རྒྱ་ནག

ཁ་སང་ཕྱི་ཚེས ༡༩ཉིན། རྒྱ་ནག་གཞུང་གིས་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ཝང་དབྱིང་ཅེ་ཟེར་བ་འགྱུར་བ་བཏང་སྟེ།  དེའི་ཚབ་ཏུ་རྒྱ་ནག་གི་ནང་དུ་དབང་བསྒྱུར་དྲག་གནོན་ཆེ་ཤོས་ཀྱི་ཡུ་གུར་རང་སྐྱོང་ལྗོངས་ཀྱི་དམར་ཤོག་ཚོགས་པའི་འགོ་གཙོ་གཞོན་པ་ཧན་མི་རིགས་ཝང་ཅུན་ཀྲེང་ཟེར་བ་བསྐོ་བཞག་བྱས་འདུགགཞི་རྩའི་ཝང་ཅུན་ཀྲེང་ནི་ཕྱི་ལོ་ ༢༠༡༩ ཟླ་ ༡ ནས་ཤིན་ཅང་ཡུ་གུར་མི་རིགས་རང་སྐྱོང་ཁུལ་དམར་ཤོག་ཚོགས་པའི་རྒྱུན་ལས་དང་སྲིད་ཁྲིམས་རྒྱུན་ལས་ལྷན་ཁང་གི་དྲུང་ཆེ། ཕྱི་ལོ་ ༢༠༢༠ ཟླ་ ༥ ནས་ལོ་དེའི་ཕྱི་ཟླ་ ༩ པའི་བར་ཤིན་ཅང་ཡུ་གུར་མི་རིགས་རང་སྐྱོང་ཁུལ་དམར་ཤོག་དྲུང་ཆེ་གཞོན་པ་དང་སྲིད་ཁྲིམས་རྒྱུན་ལས་ལྷན་ཁང་གི་དྲུང་ཆེ། ཤིན་ཅང་ཐོན་སྐྱེད་འཛུགས་སྐྲུན་དམག་སྡེའི་དམར་ཤོག་དྲུང་ཆེ། རྒྱ་ནག་ཡུ་གུར་འཛུགས་སྐྲུན་ལྷན་ཚོགས་ཀྱི་མགོ་འཁྲིད་སོགས་བྱས་པའི་ཁྲོད། ཤིན་ཅིང་གི་ཁུལ་དུ་དྲག་གནོན་གྱི་སྲིད་བྱུས་ལག་བསྟར་གྱིས་མི་མང་བཀག་སྐྱིལ་དང་ངལ་རྩོལ་བསྒྱུར་བཀོལ་སོགས་ཀྱི་ནག་ཉེས་དང་འབྲེལ་ནས།  ཨ་རི་དང་དབྱིན་ཡུལ། དེ་བཞིན་ཁ་ན་ཊ་དང་ཡུ་རོབ་སོགས་ཀྱིས་ནུབ་ཕྱོགས་སུ་འགྲོ་སྐྱོད་བཀག་སྡོམ་བྱས་པའི་རྒྱ་ནག་གི་དཔོན་རིགས་ཁྲོད་ཀྱི་གཅིག་ཆགས་ཡོད་པ་རེད། ཐེངས་འདིའི་བོད་རང་སྐྱོང་ལྗོངས་ཀྱི་དཔོན་རིགས་བརྗེ་བསྒྱུར་གྱི་གནད་དོན་དང་འབྲེལ་ནས་རྒྱ་རིགས་ཉམས་ཞིབ་པ་དང་ཐེ་ཝན་དོན་གཅོད་སྐལ་བཟང་རྒྱལ་མཚན་ལགས་སུ་བཀའ་འདྲི་ཞུས་པར་ཁོང་གིས་བོད་རང་སྐྱོང་ལྗོངས་སུ་རྒྱ་ནག་གི་འགོ་ཁྲིད་སུ་སླེབས་མིན་ལ་མ་ལྟོས་བར་ད་ལྟའི་སྲིད་འཛིན་ཞི་ཅིན་ཕིང་གི་འགོ་ཁྲིད་ཀྱི་འོག་ཏུ་བོད་ཁུལ་དུ་༸གོང་ས་མཆོག་གི་ཆོས་ཕྱོགས་ཀྱི་ཤན་ཤུགས་རྩ་གཏོར་གྱི་སྲིད་བྱུས་ལག་བསྟར་གྱིས་བོད་ནང་དུ་དམ་དྲག་བྱེད་མུས་ཡིན་པ་ལྟར། ཝང་ཅུན་ཀྲེང་གིས་ཀྱང་ད་ལྟའི་དམ་དྲག་གི་སྲིད་བྱུས་དེ་ལག་བསྟར་བྱེད་རྒྱུ་ཉག་གཅིག་ཡིན་པ་མ་ཟད། ཁོ་ནི་ཤིན་ཅང་གི་ནང་དུ་ཡང་དྲག་གནོན་གྱི་སྲིད་བྱུས་ལག་བསྟར་བྱེད་མཁན་ཞིག་ཡིན་པ་ལྟར། བོད་ནང་དུ་ཡ་ང་སྙིང་རྗེ་བྲལ་བའི་བྱ་སྤྱོད་སྤེལ་རྒྱུ་ཡིན་པར་གསུངས་སོང་། གཞན་ཡང་ཁོང་གིས། རྒྱ་ནག་དམར་ཤོག་གི་དབང་བསྒྱུར་སྲིད་བྱུས་ཀྱི་འོག་ཏུ། བོད་རང་སྐྱོང་ལྗོངས་དང་ཤིན་ཅིང་རང་སྐྱོང་ལྗོངས་གཉིས་སུ་རྒྱ་ནག་གི་དཔོན་རིགས་བརྗེ་སྤོར་གྱི་ལམ་སྲོལ་ཡོད་པ་ཞིག་ཡིན་པར་ལུང་འདྲེན་གྱིས། ཝང་དབྱིང་ཅེ་དང་ཝང་ཅུན་ཀྲེང་གཉིས་ནི་རྒྱ་ནག་གི་ཧྲན་ཏུང་ཞིང་ཆེན་ནས་ཡིན་པ་གཅིག་མཚུངས་ཡིན་པ་ལྟར། ཧྲན་ཏུང་གི་མི་རིགས་དེ་རྒྱ་ནག་གིས་ཧན་མི་རིགས་ཀྱི་ངོ་བོར་བསྒྱུར་ཟིན་པ་ཞིག་ཡིན་པ་མ་ཟད། ཁུལ་དེའི་དཔོན་རིགས་རྣམས་མི་རིགས་་གཞན་ལ་སྡང་ཟུག་དང་དྲག་གནོན་བྱེད་རྒྱུར་ཡ་ང་སྙིང་རྗེ་བྲལ་བ་ཞིག་ཡིན་པ་དང་།  ཝང་དབྱིང་ཅི་ཡིས་བོད་ཁུལ་དུ་ལོ་ངོ་སུམ་ཅུ་ལྷག་ལ་ལས་ཀ་བྱས་པའི་ཁྲོད་ནས་དྲག་གནོན་སྲིད་བྱུས་ལག་བསྟར་བྱས་པ་མངོན་གསལ་ཡིན་པ་ལས། བོད་སྐད་བོད་ཡིག་ཚིག་གཅིག་ཀྱང་མི་ཤེས་བའི་དཔོན་རིགས་ཆགས་ཡོད་པར་འགྲེལ་བརྗོད་གནང་སོང་།ཁ་སང་ཝང་ཅུན་ཀྲེང་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་འགོ་ཁྲིད་དུ་བསྐོ་བཞག་བྱས་པའི་མཛད་སྒོའི་སྟེང་ཁོས་གཏམ་བཤད་སྤེལ་བའི་ནང་དུ། ཞི་ཅིན་ཕིང་གི་བོད་ཀྱི་ལས་དོན་སྐོར་ལ་སྤེལ་བའི་བསམ་བློའི་མཛུབ་སྟོན་གྱི་འོག་ནས།  བོད་ཁུལ་དུ་རྒྱ་ནག་དམར་གཞུང་གི་འཐབ་བྱུས་བཀོད་སྒྲིག་ལག་བསྟར་བྱས་ཏེ་སྤྱི་ཚོགས་བརྟན་བརླིང་ལ་ཤུགས་སྣོན་དང་། ཏཱ་ལའི་ཁ་བྲལ་ལ་རྒོལ་རྡུང་དང་བོད་ནང་གི་ཆོས་ལུགས་ལས་དོན་ཁྲིམས་ལྟར་ལག་བསྟར། དེ་བཞིན་མཐའ་མཚམས་ས་ཁུལ་ལ་འཛུགས་སྐྲུན་གསར་རྒྱག་ལ་ཤུགས་སྣོན་བྱེད་རྒྱུ་ཡིན་པར་བསྒྲགས་འདུག རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གིས་བོད་ས་བཙན་བཟུང་བྱས་ནས་མི་ལོ་༦༠ ལྷག་འགྲོ་བཞིན་ཡོད་ཀྱང་། ད་ལྟའི་བར་དུ་བོད་མི་ཞིག་བོད་རང་སྐྱོང་ལྗོངས་ཀྱི་འགོ་ཁྲིད་དུ་བསྐོ་བཞག་བྱེད་མ་ཐུབ་པ་དེ་ཡིས་རྒྱ་ནག་གིས་དུས་ལྟ་དའི་བར་དུ་བོད་མི་རྣམས་ཀྱི་ཡིད་སེམས་འགུག་ཐུབ་མེད་པ་ཞིག་ཡིན་པ་གསལ་སྟོན་བྱས་ཡོད་པ་ལུང་འདྲེན་གྱིས། རྒྱ་ནག་གིས་མུ་མཐུད་དུ་བོད་ཁུལ་དུ་དྲག་གནོན་གྱི་སྲིད་བྱུས་ལག་བསྟར་བྱེད་རྒྱུ་ཡིན་པ་མངོན་གསལ་གནང་འདུག རྩ་བའི་ཝང་ཅུན་ཀྲེང་ནི་ཕྱི་ལོ་༡༩༦༣ལོ་རྒྱ་ནག་ཧྲན་ཏུང་ལིན་ཞི་ཞེས་པར་སྐྱེས་པ་དང་།  ཕྱིས་སུ་ཧྲན་ཏུང་སློབ་ཆེན་གྱི་སྤྱི་ཚོགས་རིང་ལུགས་སྡེ་ཚན་དུ་སྤྱི་ཚོགས་རིང་ལུགས་ཆེད་ལས་སློབ་སྦྱོང་གནང་སྟེ་ཕྱི་ལོ་༡༩༨༧ལོ་ནས་དམར་ཤོག་ཚོགས་པའི་ཁྲོད་འཛུལ་ཞུགས་ཀྱིས་ལས་གནས་འདྲི་མིན་ཁྲོད་ལས་ཀ་བྱེད་མྱོང་མཁན་ཞིག་རེད་འདུག

རྒྱ་ནག་གཞུང་འབྲེལ་གྱི་ Global Times གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་གར་གྱིས་འདི་ལོའི་ལོ་འགོ་ནས་བཟུང་མཐའ་དམག་གི་དཔུང་སྡེ་ཁག་ལ་བོད་སྐད་བོད་ཡིག་དང་བོད་ཀྱི་ས་གཤིས་སོགས་ཀྱི་སློབ་ཁྲིད་བྱེད་འཆར་ཡོད་པ་དེ་ནི། རྩོད་རྙོག་ཅན་གྱི་མཐའ་མཚམས་ཁག་ཏུ་དམག་སྡེ་ཡུན་གནས་ཡོང་རྒྱུར་དམིགས་པའི་སྲིད་བྱུས་ཤིག་ཡིན་པའི་དགག་གཞག་བྱས་འདུག གཞི་རྩའི་འདི་ལོའི་ལོ་འགོ་ནས་བཟུང་། རྒྱ་གར་གྱི་གསར་ལམ་ཁག་གིས་གནས་ཚུལ་སྤེལ་བའི་ནང་དུ་། སྔར་ལོ་ནས་རྒྱ་གར་བྱང་ཕྱོགས་ཀྱི་ལ་དྭགས་དང་འབྲས་ལྗོངས་སུ་འཁེལ་བའི་འཕགས་བོད་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་གནད་དོན་རིམ་པ་བྱུང་ཡོད་པ་ལྟར། རྒྱ་གར་གྱིས་རྒྱ་ནག་གི་དྲིལ་བསྒྲགས་དང་ཤུགས་རྐྱེན་ལ་ཁ་གཏད་གཅོག་ཆེད་རྒྱ་གར་གྱི་མཐའ་དམག་ཚོས་བོད་ཀྱི་ལོ་རྒྱུས་དང་། རིག་གནས། སྐད་ཡིག་བཅས་སློབ་སྦྱོང་བྱེད་རྒྱུའི་ལས་གཞི་གསར་བ་ཞིག་འཛུགས་འཆར་ཡོད་པར་ཡོངས་གྲགས་གནང་ཡོད་པ་མ་ཟད། ། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དང་ལྡི་ལི་མཐོ་སློབ་གྱི་ནང་ཆོས་སློབ་གཉེར་ཁང་། དེ་བཞིན་རྒྱ་གར་ལྷོ་ཕྱོགས་སུ་ཡོད་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་སོགས་རྒྱ་གར་གྱི་དམག་མིས་བོད་ཀྱི་ལོ་རྒྱུས་དང་སྐད་ཡིག་རིག་གནས་སློབ་སྦྱོང་བྱེད་སའི་ཁོངས་སུ་མིང་འདོན་བྱས་ཡོད་པ་རེད། སྐབས་དེར་རྒྱ་གར་གྱི་དམག་མི་ཞིག་གིས་གསར་ཁང་ལ་བརྗོད་པ་ལྟར་ན། རྒྱ་གར་གྱི་དམག་མི་རྣམས་པཱ་ཀི་སི་ཐན་ཀྱི་སྐོར་ལ་རྒྱུས་ལོན་ཟབ་མོ་ཡོད་ཀྱང་། རྒྱ་ནག་གི་སྐོར་སྤྱི་དང་སྒོས་སུ་རྒྱ་ནག་གི་བསམ་བློ་གཏོང་ཕྱོགས་བཅས་ལ་རྒྱུས་མངའ་ཡོད་མཁན་ཆེས་ཉུང་ཤོས་ཤིག་ལ་མེད་པ་མ་ཟད། བོད་ཀྱི་སྐོར་ལ་ཤེས་རྟོག་ཡོད་མཁན་དེ་བས་ཀྱང་མེད་སྟབས། ད་ཆ་རྒྱ་གར་གྱི་དམག་མི་རྣམས་ཀྱིས་བོད་ཀྱི་སྐད་ཡིག་རིག་གཞུང་དང་རྒྱལ་རབས་ལོ་རྒྱུས་བཅས་ལ་སློབ་སྦྱོང་བྱེད་རྒྱུ་གལ་ཆེན་ཡིན་སྐོར་དང་། མཐའ་མཚམས་ཀྱི་དམག་མི་རྣམས་ཀྱིས་བོད་སྐད་བོད་ཡིག་དང་རྒྱ་སྐད་རྒྱ་ཡིག་སོགས་ལ་སློབ་སྦྱོང་བྱས་ཏེ་དམིགས་བཀར་གྱིས་མཐའ་མཚམས་ཁག་གི་དམག་མིའི་ལས་གནས་སུ་ཡུན་རིང་བསྐོ་བཞག་བྱེད་རྒྱུ་ཡིན་པར་བརྗོད་འདུག རྒྱ་ནག་གི་འཐབ་བྱུས་ཉམས་ཞིབ་ཁང་གི་འབྲེལ་ཡོད་ཀྱི་ཉམས་ཞིབ་པ་ Qian ཟེར་བ་ཞིག་གིས་ Global Times གསར་ཁང་ལ་འགྲེལ་བརྗོད་བྱས་པའི་ནང་དུ། ཕྱོགས་གཉིས་ཀྱི་མཐའ་མཚམས་ཀྱི་ཁག་ཏུ་དཀའ་རྙོག་ཅན་གྱི་ས་ཁུལ་མང་པོ་ཡོད་སྟབས། རྒྱ་གར་གྱིས་དངོས་ཡོད་གནས་ཚུལ་གཞིར་བཞག་གིས་རྒྱ་ནག་ལ་ཁོང་ཁྲོ་སློང་བྱེད་ཀྱི་བྱ་བཞག་ཁག་མཚམས་འཇོག་མ་བྱས་པ་ཡིན་ན། ཕྱོགས་གཉིས་ཀྱི་མཐའ་མཚམས་ཁག་ཏུ་ཉེན་འཚབ་ཆེ་བའི་དོན་རྐྱེན་བྱུང་སྲིད་པའི་ཉེན་བརྡ་བཏང་པ་མ་ཟད། གཞན་ཡང་ཁོས། རྒྱ་ནག་གིས་ས་ཁོངས་བདག་དབང་སྲུང་སྐྱོབ་བྱེད་རྒྱུའི་ལངས་ཕྱོགས་བརྟན་པོ་ཡིན་པར་ལུང་འདྲེན་གྱིས། རྒྱ་གར་གྱིས་དྲག་ཆས་ཀྱི་རྣམ་འགྱུར་ལ་འགྱུར་བ་་མ་བཏང་བ་ཡིན་ན། རྒྱ་ནག་གིས་ལས་དོན་མཐའ་འཁྱོངས་མ་བྱས་པར་དུ་འཐབ་འཛིང་བྱེད་རྒྱུ་ཡིན་པར་བསྒྲགས་འདུག།གཞི་རྩའི་འདས་བའི་ལོ་འགའི་རིང་ནས་རྒྱ་ནག་གིས་རྒྱལ་ཁོངས་རྒྱ་བསྐྱེད་ཀྱི་སྲིད་བྱུས་ལག་བསྟར་གྱི་འོག་ནས་མཐའ་མཚམས་ཁག་ཏུ་གྲོང་ཚོ་གསར་འཛུགས་དང་འབྲོག་ཁྱིམ་གནས་སྤོར་གྱིས་ལས་གཞི་རྒྱ་བསྐྱེད་ཀྱིས། ཕྱོགས་ཡོངས་ནས་བོད་ཀྱི་མཐའ་མཚམས་ཁག་ཏུ་མ་དངུལ་མང་པོ་ཆེད་གཏོང་གིས་འཛུགས་སྐྲུན་གྱི་ལས་གཞི་སྣ་མང་སྤེལ་བཞིན་པ་མ་ཟད། བོད་དམག་བསྡུ་རུབ་ཀྱིས་ས་བབ་མཐོ་ཞིང་གནམ་གཤིས་འཁྱགས་པའིི་འཕགས་བོད་མཐའ་མཚམས་སུ་བོད་ཀྱི་ཡུལ་དམག་གསར་འཛུགས་བྱེད་བཞིན་པའི་གནས་ཚུལ་རིམ་ཕྱིར་ཐོན་ཡོད་དང་། ད་ཆ་རྒྱ་གར་གྱི་ཕྱོགས་ནས་ཀྱང་མཐའ་དམག་གི་ཁྲོད་དུ་བོད་ཀྱི་ས་གཤིས་དང་བོད་སྐད་བོད་ཡིག་ཤེས་ཀྱི་སློབ་ཁྲིད་ཀྱིས་ཕྱོགས་ཡོངས་ཀྱི་གནས་ཚུལ་མཁོ་བསྡུ་དང་རྒྱུས་ལོན་བྱེད་རྒྱུར་གྲོས་བསྡུར་གནང་མུས་ཡིན་པ་རེད།

ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་Charles Michel ལགས་ཀྱིས་དེ་རིང་ཞལ་པར་བརྒྱུད་ནས་རྒྱ་ནག་གི་སྲིད་འཛིན་ཞི་ཅིན་ཕིང་དང་ལྷན་དུ་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཚོང་དོན་སོགས་ཀྱི་གནད་དོན་ཁག་གཅིག་གི་སྐོར་ནས་གླེང་མོལ་བྱེད་རྒྱུ་རེད་འདུགགཞི་རྩའི་རྒྱ་ནག་དང་ཡུ་རོབ་གཉིས་ཀྱི་ད་ལྟའི་འབྲེལ་ལམ་དེ་དངངས་འཚབ་རང་བཞིན་གྱི་ངང་གནས་ཡོད་པ་མ་ཟད། རྒྱ་ནག་གིས་ཡུ་གུར་མི་རིགས་ཀྱི་གཙོ་བྱས་པའི་རྒྱ་ནག་གི་དབང་བསྒྱུར་འོག་གི་གྲངས་ཉུང་མི་རིགས་ཁག་ལ་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དང་འབྲེལ་ནས། ཡུ་རོབ་རྒྱལ་ཁབ་ཁག་གཅིག་གིས་སྒྲིག་འཛུགས་དེའི་ངོས་ནས་རྒྱ་ནག་དང་འབྲེལ་ལམ་མཁྲེགས་འཛིན་བྱེད་དགོས་བའི་སྐུལ་མ་རིམ་པར་བཏང་ཡོད་པ་རེད། མཚན་གསལ་བོ་མ་གནང་བའི་ཡུ་རོབ་མཐུན་ཚོགས་ཀྱི་ཕྱི་འབྲེལ་མི་སྣ་ཞིག་གིས Politico གསར་ལམ་ལ་འགྲེལ་བརྗོད་གནང་དོན་ལྟར་ན། ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་Charles Michel ལགས་ཀྱིས་ཐེངས་འདིར་རྒྱ་ནག་གི་སྲིད་འཛིན་ཞི་ཅིན་ཕིང་དང་ལྷན་དུ་བཀའ་མོལ་གནང་བའི་སྐབས་སུ་རྒྱ་ནག་གིས་ཤིན་ཅང་ནང་གི་མང་ཚོགས་ལ་ངལ་རྩོལ་བསྒྱུར་བཀོལ་བྱས་པའི་གནད་དོན་དང་འབྲེལ་ནས་ཕྱོགས་གཉིས་ཀྱིས་འབྲེལ་ཡོད་ཀྱི་དཔོན་རིགས་ཁག་རྒྱལ་ཁོངས་སོ་སོར་འགྲོ་སྐྱོད་བཀག་སྡོམ་བྱས་པའི་གནད་དོན་དེར་བསྐྱར་དུ་བསམ་གཞིགས་བྱེད་དགོས་བའི་སྐུལ་མ་གནང་རྒྱུ་ཡིན་པ་དང་། ཡུ་རོབ་ཀྱི་ཕྱི་འབྲེལ་མི་སྣ་གཞན་ཞིག་གིས་ཐེངས་འདིར་ཁ་པར་བརྒྱུད་ནས་རྒྱལ་ཁབ་ཕྱོགས་གཉིས་ཀྱི་གླེང་མོལ་དེ་ཡིས་ཡུ་རོབ་རྒྱལ་ཁབ་ཀྱིས་འཐབ་བྱུས་ལྡན་པའི་རང་སྐྱོང་གི་གནས་བབ་ཐོག་ནས་རྒྱ་ནག་དང་ལྷན་དུ་སྲིད་བྱུས་གསར་བ་ཞིག་ཆེད་བཟོ་བྱེད་དགོས་གལ་ཡིན་པ་གསལ་སྟོན་གནང་གི་ཡོད་སྐོར་གསུངས་འདུག་ཀྱང་། སྐུ་ཞབས་Michelལགས་ཀྱི་མགྲིན་ཚབ་པས་དེར་འབྲེལ་གྱི་གནད་དོན་ཐད་ནས་གསར་ལམ་ཁག་གི་བཅར་འདྲི་དང་ལེན་བྱས་མེད་པ་རེད་འདུག ཡུ་རོབ་གྲོས་ཚོགས་ཀྱི་འཐུས་མིའི་ཁྲོད་ཀྱི་རྒྱ་ནག་གི་ལས་དོན་དང་འབྲེལ་བའི་འགོ་ཁྲིད་དང་རྒྱ་ནག་གི་སྲིད་དོན་ཉེས་ཆད་ཕོག་སའི་ཁོངས་སུ་ཡོད་པ་། སྐུ་ཞབས་Reinhard Bütikofer ལགས་ཀྱིས་ཐེངས་འདིར་རྒྱལ་ཁོངས་གཉིས་ཀྱི་དབུ་འཁྲིད་དབར་གྱི་ཞལ་པར་གྱི་གླེང་མོལ་དེ་ནི་ཁ་ཕྱོགས་ལེགས་པོ་ཞིག་ཡིན་པར་འགྲེལ་བརྗོད་ཀྱིས། ད་ཆ་རྒྱ་ནག་གིས་བསླབ་བྱ་གསར་བ་ཞིག་ཤེས་རྟོགས་བྱུང་བར་འགོ་ཚུགས་པ་ཞིག་ཡིན་པར་བརྗོད་དེ། རྒྱ་ནག་གིས་ཡུ་རོབ་མཐུན་ཚོགས་ཀྱི་མངའ་ཁོངས་ཀྱི་རྒྱལ་ཁབ་བྱེ་བྲག་པའི་འགོ་ཁྲིད་རྐྱང་པར་སྐད་ཆ་བཤད་པ་ཙམ་གྱིས་ཕྱོགས་གཉིས་ཀྱི་འབྲེལ་ལམ་ལ་འཕེལ་རྒྱས་འབྱུང་ཐབས་མེད་པར་བསྒྲགས་འདུགགཞི་རྩའི་ཉེ་བའི་ལོ་ཤས་ཁྲོད་ཨ་རི་དང་རྒྱ་ནག་གཉིས་དབར་གྱི་འབྲེལ་ལམ་ཁྲོད་དུའང། ཚོང་འབྲེལ་དང་འཕྲུལ་ལས། འགྲོ་བ་མིའི་ཐོབ་ཐང་གི་གནད་དོན། དེ་བཞིན་ཏོག་དབྱིབས་ཀྱི་འབྱུང་ཁུངས་སོགས་ཀྱི་གནད་དོན་མང་དག་ཅིག་གི་ཐོག་དཀའ་ངལ་རིམ་པ་འཕྲད་པ་དང་། ཟླ་བ་འདིའི་ཟླ་འགོར་སུད་སི་གྲོང་ཁྱེར་ཛུ་རིག་ཏུ་ཨ་རིའི་རྒྱལ་སྲུང་སློབ་སྟོན་པ་ Jake Sullivan ལགས་དང་རྒྱ་ནག་ཕྱི་འབྲེལ་ལས་ཁང་གི་འགན་འཛིན yang Jiechiགཉིས་དངོས་སུ་ཐུག་འཕྲད་ཀྱིས་ཕྱོགས་གཉིས་ཀྱི་འབྲེལ་ལམ་གཙོས་རྒྱ་ནག་གི་བོད་དང་ཐེ་ཝན། ཧོང་ཀོང་། ཤིན་ཅང་བཅས་ཀྱི་ཐོག་འཛིན་པའི་སྲིད་བྱུས་བཅས་ཀྱི་ཐོག་ལ་གོ་བསྡུར་གནང་བ་མ་ཟད། ལྷག་པར་འདི་ལོའི་ལོ་མཇུག་ཏུ་ཨ་རིའི་སྲིད་འཛིན་བྷ་ཊན་མཆོག་དང་རྒྱ་ནག་གི་སྲིད་འཛིན་ཞི་ཅིན་ཕིང་རྣམ་གཉིས་དབར་དྲ་ཐོག་བརྒྱུད་མཇལ་མོལ་གནང་རྒྱུའི་ཐད་གོ་བསྡུར་གནང་ཡོད་པ་དང་། ཕྱོགས་གཉིས་ཀྱི་དཔོན་རིགས་ཀྱི་མཇལ་མོལ་ཁྲོད་གོ་ལའི་གནམ་གཤིས་འགྱུར་ལྡོག་གི་གནད་དོན་དང་ཐེ་ཝན་གཙོས་ཕྱོགས་གཉིས་ཀྱི་འབྲེལ་ལམ་ཐད་ཉེན་ཁ་རིགས་འབྱུང་བའི་གནད་དོན་ལ་གོ་བསྡུར་གནང་རྒྱུ་ཡིན་པར་བསྒྲགས་ཡོད་པ་རེད།

ཨ་རིས་བཟོ་བསྐྲུན་བྱས་ཤིང་རྒྱལ་སྤྱིའི་ཐོག་སྐད་གྲགས་ཆེ་བའི་སྤྱི་ཚོགས་དྲ་རྒྱའི་གླེང་སྟེགས་ LinkedIn ཞེས་པ་དེ་རྒྱ་ནག་གཞུང་གི་གཏན་འབེབས་བྱས་པའི་དྲ་རྒྱའི་ཁྲིམས་སྒྲིག་གི་འགོག་རྐྱེན་དང་། བདེ་འཇགས་ཀྱི་གནད་དོན་སོགས་ལ་གཞིགས་ཏེ་རྒྱ་ནག་ནང་གླེང་སྟེགས་དེ་སྒོ་རྒྱག་རྒྱུ་རེད་འདུགདེ་རིང་བརྒྱུད་ལམ་ཁག་གི་ཐོག་གནས་ཚུལ་སྤེལ་བར་གཞིགས་ན། ཨ་རིའི་སྤྱི་ཚོགས་དྲ་རྒྱའི་གླེང་སྟེགས་ LinkedIn ཞེས་པ་བདེ་འཇགས་ཀྱི་གནད་དོན། ལྷག་པར་དུ་གླེང་སྟེགས་དེ་བེད་སྤྱོད་བྱེད་མཁན་གྱི་མང་ཚོགས་རྣམས་ཀྱི་སྒེར་གྱི་གནད་དོན་སྲུང་སྐྱོབ་གནང་རྒྱུ་སོགས་ལ་དམིགས་ཏེ་རྒྱ་ནག་གི་ཁྲོམ་རའི་ནང་ནས་ཕྱིར་འཐེན་གནང་དགོས་བྱུང་ཡོད་སྐོར་སོགས་བཀོད་འདུག་ལ། LinkedIn སྤྱི་ཚོགས་དྲ་རྒྱའི་གླེང་སྟེགས་ཀྱི་འགན་འཛིན་གཞོན་པ་ Mohak Shroff ལགས་ནས། གླེང་སྟེགས་འདི་རྒྱ་ནག་ནང་ལ་ཚད་དང་ལྡན་པ་ཞིག་བེད་སྤྱོད་ཐུབ་རྒྱུར་རྒྱ་ནག་གཞུང་གི་གཏན་འབེབས་བྱས་པའི་དྲ་རྒྱ་དང་འབྲེལ་བའི་ཁྲིམས་སྒྲིག་ནང་གི་ཆ་རྐྱེན་ཁག་དང་། སྤྱི་ཡོངས་ཀྱི་དྲ་རྒྱ་དང་འབྲེལ་བའི་ཁྲོམས་རའི་ཁོར་ཡུག་གི་གནས་བབ་སོགས་ཀྱི་ཐད་ནས་དཀའ་ངལ་མང་དག་ཅིག་འཕྲད་བཞིན་ཡོད་སྟབས། ལོ་འདིའི་ལོ་མཇུག་ཏུ་གླེང་སྟེགས་འདི་རྒྱ་ནག་ནང་སྒོ་རྒྱག་རྒྱུ་ཡིན་ཞེས་གསུངས་པ་དང་ཆབས་ཅིག རྒྱ་ནག་ནང་གི་ཚོང་པ་དང་ལས་ཀ་འཚོལ་མཁན་ཚོ་ལ་དམིགས་ཏེ་ InJobs ཞེས་པའི་མཉེན་ཆས་ཤིག་གསར་སྐྲུན་གནང་འཆར་ཡོད་པ་གསུངས་འདུག རྩ་བའི་ LinkedIn སྤྱི་ཚོགས་དྲ་རྒྱའི་གླེང་སྟེགས་འདི་ཐོག་མར་ཕྱི་ལོ་ ༢༠༠༣ གི་ལོ་ལ་ཨ་མི་རི་ཀའི་དྲ་རྒྱའི་ཆེད་ལས་པ་ Reid Hoffman ལགས་ཀྱིས་གསར་སྐྲུན་གནང་སྟེ་ནུབ་ཕྱོགས་རྒྱལ་ཁབ་ཁག་གཙོ་བོར་གྱུར་བའི་རྒྱལ་སྤྱིའི་ཡུལ་གྲུ་འདྲ་མིན་ནང་གི་ཆེད་ལས་མི་སྣ་དང་མང་ཚོགས་མི་ཉུང་བ་ཞིག་ནས་རང་ཉིད་ཀྱི་ངོ་སྤྲོད་སྤེལ་ས་དང་ལས་ཀའི་གོ་སྐབས་འཚོལ་སའི་གླེང་སྟེགས་ཆེ་གྲས་ཤིག་ཏུ་གྱུར་ཏེ་ལོ་ངོ་བཅུ་ལྷག་སོང་བའི་མཚམས་སུ་ Microsoft ཚོང་ལས་ཁང་ནས་གླེང་སྟེགས་དེའི་བདག་དབང་ཨ་སྒོར་ཐེར་འབུལ་ ༢༦ སྤྲད་དེ་ཉོས་ཡོད་པ་དང་། གླེང་སྟེགས་འདི་བཞིན་རྒྱ་ནག་གི་ཁྲོམ་རའི་ནང་ལ་ཐོག་མར་ ༢༠༡༤ ལོར་འཛུལ་ཞུགས་བྱས་ཏེ་ད་ཆ་ལོ་ངོ་ ༧ ཙམ་ལས་འགྲོ་གི་མེད་པ་མ་ཟད། གླེངས་སྟེགས་འདི་ནི་རྒྱ་ནག་ནང་ཡོད་པའི་ཨ་རིའི་སྤྱི་ཚོགས་དྲ་རྒྱའི་གླེང་སྟེགས་གཅིག་པོ་དེ་ཡང་ཆགས་ཀྱི་ཡོད་པ་རེད།གླེང་སྟེགས་འདི་ཐོག་མར་རྒྱ་ནག་གི་ཁྲོམ་རའི་ནང་འཛུལ་སྐབས་རྒྱ་ནག་གཞུང་གིས་བཏོན་པའི་དོན་ཚན་ཁག་ཅིག་གི་ཐོག་ལ་ཁས་ལན་བྱས་ཡོད་པ་དང་། གླེང་སྟགས་ཀྱི་འབྲེལ་ཡོད་རྣམས་ནས་ཕྱོགས་གཉིས་དབར་གན་ཡིག་འཇོག་སྐབས་ཕྱི་གསལ་གང་གསལ་བྱེད་རྒྱུའི་དོན་ཚན་དེ་བློས་གཏོང་གནང་མེད་ཅེས་འགྲེལ་བརྗོད་གནང་བཞིན་ཡོད་ཀྱང་། ཉེ་བའི་དུས་སུ་ LinkedIn སྤྱི་ཚོགས་དྲ་རྒྱའི་གླེང་སྟེགས་ཐོག་རྒྱ་ནག་གཞུང་གིས་བོད་མིར་དྲག་གནོན་བྱེད་སྟངས་སྐོར་གནས་ཚུལ་སྤེལ་མཁན་གསར་འགོད་པ་ Greg Bruno ལགས་གཙོས་པའི་གཞན་ཁག་ཅིག་གི་དྲ་བྱང་བཀག་སྡོམ་བྱས་པའི་གནས་ཚུལ་ཐོན་སྐབས། རྒྱལ་སྤྱིའི་གསར་འགོད་པ་ཙམ་མ་ཟད། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Rick Scott ལགས་སོགས་ནས་ LinkedIn སྤྱི་ཚོགས་དྲ་རྒྱའི་གླེང་སྟེགས་ངོས་ནས་རྒྱ་གཞུང་གི་དགོས་འདུན་སྒྲུབ་བཞིན་འདུག་ཅེས་སྐྱོན་བརྗོད་ནནས་པོ་བྱས་པའི་གནང་སྟངས་ཡང་བྱུང་ཡོད། དཔྱད་ཞིབ་པ་རྣམས་ནས་ད་རེས་རྒྱ་ནག་ནང་ཡོད་པའི་ཨ་རིའི་སྤྱི་ཚོགས་དྲ་རྒྱའི་གླེང་སྟེགས་གཅིག་པོ་དེ་ཡང་སྒོ་བརྒྱབ་པ་དེ་ཕྱོགས་ནས་རྒྱ་ནག་གཞུང་གི་དྲ་རྒྱའི་ཐོག་སྟངས་འཛིན་དང་དམ་དྲགས་བྱེད་བཞིན་པའི་དབང་གིས་རྒྱ་ནག་ནང་ཚོང་ལས་ཡག་པོ་ཡོང་གི་མེད་པ་དང་། ཕྱོགས་གཞན་ཞིག་ནས་གླེང་སྟགས་སྟེགས་འདིས་རྒྱ་ནག་ལ་བསྟུན་མཁས་བྱེད་རྒྱུ་མང་དྲག་པའི་དབང་གིས་ཨ་རིའི་གཞུང་ནས་ནས་ཀྱང་ཕྱིར་འཐེན་བྱེད་དགོས་པའི་གནོན་ཤུགས་སྤྲད་ཡོད་སྲིད་པ་རེད་ཅེས་གསུངས་བཞིན་འདུག གཞི་རྩའི་དུས་རྒྱུན་ནས་རྒྱ་ནག་གཞུང་གིས་རྒྱལ་ཁབ་ཀྱི་བདེ་འཇགས་སོགས་ཀྱི་མིང་བྱང་འོག་རྒྱ་ནག་ནང་ཡོད་པའི་ཕྱིའི་ཚོང་ལས་སྡེ་ཚན་དང་གཞུང་འབྲེལ་མ་ཡིན་པའི་ཚོགས་པ་ཁག་གི་ལས་དོན་ལ་དམ་དྲགས་སྣ་ཚོགས་ཤིག་བྱེད་བཞིན་ཡོད་སྟབས། འདས་པའི་ལོ་དུས་ནང་ལ་ཨ་རིའི་སྤྱི་ཚོགས་དྲ་རྒྱའི་གླེང་སྟགས་ Twitter དང་ངོ་དེབ་ཀྱང་རྒྱ་ནག་བེད་སྤྱོད་མི་ཐུབ་པར་བཟོས་པ་མ་ཟད། Google ཚོང་ལས་སྡེ་ཚན་ཀྱང་འདི་ལོ་རྒྱ་ནག་གི་ཁྲོམ་ར་ནས་ཕྱིར་འཐེན་བྱེད་དགོས་བྱུང་ཡོད་པ་རེད།  

ཉེ་ཆར་རེ་གཟའ་ཉི་མའི་ཉིན་རྒྱ་གར་བྱང་ཕྱོགས་ལ་དྭགས་དང་བོད་གཉིས་ཀྱི་ས་མཚམས་ས་ཁུལ་ Moldo ཞེས་པ་དེར་རྒྱ་དཀར་ནག་གཉིས་ཀྱི་དམག་མིའི་འགོ་ཁྲིད་དབར་རྒྱལ་ཁབ་ཕྱོགས་གཉིས་དབར་འཕྲད་བཞིན་པའི་མཐའ་མཚམས་ཀྱི་གནད་དོན་ཁག་སེལ་ཐབས་དང་འབྲེལ་བའི་གྲོས་མོལ་ཐེངས་ ༡༣ པ་དེ་གནང་ཡོད་ཀྱང་། མཐའ་མཚམས་དང་འབྲེལ་བའི་དཀའ་རྙོག་ཁག་སེལ་ཐབས་ཀྱི་ཐབས་ལམ་ཞིག་གི་ཐོག་ལ་འབབ་ཐུབ་མེད་པ་རེད།གནད་དོན་དེ་དང་འབྲེལ་བདེ་འཇགས་དང་ཐབས་བྱུས་ཐོག་དཔྱད་ཞིབ་གནང་མཁན་རྒྱ་གར་གྱི་རྐང་དམག་སྡེ་ཚན་གྱི་དམག་སྤྱི་ཟུར་པ་སྐུ་ཞབས་ S B Asthana ལགས་ནས་ FirstPost གསར་ཁང་གི་དྲ་གནས་ཐོག་དཔྱད་གཏམ་ཞིག་འདོན་སྤེལ་གནང་སྟེ། ད་རེས་རྒྱ་དཀར་ནག་གཉིས་དབར་གྱི་གྲོས་མོལ་ཐེངས་ ༡༣ པ་དེར་གྲུབ་འབྲས་ཤིག་ཐོན་ཐུབ་མེད་པ་དེ་ལ་ཧང་སང་དགོས་དོན་གང་ཡང་མེད་པ་དང་། དེ་ཡང་གྲོས་མོལ་དེ་འགོ་འཛུགས་མ་བྱས་པའི་གོང་ཙམ་དུ་རྒྱ་ནག་ཕྱོགས་ནས་རྒྱ་གར་གྱི་ Uttarakhand དང་ཨ་རུ་ན་ཅན་མངའ་སྡེའི་ས་ཁུལ་ཁག་ཅིག་ཏུ་བཙན་འཛུལ་བྱས་པའི་བྱ་སྤྱོད་དང་། དེ་བཞིན་འཕགས་བོད་གཉིས་ཀྱི་ས་མཚམས་ཁག་ཏུ་གྲོང་སྡེ་གསར་རྒྱག་བྱེད་བཞིན་པའི་གནས་སྟངས་ཁག་ལ་ལྟ་སྐབས་རྒྱ་ནག་ཕྱོགས་ནས་མཐའ་མཚམས་ཀྱི་གནད་དོན་དེ་ཞི་འགྲིག་ཡོང་རྒྱུར་འདོད་པ་རྩ་བ་ནས་མེད་པ་གསལ་པོ་རེད་ཅེས་བཀོད་འདུགམ་ཟད་ཁོང་ནས་རྒྱ་ནག་གཞུང་གི་ཆབ་སྲིད་ཀྱི་དམིགས་ཡུལ་གཙོ་བོ་ཞིག་ནི་རྒྱ་ནག་རྒྱལ་ཁབ་དེ་ཨེ་ཤ་ཡའི་ནང་གི་དབང་ལྡན་རྒྱལ་ཁབ་ཅིག་ཏུ་འགྱུར་རྒྱུ་དེ་ཡིན་པ་དེ་ལྟར་ཡང་། རྒྱ་ནག་གཞུང་ལ་སེམས་འཚབ་ཅིག་ཡོད་པ་ནི་རྒྱ་གར་ཕྱོགས་ནས་རྒྱ་ནག་ལ་སྒུར་མིན་དང་། ལྷག་པར་དུ་ལ་དྭགས་ཀྱི་ཤར་ངོས་སུ་ཡོད་པའི་རྒྱ་གར་གྱི་ས་གནས་དེ་དག་རྒྱ་ནག་གི་དམིགས་ཡུལ་སྒྲུབ་རྒྱུའི་ཐབས་བྱུས་དང་འབྲེལ་བའི་ས་ཚིགས་གལ་ཆེན་པོ་ཞིག་ཆགས་ཀྱི་ཡོད་སྟབས་ས་ཁུལ་དེ་དག་གི་བདག་དབང་ཐོག་མུ་མཐུད་རྩོད་བཞིན་ཡོད་པ་སོགས་འགྲེལ་བརྗོད་བྱས་འདུགལྷག་པར་དུ་ཁོང་གི་དཔྱད་གཏམ་དེའི་ནང་ལ་རྒྱ་གར་གཞུང་གི་ངོས་ནས་དོ་སྣང་བྱེད་པའི་དོན་ཚན་ཁག་ཅིག་གསལ་འདོན་གནང་པའི་ནང་ལ། རྒྱ་གར་གཞུང་ནས་རྒྱལ་ཁབ་ཀྱི་ཐབས་བྱུས་ཁག་ཡོངས་གྲགས་བྱེད་ཀྱི་མེད་ཀྱང་། འདས་པའི་ལོ་ངོ་བཅུ་ཕྲག་འགའི་རིང་ལ་རྒྱ་གར་གཞུང་ནས་རྒྱ་ནག་ལ་གདོང་ལེན་བྱེད་སྐབས་རྒྱ་ནག་གཞུང་ལ་ཕོག་ཐུགས་རིགས་རྩ་བ་ནས་མི་གཏོང་རྒྱུ་དེ་ནི་འཐབ་ཇུས་ཀྱི་རྨང་གཞི་གཙོ་བོ་དེ་ཟིན་ཡོད་པ་གསལ་པོ་ཡིན་སྟབས། འཐབ་ཇུས་ཀྱི་རྨང་གཞིའི་དེའི་འོག་ནས་ད་བར་རྒྱ་གར་ལ་ཁེ་ཕན་གང་ཡང་བྱུང་མེད་པ་མ་ཟད། རྒྱ་ནག་ཕྱོགས་ནས་ཀྱང་དེར་ཆ་འཇོགས་རྩབ་ནས་བྱས་མེད་པ་རེད་ཅེས་གསུངས་པ་དང་ཆབས་ཅིག་རྒྱ་གར་ངོས་ནས་རྒྱ་ནག་དང་འབྲེལ་བ་བྱེད་སྐབས་གྲོས་མོལ་གྱི་འཐབ་བྱུས་ཙམ་མིན་པར། བོད་དང་ཧོང་ཀོང་། དེ་བཞིན་ཤིན་ཅང་བཅས་ཀྱི་བདག་དབང་གི་གནད་དོན་ཐོག་འདྲི་རྩད་བྱེད་དགོས་ཀྱི་རེད་ཅེས་གསུངས་འདུག མ་ཟད་ཁོང་ནས་ད་བར་རྒྱ་གར་ཕྱོགས་ནས་བོད་དང་ཤིན་ཅང་། ཧོང་ཀོང་བཅས་ཀྱི་གནད་དོན་དངོས་སུ་གླེང་སློང་མ་བྱས་ཀྱང་རྒྱ་ནག་ཕྱོགས་ནས་Kashmir གི་གནད་དོན་བེད་སྤྱོད་བྱས་ཏེ་རྒྱ་གར་འདི་བཞིན་རྒྱལ་ཚོགས་ཀྱི་བདེ་འཇགས་ཚོགས་མིའི་ཁོངས་སུ་ཚུད་རྒྱུར་འགོག་རྐྱེན་སྣ་ཚོགས་བཟོས་ཡོད་པ་ལུང་འདྲེན་དང་སྦྲགས། རྒྱ་གར་གཞུང་ནས་རྒྱལ་ཁབ་ཀྱི་བདེ་འཇགས་དང་ཐབས་བྱུས་ཀྱི་གནད་དོན་ཐོག་ལ་བསམ་བློ་གསར་པ་ཞིག་གཏོང་རྒྱུ་གལ་ཆེན་པོ་ཡིན་པ་དང་། དེ་ཡང་རྣམ་འགྱུར་ཙམ་མིན་པར། དགོས་ངེས་བྱུང་ན་རྒྱ་གཞུང་གི་འཐབ་བྱུས་དང་འབྲེལ་བའི་ས་ཚིགས་ཁག་ལ་བཙན་འཛུལ་བྱེད་དགོས་པ་ཡང་གསུངས་འདུགདེ་བཞིན་རྒྱ་ནག་གི་བྱེད་བབ་ལ་གཞིགས་ན་རྒྱ་ནག་རང་ཉིད་ཀྱི་དམིགས་ཡུལ་མ་འགྲུབ་ཀྱི་བར་དུ་མཐའ་མཚམས་ཀྱི་གནད་དོན་ཞི་འགྲིག་ཡོང་རྒྱུར་གྲ་སྒྲིག་མེད་སྟབས། རྒྱ་གར་ངོས་ནས་ཀྱང་དེ་མཚུངས་ཀྱིས་རང་ས་སྲུང་སྐྱོབ་དང་འབྲེལ་བའི་འཛུགས་སྐྲུན་གྱི་ལས་གཞི་བརྒྱུད་མཐའ་མཚམས་ཁག་ཏུ་ཡོད་པའི་ཡུལ་མི་ཚོར་འཚོ་བའི་རོགས་རམ་གང་ཐུབ་གནང་དགོས་པ་དང་། དམག་དོན་དང་འབྲེལ་བའི་དམག་སྡེ་སྤྱི་དང་། ལྷག་པར་དུ་རྒྱ་ནག་གཞུང་ནས་མཚོ་ཐོག་ཏུ་དམག་དང་འབྲེལ་བའི་ལས་དོན་སྤེལ་བཞིན་པ་ཁག་ལ་གདོང་ལེན་གྱི་ལས་གཞི། དེ་བཞིན་མང་གཙོའི་རྒྱལ་ཁབ་གཙོས་པའི་མཐུན་ཕྱོགས་ཀྱི་རྒྱལ་ཁབ་ཁག་དང་ཟུང་འབྲེལ་ཐོག་རྒྱ་ནག་ལ་གདོང་ལེན་བྱེད་རྒྱུའི་འཐབ་བྱུས་གཏན་འབེབས་ཀྱི་ལས་དོན་རྣམས་སྔ་ས་ནས་གྲ་སྒྲིག་བྱེད་དགོས་པ་སོགས་གསུངས་འདུག གཞི་རྩའི་ལོ་གཅིག་ཙམ་གྱི་གོང་ལ་ལ་དྭགས་སྤང་གོང་མཚོའི་ཁུལ་དུ་རྒྱ་དཀར་ནག་གཉིས་ཀྱི་མདག་མིའི་དབར་མཐའ་མཚམས་ཀྱི་གནད་དོན་དང་འབྲེལ་གདོང་ཐུག་རིམ་པ་བྱུང་ཡོད་པ་དང་། སྐབས་དེར་ཕྱོགས་གཉིས་ཀྱི་དམག་མིའི་འགོ་ཁྲིད་དབར་གྲོས་མོལ་ཐེངས་ ༡༢ ཙམ་གནང་པའི་རྗེས་སུ་སྤང་གོང་དང་ Gogra ཁུལ་གྱི་གནད་དོན་སེལ་ཐུབ་ཙམ་བྱུང་ཡོད་ཀྱང་། Depsang དང་བདེན་མཆོག་གཙོས་པའི་ཨ་རུ་ན་ཅལ་མངལ་ཁུལ་གྱི་རྩོད་རྙོག་ཁག་ད་ལྟ་ཡང་ཞི་འགྲིག་ཡོང་མེད་པ་རེད། ཐེངས་འདིའི་གྲོས་མོལ་ ༡༣ མཇུག་སྒྲིལ་མཚམས་སུ་རྒྱ་ནག་གི་དམག་ཁུལ་གྱི་མགྲིན་ཚབ་པ་ཞིག་ནས་རྒྱ་གར་ཕྱོགས་ནས་དངོས་ཡོད་གནས་སྟངས་དང་མི་འཚམས་པའི་རེ་བ་ཁག་ཅིག་མུ་མཐུད་བཏོན་ཏེ་གྲོས་མོལ་ལམ་ལྷོང་ལྡན་པ་ཞིག་འགྲོ་བཅུག་མ་སོང་ཞེས་བཤད་འདུག་ཀྱང་། རྒྱ་གར་བདེ་སྲུང་ལས་ཁུངས་ཀྱི་ངོས་ནས། རྒྱ་གར་ཕྱོགས་ནས་དཀའ་རྙོག་སེལ་ཐབས་ཀྱི་ཐབས་ལམ་ཡང་དག་ཁག་ཅིག་བཏོན་ཡོད་ཀྱང་། རྒྱ་ནག་ཕྱོགས་ནས་དེར་ངོས་ལེན་མ་བྱས་པ་མ་ཟད། དཀའ་རྙོག་དེ་དག་སེལ་ཐབས་ཀྱི་ཐབས་དང་འབྲེལ་བའི་བསམ་འཆར་ཞིག་ཀྱང་སྟོན་རྒྱུ་མི་འདུག་ཅེས་གསུངས་ཡོད། གཞི་རྩའི་རྒྱ་ནག་གཞུང་ནས་བོད་དང་ས་འབྲེལ་ཡོད་པའི་རྒྱ་གར་གྱི་ས་ཁུལ་འདྲ་མིན་ཐོག་བཙན་འཛུལ་བྱས་ཏེ་ས་ཁུག་དེ་དག་གི་བདག་དབང་རྒྱ་ནག་གཞུང་ལ་ཡོད་སྐོར་བཤད་བཞིན་ཡོད་པ་མ་ཟད། ཉེ་ཆར་རྒྱ་གར་གྱི་སྲིད་འཛིན་གཞོན་པ་སྐུ་ཞབས་ Venkaiah Naidu མཆོག་རྒྱ་གར་བྱང་ཤར་ཨ་རུ་ན་ཅལ་མངའ་ཁུལ་དུ་ཕེབས་སྐབས་རྒྱ་ནག་གཞུང་ནས་རྒྱ་གར་གྱི་འགོ་ཁྲིད་ས་ཁུལ་དེར་བསྐྱོད་པ་དེ་ཡིས་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་བཏང་ཡོད་སྐོར་སོགས་བཤད་དེ་དགག་པ་རྒྱབ་ཡོད་པ་དང་། སྐབས་དེར་རྒྱ་གར་ཕྱི་སྲིད་ལས་ཁུངས་ནས་ཨ་རུ་ན་ཅལ་མངའ་སྡེའི་བདག་དབང་རྒྱ་གར་ལ་ཡོད་པ་མ་ཟད། མངའ་སྡེ་དེ་རྒྱ་གར་དང་ཁ་བྲལ་ཐབས་མེད་པ་ཞིག་རེད་ཅེས་རྒྱ་གཞུང་ལ་ལན་འདེབས་བྱས་པའི་གནས་སྟངས་ཡང་བྱུང་ཡོད།

རྒྱ་ནག་གི་ཚན་རིག་ཞིབ་འཇུག་གི་གནའ་རྫས་བརྟག་དཔྱད་རུ་ཁག་ཅིག་གིས་བོད་ཀྱི་མཚོ་བྱང་ཁུལ་གྱི་གནམ་མཚོའི་འགྲམ་ནས་གནའ་བོའི་བོད་ཀྱི་འབྲོག་པའི་རིག་གཞུང་དང་འབྲེལ་བའི་རྡོ་བརྐོས་ཀྱི་རི་མོ་ཁག་ཅིག་རྙེད་སོན་བྱུང་འདུགགཞི་རྩའི་རྒྱ་ནག་གིས་ཕྱི་ལོ་ ༢༠༡༧ ནས་བཟུང་བོད་ཁུལ་དུ་གནའ་རྫས་བརྟག་དཔྱད་ཀྱི་རྒྱང་སྐྱོད་རུ་ཁག་གི་ལས་གཞི་ཞིག་འགོ་འཛུགས་ཀྱིས་བྲག་རི་དང་བྲག་རིར་བརྟེན་པའི་གནའ་རབས་ཀྱི་རྡོ་བརྐོས་རི་མོར་བརྟད་དཔྱད་བྱས་ཡོད་པ་ལྟར། ཐེངས་འདིར་རྒྱ་མཚོ་ལས་ས་བབ་མི་ཊར་ ༤༧༣༠ ལྷག་གི་མཐོ་ཚད་ལྡན་པའི་མཚོ་བྱང་གནམ་མཚོ་ཁུལ་དུ་བརྟག་དཔྱད་བྱས་པའི་ཁྲོད། ཁུལ་དེར་རྙེད་སོན་བྱུང་བའི་རྡོ་བརྐོས་རི་མོ་ལས་གནའ་བོའི་བོད་ཀྱི་འབྲོག་ཁུལ་གྱི་རིག་གཞུང་ཕྱུག་པོ་དང་། དེ་བཞིན་འབྲོག་ཁུལ་དང་ཚོ་ཁག་གཞན་གྱི་བར་དུ་བརྗེ་བསྒྱུར་བྱས་པའི་རིག་དངོས་ཀྱི་དབང་རྟགས་གསར་བ་རྙེད་ཡོད་འདུགརྒྱ་ནག་གི་གནའ་རྫས་བརྟག་དཔྱད་ཁང་དང་རྒྱལ་སྤྱིའི་རྡོ་བརྐོས་རི་མོ་ལྟེ་གནས་ཀྱི་འགན་འཛིན་ Tang Huisheng ལགས་ཀྱིས་ཐེངས་འདིར་བོད་ཀྱི་གནམ་མཚོ་ཁུལ་ནས་གསར་དུ་རྙེད་པའི་རྡོ་བརྐོས་རི་མོ་དག་ལས་བོད་ཀྱི་གནའ་བོའི་རིག་གཞུང་གི་བརྐོས་རིས་ཁོ་ན་ཙམ་མ་ཡིན་པར། ཧན་མི་རིགས་ཀྱི་ཡིག་རིགས་འཁོད་པའི་རྡོ་ཡི་བརྐོས་རིས་ཀྱང་རྙེད་ཡོད་པར་འགྲེལ་བརྗོད་ཀྱིས།  གནམ་མཚོ་ཁུལ་དེ་ནི་གནའ་བོའི་དར་ལམ་ཞིག་ཡིན་པར་བརྟེན་ཁུལ་དེ་ནི་རིག་གཞུང་སྣ་མང་གི་ལྟེ་གནས་ཤིག་ཡིན་པ་མ་ཟད། དཀྱིལ་ཤར་ཨེ་ཤ་ཡིའི་སྒྱུ་རྩལ་གྱི་རྣམ་པ་ཡང་མཐོང་རྒྱུ་ཡོད་པར་ངོ་སྤྲོད་གནང་འདུག གནའ་རྫས་འཚོལ་ཞིབ་རུ་ཁག་དེ་ཡིས་གནམ་མཚོ་ཁུལ་དུ་རྡོ་ཡི་བརྐོས་རིས་ཙམ་མ་ཡིན་པར། གནའ་བོའི་རིག་གཞུང་གི་མཚོན་དོན་དུ་གྱུར་བའིི་རྡོ་ཡི་མཚོན་ཆ་དང་བང་སོ། དེ་བཞིན་ཆོས་ལུགས་ཀྱི་ཆོ་གའི་དམར་མཆོད་ཀྱི་ས་ཚིགས་ཀྱང་རྙེད་སོན་བྱུང་བ་ནི་བོད་མཐོ་སྒང་གི་མཚོ་བྱང་ཁུལ་གྱི་འབྲོག་པའི་རིག་གནས་ཤུལ་བཞག་ལ་རྒྱུས་ལོན་བྱེད་རྒྱུའི་རྒྱུ་ཆ་གལ་ཆེན་ཞིག་ཡིན་པར་བརྗོད་འདུག རྩ་བའི་ཟླ་བ་སྔོན་མའི་ཟླ་མཇུག་དུ་བོད་ནང་གི་གསར་གནས་ཁག་ཅིག་གི་ཐོག་ཏུ་གནས་ཚུལ་གཞན་ཞིག་ཐོན་པ་ལྟར་ན་རྒྱ་ནག་གིས་བགོས་པའི་སི་ཁྲོན་ཞིང་ཆེན་དཀར་མཛེས་ཁུལ་འདབ་པ་རྫོང་དུ་སྨི་གྲུ་བཞི་མ་ ༡༠༠ ཙམ་ཡོད་པའི་རྡོ་ཆས་རྙིང་པའི་༼ཕན་རོགས༽གནའ་ཤུལ་ཞེས་པ་ཞིག་རྙེད་ཡོད་པའི་གསལ་བསྒྲགས་སྤེལ་ཡོད་པ་དང་། གནའ་ཤུལ་དེ་ནས་ཀྱང་རྡོ་བཟོས་ཀྱི་གནའ་བོའི་མཚོན་ཆ་རིགས་མང་པོ་རྙེད་པར་བཀོད་འདུག རྒྱ་ནག་གཞུང་ཕྱོགས་ཀྱི་ཉམས་ཞིབ་པ་ཚོས། བོད་མཐོ་སྒང་གི་ས་བབ་མཐོ་ཚད་སྨི་ ༣༧༥༠ ལྷག་ནས་རྙེད་པའི་ཕན་རོགས་གནའ་ཤུལ་དེ་ནི་ལོ་ངོ་གཅིག་འབུམ་སུམ་ཁྲིའི་གོང་ནས་ཆགས་ཡོད་པ་དང་། གནའ་ཤུལ་དེར་སྔོག་འདོན་དང་རྒྱུས་ལོན་ཉམས་ཞིབ་བྱས་པའི་ཁྲོད། རྡོ་ཡིས་བཟོས་པའི་གནའ་རྫས་ཁྲི་གཅིག་ལྷག་རྙེད་ཡོད་སྟབས། བོད་མཐོ་སྒང་དུ་མི་ལོ་གཅིག་འབུམ་ཁྲི་གསུམ་གྱི་གོང་ནས་མིའི་རིགས་ཀྱི་འཚོ་གནས་མགོ་བཙུགས་ཡོད་པར་ངོས་འཛིན་བྱས་ཡོད་འདུགགཞི་རྩའི་གནའ་སྔ་མོར་བོད་དུ་དུར་མཆོད་ཀྱི་སྐབས་སུ་མིའི་བེམ་པོ་ས་འོག་ཏུ་འཇུག་པ་ཆེས་མང་བ་དང་། དུར་སྦོས་ཀྱི་ཁྲོད་དུ་བེམ་པོ་ཙམ་མིན་པར་རིག་དངོས་ཀྱང་དུར་སྦོས་བྱེད་སྲོལ་ཡོད་པ་མ་ཟད། བོད་ཁུལ་གྱི་རིག་གནས་གསར་བརྗེ་སྐབས་སུ་ཡང་བོད་མི་རྣམས་ཀྱིས་རང་གི་རིག་དངོས་རྩ་ཆེན་རྣམས་ས་འོག་ཏུ་བཅུག་ནས་བརྟན་སྲུང་བྱེད་ཐབས་བྱས་ཡོད་པ་ཆེས་མང་བར་བརྟེན། བོད་ཁུལ་དུ་གཅིག་ནས་རྒྱ་ནག་གཞུང་ཕྱོགས་ཀྱི་རིག་དངོས་རྟོག་ཞིབ་རུ་ཁག་དང་གཞན་ཡང་མི་སྒེར་གྱི་གནའ་རྫས་འཚོལ་ཞིབ་སོགས་ཀྱི་ལས་གཞི་འདྲ་མིན་སྤེལ་བཞིན་པའི་ཁྲོད། བོད་ཁུལ་གྱི་དུར་ས་མང་པོ་ཕྱིར་བསྔོགས་བྱེད་བཞིན་ཡོད་པ་རེད།

རྒྱ་ནག་གི་མཐའ་དམག་བརྒྱ་ལྷག་རྒྱ་གར་བྱང་ཕྱོགས་ཀྱི་ Uttarakhand མངའ་སྡེ་ཁུལ་གྱི་འཕགས་བོད་ས་མཚམས་སུ་སིམ་འཛུལ་གྱིས་Barahoti ཞེས་པའི་ས་ཁུལ་དེར་ཡོད་པའི་ཟམ་ཆེན་ཞིག་གཏོར་བཅོམ་བཏང་ཡོད་པའི་གནས་ཚུལ་ཐོན་འདུགཁ་ཉིན་རྒྱ་གར་གྱི་ Economic Times ཞེས་པའི་གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གི་མཐའ་དམག་བརྒྱ་ལྷག་ Uttarakhand མངའ་སྡེ་ཁུལ་གྱི་ Tunjun ཞེས་པའི་ལ་བརྒྱུད་ནས་ཁུལ་དེའི་འཕགས་བོད་ས་མཚམས་སུ་སྤྱི་ལེ་ལྔ་ཙམ་བརྒལ་ནས་རྒྱ་གར་གྱི་ས་ཁོངས་སུ་བསླེབས་ཏེ་ཁུལ་དེའི་འཛུགས་སྐྲུན་ལས་གཞིར་གཏོར་བཅོམ་བཏང་རྗེས།  རྒྱ་གར་གྱི་ཕར་རྒོལ་མ་བྱས་གོང་ནས་ཕྱིར་ལོག་བྱས་ཡོད་པར་འཁོད་འདུག གསར་ཁང་གིས་རྒྱ་གར་གྱི་བདེ་སྲུང་གི་གནས་ཚུལ་ཡོང་ཁུངས་བརྒྱུད་དེ་ཤེས་རྟོགས་བྱུང་བའི་ནང་དུ།  རྒྱ་ནག་གི་བཅིངས་གྲོལ་དམག་མི་དེ་དག་གིས་མཐའ་མཚམས་ཁུལ་དུ་རྟ་ ༥༥ ལྷག་ཞོན་ནས་བསླེབས་ཡོད་པ་མ་ཟད། རྒྱ་གར་གྱི་ས་ཁོངས་སུ་འཛུལ་ནས་ཆུ་ཚོད་གསུམ་ལྷག་གི་རིང་བསྡད་དེ་ཁུལ་དེར་འཛུགས་སྐྲུན་བྱས་ཡོད་པའི་ཟམ་པ་ཞིག་གཏོར་བཅོམ་བཏང་ཡོད་པ་ལྟར། རྒྱ་གར་གྱིས་འཕགས་བོད་མཐའ་མཚམས་ཀྱི་མཐའ་དམག་ཁུལ་དེར་ཆེད་གཏོང་གི་གནས་ཚུལ་དེར་རྒྱུས་ལོན་བྱེད་བཞིན་པ་རེད་འདུགBarahoti ཞེས་པ་དེ་ Uttarakhand མངའ་སྡེ་ཡི་ Chamoli ཞེས་པའི་རྫོང་དུ་ཆགས་ཡོད་པ་དང་། ཕྱི་ལོ་ ༢༠༡༧ ལོར་ཡང་རྒྱ་ནག་གིས་འབྲོག་ལམ་གྱི་བཙན་འཛུལ་དང་འབྲེལ་ནས་ Barahoti ནང་དུ་ཐེངས་གཉིས་ཙམ་ལ་སིམ་འཛུལ་བྱས་ཡོད་པ་རེད་འདུག དེ་བཞིན་གསར་ཁང་གིས། རྒྱ་དཀར་ནག་གཉིས་ཀྱི་བར་དུ་སྔར་ལོར་གྷལ་ཝན་ལུང་གཤོང་དུ་དམག་འཐབ་བྱུང་བའི་རྗེས་སུ།  རྒྱ་ནག་གིས་ Uttarakhand མངའ་སྡེ་ནང་གི་ Barahoti ཞེས་པའི་ས་ཁུལ་དུ་རྒྱ་ནག་གི་དམག་མི་ ༣༥་ལྷག་ཆེད་གཏོང་གིས་ཁུལ་དེར་ལས་གཞི་གང་ཞིག་གྲ་སྒྲིག་བྱེད་བཞིན་པ་ཤེས་རྟོགས་བྱུང་སྟབས། རྒྱ་གར་གྱིས་སྔར་ལོའི་གྷལ་ཝན་ལུང་གཤོང་གི་གནད་དོན་དེ་ལྟ་བུ་ཞིག་མི་ཡོང་བའི་ཕྱིར་ཏུ་ཁུལ་དེར་རྒྱ་གར་གྱི་དམག་མི་མང་པོ་འགྲེམས་འཇོག་བྱས་ཡོད་པར་བསྒྲགས་འདུགའབྲེལ་ཡོད་ཀྱི་གནས་ཚུལ་གཞན་ཞིག་གི་ནང་དུ་རྒྱ་ནག་གིས་སྔར་ལོ་ནས་འཕགས་བོད་ས་མཚམས་ཀྱི་ས་བབ་དང་གནམ་གཤིས་སོགས་ལ་བརྟེན་ནས་ས་མཚམས་ཁག་ཏུ་བོད་དམག་མང་པོ་ཆེད་གཏོང་བྱེད་བཞིན་ཡོད་པའི་གནས་ཚུལ་རིམ་པ་བྱུང་ཡོད་པ་ལྟར། ཁ་སང་ཡང་རྒྱ་གར་གྱི་གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གིས་འཕགས་བོད་ས་མཚམས་སུ་བོད་དམག་འགྲེམས་འཇོག་བྱེད་ཤུགས་ཆེ་རུ་བཏང་ཡོད་པ་མ་ཟད། རྒས་ཡོལ་དུ་ཕྱིན་པའི་དམག་མི་དག་བརྒྱུད་ནས་འཕགས་བོད་ས་མཚམས་སོ་སོར་བོད་ཀྱི་ཡུལ་དམག་གསར་འཛུགས་བྱེད་བཞིན་པ་མ་ཟད། ཡུལ་དམག་དེ་དག་ལ་ས་གནས་ཀྱི་བླ་གྲྭ་རྣམས་ཀྱིས་བྱིན་རླབས་སྩོལ་ཏུ་འཇུག་བཞིན་ཡོད་པར་འཁོད་འདུགརྒྱ་ནག་གིས་ད་ཆ་འཕགས་བོད་མཐའ་མཚམས་སུ་བོད་དམག་ཆེད་འཛུགས་བྱེད་དོན་ནི། སྔར་ལོ་གྷལ་ཝན་ཁུལ་དུ་རྒྱལ་ཁབ་ཕྱོགས་གཉིས་ཀྱི་བར་དུ་འཕགས་བོད་མཐའ་མཚམས་སུ་གདོང་ཐུག་བྱུང་སྐབས། ས་བབ་ཀྱི་ཆ་ནས་རྒྱ་མཚོ་ལས་མཐོ་ཚད་ཕི་ཊི་ ༡༥༠༠༠ ལྷག་ཆགས་ཡོད་སྟབས་རྒྱ་ནག་གི་དམག་མི་མང་པོ་ཞིག་ལ་ས་མཐོའི་སྲོག་རླུང་གི་མ་འདང་བའི་དཀའ་ངལ་འཕྲད་པ་དང་འབྲེལ་བ་ཡོད་པ་ཞིག་ཡིན་སྐོར་མངོན་གསལ་གནང་འདུག གཞི་རྩའི་འདས་བའི་ལོ་འགའི་རིང་ནས་རྒྱ་ནག་གིས་རྒྱལ་ཁོངས་རྒྱ་བསྐྱེད་ཀྱི་སྲིད་བྱུས་ལག་བསྟར་གྱི་འོག་ནས་མཐའ་མཚམས་ཁག་ཏུ་གྲོང་ཚོ་གསར་འཛུགས་དང་འབྲོག་ཁྱིམ་གནས་སྤོར་གྱིས་ལས་གཞི་རྒྱ་བསྐྱེད་ཀྱིས། ཕྱོགས་ཡོངས་ནས་བོད་ཀྱི་མཐའ་མཚམས་ཁག་ཏུ་མ་དངུལ་མང་པོ་ཆེད་གཏོང་གིས་འཛུགས་སྐྲུན་གྱི་ལས་གཞི་སྣ་མང་སྤེལ་བཞིན་པ་མ་ཟད། བོད་དམག་བསྡུ་རུབ་ཀྱིས་ས་བབ་མཐོ་ཞིང་གནམ་གཤིས་འཁྱགས་པའིི་འཕགས་བོད་མཐའ་མཚམས་སུ་བོད་ཀྱི་ཡུལ་དམག་གསར་འཛུགས་བྱེད་བཞིན་པའི་གནས་ཚུལ་རིམ་ཕྱིར་ཐོན་ཡོད་པ་རེད།

རྒྱ་ནག་གཞུང་གིས་འདི་ལོའི་ཟླ་བ་བདུན་པའི་ཚེས་ ༨ ཉིན། གཞུང་འབྲེལ་གྱི་ཐོག་ནས་མགོ་ལོག་ཁུལ་གྱི་སེང་འབྲུག་སྟག་རྩེ་སློབ་གྲྭར་བཙན་བཀའ་བཏང་ནས་དངོས་སུ་སྒོ་རྒྱག་ཏུ་བཅུག་སྟེ། སློབ་ཁོངས་དེར་སློབ་ཞུགས་བྱས་ཡོད་པའི་སློབ་ཕྲུག་རྣམས་རྒྱ་ནག་གཞུང་ལ་དེབ་སྐྱེལ་བྱས་ཡོད་པའི་སློབ་ཁོངས་སོ་སོར་སློབ་འཇུག་བྱེད་དགོས་བའི་སྐུལ་མ་བཏང་ཡོད་ཀྱང་། ད་ཆ་དྭ་ཕྲུག་མང་པོ་ཞིག་ལ་ཐོབ་ཐང་ལག་འཁྱེར་མེད་སྟབས་གཞུང་འབྲེལ་གྱི་སློབ་ཁོངས་སུ་ངོས་ལེན་མ་བྱས་པར་སློབ་འཇུག་གནང་ཐུབ་ཀྱི་མེད་པར་དཀའ་ངལ་འཕྲད་བཞིན་པ་རེད་འདུགཁ་སང་དབྱིན་ཡུལ་དུ་རྟེན་གཞི་བྱས་པའི་ Free Tibet ཞེས་པའི་བོད་དོན་རྒྱབ་སྐྱོར་ཚོགས་པས་བོད་གནས་ལྟ་ཞིབ་ཁང་གིས་བཏང་བའི་གནས་ཚུལ་འདོན་སྤེལ་བྱས་པའི་ནང་དུ། རྒྱ་ནག་གིས་བོད་ཁུལ་གྱི་སྒེར་གཉེར་གྱི་སློབ་གྲྭ་ཁག་ལ་བཙན་བཀའ་བཏང་ནས་སློབ་གྲྭ་ཁག་དངོས་སུ་སྒོ་རྒྱག་ཏུ་བཅུག་པའི་སེང་འབྲུག་སྟག་རྩེ་སློབ་གྲྭའི་ཁོངས་སུ། སློབ་མ་མང་ཆེ་བ་དྭ་ཕྲུག་ཡིན་པ་དང་དེ་བཞིན་ཁག་ཅིག་མགོ་ལོག་ས་གནས་རང་ནས་མིན་པར་རྫ་ཆུ་ཁ་བ་དང་སྡེ་དགེ་སོགས་ཀྱི་ས་ཁོངས་ནས་ཡིན་སྟབས། སློབ་མ་དེ་དག་མགོ་ལོག་དར་ལག་རྫོང་ཁོངས་ཀྱི་སློབ་གྲྭ་ཁག་ཏུ་སློབ་འཇུག་བྱེད་མ་ཐུབ་པར་ལྷག་ཡོད་པ་རེད་འདུག སྤྱིར་རྒྱ་ནག་གིས་མགོ་ལོག་དར་ལག་རྫོང་གི་སེང་འབྲུག་སྟག་རྩེ་སློབ་གྲྭ་བཙན་དབང་གིས་སྒོ་བརྒྱབས་རྗེས་སློབ་ཟུར་ཞིག་གིས་སྙན་ཞུ་ཞིག་བྲིས་བའི་ནང་། སེང་འབྲུག་སྟག་རྩེ་སློབ་གྲྭ་དེ་ནི་བོད་ཀྱི་ཆོས་རིག་གི་ལྟེ་གནས་ཤིག་ཡིན་པ་མ་ཟད། བོད་ཀྱི་ཞིང་འབྲོག་མང་ཚོགས་ཀྱི་བྱིས་པ་རྣམས་ཀྱི་མ་འོངས་བའི་ཕུགས་འདུན་བཅོལ་ས་ཡིན་པར་གསུངས་ཏེ་སློབ་གྲྭ་དེ་སྒོ་མི་རྒྱག་རྒྱུའི་རེ་ཞུ་གནང་ཡོད་ཀྱང་། རྒྱ་ནག་གིས་མང་ཚོགས་ཀྱི་མངོན་འདོད་ལ་ལྟོས་མེད་ཀྱིས་ཁྲིམས་སྒྲིག་གི་གསལ་བཤད་གང་ཡང་མེད་པར་སློབ་གྲྭ་དེ་དངོས་སུ་སྒོ་བརྒྱབས་པ་མ་ཟད།  ད་ཆ་སློབ་གྲྭ་དེའི་རྒྱུ་དངོས་སོགས་ཀྱི་བདག་དབང་ལ་ཡང་གསལ་ཁ་གང་ཡང་མེད་པར་ལྷག་ཡོད་པར་ཡོངས་གྲགས་གནང་ཡོད་པ་རེད།སློབ་ཕྲུག་རྣམས་ལ་ཐོབ་ཐང་ལག་འཁྱེར་མེད་པ་དང་ས་ཁོངས་སོགས་ཀྱི་དེབ་སྐྱེལ་གྱི་ཡིག་ཆ་མེད་པ་སོགས་ཀྱི་དཀའ་ངའ་འོག་སློབ་འཇུག་བྱེད་ཀྱི་མེད་པ་དང་། རྒྱ་ནག་གིས་སེང་འབྲུག་སྟག་རྩེ་སློབ་གྲྭའི་ལག་འཁྱེར་ཡང་ཁས་ལེན་མ་བྱས་པར་རྩིས་མེད་བཏང་བ་མ་ཟད།  སློབ་གྲྭ་དེའི་དགེ་ལས་ཡོངས་རྫོགས་རྒྱ་ནག་གི་གསང་ཞིབ་འོག་བཅུག་སྟེ་རྟོག་ཞིབ་ནན་མོ་བྱས་ནས་སློབ་ཕྲུག་རྣམས་ལ་རོགས་རམ་བྱེད་དུ་འཇུག་གི་མེད་པའི་ཁར། དུས་རྒྱུན་ནས་དགེ་ལས་རྣམས་ཀྱི་ཁ་པར་ལ་ཞིབ་བཤེར་གྱིས་སུན་གཙེར་བྱེད་བཞིན་ཡོད་པ་ཡང་འགྲེལ་བརྗོད་གནང་འདུག Free Tibet ཞེས་པའི་བོད་དོན་རྒྱབ་སྐྱོར་ཚོགས་པས་སྒེར་གཉེར་གྱི་སློབ་གྲྭ་ཁག་བཙན་དབང་གིས་སྒོ་རྒྱག་ཏུ་བཅུག་པ་དེ་ཡིས་རྒྱ་ནག་གི་གསལ་ཁ་མེད་པའི་སྐད་གཉིས་སློབ་གསོའི་ཁྲིམས་སྒྲིག་དང་སྲིད་བྱུས་ཀྱི་འོག་ཏུ་བོད་རིགས་མང་ཚོགས་ཀྱིས་རང་གི་སྐད་ཡིག་ལ་སློབ་སྦྱོང་བྱེད་རྒྱུའི་གཞི་ཁྱོན་ཇེ་ཆུང་དུ་འགྲོ་བཞིན་པར་མང་ཚོགས་ཀྱིས་སེམས་འཚབ་བྱེད་བཞིན་ཡོད་པ་མ་ཟད། རྒྱ་ནག་གིས་བོད་ཀྱི་དགོན་སྡེ་ཁག་གི་ནང་དུ་བོད་ཀྱི་སྐད་ཡིག་ཟབ་ཁྲིད་གནང་བཞིན་པ་ཁག་ཀྱང་ཁྲིམས་འགལ་ཡིན་ལུགས་འགྲེལ་བརྗོད་བྱས་པ་དང་ལྷན་དུ། དགོན་པ་གྲྭ་ཚང་ཁག་ཏུ་སྐད་ཡིག་སློབ་ཁྲིད་ཀྱི་ཚབ་ཏུ་དམར་ཤོག་སྲིད་གཞུང་གི་ལོ་རྒྱུས་སྦྱོང་བརྩོན་བྱེད་དུ་འཇུག་བཞིན་པ་སོགས་ཀྱི་མཚོན་པའི་བོད་བརྒྱུད་ནང་བསྟན་རྒྱ་སྒྱུར་གྱི་སྲིད་བྱུས་ལག་བསྟར་བྱེད་བཞིན་པ་ཡོད་པ་མངོན་གསལ་གནང་འདུག རྩ་བའི་དེ་སྔོན་ཉེ་སྔོན་རྒྱ་ནག་གིས་སེང་འབྲུག་སྟག་རྩེ་སློབ་གྲྭ་སྒོ་རྒྱག་ཏུ་བཅུག་སྐབས། དགེ་ལས་རྣམས་ཀྱི་ཚེ་སྲོག་རང་ལག་དུ་ཡོད་དུས་སློབ་གྲྭ་དེ་རྒྱག་ཏུ་བཅུག་པའི་གནད་དོན་ཕྱིར་བསྒྲགས་བྱས་པ་ཡིན་ན། རང་རང་གི་མདུན་ལམ་ལ་ཉེན་ཁ་ཡོད་པའི་ཐད་ནས་ཉེན་བརྡ་བཏང་ཡོད་པ་མ་ཟད།  སློབ་གྲྭ་དེའི་སྐད་ཡིག་གི་དགེ་རྒན་རིན་ཆེན་སྐྱིད་ལགས་ཀྱང་གནད་དོན་དེ་དང་འབྲེལ་ནས་འཛིན་བཟུང་བཙན་ཁྲིད་བྱས་ཡོད་པ་རེད།སྤྱིར་མདོ་སྨད་མགོ་ལོག་དར་ལག་རྫོང་གི་ས་གནས་གཞུང་ནས་འདི་ལོའི་ཕྱི་ཟླ་ ༧ པའི་ནང་རྒྱ་ནག་གོང་རིམ་གྱི་བཀའ་མངགས་འོག རྫོང་དེའི་ནང་རྟེན་གཞི་བྱས་པའི་སེང་འབྲུག་སྟག་རྩེ་སློབ་གླིང་གི་གཙོ་བྱས་པའི་སྒེར་གཉེར་གྱི་སློབ་གྲྭ་ཁག་ཅིག་བཙན་དབང་གིས་སྒོ་རྒྱག་ཏུ་བཅུག་ཡོད་པ་རེད། སེང་འབྲུག་སྟག་རྩེ་སློབ་གྲྭ་དེ་ནི་ཕྱི་ལོ་ ༡༩༩༨ ལོར་མཁན་སྤྲུལ་ཀུན་བཟང་རྒྱལ་མཚན་ལགས་ཀྱིས་གསར་འཛུགས་གནང་ཞིང་། ཐོག་མར་སློབ་གྲྭ་དེར་དར་ལག་རྫོང་ཁོངས་ཀྱི་ཡུལ་ཚོ་དགུའི་ནང་གི་ད་ཕྲུག་སློབ་མ་གསར་བསྡུ་གནང་ནས་སློབ་ཁྲིད་བྱེད་འགོ་ཚུགས་ཤིང་། ཕྱིས་སུ་ཐེ་ཝན་དུ་ཡོད་པའི་དབང་སྟོད་སྤྲུལ་སྐུ་ཐུབ་བསྟན་ནོར་བུ་ལགས་ཀྱིས་སྦྱིན་བདག་གི་འོག་ནས་སློབ་གྲྭ་རྒྱ་བསྐྱེད་གནང་སྟེ། དར་ལག་རྫོང་ཁོངས་སུ་བོད་སྐད་བོད་ཡིག་གཙོ་བོར་བཟུང་བའི་ཤེས་ཡོན་ལྟེ་གནས་ཆེ་ཤོས་ཤིག་ཏུ་གྱུར་ཏེ། མི་ལོ་ཉི་ཤུ་རྩ་གྲངས་ཀྱི་རིང་ལ་སློབ་མ་མང་པོ་སྐྱེད་སྲིང་གིས་མགོ་ལོག་ཁུལ་དུ་སྐད་གྲགས་ཆེས་ཆེར་ཡོད་པའི་སློབ་གླིང་ཞིག་ཆགས་ཡོད་པ་རེད་འདུག

འཕགས་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་མཐའ་སྲུང་དམག་མིའི་དབར་ས་ཆའི་བདག་དབང་གི་གནད་དོན་སོགས་དང་འབྲེལ་ཏེ་གདུང་ཐུག་གི་རྣམ་པ་མི་ཉུང་བ་ཞིག་འཕྲད་བཞིན་པའི་ཁྲོད་འདིར་རྒྱ་ནག་བཅིངས་གྲོལ་དམག་མིས་རྒྱ་གར་དང་ས་ཐག་ཉེ་བའི་ས་མཚམས་ཁུལ་དུ་མཚན་དམག་སྦྱོང་བརྡར་བྱས་འདུགཁ་སང་རྒྱ་གར་གྱི་ Common News གསར་ཁང་གི་དྲ་གནས་ཐོག་གནས་ཚུལ་སྤེལ་བར་ཉེ་ཆར་རྒྱ་ནག་བཅིངས་གྲོལ་དམག་མིའི་ཁོངས་སུ་ཡོད་པ་ Western Theatre Command ཞེས་པའི་རྒྱ་ནག་གི་ནུབ་ཕྱོགས་དམག་སྡེའི་དམག་མི་རྣམས་ཀྱིས་རྒྱ་གར་དང་ས་མཚམས་ཀྱི་འབྲེལ་བ་ཡོད་ས་ཤིན་ཅང་དང་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བ་གཉིས་ཀྱི་ཁོངས་སུ་གཏོགས་པའི་ས་གནས་མཐོ་ཚད་ལ་ཕི་ཊི་ ༡༦༠༠༠ ལྷག་ཡོད་སར་དམག་དོན་གྲ་སྒྲིག་དང་འབྲེལ་མཚན་དམག་སྦྱོང་བརྡར་བྱས་ཡོད་པ་བཀོད་འདུག Western Theatre Command ཞེས་པའི་རྒྱ་ནག་གི་ནུབ་ཕྱོགས་དམག་སྡེ་ནི་འཕགས་བོད་མཐའ་མཚམས་ས་ཁུལ་ཁག་གཙོས་ཤིན་ཅང་དང་བོད་རང་སྐྱོང་ལྗོངས་ཟེར་བར་ལྟ་རྟོག་བྱ་རྒྱུའི་དམིགས་བསལ་གྱི་འགན་ཡོད་པའི་རྒྱ་ནག་བཅིངས་གྲོལ་དམག་མིའི་སྡེ་ཁག་ཞིག་ཡིན་པ་དང་། དམག་སྡེའི་ལྟ་རྟོག་བཀོད་ཁྱབ་འོག་ད་ཆ་འཕགས་བོད་ས་མཚམས་དང་ཤིན་ཅང་གི་ས་ཁུལ་དུ་གནམ་ཐང་སུམ་ཅུ་ལྷག་གསར་རྒྱག་བྱེད་བཞིན་ཡོད་པ་མ་ཟད། དམག་སྡེའི་དཔོན་རིགས་ཤིག་གིས་རྒྱ་ནག་གཞུང་འབྲེལ་གྱི་བརྒྱུད་ལམ་ཐོག་མཐའ་མཚམས་ཁག་ཏུ་གནམ་ཐང་འཛུགས་སྐྲུན་གྱི་ལས་གཞི་རྒྱ་སྐྱེད་དང་འཕེལ་རྒྱས་གཏོང་བཞིན་པ་དེས་མ་འོངས་པར་དམག་མི་རྣམས་འགྲུལ་སྐྱོད་སྟབས་བདེ་ཆགས་ངེས་ཡིན་པ་དང་གནམ་ཐང་སུམ་ཅུ་དེ་དག་ཁྲོད་ནས་གསུམ་འཕགས་བོད་མཐའ་མཚམས་སུ་ཆགས་པའི་བོད་དབུས་ཁུལ་གྱི་ལྷུན་རྩེ་རྫོང་དང་དིང་རི། སྤུ་ཧྲེང་རྫོང་བཅས་སུ་ཁེལ་གྱི་ཡོད་པར་བརྗོད་ཡོད།གཞི་རྩའི་བོད་དང་རྒྱ་གར་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདུང་ཐུག་ཀྱི་རྣམ་པ་འདྲ་མིན་འབྱུང་བཞིན་ཡོད་པ་དང་། ལྷག་དོན་ས་མཚམས་ཀྱི་བདག་དབང་དང་འབྲེལ་ཏེ་རྩོད་རྙོག་མི་ཉུང་བ་ཞིག་བྱུང་ཡོད་པ་རེད། སྔར་ལོའི་ཕྱི་ཟླ་ ༥ ནང་རྒྱ་གར་བྱང་ཕྱོགས་ལ་དྭགས་སྤང་མགོན་མཚོའི་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདུང་ཐུག་བྱུང་རྗེས་ཕྱོགས་གཉིས་ཀྱི་དམག་མིའི་འགོ་ཁྲིད་དབར་གྲོས་མོལ་ཐེངས་བཅུ་གཉིས་ལྷག་བྱས་མཐར་གནད་དོན་དེ་ཞི་སྒྲིག་བྱུང་ཡོད་ཀྱང་། ལ་དྭགས་བདེ་བཟང་ས་གནས་གཙོས་རྒྱ་གར་བྱང་ཤར་ཨ་རུ་ནཱ་ཅལ་མངལ་ཁུལ་དང་འབྲས་ལྗོངས་བཅས་སུ་ཡོད་པའི་ས་མཚམས་ཀྱི་དོན་རྐྱེན་ཐོག་དུས་ད་ལྟའང་ཕྱོགས་གཉིས་དབར་ཞི་སྒྲིག་ཚད་ལྡན་ཞིག་བྱུང་ཐུབ་མེད།ས་མཚམས་ཀྱི་གནད་དོན་དེ་དག་དང་འབྲེལ་ད་ལྟའི་ཆར་རྒྱ་ནག་ཕྱོགས་ནས་བོད་ཀྱི་ས་གནས་ཁག་ཏུ་དམག་སྦྱོང་གི་ལས་གཞི་དང་མཐའ་མཚམས་ཁག་ཏུ་འཛུགས་སྐྲུན་གྱི་ལས་གཞི་རྒྱ་སྐྱེད། དེ་བཞིན་བོད་མི་གཞོན་སྐྱེས་རྣམས་རྒྱ་ནག་བཅིངས་གྲོལ་དམག་མིའི་ཁོངས་སུ་བསྡུ་སྐོང་སོགས་བྱེད་བཞིན་ཡོད་པ་མ་ཟད་རྒྱ་གར་ཕྱོགས་ནས་ཀྱང་ཉེ་བའི་དུས་སུ་མཐའ་མཚམས་སྲུང་སྐྱོབ་ལ་དམིགས་ཏེ་མཐའ་མཚམས་ཁག་ཏུ་དམག་མི་ ༥༠༠༠༠ ལྷག་འཕར་སྣོན་གནང་བའི་གནས་སྟངས་བྱུང་ཡོད་པ་རེད། ཕྱི་ཟླ་ ༨ ཚེས་ ༢༠ ཉིན་རྒྱ་གར་གྱི་བདེ་སྲུང་བློན་ཆེན་སྐུ་ཞབས་ Rajnath Singh མཆོག་གིས་རྒྱ་གར་རྒྱལ་ཁབ་ཀྱི་བདེ་སྲུང་གནས་བབ་ཐོག་གསུང་བཤད་གནང་སྐབས་རྒྱ་གར་དང་རྒྱ་ནག་གཉིས་ཀྱི་དབར་མཐུན་གནད་ཁག་ཅིག་ཡོད་ཀྱང་ས་མཚམས་ཀྱི་གནད་དོན་ཐོག་འཕྲད་བཞིན་པའི་དཀའ་རྙོག་དེ་ནི་དངོས་འབྲེལ་ཞིག་ཡིན་པ་དང་། རྒྱ་གར་གཞུང་གི་ངོས་ནས་དཀའ་རྙོག་དེ་དག་གྲོས་མོལ་གྱི་ལམ་ནས་སེལ་འདོད་ཡོད་ཀྱང་རྩ་ཆེ་བའི་མཐའ་མཚམས་ཁུལ་དུ་ཁྲིམས་འགལ་ཐོག་ནས་བཙན་འཛུལ་བྱས་པའི་བྱ་སྤྱོད་ལ་དུས་ནམ་ཡང་སྣང་མེད་དུ་འཇོག་ཐབས་མེད་ཅེས་གསུངས་ཡོད།