རྒྱལ་སྤྱི།

བོད་ཀྱི་གློག་བརྙན་སྒྲིག་སྦྱོར་བ་དང་འཁྲབ་གཞུང་རྩོམ་པ་པོ་པདྨ་མ་ཚེ་བརྟན་ལགས་ཀྱི་གློག་བརྙན་དབུགས་ལྒང་ཞེས་པ་དེ་རྒྱལ་སྤྱིའི་གློག་བརྙན་དུས་སྟོན་རྙིང་གྲས་ Venice གློག་བརྙན་དུས་སྟོན་ཐེངས་ ༧༦ ཐོག་གཟིགས་འབུལ་ཞུ་རྒྱུ་རེད་འདུག པདྨ་ཚེ་བརྟན་ལགས་ནི་མཚོ་སྔོན་དུ་སྐྱེས་པ་དང་། སློབ་གྲྭ་ཆེ་འབྲིང་ཆུང་གསུམ་བརྒྱུད་ནས་སློབ་མཐར་ཕྱིན་རྗེས་བོད་ཁུལ་དུ་དགེ་རྒན་གྱི་ཕྱག་ལས་གནང་ཞིང་། ཕྱིས་སུ་སླར་རྒྱ་ནག་གི་རྒྱལ་ས་པེ་ཅིན་དུ་གློག་བརྙན་ཕབ་སྐྲུན་ཐོག་སློབ་སྦྱོང་གནང་ནས་སློབ་མཐར་སོན་རྗེས་རིམ་བཞིན་བོད་ཀྱི་རིག་གཞུང་དང་ཡུལ་ལུང་སོགས་མཚོན་པའི་གློག་བརྙན་ཆེད་བཟོའི་ཐོག་ཞུགས་ཏེ་ད་ཆ་རྒྱལ་སྤྱིའི་སྟེང་སྐད་གྲགས་ཡོད་པའི་བོད་ཀྱི་གློག་བརྙན་འཁྲབ་ཁྲིད་པ་ཐོག་མ་དེ་ཆགས་ཡོད་པ་མ་ཟད། ཁོང་གི་གློག་བརྙན་ལྷིང་འཇགས་ཀྱི་མ་ཎི་རྡོ་འབུམ་དང་འཚོལ། ཁྱི་རྒན། དེ་བཞིན་ཐར་ལོ་དང་ལག་དམར་སོགས་ལ་འཛམ་གླིང་གི་གློག་བརྙན་དུས་སྟོན་མང་པོའི་ཐོག་བྱ་དགའ་མི་ཉུང་བ་ཐོབ་ཡོད་པ་རེད།  ཐེངས་འདིའི་གློག་བརྙན་དབུགས་ལྒང་ཞེས་པའི་གློག་བརྙན་དེ་ནི་བོད་མིའི་ཕལ་པའི་ཁྱིམ་ཚང་ཞིག་གི་ནང་འཁྲིག་སྤྱོད་ཀྱི་སྲུང་ཤུབས་ཤིག་ཕྱི་ལ་ཐོན་རྗེས། ཁྱིམ་མི་ཕན་ཚུན་ངོ་ཚ་ཞིང་དོགས་པའི་རང་བཞིན་ཅན་གྱི་བསམ་བློ་མང་པོ་འཁོར་ཡོད་པ་མངོན་པར་གནང་སྟེ་བོད་མིའི་ཉིན་རེའི་འཚོ་བའི་ཁྲོད་ཀྱི་གནའ་དེང་ཟུང་གི་འགལ་འདུའམ། སྲོལ་རྒྱུན་གྱི་ཆོས་ལུགས་ཀྱི་ཡིད་ཆེས་དང་དེང་རབས་ཀྱི་འཚོ་བ་གཉིས་གཞི་གཅིག་ཏུ་འདྲིས་བས་རང་བཞིན་གྱིས་བསམ་བློའི་དཔུང་འཇུག་བྱེད་སྟངས་ཁྲོད་ཀྱི་གདོང་ལེན་བྱེད་དགོས་པ་མང་པོ་ཞིག་ཡོད་པ་མཚོན་པར་གནང་ཡོད་པའི་གློག་བརྙན་ཞིག་ཡིན་པ་འགྲེལ་བརྗོད་གནང་འདུག   གཞི་རྩའི་ Venice རྒྱལ་སྤྱིའི་གློག་བརྙན་དུས་སྟོན་དེ་ནི་ཕྱི་ལོ་ ༡༩༣༢ ལོར་ཡོ་རོབ་ཀྱི་རྒྱལ་ཁབ་ Italy ནང་འགོ་འཛུགས་གནང་བ་ཞིག་ཡིན་པ་དང། ཕྱི་ཟླ་ ༨  ཚེས་ ༢༨ ནས་ཟླ་ ༩  ཚེས་༧ བར་འཚོགས་གཏན་འཁེལ་བ་ལྟར། ཐེངས་འདིའི་དུས་སྟོན་དེ་ནི་དུས་སྟོན་ཐེངས་ ༧༦ པ་ཆགས་ཀྱི་ཡོད་པ་རེད། པདྨ་ཚེ་བརྟན་ལགས་ཀྱི་གློག་བརྙན་ཐར་ལོ་དང་ལག་དམར་གཉིས་ཀྱང་ Venice རྒྱལ་སྤྱིའི་གློག་བརྙན་དུས་སྟོན་སྐབས་གཉིས་ལ་བདམས་ཐོན་བྱུང་བ་བཞིན་གཟིགས་འབུལ་ཞུས་པ་མ་ཟད། སྔ་ལོའི་དུས་སྟོན་ཐོག་ལག་དམར་གློག་བརྙན་ལ་རྩེ་ཕུད་ཀྱི་བྱ་དགའ་ཐོབ་ཡོད་པ་རེད། ཉེ་སྔོན་ཟླ་བ་འདིའི་ཚེས་ ༡༠ ཉིན་པད་མ་ཚེ་བརྟེན་ལགས་ཧོང་ཀོང་གི་གློག་བརྙན་དུས་སྟོན་ཞིག་ལ་འཛུལ་བཞུགས་གནང་སྐབས་རྒྱ་ནག་ལྷོ་རྒྱུད་ཀྱི་ཞོགས་པའི་ཆ་འཕྲིན་གྱིས་རྒྱ་ནག་ནང་བོད་ཀྱི་རིག་གཞུང་དེ་ཚོར་བ་རྣོ་བའི་གནད་དོན་ཞིག་ཆགས་ཡོད་ཀྱང་། ཁྱེད་ཀྱིས་རང་ཉིད་ཀྱི་གློག་བརྙན་དྲུག་དེ་རྒྱ་ནག་གི་བཀག་སྡོམ་ལས་ཆོག་མཆན་ཇི་ལྟར་ཐོབ་ཡོད་སྐོར་བཀའ་འདྲི་ཞུས་པར་སྔོན་ཆད་ཁོང་གིས་བོད་ཀྱི་རིག་གཞུང་གི་རྨང་གཞིའི་ཐོག་ནས་གློག་བརྙན་མང་པོ་ཞིག་སྒྲིག་སྦྱོར་གནང་རྒྱུ་ཡོད་པར་སེམས་ནའང་། རྗེས་སུ་རྒྱ་ནག་ནང་གི་བཀག་སྡོམ་སྐོར་ལ་ཤེས་རྟོགས་གནང་ཚེ་བརྗོད་བྱ་མང་པོ་ཞིག་ལྷག་མི་འདུག་ཅེས་ལན་འདེབས་གནང་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་དབྱིན་ཡུལ་གྱི་སྲིད་བློན་གསར་པར་འོས་འདེམས་བསྐོ་གཞག་བྱུང་བའི་སྐུ་ཞབས་ Boris Johnson མཆོག་ལ་དགའ་བསུའི་འཚམས་འཕྲིན་བསྩལ་བ་དང་འབྲེལ། སྲིད་བློན་གསར་པའི་ལས་དོན་མཐའ་དག་ལམ་ལྷོང་ཡོང་བའི་ཐུགས་སྨོན་བསྩལ་བའི་ཁྲོད་འདིར་ཁ་སང་ Hong Kong free Press ཞེས་པའི་གསར་ལམ་ཐོག་འབྲེལ་ཡོད་དཔྱད་གཏམ་ཞིག་སྤེལ་བའི་ནང་དབྱིན་ཡུལ་རྒྱལ་ཁབ་ནས་རྒྱ་ནག་གི་དབང་ཤུགས་ལས་རང་དབང་འདོད་ཀྱི་ཡོད་ཚེ་སྲིད་བློན་གསར་པ་སྐུ་ཞབས་ Boris Johnson མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ངེས་པར་དུ་ཞུ་དགོས་ཞེས་བཀོད་འདུག དེའང་རྒྱུན་དུ་རྒྱ་ནག་དང་ཧོང་ཀོང་དབར་གྱི་འབྲེལ་ལམ་སོགས་ཀྱི་གནད་དོན་ཐོག་དཔྱད་ཞིབ་གནང་མཁན་Gray Sergaent ལགས་ཀྱིས་དམིགས་བསལ་དཔྱད་གཏམ་ཞིག་སྤེལ་བའི་ནང་དེ་སྔ་དབྱིན་ཡུལ་གྱི་རྩོམ་པ་པོ་གྲགས་ཅན་ Edward Lucas ལགས་ཀྱིས་ཁོང་གི་བརྩམས་ཆོས་ཀློག་པ་པོ་རྣམས་ལ་རང་ཉིད་རང་དབང་ལྡན་པའི་རྒྱལ་ཁབ་ཅིག་གི་ནང་གནས་སྡོད་བྱེད་ཀྱི་ཡོད་མིན་གྱི་དྲི་བ་ཞིག་བཏང་བ་ལུང་འདྲེན་དང་འབྲེལ། གལ་ཏེ་ཁྱེད་ཚོའི་སྲིད་དོན་པ་རྣམས་ནས་༸གོང་ས་མཆོག་ལ་མཇལ་ཁ་ཞུ་རྒྱུའི་རང་དབང་མེད་ཚེ་རྒྱལ་ཁབ་གང་རུང་དེ་རང་དབང་ཅན་ཞིག་མིན་པ་རང་བཞིན་གྱིས་མངོན་གསལ་ཐུབ་ཀྱི་རེད་ཅེས་གསུངས་པ་དང་ཆབས་ཅིག དབྱིན་གྱི་སྲིད་བློན་ཟུར་པ་ལྕམ་སྐུ་ Theresa May མཆོག་ནི་སྐུ་ཞབས་སྲིད་བློན་ཟར་པ་ John Major ལགས་ཀྱི་རྗེས་༸གོང་ས་མཆོག་དང་ལྷན་མཇལ་འཕྲད་མ་ཞུ་མཁན་གྱི་སྲིད་བློན་ཐོག་མ་དེ་ཆགས་ཡོད་པ་གསུངས་འདུག དཔྱད་གཏམ་དེའི་ནང་ད་དུང་སྤྱིར་རྒྱལ་ཁབ་ཅིག་གི་དབུ་འཁྲིད་དང་༸གོང་ས་མཆོག་རྣམ་གཉིས་དབར་མཇལ་མོལ་གྱི་གནད་དོན་དེ་ནི་རྒྱ་ནག་གི་དྲག་པོའི་དབང་སྒྱུར་འོག་གནས་པའི་བོད་ནང་གི་བོད་མི་ཚོར་གདུང་སེམས་མཉམ་བསྐྱེད་མཚོན་པ་ཁོ་ན་མ་ཡིན་པར་རྒྱ་ནག་གི་འགོ་ཁྲིད་ཚོ་ལའང་བོད་ཀྱི་གནས་བབ་དེ་ ༡༩༥༠ ལྔ་གྲངས་བཞིན་ད་ལྟའང་སེལ་མ་ཐུབ་པར་དེ་མུར་ལྷག་ཡོད་པ་མངོན་གསལ་གནང་རྒྱུའི་མཚོན་དོན་གལ་ཆེ་ཞིག་ཡིན་པར་འགྲེལ་བརྗོད་གནང་བ་མ་ཟད། ལྕམ་སྐུ་ Teresa མཆོག་གིས་༸གོང་ས་མཆོག་གི་༸སྐུའི་འཕྲོད་བཞེས་ཀྱི་གནས་བབ་དང་ད་སྐབས་མགོན་པོ་༸གང་ཉིད་མཆོག་གི་མཛད་འཕྲིན་ཉུང་དུ་ཕྱིན་པ་སོགས་ཀྱི་རྒྱུ་མཚན་དུ་མ་ཞིག་བགྲང་ནའང། དོན་དམ་པར་ཁོང་གིས་ད་བར་༸གོང་ས་མཆོག་དང་ལྷན་མཇལ་འཕྲད་མ་ཞུ་པའི་རྒྱུ་མཚན་གཙོ་བོ་དེ་རྒྱ་ནག་གི་དཔལ་འབྱོར་སྟོབས་ཤུགས་དང་འབྲེལ་བ་ཡོད་པ་ཞིག་རེད་ཅེས་སྐྱོན་བརྗོད་གནང་འདུག དབྱིན་ཡུལ་གྱི་སྲིད་བློན་རིམ་པས་འདས་པའི་ལོ་ཤས་ནས་བོད་ཀྱི་གནད་དོན་ཐོག་བཞེངས་ཕྱོགས་མཁྲེགས་པོ་ཞིག་བཟུང་ཐུབ་མེད་པར་སྐྱོན་བརྗོད་གནང་དང་འབྲེལ། ཕྱི་ལོ་ ༡༩༩༡ ལོར་ཨ་རིའི་སྲིད་འཛིན་ལས་ཐོག་ཞིག་གིས་༸གོང་ས་མཆོག་དང་ལྷན་མཇལ་མོལ་ཐེངས་དང་པོ་ཞུས་པ་ནས་བཟུང་ད་བར་ Trump མ་གཏོགས་ཨ་རིའི་སྲིད་འཛིན་རིམ་པས་༸གང་ཉིད་མཆོག་ལ་མཇལ་ཁ་ཞུས་ཡོད་པ་འགྲེལ་བརྗོད་གནང་སྟེ། གལ་ཏེ་དབྱིན་ཡུལ་གྱི་སྲིད་བློན་གསར་པས་ལྕམ་ Theresa May མཆོག་གི་གནས་སྟངས་ལྟར་༸གོང་ས་མཆོག་ལ་མཇལ་ཁ་མ་ཞུས་པ་རེད། མ་འོངས་པར་དེ་ལམ་སྲོལ་ཞིག་ཆགས་ཉེན་ཡོད་པར་འགྲེལ་བརྗོད་དང་ཆབས་ཅིག གང་ལྟར་སྲིད་བློན་ Boros Johnson མཆོག་གིས་རང་ཉིད་ཀྱི་རྒྱལ་ཁབ་འདི་བཞིན་རྒྱ་ནག་གི་དབང་ཤུགས་འོག་མ་ལྷུང་བར་རང་དབང་ཅན་གྱི་རྒྱལ་ཁབ་ཞིག་བསྐྲུན་འདོད་ཡོད་ཚེ་ཁོང་ནས་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་ངེས་པར་དུ་མཇལ་འཕྲད་ཞུས་ཏེ་རང་དབང་ཅན་གྱི་དབུ་ཁྲིད་ཅིག་གི་རྣམ་པ་མཚོན་ཐུབ་པ་གནང་དགོས་ཞེས་གསུངས་འདུག གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་ཚེས་ ༢༥ ཉིན་སྐུ་ཞབས་ Boris Johnson མཆོག་དབྱིན་ཡུལ་གྱི་སྲིད་བློན་གསར་པར་འོས་འདེམས་བྱུང་བར་དགའ་བསུའི་འཚམས་འཕྲིན་བསྩལ་ནས་བོད་མིར་བློ་ཐག་ཉེ་བའི་དབྱིན་ཡུལ་གྱི་མཛའ་གྲོགས་དག་གིས་བོད་མིའི་གཞི་རྩའི་རང་དབང་དང་མཚན་མཐོང་ལ་སྨན་པའི་རྒྱབ་སྐྱོརཤུགས་ཆེ་དང་ཧ་ཅང་དགའ་མོས་གནང་དང་གནང་བཞིན་པར་བསྔགས་བརྗོད་མཛད་པ་དང་ཆབས་ཅིག་ཏུ་ལོ་རྒྱུས་ཐོག་བོད་དང་དབྱིན་ཡུལ་དབར་ཡུན་རིང་ནས་འབྲེལ་བ་དམིགས་བསལ་ཞིག་ཡོད་པ་ལྟར། དུས་ད་ལྟའང་ང་ཚོ་དང་དེ་སྔ་ཕྱི་ལོ་ ༡༩༥༩ གོང་བོད་ནང་ཕྱག་ལས་གནང་མྱོང་མཁན་གྱི་ཨིན་ཇིའི་གཞུང་ཞབས་པ་ཚོའི་ནང་མིའི་དབར་མཛའ་བརྩེའི་འབྲེལ་བ་རྒྱུན་སྐྱོང་བྱེད་བཞིན་ཡོད་ཅེས་བཀའ་བསྩལ་ཡོད་པ་རེད། ༸གོང་ས་མཆོག་གིས་ད་དུང་དབྱིན་ཡུལ་དེ་ཡོ་རོབ་མཐུན་ཚོགས་ཀྱི་སྒྲིག་འཛུགས་ནས་ཕྱིར་འཐེན་གནང་བཞིན་པའི་གནད་དོན་དང་འབྲེལ་བའི་ཐད་༸གང་ཉིད་མཆོག་ནས་དགོངས་ཚུལ་ཇི་ཡོད་བསྩལ་ཟིན་སྐོར་བཀའ་བསྩལ་དང་སྦྲགས། མགོན་པོ་མཆོག་ནི་ཡུན་རིང་ནས་རྒྱལ་ཁབ་སོ་སོའི་སྒེར་གྱི་ཁེ་ཕན་ལས་སྤྱིའི་སྒྲིག་འཛུགས་དེ་གལ་ཆེ་བར་རྩིས་ཏེ་སྒྲིག་འཛུགས་དེ་འདྲ་ཞིག་གསར་འཛུགས་གནང་ཐུབ་པའི་ཡོ་རོབ་སྤྱི་མཐུན་ཚོགས་པའི་སྒྲིག་འཛུགས་སམ་སྒྲོམ་གཞིར་རྒྱབ་སྐྱོར་དང་ཡི་རངས་བསྔགས་བརྗོད་མཛད་མཁན་ཞིག་ཡིན་པ་དེ་ལྟར་ཡང་། ཕྱི་ལོ་ ༢༠༡༦ ལོར་དབྱིན་ཡུལ་ནང་རྒྱལ་ཡོངས་འོས་བསྡུ་ཆེན་མོ་གནང་བ་ལྟར་སྐབས་དེར་ཨིན་ཡུལ་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་ནས་ཕྱིར་འཐེན་གནང་རྒྱུའི་མང་ཚོགས་ཀྱི་དགོངས་ཚུལ་བསྡུ་ལེན་གནང་སྟེ་ཐག་གཅོད་གནང་བ་དེར་༸གོང་ས་མཆོག་ནས་གུས་བརྩི་ཡོད་སྐོར་བཀའ་བསྩལ་འདུག མཐར་མགོན་པོ་༸གང་ཉིད་མཆོག་གིས་དབྱིན་ཡུལ་དེ་བཞིན་ཡུ་རོབ་སྤྱི་མཐུན་ཚོགས་པའི་སྒྲོམ་གཞི་ནས་ཕྱིར་ཐོན་པའི་མཇུག་འབྲས་གང་ཡོང་མིན་ལ་ལྟོས་མེད་དབྱིན་ཡུལ་དེ་མུ་མཐུད་གཅིག་ལ་གཅིག་བརྟེན་གྱི་འཛམ་གླིང་འདིིའི་ནང་གཞན་ལ་བཟང་པོའི་ཤུགས་རྐྱེན་འཇོག་ཐུབ་མཁན་གྱི་རྒྱལ་ཁབ་ཅིག་འགྱུར་བའི་ཐུགས་རེ་ཡོད་སྐོར་བཀའ་སྩལ་བ་དང་ཆབས་ཅིག དབྱིན་ཡུལ་གྱི་སྲིད་འཛིན་གསར་པ་མཆོག་གི་ལས་དོན་མཐའ་དག་ལམ་ལྷོང་ཡོང་བའི་ཐུགས་སྨོན་བཅས་མཛད་འདུག

ལྷོ་ཨ་ཕི་རི་ཀའི་(IFP) འམ་Inkatha རང་དབང་ཚོགས་པའི་འཐུས་མི་སྐུ་ཞབས་ Mkhuleko Hlengwa ལགས་ཀྱིས་དེ་གའི་རྒྱལ་ཁབ་ནས་འགྲོ་བ་མིའི་རིན་ཐང་ལ་དོ་ཕོག་མ་བཏང་བའི་སྒོ་ནས་རྒྱ་ནག་དང་ཚོང་འབྲེལ་འཇོག་ཐུབ་རྒྱུ་ཡིན་པ་གསུངས་འདུག དེ་ཡང་ཟླ་བ་འདིའི་ཚེས་ ༡༡ ཉིན་གྲོས་ཚོགས་འོག་མ་དང་ Inkatha རང་དབང་ཚོགས་པའི་འཐུས་མི་སྐུ་ཞབས་ Mkhuleko Hlengwa ལགས་ཀྱིས་དེ་གའི་གྲོས་ཚོགས་སུ་ཕྱི་འབྲེལ་དང་མཉམ་འབྲེལ་གྱི་ཚོགས་དུས་ཐོག་བོད་བཟོའི་སྟོད་གོས་དཀར་པོ་ཞིག་སྤྲས་པའི་ཐོག   ཉེ་ལམ་ཁོང་ལྷོ་ཨ་ཕི་རི་ཀའི་གྲོང་ཁྱེར་Pretoria ནང་རྟེན་གཞི་བྱས་པའི་ལྷོ་ཨ་ཕི་རི་ཀའི་བོད་ཀྱི་སྐུ་ཚབ་དོན་ཁང་ནས་༸གོང་ས་མཆོག་གི་འཁྲུངས་སྐར་སྲུང་བརྩིའི་དུས་སྟོན་གོ་སྒྲིག་གནང་བའི་ཐོག་མཉམ་ཞུགས་གནང་རྒྱུའི་གོ་སྐབས་བྱུང་བ་དང་སྦྲགས།  ད་ཆ་གྱོན་པའི་སྟོད་གོས་དེ་སྐབས་དེའི་དུས་བྱུང་བས།  དེས་ལྷོ་ཨ་ཕི་རི་ཀ་དེ་རང་དབང་ལྡན་པའི་རྒྱལ་ཁབ་ཞིག་ཡིན་པའི་ཁར་གཞན་གྱི་དྲག་གནོན་འོག་ལྷུང་བའི་མི་རིགས་དག་ལ་སྐྱབས་བཅོལ་གྱི་རོགས་རམ་སྤྲོད་དགོས་པ་དང་།    འགྲོ་བ་མིའི་ཐོབ་ཐང་གི་གནད་དོན་ཐད་སྣང་མེད་གཏོང་རྒྱུ་མེད་པ་དྲན་སྐུལ་གནང་གི་ཡོད་པ་གསུངས་འདུག   དེ་བཞིན་ཁོང་གིས་ང་ཚོའི་རྒྱལ་ཁབ་གཞན་གྱི་གནད་དོན་ཐོག་གྲོས་བསྡུར་བྱས་བ་བཞིན་རྒྱ་ནག་ལྟ་བུའི་ཆེས་ཐུབ་ཚོད་གཏོང་མཁན་གྱི་སྐོར་ལའང་གྲོས་བསྡུར་དགོས་པ་མ་ཟད།     རྒྱའི་དབང་བསྒྱུར་དང་དྲག་གནོན་འོག་ལྷུང་བའི་བོད་དང་ཐེ་ཝེན་སོགས་ནས་མང་གཙོ་དང་རང་དབང་འདོད་ཀྱང་ །   རྒྱ་གཞུང་གིས་རྒྱ་ནག་གཅིག་གི་སྲིད་བྱུས་འོག་མི་རིགས་དག་གི་འགྲོ་བ་མིའི་ཐོབ་ཐང་ལ་དོ་ཕོག་བཏང་དང་གཏོང་མུས་ཡིན་པར་འགྲེལ་བརྗོད་དང་འབྲེལ།   ང་ཚོས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྷོ་ཨ་ཕི་རི་ཀ་ནང་ཞབས་སོར་འཁོད་རྒྱུར་མཐོང་མཆན་ཕུལ་མེད་པའི་ཐོག་བསྐྱར་དུ་བསམ་གཞིགས་གནང་དགོས་པ་དང་འབྲེལ།   ཡང་སྒོས་རྒྱ་གར་ལྟ་བུ་ནས་༸གོང་ས་མཆོག་ལ་བཞུགས་གནས་དང་རྒྱབ་སྐྱོར་གནང་ཐུབ་ཚེ།  ང་ཚོས་ངོས་ནས་ཀྱང་འགྲོ་བ་མིའི་རིན་ཐང་དང་འགྲོ་བ་མིའི་ཐོབ་ཐང་ལ་དོ་ཕོག་མི་གཏོང་བའི་སྒོ་ནས་རྒྱ་ནག་དང་ལྷན་དུ་ཚོང་འབྲེལ་འཇོག་ཐུབ་རྒྱུ་ཡིན་པ་གསུངས་འདུག ཁོང་གིས་དེ་སྔ་ལྷོ་ཨ་ཕི་རི་ཀ་ནས་སུ་ཌན་གྱི་སྲིད་འཛིན་ཟུར་པ་ Omar Al-Bashir  ལ་རྒྱབ་སྐྱོར་གྱིས་དེ་གའི་མི་མང་གི་རེ་འདུན་ལ་སྣང་མེད་བཏང་བས།  སླད་མར་ང་ཚོའི་ངོས་ནས་ད་བར་ནོར་འཁྲུལ་བྱས་པ་རྣམས་བསྐྱར་དུ་མི་བྱེད་པའི་ཐོག་འགྲོ་བ་མིའི་གནད་དོན་ལ་བརྩི་འཇོག་བྱེད་དགོས་པ་གསུངས་འདུག རྩ་བའི་ལྷོ་ཨ་ཕི་རི་ཀ་རྒྱལ་ཁབ་དང་རྒྱ་ནག་གཉིས་བར་ཕྱི་ལོ་ ༢༠༠༩ ལོར་ཚོང་འབྲེལ་བྱུང་བ་ནས་བཟུང་༸གོང་ས་མཆོག་ཁུལ་དེར་ཞབས་སོར་འཁོད་རྒྱུའི་མཐོང་མཆན་ཕུལ་མེད་པ་དང་། རྒྱ་གཞུང་ནས་ལྷོ་ཨ་ཕི་རི་ཀའི་ཐག་གཅོད་དེར་རྒྱབ་སྐྱོར་བྱས་ཡོད་པ་རེད།  ཡིན་ནའང་དེ་སྔོན་ཕྱི་ལོ་ ༢༠༡༨ ལོར་ Inkatha རང་དབང་ཚོགས་པའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཁུལ་དེར་གདན་འདྲེན་ཞུས་པ་དང་།  དེར་Pretoria ནང་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་ལྷོ་ཨ་ཕི་རི་ཀ་ནས་དེ་གའི་རྒྱལ་ཁབ་དང་རྒྱ་ནག་གཉིས་བར་གྱི་ཆབ་སྲིད་ཀྱི་འབྲེལ་ལམ་ཐད་ཡིད་ཆེས་ཡོད་པ་དེར་སྣང་ཆུང་བྱས་པས།  བྱ་སྤྱོད་དེས་རྒྱ་ནག་ནས་ལྷོ་ཨ་ཕི་རི་ཀ་ནང་དཔལ་འབྱོར་གྱི་འགྲོ་གྲོན་གཏོང་ཕྱོགས་ལ་ཁྱད་པར་བཟོ་ངེས་ཡིན་པ་ངོ་རྒོལ་བྱས་པ་དེ་ལྟར་ཡང་།    འདི་ལོའི་ཟླ་བ་ ༢ པའི་ནང་སྲིད་སྐྱོང་བློ་བཟང་སེང་གེ་མཆོག་ཁུལ་དེར་བསྐྱར་དུ་འཚམས་གཟིགས་ཀྱིས།   དེ་གའི་སྲིད་འཛིན་ཟུར་པ F W de Klerk  མཆོག་དང་།  Inkatha རང་དབང་ཚོགས་པའི་ཚོགས་མི།  དེ་བཞིན་སྲིད་དོན་པ་དང་།  བོད་དོན་རྒྱབ་སྐྱོར་བ་སོགས་ཐུག་འཕྲད་གནང་ཡོད་པ་རེད།

ཁ་ཉིན་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་རྒྱ་ནག་རྒྱལ་སྲུང་གི་དུས་རབས་གསར་པའི་རྒྱབ་ཤ་དཀར་པོ་ཞེས་དོན་ཚན་དྲུག་ཅན་གྱི་ཡིག་ཆ་ཞིག་འདོན་སྤེལ་གནང་སྟེ་ཐེ་ཝན་དེ་རྒྱ་ནག་དང་ཆིག་སྒྲིལ་བྱེད་ཐབས་ཀྱི་འབད་རྩོན་དེའི་ནང་ཕྱི་ཕྱོགས་ཀྱི་ཐེ་གཏོགས་རིགས་ལ་ངོ་རྒོལ་གྱིས་དམག་ཐབས་བྱ་རྒྱུའི་ཉེན་བརྡ་བཏང་འདུག དེ་ཡང་ཟླ་བ་འདིའི་ཚེས་ ༢༤ ཉིན་འདོན་སྤེལ་གནང་བའི་རྒྱབ་ཤ་དཀར་པོའི་ཡིག་ཆ་དེའི་ནང་རྒྱལ་སྤྱིའི་བདེ་འཇགས་ཀྱི་གནས་སྟངས་དང་ད་ལྟའི་དུས་རབས་གསར་པའི་རྒྱ་ནག་རྒྱལ་སྲུང་ཀྱི་སྲིད་བྱུས་དང་རྒྱ་ནག་དམག་དཔུང་གི་དམིགས་ཡུལ་དང་ལས་དོན་སྒྲུབ་ཕྱོགས། དེ་བཞིན་རྒྱ་ནག་རྒྱལ་ཡོངས་ཀྱི་རྒྱལ་སྲུང་དང་དམག་དཔུང་ནང་བཅོས་སྒྱུར་བྱ་རྒྱུ།  རྒྱལ་སྲུང་ཀྱི་ཚད་ལྡན་འགྲོ་གྲོན་དང་མ་འོངས་འགྲོ་བ་མིའི་སྤྱི་ཚོགས་བདེ་ཐབས་ཡོང་སླད་དུ་མཉམ་ཞུགས་བྱེད་ཕྱོགས་བཅས་ཀྱི་གླེང་གཞི་དོན་ཚན་དྲུག་འབུར་འདོན་བྱས་ཏེ་རྒྱ་ནག་གི་སྲིད་འཛིན་ཞི་ཅིན་ཕིང་གིས་རྒྱལ་ཁབ་ཀྱི་སྲིད་འཛིན་གྱི་ལས་འགན་འཁུར་བ་ནས་བཟུང་རྒྱ་ནག་ཁྱོན་ཡོངས་ཀྱི་རྒྱལ་སྲུང་ཀྱི་སྲིད་བྱུས་གསལ་འདོན་བྱས་པ་ཐེངས་དང་པོ་ཆགས་ཀྱི་ཡོད་སྐོར་བརྗོད་འདུག རྒྱལ་སྲུང་ཀྱི་རྒྱབ་ཤ་དཀར་པོའི་ཡིག་ཆ་དེའི་དོན་ཚན་དང་པོའི་ནང་རྒྱལ་སྤྱིའི་བདེ་འཇགས་ཀྱི་གནས་སྟངས་ནང་གཙོ་བོ་བརྟན་ལྷིང་མེད་པའི་རྒྱུ་རྐྱེན་དང་ཁྱད་པར་དུ་ཉེ་ཆར་ཨ་རིས་ཐེ་ཝན་ལ་རང་སྲུང་གི་དྲག་ཆས་གོ་མཚོན་ཕོན་ཆེ་ཞིག་ཚོང་འགྲེམས་བྱ་རྒྱུའི་གསལ་བསྒྲགས་སྤེལ་ཡོད་པ་བཅས་ལུང་འདྲེན་གནང་སྟེ། པེ་ཅིང་སྲིད་གཞུང་གིས་ཨ་རིས་རྒྱལ་ཡོངས་བདེ་འཇགས་དང་རྒྱལ་སྲུང་ཐབས་བྱུས་ལ་བཅོས་སྒྲིག་བྱས་ནས་ཕྱོགས་གཅིག་གི་སྲིད་བྱུས་ལ་ལག་བསྟར་བྱེད་བཞིན་པའི་བྱ་སྤྱོད་དེས་རྒྱ་ནག་རྒྱལ་སྲུང་གི་བརྟན་ལྷིང་ལ་གཏོར་བཤིག་བྱེད་པར་ངོས་འཛིན་གྱིས་སྐྱོན་བརྗོད་ཤུགས་ཆེ་བྱེད་བཞིན་པ་གསལ་འདོན་གནང་བ་མ་ཟད། རྒྱབ་ཤ་དཀར་པོའི་ཡིག་ཆེ་དེའི་བཀོད་ཁྱབ་ཧ་ཅང་གསལ་པོ་བྱས་ཡོད་པ་ནི་ཐེ་ཝན་རང་བཙན་ཕྱོགས་སུ་སྐྱོད་ཆོག་གི་མེད་པ་དང་། གལ་ཏེ་དེའི་ཕྱོགས་སུ་སྐྱོད་པ་ཡིན་ན་རྒྱ་ནག་གིས་ཀྱང་དེའི་ཕྱོགས་སུ་སྐྱོད་པར་བཀག་འགོག་དང་། མི་སུ་འདྲ་ཞིག་གིས་ཐེ་ཝན་རྒྱ་ནག་ནས་ཁ་བྲལ་གཏོང་ཐབས་བྱེད་ཚེ་རྒྱ་ནག་གི་དམག་དཔུང་གིས་འབྱུང་འགྱུར་རྒྱལ་ཁབ་ཀྱི་བདག་དབང་དང་མངའ་ཁོངས་ཆ་ཚང་སྲུང་སྐྱོབ་བྱ་རྒྱུའི་ཆེད་དུ་དམག་ཐབས་བྱ་རྒྱུ་ཡིན་ཞེས་ཉེན་བརྡ་ཡང་བཏང་ཡོད་པ་བཀོད་འདུག གཞན་ཡང་དོན་ཚན་དང་པོའི་ནང་ཕྱི་ཕྱོགས་ཀྱི་ཁ་བྲལ་རིང་ལུགས་བརྒྱུད་བོད་རང་བཙན་རྩོད་ལེན་དང་དེ་བཞིན་རྒྱ་ནག་རྒྱལ་ཡོངས་ཀྱི་བདེ་འཇགས་དང་སྤྱི་ཚོགས་བརྟན་ལྷིང་ལ་གནོད་འཚེ་བཟོ་མཁན་ཤར་ཏུར་ཀིས་ཏན་གྱི་གནད་དོན་སོགས་ཀྱང་མངོན་གསལ་བྱས་འདུག ཡང་རྒྱབ་ཤ་དཀར་པོའི་དོན་ཚན་གཉིས་པའི་ནང་གསེས་དུས་རབས་གསར་པའི་དམག་འཐབ་ཀྱི་ཐབས་བྱུས་ལག་བསྟར་བྱེད་ཕྱོགས་ཀྱི་ལམ་སྟོན་ནང་རྒྱ་གཞུང་གིས་དྲག་ཤུགས་བེད་སྤྱོད་བྱ་རྒྱུར་བསྡུར་གྱི་མེད་པ་དང་དགོས་ངེས་ཀྱི་སྐབས་སུ་སྤྱོད་པ་ནི་ཕྱི་ཕྱོགས་ཀྱི་སྟོབས་ཤུགས་ཀྱི་ཐེ་བྱུས་དང་ཐེ་ཝན་རང་བཙན་རྩོད་ལེན་གྱི་ཁ་བྲལ་བ་མི་ཉུང་བ་ཞིག་གི་ལས་འགུལ་ལ་དམིགས་པ་ཞིག་ཡིན་པ་ལས་ཐེ་ཝན་གྱི་སྤུན་ཟླར་དམིགས་པ་ཞིག་རྩ་བ་ནས་མིན་ཞེས་བཤད་པ་མ་ཟད། རྒྱ་ནག་རྒྱལ་སྲུང་ངོས་ནས་གཙོ་བོ་སྤྱི་ཚོགས་ཀྱི་བདེ་འཇགས་དང་རྒྱལ་ཁབ་ཀྱི་ཆིག་སྒྲིལ་སླད་ཐེ་ཝན་རང་བཙན་ལ་མཐའ་གཅིག་ཏུ་ངོ་རྒོལ་བྱས་པ་མ་ཟད། ཁྱད་པར་དུ་བོད་རང་བཙན་རྩོད་མཁན་གྱི་ཁ་བྲལ་རིང་ལུགས་པ་རྣམས་ལ་འགོག་རྒོལ་དང་གདོང་ལེན་ཤུགས་ཆེ་བྱ་རྒྱུར་དམིགས་ཀྱི་ཡོད་པར་བསྐྱར་ནན་བྱས་འདུག བོད་མིའི་སྒྲིག་འཛུགས་ཀྱི་མགྲིན་ཚབ་པ་དྲིལ་བསྒྲགས་དྲུང་ཆེ་དྭགས་པོ་བསོད་ནམས་ནོར་བུ་ལགས་སུ་བཅར་འདྲི་ཞུས་སྐབས་ཁོང་གིས་བོད་མིའི་སྒྲིག་འཛུགས་ནས་ད་བར་གཉིས་སྨན་དབུ་མའི་ལམ་གྱི་སྲིད་བྱུས་ཐོག་རྒྱ་གཞུང་གི་རྩ་ཁྲིམས་ནང་གསལ་ལྟར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་པ་ལས་རང་བཙན་རྩོད་ཀྱི་མེད་ཀྱང་། རྒྱ་གཞུང་གིས་དུས་རྟག་ཏུ་བོད་མི་རྣམས་རང་བཙན་རྩོད་མཁན་གྱི་ཁ་བྲལ་རིང་ལུགས་པ་ཡིན་ཚུལ་གྱི་གཞི་མེད་སྐྱོན་འཛུགས་བྱེད་བཞིན་པར་ངོས་ལེན་རྩ་བ་ནས་ཞུ་ཐབས་མེད་པའི་བསྐྱར་ནན་གྱི་ལན་འདེབས་གནང་སོང་།

སྐུ་ཞབས་ Thomas Denny Sanford ལགས་ནས་༸གོང་ས་མཆོག་གི་བཀའ་སློབ་ལས་སེམས་འགུལ་ཐེབས་ཏེ་ San Diego གཙུག་ལག་སློབ་ཁང་ལ་སླར་ཡང་ཨ་སྒོར་ས་ཡ་ ༡༠༠ ཞལ་འདེབས་གནང་འདུག དེའང་ sandiego uniontribune  གསར་གནས་ཐོག་གནས་ཚུལ་སྤེལ་བར་གཞིགས་ཚེ་སྐུ་ཞབས་ Denny Sanford ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་རྣམ་ཀུན་ནས་ལམ་སྟོན་ཕེབས་བཞིན་ཡོད་པ་ལྟར་རང་ཅག་འགྲོ་བ་མིའི་ལྷན་སྐྱེས་སུ་ཡོད་པའི་སྙིང་རྗེ་དང་བྱམས་བརྩེའི་བཟང་པོའི་ཡོན་ཏན་ཐོག་སློབ་གཉེར་གནང་རྒྱུ་དང་དེ་བཞིན་བཟང་པོའི་ཡོན་ཏན་དེ་རྣམས་སྨན་པ་ཚོའི་ཕྱག་ལས་ནང་གོང་འཕེལ་ཡོང་ཐབས་བཅས་ལ་ཆེད་དམིགས་གནང་སྟེ་ཞལ་འདེབས་གནང་བ་ཞིག་ཆགས་ཀྱི་འདུག སྐུ་ཞབས་ Sanford ལགས་ནས་ཉེ་ཆར་ San Diego གཙུག་ལག་སློབ་གཉེར་ཁང་ལ་ཨ་སྒོར་ས་ཡ་ ༡༠༠ ཐམ་པའི་ཞལ་འདེབས་གནང་བ་དེ་ནི་ཕྱི་ལོ་ ༢༠༡༧ ལོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ California མངའ་ཁུལ་གྱི་ UCSD ཞེས་པའི་ San Diego གཙུག་ལག་སློབ་གཉེར་ཁང་གི་བསླབ་པ་མཐར་སོན་གྱི་མཛད་སྒོར་དབུ་བཞུགས་མཛད་སྐབས་དང་འབྲེལ་ནས་༸གོང་ས་མཆོག་དང་ལོགས་སུ་ཞལ་མཇལ་བྱུང་ཡོད་པ་དང་འབྲེལ། ཁོང་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་བཀའ་ཆོས་སོགས་བསྩལ་བ་དག་དང་། ཁྱད་པར་དུ་༸གོང་ས་མཆོག་གི་དགོངས་གཞི་ཚན་རིག་དང་ཆོས་ལུགས་གཉིས་ཟུང་འབྲེལ་ཐོག་ནས་གཞི་དངོས་པོར་གཏིང་ཟབ་དཔྱད་རྒྱུའི་ལམ་སྟོན་ཁག་ལ་ཡིད་མོས་བྱུང་ཡོད་པ་གསུངས་འདུག་པ་མ་ཟད། ༸གོང་ས་མཆོག་ནི་འགྲོ་བ་མིའི་རང་གཤིས་བཟང་སྤྱོད་དང་བྱམས་བརྩེ་སོགས་གོང་སྤེལ་གནང་བ་དང་དེ་བཞིན་འཛམ་གླིང་ཁྱོན་ལ་དེ་འབྲེལ་སློབ་གསོ་སྤེལ་མཁན་རླབས་ཆེན་གྱི་སྐྱེས་བུ་ཞིག་ཡིན་པ་ལྟར་ཁོང་གིས་ཞལ་འདེབས་དེ་ལྟར་ཕུལ་ནས་༸གོང་ས་མཆོག་གི་དགོངས་གཞི་ཁག་རྒྱ་སྐྱེད་གནང་གི་ཡོད་པ་གསུངས་འདུག སྐུ་ཞབས་ Sanford ལགས་ཀྱིས་ད་དུང་སྨན་པ་ཚོའི་ལས་རིགས་གཉེར་སྐབས་བྱམས་བརྩེ་དེ་ངེས་པར་དུ་དགོས་མཁོ་ཞིག་ཆགས་ཡོད་པ་དང་། ང་ཚོས་སྨན་པའི་ཆེད་ལས་ཡར་རྒྱས་དང་སྲུང་སྐྱོབ། དེ་བཞིན་ཁྱབ་སྤེལ་གནང་བའི་བརྒྱུད་རིམ་ནང་བྱམས་བརྩེ་ལག་བསྟར་གནང་ཐུབ་ཚེ་འཛམ་གླིང་འདི་བདེ་ཞིང་སྐྱིད་པ་ཞིག་ཡོང་བར་ཕན་ཐོགས་ཡོད་སྐོར་གསུངས་འདུག གཞན་ཡང་ཁོང་གིས་ཆོགས་ལུགས་ཀྱི་གནང་སྲོལ་དང་ཆབ་སྲིད་ཀྱི་སྒྲོམ་གཞི་རྐྱང་པས་ང་ཚོར་འཕྲད་བཞིན་པའི་དཀའ་ངལ་ཁག་ལ་གདོང་ལེན་བྱེད་ཐུབ་ཀྱི་མེད་པ་དང་། དེ་བཞིན་ཀླད་པའི་བྱེད་ལས་གང་ཡིན་ཤེས་པ་ཙམ་གྱིས་སྙིང་རྗེ་དང་བྱམས་བརྩེའི་དོན་རྟོགས་རྒྱུ་དཀའ་བ་ཡིན་སྟབས། ཀླད་པའི་བྱེད་ལས་དེ་དག་ཤེས་པའི་ཐོག་ནས་ནང་སེམས་ཀྱི་ཡོན་ཏན་བྱམས་སྙིང་རྗེར་ནུས་པ་ལྡན་པའི་ཕན་ཐབས་ལ་འབོད་དགོས་གལ་ཡིན་པ་གསུངས་འདུག་པ་དང་ཆབས་ཅིག ཁོང་རང་ཉིད་མ་གྲོངས་པའི་སྔོན་ལ་དཔལ་འབྱོར་གང་ཡོད་པ་དེ་དག་ཆ་ཚང་ཞལ་འདེབས་སུ་གནང་འདོད་ཡོད་པ་མ་ཟད། ལྷག་དོན་ཁོང་གིས་འགྲོ་བ་མི་ཞེས་པ་དེ་བཟང་པོའི་ཡོན་ཏན་དང་འབྲེལ་ནས་རིམ་བཞིན་ཡར་རྒྱས་འགྲོ་རྒྱུ་ཡོད་པ་བཞིན་དེ་ལྟར་ཡོང་བར་རེ་བ་ཆེན་པོ་ཡོད་སྐོར་གསུངས་འདུག དེ་བཞིན་ San Diego གཙུག་ལག་སློབ་ཁང་གི་ཚན་རིག་སྡེ་ཚན་གྱི་འགན་འཛིན་གཞོན་པ་སྐུ་ཞབས་ David Brenner ལགས་ཀྱིས་ཀྱང་སྐུ་ཞབས་ Sanford ལགས་ནི་བྱམས་པ་དང་བཟང་སྤྱོད་གཉིས་ཟུང་འབྲེལ་ཡོང་བར་ཐུགས་རེ་ཆེན་པོ་གནང་མཁན་ཞིག་ཡིན་པ་དང་། སྤྱིར་ཚོང་རིགས་དང་འབྲེལ་བའི་གཙུག་ལག་སློབ་ཁང་ལ་ཞལ་འདེབས་དེ་ལྟར་ཐོབ་པར་ཡ་མཚན་རྒྱུ་གང་ཡང་མེད་ཀྱང་། ཞལ་འདེབས་ཐོབ་དོན་ལྟར་ཁ་ཡོད་ལག་ཡོད་དགོས་མཁོ་ཡོད་སར་རག་མིན་ཐད་ལ་རྩོད་གཞི་ཆགས་ཀྱི་ཡོད་པ་རེད། འོན་ཀྱང་སྐུ་ཞབས་ Sanford ལགས་ཀྱིས་བྱམས་སྙིང་རྗེ་དང་འབྲེལ་བའི་ལས་གཞི་ཐོག་མ་དངུལ་འབོར་ཆེན་ཞལ་འདེབས་གནང་བ་དེ་ནི་ཆེས་ཐོག་མ་ཆགས་ཀྱི་ཡོད་པ་གསུངས་འདུག གཞི་རྩའི་སྐུ་ཞབས་ Thomas Denny Sanford ལགས་ Saint Pau ནང་ཕྱི་ལོ་ ༡༩༣༥ ཟླ་ ༡༢ ཚེས་ ༢༣ ཉིན་འཁྲུངས་ཡོད་པ་དང་། ཁོང་དགུང་ལོ་བཞིར་སོན་སྐབས་ཁོང་གི་ཨ་མ་ལགས་ནུ་སྐྲན་རྐྱེན་པས་འདས་གྲོངས་སུ་གྱུར་སྟབས་པཱ་ལགས་ཀྱིས་དགུང་ལོ་བརྒྱད་ལ་སོན་སྐབས་ཁོང་གོས་ཟོག་ཚོང་ཁང་དུ་ཁྲིད་ནས་ཕྱག་ལས་གནང་བཅུག་ཡོད་པ་རེད། ཁོང་གིས་རང་ཉིད་བྱིས་དུས་སྐབས་སུ་ངལ་བ་གང་འཕྲད་ལ་གདོང་ལེན་གནང་སྟེ་མཐར་ Minnesota གཙུག་ལག་སློབ་གཉེར་ཁང་ནས་བསླབ་པ་མཐར་སོན་རྗེས། ཁོང་གིས་ First Premier Bank འམ་དངུལ་ཁང་ཆེད་འཛུགས་གནང་བ་དང་དེའི་འགན་འཛིན་དང་གཙོ་གཉེར་བ་ཡང་གནང་འདུག ལྷག་དོན་སྐུ་ཞབས་ Denny Sanford ལགས་ཀྱིས་ད་བར་འཕྲོད་བསྟེན་དང་སྨན། དེ་བཞིན་ཤེས་ཡོན་སོགས་ཀྱི་ཐོག་ཨ་སྒོར་ཐེར་འབུམ་ ༡ ལྷག་གི་ཞལ་འདེབས་གནང་མྱོང་ཡོད་པའི་ཁྲོད་ཕྱི་ལོ་ ༢༠༡༣ ལོར་ UCSD གཙུག་ལག་སློབ་གཉེར་ཁང་དེའི་ཚན་རིག་ལྟེ་གནས་ཁང་དུ་ཉམས་ཞིབ་པ་ཚོས་སྨན་རྫས་གསར་པ་འཚོལ་ཞིབ་དང་བཅོས་ཐབས་ཀྱི་རིག་གསར་ཞིབ་འཇུག་གནང་ཕྱིར་ཨ་སྒོར་ས་ཡ་ ༡༠༠ ཞལ་འདེབས་དང་སློབ་གཉེར་ཁང་དེའི་རྒྱལ་སྤྱིའི་གཙུག་ལག་སློབ་ཁང་གི་ངོས་ནས་བཟང་སྤྱོད་དང་རྣམ་དཔྱོད་ལྡན་པའི་ཐོག་ནས་བྱིས་པ་ཚོར་རྩུབ་སྤྱོད་དང་དབང་ཡོད་དེ་བཞིན་དབྱེ་འབྱེད་སོགས་ཀྱི་བྱ་སྤྱོད་འགོག་ཐབས་སླད་དུ་ཨ་སྒོར་ས་ཡ་ ༡༠༠ ཐམ་པ་བཅས་ཞལ་འདེབས་གནང་མྱོང་འདུག

ཟླ་བ་འདིའི་ཚེས་ ༡༧ ཉིན་ཐེ་ཝན་གཞུང་འཛིན་མང་གཙོ་ཡར་ཐོན་ཚོགས་པའི་དྲུང་ཆེ་སྐུ་ཞབས་ Lo Wen-jia ལགས་ཀྱིས་སྣེ་ཁྲིད་འོག་ཡར་ཐོན་ཚོགས་པའི་སྤྱི་དམངས་འབྲེལ་ལམ་སྡེ་ཚན་གྱི་སྤྱི་ཁྱབ་ངེས་སྟོན་པ་སྐུ་ཞབས་ Hsieh Yu-Li ལགས་དང་ཚོགས་པའི་མགྲིན་ཚབ་པ།  སྤྱི་དམངས་འབྲེལ་ལམ་སྡེ་ཚན་གྱི་ངེས་སྟོན་པ་གཞོན་པ་སྐུ་ཞབས་ Wen Lii ལགས་བཅས་བཞུགས་སྒར་དུ་ཆེད་བཅར་གྱིས་ཚེས་ ༡༩ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསེར་ཞལ་མཇལ་ཁ་ཞུས་ཡོད་པ་རེད།  སྐུ་ཞབས་ Lo Wen-jia ལགས་ཀྱིས་༸གོང་ས་མཆོག་གི་མཇལ་ཁ་ཞུས་རྗེས་གསར་འགོད་པའི་བཅར་འདྲི་དང་ལེན་གྱིས་ད་རེས་འཚམས་གཟིགས་འདི་ཐེ་ཝན་གྱི་མང་གཙོ་ཡར་ཐོན་ཚོགས་པའི་ཚོགས་གཙོའི་སྐུ་ཚབ་ཐོག་ནས་བཅར་བ་དང་། གཙོ་བོ་༸གོང་ས་མཆོག་གི་༸སྐུའི་འཁྲུངས་སྐར་ལ་དགའ་བསུའི་འཚམས་འདྲི་ཞུ་ཆེད་ཡིན་ཞེས་གསུངས་སོང་བ་དང་། ལྷག་དོན་ཚོུད་གཅིག་ཙམ་གྱི་མཇལ་མོལ་དེའི་རིང་མགོན་པོ་༸གང་ཉིད་མཆོག་དང་ལྷན་ཐེ་ཝན་གྱི་མང་གཙོ་འཕེལ་རྒྱས། སླད་མར་ཐེ་ཝན་དང་བོད་གཉིས་ཀྱི་རང་དབང་རྩོད་ལེན་གནང་ཕྱོགས་ཀྱི་དགོངས་ཚུལ་བརྗེ་ལེན་གནང་བ་མ་ཟད། ༸གོང་ས་མཆོག་ནས་ཐེ་ཝན་གྱི་མང་གཙོ་སྟོབས་ཤུགས་དེ་གནད་ཆེ་ཞིག་ཡིན་སྐོར་བཀའ་སློབ་ནན་པོ་བསྩལ་བ་དང་ཆབས་ཅིག་ཏུ་ཐེ་ཝན་གྱི་མང་གཙོ་སྟོབས་ཤུགས་དེ་ཐེ་ཝན་གྱི་མ་རྩ་ཆེ་ཤོས་ཡིན་པར་ལམ་སྟོན་མཛད་སྐོར་གསུངས་སོང་།  དེ་བཞིན་ཁོང་གིས་༸གོང་ས་མཆོག་ལ་ཐེ་ཝན་དང་བོད་གཉིས་ནས་ཐུན་མོང་གི་གདོང་ལེན་གནང་ས་དེ་རྒྱ་ནག་དམར་ཤོག་ཚོགས་པའི་གཞུང་ཆགས་ཡོད་པ་དང་། ཐེ་ཝན་མི་རིགས་ནས་རང་ཉིད་ཀྱི་མང་གཙོ་སྲུང་སྐྱོབ་བྱེད་དགོས་པ་མ་ཟད་སྒོས་འཛམ་གླིང་ཁྲོད་ལ་མང་གཙོ་རྩོད་མཁན་ཚོར་རྒྱབ་སྐྱོར་གནང་དགོས་པའི་འོས་འགན་ཡོད་སྐོར་སྙན་གསེང་ཞུས་ཡོད་པ་གསུངས་ཡོད། མཇལ་འཕྲད་དེའི་ཁྲོད་རིག་གཞུང་གི་སྟོབས་ཤུགས་དང་བོད་བརྒྱུད་ནང་བསྟན་གྱི་རིན་ཐང་སོགས་ཀྱི་ཐོག་བཀའ་མོལ་གནང་བ་དང་ཕྱོགས་མཚུངས་༸སྐུའི་ཡང་སྲིད་ཀྱི་གནད་དོན་ཐད་ལའང་བཀའ་མོལ་གནང་འདུག སྐབས་དེར་༸གོང་ས་མཆོག་གིས་མགོན་པོ་༸གང་ཉིད་མཆོག་དགུང་ལོ་ ༡༠༠ ལྷག་བར་དུ་༸སྐུ་འཚོ་བཞུགས་མཛད་རྒྱུ་དང་འབྲེལ། ༸སྐུའི་ཡང་སྲིད་ཐད་དམར་ཤོག་ཚོགས་པའི་འཐུས་མི་ནས་ཐག་གཅོད་བྱེད་རྒྱུའི་ཐོབ་ཐང་གང་ཡང་མེད་པར་བཀའ་བསྩལ་བ་མ་ཟད།  སྐུ་ཞབས་ Lo Wen-jia ལགས་ནས་༸སྐུའི་ཡང་སྲིད་དེ་ཐེ་ཝན་ནང་འཁྲུངས་སྲིད་དམ་ཞེས་བཀའ་འདྲི་ཞུས་པར་༸གོང་ས་མཆོག་གིས་དེ་ཡོང་སྲིད་པ་དང་ནང་པའི་རྒྱལ་ཁབ་ནང་༸སྐུའི་ཡང་སྲིད་འཁྲུངས་ངེས་ཡིན་སྐོར་བཀའ་བསྩལ་ཡོད་སྐོར་གསུངས་ཡོད། ལྷག་དོན་ཁོང་གིས་བོད་མིར་བརྡ་ལན་དང་འབྲེལ་ཏེ་ཐེ་ཝན་དང་བོད་དབར་གདོང་ལེན་གནང་ཡུལ་དང་དཀའ་ངལ་གཅིག་མཚུངས་ཡིན་པས་ང་ཚོ་མཉམ་རུབ་ཀྱི་ཐོག་ནས་དེར་འབད་རྩོད་གནང་དགོས་པ་གསུངས་སོང་བ་དང་། དེ་བཞིན་མགྲིན་ཚབ་པ་སྐུ་ཞབས་ Wen Lii ལགས་ཀྱིས་བོད་མིའི་མང་གཙོའི་མྱོང་བ་དེ་ཐེ་ཝན་ལ་སེམས་འགུལ་ཐེབས་གཞི་ཞིག་ཏུ་གྱུར་བ་མ་ཟད། ང་ཚོའི་གནས་སྟངས་ཛ་དྲག་ཅི་འདྲ་ཞིག་གི་འོག་ལྷུང་ཀྱང་མང་གཙོའི་ལྟ་གྲུབ་དང་ལམ་སྲོལ། འགྲོ་བ་མིའི་ཐོབ་ཐང་དང་རང་དབང་བཅས་འགྲོ་བ་མིའི་རིན་ཐང་ཁག་མུ་མཐུད་ནས་སྲུང་གནང་དགོས་པའི་བརྡ་ལནགནང་བས་དེའི་ཐེ་ཝན་ཙམ་མ་ཟད་ཧོང་ཀོང་དང་ཡུ་གུར་སོགས་རྒྱའི་དབང་སྒྱུར་འོག་ཏུ་ལྷུང་བའི་མི་རིགས་ཡོངས་ལ་སེམས་འགུལ་ཐེབས་སྐོར་གསུངས་སོང་།  རྩ་བའི་ཐེ་ཝན་ནང་མང་གཙོ་ཡར་ཐོན་ཚོགས་པས་གཞུང་འཛིན་པའི་རྗེས་སུ་༸རྒྱལ་བའི་བཞུགས་གནས་བཞུགས་སྒར་དྷ་རྨ་ས་ལར་སྐུ་ཚབ་ཆེད་བཅར་གནང་བ་ཆེས་ཐོག་མ་ཆགས་ཀྱི་ཡོད་པ་དང་། ཕྱི་ཟླ་ ༧ ཚེས་ ༡༧ ནས་ ༡༩ བར་ཉིན་གྲངས་གསུམ་གྱི་མཛད་རིམ་ཁྲོད་ཐེ་ཝན་ནས་བོད་མི་ལ་མཛའ་གྲོགས་ཀྱི་རང་བཞིན་མཚོན་སླད་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག  དེ་བཞིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་དང་ཐུག་འཕྲད་གནང་བ་མ་ཟད།  ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་སོགས་སུ་སྐོར་སྐྱོད་གནང་ཡོད་པ་རེད།

དེ་རིང་སྔ་དྲོ་ཚོུད་ ༡༠ པ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གཙུག་ལག་སློབ་གཉེར་ཁང་ཁག་གཅིག་གི་སློབ་ཕྲུག་བཅོ་ལྔ་ལ་༸རྒྱལ་བའི་གཟིམ་ཆུང་མཇལ་ཁ་བསྩལ་བ་དང་ལྷག་དུ་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་གཙོ་གྱུར་འགྲོ་བ་མིའི་རིགས་ཀྱི་རིན་ཐང་དང་འཛམ་གླིང་གི་ཞི་བདེ་སོགས་ཀྱི་སྐོར་ལ་ལམ་སྟོན་མཛད་འདུག སྐབས་དེར་མགོན་པོ་༸གང་ཉིད་མཆོག་གིས་འགྲོ་བ་མིའི་རང་གཤིས་ནི་སྙིང་རྗེ་དང་ལྡན་པ་ཞིག་ཡིན་པར་བཀའ་བསྩལ་ཏེ་མིའི་རིགས་ཡོད་ཚད་གཅིག་སྒྲིལ་གྱིས་མཉམ་གནས་བྱེད་རྒྱུ་དེ་གལ་ཆེན་པོ་ཡིན་པ་དང་། དེ་བཞིན་དེང་དུས་ཀྱི་རྒྱལ་སྤྱིའི་ཤེས་ཡོན་སྲིད་བྱུས་དེ་དངོས་གཙོ་རང་ལུགས་ལ་གཞིར་བཞག་པ་ཞིག་ཡིན་པ་བཀའ་ཕེབས་དང་སྦྲགས། དངོས་གཙོ་རང་ལུགས་ཁོ་ནས་མི་འདང་བར་དེང་དུས་ཀྱི་ཤེས་ཡོན་སློབ་གསོའི་ནང་མིའི་ནང་སེམས་ཀྱི་འཕྲོད་བསྟེན་ལ་ཕན་པའི་གནའ་བོའི་རྒྱ་གར་གྱི་རིག་གཞུང་དང་ཤེས་ཡོན་དེ་འཇོག་དགོས་གལ་ཡིན་པ་ལམ་སྟོན་མཛད་འདུག གསར་འགོད་པས་སློབ་ཕྲུག་ཚོགས་པ་དེའི་ཚོགས་གཙོ་ Rachal Posner ལགས་སུ་མཇལ་ཁའི་སྐོར་ལ་བཅར་འདྲི་ཞུས་པར་ཁོང་གིས་ཐེངས་འདིའི་སྐོར་སྐྱོད་དེ་ནི་རྒྱལ་སྤྱིའི་འཚོ་བ་དང་རྒྱ་གར་གྱི་སྲོལ་རྒྱུན་གྱི་རིག་གཞུང་ཞེས་པའི་ལས་གཞིའི་འོག་ཨ་རིའི་སློབ་གྲྭ་འདྲ་མིན་ཁག་བཅོ་ལྔ་ལྷག་གི་འཐུས་ཚབ་སློབ་མ་དྷ་སར་ཆེད་བཅར་ཞུས་ཡོད་པ་ལྟར། དེ་རིང་༸གོང་ས་མཆོག་གི་མཇལ་ཁ་ཞུ་རྒྱུའི་གོ་སྐབས་བྱུང་བ་ནི་སྒྱུ་འཕྲུལ་ལྟ་བུ་ཞིག་ཡིན་པར་འགྲེལ་བརྗོད་ཀྱིས་དགའ་པོ་ཞེ་དྲག་བྱུང་སོང་ཞེས་ངོ་སྤྲོད་གནང་སོང་། དེ་དང་འབྲེལ་ནས་ཁོང་གིས་དྷ་སར་བཅར་དོན་གཙོ་བོ་ནི་རང་ཉིད་ཨ་རིའི་མི་སེར་ཞིག་ཡིན་སྟབས་བོད་མིའི་སྐྱབས་བཅོལ་གྱི་གནས་སྟངས་དང་འཐབ་རྩོད་ཀྱི་ངོ་བོ་བཅས་ཀྱི་སྐོར་ལ་རྒྱུས་ལོན་གནང་རྒྱུ་དེ་གལ་ཆེན་པོ་ཡིན་པ་ལྟར།  རྒྱལ་སྤྱིའི་ཐོག་གནས་ཚུལ་དེའི་བརྡ་ལན་འཕྲོད་པའི་ཐོག་ནས་ནམ་ཞིག་བོད་ལ་རང་དབང་ཐོབ་སླད་དུ་རྒྱབ་སྐྱོར་གནང་དགོས་གལ་ཡིན་པ་གསུངས་ཡོད།   དེ་བཞིན་ཇཱོན་ཟེར་བའི་སློབ་ཕྲུག་ཅིག་ལ་བོད་པའི་སྤྱི་ཚོགས་ནང་སླེབས་ནས་ཚོར་བ་ཇི་བྱུང་ཐོག་བཅར་འདྲི་ཞུས་པར་ཁོང་གིས་སྔོན་ཆད་བོད་པའི་སྤྱི་ཚོགས་ཀྱི་སྐོར་ལ་ཤེས་རྟོགས་གང་ཡང་མེད་ནའང་། ཐེངས་འདིར་བོད་པའི་སྤྱི་ཚོགས་སུ་བསླེབས་པ་དང་བསྟུན་ནས་བོད་མིའི་སྐྱབས་བཅོལ་གྱི་གནས་སྟངས་དང་བོད་མིའི་སྒྲིག་འཛུགས་ཀྱི་སྐོར་ལ་ཤེས་རྟོགས་བྱུང་བ་མ་ཟད། རྒྱ་ནག་གིས་བོད་ས་བཙན་བཟུང་བྱས་ཟིན་ནའང་བོད་མི་རྣམས་ཀྱིས་འཚེ་མེད་ཞི་བའི་ལམ་ནས་རང་དབང་འཐབ་རྩོད་གནང་བཞིན་པ་དེ་ནི་ཡུལ་གཞན་དུ་མཐོང་དཀོན་པའི་སྣང་ཚུལ་ཞིག་ཆགས་སྐོར་གསུངས་སོང་བ་དང་ཆབས་ཅིག བོད་དོན་བདེན་མཐའ་གསལ་རྒྱུར་དུས་ཡུན་རིང་པོ་འགོར་སྲིད་ཀྱང་བོད་མི་རྣམས་སེམས་ཤུགས་མི་ཆག་པར་ཡིད་ཆེས་བརྟན་པོ་གནང་རོགས་ཞེས་གསུངས་ཡོད།

ཨིན་ཡུལ་གྲོས་ཚོགས་སུ་བོད་ནང་རང་དབང་ཐོག་ཕར་འགྲོ་ཚུར་འོང་གི་འགྲོ་སྐྱོད་ཆོག་པའི་ཁྲིམས་འཆར་ Reciprocal Access to Tibet ཞེས་པ་ཆེད་འདོན་གནང་བ་དང་འབྲེལ། ཁྲིམས་འཆར་དེ་བརྒྱུད་ནས་ཨིན་ཡུལ་གཞུང་གི་ངོས་ནས་རྒྱ་གཞུང་གིས་བོད་ནང་གི་བོད་མིའི་ཐོག་རྒྱུན་མི་ཆད་པར་བརྙས་བཅོས་གཏོང་བཞིན་པའི་བྱ་སྤྱོད་ལ་བཟོད་སྒོམ་མུ་མཐུད་ནས་གནང་གི་མིན་ཞེས་གསུངས་འདུག ཁྲིམས་འཆར་དེ་ཁ་སང་ཕྱི་ཚེས་ ༢༣ ཉིན་ཨིན་ཡུལ་གྱི་གྲོས་ཚོགས་འོག་མའི་ཉིན་རྒྱབ་ཚོགས་དུས་ཐོག་ཨིན་ཡུལ་གཞུང་འཛིན་ཚོགས་པའི་གྲོས་ཚོགས་འཐུས་མི་སྐུ་ཞབས་ Tim Loughton ལགས་ཀྱིས་ཆེད་འདོན་གནང་འདུག་པ་དང་། སྐབས་དེར་ཁོང་གིས་རྒྱ་གཞུང་གིས་བོད་བཙན་བཟུང་བྱས་པ་ནས་བཟུང་ད་བར་བོད་མི་ས་ཡ་གཅིག་ལྷག་ཚེ་སྲོག་ཤོར་བ་དང་བོད་མི་ ༡༥༠ ལྷག་གིས་རྒྱ་གཞུང་ལ་ཞི་རྒོལ་གྱི་རང་ལུས་མེར་བསྲེགས་གནང་བ་དང་། དེ་བཞིན་རྒྱ་གཞུང་གིས་བོད་མཐོ་སྒང་གི་ཁོར་ཡུག་གཏོར་བཤིག་ཚབས་ཆེན་གཏོང་བཞིན་པ་བཅས་ད་ལྟའི་ཆར་བོད་ཀྱི་སྣོད་བཅུད་གཉིས་ཀར་ཛ་དྲག་དང་དང་ཚབས་ཆེའི་གནས་སྟངས་སུ་འགྱུར་བཞིན་ཡོད་ཀྱང་། རྒྱ་གཞུང་གིས་ཕྱིའི་རྒྱལ་ཁབ་ཁག་གི་གཞུང་འབྲེལ་མི་སྣ་དང་གསར་འགོད་པ། རྒྱལ་ཚོགས་ཀྱི་རྟོག་ཞིབ་མི་སྣ་སོགས་རང་དབང་ཐོག་ནས་བོད་ནང་གི་གནས་སྟངས་རྒྱུས་ལོན་དང་རྟོག་ཞིབ་ཆེད་སྐྱོད་རྒྱུར་བཀག་འགོག་བྱེད་བཞིན་ཡོད་པར་འགྲེལ་བརྗོད་གནང་སྟེ་ཨིན་ཡུལ་གཞུང་ནས་བོད་མིའི་གནད་དོན་ཁུལ་སིམ་པོར་བསྡད་རྒྱུ་མེད་ཅེས་གསུངས་པ་དང་འབྲེལ་གྲོས་ཚོགས་སུ་ཁྲིམས་འཆར་དེ་འགོད་འབུལ་ཞུས་འདུག སྐུ་ཞབས་ Tim Loughton ལགས་ཀྱིས་ཁྲིམས་འཆར་དེ་དང་འབྲེལ་ནས་རྒྱ་ནག་གི་གཞུང་འབྲེལ་མི་སྣ་ཁག་ནས་ཁེ་ཕན་བླངས་ཏེ་ནུབ་ཕྱོགས་རྒྱལ་ཁབ་ཁག་ཏུ་རང་དབང་ཐོག་ནས་སྐོར་སྐྱོད་ཀྱིས་རྒྱ་གཞུང་ལྟ་གྲུབ་ཁྱབ་སྤེལ་དང་དྲིལ་བསྒྲགས་སྤེལ་བཞིན་པའི་ལས་དོན་ཁག་མཚམས་འཇོག་ངེས་པར་བྱེད་དགོས་པ་དང་། ལྷག་པར་དུ་ཉེ་སྔོན་ཨ་རིའི་གྲོས་ཚོགས་ངོས་ནས་ཨ་རིའི་མི་སེར་དང་གཞུང་འབྲེལ་མི་སྣ་ཁག་བོད་ནང་རང་དབང་ཐོག་འདྲ་མཉམ་འགྲོ་འོང་བྱ་རྒྱུའི་ཁྲིམས་འཆར་ཞིག་གཏན་འབེབས་གནང་བ་གཞིར་བཟུང་ད་ཆ་ཡོ་རོབ་དང་ཨིན་ཡུལ་གཞུང་གཉིས་ནས་ཨ་རི་ལྟར་གཅིག་མཚུངས་ཀྱི་བཞེངས་ཕྱོགས་འཛིན་རྒྱུའི་དུས་ལ་བབ་ཡོད་པ་དང་། ཁྲིམས་འཆར་དེ་བརྒྱུད་ནས་རྒྱ་ནག་གཞུང་ལ་ཨིན་ཡུལ་གཞུང་གི་ངོས་ནས་རྒྱ་གཞུང་གིས་བོད་ནང་གི་བོད་མིའི་ཐོག་རྒྱུན་མི་ཆད་པར་བརྙས་བཅོས་གཏོང་བཞིན་པའི་བྱ་སྤྱོད་དེར་སྣང་མེད་དང་བཟོད་སྒོམ་མུ་མཐུད་ནས་གནང་རྒྱུ་མེད་ཅེས་རྒྱ་གཞུང་ལ་གསལ་འདོན་བྱ་རྒྱུ་ཡིན་པ་གསུངས་འདུག སྐུ་ཞབས་ Tim Loughton ལགས་ཀྱིས་ད་རེས་ཁྲིམས་འཆར་དེ་དང་འབྲེལ་ནས་ཨིན་ཡུལ་ཕྱི་སྲིད་ལས་ཁུངས་ནས་ལོ་གཅིག་ནང་ཚུད་ལ་ཨིན་ཡུལ་གྱི་གཞུང་འབྲེལ་མི་སྣ་དང་གསར་འགོད་པ། ཡུལ་འཁོར་སྤྲོ་འཆམ་པ་བཅས་བོད་དང་རྒྱ་ནག་གི་མངའ་ཁུལ་ཁག་ཏུ་འགྲོ་འོང་ག་ཚོད་ཙམ་གང་ཐུབ་པའི་གྲངས་ཐོ་ཁག་མཚུངས་བསྡུར་གྱིས་ལོ་འཁོར་སྙན་ཐོ་ཞིག་གྲོས་ཚོགས་ནང་འགོད་འབུལ་ཞུ་དགོས་པའི་དགོས་འདུན་ཡང་ཆེད་འདོན་གནང་ཡོད་པ་རེད། ཁ་སང་གྲོས་ཚོགས་འཐུས་མི་སྐུ་འཚབ་ Tim Loughton ལགས་ཀྱིས་ཨིན་ཡུལ་གྲོས་ཚོགས་སུ་ཁྲིམས་འཆར་དེ་འགོད་འབུལ་ཞུས་གྲུབ་རྗེས་སྤྱི་ཚོགས་དྲྭ་ལམ་ཐོག་བརྙན་པར་ལམ་ནས་ཁྲིམས་འཆར་དེ་དང་འབྲེལ། རྒྱ་གཞུང་གི་ངོས་ནས་བོད་དེ་ཕྱི་ལ་སྒོ་མོ་ཕྱེས་ནས་བོད་ནང་གི་དངོས་ཡོད་གནས་བབ་ལ་རྟོག་ཞིབ་གནང་འཇུག་དགོས་པ་དང་། དེ་བཞིན་རྒྱ་ནག་གཞུང་གིས་བོད་ནང་བོད་མི་དང་འཛམ་གླིང་ཁྱོན་ཡོངས་སུ་ཡོད་པའི་བོད་མིའི་ཐོག་དྲང་བདེན་མ་བྱེད་ཚེ་དེ་འབྲེལ་རྒྱ་ནག་གཞུང་གི་འགན་ཡོད་མི་སྣ་ཁག་ཨིན་ཡུལ་དུའང་ཡོང་རྒྱུའི་རེ་བ་དུས་ནམ་ཡང་མ་བྱེད་ཅེས་གསུངས་འདུག རླུང་འཕྲིན་ཁང་གིས་ཁྲིམས་འཆར་དེ་དང་འབྲེལ་ནས་ཨིན་ཡུལ་སྐུ་ཚབ་དོན་གཅོད་ཀྱི་འབྲེལ་ཡོད་ལས་བྱེད་བསྟན་འཛིན་ཀུན་དགའ་ལགས་སུ་བཅར་འདྲི་ཞུས་པར་ཁྲིམས་འཆར་དེ་ནི་ད་བར་ས་གནས་སུ་ཡོད་པའི་བོད་དོན་རྒྱབ་སྐྱོར་བ་ཚོགས་སྒེར་ཁག་དང་བོད་མི་སོགས་ནས་ལོ་མང་རིང་ནས་ཞུ་འབོད་རིམ་པ་ཞུས་པའི་གྲུབ་འབྲས་ཤིག་ཡིན་པ་མ་ཟད། རིང་མིན་ཁྲིམས་འཆར་དེ་གྲོས་ཚོགས་སུ་བགྲོ་གླེང་བརྒྱུད་ནས་གཏན་འབེབས་གནང་རྒྱུའི་ལས་རིམ་ཡོད་པ་དེ་ལྟར་ཡང་། ད་རེས་ཨིན་ཡུལ་གྱི་གནད་འགགས་ཆེ་བའི་གྲོས་ཚོགས་ཀྱི་དུས་ཚོད་དེ་ལྟ་བུའི་ཐོག་བོད་ནང་གི་གནད་དོན་དང་ཁྲིམས་འཆར་དེ་ཆེད་འདོན་གནང་བ་ནི་རྒྱལ་ཁ་ཆེན་པོ་ཞིག་ལ་ངོས་འཛིན་ཞུ་མ་ཆོག་ཡོད་མ་རེད་ཅེས་གསུངས་སོང་།

ཉེ་ལམ་རྒྱལ་སྤྱིའི་གསར་ལམ་ཁག་ཏུ་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་གནས་ཚུལ་ཁག་གཅིག་ཐོན་བཞིན་པ་ལྟར་དེ་རིང་ DNA གསར་ཁང་གིས་རྒྱལ་ཁབ་ཁག་གི་ཆབ་སྲིད་དང་རིག་གཞུང་ཐོག་བཤད་པ་དང་དཔྱད་རྩོམ་སྤེལ་མཁན་སྐུ་ཞབས་ Prasenjit Chowdhury ལགས་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དང་དེར་རྒྱ་དཀར་ནག་གཉིས་ཀྱི་བཞེངས་ཕྱོགས་སོགས་དང་འབྲེལ་བའི་དཔྱད་གཏམ་ཞིག་སྤེལ་འདུག དེའི་ནང་སྐུ་ཞབས་ Prasenjit Chowdhury ལགས་ཀྱིས་ཉེ་ཆར་བོད་རང་སྐྱོང་ལྗོངས་དམར་ཤོག་ཚོགས་པའི་དྲིལ་བསྒྲགས་ཚན་པའི་འགན་འཛིན་གཞོན་པ་ Wang Neng Sheng དང་། པེ་ཅིང་དུ་རྟེན་གཞི་བྱས་པའི་བོད་རིག་པའི་ཞིབ་འཇུག་བསྟི་གནས་ཁང་གི་སྤྱི་ཁྱབ་ Zha Luo ཟེར་བ་གཉིས་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་ནི་རྒྱ་ནག་རྒྱལ་ནང་གི་གནད་དོན་དང་འབྲེལ་བ་ཆགས་ཀྱི་ཡོད་སྟབས། རྒྱ་གར་གཞུང་ལ་ཐེ་བྱུས་གནང་རྒྱུའི་དབང་ཆ་གང་ཡང་མེད་པ་མ་ཟད་གལ་སྲིད་རྒྱ་གར་གཞུང་ནས་བཙན་བྱོལ་བོད་གཞུང་ཟེར་བས་བདམས་པའི་༸སྐུའི་ཡང་སྲིད་ལ་ངོས་འཛིན་ཞུ་ཚེ་རྒྱ་གར་དང་རྒྱ་ནག་དབར་གྱི་ཆབ་སྲིད་གནད་དོན་ལ་དོ་ཕོག་ཤུགས་ཆེར་འགྲོ་ངེས་ཡིན་པའི་ཉེན་བརྡ་བཏང་བ་ལུང་འདྲེན་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་ཨ་རིའི་གྲོས་ཚོགས་ཀྱིས་རྒྱ་ནག་ནས་ངོས་འཛིན་ཞུས་པའི་༸སྐུའི་ཡང་སྲིད་ལ་ངོས་ལེན་མེད་ཅེས་ཡོངས་བསྒྲགས་གནང་བ་ལྟར། རྒྱགར་གཞུང་ནས་རྒྱ་དཀར་ནག་གཉིས་ཀྱི་གནད་དོན་ཐོག་རྒྱ་ནག་ལ་ཆེས་དགའ་དགའ་དང་ཞི་འཇམ་གྱི་རྣམ་འགྱུར་མ་བསྟན་པར་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་བཞེངས་ཕྱོགས་བརྟན་པོ་ཞིག་འཛིན་དགོས་པའི་སྐུལ་མ་གནང་འདུག ཁོང་ནས་དེ་སྔ་ཕྱི་ལོ་ ༡༩༥༤ ལོར་རྒྱ་གར་གྱི་སྲིད་བློན་ནེཧ་རུ་མཆོག་གིས་བོད་དེ་རྒྱ་ནག་གི་ཆ་ཤས་ཡིན་པའི་གྲོས་མཐུན་ལ་མཚན་རྟགས་བསྐྱོན་པ་དང་། ཕྱི་ལོ་ ༢༠༠༣ རྒྱ་ནག་གིས་འབྲས་ལྗོངས་ས་མཚམས་ས་ཁུལ་ཁག་ཅིག་རྒྱ་ནག་གི་ཆ་ཤས་ཡིན་སྐོར་བརྗོད་སྐབས་གནད་དོན་འགྲིག་འཇགས་ཡོངས་ཐབས་སུ་སྲིད་བློན་ Atal Bihari Vajpayee མཆོག་གིས་སླར་བོད་དེ་རྒྱ་ནག་གི་ཤས་ཡིན་སྐོར་གསུངས་པ་དང་། དེ་བཞིན་ད་ལྟའི་རྒྱ་གར་གཞུང་འཛིན་ཚོགས་པའི་ངོས་ནས་གཞུང་འབྲེལ་གནད་ཡོད་མི་སྣ་རྣམས་བོད་མིའི་སྒྲིག་འཛུགས་ཀྱིས་གོ་སྒྲོག་ཞུས་པའི་མཛད་རིམ་ཐོག་མཉམ་ཞུགས་གནང་མི་ཆོག་པའི་བརྡ་ཁྱབ་བཏང་ཡོད་པ་སོགས་ལུང་འདྲེན་གྱིས་རྒྱ་གར་གཞུང་ནས་མུ་མཐུད་འདས་པའི་ལོ་ངོ་བཅུ་ཕྲག་ཁ་ཤས་ནང་གི་གནང་སྟངས་ལྟར་རྒྱ་ནག་ལ་འཇིགས་སྣང་ཁོ་ན་གནང་ནས་བཞུགས་ཚེ་རིམ་པས་རྒྱལ་སྤྱིའི་ཐོག་ནས་རྒྱ་གར་ལ་གཟིགས་ཕྱོགས་མི་ལེགས་པ་ཞིག་ཡོང་ངེས་ཡིན་པ་གསུངས་འདུག ལྷག་དུ་སྐུ་ཞབས་ Prasenjit Chowdhury ལགས་ནས་རྒྱ་གར་གཞུང་ནས་རྒྱ་ནག་གི་འདོད་མོས་ལྟར་འདས་པའི་ལོ་ངོ་དེ་དག་ཁྲོད་དུ་བོད་འདི་རྒྱ་ནག་གི་ཆ་ཤས་རེད་ཅེས་བརྗོད་པ་བཞིན་ཡོད་ཀྱང་། རྒྱ་དཀར་ནག་དབར་གྱི་ས་མཚམས་གནད་དོན་དེ་ནི་ད་ལྟའང་ཀྱ་གེ་ཀྱོག་གེ་ངང་གནས་ཡོད་པར་འགྲེལ་བརྗོད་དང་འབྲེལ་ཏེ་རྒྱ་གར་གཞུང་ནས་འདས་པའི་ལོ་ངོ་བཅུ་ཕྲག་ཁ་ཤས་གོང་ནས་བོད་ཐོག་འཛིན་པའི་སྲིད་བྱུས་ལ་གྲུབ་འབྲས་ཐོན་ཡོད་མེད་ལ་དཔྱད་ཞིབ་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལ་རྒྱ་ནག་ལ་རྒྱབ་སྐྱོར་གནང་ཚེ་དེ་སྔ་རྒྱ་གར་གྱིས་བོད་ཐོག་ནོར་འཁྲུལ་བཟོས་ཟིན་པའི་སྲིད་བྱུས་ཐོག་ཁ་སྣོན་ཆགས་རྒྱུ་ཡིན་པ་དང་། རྒྱ་ནག་གཞུང་ནས་ཀྱང་༸སྐུའི་ཡང་སྲིད་ཀྱི་གནད་དོན་དེ་རྒྱ་དཀར་ནག་དབར་གྱི་ས་མཚམས་གནད་དོན་དང་འབྲེལ་བ་བཏགས་ཚེ་དེས་རྒྱ་ནག་གཞུང་ནས་རྒྱ་གར་གཞུང་ལ་ཡིད་ཆེས་མེད་པའི་རྣམ་པ་ཞིག་མཚོན་གྱི་རེད་ཅེས་ནན་པོ་གསུངས་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ཕྱི་ཟླ་ ༣ ཚེས་ ༡༨ ཉིན་ Reuters  གསར་ཁང་གི་བཅར་འདྲིར་བཀའ་ལན་མཛད་སྐབས་མ་འོངས་པར་༸སྐུའི་ཡང་སྲིད་དེ་རང་དབང་གི་རྒྱལ་ཁབ་ནས་གཅིག་དང་རྒྱ་ནག་སྲིད་གཞུང་གིས་ངོས་འཛིན་བྱས་པའི་གཅིག་བཅས་གཏན་འབེབས་བྱུང་ཚེ། མི་མང་གི་ངོས་ནས་རྒྱ་ནག་གིས་བདམས་པའི་ཡང་སྲིད་དེར་གུས་བརྩི་ཞུ་ཐབས་མེད་སྟབས་རྒྱ་ནག་ལ་དཀའ་ངལ་འཕར་མ་ཞིག་ཆགས་ངེས་ཡིན་པར་བཀའ་ནན་བསྩལ་བ་དང་ཆབས་ཅིག མགོན་པོ་༸གང་ཉིད་མཆོག་རྒྱ་གར་དུ་མི་ལོ་དྲུག་ཅུ་ལྷག་གི་རིང་བཞུགས་ཞག་མཛད་བཞིན་ཡོད་སྟབས་༸སྐུའི་ཡང་སྲིད་དེ་རྒྱ་གར་རང་དབང་ལུང་པའི་ནང་ལ་འཁྲུངས་སྲིད་སྐོར་བཀའ་བསྩལ་ཡོད་པ་རེད། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་ནས་༸སྐུའི་ཡང་སྲིད་ཀྱི་གནད་དོན་དང་འབྲེལ་ཏེ་དེ་སྔ་ཕྱི་ལོ་ ༢༠༡༡ ལོར་ཚོགས་པའི་ཆོས་ཚོགས་ཐེངས་ ༡༡ པའི་ཐོག་མགོན་པོ་༸གང་ཉིད་མཆོག་གི་ཡང་སྲིད་དེ་༸རྒྱལ་མཆོག་༸རྗེ་དགེ་འདུན་གྲུབ་པའི་དགུང་གྲངས་ཙམ་དུ་ཕེབས་སྐབས་ཆོས་བརྒྱུད་ཁག་གི་བླ་ཆེན་རྣམ་པ་དང་། བོད་མི་གཙོས་པའི་དད་ལྡན་མང་ཚོགས་རྣམས་ལ་གོ་བསྡུར་གྱིས་༸རྒྱལ་དབང་༸སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་གནང་རྒྱུ་ཡིན་པ་མ་ཟད། གལ་སྲིད་༸སྐུ་ཕྲེང་བཅོ་ལྔ་པའི་ཡང་སྲིད་དགོས་གལ་དུ་གཟིགས་ཚེ་དེའི་གནང་སྒོའི་འགན་དབང་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་གི་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་ལས་གཞན་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་ཚོས་མཚོན་པའི་སྲིད་དབང་འཛིན་པ་སུ་ཞིག་ལའང་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༸རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་ཞུ་མི་དགོས་པ་བཅས་ཀྱི་བཀའ་སློབ་ནན་པོ་ཕེབས་ཡོད་པ་རེད།