བོད་མིའི་སྒྲིག་འཛུགས།

རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་གདུང་ཟླ་བ་འདིའི་ཚེས་༡༦གི་སྔ་དྲོ། ཁྲང་ཏུང་བཙོན་ཁང་ཉེ་འཁྲིས་ཀྱི་བཙོན་ཁང་ཁུག་ཀྱོག་གཅིག་ཏུ་བཙན་དབང་འོག་ཞུགས་འབུལ་བྱེད་རྗེས། ཉིན་དེའི་དགོང་མོ་དར་རྩེ་མདོའི་ཉེ་འགྲམ། ལྕགས་ཟམ་ཁ་ས་གནས་ནས་རིན་པོ་ཆེ་མཆོག་གི་གདུང་ཐལ་འཕྲོག་པ་དང། དེ་བཞིན་ཕྱི་ཉིན་ཏེ་ཚེས་༡༧གྱི་སྔ་དྲོ། ལི་ཐང་ཉེན་རྟོག་པས་ཞུགས་འབུལ་ཆེད་ཕེབས་པའི་རིན་པོ་ཆེའི་སྲིང་མོ་སྒྲོལ་དཀར་ལྷ་མོ་དང་ཚ་མོ་ཉི་མ་གཉིས་ཁྲུན་འདུ་ནས་འཛིན་བཟུང་གིས་ད་བར་གར་ཡོད་ཤེས་རྟོགས་མེད་པ་གྱུར་ཡོད་རེད། རྒྱ་གཞུང་གིས་ཨོ་ཐོག་དགོན་སོགས་སུ་དགོངས་རྫོགས་ཀྱི་བྱེད་སྒོར་དམ་དྲག་བྱེད་མུས་ཡིན་པ་དང། དེ་བཞིན་རིན་པོ་ཆེའི་སྲིང་མོ་དང་ཚ་མོ་རྣམ་གཉིས་གར་སོང་ཆ་མེད་དུ་གྱུར་ནས་ཉིན་ལྔ་སོང་མཚམས་འདིར། ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རིན་པོ་ཆེའི་དགོངས་རྫོགས་ཀྱི་གནད་དོན་དང་ནང་མི་འབྲེལ་གྱི་གནས་སྟངས་ལ་ཐུགས་འཚབ་དང་བཅས། རྒྱ་ནག་གཞུང་ནས་བསྟན་འཛིན་བདེ་ལེགས་རིན་པོ་ཆེ་མཆོག་གི་ནང་མི་ཉེ་འབྲེལ་འཛིན་བཟུང་བྱས་པ་རྣམས་འཕྲལ་དུ་གློད་བཀྲོལ་གཏོང་དགོས་པ་གསུང་གནང་སོང་བ་དང། ད་དུང་སྲིད་སྐྱོང་མཆོག་གིས་རྒྱ་གཞུང་ནས་བསྟན་འཛིན་བདེ་ལེགས་རིན་པོ་མཆོག་ལ་ནག་ཉེས་བཙུགས་པ་ཁག་ལ་བོད་མིའི་སྒྲིག་འཛུགས་ཙམ་དུ་མ་ཟད། ད་ཆ་རྒྱལ་སྤྱིིའི་གཞུང་མང་ནས་ཀྱང་དེ་ལ་གཞི་མེད་ཅིག་ཏུ་ངོས་འཛིན་གནང་གི་ཡོད་པ་མ་ཟད། ལྷག་པར་དུ་རིན་པོ་ཆེ་དགོངས་པ་རྫོགས་སྟངས་སྐོར་ལའང་ཐུགས་ཕམ་གྱི་གསལ་བསྒྲགས་སྤེལ་སྐོར་སོགས་གསུངས་གནང་སོང།

དེ་རིང་དྲུག་པ་ཚེས་བཞི་སྟེ་ཆོས་འཁོར་་དུས་ཆེན་ཉིན་དབུས་གཙང་ཆོལ་ཁ་དང་བོད་མིའི་གཞུང་འབྲེལ་མིན་པའི་ཚོགས་པ་ཆེ་ཤོས་བོད་ཀྱི་གཞོན་ནུ་ལྷན་ཚོགས་སོགས་ཚོགས་པ་ཁག་བཅུ་གཅིག་ནས་༸གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་རེད། མགོན་པོ་མཆོག་༸སྐུ་ཚེ་ཡུན་རིང་བརྟན་པའི་བརྟན་བཞུགས་ཀྱི་མཛད་རིམ་དེ་ནི་དེ་རིང་སྔ་ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཚོགས་ཡོད་པ་དང་། དེ་ཡང་༸གོང་ས་མཆོག་ཚོུད་༧:༣༠ཐོག་གཙུག་ལག་ཁང་དུ་ཆིབས་སྒྱུར་བཀྲིན་བསྐྱངས་གནང་སོང། བརྟན་བཞུགས་སྐབས་སྒྲུབ་བརྒྱུད་བསྟན་པའི་གསལ་བྱེད་རྟགས་ལུང་ཞབས་སྤྲུལ་རིན་པོ་ཆེ་མཆོག་དང། རྟགས་ལུང་མ་སྤྲུལ་རིན་པོ་ཆེ་མཆོག དཔལ་ལྡན་རྒྱུད་སྨད་གྲྭ་ཚང་གི་མཁན་ཟུར་སྒོ་སོག་རིན་པོ་ཆེ་མཆོག་སོགས་མཁན་བླ་སྤྲུལ་ཁག་ཅིག་དང། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བོད་མིའི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང། སྲི་ཞུ་ལས་བྱེད་དང་སེར་སྐྱ་མང་ཚོགས་སྟོང་ཚོ་ཁ་ཤས་བཅར་འདུག དེ་རིང་གི་དུས་ཚིགས་འདིའི་ཐོག་རྒྱ་གར་དང་བལ་ཡུལ་སོགས་ནས་བརྟན་བཞུགས་གསོལ་འདེབས་ཞུ་མཁན་ཚོགས་པ་བཅུ་གཅིག་གི་ཚོགས་མི་དང་སྐུ་ཚབ་འཐུས་མི་ཕྱི་ནས་སྟོང་ཕྲག་མང་པོ་བཅར་ཡོད་སྟབས། ༸གོང་ས་མཆོག་གིས་ཐོག་མར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀྲིན་བསྩལ་སོང་བ་དང། དེ་ཡང་ཐོག་མར་༸གང་ཉིད་མཆོག་གིས་མང་ཚོགས་ལ་སྔོན་འགྲོའི་ནང་ཆོས་བསྩལ་ཡོད། ཁྱད་པར་དུ་དེ་རིང་བརྟན་བཞུགས་གསོལ་འདེབས་ཞུ་མཁན་ཁོངས་སུ་ཧི་མ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པ་ཞེས་ཧི་མ་ལ་ཡ་རྒྱུད་ཀྱི་དད་ལྡན་པ་མང་དག་ཅིག་བཅར་ཡོད་སྟབས། ༸གོང་ས་མཆོག་གིས་དམིགས་བསལ་ཁོང་རྣམས་ལ་ད་དབར་སངས་རྒྱས་ཀྱི་བསྟན་རྒྱུན་འཛིན་སྐྱོང་སྤེལ་གསུམ་གྱི་ཐོག་ཧ་ལས་པའི་ཕྱག་རོགས་གནང་ཡོད་པར་ཐུགས་རྗེ་ཆེ་ཞེས་སོགས་བཀའ་སློབ་བསྩལ་སོང།  

༄༅། ། སྤྱི་ལོ་ ༢༠༡༥ ཟླ་ ༧ ཚེས་ ༡༣ ཉིན་དྷ་ས་བཞུགས་སྒར་ཉེ་འདབས་དབུས་སྣེ་ལེན་ཁང་དུ་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་པ་འགོ་འཛུགས་གནང་འདུག   དེ་ཡང་ཟླ་འདིའི་ཚེས་ ༡༣ ནས་ ༡༦ བཅས་ཉིན་བཞིའི་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་གོ་སྒྲིག་ཞུས་ཐོག་དྷ་ས་བཞུགས་སྒར་ཉེ་འདབས་སྣེ་ལེན་ཁང་དུ་སྐོང་ཚོགས་གནང་བ་དང་། དབུ་འབྱེད་ཀྱི་མཛད་སྒོ་ཐོག་སྐུ་མགྲོན་གྱི་གཙོ་བོ་བོད་མིའི་སྒྲིག་འཛུགས་ཀྱི་སྲིད་ཚབ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གཙོས་པའི་དམིགས་བསལ་སྐུ་མགྲོན་ལྡི་ལི་སྐུ་ཚབ་དོན་གཅོད་བཀའ་ཟུར་བསྟན་པ་ཚེ་རིང་མཆོག ལྷན་ཁང་ཁག་གི་དྲུང་ཆེ་རྣམ་པ་དང་།  ནང་སྲིད་ལས་ཁུངས་ཀྱི་ཁྱབ་ཁོངས་རྒྱ་བལ་འབྲུག་གསུམ་ནང་དུ་ཡོད་པའི་བོད་མིའི་ས་གནས་ཁག་ ༤༦ གི་ས་གནས་འགོ་འཛིན་བཅས་ཁྱོན་མི་གྲངས་ ༦༠ ཙམ་ལྷན་ཞུགས་གནང་འདུག སྲིད་ཚབ་ནང་སྲིད་བཀའ་བློན་མཆོག་གིས་བཙན་བྱོལ་སྒྲིག་འཛུགས་ཀྱི་སྒྲོམ་གཞི་དེ་བཞིན་དབུས་ས་གཉིས་ཀྱི་ལས་འགན་བགོས་འགྲེམས་ཐོག་ནས་ཡོད་པའི་སྒྲོམ་གཞི་ཞིག་ཆགས་ཡོད་པར་འགྲེལ་བརྗོད་དང་། ལྷན་ཁང་ཁག་གི་བཀའ་བློན་རྣམ་པ་གཙོས་པའི་ས་གནས་འགོ་འཛིན་དང་སྲི་ཞུ་ལས་བྱེད་པ་ཡོངས་གཏན་འཇགས་མིན་པར་རིམ་བཞིན་ས་གནས་གཞན་དུ་གནས་སྤོས་ཐོག་ཕེབས་དགོས་ནའང་། བཙན་བྱོལ་སྒྲིག་འཛུགས་དེ་སྔར་བཞིན་མུ་མཐུད་གནས་དགོས་ཀྱི་ཡོད་སྟབས། སྲི་ཞུ་བ་ཡོངས་ནས་རང་ཉིད་ས་གནས་གང་དུ་གནས་སྤོས་ཕེབས་ཀྱང། འཛིན་སྐྱོང་གི་ལྕ་དངོས་ཙམ་མིན་པར་ཡིག་སྣོད་དང་འབྲེལ་བའི་ཡིག་འབྲེལ་རིགས་འཐུས་ཚང་ཡོད་པའི་ཐོག་རྩིས་སྤྲོད་གནང་དགོས་གལ་ཆེ་བར་ནན་བརྗོད་གནང་འདུག དམིགས་བསལ་སྐུ་མགྲོན་ལྡི་ལི་སྐུ་ཚབ་དོན་གཅོད་བཀའ་ཟུར་བསྟན་པ་ཚེ་རིང་མཆོག་གིས་ཀྱང་༸གོང་ས་མཆོག་གིས་ཐུགས་རྗེ་བཀའ་དྲིན་ལ་བརྟེན་ནས་བོད་མིའི་གཞིས་ཆགས་ཁག་རིམ་པའི་སྲ་བརྟན་བྱུང་ཡོད་སྐོར་ངོ་སྤྲོད་དང་སྦྲགས། མགོན་པོ་མཆོག་གིས་རྒྱུན་དུ་བོད་མི་ཚོའི་ངོས་ནས་རེ་བ་བཟང་ས་ནས་བྱེད་དགོས་པ་དང་གྲ་སྒྲིག་སྡུག་ས་ནས་བྱེད་དགོས་པའི་བཀའ་སློབ་ཕེབས་དོན་བཞིན་ད་ཆར་བོད་མིའི་གཞིས་ཆགས་ཁག་གི་ས་གནས་འགོ་འཛིན་རྣམ་པའི་ས་གནས་བོད་མི་མང་ཚོགས་ཀྱི་ཤེས་བྱ་ཡོན་ཏན་དང་དབྱིངས་ཀྱི་ཐོག་ལ་བསམ་ཞིབ་གནང་བའི་ཐོག་ནས། ས་གནས་སོ་སོའི་དཔལ་འབྱོར་ཡར་རྒྱས་ཡོང་བར་བཟོ་གྲྭ་ཆུང་རིགས་ཁག་ཆེད་འཛུགས་གནང་ཐུབ་ན་དགེ་མཚན་ཆེན་པོ་ཡོད་པའི་ལམ་སྟོན་གནང་འདུག ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱས་མཆོག་གིས་ཐེངས་འདིའི་ཚོགས་ཆེན་ཐོག་ཚོགས་བཅར་བ་རྣམས་ནས་ཐོག་མར་ ༢༠༡༣ ལོའི་ས་གནས་འགོ་འཛིན་རྣམས་ཀྱི་ཚོགས་ཆེན་ཐེངས་དགུ་པའི་ནང་གཏན་འབེབས་བྱུང་བའི་གྲོོས་ཆོད་ཁག་ལག་བསྟར་ཐུབ་མིན་སྐོར་ལ་བསྐྱར་ཞིབ་གནང་རྒྱུ་དང་། ས་གནས་འགོ་འཛིན་སོ་སོའི་ཁྱབ་ཁོངས་ས་གནས་ཀྱི་མི་འབོར་གྲངས་ཐོ་རྩ་འཛིན་འཕེར་ངེས་བྱུང་ཆེད་མི་འབོར་ཐོ་གཞུང་བཟོ་་སྒྲིག་གནང་ཕྱོགས། དེ་བཞིན་ཕྱོགས་སྡེའི་ས་གནས་འགོ་འཛིན་ལས་ཁུངས་ཁག་གི་རྒྱུན་གྲོན་རང་འཚོ་གནང་ཕྱོགས་དང་འབྲེལ་བའི་གྲོས་གཞི་དོན་ཚན་ཁག་བདུན་གྱི་ཐོག་ཚོགས་ཆུང་ཆ་བགོས་ཀྱིས་གོ་སྡུར་གནང་རྒྱུ་ཡིན་སྐོར་གསུངས་འདུག      

སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་སྔ་འགྱུར་རྙིང་མའི་བསྟན་བདག་༸སྐྱབས་རྗེ་འཁྲུལ་ཞིག་རིན་པོ་ཆེ་ཞིང་གཤེགས་དམ་པ་དེ་ཉིད་ཀྱི་ཡང་སྲིད་དུ་ངག་དབང་བསྟན་འཛིན་ཆོས་ཀྱི་བློ་གྲོས་རབ་གསལ་ངོས་འཛིན་མཛད་འདུག ཆུང་སྲིད་ངག་དབང་བསྟན་འཛིན་ཆོས་ཀྱི་བློ་གྲོས་རབ་གསལ་མཆོག་ནི། བལ་ཡུལ་ནང་དུ་བཅའ་བཞུགས་ཡབ་ན་ཆོས་གླིང་སྤྲུལ་སྐུ་ངག་དབང་ཆོས་དཔལ་རྒྱ་མཚོ་ལགས་དང་ཡུམ་དཔལ་ལུང་ཚེ་དབང་སྒྲོལ་མ་ལགས་གཉིས་ཀྱི་རིགས་སྲས་སུ། ཕྱི་ལོ་༢༠༡༣ ཀྱི་ཟླ་༧ ཚེས་༢༥ ཉིན་བལ་ཡུལ་ནང་དུ་སྐུ་བལྟམས་ཡོད་པ་དང། ཡང་སྲིད་མཆོག་གི་རྨོ་ལགས་ནི་༸སྐྱབས་རྗེ་ཞིང་གཤེགས་དམ་པ་ཁོང་གི་ཚ་མོ་ཡིན་འདུག ༸སྐྱབས་རྗེ་འཁྲུལ་ཞིག་རིན་པོ་ཆེ་ངག་དབང་ཆོས་ཀྱི་བློ་གྲོས་མཆོག་གི་ཡང་སྤྲུལ་ངོས་འཛིན་གནང་ཕྱོགས་དང་འབྲེལ་ནས་རིན་པོ་ཆེ་མཆོག་གི་གསོལ་དཔོན་ངག་དབང་ཆོས་འཕེལ་རྒྱ་མཚོ་ལགས་ཟླ་སྔ་མའི་ཕྱི་ཚེས་ ༢༡ སྟེ་༸སྐུའི་གྱ་སྟོན་གྱི་དུས་ཚིགས་ཁྱད་པར་ཅན་དང་བསྟུན། བཞུགས་སྒར་དུ་ཕེབས་འབྱོར་གྱིས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་ཁ་ཞུས་ཐོག་མགོན་པོ་མཆོག་ལ་འཁྲུལ་ཞིག་རིན་པོ་ཆེའི་ཡང་སྲིད་སྐོར་ལ་སྙན་གསེང་ཞུས་པ་བཞིན། ༸གང་ཉིད་ཀྱིས་༸སྐྱབས་རྗེ་ཞིང་གཤེགས་དམ་པ་འཁྲུལ་ཞིག་རིན་པོའི་ཡང་སྤྲུལ་དུ་བལ་ཡུལ་ནང་བཅའ་བཞུགས་ཡབ་ངག་དབང་ཆོས་དཔལ་རྒྱ་མཚོ་ལགས་དང་ཡུམ་ཚེ་དབང་སྒྲོལ་མ་ལགས་རྣམ་གཉིས་ཀྱི་སྲས་ངག་དབང་བསྟན་འཛིན་ཆོས་ཀྱི་བློ་གྲོས་རབ་གསལ་མཆོག་ཡིན་པར་ངོས་འཛིན་གྱིས་ཕྱག་རྟགས་མཛད་ཡོད་སྟབས། གནས་ཚུལ་དེ་ཟླ་འདིའི་ཕྱི་ཚེས་ ༦ ༸སྐུའི་འཁྲུངས་སྐར་ཉིན་བལ་ཡུལ་གནས་སྡོད་བོད་མི་ཚོར་ཡོངས་ཁྱབ་གནང་འདུག

ཁ་སང་ཚེས་ ༥ ཉིན་ཨ་རིའི་ California མངའ་སྡེ་ Anaheimགྲོང་ཁྱེར་ནང་དུ་རྒྱལ་སྤྱིའི་ཐོག་སྙན་གྲགས་ཡོད་པའི་གནད་ཡོད་མི་སྣ་དང་མང་ཚོགས་ཆིག་ཁྲི་བརྒྱད་སྟོང་ལྷག་ལྷན་འཛོམས་ཐོག་བོད་ཀྱི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་གཟབ་རྒྱས་ངང་སྲུང་བརྩི་ཞུས་འདུག སྐབས་དེར་༸གོང་ས་མཆོག་དབུ་བཞུགས་སྐུ་མགྲོན་ཁོངས་ནོ་སྦེལ་ཞི་བདེའི་གཟེངས་རྟགས་བཞེས་མཁན་ལྕམ་ Shirin Ebadi ལགས་དང། ལྕམ་སྐུ་ Jody Williams ལགས། དེ་བཞིན Anaheim གྲོང་ཁྱེར་སྤྱི་ཁྱབ་པ་ Tom Tack མཆོག་གིས་དབུས་པས། ཨ་རིའི་གློག་བརྙན་འཁྲབ་སྟོན་པ་དང་གཞས་པ་གྲགས་ཅན། གཞན་ཡང་ཚན་རིག་པ་དང། སྤྱི་ཚོགས་ལས་འགུལ་བ། ཚོང་པ་གྲགས་ཅན་སོགས་སྤྱི་ཚོགས་ནང་གི་ལས་རིགས་འདྲ་མིན་གཉེར་བཞིན་པའི་ཆེད་ལས་མཁས་པ་ཉི་ཤུ་ལྷག་ཆེད་ཕེབས་གནང་འདུག ཁྱད་པར་དུ་སྐབས་དེར་ཨ་རིའི་གཞས་པ་གྲགས་ཅན་དང་སྤྱི་ཚོགས་ལས་འགུལ་བ་ Michal Frandy ལགས་ཀྱིས་༸གོང་ས་མཆོག་ལ་ཆེ་བསྟོད་འཚམས་འདྲིའི་བསྟོད་དབྱངས་ཕུལ་བ་དང་དུས་མཉམ་དེ་གར་འདུས་པའི་མང་ཚོགས་རྣམས་ནས་ཀྱང་དགའ་དད་སྤྲོ་གསུམ་ངང་འཚམས་འདྲི་ཞུས་འདུག ༸གོང་ས་མཆོག་གིས་སྐབས་དེར་མང་ཚོགས་ཀུན་ལ་ཐུགས་རྗེ་ཆེ་ཞུ་བ་དང་སྦྲགས། ༸གང་ཉིད་ཀྱི་བཀའ་སློབ་བཀྲིན་བསྩལ་བའི་ཁྲོད། འཛམ་གླིང་ནང་དོན་དམ་པའི་ནང་སེམས་ཀྱི་ཞི་བདེ་དང་དེའི་རིན་ཐང་ལ་དགའ་མོས་དང་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད་སྟབས། ༸གང་ཉིད་ཀྱི་༸སྐུ་ཚེའི་དུས་ཡུན་ནང་ཞི་བདེ་ལྡན་པའི་འཛམ་གླིང་ཞིག་ཡོང་སྲིད་པ་འདུག་ཅེས་བཀའ་བསྩལ་བ་དང། ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུ་ནི། ལས་སླ་པོ་ཞིག་མིན་པར་དེའི་སླད་སྒོ་གང་ས་ནས་ཤུགས་བརྒྱབ་དགོས་པའི་བཀའ་སློབ་གནང་བ་དང་། ད་དུང་༸གང་ཉིད་ཀྱིས་༸སྐུའི་ཉམས་མྱོང་དང་སྦྲགས་ནས་དྲང་བདེན་ལམ་བུ་དེར་དུས་ཚོད་རིང་མིན་ལ་མ་ལྟོས་པར་རྒྱལ་ཁ་ཐོབ་ངེས་ཡིན་པ་དང་། དྲག་པོའི་བྱ་སྤྱོད་ལ་ལམ་སེང་ནུས་པ་ཞིག་ཐོན་ནའང་ཕུགས་རྒྱང་རིང་པོའི་དགེ་ཕན་མེད་སྐོར་སོགས་བཀའ་བསྩལ་འདུག བཞུགས་སྒར་དུ་༸སྐུའི་འཁྲུངས་སྐར་སྲུང་བརྩི་ཞུས་པ། དེ་རིང་ཕྱི་ལོ་ ༢༠༡༥ཟླ་ ༧ ཚེས་ ༦ སྔ་དྲོ་ཚོུད་ ༨ཐོག་བཞུགས་སྒར་ལྷ་རྒྱལ་རིར་༸སྐུ་ཁམས་དང་མཐུན་པའི་༸སྐུ་རླུང་དར་འཛུགས་གྲུབ་བསྟུན། ཚོུད་ ༡༠ པའི་ཐོག་ཐེག་ཆེན་ཆོས་གླིང་གཙུག་ལག་གི་གསུང་ཆོས་ར་བའི་ནང་འཁྲུངས་སྐར་དུས་ཆེན་གྱི་དམིགས་བསལ་སྐུ་མགྲོན་དུ་ས་གནས་ཀྱི་རྫོང་དཔོན་སྐུ་ཞབས་ Pushpendra Rajput མཆོག་དང། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་སོགས་བོད་མིའི་མང་གཙོའི་མཛད་གཙོ་རྣམ་པ་དང་། ཕྱི་ནང་གི་གནད་ཡོད་སྐུ་མགྲོན་ཁག་ཆེད་ཕེབས་ཐོག་དུས་ཆེན་སྲུང་བརྩི་ཞུས་ཡོད། སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་མཛད་གཙོ་རྣམ་པས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་དང་། རིམ་པས་རྟེན་འབྲེལ་གསོལ་ཇ་བཞེས་འབྲས་འདེགས་འབུལ་གྲུབ་བསྟུན། ནམ་ཀུན་དང་མི་འདྲ་བ་དེ་རིང་འཁྲུངས་སྐར་གྱི་མཛད་སྒོ་ཐོག་མར་རྡ་ཤོད་བོད་ཁྱིམ་སློབ་གྲྭའི་སློབ་མ་སྐོར་ཞིག་ནས་སྐུ་ཚེ་བརྟན་ཞེས་པའི་ཟུང་གཞས་དང། དེ་ནས་Mcleod བོད་ཁྱིམ་ཉིན་སློབ་ནས་དགུང་གྲངས་༨༠ ཞེས་པའི་མཉམ་གཞས་སོགས་༸གོང་ས་མཆོག་དགུང་གྲངས་བརྒྱད་ཅུར་ཕེབས་པའི་རྟེན་འབྲེལ་གཞས་སྣ་ཁག་ཅིག་གཟིགས་འབུལ་ཞུས་གནང་སོང། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸སྐུའི་འཁྲུངས་སྐར་གྱི་མཛད་སྒོའི་ཐོག་ནས། བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ལྷན་ཚོགས་གཉིས་ནས་༸རྒྱལ་བའི་ཡབ་དམ་པ་ཆོས་སྐྱོང་ཚེ་རིང་མཆོག་དང་། ༸རྒྱལ་ཡུམ་དམ་པ་བདེ་སྐྱིད་ཚེ་རིང་མཆོག་རྣམ་གཉིས་ལ་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་སྦྲགས། ལྷ་ཕྱག་སྔོན་དུ་འགྲོ་ཐོག་དགའ་དད་སྤྲོ་གསུམ་གྱི་ངང་༸གོང་ས་མཆོག་ལ་འཁྲུངས་སྐར་གྱི་འཚམས་འདྲི་དང་བཅས། ༸གང་ཉིད་ནི་ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན། མདོ་སྨད་སྐུ་འབུམ་སྟག་མཚེར་དུ་སྐུ་བལྟམས་པ་ནས་བཟུང། བོད་འབངས་རྣམས་ལ་ཆོས་སྲིད་གང་ཅིའི་་ཐད་ནས་བཀྲིན་བླ་ན་མེད་པ་བསྐྱངས་གནང་མཛད་དེ། ད་ཆ་བོད་བརྒྱུད་ནང་བསྟན་པ་རྣམས་སྔར་ལྷག་དམ་ཚིག་འོ་ཆུ་གཅིག་འདྲེས་དང་། ཕན་ཚུན་དག་སྣང་ནོར་བུའི་འོད་ཀྱིས་ཁྱབ་པར་མཛད་པ་དང། སྒྲིག་འཛུགས་དང་འཛིན་སྐྱོང་གི་སྒྲོམ་གཞིར་དུས་ནས་དུས་སུ་ལེགས་བཅོས་དང་ཡར་རྒྱས་གོང་འཕེལ་གྱིས། མང་གཙོའི་ཆ་ལག་ཡོངས་སུ་ཚང་ཡོད་པ་མ་ཟད། ཁྱད་པར་དུ་བོད་ཡུལ་ཆོལ་གསུམ་གོང་བུ་ཆིག་སྒྲིལ་འདི་ལྟ་བུ་ནི། བཙན་པོའི་ལོ་རྒྱུས་རྗེས་སུ་བོད་ཀྱི་ལོ་རྒྱུས་ནང་བྱུང་མྱོང་མེད་པ་ཞིག་ཏུ་གསུངས་ནས་༸རྒྱལ་བའི་བཀྲིན་རྗེས་དྲན་ཞུས་གནང་ཡོད། ད་དུང་བོད་མིའི་གནས་སྐབས་དང་མཐར་ཐུག་གི་ཕན་བདེ་མཐའ་དག སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་བྱམས་བརྩེའི་འཕྲིན་ལས་ཁོ་ནར་རག་ལུས་པས། མགོན་པོ་༸གང་ཉིད་སྐུ་ཚེ་ཞབས་པད་ཡུན་བརྟན་དགོས་པ་ནི། བོད་མིའི་བདེ་སྐྱིད་ཀྱི་སྲོག་རྩ་ཡིན་ཞེས་དང། དེ་ལྟར་ན་མགོན་པོ་མཆོག་གིས་ཇི་ལྟར་མ་ཡིས་བུ་ལ་འདོམས་པ་ལྟར་གང་ཉིད་ཀྱིས་བཀའ་སློབ་བསྩལ་བ་ཁག་འགྲུབ་ཕྱིར། བོད་མི་མི་རེ་ངོ་རེས། དུས་རྟག་ཏུ་འབད་རྩོལ་གནང་དགོས་པ་ནན་ཏན་ཆེན་པོས་སྐུལ་མ་སོགས་ཞུས་གནང་སོང། ལྷག་པར་དུ་དེ་རིང་གི་མཛད་སྒོ་འདིའི་ཐོག་ནས་རྒྱ་གཞུང་གིས་བོད་ལྗོངས་འཕེལ་རྒྱས་བགྲོད་ལམ་གྱི་ལོ་རྒྱུས་ཀྱི་གདམ་ག་ཟེར་བའི་རྒྱབ་ཤ་དཀར་པོའི་ཐོག་ནས་དབུ་མའི་ལམ་གྱི་ངོ་བོ་ནི་ཀྲུང་གོ་ཁ་བྲལ་གཏོང་རྒྱུ་དེ་རེད་ཅེས་དང། བོད་གསར་པ་ཡང་དག་པའི་འཕེལ་རྒྱས་འགྲོ་ལམ་ཐོག་བསྐྱོད་པ་ཞེས་སོགས་གནད་དོན་ལྔའི་ཐོག་ནས་བོད་ལྗོངས་འཕེལ་རྒྱས་གཏོང་ལུགས་བརྗོད་ཡོད་པ་ལ་ལོག་འགྲེལ་དང་འཁྱོག་བཤད་དུ་ངོས་འཛིན་གྱིས། བཀའ་སྤྱི་གཉིས་ནས་རྒྱ་གཞུང་ལ་གཞིས་ལུས་བོད་མིའི་མངོན་འདོད་ལྟར། ༸གོང་ས་མཆོག་བོད་ལ་ཆིབས་སྒྱུར་ཡོང་སླད། ༸གང་ཉིད་ཀྱི་སྐུ་ཚབ་དང་ལྷན་དུ་གྲོས་མོལ་འཕྲལ་དུ་གནང་དགོས་པའི་དྲན་བསྐུལ་སོགས་གནང་ཡོད་པ་རེད།།