ཞབས་ Rishi Sunak ལགས་དང་། ལྕམ་སྐུ་ Liz Truss ལགས་གཉིས་ནས་གང་ཞིག་རྒྱལ་ཁ་ཐོབ་ཚེ་ཆབ་སྲིད་ཚོགས་པའི་འགོ་ཁྲིད་དང་རྒྱལ་ཁབ་ཀྱི་སྲིད་བློན་གཅིག་ལྕོགས་ཆགས་ཀྱི་ཡོད།  

བོད་མི་དང་རྒྱ་རིགས་དམངས་གཙོ་དོན་གཉེར་བར་རྒྱབ་སྐྱོར་གནང་མཁན་དང་འགྲོ་བ་མིའི་ཐོབ་ཐང་ལས་འགུལ་བ་སྐུ་ཞབས་ Drew pavlou ལགས་ཟླ་འདིའི་ཚེས་ ༢༡ ཉིན་དབྱིན་ཡུལ་གྱི་ཉེན་རྟོག་པས་ London ནང་རྟེན་གཞི་བྱས་པའི་རྒྱ་ནག་གཞུང་ཚབ་ཀྱི་མདུན་ནས་འཛིན་བཟུང་གིས་བཀག་ཉར་བྱས་ཡོད་པ་རེད་འདུགདེ་ཡང་དབྱིན་ཡུལ་གྱི་རྒྱལ་ས་ལོན་ཌོན་ London ནང་རྟེན་གཞི་བྱས་པའི་རྒྱ་ནག་གཞུང་ཚབ་པའི་མདུན་དུ་སྐུ་ཞབས་ Drew Pavlou ལགས་ཀྱིས་ཞི་བའི་ལས་འགུལ་སྤེལ་སྐབས་ཁུལ་དེའི་ཉེན་རྟོག་པས་སྐུ་ཞབས་ Drew ལགས་ཀྱིས་གློག་འཕྲིན་ཁ་བྱང་ཞིག་ནས་རྒྱ་ནག་གཞུང་གིས་ཡུ་གུར་མི་རིགས་ལ་དྲག་གནོན་མཚམས་འཇོག་མ་བྱས་ན་གཞུང་ཚབ་ཁང་འབར་རྫས་ཀྱིས་གཏོར་རྒོལ་བྱ་རྒྱུ་ཡིན་པའི་གློག་འཕྲིན་ཞིག་འབྱོར་ཡོད་ཚུལ་བརྗོད་དེ་ཁོང་འཛིན་བཟུང་གིས་བཀག་ཉར་བྱས་ཡོད་པ་རེད་འདུགལས་འགུལ་བ་སྐུ་ཞབས་ Drew pavlou ལགས་ཀྱིས་རང་ཉིད་ཀྱི་ Twitter ཐོག་ཕྱི་ཚེས་ ༢༡ ཉིན་རྒྱ་ནག་གཞུང་ཚབ་ཀྱི་མདུན་དུ་ཞི་བའི་ལས་འགུལ་སྤེལ་སྐབས་རྒྱ་ནག་གཞུང་ཚབ་པས་གློག་འཕྲིན་ཁ་བྱང་རྫུན་བཟོ་བྱས་ནས་གཞུང་ཚབ་ཁང་འབར་རྫས་ཀྱིས་གཏོར་རྒོལ་བྱ་རྒྱུའི་བྱུས་ངན་བཤམས་ཡོད་ཚུལ་སོགས་ཁུལ་དེའི་ཉེན་རྟོག་པར་རྩིས་སྤྲོད་བྱས་ནས་ཁོང་འཛིན་བཟུང་བྱས་ཡོད་པ་བཀོད་འདུག མ་ཟད་ཁ་སང་བར་ཉིན་ལྔའི་རིང་ཁོང་ལ་དཀའ་ངལ་ཆེན་པོ་ཕྲད་ཡོད་པ་དང་། ལྷག་པར་དུ་ཁོང་གི་དགའ་ཉེ་སྤུན་མཆེད་ཚང་མས་སེམས་འཚབ་ཆེན་པོ་གནང་ཡོད་སྟབས། ཨོས་ཊོ་ལི་ཡའི་གཞུང་ནས་རོགས་འདེགས་དགོས་པའི་བརྙན་ཞིག་ཀྱང་འཇོག་ཡོད་པ་རེད།སྐུ་ཞབས་ Pavlou ལགས་འཛིན་བཟུང་བྱས་པའི་གནས་ཚུལ་ཐོན་མ་ཐག་ཨོས་ཊོ་ལི་ཡར་གནས་བཞུགས་བོད་མི་མང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས་འཇིགས་སྐུལ་བྱས་པའི་གློག་འཕྲིན་ཁ་བྱང་དེ་སྐུ་ཞབས་ Pavlou ལགས་ཀྱི་མིན་པ་དང་དེ་ནི་རྫུན་བཟོ་བྱས་པའི་འགྲེལ་བརྗོད་དང་སྦྲགས། རྒྱུན་དུ་ནས་ཁོང་གིས་བདེ་སྤྱོད་བྱེད་བཞིན་པའི་གློག་འཕྲིན་ཁ་བྱང་ངོ་མ་བཀོད་དེ་དབྱིན་ཡུལ་གྱི་ངོས་ནས་ཁོང་འཕྲལ་མར་གློད་བཀྲོལ་གཏང་དགོས་པ་མ་ཟད། ཨོས་ཊོ་ལི་ཡའི་གཞུང་ནས་ཀྱང་ཁོང་བདེ་ཐང་ངང་ཁྱིམ་ལ་འཁོར་ཐབས་གནང་དགོས་པའི་གསར་འགོད་བསྒྲགས་གཏམ་ཞིག་སྤེལ་འདུག་པ་དང་། དེར་ལས་འགུལ་བ་ Drew pavlou ལགས་ཀྱིས་ Twitter དྲ་གནས་ཐོག་དྲང་བདེན་དང་རང་དབང་ལ་རྒྱབ་སྐྱོར་གནང་བར་བཀའ་དྲིན་ཆེ་ཞེས་བཀོད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་དྲོ་རྒྱ་གར་གྱི་ Odisha མངའ་སྡེའི་ Mayurbhanj རྫོངས་ཁོངས་ནས་ཡིན་པའི་ལྕམ་སྐུ་ Droupadi Murmu མཆོག་རྒྱ་གར་གྱི་སྲིད་འཛིན་སྐབས་ ༡༥ པར་བདམས་ཐོན་བྱུང་བར་དགའ་བསུའི་འཚམས་འདྲི་དང་སྦྲགས། མ་འོངས་ལས་དོན་ཁག་གང་ལེགས་གྲུབ་ཐུབ་པའི་ཐུགས་སྨོན་མཛད་འདུག དེ་ཡང་མགོན་པོ་གང་ཉིད་མཆོག་གིས་ད་ལྟའི་བཞུགས་བཞག་མཛད་ཡུལ་ལ་དྭགས་ཞི་བའི་ཚལ་ཕོ་བྲང་ནས་སྩལ་བའི་དགའ་བསུའི་འཚམས་འདྲི་དེའི་ནང་དུ་ད་ཆ་རྒྱལ་སྤྱིའི་སྤྱི་ཚོགས་ཁྱོན་ཡོངས་སུ་རྒྱ་གར་རྒྱལ་ཁབ་ཀྱི་གལ་གནད་དང་མཚན་མཐོང་གོང་འཕེལ་འགྲོ་བཞིན་པ་མ་ཟད། རྒྱ་གར་འདི་བཞིན་རྒྱལ་སྤྱིའི་ཐོག་ཞི་བདེ་དང་ཡར་རྒྱས་གོང་འཕེལ་ཐད་ཞབས་འདེགས་རླབས་ཆེན་གྲུབ་རྒྱུའི་ནུས་པ་ལྡན་པའི་རྒྱལ་ཁབ་ཞིག་ལ་ངོས་འཛིན་ཞུ་བཞིན་པའི་སྐབས་འདིར་ལྕམ་སྐུ་ Droupadi Murmu མཆོག་ནས་སྲིད་འཛིན་གྱི་ཐུགས་འགན་བཞེས་ཀྱིས་ཡོད་སྟབས། ལྕམ་སྐུ་མཆོག་གི་ལས་ཡུན་ཁྲོད་རང་ཉིད་ཀྱི་ནུས་པ་གང་ཡོད་ཀྱིས་རྒྱ་གར་རྒྱལ་ཁབ་འདི་བཞིན་མཚན་མཐོང་གོང་འཕེལ། ལྷག་པར་དུ་རྒྱ་གར་གྱི་གནའ་བོའི་རིག་གཞུང་བཟང་པོའི་བློ་སྤོབས་དང་སེམས་འགུལ་ཐེབས་པའི་ཐོག་རྒྱ་གར་གྱི་ནུས་སྟོབས་སྲ་བརྟན་དང་འཛམ་གླིང་ཞི་བདེའི་སྣེ་ཁྲིད་ཐུབ་པའི་ཡིད་ཆེས་ཡོད་ཅེས་བཀའ་སྩལ་འདུགམ་ཟད་མགོན་པོ་གང་ཉིད་མཆོག་རྒྱ་གར་གཞུང་གི་སྐུ་མགྲོན་དུས་ཡུན་རིང་ཤོས་ཤིག་ཡིན་པའི་ཆ་ནས་རྟག་ཏུ་རྒྱལ་ཁབ་འདི་ལ་གུས་བརྩི་ཞུ་བཞིན་ཡོད་པ་མ་ཟད། ལྷག་པར་དུ་འདས་པའི་ལོ་དུས་དེ་དག་རིང་རྒྱ་གར་གྱི་ས་གནས་ཕལ་མོ་ཆེར་ཕེབས་རྒྱུའི་གོ་སྐབས་བྱུང་ཡོད་པ་སོགས་བཀའ་འགྲེལ་དང་སྦྲགས། རྒྱ་གར་རྒྱལ་ཁབ་ཀྱིས་ལོ་ངོ་སྟོང་ཕྲག་རིང་སྙིང་རྗེ་དང་འཚེ་བ་མེད་པའི་རྣམ་གཞག་རྒྱུན་འཛིན་དང་། བདག་ཉིད་ཆེན་པོ་གན་དྷི་མཆོག་གིས་འཚེ་བ་མེད་པའི་རྣམ་གཞག་རྒྱ་ཁྱབ་མཛད་པ། དེ་བཞིན་ཆོས་ལུགས་སྣ་ཚོགས་མཉམ་གནས་ཐོག་ཆོས་ལུགས་མཐུན་འབྲེལ་ལྡན་པའི་རྒྱལ་ཁབ་ཞིག་ཡིན་པ་དེ་ནི་གང་ཟག་སྒེར་དང་རྒྱ་ཆེ་ས་ནས་འཛམ་གླིང་སྤྱི་ལ་ཞི་བདེ་བསྐྲུན་རྒྱུའི་ནུས་པ་ཡོད་པ་བཀའ་སྩལ་འདུག་པ་མ་ཟད་། ད་ཆ་རྒྱ་གར་གྱི་གནའ་བོའི་སེམས་ཁམས་རིག་པའི་ཤེས་ཡོན་ལ་དོ་སྣང་དང་གོ་རྟོགས་སྤེལ་ཏེ་གནའ་དེང་གྱི་ཤེས་ཡོན་གཉིས་ཆ་སྙོམ་བཟོ་དགོས་རྒྱུ་གལ་ཆེན་པོ་ཡིན་པ་དང་། དེ་ལྟར་བྱུང་ཚེ་འགྲོ་བ་མི་རྣམས་ཀྱི་སེམས་ཁམས་འཕྲོད་བསྟེན་ལ་ཕན་པ་དང་། རྒྱུན་དུ་ཉོན་མོངས་མ་རིག་པའི་བསམ་བློ་ལ་གདོང་ལེན་གྱིས་སེམས་ཞི་བདེ་དང་ལྡན་པ་ཞིག་ཡོང་རྒྱུར་དགེ་ཚན་ཡོད་པ་སོགས་བཀའ་སྩལ་དང་ཆབ་ཅིག མགོན་པོ་གང་ཉིད་མཆོག་ནས་སྙིང་རྗེའི་ནུས་པ་གཙོ་བོར་གྱུར་པའི་རིན་ཐང་བྲལ་བའི་རྒྱ་གར་གྱི་གནའ་བོའི་རིག་གནས་ཁག་རྒྱ་གར་ཙམ་མ་ཟད་འཛམ་གླིང་མི་མང་ལ་གོ་རྟོགས་མུ་མཐུད་སྤེལ་རྒྱུའི་དམ་བཅའ་བརྟན་པོ་ཡོད་ཅེས་བཀའ་སྩལ་འདུགགཞན་ཡང་མགོན་པོ་གང་ཉིད་མཆོག་གིས་ལྕམ་སྐུ་ Droupadi Murmu མཆོག་ལ་སྩལ་བའི་འཚམས་འཕྲིན་དེའི་ནང་རྒྱ་གར་གཞུང་དམངས་གཉིས་ནས་བོད་མི་ཡོངས་ལ་ནང་ཆོས་གཙོས་པའི་བོད་ཀྱི་ངོ་བོ་སྲུང་སྐྱོབ་གནང་རྒྱུ་སོགས་ཀྱི་ཐོག་རྒྱབ་སྐྱོར་དང་རོགས་རམ་རྒྱ་ཆེར་གནང་དང་གནང་བཞིན་པར་ཐུགས་རྗེ་ཆེ་ཞུ་དང་སྦྲགས། ལྕམ་སྐུ་མཆོག་གི་མ་འོངས་ལས་དོན་མཐའ་དག་ལམ་ལྷོང་ཡོང་བའི་སྨོན་འདུན་མཛད་འདུག རྩ་བའི་ལྕམ་སྐུ་ Droupadi Murmu མཆོག་ནི་ཕྱི་ལོ་ ༡༩༥༨ ལོར་རྒྱ་གར་གྱི་ Odisha མངའ་སྡེའི་ Mayurbhanj རྫོངས་ཁོངས་སུ་འཁྲུངས་ཤིང་། ད་རེས་ལྕམ་སྐུ་མཆོག་རྒྱ་གར་གྱི་སྲིད་འཛིན་ལ་བདམས་ཐོན་བྱུང་བ་དེ་ནི་རྒྱ་གར་ནང་བེུད་སྲིད་འཛིན་གནང་མཁན་གཉིས་པ་དང་། རྒྱ་གར་གྱི་ Santal ཞེས་པའི་གདོད་མའི་མི་རིགས་ཁྲོད་ཀྱི་བེུད་ཞིག་སྲིད་འཛིན་དུ་བསྐོ་བཞག་བྱུང་བ་ཐེངས་དང་པོ་དང་། རྒྱ་གར་རང་བཙན་ཐོབ་རྗེས་སྐུ་འཁྲུངས་པའི་སྲིད་འཛིན་ཐོག་མ། དེ་བཞིན་ད་བར་གྱི་རྒྱ་གར་སྲིད་འཛིན་དགུང་གྲངས་ཆུང་ཤོས་བཅས་ཆགས་ཀྱི་ཡོད་པ་རེད།ལྕམ་སྐུ་ Droupadi Murmu མཆོག་ཆབ་སྲིད་ཀྱི་ལས་དོན་ནང་མ་བཞུགས་གོང་ས་གནས་སུ་དགེ་རྒན་དང་སློབ་གསོ་བའི་ཕྱག་ལས་གནང་མྱོང་ཡོད་པ་དང་། ཕྱིས་སུ་རྒྱ་གར་གྱི་ BJP ཆབ་སྲིད་ཚོགས་པའི་ནང་བཞུགས་ཏེ་ Odisha མངའ་སྡེའི་གྲོས་ཚོགས་འཐུས་མི་དང་མངའ་སྡེའི་ཚོང་དང་འགྲིམ་འགྲུལ། དེ་བཞིན་ནུ་གསོ་སེམས་ཅན་ལྷན་ཁང་སོགས་ཀྱི་བློན་ཆེན། གཞན་ཡང་ཕྱི་ལོ་ ༢༠༡༥ ནས་ ༢༠༢༡ བར་ Jharkhand མངའ་སྡེའི་སྲིད་སྐྱོང་གི་ཐུགས་འགན་སོགས་བཞེས་ཡོད་པ་དང་། དེ་སྔ་མངའ་སྡེའི་གྲོས་ཚོགས་འཐུས་མི་གནང་པའི་སྐབས་འཐུས་མི་བཟང་ཤོས་ཀྱི་གཟེངས་རྟགས་སོགས་ཀྱང་ཐོབ་མྱོང་འདུག