རྒྱལ་སྤྱི།

ཉེ་ལམ་རྒྱ་ནག་གཞུང་གིས་བཙན་བྱོལ་བོད་མིའི་འོས་བསྡུའི་ལས་རིམ་ལ་ཁྱད་གསོད་དང་སྦྲགས་འོས་བསྡུའི་བརྒྱུད་རིམ་ཁྲོད་གྲུབ་འབྲས་གང་འདྲ་ཞིན་ཐོན་ཡང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་གང་ཡང་གཏང་ཐུབ་ཀྱི་མ་རེད་ཅེས་བཤད་ཡོད་ཀྱང་། བོད་མིའི་སྒྲིག་འཛུགས་ཀྱི་སྲིད་སྐྱོང་ངོས་ནས་རྒྱ་ནག་གཞུང་གིས་གང་བཤད་པ་དེ་ལས། ༸གོང་ས་མཆོག་གིས་བོད་མིར་གསོལ་སྩལ་གནང་བའི་མང་གཙོར་ནུས་པ་ཇི་ཙམ་ཡོད་པ་གསལ་སྟོན་བྱེད་ཐུབ་ཀྱི་ཡོད་སྐོར་འགྲེལ་བརྗོད་གནང་སོང་།དེའང་ཟླ་བ་འདིའི་ཚེས་ ༡ ནས་གསུམ་བར་རྒྱལ་སྤྱིའི་ཡུལ་གྲུ་གང་སར་གནས་པའི་བཙན་བྱོལ་བོད་མི་རྣམས་ཀྱིས་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོར་ཆ་ཤས་བླངས་བའི་ཁྲོད། རྒྱ་ནག་གཞུང་འབྲེལ་གྱི་གསར་ཁང་ Global Times གི་དྲ་གནས་ཐོག་གནས་ཚུལ་ཞིག་སྤེལ་བའི་ནང་སྲིད་སྐྱོང་ཞེས་པ་དེ་ཕྱིའི་རྒྱལ་ཁབ་ཁག་ནས་དཔལ་འབྱོར་འཚོལ་སྒྲུབ་བྱེད་མཁན་གྱི་ཚོགས་པ་ཞིག་གི་འགོ་ཁྲིད་ཡིན་པ་དང་། སྲིད་སྐྱོང་ཞེས་པ་དེ་ཐོག་མར་ ༢༠༡༡ ལོར་འདེམས་སྒྲུག་བྱས་ཡོད་ཀྱང་། དོན་ངོ་མར་དབང་ཚད་ཆ་ཚང་ད་ལྟ་ཡང་༸གོང་ས་མཆོག་དང་ཁོང་གི་ཉེ་འཁོར་གྱི་མི་སྣ་ཁག་ཅིག་ལ་ཡོད་སྐོར་བཤད་པ་མ་ཟད། བདམས་ཐོན་བྱུང་བའི་སྲིད་སྐྱོང་ཞེས་པ་དེས་ ༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དང་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་སོགས་ཀྱི་གནད་དོན་མང་པོ་ཞིག་ལ་གདོང་ལེན་བྱེད་དགོས་སྐོར་བརྗོད་ཡོད་པ་རེད། དེ་རིང་གསར་འགོད་པས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ལ་གནད་དོན་དེའི་སྐོར་བཀའ་དྲི་ཞུ་སྐབས། སྲིད་སྐྱོང་མཆོག་གིས་བོད་དང་འབྲེལ་བའི་གྲུབ་འབྲས་ལེགས་པོ་ཞིག་སྨིན་པ་ཡིན་ན་རྒྱ་ནག་གིས་དུས་རྒྱུན་ནས་གནད་དོན་དེའི་ལྡོག་ཕྱོགས་ནས་བྱ་བ་རྩོམ་གྱི་ཡོད་པ་ལུང་འདྲེན་དང་འབྲེལ།  བཙན་བྱོལ་བོད་མིའི་འོས་བསྡུ་ཆེན་མོ་དེ་བརྒྱུད་རྒྱ་ནག་གཞུང་ལ་ཕོག་ཐུག་ཆེན་པོ་བཏང་ཡོད་པ་དེ་ནས། ༸གོང་ས་མཆོག་གིས་བོད་མིར་བསྩལ་བའི་མང་གཙོར་ནུས་པ་ཇི་ཙམ་ཡོད་པ་གསལ་པོ་བསྟན་ཡོད་སྐོར་གསུངས་བ་མ་ཟད་། ཨ་རིའི་གཞུང་གིས་ཉེ་ལམ་ཁྲིམས་སུ་བཅས་པའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ནང་སྐུའི་ཡང་སྲིད་ཀྱི་གནད་དོན་ཐོག་འགྲེལ་བརྗོད་ནན་པོ་སྐྱོན་ཡོད་པ་དེར་རྒྱལ་སྤྱིའི་ཁྱོན་ནས་ཐུགས་སྣང་ཆེན་པོ་གནང་བ་དང་བཅས། སྐུའི་ཡང་སྲིད་ཀྱི་གནད་དོན་དང་འབྲེལ་བའི་ཁ་ཕྱོགས་དེ་བོད་མིའི་མངོན་འདོད་ཀྱི་ཕྱོགས་སུ་གྱུར་ཡོད་སྟབས། རྒྱ་ནག་ངོས་ནས་འདི་ལྟ་བུའི་གཏམ་བཤད་མི་བྱེད་ཀ་མེད་ཡིན་པའི་འགྲེལ་བརྗོད་གནང་སོང་། རྩ་བའི་དེ་རིང་སྔ་དྲོ་ཕྱག་ཚོད་ ༡༠ བའི་ཐོག  གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ཟུང་དྲུང་ཡན་གྱི་ལས་བྱེད་ཚང་འཛོགས་ཀྱི་ཐོག   སྲིད་སྐྱོང་མཆོག་གིས་ཉེ་ལམ་ཕྱི་ ༡༢ བའི་ཚེས་༢༧ ཉིན་ཨ་རིའི་སྲིད་འཛིན་གྱིས་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལ་མཚན་རྟགས་བཀོད་ནས་ཁྲིམས་སུ་བཅས་བར་དགའ་བསུ་ཞུས་པ་དང་ལྷན་དུ།  ཁྲིམས་འཆར་དེ་གཏན་འབེབས་གནང་བར་ཕྱག་རོགས་གནང་མཁན་ཀུན་ལ་ཐུགས་རྗེ་ཆེ་ཞུས་ཡོད་པ་རེད།སྐབས་དེར་སྲིད་སྐྱོང་མཆོག་གིས། རྒྱ་ནག་གི་བསམ་པར་ཕྱི་ལོག་ནས་བོད་དོན་དང་འབྲེལ་བའི་སྲིད་དོན་གྱི་འགྱུར་བ་འགྲོ་སྐབས་བོད་ནང་དུ་མི་མང་སྒེར་ལངས་སོགས་ཡོང་སྲིད་པར་སྙམ་ནས་རྒྱ་ནག་གིས་ཟླ་བ་ ༣ པ་མ་རྫོགས་བར་དུ་བོད་ནང་དུ་དམ་དྲག་ཤུགས་ཆེ་རུ་བཏང་ཡོད་པ་མ་ཟད། ལས་འགུལ་ཡང་འདྲ་མིན་ཞིག་སྤེལ་རྒྱུར་གྲ་སྒྲིག་བྱེད་བཞིན་ཡོད་སྐོར་ཡང་གསུངས་སོང་། རྩ་བའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་ནི་ཕྱི་ལོ་ ༢༠༠༢ ལོར་ཨ་རི་གཞུང་གིས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་བསྐྱར་བཅོས་གནང་བའི་ཁྲིམས་འཆར་ཞིག་ཆགས་ཀྱི་ཡོད་པ་དང་། ཁྲིམས་འཆར་དེའི་འོག་ཨ་རི་གཞུང་གི་བོད་དོན་དམིགས་བསལ་སྐུ་ཚབ་བསྐོ་བཞག་གནང་རྒྱུ་དང་བོད་རྒྱ་ཞི་མོལ་ལ་རྒྱབ་སྐྱོར་གནང་རྒྱུ། དེ་བཞིན་བོད་ནང་ཨ་རིའི་གཞུང་ཚབ་ལས་ཁུངས་གསར་འཛུགས་སོགས་ཀྱི་དེ་སྔའི་འབྲུ་དོན་ཐོག གལ་ཆེའི་གནད་དོན་ཁག་ཅིག་ཁ་སྣོན་གནང་བའི་ཁོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་དང་། གལ་ཏེ་རྒྱ་ནག་གཞུང་གི་ལས་བྱེད་མི་སྣས་བོད་མིའི་བླ་སྤྲུལ་ངོས་འཛིན་ཐད་ཐེ་བྱུས་བྱས་ཚེ་ཨ་རིའི་གཞུང་གིས་ཆབ་སྲིད་ཀྱི་ཉེས་ཆད་གཅོད་རྒྱུ་དང་། བོད་མཐོ་སྒང་གི་ཁོར་ཡུག་དང་ཆུའི་འབྱུང་ཁུངས་ལ་སྲུང་སྐྱོབ་གནང་རྒྱུ་སོགས་ཀྱི་གལ་ཆེའི་གནད་དོན་ཁག་གཅིག་འཁོད་ཡོད་པ་རེད།

སེམས་བསྐྱེད་ཀྱི་སྡོམ་པ་འབོག་མཛད་དེ་ཉིན་གསུམ་གྱི་བཀའ་ཆོས་མཇུག་སྒྲིལ།

ཁ་སང་རེས་གཟའ་ལྷག་པའི་ཉིན་ཧོང་ཀོང་ཉེན་རྟོག་པས་རྒྱལ་ཁབ་བདེ་འཇགས་ཀྱི་ཁྲིམས་གཞི་གསར་པ་ཞེས་པའི་འོག་ཧོང་ཀོང་གི་མང་གཙོའི་དོན་གཉེར་བ་ ༥༠ ལྷག་ཟླ་ ༧ པའི་གྲོས་ཚོགས་ཀྱི་སྔོན་འགྲོའི་འོས་བསྡུའི་ལས་རིམ་དང་འབྲེལ་འཛིན་བཟུང་བྱས་ཡོད་པ་དང་བསྟུན་དབྱིན་ཡུལ་གཙོས་རྒྱལ་སྤྱིའི་གཞུང་ཚོགས་ཁག་གིས་རྒྱ་གཞུང་ལ་སྐྱོན་བརྗོད་ཤུགས་ཆེ་གནང་འདུགདབྱིན་ཡུལ་ནས་རྒྱ་གཞུང་གིས་བྱེད་ཕྱོགས་དེར་ཁ་རྡུང་དང་འབྲེལ་ནས་དབྱིན་ཡུལ་གྱི་ཕྱི་སྲིད་དྲུང་ཆེ་ Dominic Raab ལགས་ཀྱིས་ཧོང་ཀོང་སྲིད་གཞུང་གིས་ཧོང་ཀོང་གི་སྲིད་དོན་པ་དང་ལས་འགུལ་བ་འཛིན་བཟུང་བྱས་པ་དེ་ནི་ཧོང་ཀོང་མང་ཚོགས་ཀྱི་ཐོབ་ཐང་དང་རང་དབང་སྲུང་སྐྱོབ་ལ་འཐབ་རྒོལ་འཚབས་ཆེན་ཞིག་བྱས་པ་དང་། ད་རེས་ཀྱི་བྱེད་ཕྱོགས་དེས་ཧོང་ཀོང་དང་རྒྱ་ནག་གཉིས་ཀྱིས་ཆེད་མངགས་རྒྱལ་ཁབ་བདེ་འཇགས་ཀྱི་ཁྲིམས་གཞི་ཞེས་པའི་དངོས་ཀྱི་དམིགས་ཡུལ་གང་ཡིན་མིན་སྐོར་རྒྱལ་སྤྱིའི་ཁྲོད་ལོག་འགྲེལ་བྱས་ཡོད་སྐོར་གསུངས་འདུག དེ་བཞིན་ཁེ་ན་ཌའི་ཕྱི་སྲིད་བློན་ཆེན་སྐུ་ཞབས་ François-Philippe Champagne མཆོག་གིས་ཧོང་ཀོང་མང་གཙོའི་ལས་འགུལ་བ་འཛིན་བཟུང་བྱས་པ་དེ་ཆབ་སྲིད་ཀྱི་ལྟ་གྲུབ་སྣ་མང་ལ་དྲག་གནོན་འཚབས་ཆེན་བྱས་པར་མ་ཟད། དེས་ཧོང་ཀོང་གི་གཞི་རྩའི་ཁྲིམས་དང་རྒྱལ་ཁབ་གཅིག་དང་ལམ་ལུགས་གཉིས་ལ་བརྩི་མེད་རྡོག་རོལ་བཏང་བའི་རྣམ་པ་མངོན་གྱི་ཡོད་སྟབས། མང་གཙོའི་ལས་འགུལ་བ་དེ་དག་འཕྲལ་མར་གློད་བཀྲོལ་དགོས་པ་གསུངས་འདུགལྷག་པར་དུ་ཁོང་གིས་ཧོང་ཀོང་ནང་གནས་བཞུགས་ཁེ་ན་ཌའི་མི་སེར་ཁྲི་གསུམ་ལ་ཁེ་ན་ཌ་གཞུང་གིས་དུས་རྟག་ཏུ་རྒྱབ་སྐྱོར་གནང་གི་ཡོད་སྐོར་གསུངས་པ་དང་ཆབས་ཅིག  ད་ལན་ཧོང་ཀོང་གི་གནད་དོན་ཐད་ཁེ་ན་ཌ་ནས་རྒྱལ་ཁབ་གཞན་དང་ལྷན་དུ་གྲོས་མཐུན་གྱིས་ཡ་ལན་ཞིག་གནང་རྒྱུ་ཡིན་པ་གསུངས་ཡོད། མ་ཟད།  ཐེ་ཝན་གྱི་རྒྱ་ནག་སྐམ་སའི་ལས་དོན་ཚོགས་པས་ད་ལན་ཧོང་ཀོང་སྲིད་གཞུང་གིས་གསར་འགྱུར་ལས་ཁང་སོགས་བསྔོག་བཤེར་དང་མང་གཙོའི་དོན་གཉེར་བ་མང་དག་ཞིག་འཛིན་བཟུང་བྱས་པའི་བྱ་སྤྱོད་ལ་ཧོན་འཐོར་བ་མ་ཟད།  སྲིད་གཞུང་གི་འགྲོ་བ་མིའི་ཐོབ་ཐང་དང་མང་གཙོར་བཙན་ཤེད་བྱས་པའི་བྱེད་ཕྱོགས་དེར་མཐའ་གཅིག་ཏུ་དགག་པ་ཡོད་པ་གསུངས་འདུག ཧོང་ཀོང་གི་བདེ་འཇགས་ཁྲིམས་གཞི་དེས་མང་གཙོའི་ལས་འགུལ་བར་གཙོ་བོར་དམིགས་འབེན་དུ་བཟུང་སྟེ་ཁོང་ཚོར་རྒྱལ་ཁབ་མགོ་རྟིང་ལོག་རྒྱུའི་ནག་ཉེས་གཡོག་པ་དང་ཕྱོགས་མཚུངས། ཐེངས་འདིའི་བྱེད་ཕྱོགས་དེས་ཧོང་ཀོང་གི་ཁྲིམས་ཀྱིས་མང་ཚོགས་ཀྱི་ཐོབ་ཐང་སྲུང་སྐྱོབ་བྱེད་ཀྱི་ཡོད་པར་བཤད་པ་དེ་ཚིག་ཙམ་ཡིན་པ་ར་འཕྲོད་བྱུང་ཡོད་པ་གསུངས་འདུག གཞན་ཡང་ཧོང་ཀོང་མང་གཙོའི་ལས་འགུལ་བ་ Sunny Cheung ལགས་ཀྱིས་ཧོང་ཀོང་སྲིད་གཞུང་གི་བྱེད་ཕྱོགས་དེས་ཧོང་ཀོང་གྲོས་ཚོགས་དེ་བཞིན་རྒྱ་གཞུང་གི་འགྱིག་གི་ཐམ་ཀ་ལྟ་བུར་གྱུར་ཡོད་པ་ར་སྤྲོད་ཐུབ་ཡོད་སྐོར་གསུངས་པ་དང་སྦྲགས། རྒྱ་ནག་དམར་ཤོག་ཚོགས་པས་ཧོང་ཀོང་ནང་མང་གཙོའི་ཤུལ་བཞག་ཆ་ཚང་རྩ་མེད་བཟོ་རྒྱུ་རེ་བ་བཅངས་ཡོད་སྟབས་ཧོང་ཀོང་ནང་མཐར་རྒྱ་ནག་དམར་ཤོག་ཚོགས་པར་རྒྱབ་སྐྱོར་བྱེད་མཁན་ལས་མང་གཙོའི་ལས་འགུལ་བ་གཅིག་ཀྱང་མཐོང་རྒྱུ་མེད་པར་གྱུར་ངེས་ཡིན་པ་གསུངས་ཡོད། དེ་བཞིན་གནད་དོན་དེའི་ཐོག་ཨོ་སི་ཊོ་ལི་ཡའི་ཕྱི་སྲིད་བློན་ཆེན་དང་ཨ་རིའི་གྲོས་ཚོགས་འཐུས་མི་གཙོས་པའི་རྒྱལ་སྤྱིའི་མང་གཙོ་དོན་གཉེར་བ་དང་ཚོགས་པ་སོགས་ཀྱིས་ཧོང་ཀོང་གི་གནད་དོན་ལ་ཐུགས་འཚབ་ཀྱིས་རྒྱ་གཞུང་ལ་སྐྱོན་བརྗོད་ཤུགས་ཆེ་གནང་བཞིན་འདུགགཞི་རྩའི་རྒྱལ་ཁབ་བདེ་འཇགས་ཀྱི་ཁྲིམས་གཞིའི་འོག་རྒྱལ་ཁབ་མགོ་རྟིང་སློག་རྒྱུ་དང་ཁ་བྲལ་དང་འཇིགས་སྐུལ་རིང་ལུགས།  ཕྱི་རྒྱལ་དང་འབྲེལ་བ་སོགས་ཀྱི་བྱ་སྤྱོད་རྣམས་ནག་ཉེས་ཅན་དུ་བརྩི་ཡི་ཡོད་པ་རེད།  ཁྲིམས་གཞི་དེ་འདས་ལོའི་ཟླ་ ༦ ནང་གཏན་འབེབས་བྱས་པ་ནས་བཟུང་སྟེ་ད་བར་མང་གཙོའི་ལས་འགུལ་བ་མང་དག་ཅིག་འཛིན་བཟུང་བྱས་ཡོད་པར་མ་ཟད་ད་ལན་འོས་བསྡུ་དང་འབྲེལ་མང་གཙོའི་ལས་འགུལ་བ་ ༥༠ ལྷག་འཛིན་བཟུང་བྱས་པ་དེ་ནི་ལས་འགུལ་བའི་ཐོག་དམ་དྲག་དང་དྲག་གནོན་འཚབས་ཆེན་བྱས་པ་ཞིག་ཆགས་ཀྱི་ཡོད་པ་རེད།

དེ་རིང་ཕྱི་ལོ་ ༢༠༢༡ ཟླ་ ༡ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་ཀོ་རི་ཡའི་ནང་པ་གཙོས་འཛམ་གླིང་ཡུལ་ཕྱོགས་གང་སར་བཞུགས་པའི་དད་ལྡན་རྣམས་ལ་ཤེས་རབ་སྙིང་པོའི་བཀའ་ཆོས་མུ་མཐུད་ནས་སྩལ་བ་དང་འབྲེལ་ཆོས་ཞུ་བའི་བཀའ་འདྲི་ཁག་ལ་བཀའ་ལན་མཛད་སོང་། དེ་རིང་གི་བཀའ་ཆོས་ཐོག་ཏུ་སེམས་བཟང་པོ་བྱེད་ཡ་དེ་ནི་འགྲོ་བ་མི་ཙམ་མ་ཡིན་པར་སེམས་ཅན་དུད་འགྲོ་ཚུན་ཆད་ལ་ཡང་ཡོད་པ་ཞིག་ཡིན་སྐོར་བཀའ་སྩལ་བ་དང་འབྲེལ། མིའི་རིགས་ཀྱིས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་ཕན་བདེ་སྒྲུབ་བསམ་པའི་ཀུན་སློང་བཟང་པོའི་སྒོ་ནས་བྱ་བཞག་ལ་བཅུག་པ་ཡིན་ན། བསོད་ནམས་ཀྱི་ཚོགས་རྒྱ་ཆེན་པོ་བསགས་ཏེ་རང་རྒྱུད་དུ་གཞན་དོན་དོན་གཉེར་གྱི་བསམ་བློ་རྒྱ་བསྐྱེད་བཏང་སྟེ་འཕྲལ་ཕུགས་གཉིས་ཀར་ཕན་པའི་སེམས་སྐྱིད་པ་དང་བག་ཕེབས་པ་སོགས་ཀྱི་སྤྱོད་པར་འཇུག་ཐུབ་པར་བཀའ་སྩལ་ཡོད།དེ་བཞིན་མགོན་པོ་༸གང་ཉིད་མཆོག་གིས་བྱང་ཆུབ་ཀྱི་སེམས་སྒོམ་པའི་ཐོག་ནས་སྣང་སྲིད་ཐམས་ཅད་གཉེན་ལ་ཤར་ཐུབ་པའི་བློ་ཞིག་བྱུང་བ་ཡིན་ན་རང་བཞིན་གྱིས་རང་རྒྱུད་ཀྱི་ཆགས་སྡང་གི་བློ་ཇེ་ཉུང་དུ་འགྲོ་ཐུབ་ངེས་ཡིན་སྐོར་བཀའ་སྩལ་བ་དང་ཆབས་ཅིག དེ་ལྟ་བུའི་བསམ་སྤྱོད་ལས་རང་གི་གཉེན་ཙམ་མིན་པར་ཐ་ན་རང་གི་དགྲ་བོ་ལ་ཡང་ཕན་བདེ་སྒྲུབ་འདོད་ཀྱི་སྙིང་རྗེ་ཞིག་སྐྱེ་ཐུབ་ཚེ་དེ་ནི་འདོད་ཆགས་དང་བྲལ་བ་ཞིག་ཡིན་སྟབས། ནང་པའི་གཞུང་ཁག་ཏུ་དགྲ་བོ་ནི་བཟོད་པའི་རྟེན་གཙོ་བོ་ཞིག་ཡིན་པར་བཞེད་པ་ལྟར། བདག་གཞན་མཉམ་བརྗེའི་ཐོག་ནས་དགྲ་བོ་དགེ་བའི་བཤེས་གཉེན་ལྟ་བུར་བཀུར་དགོས་ཞེས་ལམ་སྟོན་བཀྲིན་ཆེ་བར་མཛད་ཡོད།༸གོང་ས་མཆོག་གི་བཀའ་སློབ་ཀྱི་ལས་རིམ་གྲུབ་མཚམས་སུ་ཀོ་རི་ཡའི་ཆོས་ཞུ་བ་ཚོས་མགོན་པོ་༸གང་ཉིད་མཆོག་ལ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་གནང་དོན་བཞིན་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་སྐབས་དགེ་བའི་བཤེས་གཉེན་བསྟེན་ཚུལ་དང་འབྲེལ་ནས་༸རྗེ་རིན་པོ་ཆེའི་ལམ་རིམ་ལུང་འདྲེན་མཛད་དེ་དགེ་བའི་བཤེས་གཉེན་ཞིག་ཡིན་ན་རང་མ་དུལ་བས་གཞན་འདུལ་བའི་གནས་མེད་ཅེས་གསུངས་ཡོད་པ་དང་འབྲེལ། དང་པོ་རང་རྒྱུད་བཏུལ་བའི་ཐོག་ནས་སློབ་མ་རྣམས་ལ་བདེན་བཞིའི་རྣམ་བཞག་གི་ཐོག་ནས་ཚེ་འདི་ཕྱི་གཉིས་ཀྱི་རྣམ་བཞག་ར་སྤྲོད་ཀྱིས་ལམ་དགེ་བའི་ཕྱོགས་སུ་བསྒྱུར་ཐུབ་མཁན་ཞིག་ཡོད་ན་བླ་མའི་མཚན་ཉིད་ཚང་ཡོད་སྐོར་བཀའ་ལན་མཛད་སོང་། དེ་བཞིན་མགོན་པོ་༸གང་ཉིད་མཆོག་གིས་བཟོ་རིག་པ་དང་འབྲེལ་བའི་བཀའ་འདྲི་ཞིག་ལ་ལྗགས་ལན་མཛད་པར་བཟོ་རིག་པ་ནི་མེད་དུ་མི་རུང་བ་ཞིག་ཡིན་ཀྱང་། བཟོ་རིག་པའི་ཆེད་མཁས་པ་གང་ཞིག་གི་སེམས་རྒྱུད་དེ་ཆགས་སྡང་གི་དབང་དུ་ཕྱིན་ནས་གཞན་ཕན་དང་བྲལ་བ་ཞིག་ཏུ་གྱུར་ཚེ་འགྲོ་བ་མིའི་རིགས་སྤྱིར་སྡུག་བསྔལ་སྦྱིན་པའི་རྒྱུར་འགྲོ་རྒྱུ་ཉག་གཅིག་ཡིན་པ་བཀའ་སྩལ་ཏེ་བཟོ་རིག་པ་དེ་གལ་ཆེན་པོ་ཡིན་ཀྱང་། བཟོ་ལས་བ་རྣམས་ཀྱིས་གཞན་ལ་བརྩེ་བའི་བསམ་པའི་ཐོག་ནས་བཟོ་ལས་ཡར་རྒྱས་གཏོང་ཐུབ་པ་ཞིག་བྱུང་ན་འགྲོ་བ་སྤྱི་ལ་ཕན་རླབས་སྐྲུན་ཐུབ་པ་ཞིག་ཡོང་རྒྱུ་ཡིན་སྐོར་བཀའ་སྩལ་ཡོད། དེ་རིང་གི་བཀའ་ཆོས་མཇུག་ཏུ་མགོན་པོ་༸གང་ཉིད་མཆོག་གིས་སང་ཉིན་སེམས་བསྐྱེད་ཆོ་ག་བཀའ་དྲིན་སྩལ་བ་བརྒྱུད་ནས་ཐེངས་འདིའི་ཀོ་རི་ཡའི་དད་ལྡན་ཆོས་ཞུ་བ་རྣམས་ལ་དམིགས་པའི་ཉིན་གསུམ་གྱི་བཀའ་ཆོས་དེ་ལེགས་གྲུབ་མཛད་ཀྱི་ཡོད་པ་རེད།

སྔར་ལོའི་ཕྱི་ཟླ་ ༡༢ ཀྱི་ཟླ་མཇུག་ཏུ་ཨ་རིའི་གྲོས་ཚོགས་ཀྱིས་ཚད་མཐོའི་རྒྱབ་སྐྱོར་གནང་སྟེ་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་ཡུལ་དེའི་ཁྲིམས་སུ་བཅས་པའི་ཕྱིར་ཉིན་དེར་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་མཁའ་དབྱིངས་སུ་དམག་གི་རང་བཞིན་ལྡན་པའི་ཐད་འཕུར་གནམ་གྲུ་ཁག་ཅིག་ཆེད་དུ་བཏང་ནས་འཇིགས་སྐུལ་གྱི་རྣམ་པ་བསྟན་འདུགབོད་ཀྱི་རྩོམ་པ་པོ་གྲགས་ཅན་ཚེ་རིང་འོད་ཟེར་ལགས་ཀྱིས་རང་ཉིད་ཀྱི་ངོ་དེབ་ཐོག་ཕོ་བྲང་པོ་ཏཱ་ལའི་མཁའ་དབྱིངས་སུ་རྒྱ་ནག་གཞུང་གི་ངོས་ནས་དམག་གི་རང་བཞིན་ལྡན་པའི་ཐད་འཕུར་གནམ་གྲུ་བཏང་ནས་དམག་སྦྱོང་བྱེད་བཞིན་པའི་འདྲ་པར་ཁག་ཅིག་བཞག་འདུག་པར་མ་ཟད་སྤྱི་ཚོགས་དྲ་ལམ་བརྒྱུད་འདྲ་པར་དེ་དག་བརྒྱུད་སྤེལ་ཤུགས་ཆེར་འགྲོ་བཞིན་པ་དང་བསྟུན། ཁ་སང་རྒྱ་གར་གྱི་གསར་ཁང་ Hindustan times གིས་གནས་ཚུལ་སྤེལ་བར་ཉེ་ལམ་ཨ་རིའི་གྲོས་ཚོགས་ནས་ཚད་མཐོའི་རྒྱབ་སྐྱོར་ཐོག་གཏན་འབེབས་གནང་བའི་ ༢༠༢༠ ལོའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དེ་མགོན་པོ་༸གང་ཉིད་མཆོག་དང་བོད་མི་ཁོ་ལས་གཞན་སུས་ཀྱང་ཐེ་བྱུས་བྱ་མི་ཆོག་པ་སོགས་ཁྲིམས་སུ་བཅས་པའི་ཕྱི་ཉིན་དེར་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་མཁའ་དབྱིངས་སུ་དམག་གི་རང་བཞིན་ལྡན་པའི་ཐད་འཕུར་ནམ་གྲུ་ཁག་ཅིག་ཆེད་དུ་བཏང་ནས་འཇིགས་སྐུལ་བྱས་པ་དེས་བོད་མི་ཙམ་མ་ཟད། ཧི་མཱ་ལའི་ཁུལ་གྱི་བོད་བརྒྱུད་ནང་བསྟན་རྒྱུན་འཛིན་གནང་མཁན་ཀུན་ལ་འཇིགས་སྐུལ་བྱས་པ་ཞིག་རེད་ཅེས་བརྗོད་འདུགརྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་ནག་ཐོག་ལ་ཉམས་ཞིབ་གནང་མཁན་ཞིག་གིས་གསར་ཁང་དེར་བརྗོད་དོན་ལྟར་ན། ཐེངས་འདིར་དྲག་པོའི་དམག་གི་རང་བཞིན་ལྡན་པའི་ཐད་འཕུར་གནམ་གྲུ་ཁག་ཅིག་རྒྱལ་ས་ལྷ་སའི་མཁའ་དབྱིངས་སུ་ཆེད་གཏོང་བྱས་པ་དེ་ཉེ་ལམ་ཨ་རིའི་གཞུང་གིས་གཏན་འབེབས་གནང་བའི་བོད་དོན་ཁྲིམས་གཞི་དེ་དང་འབྲེལ་ནས་སྲིད་འཛིན་ཞི་ཅིན་ཕིང་གིས་བོད་དེ་རྒྱ་སྡེར་བསྒྱུར་རྒྱུའིི་ཐད་ཤུགས་གནོན་འཕར་མ་སྤྲོད་བཞིན་པའི་སྣང་བརྙན་ཞིག་ཡིན་པར་མ་ཟད། རྒྱ་ནག་གཞུང་གིས་བོད་ནང་ཨ་རི་གཞུང་གིས་ཁྲིམས་གཞི་དེ་དང་འབྲེལ་ནས་རོགས་འདེགས་བྱ་རྒྱུར་བཀག་འགོག་བྱས་པའི་རྣམ་པ་ཞིག་ཡིན་པ་དང་། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་སྐབས་རྒྱ་ནག་གཞུང་གིས་བོད་མིར་གཅར་རྡུང་བྱས་པ་བཞིན་རྒྱ་ནག་གཞུང་གིས་དམ་དྲག་ཤུགས་ཆེ་རུ་གཏོང་རྒྱུའི་ཉེན་ཁ་ཡོད་པར་འགྲེལ་བརྗོད་གནང་འདུག གསར་ཁང་དེས་མུ་མཐུད་བརྗོད་པར་བོད་དེ་རྒྱ་སྡེར་བསྒྱུར་རྒྱུ་ཞེས་པ་ནི་བོད་མིའི་ཆོས་དང་རིག་གཞུང་། ངོ་བོ་བཅས་ཡོངས་སུ་རྒྱ་ནག་གཞུང་གི་ལྟ་སྤྱོད་དང་མཐུན་པའམ་རྒྱའི་ཁྱད་ཆོས་ལྡན་པ་ཞིག་ལ་བཟོ་རྒྱུ་དང་། སྔར་ལོ་ཕྱི་ཟླ་ ༨ ནང་བོད་ལྗོངས་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ ༧ ཐོག་ཞི་ཅིན་ཕིང་གིས་རྒྱལ་ཁབ་ཀྱི་བདེ་འཇགས་དང་མི་མང་གི་འཚོ་བ། དེ་བཞིན་རང་བྱུང་ཁོར་ཡུག་དང་མཐའ་མཚམས་སྲུང་སྐྱོབ་བཅས་འགན་སྲུང་གི་གནད་དོན་བཞིའི་སྐོར་ལ་གཏམ་བཤད་སྤེལ་བའི་ཁྲོད་རྒྱལ་ཁབ་སྐྱོང་བའི་སྔོན་ལ་མཐའ་མཚམས་སྐྱོང་དགོས་པ་དང་། མཐའ་མཚམས་སྐྱོང་བའི་སྔོན་ལ་བོད་ནང་བརྟན་ལྷིང་དགོས་པ། ལྷག་པར་དུ་ཁ་བྲལ་རིང་ལུགས་ལ་གདོང་ལེན་དང་བོད་བརྒྱུད་ནང་བསྟན་དེ་ཀྲུང་གོའི་ཁྱད་ཆོས་ལྡན་པ་ཞིག་བཟོ་དགོས་གལ་ཡིན་པར་བཤད་པ་ལུང་འདྲེན་དང་འབྲེལ། རྒྱ་དམར་ཤོག་གཞུང་གིས་ལོ་རབས་བཅུ་ཕྲག་ཁ་ཤས་ཀྱི་རིང་བོད་མིར་དྲག་གནོན་ཇི་ཙམ་བྱས་ཀྱང་བོད་མིའི་སེམས་ཁོངས་སུ་༸གོང་ས་མཆོག་ལ་དད་གུས་གནང་རྒྱུ་གཙོས་དཀོན་མཆོག་དངོས་སུ་གཟིགས་ཚུལ་གྱི་རྣམ་པ་དེ་རྒྱ་ནག་གཞུང་གིས་འཇིགས་སྣང་བྱེད་ས་ཞིག་ཆགས་ཀྱི་ཡོད་སྟབས། རྒྱ་ནག་གཞུང་གིས་ ༢༠༢༠ ལོའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་ཉེན་ཁ་ཞིག་དང་བོད་མི་བླ་སྤྲུལ་ཡང་སྲིད་ངོས་འཛིན་གནང་ཕྱོགས་དེ་ཡང་དམར་པོའི་གཞུང་གི་ཁྲིམས་ལུགས་ལྟར་འགྲོ་དགོས་ཀྱི་ཡོད་པར་བརྗོད་ཀྱི་ཡོད་ཅེས་བཀོད་འདུགཕོ་བྲང་པོ་ཏཱ་ལའི་མཁའ་དབྱིངས་སུ་རྒྱ་ནག་གཞུང་གིས་ཐད་འཕུར་གནམ་གྲུ་བརྒྱུད་དྲག་པོའི་དམག་སྦྱོང་བྱེད་བཞིན་པའི་འདྲ་པར་དེ་དག་བོད་མི་ཚོས་སྤྱི་ཚོགས་དྲྭ་ལམ་ Face book དང་ twitter སོགས་ཀྱི་ནང་བརྒྱུད་སྤེལ་ཤུགས་ཆེར་གནང་སྟེ་བློ་འཚབ་ཀྱི་རྣམ་པ་ཤུགས་ཆེར་སྟོན་གནང་བཞིན་འདུག

དེ་རིང་ཕྱི་ལོ་ ༢༠༢༡ ཟླ་བ་ ༡ ཚེས་ ༥ ཉིན་ཀོ་རི་ཡའི་ནང་པ་ཚོས་ཇི་ལྟར་གསོལ་བ་བཏབ་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་ཤེས་རབ་སྙིང་པོའི་བཀའ་ཆོས་དབུ་འཛུགས་བསྐྱངས་སོང་།མགོན་པོ་༸གང་ཉིད་མཆོག་གིས་བཀའ་ཆོས་ཀྱི་ཉིན་དང་པོར་ཀོ་རི་ཡའི་ཆོས་གྲོགས་རྣམས་ལ་འཚམས་འདྲི་མཛད་པ་དང་སྦྲགས། ཤེས་རབ་སྙིང་པོ་དེ་ནི་ཤེར་ཕྱིན་གྱི་གཞུང་ཐམས་ཅད་ཀྱི་རྩ་བ་ལྟ་བུ་ཡིན་སྐོར་གྱི་བཀའ་སྩལ་བ་དང་འབྲེལ། སྤྱིར་བཏང་དད་པ་ལ་དབང་རྟུལ་དད་པའི་རྗེས་འབྲང་དང་དབང་རྣོན་ཆོས་ཀྱི་རྗེས་འབྲང་ཞེས་རིགས་གཉིས་ཡོང་གི་ཡོད་པ་ལས། སྟོན་པ་བཅོམ་ལྡན་འདས་ཀྱིས་སྔར་གསུངས་ཟིན་པ་ལྟར། ནང་ཆོས་ཀྱི་གཞུང་གི་ནང་དུ་ཆོས་ཐམས་ཅད་ཅི་བཞིན་བདག་ཅག་གི་སྟོན་པའི་བཀའ་ཡིན་པའི་དབང་གིས་ཁས་ལེན་བྱེད་རྒྱུ་ཞིག་མིན་པར། རིགས་པའི་ལམ་ནས་བརྡར་ཤ་བཅད་ནས་ཐག་གཅོད་བྱེད་རྒྱུ་དེ་གལ་ཆེན་པོ་ཡིན་པར་བཀའ་སྩལ་སོང་། དེ་བཞིན་༸མགོན་པོ་མཆོག་གིས་ཤེར་ཕྱིན་གྱི་གཞུང་ཡག་པོ་ཞིག་ཤེས་པར་བྱ་བ་ལ་མངོན་རྟོགས་རྒྱན་དང་ཀླུ་སྒྲུབ་ཡབ་སྲས་ཀྱི་གཞུང་ཆེན་དག་ལ་སློབ་སྦྱོང་བྱས་ཏེ་ཐོས་བྱུང་གི་གོ་བ་དང་བསམ་བྱུང་གི་གོ་བ་བསྐྱེད་དེ་མཐར་སྒོམ་བྱུང་གི་ཐོག་ནས་སློབ་གཉེར་གནང་བ་ཡིན་ན། ཟབ་མོ་སྟོང་པ་ཉིད་ཀྱི་གོ་བ་རྙེད་ཐུབ་པར་བཀའ་སྩལ་བ་དང་ཆབས་ཅིག འགྲོ་བ་མིའི་རིགས་ཀྱི་ཚུལ་མིན་ཡེ་ཤེས་ཀྱི་རྣམ་རྟོག་གི་སྒྲོ་བཏགས་པའི་ཁར་བཟང་ངན་སོགས་ཀྱི་དབྱེ་འབྱེད་ཡོང་གི་ཡོད་སྐོར་བཀའ་སྩལ་ནས་ཉོན་མོངས་པའི་གཉེན་པོར་སྟོང་ཉིད་སྒོམ་དགོས་གལ་ཡིན་པར་ལམ་སྟོན་བཀྲིན་ཆེར་མཛད་ཡོད།༸གོང་ས་མཆོག་གི་བཀའ་སློབ་ཀྱི་ལས་རིམ་གྲུབ་མཚམས་སུ་ཀོ་རི་ཡའི་ཆོས་ཞུ་བ་ཚོས་མགོན་པོ་༸གང་ཉིད་མཆོག་ལ་བརྗོད་གཞི་འདྲ་མིན་ཐོག་བཀའ་འདྲི་དགོངས་སྐོར་ཞུས་དོན་ལྟར་དེའི་ཁྲོད་ཆོས་ཞུ་བ་ཞིག་གིས་ནང་ཆོས་དང་ཚན་རིག་གཉིས་ཀྱི་དམིགས་འདུན་གྱི་སྐོར་བཀའ་འདྲི་དགོངས་སྐོར་ཞུས་པར་མགོན་པོ་༸གང་ཉིད་མཆོག་གིས་ནང་ཆོས་ཀྱིས་སེམས་ཁམས་རིག་པ་གཙོ་བོ་བརྗོད་བཞིན་ཡོད་པ་དང་ཚན་རིག་གིས་དངོས་ཁམས་རིག་པ་གཙོ་བོ་བརྗོད་བཞིན་ཡོད་པར་བཀའ་གནང་སྟེ། ནང་ཆོས་དང་ཚན་རིག་གཉིས་ཀྱིས་ཕན་ཚུན་ལ་གཞོག་འདེགས་གནང་ཐུབ་ཀྱི་ཡོད་སྐོར་བཀའ་ལན་སྩལ་སོང་། མགོན་པོ་༸གང་ཉིད་མཆོག་གིས་བཀའ་ལན་གཞན་ཞིག་སྩལ་བར་ཆོས་ལུགས་ཐམས་ཅད་ཀྱི་ནང་དུ་བྱམས་བརྩེ་སྐོར་དེ་གཙོ་བོར་འཛིན་བཞིན་ཡོད་པ་དང་། སྒོས་སུ་མི་ཚང་མ་གཅིག་གྱུར་ཡིན་པའི་འདྲ་མཉམ་གྱི་ལྟ་བའི་ཐོག་སེམས་ཁམས་རིག་པའི་རྣམ་གཞག་སྟེང་ནས་བྱམས་བརྩེ་གོང་མཐོར་གཏོང་ཐུབ་མཁན་གྱི་ཆོས་ལུགས་དེ་ནང་ཆོས་ཡིན་པར་བཀའ་སྩལ་ཏེ་ཆོས་ལུགས་དང་ཤེས་ཡོན་གྱི་ལམ་ལུགས་ཟུང་འབྲེལ་ཐོག་ནས་འགྲོ་བ་མིའི་རིགས་ཀྱི་རྒྱུད་ལ་བྱམས་བརྩེ་གོང་འཕེལ་གཏོང་རྒྱུ་དེ་གལ་ཆེན་པོ་ཡིན་པར་བཀའ་སྩལ་ཡོད།གཞི་རྩའི་འདི་ལོར་རྒྱ་ནག་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་རྐྱེན་གྱིས་མི་ཚང་མའི་འགྲོ་འདུག་ལ་བཀག་སྡོམ་བྱས་ཡོད་པ་ལྟར། རྒྱ་གར་གྱི་ནང་དུ་རིམས་ནད་ཁྱབ་བརྡལ་བྱུང་བ་ནས་བཟུང་བཞུགས་སྒར་༸རྒྱལ་བའི་ཕོ་བྲང་ཡང་སྒོ་རྒྱབ་མུས་ཡིན་པ་ལྟར། མགོན་པོ་༸གང་ཉིད་མཆོག་གིས་དྲ་ལམ་བརྒྱུད་ནས་མང་ཚོགས་ལ་བཀའ་ཆོས་སྩོལ་བཞིན་ཡོད་པ་རེད། ཐེངས་འདིའི་ཀོ་རི་ཡའི་དད་ལྡན་མང་ཚོགས་ལ་བཀའ་ཆོས་སྩོལ་རྒྱུའི་ལས་རིམ་དེ་དེ་རིང་ཚེས་ ༥ ནས་དབུ་འཛུགས་ཀྱི་ཚེས་ ༧ བར་ཁྱོན་ཉིན་གསུམ་གྱི་རིང་ལ་གནང་གི་ཡོད་པ་དང་། དེ་བཞིན་ཕྱི་ཚེས་༡༠ ཉིན་སེམས་དང་སྲོག་གི་བསྟི་གནས་ཁང་གིས་གོ་སྒྲིག་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་སའི་གོ་ལའི་གནམ་གཤིས་ཚ་དྲོད་སྲུང་སྐྱོབ་དང་ཁོར་ཡུག་ལས་འགུལ་བ་གྲགས་ཆེན་གཞོན་ནུ་མ་ Greta Thunberg དང་། དེ་བཞིན་དེང་དུས་ཚན་རིག་པ་ཁག་ཅིག་དང་ལྷན་དུ་གོ་ལའི་ཚ་དྲོད་ཀྱི་ཛ་དྲག་གནས་སྟངས་ཀྱི་བརྗོད་གཞིའི་ཐོག་བགྲོ་གླེང་མཛད་རྒྱུའི་མཛད་འཆར་ཐུགས་གཏན་འཁེལ་ཡོད་པ་རེད།

ད་ཆ་འཛམ་གླིང་སྤྱིར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཁྱབ་གདལ་གྱི་རྐྱེན་གྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་ངལ་བ་བཟོད་གླགས་མེད་པ་མྱངས་དང་མྱོང་པའི་དུས་སྐབས་འདིར་ཧི་མཱ་ཅལ་གཙོས་རྒྱ་གར་གྱི་མངའ་སྡེ་ཁག་ཅིག་གི་ནང་བྱ་ནད་དམ་ Bird Flu ཁྱབ་གདལ་འགྲོ་བཞིན་པའི་གནས་ཚུལ་ཐོན་འདུག ཁ་ས་དང་དེ་རིང་བརྒྱུད་ལམ་ཁག་ཏུ་ཐོན་པའི་གནས་ཚུལ་ལ་གཞིགས་ན། ཉེ་ལམ་རྒྱ་གར་གྱི་མངའ་སྡེ་ Haryana དང་ Rajasthan དེ་བཞིན་ Kerala དང་ Madhya Pradesh ནང་བྱ་ནད་ཁྱབ་གསལ་གྱི་རྐྱེན་གྱིས་བྱ་རིགས་མང་དག་ཅིག་འཆི་སྐྱོན་བྱུང་བ་ཤེས་རྟོགས་ཐུབ་ཡོད་པར་མ་ཟད། བཞུགས་སྒར་དྷརྨ་ས་ལའི་ཉེ་འདབས་དང་ཀངྒ་རཱ་རྫོང་ཁོངས་སུ་ཡོད་པའི་ Pong Dam འམ་སྤོང་ཆུ་རགས་ཀྱི་མཚོ་ཆུང་སར་འདས་པའི་བདུན་ཕྲག་ནང་དུ་བོད་གཙོས་པའི་རྒྱལ་ཁབ་གཞན་ནས་ཡོང་བའི་བྱ་ ༡༨༠༠ ལྷག་ཞིག་ཤི་ཡོད་པར་ཤེས་རྟོགས་བྱུང་འདུག ཧི་མཱ་ཅལ་རི་སྐྱེས་སྲོག་ཆགས་ཀྱི་གཙོ་འཛིན་ Archana Sharma ལགས་ཀྱིས་རྒྱ་གར་གྱི་གྲོང་ཁྱེར་ Bareilly ནང་དུ་ཡོད་པའི་ Indian Veterinary Research Institute ནས་ཞིབ་འཇུག་གནང་སྐབས་བྱ་རིགས་དེ་དག་ལ་བྱ་ནད་ཕོག་པའི་རྐྱེན་གྱིས་ཤི་ཡོད་པར་ཤེས་རྟོགས་ཐུབ་འདུག གཞི་རྩའི་བྱ་ཤི་བ་དེ་དག་ཁྲོད་བརྒྱ་ཆ་ ༩༠ ཙམ་ཞིག་དཀྱིལ་ཤར་ཨེ་ཤ་ཡ་དང་ཨུ་རུ་སུ། སོག་ཡུལ་སོགས་ནས་ཡོང་བའི་ Bar-Headed Geese འམ་ཆུ་བྱ་ལྟག་ཁྲ་རེད་འདུག   Archana Sharma ལགས་ཀྱིས་དེ་སྔ་སྤོང་ཆུ་རགས་སར་གནས་ཡུལ་གཞན་ནས་བྱ་འབུམ་གཅིག་ལྷག་ཡོང་གི་ཡོད་ཀྱང་འདི་ལོར་ཁྲི་ལྔ་ལས་འབྱོར་མེད་པར་གསུངས་འདུག  བྱ་ནད་ཁྱབ་གདལ་གྱི་དུས་ཡུན་འདིའི་ཁྲོད་ཧི་མཱ་ཅལ་ཀངྒ་རཱ་རྫོང་དཔོན་སྐུ་ཞབས་ Rakesh Prajapati མཆོག་གིས་ Fatehpur དང་།  Dehra དེ་བཞིན་  Jawali དང་ Indora བཅས་སུ་ཁྱིམ་བྱ་གཙོས་པའི་ཉ་རིགས་དང་སྒོ་ང་སོགས་ཉོ་ཚོང་གནང་རྒྱུར་བཀག་སྡོམ་དང་སྤོང་ཆུ་རགས་ཁུལ་དུ་ཡུལ་སྐོར་སྤྲོ་འཆམ་པ་སོགས་འགྲོ་ཆོག་གི་མེད་པའི་བཀོད་ཁྱབ་གནང་འདུག གཞི་རྩའི་ Haryana དང་ Rajasthan དེ་བཞིན་ Kerala དང་ Madhya Pradesh བཅས་ལ་འདས་པའི་ཉིན་ཤས་ནང་ poultry birds འམ་ཁྱིམ་བྱ་འབུམ་གཅིག་ཙམ་ཞིག་དང་ཕོ་རོག ཆུ་བྱ་མང་དག་ཅིག་ལ་བྱ་ནད་ཕོག་རྐྱེན་ཤི་ཡོད་པར་ར་འཕྲོད་བྱུང་ཡོད་པ་རེད། ལྷག་པར་དུ་རྒྱ་གར་ལྷོ་ཕྱོགས་ཀེ་ར་ལ་མངའ་ཁུལ་དུ་འཛིན་སྐྱོང་གིས་བྱ་ནད་ཁྱབ་གདལ་མི་འགྲོ་བར་བྱ་ནད་ཁྱབ་ཁུལ་གྱི་ས་ཚིགས་གཡས་གཡོན་དུ་ཡོད་པའི་ཆུ་བྱ་དང་བྱ་མོ། དེ་བཞིན་ཁྱིམ་བྱའི་རིགས་ཁྲི་བཞི་ལྷག་སོད་ཅིག་ཅེས་བཀའ་རྒྱ་བཏང་འདུག རྩ་བའི་བྱ་ནད་ནི་འགོས་ཁྱབ་ཧ་ཅང་ཆེ་བའི་ནད་གཞི་ཞིག་ཡིན་པ་དང་། ནད་གཞི་དེ་གཙོ་བོ་ H5N1 ཞེས་པའི་གཉན་སྲིན་ལས་བྱུང་གི་ཡོད་པར་མ་ཟད། ད་ལན་རྒྱ་གར་ནང་དུ་བྱ་ནད་ཁྱབ་གདལ་འགྲོ་བཞིན་པ་དེ་ས་གནས་གཞན་ནས་ཡོང་བའི་བྱ་རིགས་ལས་འགོས་ཁྱབ་བྱུང་བར་དོགས་པ་གནང་གི་འདུག  འཛམ་གླིང་འཕྲོད་བསྟེན་ལྷན་ཚོགས་ཀྱིས་ནད་གཞི་དེ་མིར་སྐབས་འགར་འགོས་སྲིད་ཀྱང་མི་ནས་མིར་འཆར་ཅན་ལྟར་འགོས་ཁྱབ་བྱུང་གི་མེད་ཅེས་བརྗོད་འདུག

ཉེ་ལམ་ཨ་རིའི་སྲིད་འཛིན་ Donald Trump མཆོག་གིས་ Tibet Policy and Support Act  ༢༠༢༠ ཞེས་ལོ་རྒྱུས་ཀྱི་རང་བཞིན་ལྡན་པའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་མཚན་རྟགས་བསྐྱོན་ནས་ཁྲིམས་སུ་བཅས་ཡོད་པ་རེད། གཞི་རྩའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་དེ་སྔ་ཕྱི་ལོ་ ༢༠༠༢ ལོར་ཨ་རི་གཞུང་གིས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་ལ་བསྐྱར་བཅོས་གནང་བའི་ཁྲིམས་འཆར་ཞིག་ཆགས་ཀྱི་ཡོད་པ་དང་། ཁྲིམས་འཆར་དེའི་འོག་ཨ་རི་གཞུང་གི་བོད་དོན་དམིགས་བསལ་སྐུ་ཚབ་བསྐོ་བཞག་གནང་རྒྱུ་དང་བོད་རྒྱ་ཞི་མོལ་ལ་རྒྱབ་སྐྱོར་གནང་རྒྱུ། དེ་བཞིན་བོད་ནང་ཨ་རིའི་གཞུང་ཚབ་ལས་ཁུངས་གསར་འཛུགས་སོགས་ཀྱི་དེ་སྔའི་འབྲུ་དོན་ཐོག་གལ་ཆེའི་གནད་དོན་ཁག་ཅིག་ཁ་སྣོན་གནང་བའི་ཁོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་དང་། གལ་ཏེ་རྒྱ་ནག་གཞུང་གི་ལས་བྱེད་མི་སྣས་བོད་མིའི་བླ་སྤྲུལ་ངོས་འཛིན་ཐད་ཐེ་བྱུས་བྱས་ཚེ་ཨ་རིའི་གཞུང་གིས་ཆབ་སྲིད་ཀྱི་ཉེས་ཆད་ལྕི་མོ་གཅོད་རྒྱུ་ཡིན་པ། ༸གོང་ས་མཆོག་གི་མང་གཙོ་གོང་འཕེལ་ཐད་ཀྱི་མཛད་རྗེས་ལ་ངོས་འཛིན་དང་ཆེ་བསྟོད། དེ་བཞིན་བོད་མིའི་སྒྲིག་འཛུགས་འདི་བཞིན་བཙོན་བྱོལ་བོད་མིའི་སྐུ་ཚབ་དང་མངོན་འདོད་མཚོན་ཐུབ་མཁན་གྱི་སྒྲིག་འཛུགས་ཤིག་དང་བོད་མིའི་སྒྲིག་འཛུགས་ཀྱི་འགོ་ཁྲིད་བཅས་ངོས་འཛིན་གནང་དགོས་པ།བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཡན་ལག་གི་ལས་ཁུངས་མ་བཙུག་བར་དུ་ཨ་རིར་རྒྱ་ནག་གཞུང་ཚབ་ཡན་ལག་ལས་ཁུངས་གསར་འཛུགས་མི་ཆོག་པ། བོད་ནང་ཚོང་འབྲེལ་བྱེད་མཁན་རྣམས་ནས་རྒྱལ་ཚོགས་ཀྱི་ཁྲིམས་སྒྲིག་ལྟར་ཚོང་འབྲེལ་བྱེད་དགོས་པ། བོད་མཐོ་སྒང་གྱི་ཁོར་ཡུག་སྲུང་སྐྱོབ་བྱེད་དགོས་པ། བོད་ཕྱི་ནང་གཉིས་ཀྱི་བོད་མིར་རང་གི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་གནང་ཕྱིར་ཕྱི་ལོ་ ༢༠༢༥ བར་རོགས་དངུལ་སྔར་བཞིན་གནང་སྐྱོང་ཡོང་བ་སོགས་ཀྱི་འབྲུ་དོན་ཁག་ཆེད་བཀོད་ཀྱིས་ཁ་སྣོན་གནང་ཡོད་པ་རེད།རླུང་འཕྲིན་ཁང་གིས་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་བུ་ཆུང་ཚེ་རིང་ལགས་སུ་ཁྲིམས་འཆར་གཏན་འབབ་དང་འབྲེལ་ནས་བཀའ་འདྲི་ཁག་ཅིག་ཞུས་ཡོད།

འདི་ལོར་རྒྱ་ནག་གིས་གཏན་འབེབས་བྱས་པའི་ཧོང་ཀོང་གི་བདེ་འཇགས་ཀྱི་ཁྲིམས་གཞི་ལ་རྐྱེན་བྱས་ཏེ། ཧོང་ཀོང་གི་ནང་དུ་མི་མང་ས་ཡ་མང་པོ་སྲང་ལམ་དུ་སླེབས་ནས་རྒྱ་ནག་གི་བཙན་འཛུལ་རང་བཞིན་གྱི་ཁྲིམས་གཞི་དེར་རྒོལ་རྡུང་གི་ལས་འགུལ་སྤེལ་ཡོད་པ་ལྟར།  ཁ་སང་རྒྱ་ནག་གིས་སྐབས་དེའི་མང་གཙོའི་ལས་འགུལ་བ་བཅུ་ལ་ཟླ་བ་ ༧ ནས་མི་ལོ་ ༣ རིང་གི་ཁྲིམས་ཐག་བཅད་འདུགཡང་་དེ་རིང་གསར་ལམ་ཁག་ཏུ་གནས་ཚུལ་སྤེལ་ན་ལྟར་ན། འདི་ལོའི་ཧོང་ཀོང་མི་མང་གི་མང་གཙོའི་ལས་འགུལ་དང་འབྲེལ་ནས་རྒྱ་ནག་གི་ཁྲིམས་གཞི་ལ་རྒོལ་རྡུང་གཏོང་མཁན་གྱི་མང་གཙོའི་ལས་འགུལ་བ་བཅུ་གཉིས་མཚོ་གྲུར་བསྡད་ནས་ཐེ་ཝན་དུ་བྲོས་བྱོལ་ལ་ཕེབས་བཞིན་པའི་ལམ་བར་དུ་རྒྱ་ནག་གིས་འདི་ལོའི་ཟླ་བ་བརྒྱད་པའི་ནང་འཛིན་བཟུང་བྱས་ཡོད་པ་ལྟར། ཁ་སང་རྒྱ་ནག་གི་ཧྲིན་ཀྲིན་གྲོང་ཁྱེར་གྱི་ནང་དུ་རྟེན་གཞི་བྱས་པའི་ཁྲིམས་ཁང་ཞིག་གིས། མང་གཙོའི་ལས་འགུལ་བ་ Tang Kai-yin ལགས་སུ་ལོ་གསུམ་དང་། Quinn Moon ལགས་སུ་ལོ་གཉིས། དེ་མིན་གྱི་ལས་འགུལ་བ་བརྒྱད་ལ་ཟླ་ངོ་བདུན་གྱི་ཁྲིམས་ཐག་བཅད་ཡོད་པ་མ་ཟད། ཐེངས་འདིར་ཁྲིམས་ཐག་བཅད་པ་རྣམས་ལ་རྒྱ་སྒོར་ཁྲི་གཉིས་ལྷག་གི་ཉེས་ཆད་ཀྱང་བཅད་ཡོད་པར་ཕྱིར་བསྒྲགས་གནང་འདུག The Hindustan Times གསར་ཁང་གིས་གནས་ཚུལ་སྤེལ་བའི་ནང་དུ།  ཐེངས་འདིར་རྒྱ་ནག་གིས་ཁྲིམས་ཐག་བཅད་པའི་ཧོང་ཀོང་གི་མི་སེར་རྣམས་ཁ་ཉིན་གཟའ་ཟླ་བའི་ཉིན་ཁྲིམས་བཤེར་བྱས་ཡོད་ནའང་།  ཁོང་རྣམས་ཀྱི་ནང་མི་རྣམས་ལ་ཉིན་གསུམ་གྱི་གོང་དུ་མ་གཏོགས་ཁྲིམས་བཤེར་གྱི་གནད་དོན་ཐད་ནས་གསལ་བསྒྲགས་བྱས་མེད་སྟབས། ཕ་མ་རྣམས་ཀྱིས་ཁྲིམས་བཤེར་ལ་འཛུལ་ཞུགས་བྱེད་ཐབས་མེད་པ་དང་། དེ་བཞིན་ཁོང་ཅག་གི་ཁྲིམས་རྩོད་པ་རྣམས་ཀྱང་བཀག་སྐྱིལ་འོག་གི་ཧོང་ཀོང་གི་མི་སེར་བཅུ་ལ་ཐུག་འཕྲད་བྱེད་དུ་མ་བཅུག་མ་ཟད།  ཁྲིམས་བཤེར་གྱི་གནད་དོན་སྐབས་སུ་ཡང་གསར་འགོད་པ་སོགས་ལ་མཉམ་ཞུགས་བྱེད་དུ་བཅུག་མེད་མངོན་གསལ་གནང་འདུགསྲིད་གཞུང་གི་བཀའ་མངགས་ལྟར་ཧོང་ཀོང་གི་མི་སེར་བཅུ་ལ་ཁྲིམས་ཐག་བཅད་ཟིན་པའི་རྗེས་སུ། ཁྲིམས་ཆད་ཕོག་པའི་མི་སེར་བཅུ་བོའི་ཁྲིམས་རྩོད་པའི་གསར་ཁང་ལ་འགྲེལ་བརྗོད་བྱས་པ་ལྟར་ན། ཁོང་ཚོར་ས་མཚམས་བརྒལ་བའི་ཉེས་འཛུགས་ལ་དཔག་པའི་ཁྲིམས་ཆད་ལྕི་མོ་བཅད་ཡོད་པར་འགྲེལ་བརྗོད་གནང་འདུག རྩ་བའི་གཟའ་ཟླ་བའི་ཉིན། ཨ་རིའི་གཞུང་ཚབ་ཁང་གི་མགྲིན་ཚབ་པས་རྒྱ་ནག་གིས་བྲོས་བྱོལ་ཁྲོད་འཛིན་བཟུང་བྱས་པའི་ཧོང་ཀོང་གི་མི་སེར་དེ་དག་འཕྲད་དུ་གློད་གྲོལ་གཏོང་དགོས་བའི་ཞུ་སྐུལ་གནང་བ་དང་འབྲེལ་ནས། རྒྱ་ནག་གིས་དུས་རྒྱུན་ནས་རང་དབང་འཐབ་རྩོད་དང་འབྲེལ་བའི་ལས་འགུལ་བ་རྣམས་ལ་སྲུང་སྐྱོབ་བྱེད་ཀྱི་མེད་པའི་སྐྱོན་བརྗོད་གནང་ཡོད་པ་རེད། དེ་བཞིན་རྒྱལ་སྤྱིའི་ཉེས་ཡངས་ཚོགས་པའི་ལྷོ་རྒྱ་མཚོའི་ཁུལ་གྱི་འགན་འཛིན། ལྕམ་Yamini Mishra ལགས་ཀྱིས་ཀྱང་རྒྱ་ནག་གིས་ ཧོང་ཀོང་གི་མི་སེར་དེ་དག་ལ་དྲང་བདེན་མིན་པའི་ཁྲིམས་ཐག་བཅད་ཡོད་སྐོར་ཕྱིར་བསྒྲགས་ཀྱིས། ཐེངས་འདིའི་གནད་དོན་དེ་ཡིས་རྒྱ་ནག་གིས་རྒྱལ་སྤྱིའི་སྒང་ལ་ཆབ་སྲིད་དང་འབྲེལ་བའི་ལས་འགུལ་བ་རྣམས་ལ་ནམ་ཡང་དྲང་བདེན་གྱི་ཁྲིམས་བཤེར་བྱེད་ཀྱི་མེད་པ་མངོན་གསལ་གནང་བ་ཞིག་ཆགས་ཡོད་སྐོར་དང་འབྲེལ་རྒྱ་ནག་གི་བྱེད་བབ་དེར་སྐྱོན་བརྗོད་ཚ་ནན་བྱས་འདུག གཞི་རྩའི་ཐེངས་འདིའི་གྱོད་དོན་ཁྲོད་བྲོས་བྱོལ་བ་བཅུ་གཉིས་འཛིན་བཟུང་བྱས་ཡོད་ནའང་། དེ་དག་གི་ཁྲོད་ཀྱི་མི་གཉིས་ཁྲིམས་ཐོག་ནས་ལོ་ཚོད་ལོང་མེད་པར་བརྟེན་ནས་དམིགས་བསལ་གྱི་ཁྲིམས་ཆད་ཕོག་མེད་པ་རེད།  རྒྱ་ནག་གི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན་གློད་གྲོལ་ཐོབ་པའི་བྱིས་པ་དེ་གཉིས་གཅིག་ནས་ལོ་ཆུང་བ་དང་། གཉིས་ནས་རང་གི་ནོར་འཁྲུལ་ཁས་ལེན་བྱས་པ་སོགས་ཀྱི་དབང་གིས་ཁྲིམས་ཆད་བཅད་མེད་པར་འཁོད་འདུག