བཙན་བྱོལ།

ཁ་སང་ཉིན་རྒྱབ་རྒྱ་གར་གྱི་རྒྱལ་ས་ལྡི་ལིར་བོད་ཀྱི་གཞོན་ནུ་ལྷན་ཚོགས་ཀྱི་ལས་འགུལ་བ་མི་གྲངས་ ༡༥༠ ལྷག་ནས་ཧོང་ཀོང་མི་མང་གི་མང་གཙོ དང་རང་དབང་གི་མངོན་འདོད་ལས་འགུལ་ལ་རྒྱབ་སྐྱོར་དང་གདུང་སེམས་མཉམ་བསྐྱེད་ཡོད་པའི་ལས་འགུལ་ཞིག་སྤེལ་སོང་། ཁ་སང་ཉིན་རྒྱབ་ཚོུད་ ༣ ཙམ་ལ་བོད་རིགས་ན་གཞོན་མི་གྲངས་ ༡༥༠ བརྒལ་བས་ཉི་གདུགས་སྟེང་དུ་ཧོང་ཀོང་མི་མང་གི་རྒྱབ་ཏུ་ང་ཚོ་ཡོད། ཧོང་ཀོང་ལ་མང་གཙོའི་རང་དབང་སྤྲོད་དགོས།  བོད་ཧོང་ཀོང་དང་མཉམ་དུ་ཡོད་ཅེས་སོགས་ཀྱི་འབོད་ཚིག་བཀོད་དེ་ལྡི་ལི་གསར་པའི་གྲོས་ཚོགས་ལམ་གཞུང་བརྒྱུད་ཇན་ཏར་མན་ཏར་བར་སྐད་འབོད་བྱེད་བཞིན་པར་ཞི་བའི་གོམ་བགྲོད་གནང་ཡོད་པ་དང་།    ལས་འགུལ་གོ་སྒྲིག་ཞུ་མཁན་བོད་ཀྱི་གཞོན་ནུ་ལྷན་ཚོགས་ཀྱིས་བོད་ཧོང་ཀོང་དང་མཉམ་དུ་ཡོད་ཅེས་པའི་ཐེངས་འདིའི་ལས་འགུལ་ནི་ཧོང་ཀོང་གི་མང་གཙོ་དོན་གཉེར་བ་ཚོར་རྒྱབ་སྐྱོར་དང་གདུང་སེམས་མཉམ་བསྐྱེད་ཞུ་རྒྱུ་དང་། ལྷག་དོན་རྒྱ་ནག་གི་གཉའ་གནོན་འོག་ཡོད་པའི་བོད་མི་དང་ཤར་ཏུར་ཀི་སི་ཐན། སོག་པོ་བཅས་ཐུན་མོང་ནས་ལས་འགུལ་ཞིག་སྤེལ་ཚེ་རྒྱ་ནག་ལ་ངེས་པར་དུ་བརྡ་ལན་ཞིག་འཕྲོད་ངེས་ཡིན་པ་དང་། ཧོང་ཀོང་ལས་འགུལ་དེ་བརྒྱུད་བོད་ཀྱི་གཞོན་ནུ་ལྷན་ཚོགས་ལ་མ་འོངས་པར་ལས་འགུལ་སྤེལ་ཕྱོགས་སོགས་ཀྱི་ཐད་ལ་ལེགས་ཆ་མང་པོ་ཞིག་བླང་རྒྱུ་ཡོད་སྐོར་སོགས་འགྲེལ་བརྗོད་གནང་གི་འདུག གཞི་རྩའི་བོད་ཀྱི་གཞོན་ནུ་ལྷན་ཚོགས་ནི་བཙན་བྱོལ་ནང་གི་གཞུང་འབྲེལ་མ་ཡིན་པའི་ཚོགས་པ་ཆེ་ཤོས་ཤིག་དང་། གཞོན་ནུ་ལྷན་ཚོགས་ཀྱི་ངོས་ནས་ཚོགས་པའི་ཁོངས་སུ་ས་གནས་ཀྱི་ཡན་ལག་ ༨༨ དང་ཚོགས་མི་གྲངས་ ༣༥༠༠༠ ལྷག་ཡོད་པར་གདེང་འཇོག་གནང་གི་ཡོད་པ་རེད།  སྒྲིག་འཛུགས་ཀྱི་ངོས་ནས་ཞི་བའི་གོམ་བགྲོད་ཀྱི་ལས་འགུལ་སྤེལ་བསྒྲུབས་རྗེས་ཕྱི་དྲོ་བོད་སྒར་བསམ་ཡས་གླིང་དུ་མར་མེ་ཁྲོམ་སྐོར་ཞིག་ཀྱང་གནང་ཡོད་པ་མ་ཟད། གསར་འགོད་བསྒྲགས་གཏམ་ཞིག་སྤེལ་བའི་ནང་ཧོང་ཀོང་སྲིད་གཞུང་གིས་རྒྱ་ནག་གི་གནོན་ཤུགས་འོག་མི་མང་གི་འགྲོ་བ་མིའི་ཐོབ་ཐང་དང་གཞི་རྩའི་མང་གཙོའི་རང་དབང་རྩིས་མེད་རྡོག་རོལ་གཏོང་བཞིན་པར་ངོ་རྒོལ་དང་།  ལྷག་དོན་རྒྱ་ནག་སྲིད་འཛིན་ཞི་ཅིན་ཕིང་གི་བཀོད་བྱུས་འོག་ཧོང་ཀོང་གི་ཞི་བའི་ལས་འགུལ་བ་ཚོར་བཙན་དབང་གིས་དྲག་གནོན་སྤེལ་རྒྱུ་འཕྲལ་མར་མཚམས་འཇོག་དགོས་པའི་དགོས་འདུན་ཡང་ཆེད་བཏོན་གནང་འདུག དེ་དང་ཕྱོགས་མཚུངས་སུ་དེ་རིང་སྔ་དྲོ་ཚོུད་༡༠ ཐོག་དབུས་བོད་ཀྱི་བུད་མེད་ལྷན་ཚོགས་ཀྱིས་གོ་སྒྲིག་ཞུས་དོན་ལྟར་ངྷ་སའི་མེག་གྷན་གྱི་སྲང་ལམ་དུ་མི་མང་ནམཉམ་ཞུགས་བྱས་པ་བརྒྱུད་ཧོང་ཀོང་གི་དོན་རྐྱེན་ཁྲོད་མིག་ལ་མེ་དམའ་ཕོག་པའི་སྙིང་སྟོབས་ཅན་གྱི་བེུད་དེས་གཙོས་པའི་ལས་འགུལ་ཁྲོད་སྡུག་སྦྱོང་མནར་གཅོད་མྱོང་བཞིན་པའི་མང་ཚོགས་རྣམས་ལ་གདུང་སེམས་མཉམ་བསྐྱེད་ཀྱི་ཁྲོམ་སྐོར་གནང་ཡོད།

ཁ་ཉིན་ཕྱི་ཚེས་ ༢༨ ཉིན་གྱི་དགོང་མོར་ལ་དྭགས་བསོད་ནམས་གླིང་མཉམ་འབྲེལ་ཚོགས་ཁང་དུ་དབུས་བོད་མིའི་སྒྲིག་འཛུགས་དང་ལ་བྱང་བསོད་ནམས་གླིང་བོད་མིའི་གཞིས་ཆགས་ཀྱི་ལ་སྤྱིའི་ལས་ཁུངས་ཐུན་མོང་གིས་ལ་དྭགས་དེ་བཞིན་རྒྱ་གར་དབུས་འཛིན་སྐྱོང་མངའ་ཁུལ་དུ་གྱུར་བར་རྟེན་འབྲེལ་དགའ་བསུའི་འཚམས་འདྲི་ཞུ་སླད་དུ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དབུས་བཞུས་ཐོག་ལ་དྭགས་ཀྱི་ཆེས་མཐོའི་མི་སྣ་༡༠༠ ཙམ་གདན་ཞུས་ཀྱིས་གཞས་སྣ་གཟིགས་འབུལ་དང་དགོང་ཚིགས་རྒྱས་པ་ཞིག་འདེགས་འབུལ་ཞུས་འདུག གསོལ་སྟོན་གྱི་མཛད་སྒོའི་ཐོག་སྐུ་མགྲོན་གཙོ་བོ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ཚོགས་གཙོ་རྒྱལ་པི་རྣམ་རྒྱལ་ལགས་དང་། དམིགས་བསལ་སྐུ་མགྲོན་གཞུང་འཛིན་ཚོགས་པའི་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས་ཀྱིས་གཙོས་པའི་ཆེས་མཐོའི་མི་སྣ་བརྒྱ་ཙམ་གདན་ཞུ་གནང་འདུག་པ་དང། སྐབས་དེར་ཆོས་རིག་བཀའ་བློན་མཆོག་གིས་ལ་དྭགས་མི་མང་ཡོངས་ཀྱི་འདོད་དོན་རྙིང་པ་ཞིག་ད་ཆ་དངོས་སུ་གྲུབ་པར་འཚམས་འདྲི་དང་རྟེན་འབྲེལ་མཚོན་ཆེད་དུ་མཇལ་དར་སྒྲོན་གནང་འདུག དེ་བཞིན་སྐུ་མགྲོན་གཙོ་བོ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ཚོགས་གཙོ་རྒྱལ་པི་རྣམ་རྒྱལ་ལགས་ཀྱིས་བོད་མིའི་སྒྲིག་འཛུགས་ཀྱིས་གཙོས་ལ་སྤྱི་ལས་ཁུངས་ནས་དགའ་བསུའི་འཚམས་འདྲི་དང་གསོལ་སྟོན་རྒྱས་པ་ཞིག་བཤམས་པར་ཐུགས་རྗེ་ཆེ་ཞེས་ཞུས་པ་དང་འབྲེལ། ལ་དྭགས་མི་མང་ཡོངས་ནས་མི་ལོ་བཅུ་ཕྲག་བདུན་ལྷག་གི་རིང་འབད་པ་དུ་མའི་རྩོལ་བ་གནང་འབྲས་ད་རེ་དངོས་སུ་འཐོན་པ་བཞིན་ཉེ་བའོ་ལོ་ངོ་བཅུའི་ནང་བོད་ཀྱི་བདེན་མཐའ་སེལ་བར་ཡིད་ཆེས་གནང་བཞིན་ཡོད་སྐོར་དང་། བོད་མིའི་འཐབ་རྩོད་སླད་དུ་དུས་ནམ་ཡང་རོགས་འདེགས་ཞུ་རྒྱུའི་གྲ་སྒྲིག་དང་གདུང་སེམས་མཉམ་བསྐྱེད་ཡོད་ཅེས་གསུངས་འདུག དེ་དང་ཕྱོགས་མཚུངས་སུ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ South Asia, Bureau of Population, Refugees and Migration ཞེས་ཨ་རིའི་ལྷོ་ཨེ་ཤ་ཡའི་མི་འབོར་དང་སྐྱབས་བཅོལ་བ། གཞིས་སྤོ་བཅས་ཀྱི་ལས་ཁུངས་ཀྱི་ལས་འཆར་འགན་འཛིན་སྐུ་ཞབས་ Hefright Brook ལགས་དང་མཇལ་མོལ་གནང་འདུག སྐབས་དེར་བཀའ་བློན་མཆོག་ནས་རྒྱ་ནག་གཞུང་གིས་གནོན་ཤུགས་འོག་བལ་ཡུལ་ནང་གི་བཙན་བྱོལ་བོད་མིའི་དཀའ་ངལ་རྣམས་ཞིབ་ཕྲ་སྙན་སེང་ཞུས་འདུག་པ་དང་། སྐུ་ཞབས་ Hefright Brook ལགས་ཀྱིས་བལ་ཡུལ་གཞུང་གིས་བཙན་བྱོལ་བོད་མི་ཕྱིར་རྒྱ་ནག་ལ་རྩིས་སྤྲད་པའི་གནས་ཚུལ་རིགས་བྱུང་ཚེ་ཁོང་ལ་འབྲེལ་གནང་བ་ཡིན་ན། བལ་ཡུལ་གྱི་རྒྱལ་སར་རྟེན་གཞི་བྱས་པའི་ཨ་རིའི་གཞུང་ཚབ་ཁང་བརྒྱུད་གནས་ཚུལ་ཞིབ་གཅོད་གནང་ཆོག་གི་རེད་ཅེས་གསུངས་འདུག གཞན་ཡང་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern མཆོག་གི་ལས་ཁུངས་སུ་ཨ་རིའི་གྲོས་ཚོགས་ཀྱི་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཁྲིམས་ལུགས་འཕེལ་རྒྱས་རྟོག་ཞིབ་ཚན་པའི་ངེས་སྟོན་པ་ Jon Stivers ལགས་དང་ཐུག་འཕྲད་གནང་འདུག་པ་མ་ཟད་སྐུ་ཞབས་ Jim McGovern མཆོག་གིས་མི་འགྱངས་པར་ཨ་རིའི་གྲོས་ཚོགས་འོག་མའི་ནང་བོད་དོན་ཆེད་ཁྲིམས་འཆར་གསར་པ་ཞིག་ངོ་སྤྲོད་གནང་རྒྱུ་ཡིན་སྐོར་ཐོག་ལ་གྲོས་བསྡུར་གནང་འདུག

རིག་པ་ཆོས་ཚོགས་གསར་འཛུགས་གནང་མཁན་བསོད་རྒྱལ་རིན་པོ་ཆེ་མཆོག་ཁ་སང་ཉིན་རྒྱབ་དགུང་ལོ་ ༧༢ ཐོག་ཐེ་ལན་ཌི་ཁུལ་དུ་སྙུང་གཞིའི་རྐྱེན་པས་དགོངས་པ་རྫོགས་འདུག རིན་པོ་ཆེ་དམ་པ་ཁོང་ནི་ཕྱི་ལོ་ ༡༩༤༧ ལོར་བོད་ཁམས་ཕྱོགས་ཀྱི་ཏྲེ་ཧོར་ལྭ་དཀར་ཞེས་པའི་ཁྱིམ་ཚང་དུ་འཁྲུངས་ཤིང་། བོད་ཕྱི་ནང་གཉིས་སུ་སྐྱེས་ཆེན་དམ་པ་མང་པོའི་ཞབས་ལ་གཏུགས་ནས་དབང་ལུང་མན་ངག་དུ་མ་ཞུ་མྱོང་ཡོད་པ་མ་ཟད། དེང་རབས་ཀྱི་ཤེས་ཡོན་དང་འབྲེལ་ནས་ཕྱི་རྒྱལ་གྱི་གཙུག་ལག་སློབ་ཁག་ཏུའང་སློབ་སྦྱོང་གནང་འདུག་པ་དང་། ཕྱི་ནང་གྱི་རྗེས་འཇུག་དུ་མ་ལ་ནང་ཆོས་ངོ་སྤྲོད་གནང་བ་སོགས་བསྟན་པ་སྤྱིའི་ཞབས་འདེགས་རིམ་པ་བསྒྲུབས་ཡོད་པ་རེད། རིན་པོ་ཆེ་དམ་པ་ཁོང་གིས་ཕྱི་གླིང་བ་ཚོ་ཕྱིའི་མཐུན་རྐྱེན་ལེགས་ཀྱང་ནང་སེམས་ཀྱི་དཀའ་ངལ་ཆེན་པོ་ཡོད་པ་གཟིགས་ཚུལ་བྱུང་ནས་དཀའ་ངལ་དེ་དག་སེལ་ཆེད་དུ་ཕྱི་ལོ་ ༡༩༩༢ ལོར་ཨིན་ཡིག་གི་ཐོག་ནས་ The Tibetan Book of Living and Dying ཞེས་པའི་བོད་ཀྱི་སྐྱེ་འཆིའི་སྐོར་གྱི་ཕྱག་དེབ་ཅིག་ལྗགས་རྩོམ་གནང་ཡོད་པ་དང་། ཕྱག་དེབ་དེའི་ནང་༸གོང་ས་༸སྐྱབས་མགོན་ཆེན་པོ་མཆོག་དང་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་རིན་པོ་ཆེ་གཙོས་བླ་ཆེན་མང་པོའི་བཀའ་ཆོས་དང་བཀའ་སློབ། དེ་བཞིན་ཕྱི་ནང་གཉིས་ཀྱི་ལྟ་གྲུབ་ཀྱི་སྐོར་འཁོད་ཡོད་པ་མ་ཟད། དེབ་དེ་སྐད་རིགས་མི་འདྲ་བ་ ༣༥ ནང་ལ་ཕབ་སྒྱུར་ཞུས་ཡོད། རྒྱལ་ཁབ་མི་འདྲ་བ་ ༥༠ ལྷག་གི་ནང་དེབ་གྲངས་ས་ཡ་གསུམ་དང་། ལྷག་པར་དུ་རྒྱ་ནག་གི་ཁུལ་དུ་དེབ་གྲངས་ས་ཡ་བཞི་ཙམ་ཚོང་འགྲེམས་བྱས་པའི་ལོ་རྒྱུས་འདུག རིན་པོ་ཆེ་དམ་པ་ཁོང་གིས་རིག་པ་ཆོས་ཚོགས་ཞེས་ཕྱི་ལོ་ ༡༩༧༥ ཙམ་ལ་ཨིན་ཡུལ་གྱི་རྒྱལ་ས་ལོན་ཌོན་ནང་གསར་འཛུགས་གནང་ཡོད་པ་མ་ཟད། འཛམ་གླིང་གི་རྒྱལ་ཁབ་ ༣༠ ཙམ་གྱི་ནང་ཆོས་ཚོགས་གྲངས་ ༡༠༠ ལྷག་ཆེད་འཛུགས་གནང་ཡོད་པ་རེད། སྤྱིར་བསོད་རྒྱལ་རིན་པོ་ཆེ་མཆོག་དམ་པ་དེ་ཉིད་ནི་ནུབ་ཕྱོགས་སུ་བོད་ཀྱི་ནང་བསྟན་ཆོས་བརྒྱུད་དར་སྤེལ་གནང་མཁན་ཐོག་མའི་གྲས་ཤིག་ལ་ངོས་འཛིན་གྱིས་ཁོང་གི་རླབས་ཆེན་གྱི་མཛད་རྗེས་ལ་ཆེ་བསྟོད་ཞུ་མཁན་མང་པོ་ཡོད་ཀྱང་། འདས་པའི་ལོ་ཤས་ནས་རིན་པོ་ཆེ་དེ་ཉིད་ཀྱི་སློབ་མ་མི་ཉུང་བ་ཞིག་གིས་ཁོང་ལ་ཚུལ་མིན་བྱ་སྤྱོད་ཀྱི་ཉེས་འཛུགས་བྱས་པའི་གནས་ཚུལ་ཁག་གཅིག་ཐོན་པ་མ་ཟད། སྔ་ལོར་ནང་ཆོས་ལ་དོན་གཉེར་གནང་མཁན་གྱི་ཕྱི་རྒྱལ་མི་སྣ་ཁག་གཅིག་གིས་༸གོང་ས་མཆོག་ལ་དེ་འབྲེལ་སྙན་གསེང་ཞུ་པའི་ཁྲོད་ཕྱི་རྒྱལ་གྱི་བརྒྱུད་ལམ་མང་དག་ཅིག་ཏུ་དེའི་སྐོར་གནས་ཚུལ་དུ་མ་ཐོན་ཡོད་པ་རེད།

Mountain Resiliency ཞེས་ཁོར་ཡུག་སྲུང་སྐྱོབ་དང་འབྲེལ་བའི་ཡར་ཐོན་ཚོང་ལས་གསར་འཛུགས་གནང་མཁན་ཨ་རིར་གནས་བཞུགས་ཚེས་བཅུ་སྒྲོལ་མ་ལགས་ལ་རྒྱལ་སྤྱིའི་ཐོག་སྙན་གྲགས་ཆེ་བའི་ Skoll ཞེས་པའི་སློབ་ཡོན་ཐོབ་ནས་ཨ་རིའི་ Oxford གཙུག་ལག་སློབ་གཉེར་ཁང་དུ་ Master of Business Administration ཞེས་ལོ་གཅིག་གི་རིང་ཚོང་གཉེར་གི་འཛིན་སྐྱོང་ཐོག་གཙུག་ལག་རབ་འབྱམས་པའི་སློབ་སྦྱོང་གནང་རྒྱུ་རེད་འདུག Skoll Scholarship ཞེས་པའི་སློབ་ཡོན་དེ་ཕྱི་ལོ་ ༢༠༠༢ ལོར་ཐོག་མ་དབུ་འཛུགས་གནང་བ་བཞིན་ལོ་ལྟར་ས་གནས་དང་འཛམ་གླིང་ཁྱོན་ཡོངས་ལ་གང་ཟག་སྒེར་གྱིས་གསར་གཏོད་ཀྱི་ལམ་ནས་སྤྱི་ཚོགས་ཡོངས་ལ་སྨན་པའི་ཡར་ཐོན་ཚོང་ལས་རིགས་གཉེར་ཞིང་སྤྱི་ཚོགས་ནང་དེ་འབྲེལ་ཉེ་བར་མཁོ་བའི་ཐབས་བྱུས་དང་ཁོར་ཡུག་གི་གནས་སྟངས་བཅས་ལ་དགོས་ངེས་ཀྱི་གདོང་ལེན་གནང་མཁན་རྣམས་ལ་གཟེངས་རྟགས་ཀྱི་ཚུལ་དུ་སློབ་ཡོན་གནང་གི་ཡོད་པ་རེད། འོན་ཀྱང་སློབ་ཡོན་དེའི་དགོས་དམིགས་གཙོ་བོ་ནི་ཡར་ཐོན་ཚོང་ལས་རིགས་གསར་འཛུགས་དང་ཚོང་ལས་གཉེར་མཁན་ཚོར་ཚོང་གཉེར་གྱི་འཛིན་སྐྱོང་སློབ་ཡོན་ཕུལ་བ་ཙམ་མིན་པར་སློབ་ཡོན་དེ་བརྒྱུད་སླད་མར་གོ་ལའི་ཁྱོན་ཡོངས་ནས་སྤྱི་ཚོགས་ཡར་རྒྱས་ལ་ཕན་པའི་མགོ་ཁྲིད་ཅིག་བསྐྲུན་ཆེད་ཡིན་པ་མ་ཟད། ལྷག་པར་དུ་འཛམ་གླིང་ནང་ཆེས་སྙན་གྲགས་ཡོད་པའི་ཡར་ཐོན་ཚོང་གཉེར་བ་ཁག་དང་ཐུག་འཕྲད་གནང་རྒྱུ་དང་དེ་བཞིན་མགོ་ཁྲིད་དང་མ་འཛུགས་བྱེད་མཁན་ཚོ་དང་བསམ་བློ་བརྗེ་རེས་གནང་རྒྱུ་སོགས་ཀྱི་གོ་སྐབས་བསྐྲུན་གྱི་ཡོད་པ་ལྟར། འཛམ་གླིང་གི་རྒྱལ་ཁབ་ Australia དང་།  Bangladesh དེ་བཞིན་ Costa Rica དང་། Kenya ཨ་རི་བཅས་ནང་སྤྱི་ཚོགས་ལ་ཕན་པའི་ཡར་ཐོན་ཚོང་གཉེར་བ་སྟོང་ཕྲག་ལྷག་གིས་སློབ་ཡོན་དེ་འཐོབ་ཐབས་སུ་ཞུ་སྙན་ཕུལ་བའི་ཁྲོད་ནས་སློབ་ཡོན་ཐེངས་ ༡༦ པ་འམ་ཕྱི་ལོ་ ༢༠༡༩༌༌༢༠ ལོའི་སློབ་ཡོན་བཞེས་མཁན་མི་ཡར་ཐོན་ཚེང་གཉེར་བ་མི་ལྔ་འདེམས་སྒྲུག་གནང་བའི་ཁོངས་སུ་བོད་མི་ཆེས་ཐོག་མ་ཚུད་མཁན་ཨ་རིར་གནས་བཞུགས་ཚེས་བཅུ་སྒྲོལ་མ་ལགས་ཆགས་ཀྱི་འདུག འདི་ག་རླུང་འཕྲིན་ཁང་གིས་བལ་ཡུལ་ནང་དུ་ Mountain Resiliency ཞེས་ཁོར་ཡུལ་སྲུང་སྐྱོབ་དང་འབྲེལ་བའི་སྤྱི་ཚོགས་ཡར་རྒྱས་ཚོང་ལས་གཉེར་མཁན་ཚེས་བཅུ་སྒྲོལ་མ་ལགས་སུ་ད་རེས་ཁོང་ལ་ Skoll སློབ་ཡོན་དེ་ཐོབ་དོན་གང་ཡིན་སོགས་ཀྱི་ཐོག་ལ་བཅར་འདྲི་ཁག་ཞུས་པར་ཁོང་གིས་སློབ་ཡོན་འདི་ཐོབ་ཚུལ་ངོ་སྤྲོད་གནང་བ་སྦྲགས། མ་འོངས་པར་རྒྱལ་སྤྱིའི་ཚོང་གཉེར་རིག་པའི་ཐོག་ལ་སློབ་གཉེར་གནང་རྒྱུ་དང་མུ་མཐུད་སྤྱི་ཚོགས་ལ་ཕན་པའི་ཡར་ཐོན་ཚོང་ལས་ཐད་ལ་ཕྱག་ལས་གནང་འདོད་ཡོད་པ་གསུངས་སོང་། རྩ་བའི་ Skoll སློབ་ཡོན་དེ་ནི་འཛམ་གླིང་ཁྲོད་དུ་གང་ཟག་གང་ཞིག་ཡར་ཐོན་ཚོང་གཉེར་གནང་མཁན་ཚོར་འགྲན་ཞུགས་ཀྱི་ལམ་ནས་ Oxford གཙུག་ལག་སློབ་གཉེར་ཁང་དུ་ཚོང་གཉེར་གྱི་འཛིན་སྐྱོང་ཐོག་སློབ་སྦྱོང་བྱ་ཆེད་སྤྱི་ཚོགས་ལ་སྨན་པའི་ཉེར་བར་མཁོ་བའི་ཚོང་གཉེར་གྱི་ཐབས་བྱུས་དང་ཁོར་ཡུག་བཅས་ལ་གདོང་ལེན་གནང་མཁན་ཚོར་སློབ་ཡོན་ཆ་ཚང་གནང་བ་མ་ཟད། དེ་བཞིན་རང་ཉིད་ལ་དགོས་ངེས་ཀྱི་ལག་དངུལ་ཨིན་སྒོར་ ༡༤༠༠༠ ལྷག་གནང་གི་ཡོད་པ་རེད། གཞི་རྩའི་ཨ་རིར་བཞུགས་པའི་ཚེས་བཅུ་སྒྲོལ་མ་ལགས་ཀྱིས་བལ་ཡུལ་དུ་ Mountain Resiliency ཞེས་ཁོར་ཡུལ་སྲུང་སྐྱོབ་དང་འབྲེལ་བའི་ཡར་ཐོན་ཚོང་ལས་གསར་འཛུགས་གནང་ཞིང་། རྒྱལ་སྤྱིའི་ཐོག་སྙན་གྲགས་ཡོད་པའི་ Forbes དུས་དེབ་ཐོག་ཨ་རིའི་ནང་ལོ་ངོ་སུམ་ཅུ་མན་གྱི་ན་གཞོན་ཁྲོད་ནས་རང་ཉིད་ཀྱིས་གསར་གཏོད་ལམ་ནས་ཡར་ཐོན་ཚོང་ལས་རིགས་གསར་འཛུགས་གནང་སྟེ་སྤྱི་ཚོགས་ལ་ཕན་པའི་ལས་དོན་གཉེར་བཞིན་པའི་མི་སྣ་ ༦༠༠ དང་། དེ་དག་ལས་མ་འོངས་པར་ལས་གཞི་དེའི་བརྒྱུད་སྤྱི་ཚོགས་ཁྱོན་ལ་བཟང་ཕྱོགས་ཀྱི་འགྱུར་བ་གཏོང་ཐུབ་པ་འདུག་སྙམ་པའི་ཆེས་དྲག་གྲས་ན་གཞོན་སུམ་ཅུའི་ཁོངས་སུ་ཚུད་ཐུབ་ཡོད་པ་མ་ཟད། སྔ་ལོའི་ནང་ Asia 21 Young Leaders Class of 2018 ཞེས་ཕྱི་ལོ་ ༢༠༡༨ ལོའི་ཨེ་ཤ་ཡའི་ཕུལ་བྱུང་ན་གཞོན་མགོ་ཁྲིད་ཁོངས་སུ་ན་གཞོན་གཟེངས་ཐོན་ ༣༡ འདེབས་སྒྲུག་གནང་བའི་ནང་ཚེས་བཅུ་སྒྲོལ་མ་ལགས་ཀྱང་འདེམས་སྒྲུག་གནང་ཡོད་པ་རེད།

དེ་རིང་སྔ་དྲོ་རྒྱ་གར་བྱང་ཕྱོགས་ཀུ་ལུ་ཁུལ་དུ་རྟེན་གཞི་བྱས་པའི་དགས་པོ་གྲྭ་ཚང་དུ་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ཧྲིལ་པོ་ ༦༠༠ འཁོར་བ་དང་བསྟུན་བྱེས་ཀྱི་གདན་ས་ཆེན་པོ་གསུམ་གྱིས་གཙོས་པའི་དགོན་པ་གྲྭ་ཚང་ཁག་གི་འཐུས་ཚབ་མི་སྣ་བཅས་ཁྱོན་ཚོགས་བཅར་བ་ ༡༥༠ ལྷག་ལྷན་འཛོམས་ཐོག་ཉིན་གཉིས་ཀྱི་རིང་ལམ་རིམ་ཆེན་མོའི་བགྲོ་གླེང་དབུ་འཛུགས་གནང་འདུག དེ་རིང་བགྲོ་གླེང་དབུ་འཛུགས་མ་གནང་བའི་སྔོན་དུ་སྐུ་མགྲོན་གཙོ་བོ་དགའ་ལྡན་ཁྲི་ཐོག་ ༡༠༤ པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དབུ་བཞུགས་ཐོག་དགེ་ལུགས་སྤྱི་འཐུས་ཨ་ཀྲུག་ཚེ་བརྟན་ལགས་དང་ཆོས་རིག་དྲུང་ཆེ་བསྟན་འཛིན་ལུང་རྟོགས་ལགས་སོགས་གཙོས་དགོན་སྡེ་གྲྭ་ཚང་ཁག་གི་བགྲོ་གླེང་བ་ཡོངས་འདུ་འཛོམས་ཀྱིས་བགྲོ་གླེང་དངོས་གཞི་དབུ་འཛུགས་མ་གནང་གོང་དུ་ཚོུད་ ༧ ཐོག་དགའ་ལྡན་ཁྲི་ཐོག་ ༡༠༤ བ་མཆོག་ལ་མདོ་ལུགས་ཀྱི་བརྟན་བཞུགས་བསྟར་འབུལ་ཞུས་པ་དང་ཚོུད་ ༡༠ སྟེང་༸རྗེ་ཙོང་ཁ་པ་ཆེན་པོ་མཆོག་གིས་ལྗགས་རྩོམ་མཛད་པའི་ལམ་རིམ་ཆེན་མོའི་ཐོག་ལ་མཁས་པའི་བགྲོ་གླེང་དབུ་འཛུགས་ཀྱིས་དུས་དྲན་སྲུང་བརྩི་ཞུས་འདུག དྭགས་པོ་གྲྭ་ཚང་གི་ཕྱག་མཛོད་དགེ་བཤེས་རྒྱལ་མཚན་སེང་གེ་ལགས་ཀྱིས་འདི་ལོ་འཛམ་གླིང་རྒྱལ་སྤྱིའི་དགེ་ལྡན་ལྷན་ཚོགས་ནས་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ ༦༠༠ འཁོར་བ་བསྟུན་༸རྗེ་རིན་པོ་ཆེ་མཆོག་གི་བཀའ་དྲིན་རྗེས་སུ་དྲན་པའི་ཐོག་ཕྱི་ལོ་ ༢༠༡༩ སྟེ་བོད་རབ་གནས་ས་མོ་ཕག་གི་ལོ་ཧྲིལ་པོ་འདི་རྒྱལ་སྤྱིའི་༸རྗེ་ཙོང་ཁ་པའི་ལོ་ཞེས་སྲུང་བརྩི་ཞུ་བཞིན་ཡོད་པ་ལྟར། དྭགས་པོ་གྲྭ་ཚང་འདི་༸རྗེ་རིན་པོ་ཆེ་མཆོག་གི་དངོས་སློབ་ཆོས་རྗེ་བློ་གྲོས་བསྟན་པ་མཆོག་གིས་ཕྱག་བཏབ་པ་ཞིག་ཡིན་པ་ལྟར། དྭགས་པོ་ཁུལ་དུ་ལམ་རིམ་གྱི་བསྟན་པ་ཉི་མ་ཤར་བ་བཞིན་དུ་སྤེལ་བའི་རྟགས་དང་མཚན་མའི་རྟེན་འབྲེལ་མང་དུ་མ་ཡོད་པར་ངོ་སྤྲོད་གནང་སོང་། རྩ་བའི་དྭགས་པོ་བཤད་སྒྲུབ་གླིང་དགོན་པ་ནི་དེ་སྔོན་རྒྱ་གར་མན་སྤར་ཕན་བདེ་གླིང་དུ་ཡོད་པ་དང། དེ་ནས་ཀུ་ལུ་ཁུལ་དུ་གནས་སྤོས་གནང་ནས་ཕྱི་ལོ་ ༢༠༠༥ ལོར་ཀུ་ལུ་ཁུལ་དུ་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འབྱེད་རབ་གནས་བཀྲིན་བསྐྱངས་ཡོད་པ་རེད།

རྒྱ་ནག་གིས་བོད་ས་ཡོངས་རྫོགས་དབང་བསྒྱུར་ནས་མི་ལོ་ཧྲིལ་པོ་ ༦༠ འཁོར་བའི་དུས་སྐབས་དང་བསྟུན་ཡོ་རོབ་སྤྱི་འཐུས་སྐུ་ཞབས་ཐུབ་བསྟན་དབང་ཆེན་ལགས་ཀྱིས་བོད་ནང་གི་དངོས་ཡོད་གནས་སྟངས་གསལ་འདོན་སྤྱི་དང་སྒོས་བོད་རྒྱ་གཉིས་དབར་གྲོས་མོལ་བསྐྱར་གསོ་མགྱོགས་མྱུར་ཡོང་ཆེད་ཡོ་རོབ་བོད་དོན་གྲོས་མོལ་ཞུ་གཏུག་གི་སྐོར་སྐྱོད་ཅེས་པའི་ལས་འགུལ་འོག་ཉིན་གྲངས་ ༧༠ རིང་ཡོ་རོབ་རྒྱལ་ཁབ་ཁག་ ༣༠ ནང་སྣུམ་འཁོར་བཏང་ནས་བོད་དོན་ཞུ་གཏུག་གནང་རྒྱུ་རེད་འདུག ལས་འགུལ་དེ་རིང་མིན་ཕྱི་ཟླ་ ༩ ཚེས་ ༢ ཉིན་བོད་མིའི་མང་གཙོ་དུས་ཆེན་དང་བསྟུན་ཡོ་རོབ་རྒྱལ་ཁབ་སེ་པན་གྱི་སྦར་སེ་ལོ་ན་གྲོང་ཁྱེར་ནས་དབུ་འཛུགས་གནང་རྒྱུ་དང་། ལས་འགུལ་དེའི་དམིགས་ཡུལ་གཙོབོ་ནི་ཡུ་རོབ་རྒྱལ་ཁབ་ ༣༠ ནང་ཡོད་པའི་བོད་མི་ཁ་འཐོར་བ་རྣམས་དང་བོད་དོན་རྒྱབ་སྐྱོར་བ་རྣམས་ཐུག་འཕྲད་ཀྱིས་བོད་དོན་འཐབ་རྩོད་ཀྱི་ནུས་པ་གོང་མཐོར་གཏོང་ཐབས། དེ་བཞིན་རྒྱལ་ཁབ་སོ་སོའི་གཞུང་འབྲེལ་དཔོན་རིགས་ཁག་ལ་ཐུག་འཕྲད་ཀྱིས་ད་བར་གྱི་རྒྱ་ནག་གཞུང་གིས་བོད་ནང་བོད་མིའི་ཐོག་སྤེལ་བཞིན་པའི་སྡུག་རྩུབ་གཉའ་གནོན་འོག་བོད་མི་ཚོར་ཆོས་དད་རང་དབང་དང་སྐད་ཡིག་རང་དབང་མེད་པ། ཁོར་ཡུག་གཏོར་བཤིག བཙུན་འཇུག་སོགས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཁག་སྙན་སེང་ཞུ་རྒྱུ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་དང་སྲིད་འཛིན་ཞི་ཅིན་ཕིང་རྣམ་གཉིས་ཀྱི་སྐུ་ཚབ་ཕན་ཚུན་མགྱོགས་མྱུར་གྲོས་མོལ་ཡོང་བར་རྒྱལ་ཁབ་སོ་སོའི་གཞུང་ཁག་ལ་རེ་སྐུལ་ཞུ་ཕྱིར་ཡིན་པ་རེད། སྐུ་ཞབས་ཐུབ་བསྟན་དབང་ཆེན་ལགས་ཀྱིས་ཐེངས་འདིའི་བོད་དོན་སྐོར་སྐྱོད་ཀྱི་ལས་འགུལ་ཐོག་རྒྱལ་ཁབ་སོ་སོའི་གཞུང་འབྲེལ་དཔོན་རིགས་ཁག་ལ་ཞུ་གཏུག་དང་རྒྱ་གཞུང་ལ་དགོས་འདུན་དོན་ཚན་ ༡༢ བཅས་སྤྱིར་བསྒྲགས་ཤིག་ངོ་དེབ་ཐོག་སྤེལ་འདུག དེའི་ནང་བོད་རྒྱ་འབྲེལ་མོལ་གང་མགྱོགས་ཡོང་ཐབས་དང་། ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་ཡོང་ཐབས། བོད་མི་ཚོར་ཆོས་དད་དང་ཤེས་ཡོན། འགྲོ་སྐྱོད་རང་དབང་དགོས་པ། བོད་ཀྱི་སྐད་ཡིག་སྲུང་སྐྱོབ་པ་བཀྲིས་དབང་ཕྱུག་ལགས་གློད་བཀྲོལ་དགོས་པ། ༸གོང་ས་༸སྐྱབས་མགོན་ཆེན་པོ་མཆོག་བོད་ལ་ཕྱིར་ཕེབས་གནང་ཐུབས་ཐབས་དང་། དངོས་ཡོད་བདེན་འཚོལ་གྱི་རྒྱལ་སྤྱིའི་སྐུ་ཚབ་བོད་ནང་ལ་གཟིགས་སྐོར་གནང་ཐབས། བོད་ཀྱི་འབྲོག་པ་རྣམས་ཀྱི་མི་ཚེའི་གནས་སྟངས་ལ་སྲུང་བརྩི་བྱ་རྒྱུ། རྒྱ་ནག་གི་ཆབ་སྲིད་རྒྱུད་གཅིག་ལམ་གཅིག་ཞེས་པ་བཀག་འགོག་བྱ་ཐབས། བོད་ཀྱི་ཁོར་ཡུག་གཏོར་བཤིག་ལ་བཀག་སྡོམ་བྱ་རྒྱུ། ཕར་འགྲོ་ཚུར་འོང་འདྲ་མཉམ་ཡོང་ཐབས་ལ་ཤུགས་སྣོན་གནང་རྒྱུ། དེ་བཞིན་རྒྱ་གཞུང་གིས་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་མཚམས་འཇོག་དགོས་པ་བཅས་ཆགས་ཀྱི་འདུག སྤྱི་འཐུས་སྐུ་ཞབས་ཐུབ་བསྟན་དབང་ཆེན་ལགས་ཀྱིས་སེ་པན་ནས་དབུ་འཛུགས་ཀྱིས་རིམ་པས་ཡོ་རོབ་རྒྱལ་ཁབ་ ༣༠ ནང་སྐོར་སྐྱོད་ཀྱིས་ཕྱི་ཟླ་ ༡༡ ཚེས་ ༦ ཉིན་སུད་སི་ཇི་ནི་ཝའི་རྒྱལ་ཚོགས་ཀྱི་མདུན་ཐང་དུ་མཇུག་སྒྲིལ་གནང་རྒྱུ་རེད་འདུག རྩ་བའི་སྐུ་ཞབས་ཐུབ་བསྟན་དབང་ཆེན་ལགས་ནས་དེ་སྔ་ཕྱི་ལོ་ ༢༠༡༢ ལོར་ཡོ་རོབ་རྒྱལ་ཁབ་ཁག་ ༢༠ ནང་དུ་སྣུམ་འཁོར་བཏང་ནས་བོད་མི་མང་སྤྱི་འཐུས་ལྷན་ཚོགས་ཀྱི་བདེན་པའི་མེ་ལྕེའི་སྐོར་སྐྱོད་ཀྱི་ལས་འགུལ་ཡང་སྤེལ་མྱོང་ཡོད་པ་རེད།

༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ཕྱི་ཟླ་ ༦ པའི་ཟླ་མཇུག་ཙམ་ནས་བྱང་ཨ་མི་རི་ཀའི་ས་གནས་ཁག་གཅིག་ཏུ་ཆོས་འབྲེལ་དང་བཀའ་དབང་། དེ་བཞིན་གཙུག་ལག་སློབ་གཉེར་ཁང་། ཚོགས་སྐྱིད་ཁག་གི་སློབ་ཕྲུག་དང་མང་ཚོགས་རྣམས་ལ་བཀའ་སློབ་སོགས་ཀྱི་མཛད་འཕྲིན་རྒྱ་ཆེ་སྐྱོང་བཞིན་ཡོད་པ་ལྟར་ཟླ་ ༨ ཚེས་ ༢༣ ཉིན་གླིང་མཆོག་སྤྲུལ་རིན་པོ་ཆེ་མཆོག་གིས་ཨ་རིའི་ཕྱི་སྲིད་ལྷན་ཁང་དུ་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་དམིགས་བསལ་སློབ་སྟོན་པ་སྐུ་ཞབས་ Thames Noax ལགས་དང་ཐུག་འཕྲད་ཀྱིས་བོད་དོན་སྙན་གསེང་ཞུས་འདུག རིན་པོ་ཆེ་མཆོག་གིས་སྐུ་ཞབས་ Thames Noax ལགས་སུ་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་སྒོས་ཆོས་དད་རང་དབང་གི་གནས་སྟངས་དང་འབྲེལ་ནས་ཆོས་ལ་དད་པ་མེད་མཁན་རྒྱ་ནག་དམར་ཤོག་གཞུང་གིས་བོད་ཀྱི་ཆོས་དད་རང་དབང་དང་བླ་སྤྲུལ་ཡང་སྲིད་ཀྱི་ངོས་འཛིན་གནང་སྲོལ་ལམ་ལུགས་ལ་ཐེ་བྱུས་བྱེད་བཞིན་པ་ནི་གཞི་རྩ་མེད་པ་ཞིག་དང་། རྒྱ་ནག་གཞུང་གིས་བོད་ཀྱི་དགོན་པ་རེར་དོ་དམ་ཚོགས་ཆུང་ཞེས་ཆེད་འཛུགས་ཀྱིས་དགོན་པའི་ཉིན་རེའི་གནང་སྒོ་ཁག་ལ་དམ་དྲག་དང་བཏང་འཛིན་སོགས་བྱེད་བཞིན་ཡོད་སྟབས་དགོན་ཁག་གི་ཉིན་རེའི་གནང་སྒོ་ཁག་ལ་ཧ་ཅང་གི་སུན་གཙིར་ཆགས་ཡོད་པ་སོགས་གསལ་བཤད་གནང་འདུག རིན་པོ་ཆེ་མཆོག་གིས་ད་དུང་རྒྱ་གཞུང་གི་སྲིད་བྱུས་འོག་བོད་ནང་ལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་སོགས་ཉམས་གུད་དུ་འགྲོ་བཞིན་པའི་ཆེས་ཛ་དྲག་གི་དངོས་ཡོད་གནས་སྟངས་ཡང་སྙན་གསེང་ཞུས་ཡོད་པ་རེད། སྐབས་དེར་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་དམིགས་བསལ་སློབ་སྟོན་པ་སྐུ་ཞབས་ Thames Noax ལགས་ཀྱིས་བོད་ནང་གི་ཆོས་དད་རང་དབང་གི་གནས་སྟངས་ཐད་ཐུགས་འཚབ་ཆེན་པོ་གནང་གི་ཡོད་པ་མ་ཟད། ཉེ་ཆར་རྒྱལ་ཚོགས་ཀྱི་ཆོས་དད་རང་དབང་ཚོགས་འདུའི་སྐབས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་གཞུང་ཚབ་པ་སྐུ་ཞབས་ Sam Brownback ལགས་ཀྱིས་རྒྱ་ནག་ནང་གི་ཆོས་དད་རང་དབང་སྐོར་གླེང་སློང་གནང་ཡོད་པ་སོགས་འགྲེལ་བརྗོད་དང་འབྲེལ། ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ངོས་ནས་བོད་ནང་གི་ཆོས་དད་རང་དབང་ལ་གང་ཐུབ་ཅི་ཐུབ་གནང་རྒྱུ་ཡིན་ཞེས་ཞལ་བཞེས་གནང་འདུག གཞི་རྩའི་མཇལ་མོལ་དེའི་སྐབས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་ཨ་རིའི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་སྒྲོལ་ལགས་རྣམ་གཉིས་ལྷན་བཅར་ཞུས་ཡོད་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་རྒྱ་ནག་གཞུང་གིས་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་སྲོལ་ལམ་ལུགས་ལ་ཐེ་བྱུས་བྱེད་བཞིན་པ་དེ་ནི་སྐྱེ་བ་སྔ་ཕྱི་ལ་ཡིད་ཆེས་གང་ཡང་མེད་མཁན་ཞིག་ནས་བོད་བརྒྱུད་ནང་བསྟན་གྱི་རྗེས་འཇུག་པ་རྣམས་ལ་དམའ་འབེབས་དང་འཕྱ་སྨོད་བྱེད་པ་ཞིག་རེད་ཅེས་གསུངས་འདུག རྩ་བའི་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་བྱང་ཨ་རི་ཁུལ་གྱི་མཛད་འཆར་ཁྲོད་ཁེ་ན་ཌའི་གྲོང་ཁྱེར་ཊོ་རོན་ཊོ་ནང་ཡོད་པའི་གངས་ལྗོངས་ཆོས་ལྡན་གླིང་དུ་སྨན་བླའི་བཀའ་དབང་དང་། སྒྲོལ་དཀར་ཚེ་དབང་། མི་མང་ལ་བླང་དོར་གྱི་བཀའ་སློབ་སོགས་བསྩལ་ཡོད་པ་མ་ཟད། ཨ་རིའི་མངའ་སྡེ་ Michigan དང་ Wisconsin  Texas དེ་བཞིན་གྲོང་ཁྱེར་ New York དང་ Vermont Massachusetts སོགས་སུ་མང་ཚོགས་ལ་བཀའ་ཆོས་དང་བཀའ་སློབ་སོགས་ཀྱི་མཛད་འཕྲིན་རྒྱ་ཆེ་བསྐྱངས་ཡོད་པ་རེད། ལྷག་པར་དུ་ཨ་རིའི་རྒྱལ་ས་ Washington DC ཁུལ་གྱི་མཛད་འཆར་ཁྲོད་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་དམིགས་བསལ་སློབ་སྟོན་པ་མཆོག་ལ་བོད་དོན་སྙན་གསེང་ཞུས་པ་མ་ཟད། ཁུལ་དེར་རྟེན་གཞི་བྱས་པའི་ཨ་རིའི་ཞི་བདེའི་བསྟི་གནས་ཁང་དུ་བསྟི་གནས་ཁང་གི་ཚོགས་གཙོ་ Nancy Lindborg ལགས་དང་ཚོགས་གཞོན་ Susan Hayward ལགས་ཀྱིས་གཙོས་པའི་གནད་ཡོད་མི་སྣ་དང་། གཙུག་ལག་སློབ་གཉེར་ཁང་གི་སློབ་དཔོན། མཁས་དབང་ཁག་ལྷན་འཛོམས་སར་འཁྲུག་རྩོད་ཅན་གྱི་འཛམ་གླིང་ནང་ཞི་བདེ་གསོ་བ་ཞེས་པའི་བརྗོད་གཞིའི་ཐོག་བཀའ་སློབ་དང་གྲོས་བསྡུར་མཛད་འདུག ཁ་ཉིན་༸སྐྱབས་རྗེ་རིན་པོ་ཆེ་མཆོག་གིས་ཁུལ་དེར་ཚོགས་པའི་ཆོས་ལུགས་འདྲ་མིན་གྱི་སྐུ་ཚབ་རྣམ་པའི་ལྷན་ཚོགས་ཐོག་དབུ་བཞུགས་བཀྲིན་མཛད་ཡོད། འབྲེལ་ཡོད་སྐུ་པར་ཁག་གླིང་རིན་པོ་ཆེའི་ངོ་དེབ།

འཁོན་རིགས་བསྟན་པའི་སྲོལ་འབྱེད་༸དཔལ་ས་སྐྱ་གོང་མ་ཁྲི་ཆེན་མཆོག་གིས་ཕྱི་ཟླ་ ༤ ཚེས་ ༢༤ ཉིན་འདི་ག་སུད་སི་ཁུལ་དུ་གནས་སྡོད་བོད་མི་སེར་སྐྱ་མང་ཚོགས་ལ་ཆོས་འབྲེལ་བཀྲིན་བསྐྱངས་པ་དང་འབྲེལ་བོད་མི་ཡོངས་ནས་འདས་པའི་ལོ་རྒྱུས་ལས་བསླབ་བྱ་བླངས་ཏེ་བོད་ཆོལ་ཁ་གསུམ་དང་ཆོས་བརྒྱུད་བཅས་པ་ཕན་ཚུན་དབར་འཆམ་འཐུན་བྱ་རྒྱུ་ཤིན་ཏུ་ནས་གལ་ཆེན་པོ་ཡིན་པ་དང་། མ་འོངས་པར་བོད་གངས་ཅན་ལྗོངས་རང་དབང་མངའ་སྲོལ་དང་གཞིས་བྱེས་མཉམ་འཛོམས་ཡོང་བར་འཆམ་མཐུན་ནི་གལ་ཆེ་ཞིག་ཆགས་ཡོད་པ་དང་། གལ་ཏེ་བོད་མི་ནང་ཁུལ་འཆམ་མཐུན་མེད་ན་ཕྱིའི་སྟོབས་ཤུགས་ག་ཚོད་ཆེན་པོ་ཡོད་ཀྱང་དོན་ངོ་མ་བསྒྲུབ་རྒྱུ་མེད་པར་ལམ་སྟོན་བསྩལ་སོང་། ༸དཔལ་ས་སྐྱ་གོང་མ་ཁྲི་ཆེན་མཆོག་གིས་ད་དུང་བོད་མི་རིགས་ཀྱི་སྐད་ཡིག་དང་གོམས་སྲོལ་བཟང་པོ་དག་གི་གལ་གནད་དང་འབྲེལ། དེང་སྐབས་ཕྱི་རྒྱལ་ཁག་ཏུ་ཡོད་པའི་བོད་པའི་གཞོན་སྐྱེས་ཁག་ས་གནས་སོ་སོའི་ཁོར་ཡུག་གི་ཤུགས་རྐྱེན་འོག་ནས་བོད་ཡིག་དང་བོད་པའི་སྐད་མ་ཤེས་པའི་གནས་སྟངས་ཡོང་གི་ཡོད་པ་དེ་ནི་ཐབས་སྐྱོ་བའི་གནས་སྟངས་ཤིག་ཡིན་པ་དང་། ཕྱི་རྒྱལ་དུ་གནས་སྡོད་བོད་མི་ཚོས་འཕྲལ་གསལ་གྱི་ཟས་གོས་ཕུན་སུམ་ཚོགས་པའི་ཁོར་ཡུག་དེའི་ནང་རང་རེའི་བོད་མི་རིགས་ཀྱི་ངོ་བོ་དང་ཕ་མེས་ནས་ཡོད་པའི་གོམས་སྲོལ་བཟང་པོ་དེ་གཅེས་འཛིན་བྱེད་མ་ཐུབ་ཚེ་དེ་ནི་བོད་མི་རིགས་ལ་གྱོང་གུད་ཆེན་པོ་རེད་ཅེས་བཀའ་བསྩལ་བ་མ་ཟད། བོད་མིའི་འགན་འཁྲི་བསྒྲུབ་པར་བོད་མི་རང་གི་ངོ་བ་མ་བརླག་པར་འབད་དགོས་དགོས་གལ་ཡིན་པ་དང་དེ་ལྟར་ཡོང་བར་གཙོ་བོ་བོད་ཀྱི་སྐད་དང་ཡི་གེ་གཉིས་པོ་ཆགས་ཡོད་པ་བཀའ་བསྩལ་འདུག རིན་པོ་ཆེ་མཆོག་གིས་ད་བར་༸གོང་ས་༸སྐྱབས་མགོན་ཆེན་པོ་ཆེ་མཆོག་གིས་བོད་མི་ཚོར་མ་ཡིས་བུ་ལ་བརྩེ་བས་གདམས་པ་ལྟར་ད་བར་བཀའ་སློབ་ཟབ་ཅིང་རྒྱས་པར་བསྩལ་བ་རྣམས་རང་ཅག་བོད་མི་རྣམས་ནས་སྙིང་ཁོངས་སུ་བཅངས་ནས་མགོན་པོ་༸གང་ཉིད་མཆོག་གི་བཀའ་སློབ་དེ་དག་ལ་སློབ་སྦྱོང་བྱས་ནས་༸རྒྱལ་བའི་བཀའ་དགོངས་བཞིན་ལག་བསྟར་གནང་གནད་ཡིན་པའི་ལམ་སྟོན་མཛད་ཡོད་པ་རེད། རྩ་བའི་༸དཔལ་སྐྱ་གོང་མ་ཁྲི་ཆེན་རིན་པོ་ཆེ་མཆོག་ད་རེས་ཡོ་རོབ་རྒྱལ་ཁབ་བྷེལ་འཇམ་དང་ཇར་མི་ནི་དང་དེ་བཞིན་ཕ་རན་སི་བཅས་ཀྱི་ནང་ས་སྐྱ་སྨོན་ལམ་ཆེན་མོ་གཙོ་གྱུར་ཆོས་འབྲེལ་མཛད་འཕྲིན་ཁག་བསྐྱངས་གྲུབ་རྗེས། འདི་ག་སུད་སིར་རྟེན་གཞི་བྱས་པའི་བརྩེ་ཆེན་ཚོགས་པ་དང་ཐུབ་བསྟན་བྱང་ཆུབ་ཆོས་གླིང་ཆོས་ཚོགས་གཉིས་ནས་ཇི་ལྟར་གསོལ་འདོབས་ཞུས་དོན་ལྟར་ཕྱི་ཚེས་ ༢༣ ཉིན་ཐུབ་བསྟན་ཆོས་གླིང་ཆོས་ཚོགས་སུ་གུ་རུ་དབང་དང་ཕྱི་ཚེས་ ༢༤ ཉིན་འདི་ག་སུད་སི་ Wtiherthur ས་གནས་སུ་ཆེད་དུ་བྱ་བའི་འདུལ་བྱ་བོད་མི་སེར་སྐྱ་མང་ཚོགས་གཙོ་གྱུར་ཕྱི་ནང་གི་དད་ལྡན་ཆོས་ཞུ་བ་༢༤༠༠ མན་ཙམ་ལ་ཆོས་འབྲེལ་དང་རིགས་གསུམ་མགོན་པོའི་བཀའ་དབང་བཀའ་དྲིན་བསྩལ་ཡོད་པ་རེད།

བཞུགས་སྒར་གྱི་ཉེ་འདབས་སུ་རྟེན་གཞི་བྱས་པའི་དྷ་སྟེང་བོད་ཁྱིམ་སློབ་གྲྭར་དེ་རིད་ཟླ་ ༨ ཚེས་ ༢༦ ནས་དབུ་འཛུགས་ཀྱིས་ཟླ་ ༩ ཚེས་ ༡ བར་དྷ་ས་དང་མ་སུ་རི་ཁུལ་གྱི་བོད་མིའི་སློབ་ཁག་གི་རིགས་ལམ་འདུ་འཛོམས་ཆེན་མོ་ཐེངས་ ༨ པ་དབུ་འཛུགས་གནང་སོང་། རིགས་ལམ་གྱི་འདུ་འཛོམས་ཆེན་མོ་དེའི་ཐོག་དྷ་སྟེང་དང་དྷ་ཤོད་སློབ་གྲྭ གོ་པལ་པུར། སུ་ཇཱ། ཅོན་ཊ་རཱ་བོད་ཁྱིམ་དང་། དེ་བཞིན་དཔེ་སྟོན་སློབ་གྲྭ། དྷོ་ལན་ཇཱི་སཾ་བྷོ་ཊ། སིམ་ལ་གཏན་སློབ། ཅོན་ཏ་རཱ་སཾ་བྷོ་ཊ། ལ་དྭགས་བོད་ཁྱིམ། ཌལ་ཧོར་གཏན་སློབ་བཅས་དྷ་ས་ཁུལ་གྱི་བོད་སློབ་ཁག་བཅིུག་དང་། གཞན་ཡང་སེ་ལ་ཀུ་བོད་ཁྱིམ་སློབ་གྲྭ་དང་སྤོན་ཊ་སཾ་བྷོ་ཊ། མ་སུ་རི་བོད་ཁྱིམ། མ་སུ་རི་གཏན་སློབ། རཱཇ་པུར་བོད་ཁྱིམ། གྷོ་རི་མ་པཱི་བོད་ཁྱིམ། བདེ་སྐྱིད་གླིང་བོད་ཁྱིམ། ཧར་སྤུར་ཉིན་སློབ། དོན་གྲུབ་གླིང་སློབ་གྲྭ་བཅས་མ་སུ་རི་ཁུལ་གྱི་བོད་སློབ་ཁག་དགུ་ཁྱོན་བོད་མིའི་སློབ་གྲྭ་ ༢༠ འི་སློབ་མ་ ༡༤༧ ནས་མཉམ་ཞུགས་གནང་འདུག དྷ་སྟེང་བོད་ཁྱིམ་གྱི་བདེ་སྐྱིད་ཚེ་རིང་ཚོགས་ཁང་དུ་ཚོགས་པའི་རིགས་ལམ་འདུ་འཛོམས་ཀྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་དྷ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་མཆོག་གིས་གཙོས་པའི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག ཤེས་རིག་ཤེས་ཡོན་ཚན་པའི་འགན་འཛིན་བསྟན་འཛིན་རྡོ་རྗེ་ལགས། དྷ་སྟེང་བོད་ཁྱིམ་གྱི་ངེས་སྟོན་པ་ཚུལ་ཁྲིམས་རྡོ་རྗེ་ལགས་ཀྱིས་གཙོས་འབྲེལ་ཡོད་ལས་བྱེད་ཁག་གཅིག བོད་མིའི་སློབ་གྲྭ་ཁག་གི་ལྟ་གྲུབ་སློབ་དཔོན་དང་རིགས་ལམ་རྩིད་འགྲན་པའི་སློབ་ཕྲུག་བཅས་འདུ་འཛོམས་གནང་སོང་། མཛད་སྒོའི་ཐོག་མར་ཤེས་རིག་ཤེས་ཡོན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་ཀྱིས་རིགས་ལམ་འདུ་འཛོམས་གོ་སྒྲིག་གནང་དོན་གཙོ་བོ་ནི་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་རིགས་ལམ་ཞེས་པ་དེ་ནི་ཆོས་ཕྱོགས་ཀྱི་ངོ་བོ་ཁོ་ན་ཙམ་མིན་པར་སློབ་ཕྲུག་ཚོའི་ངོས་ནས་སློབ་ཚན་གཞན་གི་ཐོག་ལ་རིགས་འགྲེ་གནང་ཐུབ་ཐབས་དང་རིག་པ་འཕེལ་བར་སློབ་ཁྲིང་གནང་དགོས་གལ་ཡིན་པའི་ལམ་སྟོན་དང་ལྷག་དོན་ཤེས་རིག་ཚོགས་ཆེན་སྔ་རྗེས་སུའང་མགོན་པོ་༸གང་ཉིད་མཆོག་གིས་དེ་ལྟར་སློབ་ཁྲིད་གནང་གནད་ཡིན་པར་ལམ་སྟོན་བཀྲིན་ཕེབས་པ་ལྟར་རིགས་ལམ་འདུ་འཛོམས་ཀྱི་ལས་འཆར་གོ་སྒྲིག་གནང་བ་ཞིག་ཆགས་ཡོད་པ་ངོ་སྤྲོད་གནང་སོང་། སྐུ་མགྲོན་གཙོ་བོ་དྷ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་མཆོག་གིས་ང་ཚོ་བོད་མི་ཚོས་ཚད་མ་རིག་པ་ཞེས་འཕྲལ་ཕུགས་ཀྱི་བླང་དོར་གྱི་རྣམ་དབྱེ་འབྱེད་པར་སྤྱོད་བཞིན་ཡོད་པ་ལྟར་འདི་ལ་འཛམ་གླིང་སྤྱི་ཡོངས་ནས་གལ་ཆེ་ཞིག་ལ་ངོས་འཛིན་བྱེད་བཞིན་ཡོད་སྐོར་གསུངས་པ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གིས་རིགས་ལམ་སློབ་སྦྱོང་བྱས་ནས་རིག་གནས་གཞན་ཁག་གི་ཐོག་ལ་རིགས་འགྲེ་ཐུབ་ཐབས་སུ་དགོངས་གཞི་ཡོད་པ་ལྟར་འཛམ་གླིང་སྤྱིའི་རིག་གནས་ཤེས་པར་རིགས་ལམ་གྱི་ཐོག་ནས་གནང་ཐུབ་ཚེ་དེ་ནི་གསར་གཏོད་ཆེན་པོ་ཞིག་རེད་ཅེས་ལམ་སྟོན་གནང་སོང་། དགེ་བཤེས་ལྷག་རྡོར་མཆོག་གིས་ད་དུང་སྤྱིར་ཚད་མ་རིག་པ་ཞེས་པ་དེ་ཕྱི་ནང་ཆོས་ལུགས་ཀུན་གྱི་ཐུན་མོང་གི་རིག་པ་ཞིག་ཡིན་ཀྱང་། བརྗོད་བྱ་མངོན་མཐོ་དང་ངེས་ལེགས་ཀྱི་གོ་འཕང་དང་དེ་ལྟར་འཐོབ་པར་བརྗོད་བྱེད་བདེན་གཉིས་དང་བདེན་བཞི་བཅས་ཀྱི་ཐོག་ནས་ནང་པའི་ཐུན་ཐོང་མ་ཡིན་པའི་རིག་པའི་རྣམ་གཞག་ཆགས་ཚུལ་ངོ་སྤྲོད་གནང་ཡོད། ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་གིས་རིགས་ལམ་འདུ་འཛོམས་འདི་ལྟ་བུ་གོ་སྒྲིག་གནང་ཐུབ་པ་འདི་༸གོང་ས་༸སྐྱབས་མགོན་ཆེན་པོ་མཆོག་གི་བླ་ན་མེད་པའི་དགོངས་གཞིའི་ཆ་ཤས་ཤིག་བསྒྲུབ་རྒྱུ་དང་བསོད་ནམས་ཀྱི་གོ་སྐལ་ཞིག་ཡིན་པ་གསུངས་སོང་བ་དང་སྦྲགས། རིགས་ལམ་འདུ་འཛོམས་འདི་བརྒྱུད་ནས་ཤེས་ཡོན་སྲིད་བྱུས་ཀྱི་དགོས་དམིགས་བཞི་པོ་ལེགས་གྲུབ་ཐུབ་པར་ཕན་ཐོགས་འབྱུང་བཞིན་ཡོད་པ་གསུངས་ཡོད། རྩ་བའི་རིགས་ལམ་འདུ་འཛོམས་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེས་ལྟར་སློབ་གྲྭ་ཁག་ཏུ་རིགས་ལམ་སློབ་ཁྲིད་སྲ་བརྟན་ཡོང་ཐབས་དང་། རིགས་ལམ་སློབ་ཁྲིད་གནང་བ་བརྒྱུད་སློབ་མ་ཚོའི་རིག་སྟོབས་འཕེལ་ཆེད་དུ་དམིགས་པ་ཞིག་ཡིན་པ་རེད།