བོད།

ཁ་ནུབ་མཚན་དགོང་བོད་ནང་གི་ཚོུད། ༡།༠༠ ཐོག་ལ་རྒྱ་གཞུང་ཉེན་རྟོག་པས་རྒྱལ་གཅེས་པ་རུང་རྒྱས་ཨ་གྲགས་ལགས་ཁོང་གི་ནང་དུ་བསྐྱལ་འདུག རྒྱལ་གཅེས་པ་རུང་རྒྱས་ཨ་གྲགས་ལགས་དེ་སྔ་ ༢༠༠༧ ལོའི་ཟླ་ ༨ ཚེས་ ༡ ཉིན་མདོ་ཁམས་ལི་ཐང་རྟ་རྒྱུགས་ཆེན་མོའི་སྐབས་ཁོང་གིས་༸གོང་ས་མཆོག་བོད་ལ་ཕེབས་དགོས། བོད་ལ་རང་དབང་དགོས། ཀུན་གཟིགས་པཎ་ཆེན་རིན་པོ་ཆེ་མཆོག་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྣམ་གཉིས་གློད་བཀྲོལ་བཏང་དགོས་པའི་ཐོག་གསུང་བཤད་གནང་བར་བརྟེན་རྒྱ་གཞུང་ཉེན་རྟོག་པས་རྒྱལ་གཅེས་པ་ཁོང་འཛིན་བཟུང་གིས་ཉན་ཡང་བཙོན་ཁང་དུ་ལོ་བརྒྱད་ཀྱི་ཁྲིམས་ཆད་ཐོག་བཙོན་འཇུག་བྱས་ཡོད་པ་ཞིག་རེད། ཁོང་གི་ཚ་བོ་ཨ་འབྲུག་ཚེ་བརྟན་ལགས་ཀྱིས་གསུང་དོན་ལ་རྒྱ་ནག་གཞུང་གིས་ ༢༠༡༥ ལོའི་ཟླ་ ༧ ཚེས་ ༣༡ བོད་ནང་གི་མཚན་དཀྱིལ་ཚོུད་དང་པོའི་ཐོག་ལ་ཁོང་ནང་དུ་ཕྱིར་བསྐྱལ་དོན་གཙོ་བོ་ནི། ད་ལན་ཟླ་ ༨ ཚེས་ ༡ ཉིན་ཁོང་ལོ་བརྒྱད་ཀྱི་ཁྲིམས་ཆད་ཀྱི་དུས་ཡུན་ཟིན་གྱི་ཡོད་པ་རེད་ཅེས་གསུངས་པ་དང། རྒྱ་གཞུང་གིས་དམ་དྲག་འོག་ད་ལྟའི་ཆར་ཁོང་གི་སྐུ་གཟགས་ཀྱི་གནས་བབ་དང་དེ་མིན་གྱི་གནས་ཚུལ་སོགས་ཀྱི་ཐད་ཤེས་རྟོགས་གང་ཡང་མི་འདུག་ཅེས་གསུངས་སོང།

༸སྐུའི་གྱ་སྟོན་ཉིན་མོར་བོད་གསེར་རྟ་ཕུར་བུ་དགོན་པའི་དགེ་འདུན་པ་ཆོས་སྐྱིད་དང་ཁོང་གི་ནང་མི་གཉིས་བཅས་བོད་མི་གསུམ་རྒྱ་གཞུང་གིས་འཛིན་བཟུང་བྱས་འདུག རྩ་བའི་འདི་ལོའི་ནང་འཛམ་གླིང་ས་ཕྱོགས་གང་སར་ནས་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་སྲུང་བརྩི་ཞུ་བཞིན་ཡོད་པ་ལྟར་རྒྱ་གཞུང་གིས་བོད་ནང་དམ་དྲག་སྔར་ལྷག་ཤུགས་ཆེ་བྱེད་བཞིན་ཡོད་པ་མ་ཟད། ལྷག་དོན་དུ་མདོ་སྨད་གསེར་རྟ་ནང་གྱ་སྟོན་གྱི་ཟླ་གཅིག་གོང་ནས་དམ་དྲག་ཤུགས་ཆེ་བྱེད་མུས་ལྟར། ཕྱི་ཟླ་ ༦ ཕྱི་ཚེས་ ༢༡ ༸སྐུའི་གྱ་སྟོན་ཉིན་མོར་གསེར་རྟ་ནང་དགེ་འདུན་པ་ཆོས་སྐྱིད་དང་། ཁོང་གི་པ་ལགས་གཉིས་གསེར་རྟ་རྫོང་ཐོག་ཏུ་དངོས་པོ་ཙ་ཙིག་ཉོ་སྐབས་རྒྱ་གཞུང་ཉེན་རྟོག་པས་གློ་བུར་དུ་ཆོས་དགེ་ལགས་འཛིན་བཟུང་བྱེད་རྗེས་ཁོང་གི་སྲིང་མོ་སྐྱིད་འཛོམས་ལགས་དང་ཚ་བོ་གྲགས་པ་ལགས་རྣམ་གཉིས་ཀྱང་འཛིན་བཟུང་བྱས་འདུགདགེ་འདུན་པ་ཁོང་འཛིན་བཟུང་བྱེད་དོན་ནི། ༸སྐུའི་གྱ་སྟོན་ཉིན་མོར་ཁོང་གི་སྟོད་གོས་རྒྱབ་ཏུ་བོད་ཡིག་ཐོག་༸སྐུའི་གྱ་སྟོན་བསུ་ཞེས་བྲིས་པ་དེའི་འཆར་འགོད་པ་དང་ཁོང་གིས་སྟོད་གོས་སྣམ་པ་དེ་ ཆབ་སྲིད་གནད་དོན་དུ་རྩིས་ཏེ་འཛིན་བཟུང་བྱས་འདུག ད་ཆ་དགེ་འདུན་པ་ཁོང་རྒྱ་གཞུང་གིས་གསེར་རྟ་རྫོང་ཁུལ་དུ་བཀག་ཉར་བྱེད་ཡོད་པར་ཚོད་དཔག་ཙམ་ལས་དམིགས་བསལ་གྱི་ཤེས་རྟོགས་གང་ཡང་བྱུང་མི་འདུག འོན་ཀྱང་ཁོང་གི་སྤུན་མཆེད་གཉིས་ཉིན་གྲངས་ཁ་ཤས་རྗེས་སུགློད་བཀྲོལ་བཏང་ཡོད་ཀྱང་ཚ་བོ་གྲགས་པ་ལགས་ལ་ཉི་ལྟར་ས་གནས་རྒྱ་གཞུང་ཉེན་རྟོག་པས་ལས་ཁུངས་སུ་འདྲི་རྩད་བྱེད་བཞིན་ཡོད་པ་རེད་འདུག

རྒྱལ་མོ་དངུལ་ཆུའི་ཉེ་འགྲམ་དུ་གཏེར་ཁ་སྔོག་འདོན་གྱི་ལས་འཆར་ལ་ཞི་རྒོལ་གནང་མཁན་བློ་བཟང་ཡེ་ཤེས་ལགས་ལྷ་སའི་ཆུ་ཤུལ་བཙོན་ཁང་དུ་སྐུ་འདས་གྲོངས་སུ་གྱུར་འདུག རྒྱལ་གཅེས་པ་བློ་བཟང་ཡེ་ཤེས་ལགས་ཟླ་ ༧ ཚེས་༡༩ ཉིན་གྱི་ཚོུད་ ༢།༠༠ ཡས་མས་ཙམ་ལ་འདས་གྲོངས་སུ་གྱུར་ཡོད་པ་དང། རྒྱ་ནག་གཞུང་གིས་ཁོང་གི་སྐུ་ཕུང་ནང་མིར་རྩིས་སྤྲོད་མ་བྱས་པ་མ་ཟད། སྤུན་མཆེད་ཚོས་ཞུ་གཏུགས་ལན་མང་བྱས་ཡོད་པར་བརྟེན་མཐར་དགེ་འདུན་པ་གཅིག་སྐུ་ཕུང་མདུན་སར་བསྔོ་སྨོན་སླད་བཅར་བཅུག་པ་ལས་གཞན་སྤུན་གཉེན་གཅིག་ཀྱང་བཏང་མེད་པ་དང། དེ་བས་ཀྱང་སྐུ་ཕུང་ཞུགས་འབུལ་སྐབས་སྤུན་མཆེད་གཉིས་ལས་ལྷག་ཡོང་མི་ཆོག་ཅེས་བརྗོད་འདུགརྩ་བའི་ཁོང་རྒྱ་གཞུང་གིས་ཐོག་མར་བཙོན་འཇུག་བྱེད་དོན་ནི། སྤྱི་ལོ་ ༢༠༡༤ ཟླ་ ༥ ཚེས་ ༧ ཉིན་ཁམས་ཚ་བ་མཛོ་སྒང་རྫོང་སྟོང་འབར་ཡུལ་ཚོའི་གེ་བ་གྲོང་ཚོའི་ནང་གི་རྒྱལ་མོ་དངུལ་ཆུའི་ཉེ་འགྲམ་དུ་རྒྱ་གཞུང་གིས་གཏེར་ཁ་སྔོག་འདོན་གྱི་ལས་གཞི་སྤེལ་སྐབས། ས་གནས་བོད་མི་ཚོས་ཞི་རྒོལ་ཤུགས་ཆེ་བྱས་པ་མ་ཟད། སྐབས་དེར་རྒྱལ་གཅེས་པ་འཕགས་པ་རྒྱལ་མཚན་ལགས་འདས་གྲོངས་སུ་གྱུར་པ་དང་། གཞན་ཡང་རྒྱལ་གཅེས་པ་རིག་འཛིན་ལགས་གྱིས་ཀྱང་རང་ལུས་ལ་གྲི་བརྒྱབ་སྟབས། ཕྱི་ཚེས་ ༩ དང། ༡༠ བཅས་སུ་གེ་བ་སྡེ་བའི་སྡེ་དཔོན་རྒྱལ་གཅེས་པ་བློ་བཟང་ཡེ་ཤེས་ལགས་དང་མི་རྒན་གྲས་འགས་སྣེ་ཁྲིད་འོག་སྟོང་འབར་ཡུལ་ཚོའི་བོད་མི་རྒན་གཞོན་བར་གསུམ་གྱིས་མུ་མཐུད་ཞི་རྒོལ་གནང་པའི་རྗེས། ཆབ་མདོ་ཁུལ་དང་མཛོ་སྒང་རྫོང་སོགས་ནས་ཉེན་རྟོག་པ་དང་དམག་མི་ཡོང་ནས་ཡུལ་མི་ཚོར་འཇིགས་སྐུལ་བྱས་ཀྱང་ཡུལ་མི་ཚོས་དང་ལེན་མ་བྱས་པར་བརྟེན་ ཕྱི་ཚེས་ ༡༢ ཉིན་སྡེ་དཔོན་བློ་བཟང་ཡེ་ཤེས་ལགས་སོགས་མི་བདུན་ཙམ་ཆབ་མདོ་མཛོ་སྒང་རྫོང་དུ་བཙན་ཁྲིད་ཀྱིས་ལོ་གཅིག་ཙམ་རིང་འདྲི་རྩད་དང་ཉེས་རྡུང་བཟོད་གླགས་མེད་པའི་མནར་གཅོད་འོག་བཀག་ཉར་བྱས་འདུག གཞན་ཡང་ ༢༠༡༥ ཟླ་ ༥ པའི་ནང་ཁོང་དང་། ཁོང་གི་རོགས་པ་ངག་བཀྲ་ལགས། དེ་བཞིན་ཆོས་ལུགས་བསྟན་འཛིན་ལགས་བཅས་ཁོང་གསུམ་ལ་ལོ་གཉིས་རེའི་ཁྲིམས་ཐག་བཅད་ཡོད་པ་དང། བློ་བཟང་ཡེ་ཤེས་ལགས་ལ་རྒྱ་གཞུང་ཉེན་རྟོག་པས་མི་སྤྱོད་ལས་འདས་པའི་ཉེས་རྡུང་ཚད་མེད་བཏང་བའི་དབང་གིས་མགོ་ཡུ་འཁོར་བ་སོགས་གཟུགས་པོ་ནད་གཅོང་དུ་གྱུར་ནས་འདས་གྲོངས་སུ་གྱུར་པ་དང་གཞན་གཉིས་ད་དུང་བཙོན་ཁང་དུ་ཡོད་པ་རེད་འདུག ཡང་དེའི་བར་ན་ཟླ་ ༧ ཕྱི་ཚེས་ ༡༥ རེས་གཟའ་ལྷག་པའི་ཉིན་ཨ་མདོ་རྔ་བ་རྫོང་རྨེའི་རུ་མ་ཡུལ་ཚོའི་ནང་རྒྱལ་གཅེས་དབང་མོ་ལགས་ཀྱིས་༸གོང་ས་མཆོག་བོད་དུ་ཕེབས་དགོས་བོད་ལ་རང་དབང་དགོས་ཞེས་སྐད་འབོད་གནང་བཞིན་ཁྲོམ་སྐོར་བྱས་པར་བརྟེན་རྒྱ་གཞུང་ཉེན་རྟོག་པས་ཁོ་མོ་བཙན་ཁྲིད་ཀྱིས་འཛིན་བཟུང་བྱས་ཡོད་ཀྱང། ཁོང་ཁ་སང་ཚེས་ ༢༢ སྔ་དྲོར་གློད་བཀྲོལ་བཏང་ཡོད་པ་དང། ཁོང་ཕ་ཡུལ་དུ་ཕྱིར་འབྱོར་སྐབས་སྤུན་གཉེན་དང་། ས་གནས་མི་མང་ཚོས་མང་པོས་མཇལ་དར་དང་གོས་ཆེན་གཡོགས་ཏེ་བསུ་བ་གཟབ་རྒྱས་ཞུས་འདུག

ཟླ་འདིའི་ཕྱི་ཚེས་ ༡༧ ཉིན་ཨ་མདོ་ཞོན་ཧྭ་བིས་མདོ་ནས་ཡིན་པའི་རྒྱལ་གཅེས་པ་གྲྭ་ཐུབ་བསྟན་བརྩོན་འགྲུས་ལགས་རྒྱ་གཞུང་གི་བཙོན་ཁང་ནས་ལོ་གསུམ་གྱི་ཁྲིམས་ཆད་དུས་ཚང་ཐོག་བཙོན་ནས་གློད་བཀྲོལ་ཐོབ་འདུག ཁོང་ནི་རྒྱ་གཞུང་གིས་བོད་ནང་རང་ལུས་མེར་བསྲེགས་གནང་མཁན་ཚོར་གདུང་སེམས་མཉམ་བསྐྱེད་ཞུ་བའི་ལས་འགུལ་ཐོག་འགན་འཁུར་བླངས་པའི་ཉེས་མིང་འོག་ལོ་ངོ་གསུམ་རིང་དུས་བཀག་བཙོན་འཇུག་བྱས་ཡོད་པ་དང། ཁོང་རྒྱ་གཞུང་གི་བཙོན་ནས་ལོ་གསུམ་གྱི་བཙོན་འཇུག་དུས་བཀག་ཚང་ཟིན་རྗེས་རང་གི་ཕ་ཡུལ་ཕྱིར་ཕེབས་པའི་སྐབས་དེར་སེར་སྐྱ་མི་མང་རྣམས་མཇལ་དར་སྒྲོན་འབུལ་གྱིས་ཕེབས་བསུ་ཞུས་འདུག

ཨ་རིར་རྟེན་གཞི་བྱས་པའི་ bowenpress.com ཞེས་པའི་གསར་ཁང་ནས་གནས་ཚུལ་སྤེལ་བར་གཞིགས་ན། རྒྱ་ནག་གི་སྲིད་འཛིན་ཞི་ཅིང་ཕིང་ཟླ་བ་འདིའི་ཟླ་མཇུག་ཏུ་བོད་ནང་བསྐྱོད་འཆར་ཡོད་པ་དང། གནད་དོན་དེའི་རྐྱེན་པས་རྒྱ་གཞུང་གིས་བོད་རང་སྐྱོང་ལྗོངས་ནང་དྲག་ཆས་དམག་མི་སོགས་སྔར་ལྷག་འགྲེམས་འཇོག་བྱེད་བཞིན་པ་མ་ཟད། འགག་སྒོ་ཁག་ཏུ་དམ་བསྒྲགས་ཤུགས་ཆེ་བྱེད་འགོ་ཚུགས་ཡོད་པ་བརྗོད་འདུག

རྒྱ་ནག་གཞུང་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྤུན་ཉེ་འབྲེལ་དང་སློབ་མ། དེ་བཞིན་མང་ཚོགས་བརྒྱ་སྐོར་ཁ་ཤས་ཀྱིས་མངོན་འདོད་ལྟར་སྐུ་ཕུང་ནང་མིར་རྩིས་མ་སྤྲད་པར་བཙན་དབང་འོག དེ་རིང་བོད་ནང་གི་སྔ་དྲོ་ཚོུད་༧པའི་ཐོག་ཞུགས་འབུལ་གནང་འདུག རིན་པོ་ཆེ་མཆོག་གི་སྤུན་མཆེད་གཅིག་གིས་འགྲེལ་བརྗོད་གནང་པར་རྒྱ་ནག་གཞུང་ནས་རིན་པོ་ཆེ་མཆོག་དུག་གིས་བཀྲོངས་ཡོད་པ་རེད་འདུག

ཕྱི་ཟླ་ ༥ པའི་ཚེས་ ༢༧ ཉིན་རྒྱལ་གཅེས་སངས་རྒྱས་མཚོ་ལགས་ཀྱི་རང་ལུས་མེར་བསྲེགས་བཏང་ཡུལ་བོད་མདོ་སྨད་ཅོ་ནེ་རྫོང་ཆས་བུ་གཞིས་ཁུལ་གྱི་ཉིན་པ་སྡེ་བའི་འབྲོག་སར་བདེ་འཇགས་སླད་ཡིན་ཟེར་བའི་རྒྱ་གཞུང་སྤྱི་བདེ་མི་སྣས། ཉིན་པའི་འབྲོག་མི་ཕར་འགྲོ་ཚུར་འོང་རྣམས་ཀྱི་གཞུང་ལམ་བཀག་འགོག་དང། འབྲོག་པ་ཚོ་དབྱར་དགུན་རུ་པ་སྤོ་སྐབས་དོན་མེད་ཀྱིས་གཅར་རྡུང་དང་སུན་གཙེར་བཟོ་བཞིན་པའི་ཁྲོད་དུ། ཟླ་འདིའི་ཕྱི་ཚེས་ ༡༣ ཉིན་ཁུལ་དེའི་བོད་མི་རྣམ་རྒྱལ་སྐྱབས་དང་བན་དེ་མཁར་ཞུ་བ་གཉིས་ལ་གཅར་རྡུང་དྲགས་པོ་བཏང་སྟེ་འཛིན་བཟུང་བྱེད་འདུག ཉེན་རྟོག་པས་ས་གནས་བོད་མི་ཚོར་ཞིབ་བཤེར་བྱ་རྒྱུ་ཡིན་པའི་སྔོན་བརྡ་གང་ཡང་མ་བྱེད་པར་ཉིན་པ་སྡེ་པའི་སྐྱེས་པ་ཚོར་གཞུང་ལམ་བཀག་འགོག་གིས་སྔོག་གཤེར་བྱས་སྟབས། སྐྱེས་པ་ཚོས་ཞིབ་གཤེར་བྱེད་དོན་ཅི་ཡིན་སོགས་ཀྱི་གནད་དོན་དྲི་པར། ཉེན་རྟོག་པས་དེ་མ་ཐག་རྣམ་འགྱུར་མི་ལེགས་པར་ཁ་གཡར་ཏེ་ཁོང་གཉིས་ལ་དབྱུག་པ་དང་ཁུ་ཚུར། རྡོག་ཐོ་སོགས་ཀྱིས་གཞུས་ནས་རུབ་རྡུང་ཡུན་རིང་བྱས་མཐར། ཉེན་རྟོག་པས་རླངས་འཁོར་ནང་བཞག་སྟེ་ལྐོག་སུད་ཀྱིས་ཀན་ལྷོ་མི་མང་སྨན་ཁང་དུ་འཕྲལ་མར་བཙན་ཁྲིད་བྱས་ཡོད་པ་མ་ཟད། ཆུ་ཚོད་ཉེར་བཞི་རྗེས་སུའང་ ཁོང་གི་སྤུན་གཉེན་རྣམས་ལ་བརྡ་ལན་སྤྲད་མི་འདུག

ཟླ་འདིའི་ཚེས་ ༩ ཉིན་བོད་ནང་ཕྱི་དྲོ་ཆུ་ཚོད་ ༦ ཙམ་ལ་ཁམས་ཡུལ་ཤུལ་སྐྱེ་རྒུ་མདོའི་གེ་སར་ཐང་ཆེན་དུ་བོད་བསྟན་སྲིད་མི་རིགས་དང་བཅས་པའི་སླད་རང་ལུས་ཞུགས་འ བུལ་གནང་མཁན་སྡེ་དགེ་རྫོང་གསར་དགོན་པའི་གྲྭ་བསོད་ནམས་སྟོབས་རྒྱལ་ཀྱི་ཞལ་ཆེམས་ནང་དུ། ང་ཚོ་མང་ཚོགས་ཚང་མའི་རེ་བ་གཙོ་བོ་ནི་༸རྒྱལ་བ་བསྟན་འཛིན་རྒྱ་མཚོ་ཕོ་བྲང་པོ་ཏ་ལའི་ནང་དུ་ཞབས་སོར་འགོད་དགོས་པ་དེ་ཡིན། ང་ཚོ་ལ་བདེན་དོན་དང་གནས་ལུགས་སོགས་གང་ཡང་བཤད་དབང་མེད་པའི་ཕྱིར་ངའི་ཚེ་སྲོག་གིས་སྤྱིར་འཛམ་བུ་གླིང་དང་ཡང་དགོས་སུ་རྒྱ་ནག་སྲིད་གཞུང་དང་མི་དམངས་ལ་བདེན་དཔང་བྱེད་དགོས་བྱུང། ཤ་རུས་གཅིག་ལས་ཆེད་པའི་སྤུན་ཟླ་རྣམས་ཀྱིས་གོ་མེད་ཚོར་མེད་མ་གནང་ནས་མཐུན་སྒྲིལ་གྱི་སྟོབས་ཤུགས་གཅིག་ཏུ་སྒྲིལ་ཏེ། མ་འོངས་པར་མི་རིགས་འདི་བདེན་མཐའ་གསལ་བའི་ཆེད་དུ་ཚང་མས་འབད་བརྩོན་ཅི་ནུས་གནང་རོགས་ཞུ་ཞེས་གསུངས་འདུག

ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་ཁང་ནང་འདས་གྲོངས་གྱུར་ནས་ཉིན་གསུམ་ཙམ་སོང་ཟིན་པའི་དུས་མཚམས་འདིར། རིན་པོ་ཆེའི་སྤུན་མཆེད་རྣམས་ད་དུང་ཡང་རྒྱ་ནག་གི་ཟི་ཁྲོན་ཞིང་ཆེན་ཏཱ་ཀྲུ་རྫོང་གི་ཁྲོན་ཏུང་བཙོན་ཁང་དུ་མུ་མཐུད་བཞུགས་ནས་སྐུ་ཕུང་རག་ཐབས་གནང་བཞིན་ཡོད་པ་དང་། ཉེ་ཆར་ཚེས་༡༣ཉིན་ལི་ཐང་ཨོ་ཐོག་འབྲོག་ཁུལ་གྱི་ས་གནས་བོད་མི་རྣམས་ནས་རིན་པོ་ཆེའི་སྐུ་ཕུང་བོད་མིར་རྩིས་སྤྲོད་དགོས་པའི་ཞུ་གཏུགས་བྱེད་སྐབས། རྒྱ་གཞུང་གི་ཉེན་རྟོགས་པས་ཁོ་ཚོར་མེ་མདའ་རྒྱབ་པ་དང་ཉེས་བརྡུང་བཏང་སྟབས། དེའི་ཁྲོད་བོད་མི་ ༡༥ ལ་རྨས་སྐྱོན་དྲག་པོ་ཕོག་སྟེ་ད་ཆ་ཁྲེན་ཏུ་སྨན་ཁང་དུ་སྐྱེལ་དགོས་པ་བྱུང་འདུག སྐབས་དེའི་དོན་རྐྱེན་དང་འབྲེལ་བའི་འདྲ་དཔར་ཁག་ཅིག་བཙན་བྱོལ་དུ་ཕྱིར་འབྱར་བྱུང་བའི་ནང་དགེ་འདུན་པ་ཞིག་གི་མཇིང་པར་མེ་མདའ་ཕོག་པ་དང་། དེ་བཞིན་བོད་མི་མང་པོ་ཞིག་གི་མགོ་དང་ལུས་པོར་མེ་མདའ་ཕོག་སྟེ་རྨས་སྐྱོན་ཚབས་ཆེ་བྱུང་བ་མངོན་རྒྱུ་འདུག ཁ་སང་རྒྱ་གཞུང་གི་འབྲེལ་ཡོད་ཚོས་ཉག་ཆུ་རྫོང་ཁོངས་ཀྱི་མི་བཅོ་བརྒྱད་ཀྱིས་ཞུ་གཏུགས་ཆེད་བཙོན་ཁང་ཡོད་སར་འགྲོ་ཆོག་པའི་ཆོག་ཆན་སྤྲད་སྟབས། ད་ཆ་བོད་མི་བཅོ་བརྒྱད་དེ་དག་དང་གཞན་ཡང་ལི་ཐང་དང་ཉག་ཆུ་རྫོང་གི་ས་གནས་བོད་མི་བརྒྱ་སྐོར་ཙམ་ཞིག་བཙོན་ཁང་དེར་འབྱོར་ནས། རྒྱ་གཞུང་ལ་རིན་པོ་ཆེའི་སྐུ་ཕུང་བོད་མིར་རྩིས་སྤྲོད་དགོས་པའི་འབོད་སྐུལ་མུ་མཐུད་ཞུ་མུས་དང།། རིན་པོ་ཆེའི་སྤུན་ཆེད་གཅིག་དྲན་མེད་དུ་བརྒྱལ་བའི་གནས་ཚུལ་བྱུང་འདུག རྩ་བས་ཁ་སང་ཞུགས་སྒར་དུ་བོད་ཀྱི་དགུ་བཅུ་གསུམ་ལས་འགུལ་ཚོགས་པས་གོ་སྒྲིག་འོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་མཛད་རྗེས་ལ་བཀྲིན་རྗེས་དྲན་མཚོན་ཆེད་ཀྱི་བགྲོ་གླེང་ལས་རིམ་ཞིག་ཚོགས་པའི་ཐོག དགེ་བཤེས་ཉི་མ་ལགས་གཙོས་པའི་བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བལྟི་གནས་ཁང་གི་འགན་འཛིན་ཚེ་རིང་མཚོ་མོ་ལགས་བཅས་གསུམ་ནས། དམ་པ་ཁོང་གིས་བོད་ཀྱི་བསྟན་སྲིད་སླད་མཛད་རྗེས་བསྐྱངས་པ་རྣམས་ལ་ཆེ་བསྟོད་ཀྱི་ཡི་རང་ཞུས་པ་དང། རིན་པོ་ཆེ་མཆོག་ལ་ཁྲིམས་ཐོག་ནས་དྲང་བདེན་གྱི་ཐག་གཅོད་བྱེད་མེད་པའི་བརྒྱུད་རིམ་སྐོར་དང་། དེ་བཞིན་རྒྱལ་སྤྱིའི་ཁྲིམས་ཀྱི་ཐོག་ནས་རིན་པོ་ཆེ་མཆོག་གི་གནས་སྟངས་དེ་ཁྲིམས་འགལ་ཆགས་ཀྱི་ཡོད་པ་བཅས་ཀྱི་ཐོག་བགྲོ་གླེང་གཟབ་རྒྱས་ཞིག་གནང་འདུག སྐབས་དེར་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་རྒྱ་གཞུང་གིས་ཁྲིམས་ཀྱི་ཐོག་ནས་རིན་པོ་ཆེར་ཁྲིམས་འགལ་གྱི་ཉེས་ཆད་བསྐྱལ་ཡོད་པར་སྐྱོན་བརྗོད་གནང་བ་དང། གཞན་ཡང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ཕེལ་རྒྱས་བལྟི་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་རྒྱལ་སྤྱིའི་ཁྲིམས་ཀྱི་ཐོག་ནས་རིན་པོ་ཆའི་་གནས་སྟངས་དེ་ཁྲིམས་འགལ་ཆགས་ཀྱི་ཡོད་པ་མང་ཚོགས་ལ་ངོ་སྤྲོད་གནང་སོང།