བཙན་བྱོལ།

རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་གྲྭ་ཚང་བྱེས་བྱ་བྲལ་ཁང་ཚན་གྱི་དགེ་འདུན་པ་ཁག་ཅིག་གིས་ཆེད་གཉེར་གནང་བའི་ལྗང་རླུང་ཚོགས་པས་སྔ་ལོ་ ༢༠༡༧ ལོ་ནས་དབུ་འཛུགས་ཀྱིས་དུས་ཡུན་ལོ་ངོ་གཅིག་ཏག་ཏག་རིང་ལ་བོད་ཕྱི་ནང་གཉིས་ཀྱི་སྤྱི་ཚོགས་ཁྲོད་ལྗང་རླུང་དཔེ་ཀློག་བྱ་འགུལ་ཞིག་སྤེལ་ཡོད་པ་དང་ལྗང་རླུང་དཔེ་ཀློག་གི་བྱ་འགུལ་ནང་ཞུགས་མཁན་རྩེ་ཕུད་ཨང་རིམ་གསུམ་ལ་ཁ་སང་ལྗང་རླུང་ཚོགས་པ་གཉེར་ནས་ལོ་ངོ་བཅུ་འཁོར་བའི་དུས་ཚིགས་དང་བསྟུན་དཔེ་ཀློག་གི་བྱ་དགའ་གནང་ཡོད་པ་རེད། ལྗང་རླུང་དཔེ་ཀློག་འགྲན་བསྡུར་ནང་ཞུགས་མཁན་དེ་དག་གི་ཁྲོད་ནས་ཨང་གསུམ་པ་རྒྱ་གར་ལྷོ་ཕྱོགས་སེ་ར་དགོན་གྱི་དགེ་བཤེས་ཉི་མ་རྒྱལ་མཚན་ལགས་དང་འཇིགས་མེད་རྒྱ་མཚོ་ལགས་རྣམ་གཉིས་ལ་དེབ་ ༢༥ བཀླགས་པའི་མཚན་སྙན་གཟེངས་བསྟོད་དང་བྱ་དགའ་ཨ་སྒོར་ ༥༠ ཐོབ་པ་དང་། ཨང་གཉིས་པ་རྒྱ་གར་ལྷོ་ཕྱོགས་སེ་ར་བྱེས་ཀྱི་དགེ་འདུན་པ་ཐུབ་བསྟན་ཟླ་བ་ལགས་ལ་དེབ་བདུན་ཅུ་གྱ་ཅུ་ཙམ་ཀློག་མཁན་གྱི་གཟེངས་བསྟོད་དང་ཨ་སྒོར་ ༡༥༠ བྱ་དགའ་ཐོབ་ཡོད་པ་རེད། ཨང་དང་པོ་དེ་བོད་མདོ་སྨད་རོང་བོ་དགོན་ཆེན་གྱི་དགེ་འདུན་པ་པདྨ་འཕྲིན་ལས་ལགས་ལ་དེབ་ ༡༠༠ བཀླགས་པའི་ལྗང་རླུང་ཕུལ་བྱུང་དཔེ་ཀློག་པའི་མཚན་སྙན་གཟེངས་བསྟོད་དང་ཨ་སྒོར་ ༡༠༠༠ བྱ་དགའ་ཐོབ་འདུག ལྗང་རླུང་ཚོགས་པས་དཔེ་ཀློག་འགྲན་བསྡུར་གྱི་བྱེད་སྒོ་དེ་སྤེལ་དགོས་དོན་ནི་བོད་པའི་སྤྱི་ཚོགས་ནང་དཔེ་དེབ་བཀལག་རྒྱུའི་གོམས་གཤིིས་སྤེལ་ཐབས་ཆེད་དུ་རེད་འདུག་པ་དང་། ལྗང་རླུང་ཚོགས་པ་དེ་ཕྱི་ལོ་ ༢༠༠༧ ལོར་སེ་ར་བྱེས་བྱ་བྲལ་ཁང་ཚན་གྱི་གྲྭ་རྐྱང་ཁག་ཅིག་ནས་ཆེད་འཛུགས་གནང་བ་ཞིག་ཡིན་ཅིང་ཚོགས་པ་དེ་ནི་རིག་གནས་ཁོ་ན་དང་འབྲེལ་བའི་ཚོགས་པ་ཞིག་ཡིན་པ་རེད། ཚོགས་པ་དེས་ད་བར་ལྗང་རླུང་ཚགས་པར་འདོན་སྤེལ་དང་རིག་གནས་འཆད་ཁྲིད། དཔེ་དེབ་ ༩༠ པར་སྐྲུན་བཅས་གནང་ཡོད་པ་རེད།

དེ་སྔ་༸གོང་ས་༸སྐྱབས་མགོན་ཆེན་པོ་མཆོག་དང་བོད་གཞུང་ཚོང་དོན་སྐུ་ཚབ་རྒྱ་གར་དུ་ཕེབས་སྐབས་གསུང་སྒྱུར་གྱི་ཞབས་ཞུ་གནང་མྱོང་མཁན་ཡབ་གཞིས་གཡུ་ཐོག་འཇིགས་མེད་རྡོ་རྗེ་ལགས་ཟླ་ ༨ ཚེས་ ༤ ཉིན་ཨ་རིའི་ Seattle མངའ་སྡེའི་སྨན་ཁང་ཞིག་ནང་དགུང་ལོ་ ༨༧ ཐོག་དགོངས་པ་རྫོགས་འདུག རྩ་བའི་ཡབ་གཞིས་གཡུ་ཐོག་འཇིགས་མེད་རྡོ་རྗེ་ལགས་དམ་པ་དེ་ཉིད་ཕྱི་ལོ་ ༡༩༣༡ ལོར་བོད་ཀྱི་རྒྱལ་ས་ལྷ་སར་༸རྒྱལ་བ་༸སྐུ་ཕྲེང་བཅུ་པའི་ཡབ་གཞིས་ཁྱིམ་དུ་འཁྲུངས་འདུག་པ་དང་ཆུང་དུས་རྡོར་གླིང་ཡེ་ཤུའི་སློབ་གྲྭར་ཕེབས་ནས་ཨིན་སྐད་སློབ་གཉེར་གནང་རྗེས་དགུང་ལོ་ ༡༨ ཙམ་ནས་རྒྱ་གར་ནང་བོད་གཞུང་ཚོང་དོན་སྐུ་ཚབ་ཕེབས་སྐབས་དམ་པ་ཁོང་དབྱིན་སྐད་གསུང་སྒྱུར་བར་བསྐོ་མངགས་གནང་ཡོད་པ་རེད། སྐབས་དེར་དམ་པ་ཁོང་ནས་བོད་གཞུང་ཚོང་དོན་སྐུ་ཚབ་རིམ་བཞི་ཟུར་ཁང་ལྷ་དབང་སྟོབས་རྒྱལ་མཆོག་དང་མཁན་ཆུང་བློ་བཟང་ཚེ་རིང་མཆོག་དང་ལྷན་བཅར་ཞུས་ནས་རྒྱ་གར་གྱི་སྲིད་བློན་སྐུ་ཞབས་ནེ་རུ་མཆོག་དང་མཇལ་འཕྲད་ཀྱིས་གསུང་སྒྱུར་ཞུས་པ་དང་ཕྱི་ལོ་ ༡༩༥༩ ལོར་བོད་ནང་རྒྱ་ནག་གིས་བཙན་འཛུལ་བྱེད་སྐབས་༸གོང་ས་མཆོག་རྒྱ་གར་ནང་བཙན་བྱོལ་དུ་༸ཞབས་སོར་འཁོད་མཚམས་སུའང་༸སྐུའི་ཨིན་སྐད་གསུང་སྒྱུར་ཞུས་པ་མ་ཟད། མགོན་པོ་༸གང་ཉིད་མཆོག་ཏེ་ཛི་པུར་དུ་གསར་འགོད་གསལ་བསྒྲགས་ཐོག་མ་བསྐྱང་སྐབས་དམ་པ་ཁོང་གིས་གསར་འགོད་གསལ་བསྒྲགས་དེ་ཨིན་སྐད་ཐོག་ཕབ་བསྒྱུར་གྱིས་སྒྲོག་སྦྱང་ཞུས་འདུག དེ་རྗེས་དམ་པ་ཁོང་ནས་མ་སུ་རིར་༸རྒྱལ་བའི་གཟིམ་ཆུང་དང་བོད་གཞུང་གི་འཕྲལ་སེལ་ལས་ཁུངས་འཛུགས་སྐྲུན་སྐབས་སུའང་ཨིན་དྲུང་གནང་བ་དང་ཕྱི་ལོ་ ༡༩༦༧ ལོར་སི་ཧོར་གྲོང་ཁྱེར་དུ་བོད་གཞུང་གི་ཤོག་བུའི་བཟོ་གྲྭ་ཐོག་མ་འཛུགས་སྐབས་༸གོང་ས་མཆོག་གི་བཀའ་འབྲེལ་ལྟར་དམ་པ་ཁོང་གིས་ལས་འཁུར་དང་ལེན་ཞུས་ནས་ཕྱག་ལས་གནང་འདུག ཕྱི་ལོ་ ༡༩༦༩ ལོར་ཨ་རིར་གནས་སྤོས་གནང་ཡོད་པ་དང་ཁུལ་དེར་ཝ་ཤིང་ཊིན་གཙུག་ལག་སློབ་གཉེར་ཁང་གི་བོད་རིག་པའི་མཁས་པ་ Turrell  ལགས་དང་ལྷན་བོད་རིག་པའི་ལས་འཆར་ཐོག་མ་དབུ་འཛུགས་གནང་འདུག ལྷག་དོན་ཕྱི་ལོ་ ༡༩༧༠ ལོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིར་ཆིབས་བསྒྱུར་མཛད་སྐབས་ Seattle མངའ་སྡེར་གདན་འདྲེན་ཞུས་ཡོད་པ་རེད།

ལྷོ་ཨ་རིའི་སྐུ་ཚབ་དོན་གཅོད་ཚེ་དབང་ཕུན་ཚོགས་ལགས་ནས་ཟླ་བ་འདིའི་ཚེས་ ༡༧ ཙམ་ནས་ལྷོ་ཨ་རིའི་ནུབ་ཕྱོགས་སུ་ཆགས་པའི་ Chile རྒྱལ་ཁབ་ནང་འཚམས་གཟིགས་དང་གཞུང་འབྲེལ་ལས་དོན་ཁག་ཅིག་གནང་བཞིན་ཡོད་པ་ལྟར། ཁ་ཉིན་ཚེས་ ༢༡ ཉིན་ཡུལ་དེའི་གྲོང་ཁྱེར་ Valparaíso ནང་རྟེན་གཞི་བྱས་པའི་ Chile གྲོས་ཚོགས་ཀྱི་ཚོགས་ཁང་དུ་ཡུལ་དེའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ Vlado Mirosevic ལགས་ཀྱིས་གཙོས་པའི་ཚོགས་ཆུང་གི་ཚོགས་མི་དང་འབྲེལ་ཡོད་ལས་བྱེད་བཅས་ཁྱོན་གནད་ཡོད་མི་སྣ་ཉི་ཤུ་ལྷག་འདུ་འཛོམས་ཐོག་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་རང་ལུས་མེས་སྲེག་གི་གནད་དོན་སོགས་ཀྱི་ཐད་སྙན་གསེང་ཞུས་འདུགལྷག་པར་དུ་སྐུ་ཚབ་དོན་གཅོད་ཚེ་དབང་ཕུན་ཚོགས་ལགས་ནས་སྐབས་དེར་བཅར་བའི་གྲོས་ཚོགས་འཐུས་མི་དང་འབྲེལ་ཡོད་ལས་བྱེད་རྣམས་ལ་བོད་མིའི་ངོས་ནས་རྒྱ་ནག་དང་ཁ་བྲལ་རྩོད་ཀྱི་མེད་པ་མ་ཟད་བོད་རྒྱ་གཉིས་ཀྱི་གནད་དོན་ཞི་འགྲིག་ཡོང་ཐབས་སུ་བོད་མིས་རྒྱ་ནག་གཞུང་གི་རྩ་ཁྲིམས་དང་མ་འགལ་བར་གཉིས་ཕན་དབུ་མའི་ལམ་གྱི་སྲིད་བྱུས་ཐོག་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་ཡོད་པར་གསལ་བཤད་གནང་འདུག རྩ་བའི་ལྷོ་ཨ་མི་རི་ཀའི་སྐུ་ཚབ་དོན་གཅོད་ད་རེས་ Chile ནང་ཆེད་ཕེབས་ཀྱིས་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་ཐོག་བོད་དོན་སྙན་གསེང་ཞུ་བ་ཙམ་མ་ཡིན་པར་གཙོ་བོ་ཡུལ་དེའི་ Arika གྲོང་ཁྱེར་དང་རྒྱལ་ས་ Santiago བཅས་ཀྱི་ས་གནས་ཁག་ཅིག་ཏུ་ཤེས་ཡོན་སློབ་གསོ་དང་འབྲེལ་བའི་གནད་ཡོད་མི་སྣ་འདྲ་མིན་མཇལ་འཕྲད། དེ་བཞིན་གསུང་བཤད་དང་བགྲོ་གླེང་སོགས་ཀྱི་ལས་རིམ་མང་དག་ཞིག་གི་བརྒྱུད་༸གོང་ས་མཆོག་གི་དགོངས་གཞི་ལྟར་འགྲོ་བ་མིའི་བཟང་སྤྱོད་གོང་འཕེལ་གཏོང་ཐབས་དང་འབྲེལ་བའི་ཆོས་ལུགས་ལ་མ་བརྟེན་པའི་བཟང་སྤྱོད་འམ་ཚུལ་སྤྱོད་ཤེས་ཡོན་སློབ་གསོ་ཞེས་པའི་བསླབ་གཞི་གཏན་འབེབས་གནང་ཕྱོགས་ཀྱི་ལས་རིམ་མང་དག་གི་ཐོག་ལྷན་ཞུགས་གནང་འདུག ཆི་ལི་རྒྱལ་ཁབ་ནང་ཆོས་ལུགས་ལ་མ་བརྟེན་པའི་བཟང་སྤྱོད་འམ་ཚུལ་སྤྱོད་ཤེས་ཡོན་སློབ་གསོ་ཞེས་པ་དེ་ཐོག་མའི་འཆར་ Arica གྲོང་ཁྱེར་ནང་གི་གཞུང་འབྲེལ་གྱི་སློབ་གྲྭ་ཞིག་ཏུ་ལོ་གཉིས་ཙམ་གོང་ནས་ཚོད་ལྟ་དབུ་འཛུགས་གནང་ཡོད་པ་དང་། སྐུ་ཚབ་དོན་གཅོད་མཆོག་གིས་འགྲེལ་བརྗོད་གནང་དོན་ལྟར་ན་ད་ཆ་ Chile ནང་ལས་གཞི་དེར་དོ་སྣང་གནང་མཁན་ཇེ་མང་དུ་འགྲོ་བཞིན་ཡོད་པ་རེད་འདུག ཁོང་གིས་ད་དུང་སྤྱིར་ལྷོ་ཨ་མི་རི་ཀ་ལྟ་བུ་རྒྱ་ནག་གི་ཤུགས་རྐྱེན་ཆེན་པོ་ཡོད་པའི་རྒྱལ་ཁབ་ནང་བོད་དོན་ཐོག་ཆབ་སྲིད་རྐྱང་པའི་ལས་དོན་གྲུབ་རྒྱུ་དཀའ་ནའང་། ད་ཆ་རྒྱལ་ཁབ་དེའི་ནང་ཕྱིའི་དངོས་པོ་ཡར་རྒྱས་ལ་བརྟེན་ནས་ནང་སེམས་ཀྱི་དཀའ་ངལ་ཇེ་མང་འཕྲད་མུས་ཁྲོད་དཀའ་ངལ་དེ་དག་སེལ་ཐབས་སུ་ཡུལ་དེའི་གྲོས་ཚོགས་འཐུས་མིས་གཙོས་གཞུང་འབྲེལ་མི་སྣ་དང་དགེ་རྒན་ཚོས་༸གོང་ས་མཆོག་གི་དགོས་གཞི་གཞིར་བཅོས་ཐོག་ཚུལ་སྤྱོད་ཤེས་ཡོན་སློབ་གསོ་སྤེལ་རྒྱུའི་ལས་གཞི་ཐད་དམིགས་བསལ་གྱིས་དོ་སྣང་གནང་གི་ཡོད་སྟབས། ལྷོ་ཨ་མི་རི་ཀའི་མང་ཚོགས་ཀྱི་ངོས་ནས་དེའི་བརྒྱུད་བོད་ཀྱི་གནད་དོན་ཐོག་ལའང་ཐུགས་ཁུར་ཆེན་པོ་གནང་བཞིན་ཡོད་པར་འགྲེལ་བརྗོད་གནང་ཡོད།

བཞུགས་སྒར་དྷ་རྨ་ས་ལའི་ཉེ་འདབས་སུ་རྟེན་གཞི་བྱས་པའི་ཨིམ་པིརེལ་ Imperial གསོལ་མགྲོན་ཁང་དུ་ཟླ་བ་འདིའི་ཚེས་ ༡༧ ནས་ ༢༠ བར་མ་འོངས་བོད་ཀྱི་མདུན་ལམ་ཞེས་པའི་བརྗོད་གཞིའི་ཐོག་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཚོགས་ཡོད་པ་ལྟར། ཐེངས་འདིའི་ཚོགས་འདུའི་ཐོག་ཚོགས་བཅར་བ་བོད་རིགས་ན་གཞོན་ ༡༠༠ ཙམ་ནས་མཉམ་ཞུགས་གནང་ཡོད་པ་ཚོས་དབུས་བོད་མིའི་སྒྲིག་འཛུགས་ཀྱི་ངོས་ནས་གང་གནང་དགོས་པའི་ཐོག་དགོངས་འཆར་ཁྱོན་ ༣༥ དང་གཞོན་སྐྱེས་དོ་བདག་ནས་གནང་ཐུབ་རྒྱུའི་དགོངས་འཆར་ཁྱོན་ ༢༠ བཅས་ལྔ་དང་ལྔ་བཅུའི་ཐབས་བྱུས་ལྡན་པའི་ལག་བསྟར་ལས་འཆར་མི་འདྲ་བ་ ༥༥ ཙམ་ཕུལ་འདུག ལྔ་དང་ལྔ་བཅུའི་གཞོན་སྐྱེས་ཚོགས་འདུ་སྤྱི་ཡོངས་ཐོག་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་སུ་བཅར་འདྲི་ཞུས་ཡོད།

འདི་ལོ་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་ཀྱི་ཉེ་འདབས་སུ་ཡོད་པའི་ Kodaguཀོ་ཌཱ་གྷུ་རྫོང་གི་ Suntikoppa སན་ཊི་ཀོབ་པཱ་དང་ Koppa ཀོབ་པཱ། དེ་བཞིན་Madikeri མ་ཌི་ཀེ་རེ་སོགས་ས་གནས་ཁ་ཤས་ནང་ཉིན་མཚན་ལྟོས་མེད་ཆར་པ་ཤུགས་ཆེ་བཏང་བའི་རྐྱེན་གྱིས་ས་གནས་ཡུལ་མིར་མི་རྒྱུ་ཟོག་གསུམ་ལ་གནོད་འཚེ་ཤུགས་ཆེ་ཕོག་ཡོད་ཅིང་ཁང་པ་དང་ས་ཞིང་ཆུས་འཁྱེར་ཏེ་ཞིང་པ་བརྒྱ་ཕྲག་མང་པོ་ཞིག་སྡོད་གནས་དང་ཟས་གོས་མེད་པར་ཉམས་ཐག་པའི་དཀའ་ངལ་འོག་གནས་པའི་སྐབས་དེར་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་ནང་དུ་ཡོད་པའི་བོད་ཀྱི་དགོན་སྡེ་གྲྭ་ཚང་ཁག་ནས་གདུང་སེམས་མཉམ་བསྐྱེད་ཀྱིས་ཐུགས་སྨོན་དང་ཛ་དྲག་མཐུན་འགྱུར་རོགས་རམ་གནང་ཡོད་པ་རེད། དེ་ཡང་༸གོང་ས་སྐྱབས་མགོན ཆེན་པོ་མཆོག་གི་བཀའ་དགོངས་ལམ་སྟོན་ལྟར་ཆོས་ལུགས་མཐུན་སྒྲིལ་དང་ཡུལ་མིར་མཐུན་ལམ། ལྷག་དོན་རྒྱ་གར་གཞུང་མང་གིས་བཙན་བྱོལ་བོད་མི་ཚོར་ད་བར་བླ་ན་མེད་པའི་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུ་ཆེད་གདན་ས་ཆེན་པོ་སེ་ར་ཐེག་ཆེན་གླིང་གི་བླ་སྤྱི་དང་གྲྭ་ཚང་བྱེས་སྨད་གཉིས་ཐོུང་ཐོག་ནས་ཕྱི་ཚེས་༡༨ ཉིན་འབྲེལ་ཡོད་མི་སྣ་ས་གནས་ས་ཐོག་ལ་ཆེད་གཏོང་གནང་ཏེ་་མི་མང་༡༣༠༠ ཙམ་ཞིག་ལ་ཧིན་སྒོར་འབུམ་ཕྲག་མང་པོའི་མ་གནས་ཡོད་པའི་ཉལ་ཆས་དང་གདན། ཟ་མ། འཐུང་ཆུ་སོགས་ཀྱི་རྒྱབ་སྐྱོར་གནང་ཡོད་པ་རེད། ཕྱོགས་མཚུངས་རེས་གཟའ་ཉི་མ་ཕྱི་ཚེས་༡༩ ཉིན་སེར་སྨད་གྲྭ་ཚང་གི་ངོས་ནས་སླར་ཡང་དཀའ་ངལ་འཕྲད་པའི་རྒྱ་གར་མང་ཚོགས་ ༡༣༠༠ ཙམ་ལ་ཧིན་སྒོར་འབུམ་གསུམ་ལྷག་གི་ཟས་གོས་དང་འཐུང་ཆུ། སྨན་སོགས་ཀྱི་རོགས་རམ་གནང་ཡོད་པ་རེད། གཞན་ཡང་སྦེལ་ཀོབ་བོད་མིའི་གཞིས་ཆགས་ཁུལ་དུ་ཡོད་པའི་རྣམ་གྲོལ་གླིང་དགོན་པའི་ངོས་ནས་ཀྱང་གནོད་འཚེ་ཕོག་པའི་མང་ཚོགས་ལ་ཐུགས་སྨོན་སྐྱབས་འཇུག་དང་ཆབས་ཅིག་འབྲེལ་ཡོད་མི་སྣ་ས་གནས་ས་ཐོག་ཏུ་བསྐྱོད་ཏེ་འབྲས་དང་། ད་ལི། སྣུམ། ཙོང་སོགས་བཟའ་ཆས་རིགས་དང་མལ་ཆས་སོགས་རོགས་རམ་གནང་འདུག མ་ཟད་སྦེལ་ཀོབ་བདེ་སྐྱིད་སླར་གསོ་དང་ལུགས་བསམ་གཞིས་ཆགས་གཉིས་ཀྱི་ས་གནས་འགོ་འཛིན་ནས་འགན་བཞེས་པའི་ཐོག་གཞིས་ཆགས་མང་ཚོགས་ལ་ཞལ་འདེབས་བསྡུ་རུབ་ཀྱིས་རོགས་རམ་ཡང་གནང་ཡོད་པ་རེད། ཐེངས་འདིར་བོད་མི་ཚོས་ས་གནས་ཡུལ་མིར་རོགས་སྐྱོར་གནང་བ་དེར་ས་གནས་ཀྱི་གསར་འགྱུར་བརྒྱུད་ལམ་ཁག་ནང་ཐད་གཏོང་གིས་ཡི་རང་བསྔགས་བརྗོད་ཀྱང་གནང་ཡོད་པ་རེད། རང་བྱུང་གོད་ཆགས་ཁྲོད་བོད་མིའི་གཞིས་ཆགས་མང་ཚོགས་གནས་ཡུལ་དུ་གནོད་འཚེ་གང་ཡང་བྱུང་མེད་པ་རེད། གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཉེ་ལམ་རྒྱ་གར་ལྷོ་ཕྱོགས་ཀེ་ར་ལ་ཁུལ་དུ་ཆུ་ལོག་གིས་གོད་ཆག་ཕོག་པའི་གནད་དོན་ཐོག་ཧ་ཅང་ཐུགས་ཕམ་དང་སྦྲགས་གདུང་སེམས་མཉམ་བསྐྱེད་ཀྱིས་ཐུགས་གསོའི་གསུང་འཕྲིན་བསྩལ་བ་མ་ཟད། གོད་ཆག་ཕོག་མཁན་ཚོའི་ཆེད་དུ་རོགས་དངུལ་ཡང་གསོལ་བསྩལ་གནང་ཡོད་པ་རེད། དེ་བཞིན་དཔལ་༸རྒྱལ་བ་ཀརྨ་པ་རིན་པོ་ཆེ་མཆོག་ནས་ཀྱང་རྒྱ་གར་སྲིད་བློན་དང་དེ་བཞིན་ཀེ་ར་ལ་མངའ་སྡེའི་སྤྱི་ཁྱབ་བློན་ཆེན་མཆོག་གི་མཚན་ཐོག་ཧིན་སྒོར་འབུམ་གསུམ་རེའི་རོགས་དངུལ་གསོལ་བསྩལ་གནང་ཡོད་པ་རེད།

ཕྱི་ལོ་ ༢༠༡༨ ཕྱི་ཟླ་ ༨ ཚེས་ ༡༨ ནས་ ༡༩ བར་ཉིན་གྲངས་གཉིས་རིང་རྒྱ་གར་ལྷོ་ཕྱོགས་སྦེལ་ཀོབ་ལུགས་ཟུང་བསམ་གྲུབ་གླིང་བོད་མིའི་གཞིས་ཆགས་ཀྱི་མཉམ་འབྲེལ་ཚོགས་ཁང་དུ་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ལས་གཞི་ཚན་པ་དང་བོད་མིའི་ཚོང་ལས་སྡེ་ཚོགས་ཐུན་མོང་གིས་གོ་སྒྲིག་འོག་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་ཐེངས་ ༤ པ་བསྐོང་ཚོགས་གནང་ནས་ཚོང་ལས་དང་འབྲེལ་བའི་གོ་རྟོགས་སྤེལ་ཕྱིར་ཟབ་སྦྱོང་གནང་བ་དང་། ལྷག་དོན་ཚོང་པ་གསར་པ་ཚོར་མ་དངུལ་རོགས་སྐྱོར་གཟེངས་རྟགས་ཀྱི་འགྲན་བསྡུར་གནང་བའི་བརྒྱུད་ཚོང་པ་གསུམ་དྲག་འདེམས་བྱུང་བ་ལྟར་ཧིན་སྒོར་འབུམ་ ༡༥མཐུན་རྐྱེན་སྦྱར་ཡོད་པ་རེད། ཧིན་སྒོར་འབུམ་ ༡༥ འི་མ་དངུལ་གཟེངས་རྟགས་ཐོབ་པའི་ཁྲོད་ནས་ཨང་དང་པོ་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་ནས་ཡིན་པ་སྤེན་པ་ཚེ་རིང་ལགས་སུ་ཧིན་སྒོར་འབུམ་བདུན་གྱི་རོགས་སྐྱོར་ཐོབ་ཡོད་པ་རེད། དེའང་ཁོང་གི་ལས་གཞི་གཞིས་ཆགས་ནང་ཞིང་ལས་འཕྲུལ་ཆས་ལས་གཞིར་ཐོབ་ཡོད་རེད། ཁོང་ལ་ལོ་ངོ་བཅུ་ཕྲག་གཉིས་ཙམ་རིང་ཞིང་ལས་ཀྱི་ཉམས་མྱོང་ཡོད་པ་དང་ལྷག་པར་དུ་ཞིང་ལས་འཕྲུལ་ཆས་ཆེད་ལས་སློབ་སྦྱོང་གནང་བ་དང་ལས་ཀའི་ཉམས་མྱོང་ཡོད་པ་མ་ཟད་འདས་པའི་ལོ་ངོ་ ༢༢ རིང་ཁོང་གིས་ཀོ་ལི་གྷལ་གཞིས་ཆགས་ཀྱི་མཉམ་འབྲེལ་ནང་འཕྲུལ་ལས་ཀྱི་ཕྱག་ལས་ཞབས་ཞུ་གནང་འདུག རོགས་སྐྱོར་ཨང་གཉིས་པ་དེ་འབུམ་སྡེ་ལ་བསྟན་འཛིན་སྒང་ནས་ཡིན་པ་བསྟན་འཛིན་གྲགས་པ་ལགས་སུ་ཧིན་སྒོར་འབུམ་ལྔ་དང་ལྔ་སྟོང་གི་རོགས་སྐྱོར་ཐོབ་ཡོད་པ་དང་། དེའང་ཁོང་གི་གཞིས་ཆགས་ནང་ཤིང་འབྲས་ Kiwi འདེབས་ལས་བྱེད་བཞིན་པའི་ལས་གཞི་རྒྱ་བསྐྱེད་ཆེད་ཐོབ་འདུག ཁོང་ལ་འདས་པའི་ལོ་བཅུ་ཙམ་རིང་ཞིང་ལས་དང་ཀི་བི་འདེབས་ལས་ཀྱི་ཉམས་མྱོང་ཡོད་པ་མ་ཟད་ད་ལྟའི་ཆར་ཁོང་གིས་ཤིང་འབྲས་ཀི་བི་སྡོང་པོ་ ༤༥༠ ཙམ་འདེབས་ལས་བྱེད་བཞིན་ཡོད་པ་ནས་སྡོང་པོ་ཆིག་སྟོང་བར་རྒྱ་བསྐྱེད་གནང་འཆར་འདུག ཨང་གསུམ་པ་ཧི་མཱ་ཅལ་མངའ་སྡེའི་ནང་གི་ཀམ་རོ་གཞིས་ཆགས་ནས་ཡིན་པ་ཀུན་དགའ་དཔལ་འབྱོར་ལགས་དང་ཁོང་གི་གཅེན་པོ་གཉིས་ཀྱིས་གཞིས་ཆགས་ནང་བ་ཕྱུགས་ཀྱི་འོ་མ་ཚོང་ལས་ཀྱི་ལས་གཞིར་ཧིན་སྒོར་འབུམ་གསུམ་མ་ཟིན་ཙམ་ཐོབ་འདུག ལས་གཞི་དེ་ཐོག་མར་བརྩམ་མཁན་དགེ་ལེགས་སྐལ་བཟང་ལགས་ནི་དེ་སྔ་ལོ་ལྔའི་རིང་དམག་ཁོངས་སུ་ཞུགས་པ་དང་དེ་རྗེས་ལོ་བཅུ་ཙམ་རིང་བལ་གོས་ཀྱི་ཚོང་ལས་གཉེར་འདུག ཐེངས་འདིའི་མཇུག་སྡོམ་མཛད་སྒོར་སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་ཚོང་པ་གསར་པ་ཞིག་ཡིན་ཕྱིན་དཀའ་ངལ་མང་དག་ལ་གདོང་ལེན་མ་གནང་བར་གྲུབ་འབྲས་བཟང་པོ་ཞིག་ཡོང་དཀའ་བ་ནི་ཆོས་ཉིད་ཡིན་སྟབས་འགྲན་བསྡུར་ནང་རྒྱལ་ཁ་མ་ཐོབ་མཁན་ཚོས་ཀྱང་སེམས་ཤུགས་མ་ཆག་པར་མུ་མཐུད་འབད་བརྩོན་གནང་ཚེ་འབྲས་བུ་བཟང་པོ་ཐོབ་ངེས་ཡིན་པར་ལམ་སྟོན་གནང་སོང་།

བོད་ཀྱི་བེུད་རྐང་རྩེད་སྤོ་ལོའི་རུ་ཁག་ནས་རིང་མིན་ཨ་རིའི་ནིའུ་ཡོག་ནང་གི་རྒྱལ་ཡུམ་ཆེན་མོ་དྲན་རྟེན་གྱི་རྐང་སྤོལ་འགྲན་བསྡུར་དང་བསྟུན་ཁུལ་དེར་མཐུན་སྒྲིལ་གྱི་རྩེད་འགྲན་ཁག་ཅིག་ནང་མཉམ་ཞུགས་བྱ་རྒྱུར་མཐོང་མཆན་ཞུས་འདུག་ཀྱང་། རྒྱ་གར་རྒྱལ་ས་ལྡི་ལིའི་ནང་ཡོད་པའི་ཨ་རིའི་གཞུང་ཚབ་ཁང་གིས་མཐོང་མཆན་སྤྲད་མི་འདུག དེ་ཡང་བོད་རྒྱལ་ཡོངས་རྩེད་རིགས་ཚོགས་པའི་དྲུང་ཆེ་པ་སངས་རྡོ་རྗེ་ལགས་ཀྱིས་རང་གི་ངོ་དེབ་ཐོག་བརྙན་པར་ཞིག་འདོན་སྤེལ་གནང་འདུག་པའི་ནང་། བོད་རྒྱལ་ཚོགས་རྩེད་རིགས་ཚོགས་པས་དེ་སྔོན་བོད་པའི་བེུད་ ༡༦ ལ་རྐང་སྤོལ་རྩེད་འགྲན་གྱི་དམིགས་བསལ་སྦྱོང་བརྡར་ཞིག་ཕུལ་ནས། ཁོང་རྣམས་འཚོག་ལ་ཉེ་བའི་ཨ་རིའི་ནིའུ་ཡོག་ནང་གི་ཕྱི་ལོ་ ༢༠༡༨ ལོའི་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་གསེར་གྱི་གཟེངས་རྟགས་རྩེད་འགྲན་དང་བསྟུན་ཁུལ་དེར་མཐུན་སྒྲིལ་གྱི་རྩེད་འགྲན་ཁག་ཅིག་ནང་མཉམ་ཞུགས་བྱ་རྒྱུར་དམིགས་ཏེ་ཉེ་ཆར་ཟླ་བ་འདིའི་ཚེས་ ༧ ཉིན་རྒྱལ་ས་ལྡི་ལིར་མཐོང་མཆན་ལག་འཁྱེར་ཞུ་བར་བསྐྱོད་ཡོད་ཀྱང་། ཨ་རིའི་གཞུང་ཚབ་ཁང་གིས་བོད་པའི་བེུད་དེ་དག་ལ་ཨ་རིར་བསྐྱོད་ཆོག་པའི་མཐོང་མཆན་སྤྲད་ཐུབ་ཐབས་མེད་པ་གསུངས་སྟབས། པ་སངས་ལགས་ཀྱིས་ཨ་རིའི་གཞུང་ཚབ་ཁང་གིས་ཐག་གཅོད་དེར་བློ་ཕམ་ཡོད་པ་དང་། ད་ཆ་བོད་རྒྱལ་ཡོངས་རྩེད་རིགས་ཚོགས་པའི་ངོས་ནས་བེུད་རྐང་སྤོལ་རུ་ཁག་རྣམས་ཁེ་ན་ཌའི་གྲོང་ཁྱེར་ Toronto ནང་བསྐྱོད་རྒྱུར་མཐོང་མཆན་ཞུས་བཞིན་པའི་གནས་སྟངས་ཡིན་པ་འགྲེལ་བརྗོད་དང་འབྲེལ། བེུད་ཀྱི་རུ་ཁག་ལ་ད་བར་མཐུན་འགྱུར་དང་རྒྱབ་སྐྱོར་གནང་མཁན་ཨ་རིའི་ཕྱོགས་མཐའ་ཁག་གི་བོད་མིའི་ཚོགས་སྐྱིད་ཁག་དང་ས་གནས་བོད་རིགས་མང་ཚོགས་ཀུན་ལ་ཐུགས་རྗེ་ཆེ་ཞུས་འདུག ད་ལན་བོད་པའི་བེུད་རྐང་སྤོལ་རུ་ཁག་ལ་ཨ་རིར་བསྐྱོད་རྒྱུའི་མཐོང་མཆན་མ་རག་པ་དེ་ནི་ཐེངས་དང་པོ་ཙམ་མིན་པར། དེ་སྔོན་ཕྱི་ལོ་ ༢༠༡༧ ལོའི་ནང་ཨ་རིར་གནས་བཞུགས་ Cassie Childers ལགས་ཀྱིས་གསར་འཛུགས་གནང་བའི་བོད་པའི་བེུད་རྐང་སྤོལ་རུ་ཁག་ལའང་ Dallas Cup ཞེས་རྒྱལ་སྤྱིའི་གྲགས་ཅན་རྐང་སྤོལ་རྩེད་འགྲན་ནང་མཉམ་ཞུགས་གནང་རྒྱུའི་མགྲོན་བརྡ་གནང་ཡོད་ཀྱང་། ཨ་རིའི་གཞུང་གིས་བོད་པའི་བེུད་རུ་ཁག་དེ་དག་ཨ་རིའི་ནང་བསྐྱོད་ཆོག་པའི་བཀའ་ཁྲོལ་ཞུས་པ་དེ་རྒྱུ་མཚན་ལྡན་པ་མཐོང་གི་མིན་འདུག་ཅེས་གསུངས་ཏེ་མཐོང་མཆན་སྤྲད་མེད་པའི་གནས་ཚུལ་ཡང་བྱུང་ཡོད་པ་རེད། གལ་ཏེ་ད་ལན་བོད་ཀྱི་བེུད་རྐང་སྤོལ་རུ་ཁག་ལ་ཨ་རིར་ཕེབས་ཆོག་པའི་མཐོང་མཆན་ཐོབ་ཡོད་ན། ཁོང་རྣམས་དང་ཐོག་ཨ་རིའི་ Chicago གྲོང་ཁྱེར་ནང་ཆེད་བསྐྱོད་ཀྱིས་ཁུལ་དེར་མཐུན་སྒྲིལ་གྱི་རྩེད་འགྲན་ཁག་ཅིག་ནང་མཉམ་ཞུགས་གནང་རྒྱུད་དང་དེ་ནས་རིམ་པའི་ Madison དང་ Minnesota དེ་རྗེས་ཨ་རི་Washington DC དང་ནིའུ་ཡོག་གྲོང་ཁྱེར། མཐར་ཁེ་ན་ཌའི་གྲོང་ཁྱེར་Toronto བཅས་ཀྱི་ནང་ཆེད་བསྐྱོད་གནང་རྒྱུའི་ལས་རིམ་ཁག་ཅིག་བང་སྒྲིག་ཡོད་པ་རེད། རྩ་བའི་ཟླ་བ་འདིའི་ཚེས་༣༠ ནས་ཨ་རིའི་ནིའུ་ཡོག་ཏུ་ཕྱི་ལོ་ ༢༠༡༨ ལོའི་རྒྱལ་ཡུམ་ཆེན་མོ་དྲན་རྟེན་གྱི་རྐང་རྩེད་སྤོ་ལོའི་འགྲན་བསྡུར་ཐེངས་གཉིས་པ་དེ་འགོ་འཛུགས་གནང་གི་འདུག་པ་དང་། རྩེད་འགྲན་དེའི་ནང་བྱང་ཨ་མི་རི་ཀ་དང་ཡུ་རོབ་ཁུལ་གྱི་བོད་རིགས་རྐང་སྤོལ་རུ་ཁག་ ༡༦ ཙམ་ནས་མཉམ་ཞུགས་གནང་རྒྱུ་རེད་འདུག

འདི་ལོ་ཕྱི་ལོ་ ༢༠༡༨ ལོའི་དགེ་ལྡན་ལུགས་བཟང་གཙུག་ལག་སློབ་གཉེར་ཁང་ཆེན་མོའི་དགེ་ལུགས་རྒྱུགས་སྤྲོད་ཆེན་མོ་ཟླ་ ༨ ཚེས་ ༡༣ ཉིན་ནས་དབུ་འཛུགས་ཀྱིས་ཟླ་ ༩ ཚེས་ ༨ བར་དུས་ཡུན་ཟླ་བ་གཅིག་ཙམ་རིང་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་ཁུལ་དུ་རྟེན་གཞི་བྱས་པའི་བྱེས་ཀྱི་གདན་ས་ཆེན་པོ་སེ་ར་ཐེག་ཆེན་གླིང་དུ་འཚོགས་གནང་བཞིན་ཡོད་པ་རེད། འདི་ལོ་དགེ་ལུགས་རྒྱུགས་སྤྲོད་ཆེན་མོའི་ནང་སྔར་ཡོད་གཞུང་ཆེན་བཀའ་པོད་ལྔའི་ཐོག་རྩོད་རྒྱུགས་དང་འབྲི་རྒྱུགས། ཐུན་མོང་བའི་རིག་གནས་བཅས་ཀྱི་ཐོག་འདི་ལོ་ནས་བཀའ་རམས་ལོ་རིམ་དང་པོ་ནས་དེང་དུས་ནུབ་ཕྱོགས་པའི་ལུགས་ཀྱི་ཚན་རིག་ཀྱི་སློབ་ཚན་གསར་དུ་ཁ་སྣོན་གནང་ཡོད་པ་དང་སློབ་ཚན་ནང་ཚན་རིག་ལྟ་གྲུབ་དང་དངོས་ཁམས་ཚན་རིག སྐྱེ་དངོས་ཚན་རིག། དབང་རྩ་ཚན་རིག་བཅས་ཡོད་པ་རེད་འདུག དེ་བཞིན་རྒྱུགས་སྤྲོད་ཀྱི་བསླབ་གཞི་ཁག་ནི་ཨེ་མོ་རི་གཙུག་ལག་སློབ་གཉེར་ཁང་དང་བོད་ཀྱི་ཚན་རིག་ལས་རིམ་གཉིས་ནས་བོད་ཡིག་ཐོག་གཏན་འབེབས་དང་འགྲེམས་སྤེལ་གནང་བའི་སློབ་དེབ་ཁག་ཡིན་པ་རེད། འདི་ལོའི་རྒྱུགས་སྤྲོད་ཆེན་མོར་མཉམ་ཞུགས་གནང་མཁན་ནང་གདན་ས་ཆེན་པོ་གསུམ་གྱི་གྲྭ་ཚང་དྲུག་དང་། བཀྲ་ཤིས་ལྷུན་པོ། རྭ་སྟོད་གྲྭ་ཚང་བཅས་ཀྱི་ཆ་རྐྱེན་ཚང་བའི་སློབ་གཉེར་བ་ཁྱོན་ ༨༦༢ ནས་སྙན་ཞུ་ཕུལ་འདུག དགེ་ལུགས་རྒྱུགས་སྤྲོད་ཆེན་མོར་ཞུགས་མཁན་ལ་ཚང་དགོས་པའིི་ཆ་རྐྱེན་ནི་གདན་སའི་གྲྭ་ཚང་དུ་ཆོས་གྲྭར་བཞུགས་ནས་བསྡུས་གྲྭ་ནས་འདུལ་བ་དང་མཛོད་བར་ཉུར་མཐར་ལོ་ ༡༧ ཧྲིལ་པོར་སློབ་གཉེར་ཚུལ་བཞིན་གནང་ནས་གྲྭ་ཚང་སོ་སོའི་དགེ་ལུགས་རྒྱུགས་སྤྲོད་དུ་ཞུགས་རྒྱུའི་མིང་མཚམས་སུ་སོན་པ་དང་། ལོར་དེར་གཞུང་ཆེན་རྩོད་རྒྱུགས་དང་། འབྲི་རྒྱུགས་གཉིས་ཀར་རྩ་བའི་བརྒྱ་ཆ་ ༡༠༠ ནས་བརྒྱ་ཆ་ ༦༦ ངེས་པར་དུ་ལོན་དགོས་འདུག

བཞུགས་སྒར་དྷ་ས་ཉེ་འདབས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བཙན་བྱོལ་བོད་མིའི་རིག་གནས་སློབ་གསོའི་ཐོག་མཛད་རྗེས་ཆེ་བའི་སྔོན་བྱོན་མི་སྣར་རྗེས་དྲན་ཞེས་པའི་བརྗོད་གཞིའི་ཐོག་བོད་རིག་པའི་བགྲོ་གླེང་ཐེངས་ ༡༢ པ་དབུ་འཛུགས་གནང་སོང་། དེ་རིང་ཟླ་ ༨ ཚེས་ ༡༦ ཉིན་སྔ་དྲོ་ཚོུད་ ༩༌༠༠ སྟེང་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ས་རཱ་བོད་ཀྱི་མཐོ་སློབ་ཀྱི་སློབ་མའི་གཞོན་ནུ་རུ་ཁག་གིས་གོ་སྒྲིག་འོག་བོད་རིག་པའི་བགྲོ་གླེང་ཐོག་སྐུ་མགྲོན་གཙོ་བོ་ཨ་མྱེས་རྨ་ཆེན་བོད་ཀྱི་རིག་གཞུང་བསྟི་གནས་ཁང་གི་འགན་འཛིན་དང་ལོ་རྒྱུས་ཉམས་ཞིབ་པ་མཁས་དབང་ཇོ་སྲས་བཀྲ་ཤིས་ཚེ་རིང་ལགས་ཀྱིས་གཙོསཔའི་ཕྱོགས་མཐའ་ཁག་ནས་ཕེབས་པའི་མཁས་དབང་དང་བགྲོ་གླེང་བ་རྣམ་པ་དང་། ས་རཱ་མཐོ་སློབ་ཀྱི་དབུ་འཛིན་དབུས་པའི་དགེ་ལས་སློབ་གཉེར་བ་བཅས་ནས་མཉམ་ཞུགས་གནང་སོང་། སྐབས་དེར་སྐུ་མགྲོན་གཙོ་བོ་ཇོ་སྲས་བཀྲ་ཤིས་ཚེ་རིང་ལགས་ཀྱིས་ཕྱི་ལོ་ ༡༩༦༠ ལོར་བཙན་བྱོལ་སྤྱི་ཚོགས་ནང་དེང་དུས་ཀྱི་ཤེས་ཡོན་སློབ་གསོ་དབུ་འཛུགས་གནང་སྟངས་དང་རྒྱ་གར་གཞུང་ནས་བོད་པའི་སློབ་གྲྭ་ཁག་ཇི་ལྟར་གསར་འཛུགས་གནང་ཡོད་སྐོར། དེ་བཞིན་ཕྱི་ལོ་ ༡༩༦༣ ལོར་དགེ་རྒན་འོས་སྦྱོང་ཐེངས་དང་པོ་དེ་ཚུགས་པ་སོགས་ཀྱི་སྐོར་འགྲེལ་བརྗོད་གནང་བ་མ་ཟད། སྔར་གྱི་བླ་སྤྲུལ་དང་དགེ་བཤེས་ བོད་རིག་པའི་ཐོག་གི་མཁས་དབང་རྣམས་ཀྱིས་བོད་ཀྱི་ལོ་རྒྱུས་དང་རིག་གནས་ཐད་ཕྱག་དེབ་དཔར་སྐྲུན་གནང་མཁན་དང།  གནད་ཆེ་བའི་ཡིག་ཆ་ཁག་ཉར་ཚགས་ཀྱིས་བོད་ཀྱི་རིག་གནས་སློབ་གསོའི་ཐོག་མཛད་རྗེས་རླབས་ཆེན་བཞག་ཡོད་སྐོར་ངོ་སྤྲོད་གནང་སོང་།མཛད་སྒོའི་ཐོག་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ནས་མཐོ་སློབ་ཀྱི་ལོ་རྒྱུས་དང་སྦྲགས།  མཐོ་སློབ་ཀྱི་ལས་གཞི་ཁག་དང་སློབ་སྦྱོང་གི་བརྒྱུད་རིམ་སོགས་ཀྱི་སྐོར་ངོ་སྤྲོད་ཀྱང་གནང་སོང་། ས་རཱ་གཞོན་ནུ་རུ་ཁག་གི་ཚོགས་གཙོ་བསྟན་འཛིན་ཆོས་སྐྱིད་ལགས་ནས་གཞོན་ནུ་རུ་ཁག་གི་ལས་གཞི་ངོ་སྤྲོད་དང།  བགྲོ་གླེང་གི་བརྗོད་གཞི་དང་འབྲེལ་བའི་གཏམ་བཤད་གནང་བ་མ་ཟད་ཁོང་གིས་རྒྱ་གར་མཐོ་སློབ་ཁག་ཏུ་སློབ་གཉེར་གནང་བཞིན་པའི་བོད་ཕྲུག་རྣམས་ནས་བོད་མིའི་རིག་གནས་སློབ་གསོའི་མཁས་དབང་དང་ཁོང་རྣམ་པའི་མཛད་རྗེས་ཐོག་མཁྱེན་རྒྱ་ཞན་སྟབས། དེ་དག་ཐོག་མཁྱེན་རྟོགས་ཡོང་རྒྱུ་དང་མཁྱེན་རྟོགས་ཡོད་པ་རྣམས་ལ་དྲན་སྐུལ་ཞུ་ཕྱིར་བརྗོད་གཞི་དེ་བཞག་སྐོར་གསུངས་སོང་། གཞི་རྩའི་བགྲོ་གླེང་གི་དུས་ཡུན་ཉིན་གྲངས་གསུམ་རིང་མཁས་དབང་རག་ར་རིན་པོ་ཆེ་ཐུབ་བསྟན་ཆོས་དར་མཆོག་དང།  མཁས་དབང་བར་གཞི་ཕུན་ཚོགས་དབང་རྒྱལ་མཆོག  པད་ནོར་རིན་པོ་ཆེ་མཆོག རྒྱལ་བའི་ཡོངས་འཛིན་རྣམ་པ། ༸རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ་རིག་པའི་རྡོ་རྗེ་མཆོག་སོགས་ཀྱི་མཛད་རྣམ།  རྩིས་དཔོན་ཞྭ་སྒབ་པའི་སྐུ་ཚེས་ལོ་རྒྱུས་སོགས་བརྗོད་གཞི་འདྲ་མིན་ཐོག་བགྲོ་གླེང་གནང་གི་འདུག