༸གོང་ས་མཆོག

དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཝེ་ཏི་ནམ་མཇལ་བཅར་བ་མི་གྲངས་ ༤༠ ཙམ་ལ་མཇལ་ཁ་བསྩལ་བ་དང་མ་ཎིའི་ལྗགས་ལུང་དང་ཡིག་དྲུག་གི་འགྲེལ་བ་བཀའ་ཁྲིད་མཛད་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་མ་ཎི་ཡིག་དྲུག་གི་འགྲེལ་བ་བཀའ་ཁྲིད་མཛད་པའི་སྐབས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཟུང་དུ་འབྲེལ་ནས་ཉམས་ལེན་བྱས་པ་ཡིན་ན་མཐར་མ་དག་པའི་ལུས་ངག་ཡིད་གསུམ་པོ་དེ་བསྒྱུར་ནས་སརྒྱས་ཀྱི་སྐུ་གསུང་ཐུགས་ཀྱི་ངོ་བོ་ཆགས་ངེས་ཡིན་པ་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་མ་ཎིའི་ལྗགས་ལུང་དང་དེའི་དོན་འགྲེལ་མཛད་ཟིན་པའི་རྗེས་སུ་ མཇལ་བཅར་བ་རྣམས་ལ་མ་ཎི་བསགས་སྐབས་གཙོ་བོ་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ལ་བསམ་བློ་བཏང་ནས་མ་ཎི་བགྲངས་པ་ཡིན་ན་དོན་དང་ལྡན་པ་ཞིག་ཆགས་ངེས་ཡིན་པ་བཀའ་སློབ་བཀའ་དྲིན་ཆེ་བ་བསྩལ་འདུག གཞི་རྩའི་༸གོང་ས་མཆོག་བདུན་ཕྲག་སྔོན་མའི་ནང་རྒྱ་གར་གྱི་རྒྱལ་ས་ལྡི་ལི་དང་མ་ཧཱ་རཱཤྚའི་མཛད་འཆར་ལེགས་གྲུབ་ཟིན་ནས་ཁ་ཉིན་ཕྱི་ཚེས་ ༢༥ ཉིན་བཞུགས་སྒར་དུ་ཕྱིར་༸ཞབས་སོར་བདེ་བར་འཁོད་ཡོད་པ་རེད། མཛད་འཆར་ལྟར་ན་ཕྱི་ཟླ་ ༡༢ པའི་གཟའ་འཁོར་གཉིས་པའི་ནང་གྷོ་ཝ་གཙུག་ལག་སློབ་གཉེར་ཁང་དུ་ཆིབས་བསྒྱུར་མཛད་རྒྱུ་དང་། དེ་རྗེས་རྒྱ་གར་ལྷོ་ཕྱོགས་བོད་མིའི་གཞིས་ཆགས་སུ་མཛད་འཆར་ཁག་གཅིག་གི་སླད་དུ་ཆིབས་བསྒྱུར་བཀའ་དྲིན་བསྐྱང་གཏན་ཁེལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལི་དང་མ་ཧཱ་རཱ་ཤྚའི་མངའ་སྡེའི་གྲོང་ཁྱེར་ཨོ་རངྒ་བྷད་ནང་གི་མཛད་འཆར་ཁག་ལེགས་གྲུབ་ཀྱིས་དེ་རིང་སྔ་དྲོ་ཚོུད་ ༨༌༤༥ ཙམ་ལ་བཞུགས་སྒར་དུ་ཕྱིར་༸ཞབས་སོར་བདེ་བར་འཁོད་སོང་། ཨོ་རངྒ་བྷད་ནང་གི་ཆིབས་བསྒྱུར་དེ་ནི་ཁུལ་དེར་རྟེན་གཞི་བྱས་པའི་འཕགས་པ་གནས་བརྟན་པའི་ཆོས་ཚོགས་བྷི་ཀུ་ནི་སྦྱོང་བརྡར་ལྟེ་གནས་ཁང་གིས་གསོལ་འདེབས་ཞུས་པ་ཞིག་ཡིན་པ་དང་། ༸གོང་ས་མཆོག་གིས་ཕྱི་ཚེས་ ༢༤ ཉིན་ཆོས་ཚོགས་དེའི་དྲྭ་རྒྱ་ཞིག་དབུ་འབྱེད་དང་རྒྱ་གར་གྱི་ནང་པའི་སེར་སྐྱ་ཕོ་མོ་ཁྲི་ལྔ་ཙམ་ལ་བློ་སྦྱོང་ཚིགས་བརྒྱད་མའི་བཀའ་ཆོས་དང་ནང་ཆོས་ངོ་སྤྲོད་བཅས་བཀྲིན་བསྩལ་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་གིས་དྲྭ་རྒྱ་ཞིག་དབུ་འབྱེད་མཛད་པ་ལྟར་རིམ་བཞིན་དྲྭ་རྒྱ་དེ་དག་གི་ནང་དུ་དབུ་མ་རྩ་བ་ཤེས་རབ་དང་མངོན་རྟོགས་རྒྱན་ལ་སོགས་པའི་གཞུང་གི་སྙིང་བསྡུས་འགའ་ཞིག་དྲྭ་ཐོག་ཏུ་བསྟན་ཐུབ་ཚེ་༸དཔལ་ནཱ་ལེནྡཱའི་ཆོས་བརྒྱུད་ཀྱི་གོ་བ་ཡག་པོ་ཞིག་ཆགས་ངེས་ཡིན་པ་བཀའ་བསྩལ་བ་དང་འབྲེལ། ནཱ་ལེནྡཱའི་ཆོས་བརྒྱུད་ཆ་ཚང་བ་ཅིག་མཁན་ཆེན་ཞི་བ་འཚོས་དུས་རབས་བརྒྱད་པའི་ནང་བོད་དུ་དར་སྤེལ་གནང་བ་ལྟར་ང་ཚོས་ལོ་ངོ་སྟོང་ཕྲག་རིང་ལ་རྒྱུན་འཛིན་ཐུབ་པ་ཞིག་བྱུང་ཡོད་པ་མ་ཟད་ནཱ་ལེནྡཱའི་ཆོས་བརྒྱུད་ཆ་ཚང་བ་ཅིག་བདག་གཉེར་གནང་མཁན་ནི་བོད་པ་གཅིག་པོ་ཡིན་པ་བཀའ་བསྩལ་ཏེ་ཕྱག་དཔེ་གཟིགས་རྒྱུ་དེ་ཤིན་ཏུ་ནས་གལ་ཆེན་པོ་ཡིན་པ་བཀའ་བསྩལ་འདུག ༸མགོན་པོ་མཆོག་གིས་ནང་པ་ཚོ་དུས་རབས་ཉེར་གཅིག་པའི་ནང་པ་ཞིག་བྱེད་དགོས་པ་དང་། སརྒྱས་པའི་ཆོས་ཤེས་ནས་དད་པ་ཐོབ་པ་ཞིག་བྱེད་དགོས་གལ་ཡིན་པ་བཀའ་བསྩལ་བ་དང་ཆབས་ཅིག དབང་རྟུལ་དད་པའི་རྗེས་འབྲང་དང་དབང་རྣོན་ཆོས་ཀྱི་རྗེས་འབྲང་ཞེས་གཉིས་ཡོད་པ་ལྟར་དབང་རྣོན་ཆོས་ཀྱི་རྗེས་འབྲང་གི་ཐོག་ནས་འཇུག་ཚེ་སརྒྱས་པའི་ཆོས་དེ་ལོ་བརྒྱ་ཕྲག་ཁ་ཤས་རིང་ལ་གནས་ཐུབ་ངེས་ཡིན་སྟབས་སརྒྱས་པའི་ཆོས་ལ་སློབ་སྦྱོང་བྱེད་དགོས་པ་བཀའ་བསྩལ་ཡོད། མགོན་པོ་མཆོག་གིས་སངས་རྒྱས་པའི་ཆོས་དེ་རྒྱ་གར་ནས་དར་བ་ཅིག་ཡིན་པ་དང་ལྷག་པར་དུ་ཨེ་ཤ་ཡའི་རྒྱལ་ཁབ་ཕལ་མོ་ཆེར་ནང་པའི་བསྟན་པ་དར་ཁྱབ་ཏུ་ཕྱིན་ནས་ཨེ་ཤ་ཡའི་ཁུལ་གྱི་འོད་སྣང་ལྟ་བུར་གྱུར་ཡོད་པ་བཀའ་བསྩལ་ཏེ་རྒྱ་གར་ལྟ་བུར་མཚོན་ན་དུས་རབས་ཉི་ཤུ་པའི་ནང་ Dr. Bhimrao Ramji Ambedkar  དམ་པ་མཆོག་གིས་ནང་པའི་བསྟན་པ་སླར་གསོ་གནང་ཕྱོགས་ཀྱི་ཐད་ལ་རླབས་ཆེན་གྱི་ལེགས་སྐྱེས་ཆེན་པོ་ཕུལ་ཡོད་པ་མ་ཟད་དུས་རབས་ཉི་ཤུ་པ་ནས་ནུབ་ཕྱོགས་པའི་ཕྱི་གླིང་བ་ཚོས་ཀྱང་ནང་པའི་ཆོས་ལ་དགའ་མོས་བྱེད་མཁན་མང་དུ་འགྲོ་བཞིན་ཡོད་པ་བཀའ་བསྩལ་བ་དང་སྦྲགས། ད་ལྟའི་ཆར་སངས་རྒྱས་ཞེས་བརྗོད་སྐབས་གང་འདྲ་ཞིག་ལ་སརྒྱས་ཞེས་བརྗོད་ཀྱི་ཡོད་མེད་དང་། ཆོས་ཟེར་ན་གང་ཞིག་ལ་ཟེར་བ། དེ་བཞིན་ཆོས་དཀོན་མཆོག་ལ་ཉམས་སུ་བླངས་ནས་དཀོན་མཆོག་གསུམ་ངོ་འཕྲོད་རྒྱུ་དེ་གལ་ཆེན་པོ་ཡིན་པ་བཀའ་བསྩལ་ཡོད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཨོ་རངྒ་བྷད་གྲོང་ཁྱེར་ནང་ཕྱི་ཚེས་ ༢༡ ཉིན་༸ཞབས་སོར་བདེ་བར་འཁོད་ཡོད་པ་དང་། མགོན་པོ་༸གང་ཉིད་མཆོག་ནས་ཕྱི་ཚེས་ ༢༢ ཉིན་ནང་པའི་ཚོགས་པའི་རྒྱལ་སྤྱིའི་ནང་པའི་ལྷན་ཚོགས་ཐོག་དབུ་བཞུགས་མཛད་དེ་ནང་པའི་བསྟན་པ་རིན་པོ་ཆེ་འཕེལ་རྒྱས་གཏོང་ཕྱོགས་ཀྱི་བཞུགས་མོལ་ལྷན་ཚོགས་ཚོགས་ཡོད་པ་དང། རྒྱལ་སྤྱིའི་ནང་པའི་ལྷན་ཚོགས་ཐོག་ཤྲི་ལངྐ་དང་བལ་ཡུལ། ལྷོ་ཀོ་རི། ཐེ་ཝན་སོགས་ཀྱི་རྒྱལ་ཁབ་བཅུའི་དགེ་འདུན་པའི་འཐུས་ཚབ་ཀྱིས་འཛུལ་ཞུགས་གནང་ཡོད་པ་རེད། གྲོང་ཁྱེར་ཨོ་རངྒ་བྷད་ནང་ཆིབས་བསྒྱུར་མ་མཛད་གོང་དུ་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཚེས་ ༢༠ ཉིན་རྒྱལ་ས་ལྡི་ལིའི་ St.Columbia’s  སློབ་གྲྭའི་ནང་དུ་ལྡི་ལིར་རྟེན་གཞི་བྱས་པའི་བླ་མ་བཟོད་པ་རིན་པོ་ཆེའི་ Tushita ཆོས་ཚོགས་གསར་འཛུགས་མཛད་དེ་ལོ་ངོ་ ༤༠ འཁོར་བའི་དུས་དྲན་མཛད་སྒོར་དབུ་བཞུགས་མཛད་དེ་མང་ཚོགས་ལ་ང་རྒྱལ་དང་དངངས་སྐྲག་ལ་གདོང་ལེན་ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་བཀྲིན་བསྩལ་ཡོད་པ་རེད། བློ་སྦྱོང་ཚིགས་བརྒྱད་མའི་བཀའ་ཆོས་བཀྲིན་བསྩལ་ཡོད་པ་དང་། ཕྱི་ཚེས་ ༢༡ ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་ IIC ནང་དུ་སྲིད་འཛིན་དམ་པ་ sarvapalle radhakrishna མཆོག་ལ་རྗེས་དྲན་གྱི་གསུང་བཤད་ལས་རིམ་གྱི་སྐུ་མགྲོན་གཙོ་བོར་ཆིབས་བསྒྱུར་མཛད་དེ་གོ་ལ་སྤྱི་ལ་ཁྱབ་པའི་བཟང་སྤྱོད་ཀྱི་བརྗོད་གཞིའི་ཐོག་བཀའ་སློབ་བཀའ་དྲིན་བསྩལ་ཡོད་པ་རེད།

དེ་རིང་རྒྱ་གར་གྱི་དུས་བབ་གསར་ཁང་གིས་གནས་ཚུལ་སྤེལ་བར་ལྟར་ན། ཁ་སང་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་རྒྱལ་ས་ལྡི་ལི་ནས་མཁའ་ལམ་བརྒྱུད་དེ་རྒྱ་གར་ནུབ་ཕྱོགས་ཀྱི་མངའ་སྡེ་ Maharashtra   ཁུལ་གྱི་ Aurangabad  གྲོང་ཁྱེར་དུ་རྟེན་གཞི་བྱས་པའི་ནང་པའི་དགོན་པ་ Lokuttra Mahavihara and Bhikkhu Training Centre ཞེས་པར་ཆིབས་བསྒྱུར་བཀའ་དྲིན་ཐེངས་གཉིས་པ་དེ་བསྐྱངས་ཡོད་པ་དང་། ས་གནས་ཀྱི་འབྲེལ་ཡོད་ཀྱི་གདན་ཞུ་བ་དང་དད་ལྡན་མང་ཚོགས། དེ་བཞིན་སློབ་གྲྭ་ཁག་གི་སློབ་ཕྲུག་སྟོང་ཕྲག་བརྒལ་བས་དགའ་བསུའི་མེ་ཏོག་མཆོད་པའི་ཐོག་༸གོང་ས་མཆོག་ཁུལ་དེར་༸ཞབས་སོར་བདེ་བོར་འཁོད་ཡོད་སྟབས། ཁ་སང་ནས་བཟུང་དགོན་པ་དེར་ཞི་བདེ་དང་མཐུན་ལམ། མཛའ་བརྩེ་སོགས་ཀྱི་དུས་ཚོད་དམིགས་བསལ་བ་ཞིག་ཆགས་ཀྱི་ཡོད་པར་བརྗོད་འདུག ཉིན་གསུམ་རིང་གི་སྤྱིའི་ནང་པའི་ལྷན་ཚོགས་དབུ་འཛུགས་གནང་ཡོད་པ་ལྟར་དེ་རིང་༸གོང་ས་༸སྐྱབས་མགོན་མཆོག་དབུ་བཞུགས་ཐོག་རྒྱ་གར་གྱི་ནང་པའི་དགེ་འདུན་པ་སུམ་བརྒྱ་ལྷག་དང་། རྒྱལ་ཁབ་བཅུ་ལྷག་གི་ཆེད་མཁས་ཀྱི་མི་སྣ་རྣམས་ལྷན་འཛོམས་ཀྱིས་ནང་པའི་བསྟན་པ་རིན་པོ་ཆེ་དེ་འཕེལ་རྒྱས་གཏོང་ཕྱོགས་ཀྱི་ཐད་ནས་བཞུགས་མོལ་ལྷན་ཚོགས་ཤིག་ཚོགས་ཡོད་པ་དང། ཐེངས་འདིའི་ལྷན་ཚོགས་ཐོག་རྒྱ་གར་གྱི་བདེ་སྲུང་དོ་དམ་སྔར་ལྷག་བརྟན་པོ་བྱས་ཡོད་པ་མ་ཟད་ལྷན་ཚོགས་དེར་གདན་ཞུའི་མི་སྣ་མ་གཏོགས་གཞན་སུའང་ཚོགས་བཅར་ཞུ་ཆོག་གི་མེད་པ་རེད། རྒྱ་གར་རྒྱལ་ཡོངས་ནང་པའི་དགེ་འདུན་པའི་དབུ་ཁྲིད་ Sadanand Mahasatvir ལགས་དང་རྒྱལ་སྤྱིའི་ནང་པའི་དགེ་སློང་རྣམས་ལ་སྦྱོང་བརྡར་སྤྲོད་སའི་ལྟེ་གནས་ Chauka ཞེས་པའི་འགན་འཛིན་ Bodhipalo Mahathero ལགས་རྣམ་གཉིས་ཀྱིས་གཟའ་ལྷག་པའི་ཉིན་གསར་འགོད་པ་རྣམས་ལ་འགྲེལ་བརྗོད་གནང་དོན་ལྟར་ན། ཐེངས་འདིའི་རྒྱལ་སྤྱིའི་ནང་པའི་ལྷནཚོགས་དེ་ Aurangabad རུ་འཚོགས་གཏན་འཁེལ་བ་དེ་ནི་ཁུལ་དེར་ལོ་ངོ་ཉིས་སྟོང་ལྔ་བརྒྱ་ལྷག་གི་ལོ་རྒྱུས་རང་བཞིན་ལྡན་པའི་འབྲེལ་བ་དམིགས་བསལ་བ་ཞིག་ཡོད་པ་དང་། དགོན་གྲོང་དེའི་ཉེ་འཁྲིས་སུ་བདག་ཅག་གི་སྟོན་པས་དངོས་སུ་བཀའ་ཆོས་བསྩལ་སའི་གནས་བྱིན་རླབས་ཅན་གཉིས་ཡོད་པ་གསུངས་འདུག  Bodhipalo ལགས་ཀྱིས་གསར་འགོད་པར་སྦྱོང་བརྡར་ལྟེ་གནས་ཁང་དེ་ནས་ད་བར་དགེ་འདུན་པ་བརྒྱ་སྐོར་ཞིག་ལ་སྦྱོང་བརྡར་གནང་ཡོད་པ་དང་། དགེ་འདུན་པ་དེ་དག་གིས་གིས་ཐེངས་འདིའི་ལྷན་ཚོགས་དང་འབྲེལ་བའི་ཕྱོགས་མཐའ་ཁག་གི་དད་ལྡན་པ་ཡོངས་ལ་སྒྲིག་སྤྱོད་ཕྱག་ལེན་ཐད་ནས་འགན་རྐང་བཞེས་གནང་གི་ཡོད་པ་མ་ཟད། ཉིན་གསུམ་རིང་གི་ཚོགས་འདུ་དེར་ཞི་བདེ་བརྟན་བརླིང་སྐྲུན་པར་མཐུན་འགྱུར་གྱི་རོགས་རམ་གནང་གཏན་འཁེལ་ཡོད་པ་ལྟར། ས་གནས་ཀྱི་དད་ལྡན་པ་ཡོངས་ཀྱིས་ཐག་རིང་ནས་ཕེབས་པའི་སྐུ་མགྲོན་རྣམས་ལ་མཐུན་འགྱུར་གནང་གི་ཡོད་པ་རེད་འདུག དེ་བཞིན་ཁོང་གིས་རྒྱལ་སྤྱིའི་ཐོག་དང་རྒྱ་གར་ནང་གི་ནང་པའི་བསྟན་པར་ཞུགས་མཁན་རྣམས་ལ་ཁྱད་པར་ཏོག་ཙམ་ཞིག་ཡོང་གི་ཡོད་ཀྱང་། དེ་ནི་ནང་པའི་ཆོས་གཞུང་དང་འབྲེལ་བ་ཞིག་མ་ཡིན་པར་སྤྱི་ཚོགས་སོ་སོའི་ནང་གི་སྤྱི་ཚོགས་ཀྱི་དཔལ་འབྱོར་གྱི་གྲལ་རིམ་དང་ཤེས་ཡོན་གྱི་འབྱུང་ཁུངས་བཅས་ཀྱི་ཁྱད་པར་ཞིག་ཡིན་པར་བརྗོད་པ་མ་ཟད། ནང་པའི་བསྟན་པ་རིན་པོ་ཆེ་རྒྱ་གར་དུ་ཐོག་མར་དབུ་བརྙེས་ཏེ་རྗེས་སུ་འཛམ་གླིག་གི་ཡུལ་ཕྱོགས་གང་སར་དར་ཁྱབ་བྱུང་བ་ཞིག་ཡིན་ཀྱང་། རྒྱ་གར་གྱི་རྩ་ཁྲིམས་ཀྱི་ཡབ་ཆེན་དུ་འབོད་པའི་མཁས་དབང་ཆེན་པོ་སྐུ་ཞབས་ Dr B.R Ambedkar ལགས་ཀྱི་བཀའ་དྲིན་མ་གཏོགས་ནང་པའི་བསྟན་པ་དེ་རྒྱ་གར་གྱི་ནང་དུ་རྩ་སྟོང་དུ་ཕྱིན་ཡོད་སྐོར་ངོ་སྤྲོད་གནང་འདུག Mahasatvir ལགས་ཀྱིས་ཀྱང་སྔོན་ཆད་རྒྱ་གར་གྱི་ནང་དུ་ནང་པའི་དགོན་པ་ ༨༤༠༠༠ ལྷག་ཡོད་པ་མ་ཟད་དགོན་པ་དེ་དག་ཏུ་དགེ་འདུན་པ་རྣམས་ཀྱིས་ནང་ཆོས་ལ་འཆད་ཉན་ཚགས་ཚུད་གནང་གི་ཡོད་པ་བརྗོད་འདུག གཞི་རྩའི་ཐེངས་འདིའི་རྒྱལ་སྤྱིའི་ནང་པའི་ལྷན་ཚོགས་ཐོག་ཤྲི་ལངྐ་དང་བལ་ཡུལ། ལྷོ་ཀོ་རི། ཐེ་ཝན་སོགས་ཀྱི་རྒྱལ་ཁབ་བཅུའི་དགེ་འདུན་པའི་འཐུས་ཚབ་ཀྱིས་འཛུལ་ཞུགས་གནང་ཡོད་པ་རེད། མཛད་འཆར་ལྟར་ན་སང་ཞོགས་མགོན་པ་༸གང་ཉིད་མཆོག་གིས་ PES ལུས་སྦྱོང་མཐོ་སློབ་ཀྱི་རྩེད་ཐང་དུ་མང་ཚོགས་ལ་ཆོས་འབྲེལ་བསྩལ་རྒྱུ་ཡིན་པ་རེད། ༸སྐུ་པར་རྣམས་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

དབྱིན་ཡུལ་གྱི་གསར་ཁང་ཆེ་གྲས་ Daily Mirror ཞེས་པས་ཁུལ་དེར་རྟེན་གཞི་བྱས་པའི་ Woodland Trust ཞེས་ནགས་ཚལ་སྲུང་སྐྱོབ་དང་ཤིང་སྣ་འདེབས་ལས་ཐོག་གོ་རྟོག་སྤེལ་མཁན་གྱི་ཐེབས་རྩ་ཁང་དང་ཟུང་འབྲེལ་གྱིས་དབྱིན་ཡུལ་གཙོས་རྒྱལ་སྤྱིའི་ས་གནས་གང་སར་ཤིང་སྣ་འདེབས་འཛུགས་དང་འབྲེལ་བའི་ Million Trees campaign ཞེས་ཤིང་སྣ་ས་ཡ་ལྷག་འདེབས་འཛུགས་ཞེས་པའི་ལས་འགུལ་ཞིག་དབུ་འཛུགས་གནང་ཡོད་པ་རེད།  ལས་འགུལ་དེ་དབུ་འཛུགས་གནང་སྟེ་ཉིན་ཤས་སོང་མཚམས་སུ་རྒྱལ་སྤྱིའི་གློག་བརྙན་འཁྲབ་སྟོན་པ་དང་། གཞས་པ་གྲགས་ཅན། དེ་བཞིན་ས་གནས་ཀྱི་གནད་ཡོད་མི་སྣ། མང་ཚོགས་མི་ཉུང་བ་ཞིག་ནས་རྒྱབ་སྐྱོར་གྱིས་སོ་སོའི་སྡོད་ཁང་ཉེ་འཁོར་གཙོ་གྱུར་ས་གནས་ཁག་ཏུ་ཤིང་སྣ་འདེབས་འཛུགས་གནང་བཞིན་ཡོད་པ་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤིང་སྣ་འདེབས་འཛུགས་ཀྱི་བྱ་བ་དེ་ནི་གནམ་གཤིས་འགྱུར་ལྡོག་དང་འབྲེལ་བའི་དཀའ་ངལ་སེལ་བའི་ཐབས་སུ་ང་ཚོ་མི་རྣམས་ནས་གནང་ཐུབ་པའི་བྱ་བ་ཅིག་ཡིན་པར་བཀའ་བསྩལ་དང་སྦྲགས་ཏེ་ད་རེས་ Daily Mirror གསར་ཁང་ནས་ཤིང་སྣ་འདེབས་འཛུགས་ཀྱི་ལས་འགུལ་སྤེལ་བ་དེ་ནི་གཞན་ལ་སེམས་འགུལ་ཐེབས་གཞིའི་ལས་འགུལ་ཞིག་ཀྱང་རེད་ཅེས་བསྔགས་བརྗོད་མཛད་འདུག དེ་བཞིན་༸གོང་ས་མཆོག་གིས་དེང་ཀྱི་འཛམ་བུ་གླིང་འདིའི་ཐོག་ལ་མི་འབོར་འཕེལ་རྒྱས་དང་གནམ་གཤིས་འགྱུར་ལྡོག་དང་འབྲེལ་བའི་དཀའ་ངལ་གཉིས་ནི་ཆེས་ཛ་དྲག་རང་བཞིན་ཅན་ཞིག་ཆགས་ཡོད་སྟབས། དཀའ་ངལ་དེར་ང་ཚོས་མཉམ་རུབ་ཀྱིས་གདོང་ལན་གནང་དགོས་པ་དང་། མགོན་པོ་༸གང་ཉིད་མཆོག་ནས་རྣམ་ཀུན་ཤིང་སྣ་འདེབས་འཛུགས་གནང་སྐབས་སུ་ཤིང་སྣ་དེ་དག་རིམ་པས་འཚར་ལོངས་བྱུང་བ་དང་ལྷན་དུ་འཛམ་བུ་གླིང་འདིའི་བདེ་སྐྱིད་དང་ཞི་བདེ་འཕེལ་བའི་ཐུགས་སྨོན་མཛད་བཞིན་ཡོད་པ་བཀའ་བསྩལ་འདུག ཤིང་སྣ་ས་ཡ་འདེབས་འཛུགས་ཀྱི་ལས་འགུལ་ནང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་ Richard Gere ལགས་ནས་མཉམ་ཞུགས་གནང་བ་དང་འབྲེལ། བོད་མཐོ་སྒང་དེ་ནི་ཨེ་ཤ་ཡའི་རྒྱལ་ཁབ་མང་པོའི་ཆུའི་འབྱུང་ཁུངས་ཡིན་པ་མ་ཟད་འཛམ་གླིང་ཐོག་གྱི་འཁྱགས་རོམ་གྱི་སྣེ་མོ་གསུམ་པར་གྲགས་ཡོད་པ་དང་། ད་ཆ་བོད་མཐོ་སྒང་གི་གནམ་གཤིས་ལ་འགྱུར་ལྡོག་ཕྱིན་ཏེ་འཁྱགས་རོམ་ཁག་ལྡབ་གསུམ་ཙམ་མགྱོགས་པ་བཞུར་བཞིན་པ་སོགས་འགྲེལ་བརྗོད་དང་སྦྲགས། བོད་ཀྱི་གནམ་གཤིས་གནས་སྟངས་ལ་འགྱུར་བ་ཕྱིན་པ་དེས་བོད་ཙམ་མ་ཟད་ཨེ་ཤ་ཡ་དང་ཡོ་རོབ་སོགས་འཛམ་གླིང་སྤྱིའི་གནམ་གཤིས་ལའང་དོ་ཕོག་ཐེབས་ངེས་ཤིག་ཡིན་པ་གསུངས་འདུག ཁོང་ནས་ཐེངས་འདིའི་ཤིང་སྣ་འདེབས་འཛུགས་ཀྱི་ལས་འགུལ་དེ་ནི་དུས་ཚོད་ཀྱི་ཆ་ནས་དགོས་ངེས་ཅན་ཞིག་ཡིན་པར་འགྲེལ་བརྗོད་དང་འབྲེལ་ཏེ་མང་ཚོགས་ནས་སོ་སོའི་ས་གནས་ནང་ཤིང་སྣ་འདེབས་འཛུགས་གནང་སྐྱོང་ཡོང་བའི་སྐུལ་མ་གནང་འདུག གཞི་རྩའི་དབྱིན་ཡུལ་གྱི་ Daily Mirror ཞེས་པའི་གསར་ཁང་ནས་ཤིང་སྣ་ས་ཡ་འདེབས་འཛུགས་ཀྱི་ལས་འགུལ་དང་འབྲེལ་གསར་ཁང་དེའི་གསར་ཤོག་མངགས་ཉོ་གནང་མཁན་གཙོས་མང་ཚོགས་ཚོར་ཤིང་སྣའི་རིགས་འདྲ་མིན་འགྲེམས་སྤེལ་གནང་བ་མ་ཟད། ཚགས་ཤོག་ཐོག་ཤིང་སྣ་འདེབས་འཛུགས་གནང་དགོས་གལ་སྐོར་གོ་རྟོགས་སོགས་སྤེལ་མུས་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་ཤེས་ཡོན་ལམ་ལུགས་ནང་དེང་དུས་ཀྱི་ཤེས་ཡོན་དང་ལྷན་དུ་ནང་སེམས་ཀྱི་རིན་ཐང་གོང་འཕེལ་དང་འབྲེལ་བའི་ལེགས་བཤད་ཟུང་འབྲེལ་ཐོག་ནས་གསར་བརྗེ་ཞིག་ཧ་ཅང་གནང་དགོས་གལ་ཆེ་བའི་ལམ་སྟོན་བསྩལ་བ་དང་འབྲེལ། རྒྱ་གར་གྱི་སྲིད་འཛིན་དམ་པ་སྐུ་ཞབས་ Radhakrishna མཆོག་ནི་དེ་ལྟ་བུའི་ཤེས་ཡོན་ཟུང་འབྲེལ་གྱི་དཔེ་མཚོན་ཡག་ཤོས་ཤིག་ཡིན་པར་བཀའ་བསྩལ་མཛད་སོང་། རྒྱ་གར་གར་གྱི་སྲིད་འཛིན་དམ་པ་ sarvapalle radhakrishna མཆོག་གིས་ ༡༩༦༥  ལོར་རྒྱ་གར་གྱི་བྱང་ཕྱོགས་སིམ་ལ་གྲོང་ཁྱེར་དུ་བཙུགས་པའི་ IIAS  ཞེས་རྒྱ་གར་གྱི་ཡར་ཐོན་ཤེས་ཡོན་ལྟེ་གནས་ཁང་གིས་དེ་རིང་རྒྱ་གར་གྱི་རྒྱལ་ས་ལྡི་ལི་གསར་པའི་ IIC  ནང་དུ་སྲིད་འཛིན་དམ་པར་རྗེས་དྲན་ཞུ་བའི་གསུང་བཤད་ལས་རིམ་གྱི་སྐུ་མགྲོན་གཙོ་བོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ཞུ་ཕུལ་དོན་བཞིན་༸གོང་ས་མཆོག་གིས་དེ་རིང་སྔ་དྲོ་ཚོུད་ ༡༠༌༣༠ ཙམ་ནས་ལས་རིམ་ཐོག་དབུ་བཞུགས་ཀྱིས་སྤྱི་ལ་ཁྱབ་པའི་བཟང་སྤྱོད་ཀྱི་བརྗོད་གཞིའི་ཐོག་བཀའ་སློབ་བཀའ་དྲིན་བསྩལ་ཡོད་པ་རེད། སྐབས་དེར་༸གོང་ས་མཆོག་གིས་ཐོག་མར་དེ་རིང་གི་ལས་རིམ་ཐོག་ལོ་མང་གོང་གི་གྲོགས་པོ་རྙིང་པ་མང་པོ་ཞིག་གཟིགས་རྒྱུ་ཡོད་པ་དང་། སྤྱིར་མགོན་པོ་༸གང་ཉིད་མཆོག་ནས་གྲོགས་པོ་དེ་དག་གི་མཚན་རེ་རེ་བཞིན་ཐུགས་དྲན་གསོ་ཡི་མེད་ཀྱང་ཁོང་རྣམ་པའི་ཞལ་རས་ཐུགས་ལ་གསལ་པོ་ངེས་ཡོད་པ་དང་། ད་ལྟའི་ཆར་གྲོགས་པོ་རྙིང་པ་དེ་དག་བཞིན་མགོན་པོ་མཆོག་༸སྐུ་ན་བགྲེས་ཀྱི་ཡོད་ཀྱང། རང་ཉིད་ཀྱི་མི་ཚེ་འདི་དོན་དང་ལྡན་པ་ཞིག་སྐྱེལ་ཐུབ་ཡོད་མེད་དེ་དེ་ལས་ཀྱང་ཆེས་གལ་ཆེ་ཡིན་པར་བཀའ་བསྩལ་སོང་། ༸གོང་ས་མཆོག་གིས་སྐབས་དེར་སྲིད་འཛིན་དམ་པ་ Radhakrishna མཆོག་ནི་དེ་སྔ་མགོན་པོ་༸གང་ཉིད་མཆོག་ཕྱི་ལོ་ ༡༩༥༦ ལོར་སྟོན་པ་སྐུ་མྱ་ངན་ལས་འདས་ནས་ལོ་ ༢༥༠༠ འཁོར་བའི་རྗེས་དྲན་མཛད་སྒོའི་སླད་རྒྱ་གར་ལ་ཆིབས་བསྒྱུར་མཛད་སྐབས་སུ་རྗེས་དྲན་གྲ་སྒྲིག་གནང་མཁན་གོ་སྒྲིག་ཚོགས་ཆུང་གི་ཚོགས་གཙོ་ཡིན་པར་བཀའ་འགྲེལ་དང་སྦྲགས། སྲིད་འཛིན་དམ་པ་མཆོག་ནི་རྒྱ་གར་གྱི་གནའ་རབས་ལེགས་བཤད་དང་དེང་དུས་ཀྱི་ཤེས་ཡོན་གཉིས་ཀ་ཟུང་དུ་འབྲེལ་བའི་དཔེ་མཚོན་ཚད་ལྡན་ཞིག་ཡིན་པར་བཀའ་བསྩལ་བ་མ་ཟད་ལོ་ངོ་ ༣༠༠༠ བརྒལ་བའི་རྒྱ་གར་གྱི་གནའ་རབས་ལེགས་བཤད་ནང་ अहिंसा ཞེས་འཚེ་མེད་ཞི་བ་དང་། करुणा ཞེས་སྙིང་རྗེའི་སྐོར་ལ་གསུངས་ཡོད་པ་དེ་དག་ཧ་ཅང་རླབས་ཆེན་ཡིན་པར་བཀའ་བསྩལ་བསྐྱར་ནན་མཛད་དེ་དེང་གི་འཛམ་གླིང་ནང་དེ་དག་རིན་ཐང་ལྡན་པ་ཞིག་དང་ཧ་ཅང་དགོས་མཁོ་ཆེ་བ་ཆགས་ཡོད་སྟབས་ལེགས་བཤད་དེ་དག་སྲུང་སྐྱོབ་དང་ཉམས་པ་སླར་གསོ་གནང་བ་དང་ཆབས་ཅིག་ཏུ་དེང་དུས་ཀྱི་ཤེས་ཡོན་དང་ལྷན་དུ་ཟུང་འབྲེལ་གནང་རྒྱུའི་ནུས་པ་དང་གོ་སྐབས་ཆེ་ཤོས་དེ་རྒྱ་གར་ལ་མ་གཏོགས་མེད་པར་བཀའ་སློབ་བཀྲིན་ཆེ་བ་བསྩལ་ཡོད། ༸གོང་ས་མཆོག་གིས་གཞན་ཡང་མགོན་པོ་༸གང་ཉིད་མཆོག་ནི་རྒྱུན་དུ་དེང་རབས་ཀྱི་ཤེས་ཡོན་ལམ་སྲོལ་ལ་སྐྱོན་བརྗོད་ཤུགས་ཆེ་གནང་མཁན་ཞིག་ཡིན་པར་བཀའ་བསྩལ་ཏེ་རྒྱ་གར་གྱི་དཔལ་ནཱ་ལེནྡཱའི་ཆོས་བརྒྱུད་ཀྱི་ལེགས་བཤད་དེ་དག་ཆོས་ལུགས་མ་ཡིན་པར་ཤེས་ཡོན་སློབ་གསོའི་ངོ་བོར་ངོས་འཛིན་གྱིས་དེང་རབས་ཀྱི་ཤེས་ཡོན་བསླབ་གཞིའི་ཁོངས་སུ་འཇོག་རྒྱུ་ཧ་ཅང་ཛ་དྲག་ཆགས་ཡོད་པར་བཀའ་སློབ་བསྐྱར་ནན་མཛད་པ་མ་ཟད། མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་དང་པོ་སྟེ། འགྲོ་བ་མི་གཅིག་འགྱུར་གྱི་འདུ་ཤེས་ཐོག་ནས་འགྲོ་བ་མིའི་རང་བཞིན་ལྷན་རྒྱས་སུ་ཡོད་པའི་བཟང་པོའི་ཡོན་ཏན་གོང་འཕེལ་དང་འབྲེལ་བའི་བཀའ་སློབ་ལས་འཕྲོས་ཏེ་རང་གི་དགྲ་བོ་ནི་རང་གི་དགེ་རྒན་ཡག་ཤོས་ཡིན་པ་གསུང་སྲོལ་ཡོད་པ་ལྟར། རང་གི་གྲོགས་པོ་དང་ངོ་ཤེས་པ་ཚོར་ཉམས་ལེན་བྱས་པའི་བྱམས་བརྩེ་དེ་ནི་ཆགས་པ་དང་འབྲེལ་བ་ཡོད་པ་དང་དོན་དམ་གྱི་བྱམས་བརྩེ་ནི་རང་གི་དགྲ་བོར་ཉམས་ལེན་བྱས་པའི་བྱམས་བརྩེ་དེ་རེད་ཅེས་བཀའ་བསྩལ་ཡོད་པ་རེད། ༸གོང་ས་མཆོག་གི་བཀའ་སློབ་བསྩལ་གྲུབ་རྗེས་བཀའ་འདྲིའི་དགོངས་སྐོར་ཞུ་མཁན་ཁག་གཅིག་གིས་ཡིག་ཐོག་ནས་༸གོང་ས་མཆོག་ལ་ཁོར་ཡུག་དང། བྱམས་བརྩེ། ཤེས་ཡོན་ལམ་ལུགས། ཆོས་ལུགས་སོགས་དང་འབྲེལ་བའི་བཀའ་འདྲི་མང་ཅིག་ཞུས་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་རྒྱ་གར་ནང་༸སྐུ་བཞུགས་མཛད་ནས་ད་ཆ་མི་ལོ་ ༦༠ ལྷག་ཙམ་ཕེབས་ཀྱི་ཡོད་ཀྱང་། རྒྱ་གར་ནང་དེང་སྐབས་ཆོས་ལ་ཉམས་རྒུད་འགྲོ་བཞིན་པའི་རྒྱུ་རྐྱེན་གང་ཡིན་ནམ་ཞེས་བཀའ་འདྲི་ཞུས་པར་མི་མང་པོས་ཆོས་ཉམས་ལེན་གནང་སྐབས་ཆོ་ག་ཕྱག་ལེན་ལ་དོ་སྣང་མང་བ་བྱེད་ཀྱི་ཡོད་པ་དང། ཆོས་ཞེས་པའི་གོ་དོན་གཙོ་བོ་ནི་བློ་སྦྱོང་བའི་ཐོག་ནས་ནང་སེམས་ལ་བསྒྱུར་བཅོས་གནང་རྒྱུ་དེ་ཡིན་ཀྱང་། རྒྱ་གར་བའི་ངོས་ནས་ཆོས་ཀྱི་གོ་དོན་ངོ་མ་དེ་རྟོགས་ཐུབ་ཀྱི་མེད་པར་བཀའ་བསྩལ་མཛད་སོང་། དེ་བཞིན་མ་འོངས་པའི་འཛམ་གླིང་འདིར་རེ་བ་ཅིག་ཡོད་དམ་ཞེས་བཀའ་འདྲི་ཞུས་པར་༸གོང་ས་མཆོག་གིས་ང་ཚོའི་ཤེས་ཡོན་གྱི་ལམ་ལུགས་ནང་ཕྱིའི་དངོས་པོ་ཡར་རྒྱས་ཁོ་ནར་དམིགས་པའི་དེང་དུས་ཀྱི་ཤེས་ཡོན་ཙམ་མ་ཡིན་པར་ནང་སེམས་ཀྱི་རིན་ཐང་གོང་འཕེལ་དང་འབྲེལ་བའི་སློབ་གསོ་སྤྲོད་རྒྱུ་དབུ་འཛུགས་གནང་ཚེ་མ་འོངས་པའི་ལོ་ཉི་ཤུ་དང་སུམ་ཅུའི་ནང་ཤེས་ཡོན་གྱི་ལམ་ལུགས་འདི་སྒྲིམ་མཁན་རྣམས་དངོས་གནས་མི་འདྲ་བ་ཅིག་ཆགས་ངེས་ཡིན་པར་བཀའ་བསྩལ་ཏེ་དེ་འབྲེལ་རྒྱ་གར་གྱི་ཤེས་ཡོན་ལམ་ལུགས་ནང་ད་ཆ་གསར་བརྗེ་ཞིག་དགོས་གལ་ཆེ་བའི་ལམ་སྟོན་བཀའ་དྲིན་ཆེ་བ་མཛད་ཡོད། གཞི་རྩའི་དེ་རིང་རྒྱ་གར་གྱི་སྲིད་འཛིན་དམ་པ་ Dr. Radhakrishna མཆོག་གི་རྗེས་དྲན་གསུང་བཤད་ལས་རིམ་འདིའི་ཐོག་རྒྱ་གར་གྱིི་ཕྱི་སྲིད་དྲུང་ཆེ་དང་དམག་དཔོན། གཞུང་གི་གནད་ཡོད་དཔོན་རིགས་སོགས་གནང་མྱོང་ཡོད་པའི་གནད་ཡོད་མི་སྣ་མང་པོ་ཞིག་ཆེད་ཕེབས་གནང་ཡོད་པ་མ་ཟད། དེ་བཞིན་མཁས་དབང་དང་དོན་གཉེར་ཅན་སོགས་ཁྱོན་མི་གྲངས་ ༢༠༠ ལྷག་འདུ་འཛོམས་བྱུང་འདུག མཛད་སྒོའི་ཐོག་གཞན་ཡང་དམིགས་བསལ་སྐུ་མགྲོན་དུ་རྒྱ་གར་གྱི་གྲོས་ཚོགས་ཚོགས་མི་དང་རྒྱ་གར་གྱི་རིག་གཞུང་ལས་དོན་ལྷན་ཚོགས་ཀྱི་ཚོགས་གཙོ་ Dr. Vinay Saharabuddhe མཆོག་གིས་དབུས་པའི་ IIC རྒྱ་གར་དང་རྒྱལ་སྤྱིའི་ལྟེ་གནས་ཁང་གི་ཚོགས་གཙོ་ NN Vohra མཆོག་སོགས་གནད་ཡོད་མི་སྣ་ཁག་གཅིག་ཕེབས་ཡོད་པ་རེད། རླུང་འཕྲིན་ཁང་གིས་ལས་རིམ་གོ་སྒྲིག་ཞུ་མཁན་ IIAS ལྟེ་གནས་ཁང་གི་ཚོགས་གཙོ་སྐུ་ཞབས་ Kapil Kapoor ལགས་སུ་ལས་རིམ་དེའི་སྐོར་ལ་བཀའ་འདྲི་ཞུས་པར་༸གོང་ས་མཆོག་ལས་རིམ་འདིའི་ཐོག་ཆིབས་བསྒྱུར་མཛད་པ་ནི་མང་ཚོགས་ལ་ཉི་འོད་ནས་གྲིབ་བསིལ་ཐོབ་པ་ལྟ་བུ་ཞིག་བྱུང་བ་དང་། མགོན་པོ་༸གང་ཉིད་མཆོག་ལ་གདན་ཞུ་གསོལ་འདེབས་ཞུས་པ་བཞིན་དངོས་སུ་ཆིབས་བསྒྱུར་བསྐྱངས་བ་འདི་ནི་ང་ཚོའི་ཚོགས་པར་སྦྱིན་རླབས་ཐོབ་པ་ཞིག་ཏུ་ངོས་འཛིན་ཞུ་བཞིན་ཡོད་ཅེས་གསུངས་སོང་། མཛད་འཆར་ལྟར་ན། ༸གོང་ས་༸སྐྱབས་མགོན་ཆེན་པོ་མཆོག་སང་ཉིན་རྒྱ་གར་གྱི་རྒྱལ་ས་དི་ལླཱི་ནས་ Maharashtra མངའ་སྡེའི་གྲོང་ཁྱེར་ Aurangabad ནང་ཉིན་གཅིག་གི་བཀའ་ཆོས་མཛད་འཆར་བསྐྱང་སླད་ཆིབས་བསྒྱུར་བཀྲིན་མཛད་ཀྱི་ཡོད་པ་རེད།

ཟླ་ ༡༡ ཚེས་ ༡༣ ཉིན་ཨ་མི་རི་ཀའི་གྲོས་ཚོགས་འོག་མའི་ནང་ལ་བོད་མིའི་བླ་ན་མེད་པའི་དབུ་ཁྲིད་སྤྱི་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྗེས་ལ་ཆེ་བསྟོད་དང་བོད་མིའི་མིང་དོན་མཚུངས་པའི་རང་སྲིད་རང་སྐྱོང་གི་མངོན་འདོད་ལ་རྒྱབ་སྐྱོར་མཚོན་པའི་གྲོས་འཆར་གསར་པ་ཆེད་འདོན་གནང་འདུག གྲོས་འཆར་གསར་པ་དེ་བཞིན་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་དང་ཚོགས་ཆུང་དེའི་མཉམ་འབྲེལ་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Chris Smith ལགས། དེ་བཞིན་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་གྲོས་ཚོགས་འཐུས་མི་སྐུ་ཞབས་ Ted Yoho ལགས་དང་གྲོས་ཚོགས་འཐུས་མི་སྐུ་ཞབས་ Michael McCaul ལགས་བཅས་ནས་ཆེད་འདོན་གནང་ཐོག་ཡུལ་དེའི་གྲོས་ཚོགས་འཐུས་མི་ལྕམ་ Ann Wagner ལགས་ནས་རྒྱབ་སྐྱོར་གྱི་མཚན་རྟགས་གནང་འདུག གཞི་རྩའི་གྲོས་འཆར་གསར་པ་དེའི་ནང་ལ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་ཞི་འགྲིག་ཡོང་ཐབས་སུ་གཉིས་ཕན་དབུ་མའི་ལམ་གྱི་སྲིད་བྱུས་འདོན་གནང་མཛད་པའི་རྒྱུད་རིམ་དང་། དེ་སྔ་ཕྱི་ལོ་ ༡༩༨༩ ལོར་མགོན་པོ་༸གང་ཉིད་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་མ་ཟད་ ༢༠༠༧ ལོར་ཨ་རིའི་གྲོས་ཚོགས་ནས་༸གོང་ས་མཆོག་ལ་གསེར་གྱི་གཟེངས་རྟགས་ཕུལ་བ། ལྷག་པར་དུ་༸གོང་ས་མཆོག་གིས་དུས་དང་རྣམ་པ་ཀུན་ཏུ་བོད་རྒྱའི་དཀའ་རྙོག་ཙམ་མ་ཟད་འཛམ་བུ་གླིང་ཐོག་འཕྲད་བཞིན་པའི་དཀའ་རྙོག་ཚང་མ་འཚེ་བ་མེད་པར་གྲོས་མོལ་དང་ཞི་བའི་ཐོག་ནས་གསལ་ཐབས་གནང་གལ་ཡིན་པའི་བཀའ་སློབ་ལམ་སྟོན་སྩོལ་བཞིནཔ། དེ་བཞིན་ཨ་རི་གཞུང་ནས་བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་སྲུང་སྐྱོན་སླད་རོགས་རམ་གནང་བཞིན་པའི་གནས་སྟངས་སོགས་འགྲེལ་བརྗོད་ལུང་འདྲེན་དང་སྦྲགས། ཨ་མི་རི་ཀའི་གྲོས་ཚོགས་ནས་ཨ་རི་དང་བོད་དབར་གྱི་ཐུན་མོང་མ་ཡིན་པའི་འབྲེལ་བ་དང་བོད་ཀྱི་རིག་གནས་ཁག་སྲུང་སྐྱོབ་ཐུབ་ཐབས་སུ་བོད་མིའི་མིང་དོན་མཚུངས་པའི་རང་སྲིད་རང་སྐྱོང་གི་མངོན་འདོད་ལ་རྒྱབ་སྐྱོར་བྱེད་དགོས་པ་དང་། ༸གོང་ས་མཆོག་གི་ཐུགས་བསྐྱེད་དམ་བཅའ་སྤྱི་དང་ལྷག་པར་དུ་མགོན་པོ་༸གང་ཉིད་མཆོག་གིས་འཛམ་གླིང་ཐོག་ཞི་བདེ་དང་འཚེ་བ་མེད་པའི་ལྟ་སྤྱོད་གོང་འཕེལ་མཛད་བཞིན་པར་ཨ་རིའི་གྲོས་ཚོགས་ཀྱིས་ཆེ་བསྟོད་དང་རམ་འདེགས་ཞུ་དགོས་པ། དེ་བཞིན་ཨ་རིའི་གྲོས་ཚོགས་གོང་འོག་གཉིས་ཀས་རྒྱལ་སྤྱིའི་དཀའ་རྙོག་ཁག་གསལ་ཐབས་སུ་མགོན་པོ་གང་ཉིད་མཆོག་དང་ལྷན་དུ་དྲྭ་ཐོག་བརྒྱུད་གྲོས་མོལ་གྱི་ལེ་ཚན་ཞིག་གོ་སྒྲིག་ཞུ་དགོས་པ་བཅས་དོན་ཚན་གཙོ་བོ་གསུམ་འཁོད་འདུག ད་ལྟའི་ཆ་ལ་གྲོས་འཆར་གསར་པ་དེ་ཨ་མི་རི་ཀའི་གྲོས་ཚོགས་ཀྱི་གྲོས་ཆོད་གཏན་འབེབས་འགྲོ་ལུག་ལྟར་ཡུལ་དེའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་ལ་ཕུལ་ཏེ་གྲོས་བསྡུར་དང་དཔྱད་ཞིབ་གནང་མུས་ཡིན་པ་རེད། རྩ་བའི་ད་རེས་ཙམ་མ་ཟད་ཉེ་ཆར་ཕྱི་ཟླ་དགུ་པའི་ལ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་དང་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ཀྱིས་གཙོས་པའི་གྲོས་ཚོགས་འཐུས་མི་ཁག་གཅིག་ནས་ཡུལ་དེའི་གྲོས་ཚོགས་གོང་འོག་གཉིས་སུ་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིས་བོད་ཐོག་འཛིན་པའི་སྲིད་བྱུས་ནང་གསལ་བའི་དོན་ཚན་ཁག་ལ་རྒྱས་བཤད་དང་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་ཐད་རྒྱ་ནག་གཞུང་ལ་ཐེ་བྱུས་བྱེད་རྒྱུའི་ཐོབ་ཐང་མེད་པ། དེ་བཞིན་བོད་ཀྱི་རང་བྱུང་ཁོར་ཡུག་སྲུང་སྐྱོབ་དགོས་པ། ཨ་མི་རི་ཀའི་སྲིད་གཞུང་ནས་བོད་མིར་རོགས་སྐྱོར་མུ་མཐུད་གནང་དགོས་པ་སོགས་དོན་ཚན་ཆེ་ཁག་ལྔ་ཙམ་འཁོད་པའི་ Tibetan Policy and Support Act of 2019 ཞེས་ཨ་རིའི་བོད་དོན་ཁྲིམས་འཆར་གསར་ཞིག་ཆེད་འདོན་གནང་སྟེ་ཡུལ་དེའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་ཁྲིམས་ལུགས་ཚོགས་ཆུང་གཉིས་སུ་ཕུལ་ཡོད་པ་དང་། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འབྲེལ་ཡོད་རྣམ་པ་གཙོས་ས་གནས་བོད་མི། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་གཞུང་འབྲེལ་གནད་ཡོད་མི་སྣའི་འཚམས་གཟིགས་སྐབས་སུ་ཁྲིམས་འཆར་དེ་གཏན་འབེབས་ཐུབ་ཐབས་སུ་ཞུ་གཏུག་གནང་མུས་ཡིན་པ་རེད།

དེ་རིང་ཕྱི་ཟླ་ ༡༡ ཚེས་ ༢༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་གར་གྱི་རྒྱལ་ས་ལྡི་ལིར་མི་གྲངས་སྟོང་ཕྲག་འགའ་ཤས་ཤིག་ལ་ང་རྒྱལ་དང་དངངས་སྐྲག་ལ་གདོང་ལེན་ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་བཀྲིན་བསྩལ་གནང་མཛད་ཡོད་པ་མ་ཟད། སྐབས་དེར་ད་དུང་མགོན་པོ་གང་ཉིན་མཆོག་ནས་མི་གྲངས་སྟོང་ཕྲག་དྲུག་ལྷག་འདུས་པ་དེ་དག་ལ་བློ་སྦྱོང་ཚིག་བརྒྱད་མའི་ཆོས་འབྲེལ་ཡང་བཀྲིན་བསྩལ་གནང་མཛད་ཡོད་པ་རེད། རྒྱལ་ལ་ལྡི་ལིའི་ St.Columbia’s སློབ་གྲྭར་གོ་སྒྲིག་ཞུས་པའི་དེ་རིང་གི་མཛད་སྒོ་དེ་ནི་ལྡི་ལིར་རྟེན་གཞི་བྱས་པའི་བླ་མ་བཟོད་པ་རིན་པོ་ཆེའི་ Tushita ཆོས་ཚོགས་གསར་འཛུགས་མཛད་དེ་ལོ་ངོ་ ༤༠ འཁོར་བའི་དུས་དྲན་གྱི་མཛད་སྒོ་ཞིག་ཡིན་པ་དང་། མཛད་སྒོ་དེའི་ཐོག་སློབ་གྲྭ་དེའི་སློབ་ཕྲུག་སྟོང་ཕྲག་གཉིས་བརྒལ་བ་ཞིག་དང་། ལྡི་ལི་ཁུལ་གྱི་ཤེས་ལྡན་མི་སྣ་དང་ཕྱི་རྒྱལ་གྱི་གཞུང་ཚབ་ཁག་གི་མི་སྣ། ཧི་མ་ལ་ཡའི་མི་རིགས དེ་བཞིན་བོད་མི་བཅས་ཁྱོན་མི་གྲངས་སྟོང་ཕྲག་དྲུག་ལྷག་འདུ་འཛོམས་བྱུང་ཡོད་པ་ལྟར། མགོན་པོ་༸གང་ཉིད་མཆོག་གིས་སྐབས་དེར་སྤྱིར་ངོས་རང་མང་ཚོགས་ཐུགས་འཕྲད་བྱ་རྒྱུར་དགའ་པོ་ཡོད་ཀྱང་། ལོ་ན་གཞོན་པའི་གྲས་ཐུགས་འཕྲད་བྱ་རྒྱུར་དེ་བས་དགའ་བ་དང་། ལྷག་དོན་ངོས་རང་ཡང་ལོ་ཆུང་ཆུང་ཡིན་པའི་སྣང་པ་ཞིག་ཡོང་གི་འདུག་ཅེས་བཀའ་བསྩལ་བ་དང་སྦྲགས། དུས་ཚོད་ཀྱི་འགྱུར་བའི་ཆོས་ཉིད་ལ་ང་ཚོ་སུས་ཀྱང་སྟངས་འཛིན་བྱེད་ཐབས་མེད་ཀྱང་། དུས་ཚོད་དམ་འཛིན་བྱས་ཏེ་མ་འོངས་པའི་དུས་ཪབས་དེ་ཞི་བདེ་ལྡན་པ་ཞིག་བསྐྲུན་ཐུབ་པའི་ནུས་པ་དེ་ང་ཚོེར་ལྡན་ཡོད་སྟབས། ལོ་ན་ཆུང་བ་ཚོས་ད་ལྟ་ནས་གོ་སྐབས་དེ་སོ་སོ་རང་ཉིད་ཀྱི་ལས་འགན་ཡིན་བསམ་པའི་ཐོག་ནས་དུས་ཪབས་ ༢༡ དེ་བདེ་སྐྱིད་ལྡན་པ་ཞིག་ཡོང་ཐབས་གནང་དགོས་པ་དང་། དེ་ནི་སོ་སོ་རང་ཉིད་ཀྱི་ཁེ་ཕན་དང་ཐད་ཀར་འབྲེལ་བ་ཡོད་པའི་ལམ་སྟོན་བཀའ་བསྩལ་གནང་མཛད་པ་མ་ཟད། ད་ལྟའི་འཛམ་བུ་གླིང་འདིའི་དཀའ་ངལ་ཕལ་ཆེ་བ་མིས་བཟོས་པའི་དཀའ་ངལ་དང་། དེ་ཡང་གཞི་རྩ་གཙོ་བོ་དེ་ང་རྒྱལ་དང་རང་གཅེས་འཛིན། ཁོང་ཁྲོ་སོགས་ནས་ཡོང་གི་ཡོད་སྟབས། དཀའ་ངལ་དེ་དག་སེལ་བའི་འགན་དེ་ཡང་ང་ཚོ་རང་ལ་ཡོད་པའི་ལམ་སྟོན་བསྩལ་གནང་མཛད་དེ། སྤྱིར་འགྲོ་བ་མིའི་རིགས་དེ་སྤྱི་ཚོགས་ལ་བརྟེན་དགོས་པའི་སེམས་ཅན་ཞིག་དང་། ལྷག་པར་དུ་སྔོན་གྱི་དུས་རབས་དང་མི་འདྲ་བར་དེང་སྐབས་ཚན་རིག་དང་སྤྱི་ཚོགས་གོང་འཕེལ་དཔལ་འབྱོར་སོགས་ཕྱོགས་གང་སྤྱིའི་ཐད་ནས་ཤར་ཕྱོགས་ཀྱི་ནུབ་ལ་བརྟེན་དགོས་པ་དང་། དེ་བཞིན་བྱང་ཕྱོགས་ཀྱི་ལྷོ་ལ་བརྟེན་དགོས་པ་དེ་དངོས་ཡོད་གནས་སྟངས་ཡིན་སྟབས། ཚང་མར་ང་ཚོ་འགྲོ་བ་མི་གཅིག་ཡིན་བསམ་པའི་འདུ་ཤེས་དེ་ངེས་པར་དུ་དགོས་པའི་ལམ་སྟོན་ཡང་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་ད་དུང་། ཆོས་ལུགས་མཐུན་འབྲེལ་ཡོང་ཐབས་དང་འབྲེལ་ཏེ། རྩ་བའི་འཛམ་བུ་གླིང་གི་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་། ཚང་མའི་དམིགས་ཡུལ་དེ་བདེ་བ་འགྲུབ་ཐབས་ཤིག་ཡིན་པ་དང་། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གི་ངོས་ནས་རྒྱ་གར་གྱི་ལོ་ངོ་སྟོང་ཕྲག་ནས་ཡོད་པའི་འཚེ་མེད་ཞི་བ་དང་། སྙིང་རྗེ་བཅས་ཀྱི་རྩ་ཆེའི་ཪིག་གཞུང་དེ་དག་ལས་བྱུང་བའི་ཆོས་ལུགས་རིས་མེད་ཀྱི་རིག་གཞུང་བཟང་པོ་དེར་ཡི་རང་བསྔགས་བརྗོད་མཛད་པ་དང་འབྲེལ། རིག་གཞུང་བཟང་པོ་དེ་དག་དེང་དུས་ཀྱི་ཤེས་ཡོན་དང་ཟུང་འབྲེལ་ཐོག་ནས་སློབ་སྦྱོང་བྱེད་དགོས་པའི་ལམ་སྟོན་བཀའ་བསྩལ་གནང་མཛད་པ་མ་ཟད། མགོན་པོ་༸གང་ཉིད་མཆོག་གི་ངོས་ནས་དེང་སྐབས་རྒྱ་གར་ནང་ཪིག་གཞུང་དེ་བསྐྱར་གསོ་ཡོང་ཐབས་ཀྱི་འབེད་བརྩོན་གནང་གི་ཡོད་པའི་སྐོར་ཡང་བཀའ་བསྩལ་འདུག དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་མགོན་པོ་༸གང་ཉིད་མཆོག་གི་སྐུ་ཚེའི་ཐུགས་དགོངས་བཞི་སྙིང་བསྡུས་ཀྱི་ངོ་སྤྲོད་བསྩལ་གནང་མཛད་པ་དང་སྦྲགས་མང་ཚོགས་ལ་བློ་སྦྱོང་ཚིག་བརྒྱད་མའི་ཆོས་འབྲེལ་བཀྲིན་བསྐྱངས་འདུག གཞི་རྩའི་བོད་མི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཚེས་ ༡༩ ཉིན་བཞུགས་སྒར་རྡ་རམ་ས་ལ་ནས་རྒྱལ་ས་ལྡི་ལིར་༸ཞབས་སོར་འཁོད་པ་ཞིག་ཡིན་པ་དང་། ཕྱི་ཚེས་ ༢༡ ཉིན་མགོན་པོ་གང་ཉིད་མཆོག་གིས་རྒྱལ་ས་ལྡི་ལིར་རྒྱ་གར་གྱི་སྲིད་བློན་དམ་པ་ Sarvapalli Radhakrishna མཆོག་གི་དྲན་རྟེན་འགྲེམས་སྟོན་མཛད་སྒོ་ཐེངས་ ༢༤ པའི་ཐོག་དབུ་བཞུགས་དང་འབྲེལ་ལམ་སྟོན་བཀའ་སློབ་བསྩལ་གནང་མཛད་རྒྱུ་དང་། དེ་ནས་ཕྱི་ཚེས་ ༢༣ ཉིན་ Maharashtra མངའ་སྡེའི་ Aurangabad གྲོང་ཁྱེར་ནང་ཉིན་གྲངས་གཅིག་རིང་གི་མཛད་འཆར་ལྟར་ཁུལ་དེར་ཆིབས་བསྒྱུར་བཀྲིན་མཛད་རྒྱུ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་རྒྱལ་ས་ལྡི་ལི་དང་ Maharashtra མངའ་སྡེའི་ Aurangabad གྲོང་ཁྱེར་ནང་གི་མཛད་འཆར་བསྐྱང་སླད་དེ་རིང་སྔ་དྲོ་ཕྱག་ཚོད་ ༧་༣༠ ཙམ་ལ་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་མཛད་དེ་གྷ་གྷལ་གནམ་ཐང་ནས་མཁའ་ལམ་བརྒྱུད་རྒྱལ་ས་ལྡི་ལིར་༸ཞབས་སོར་བདེ་བར་འཁོད་འདུག མཛད་འཆར་ལྟར་ན་དེ་རིང་ལྡི་ལིར་ཉིན་གཅིག་གི་རིང་ལ་༸སྐུ་ལྷོད་བཞུགས་མཛད་རྒྱུ་དང་སང་ཉིན་ཕྱི་ཚེས་ ༢༠ ཉིན་ཁུལ་དེར་རྟེན་གཞི་བྱས་པའི་བླ་མ་བཟོད་པ་རིན་པོ་ཆེའི་ Tushita ཆོས་ཚོགས་དབུ་བརྙེས་ནས་ལོ་ངོ་ ༤༠ འཁོར་བའི་དུས་དྲན་མཛད་སྒོ་དང་བསྟུན་ཁུལ་དེའི་ St. Columba's སློབ་གྲྭར་ང་རྒྱལ་དང་མངངས་སྐྲག་ལ་གདོང་ལེན་ཞེས་པའི་བརྗོད་གཞིའི་ཐོག་དགེ་ལས་སློབ་ཕྲུག་བཅས་མི་གྲངས་ ༤༠༠༠ ཡས་མས་ཤིག་ལ་བཀའ་སློབ་བཀའ་འདྲིན་བསྩལ་རྒྱུ་རེད་འདུག དེ་རྗེས་ཕྱི་ཚེས་ ༢༡ ཉིན་རྒྱ་གར་གྱི་སྲིད་འཛིན་དམ་པ་ Sarvapalli Radhakrishnan མཆོག་གི་དྲན་རྟེན་འགྲེམས་སྟོན་མཛད་སྒོ་ཐེངས་ ༢༤ པ་དང་འབྲེལ་བའི་ Indian Institute of Advanced Studies ཞེས་པའི་སློབ་གཉེར་ཁང་གི་གོ་སྒྲིག་འོག་ India International Center ཞེས་པའི་ལྟེ་གནས་ཁང་དུ་ Universal Ethics འམ་གོ་ལ་སྤྱི་ལ་ཁྱབ་པའི་བཟང་སྤྱོད་ཀྱི་བརྗོད་གཞིའི་ཐོག་བཀའ་སློབ་བཀའ་འདྲིན་བསྩལ་གཏན་ཁེལ་འདུག རྩ་བའི་ Indian Institute of Advanced Studies ཞེས་པའི་བསྟི་གནས་ཁང་དེ་ Ministry of Human Resource Development འམ་རྒྱ་གར་གཞུང་གི་ཆེད་མཁས་མི་སྣ་གསོ་སྐྱོང་བསྟི་གནས་ཁང་གི་འོག་རང་སྐྱོང་སྡེ་ཚན་ཞིག་ཡིན་པ་མ་ཟད། བསྟི་གནས་ཁང་དེ་རྒྱ་གར་སྲིད་འཛིན་གྱི་དབྱར་ཁའི་བཞུགས་གནས་སུ་རྟེན་གཞི་བྱས་ཡོད་པ་རེད། ཁ་སང་རྒྱ་གར་གྱི་ Deccan Herald གསར་ཁང་གི་ཐེངས་འདིའི་༸གོང་ས་མཆོག་གི་ལྡི་ལི་ནང་གི་མཛད་འཆར་དང་འབྲེལ་བའི་གནས་ཚུལ་སྤེལ་བའི་ནང་དུ་རྒྱ་གར་གཞུང་གི་དགག་བྱ་གང་ཡང་མེད་པའི་ཐོག་ནས་བསྟི་གནས་ཁང་གིས་༸གོང་ས་མཆོག་གདན་ཞུ་གནང་བ་དེ་ནི་སྔ་ལོར་རྒྱ་གར་གཞུང་གི་དེ་གའི་དཔོན་རིགས་རྣམས་ལ་བོད་མིའི་གཞུང་འབྲེལ་མཛད་སྒོའི་ཐོག་མཉམ་ཞུགས་གནང་རྒྱུ་མེད་པའི་བརྡ་ཁྱབ་བཏང་བའི་གནད་དོན་བྱུང་རྗེ་སུ་བོད་མིའི་ཐོག་འཛིན་པའི་བཞེངས་ཕྱོགས་ལ་འགྱུར་བ་ཕྲན་བུ་སོང་བར་ངོས་འཛིན་གནང་གི་འདུག་པ་དང་། དེང་སྐབས་རྒྱ་དཀར་ནག་གཉིས་ཀྱི་འབྲེལ་ལམ་ཡག་པོ་མེད་པའི་ཐོག་ལ་ད་ལན་རྒྱ་གར་གཞུང་དང་འབྲེལ་ཡོད་རང་སྐྱོང་སྡེ་ཚན་ཞིག་གིས་༸གོང་ས་མཆོག་གདན་འདྲེན་ཞུས་པ་དེས་རྒྱ་ནག་གཞུང་ལ་ཁོང་ཁྲོ་སློང་རྒྱུ་ཉག་གཅིག་ཡིན་པར་འགྲེལ་བརྗོད་བྱས་འདུག མཛད་འཆར་ལྟར་ན་རྒྱལ་ས་ལྡི་ལི་ནང་གི་མཛད་འཆར་ཁག་ལེགས་པར་གྲུབ་རྗེས། ༸གོང་ས་མཆོག་ཕྱི་ཚེས་ ༢༢ ཉིན་ Maharashtra མངའ་སྡེའི་གྲོང་ཁྱེར་ Aurangabad ནང་གི་མཛད་འཆར་སླད་རྒྱལ་ས་ལྡི་ལི་ནས་ཆིབས་ཐོན་མཛད་ཀྱི་ཡོད་པ་རེད། ཨོ་རངྒ་བྷད་ནང་རྟེན་གཞི་བྱས་པའི་ Lokuttara International Bhikku Training Center ཞེས་རྒྱལ་སྤྱིའི་ནང་པའི་དགེ་སློང་སྦྱོང་བརྡར་བསྟི་གནས་ཁང་གི་གདན་ཞུ་གནང་ཐོག་གྲོང་ཁྱེར་དེར་ཡོད་ PES ལུས་སྦྱོང་མཐོ་སློབ་ཀྱི་རྩེད་ཐང་དུ་ཆོས་འབྲེལ་བཀའ་དྲིན་བསྐྱང་གཏན་ཁེལ་ཡོད་པ་རེད། ཆིབས་བསྒྱུར་གྱི་༸སྐུ་པར་བོད་མིའི་སྒྲིག་འཛུགས་ཀྱི་དྲྭ་རྒྱ།

དེ་རིང་སྔ་དྲོ་ཆུ་ཚོད་ ༩༌༣༠ ཙམ་ལ་ཧི་མཱ་ཅལ་མངའ་སྡེའི་སྲིད་སྐྱོང་སྐུ་ཞབས་ Bandaru Dattatreya མཆོག་ནས་ཞུགས་སྒར་༸རྒྱལ་བའི་རྒྱལ་ཕོ་བྲང་དུ་ཆེད་བཅར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཚམས་འདྲི་ཞུས་པ་དང་སྦྲགས་ཏེ་དམིགས་མཇལ་མོལ་གནང་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་མཇལ་མོལ་སྐབས་སུ་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཞི་པོ་ངོ་སྤྲོད་མཛད་པ་དང་འབྲེལ།དེང་གི་འཛམ་བུ་གླིང་འདིའི་ཐོག་རྒྱ་གར་གྱི་གནའ་བོའི་རིག་གནས་སྤྱི་དང་ལྷག་པར་དུ་རྒྱ་གར་གྱི་རིག་གནས་ནང་དུ་གསུངས་པའི་འཚེ་བ་མེད་པ་དང་ཞི་གནས། ལྷག་མཐོང་ །དེ་བཞིན་བཟང་སྤྱོད་ཀྱི་ཆ་དེ་དག་འགྲོ་བ་མིའི་སྤྱི་ཚོགས་ཁྲོད་དུ་གལ་འགངས་ཆེན་པོ་ཆགས་ཡོད་སྟབས་རིག་གནས་དེ་དག་རྒྱུན་འཛིན་གནང་རྒྱུ་གལ་ཆེན་པོ་ཡིན་པ་སོགས་བཀའ་བསྩལ་འདུག དེའི་སྐོར་ཧི་མཱ་ཅལ་མངའ་སྡེའི་སྲིད་སྐྱོང་སྐུ་ཞབས་ Bandaru Dattatreya མཆོག་གིས་ཕྱོགས་གཉིས་ཀྱི་མཇལ་མོལ་གྲུབ་མཚམས་སུ་གསར་འགོད་པར་ད་རེས་ཀྱི་མཇལ་མོལ་འདི་ནི་གཙོ་བོ་ཆོས་ཕྱོགས་ཀྱི་རྣམ་པ་ཞིག་ཡིན་པ་དང་། དེ་ཡང་ང་རང་མངའ་སྡེ་འདིའི་སྲིད་སྐྱོང་གི་འགན་འཁུར་བ་ནས་བཟུང་ལས་དོན་ཁག་ལམ་ལྷོང་ཡོང་ཆེད་༸གོང་ས་མཆོག་གི་མཇལ་ཁར་བཅར་བ་ཡིན་པ་མ་ཟད་༸གོང་ས་མཆོག་མངའ་སྡེ་འདིའི་ནང་༸སྐུ་བཞུགས་གནང་གི་ཡོད་སྟབས། མངའ་སྡེའི་གཞུང་དང་རྒྱ་གར་དབུས་གཞུང་ནས་མཐུན་རའགྱུར་གང་ཞུ་དགོས་པ་དང་། ལྷག་པར་དུ་མགོན་པོ་༸གང་ཉིད་མཆོག་གི་༸སྐུའི་འཕྲོད་བཞེས་ཀྱི་གནས་བབ་སོགས་ཀྱི་ཐོག་རྒྱུས་ལོན་གནང་ཕྱིར་ཡོང་བ་ཡིན་ཞེས་གསུངས་སོང་། དེ་བཞིན་དབུ་ཁྲིད་རྣམ་གཉིས་དབར་སྲིད་བློན་མོ་དཱི་སྐོར་ལ་བཀའ་མོལ་བྱུང་ཡོད་པ་ལྟར་མགོན་པོ་༸གང་ཉིད་མཆོག་ནས་སྲིད་བློན་མཆོག་གི་ལས་དོན་ལ་བསྔགས་བརྗོད་དང་སྦྲགས། མགོན་པོ་༸གང་ཉིད་མཆོག་གིས་རྒྱ་གར་གི་གནའ་བོའི་རིག་གཞུང་སླར་གསོ་མཛད་བཞིན་པའི་མཛད་འཕྲིན་ཁག་སྙན་གསེང་ཞུ་གནང་ཡོང་བར་བཀའ་མངགས་བསྩལ་འདུག གཞི་རྩའི་ཧི་མཱ་ཅལ་མངའ་སྡེའི་སྲིད་སྐྱོང་སྐུ་ཞབས་ Bandaru Dattatreya མཆོག་གིས་དེ་རིང་༸གོང་ས་མཆོག་དང་མཇལ་མོལ་གྲུབ་མཚམས་སུ་བོད་མིའི་སྒྲིག་འཛུགས་ལ་འཚམས་གཟིགས་དང་སྦྲགས་བཀའ་བློན་རྣམ་པ་དང་ལྷན་ནང་མོལ་གནང་ཡོད་པ་དང་། དེ་བཞིན་ཚོགས་གཞོན་མཆོག་གིས་དབུས་པའི་བོད་མི་མང་སྤྱི་འཐུས་ཁག་གཅིག་དང་མཇལ་མོལ་གནང་སྟེ་བོད་མིའི་སྒྲིག་འཛུགས་དང་བོད་དོན་ཐོག་རྒྱུས་ལོན་གནང་ཡོད་པ་རེད།