བོད་མིའི་སྒྲིག་འཛུགས།

ཕྱི་ཟླ་ ༦ ཚེས་ ༣༠ ཉིན་ནས་སུད་སི་གྲོང་ཁྱེར་ཇི་ནི་ཝ་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༤ འཚོགས་བཞིན་ཡོད་པ་དང་། ཕྱི་ཚེས་ ༡༠ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་ཚོང་འབྲེལ་སྡེ་ཁག་ཐོག་གི་དམིགས་བསལ་ཁྱད་ལས་རྟོག་ཞིབ་ཚོགས་ཆུང་གི་སྙན་ཐོ་དང་འབྲེལ་བའི་བགྲོ་གླེང་ལས་རིམ་ཐོག་བོད་ནང་རྒྱ་ནག་གི་གཞུང་འབྲེལ་མི་སྣས་ཁྲིམས་འགལ་ཐོག་འབྲོག་ས་བཙན་འཕྲོག་བྱེད་བཞིན་པའི་གནས་སྟངས་སྤྱི་དང་དེ་འབྲེལ་རྒྱ་གཞུང་ལ་ཞི་རྒོལ་གྱིས་གདོང་ལེན་གནང་མཁན་བོད་མི་རྣམས་འཛིན་བཟུང་བཙོན་འཇུག་གིས་ཁྲིམས་ཆད་གཅོད་བཞིན་པའི་གནས་སྟངས་སྙན་སེང་ཞུས་འདུག སྐབས་དེར་སུད་སི་དོན་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་ Society  for Threatened People ཞེས་པའི་རྒྱལ་ཚོགས་ཀྱི་གཞུང་འབྲེལ་མིན་པའི་ཚོགས་པའི་མཚན་ཐོག་ནས་བོད་ནང་གི་འབྲོག་པའི་གནས་སྟངས་སྐོར་སྙན་སེང་ཞུས་པ་དང་འབྲེལ། ཉེ་བའི་ཆར་རྒྱ་ནག་གཞུང་གིས་བོད་ནང་འཛུག་སྐྲུན་དང་རྒྱུད་ཅིག་ལམ་གཅིག་གི་ལས་གཞིར་ཁ་གཡར་ནས་ མང་ཚོགས་སྤྱི་དང་སྒོས་འབྲོག་པ་ཚོའི་རྩྭ་ས་བཙན་འཕྲོག་གིས་གྲོང་ཁྱེར་ནང་གནས་སྤོས་བྱེད་བཅུག་ པའི་གནས་སྟངས་དང་། དེ་བཞིན་ས་ཆ་བཙན་འཕྲོག་གི་གནད་དོན་དང་འབྲེལ་བའི་ཐོག་ནས་རྒྱ་ནག་གཞུང་ལ་ཞི་རྒོལ་དང་གདོང་ལེན་གནང་མཁན་ཚོ་འཛིན་བཟུང་བཀག་ཉར་དང་མནར་གཅོད། བོད་མི་དེ་དག་ལ་རྒྱལ་ཁབ་ཁ་བྲལ་གྱི་ནག་ཉེས་གཡོགས་ནས་བཙོན་འཇུག་གི་ཁྲིམས་ཐག་གཅོད་བཞིན་ཡོད་པ་སྙན་སེང་ཞུས་འདུག ལྷག་པར་དུ་འདས་ལོ་ནང་བོད་མགོ་ལོག་ཁུལ་ནས་རྒྱ་གཞུང་གིས་འབྲོག་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ཨ་ཉ་སེང་སྒྲ་ལགས་སུ་རྒྱ་གཞུང་གིས་སྤྱི་བདེ་ཉེན་རྟོག་དང་གཞུང་། དེ་བཞིན་ཁྲིམས་ཁང་ངན་པ་ལག་འབྲེལ་གྱིས་ཁོང་འཛིན་བཟུང་བཀག་ཉར་དང་མནར་གཅོད། དེ་བཞིན་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ནག་ཆེན་ས་ཁུལ་ནས་སྔ་རྗེས་སུ་རྒྱ་ནག་གཞུང་གི་རྩྭ་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ ༣༠ བཙོན་འཇུག་ཁྲིམས་ཐག་བཅད་པ་སོགས་ཀྱི་གནད་དོན་ཡང་ལུང་འདྲེན་གནང་ཡོད་པ་རེད། ཁོང་གིས་ལྷན་ཚོགས་ཐོག་རྒྱལ་ཚོགས་ཀྱི་ངོས་ནས་རྒྱ་གཞུང་ལ་གནོན་ཤུགས་ཀྱིས་ཨ་ཉག་སེང་སྒྲ་ལགས་ཀྱིས་གཙོས་པའི་བོད་མི་བཙོན་པ་གཞན་རྣམས་གློད་བཀྲོལ་ཡོང་བའི་འབོད་སྐུལ་ཞུས་པ་དང་འབྲེལ། རྒྱལ་ཚོགས་ཀྱིས་རྒྱ་ནག་གི་གཞུང་འབྲེལ་སྡེ་ཁག་ནས་ངན་པ་ལག་འབྲེལ་གྱིས་བོད་ནང་གི་མང་ཚོགས་ཀྱི་ས་ཆ་འཕྲོག་བྱེད་བཞིན་པའི་བྱ་སྤྱོད་དེ་དག་འཕྲལ་མར་མཚམས་འཇོག་བྱེད་རྒྱུའི་དུས་ལ་བསླེབས་སོང་ཞེས་གསུངས་འདུགཉེ་ཆར་རྒྱལ་ཚོགས་ཁྱད་ལས་མི་སྣ་ ༤༩ ནས་རྒྱ་ནག་གཞུང་གིས་བོད་དང་ཧོང་ཀོང་། དེ་བཞིན་ཤར་ཏུ་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་ཚོགས་མི་རྒྱལ་ཁབ་ཁག་ལ་རྒྱ་ནག་ཐོག་དམིགས་བསལ་ཚོགས་དུས་བསྐོང་ཚོགས་གནང་དགོས་པའི་རེ་འདུན་གནང་ཁག་དོན་འཁྱོལ་ཕྱག་བསྟར་ཡོང་བའི་འབོད་སྐུལ་བསྐྱར་ནན་ཞུས་ཡོད་པ་རེད། རྩ་བའི་ཐེངས་འདིའ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེ་ཕྱི་ཟླ་ ༦ ཚེས་ ༣༠ ཉིན་ནས་ཕྱི་ཟླ་ ༧ ཚེས་ ༢༠ བར་ཚོགས་ཀྱི་ཡོད་པ་རེད། འདི་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་སྔ་ལོའི་ཚོགས་དུས་ ༤༣ པ་དེ་དུས་ཚོད་གཅིག་གི་ནང་ཆ་ཚང་ཚོགས་ཐུབ་མེད་པ་དང་། ད་ལན་རྒྱལ་ཚོགས་ཀྱི་ལྷན་ཚོགས་ཐེངས་ ༤༤ པའི་ཚོགས་འདུ་འགྲོ་ལུགས་དང་ལས་རིམ་ཁག་ཀྱང་རྣམ་ཀུན་དང་མི་འདྲ་བ་གནང་དགོས་བྱུང་འདུག་པ་མ་ཟད། དེ་བཞིན་ཚོགས་་འདུ་མང་དག་ཅིག་དྲྭ་ལམ་ཐོག་ཚོགས་ཀྱི་ཡོད་པ་རེད།

ཁ་ཉིན་ཕྱི་ཚེས་ ༧ ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་དེ་སྔ་ ༢༠༡༨ ལོར་ཡུལ་དེའི་གྲོས་ཚོགས་གོང་འོག་གཉིས་སུ་གཏན་འབེབས་གནང་རྗེས་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་ཨ་རིའི་ཁྲིམས་སུ་གཏན་ལ་ཕབ་པའི་Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ཡོད་པ་རེད།གནད་དོན་དེ་དང་འབྲེལ་ཁ་སང་རྒྱ་ནག་གཞུང་འབྲེལ་གྱི་ཉིན་རེའི་གསར་འགོད་ལྷན་ཚོགས་ཐོག་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་ཨ་རིས་བོད་དང་འབྲེལ་རྒྱ་ནག་རྒྱལ་ནང་གི་གནད་དོན་ལ་ཐད་བྱུས་གནང་རྒྱུ་ངེས་པར་དུ་མཚམས་འཇོག་བྱས་ཏེ་ཨ་རི་དང་རྒྱ་ནག་གཉིས་ཀྱི་འབྲེལ་བ་བཟང་དུ་གཏང་རྒྱུར་དོ་སྣང་གནང་དགོས་ཞེས་བརྗོད་པ་དང་ཆབས་ཅིག ཨ་རིས་བོད་ཀྱི་གནད་དོན་དང་འབྲེལ་རྒྱ་ནག་གི་དཔོན་རིགས་ཚོ་ཨ་རི་ནང་བསྐྱོད་རྒྱུའི་མཐོང་མཆན་གནང་རྒྱུ་མིན་སྐོར་བརྗོད་པ་དེར་རྒྱ་ནག་ཕྱོགས་ནས་ཀྱང་བོད་དོན་འབྲེལ་བ་དམ་ཟབ་ཡོད་པའི་ཨ་རིའི་གཞུང་འབྲེལ་མི་སྣ་དང་མི་སྒེར་རྣམས་རྒྱ་ནག་དང་བོད་ནང་ཕེབས་རྒྱུར་དམ་དྲག་བྱེད་ངེས་ཡིན་ཞེས་ལན་འདེབས་བྱས་འདུགཁོ་པས་ད་དུང་རྒྱ་ནག་གི་ངོས་ནས་བོད་འདི་རྒྱལ་སྤྱིའི་གཞུང་ཚབ་དང་ཡུལ་སྐོར་སྤྲོ་འཆམ་པ་ཚོར་དུས་རྟག་ཏུ་སྒོ་ཕྱེ་ཡོད་པ་མ་ཟད་ཕྱི་ལོ་ ༢༠༡༥ ནས་ ༢༠༡༨ བར་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁོ་ནའི་ནང་གཞུང་ཚབ་པ་དང་ཡུལ་སྐོར་སྤྲོ་འཆམ་པ་ ༡༧༦༠༠༠  ལྷག་བཏང་ཡོད་པར་འགྲེལ་བརྗོད་དང་སྦྲགས། ད་རེས་ཨ་རིས་ཕྱག་བསྟར་གནང་རྒྱུའི་ཁྲིམས་འཆར་དེ་ནི་གནང་སྟངས་ཡག་པོ་ཞིག་མིན་པ་དང་། རྒྱ་ནག་ནས་བོད་ཐོག་འགྲོ་སྐྱོད་ཆོག་མིན་དང་འབྲེལ་བའི་སྒྲིག་ཁྲིམས་གཏན་འབེབས་ཡོད་པ་དེ་བོད་ཀྱི་ས་བབས་གནས་སྟངས་ལ་གཞིགས་ཏེ་ཕྱི་མིའི་བདེ་འཇགས་ལ་ཆེད་དམིགས་ཀྱིས་བཟོས་པ་ཞིག་རེད་ཅེས་བརྗོད་འདུགརྒྱ་གཞུང་གི་ཡར་ལན་དེ་དང་འབྲེལ་ཁ་སང་གསར་འགོད་པ་ཁག་ཅིག་ནས་ཨ་རི་ཕོ་བྲང་དཀར་པོའི་གསར་འགོད་ལྷན་ཚོགས་སྐབས་གསར་འགོད་དྲུང་ཆེ་ Kayleigh McEnany ལགས་སུ་བཀའ་འདྲི་ཁག་ཅིག་ཞུ་སྐབས་སྲིད་འཛིན་སྐུ་ཞབས་ Donald Trump མཆོག་ནས་རྒྱ་ནག་གི་བྱ་སྤྱོད་ཡར་ལན་སོགས་ཀྱི་ཐད་ཕྱག་བསྟར་གནང་རྒྱུའི་སྲིད་བྱུས་དང་འཆར་གཞི་ཁག་ཅིག་གཏན་འབེབས་གནང་ཡོད་པས་དེ་དག་རིམ་པས་མཁྱེན་རྟོགས་ཡོང་གི་རེད་ཅེས་གསུངས་ཡོད་པ་ལས་དེ་མིན་ཕྱག་བསྟར་གནང་རྒྱུའི་འཆར་གཞི་གང་དག་ཡོད་མེད་ཁ་གསལ་གནང་མེད་པ་རེད།གཞི་རྩའི་རྒྱ་ནག་གཞུང་ནས་བོད་ཀྱི་ས་ཁུལ་ཁག་ཏུ་རྒྱལ་སྤྱིའི་གཞུང་ཚབ་མི་སྣ་དང་ཡུལ་སྐོར་སྤྲོ་འཆམ་པ་རྣམས་རང་དབང་ཐོག་བསྐྱོད་རྒྱུར་དམ་དྲག་བྱེད་བཞིན་པ་དེ་ནི་དངོས་ཡོད་གནས་སྟངས་ཤིག་ཡིན་པ་དང་། གལ་སྲིད་གཞུང་ཚབ་མི་སྣ་གཙོས་ཕྱི་མི་ཞིག་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱིས་གཙོས་པའི་བོད་ཀྱི་ས་ཁུལ་ཁག་ཏུ་བསྐྱོད་རྒྱུའི་ཆོག་མཆན་སྤྲད་དབང་དུ་བཏང་ཡང་ས་གནས་རྒྱ་གཞུང་ལས་བྱེད་ཚོས་ཁོང་ཚོར་ལྟ་སྲུང་ནན་པོ་བྱས་ནས་བོད་མི་དང་ཐུག་འཕྲད་གནང་རྒྱུར་དམ་དྲག་ཆེན་པོ་བྱེད་ཀྱི་ཡོད་པ་རེད།ཁ་ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་ཕྱག་བསྟར་བརྒྱུད་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དང་འབྲེལ། དེ་སྔ་ཁྲིམས་དེ་ཨ་རིའི་གྲོས་ཚོགས་སུ་ཆེད་འདོན་གནང་མཁན་ཁོངས་སུ་ཡོད་པ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ནས་དགའ་བསུ་དང་བོད་ནང་གཞི་རྩའི་འགྲོ་བ་མིའི་ཐོབ་ཐང་རྡོལ་རོལ་གཏང་མཁན་རྒྱ་ནག་གི་དཔན་རིགས་ཚོ་ཨ་རི་ནང་རང་དབང་ལོངས་སུ་སྤྱོད་རྒྱུའི་ཐོབ་ཐང་ཡོད་མ་རེད་ཅེས་ནན་བརྗོད་གནང་བ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་ཁ་སང་རྒྱ་གར་གྱི་ Republic གསར་ཁང་གི་བཅར་འདྲི་ཐོག་ཨ་རིས་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དེ་ནི་དགའ་བསུ་ཞུ་འོས་པ་དང་རྒྱལ་སྤྱིར་བསྒྲགས་ཆོག་པའི་བརྡ་ལན་ཞིག་ཀྱང་རེད་ཅེས་གསུངས་འདུགསྲིད་སྐྱོང་མཆོག་ནས་ད་དུང་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་རྒྱལ་སྤྱིའི་མང་ཚོགས་ནས་བློ་འཚབ་ཀྱིས་དོ་སྣང་ཆེན་པོ་གནང་བཞིན་ཡོད་པ་མ་ཟད། ཉེ་ཆར་ཡོ་རོན་མཐུན་ཚོགས་དང་རྒྱ་ནག་དབར་གྱི་ཆེ་མཐོའི་ལྷན་ཚོགས་ཐོག་བོད་དོན་གླེང་བ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་ལས་པ་ ༥༠ ཐུན་མོང་གིས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ལ་ཞིབ་འཇུག་ཆེད་ཕེབས་འདོད་ཡོད་པའི་བསྒྲགས་གཏམ་ཞིག་སྤེལ་ཡོད་པ་སོགས་གསུངས་ཡོད། དེ་བཞིན་རྒྱ་དཀར་ནག་གཉིས་ཀྱི་གནད་དོན་དང་འབྲེལ་ལོ་རྒྱུས་ཐོག་རྒྱ་གར་དང་རྒྱ་ནག་དབར་གྱི་ས་མཚམས་ཞེས་པ་ཞིག་མེད་པ་དང་། བོད་དང་རྒྱ་གར་གཉིས་དབར་ས་མཚམས་ཞེས་པ་ཞིག་ཡོད་སྟབས། གསར་ཁང་ཁག་གིས་གཙོས་པའི་ཉམས་ཞིབ་པ་རྣམས་ནས་རྒྱ་དཀར་ནག་མིན་པར་བོད་དང་རྒྱ་གར་གྱི་ས་མཚམས་ཞེས་བེད་སྤྱོད་གནང་དགོས་པ་དང་། བོད་མི་རྣམས་དུས་རྟག་ཏུ་རྒྱ་གར་དང་ལྷན་དུ་ཡོད་ཅེས་གསུངས་འདུགགཞི་རྩའི་ད་ལྟའི་ཆ་ས་མཚམས་དང་ཚོང་འབྲེལ། དེ་བཞིན་ཏོག་དབྱིབས་རིམས་ནད་དང་འགྲོ་བ་མིའི་ཐོབ་ཐང་སོགས་གནད་དོན་དུ་མ་ཞིག་གི་ཐད་ནས་རྒྱ་ནག་ལ་གནོན་ཤུགས་ཆེན་པོ་སྤྲོད་བཞིན་པ་མ་ཟད། ལྷག་པར་དུ་ཨ་རིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་དུ་འཛུགས་གནང་མུས་ཀྱི་དུས་སྐབས་འདིར་དབྱིན་ཡུལ་གྲོས་ཚོགས་འཐུས་མི་སྐུ་ཞབས Tim Loughton ལགས་ཀྱིས་དབྱིན་ཡུལ་གྲོས་ཚོགས་ནང་འགྲོ་བ་མིའི་ཐོབ་ཐང་རྡོག་རོལ་གཏང་མཁན་རྒྱ་ནག་གི་དཔོན་རིགས་རྣམས་དབྱིན་ཡུལ་ནང་ཡོང་རྒྱུར་བཀག་སྡོམ་གནང་དགོས་པའི་གླེང་སློང་དང་། དབྱིན་ཡུལ་སྲིད་གཞུང་གིས་ཀྱང་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་དགོས་པའི་གཞེན་སྐུལ་གནང་ཡོད།

རིང་སྔ་དྲ་ཕྱག་ཚོད་བཅུ་དང་ཕྱེད་ཀའི་ཐོག    ཐེ་ཝན་གྱི་རྒྱལ་ས་ཐེ་པཱེ་རུ་རྟེན་གཞི་བྱས་པའི་ཐེ་ཝན་གྱི་གྲོས་ཚོགས་ཁང་གི་དབུས་སུ།  ཐེ་ཝན་ནང་གི་སྐབས་བཅུ་བའི་གྲོས་ཚོགས་ཀྱི་འཐུས་མི་གསར་འདེམས་བྱུང་བ་དང་འབྲེལ་ནས། གྲོས་ཚོགས་འཐུས་མི་༤༦ ལྷག་གི་རྒྱབ་སྐྱོར་གྱི་འོག    བོད་དོན་རྒྱབ་སྐྱོར་གྱི་ཚོགས་པ་གསར་བ་ཞིག་བསྐྱར་དུ་བཙུགས་འདུགདེ་རིང་གི་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་འདུའི་སྐབས་སུ། གྲོས་ཚོགས་འཐུས་མི་༤༦ གི་དབུ་བཞུགས་ཀྱི་ཐོག   ཐེ་ཝན་དོན་གཅོད་པ་ཟླ་བ་ཚེ་རིང་ལགས་དང་དོན་གཅོད་ཁང་གི་ལས་བྱེད། དེ་བཞིན བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་བཀྲ་ཤིས་ཚེ་རིང་ལགས་བཅས་ཀྱིས་མཉམ་ཞུགས་གནང་བའི་ཐོག   གྲོས་ཚོགས་ཀྱི་འཐུས་མི་བརྒྱད་ཀྱིས་ཆ་ཤས་བླངས་ནས་བོད་དོན་དང་འབྲེལ་བའི་གཏམ་བཤད་གནང་འདུག     སྐབས་དེར་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་གཙོ་སྐུ་ཞབས་Freddy Lim གྱིས་རྒྱ་ནག་དམར་ཤོག་སྲིད་གཞུང་གིས་བོད་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་མ་ཟད། བོད་ཀྱི་སྐད་ཡིག་རིག་གཞུང་དང་བཅས་ལ་ཡང་རྩ་གཏོར་གཏོང་གི་ཡོད་པ་ཡོངས་གྲགས་གནང་བ་དང་སྦྲགས། ༸གོང་ས་སྐྱབས་མགོན་རིན་པོ་མཆོག་ག་དུས་ཐེ་ཝན་དུ་ཕེབས་པ་ཡིན་ན་ཡང་ཐེ་ཝན་སྲིད་གཞུང་གིས་དགའ་བསུ་ཞུ་རྒྱུ་ཡིན་པའི་གཏམ་བཤད་གནང་འདུགདེ་རིང་གི་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་འདུ་དང་འབྲེལ་ནས། འདི་གའི་གསར་འགོད་པས་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་བཀྲ་ཤིས་ཚེ་རིང་ལགས་སུ་ཞལ་པར་བརྒྱུད་ནས་བཀའ་འདྲི་ཞུས་པར།  ཁོང་གིས་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་པ་དེ་ནི་དེབ་སྐྱེལ་བྱས་ཡོད་པའི་ཚོགས་པ་ཞིག་ཆགས་ཀྱི་ཡོད་པ་དང་། གྲོས་ཚོགས་ཀྱི་འོས་བསྡུ་དང་འབྲེལ་ནས་འཐུས་མི་གསར་བ་མང་པོ་ཞིག་བྱུང་ཡོད་སྟབས་དེ་རིང་སླར་ཡང་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་པ་དེ་བསྐྱར་དུ་བཙུགས་པ་ཞིག་ཡིན་སྐོར་ངོ་སྤྲོད་ཀྱིས། ཚོགས་འདུའི་ཐོག་རྒྱ་གཞུང་གིས་བོད་ཀྱི་ཆོས་རིག་ལ་གཏོར་བཅོམ་གཏོག་གི་ཡོད་པའི་ཐད་ནས་གཏམ་བཤན་གནང་མཁན་མང་པོ་བྱུང་ཡོད་པར་གསུངས་སོང་།དེ་བཞིན་ཁོང་གིས་གསར་འགོད་པ་རྣམས་ཀྱིས་སྐྱབས་མགོན་རིན་པོ་ཆེ་ཐེ་ཝན་ལ་ཆིབས་བསྒྱུར་གནང་ཐུབ་མིན་གྱི་སྐོར་ནས་བཀའ་འདྲི་གནང་སྐབས། གྲོས་ཚོགས་ཀྱི་འཐུས་མི་རྣམས་ཀྱིས་༸གོང་ས་མཆོག་ག་དུས་ཕེབས་ཀྱང་དགའ་བསུ་ཞུ་རྒྱུ་ཡིན་པར་གསུངས་བ་དང་འབྲེལ།  ཐེ་ཝན་དོན་གཅོད་ཟླ་བ་ཚེ་རིང་ལགས་ཀྱིས་ཀྱང་སྐུ་མདུན་ཀྱི་དགུང་ལོའི་བབ་དང་བསྟུན་ནས་ས་ཐག་རིང་པོར་འགྲུལ་བཞུད་བྱེད་རྒྱུ་ཁག་པོ་ཡིན་ནའང་། མ་འོངས་བར་མགོན་པོ་གང་ཉིད་ཐེ་ཝན་དུ་ཆིབས་བསྒྱུར་བསྐྱང་ཐུབ་པའི་རེ་བ་ཡོད་སྐོར་ངོ་སྤྲོད་གནང་ཡོད་ལུགས་གསུངས་སོང་། གཞན་ཡང་ཁོང་གིས་དེ་རིང་གི་བོད་དོན་རྒྱབ་སྐྱོར་གྱི་ཚོགས་འདུའི་གོ་སྐབས་དང་སྟབས་བསྟུན་གྱིས།  བཙན་བྱོལ་ནང་གི་རྒྱ་སྐད་རྒྱ་ཡིག་ཤེས་མཁན་གྱི་མི་རབས་གཉིས་བ་རྣམས་རྫོགས་འགྲོ་བཞིན་ཡོད་པར་བརྟེན། གྲོས་ཚོགས་འཐུས་མི་རྣམས་ཀྱི་རྒྱབ་སྐྱོར་གྱི་འོག་ནས་མ་འོངས་བར་བོད་རིགས་སློབ་མ་རྣམས་ལ་རྒྱ་སྐད་རྒྱ་ཡིག་སློབ་སྦྱོང་གི་སློབ་ཡོན་འབུལ་རྒྱུའི་རེ་སྐུལ་གནང་ཡོད་པར་གསུངས་སོང་།

ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ཉིན་མོར་བོད་མིའི་སྒྲིག་འཛུགས་དབུས་བཙན་བྱོལ་བོད་མིའི་ཚོགས་སྒེར་ཚོས་ལྷ་བསངས་དང་མ་ཎི་གསོག་སྒྲུབ། དེ་བཞིན་རྐང་བྲོ་གླུ་གཞས་བཅས་ཀྱི་དཔལ་ལ་རོལ་བཞིན་དགའ་དད་སྤྲོ་གསུམ་གྱི་ངང་ནས་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་འདུགདེང་སྐབས་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་མང་ཚོགས་ཕོན་ཆེན་འདུ་འཛོམས་ཀྱིས་མཛད་སྒོ་རིགས་གཉེར་མི་ཆོག་པ་ལྟར། ཁ་སང་སྔ་དྲོ་བོད་མིའི་སྒྲིག་འཛུག་ཀྱི་ཚོགས་ཁང་གསར་པར་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཁོ་ན་ལྷན་འཛོམས་ཐོག་བོད་གཞུང་ཟློས་གར་ཚོགས་པས་ཆོལ་གསུམ་ཐུན་མོང་མ་ཡིན་པའི་རྐང་བྲོ་གླུ་གཞས་ཁག་ཅིག་གཟིགས་འབུལ་དང་། དེ་བཞིན་བོད་ཀྱི་ཆོས་བརྒྱུད་ཁག་གི་བླ་ཆེན་དབུ་ཁྲིད་དང་སྐུ་ཚབ་བཅས་ནས་བརྙན་པར་བརྒྱུད་གསུང་འཕྲིན་བསྩལ་བ། རྒྱ་གར་དུ་ཡོད་པའི་ཨ་རིའི་གཞུང་ཚབ་མི་སྣས་གཙོས་པའི་རྒྱལ་ཁབ་འདྲ་མིན་གྱི་གནད་ཡོད་མི་སྣ་ལས་ཟུར་འདྲ་མིན་གྱིས་༸གོང་ས་མཆོག་ལ་དྲྭ་ཐོག་བརྒྱུད་འཚམས་འདྲི་ཞུས་པའི་བརྙན་པར་ཁག་གཟིགས་འབུལ་ཐོག་༸སྐུའི་འཁྲུངས་སྐར་ཉིན་མོ་དེ་སྲུང་བརྩི་གཟབ་རྒྱས་ཞུས་འདུགསྐབས་དེར་སྲིད་སྐྱོང་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་ཆེད་ཐུགས་འགན་བཞེས་པ་ནས་བཟུང་ད་ཆ་དགུང་གྲངས་ ༨༥ ལ་མ་ཕེབས་བར་དུ་བོད་གཞིས་བྱེས་གཉིས་ཀྱི་བོད་མི་ཡོངས་ལ་སོ་སོའི་ཕ་མ་ལྟ་བུའི་གཟིགས་སྐྱོང་གནང་བ་དང་སྒོས་སུ་འཛམ་བུ་གླིང་ཡོངས་ལ་ཞི་བདེ་དང་བྱམས་བརྩེ་གོང་འཕེལ་མཛད་ཁག་གི་མཛད་འཕྲིན་ཁག་དྲན་གསོ་དང་དེ་དག་ལ་འཛམ་གླིང་ཁྱོན་ཡོངས་ནས་བསྔགས་བརྗོད་དང་དགའ་བསུ་ཞུ་བཞིན་ཡོད་པ་དང་། འདི་ལོ་བོད་མིའི་སྒྲིག་འཛུགས་ཀྱིས་ལོ་འཁོར་མོ་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་མུས་ལྟར། བོད་མི་རྣམས་ནས་མགོན་པོ་མཆོག་གི་བཀའ་དྲིིན་མ་བརྗེད་པར་༸གོང་ས་མཆོག་གི་བཀའ་སློབ་ཁག་ཉམས་ལེན་གནང་དགོས་པ་དང་། མགོན་པོ་༸གང་ཉིད་མཆོག་གི་ཐུགས་བསྐྱེད་ཆེན་པོ་བཞི་པོ་དེ་དག་གང་ཡིན་དང་དགོས་དམིགས་སོགས་གོ་ལ་ཁྱོན་ལ་ཁྱབ་ཐུབ་པ་གནང་གནད་ཡིན་པར་སྐུལ་མ་གནང་ཡོད།དེ་རྗེས་སྲིད་སྐྱོང་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་གིས་༸སྐུ་ཚེ་ཧྲིལ་པོའི་མཛད་པ་འཕྲིན་ལས་རྣམས་དྲན་གསོ་དང་འབྲེལ་བོད་མི་སྤྱི་བོ་གནམ་བསྟན་ཡོངས་ནས་༸རྒྱལ་བའི་བཀའ་དྲིན་དྲན་པའི་ཐོག་ནས་༸གོང་ས་མཆོག་གི་བཀའ་དགོངས་བཞིན་ཕྱག་ལས་གནང་ཡིན་པ་དང་། ད་རེས་ཀྱི་གོ་སྐབས་འདི་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཛམ་གླིང་སྤྱིར་སྨན་པའི་རླབས་ཆེན་གྱི་དགོངས་གཞི་དེ་དག་བསྒྲུབ་ཐབས་སུ་ཁ་ཞེ་གཉིས་མེད་ཀྱིས་རྒྱབ་སྐྱོར་དང་། མཐུན་འགྱུར་གནང་མཁན་བཅས་དང་། བོད་དོན་ལ་རྒྱ་གར་དབུས་ས་གཉིས་ཀྱིས་གཙོས་པའི་རྒྱབ་སྐྱོར་གནང་མཁན་རྒྱལ་ཁབ་དང་། གྲོས་ཚོགས། ཚོགས་སྒེར་ཡོངས་ལ་བོད་མིའི་སྒྲིག་འཛུགས་ཀྱི་ངོས་ནས་ཐུགས་རྗེ་ཆེ་ཞུས་འདུགདེ་བཞིན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་༸སྐུའི་འཁྲུངས་སྐར་ཉིན་སྤྱི་འཐུས་ལྷན་ཚོགས་ཀྱི་གསུང་འཕྲིན་ལྗགས་ཀློག་གནང་བའི་ནང་༸གོང་ས་མཆོག་གི་མཛད་པ་འཕྲིན་ལས་རྣམས་ཞིབ་རྒྱས་སུ་ངོ་སྤྲོད་གནང་བ་དང་འབྲེལ། མགོན་པོ་མཆོག་གིས་ལམ་སྟོན་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་འོག་དེང་སྐབས་འཛམ་གླིང་རྒྱལ་ཁབ་མང་པོའི་སྲིད་གཞུང་གཙོས་སྤྱི་སྒེར་ཡོངས་ནས་བོད་དོན་ལ་རྒྱབ་སྐྱོར་གང་ལེགས་ཐོབ་བཞིན་པ་མ་ཟད། རྒྱ་ནག་ནང་གི་ཤེས་ཡོན་ཅན་གྱི་མི་སྣ་མང་པོས་ཀྱང་དགའ་མོས་གནང་སྟེ་རྒྱབ་སྐྱོར་ཐོབ་དང་ཐོབ་བཞིན་ཡོད་པ་སོགས་གསུངས་སོང་། མགོན་པོ་༸གང་ཉིད་མཆོག་གི་བསྩལ་བའི་གལ་ཆེའི་བཀའ་སློབ་རིམ་ཕེབས་ཁོངས་ནས་ཁག་གཉིས་ལུང་འདྲེན་གནང་བའི་ཐོག་མང་ཚོགས་ལ་གཞེན་སྐུལ་གནང་སོང་།ཁ་སང་༸སྐུའི་འཁྲུངས་སྐར་གྱི་མཛད་སྒོ་དང་བསྟུན་ཕྱི་དྲིལ་ལས་ཁུངས་ནས་༸རྒྱལ་བའི་བཀའ་དྲིན་རྗེས་དྲན་གྱི་ལས་གཞི་དང་འབྲེལ་ཕྱོགས་བསྒྲིགས་ཞུས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལུང་ཚིག་ Quotation གྲངས་ ༡༡༣ གྱི་དཔེ་དེབ་ཅིག་དབུ་འབྱེད་དང་། བོད་མིའི་སྒྲིག་འཛུགས་ཀྱི་སྲི་ཞུ་བ་ལས་བྱེད་ལས་རྒྱུན་ཞབས་ལོ་ ༢༥ ཧྲིལ་པོ་ལོན་པའི་ལས་བྱེད་རྒན་གྲས་གྲངས་ ༣ ལ་ལས་བྱེད་འདེམས་ལྷན་ནས་ལེགས་གསོའི་གཟེངས་རྟགས་ཕྱག་འཁྱེར་གནང་བ་དང་། ད་བཞིན་བོད་མིའི་སྒྲིག་འཛུགས་ཀྱི་སྲིད་ཞུའི་ལས་བྱེད་ཁོངས་དམིགས་གསལ་ཧུར་བརྩོན་དང་གཟེངས་སུ་ཐོན་པའི་ཕྱག་ལས་གནང་མཁན་ལས་བྱེད་གཉིས་ལ་གཟེངས་རྟགས་སོགས་གནང་ཡོད་པ་རེད།ཁ་སང་དང་ཁ་ཉིན་བཅས་ལ་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཀྱི་གནས་སྟངས་ལ་ལྟོས་མེད་འཛམ་གླིང་ཡུལ་གྲུ་གང་སར་ཡོད་པའི་བཙན་བྱོལ་བོད་མི་རྣམས་ནས་༸སྐུའི་འཁྲུངས་སྐར་ལ་དགའ་བསུའི་འཚམས་འདྲིའི་བརྙན་པར་འདོན་སྤེལ་དང་། ༸གོང་ས་མཆོག་ལ་དབྱངས་ཀྱི་བསྟོད་གླུ་ཕུལ་བ། དེ་བཞིན་རོལ་དབྱངས་འདུ་འཛོམས་ལ་སོགས་པའི་རྣམ་པ་འདྲ་མིན་བརྒྱུད་དེ་ཉིན་མོ་དེ་སྲུང་བརྩི་ཞུས་པ་མ་ཟད། སྤྱི་ཚོགས་རྒྱང་ཐག་དང་ཁ་རས་གྱོན་རྒྱུ་དང་ལག་པ་གཙང་ཉར་སོགས་ཡིད་ཟབ་གནང་ཐོག་བཙན་བྱོལ་བོད་མིའི་གནས་སྡོད་གང་སར་མངར་ཟས་བགོ་འགྲེམས་དང་། དབུལ་པོར་ཟས་སྦྱིན། ཤིང་སྣ་འདེབས་འཛུགས་ལ་སོགས་པའི་གནང་སྒོ་སྤེལ་ནས་༸སྐུའི་འཁྲུངས་སྐར་ཉིན་མོ་སྲུང་བརྩི་གཟབ་རྒྱས་ཞུས་ཡོད་པ་རེད། འབྲེལ་ཡོད་པར་ཁག་བོད་མིའི་སྒྲིག་འཛུགས།

རིང་མིན་ཟླ་བ་ ༧ ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་བརྒྱད་ཅུ་གྱ་ལྔར་བདག་གིར་བཞེས་ཀྱི་ཡོད་སྟབས་དེ་རིང་ཐེ་ཝན་ནང་མང་ཚོགས་ཀྱིས་དགའ་དད་སྤྲོ་གསུམ་སྒོ་གྱི་ནས་༸རྒྱལ་བའི་འཁྲུངས་སྐར་སྔ་སྣུར་གྱིས་སྲུང་བརྩི་ཞུས་སོང་།དེ་རིང་ཐེ་ཝན་གྱི་སྔ་དྲོ་ཕྱག་ཚོད་ ༡༠ ནས་ ༡༢ བར་དང་དེ་བཞིན་ཕྱག་ཚོད་ ༢ ནས ༣ པའི་བར་སྐུ་མགྲོན་གཙོ་བོ་ཐེ་ཝན་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་ Yumeinu གཙོས་པའི་གྲོས་ཚོགས་འཐུས་མི་དང་། ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས།  བོད་དོན་རྒྱབ་སྐྱོར་བ། དད་ལྡན་མང་ཚོགས་འཛོམས་པའི་ཐོག ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྔ་སྣུར་ངང་སྲུང་བརྩི་ཞུས་སོང་། སྐབས་དེར་ལྕམ་Yumeinu ལགས་ཀྱིས་རྒྱ་ནག་པེ་ཅིན་དུ་གནས་བཞུགས་བོད་པའི་རྩོམ་པ་པོ་ཚེ་རིང་འོད་ཟེར་ལགས་ཀྱི་བཟའ་ཟླ་སྐུ་ཞབས་ Wang Lixiong ལགས་ཀྱིས་བརྩམས་གནང་བའི་ཕྱག་དེབ་ཡང་སྲིད་ཅེས་པ་ཞིག་དབུ་འབྱེད་གནང་སོང་བ་མ་ཟད། བོད་ཀྱི་ལོ་རྒྱུས་དང་འབྲེལ་བའི་ཕྱག་དེབ་དང་།  ཐེ་ཝན་བོད་ཀྱི་སྐུ་ཚབ་དོན་ཁང་ཆེད་བཙུགས་གནང་ནས་ལོ་ངོ་ ༢༠ ཕྱིན་པའི་བརྙན་དེབ་སོགས་དཔེ་དེབ་ཁག་ཅིག་དབུ་འབྱེད་དང་།  དེ་བཞིན་ཚེ་རིང་འོད་ཟེར་ལགས་ཀྱིས་ཆེད་རྩོམ་གནང་བའི་སྙན་ངག་གྱེར་འདོན་གྱི་བརྙན་ཐུང་ཞིག་ཀྱང་གཟིགས་འབུལ་ཞུས་སོང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བརྙན་ལམ་བརྒྱུད་ཐེ་ཝན་དད་ལྡན་མང་ཚོགས་ཚོར་འདི་ལོར་༸གོང་ས་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུར་གཏན་འབེབས་བྱུང་བ་དང་སྦྲགས། མགོན་པོ་༸གང་ཉིད་མཆོག་ནི་བོད་མིི་རྣམས་ཀྱི་ཚེ་འདི་ཕྱི་གཉིས་ཀྱི་མགོན་སྐྱབས་དང་ཕ་མ་ལྟ་བུ་ཆགས་ཡོད་པས་མགོན་པོ་མཆོག་ལས་བཀའ་དྲིན་ཆེ་བ་མེད་སྟབས།  འདི་ལོ་༸གོང་ས་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་དེ་འོས་འཚམས་ཡིན་པར་བརྟེན་ཐེ་ཝན་མི་མང་གིས་དུས་རྟག་ཏུ་༸གོང་ས་མཆོག་ལ་དད་གུས་དང་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞེས་གསུངས་འདུགད་དུང་ཐེ་ཝན་གྱིས་ཡུལ་དེའི་ནང་ཏོག་དབྱིབས་གཉན་རིམས་ཤུགས་ཆེར་ཁྱབ་གདལ་མི་འགྲོ་བར་སྟངས་འཛིན་ཧ་ཅང་ལེགས་པོ་གནང་ཡོད་པར་བསྔགས་བརྗོད་དང་ཐེ་ཝན་ལྟ་བུར་རྒྱལ་ཚོགས་ཀྱི་འཕྲོད་བསྟེན་ལྷན་ཚོགས་ནང་ཞབས་སྟེགས་ངེས་པར་དུ་གནང་དགོས་སྐོར་གསུངས་ཡོད་པ་རེད།མཛད་སྒོའི་སྐུ་མགྲོན་གཙོ་བོ་རྣམས་ཀྱིས་གསུང་བཤད་གྲུབ་མཚམས་སུ་ཐེ་ཝན་བོད་ཀྱི་སྐུ་ཚབ་དོན་ཁང་གི་ནང་ཆོས་འཛིན་གྲྭའི་སློབ་མ་ཚོས་༸གོང་ས་མཆོག་༸སྐུ་ཚེ་ཁྲི་ལོ་བརྟན་པའི་བསྟོད་དབྱངས་དང་།  དེ་བཞིན་ཡུལ་དེའི་ནང་གནས་བཞུགས་བོད་མི་རྣམས་ཀྱིས་རྐང་བྲོ་གླུ་གཞས་གཟིགས་འབུལ་ཞུས་སོང་།གཞི་རྩའི་ལོ་ལྟར་ཕྱི་ཟླ་ ༧ ཚེས་ ༦ ཉིན་བཙན་བྱོལ་བོད་མིའི་ལྟེ་གནས་བཞུགས་སྒར་དྷརྨ་སཱ་ལཱ་གཙོས་འཛམ་གླིང་ས་ཕྱོགས་གང་སར་གནས་འཁོད་བོད་མི་དང་བོད་དོན་རྒྱབ་སྐྱོར་བ་ཡོངས་མཉམ་འཛོམས་ཐོག་དགའ་དད་སྤྲོ་གསུམ་གྱི་ངང་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུ་སྲོལ་ཡོད་ཀྱང་། ད་ལན་ཏོག་དབྱིབས་གཉན་རིམས་རྐྱེན་པས་མང་ཚོགས་འདུ་འཛོམས་སོགས་བྱེད་ཆོག་གི་མེད་སྟབས་༸དཔལ་ལྡན་དགའ་ལྡན་ཕོ་བྲང་གི་དྲྭ་གནས་ཐོག་༸སྐུའི་འཁྲུངས་སྐར་དང་འབྲེལ་གསལ་བསྒྲགས་ཤིག་སྤེལ་བར་བོད་འབངས་ཡོངས་ཀྱིས་སྤྱི་མཐུན་བསོད་ནམས་གསོག་ཆེད་༸སྐུའི་འཁྲུངས་སྐར་དུས་ཆེན་ཉིན་མ་ཎི་ཡིག་དྲུག་སྟོང་ཚར་རེ་ལས་མ་ཉུང་བ་གསོག་གནང་ཡོང་བའི་གཞེན་སྐུལ་གནང་བ་ལྟར། ད་རེས་ཐེ་ཝན་དུའང་མཛད་སྒོ་གྲུབ་རྗེས་མང་ཚོགས་ཀྱིས་༸གོང་ས་མཆོག་༸སྐུ་ཚེ་བསྐལ་བརྒྱར་བརྟན་ཕྱིར་ཉིན་གུང་མ་ཎི་གསོག་སྒྲུབ་གནང་འདུགདེ་བཞིན་དེ་རིང་ New Zealand གྱི་ Aukland གྲོང་ཁྱེར་ནང་ས་གནས་བོད་རིགས་མཐུན་ཚོགས་དང་ནིའུ་ཛི་ལེནཌ་བོད་ཀྱི་གྲོགས་པོ་ཚོགས་པ་གཉིས་ཀྱི་གོ་སྒྲིག་འོག་ཁུལ་དེར་ཡོད་པའི་བོད་མི་དང་། རྒྱ་བོད་མཐུན་ཚོགས་ཀྱི་ཚོགས་མི། བོད་དོན་རྒྱབ་སྐྱོར་བ་འཛོམས་པའི་ཐོག་རྐང་བྲོ་གླུ་གཞས་སོགས་གཟིགས་འབུལ་དང་༸སྐུའི་འཁྲུངས་སྐར་གྱི་མངར་ཟས་བགོ་འགྲེམས་གནང་སྟེ་༸གོང་ས་མཆོག་གི་༸སྐུའི་འཁྲུངས་སྐར་སྔ་སྣུར་གྱིས་སྲུང་བརྩི་ཞུས་འདུག

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་དེ་རིང་ཉིན་རྒྱབ་གསར་འགོད་གསལ་བསྒྲགས་སྤེལ་བར་འདས་པའི་གཟའ་འཁོར་འདི་ནང་རྒྱ་བལ་གཉིས་ནང་གི་བཙན་བྱོལ་བོད་མིའི་སྤྱི་ཚོགས་ཁྲོད་བོད་མི་བཅིུག་ལ་ Covid-19 གཉན་རིམས་ཕོག་ཡོད་པ་ཡོངས་གྲགས་གནང་སོང་།བདེ་ལེགས་སྨན་ཁང་གི་ཕྱི་ལུགས་སྨན་པ་བསྟན་འཛིན་བརྩོད་འགྲུས་ལགས་དང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་ཚེ་རིང་མཚམས་གཅོད་ལགས་གཉིས་དབུ་བཞུགས་ཐོག་གསར་འགོད་གསལ་བསྒྲགས་གནང་བར་སྨན་པ་ཚེ་རིང་མཚམས་གཅོད་ལགས་ཀྱིས་ད་ལྟའི་ཆར་རྒྱ་བལ་གཉིས་ནང་གི་བོད་མིའི་སྤྱི་ཚོགས་གནས་སྟངས་སྐོར་འགྲེལ་བརྗོད་གནང་སྐབས་འདས་པའི་གཟའ་འཁོར་འདི་ནང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་ཁོ་ན་ནས་རང་ལོ་ ༡༢ ནས་ ༨༣ བར་གྱི་བོད་མི་ཁྱོན་ ༨ ལ་ནད་རྟགས་ཐོན་པ་དང་དེ་བཞིན་སྦེལ་ཀོབ་ནས་རང་ལོ་ ༤༡ ཅན་གྱི་སྐྱེས་པ་ཞིག་དང་། རྒྱལ་ས་ལྡི་ལི་ནས་བེུད་རང་ལོ་ ༢༤ དང་ ༣༤ ཡིན་པ་གཉིས་བཅས་ལ་གཉན་རིམས་ཕོག་པ་ཤེས་རྟོགས་བྱུང་སྐོར་གསུངས་སོང་། ད་ལྟའི་ཆར་མོན་གྷོ་འདོད་རྒུ་གླིང་གི་བོད་མི་བརྒྱད་པོ་དེ་དག་དང་སྦེལ་ཀོབ་ཀྱི་བོད་མི་གཅིག་པོ་དེ་རྣམས་རྫོང་གི་ཏོག་དབྱིབས་སྨན་ཁང་དུ་ཟུར་འཇོག་གནང་མུས་ཡིན་པ་དང་། ལྡི་ལི་ནང་གི་བེུད་གཉིས་པོ་དེ་རང་ཁྱིམ་དུ་ཟུར་འཇོག་གནང་བཞིན་པ་དེ་ལྟར་ཡང་། ཁོང་རྣམ་པར་གཉན་རིམས་ཀྱི་ནད་རྟགས་ཐོན་པ་མ་གཏོགས་དེ་མིན་ཛད་དྲག་གི་གནས་སྟངས་གང་ཡང་མེད་པར་འགྲེལ་བརྗོད་གནང་ཡོད། སྤྱིར་ད་བར་རྒྱ་གར་དང་བལ་ཡུལ་ནང་གི་བཙན་བྱོལ་བོད་མིའི་ཁྲོད་ཏོག་དབྱིབས་གཉན་རིམས་ཕོག་མཁན་ཁྱོན་ ༥༣ བྱུང་བའི་ཁོངས་ནས་གཉིས་འདས་གྲོངས་སུ་གྱུར་ཡོད་པ་དང་། བོད་མི་ ༢༥ དྲག་སྐྱེད་བྱུང་བ། དེ་བཞིན་གཉན་རིམས་ཀྱིས་མནར་བཞིན་པ་ ༢༦ ཡོད་པ་རེད། དེ་རིང་གི་གསར་འགོད་ལྷན་ཚོགས་ཐོག་བཙན་བྱོལ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སེམས་ཁམས་འཕྲོད་བསྟེན་ཚན་པ་དང་གྲངས་ཐོ་ཚན་པའི་ལས་བྱེད་ནས་ནད་པར་དངོས་སུ་དཀའ་ངལ་གང་འཕྲད་བཞིན་པ་དང་དེ་དག་ལ་གདོང་ལེན་གནང་ཕྱོགས་ཐད་ལམ་སྟོན་གནང་ཡོད་པ་མ་ཟད། སྨན་པ་གཉིས་ཀྱིས་བོད་མི་རྣམས་ལ་གཉན་རིམས་ཁྱབ་གདལ་ཁྲོད་མུ་མཐུད་ཡིད་གཟབ་གནང་དགོས་པ་དང་སྤྱིར་ད་ཆར་ས་གནས་སོ་སོར་ཕྱིར་ཕེབས་གནང་བའི་བོད་མི་རྣམས་ལ་ཉུང་མཐར་ཉིན་ ༡༤ རིང་འགོག་དབྱེ་ཟུར་འཇོག་གནང་བཞིན་པ་དེ་ལྟར་ཡང་། རབ་བྱུང་ན་ལྷག་འཁྲོལ་ཉིན་ ༡༤ དེའི་རིང་རང་ཁྱིམ་དུ་བཞུགས་ཏེ་ཁྱོན་ཉིན་ ༢༨ རིང་ཟུར་བཞུགས་གནང་གནད་ཡིན་པའི་འབོད་སྐུལ་གནང་ཡོད།

དེང་སྐབས་འཛམ་གླིང་ཁྱོན་དུ་ཏོག་དབྱིབས་གཉན་རིམས་ཀྱི་དཀའ་ངལ་ཆེན་པོ་འཕྲད་བཞིན་པའི་དུས་སྐབས་སུ་བོད་མི་ཚོགས་སྒེར་ཁག་ནས་རང་རེའི་གནས་ཡུལ་རྒྱལ་ཁབ་ཀྱི་གཞུང་མང་ལ་གདུང་སེམས་མཉམ་བསྐྱེད་མཚོན་ཆེད་དུ་རོགས་དངུལ་ཞལ་འདེབས་དང་ཟས་གོས་སྦྱིན་གཏོང་སོགས་ཀྱི་ལས་འགུལ་སྣ་མང་སྤེལ་བཞིན་ཡོད་པ་ལྟར། ཁེ་ན་ཌའི་བོད་རིགས་སྤྱི་མཐུན་ཚོགས་པ་ཁག་གིས་ངལ་སེལ་ཆེད་ཞལ་འདེབས་བསྡུ་རུབ་གནང་ནས་ཨ་སྒོར་ལྔ་སྟོང་བརྒྱད་བརྒྱ་ལྷག་ཁུལ་དེར་རྟེན་གཞི་བྱས་པའི་ Canadian Alliance to End Homelessness ཞེས་ཁེ་ན་ཌའི་ནང་དུ་སྡོད་ཁྱིམ་ཀྱི་ངལ་བ་སེལ་ཐབས་ཀྱི་གཞུང་འབྲེལ་མ་ཡིན་པའི་ཚོགས་པར་གནང་འདུགསྐབས་དེར་བྱང་ཨ་རིའི་བོད་ཀྱི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཚོགས་པ་དེའི་ཚོགས་གཙོ་སྐུ་ཞབས་ Tim Ritcher ལགས་སུ་ཞལ་འདེབས་ཕྱག་བྲིས་ཤིག་ཕུལ་བར་ཁེ་ན་ཌའི་གཞུང་གིས་ཕྱི་ལོ་ ༢༠༡༣ ལོར་བཙན་བྱོལ་བོད་མི་མང་དག་ཅིག་ཡུལ་དེའི་ནང་གཞིས་སྤོས་གནང་ཆོགཔའི་དམིགས་བསལ་བཀའ་འཁྲོལ་གནང་བ་ནས་བཟུང་ད་བར་བོད་མིའི་ཁྱིམ་ཚང་མང་དག་ཅིག་ཁེ་ན་ཌའི་མི་སེར་ཆགས་ཡོད་པ་དང་། ད་ཆ་ཏོག་དབྱིབས་གཉན་རིམས་རྐྱེན་པས་ཁེ་ན་ཌའི་མི་མང་ཁག་ཅིག་ལ་བཞུགས་གནས་སོགས་མེད་པའི་དཀའ་ངལ་ཆེན་པོ་འཕྲད་བཞིན་པའི་སྐབས་འདིར་བོད་མི་ཚོས་གདུང་སེམས་མཉམ་བསྐྱེད་དང་ལྷག་དོན་ཁེ་ན་ཌའི་གཞུང་མང་ནས་བོད་མི་ཚོར་ད་བར་རྒྱབ་སྐྱོར་དང་མཐུན་འགྱུར་གང་ལེགས་གནང་བར་བཀའ་དྲིན་བསམ་ཤེས་མཚོན་ཆེད་ཞལ་འདེབས་དེ་ལྟར་ཕུལ་སྐོར་ཆེད་བཀོད་གནང་འདུགཐེངས་འདིའི་ཞལ་འདེབས་ཁོངས་སུ་ཁེ་ན་ཌའི་ Vancouver གྲོང་ཁྱེར་ནང་རྟེན་གཞི་བྱས་པའི་སྦི་སི་བོད་ཀྱི་རིག་གཞུང་ཚོགས་པ་ནས་ཁེ་ན་ཌའི་སྒོར་ ༦༠༠༠ ཐམ་པ་དང་། ཨོན་ཊ་རོ་བོད་རིགས་སྤྱི་མཐུན་ཚོགས་པ་ནས་སྒོར་ ༡༠༠༠ ཐམ་པ། དེ་བཞིན་ Alberta བོད་རིགས་མཐུན་ཚོགས་ནས་སྒོར་ ༡༠༠༠ ཐམ་པ་བཅས་ཁྱོན་བསྡོམས་ཨ་སྒོར་ ༥༨༧༨ ལྷག་ཕུལ་ཡོད་པ་རེད།རྩ་བའི་ཁེ་ན་ཌའི་བོད་རིགས་སྤྱི་མཐུན་ཚོགས་པ་ཁག་གིས་ད་རེས་ཡུལ་དེའི་གཞུང་འབྲེལ་མིན་པའི་ཚོགས་པར་ཨ་སྒོར་ལྔ་སྟོང་བརྒྱད་བརྒྱ་ལྷག་གི་ཞལ་འདེབས་ཕུལ་བ་དེ་ནི་བོད་མིའི་སྒྲིག་འཛུགས་བཀའ་ཤག་གི་ལམ་སྟོན་འོག་འཛམ་གླིང་ས་ཕྱོགས་གང་སར་གནས་པའི་བོད་མི་རྣམས་ནས་དང་བླངས་ཐོག་གནས་ཡུལ་ས་གནས་སོ་སོའི་གཞུང་ལ་ཏོག་དབྱིབས་གཉན་རིམས་ལ་གདོང་ལེན་གནང་བཞིན་པར་རྒྱབ་སྐྱོར་དང་གདུང་སེམས་མཉམ་བསྐྱེད་མཚོན་ཕྱིར་ཞལ་འདེབས་རྒྱ་གང་ཆེ་གནང་དགོས་པའི་གཞེན་སྐུལ་གནང་ཡོད་པ་རེད།  

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ནས་རྒྱ་ནག་གཞུང་གིས་བོད་དང་ཧོང། དེ་བཞིན་ཤར་ཏུར་ཀི་སི་ཐན་བཅས་ནང་མང་ཚོགས་ཐོག་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ལ་བློ་འཚབ་ཀྱི་རྣམ་པ་ཆེས་ཆེར་ཆེད་འདོན་དང་འབྲེལ། རྒྱལ་ཚོགས་ཀྱི་ངོས་ནས་རྒྱ་ནག་ཐོག་ཕྱོགས་ལྷུང་མེད་པའི་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་དགོས་ཞེས་གསུངས་འདུགསུད་སི་ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༤ པ་འཚོགས་ལ་ཉེ་བ་དང་བསྟུན་ཟླ་བ་འདིའི་ཕྱི་ཚེས་ ༢༦ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ཡི་ཁེ་ལས་རྟོག་ཞིབ་མི་སྣ་ ༥༠ མན་མཉམ་འཐུས་ཀྱིས་རྒྱ་ནག་ཐོག་དམིགས་བསལ་སྤྱིར་བསྒྲགས་སྤེལ་འདུག་པ་དང། སྤྱིར་བསྒྲགས་ཐོག་དམིགས་བསལ་ཁེ་ལས་རྟོག་ཞིབ་མི་སྣ་རྣམས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་ཚོགས་མི་རྒྱལ་ཁབ་ཁག་ལ་རྒྱ་ནག་གཞུང་གི་མངའ་འོག་ཏུ་ཡོད་པའི་བོད་རང་སྐྱོང་ལྗོངས་མངའ་ཁུལ་དང་ཤར་ཏུར་ཀི་སི་ཐན་རང་སྐྱོང་ལྗོངས་མངའ་ཁུལ། དེ་བཞིན་ཧོང་ཀོང་བཅས་ཀྱི་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་ཆེད་དུ་དགོས་འདུན་དོན་ཚན་གསུམ་ཅན་ཞིག་ཆེད་འདོན་གནང་འདུག དགོས་འདུན་དོན་ཚན་གསུམ་ཅན་དེའི་ནང་རྒྱ་གཞུང་གིས་གོང་གསལ་ས་ཁུལ་དེ་དག་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་རྡོག་རོལ་གཏོང་བཞིན་པའི་གནད་དོན་ཐོག་རྒྱལ་ཚོགས་ཀྱིས་བསྐྱར་ཞིབ་གནང་སྟེ་རྒྱ་ནག་རང་གི་ཐོག་དམིགས་བསལ་གྱི་ཚོགས་དུས་རྒྱལ་ཚོགས་ཀྱི་ངོས་ནས་བསྐོང་ཚོགས་གནང་དགོས་པ་དང། རྒྱལ་ཚོགས་ནས་རྒྱ་ནག་ཐོག་ཕྱོགས་ལྷུང་མེད་པའི་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་བྱེད་དགོས་པ། དམིགས་བསལ་ཁེ་ལས་རྟོག་ཞིབ་མི་སྣ་འམ་དམིགས་བསལ་ཁེ་ལས་རྟོག་ཞིབ་ཚོགས་ཆུང། དེ་བཞིན་དམིགས་བསལ་ཁེ་ལས་སྐུ་ཚབ་བཅས་ཀྱི་ཆེད་འཛུགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་སྤྱི་དང་རྒྱ་ནག་གིས་དབྱེ་བའི་བོད་རང་ལྗོངས་དང་ཤར་ཏུར་ཀི་སི་ཐན་མངའ་ཁུལ། དེ་བཞིན་ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཡོད་པའི་ས་ཁུལ་ཐོག་ལྟ་ཞིབ་དང་ཞིབ་འཇུག་གྱི་ལོ་འཁོར་སྙན་ཐོ་འདོན་སྤེལ་དགོས་པ། རྒྱལ་ཚོགས་ཀྱི་ཚོགས་མི་རྒྱལ་ཁབ་དང་འབྲེལ་ཡོད་ལས་ཁུངས་ཁག་གི་རྒྱ་ནག་དང་ལྷན་དུ་འབྲེལ་མོལ་བྱེད་པའི་སྐབས་རྒྱ་ནག་གི་ངོས་ནས་དེ་སྔ་འགྲོ་བ་མིའི་ཐོབ་ཐང་སྲུང་སྐྱོབ་ཞུ་རྒྱུར་ཁས་ལེན་གྱི་འབྲུ་དོན་ཁག་ལག་བསྟར་བྱེད་བཅུག་དགོས་ཞེས་འཁོད་འདུག སྤྱིར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་མི་སྣའི་སྡེ་ཚན་ཁག་ཤས་ཀྱིས་རྒྱུན་དུ་རྒྱ་ནག་གཞུང་ལ་འགྲོ་བ་མིའི་ཐོབ་ཐང་གནས་སྟངས་ཐོག་འདྲི་རྩད་དང་སེམས་འཚབ་དང་འབྲེལ་བའི་སྤྱིར་བསྒྲགས་རིགས་སྤེལ་གྱི་ཡོད་ཀྱང་། གནད་དོན་དབྱེ་ཞིབ་པ་ཚོས་ཐེངས་འདིའི་རྒྱལ་ཚོགས་ཀྱི་དམིགས་བསལ་ཁེ་ལས་དམིགས་བསལ་རྟོག་ཞིབ་སྡེ་ཚན་ཁག་ ༣༠ ནས་རྒྱ་ནག་ཐོག་མཉམ་འཐུས་ཀྱིས་སྤྱིར་བསྒྲགས་སྤེལ་ཏེ་དགོས་འདུན་བཏོན་པ་འདི་ནི་བྱུང་མྱོང་མེད་པའི་གནས་ཚུལ་ཞིག་ཆགས་ཡོད་པར་འགྲེལ་བརྗོད་གནང་བཞིན་འདུག དེ་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁེ་ལས་རྟོག་ཞིབ་པ་རྣམས་ནས་སྤེལ་བའི་སྤྱིར་བསྒྲགས་ནང་རྒྱ་ནག་གཞུང་གིས་བོད་དང་ཧོ་ཀོང་ཤར་ཏུར་ཀི་སི་ཐན་ནང་མང་ཚོགས་ཐོག་དྲག་གནོན་དང་ཆོས་དད་རང་དབང་རྡོག་རོལ། འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་རྣམས་འཛིན་བཟུང་བཀག་ཉར། དེ་བཞིན་རྒྱ་གཞུང་གིས་རྒྱ་ནག་ནས་ཐོན་པའི་ཏོག་དབྱིབས་གཉན་རིམས་ ༡༩ དང་འབྲེལ་དངོས་ཡོད་གནས་ཚུལ་ཕྱིར་གྱར་བྱེད་མཁན་གྱི་སྨན་པ་དང་གསར་འགོད་པའི་སྨྲ་བརྗོད་རང་དབང་རྡོག་རོལ་བཏང་བའི་གནད་དོན་ཁག་དང་རྒྱལ་ཚོགས་ཁེ་ལས་རྟོག་ཞིབ་མི་སྣས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐོག་ད་བར་འདྲི་རྩད་བྱས་པ་ཁག་ལ་ཁས་ལེན་བྱེད་ཀྱི་མེད་པ་སོགས་མངོན་གསལ་གྱིས་རྒྱ་གཞུང་གི་བྱ་སྤྱོད་ཁག་ཐེར་འདོན་གནང་འདུགལྷག་པར་དུ་རྒྱལ་ཚོགས་ཀྱི་དམིགས་བསལ་ཁེ་ལས་རྟོག་ཞིབ་སྡེ་ཚན་ཁག་ནས་རྒྱལ་ཚོགས་ལ་རྒྱ་ནག་སྤྱི་དང་སྒོས་རྒྱ་ནག་གི་མངའ་འོག་ཏུ་ཡོད་པའི་བོད་དང་ཧོང་ཀོང། དེ་བཞིན་ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་བསྐྱར་ཞིབ་གནང་རྒྱུའི་དུས་ལ་བབ་འདུག་ཅེས་བརྗོད་པ་མ་ཟད། རྒྱལ་ཚོགས་དང་རྒྱལ་སྤྱིའི་གཞུང་སྒེར་ཚོགས་སྡེ་ཁག་ནས་རྒྱ་ནག་གཞུང་གི་ངོས་ནས་ཁས་ལེན་བྱས་པའི་རྒྱལ་སྤྱིའིའགྲོ་བ་མིའི་ཐོབ་ཐང་སྲུང་སྐྱོབ་ཀྱི་འབྲུ་དོན་ཁག་དོན་འཁྱོལ་ལག་བསྟར་བྱེད་དགོས་ཞེས་ནན་བརྗོད་ཀྱང་གནང་འདུགཐེངས་འདིའི་རྒྱལ་ཚོགས་ཀྱི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ཡིས་རྒྱ་ནག་ཐོག་སྤེལ་བའི་བསྒྲགས་གཏམ་འདིར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱབ་སྐྱོར་དང་འབྲེལ་དགའ་བསུའི་བསྒྲགས་གཏམ་ཞིག་སྤེལ་དང་འབྲེལ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ངོས་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་བཏང་བའི་གནད་དོན་ཐོག་དམིགས་བསལ་ཚོགས་དུས་ཤིག་འཚོགས་དགོས་པའི་རེ་འདུན་གནང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁ་སང་ཕྱི་དྲོར་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་སྟེ་རིང་མིན་ཕྱི་ཟླ་ ༧ ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་དུས་ཆེན་ཉིན་མོར་རྣམ་ཀུན་ལྟར་མང་ཚོགས་ཕོན་ཆེན་འདུ་འཛོམས་གནང་ཆོག་གི་མེད་སྟབས་བོད་མིའི་སྒྲིག་འཛུགས་ཀྱི་དྲུང་ཆེ་ཡན་གྱི་མཛད་གཙོ་རྣམ་པ་ལྷན་ཞུགས་ཐོག་༸སྐུའི་ཁྲུངས་སྐར་སྲུང་བརྩི་ཞུ་རྒྱུ་ཡིན་པ་གསུངས་སོང་།བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་འདི་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོ་སྲུང་བརྩི་ཞུ་རྒྱུ་ཡིན་པར་ཡོངས་ཁྱབ་སོང་བ་ལྟར། མང་ཚོགས་རྣམས་ནས་༸གོང་ས་མཆོག་གི་ཐུགས་བསྐྱེད་དམ་བཅའ་བཞིས་གཙོས་པའི་རླབས་ཆེན་གྱི་མཛད་རྗེས་ཁག་མཁྱེན་པ་གནང་སྟེ་དོ་བདག་སོ་སོའི་ནང་མི་བུ་ཕྲུག་དང་ཉེ་འཁོར་མི་མང་རྣམས་ལ་སློབ་སྟོན་སོགས་གནང་དགོས་པའི་སྐུལ་མ་གནང་བ་དང་ཆབས་ཅིག བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ཟླ་ ༧ ཚེས་ ༡ ནས་ཕྱི་ལོ་ ༢༠༢༡ ཟླ་ ༦ ཚེས་ ༣༠ བར་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་ཡིན་པ་མཟད་ཕྱི་ཟླ་ ༧ ཚེས་ ༡ ཉིན་ནས་ཕྱི་དྲིལ་བོད་ཀྱི་བརྙན་འཕྲིན་ཚན་པས་བཟོ་སྐྲུན་གནང་བའི་བརྙན་ཐུང་ཁག་རེས་གཟའ་ལྷག་པ་སྟེ་ལྷག་དཀར་ནམ་ཡིན་ལ་བསྟན་འཆར་ཡོད་པ། བོད་མི་གནས་ཡུལ་གཞིས་ཆགས་དང་མང་ཚོགས་རྣམས་ནས་ཀྱང་ས་གནས་མངའ་སྡེ་དང་རྫོངས་ཁག་གི་ལམ་སྟོན་གཞི་རྩར་བཞག་ཐོག་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུ་གཙོས་མཛད་རིམ་ཁག་མུ་མཐུད་སྤེལ་རོགས་ཞེས་འབོད་སྐུལ་གནང་ཡོད། གཞི་རྩའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་རྐྱེན་གྱིས་མང་ཚོགས་ཕོན་ཆེན་འདུ་འཛོམས་ཐོག་མཛད་རིམ་སྤེལ་རྒྱུ་སོགས་ཁག་པོ་ཆགས་ཡོད་སྟབས་འདི་ལོར་ཟློས་གར་ཚོགས་པ་དབུ་བརྙེས་ནས་མི་ལོ་ ༦༡ འཁོར་བའི་དུས་དྲན་དང་བསྟུན་དབྱར་སྐྱིད་ཅེས་རྒྱ་ལུ་རུ་ཁག་དང་རྔོན་པ་རུ་ཁག་གཉིས་དབར་རྐང་བྲོ་གླུ་གཞས་འགྲན་བསྡུར་གནང་སྲོལ་ཡོད་པ་ལྟར། མངའ་སྡེ་གཞུང་གི་ལམ་སྟོན་གཞིར་བཟུང་བོད་མིའི་སྒྲིག་འཛུགས་ཀྱི་སྲི་ཞུ་དྲུང་ཆེ་ཡན་གྱི་མཛད་གཙོ་རྣམ་པ་སོགས་མི་གྲངས་ ༥༠ ཙམ་ལྷན་འཛོམས་ཐོག་བོད་ཀྱི་བརྙན་འཕྲིན་བརྒྱུད་ཕྱི་ཚེས་ ༡ ཉིན་གྱི་དགོང་དྲོ་ཆུ་ཚོད་ ༥ པའི་ཐོག་ཐད་བསྲིངས་གནང་རྒྱུ་ཡིན་པ་གསུངས་སོང་།དེ་བཞིན་གསར་འགོད་ལྷན་ཚོགས་ཐོག་བོད་མིའི་སྒྲིག་འཛུགས་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གི་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་བདུན་རེའི་ཏོག་དབྱིབས་རིམས་ནད་དང་འབྲེལ་བའི་གནས་ཚུལ་ཡོངས་ཁྱབ་གནང་སྐབས་འདས་པའི་བདུན་ཕྲག་དེའི་ནང་ཕྱི་རྒྱལ་ཡུལ་གྲུ་ཁག་ཏུ་བོད་པ་རིམས་ནད་ཕོག་མཁན་གྱི་གྲངས་ཐོ་གསར་པ་གང་ཡང་འབྱོར་མེད་ཀྱང་། རྒྱ་གར་དང་བལ་ཡུལ་གཉིས་སུ་འདས་པའི་བདུན་ཕྲག་གཅིག་གི་ནང་ཚུད་ལ་རིམས་ནད་ཕོག་པའི་བོད་པ་ ༡༤ བྱུང་ཡོད་པ་སོགས་གསུངས་ཡོད། ལྷག་པར་དུ་སྐབས་དེར་སྲིད་སྐྱོང་བློ་བཟང་སེང་གེ་མཆོག་དང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་་མཆོག་ནས་ད་ཆ་རྒྱ་གར་རྒྱལ་ཡོངས་ཐེམ་སྤང་གི་བཀའ་རྒྱ་གུ་ཡངས་དུ་བཏང་བ་ནས་བཟུང་རྒྱ་གར་སྤྱི་དང་རང་རེའི་སྤྱི་ཚོགས་ནང་ལ་ཏོགས་དབྱིབས་རིམ་ནད་ཕོག་མཁན་ཇེ་མང་དུ་འགྲོ་བཞིན་པའི་ཐད་ལ་མང་ཚོགས་དོ་བདག་སོ་སོའི་ངོས་ནས་རྒྱུན་དུ་ཡིད་གཟབ་དང་འགན་བཞེས་རྒྱུ་གལ་ཆེན་པོ་ཡིན་པ་དང་བོད་པའི་སྤྱི་ཚོགས་ཁྲོད་དུ་ཏོག་དབྱིབས་རིམས་ནད་ཕོག་པའི་ནད་པ་དང་ནད་པའི་ནང་མི་སྤུན་མཆེད་ཚོར་འཇིགས་སྣང་སྐུལ་བ་དང་ངལ་བ་སྤྲད་ཚེ་ཆོས་དང་འཇིགས་རྟེན་གཉིས་གང་གི་ཐོག་ནས་ཀྱང་འགྲིག་ཐབས་མེད་རེད་ཅེས་ནན་བརྗོད་གནང་ཡོད། གཞི་རྩའི་ད་ལྟའི་ཆ་ལ་བོད་མིའི་སྒྲིག་འཛུགས་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གྲངས་ཐོར་གཞིགས་ཚེ་རྒྱ་གར་དང་བལ་ཡུལ་གཉིས་སུ་ཏོག་དབྱིབས་རིམས་ནད་ཕོག་པའི་བོད་མི་ ༣༨ དང་། དེ་དག་ཁྲོད་ནས་ ༢ འདས་གྲོངས་སུ་ཕྱིན་པ། ༡༧ དྲག་སྐྱེད་ཟིན་པ། གཞན་ ༡༩ རིམས་ནད་ཕོག་ཡོད་ཀྱང་ཛ་དྲག་གི་གནས་སྟངས་གང་ཡང་མེད་པ་རེད་འདུག