༸གོང་ས་མཆོག

བོད་ཀྱི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཚེས་ ༡༧ ཉིན་གྱི་སྔ་ཐོག་ཚོུད་ ༡༡།༠༠ སྟེང་ལ་དྭགས་ཀྱི་རྒྱལ་ས་གླེར་རྟེན་གཞི་བྱས་པའི་ལ་དྭགས་ཆོས་མཛད་མའི་ཚོག ས་པའི་བཙུན་དགོན་ཐུབ་བསྟན་ཆོས་འཁོར་གླིང་དུ་ཆིབས་སྒྱུར་གྱིས་བཙུན་མ་རྣམས་ལ་བླང་དོར་བཀའ་སློབ་བཀྲིན་བསྩལ་ཡོད་པ་རེད། དེ་རིང་མགོན་པོ་མཆོག་བཙུན་དེར་ཆིབས་སྒྱུར་གསོལ་འདེབས་ཞུ་དགོས་དོན་ནི་ལ་དྭགས་ནང་གི་བཙུན་མའི་དཀའ་ངལ་ལ་གཟིགས་རྟོག་དང་དུས་བསྟུན་ཤེས་ཡོན་གྱི་གོ་སྐབས་སྐྲུན་གནང་མཁན་ལ་དྭགས་ཆོས་མཛད་མའི་ཚོགས་པ་དེས་ད་བར་༸གོང་ས་མཆོག་གི་བཀའ་དགོངས་ལྟར་སྤྱི་ཚོགས་ནང་ཞབས་ཏོག་ཇི་ཙམ་ཞུས་ཡོད་པ་དང་། ད་བར་ནང་པའི་གཞུང་དང་རིག་གནས་གཞན་གྱི་ཐོག་ལ་བཙུན་མ་བསླབ་པ་མཐར་སོན་ཇི་ཙམ་བྱུང་ཡོད་མེད་སོགས་ཀྱི་ལས་བསྡོམས་སྙན་གསེང་ཞུ་རྒྱུའི་སླད་ཡིན་འདུག སྐབས་དེར་ལ་དྭགས་ཆོས་མཛད་མའི་ཚོགས་པའི་སྤྱི་ཁྱབ་འགན་འཛིན་བཙུན་མ་བསྟན་འཛིན་དཔལ་མོ་ལགས་ཀྱིས་༸གོང་ས་མཆོག་དབུ་བཞུགས་གཙོས། དགའ་ལྡན་ཁྲི་རིན་པོ་ཆེ་མཆོག་དང་གཞན་ཡང་གཞུང་དང་གཞུང་འབྲེལ་མིན་པའི་སྐུ་མགྲོན་རྣམ་པར་དགའ་བསུའི་གསུང་བཤད་དང་ལས་བསྡོམས་སྤྱན་འབུལ་ཞུས་པའི་ནང་དགའ་ལྡན་ཁྲི་རིན་པོ་ཆེ་མཆོག་གིས་སྤྱི་ཁྱབ་སློབ་སྟོན་འོག་ཕྱི་ལོ་ ༡༩༩༦ ལོར་གསར་བཙུགས་གནང་པའི་ཚོགས་པ་དེས་ད་བར་གསོ་བ་རིག་པའི་ཐོག་བཙུན་མ་སློབ་མཐར་སོན་པ་ ༤  དང་། མཐོ་རིམ་རིག་གནས་སློབ་མཐར་སོན་པ་བཙུན་མ་ ༨ དང་། རྡ་ས་བཙུན་དགོན་འཇམ་དབྱངས་ཆོས་གླིང་ནས་ཕར་ཕྱིན་རབ་འབྱམས་པ་སློབ་མཐར་སོན་པ་བཙུན་མ་གཅིག་བཅས་བྱུང་ཡོད་པ་དེ་དག་གིས་ད་ཆ་བཙུན་དགོན་ཁག་དང་སྤྱི་ཚོགས་ནང་ལས་དོན་གཉེར་བཞིན་ཡོད་པ་མ་ཟད། ཁྱད་པར་དུ་ཆོས་མཛད་མ་ཚོགས་པ་དེ་ཐོག་མར་གསར་འཛུགས་སྐབས་བཙུན་དགོན་ ༨ ལས་མེད་ཀྱང་།  ད་ཆ་ས་དགེ་བཀའ་རྙིང་རིས་མེད་ཀྱི་བཙུན་དགོན་ ༢༦ ཡོད་པ་རེད་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཁྲི་རིན་པོ་མཆོག་གིས་གཟིགས་སྐྱོང་གནང་བཞིན་པའི་ཆོས་མཛད་མའི་ལས་དོན་སྤྱི་ལ་བསྔགས་བརྗོད་དང་སྦྲགས་༸གང་ཉིད་ཐུགས་དགྱེས་ཚོར་དང་བཅས་ཚང་མར་ཐུགས་རྗེ་ཆེ་ཞུས་པ་དང་། ལྷག་དོན་བཙུན་མ་རྣམས་ནས་ནང་པའི་གཞུང་དང་དེ་བཞིན་རིག་གནས་གཞན་གྱི་ཐོག་སློབ་གཉེར་གནང་ནས་ཕན་ཐོགས་ཆེན་པོ་བྱུང་ཡོད་པར་རྗེས་སུ་ཡི་རངས་ཡོད་ཅེས་བཀའ་གནང་སོང་། ད་དུང་ ༸གོང་ས་མཆོག་གིས་བར་ལམ་ཞིག་ནས་ལ་ལས་མཐོང་ཚུལ་ལ་ནང་པའི་གཞུང་ལ་སློབ་སྦྱོང་བྱེད་ཡག་དང་མཚན་ཉིད་སློབ་ཡག་དེ་ནི་དགེ་ལུགས་པའི་རེད་ཟེར་མཁན་དང་། དེ་བཞིན་ཡང་འགའ་ཞིག་གིས་མགོན་པོ་ཀླུ་སྒྲུབ་དགེ་ལུགས་པ་རེད་ཅེས་ཤོད་མཁན་ཡོད་པ་དེ་དག་ནི་མ་ཤེས་པ་དང་ལྐུག་རྟགས་བསྟན་པ་ཞིག་ཆགས་ཡོད་པ་བཀའ་གནང་སྟེ།  ས་དགེ་བཀའ་རྙིང་རིས་མེད་ཀྱི་བོད་བརྒྱུད་ནང་བསྟན་འདི་ནི་དཔལ་ནཱ་ལེནྜའི་ཆོས་བརྒྱུད་ལ་ཐུག་ཡོད་པ་རེད་ཅེས་བཀའ་སྩལ་ནན་པོ་གནང་ཡོད་པ་རེད། ཁྱད་པར་༸གོང་ས་མཆོག་གིས་སྐབས་དེར་རྙིང་དགོན་རྣམ་གྲོལ་གླིང་དགོན་གྱི་དགོན་བདག་པད་ནོར་རིན་པོ་ཆེ་མཆོག་གིས་དགོན་པར་མཚན་ཉིད་སློབ་རྒྱུའི་ཐད་ཐུགས་འཁུར་རྒྱ་ཆེ་བཞེས་ཡོད་པར་བསྔགས་བརྗོད་དང་འབྲེལ། བཙུན་མ་རྣམས་ནས་ནང་པའི་གཞུང་དང་མཚན་ཉིད་ལ་སློབ་གཉེར་གནང་སྐབས་སྤོམ་བཤད་ཙམ་མ་ཡིིན་པར་དགག་བཞག་སྤོང་གསུམ་གྱི་རྣམ་གཞག་ཡག་པོ་ཤེས་དགོས་གལ་ཡིན་པ་བཅས་ནང་པའི་གཞུང་ལུགས་དག་ལ་སློབ་གཉེར་གནང་ཕྱོགས་སྐོར་ལ་བཀའ་སློབ་གནང་སོང་། གཞན་ཡང་༸གོང་ས་མཆོག་གིས་རྒྱལ་ས་གླེ་ལ་ཡོད་པའི་ Islamia public school ཞེས་པའི་ཁ་ཆེའི་སློབ་གྲྭ་གཅིག་ཏུ་ཆིབས་སྒྱུར་བསྐྱངས་ཡོད་པ་དང་།  དེ་རྗེས་ཉིན་གུང་ཚོུད་ ༡།༠༠ ཐོག་ཁྲིག་རྩེ་ཉེ་འཁྲིས་ཆུ་ཤོད་གོང་མར་རྟེན་གཞི་བྱས་པའི་ཁ་ཆེའི་ལྷ་ཁང་ཞིག་ཏུའང་ཆིབས་སྒྱུར་བཀྲིན་བསྐྱངས་ཏེ་ཆོས་ལུགས་མཐུན་སྒྲིལ་གྱི་གལ་གནད་དང་ལ་དྭགས་ནང་གི་ཆོས་ལུགས་མཐུན་སྒྲིལ་གྱི་དཔེ་ལས་འཛམ་གླིང་མཐུན་སྒྲིལ་ཡོང་ཐུབ་རྒྱུ་ཡིན་པ་དང་། ལྷག་པར་མིའི་ལྷན་སྐྱེས་བྱམས་བརྩེ་ལྡན་པ་ཞིག་ཡིན་སྟབས་མི་རབས་གཞོན་པ་ཚོས་མ་འོངས་པར་འཛམ་གླིང་འདི་བྱམས་བརྩེ་ལྡན་པ་ཞིག་ཏུ་སྐྲུན་ཐུབ་རྒྱུའི་གོ་སྐབས་དང་རེ་བ་ཆ་ཚང་ཡོད་པ་སོགས་ལམ་སྟོན་རྒྱ་ཆེ་བསྩལ་ཡོད་པ་རེད།

ཁ་སང་ཟླ་ ༨ ཚེས་ ༡༤ ཉིན་ལ་དྭགས་རི་ལྗོངས་ཡར་རྒྱས་ཚོགས་པས་༸གོང་ས་མཆོག་ལ་ཇི་ལྟར་གསོལ་འདེབས་ཞུ་དོན་ལྟར་གུང་ཚིགས་གསོལ་སྟོན་འདེབས་འབུལ་ཞུས་པའི་མཛད་སྒོའི་སྟེང་མགོན་པོ་མཆོག་གིས་ལས་བྱེད་ཚོར་བླར་དོར་བཀའ་སློབ་སྩལ་གྲུབ་བསྟུན་མང་ཚོགས་ནས་༸གང་ཉིད་ལ་བཀའ་འདྲི་དགོངས་བསྐོར་ཞུས་ཡོད་པ་དང་།  སྐབས་དེར་མགོན་པོ་༸གང་ཉིད་མཆོག་གིས་ནད་པར་ཤི་སྨན་སྤྲད་རྒྱུའི་ཐད་དགོངས་པ་བཞེས་ཕྱོགས་དང་ནང་པའི་ལྟ་གྲུབ་ཐོག་སློབ་སྦྱོང་བྱེད་སྟངས་སྐོར་བཀའ་སློབ་གནང་ཡོད་པ་རེད། རྩ་བའི་ཁ་སང་༸གོང་ས་མཆོག་ལ་གུང་ཚིགས་གསོལ་སྟོན་འདེགས་འབུལ་ཞུས་པའི་མཛད་སྒོ་དེའི་ཐོག་༸གང་ཉིད་མཆོག་གིས་ད་ལྟ་བོད་དེ་དཀའ་ངལ་ཞིག་དང་གནས་སྟངས་ཉག་ཕྲ་བོ་ཞིག་གི་འོག་ཏུ་ལྷུང་ཡོད་པའི་དུས་ཚོད་འདིར། རྒྱལ་ཁབ་དང་རང་དབང་ཡོད་པའི་ལ་དྭགས་གཙོས་པའི་ཧི་མཱ་ལ་ཡའི་བརྒྱུད་ཀྱི་མང་ཚོགས་ནས་སྔར་ལྟར་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་མུ་མཐུད་གནང་གལ་ཡིན་པའི་ལམ་སྟོན་རྒྱ་ཆེ་བསྩལ་སོང་བ་དང་།   མང་ཚོགས་ནས་༸གོང་ས་མཆོག་ལ་བཀའ་འདྲི་ཞུས་པའི་ཁྲོད་ལ་དྭགས་པ་ན་ཆུང་ཞིག་གིས་ཁོ་མོ་དུས་རྒྱུན་དཔེ་ཆ་ལྟ་ཀློག་བྱེད་སྐབས་མིང་ཚིག་ཁག་གི་གོ་དོན་མི་ཤེས་པས་ཁག་པོ་ཡོད་སྟབས། ནང་ཆོས་ལ་སློབ་སྦྱོང་བྱེད་སྟངས་དང་འགོ་གང་ནས་འཛུགས་དགོས་ཀྱི་ཡོད་སྐོར་བཀའ་འདྲི་ཞུས་པར་༸གོང་ས་མཆོག་གིས་སློབ་ཚན་གང་འདྲ་ཞིག་ཡིན་རུང་དེ་དག་ལ་སློབ་གཉེར་གནང་སྟངས་གཅིག་མཚུངས་ཡིན་པ་རེད།  དཔེར་ན། མཐོ་རིམ་སློབ་ཚན་ཞིག་སྔོན་འགྲོ་འཛིན་གྲྭས་ཤེས་ཐུབ་ཀྱི་མེད་པ་ལྟར། དེ་དོན་འཛིན་གྲྭ་དང་པོ་དང་གཉིས་པ། དེ་ནས་གསུམ་སོགས་རིམ་པ་བཞིན་འགྲོ་དགོས་ལ་ལྟར།  ནང་པའི་མཁས་པ་རྣམས་ནས་ཀྱང་ཐོག་མར་བསྡུས་སྒྲ་ནས་འགོ་འཛུགས་ཏེ་རིམ་པས་ལོ་ནས་ལོ་བསྟུད་ནས་དཔེ་ཆ་གཟིགས་གནང་གི་ཡོད་སྟབས་སློབ་སྦྱོང་མ་བྱེད་པར་ནང་པའི་ལྟ་གྲུབ་ཁག་པོ་འདུག་ཟེར་ན་རྒྱུ་མཚན་མེད་པའི་སྐད་ཆ་རེད་ཅེས་བཀའ་གནང་ཡོད་པ་རེད། ད་དུང་སྐབས་དེར་༸གོང་ས་མཆོག་༸སྐུ་སྒེར་གྱི་ཉམས་མྱོང་སྐོར་བཀའ་གནང་སྟེ། ༸གང་ཉིད་མཆོག་དེ་སྔ་སྐུ་ན་ཕྲ་མོའི་དུས་སུ་རྩེད་མོ་རྩེད་གནང་རྒྱུ་ལས་ཕྱག་དཔེ་གཟིགས་རྒྱུར་དེ་ཙམ་ཐུགས་འདོད་མེད་པ་དང་། དགུང་ལོ་ ༧ ཕེབས་སྐབས་ཐོག་མར་སློབ་སྦྱོང་གནང་འགོ་ཚུགས་ཡོད། དེ་ནས་དགུང་ན་ ༡༡ ནས་ ༡༣ བར་ནང་ཆོས་ལ་ཐུགས་སྣང་དང་དབྱིངས་ཆེན་པོ་སླེབས་ཡོད་པ་མ་ཟད། ལྷག་དོན་༸གང་ཉིད་མཆོག་དགུང་ལོ་ ༡༦ ནས་ཉམས་ལེན་གྱི་ཕྱོགས་སུ་ཞུགས་འགོ་ཚུགས་ནས་ད་བར་མཁས་པ་དང་སྐྱེས་བུ་དམ་པ་མང་དག་བསྟེན་ནས་སློབ་སྦྱོང་རྒྱ་ཆེ་མཛད་ཡོད་སྐོར་བཀའ་སྩལ་གནང་ཡོད་པ་རེད། ཁྱད་པར་དུ་༸གོང་ས་མཆོག་གིས་རྟགས་གསལ་བཏང་ནས་རིགས་ལམ་སློབ་སྦྱོང་བྱེད་པ་ཡིན་ན། ཤེས་རབ་མྱུར་པོ་ཡོང་རྒྱུར་ཕན་ཐོགས་ཆེན་པོ་ཡོད་པ་བཀའ་གནང་པ་དང་སྦྲགས། བཙན་བྱོལ་ནང་གི་དེ་སྔ་དཔེ་ཆ་མ་གཟིགས་མཁན་དགོན་པ་གྲྭ་ཚང་ནས་འདས་པའི་ལོ་ ༢༠ ཙམ་ནས་དཔེ་ཆ་གཟིགས་འགོ་ཚུགས་ནས་མཚན་ཉིད་ཀྱི་སློབ་ཚན་ཡང་བསླབ་ཡོད་སྟབས། ད་ཆ་དེ་དག་ལ་ཕན་ཐོགས་ཆེན་པོ་བྱུང་བཞིན་ཡོད་པའང་བཀའ་གནང་སོང་བ་མ་ཟད། ༸གོང་ས་མཆོག་གིས་སྐབས་དེའི་བཀའ་ལན་ནས་འཕྲོས་ཏེ། ལ་དྭགས་ནང་གི་དགོན་པ་ཁ་ཤས་ད་དུང་ཡང་ཕུགས་རྒྱང་རིང་པོའི་བསམ་བློ་མ་འཁོར་ནས་དཔེ་ཆར་སློབ་སྦྱོང་དང་རིགས་ལམ་ལ་དོ་དབྱིངས་མེད་པ་དེས་ཡར་རྒྱས་ལ་འགོག་རྐྱེན་ཆགས་རྒྱུ་ཡིན་ཞིང་། ང་ཚོ་དུས་རབས་ཉེར་གཅིག་པ་འདིའི་ནང་ཚན་རིག་དང་མཐུན་པའི་ཤེས་ཡོན་ཡར་རྒྱས་འགྲོ་དང་འགྲོ་མུས་ཡིན་སྟབས། མ་འོངས་པར་ཁུངས་མ་འཁྱོལ་བའི་ཉེན་ཁ་གཟིགས་ཀྱི་ཡོད་པ་བཅས་ནང་ཆོས་ལ་སློབ་སྦྱོང་བྱ་རྒྱུ་ནི་ཤིན་ཏུ་ནས་གལ་འགངས་ཆེན་པོ་ཡིན་པ་བཀའ་ལན་ཟབ་མོ་བསྩལ་ཡོད། ཡང་སྐབས་དེར་ས་གནས་ཀྱི་སྨན་པ་པདྨ་ཞུ་མཁན་ཞིག་གིས་ནད་པར་ཤི་སྨན་སྤྲད་རྒྱུའི་ཐད་༸གོང་ས་མཆོག་གིས་དགོངས་པ་བཞེད་ཕྱོགས་ཇི་ལྟར་ཡིན་པའི་སྐོར་བཀའ་འདྲི་ཞུས་པར་༸གོང་ས་མཆོག་གིས་སྤྱིར་མི་ལུས་རིན་པོ་ཆེ་འདི་ནི་ཧ་ཅང་གི་རྩ་ཆེན་པོ་ཞིག་ཡིན་ནའང་སྐབས་རེ་ནད་པ་དེ་དབུགས་གཏོང་ཐུབ་ཙམ་ལས་གཞན་སྨན་བཅོས་དང་དྲག་སྐྱེད་ཡོང་རྒྱུའི་རེ་བ་རྩ་བ་ནས་མེད་པའི་དུས་མཚམས་དང་། ད་དུང་ནང་མིར་དཀའ་ངལ་དང་དཔལ་འབྱོར་གྱི་འགྲོ་གྲོན་ཧ་ཅང་ཆེན་འགྲོ་བཞིན་ཡོད་ན། ཉེ་འབྲེལ་ནང་མི་དང་ལྷན་དུ་མོས་མཐུན་ཡོད་པའི་ཐོག་ནས་ཤི་སྨན་སྤྲད་ན་འགྲིག་གི་ཡོད་པ་དགོངས་གནང་གི་ཡོད་ཅེས་དང་།  ལྷག་དོན་ཨ་མའི་མངལ་ནང་ཕྲུ་གུ་མེད་པ་བཟོས་ཡག་དང་ཕྲུ་གུའི་སྐྱེས་སྒོ་བཀག་པའི་རིགས་ནམ་ཡང་གནང་རྒྱུ་མེད་པའི་ལམ་སྟོན་གནང་པ་དང་ཆབས་ཅིག   སྐབས་རེ་ཨ་མའི་མངལ་ནང་ཆགས་པའི་ཕྲུ་གུ་དེ་དབང་པོ་མ་ཚང་བའམ་གཟུགས་དབྱིབས་ཆ་ཚང་མ་ཚང་བ་ཞིག་དང་། དེའི་རྐྱེན་པས་ཕྲུ་གུ་རང་ཉིད་དང་ཨ་མ་གཉིས་ཀའི་ལུས་ཁམས་ལ་གནོད་ཆེ་བ་ཡོང་གི་ཡོད་ན། རྒྱལ་སྲས་ཆེན་པོ་ཞི་བ་ལྷས་གསུངས་པ་ལྟར། ལས་ཅི་འདྲ་ཞིིག་བྱ་རུང་དེའི་དགེ་སྐྱོན་ལ་གཟིགས་དགོས་གལ་ཡིན་པ་རེད་བཅས་བཀའ་ལན་བསྩལ་ཡོད་པ་རེད། གཞི་རྩའི་ཁ་སང་ཚེས་ ༡༤ ཉིན་ལ་དྭགས་རི་ལྗོངས་ཡར་རྒྱས་ཚོགས་པས་༸གོང་ས་༸སྐྱབས་མགོན་ཆེན་པོ་མཆོག་ལ་གུང་ཚིགས་གསོལ་སྟོན་འདེབས་འབུལ་ཞུས་པའི་མཛད་སྒོ་དེའི་ཐོག་ལ་ལ་དྭགས་པའི་གཞུང་གི་གནད་ཡོད་མི་སྣ་དང་གྲོས་ཚོགས་འཐུས་མི། ལས་བྱེད་དང་སྨན་པ་སོགས་ཤེས་ཡོན་ཅན་བརྒྱ་སྐོར་ཞིག་ཆེད་བཅར་ཞུས་འདུག མཛད་འཆར་ལྟར་ན། ༸གོང་ས་མཆོག་གིས་ཟླ་འདིའི་ཕྱི་ཚེས་ ༡༨ ནས་དབུ་འཛུགས་ཀྱིས་ཚེས་ ༢༡ བར་ལ་དྭགས་ཞི་བའི་ཚལ་ཕོ་བྲང་དུ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ཆོས་འབྲེལ་དང་ཉིན་མཐའ་མའི་སྐབས་ཕྱི་ནང་གི་དད་ལྡན་མང་ཚོགས་རྣམས་ལ་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་གནང་རྒྱུ་ཡིན་འདུག  

   

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཟླ་ ༨ ཚེས་ ༡༡ ཉིན་ལ་དྭགས་ཁྲིག་རྩེར་ཆོས་འབྲེལ་ཉིན་མཐའ་མའི་སྐབས་ཁ་སང་དབུ་འཛུགས་མཛད་པའི་བྱང་ཆུབ་ལམ་སྒྲོན་གྱི་བཀའ་ཆོས་འཕྲོ་སྐྱོང་མཛད་པ་དང་། ཕྱི་ནང་གི་དད་ལྡན་མང་ཚོགས་སྟོང་ཕྲག་བརྒལ་བར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀྲིས་ཆེ་བ་སྩལ་གྲུབ་བསྟུན། དེ་རྗེས་ཁྲིག་རྩེ་འདུས་མང་ཡོངས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད་པ་རེད། ༸གོང་ས་མཆོག་གིས་ཆོས་ཞུ་བ་རྣམས་ལ་བྱང་ཆུབ་ལམ་སྒྲོན་གྱི་བཀའ་ཆོས་འཕྲོ་སྐྱོང་མཛད་སྐབས་སངས་རྒྱས་པའི་ཆོས་ལ་འཆད་ཉན་གནང་པར་བླ་མ་དང་སློབ་མ་གཉིས་ཀྱི་ངོས་ནས་སྐྱབས་འགྲོ་སེམས་བསྐྱེད་སྔོན་དུ་འགྲོ་བའི་ཐོག་ནས་ཀུན་སློང་རྣམ་དག་བཅོས་གལ་ཆེ་བ་མ་ཟད། ལྷག་དོན་སངས་རྒྱས་པའི་ཆོས་ལ་དད་པ་ཁོ་ནའི་རྗེས་སུ་མི་འཇུག་པར་ཆོས་ལ་སློབ་གཉེར་གནང་ནས་གོ་བ་གཏིང་ཟབ་ཆགས་པ་ཞིག་གནང་གལ་ཆེ་བ་ཡིན་པའི་བཀའ་ནན་སྩལ་སོང་། ༸གང་ཉིད་མཆོག་གིས་མུ་མཐུད་བཀའ་སྩལ་གནང་པར་ད་ལན་གྱི་བཀའ་ཆོས་སྩལ་ཡུལ་ལ་དྭགས་ཀྱི་མང་ཚོགས་རྣམས་ལ་དད་པ་འདུག་པས་དད་པ་དེ་ཡོད་ཐོག་ས་དགེ་བཀའ་རྙིང་རིས་མེད་ཀྱི་གཞུང་ལུགས་དག་ལ་སློབ་གཉེར་རྒྱ་གང་ཆེ་གནང་འགངས་ཆེ་བ་ཡིན་སྐོར་བཀའ་བསྩལ་མཛད་ཡོད། དེ་བཞིན་མགོན་པོ་༸གང་ཉིད་མཆོག་གིས་དེ་རིང་སྔ་ཐོག་ཕྱི་ནང་གི་དད་ལྡན་མང་ཚོགས་རྣམས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་སྩལ་སྐབས་ཚེ་རིང་པོ་ཡོང་བར་རྒྱུ་རྐྱེན་གཙོ་བོ་དེ་རང་ཉིད་ཀྱི་འཕྲོད་བསྟེན་ལེགས་པོ་གནང་རྒྱུ་དེ་ཡིན་པས་དེར་གཟབ་ནན་གནང་དགོས་གལ་ཡིན་པ་སོགས་བཀའ་བསྩལ་མཛད་ཡོད་པ་རེད། རྩ་བའི་༸གོང་ས་མཆོག་གིས་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱུང་ཆུབ་ལམ་སྒྲོན་གྱི་ཆོས་འབྲེལ་བཀྲིན་ཆེ་བ་ལེགས་པར་གྲུབ་བསྟུན། ཁྲིག་རྩེ་དགོན་པའི་མཁན་རིན་པོ་ཆེས་༸གང་ཉིད་མཆོག་ལ་བཀྲིན་གཏང་རག་ཚུལ་དུ་མཎྜལ་འདེབས་འབུལ་དང་མང་ཚོགས་ཚོས་ཀྱང་སྟོན་པ་ཐུབ་དབང་གི་སྐུ་བརྙན་གཙོས་བརྟན་བཞུགས་ཀྱི་འབུལ་རྫས་རྣམས་འདེགས་འབུལ་ཞུས་ཡོད་པ་རེད།    

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཟླ་ ༨ ཚེས་ ༡༠ ཉིན་ལ་དྭགས་ཁྲིག་རྩེར་དབྱར་ཆོས་ཆེན་མོའི་ཉིན་གཉིས་པའི་ཐོག་ཕྱི་ནང་གི་དད་ལྡན་མང་ཚོགས་སྟོང་ཕྲག་བརྒལ་བར་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱུང་ཆུབ་ལམ་སྒྲོན་གྱི་ཆོས་འབྲེལ་བཀྲིན་བསྐྱངས་ཡོད་པ་རེད། དེའང་མགོན་པོ་༸གང་ཉིད་མཆོག་གིས་སྔ་དྲོ་ཚོུད་ ༨།༠༠ སྟེང་དབྱར་ཆོས་ཆེན་མོ་ཚོགས་ཡུལ་ཁྲིག་རྩེ་དགོན་གྱི་གསུང་ཆོས་རྭ་བར་ཆིབས་སྒྱུར་གྲུབ་བསྟུན། ཆོས་འབྲེལ་གྱི་ཐོག་མར་རྒྱུན་ཕྱག་གསུམ་པ་དང་ཤེས་རབ་སྙིང་པོ། དེ་བཞིན་སེམས་བསྐྱེད་སྨོན་ལམ་བཅས་གསུང་འདོན་མཛད་པ་དང་། འཆད་པར་བྱ་བའི་གཞུང་བྱང་ཆུབ་སེམས་འགྲེལ་ལས་སྟོང་ཉིད་ཀྱི་ལྟ་བ་དང་བྱང་ཆུབ་སེམས་ཀྱི་གོ་དོན་དང་ཕན་ཡོན་བཅས་ཀྱི་སྐོར་ལས་ཆོས་འབྲེལ་དབུ་འཛུགས་ཀྱིས་བཀའ་སློབ་གནང་སོང་། ༸གོང་ས་མཆོག་གིས་ང་ཚོས་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་སྒོམ་ཚེ། ཚེ་འདིར་སྐྱིད་པོ་ཙམ་མ་ཡིན་པར། ཕྱི་མ་ལའང་བདེ་བ་དང། བདེ་ནས་བདེ་བར་འགྲོ་ཐུབ་རྒྱུ། མཐར་ཐུག་རྣམ་མཁྱེན་རྒྱལ་བའི་གོ་འཕང་ཐོབ་རྒྱུ་ཡོད་སྟབས་སངས་རྒྱས་པའི་ཆོས་ཀྱི་རྩ་བ་དེ་ཤེས་ནས་ཉམས་ལེན་བྱ་རྒྱུ་ནི་ཧ་ཅང་གི་གལ་གནད་ཡིན་པར་ལམ་སྟོན་གནང་པ་མ་ཟད། ལྷག་པར་དུ་དེ་རིང་ང་ཚོ་འདིར་འདུས་དགོས་དོན་གཙོ་བོ་ནི་ཆོས་ཉན་ནས་སེམས་དགེ་བ་དང་ཆོས་ཀྱི་ཕྱོགས་སུ་བཅོས་བསྒྱུར་གཏོང་ཆེད་ཡིན་པར་བསམ་དགོས་གལ་ཡིན་པ་བཀའ་བསྩལ་བཀྲིན་ཆེ་བ་མཛད་ཡོད་པ་རེད།  དེ་ལྟར་ན་ཆོས་ཉན་ནས་བློ་ཆོས་སུ་སོང་བ་དང་ཆོས་དེ་ཡང་ཐེག་ཆེན་གྱི་ཆོས་སུ་སོང་བར་སྐྱབས་འགྲོ་སེམས་བསྐྱེད་ཀྱིས་ཀུན་ནས་བླངས་དགོས་གལ་ཡིན་པ་མ་ཟད། སྒོས་སུ་བྱང་ཆུབ་ཀྱི་སེམས་ནི་གཙོ་བོ་ཡིན་པས་རྒྱ་གར་གྱི་མེས་པོ་དམ་པ་གྷན་དྷི་མཆོག་སོགས་སྙན་གྲགས་ཆེ་བའི་མི་སྣ་དེ་དག་ལ་དགའ་མོས་ཡོང་དགོས་དོན་རྐང་གཞན་ཕན་གྱི་བསམ་བློའི་སྟེང་ནས་ཡོང་གི་ཡོད་སྐོར་བཀའ་ནན་བསྩལ་སོང་། ཁྱད་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བྱང་ཆུབ་སེམས་འགྲེལ་གྱི་བཀའ་ཆོས་བསྐྱངས་པ་འདིའི་ཁྲོད་མང་ཚོགས་རྣམས་ལ་གཞུང་དེ་ཐོས་རྗེས་རིམ་པས་རང་ངོས་ནས་སློབ་སྦྱོང་བྱེད་དགོས་པ་མ་ཟད། ལོ་རྗེས་མ་སོ་སོའི་སེམས་ལ་འགྱུར་བ་ཏོག་ཙམ་གཏང་དགོས་རེད། དེ་ལྟར་མ་བྱུང་ཚེ་ཆོས་ཆོས་སུ་མ་སོང་བ་རེད་ཅེས་བཀའ་བསྩལ་མཛད་ཡོད་པ་རེད། ཉིན་དགུང་ཚོུད་ ༡༡།༣༠ ཐོག་༸གོང་ས་མཆོག་གིས་བྱང་ཆུབ་སེམས་འགྲེལ་གྱི་བཀའ་ཆོས་གྲུབ་བསྟུན། ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་སྐྱེས་བུ་གསུམ་གྱི་ལམ་གྱི་རིམ་པ་གཙོ་བོ་བསྟན་པའི་བྱང་ཆུབ་ལམ་སྒྲོན་གྱི་བཀའ་ཆོས་བཀྲིན་བསྩལ་གནང་ཡོད་པ་དང་། སྐབས་དེར་མགོན་པོ་མཆོག་གིས་ཇོ་བོ་རྗེ་དཔལ་ལྡན་ཨ་ཏི་ཤ་དེ་སྔ་རྒྱ་གར་ནས་བོད་ལ་གདན་འདྲེན་ཞུ་སྟངས་དང་། དེ་ནས་སྟོད་མངའ་རིས་མཐོ་ལྡིང་དུ་བྱང་ཆབ་ལམ་སྒྲོན་མཛད་སྟངས་སོགས་ཇོ་བོ་རྗེ་བོད་གངས་ཅན་ལྗོངས་ལ་བཀྲིན་ཆེན་པོ་ཡིན་པའི་ཆོས་འབྱུང་ལོ་རྒྱུས་སྙིང་བསྡུས་ཤིག་ངོ་སྤྲོད་མཛད་སོང་།      རྩ་བའི་སང་ཉིན་ཚེས་ ༡༡ ཉིན་གྱི་སྔ་ཐོག་༸གོང་ས་མཆོག་གིས་བྱང་ཆུབ་ལམ་སྒྲོན་གྱི་གཞུང་འཕྲོ་སྐྱོང་གྲུབ་བསྟུན་མང་ཚོགས་ལ་ཚེ་དབང་བཀྲིན་བསྩལ་རྒྱུ་དང་། དེ་རྗེས་ཁྲིག་རྩེ་འདུས་མང་ཡོངས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུ་རྒྱུ་རེད་འདུག

བོད་ཀྱི་བླ་ན་མེད་པའི་དབུ་ཁྲིད་༸གོང་ས་༸སྐྱབས་དགོན་ཆེན་པོ་མཆོག་གིས་དེ་རིང་ཕྱི་ཚེས་ ༩ ཉིན་གྱི་སྔ་དྲོ་ཚོུད་ ༨།༣༠ ཐོག་ལ་དྭགས་གི་རྒྱལ་ས་གླེ་ནས་རྒྱང་ཐག་ཀི་ལོ་མི་ཊ། ༡༩ སར་ཆགས་པའི་ས་གནས་ཀྱི་དགེ་ལུགས་པ་དགོན་པ་རྙིང་ཤོས་ཁྲིག་དགོན་ཚུལ་ཁྲིམས་རྣམ་དག་གླིང་དུ་ཆིབས་སྒྱུར་བཀྲིན་བསྐྱངས་ཏེ། གཙུག་ལག་ཁང་གསར་པར་རབ་གནས་དང་ཉིན་གྲངས་ ༡༢ རིང་ཚོགས་རྒྱུའི་དབྱར་ཆོས་ཆེན་མོ་དབུ་འབྱེད་བཀྲིན་བསྩལ་གནང་སོང་བ་མ་ཟད། སེར་སྐྱ་མང་ཚོགས་སྟོང་ཕྲག་བརྒལ་བར་བླང་དོར་བཀའ་སློབ་བཀྲིན་བསྩལ་སོང་། ཁྲིག་དགོན་དབྱར་ཆོས་ཆེན་མོ་དབུ་འབྱེད་མཛད་སྒོའི་ཐོག་མར་ཁྲིག་རྩེ་མཁན་པོ་རིན་པོ་ཆེ་ངག་དབང་བྱམས་པ་བསྟན་འཛིན་ལགས་ནས་༸གོང་ས་མཆོག་དབུ་བཞུགས་གཙོས། དགའ་ལྡན་ཁྲི་རིན་པོ་ཆེ་མཆོག་དང་གླིང་མཆོག་སྤྲུལ་རིན་པོ་ཆེ་མཆོག བ་ཀུ་ལ་རིན་པོ་ཆེ་མཆོག། ས་གནས་ཀྱི་ཁ་ཆེ་དང་ཡི་ཤུའི་སྐུ་མགྲོན་རྣམ་པ་དང་། དེ་བཞིན་ཇ་མུ་དང་ཀཤ་མིར་མངའ་སྡེའི་མཉམ་འབྲེལ་དང་ལ་དྭགས་སྡེ་ཚན་གྱི་བློན་ཆེན་སྐུ་ཞབས་ཚེ་རིང་རྡོ་རྗེ་མཆོག་དང་ལ་དྭགས་རི་ལྗོངས་ཡར་རྒྱས་ཚོགས་ཆེན་གྱི་སྡེ་དཔོན་འབུམ་རམས་པ་བསོད་ནམས་ཟླ་བ་ལགས་སོགས་ཆོས་ཕྱོགས་དང་གཞུང་གི་དཔོན་རིགས་རྣམས་ལ་དགའ་བསུ་དང་སྦྲགས་དུས་ཚིགས་ངོ་སྤྲོད་ཀྱི་གསུང་བཤད་གནང་སོང་བ་དང་། རྐང་ཐེངས་འདིའི་དབྱར་ཆོས་ཆེན་མོ་འདི་ནི་ཚོགས་ཐེངས་ ༤ དེ་ཆགས་ཡོད་པ་རེད་འདུག དེ་ཡང་གཙོ་བོ་༸གོང་ས་མཆོག་གིས་བཀའ་དགོངས་ལྟར། ཆོས་བརྒྱུད་ཕན་ཚུན་དབར་ལ་བགྲོ་གླེང་སྦྱང་བཤད་དང་། ལ་དྭགས་མང་ཚོགས་ལ་ནང་ཆོས་ངོ་སྤྲོད་ཡོང་ཆེད་དུ་དམིགས་ཡོད་སྐོར་དང། དབྱར་ཆོས་ཐོག་མ་ཕྱི་ལོ་ ༢༠༡༣ ལོར་ལ་དྭགས་མཚན་ཉིད་སློབ་གྲྭར་ཚོགས་ཡོད་པ་དང་། ཐེངས་གཉིས་པ་ལི་འཁྱིལ་དགོན་པ་དང་། གསུམ་པ་དཔེ་ཐུབ་དགོན་པར་ཚོགས་གྲུབ་ཡོད་པ་ངོ་སྤྲོད་གནང་པ་མ་ཟད། ལྷག་པར་དུ་འདས་པའི་དབྱར་ཆོས་ཆེན་པོའི་ལས་རིམ་ནས་མང་ཚོགས་ལ་ཕན་ཐོགས་རྒྱ་མི་ཆུང་བ་བྱུང་ཡོད་སྐོར་གསུངས་སོང་། ཁྲིག་རྩེ་མཁན་པོ་རིན་པོ་ཆེ་མཆོག་གིས་མཛད་སྒོ་འདིའི་ཐོག་༸སྐུའི་གྱ་སྟོན་ལ་བཀྲིན་རྗེས་དྲན་ཞུ་ཆེད་གསེར་གྱི་རྟགས་མ་ཞིག་༸གང་ཉིད་མཆོག་ལ་ཕུལ་ཡོད་པ་རེད། ད་རེས་ཉིན་གྲངས་ ༡༢ རིང་ཚོགས་རྒྱུའི་དབྱར་ཆོས་ཆེན་མོའི་ཐོག་གཙོ་བོ་ལི་འཁྱིལ་དགོན་པ་དང་དཔེ་ཐུབ་དགོན། མཚན་ཉིད་སློབ་གྲྭ་དང་ཁྲིག་རྩེ་དགོན་སོགས་ལ་དྭགས་ནང་གི་དགོན་ཁག་ཚང་མ་ནས་དགེ་བཙུན་སྐུ་ཚབ་ཙམ་མ་ཟད། ཉེ་འཁོར་སློབ་གྲྭ་ཁག་བཅུའི་སློབ་ཕྲུག་ཁག་ཅིག་བསྡོམས་ཁྱོན་མཉམ་ཞུགས་གནང་མཁན་ ༣༠༠ ཙམ་འདུག་པ་དང་། ལས་རིམ་ལྟར་ན་དབྱར་ཆོས་འདིའི་ཁྲོད་གདན་ཞུ་ནང་པའི་དགེ་བཤེས་ཁག་ཅིག་དང་ས་གནས་ཀྱི་ཡི་ཤུ་དང་ཁ་ཆེའི་མཁས་པ་འགའ། ཆོས་ལུགས་དང་མི་རིགས་མཐུན་སྒྲིལ་གལ་གནད་དང་ཆང་རག་གི་ཉེས་དམིགས། ནང་ཆོས་དང་ཚན་རིག་གི་འབྲེལ་བའི་སྐོར། བདེན་བཞི་དང་ཐེག་པ་གསུམ་སོགས་བརྗོད་སྣ་མང་ཐོག་གསུང་བཤད། དེ་ནས་ཉིན་ལྟར་བྱང་ཆུབ་ལམ་སྒྲོན་གྱི་གཞུང་ཐོག་དམ་བཅའ་དང་རྩོད་པ་སོགས་རྩོད་གནང་གི་འདུག དེ་རིང་སྔ་ཐོག་དབུ་འབྱེད་མཛད་སྒོའི་ཐོག་དགའ་ལྡན་ཁྲི་རིན་པོ་ཆེ་མཆོག་དང། ས་གནས་ཀྱི་ཁ་ཆེ་shia དང་ sunny འི་སྐུ་ཚབ་སྐུ་ཞབས་ Molvi Abdul ལགས་དང་སྐུ་ཞབས་ Mohammad Javid ལགས་བཅས་ནས་ཆོས་ལུགས་མཐུན་སྒྲིལ་དང་འཆམ་མཐུན། འཛམ་གླིང་ཞི་བདེའི་གལ་གནད་སོགས་ཀྱི་ཐོག་གསུང་བཤད་གནང་པ་མ་ཟད། ཁྱད་པར་དུ་སྐབས་དེར་ཇ་མུ་དང་ཀཤ་མིར་མངའ་སྡེའི་མཉམ་འབྲེལ་དང་ལ་དྭགས་སྡེ་ཚན་གྱི་བློན་ཆེན་སྐུ་ཞབས་ཚེ་རིང་རྡོ་རྗེ་མཆོག་ནས་མངའ་སྡེའི་སྤྱི་ཁྱབ་བློན་ཆེན་ལྕམ་སྐུ་ Mehbooba Mufti མཆོག་གིས་༸གོང་ས་མཆོག་ལ་འཚམས་འདྲིའི་ཞུས་ཡོད་པ་དང་ཁོང་མོ་ད་རེས་ས་གནས་སུ་འཕྲད་བཞིན་པའི་དཀའ་རྙོག་གི་རྐྱེན་པས་བཅར་ཐུབ་མེད་པ་སྙན་གསེང་ཞུས་སོང་། ༸གོང་ས་སྐྱབས་མགོན་ཆེན་པོ་མཆོག་གིས་དེ་རིང་འདི་ག་ཁྲིག་རྩེ་དབྱར་ཆོས་ཆེན་མོའི་མཛད་སྒོའི་ཐོག་བཅར་བའི་མང་ཚོགས་སྟོང་ཕྲག་བརྒལ་བར་ཐོག་མར་༸གང་ཉིད་མཆོག་འཛམ་གླིང་ས་ཕྱོགས་གང་དུ་ཕེབས་རུང་། མི་སུ་འདྲ་ཞིག་དང་མཇལ་རུང་༸སྐུ་ཉིད་འགྲོ་བ་མི་གཅིག་ཡིན་པའི་འདུ་ཤེས་ཐོག་ནས་མཇལ་འཕྲད་གནང་གི་ཡོད་སྐོར་བཀའ་བསྩལ་གནང་སྟེ། ༸སྐུའི་ཐུགས་བསྐྱེད་དམ་བཅའ་གསུམ་ལས་འགྲོ་བ་མའི་བཟང་སྤྱོད་ཀྱི་རིན་ཐང་གོང་འཕེལ་དང་འཛམ་གླིང་ཆོས་ལུགས་མཐུན་སྒྲིལ་སྐོར་ལ་བཀའ་སློབ་གནང་པ་མ་ཟད། ཁྱད་པར་སྐབས་དེར་ཆོས་ལུགས་མཐུན་སྒྲིལ་སྐོར་ལས་ད་ལྟ་ལ་དྭགས་ནང་གི་ནང་པ་དང་ཁ་ཆེའི་དབར་གྱི་འབྲེལ་བ་དང། དེ་བཞིན་ཁ་ཆེ་ནང་ཕུན་ཚུན་གྱི་འབྲེལ་བ་དེ་ནི་གཅེས་པའི་ནོར་བུ་ལྟ་བུ་ཆགས་ཡོད་པས་བསྔགས་བརྗོད་ཆེན་པོ་གནང་པ་དང་ཆབས་ཅིག ནོར་བུ་དེ་ཡིས་འོད་ཟེར་དེ་རིམ་པས་འཛམ་གླིང་སྤྱི་ལ་ཁྱབ་སྤེལ་གནང་རྒྱུའི་འགན་བཞེས་དགོས་པ་ལམ་སྟོན་མཛད་ཡོད། དེ་བཞིན་༸གོང་ས་མཆོག་གིས་དབྱར་ཆོས་ཆེན་མོ་སྐོར་ལས་འཕྲོས་ཏེ།  དེ་གར་འདུས་པའི་གྲྭ་བཙུན་དང་མི་སྐྱ་ཕོ་མོ་ཀུན་ལ་སངས་རྒྱས་ཀྱི་ཆོས་ཤེས་པ་ལ་ལུང་རྟོགས་ཀྱི་ཆོས་ལ་སློབ་སྦྱོང་བྱ་རྒྱུ་ཤིན་ཏུ་ནས་གལ་ཆེ་ཡིིན་ཞིང་ཁ་འདོན་ལ་༸སྐུ་འདྲ་བཞེངས་པ་ཙམ་གྱིས་འགྲིག་ཐབས་མེད་པས་རྟགས་གསལ་དང་རིགས་ལམ་སྦྱོང་རྒྱུ་ནི་དེ་བས་གལ་ཆེ་བ་ཡིན་པ་བཀའ་བསྩལ་མཛད་སོང་། ཁྱད་པར་དུ་༸གོང་ས་མཆོག་གིས་དུས་རབས་ ༢༡ པའི་ནང་པའམ་ཆོས་ལ་ཤེས་ནས་དད་པ་ཐོབ་གལ་ཡིན་པ་མ་གཏོགས། དབང་བརྟུལ་དད་པའི་རྗེས་འབྲངས་ཁོ་ནར་འཇུག་པ་ཡིན་ན་སངས་རྒྱས་ཀྱི་བསྟན་པ་ཡུན་རིང་གནས་ཀྱི་མ་རེད་ཅེས་བཀའ་ནན་བསྩལ་སོང། རྩ་བའི་མཛད་འཆར་ལྟར་སང་ཉིན་༸གོང་ས་མཆོག་གིས་ཁྲིག་རྩེ་དགོན་དུ་ཇོ་བོ་རྗེས་མཛད་པའི་བྱང་ཆུབ་ལམ་སྒྲོན་དང་དཔལ་མགོན་འཕགས་པ་ཀླུ་གྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཆོས་འབྲེལ་བཀྲིན་བསྩལ་རྒྱུ་ཡིན་འདུགཔ་དང་། གནངས་ཚེས་ ༡༡ ཉིན་ཁྲིག་རྩེ་འདུས་མང་ནས་མགོན་པོ་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུ་འཆར་འདུག

དེ་རིང་ཟླ་ ༨ ཚེས་ ༨ ཉིན་གྱི་སྔ་དྲོ་ཚོུད་ ༨།༠༠ ཡོལ་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་ས་ཕུག་ས་གནས་སུ་ཆིབས་སྒྱུར་གྱིས་རིས་མེད་ཤེས་ཡོན་ལྟེ་གནས་ཁང་ཞིག་ལེགས་གྲུབ་བྱུང་བར་དབུ་འབྱེད་རབ་གནས་གྲུབ་བསྟུན། ༸གང་ཉིད་མཆོག་ཚོུད་ ༩།༠༠ ཡོལ་ཙམ་ནས་སྟོག་ཁྱབ་ཁོངས་ Siddhartha འབྲིང་རིམ་སློབ་གྲྭར་ཆིབས་སྒྱུར་མཛད་པ་དང་། དེའང་གཙོ་བོ་སློབ་མ་རྣམས་ཀྱིས་མགོན་པོ་མཆོག་ལ་རིགས་ལམ་རྟགས་གསལ་སྤྱན་འབུལ་ཞུས་ཡོད་པ་རེད། དེ་རྗེས་ཚོུད་ ༡༠།༠༠ ཙམ་ལ་བ་ཀུ་ལ་རིན་པོ་ཆེ་མཆོག་གི་གུར་བུ་དགོན་དུ་གནས་གཟིགས་མཛད་པ་མ་ཟད། དགོན་པ་དེའི་རྟེན་གཙོ་སྟོན་པ་ཐུབ་པའི་དབང་པོ་མཆོག་གི་སྣང་བརྙན་གསར་པ་ཕི་ཊི་ ༧༡ ཅན་རྟེན་དང་བརྟེན་པ་བཅས་པ་རབ་གནས་དབུ་འབྱེད་བཀྲིན་བསྐྱངས་ཡོད་པ་དང་། ༸གང་ཉིད་མཆོག་གི་སྐུ་འཁོར་ལྷན་རྒྱས་སྟོག་རྒྱལ་ཁང་དུ་ཉིན་དགུང་ལྗགས་སྨིན་བཞེས་གནང་མཛད་ཡོད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་སྔ་དྲོ་ཚོུད་  ༩།༠༠ ཐོག་ལ་དྭགས་གླེ་ལྕོག་ལམ་སར་རྟེན་གཞི་བྱས་པའི་བོད་ཕྲུག་ཁྱིམ་སྡེའི་རྩེད་ཐང་དུ་ས་གནས་བོད་རིགས་རྣམས་ལ་བཀའ་སློབ་བཀྲིན་བསྐྱངས་ཡོད་པ་དང་། སྐབས་དེར་མགོན་པོ་༸གང་ཉིད་ནས་བོད་མི་རྣམས་ནས་རང་ཉིད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ལ་དགའ་ཞེན་དང་སྤོབས་པ་ཆེན་པོའི་ཐོག་མི་ཉམས་རྒྱུན་འཛིན་དང་ཉམས་པ་སླར་གསོ་གནང་བཞིན་པ་དེ་ནི་ཁ་བྲལ་བའི་བྱ་སྤྱོད་ཞིག་མ་རེད་ཅེས་བཀའ་སྩལ་འདུག དེའང་༸གོང་ས་མཆོག་གིས་མང་ཚོགས་རྣམས་ལ་བཀའ་སློབ་སྩལ་དོན་ལ། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རིགས་དེ་ལོ་ངོ་སྟོང་ཕྲག་མང་པོའི་ལོ་རྒྱུས་ཡོད་པའི་མི་རིགས་ཤིག་ཡིན་པ་དང། མི་རིགས་ཀྱི་ངོ་བོ་མཚོན་སླད་གཙོ་ཆེ་ཤོས་སྐད་ཡིག་ཡིན་སྟབས། རྒྱ་རིགས་མི་མང་རྣམས་ནས་སྔ་རབས་ནས་ཡོད་པའི་རང་ཉིད་ཀྱི་ངོ་བོ་དང་རིག་གཞུང་ལ་དགའ་ཞེན་ཆེན་པོ་གནང་བཞིན་པ་ལྟར། བོད་མི་ཚོ་ལའང་དེ་མཚུངས་རང་ཉིད་ཀྱི་ཐུན་མོང་མ་ཡིན་པའི་མི་རིགས་ཀྱི་ངོ་བོ་དང་རིག་གཞུང་། ཆོས་དང་སྐད་ཡིག་སོགས་ལ་དགའ་ཞེན་དང་སྤོབས་པ། ལྷག་དོན་རིག་གཞུང་དེ་དག་སྲུང་སྐྱོབ་དང་མི་ཉམས་རྒྱུན་འཛིན་གནང་རྒྱུའི་རང་དབང་ཡོད་པ་རེད་ཅེས་བཀའ་སྩལ་མཛད་འདུག ༸གང་ཉིད་མཆོག་གིས་རྒྱ་གཞུང་གི་ལྟ་བ་མཁྲེགས་བཟུང་ཅན་གྱི་རྒྱ་རིགས་འགོ་ཁྲིད་ཁག་ཅིག་གིས་བོད་ནང་གི་བོད་མི་ཚོས་རང་ཉིད་ཀྱི་ཆོས་དང་སྐད་ལ་སློབ་སྦྱོང་གནང་པར་གདུག་རྩུབ་ཅན་གྱི་སྲིད་བྱུས་འོག་དམ་དྲག་ཤུགས་ཆེ་བྱེད་བཞིན་པ་དེ་ནི་བློ་ཕམ་གྱི་གནས་སྟངས་ཤིག་ཡིན་པ་བཀའ་སྩལ་དང་སྦྲགས།  བོད་མི་རྣམས་ནས་རང་ཉིད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་གནང་བཞིན་པ་དེ་ནི་ཁ་བྲལ་བའི་བྱ་སྤྱོད་ཞིག་མ་རེད་ཅེས་བཀའ་སྩལ་ནན་པོ་མཛད་ཡོད་པ་རེད། དེ་བཞིན་༸གོང་ས་མཆོག་གིས་བོད་ཀྱི་སྐད་ཡིག་དང་ནང་ཆོས་ཀྱི་གལ་གནད་སྐོར་བཀའ་སྩལ་བ་མ་ཟད། གཞན་ཡང་ ས་གནས་ལ་དྭགས་མི་མང་དང་གནད་ཡོད་མི་སྣ་རྣམས་ནས་ད་བར་ཁུལ་དེར་ཡོད་པའི་བོད་མི་གཙོ་བོར་གྱུར་བའི་ས་གནས་སློབ་གྲྭ་ཁག་ལ་གཟིགས་སྐྱོང་དང་རོགས་རམ་ཤུགས་ཆེ་གནང་པར་ཐུགས་རྗེ་ཆེ་ཞུ་དང་། བོད་ནང་གི་བོད་མི་ཚོར་རང་ཉིད་ཀྱི་རིག་གཞུང་སྲུང་སྐྱོབ་ཞུ་རྒྱུར་རང་དབང་མེད་སྟབས། བོད་ཀྱི་ཆོས་དང་སྐད་ཡིག་སོགས་གཅིག་མཚུངས་ཡིན་པའི་ལ་དྭགས་ནས་མོན་བར་གྱི་ཧི་མཱ་ལ་ཡའི་མི་རིགས་རྣམས་ནས་བོད་ཀྱི་ཆོས་དང་སྐད་ཡིག་ལ་དོ་སྣང་དང་སློབ་སྦྱོང་གནང་རྒྱུ་གལ་ཆེན་པོ་ཡིན་པར་བཀའ་སློབ་བཀྲིན་བསྩལ་འདུག རྩ་བའི་ད་ལྟའི་ཆར་༸གོང་ས་མཆོག་གིས་ལ་དྭགས་ཁུལ་གྱི་མཛད་འཆར་སྐྱང་བཞིན་ཡོད་པ་དང་། ༸ གང་ཉིད་མཆོག་ད་ལན་ཁུལ་དེའི་ནང་བཞུགས་ཞག་དུས་ཡུན་ནི་ཟླ་འདིའི་ཚེས་ ༢༤ བར་ཡིན་པ་རེད།

དེ་རིང་ཟླ་ ༨ ཚེས་ ༥ ཉིན་གྱི་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ལ་ཇི་ལྟར་གསོལ་འདེབས་ཞུ་དོན་ལྟར། མགོན་པོ་༸གང་ཉིད་མཆོག་ལ་དྭགས་ཞི་བའི་ཚལ་ཕོ་བྲང་ནས་རྒྱང་ཐག་སྤྱི་ལེ་ ༤༠ སར་ཡོད་པའི་སྔ་འགྱུར་བྲག་ཐོག་དགོན་ཆོས་འཁོར་པདྨ་གླིང་དུ་ཆིབས་བསྒྱུར་གྱིས་དགོན་པའི་དུ་ཁང་གསར་པ་དབུ་འབྱེད་རབ་གནས་བཀྲིན་བསྩལ་བ་དང་། གཏང་རག་གི་ཚོགས་མཆོད་འབུལ་བཞེས་མཛད་འདུག ༸གོང་ས་མཆོག་གི་སྐབས་དེར་སྔ་འགྱུར་བྲག་ཐོག་དགོན་པའི་འདུ་ཁང་དབུ་འབྱེད་ཀྱི་མཛད་སྒོའི་ཐོག་བཅར་བའི་སེར་སྐྱ་མང་ཚོགས་རྣམས་ལ།  གང་ཉིད་ཀྱིས་ས་གནས་མང་ཚོགས་ཚོས་ནང་ཆོས་ལ་དད་པ་ཙམ་མ་ཡིན་པར་བསླབ་པ་སློབ་གཉེར་གནང་གལ་ཆེ་བའི་བཀའ་སློབ་བསྩལ་བ་དང་ཆབས་ཅིག  དེང་སྐབས་ཕྱིའི་དངོས་པོ་ཡར་རྒྱས་ཕྱིན་པའི་དུས་དང་བསྟུན། ནང་སེམས་ཀྱི་ཞེ་བདེ་དང་བྱམས་བརྩེ་གོང་འཕེལ་གཏོང་གལ་ཆེ་སྐོར་ལའང་བཀའ་སློབ་ལམ་སྟོན་མཛད་འདུག གཞི་རྩའི་༸གོང་ས་མཆོག་ཆིབས་སྒྱུར་མཛད་ཡུལ་ལ་དྭགས་སྔ་འགྱུར་རྙིང་མའི་བྲག་ཐོག་དགོན་པ་དེ་སྔ་འགྱུར་རྙིང་མའི་མ་དགོན་ཐུབ་བསྟན་རྡོ་རྗེ་བྲག་ཨེ་ཝམ་ལྕོག་སྒར་ཆོས་འཁོར་རྣམ་རྒྱལ་གླིང་གི་ཡན་ལག་དགོན་པ་ཞིག་ཡིན་པ་དང་། དགོན་པ་དེའི་དགོན་བདག་སྔ་འགྱུར་རྙིང་མའི་ཞིང་གཤེགས་༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་ཡིན་པ་རེད། ད་ལྟའི་ཆར་དགོན་པའི་དགེ་འདུན་པ་ཞལ་གྲངས་ ༢༨ ཙམ་སློབ་གཉེར་གནང་བཞིན་ཡོད་པ་རེད་འདུག རྩ་བའི་ད་ལྟའི་ཆར་༸གོང་ས་མཆོག་གི་ལ་དྭགས་ཁུལ་གྱི་མཛད་འཆར་བསྐྱང་བཞིན་ཡོད་པ་དང་། ༸ གང་ཉིད་མཆོག་ད་ལན་ཁུལ་དེའི་ནང་བཞུགས་ཞག་དུས་ཡུན་ནི་ཟླ་འདིའི་ཚེས་ ༢༡ བར་ཡིན་པ་རེད། ༸གོང་ས་མཆོག་གིས་སྔ་འགྱུར་རྙིང་མའི་བྲག་ཐོག་དགོན་པའི་འདུ་ཁང་དབུ་འབྱེད་སྐབས་སྩལ་བའི་བཀའ་སློབ། བརྙན་པར། http://www.youtube.com/watch?v=wRJt2i1d9Kw

 སྐབས་ ༡༦ བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨ་ཅཱ་རྱ་ཡེ་ཤེས་ཕུན་ཚོགས་མཆོག་གིས་སྣེ་ཁྲིད་པའི་སྤྱི་འཐུས་སྒྲོལ་མ་ཚེ་རིང་ལགས་དང་བློ་བཟང་ཆོས་འབྱོར་ལགས་བཅས་རྣམ་པ་གསུམ་ནས་ཟླ་སྔོན་མའི་ཕྱི་ཚེས་ ༢༦ ནས་དབུ་འཛུགས་གནང་སྟེ་རྒྱལ་ས་ལྡི་ལིར་རྒྱ་གར་གྱི་ཆར་དུས་གྲོས་ཚོགས་འཚོགས་བཞིན་པ་དང་བསྟུན། རྒྱ་གར་གྱི་དབུས་གཞུང་གི་ཆེས་མཐོའི་དཔོན་རིགས་ཁག་དང་གྲོས་ཚོགས་གོང་འོག་གི་འཐུས་མི་རྣམས་ལ་མཇལ་འཕྲད་ཞུས་ཡོད་པ་རེད། དེའང་ཆེས་མཐོའི་དཔོན་རིགས་དང་གྲོས་ཚོགས་གོང་འོག་གཉིས་ཀྱི་འཐུས་མི་རྣམས་ལ་བོད་མི་རང་ལུས་མེར་སྲེག་གིས་གཙོས་བོད་ནང་གི་ཛ་དྲག་གནས་སྟངས་སྤྱི་སྙན་སེང་དང་། ལྷག་དོན་རྒྱ་གར་གྲོས་ཚོགས་ནས་བོད་མིའི་སྒྲིག་འཛུགས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་འབྲེལ་མོལ་བསྐྱར་གསོ། དེ་བཞིན་རྒྱ་དཀར་ནག་གཉིས་ཀྱི་འབྲེལ་ལམ་སྐབས་བོད་ཀྱི་གནད་དོན་གཙོ་གྲས་སུ་གླེང་སློང་གིས་གྲོས་ཆོད་འཇོག་སྐྱོང་ཡོང་བའི་ཞུ་སྐུལ་གནང་པའི་ཁྲོད། ད་བར་བདུན་ཕྲག་གཅིག་གི་ནང་གཞུང་གི་བློན་ཆེན་ཆེ་ཆུང་ ༨ དང་གྲོས་ཚོགས་གོང་འགོ་གི་འཐུས་མི་ ༥༢ དང་མཇལ་འཕྲད་ཞུས་ཐུབ་པ་བྱུང་འདུག