རྒྱལ་སྤྱི།

ཉེ་ཆར་ཨ་རི་ནང་དུ་བོད་མི་ཆབ་སྲིད་བཙོན་ཟུར་སྐུ་ཞབས་རྟའུ་བློ་བཟང་སྦྱིན་པ་ལགས་ཀྱིས་ Boston གྲོང་ཁྱེར་ནས་རྒྱལ་ས་ Washington DC བར་དུ་སྤྱི་ལི་ ༧༠༠ ལྷག་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བ་དང་། དེ་བཞིན་ཁེ་ན་ཌ་ནང་དུ་བོད་དོན་ལས་འགུལ་བ་སངས་རྒྱས་སྐྱབས་ལགས་ཀྱིས་ Toronto གྲོང་ཁྱེར་ནས་རྒྱལ་ས་ Ottawa དང་དེ་རྗེས་ཕྱིར་ Toronto བར་ཁྱོན་སྤྱི་ལེ་ ༩༠༠ ཙམ་གྱི་གོམ་བགྲོད་ལས་འགུལ་གཉིས་མཇུག་སྒྲིལ་གནང་འདུག ཁ་སང་སྐུ་ཞབས་སངས་རྒྱས་སྐྱབས་ལགས་ཕྱིར་ Toronto དུ་འབྱོར་བ་དང་སྦྲགས། ཁུལ་དེའི་རྒྱ་ནག་གཞུང་ཚབ་ལས་ཁུངས་མདུན་དུ་ས་གནས་བོད་མི་མང་དག་ཅིག་དང་ལྷན་དུ་རྒྱ་ནག་གཞུང་ལ་ངོ་རྒོལ་སྐད་འབོད་སོགས་གནང་བ་དང་བོད་དོན་གོམ་བགྲོད་ཀྱི་ལས་འགུལ་མཇུག་སྒྲིལ་གནང་འདུག སྐབས་དེར་ Toronto ཁུལ་གྱི་བོད་མིའི་ཚོགས་པ་ལྔ་ཡི་འཐུས་མི་གཙོས་བོད་མི་མང་པོ་འདུ་འཛོམས་ཐོག་མངར་ཟས་བགོ་འགྲེམས་དང་དཀར་གཙང་གི་མཇལ་དར་སྒྲོན་ནས་ཁོང་ལ་ཕེབས་བསུ་གཟབ་རྒྱས་ཞུས་འདུག སྐབས་དེར་ཁོང་གིས་བོད་མི་རིགས་ཀྱི་དཀའ་ངལ་དང་འཐབ་རྩོད་ཁྲོད་ད་བར་བོད་ནང་བོད་མི་ ༡༥༠ ལྷག་གིས་རང་སྲོག་བློས་བཏང་གནང་བའི་ཆེས་ཛ་དྲག་གི་གནས་སྟངས་རྣམས་དྲན་གསོ་དང་འབྲེལ། ཕྱི་རྒྱལ་རང་དབང་ལུང་པར་བོད་ཀྱི་རྒྱལ་དར་འཁྱེར་རྒྱུ་དང་བོད་དོན་ལས་འགུལ་སྤེལ་རྒྱུ་སོགས་ཀྱི་རང་དབང་ཡོད་སྐབས་བོད་མི་ཚོ་རང་གི་འཚོ་བ་གཅིག་པོར་དབུ་མ་འཁོར་བར་བོད་དོན་ཆེད་དུ་ཚང་མས་རྡོག་རྩ་གཅིག་སྒྲིལ་གྱིས་ཕྱག་ལས་གནང་རྒྱུའི་འགན་ཡོད་སྐོར་གསུངས་པ་མ་ཟད། ཁོང་རང་ཉིད་ནས་ཕྱི་ལོ་ ༢༠༡༨ ལོ་ནས་རང་ནུས་གང་ལྕོགས་ཀྱིས་ལས་འགུལ་སྤེལ་དང་སྤེལ་མུས་ཡིན་པ་ལྟར་བོད་མི་གཞན་རྣམས་ནས་ཀྱང་བོད་ཀྱི་རྩ་དོན་ཆེད་དུ་མུ་མཐུད་ལས་འགུལ་སྤེལ་དགོས་པའི་གཞེན་སྐུལ་གནང་འདུག རྩ་བའི་སངས་རྒྱས་སྐྱབས་ལགས་ཀྱིས་ཟླ་བ་སྔོན་མའི་ཕྱི་ཚེས་ ༢༨ ཉིན་ Toronto གྲོང་ཁྱེར་ནས་དབུ་འཛུགས་ཀྱིས་ཕྱི་ཚེས་ ༦ ཉིན་རྒྱལ་ས་ Ottawa ནང་དུ་འབྱོར་རྗེས་ཡུལ་དེའི་གྲོས་ཚོགས་འཐུས་མི་སྐུ་ཞབས་ Arif Virani ལགས་ཀྱིས་གཙོས་པའི་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གནང་རྗེས་རྒྱ་ནག་གཞུང་ཚབ་ལས་ཁུངས་མདུན་དུ་ཟས་བཅད་ངོ་རྒོལ་གྱི་ལས་འགུལ་སོགས་སྤེལ་བ་མ་ཟད། ཕྱིར་ Toronto བར་གོམ་བགྲོད་གནང་ཡོད་པ་རེད། ཁོང་གིས་རླུང་འཕྲིན་ཁང་ལ་ད་རེས་ཀྱི་ལས་འགུལ་འདི་འདོད་བློ་ཁེངས་པོ་བྱུང་བ་དང་། ཁོང་རང་ཉིད་ཀྱི་དགོས་འདུན་གཙོ་བོ་གསུམ་པོ་དེ་དག་དངོས་སུ་ཁེ་ན་ཌའི་གཞུང་འབྲེལ་མི་སྣར་སྤྱན་འབུལ་ཞུ་རྒྱུའི་གོ་སྐབས་ཐོབ་པར་དགའ་ཚོར་དང་བོད་དོན་དྲིལ་བསྒྲགས་གང་ལ་གང་འཚམ་གནང་ཐུབ་པའི་མྱོང་བ་བྱུང་ཡོད་སྐོར་སོགས་གསུངས་སོང་། དེ་བཞིན་ཨ་རི་ནང་དུ་བཅའ་བཞུགས་བོད་མི་ཆབ་སྲིད་བཙོན་ཟུར་རྟའུ་བློ་བཟང་སྦྱིན་པ་ལགས་ཀྱིས་ Boston གྲོང་ཁྱེར་ནས་ཨ་རིའི་རྒྱལ་ས་ Washington DC བར་སྤྱི་ལེ་ ༧༠༠ ལྷག་གི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་དོན་བཞིན་ཁ་ཉིན་ཕྱི་ཚེས་ ༡༩ ཉིན་རྒྱལ་ས་ Washington དུ་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་འབྱོར་བ་དང་འབྲེལ། ས་གནས་བོད་མི་མང་དག་ཅིག་མཉམ་ཞུགས་ཐོག་རྒྱ་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག དེ་རྗེས་ཨ་རིའི་སྲིད་འཛིན་གྱི་བཞུགས་གནས་ཕོ་བྲང་དཀར་པོའི་བར་རྐང་འཁོར་སྐོར་སྐྱོད་དང་བོད་དོན་དྲིལ་བསྒྲགས་གནང་སྟེ་ལས་འགུལ་མཇུག་སྒྲིལ་གནང་འདུག ཐེངས་འདིའི་ལས་འགུལ་ཁྲོད་བོད་དོན་ལས་འགུལ་བ་གཉིས་ནས་༸གོང་ས་མཆོག་བོད་ལ་ཕྱིར་གདན་ཞུ་གནང་རྒྱུ་དང་། བོད་རྒྱ་འབྲེལ་མོལ་བསྐྱར་གསོ་གནང་རྒྱུ། དེ་བཞིན་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་གཙོས་པའི་བོད་མི་ཆབ་སྲིད་བཙོན་པ་རྣམས་གློད་བཀྲོལ་དགོས་པ་སོགས་ཀྱི་དགོས་འདུན་ཁག་ཅིག་ཆེད་བཏོན་གྱིས་རྐང་འཁོར་སྐོར་སྐྱོད་དང་གོམ་བགྲོད་ཀྱི་ལས་འགུལ་སོ་སོར་སྤེལ་ཡོད་པ་རེད།

ཨ་མི་རི་ཀའི་སྲིད་གཞུང་གིས་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ཨ་རིའི་བཟོ་ཚོང་དང་འབྲེལ་ཡོད་རྒྱ་ནག་གི་ཚོང་ལས་སྡེ་ཚན་ ༡༡ ལ་ཨ་རི་གཞུང་གིས་ཆོག་མཆན་མེད་པར་མཉམ་འབྲེལ་གྱི་ཚོང་ལས་གནང་རྒྱུ་མེད་པའི་ཉེས་ཆད་བཀལ་འདུག ཁ་སང་ New York Times སོགས་རྒྱལ་སྤྱིའི་གསར་ཁང་ཁག་གིས་གནས་ཚུལ་སྤེལ་བར་གཞིགས་ན། ཨ་རིའི་སྲིད་གཞུང་ནས་ད་ལྟའི་ཤིན་ཅང་ནང་གི་ཡུ་གུ་མི་རིགས་ཀྱི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ། ཡུ་གུར་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་རྒྱ་ནག་སྲིད་གཞུང་དང་འབྲེལ་བ་ཡོད་པའི་རྒྱ་ནག་གི་འཕྲུལ་རིགས་དང་གྱོན་ཆས་སོགས་དང་འབྲེལ་བའི་བཟོ་ཚོང་ལྟེ་གནས་ཁང་ Nanchang O-Film Tech དང་Hefei Bitland Information Technology དེ་བཞིན་ Changji Esquel Textile Co. Ltd སོགས་རྒྱ་ནག་གི་ཚོང་ལས་སྡེ་ཚན་ ༡༡ དངོས་སུ་མིང་འདོན་གནང་སྟེ་ཚོང་ལས་སྡེ་ཚན་དེ་དག་ཨ་རི་ནང་ཡོད་པའི་ཚོང་ལས་སྡེ་ཚན་ཁག་དང་འབྲེལ་བ་བྱེད་མི་ཆོག་པའི་ཉེས་ཆད་བཀལ་ཡོད་པ་གསུངས་འདུག རྒྱ་ནག་གི་ཚོང་ལས་སྡེ་ཚན་དེ་དག་གིས་གསང་བའི་ལྟ་སྲུང་ཡོ་ཆས་མང་དག་ཅིག་བཟོས་ཏེ་རྒྱ་ནག་གཞུང་གི་སྲིད་བྱུས་ལ་རོགས་འདེགས་ཀྱིས་མང་ཚོགས་བཀག་སྐྱིལ་བྱ་ཡུལ་ས་ཁུལ་ཁག་ཏུ་ཤུགས་ཆེར་སྤྱོད་བཞིན་པ་མ་ཟད། གྱོན་ཆས་བཟོ་ཚོང་དང་འབྲེལ་བའི་ཚོང་ལས་སྡེ་ཚན་ཁག་ནས་ཡུ་གུར་མང་ཚོགས་རྣམས་ལ་གླ་ཕོགས་སོགས་ཀྱི་ཐོབ་ཐང་གང་ཡང་མེད་པར་ངལ་རྩོལ་ལས་རིགས་འདྲ་མིན་གཉེར་འཇུག་བཞིན་ཡོད་པ་གསུངས་འདུག ད་རེས་ཨ་རི་སྲིད་གཞུང་གིས་ཉེས་ཆད་བཀལ་སའི་རྒྱ་ནག་གྱི་ཚོང་ལས་སྡེ་ཚན་དེ་དག་ཨ་རིས་གཙོས་པའི་རྒྱལ་སྤྱིའི་ཚོང་ལས་སྡེ་ཚན་ Apple དང་ Google དེ་བཞིན་ HP དང་། Tommy Hilfiger བཅས་དང་ཚོང་འབྲེལ་ཆེན་པོ་ཡོད་པ་ཞིག་རེད་འདུག རྒྱ་ནག་གི་ Nanchang O-Film Tech ཞེས་པ་དེ་དེ་སྔ་ཨ་རིའི་ Apple བཟོ་ཚོང་ཁང་དང་འབྲེལ་བ་དམ་ཟབ་འོག་ཀུ་ཤུ་རྟགས་ཅན་ལག་ཐོགས་ཁ་པར་གྱི་པར་ཆས་བཟོ་ལས་ཐོག་མཉམ་ལས་བྱེད་མྱོང་ཡོད་པ་དང་། བཟོ་ལས་ཁང་དེའི་གཤམ་འོག་ལས་བྱེད་མང་ཆེ་བ་བཙན་གནོན་ཐོག་ཤིན་ཅང་ནས་ཁྲིད་ཡོང་བ་ཤ་སྟག་ཆགས་ཀྱི་ཡོད་པ་སོགས་ཨོ་སི་ཊོ་ལི་ཡའི་སྲིད་བྱུས་ཉམས་ཞིབ་ལྟེ་གནས་ཁང་གི་སྙན་ཐོར་གསལ་ཡོད་པ་རེད། འོན་ཀྱང་ཨ་མི་རི་ཀའི་ཚོང་འབྲེལ་དྲུང་ཆེ་སྐུ་ཞབས་ Wilbur Ross ལགས་ནས་རྒྱ་ནག་གི་ཚོང་ལས་སྡེ་ཚན་དེ་དག་གི་མང་ཚོགས་ལ་གཉའ་གནོན་བཏང་ནས་ངལ་རྩོལ་གྱི་ལས་ཀ་མང་པོ་བྱེད་བཅུག་པ་མ་ཟད། དེང་དུས་ཀྱི་འཕྲུལ་ཆས་གསར་བཟོ་བརྒྱུད་གཞི་རིམ་མི་མང་གི་རང་དབང་ཁག་རྡོག་རོལ་གཏོང་བཞིན་ཡོད་པར་འགྲེལ་བརྗོད་དང་སྦྲགས། ཐེངས་འདིའི་ཨ་རི་སྲིད་གཞུང་གི་ཐག་གཅོད་དེས་ཨ་རིའི་ཚོང་ལས་སྡེ་ཚན་རྣམས་ཤིན་ཅང་ནང་ལག་བསྟར་བྱེད་བཞིན་པའི་རྒྱ་ནག་སྲིད་གཞུང་གི་དྲག་པོའི་སྲིད་བྱུས་ཀྱི་ལག་ཆར་མི་གྱུར་བའི་ཡིད་ཆེས་ཡོད་ཅེས་གསུངས་འདུག གཞི་རྩའི་ད་ལྟའི་ཤིན་ཅང་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། ལྷག་པར་དུ་ཨ་རི་དང་རྒྱ་ནག་དབར་གྱི་འབྲེལ་བའི་གནས་སྟངས་སོགས་ཀྱི་ཁྲོད་ཉེ་བའི་ཆར་ཨ་རི་གཞུང་ནས་འགྲོ་བ་མིའི་ཐོབ་ཐང་ཐོག་འགན་ཁུར་ཐུབ་ཐབས་དང་། བོད་ནང་ཕར་འགྲོ་ཚུར་འོང་གཉིས་ཀྱི་ཁྲིམས་གཞི་ལག་བསྟར་བརྒྱུད་རྒྱ་ནག་གི་དཔོན་རིགས་ཁག་ཅིག་དངོས་སུ་མིང་འདོན་གྱིས་ཨ་རི་ནང་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ཡོད་པ་མ་ཟད། རྒྱ་ནག་གི་འཕྲུལ་ལས་ཚོང་གཉེར་ཁང་ Huawei ཡི་ལས་བྱེད་ཚོར་མཐོང་མཆན་བཀག་སྡོམ་གནང་རྒྱུ་ཡིན་པ་གསུངས་ཡོད།  

ཁ་སང་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གཞུང་གི་ཆབ་སྲིད་སློབ་སྟོན་པ་མཐོ་གྲས Wang Yang ཟླ་བ་འདིའི་ཚེས་ ༦ ནས་ ༨ བར་ཉིན་གྲངས་གཉིས་ཀྱི་རིང་བོད་རང་སྐྱོང་ལྗོངས་ཟེར་བའི་ལྷ་ས་དང་གཞིས་ཀ་རྩེར་ཞིབ་འཇུག་སྐོར་སྐྱོད་བྱས་ཡོད་སྐོར་བཀོད་འདུགWang Yang ནི་རྒྱ་ནག་དབུས་ཆབ་སྲིད་གྲོས་ཚོགས་ཀྱི་ཚོགས་གཙོ་དང་དབུས་ཆབ་སྲིད་རྒྱུན་ལས་ལྷན་ཁང་གི་དཔོན་རིགས་བདུན་ཁོངས་ནས་གཅིག་ཡིན་པ་མ་ཟད། ཁོ་པ་ནི་ལོ་འདིའི་ནང་བོད་དུ་སྐྱོད་མཁན་རྒྱ་ནག་གི་དཔོན་རིགས་མཐོ་གྲས་ཤིག་ཆགས་ཀྱི་ཡོད་པ་རེད། ཁོ་པས་ཐེངས་འདིའི་སྐོར་སྐྱོད་ཁྲོད་མང་ཚོགས་ལ་སེམས་ཐག་གཙང་སེལ་གྱི་སྒོ་ནས་ཁ་བྲལ་བར་རྒོལ་འཛིང་བྱེད་དགོས་པ་དང་རྒྱལ་ཞེན་རིང་ལུགས་ཀྱི་སློབ་གསོ་མཐོར་འདེགས་ཀྱིས་བོད་ཀྱི་ནང་བསྟན་ཆོས་བརྒྱུད་དེ་སྤྱི་ཚོགས་རིང་ལུགས་ཀྱི་ཁྱད་ཆོས་ལྡན་པ་བཟོ་དགོས་པ་མ་ཟད། མི་རིགས་དང་ཆོས་ལུགས་ཀྱི་ལས་དོན་མཐའ་དག་བོད་ཀྱི་ས་གནས་བདེ་འཇགས་དང་ཐད་ཀར་འབྲེལ་བ་ཡོད་པར་བརྗོད་དེ་མང་ཚོགས་ཁྲོད་མི་རིགས་གོང་བུ་གཅིག་གྱུར་གྱི་གོ་རྟོགས་གོང་སྤེལ་ཡོང་སླད་རྒྱ་ནག་དམར་པོའི་རིང་ལུགས་ཀྱི་ལོ་རྒྱུས་ལ་ཉམས་ཞིབ་དང་སློབ་སྦྱོང་བྱེད་དགོས་གལ་ཡིན་པར་བཤད་འདུག རྒྱལ་སྤྱིའི་བོད་དོན་ལས་འགུལ་ཁང་གིས་ Wang Yang ཡིས་ལྷ་ས་ནང་དམར་ཤོག་ཚོགས་པའི་ཚོགས་མི་རྣམས་ལ་གཏམ་བཤད་བྱེད་སྐབས་བོད་བརྒྱུད་ནང་བསྟན་པ་རྣམས་ནས་རྒྱལ་ཁབ་ཀྱི་ཁྲིམས་དེ་ནང་པའི་བཀའ་དང་བསྟན་བཅོས་ལས་ལྷག་པ་ཞིག་ལ་ངོས་འཛིན་དགོས་པ་དང་། དགོན་སྡེ་ཁག་དང་ཆོས་ལུགས་ཀྱི་ལས་དོན་མཐའ་དག་རྒྱལ་ཁབ་ཀྱི་ཁྲིམས་ལ་བཀུར་དགོས་པ་མ་ཟད། བོད་ཀྱི་ནང་བསྟན་ཆོས་བརྒྱུད་དེ་སྤྱི་ཚོགས་རིང་ལུགས་ཀྱི་ཁྱད་ཆོས་ལྡན་པ་བཟོ་ཆེད་རྒྱལ་གཅེས་ཀྱི་སློབ་གསོ་དགོས་གལ་ཡིན་ཚུལ་འགྲེལ་བརྗོད་བྱས་པར་གཞིགས་ཚེ་རྒྱ་ནག་དམར་ཤོག་ཚོགས་པས་བོད་ཀྱི་དགོན་སྡེ་ཁག་གཙོས་མི་མང་དཀྱུས་མའི་ཁྲོད་རྒྱལ་གཅེས་ཆོས་གཅེས་ཀྱི་སྲིད་བྱུས་གོང་སྤེལ་གཏོང་ཐབས་ལ་འབད་བཞིན་པའི་དཔང་རྟགས་འཕར་མ་ཤིག་ཡིན་པ་དང་། སྲིད་གཞུང་གི་ངོས་ནས་མ་འོངས་པར་སྲིད་བྱུས་དེ་ལག་བསྟར་ཤུགས་ཆེ་སྤེལ་ངེས་ཡིན་པར་གསལ་འདོན་བྱེད་ཀྱི་ཡོད་སྐོར་གསུངས་འདུག ལྷག་པར་དུ་ཁོ་པས་སེམས་ཐག་གཙང་སེལ་གྱི་སྒོ་ནས་ཁ་བྲལ་བར་རྒོལ་འཛིང་བྱེད་དགོས་སྐོར་དང་རྒྱལ་ཞེན་རིང་ལུགས་ཀྱི་སློབ་གསོ་མཐོར་འདེགས་ལ་ཁ་གཡར་ནས་བོད་ཀྱི་ནང་བསྟན་ཁག་སྤྱི་ཚོགས་རིང་ལུགས་སུ་གྱུར་དགོས་ལུགས་བཤད་པ་ལས་བོད་མིའི་ཆོས་དད་རང་དབང་གཙོས་རིག་གཞུང་ལ་སྟངས་འཛིན་དང་བོད་མིར་དྲག་གནོན་ཇེ་ཆེར་འགྲོ་ངེས་ཡིན་པ་གསལ་པོ་རེད་ཅེས་གསུངས་འདུག དེ་བཞིན་ Wang Yang ཡིས་དེ་སྔ་བོད་ནང་སྐྱོད་པའི་སྐབས་དང་སྤྱི་མཚུངས་ལྟར་ཐེངས་འདིའི་སྐོར་སྐྱོད་ཁྲོད་སླར་ཡང་གཞིས་སྤོས་ཟིན་པའི་བོད་མིའི་ཞིང་འབྲོག་ཁྱིམ་ཚང་ནང་ཆེད་སྐྱོད་ཀྱིས་འདྲ་པར་བླངས་ནས་བོད་མི་ཞིང་འབྲོག་དེ་དག་བདེ་སྐྱིད་ཀྱི་འཚོ་བར་རོལ་བཞིན་པ་གསལ་བཏོན་བྱས་ཀྱང་། དོན་དངོས་ཐོག་རྒྱ་ནག་གི་ལས་གཞི་དེའི་ཐོག་ནས་བོད་མིའི་ཁྱིམ་ཚང་དག་ལ་སྟངས་འཛིན་དང་མྱུལ་ཞིབ་ཀྱི་ལས་དོན་ཤུགས་ཆེ་རུ་གཏོང་རྒྱུའི་ལྐོག་གི་དམིགས་ཡུལ་བསྒྲུབ་རྒྱུ་མ་ཟད། བོད་མི་ཞིང་འབྲོག་མང་ཚོགས་རྣམས་ཆེས་དབུལ་ཕོངས་ཀྱི་གནས་སུ་གྱུར་རྗེས་དེ་འབྲེལ་ངལ་བ་ཆེན་པོ་འཕྲད་བཞིན་ཡོད་པར་བརྗོད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རི་གྲོས་ཚོགས་འཐུས་མི་ཟུར་པ་སྐུ་ཞབས་ John Lewis མཆོག་གཟའ་འཁོར་སྔོན་མའི་རེས་གཟའ་པ་སངས་ཉིན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་ཐུགས་གསོའི་གསུང་འཕྲིན་ཞིག་བསྩལ་འདུགགསུང་འཕྲིན་དེའི་ནང་དམ་པ་ཁོང་ནི་ཨ་རིའི་སྤྱི་དམངས་ཐོབ་ཐང་འཐབ་རྩོད་གནང་མཁན་གྱི་དབུ་ཁྲིད་ཙམ་མིན་པར་འཚེ་མེད་ཞི་བདེ་དང་དྲང་བདེན་ཐད་རྒྱལ་སྤྱི་ཁྱོན་ཡོངས་ལ་སེམས་འགུལ་སྤེལ་མཁན་མིག་ལྟོས་ལྟ་བུ་ཆགས་ཡོད་པ་བཀའ་བསྩལ་འདུག ༸གོང་ས་མཆོག་གིས་མགོན་པོ་༸གང་ཉིད་མཆོག་ནི་དུས་ཡུན་རིང་པོའི་གོང་ནས་ཨ་རིའི་སྙན་གྲགས་ཅན་གྱི་སྤྱི་དམངས་ཐོབ་ཐང་རྩོད་ལེན་པ་སྐུ་ཞབས་ Dr. Martin Luther King Jr མཆོག་དང་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་ Gandhi མཆོག དེ་བཞིན་ལྷོ་ཨ་ཕི་རི་ཀའི་དབུ་ཁྲིད་ Nelson Mandela མཆོག་སོགས་སྐྱེས་ཆེན་དམ་པ་དེ་དག་ལ་ཡིད་མོས་མཛད་མཁན་ཞིག་ཡིན་པ་དང་། ལྷག་པར་དུ་མགོན་པོ་༸གང་ཉིད་མཆོག་ནས་འཚེ་མེད་ཞི་བ་དང་འབྲེལ་བའི་བཀའ་མོལ་སྩོལ་སྐབས་ཁོང་རྣམ་པ་དཔེ་མཚོན་དུ་ལུང་འདྲེན་མཛད་སྐོར་བཀའ་བསྩལ་བ་དང་སྦྲགས། སྐུ་ཞབས་ Lewis ལགས་དམ་པ་དེ་ཉིད་ནི་ Dr. Martin Luther King Jr མཆོག་ཐུགས་ངོ་མཁྱེན་པ་ཁོ་ན་མ་ཡིན་པར་ཁོང་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་ཞུ་མཁན་ཞིག་ཡིན་སྟབས་༸གོང་ས་མཆོག་གིས་ Dr. King Jr མཆོག་དང་སྐུ་དངོས་སུ་མཇལ་མྱོང་མེད་ཀྱང་སྐུ་ཞབས་ Lewis མཆོག་གི་བརྒྱུད་ཁོང་དང་དམིགས་བསལ་གྱི་འབྲེལ་བ་ཅིག་འཇོག་ཐུབ་པའི་ཐུགས་ཚོར་བྱུང་ཡོད་སྐོར་བཀའ་བསྩལ་འདུགགཞན་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་གྲོས་ཚོགས་འཐུས་མི་ཟུར་པ་སྐུ་ཞབས་ John Lewis མཆོག་གི་བཞེངས་ཕྱོགས་དང་འབྲེལ་དམ་པ་ཁོང་ནི་མང་གཙོའི་ཆ་རྐྱེན་གཙོ་བོ་སྟེ་འདྲ་མཉམ་དང་རང་དབང་། དེ་བཞིན་དྲང་བདེན་གྱི་ལྟ་སྤྱོད་སོགས་བརྒྱུད་ནས་ཨ་རིའི་མི་སེར་རྣམས་ལ་འཐབ་རྩོད་ཀྱི་ལམ་བུ་དེ་འཚེ་མེད་ཞི་བའི་ཐོག་ནས་རྩོད་ལན་གནང་དགོས་པའི་བློ་སྐྱེད་གནང་ཡོད་པ་ལྟར། ད་ཆ་དམ་པ་ཁོང་སྐུ་འཚོ་བཞུགས་མེད་ཀྱང་ཨ་རིའི་མི་མང་ཚོའི་ངོས་ནས་ཨ་རི་རྒྱལ་ཁབ་དང་དེ་བཞིན་གོ་ལའི་ཁྱོན་གྱི་བདེ་ཐབས་ལ་དམིགས་ཏེ་ཁོང་གི་བཞེངས་ཕྱོགས་དེའི་ཐོག་ནས་ཕྱག་ལས་མུ་མཐུད་གནང་རྒྱུའི་ཐུགས་རེ་ཡོད་ཅེས་བཀའ་བསྩལ་འདུག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དམ་པ་ཁོང་གི་ནང་མི་དང་ཨ་རིའི་གཞུང་མང་གཉིས་ལ་ཐུགས་གསོ་ཞུས་པ་དང་སྦྲགས། དམ་པ་ཁོང་ནི་ཨ་རིའི་མི་མང་གི་རང་དབང་དང་དྲང་བདེན་སླད་ Dr. Martin Luther King མཆོག་གི་བཞེངས་ཕྱོགས་དང་འབྲེལ་ནས་འཚེ་མེད་ཞི་བའི་ལྟ་སྤྱོད་ཐོག་ནས་རླབས་ཆེན་གྱི་ཕྱག་ལས་གནང་མཁན་དབུ་ཁྲིད་ཅིག་ཡིན་སྐོར་གསུངས་པ་དང་སྦྲགས། དམ་པ་ཁོང་མིག་དཔེར་བཟུང་ནས་བོད་མི་རིགས་ཀྱི་རང་དབང་དང་དྲང་བདེན་གྱི་འཐབ་རྩོད་དེ་ཡང་འཚེ་མེད་ཞི་བའི་སྒོ་ནས་གནང་བཞིན་ཡོད་པ་གསུངས་འདུགདེ་བཞིན་སྲིད་སྐྱོང་མཆོག་གིས་གཉན་འཕྲང་ཅན་གྱི་དུས་ཚིགས་འདི་འདྲ་ཞིག་གི་ཐོག་དམ་པ་ཁོང་སྐུ་འདས་གྲོངས་སུ་གྱུར་བར་མྱ་ངན་ཞུས་པ་དང་ཆབས་ཅིག སྐུ་ཞབས་ John Lewis མཆོག་གི་ཞལ་ཆེམས་དེ་མུ་མཐུད་ནས་མིག་ལྟོས་ལ་བཟུང་སྟེ་བདེན་པར་རྒྱབ་སྐྱོར་གྱི་ཕྱག་ལས་གནང་དགོས་གལ་ཡིན་པ་གསུངས་འདུག

ཉེ་ཆར་ཕྱི་ཚེས་ ༡༧ ཉིན་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་དང་དོན་གཅོད་ཁང་གི་དྲུང་ཆེ་དོན་གྲུབ་རྒྱལ་པོ་ལགས་རྣམ་གཉིས་ནས་ཁུལ་དེར་བཅའ་བཞུགས་ཨ་རིའི་གཞུང་ཚབ་ཆེན་མོ་སྐུ་ཞབས་ Kenneth Juster ལགས་དང་མཇལ་འཕྲད་ཀྱིས་བོད་དོན་དང་ལྷག་དོན་ཨ་རི་དང་བོད་དབར་གྱི་གནད་དོན་ཁག་དང་འབྲེལ་བའི་གླེང་མོལ་གནང་འདུག སྐབས་དེའི་མཇལ་འཕྲད་དང་འབྲེལ་ཏེ་གཞུང་ཚབ་ཆེན་མོ་ Kenneth ལགས་ནས་ཐེངས་འདིའི་སྐུ་ཚབ་དོན་གཅོད་ཀྱི་མཇལ་འཕྲད་དང་འབྲེལ། རང་ཉིད་ཀྱི་ twitter ཐོག་མཇལ་འཕྲད་ཀྱི་པར་དང་ལྷན་དུ་ཨ་རི་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཉིས་དབར་གྱི་མཛའ་འབྲེལ་དེ་དུས་ནས་དུས་སུ་ཇེ་བཟང་དུ་འགྲོ་བཞིན་ཡོད་པ་དང་། ད་རེས་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་དང་དྲུང་ཆེ་དོན་གྲུབ་རྒྱལ་པོ་རྣམ་གཉིས་མཇལ་འཕྲད་བྱུང་བར་ཐུགས་དགྱེས་ཚོར་བྱུང་སྐོར་དང་དེ་ནི་ཨ་རིའི་མི་མང་དང་བོད་མི་མང་གཉིས་ཀྱི་འབྲེལ་ལམ་རྒྱ་སྐྱེད་གཏོང་ཕྱིར་ཡིན་པ་གསུངས་འདུགརླུང་འཕྲིན་ཁང་གིས་དེ་རིང་ཞལ་པར་བརྒྱུད་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་ལ་མཇལ་ཕྲད་དང་འབྲེལ་བའི་བཀའ་འདྲི་ཁག་ཅིག་ཞུས་པར་སྐབས་དེར་གཙོ་བོ་ཨ་རི་དང་༸གོང་ས་མཆོག དེ་བཞིན་བོད་དང་ཨ་རི་བཅས་ཀྱི་འབྲེལ་བའི་སྐོར་ལ་བཀའ་བསྡུར་གནང་བ་མ་ཟད་ལྷག་པར་དུ་མ་འོངས་པར་མུ་མཐུད་ཕྱོགས་གཉིས་དབར་མཉམ་རུབ་ཐོག་ཕྱག་ལས་གནང་ཕྱོགས་ཇི་ཡོད་སོགས་ཀྱི་ཐད་བཀའ་བསྡུར་ལྷུག་པོ་གནང་ཡོད་པ་དང་། ཁྱད་པར་དུ་གོ་སྐབས་དེ་དམ་འཛིན་གྱིས་སྐུ་ཚབ་དོན་གཅོད་མཆོག་ནས་གཞུང་ཚབ་ཆེན་མོ་སྐུ་ཞབས་ Kenneth Juster ལགས་ཀྱིས་གཙོས་པའི་ཨ་རིའི་གནད་ཡོད་མི་སྣ་དང་མང་ཚོགས་བཅས་ཀྱིས་ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ཉིན་མོར་འཚམས་འདྲི་ཞུས་པ་དང་། ཨ་རི་སྲིད་གཞུང་ནས་བོད་ནང་ཕར་འགྲོ་ཚུར་འོང་གི་ཁྲིམ་འཆར་ཕྱག་བསྟར་གནང་རྒྱུའི་གསལ་སྒྲགས་གནང་བ། དེ་བཞིན་བོད་མི་སྤྱིའི་བདེ་དོན་སླད་རོགས་དངུལ་གནང་བཞིན་པ་སོགས་ལ་ཐུགས་རྗེ་ཆེ་ཞུས་འདུག གཞི་རྩའི་ཨ་རིའི་གཞུང་ཚབ་པ་སྐུ་ཞབས་ Kenneth Juster ལགས་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་རྐྱེན་པས་༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་གྱི་མཛད་སྒོའི་སྐུ་མགྲོན་གཙོ་བོར་ཕེབས་ཐུབ་མེད་ཀྱང་། དྲྭ་ཐོག་བརྙན་འཕྲིན་བརྒྱུད་མགོན་པོ་༸གང་ཉིད་མཆོག་ལ་དགའ་བསུའི་འཚམ་འདྲི་ཞུས་ཡོད་པ་མ་ཟད། དེ་སྔ་ཕྱི་ལོ་ ༢༠༡༨ ཕྱི་ཟླ་ ༥ ཚེས་ ༤ ཉིན་བཞུགས་སྒར་༸རྒྱལ་བའི་ཕོ་བྲང་དུ་ཆེད་ཕེབས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་པ་དང་འབྲེལ། མགོན་པོ་༸གང་ཉིད་མཆོག་དུས་ནམ་ཞིག་ཨ་རིར་ཆིབས་བསྒྱུར་བཀྲིན་བསྐྱང་གནང་ཡོང་བའི་གསོལ་འདེབས་ཞུས་ཡོད་པ་རེད།

ཧོང་ཀོང་གི་ནང་དུ་གནས་བཞུགས་ཐེ་ཝན་གྱི་གཞུང་ཚབ་མཐོ་གྲས་སྐུཞབས་ Kao Ming-tsun ལགས་ཀྱིས་རྒྱ་ནག་གཅིག་གི་སྲིད་བྱུས་ལ་རྒྱབ་སྐྱོར་གྱི་མཚན་རྟགས་བཀོད་རྒྱུ་མིན་པའི་རྣམ་འགྱུར་འོག་ཧོང་ཀོང་ནས་ཕྱིར་ཐེ་ཝན་དུ་ཕྱིར་ལོག་གནང་དགོས་བྱུང་འདུགདེའང་ཁ་སང་གཟའ་ཕུར་བའི་ཉིན། ཧོང་ཀོང་གི་རང་དབང་གསར་གནས་ཞེས་པའིི་སྟེང་གནས་ཚུལ་ཐོན་པ་ལྟར་ན། ཧོང་ཀོང་དུ་རྟེན་གཞི་བྱས་པའི་ཐེ་ཝན་གྱི་དཔལ་འབྱོར་དང་རིག་གཞུང་ལྟེ་གནས་ཁང་གི་འགན་འཛིན་ལས་ཚབ་སྐུ་ཞབས་ Kao Ming-tsun གིས་རང་ཉིད་ཀྱི་མཐོང་མཆན་ལག་འཁྱེར་ཕྱིར་འགྱངས་ཞུ་དགོས་ཀྱང་།  རྒྱ་ནག་གིས་ཁོང་ཁུལ་དེར་མུ་མཐུད་དུ་བཞུགས་དགོས་ཚེ་རྒྱ་ནག་གཅིག་གི་སྲིད་བྱུས་ལ་ཁས་ལེན་གྱིས་མིང་རྟགས་བཀོད་དགོས་བའི་ཆ་རྐྱེན་བཏོན་ཡོད་སྟབས།  ཁོང་གིས་ཆ་རྐྱེན་དེར་ཁས་ལེན་མ་བྱས་པར་ཕྱིར་ཐེ་ཝན་དུ་ཕྱིར་ལོག་གནང་ཡོད་པ་རེད་འདུག རྒྱ་ནག་གིས་ཕྱི་འབྲེལ་གྱི་གནས་བབ་གང་སའི་ཁྲོད་དུ།  པེ་ཅིན་སྲིད་གཞུང་དང་འབྲེལ་བ་བྱེད་དགོས་ཚེ་ཐེ་ཝན་སྲིད་གཞུང་དང་འབྲེལ་བ་གཅོད་དགོས་བའི་བཙན་བཀའ་བཏང་སྟེ་མཚོ་གླིང་གི་ཐེ་ཝན་རྒྱལ་ཁབ་དེ་ཁེར་རྐྱང་དུ་འཕུད་ཐབས་བྱེད་ཀྱི་ཡོད་པ་ཡོངས་གྲགས་ཡིན་པ་དང་། ད་ལྟའི་འཆར་ཐེ་ཝན་ལ་ཕྱི་འབྲེལ་གྱི་འབྲེལ་ལམ་ཡོད་མཁན་ཕྱོགས་གཏོགས་རྒྱལ་ཁབ་བཅོ་ལྔ་མ་གཏོགས་མེད་པ་མ་ཟད། རྒྱ་ནག་གི་གནོད་ཤུགས་ཀྱི་འོག་ནས།  མཚོ་གླིང་རྒྱལ་ཁབ་དེ་བཞིན་རྒྱལ་སྤྱིའི་འཕྲོད་བསྟེན་ལྷན་ཚོགས་ལྟ་བུའི་རྒྱལ་སྤྱིའི་སྒྲིག་འཛུགས་ཁག་གི་ནང་དུ་མཉམ་ཞུགས་བྱེད་ཐུབ་ཀྱི་མེད་པ་རེད།  ཧོང་ཀོང་གི་ནང་དུ་རྟེན་གཞི་བྱས་པའི་རྒྱ་ནག་སྐམ་སའི་ལས་དོན་ལྷན་ཚོགས་ཀྱི་བློན་ཆེན་ Chen Ming-tong ་གིས་གསར་འགོད་པར་འགྲེལ་བརྗོད་གནང་གསལ་ལྟར་ན།   ཐེ་ཝན་གྱི་མི་སེར་ཡིན་པའི་སྐུ་ཞབས་ Kao Ming-tsun རྒྱ་ནག་གི་དགོས་འདུན་ལ་ངོས་ལེན་མ་བྱས་པར་ཕྱིར་ཐེ་ཝན་དུ་ལོག་ཡོད་པ་དང་། དེང་སྐབས་ཧོང་ཀོང་གི་ནང་དུ་རྟེན་གཞི་བྱས་པའི་ཐེ་ཝན་གྱི་སྐུ་ཚབ་གཞན་མང་པོ་ཞིག་གི་མཐོང་མཆན་ཕྱིར་འགྱངས་བྱེད་རྒྱུར་རྗེས་ལུས་ཐེབས་ཡོད་མ་ཟད།  རྒྱ་ནག་གིས་ཧོང་གི་བདེ་འཇགས་ཁྲིམས་འཆར་ལག་བསྟར་བྱས་པ་ནས་བཟུང་།  ཧོང་ཀོང་སྲིད་གཞུང་གིས་མཐོན་མཆན་སྤྲོད་ལུགས་ཀྱི་ཆ་རྐྱེན་གསར་བ་བཟོས་ཡོད་པ་ཕྱིར་བསྒྲགས་བྱས་པ་དང་ཆབས་ཅིག རྒྱ་ནག་གཞུང་གིས་བྱེད་བབ་དེ་དྭངས་ལེན་ཐུབ་ཐབས་མེད་པ་ཞིག་རེད་ཅེས་སྐྱོན་བརྗོད་གནང་འདུགརྒྱ་ནག་གིས་ཐེ་ཝན་གྱི་མཚོ་གླིང་དེ་མེས་རྒྱལ་དང་གོང་བུ་གཅིག་གྱུར་ཟེར་བའི་དགོས་འདུན་འོག་མཚོ་གླིང་དེའི་ཐོག་གནོན་ཤུགས་ཇེ་ཆེར་སྤྲོད་བཞིན་པའི་ཁྲོད་ཐེ་ཝན་གྱིས་བདུན་ཕྲག་སྔོན་མའི་ནང་ཉིན་ལྔ་ཡི་རིང་ལ་ཐེ་ཝན་གྱི་དམག་མི་ཚོས་རྒྱལ་སྲུང་སྦྱོང་བརྡར་གྱི་དམག་སྦྱོང་བྱས་ཡོད་པ་དང་། དེའི་དམིགས་ཡུལ་ནི་ཐེ་ཝན་གྱིས་ཁྱིམ་མཚེས་རྒྱལ་ཁབ་ཀྱིས་བཙན་འཛུལ་ལ་རྒོལ་ལན་སློག་རྒྱུར་དམིགས་པ་ཞིག་ཡིན་པ་རེད་འདུག

ཁ་སང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་གསར་འགོད་ལྷན་ཚོགས་ཤིག་གི་ཐོག་རྒྱ་ནག་གི་འཕྲུལ་ལས་ཚོང་གཉེར་ཁང་ Huawei ཡི་ལས་མི་ཚོས་གསང་ཞིབ་མྱུལ་ལྟའི་འཕྲུལ་ཆས་དུ་མ་བཟོས་ནས་རྒྱ་ནག་གཞུང་དང་ཆབ་སྲིད་ཀྱི་ལྟ་སྤྱོད་མི་མཐུན་མཁན་རྣམས་དང་ཤིན་ཅང་ནང་ཟུར་དུ་བཀག་སྐྱིལ་འོག་ཡོད་པའི་མང་ཚོགས་ཐོག་ལ་དམ་དྲག་གིས་ཞིབ་བཤེར་བྱེད་བཞིན་པ་སོགས་གནད་དོན་ཁག་ཅིག་ཆེས་མངོན་གསལ་གྱིས་ལས་མི་རྣམས་ཀྱི་མཐོང་མཆན་བཀག་སྡོམ་གནང་རྒྱུ་ཡིན་པ་ཡོངས་གྲགས་གནང་བར་ངན་ལན་དང་སྦྲགས་ཏེ། རྒྱ་ནག་གཞུང་གིས་ཨ་རི་ནི་འཛམ་གླིང་ཐོག་གི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་ཆེས་སྡུག་ཤོས་དེ་རེད་ཅེས་སྐྱོན་བརྗོད་བྱས་འདུགདེའང་ཁ་སང་རེས་གཟའ་ཕུར་བུ་ཉིན་རྒྱ་ནག་གི་རྒྱལ་ས་པེ་ཅིང་དུ་ཚོགས་པའི་གསར་འགོད་ལྷན་ཚོགས་ཐོག་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་ཨ་རིའི་ངོས་ནས་རྒྱ་ནག་ནི་དུས་རབས་འདིའི་ཐོག་ཆེས་གཡོ་སྒྱུ་ཅན་གྱི་མི་རིགས་ཤིག་ཡིན་སྐོར་བཤད་པ་དེ་ལས་ལྡོག་ནས་ཨ་རིའི་དཔོན་རིགས་དེ་དག་ནི་གཡོ་ཁྲམ་གྱི་བདག་ཉིད་ཅན་རེད་ཅེས་སྐྱོན་བརྗོད་བྱས་པ་མ་ཟད། ཨ་རིའི་དཔོན་རིགས་ཚོའི་གནང་བབ་དེར་ཡུལ་དེའི་མང་ཚོགས་ནས་བློ་ཕམ་གནང་འོས་པ་ཞིག་རེད་ཅེས་བརྗོད་འདུགཁོ་མོས་ད་དུང་ཨ་རི་ལྟ་བུ་ནི་འཛམ་གླིང་ནང་གི་ཆེས་སྟོབས་ཆེན་རྒྱལ་ཁབ་ཡིན་སྟབས་ཁ་སང་གི་གནང་བབ་དེས་འཛམ་གླིང་ཐོག་ཨ་རིར་ལྟ་སྣང་གང་འདྲ་ཞིག་ཡོང་སྲིད་དམ་ཞེས་དྲི་བ་བཏང་བ་དང་ཆབས་ཅིག ཨ་རིའི་གཞུང་གི་གནང་སྟངས་དེ་ནི་གཞི་རྩའི་རྒྱལ་སྤྱིའི་འབྲེལ་ལམ་གྱི་འབྲུ་དོན་དང་ཡོངས་སུ་འགལ་བ་མ་ཟད་སྟོབས་ཆེན་རྒྱལ་ཁབ་དེའི་ཆེ་མཐོང་ལའང་དོ་ཕོག་ཤུགས་ཆེ་འགྲོ་ངེས་ཡིན་པ་བཤད་འདུག རྒྱ་ནག་གི་མགྲིན་ཚབ་པ་ Chunying ཡིས་གཞན་ཡང་ཉེ་ལམ་དབྱིན་ཡུལ་གཞུང་གིས་ཀྱང་ཕྱི་ལོ་ ༢༠༢༧ ནང་ཚུད་ཡུལ་དེའི་ནང་གི་ 5G དྲྭ་རྒྱའི་ཚོང་ལས་ནས་རྒྱ་ནག་གི་འཕྲུལ་ལས་བཟོ་གྲྭ་ཆེ་ཤོས་ Huawei དེ་ཕྱིར་འབུད་གནང་ངེས་ཡིན་པའི་ཉེན་བརྡ་བཏང་ཡོད་པར་སྐྱོན་བརྗོད་བྱས་པ་དང་འབྲེལ། རྒྱ་ནག་གཞུང་གི་ངོས་ནས་དེ་འབྲེལ་དཔྱད་ཞིབ་དང་ཡུལ་དེའི་ནང་གི་ཚོང་ལས་ཁང་དེ་རིགས་རྒྱུན་སྐྱོང་ཐུབ་ཐབས་སུ་དགོས་ངེས་ཀྱི་མཐུན་འགྱུར་བསྐྲུན་རྒྱུ་ཡིན་པའི་ལན་འདེབས་བྱས་འདུགདེའི་བར་ན་རྒྱ་ནག་གི་ Huawei ཚོང་ལས་ཁང་གི་ངོས་ནས་ཨ་རིའི་གཞུང་གིས་དེ་གའི་ལས་མི་ཁག་ཅིག་གི་མཐོང་མཆན་བཀག་སྡོམ་གནང་རྒྱུའི་ཐག་གཅོད་དེར་བློ་ཕམ་དང་བཅས་ཚོང་ལས་ཁང་འདི་ནི་རྒྱ་ནག་གི་སྟངས་འཛིན་འོག་མེད་པར་སྒེར་གཉེར་དང་སྒེར་བདག་ཅན་གྱི་ཚོང་ལས་ཁང་རང་དབང་ཅན་ཞིག་ཡིན་ཚུལ་འགྲེལ་བརྗོད་བྱས་ཡོད་པ་རེད།གཞི་རྩའི་གཟའ་འཁོར་སྔོན་མའི་ནང་ཨ་རིའི་གཞུང་ངོས་ནས་དེ་སྔ་ ༢༠༡༦ ཨ་རིའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་འཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་དངོས་སུ་ཕྱག་བསྟར་བརྒྱུད་དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo གཙོས་ཡུ་གུར་གྱི་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་མཁན་རྒྱ་ནག་གི་དཔོན་རིགས་བཞི་དང་རྒྱ་ནག་གཞུང་འབྲེལ་གྱི་ལས་ཁུངས་གཅིག་བཅས་དངོས་སུ་མིང་མངོན་གསལ་གྱིས་དཔལ་འབྱོར་གྱི་ཉེས་ཆད་འགེལ་རྒྱུ་དང་ཨ་རིར་འགྲོ་ཆོག་པའི་མཐོང་མཆན་ལ་དམ་དྲག་གནང་རྒྱུ་ཡིན་སྐོར་གསུངས་པ་མ་ཟད་། ཧོང་ཀོང་གི་བདེ་འཇགས་ཁྲིམས་གཞིར་ཡ་ལན་དང་བཅས་ཨ་རིའི་ངོས་ནས་ཧོང་ཀོང་འདི་བཞིན་རྒྱ་ནག་གི་སྐམ་ས་སྤྱི་མཚུངས་ལྟར་ངོས་འཛིན་གྱིས་དེ་སྔ་ཁུལ་དེར་དམིགས་བསལ་གནས་བབས་ཤིག་གནང་བཞིན་པ་དེ་ཡོངས་སུ་ཕྱིར་འཐེན་གནང་རྒྱུ་ཡིན་སྐོར་གསུངས་ཡོད་པ་རེད།Reuters གསར་ཁང་གིས་དེ་རིང་མིང་མངོན་གསལ་མ་གནང་བའི་གནས་ཚུལ་ཡོང་ཁུངས་ཞིག་ལུང་འདྲེན་གྱིས་གནས་ཚུལ་སྤེལ་བར་གཞིགས་ཚེ་ཨ་རིའི་སྲིད་འཛིན་སྐུ་ཞབས་ཊམ་སྲིད་གཞུང་གི་ངོས་ནས་ད་དུང་རིམ་པས་རྒྱ་ནག་དམར་ཤོག་ཚོགས་པའི་ཚོགས་མི་ཡོངས་རྫོགས་དང་དེ་དག་གི་ནང་མི་དང་བཅས་པ་ཨ་རིར་བསྐྱོད་རྒྱུའི་མཐོང་མཆན་བཀག་སྡོམ་གནང་འཆར་ཡོད་པ་ཡོངས་གྲགས་གནང་འདུག གནད་དོན་དེའི་ཐོག་རྒྱུས་མངའ་ལེགས་པོ་ཡོད་མཁན་མིང་མངོན་གསལ་མ་གནང་བའི་དཔོན་རིགས་རིགས་དེས་འགྲེལ་བརྗོད་གནང་དོན་ལྟར་ན། ད་ལྟའི་ཆར་ཨ་རིའི་དཔོན་རིགས་ཚོས་རྒྱ་ནག་དམར་ཤོག་ཚོགས་པའི་ཚོགས་མི་ཡོངས་རྫོགས་དང་དེ་དག་གི་ནང་མི་རྣམས་ཨ་རིར་བསྐྱོད་རྒྱུའི་མཐོང་མཆན་བཀག་སྡོམ་དང་འབྲེལ་བའི་ཐོག་མའི་འཆར་ཟིན་ཞིག་ནང་ཁུལ་བརྒྱུད་སྤེལ་གནང་བཞིན་པ་དེ་ལྟར་ཡང་། ད་ཆར་སྲིད་འཛིན་སྐུ་ཞབས་ Donald Trump མཆོག་ལ་སྤྱན་འབུལ་ཞུ་མེད་པ་དང་། རྒྱ་རིགས་ས་ཡ་མང་པོའི་མཐོང་མཆན་བཀག་སྡོམ་གྱི་འཆར་གཞི་དེ་དངོས་སུ་ཕྱག་བསྟར་གནང་ཚེ་དེ་ནི་ཉིན་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་པའི་རྒྱ་ནག་དང་ཨ་རི་གཉིས་དབར་གྱི་འབྲེལ་ལམ་ཁྲོད་ཨ་རི་གཞུང་གི་ཐག་གཅོད་དེ་ཆེས་མཁྲེགས་ཤོས་ཤིག་ཆགས་ཀྱི་ཡོད་པ་རེད།

ད་ལྟའི་ཆར་ཏོག་དབྱིབས་རིམས་ནད་དང་འགྲོ་བ་མིའི་ཐོབ་ཐང་། དེ་བཞིན་ས་མཚམས། ཚོང་འབྲེལ་སོགས་ཀྱི་གནད་དོན་དུ་མའི་ཐད་ནས་རྒྱ་ནག་གཞུང་ལ་ཕྱིའི་གནོན་ཤུགས་ཆེན་པོ་སྤྲོད་བཞིན་པའི་དུས་སྐབས་འདིར་བཞུགས་སྒར་དུ་རྟེན་གཞི་བྱས་པའི་བོད་མིའི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་ལྔས་རྒྱལ་ས་ལྡི་ལིར་ཡོད་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པའི་ཡན་ལག་ལས་ཁུངས་ཁག་དང་། ཨ་རིས་གཙོས་པའི་ཕྱིའི་རྒྱལ་ཁབ་ཁག་གི་གཞུང་ཚབ་ལས་ཁུངས་སོ་སོར་ད་ལྟའི་བོད་ནང་གི་ཛ་དྲག་གནས་སྟངས་ལ་གཟིགས་རྟོག་དང་རྒྱབ་སྐྱོར་ཡོང་བའི་ཞུ་གཏུག་ལས་འགུལ་ཞིག་སྤེལ་རྒྱུ་རེད་འདུགདེ་རིང་སྔ་དྲོ་ཆུ་ཚོད་ ༡༠ ཐོག་བཞུགས་སྒར་མེག་ལོཊ་ཁྲོམ་གཞུང་དུ་བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བེུད་ལྷན་ཚོགས། བོད་ཀྱི་རྒྱལ་ཡོངས་མང་གཙོ་ཚོགས་པ། དེ་བཞིན་བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཀྱི་དབུས་རྒྱུན་ལས་བྱེད་རྣམ་པ་ལྷན་ཞུགས་ཐོག་བོད་དང་རྒྱ་གར་གཉིས་ཀྱི་རྒྱལ་གླུ་བླངས་པ་དང་ད་བར་བོད་བསྟན་སྲིད་མི་རིགས་ཀྱི་སླད་དུ་སྐུ་སྲོག་བློས་བཏང་གནང་མཁན་དང་། ད་ལྟ་རྒྱ་གཞུང་གི་བཙོན་འཇུག་འོག་དཀའ་སྡུག་མྱོང་བཞིན་པའི་དཔའ་བོ་དཔའ་མོ་རྣམ་པར་མྱ་ངན་གུས་འདུད་དང་གདུང་སེམས་མཉམ་བསྐྱེད་ཀྱི་ངག་བཅད་གནང་ཐོག་ཞུ་གཏུག་ལས་འགུལ་དབུ་འཛུགས་དང་འབྲེལ་བའི་བསྒྲགས་གཏམ་སྙན་སྒྲོན་ཞུས་སོང་།   བསྒྲགས་གཏམ་ནང་འདས་པའི་ལོ་ངོ་ ༦༠ ལྷག་གི་རིང་རྒྱ་ནག་དམར་པོའི་སྲིད་གཞུང་གི་བཙན་གནོན་འོག་བོད་མི་ས་ཡ་གཅིག་ལྷག་རྐྱེན་འདས་སུ་བཏང་བ་དང་བོད་མིའི་ཐུན་མོང་མ་ཡིན་པའི་རིག་གཞུང་གི་ལྟེ་གནས་ཁག་གཏོར་བཤིག་བཏང་བ། དེ་བཞིན་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་དབུས་པའི་ད་བར་གར་སོང་ཆ་མེད་དུ་ཕྱིན་པ་དང་། ད་ལྟ་མུ་མཐུད་དཀའ་སྡུག་མྱོང་བཞིན་པའི་བོད་མིའི་ཆབ་སྲིད་བཙོན་པའི་གནད་དོན། ཕྱི་ལོ་ ༢༠༠༩ ནས་ད་བར་བོད་མི་ ༡༥༥ ཙམ་གྱིས་བོད་དོན་སླད་རང་ལུས་མེར་བསྲེགས་བཏང་བ། རྒྱ་ནག་གཞུང་གིས་རྒྱལ་ཁབ་བདེ་འཇགས་ལ་བསྙད་དེ་བོད་མིའི་ཆོས་ཕྱོགས་ཀྱི་འདུ་འཛོམས་དང་སྨྲ་བརྗོད་རང་དབང་སོགས་ལ་དམ་དྲག་ཤུགས་ཆེ་བྱེད་བཞིན་པ་སོགས་ད་ལྟའི་བོད་ནང་གི་ཛ་དྲག་གནས་སྟངས་འཁོད་པའི་ཤོག་གྲངས་ ༢༠ ཅན་གྱི་སྙན་ཐོ་ཞིག་རྒྱལ་སྤྱིའི་གཞུང་ཚབ་ཁག་ལ་འབུལ་རྒྱུ་གཙོས་བོད་དོན་ཞུ་གཏུག་ལས་འགུལ་སྤེལ་རྒྱུ་རེད་འདུགཐེངས་འདིའི་ཞུ་གཏུག་ལས་འགུལ་འདི་རྐང་སྦྲག་ཐོག་དང་མྱུར་འཕྲིན་བརྒྱུད་སྤེལ་གནང་རྒྱུ་ཡིན་པ་དང་། གལ་ཏེ་ད་ལྟའི་གནས་སྟངས་ལ་གུ་ཡངས་ཏོག་ཙམ་ཕྱིན་ཚེ་ཚོགས་པ་ལྔའི་སྐུ་ཚབ་རྣམ་པ་ས་གནས་ས་ཐོག་ཏུ་ཆེད་བཅར་གྱིས་ཞུ་གཏུག་གནང་འཆར་འདུགརྒྱ་ནག་གཞུང་གིས་ཐོག་མ་ཉིད་ནས་ཏོག་དབྱིབས་རིམས་ནད་ཀྱི་གནད་དོན་ཐད་སྦས་གསང་དང་རྒྱལ་སྤྱིའི་སྒྲིག་འཛུགས་ལྡན་པའི་ཞིབ་འཇུག་ཚོགས་ཆུང་བཀག་འགོག་བྱས་པའི་དབང་གིས་ད་ཆ་རྒྱལ་སྤྱིའི་ཁྱོན་ཡོངས་ལ་དཀའ་ངལ་འཕར་མ་ཞིག་འཕྲད་བཞིན་པའི་ནག་ཉེས་ཆ་ཚང་རྒྱ་ནག་གཞུང་ལ་ཡོད་པ་དང་། ཨ་རིས་གཙོས་པའི་རྒྱལ་སྤྱིའི་སྲིད་གཞུང་དང་གྲོས་ཚོགས་འཐུས་མི། གཞུང་འབྲེལ་མ་ཡིན་པའི་ཚོགས་པ་སོགས་ནས་རྒྱ་ནག་ལ་སྐྱོན་བརྗོད་གནང་བཞིན་པར་བོད་མིའི་གཞུང་འབྲེལ་མ་ཡིན་པའི་ཚོགས་པ་ལྔའི་ངོས་ནས་རྒྱབ་སྐྱོར་ཡོད་པ་སོགས་འཁོད་འདུགགཞི་རྩའི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་ལྔས་ད་ལྟའི་ཚོར་བ་རྣོ་བའི་རྒྱལ་སྤྱིའི་གནས་བབས་ཁྲོད་དུ་ད་རེས་ཙམ་མིན་པར་འདས་པའི་ཟླ་ཤས་ནང་རིམས་ནད་ཁྱབ་གདལ་གྱི་འགན་ཡོངས་རྫོགས་རྒྱ་གཞུང་གིས་ཁུར་དགོས་པ་དང་། རྒྱ་ནག་གི་ཅ་དངོས་ཉོ་ཚོང་དང་བེད་སྤྱོད་གནང་མཚམས་འཇོག་དགོས་པ། དེ་བཞིན་བོད་འདི་ལོ་རྒྱུས་ཐོག་ནས་རང་བཙན་གཙང་མའི་རྒྱལ་ཁབ་ཅིག་ལ་ངོས་ལེན་གནང་དགོས་པ་སོགས་ཀྱི་ལས་འགུལ་མང་དག་ཅིག་གོ་སྒྲིག་གནང་ཡོད་པ་རེད།

ཉེ་ཆར་ཨ་རིའི་ངོས་ནས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ཡོད་པ་མ་ཟད། ཁ་སང་སླར་ཡང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་གསར་འགོད་ལྷན་ཚོགས་ཤིག་གི་ཐོག་རྒྱ་ནག་གི་འཕྲུལ་ལས་ཚོང་གཉེར་ཁང་ Huawei ཡི་ལས་མི་རྣམས་ཀྱི་མཐོང་མཆན་བཀག་སྡོམ་གནང་རྒྱུ་ཡིན་པ་གསུངས་འདུགསྐུ་ཞབས་ Pompeo མཆོག་གིས་གསར་འགོད་ལྷན་ཚོགས་དེའི་ཐོག་ཨ་རི་གཞུང་གིས་ལོ་མང་རིང་ནས་འཛམ་གླིང་ནང་ཆེས་བཙན་གནོན་གྱི་དྲག་སྤྱོད་དང་སྨྲ་བརྗོད་རང་དབང་ལོངས་སུ་སྤྱོད་མ་ཐུབ་མཁན་ཚོའི་སྐུ་ཚབ་ལྟ་བུའི་ཕྱག་ལས་གནང་གི་ཡོད་པ་མ་ཟད། ལྷག་དོན་རྒྱ་ནག་དམར་ཤོག་ཚོགས་པས་ཡུལ་དེའི་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་བའི་གནད་དོན་ཐད་འཛེམ་ཟོན་མེད་པར་སྐྱོན་བརྗོད་གནང་གི་ཡོད་སྐོར་འགྲེལ་བརྗོད་དང་འབྲེལ། ད་རེས་ཨ་རི་གཞུང་གི་ངོས་ནས་ཕྱི་མི་གཞིས་སྤོས་དང་མི་སེར་སྲུང་སྐྱོབ་དང་འབྲེལ་བའི་ཁྲིམས་ཡིག་དགོངས་སོན་ལྟར་གོ་ལ་སྤྱིའི་འགྲོ་བ་མིའི་ཐོབ་ཐང་ལ་གནོད་གཞི་གྱུར་པའི་ལས་དོན་གཉེར་མཁན་རྒྱ་ནག་གི་ Huawei ཚོང་ལས་ཁང་གི་ལས་མི་ཁག་ཅིག་གི་མཐོང་མཆན་བཀག་སྡོམ་གནང་རྒྱུ་ཡིན་པ་ཡོངས་གྲགས་གནང་འདུགཁོང་གིས་ད་དུང་རྒྱ་ནག་གི་འཕྲུལ་ལས་ཚོང་གཉེར་ཁང་ Huawei ཡི་ལས་མི་ཚོས་གསང་ཞིབ་མྱུལ་ལྟའི་འཕྲུལ་ཆས་དུ་མ་བཟོས་ནས་རྒྱ་ནག་གཞུང་དང་ཆབ་སྲིད་ཀྱི་ལྟ་སྤྱོད་མི་མཐུན་མཁན་རྣམས་དང་ཤིན་ཅང་ནང་ཟུར་དུ་བཀག་སྐྱིལ་འོག་ཡོད་པའི་མང་ཚོགས་ཐོག་ལ་དམ་དྲག་གིས་ཞིབ་བཤེར་བྱེད་བཞིན་པ་མངོན་གསལ་དང་སྦྲགས། Huawei ཚོང་ལས་ཁང་ནི་མང་ཚོགས་ལ་དམ་དྲག་བྱེད་མཁན་རྒྱ་ནག་གི་ལག་པ་ལྟ་བུ་ཡིན་སྐོར་འགྲེལ་བརྗོད་གནང་བ་མ་ཟད། རྒྱལ་སྤྱིའི་ཁྱོན་དུ་ཡོད་པའི་འཕྲིན་གཏོང་གི་ཚོང་ལས་ཁང་གཞན་ཚོས་ཀྱང་ཧཱ་ཝཡི་ཚོང་ལས་ཁང་དང་ལག་འབྲེལ་གནང་རྒྱུ་མེད་པ་དང་། གལ་ཏེ་ཚོང་ལས་ཁང་གཞན་ཚོའི་ངོས་ནས་དེ་དང་འབྲེལ་བ་གནང་ཚེ་དེ་དག་གིས་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་བཏང་བར་ངོས་འཛིན་གྱིས་འཇུག་འབྲས་དེ་ལྟར་ཡོང་ངེས་ཡིན་པའི་ཉེན་བརྡའ་བཏང་འདུགདེ་བཞིན་སྐུ་ཞབས་ Pompeo མཆོག་ལ་ཟུར་དུ་ཨ་རིའི་ངོས་ནས་ Tiktok ལྟ་བུ་རྒྱ་ནག་གི་མཉེན་ཆས་ཁག་ཅིག་བཀག་སྡོམ་གནང་རྒྱུའི་འཆར་གཞི་ཡོད་མེད་དང་འབྲེལ་བའི་བཅར་འདྲི་ཞུས་འདུག་པ་དེར་མཉེན་ཆས་དང་ཚོང་ལས་ཁང་། འཛུགས་སྐྲུན་སོགས་གང་འདྲ་ཞིག་ཡིན་རུང་ཨ་རི་གཞུང་གི་ངོས་ནས་ཡུལ་དེའི་མང་ཚོགས་ཀྱི་སྒེར་གྱི་གསང་བའི་གནད་དོན་རྣམས་སྲུང་སྐྱོབ་ཆེད་རྒྱ་ནག་གི་ལག་ཏུ་མ་ཤོར་བར་ཐུགས་སྣང་ཆེན་པོ་གནང་བཞིན་པ་དང་། ཨ་རི་གཞུང་གི་ངོས་ནས་མུ་མཐུད་སྒེར་གྱི་གསང་བའི་གནད་དོན་དང་ཐད་ཀར་འབྲེལ་བ་ཆགས་པའི་རྒྱ་ནག་གི་འཕྲིན་གཏོང་འཕྲུལ་ལས་ཁང་གཞན་ཚོའི་ཐོག་ལའང་ཐག་གཅོད་རིམ་པ་གནང་རྒྱུ་ཡིན་པ་གསུངས་འདུག