རྒྱལ་སྤྱི།

ཉེ་བའི་ཆར་རྒྱ་དཀར་ནག་དབར་ས་མཚམས་དང་འབྲེལ་རྩོད་རྙོག་ཆེ་རུ་ཕྱིན་ཏེ་མཐའ་སྲུང་དམག་མིའི་དབར་དངོས་སུ་ལག་འཛིང་ཤོར་བའི་རྐྱེན་གྱིས་ཕན་ཚུན་གྱི་དམག་མི་གསོད་རེས་ཀྱིས་གྱོད་དོན་རྣོ་ངར་ཅན་དུ་གྱུར་བར་བརྟེན་རྒྱ་གར་དབུས་གཞུང་གི་བརྡ་འཕྲིན་འཕྲུལ་ལས་སྡེ་ཁག་གིས་ཕྱི་ཟླ་ ༧ ཟླ་སྟོད་དུ་རྒྱ་ནག་གིས་བཟོས་བའི་མཉེན་ཆས་ Wechat འམ་སྐད་འཕྲིན་གཙོས་པའི་མཉེན་ཆས་ ༥༩ རྒྱ་གར་གྱི་བདེ་འཇགས་སྲུང་སྐྱོབ་ཀྱི་མིང་ཐོག་ནས་བཀག་སྡོམ་གནང་ཡོད་པ་ལྟར། ཁ་སང་རེས་གཟའ་ཕུར་བུའི་ཉིན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་ཀྱང་རྒྱ་ནག་གིས་བཟོས་པའི་མཉེན་ཆས་ TikTok དང་ WeChat གཉིས་པོ་ཁྱོན་ཉིན་གྲངས་ ༤༥ ནང་ཚུད་བཀག་སྡོམ་གནང་རྒྱུ་ཡིན་པའི་བཀོད་ཁྱབ་གནང་འདུགཨ་རིའི་ནོར་སྲིད་ལྷན་ཁང་གི་དྲུང་ཆེ་སྐུ་ཞབས་ Steven Mnuchin ལགས་ཀྱིས་ཀྱང་འདས་པའི་གཟའ་འཁོར་ནང་རྒྱ་ནག་གིས་བཟོས་པའི་མཉེན་ཆས་ TikTok དང་ WeChat དེ་དག་མཚམས་འཇོག་གནང་དོན་ནི་ཨ་རིའི་བདེ་འཇགས་ལ་དམིགས་ཏེ་གནང་བ་ཅིག་ཡིན་སྐོར་གསུངས་ཡོད་པ་རེད། གཞི་རྩའི་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་དེ་སྔོན་རྒྱ་ནག་གིས་བཟོས་པའི་མཉེན་ཆས་ TikTok དེ་གང་མགྱོགས་བཀག་སྡོམ་གནང་རྒྱུ་ཡིན་པའི་བཀའ་ཁྱབ་བསྒྲགས་ངེས་ཡིན་སྐོར་གསུངས་མ་ཐག་གྷུ་གྷལ་ཚོང་ལས་ཁང་གིས་ TikTok  མཉེན་ཆས་དེ་ཉོ་རྒྱུ་ཡིན་སྐོར་གསུངས་པ་བཞིན་སྲིད་འཛིན་མཆོག་གིས་ TikTok  མཉེན་ཆས་གཉེར་མཁན་རྒྱ་ནག་གི་ Bytedance ཚོང་ལས་ཁང་ལ་ཕྱི་ཟླ་ ༩ ཚེས་ ༡༥ ནང་ཚུད་གཉེན་ཆས་བཙོང་ཟིན་དགོས་པའི་དུས་བཅད་གནང་ཡོད་པ་དང་། ཅི་སྟེ་གྷུ་གྷལ་ཚོང་ལས་ཁང་གིས་ TikTok མཉེན་ཆས་དེ་ཉོ་མ་ཚར་ན་ཨ་རིའི་ངོས་ནས་གཉེན་ཆས་དེ་ཡོངས་སུ་བཀག་སྡོམ་གནང་རྒྱུ་ཡིན་པའི་བཀོད་ཁྱབ་གནང་ཡོད་པ་རེད།TikTok ཚོང་ལས་ཁང་གིས་སྲིད་འཛིན་མཆོག་གིས་བཀོད་ཁྱབ་དེར་ཧ་ཅང་བློ་ཕམ་གྱི་རྣམ་པ་ཆེད་འདོན་དང་འབྲེལ་ཏེ་གནད་དོན་དེའི་ཐོག་ཨ་རིར་ཁྲིམས་གཏུག་བྱ་རྒྱུའི་ཉེན་བརྡ་བཏང་བ་མ་ཟད། Wechat ཡི་ཚོང་བདག་ Tencent ཚོང་ལས་ཁང་གིས་ཀྱང་ད་ལྟའི་ཆར་གནད་དོན་དེའི་ཐོག་བསྐྱར་ཞིབ་བྱེད་བཞིན་ཡོད་པ་བཤད་འདུག སྤྱིར་ཨ་རི་གཞུང་གི་ངོས་ནས་རྒྱ་ནག་གིས་བཟོས་པའི་མཉེན་ཆས་ TikTok དེ་བཀག་སྡོམ་གནང་དོན་གཙོ་བོ་ནི་རྒྱ་ནག་དམར་ཤོག་ཚོགས་པས་མཉེན་ཆས་དེའི་བརྒྱུད་ནས་ཨ་རི་ནང་དུ་ཨ་རིའི་གཞུང་འབྲེལ་མི་སྣ་དང་མི་སེར་དཀྱུས་མ་ཚོའི་ལོ་རྒྱུས་དང་གསང་གནས་ཁག་རྐུ་ཁྱེར་བྱེད་བཞིན་པའི་གནད་དོན་དང་འབྲེལ་ནས་དེ་ལྟར་བཀག་སྡོམ་གནང་བ་ཡིན་པ་དང་། དེ་བཞིན་སྐད་འཕྲིན་ནམ་ཝི་ཅཊ་བཀག་སྡོམ་གནང་བ་དེ་ནི་སྐད་འཕྲིན་བརྒྱུད་མི་ཕན་ཚུན་དབར་དངུལ་དམར་སྐུར་གྱི་ཡོད་སྟབས། གལ་ཏེ་དེ་ལྟར་བྱས་པའི་གནས་ཚུལ་ཐོན་ཚེ་ཨ་རིའི་ཁྲིམས་སྒྲིག་གི་དགོངས་དོན་བཞིན་ཉེས་ཆད་འགེལ་རྒྱུ་ཡིན་པ་གསུངས་འདུགCNN གསར་ཁང་གིས་ལྷག་དོན་ད་རེས་ཨ་རིའི་སྲིད་འཛིན་སྐུ་ཞབས་ཊམ་མཆོག་གིས་རྒྱ་ནག་གི་མཉེན་ཆས་བཀག་སྡོམ་གནང་བའི་རྒྱུ་མཚན་གཞན་ཞིག་ནི་སྤྱི་ཚོགས་བརྒྱུད་ལམ་ཁག་ཏུ་རྒྱ་ནག་གིས་བཟོས་པའི་མཉེན་ཆས་ TikTok བེད་སྤྱོད་བཏང་བའི་ཐོག་ནས་བརྙན་པར་ཆེད་སྒྲིག་གིས་རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་གཉན་རིམས་སམ་ Covid -19 ཁྱབ་བརྡལ་དང་འབྲེལ་ནད་ཡམས་དེ་རྒྱ་ནག་ནས་ཁྱབ་མེད་པ་སོགས་གནས་ཚུལ་རྫུན་བཟོ་བྱས་པ་ཁག་འགོག་ཐབས་སླད་ཡིན་པར་གསུངས་འདུག རྒྱ་ནག་གི་ཊིཀ་ཊོཀ་ཚོང་གཉེར་ཁང་གི་ངོས་ནས་དུས་ད་ལྟའང་ཨ་རི་ནང་དུ་མཉེན་ཆས་དེ་སྤྱོད་མཁན་ཚོར་མུ་མཐུད་ནས་སྤྱོད་འདོད་ཡོད་སྐོར་བཤད་པ་མ་ཟད་དེ་བཞིན་ TikTok མཉེན་ཆས་ཚོང་ལས་ཁང་གི་མགྲིན་ཚབ་པ་ Josh Gartner ཡིས་ཀྱང་ཨ་རི་གཅིག་པོར་ TikTok སྤྱོད་མཁན་མང་ཚོགས་ས་ཡ་བརྒྱ་ལྷག་ཡོད་པ་དེ་དག་གི་བསམ་སྤྱོད་ལ་གུས་བརྩི་ཞུས་ཏེ་མུ་མཐུད་སྤྱོད་རྒྱུ་ཡོང་བར་རེ་བ་ཡོད་སྐོར་བརྗོད་འདུགདཔྱད་ཞིབ་པ་ཁག་ཅིག་གིས་ད་ལན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་རྒྱ་ནག་གིས་བཟོས་པའི་མཉེན་ཆས་ TikTok དང་ WeChat བཀག་སྡོམ་གནང་རྒྱུའི་བཀོད་ཁྱབ་གནང་བ་དེ་ནི་ཉེ་བའི་ཆར་ཊམ་གྱི་འོས་བསྡུའི་དྲིལ་བསྒྲགས་གནང་སྐབས་ཁོང་ལ་མི་འདོད་པ་ཚོས་ཊིཀ་ཊོག་སྤྱོད་ནས་བརྙན་པར་བཟོས་པའི་རྐྱེན་གྱིས་ཡིན་པར་དགོངས་ཚུལ་གསུང་བཞིན་འདུག

ཁ་སང་ཨ་རི་ཕྱི་སྲིད་ལས་ཁུངས་ཀྱི་སྙན་ཐོ་གསར་པ་འདོན་སྤེལ་གནང་བའི་ནང་རྒྱ་ནག་གཞུང་གིས་ཨ་རིའི་མི་སེར་བོད་ནང་འགྲོ་སྐྱོད་ཐད་འཆར་གཞི་ལྡན་པའི་སྒོ་ནས་དམ་དྲག་བྱེད་བཞིན་ཡོད་པ་མངོན་གསལ་གནང་འདུག བོད་ནང་ཕར་འགྲོ་ཚུར་འོང་གི་ཁྲིམས་གཞི་ཕྱག་བསྟར་དང་འབྲེལ་ཏེ་ཨ་རིའི་ཕྱི་སྲིད་ལས་ཁུངས་ནས་ཕྱི་ཚེས་ ༥ ཉིན་དེ་གའི་གྲོས་ཚོགས་སུ་ཕྱི་ལོ་ ༢༠༡༩ ལོར་བོད་ནང་འགྲོ་སྐྱོད་ཐད་སྙན་ཐོ་འདོན་སྤེལ་གནང་འདུག་པ་དང་སྙན་ཐོའི་ནང་རྒྱ་ནག་གཞུང་གིས་འཆར་གཞི་ལམ་ལུགས་ལྡན་པའི་ཐོག་ནས་ཨ་རིའི་གཞུང་འབྲེལ་མི་སྣ་དང་། ལས་བྱེད། གསར་འགོད་པ་དང་ཡུལ་སྐོར་སྤྲོ་འཆམ་པ་རྣམས་བོད་རང་སྐྱོང་ལྗོངས་ཞེས་པ་དང་དེའི་ཕྱི་ཕྱོགས་བོད་ཀྱི་ས་ཁུལ་ཁག་ཏུ་འགྲོ་སྐྱོད་ལ་དམ་དྲག་བྱེད་བཞིན་ཡོད་པ་མངོན་གསལ་གནང་འདུག་པ་མ་ཟད།  འགྲོ་འོང་གི་དམ་དྲག་དེའི་ཁྲོད་རྒྱ་གཞུང་གིས་དབྱེ་འབྱེད་དང་སྐབས་རེ་སུན་གཙེར་བཟོ་བའི་བྱ་སྤྱོད་བཅས་ཐེར་འདོན་གྱིས་ཨ་རིའི་མི་སྣ་དེ་དག་ལ་སྐུ་ངལ་དུ་མ་འཕྲད་ཀྱི་ཡོད་པ་སོགས་མངོན་གསལ་གནང་འདུག ལྷག་པར་དུ་སྙན་ཐོའི་ནང་གལ་ཏེ་ཨ་རིའི་གཞུང་འབྲེལ་མི་སྣ་བོད་རང་སྐྱོང་ལྗོངས་ཞེས་པའི་ནང་ཕེབས་རྒྱུར་རེ་སྐུལ་གནང་ཚེ་བོད་རང་སྐྱོང་ལྗོངས་ཀྱི་ས་གནས་སྲིད་གཞུང་ནས་སྤྱི་བདེ་ལས་ཁུངས་དང་ཕྱི་སྲིད་ལས་ཁུངས་སོགས་ལ་བརྡ་ལན་སྤྲོད་པ་དང་སྦྲགས། དབུས་ལས་ཁུངས་ཀྱི་ངོས་ནས་དེའི་ཐད་ཐག་གཅོད་དང་དམ་དྲག་བྱེད་བཞིན་ཡོད་པ་མངོན་ཆེད་བཀོད་གནང་འདུག དེ་བཞིན་ཕྱི་ལོ་ ༢༠༡༩ ལོར་རྒྱ་གཞུང་གིས་ཨ་རིའི་གཞུང་འབྲེལ་མི་སྣ་བོད་རང་སྐྱོང་ལྗོངས་ནང་འཚམས་གཟིགས་གནང་རྒྱུའི་རེ་སྐུལ་ཐེངས་བཅུ་གནང་བ་ལས་ལྔ་ཙམ་ལ་མ་གཏོགས་ངོས་ལེན་བྱས་མེད་པ་འཁོད་འདུག ཡུལ་སྐོར་སྤྲོ་འཆམ་པའི་གྲངས་ཐོར་གཞིགས་ཚེ་ཁུལ་དེའི་ས་གནས་སྲིད་གཞུང་ནས་ཕྱི་ལོ་ ༢༠༡༨ ལོར་རྒྱལ་སྤྱིའི་རྒྱལ་ཁབ་འདྲ་མིན་ནས་ཡུལ་སྐོར་སྤྲོ་འཆམ་པ་ས་ཡ་ ༣༠ ཙམ་དང་། ཕྱི་ལོ་ ༢༠༡༩ ལོར་ས་ཡ་ ༤༠ ཙམ་ཞིག་བོད་རང་སྐྱོང་ལྗོངས་ཁུལ་དུ་ཕེབས་རྒྱུར་ཆོག་མཆན་སྤྲད་ཡོད་པ་བརྗོད་འདུག འོན་ཀྱང་ཨ་རིའི་མི་སེར་གྱི་ཡུལ་སྐོར་སྤྲོ་འཆམ་པའི་གྲངས་ཐོ་འཕར་ཡོད་མེད་སོགས་ཀྱི་ཐད་ད་ཆ་ཁུངས་སྐྱེལ་གནང་བ་གང་ཡང་མཐོང་རྒྱུ་མེད་པ་བཀོད་འདུག ཁྲན་ཏུར་ཡོད་པའི་ཨ་རིའི་གཞུང་ཚབ་པས་ཕྱི་ལོ་ ༢༠༡༩ ལོར་དེ་སྔ་ཕྱི་ལོ་ ༢༠༡༨ ལོ་བཞིན་རྒྱ་གཞུང་གིས་ཨ་རིའི་མི་སེར་ཆིག་ཁྲི་ཙམ་མ་གཏོགས་བོད་རང་སྐྱོང་ལྗོངས་ནང་ཕེབས་རྒྱུའི་ཆོག་མཆན་སྤྲོད་མེད་པ་ཚོད་དཔག་གནང་གི་འདུག དེའི་ཁྲོད་བོད་པ་ཨ་རི་མི་སེར་ཡིན་པ་རྣམས་བོད་རང་སྐྱོང་ལྗོངས་ནང་ཕེབས་སྐབས་ཁོང་ཚོར་གཞན་དང་མི་འདྲ་བར་དམ་དྲག་དང་སུན་གཙེར་མང་བ་བཟོ་ཡི་ཡོད་པ་ཆེས་ཁ་གསལ་གནང་འདུགཕྱི་སྲིད་ལས་ཁུངས་ཀྱི་སྙན་ཐོ་ཐད་རྒྱལ་སྤྱིའི་བོད་དོན་ལས་ཁུངས་ཀྱི་ཚོགས་གཙོ་སྐུ་ཞབས་ Matteo Mecacci  ལགས་ཀྱིས་ཕྱི་སྲིད་ལས་ཁུངས་ཀྱི་སྙན་ཐོ་བརྒྱུད་དེ་རྒྱ་གཞུང་གིས་བོད་ནང་གི་འགྲོ་འོང་ཁྲིམས་འཆར་གྱི་འབྲུ་དོན་ལ་བརྩི་མེད་བཏང་ཐོག་མུ་མཐུད་ནས་ཁུལ་དེར་ཨ་རིའི་མི་སེར་ཕེབས་རྒྱུའི་ཐད་འགོག་རྐྱེན་དང་དམ་དྲག་བྱེད་བཞིན་ཡོད་པ་ར་སྤྲོད་བྱུང་བ་དང་སྒོས་བོད་རང་སྐྱོང་ལྗོངས་ཞེས་པ་དེར་ཕྱི་མི་ཕེབས་ཚེ་དམིགས་བསལ་གྱི་ཆོག་མཆན་ཞུ་དགོས་པའི་ས་ཁུལ་གཅིག་པོ་དེ་ཆགས་ཀྱི་ཡོད་པ་དེ་ལྟར་ཡང་། རྒྱ་རིགས་ཨ་རིར་བཞུགས་མཁན་ཚོར་དེ་འབྲེལ་དམ་དྲག་སོགས་མེད་སྐོར་གསུངས་འདུག ཁོང་གིས་ད་དུང་རྒྱ་གཞུང་གིས་བོད་དེ་ཕྱི་ཕྱོགས་ཀྱི་རྒྱལ་ཁབ་དང་འབྲེལ་ཐག་བཅད་པའི་ཐོག་ལོགས་སུ་འཇོག་པ་དེ་ནི་བོད་མི་མང་ཚོགས་ཀྱི་དངོས་ཡོད་གནས་སྟངས་སྦས་གསང་བྱེད་རྒྱུ་དང་བོད་ཀྱི་ཛ་དྲག་གི་གནས་བབས་ཕྱིར་འགྱར་མི་ཡོང་ཕྱིར་རྒྱ་ནག་གི་སྲིད་བྱུས་ཀྱི་ཆ་ཤས་ཤིག་ཡིན་པར་གསུངས་འདུག་པ་དང་། རྒྱ་ནག་དབུས་ལས་ཁུངས་སོགས་ཀྱིས་བོད་མིར་དྲག་གནོན་དང་དེ་བཞིན་ཨ་རིའི་གཞུང་འབྲེལ་མི་སྣ་ཚོར་བོད་ནང་འགྲོ་འོང་ཐད་དམ་དྲག་དང་བཀག་སྡོམ་བྱས་དང་བྱེད་མུས་ནི་ཡུན་རིང་ནས་ལག་བསྟར་བྱས་པའི་བྱ་སྤྱོད་ཅིག་ཡིན་སྟབས་བྱ་སྤྱོད་དེ་དག་མཚམས་འཇོག་དགོས་པ་བཟོ་དགོས་ཞེས་གསུངས་འདུག གཞི་རྩའི་འདས་པའི་ཟླ་བ་ནང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ཕྱི་ལོ་ ༢༠༡༨ ལོར་གཏན་འབེབས་གནང་བའི་ Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་དེ་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ཡོད་པ་རེད།  

ཉེ་བའི་ཆར་འཛམ་གླིང་ས་ཕྱོགས་གང་སར་གནས་སྡོད་བོད་མི་ཚོགས་སྒེར་ཁག་ནས་གཅིག་རྗེས་གཉིས་མཐུད་ཀྱིས་བོད་དོན་ལས་འགུལ་འདྲ་མིན་སྤེལ་བཞིན་ཡོད་པའི་ཁྲོད་འདིར་དབྱིན་ཡུལ་གྱི་ནང་གནས་སྡོད་བསྟན་འཛིན་བཟང་མོ་ལགས་དང་ཁོང་གི་སྐུ་ཟླ་བཀྲིས་དོན་གྲུབ་ལགས། དེ་བཞིན་བསོད་ནམས་ཚེ་རིང་ལགས། བསྟན་འཛིན་ཕུན་ཚོགས་ལགས་བཅས་བོད་མི་བཞིས་དང་བླངས་ཀྱིས་ཁ་སང་ཕྱི་ཟླ་ ༨ ཚེས་ ༥ ཉིན་རྒྱལ་སྤྱི་དང་དབྱིན་ཡུལ་གཞུང་མང་གཉིས་ནས་བོད་དོན་ལ་རྒྱབ་སྐྱོར་གནང་ཕྱིར་དབྱིན་ཡུལ་གྱི་གྲོང་ཁྱེར་ Bristol ནས་རྒྱལ་ས་ London བར་བོད་དོན་ཞི་བའི་གོམ་བགྲོད་ཀྱི་ལས་འགུལ་དབུ་འཛུགས་གནང་ཡོད།སྐབས་དེར་བོད་དོན་གོམ་བགྲོད་ཀྱི་ལས་འགུལ་བ་རྣམས་ནས་ཐེངས་འདིའི་ལས་འགུལ་གྱི་དབུ་འབྱེད་མཛད་སྒོ་དེ་ཉེ་ཆར་མང་ཚོགས་ཀྱིས་གཏོར་བརླག་བཏང་བའི་ལོ་རྒྱུས་རང་བཞིན་ལྡན་པའི་དབྱིན་ཡུལ་གྱི་དྲན་གཡོག་ཚོང་པ་ཆེན་པོ་ Edward Colston ཡི་འདྲ་སྐུ་ཡོད་པའི་ས་ཚིགས་ནས་དབུ་འཛུགས་གནང་འདུག་ཅིང། སྐབས་དེར་ས་གནས་སུ་ཡོད་པའི་བོད་མི་དང་བོད་དོན་རྒྱབ་སྐྱོར་བ། དེ་བཞིན་གཞུང་འབྲེལ་གྱི་གནད་ཡོད་མི་སྣ་ཁག་ཅིག་ལྷན་འཛོམས་ཐོག་དབྱིན་ཡུལ་གྲོས་ཚོགས་འཐུས་མི་ལྕམ་ kerry MaCarthy ལགས་ནས་གསུང་བཤད་གནང་བ་དང་བོད་མི་ཚོས་བོད་དོན་གོམ་བགྲོད་བ་རྣམས་ལ་མཇལ་དར་སྒྲོན་ནས་ཕེབས་སྐྱེལ་ཞུས་འདུགལས་འགུལ་བ་རྣམས་ཀྱིས་རྒྱ་ནག་གི་སྲིད་འཛིན་ནས་བོད་རྒྱ་ཞི་མོལ་སླར་གསོ་བྱེད་དགོས་པ་དང་རྒྱལ་སྤྱིའི་གཞུང་མང་ནས་རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་བཏང་བ་མ་ཟད་འཛམ་གླིང་ཡོངས་ལ་ཏོག་དབྱིབ་གཉན་རིམས་ཁྱབ་བརྡལ་བཏང་བའི་འགན་འཁྱེར་འཇུག་དགོས་པ། ༸ཀུན་གཟིགས་༸པཎ་ཆེན་རིན་པོ་ཆེ་མཆོག་དང་བཀྲིས་དབང་ཕྱུག་ལགས་གཙོས་པའི་བོད་མི་ཆབ་སྲིད་བཙོན་པ་རྣམས་གློད་བཀྲོལ་དགོས། དེ་བཞིན་དབྱིན་ཡུལ་གྲོས་ཚོགས་འཐུས་མི་རྣམས་ནས་བོད་ནང་དུ་ཕར་འགྲོ་ཚུར་འོང་གི་ཁྲིམས་འཆར་ལ་རྒྱབ་སྐྱོར་གནང་སྐྱོང་ཡོང་བ་སོགས་རྒྱལ་སྤྱིའི་གཞུང་དང་དབྱིན་ཡུལ་གཞུང་མང་གཉིས་ལ་ཁྱོན་དགོས་འདུན་དོན་ཚན་བཅུ་ཅན་ཞིག་ཆེད་འདོན་གནང་སྟེ་བོད་དོན་གོམ་བགྲོད་ཀྱི་ལས་འགུལ་སྤེལ་བཞིན་འདུག་པ་མ་ཟད། ད་ལན་གྱི་ལས་འགུལ་བ་རྣམས་དབྱིན་ཡུལ་གྱི་ Bristol གྲོང་ཁྱེར་ནས་རྒྱལ་ས་ London ཁྱོན་རྒྱང་ཐག་སྤྱི་ལེ་ ༡༨༠ ལྷག་ཙམ་ཡོད་པའི་ཁྲོད་གྲོང་ཁྱེར་དང་གྲོང་སྡེ། དེ་བཞིན་གྲོང་གསེབ་བཅས་ཁྱོན་ས་གནས་ ༡༠ ཙམ་ནང་གོམ་བགྲོད་གནང་བ་བརྒྱུད་ནས་བོད་དོན་དང་འབྲེལ་བའི་དགོས་འདུན་ཁག་གི་ཡིག་ཆ་རྣམས་ས་གནས་སོ་སོའི་གཞུང་མང་གཉིས་ལ་བགོ་འགྲེམས་གནང་གི་འདུགཐེངས་འདིའི་བོད་དོན་གོམ་བགྲོད་པ་རྣམ་པའི་འཆར་གཞི་ལྟར་ན་ཕྱི་ཟླ་ ༨ ཚེས་ ༡༠ ཉིན་ཁོང་རྣམས་དབྱིན་ཡུལ་གྱི་རྒྱལ་ London དུ་ལས་འགུལ་མཇུག་སྒྲིལ་གནང་གཏན་ཁེལ་འདུག ཐེངས་འདིའི་བོད་དོན་གོམ་བགྲོད་ལས་འགུལ་འདི་ནི་འདི་ལོའི་ནང་ཡོ་རོབ་རྒྱལ་ཁབ་ཁུལ་གྱི་བོད་མི་སྒེར་ནས་སྤེལ་བའི་བོད་དོན་གོམ་བགྲོད་ལས་འགུལ་ཐེངས་གསུམ་པ་དེ་ཆགས་ཀྱི་ཡོད་པ་རེད།  

PEN America ཞེས་པའི་ཨ་རིའི་སྨྱུ་གུ་ཚོགས་པས་ཤོག་གྲངས་ ༩༤ཅན་གྱི་སྙན་ཐོ་ཞིག་འདོན་སྤེལ་དང་སྦྲགས།  ཨ་རིའི་Hollywood གློག་བརྙན་བཟོ་ལས་ཁང་གིས་དབང་ཆ་གཅིག་སྡུད་ཀྱི་རྒྱ་ནག་གི་གློག་བརྙན་བཟོ་ལས་བཀག་སྡོམ་དང་མཉམ་འབྲེལ་བྱས་པར་སྐྱོན་བརྗོད་བྱས་པ་དང་ཆབས་ཅིག  Hollywood གློག་བརྙན་ཁང་གིས་རང་ཉིད་ཀྱི་སྒྱུ་སྩལ་རང་དབང་ལ་སྲུང་སྐྱོབ་བྱེད་ཕྱིར་རྒྱ་ནག་གིས་བཀག་སྡོམ་དང་འབྲེལ་བའི་གནད་དོན་ཕྱི་གསལ་ནང་གསལ་བཟོ་དགོས་བའི་འབོད་སྐུལ་ཞུས་འདུགཨ་རིའི་སྨྱུ་གུ་ཚོགས་པས་ཁ་སང་རེས་གཟའ་ལྷག་པའི་ཉིན་འདོན་སྤེལ་གནང་བའི་སྙན་ཐོ་དེའི་ནང་། རྒྱ་ནག་གཞུང་གིས་ཡུལ་དེའི་ནང་གི་གློག་བརྙན་ཙམ་མ་ཡིན་པར། རྒྱལ་སྤྱིའི་མང་ཚོགས་ལ་གློག་བརྙན་ཅི་འདྲ་ཞིག་སྟོནདགོས་མིན་ཐད་ལའང་གནོད་ཤུགས་ཇེ་ཆེར་སྤྲོད་བཞིན་པའི་གནད་དོན་ཁ་གསལ་བཀོད་པ་དང་འབྲེལ། Hollywood གློག་བརྙན་ཁང་ནས་ཅི་སྟེ་རྒྱ་ནག་གི་རེ་འདོད་ལྟར་གློག་བརྙན་གྱི་བརྗོད་བྱ་དང་བརྗོད་བྱེད་ལ་འགྱུར་བ་གཏོང་དགོས་ན། རྒྱ་ནག་གི་ཁྲོམ་རའི་ནང་དུ་འགྲེམ་རྒྱུའི་གློག་བརྙན་ཐོན་རིམ་ལ་འགྱུར་བ་གཏོང་རྒྱུ་ལས། སྤྱི་ཡོངས་ཀྱི་ཆ་ནས་རྒྱལ་སྤྱིའི་སྟེང་ཚོང་འགྲེམས་བྱེད་རྒྱུའི་གློག་བརྙན་གྱི་ཨ་མ་དངོས་དེར་འགྱུར་བ་མ་གཏོང་རོགས་ཞེས་རེ་བ་བཏོན་པ་མ་ཟད། ཨ་རིའི་སྲིད་གཞུང་གིས་ཁྲིམས་ཐོག་ནས་བཀའ་རྒྱ་གཏོང་མི་དགོས་བར། བཟོ་ལས་ཁང་གིས་འགན་རང་ཁུར་གྱིས་རྒྱ་ནག་གི་ད་ལྟའི་འབྲེལ་ལམ་དེར་ཐབས་བྱུས་ལྡན་པའི་འགྱུར་བ་གཏོང་དགོས་ཀྱི་རེད་ཅེས་ཉེན་བརྡ་བཏང་འདུག སྙན་ཐོ་དེའི་ནང་། རྒྱ་ནག་གིས་དུས་རྒྱུན་ནས་གློག་བརྙན་གྱི་ཁྲོམ་རར་སྟངས་འཛིན་བྱེད་བཞིན་ཡོད་པ་མངོན་གསལ་གྱིས། དེ་སྔ་བོད་ནང་ལོ་བདུན་དང་སྐུ་མདུན་ཞེས་པའི་གློག་བརྙན་འདི་གཉིས་རྒྱ་ནག་གི་ཁྲོམ་རར་བཀག་སྡོམ་བྱས་ཡོད་པ་མ་ཟད། གློག་བརྙན་འཁྲབ་གཞུང་རྩོམ་མཁན་དང་འཁྲབ་སྟོན་པ་སོགས་ཐོ་གཞུང་ནག་པོའི་ནང་དུ་བཅུག་པ་དང་།   དེ་བཞིན་གློག་བརྙན་བཟོ་ལས་ཁང་གིས་ཀྱང་རྒྱ་ནག་དང་འབྲེལ་བའི་ཁེ་ཚོང་གི་རིགས་བྱེད་རྒྱུ་ཡང་བཀག་སྡོམ་བྱས་ཡོད་ལུགས་ངོ་སྤྲོད་གནང་སྟེ།  རྒྱ་ནག་གིས་དུས་རྒྱུན་ནས་རྒྱ་ནག་དང་འབྲེལ་བའི་ལས་རིགས་ཡོངས་རྫོགས་ལ་བརྟག་དཔྱད་བྱས་ཏེ་ཕྱོགས་ཡོངས་ནས་གནོན་ཤུགས་སྤྲོད་ཐབས་བྱེད་ཀྱི་ཡོད་པ་ཕྱིར་བསྒྲགས་གནང་སྟེ། ད་ཆ་རྒྱ་ནག་གིས་བཀག་སྡོམ་གྱི་ལམ་ལུགས་འདི་རྒྱལ་ནང་ཙམ་དུ་མ་ཟད། ཕྱི་ལོགས་ཀྱི་སྤྱི་ཚོགས་ནང་དུ་ཡང་ཤན་ཤུགས་ཇེ་ཆེར་གཏོང་གི་ཡོད་པ་ལུང་འདྲེན་གྱིས། རྒྱ་ནག་གི་ནང་གློག་བརྙན་བཟོ་ལས་ཁང་གིས་བོད་དང་ཡུ་གུར། དེ་བཞིན་ཧོང་གོང་བཅས་ཀྱི་བརྗོད་བྱ་དང་འབྲེལ་བའི་གློག་བརྙན་བཟོ་ཐབས་མེད་དུས། ཕྱི་ལོག་གི་རང་དབང་གི་བཟོ་ལས་ཁང་གིས་ཀྱང་གོང་གི་གནད་དོན་དང་འབྲེལ་ནས་གློག་བརྙན་བཟོ་མ་ཐུབ་ན། གཞན་སུས་བརྗོད་བྱ་དེ་དག་གི་སྒང་ལ་གློག་བརྙན་བཟོ་དགོས་རེད་ཅེས་དོགས་འདྲི་ཡང་གནང་འདུགགཞན་ཡང་སྙན་ཐོའི་ནང་དུ། རྒྱ་ནག་གིས་སྤྱི་ཡོངས་ཀྱི་ཆ་ནས་གློག་བརྙན་ཙམ་མིན་པར།  རྒྱལ་ཁབ་གྱི་མངོན་འདོད་བརྩི་སྲུང་དང་སྤྱི་ཚོགས་བརྟན་བརླིང་གི་མིང་ཐོག་ནས་ཕྱི་ཕྱོགས་ཀྱི་གསར་འགོད་ལས་རིགས་ཁྲོད་ཀྱི་བརྙན་དང་རླུང་འཕྲིན་ཁག  དེ་བཞིན་གསར་ཤོག  ཐ་ན་ཚགས་པར་ཚུན་ཆད་ཀྱང་བཀག་སྡོམ་བྱས་ཡོད་ལུགས་ལུང་འདྲེན་གྱིས།  རྒྱ་ནག་གིས་ཕྱི་ལོགས་སུ་གནས་ཚུལ་ལ་བཀག་སྡོམ་བྱེད་དོན་ནི་དམར་ཤོག་ཚོགས་པ་དང་ཚོགས་པའི་འགོ་ཁྲིད་ཚོའི་ཁེ་ཕན་ལ་དམིགས་པ་ཞིག་ཡིན་སྐོར་ངོ་སྤྲོད་གནང་འདུག ཨ་རིའི་སྨྱུ་གུ་ཚོགས་པས་ད་དུང་། སྤྱིར་ཨ་རིའི་ངོས་ནས་རྒྱལ་ཁབ་ཕྱི་ནང་གང་དུ་ཡང་སྨྲ་བརྗོད་རང་དབང་གཙོ་ཆེར་འཛིན་བཞིན་ཡོད་པར་བརྟེན། ལོ་ངོ་བཅུ་ཕྲག་ཁ་ཤས་ཀྱི་ནང་དུ་རྒྱ་ནག་དང་འབྲེལ་ལམ་བཙུགས་ནས་སྨྲ་བརྗོད་རང་དབང་གོང་སྤེལ་གྱི་ལས་གཞི་སྤེལ་ཡོད་ནའང་། རྒྱ་ནག་གིས་ཁུལ་དེའི་ནང་ཡོད་པའི་ཨ་རིའི་སྨྲ་བརྗོད་རང་དབང་གི་ཡན་ལག་ལས་ཁུངས་ཀྱི་ཚོགས་མི་བཞི་བཙོན་འཇུག་ཁྲིམས་ཐག་བཅད་ཡོད་པ་ཡོངས་གྲགས་ཀྱིས། རྒྱ་ནག་གི་བཙན་དབང་གི་འོག་ནས་འདས་གྲོངས་སུ་གྱུར་བའི་ནོ་སྦེལ་ཞི་བདེ་གཟེགས་རྟགས་བཞེས་མཁན་གྱི་སྐུ་ཞབས་ Liu Xiaobo ལགས་ཀྱང་ཨ་རིའི་སྨྲ་བརྗོད་རང་དབང་ཚོགས་པ་དེར་འབྲེལ་འདྲིས་ཆེ་བའི་ཤུགས་རྐྱེན་ཆེས་ཆེ་ཤོས་ཀྱི་གྲོགས་པོ་ཞིག་ཡིན་སྐོར་འཁོད་འདུགཨ་རིའི་སྨྱུ་གུ་ཚོགས་པས་སྙན་ཐོ་འདི་བརྒྱུད་ནས། གློག་བརྙན་བཟོ་ལས་ཁང་གཞན་དག་གིས་རྒྱ་ནག་གི་གནོན་ཤུགས་ལ་མགོ་བོ་མི་སྒུར་བར་སྤྱི་ཚོགས་སྟེང་མངོན་གསལ་དོད་པའི་གནད་དོན་འདིའི་ཐོག་ལ་གླེང་སློང་བྱས་ཏེ། མི་མང་གིས་རྒྱ་ནག་གི་གནོད་ཤུགས་འདིར་ལྟ་སྟངས་ཅི་ཡོད་ཀྱི་ཐད་ནས་གྲོས་བསྡུར་བྱེད་རྒྱུའི་གར་སྟེགས་ཤིག་སྐྲུན་དགོས་བ་མ་ཟད། གློག་བརྙན་བཟོ་ལས་ཁང་གིས་ལས་མི་ཡོངས་ཀྱིས་ཀྱང་གནད་དོན་འདིར་ཤེས་རྟོག་ཡོད་པའི་ཐོག་ནས་རང་གི་ཆེད་ལས་དང་ཀུན་སྤྱོད་ལ་བསམ་བློ་གཏོང་དགོས་བའི་འབོད་སྐུལ་ཞུས་འདུག གཞི་རྩའི་རྒྱ་ནག་གི་ནང་དུ་དཔེ་དེབ་དང་གློག་བརྙན་སོགས་གང་ཞིག་འདོན་སྤེལ་བྱེད་དགོས་ན་ཡང་། སྤྱི་ཚོགས་ཀྱི་ནང་དུ་ཡོངས་གྲགས་ཀྱིས་འགྲེམས་སྤེལ་མ་བྱས་སྔོན་ནས་ཐོག་མར་དམར་ཤོག་སྲིད་གཞུང་གིས་བསྐྱར་ཞིབ་བྱེད་པར་འབུལ་དགོས་བའི་བཀག་སྡོམ་གྱི་ལམ་ལུགས་ཤིག་བཟོས་ཡོད་པ་དང་།  སྤྱི་ལོ་ ༢༠༡༦ ལོར་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་་སྐབས་སུ་རྒྱལ་ནང་གི་གློག་བརྙན་བཟོ་ལས་དང་འབྲེལ་ཁྲིམས་སྒྲིག་ཅིག་གསར་བཟོ་བྱས་ཡོད་པའི་ནང་དུ། རྒྱལ་ཁབ་ཀྱི་བདེ་འཇགས་ལ་གནོད་པ་དང་རྒྱལ་ཁབ་ཀྱི་གསང་བ་ཕྱི་ལ་སྤྲོད་པ།  དེ་བཞིན་ཐད་སྤྱོད་ཀྱི་བྱ་སྤྱོད་དང་འཇིགས་སྐུལ་རིང་ལུགས་སོགས་དང་འབྲེལ་བའི་གློག་བརྙན་རིགས་ཡོངས་སུ་བཀག་སྡོམ་བྱེད་རྒྱུ་ཡིན་སྐོར་འཁོད་ཡོད་པ་ལྟར་ཁྲིམས་གཞི་དེ་ལག་བསྟར་བྱེད་མུས་རེད།

དེ་རིང་སྔ་དྲོ་ཕྱག་ཚོད་ ༡༠ བའི་ཐོག   གངས་སྐྱིད་ལྷག་པ་ཚེ་རིང་ཚོགས་ཁང་གི་ནང་དུ། བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་གི་འགན་འཛིན་དབང་འདུས་ཚེ་རིང་ལགས་དང་། འགན་འཛིན་ལས་འཕར་སྤྱི་ཟུར་བསོད་ནམས་རྒྱལ་མཚན་དང་དགེ་བཤེས་མ་བདེ་ལེགས་དབང་མོ་གཉིས་ཀྱི་དབུ་བཞུགས་ཀྱིས་གསར་འགོད་ལྷན་འཛོམས་ཤིག་སྐོང་ཚོགས་གནང་སྟེ།  བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་དང་འོས་བསྡུའི་སྒྲིག་གཞིའི་འོག  ཕྱི་ལོ་ ༢༠༢༡ ལོའི་ལོའི་སྲིད་སྤྱི་གཉིས་ཀྱི་འོས་བསྡུ་དངོས་སུ་འགོ་འཛུགས་གནང་བ་གསལ་བསྒྲགས་བསྐྱངས་སོང་།  དབུས་འོས་བསྡུ་ལས་ཁང་གིས་ད་ལྟའི་ཆར་སྲིད་སྤྱི་གཉིས་སྔོན་འགྲོ་དང་དངོས་གཞིའི་འོས་བསྡུ་ག་དུས་གནང་མིན་གྱི་དུས་ཚོད་གཏན་འབེབས་གནང་མེད་ནའང་།  འོས་བསྡུ་འགན་འཛིན་ལགས་ཀྱིས་དེང་སྐབས་ནད་ཡམས་གྱི་རྐྱེན་གྱིས་དཀའ་ཚེགས་དུ་མ་ཡོད་མེད་ལ་མ་ལྟོས་པར་འོས་བསྡུ་ཆེན་མོ་དུས་ཐོག་ལ་ཞུ་རྒྱུའི་ཆོད་སེམས་བརྟན་པོ་ཡོད་པ་དང་། ས་གནས་འོས་བསྡུ་ལས་ཁང་དང་རྒྱ་ཆེ་མང་ཚོགས་རྣམས་ཀྱིས་ཀྱང་ངལ་བ་ཁྱད་བསད་ཀྱིས་ཞུ་སྒོ་ཁག་གནང་ཐབས་དང་། ལྷག་པར་དུ་རང་རིགས་ཡོངས་ནས་རྡོག་རྩ་གཅིག་ཏུ་སྒྲིལ་ཏེ་འོས་བསྡུའི་ནང་ཆ་ཤས་བཞེས་རྒྱུ་གལ་ཆེན་ཡིན་པར་ངོ་སྤྲོད་གནང་བ་མ་ཟད། འོས་བསྡུའི་སྒྲིག་གཞི་བསྐྱར་བཅོས་ཀྱི་དགོངས་དོན་ལྟར། འོས་བསྡུའི་དེབ་སྐྱེལ་གསར་དུ་ཞུ་གཏན་འཁེལ་བ་ཡིན་པས་མང་ཚོགས་ཀྱིས་དམིགས་བསལ་ཐུགས་སྣང་བཞེས་དགོས་བའི་རེ་སྐུལ་ཞུས་སོང་། དེ་དང་འབྲེལ་ནས། འོས་བསྡུ་ལས་ཁང་གིས་སྲིད་སྐྱོང་དང་སྤྱི་འཐུས་འོས་མི་རྣམས་ཀྱིས་འོས་འགྲན་དྲིལ་བསྒྲགས་བྱེད་ཕྱོགས་དང་འབྲེལ་ནས་རྩ་འཛིན་གྱི་ལམ་སྟོན་དོན་ཚན་བཅུ་གཉིས་ཅན་ཞིག་གསལ་བསྒྲགས་གནང་བའི་ནང་།  འོས་མི་རྣམས་ཀྱིས་དྲིལ་བསྒྲགས་ཀྱི་ཡིག་ཆའི་ཐོག་༸གོང་ས་མཆོག་གི་སྐུ་པར་དང་བོད་མིའི་སྒྲིག་འཛུགས་ཀྱི་ལས་རྟགས། བོད་རྒྱལ་ཁབ་ཆེན་མོའི་རྒྱལ་དར་སོགས་འཁོད་མི་ཆོག་པ་དང་། དེ་བཞིན་སྤྱི་ཡོངས་ནས་ཡ་རབས་བཟང་སྤྱོད་དང་ལྡན་པ། འཆམ་མཐུན་གྱི་རྨང་གཞི་བརྟན་པ། གཞན་ཡང་གཞི་རིམ་གྱི་ཐོབ་ཐང་ཁག་ལ་སྲུང་བརྩི་ཞུ་རྒྱུ་དང་། དྲང་བདེན་མིན་པའི་གནས་ཚུལ་ཁྱབ་སྤེལ་མི་ཆོག་པ་སོགས་ཀྱི་དོན་ཚན་བཅུ་གཉིས་ཕྱིར་བསྒྲགས་གནང་སོང་། གཞན་ཡང་སྐབས་དེར་བཙན་བྱོལ་བོད་མིའི་འོས་བསྡུའི་སྒྲིག་གཞིའི་ནང་གསལ་ལྟར་བོད་མི་མང་སྤྱི་འཐུས་ཀྱི་རྩ་འབོར་གྲངས་དེ་སྔ་ལྟར་ ༤༥ ངེས་གནས་ཡིན་པ་དང་། མང་ཚོགས་རྣམས་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༤ དང་ ༢༥ གཉིས་ལ་དམིགས་བསལ་གྱི་ཐུགས་སྣང་དགོས་པ་མ་ཟད། དེང་སྐབས་ཁ་པར་དང་དྲ་ལམ་ཁག་ཏུ་སྒེར་ནད་སྤྱི་སྤུངས་ཀྱི་ནང་ཁུལ་འཁྲུགས་གཞི་དང་། དགོས་མེད་དཀྲོགས་རྐྱེན་རིགས་ལ་དབུ་མ་འཁོར་བར་དྭོགས་ཟོན་དང་སྦིར་བསངས་དོད་པོས་བྱ་ར་དམ་འཛིན་གནང་དགོས་པའི་ལམ་སྟོན་སོགས་གནང་སོང་པ་མ་ཟད། རིམ་བཞིན་དབུས་འོས་བསྡུ་ལས་ཁང་ནས་ཚེས་གྲངས་གསལ་སྒྲགས་གནང་མཚམས་སུ་འོས་བསྡུའི་དེབ་སྐྱེལ་ངེས་པར་དུ་གནང་དགོས་པ་གསུངས་སོང་། དེ་བཞིན་སྐབས་དེར་འདི་གའི་གསར་འགོད་པས་ཕྱི་ལོ་ ༢༠༡༦ འོས་བསྡུའི་ཁྲོད་དགོན་པ་གྲྭ་ཚང་དང་སྡེ་ཚན་བྱེ་བྲག་པ་རེ་འགས་སྲིད་སྐྱོང་གི་འོས་བསྡུའི་དྲིལ་བསྒྲགས་ཀྱི་སྐབས་སུ་དམིགས་བསལ་གྱི་ཁྱབ་ཁོངས་ཀྱི་ས་ཁུལ་རེ་འགར་འགྲོ་རུ་མ་བཅུག་པ་སོགས་ཀྱི་གནད་དོན་བྱུང་ཡོད་སྟབས། དེ་འདྲའི་རྙོག་གླིང་གི་སྐབས་སུ་འོས་བསྡུ་ལས་ཁང་གི་ངོས་ནས་འགན་ག་རེ་བཞེས་བཞིན་ཡོད་པར་བཀའ་འདྲི་ཞུས་པར། ཁོང་གིས་མང་ཚོགས་ཀྱི་བོད་མིའི་བཅའ་ཁྲིམས་ལ་རྩ་འཛིན་བྱས་པའི་ཐོག་ནས་མང་ཚོགས་ཀྱི་ཐོབ་ཐང་དང་འོས་འགན་གཉིས་ལ་བརྩི་སྲུང་བྱེད་རྒྱུ་གལ་ཆེན་པོ་ཡིན་ལུགས་ཀྱིས། འོས་བསྡུ་ལས་ཁང་གི་ངོས་ནས་འོས་མི་ཡོངས་ལ་གཅིག་གྱུར་གྱིས་དྲིལ་བསྒྲགས་ཀྱི་གོ་སྐབས་འབུལ་བར་མཐུན་རྐྱེན་སྒྲུབ་དགོས་ལུགས་ཀྱི་ལམ་སྟོན་གནང་སོང་། གཞི་རྩའི་དབུས་འོས་བསྡུ་ལས་ཁང་ནས་རིམ་པའི་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་འདི་བཞིན་སྒྲིག་མཐུན་ཚགས་ཚུད་ཡོང་ཐབས་སུ་ཟབ་སྦྱོང་ཁག་ཅིག་གནང་འཆར་འདུག་ཀྱང་། ད་ལྟའི་རིམས་ནད་ཁྱབ་བརྡལ་གྱི་ཛ་དྲགས་གནས་སྟངས་ཁྲོད་མང་ཚོགས་ཀྱིས་སྟབས་བདེའི་ངང་ནས་འོས་བསྡུའི་གནས་ཚུལ་འཚོལ་བཤེར་བྱེད་ཐབས་དང་། འོས་བསྡུའི་གོ་རྟོག་སྤེལ་རྒྱུ་སོགས་ལ་དམིགས་ཏེ། tibetanelection.net ཞེས་པའི་འོས་བསྡུའི་དྲ་རྒྱ་གསར་པ་ཞིག་ཀྱང་དབུ་འབྱེད་གནང་ཡོད།    དབུས་འོས་བསྡུ་ལས་ཁང་གི་བསྒྲགས་གཏམ། To press Tibetan

དེ་རིང་ཟླ་ ༨ ཚེས་ ༥ ཉིན་སྔ་དྲོ་ཆུ་ཚོད་ ༦༌༣༠ སྟེང་དྷ་ས་ཁུལ་གྱི་མི་མང་ཆེད་འཛོམས་ཐོག་བོད་ཀྱི་ཆབ་སྲིད་བཙོན་ཟུར་ཞིང་གཤེགས་དམ་པ་ཨ་མ་ཨ་བདེ་ལགས་ཀྱི་སྐུ་ཕུང་ཞུགས་འབུལ་གནང་སོང་།བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱིས་ཐུགས་འགན་གཙོ་བཞེས་ཐོག་སྤྱི་འཐུས་རྒྱུན་ལས་ཁག་ཅིག་གིས་དབུས་པའི་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་རྣམ་པ། དྷ་སར་གཉུག་མར་གནས་པ་དང་གློ་བུར་དུ་ལྷགས་པའི་བོད་མི་མང་ཚོགས་བརྒྱ་སྐོར་ཞིག་ཆེད་འཛོམས་ཀྱིས་དམ་པ་དེ་ཉིད་ཀྱི་སྐུ་ཕུང་མེག་གྷན་དུ་རྟེན་གཞི་བྱས་པའི་དབུས་སྣེ་ལེན་ཁང་ནས་དུར་ཁྲོད་དུ་གདན་འདྲེན་ཞུས་ཏེ། ཞི་ཞིང་དུལ་བའི་བསྔོན་སྨོན་གསུང་འདོན་དང་། གུས་འདུད་དང་ཆེ་མཐོང་ལྡན་པའི་ཐོག་ནས་སྐུ་ཕུང་ཞུགས་འབུལ་གནང་སོང་།སྐབས་དེར་བོད་མི་མང་སྤྱི་འཐུས་རྒྱུན་ལས་ཁག་ཅིག་ཆེད་ཕེབས་གནང་ཡོད་པ་ལྟར་སྤྱི་འཐུས་རྣམ་རྒྱལ་སྒྲོལ་དཀར་ལགས་ཀྱིས་གསར་འགོད་པའི་བཅར་འདྲི་དང་ལེན་དང་འབྲེལ། རྒྱལ་གཅེས་མ་ཨ་མ་ཨ་བདེ་ལགས་དམ་པ་ཁོང་གིས་བོད་དོན་ཆེད་མི་ལོ་ ༢༧ རིང་ལ་རྒྱ་ནག་གི་བཙོན་ཁང་དུ་སྡུག་སྦྱོང་མནར་གཅོད་བཟོད་གླགས་མེད་པ་མྱངས་བ་མ་ཟད། བཙན་བྱོལ་དུ་ཕེབས་རྗེས་སྐུ་ཚེ་ཧྲིལ་པོ་བོད་དོན་ཆེད་བློས་བཏང་གནང་ཡོད་སྟབས། ཁོང་གི་རླབས་ཆེན་གྱི་མཛད་རྗེས་དག་ལ་རྗེས་དྲན་དང་གུས་འདུད་ཞུ་ཕྱིར་ཕེབས་སྐོར་གསུངས་སོང་།དེ་བཞིན་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས་རྒྱལ་གཅེས་མ་དམ་པ་ཁོང་གིས་༸གོང་ས་མཆོག་དབུ་བཞུགས་འོག་བོད་བསྟན་སྲིད་སྤྱིའི་སླད་དུ་མུ་མཐུད་ནས་ཕྱག་ལས་གནང་དགོས་པའི་རེ་སྐུལ་གནང་སྐོར་དྲན་གསོ་གནང་སོང་།གཞན་ཡང་སྐབས་དེར་བཅར་བའི་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་རླུང་འཕྲིན་ཁང་ལ་རང་རིགས་གཞོན་སྐྱེས་ཚོར་དམ་པ་ཁོང་གིས་མི་ལོ་ ༢༧ རིང་བཙོན་འཇུག་སྐབས་ཀྱི་མྱོང་བ་དག་རྒྱལ་སྤྱིར་མཁྱེན་རྟོགས་སླད་དྲན་འོས་པའི་ཨ་མ་ཨ་བདེའི་འབོད་སྒྲ་ཞེས་པའི་ཕྱག་དེབ་ཅིག་འདོན་སྤེལ་གནང་ཡོད་པ་ལྟར་ཕྱག་དེབ་དེ་ངེས་པར་དུ་ལྗགས་ཀློག་གནང་ནས་ཐུགས་དགོངས་གང་ཡིན་ཤེས་ཐབས་གནང་དགོས་གལ་ཡིན་པ་གསུངས་སོང་། དེ་དང་ཕྱོགས་མཚུངས་སུ་ས་གནས་བོད་ཀྱི་བེུད་ལྷན་ཚོགས་ཀྱི་རྒྱུན་ལས་ཚེ་རིང་དབྱངས་འཛོམས་ལགས་ཀྱིས་ད་རེས་རྒྱལ་གཅེས་མ་ཨ་མ་ཨ་བདེ་ལགས་འདས་གྲོངས་སུ་གྱུར་བ་དེ་ནི་བློ་ཕམ་དང་ལྷག་དོན་བོད་མི་ཡོངས་ལ་གྱོང་གུད་ཆེན་པོ་ཞིག་ཡིན་སྐོར་གསུངས་སོང་།གཞི་རྩའི་ཁམས་ཉག་རོང་དུ་འཁྲུངས་པའི་ཨ་མ་ཨ་བདེ་ལགས་ནི་མི་ལོ་ ༢༧ རིང་རྒྱ་གཞུང་གིས་བཙོན་འཇུག་འོག་གདུག་རྩུབ་མནར་གཅོད་མྱངས་པའི་ལོ་རྒྱུས་ཁྲོད་བོད་ཀྱི་ཆབ་སྲིད་བཙོན་ཟུར་སྙན་གྲགས་ཅན་ཞིག་ཆགས་ཀྱི་ཡོད་པ་དང་། དམ་པ་ཁོང་གིས་མི་ལོ་ ༢༧ རིང་བཙོན་འཇུག་སྐབས་ཀྱི་མྱོང་བ་དག་རྒྱལ་སྤྱིར་མཁྱེན་རྟོགས་སླད་དྲན་འོས་པའི་ཨ་མ་ཨ་བདེའི་འབོད་སྒྲ་ཞེས་པའི་ཕྱག་དེབ་ཅིག་འདོན་སྤེལ་གནང་ཡོད་པ་རེད།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་དམིགས་བསལ་ཁྱད་ལས་རྟོག་ཞིབ་སྡེ་ཚན་ཁག་ལྔ་མཉམ་མཐུན་གྱིས་རྒྱ་ནག་གཞུང་ལ་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་ཀྱི་གནས་སྟངས་ཞིབ་ཕྲ་དུས་ཐོག་ཏུ་མངོན་གསལ་བྱེད་དགོས་ཞེས་འདྲི་རྩད་གནང་འདུག་པ་མ་ཟད། དེ་བཞིན་རིན་པོ་ཆེ་མཆོག་གི་གནད་དོན་ཐད་མངོན་གསལ་ཡོང་ཕྱིར་རྒྱ་ནག་གཞུང་ནས་རང་དབང་ཅན་གྱི་སྡེ་ཚན་ས་གནས་ལ་དངོས་སུ་རྟོག་ཞིབ་ཆེད་འགྲོ་སྐྱོད་ཆོག་པ་བཟོ་དགོས་པའི་གཞེན་སྐུལ་བསྐྱར་ནན་གནང་འདུག༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་བཙན་ཁྲིད་འོག་གར་སོང་ཆ་མེད་དུ་གྱུར་ནས་འདི་ལོ་མི་ལོར་ ༢༥ འཁོར་བའི་དུས་ཚིགས་དང་འབྲེལ། ཉེ་ཆར་རྒྱལ་ཚོགས་ཀྱི་བཙན་གནོན་འོག་གར་སོང་ཆ་མེད་དུ་གྱུར་བའི་དམིགས་བསལ་ལས་དོན་ཚོགས་ཆུང་དང་སྡུག་སྦྱོང་བཀག་ཉར་འགོག་ཐབས་ཀྱི་ཁྱད་ལས་རྟོག་ཞིབ་མི་སྣ། རིག་གཞུང་རང་དབང་དང་འབྲེལ་བའི་དམིགས་བསལ་ཁྱད་ལས་རྟོག་ཞིབ་མི་སྣ། གྲངས་ཉུང་མི་རིགས་ཐོག་དམིགས་བསལ་ཁྱད་ལས་རྟོག་ཞིབ་མི་སྣ། དེ་བཞིན་ཆོས་དད་རང་དབང་གྱི་དམིགས་བསལ་ཁྱད་ལས་རྟོག་ཞིབ་མི་སྣའི་སྡེ་ཁག་ལྔས་མཉམ་མཐུན་གྱིས་ཉེ་སྔོན་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་ཐོག་འདྲི་རྩད་གནང་བའི་གནད་དོན་དང་འབྲེལ་གནས་ཚུལ་ཞིག་ཁ་སང་རྒྱལ་ཚོགས་ཀྱི་དྲྭ་ལམ་ཐོག་ཕྱིར་བསྒྲགས་གནང་འདུག ད་ལན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་ལས་རྟོག་ཞིབ་སྡེ་ཁག་ལྔས་རྒྱ་གཞུང་ལ་བཏང་བའི་འདྲི་རྩད་དེའི་ནང་གཙོ་བོ་ད་བར་རྒྱལ་ཚོགས་བྱིས་པའི་རང་དབང་སྲུང་སྐྱོབ་སྡེ་ཚན་གྱིས་མཚོན་པའི་འགྲོ་བ་མིའི་ཐོབ་ཐང་དམིགས་བསལ་ཁྱད་ལས་རྟོག་ཞིབ་སྡེ་ཁག་ནས་ད་བར་རྒྱ་ནག་གཞུང་ལ་༸པཎ་ཆེན་རིན་པོ་ཆེའི་གནད་དོན་སྐོར་འདྲི་རྩད་དང་གླེང་སློང་ཐེངས་མང་གནང་ཡོད་པ་ལུང་འདྲེན་དང་འབྲེལ། ད་བར་ལོ་ ༢༥ རིང་རྒྱ་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་བཙན་དབང་གིས་གར་སོང་ཆ་མེད་དུ་བཏང་བའི་བྱ་སྤྱོད་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཡོངས་ཁྱབ་བསྒྲགས་གཏམ་ནང་གསལ་ཁྲིམས་སྒྲིག་གི་འབྲུ་དོན་ཁག་རྡོག་རོལ་བཏང་བ་ཞིག་རེད་ཅེས་ཆེད་བཀོད་གནང་འདུག་པ་མ་ཟད། རྒྱལ་ཚོགས་ཀྱི་བྱིས་པའི་རང་དབང་སྲུང་སྐྱོབ་སྡེ་ཚན་ནས་རྒྱ་གཞུང་ལ་རེ་འདུན་གནང་བ་ལྟར་༸པཎ་ཆེན་རིན་པོ་ཆེ་མཆོག་གི་གནད་དོན་ཁ་གསལ་ཡོང་ཕྱིར་ས་གནས་སུ་རང་དབང་ཅན་གྱི་རྟོག་ཞིབ་ཚོགས་ཆུང་འགྲོ་སྐྱོད་གནང་འཇུག་དགོས་པའི་གཞེན་སྐུལ་བསྐྱར་ནན་གནང་འདུགདེ་བཞིན་རྒྱལ་ཚོགས་ཀྱི་དམིགས་བསལ་ཁྱད་ལས་རྟོག་ཞིབ་སྡེ་ཁག་ནས་རྒྱ་ནག་གཞུང་ལ་འདྲི་རྩད་དང་སྐྱོན་བརྗོད་བྱས་པའི་གནད་དོན་གཞན་ཞིག་ལ་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་ཀྱི་ལམ་སྲོལ་ཐོག་ཐེ་བྱུས་ཀྱིས་ཁྲིམས་སྒྲིག་བཟོས་པའི་གནད་དོན་ནི་སེམས་འཚབ་བྱ་ཡུལ་ཞིག་ཡིན་པར་མངོན་གསལ་དང་འབྲེལ། བྱ་སྤྱོད་དེ་ནི་རྒྱ་ནག་གཞུང་གིས་གྲངས་ཉུང་མི་རིགས་ཀྱི་བོད་བརྒྱུད་ནང་བསྟན་རྗེས་འཇུག་ཚོའི་ཆོས་ཕྱོགས་ཀྱི་བྱེད་སྒོ་ལ་ཁྱད་གསོད་བྱས་པ་ཞིག་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཁྲིམས་སྒྲིག་གི་འབྲུ་དོན་རྡོག་རོལ་བཏང་བ་ཞིག་རེད་ཅེས་གསུངས་འདུག སྤྱིར་སྔ་ལོའི་ཕྱི་ཟླ་ ༩ ནང་ཚོགས་པའི་རྒྱལ་ཚོགས་ཀྱི་བཙན་གནོན་འོག་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གི་ཚོགས་ཐེངས་ ༡༡༩ སྟེང་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་སྐོར་འདྲི་རྩད་གནང་སྐབས་སུ་རྒྱ་ནག་གཞུང་གིས་རིན་པོ་ཆེ་མཆོག་ད་ཆ་གཙུག་ལག་སློབ་གྲྭ་ཆེན་མོ་ཐོན་ནས་ཕྱག་ལས་གནང་བཞིན་ཡོད་ཅེས་བརྗོད་པ་ལས་ཞིབ་ཕྲའི་གནས་ཚུལ་ཁ་གསལ་གང་ཡང་བྱས་མེད་པ་རེད། སྐབས་དེར་ལས་དོན་ཚོགས་ཆུང་གི་ངོས་ནས་རྒྱ་ནག་གཞུང་གི་ལན་འདེབས་དེར་འདོད་བློ་ཁེངས་པ་ཞིག་མི་འདུག་ཅེས་དང་རིན་པོ་ཆེ་མཆོག་གི་གནད་དོན་ནི་ལས་དོན་ཚོགས་ཆུང་གི་དོ་སྣང་གནང་ཡུལ་ཞིག་ཡིན་སྐོར་རྒྱ་ནག་གཞུང་ལ་བསྐྱར་ནན་གྱིས་གསུངས་ཡོད་པ་རེད། ད་རེས་རྒྱལ་ཚོགས་ཀྱི་བཙན་གནོན་འོག་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གིས་མཚོན་པའི་ཁྱད་ལས་རྟོག་ཞིབ་སྡེ་ཁག་བཞིས་བསྐྱར་དུ་རྒྱ་གཞུང་ལ་༸པཎ་ཆེན་རིན་པོ་ཆེའི་གནད་དོན་སྐོར་འདྲི་རྩད་བཏང་བ་དང་འབྲེལ། རྒྱ་ནག་གཞུང་གི་ངོས་ནས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་གནས་ཚུལ་དུས་ཐོག་ཏུ་མངོན་གསལ་བྱེད་དགོས་ཞེས་བརྗོད་འདུག་པ་མ་ཟད། རྒྱ་གཞུང་གིས་བཟོས་པའི་བླ་སྤྲུལ་ཡང་སྲིད་ངོས་འཛིན་གནང་ཕྱོགས་དང་འབྲེལ་བའི་ཁྲིམས་སྒྲིག་དེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ནང་གསལ་དབྱེ་འབྱེད་མེད་པར་གྲངས་ཉུང་མི་རིགས་ཀྱི་ཆོས་དད་རང་དབང་ལ་སྲུང་སྐྱོབ་གནང་དགོས་ཞེས་པ་དང་དངོས་འགལ་ཆགས་མིན་ལན་འདེབས་ཁ་གསལ་དགོས་པའི་འདྲི་རྩད་བཅས་གནང་འདུག རྒྱལ་ཚོགས་ཀྱི་ཁྱད་ལས་རྟོག་ཞིབ་སྡེ་ཁག་ལྔས་རྒྱ་ནག་གཞུང་ལ་༸པཎ་ཆེན་རིན་པོ་ཆེའི་གནད་དོན་སྐོར་འདྲི་རྩད་བྱས་པའི་གནས་ཚུལ་ཐོན་སྟབས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དགའ་བསུ་ཞུས་པ་དང་འབྲེལ་རྒྱ་ནག་གཞུང་གི་ངོས་ནས་རྒྱལ་ཚོགས་ཀྱི་ཁྱད་ལས་རྟོག་སྡེ་ཁག་དགོས་འདུན་རྣམས་བསྒྲུབ་དགོས་པ་མ་ཟད་དེ་བཞིན་རྒྱ་གཞུང་ནས་བོད་བརྒྱུད་ནང་བསྟན་ཆོས་ཕྱོགས་ཀྱི་གནང་སྒོ་ཁག་དང། ལོ་རྒྱུས་ཡུན་རིང་ལྡན་པའི་ཆོས་ཕྱོགས་ཀྱི་ལྟེ་གནས་དང་ལམ་སྲོལ་ཐོག་ཐེ་བྱུས་བྱེད་བཞིན་པའི་བྱ་སྤྱོད་ཁག་འཕྲལ་མར་མཚམས་འཇོག་དགོས་པའི་ནན་སྐུལ་གནང་འདུག

བྱང་ཨར་ལན་ཌི་དང་ཨིན་ཡུལ་གཞུང་གཉིས་དབར་ཞི་བའི་ཆིངས་ཡིག་བཞག་སྟེ་ཕྱོགས་གཉིས་ཀྱི་ལོ་ངོ་བཅུ་ཕྲག་འགའི་དཀའ་ངལ་རྣམས་སེལ་མཁན་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ John Hume མཆོག་ཁ་སང་ཟླ་ ༨ ཚེས་ ༣ ཉིན་ སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུན་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་དམ་པ་ཁོང་གི་སྐུ་ཟླ་ Patricia Hume མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་འདུགདེའང་དགུང་གྲངས་ ༨༣ ཐོག་སྐུ་ཚེའི་འཕེན་པ་རྫོགས་པའི་སྐུ་ཞབས་ John Hume མཆོག་ཡུན་རིང་ནད་མནར་རྗེས་ཁ་སང་བྱང་ Ireland ཁུལ་གྱི་ Londonderry གྲོང་ཁྱེར་གྱི་སྨན་ཁང་དུ་སྐུ་ཚེའི་འཕེན་པ་རྫོགས་འདུག ཁོང་ནི་དེ་སྔ་ Ireland ཁུལ་དུ་ནང་འཁྲུག་སྐབས་སུ་གྲོས་མོལ་དང་འགྲིག་འཇགས་ཀྱི་ཐོག་ནས་ངལ་བ་དག་སེལ་མཁན་ཞིག་ཡིན་སྟབས། ཕྱི་ལོ་ ༡༩༩༨ ལོར་ Good Friday Deal ཞེས་དམ་པ་དེ་ཉིད་ནས་སྣེ་ཁྲིད་དེ་བྱང་ཨར་ལན་ཌི་དང་ཨིན་ཡུལ་གཞུང་གཉིས་དབར་ཞི་བའི་ཆིངས་ཡིག་བཞག་སྟེ་ཕྱོགས་གཉིས་ཀྱི་ལོ་ངོ་བཅུ་ཕྲག་འགའི་དཀའ་ངལ་རྣམས་སེལ་ཐུབ་པ་བྱུང་བར་བརྟེན་ལོ་དེར་ཁོང་ལ་ནོ་བེལ་ཞི་བདེའི་གཟེངས་རྟགས་ཀྱང་འབུལ་བཞེས་གནང་མྱོང་ཡོད་པ་རེད། དམ་པ་ཁོང་དགོངས་པ་རྫོགས་པའི་གནས་ཚུལ་གསན་པ་དང་འབྲེལ་དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་གི་ཤུལ་ལུས་སྐུ་འཁོར་ཡོངས་ལ་ཐུགས་གསོའི་གསུང་འཕྲིན་ཞིག་བསྩལ་འདུག་པའི་ནང་།  མགོན་པོ་མཆོག་དེ་སྔ་བྱང་ Ireland ནང་དུ་ཐེངས་ཁ་ཤས་ཆིབས་བསྒྱུར་མཛད་མྱོང་ཡོད་པ་དང་། སྐབས་དེ་དུས་སྐུ་ཞབས་ John Hume དམ་པ་ཁོང་དང་མཇལ་འཕྲད་མཛད་རྒྱུའི་གོ་སྐབས་བྱུང་ཡོད་སྐོར་བཀའ་བསྩལ་དང་སྦྲགས། ཁོང་ནི་གྲོས་མོལ་དང་འགྲིག་འཇགས་ཀྱི་ཐོག་ནས་རྩོད་རྙོག་གི་ངལ་བ་སེལ་རྒྱུའི་ནུས་པར་ཡིད་ཆེས་དང་ཆོད་སེམས་བརྟན་པོ་གནང་མཁན་ཞིག་ཡིན་པ་དང་། ཁོང་གིས་དབུ་ཁྲིད་དང་གྲོས་མོལ་གྱི་ནུས་པར་ཡིད་ཆེས་ལྷད་མེད་གནང་བ་དེས་དེ་སྔ་ Good Friday Agreement ལྟ་བུའི་ལོ་རྒྱུས་ཀྱི་རང་བཞིན་ལྡན་པའི་གྲོས་མཐུན་དེ་འཇོག་ཐུབ་པ་བྱུང་ཡོད་སྐོར་བཀའ་བསྩལ་འདུག ༸གོང་ས་མཆོག་གིས་ད་དུང་དམ་པ་དེ་ཉིད་ཀྱིས་དོན་དངོས་ཐོག་མི་ཚེ་དོན་དང་ལྡན་པ་བསྐྱལ་ཡོད་པར་བཀའ་བསྩལ་བ་དང་ཁོང་གི་ཆོད་སེམས་དང་ཕྱག་ལས་གཡོ་བ་མེད་པར་གནང་བ་དེ་ང་ཚོའི་དམིག་དཔེ་འོས་པ་ཞིག་ཆགས་ཡོད་པ་མ་ཟད། དཀའ་ངལ་དང་རྙོག་གྲ་ཇི་ཙམ་ཡོད་ཀྱང་ཞི་བདེ་དང་གྲོས་མོལ་གྱི་ལམ་ནས་སེལ་རྒྱུ་ཡོད་པར་གཙིགས་ཆེར་ངོས་བཞེས་གནང་དོན་ལྟར་དེ་དག་མུ་མཐུད་ནས་གནས་རྒྱུ་ཡིན་པ་བཀའ་བསྩལ་འདུག སྐུ་ཞབས་ John Hume མཆོག་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་འབྲེལ། ཨིན་ཡུལ་གྱི་སྲིད་བློན་ལས་ཟུར་དང་ཨ་རིའི་སྲིད་འཛིན་ཟུར་སྐུ་ཞབས་པ་ Bill Clinton མཆོག་སོགས་ཨིན་ཡུལ་དང་རྒྱལ་སྤྱིའི་དབུ་ཁྲིད་མང་དག་ཅིག་ནས་ཁོང་གི་མཛད་རྗེས་ལ་ཆེ་བསྟོད་དང་འབྲེལ། སྐུ་ཚེའི་འཕེན་པ་རྫོགས་པར་ཆེས་ཐུགས་ཕམ་གནང་བཞིན་འདུག

ཁ་སང་། འདི་གའི་རླུང་འཕྲིན་ཁང་ལ་མིང་བརྗོད་འདོད་མེད་པའི་་མི་སྣ་ཞིག་གིས་བོད་ནང་གི་གནས་ཚུལ་མཁོ་སྤྲོད་བྱས་པ་ལྟར་ན།   རྒྱ་ནག་དམར་ཤོག་གཞུང་གི་དབང་འཛིན་ལས་ཁུངས་ཀྱིས་ལོ་ཤས་གོང་ནས་བཟུང་བོད་རིགས་ས་ཁུལ་དུ་རང་བསྲེགས་ངོ་རྒོལ་ལ་ཉེས་ཆད་གཅོད་རྒྱུའི་རྩ་འཛིན་གྱི་དེབ་ཆུང་ཞིག་འགྲེམས་སྤེལ་གྱིས།  བོད་རིགས་མང་ཚོགས་ལ་གལ་ཏེ་རང་བསྲེགས་གཏོང་བ་དང་། རང་བསྲེགས་གཏོང་མཁན་ལ་གཞོགས་འདེགས་བྱེད་པ། ཡང་ན་རང་བསྲེགས་གཏོང་མཁན་གྱི་པར་རིས་དང་བརྙན་སོགས་གནས་ཚུལ་ཕྱི་ལོགས་སུ་བརྒྱུད་བསྒྲགས་བྱེད་པ་སོགས་ཀྱི་གནས་ཚུལ་ཤེས་རྟོགས་བྱུང་ན་ཆད་པ་གཅོད་རྒྱུ་སོགས་འཁོད་ཡོད་པ་ངོ་སྤྲོད་ཀྱིས། རྒྱ་ནག་གི་བསྒྲགས་ཡིིག་དེའི་དམིགས་ཡུལ་ནི་བོད་མི་མང་ཚོགས་ལ་འཇིགས་སྐུལ་གྱིས་རང་བསྲེགས་དང་རྔམ་སྟོན་བྱེད་པའི་བྱ་སྤྱོད་ལ་རྡུང་རྡེག་བྱེད་རྒྱུ་དེ་ཡིན་པར་མངོན་གསལ་གནང་ཡོད།གནས་ཚུལ་མཁོ་སྤྲོད་པས་འདི་གར་བཏང་བའི་རྒྱ་ནག་གིས་རང་བསྲེགས་པར་འཇིགས་སྐུལ་གྱི་དེབ་ཆུང་གི་མིང་ལ་༼ ཁྲིམས་ལུགས་ཀྱི་འདུ་ཤེས་ཇེ་དྲག་ཏུ་བཏང་ནས་སྤྱི་ཚོགས་བརྟན་འཇགས་སྲུང་སྐྱོབ་བྱ་དགོས། ༽ཞེས་འཁོད་འདུག  སྤྱི་ལོ་༢༠༡༥ ལོར་རྒྱ་ནག་དམར་ཤོག་གཞུང་གིས་བོད་ཨ་མདོ་མཚོ་སྔོན་ཁུལ་དུ་ཞིང་འབྲོག་མང་ཚོགས་ལ་དཔེ་དེབ་དེ་མཁོ་སྤྲོད་བྱས་ཡོད་པ་དང་།  དེའི་ནང་དུ་རྐང་བཙུགས་ནས་མི་གསོད་པའི་ཚོགས་པ་དང་ལྐོག་འབྲེལ་བྱེད་པ་དང་། རྒྱ་ནག་གི་ཕྱི་རོལ་དུ་རང་བསྲེགས་མི་སྣའི་འདྲ་པར་དང་བརྙན་རིས་ཀྱི་གནས་ཚུལ་བརྒྱུད་སྤྲོད་བྱེད་པ་དེ་ནི་རྒྱ་ནག་གི་ཉེས་ཁྲིམས་ཀྱི་དོན་ཚན་༣༢༣ ནང་གཏན་འབེབས་བྱས་པ་ལྟར། རྐང་བཙུགས་ནས་མི་བསད་པའི་གྱོད་དོན་གྱི་ནག་ཉེས་སུ་ངོས་འཛིན་བྱེད་རྒྱུ་ཡིན་པར་འཁོད་ཡོད་འདུག གནས་ཚུལ་མཁོ་སྤྲོད་པས།  རྒྱ་ནག་གིས་བོད་ཁུལ་དུ་རང་བསྲེགས་དང་འབྲེལ་བའི་ཉེས་དོན་གྱི་དཔེ་དེབ་དེ་འགྲེམས་སྤེལ་བྱས་པ་དེ་ནི་རྒྱ་ནག་གིས་བོད་མིས་རྔམ་སྟོན་དང་རང་བསྲེགས་ལ་གཞོགས་འདེགས་བྱེད་པ། དེ་བཞིན་ཕྱི་ཕྱོགས་སུ་རང་བསྲེགས་ཀྱི་གནས་ཚུལ་མཁོ་སྤྲོད་བྱེད་བཞིན་པའི་མི་སྣ་ལ་ཉེས་འཛུགས་བྱ་ཐབས་གསར་ཤོས་ཤིག་ཡིན་པར་ངོ་སྤྲོད་ཀྱིས།  གཙོ་བོ་བོད་མི་རྣམས་ཀྱིས་རང་བསྲེགས་ཀྱི་ལས་འགུལ་དེ་མཇུག་སྒྲིལ་ཐབས་སུ་འཇིགས་སྐུལ་བྱས་པ་ཞིག་ཡིན་པར་ངོ་སྤྲོད་གནང་ཡོད།གཞི་རྩའི་ཉེ་བའི་ལོ་འགའི་རིང་ནས་བཟུང་།  རྒྱ་ནག་གིས་བོད་ཁུལ་དུ་བོད་མི་རང་ལུས་མེར་བསྲེགས་གཏོང་མཁན་རྣམས་ལ་ལྟ་རྟོག་ནན་པོ་བྱེད་བཞིན་པར་བརྟེན། རང་བསྲེགས་ཀྱི་གནད་དོན་མང་པོ་ཞིག་དུས་ཐོག་ཏུ་ཕྱི་ལོགས་སུ་མཁོ་སྤྲོད་བྱེད་རྒྱུར་དམ་དྲག་སྔར་ལྷག་བྱེད་བཞིན་ཡོད་པ་རེད། དཔེར་ན་བོད་ཨ་མདོ་རྔ་བ་ནས་ཡིན་པའི་བོད་མི་རྡོ་རྗེ་ཡིས་ཕྱི་ལོ ༢༠༡༢ ལོའི་ཟླ་ ༣ པའི་ཚེས་༥  ཉིན་རྒྱ་ནག་དམར་ཤོག་སྲིད་གཞུང་ལ་ངོ་རྒོལ་གྱིས་རང་བསྲེགས་གནང་སྟེ་དེ་གར་སྐུ་གྲོངས་ཡོད་པའི་གནས་ཚུལ་ཐོན་ཡོད་ནའང་།  སྔར་ལོ་བར་དུ་ཁོང་གི་འདྲ་པར་ཕྱི་ལོགས་སུ་མཁོ་འདོན་བྱེད་ཐུབ་མེད་པ་རེད།གཞི་རྩའི་རྒྱ་ནག་དམར་ཤོག་གཞུང་གིས་ཁྲིམས་འགལ་གྱིས་བོད་ས་བཙན་བཟུང་བྱས་པ་མ་ཟད། ད་དུང་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་བ་དང་ཆབས་ཅིག་བོད་ཁུལ་དུ་རང་བྱུང་ཐོན་ཁུངས་སྔོག་འདོན་ཤུགས་ཆེར་བྱས་ཏེ་སྐྱེ་ཁམས་ཁོར་ཡུག་ལ་གནོད་སྐྱོན་ཚབས་ཆེན་བཟོ་བཞིན་པར་བརྟེན།  བོད་མི་རྣམས་ཀྱིས་རྒྱ་ནག་གི་བྱེད་བབ་དེར་ཉིན་རེ་ནས་ཉིན་རེར་སྡང་སེམས་ཇེ་ཆེར་འགྲོ་བཞིན་ཡོད་ཀྱང་། ༸བོད་མིའི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་རིན་པོ་ཆེ་མཆོག་གིས་དུས་དང་རྣམ་པ་རྣམ་ཀུན་དུ་བོད་མིའི་འཐབ་རྩོད་ཀྱི་ཁྲོད་དུ་འཚེ་མེད་ཞུ་བའི་ལྟ་གྲུབ་ཕྱག་བསྟར་གནང་དགོས་བའི་བཀའ་སློབ་ལམ་སྟོན་གནང་གི་ཡོད་པར་བརྟེན། བོད་མི་རྣམས་ཀྱིས་རྒྱ་ནག་གི་གཉའ་གནོན་འོག་ཏུ་གཞན་ལ་འཚེ་བའི་ལས་མི་རྩོམ་པར་རང་ཉིད་ཀྱི་ཚེ་སྲོག་མེ་ལ་སྒྲོན་ནས་རྒྱ་ནག་གི་དབང་བསྒྱུར་ལ་ངོས་ལེན་མེད་པའི་རྣམ་འགྱུར་སྟོན་གྱི་ཡོད་པ་རེད།